ខេត្តសៀមរាប – Page 156

ខេត្តសៀមរាប៖”គ្រប់គ្នាអាចធ្វើជាសហគ្រិនបាន ប្រសិនបើ ប្រកាន់ភ្ជាប់នូវការរៀន គ្រប់ពេលវេលា

# រៀនពីបទពិសោធន៍អតីតកាល

# រៀន ធ្វើពេលបច្ចុប្បន្នច្រើនជាងការនិយាយ

# ធ្វើឲ្យបានច្រើន លើសពីការទទួលបាន

# និងវាយតំលៃប្រមាណមើលនៅពេលខាងមុខ

ជាពិសេសនោះ ហ៊ានធ្វើការសម្រេចចិត្តជាបន្តបន្ទាប់”

រឿងនោះគឺសាមញ្ញទេ សម្រាប់យើង ដែលត្រូវ លើកយកមកធ្វើការពិចារណា ” ប្រសិនបើអ្នករៀន អ្នកនឹងយល់ , ប្រសិនបើអ្នកបានយល់ អ្នកធ្វើការសម្រេចចិត្តបានត្រឹមត្រូវច្រើន”

សម្រាប់មិត្តអ្នកអាន: នៅក្នុងអត្ថបទនេះ លោកអ្នកនឹងទទួលបានគន្លឹះក្នុងការគិតពិចារណាអំពីការបង្កើតអាជីវកម្មនិងការដឹកនាំ ប្រកបដោយតម្លាភាពខ្ពស់ ឬក៏ជាចំណេះដឹងសម្រាប់ធ្វើការកែប្រែ ដើម្បីឲ្យជាប្រយោជន៍សម្រាប់ខ្លួនអ្នក គ្រួសារអ្នក និងមនុស្សជុំវិញខ្លួនរបស់អ្នក ព្រមទាំង សហគមន៍របស់អ្នក។

ដំណឹងល្អនោះគឺថា: អ្នកណាក៏អាចរៀនបាន អំពីការងាររបស់ខ្លួន អំពីអតីតកាលរបស់ខ្លួន នឹងពេលបច្ចុប្បន្ន តើ អ្នក នឹងធ្វើដំណើរទៅទីណាក្នុងពេលអនាគត។

ពីព្រោះជីវិតរបស់យើង តែងតែសំណូមពរឬក៏ដាក់សំណើរមកយើងថា: សូមអោយមានភាពប្រសើរឡើង ជាបន្តបន្ទាប់ ។

ជាការពិតណាស់ភាពប្រសើរឡើង ភាពអស្ចារ្យ ត្រូវទាមទារឲ្យយើងធ្វើការអភិវឌ្ឍន៍ខ្លួន រៀនពីកំហុស និងការតាំងចិត្តមុតមាំ ពោលគឺអ្នកត្រូវហ៊ានធ្វើការសម្រេចចិត្ត ដើម្បី ឱ្យយើងកែលម្អ អ្វីដែលកំពុងមានក្នុងដៃ ពីព្រោះកាលដែល ” មិនសម្រេចចិត្ត ” គឺជាកំហុសដ៏ធំបំផុត ដែលនាំឲ្យអ្នកមានការឈឺចាប់នៅថ្ងៃក្រោយ។

“ពាក្យថា # ការរង់ចាំ នឹងធ្វើអោយអ្នកឈឺចាប់ , ពាក្យថា # មិនដឹងត្រូវធ្វើអ្វីសម្រាប់ជីវិត នឹងធ្វើអោយអ្នកឈឺចាប់ , # ការរក្សានូវទម្លាប់ចាស់ៗ នឹង ធ្វើអោយអ្នកឈឺចាប់ “។

ប៉ុន្តែដំណឹងល្អនោះគឺថា : ប្រសិនបើអ្នករៀន ជីវិតរបស់អ្នកពោរពេញដោយ ការចាប់អារម្មណ៍ ថ្ងៃល្អៗ នឹងកើតឡើងចំពោះអ្នកជារៀងរាល់ថ្ងៃ។

នៅក្នុងចំណុចនេះខ្ញុំសូមអោយលោកអ្នកក្រឡេកមើលពីអតីតកាល ប្រហែលជា កើតឡើងចំពោះលោកអ្នក ដោយសារការភ័យខ្លាច ជាមួយការបាត់បង់ ឬការ លំបាកជាងនេះដែលជាកត្តា ធ្វើឱ្យអ្នកនៅមួយកន្លែង ដូចជាមនុស្សស្លាប់។

សូមអ្នកគិតមើល ” តើរយៈពេល៥ ឆ្នាំកន្លងផុតទៅ អ្នកបានបំពេញ ហើយបានសម្រេចអ្វីខ្លះ ?

ប្រសិនបើអ្នកមិនបានរៀននិង មិនបានកែប្រែក្នុងពេលបច្ចុប្បន្ននេះ តើ៥ឆ្នាំ ទៅមុខទៀតតើអ្នកនឹងបានទទួលផលអ្វីខ្លះ? ”

ពិតណាស់ប្រសិនបើអ្នកមិនបានរៀននឹងមិនមានផែនការ កែប្រែទម្លាប់និងវិន័យសម្រាប់ពេលខាងមុខទេ អ្នកមិនអាចទទួលបានលទ្ធផលដដែលបានទេ ឬអាចនិយាយបានថា លទ្ធផលស្មើនឹងសូន្យ នៅពេល៥ឆ្នាំទៅមុខទៀត។

ទាំងអស់នេះ គ្រាន់តែជាអត្ថបទដើម្បី ចូលរួម ជម្រុញលោកអ្នក ឲ្យគិត ឲ្យផ្ដោតលើកិច្ចការដែលត្រូវបំពេញ សម្រាប់ពេលអនាគត ៕

និពន្ធដោយលោក:សឿន តុលា ស្ថាបនិកក្រុមហ៊ុន ផា ផា យ៉ា

PAPAYA NEXT STEP CO,.LTD

* PAPAYA REAL ESTATE

( គម្រោងអភិវឌ្ឍន៍អចលនទ្រព្យ)

* PAPAYA HOMESTAY

( គម្រោងលើវិស័យទេសចរណ៍)

* PAPAYA GARDEN

( គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានជួបសំណេះសំណាល និងនាំយកអំណោយមនុស្សធម៌ ជូនលោកគ្រូ អ្នកគ្រូ និងប្អូនៗកំព្រា និងកុមារគថ្លង់ចំនួន ២៦៥នាក់។

ពិធីនេះនៅរសៀលថ្ងៃសៅរ៍ ទី ១៣ ខែកុម្ភៈ ម្សិលមិញ នៅវិទ្យាស្ថានអប់រំពិសេស ខេត្តសៀមរាប មកពីមជ្ឈមណ្ឌលកុមារកំព្រា ខេត្តសៀមរាប និង វិទ្យាស្ថានអប់រំពិសេស ខេត្តសៀមរាប។

មានប្រសាសន៍សំណេះសំណាលជាមួយលោកគ្រូ អ្នកគ្រូ និងប្អូនៗកុមារគថ្លង់ សម្ដេចកិត្តិព្រឹទ្ធបណ្ឌិតប្រធានបានសួរសុខទុក្ខ អំពីស្ថានភាពរស់នៅ និងការរៀនសូត្ររបស់ក្មួយៗ ដែលរស់នៅក្នុងមជ្ឈមណ្ឌលកុមារកំព្រា។

សម្ដេចប្រធាន ក៏បានក្រើនរំឮកដល់ក្មួយៗ ត្រូវខិតខំប្រឹងប្រែងរៀនសូត្រ ត្រងត្រាប់ ស្ដាប់ដំបូន្មាន របស់លោកគ្រូ អ្នកគ្រូ ដើម្បីជាសិស្សល្អ កូនល្អ។
សម្ដេចប្រធាន ក៏សូមឱ្យលោកគ្រូ អ្នកគ្រូ និងក្មួយៗទាំងអស់ ត្រូវអនុវត្ដឱ្យបានខ្ជាប់ខ្ជួននូវវិធាន របស់ក្រួសួងសុខាភិបាល ក្នុងការការពារ ជំងឺកូវីដ-១៩ ព្រោះថាជំងឺនេះឆ្លងមិនរើសមុខទេ មិនថា កុមារកំព្រា កុមារគថ្លង់ ឬអ្នកណាឡើយ ហេតុនេះហើយ យើងត្រូវរួមគ្នាប្រយុទ្ធប្រឆាំង កុំឱ្យវាឆ្លងចូល ដល់សហគមន៍ឱ្យសោះ។

អំណោយមនុស្សធម៌ ដែលបានផ្ដល់ជូនមាន៖

១.សម្រាប់វិទ្យាស្ថានអប់រំពិសេស ខេត្តសៀមរាប៖ អង្ករ២តោន មី៤កេសធំ ត្រីខ១០កេសតូច ទឹកក្រូច២០កេស ទឹកបរិសុទ្ធ២០យួរ ផ្លែទំពាំងបាយជូ១២កេស ផ្លែសារី៥កេស ផ្លែប៉ោម២កេស ផ្លែខ្វិច៧កេស ផ្លែក្រូចលឿង២កេស ផ្លែស្រកានាគ២កេស ផ្លែមៀន១កញ្ច្រែង នំអេសប៊ី៩៥កញ្ចប់ នំដាយនូស័រ១៨០កញ្ចប់ នំធុង៨ធុង ស្ករគ្រាប់១៥កញ្ចប់ធំ។

២.សម្រាប់មជ្ឈមណ្ឌលកុមារកំព្រា ខេត្តសៀមរាប៖ អង្ករ១តោន មី២កេសធំ ត្រីខ៥កេសតូច ទឹកក្រូច១០កេស ទឹកបរិសុទ្ធ១០យួរ ផ្លែទំពាំងបាយជូ៦កេស ផ្លែសារី២កេស ផ្លែប៉ោម១កេស ផ្លែក្រូចខ្វិច៤កេស ផ្លែក្រូចលឿង២កេស ផ្លែមៀន១កញ្ច្រែង នំអេសប៊ី៩៥កញ្ចប់ នំដាយនូស័រ១៨០កញ្ចប់ នំធុង៧ធុង ស្ករគ្រាប់១៥កញ្ចប់ធំ។

៣.លោកគ្រូ អ្នកគ្រូ ចំនួន៤៥នាក់ ម្នាក់ៗទទួលបាន៖ ក្រណាត់ស១ដុំ និងវថិកា ១សែន២ម៉ឺនរៀល។
៤. កុមារកំព្រា និងកុមារគថ្លង់ ចំនួន ២២០នាក់ ម្នាក់ទទួលបាន៖ ក្រណាត់សដុំ និងថវិកា៣ម៉ឺនរៀល។

សម្ដេចកិត្តិព្រឹទ្ធបណ្ឌិត ក៏បានឧបត្ថម្ភថវិកា ចំនួន ៥ពាន់ដុល្លារ ដើម្បីរៀបចំម្ហូបអាហារ សម្រាប់ក្មួយៗ កុមារ ជួបជុំគ្នាផងដែរ៕SRP

Sponsored

ខេត្តសៀមរាប៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា កាលពីរសៀលថ្ងៃទី១២ ខែកុម្ភៈ ឆ្នាំ២០២១នេះ បានបន្តអញ្ជើញធ្វើពិធីបួងសួងនៅទីសក្ការៈចំនួន៣កន្លែងបន្ថែមទៀតនៅក្នុងបរិវេណប្រាសាទអង្គរវត្តជាសម្បត្តិបេតិកភណ្ឌអច្ឆរិយលើលោក។

ពិធីបួងសួងនោះបានប្រព្រឹត្តទៅតាមប្រពៃណីសាសនា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានថ្វាយនូវផ្កាភ្ញីគ្រឿងសក្ការៈ និងបំពាក់ហង់ស័កថ្វាយបដិមាតំណាងទេវរូបទាំង៣ព្រះអង្គ ដែលក្នុងនោះរួមមាន៖
ទេវរូបលោកតារាជ្យ ដែលមានទីតាំងខ្លោងទ្វារខាងលិច ផ្លូវចូលអង្គរវត្ត ទេវរូបលោកតាពេជ្រ មានទីតាំងស្ថិនៅខ្លោងទ្វារខាងត្បូងផ្លូវចូលប្រាសាទអង្គរវត្ត និងទេវរូបព្រះអង្គរយពាន់ ដែលស្ថិតនៅប្រាសាទជាន់កណ្តាលប្រាសាទអង្គរវត្ត។

នៅក្នុងពិធីបួងសួងដ៏មានអត្ថន័យនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានបួងសួងដល់ដួងព្រលឹងរបស់បុព្វបុរសខ្មែរគ្រប់ជំនាន់ ក្នុងសម័យកាលអាណាចក្រអង្គរដ៏រុងរឿង និងគ្រប់បារមីនៃវត្ថុស័កសិទ្ធក្នុងលោក ដែលថែរក្សាទីក្រុងអង្គរទាំងមូល សូមជួយប្រោះព្រំទឹកអម្រិត និងប្រោសព្រះរាជទានពរជ័យសិរីមង្គលគ្រប់ប្រការ ថ្វាយព្រះករុណា ជាអម្ចាស់ជីវិតលើត្បូងព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះ មហាក្សត្រី ព្រះវររាជមាតាជាតិខ្មែរ ក្នុងសិរីភាព សេចក្តីថ្លៃថ្នូរ និងសុភមង្គល ជាទីសក្ការៈដ៏ខ្ពង់ខ្ពស់បំផុត សូមព្រះអង្គទាំងទ្វេមានព្រះរាជសុខភាពបរិបូណ៌ ព្រះជន្មាយុយឺនយូរ ជាងរយព្រះវស្សា ដើម្បីគង់ជាម្លប់ដ៏ត្រជាក់ត្រជុំដល់ប្រជារាស្រ្តទូទាំងប្រទេសកម្ពុជា ឱ្យបានយូរអង្វែង និងសូមបួងសួងសូមឱ្យព្រះរាជាណាចក្រកម្ពុជា ចៀសផុតពីគ្រោះភ័យដោយយថាហេតុនានា ជាពិសេសជំងឺឆ្លងកូវីដ-១៩ ដែលកំពុងរាតត្បាតនៅទូទាំងពិភពលោកឱ្យរលាយសាបសូន្យបាត់ពីភពផែនដីយើងនេះទៅ៕SRP

ខេត្តសៀមរាប៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញធ្វើពិធីបួងសួង នៅទីសក្ការៈព្រះអង្គចេកព្រះអង្គចម ដើម្បីសុំសេចក្តីសុខសម្រាប់ថ្នាក់ដឹកនាំ និងប្រជាពលរដ្ឋទូទាំងប្រទេសកម្ពុជា នៅក្នុងទីក្រុងសៀមរាប ខេត្តសៀមរាប ទឹកដីអរិយធម៌ ពិធីបួងសួងនោះបានប្រព្រឹត្តទៅតាមប្រពៃណីសាសនា។
បន្ទាប់ពីពិធីបួងសួងនៅព្រះអង្គចេកព្រះអង្គចម សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានធ្វើទានចំពោះចាស់ព្រឹទ្ធាចារ្យ ដែលជាអ្នកថែរក្សាទីសក្ការៈព្រះអង្គចេកព្រះអង្គចមផងដែរ ពិធីបួងសួង និងការធ្វើទានក្នុងពេលនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានឧទ្ទិសជូនដួងវិញ្ញាណក្ខន្ធបុព្វការីជនញាតិទាំង៧សន្តាន សូមដួងវិញ្ញាណក្ខន្ធអ្នកមានគុណទាំងអស់នោះបានទៅកាន់សុគតិភព និងនៅក្នុងឋានបរមសុខជានិច្ចនិរន្តតរៀងទៅ។

សូមជម្រាបថា ពិធីនេះធ្វើនៅថ្ងៃទី១២ ខែកុម្ភៈ ឆ្នាំ២០២១ ព្រឹកមិញ៕SRP

ខេត្តសៀមរាប៖បុរសពីរនាក់ បានស្លាប់ដោយ
សារគ្រោះថ្នាក់ចរាចរណ៍ បង្កឡើងដោយខ្លួនឯង។

ហេតុការណ៍បានកើតឡើង នៅវេលាម៉ោង១២និង១០នាទី យប់រំលងអាធ្រាត ឈានចូលថ្ងៃទី១៣ ខែកុម្ភៈ ឆ្នាំ២០២១ នៅចំណុចផ្លូវគ្រួសក្រហម ស្ថិតក្នុងភូមិជ្រាវ សង្កាត់ជ្រាវ ក្រុងសៀមរាប ខេត្តសៀមរាប។

សមត្ថកិច្ចបានឲ្យដឹងថាជនរងគ្រោះទី ១ឈ្មោះចោម ចាន់នី អាយុ២៧ឆ្នាំ មុខរបរ ជាងជួសជុលរថយន្ដ រស់នៅភូមិតាចេក សង្កាត់ជ្រាវ ក្រុងសៀមរាប ខេត្ដសៀមរាប (ស្លាប់តាមផ្លូវមុនពេលបញ្ជូន ទៅដល់មន្ទីរពេទ្យខេត្តបាត់ដំបង)
ជាអ្នកបើកបរម៉ូតូ ម៉ាកសង់ សេ១២៥ ស៊េរីឆ្នាំ២០១៤ ពណ៌ខ្មៅ ពាក់ស្លាកលេខ សៀមរាប ១P៥៥០៥។ ទី២ ឈ្មោះសី សក្ករ៉ា អាយុ២៨ឆ្នាំ មុខរបរ នៅផ្ទះ រស់នៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ជាអ្នករួមដំណើរ ស្លាប់ភ្លាមៗ។

សមត្ថកិច្ចបានដាក់សន្និដ្ឋានថា នៅមុនពេលកើតហេតុ ជនរងគ្រោះ បានចូលរួមកម្មវិធីខួបកំណើត លុះពេលត្រឡប់ចេញមកវិញ បើកម៉ូតូល្បឿនលឿន ក៏ដួលតែម្ដង។

បច្ចុប្បន្ន ជនរងគ្រោះទាំង២នាក់ ត្រូវបានក្រុមគ្រួសារ ដឹកយកទៅធ្វើបុណ្យតាមប្រពៃណីរៀងៗខ្លួន។ ចំណែក ម៉ូតូសមត្ថកិច្ចយកទៅរក្សាទុក នៅប៉ុស្តិ៍នគរបាលសង្កាត់ជ្រាវ៕SRP

Sponsored

ខេត្តសៀមរាប៖យើងទាំងអស់គ្នា ប្រហែលជាធ្លាប់បានឮពាក្យចាស់ដែលបានពោលថា ” ប្រសិនបើយើងសែបគប់បណ្ឌិត យើងនឹងក្លាយជាបណ្ឌិត ប្រសិនបើយើងសែបគប់ ជាមួយពាល បើយើងមិនក្លាយជាជនពាល ប្រហែលជាអ្នកគាំទ្រអំពើរបស់ពាល ” ហេតុដូច្នេះហើយទើបយើងឃើញ ភាគច្រើនបំផុត ក្នុងលោកយើងនេះ អ្នកមានរាប់អានអ្នកមាន រីឯ អ្នកក្រ រាប់អានអ្នកក្រ ពីព្រោះពួកគេ ងាយស្រួលនិយាយចូលគ្នា ជាមួយនឹងគំនិតប្រហាក់ប្រហែលគ្នា ឬក៏យើងអាចនិយាយបានថា “ ផ្ទះរស់នៅក្នុងតំបន់់ប្លុកអ្នកមាន ឬផ្ទះរស់នៅ ក្នុងតំបន់ប្លុកអ្នកក្រ។

ចំណុចដែលត្រូវលើកយកមកពិចារណា ទៅលើអត្ថបទនេះ គឺចង់ឱ្យមិត្តអ្នកអាន ងាកមកគិតអំពីខ្លួនឯងផ្ទាល់វិញ អំពីឥទ្ធិពល នៃបរិស្ថានជុំវិញខ្លួន ឥទ្ធិពល នៃទំនាក់ទំនង ជាមួយនិងមនុស្សដទៃទៀត ព្រមទាំង បរិស្ថានរស់នៅផ្ទាល់ខ្លួន ដោយមានសំណួរខ្លះថាតើ :
1: អ្នកនឹងក្លាយជាអ្វីនៅពេលអនាគត? ហើយបរិស្ថានជុំវិញខ្លួន របស់អ្នក និងការរៀបចំខ្លួនរបស់អ្នក ជួយគាំទ្រអ្នកដែរឬទេ?

2: សកម្មភាពបច្ចុប្បន្ន និងទម្លាប់បច្ចុប្បន្ន ឆ្ពោះទៅអ្វីមួយសំរាប់អនាគតដែរឬទេ?

៣: តើអ្នកអាចកត់សម្គាល់ សកម្មភាពនិងឫកពា មួយ ណាជាពាល ហើយ និងឫកពា មួយ ណាជាបណ្ឌិត បានដែរឬទេ?

3 : តើអ្នកអាចកត់សម្គាល់អំពីសកម្មភាព និង ការងាររបស់អ្នក ស្ថិតនៅទីកន្លែងណាមកដល់បច្ចុប្បន្ននេះ?

ជាទូទៅ មនុស្សនៅក្នុងលោកយើងនេះ តែងតែមានភាពច្របូកច្របល់ នៅក្នុងចិត្តគំនិត ហើយបរាជ័យ មិនបានអភិវឌ្ឍខ្លួន ដើម្បីឲ្យបានសម្រេច នូវអ្វីដែលយើងចង់បាននោះទេ មានមនុស្ស មិនច្រើនគ្នាឡើយ ដែលបានដាក់ផែនការចំពោះខ្លួនច្បាស់លាស់ សម្រាប់ពេលអនាគត។
ភាគច្រើននៅក្នុងចំណោម ពួកយើង
បាត់ ភាពក្លាហាន និងជំនឿជឿ ជាក់លើខ្លួនឯង
ដោយសារតែមានសំលេង នៅជុំវិញខ្លួន រួមទាំងផ្នត់គំនិតពីមុនមក មិនឲ្យយើងអភិវឌ្ឍខ្លួន មានដូចជា :

1: ស្លឹកឈើជ្រុះមិនឆ្ងាយពីគល់
2: ពូជយើងជាអ្នកក្រ ឬពាក្យថា ធ្វើម្ដេចបើយើងអ្នកក្រ”
3 : អ្នកគ្មានសមត្ថភាពទេ!

តាមពិត : “ភាពមានបាន ស្តុកស្តម្ភ “មិនមែនជាកម្មសិទ្ធិរបស់អ្នកណាឡើយ”។

ទាំងអស់នោះអាស្រ័យលើគំនិតតែប៉ុណ្ណោះ ” ប្រសិនបើអ្នកផ្លាស់ប្ដូរវិធីគិត អ្នកនឹងមានគំនិតថ្មី ដែលធ្វើឲ្យ បរិស្ថានរស់នៅ និងអ្វីៗជុំវិញខ្លួនរបស់អ្នក មានភាពប្រសើរឡើង ជារៀងរាល់ថ្ងៃ”,៕

និពន្ធដោយ លោកសឿន តុលា
ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD
* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
* PAPAYA HOMESTAY
( គម្រោងលើវិស័យទេសចរណ៍)
* PAPAYA GARDEN
( គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖ក្មេងស្រីចំនួន២ នាក់ ត្រូវបានសិស្សអាយុ១៣ឆ្នាំចាប់រំលោភ ប៉ុន្តែជនសង្ស័យ បដិសេធថាមិនបានរំលោភនោះទេ។

យោងតាមរបាយការណ៍របស់សមត្ថកិច្ចបានបង្ហាញថានៅវេលាម៉ោង ១២និង៣០នាទី ១០ខែកុម្ភ: ឆ្នាំ២០២១ ការិយាល័យប្រឆាំងការជួញដូរមនុស្ស បានទទួលបណ្ដឹង ០១ករណី រំលោភសេពសន្ថវះលើអនិតិជន ឡើងកាលថ្ងៃទី០៩ខែ កុម្ភ: ឆ្នាំ២០២១ វេលាម៉ោង ១២និង៣០នាទី នៅចំណុច ផ្ទះជនសង្ស័យ ភូមិវាល សង្កាត់គោកចក ក្រុងសៀមរាប។

របាយការណ៍បានបន្តថា ករណីនេះ ជនរងគ្រោះ ទី១ មាន ឈ្មោះ ន .ស.ល.ក អាយុ ០៧ឆ្នាំ រស់នៅភូមិវាល សង្កាត់គោកចក ក្រុងសៀមរាប។
ទី២មាន ឈ្មោះ រ .ល.ហ្ស. អាយុ០៥ឆ្នាំ ត្រូវជាប្អូនជីដូនមួយ ជាមួយជនរងគ្រោះ ទី១ រស់នៅភូមិវាល សង្កាត់គោកចក ក្រុងសៀមរាប។

របាយការណ៍បានបញ្ជាក់ថា បន្ទាប់ទទួលបណ្ដឹង ការិយាជំនាញ បានប្រគល់ ជនរងគ្រោះ ទាំងពីរអោយទៅ មន្ទីរជំនាញខេត្តសៀមរាប ដើម្បីយកទៅធ្វើកោសល្យវិច័យ នៅមន្ទីរពេទ្យបង្អែក ខេត្តសៀមរាប។ នៅថ្ងៃទី ១១ខែកុម្ភ: ឆ្នាំ២០២១ វេលាម៉ោង ៩ព្រឹក ដោយមានការសម្របសម្រួលពី លោក កើត វណ្ណារ៉េត ព្រះរាជអាជ្ញា អមសាលាដំបូង ខេត្តសៀមរាប កំលាំងជំនាញដឹកនាំដោយលោកវរសេនីយ៍ត្រី អាង សែន នាយការិយាល័យ ចុះដល់កន្លែងកើតហេតុនឹងធ្វើការស្ដាប់ចម្លើយជនសង្ស័យ។

ជនសង្ស័យឈ្មោះ យេត សុខលីម ភេទប្រុស អាយុ ១៣ឆ្នាំ របរសិស្ស បានសារភាពថា ខ្លួនបានត្រឹមតែអោប នឹងបឺតមាត់ ជនរងគ្រោះទាំងពីរនាក់តែប៉ុណ្ណោះ។

ជនសង្ស័យ ត្រូវបានព្រះរាជ អាជ្ញា ប្រគល់អោយអាណាព្យាបាលធ្វើការអប់រំ។ ចំណែកសំណុំរឿងចាត់ការតាមនិតិវីធី បញ្ជូនទៅសាលាដំបូង ខេត្តសៀមរាប៕SRP

Sponsored

ខេត្តសៀមរាប៖មនុស្សចំនួន៣ នាក់ បានរងរបួសធ្ងន់ ខណៈជិះម៉ូតូ២គ្រឿង បុកគ្នា ក្នុងទិសដៅ បញ្រ្ចស់ទិសគ្នា។

ហេតុការណ៍បានកើតឡើង នៅវេលាម៉ោង០៨យប់ ថ្ងៃទី ១១ ខែកុម្ភៈ ឆ្នាំ២០២១ ស្តិតនៅក្នុងភូមិត្រពាំងស្វាយ ឃុំលាងដៃ ស្រុកអង្គរធំ ខេត្តសៀមរាប។

សមត្ថកិច្ចស្រុកអង្គរធំបាន រាយការណ៍ នៅព្រឹកនេះថា ភាគីទី១ម៉ូតូម៉ាក C១៣៥ហុងដា ឆ្នាំ២០១៤ ពណ៌ខ្មៅស្លាកលេខសៀមរាប ១R១២៨៧ ពីជើងទៅត្បូង បើកដោយឈ្មោះ ញឿម ញាក់ ភេទប្រុសអាយុ២២ អ្នកជិះមួយ ឈ្មោះឈ្មោះ ប៉ាវ ប៉ុម ភេទប្រុសអាយុ២១ឆ្នាំ អ្នកទាំងពីរ រស់នៅភូមិពាក់ស្នែង ឃុំពាក់ស្នែង ស្រុកអង្គរធំ ខេត្តសៀមរាប (រងរបួសធ្ងន់ទាំងពីរនាក់)។

ចំណែកភាគីទី២ ម៉ូតូ C១២៥ហុងដា
ឆ្នាំ២០១៥ ពណ៌ខ្មៅ ស្លាកលេខ សៀមរាប ១U៥៣២៨ ទិសដៅពីត្បូងទៅជើង បើកដោយឈ្មោះធូ សាំ ភេទស្រី អាយុ២០ឆ្នាំ នៅភូមិពាក់ស្នែង ឃុំពាក់ស្នែងស្រុកអង្គរធំ ខេត្តសៀមរាប (រងរបួសធ្ងន់)។ ដោយឡែកម៉ូតូទាំង០២គ្រឿង រងការខូចខាត សមត្ថកិច្ច នាំយកទៅរក្សាទុក នៅអធិកាដ្ឋាននគបាលស្រុកអង្គរធំ រងចាំកាដោះស្រាយ។

បើតាមសមត្ថកិច្ចបញ្ជាក់ថាគ្រោះថ្នាក់ចរាចរណ៍នេះ មូលហេតុ អ្នកបើកបរខ្វះការប្រុងប្រយ័ត្នពេលយប់។
ទោះជាយ៉ាងណា ជនរងគ្រោះទាំង៣នាក់ ត្រូវបានគេ បញ្ជួនទៅសង្គ្រោះ នៅមន្ទីរពេទ្យបង្អែកខេត្តសៀមរាប៕SRP

ខេត្តសៀមរាប៖ផ្ទះចំនួន២ខ្នង ត្រូវបានអគ្គីភ័យឆាប់ឆេះ រួមនិងទ្រព្យសម្បត្ដិមួយចំនួន។

ហេតុការណ៍បានកើតឡើងនៅវេលាម៉ោង១៧និង៣០នាទី ថ្ងៃព្រហស្បតិ៍ ថ្ងៃទី១១ ខែកុម្ភៈ ឆ្នាំ២០២១ នេះ នៅចំណុចភូមិអញ្ចាញ សង្កាត់នគរធំ ក្រុងសៀមរាប ខេត្តសៀមរាប។

សមត្ថកិច្ចបានដឹងថា ផ្ទះពលរដ្ឋ ដែលរងការឆេះ
ទាំងស្រុងចំនួន២ខ្នង គឺនៅជាប់គ្នា ក្នុងទីតាំងដីឡូត៍តែមួយ ម្ចាស់តែមួយ ប្រភេទផ្ទះផ្ទាល់ដី ប្រក់ស័ង្កសី ជញ្ជាំងក្ដា ទំហំ៖
-ទី១ ទំហំ ៧x១២ម៉ែត្រ
-ទី២ ទំហំ ៦x១២ម៉ែត្រ។
ម្ចាស់ផ្ទះ ប្ដីមាន ឈ្មោះទេព សំបាន ភេទប្រុស អាយុ៤៦ឆ្នាំ មុខរបរ អាជីវករ ប្រពន្ធឈ្មោះជាតិ សាហៀង ភេទស្រី អាយុ២៣ឆ្នាំ មុខរបរ អាជីវករ។

ករណីនេះបណ្ដាលឲ្យខូចខាត ប្រាក់ដុល្លារចំនួន ៤០០០ដុល្លារអាមេរិច ម៉ូតូចំនួន ៣គ្រឿង រុឺម៉កចំនួន ២គ្រឿង នឹងសម្ភារប្រើប្រាស់ផ្សេងៗក្នុងផ្ទះទាំងស្រុង។

ក្នុងប្រតិបត្តិការ នេះ សមត្ថកិច្ច ជួយពន្លត់ដោយកម្លាំងកងរាជអាវុធហត្ថខេត្ត ក្រុងសៀមរាបចំនួន១៥នាក់ ដឹកនាំដោយលោកវរសេនីយ៍ទោ ប្រាក់ វណ្ណះ មេបញ្ជាការមូលដ្ឋានកងរាជអាវុធហត្ថក្រុងសៀមរាប។

ដោយប្រើប្រាស់រថយន្ដពន្លត់អគ្គីភ័យចំនួន ៧គ្រឿង ប្រើអស់ទឹកចំនួន៤ឡាន ស្មើនឹង១៦០០០លីត្រ។
ក្នុងនោះ រថយន្ដរបស់កងរាជអាវុធហត្ថចំនួន២គ្រឿង ប្រើទឹកអស់១ឡានា្មើ៣០០០លីត្រ។
រថយន្ដរបស់ស្នងការនគរបាល ចំនួន៣គ្រឿង ប្រើទឹកអស់១ឡានស្មើ៦០០០លីត្រ
រថយន្ដរបស់អាជ្ញាធរអប្សរាចំនួន ២គ្រឿង ប្រើទឹកអស់២ឡានស្មើ៧០០០លីត្រ។«មូលហេតុ ទុស្សេខ្សែភ្លើង» ទោះជាយ៉ាងណា ពុំបណ្ដាលឲ្យឆេះរាលដាល ឫរងគ្រោះថ្នាក់ដល់មនុស្ស និងសត្វឡើយ ដោយរលត់វិញទាំងស្រុងនៅវេលាម៉ោង១៨និង៣០នាទី ថ្ងៃដដែល៕SRP

ខេត្តសៀមរាប៖”ប្រសិនបើអ្នកជឿខ្លួនឯងថា អ្នកនឹងរស់នៅក្នុងភាពស្តុកស្តម្ភ ភាពស្ដុកស្ដម្ភនឹងជឿអ្នក” អត្ថន័យខាងលើនោះ សូមដៅឲ្យយើងការជឿទៅលើចំណុចវិជ្ជមាន ដែលខ្លួនយើងចង់បានជាពិសេស ឥទ្ធិពលនៃជំនឿ សម្រាប់់ជីវិតរស់នៅនិងការធ្វើអាជីវកម្ម។

រាល់ការធ្វើអាជីវកម្មទាំងអស់ ដែលទទួលបានភាពជោគជ័យ មិនអាចកើតឡើង ដោយធម្មជាតិ ដោយភាពងាយស្រួល ឬដោយភាពចៃដន្យនោះទេ។

គ្រប់យ៉ាងកើតឡើង ចេញពីភាពក្លាហាន ឬក៏យើងហៅថា”ការប្រថុយដែលមានកម្រិតគ្រប់គ្រងបាន” ចេញពីការសម្រេចចិត្ត ចេញពីភាពប្រឹងប្រែងនិងការរៀនពីកំហុសជាប្រចាំ ពីព្រោះយើងដឹងហើយថា ” សូម្បីតែយើង អង្គុយស្ងៀមមិនធ្វើអ្វីមួយ ក៏មានកំហុសទៅលើហេតុផលអ្វីមួយរួចទៅហើយដែរ”។

ដូច្នេះហើយការកែប្រែកំហុសឲ្យមានប្រសិទ្ធភាព ឱ្យឃើញផ្លែផ្កា រាល់ការងារ ដែលសហគ្រិនជោគជ័យបានធ្វើគឺស្ថិតនៅក្នុងគោលដៅយ៉ាងច្បាស់ ដោយឈរលើខ្សែបន្ទាត់នៃគុណភាព ទំនាក់ទំនង ហើយមិត្តអ្នកអាន សូមចងចាំថា” កម្រិតគុណភាពរបស់សហគ្រិនភាព អាស្រ័យទៅលើ កម្រិតគុណភាព ទំនាក់ទំនង ដែលពួកគេបានធ្វើឡើង”។

សហគ្រិនដែលបានទទួលជោគជ័យជានិរន្តរ៍ ពួកគាត់បានកំណត់ចក្ខុវិស័យ យ៉ាងច្បាស់លាស់ ដើម្បីឲ្យក្លាយជាអ្វីមួយនៅពេលខាងមុខ ហើយពួកគេជឿលើចក្ខុវិស័យរបស់ខ្លួន “ប្រសិនបើអ្នកជឿលើខ្លួនឯង ជោគជ័យនិងចូលរួមជឿលើអ្នក” ពីព្រោះអ្នកជឿលើហេតុផលចេញ ពីក្នុងខ្លួនរបស់អ្នកមក។

ខាងក្រោមនេះ ជាគោលដៅចំបងចម្បង ៥ចំណុច សម្រាប់សហគ្រិនដើម្បីពង្រីកសមត្ថភាពរលើកធុរកិច្ចរបស់ខ្លួន។

១. គិតធំ “ខ្ញុំអាចធ្វើបាន”

“ប្រសិនបើអ្នកគិតថា អាចធ្វើបាន អ្នកនឹងមើលឃើញនូវវិធីជាច្រើនដើម្បីឲ្យសម្រេចបានចំពោះការគិតនោះ”

ការប្រកាន់នៅជំហរថា :គ្មានអ្វីដែលមិនអាចទៅរួចនោះទេ បើអ្នកមិនទាន់ធ្វើវានោះ ពាក្យពេចន៍ទាំងអស់នោះ មានតម្លៃលើសពីអ្វីដែលអ្នកបានគិត ក្នុងកម្រិតដែលអ្នកមានអំឡុងពេលពេលបច្ចុប្បន្ន ប៉ុន្តែអ្នកត្រូវ ចាប់ផ្ដើមធ្វើពីឥឡូវនេះទៅ “ប្រសិនបើអ្នកនៅតែបន្តការប្រៀបធៀបការវាយតម្លៃមកលើខ្លួនឯងអ្នកមិនអាចមានចិត្តក្លាហានគិតធំបានឡើយ ហើយការគិតធំនេះ ធ្វើឲ្យអ្នកមានវិន័យដាច់ខាតចំពោះខ្លួនឯង។

២. ប្រកាន់យកការគិតវិជ្ជមាន:

សហគ្រិនជោគជ័យ មានមូលហេតុដែល ពួកគេជោគជ័យ ពីព្រោះ ពួកគេផ្លាស់ប្ដូរផ្នត់គំនិត អវិជ្ជមាន ទាំងឡាយ នៅក្នុងផ្នត់គំនិតចាស់ៗរបស់ពួកគេដោយបញ្ចូលឬជំនួសមកវិញនៅ នូវផ្នត់គំនិតវិជ្ជមាន។

“ប្រសិនបើអ្នកមានការគិតអវិជ្ជមាន អ្នកនឹងមើលឃើញពីពន្លឺនៃភាពជោគជ័យរចេញពីក្នុងខ្លួនរបស់អ្នក “ដូច្នេះហើយ សូមអ្នក ព្យាយាមកែប្រែគំនិតអវិជ្ជមានចោល ហើយទទួលយកឥរិយាបថល្អៗសម្រាប់ខ្លួនឯងវិញ ” ការ គិតអវិជ្ជមាន គឺជាឧបសគ្គរាំងផ្លូវរបស់អ្នកមិនឲ្យធ្វើដំណើរទៅ ដល់កន្លែងដែលអ្នកចង់ទៅ រីឯការគិតវិជ្ជមាន នឹងពាំនាំរូបអ្នក ទៅដល់ទីកន្លែងតើអ្នកចង់ទៅ ”

៣. គិតអំពី ឈ្នះឈ្នះរួមគ្នា

សហគ្រិនដែលទទួលបានផលធំៗពីព្រោះពួកគេបានគិតធំ ពួកគេតែងតែប្រកាន់យកនូវកិច្ចសហប្រតិបត្តិការ ដែលជាស្នូលធំមួយក្នុងទិសដៅរួម “ឈ្នះឈ្នះទាំងអស់គ្នា “ប្រសិនបើខ្ញុំបានចំណេញ អ្នកក៏បានចំណេញ គឺគ្មានអ្នកណាខាតឡើយ។

ក្រុមហ៊ុនមួយជោគជ័យ នឹងស្ដុកស្ដម្ភទៅបាន មិនមែនអាស្រ័យទៅលើតែ អតិថិជន ក្នុងរយៈពេលខ្លីនោះទេ គឺការគិតឃើញវែងឆ្ងាយ សម្រាប់មនុស្សជំនាន់ក្រោយ ព្រមទាំង ការសហការជាមួយនឹងដៃគូផ្សេងៗ ដើម្បីចូលរួមភាព រីកចម្រើនរយៈពេលយូរ ក្នុងទិសដៅ ឈ្នះរួមគ្នា ” ខ្ញុំឈ្នះ , អ្នកឈ្នះ , យើងឈ្នះ WIN WIN ព្រមទាំង

ការបង្កើតវប្បធម៌ រីករាយ និងការសំរេចចិត្តលឿន របស់បុគ្គលិកគ្រប់ផ្នែកនៅក្នុងស្ថាប័នផងដែរដូច្នេះ ហើយ ការប្រកាន់យកភាពត្រឹមត្រូវ និង ការប្រកាន់យកភាពយុត្តិធម៌ គឺជាអ្វីដែលពួកគេត្រូវធ្វើក្នុងបុព្វហេតុនៃសហប្រតិបត្តិការ។

៤.ក្លាហានសារភាពចំពោះកំហុស

“កំហុសពិតប្រាកដរបស់សហគ្រិនគឺកំហុស ដែលបណ្ដោយអោយមានដដែលៗ “កំហុសវាមិនមែនជារឿងធំដែលធ្វើឱ្យអ្នកបាក់ មុខមាត់ដូចអ្នកបានគិតនោះទេ តាមការពិតកំហុសគឺជាគ្រាប់ពូជ នៃភាពវាងវៃ នៃភាពត្រឹមត្រូវ សម្រាប់ជំហានបន្ទាប់ ប្រសិនបើអ្នកទទួលស្គាល់នូវកំហុសនោះ។

នៅក្នុងលោកយើងនេះគ្មានអ្វីដែលឥតខ្ចោះនោះឡើយសូម្បីតែផ្ទាំងគំនូរដ៏ល្អមួយត្រូវបានឆ្លងកាត់ការប្រើខ្មៅដៃ ដែល ដែលត្រូវលុបច្រើនដងសូមមិត្តអ្នកអានចង់ចាំថា “ខ្មៅដៃដែលល្អ គឺខ្មៅដៃដែលមានជ័រលុប”។

៥. ផ្នត់គំនិតនិងការតាំងចិត្តត្រូវតែរឹងមាំ

“គ្មានផលធំទាំងឡាយណា កើតឡើងចំពោះអ្នកគិត ស្រាលៗ ឬលំៗ ដោយគ្មានការតាំងចិត្ត មុតមាំបានឡើយ”

នៅពេលដែលអ្នកដឹងច្បាស់ថា អ្នកចង់បានអ្វីឲ្យប្រាកដនោះ គ្មានអ្វីដែលជាឧបសគ្គសំរាប់អ្នកទៀតឡើយ ពីព្រោះភាពពិតប្រាកដ បានធ្វើឲ្យអ្នកក្លាហានជាងមុនបានធ្វើឲ្យអ្នកលះបង់ទម្លាប់ដែរអត់ប្រយោជន៍ ដើម្បីធ្វើកិច្ចការចាំបាច់ ៗ ហើយនៅពេលនោះនឹងជួបមនុស្សជាច្រើន ដែលមានជំនាញនិងមានគំនិតជួយដល់អ្នក លើកស្ទួយអ្នកឲ្យទទួលបានជោគជ័យ។

ប៉ុន្តែរឿងទាំងអស់នោះ “ពួកគេត្រូវការដំបូងគឺអ្នកត្រូវមានការតាំងចិត្តមុតមាំ”។

និពន្ធដោយ៖ លោកសឿន តុលា ស្ថាបនិកក្រុមហ៊ុនផាផាយ៉ា PAPAYA NEXT STEP CO,.LTD

*PAPAYA REAL ESTATE «គម្រោងអភិវឌ្ឍន៍អចលនទ្រព្យ»

* PAPAYA HOMESTAY «គម្រោងលើវិស័យទេសចរណ៍»

*PAPAYA GARDEN «គម្រោងលើវិស័យកសិកម្មនិងចែកចាយអាហារ»

Sponsored