ខេត្តសៀមរាប

ខេត្តសៀមរាប៖លោក ទៀ សីហា ប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប នៅថ្ងៃច័ន្ទទី២២ ខែមីនា ឆ្នាំ២០២១ បានចាត់ លោក គុជ លីណា អនុប្រធានគណៈកម្មាធិការសាខា នាំយកអំណោយមនុស្សធម៌ ឧបត្ថម្ភដល់ក្រុមការងារត្រួតពិនិត្យសុខភាពបឋម នៅកំណត់ផ្លូវជាតិលេខ៦ ចំណុចព្រំប្រទល់ស្រុកក្រឡាញ់ខេត្តសៀមរាប និងខេត្តបន្ទាយមានជ័យ ដើម្បីរួមគ្នាទប់ស្កាត់ជំងឺកូវីដ-១៩ ដែលអាចនឹងរាតត្បាតកាន់តែធំឡើងៗបើគ្មានវិធានការទប់ស្កាត់បានទានពេលវេលាទេនោះ។

លោក គុជ លីណា បានលើកឡើងថា ចាប់តាំងពីព្រឹត្តិការណ៍២០កុម្ភៈ បានផ្ទុះឡើង យើងទាំងអស់គ្នាមានការព្រួយបារម្ភជាខ្លាំង អំពីលទ្ធភាព នៃការរីរាលដាលជាបន្តបន្ទាប់ នៅក្នុងសហគមន៍ ហេតុនេះក្នុងនាមជាជំនួយការឱ្យអាជ្ញាធរសាធារណៈ ក្នុងវិស័យមនុស្សធមម៌ សាខាកាកបាទក្រហមកម្ពុជា ខេត្តសៀមរាប បានយកចិត្តទុក្ខជាចម្បង ក្នុងការរួមចំណែកទប់ស្កាត់ការរីករាលដាលជំងឺកូវីដ-១៩នេះ ដោយក្រុមប្រតិបត្តិសាខា បានចុះអប់រំផ្សព្វផ្សាយ ជាហូរហែទាំងនៅក្នុងសហគមន៍ និងនៅតាមគ្រឹះស្ថានសិក្សា ព្រោះដូចយើងទាំងអស់គ្នាបានដឹងហើយថា នេះជាដំណាក់កាលដែលយើងទាំងអស់គ្នាត្រូវប្រុងប្រយ័ត្នខ្ពស់បំផុត ចំពោះជំងឺដ៏កាចសាហាវនេះ។
លោកក៏បានថ្លែងអំណរគុណ និងសូមសរសើរចំពោះមន្ត្រី និងក្រុមការងារប្រចាំការនៅទីនេះ ដែលបានលះបង់អស់កម្លាំងកាយចិត្ត និងពេលវេលាផ្ទាល់ខ្លួន មិនថាយប់ មិនថាថ្ងៃ ខិតខំបំពេញការងារយ៉ាងសកម្ម ដើម្បីទប់ស្កាត់ជំងឺកូវីដ-១៩ កុំឱ្យរីករាលដាលកាន់តែធំឡើង និងដើម្បីឈានទៅគ្រប់គ្រងឱ្យបាននាពេលខាងមុខ។

លោកសូមអំពាវនាវដល់ប្រជាពលរដ្ឋ ទាំងអស់ ពិសេសបងប្អូន ដែលធ្វើដំណើរលើដងផ្លូវជាតិលេខ៦ចូលមកកាន់ខេត្តសៀមរាប ត្រូវគោរពឱ្យបានខ្ជាប់ខ្ជួន នូវវិធានការ ៣ការពារ និង៣កុំ ព្រមទាំង២ចូលរួមបន្ថែមទៀត គឺចូលរួម Scan QR Code និងចូលរួមពិនិត្យកម្ដៅឱ្យបានគ្រប់គ្នា។

លោកបានបន្ថែមថា អំណោយដែលឧបត្ថម្ភនាពេលនេះ ទោះបីមានចំនួនតិចតួចក្ដី តែនេះជាការចូលរួម ក៏ដូចជាការលើកទឹកចិត្តដល់មន្ត្រី និងក្រុមការងារដែលកំពុងបំពេញភារកិច្ចយ៉ាងមមាញឹកនៅទីនេះ ដើម្បីសុខុមាលភាពសាធារណៈក្នុងសហគមន៍យើង។

អំណោយមនុស្សធម៌ដែលបានឧបត្ថម្ភរួមមាន៖ ទឹកបរិសុទ្ធ៥០កេស ទឹកផ្លែឈើ២០កេស ម៉ាស៥០០០ អង្ករ១តោន មី៣០កេស ត្រីខ ២០០កំប៉ុង។ទន្ទឹមនិងនេះមានសម្ភារមួយចំនួនដូចជា ទឹកបរិសុទ្ធ ២០កេស អង្ករ១តោនផ្តល់ជូនមណ្ឌលចត្តាឡីស័ក នៅវិទ្យាល័យក្រឡាញ់ផងដែរ៕SRP

ខេត្តសៀមរាប៖សមត្ថកិច្ចស្រុកប្រាសាទបាគងបានឲ្យដឹងថា បុរសម្នាក់បានដេកស្លាប់នៅកណ្ដាលវាលស្រែ បង្កឱ្យមានការភ្ញាក់ផ្អើល។

ហេតុការណ៍បានកើតឡើងនៅវេលាម៉ោង០៣រសៀល ថ្ងៃទី២២ ខែមីនា ឆ្នាំ២០២១ ស្ថិតនៅភូមិគោកធ្លក ឃុំកណ្តែក ស្រុកប្រាសាទបាគង ពីផ្ទះប្រហែល២០ម៉ែត្រ។

ជនរងគ្រោះ ឈ្មោះប្រាច រ៉ុង អាយុ៣៦រស់នៅភូមិឃុំ ខាងលើ។សមត្ថកិច្ចបានបញ្ជាក់ថាករណីនេះមូលហេតុ បណ្តាយមកពីជនរងគ្រោះ មានជំងឺវង្វេងស្មារតី ផឹកស្រាជាប្រចាំបណ្តាយអោយធ្លាយក្រពះស្លាប់។ ជនរងគ្រោះបានលែងលះជាមួយប្រពន្ឋជាច្រើនឆ្នាំមកហើយ៕SRP

ខេត្តសៀមរាប៖ប្រធានគណបក្សយុវជនកម្ពុជា លោកពេជ្រ ស្រស់ នៅល្ងាចថ្ងៃទី២២ ខែមីនា ឆ្នាំ២០២១នេះ បានសរសេរ សុំទោសអាជ្ញាធរខេត្តសៀមរាប ក្រោយបង្ហោះសារប្រើពាក្យមិនសមរម្យ លើ facebookរបស់ខ្លួន។

យោងតាមគណនីfacebook ផ្លូវការរបស់លោកពេជ្រ ស្រស់ បានឲ្យដឹងថា៖នៅថ្ងៃទី៩ ខែមីនា ឆ្នាំ២០២១ ខ្ញុំបានបង្ហោះសារពាក់ព័ន្ធនឹងករណីប្រជាពលរដ្ឋ ១៩ គ្រួសារ ស្ថិតនៅភូមិធ្លកអណ្តូង សង្កាត់ស្លក្រាម ខេត្តសៀមរាប ដែលប្រើសំណេរលើសលួសដល់អាជ្ញាធរ ដោយប្រើពាក្យថា”កូវីដជាន់កហើយ ត្រូវអាជ្ញាធរជាន់កថែមទៀត” គឺជាសំណេរដែលមានចរិតមិនសមរម្យ ក្នុងន័យនេះ ខ្ញុំសូមធ្វើការសុំទោសដល់អាជ្ញាធរខេត្តសៀមរាប គ្រប់ជាន់ថ្នាក់ និងទុកលទ្ធភាពជូនអាជ្ញាធរអនុវត្តកិច្ចការចំពោះគ្រួសារ១៩គ្រួសារ ហើយប្រតិភូគណបក្សយុវជនកម្ពុជា គឺបញ្ចប់ការសិក្សាលើបញ្ហារបស់ប្រជាពលរដ្ឋ១៩គ្រួសារទៀតហើយ ពីព្រោះគឺជាកិច្ចការរដ្ឋអំណាចអភិវឌ្ឍទីក្រុង។

សូមរំលឹកថាកាលពីថ្ងៃទី១០ ខែមីនាឆ្នាំ២០២១នេះរដ្ឋបាលខេត្តសៀមរាប បានចេញលិខិតមួយទំព័របំភ្លឺជុំវិញហ្វេសប៊ុក ពេជ្រ ស្រស់ បង្ហោះថា ប្រជាពលរដ្ឋ ១៩គ្រួសារ រស់នៅសង្កាត់ស្លក្រាម កើតទុក្ខមិនសុខចិត្តជាមួយអាជ្ញាធរ។
ខាងក្រោមនេះជាលិខិតបំភ្លឺទាំងស្រុងរបស់រដ្ឋបាលខេត្តសៀមរាប៖កាលពីថ្ងៃទី០៩ ខែមីនា ឆ្នាំ២០២១ មានករណីបង្ហោះព័ត៌មានក្នុងបណ្តាញ ទំនាក់ទំនងសង្គម Facebook របស់គណនីឈ្មោះ Pich Sros-ពេជ្រ ស្រស់ បានផ្សព្វផ្សាយនៅក្នុង បណ្តាញសង្គមថា ប្រជាពលរដ្ឋ ១៩គ្រួសារ រស់នៅសង្កាត់ស្លក្រាម កើតទុក្ខមិនសុខចិត្តជាមួយអាជ្ញាធរ ខេត្តសៀមរាប ដែលបណ្តេញពួកគាត់ចេញពីលំនៅដ្ឋានរបស់ពួកគាត់ ដែលពួកគាត់មានចុះបញ្ជីដីធ្វើប្លង់ កម្មសិទ្ធិត្រឹមត្រូវទាំងផ្ទះរបស់ពួកគាត់ ដោយគ្មានប៉ះពាល់គម្រោងអភិវឌ្ឍរបស់រដ្ឋនោះឡើយ។
ពាក់ព័ន្ធនឹងករណីនេះ រដ្ឋបាលខេត្តសៀមរាបសូមបញ្ជាក់ និងជម្រាបជូនសាធារណជន អ្នក សារព័ត៌មានជាតិ និងអន្តរជាតិថា ការលើកឡើងរបស់ម្ចាស់គណនីខាងលើ គឺពុំត្រឹមត្រូវនោះឡើយ ដោយហេតុថាករណីប្រជាពលរដ្ឋ ១៩គ្រួសារនេះ គឺបានទៅរស់នៅ និងសាងសង់សំណង់លំនៅដ្ឋានលើ ដីប្រព័ន្ធការពារដែលជាដីសាធារណៈរបស់រដ្ឋទាំងស្រុង មានទីតាំងស្ថិតនៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។ ទីតាំងដីលំនៅដ្ឋានមិនរៀបរយរបស់ប្រជាពលរដ្ឋ ១៩គ្រួសារខាងលើនេះ គឺស្ថិតនៅក្នុងតំបន់វិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ ហើយក្រុមការងារចុះបញ្ជីដីធ្លី មានលក្ខណៈ ជាប្រព័ន្ធ(LMAP)បានចុះវាស់វែង និងបានចេញបង្កាន់ដៃ ចំពោះអ្នកដែលបានបង្ហាញព្រំដី និងអ្នកដែល បានផ្តល់ទិន្នន័យក្បាលដីដល់ក្រុមការងារ ប៉ុន្តែបង្កាន់ដៃដែលក្រុមការងារផ្តល់ជូននេះ គឺគ្រាន់តែជាការ ប្រមូលទិន្នន័យ និងព័ត៌មានក្បាលដីប៉ុណ្ណោះ ដោយពុំបានកំណត់ទទួលស្គាល់ភាពជាកម្មសិទ្ធិករស្របច្បាប់ នៅលើដីនោះទេ និងមិនអនុញ្ញាតឲ្យយកបង្កាន់ដៃនេះ ទៅធ្វើការលក់ដូរ ផ្ទេរសិទ្ធិ និងបញ្ចាំបានឡើយ។
ដោយយោងតាមតម្រូវការចាំបាច់ និងដើម្បីបម្រើផលប្រយោជន៍ សាធារណៈ ស្របតាមគោលការណ៍ របស់ រាជរដ្ឋាភិបាលកម្ពុជា លើគម្រោងស្ថាបនាហេដ្ឋារចនាសម្ព័ន្ធផ្លូវ ៣៨ខ្សែក្នុងក្រុងសៀមរាប រដ្ឋបាលខេត្តបាន ចេញសេចក្តីជូនដំណឹង ឲ្យប្រជាពលរដ្ឋ ១៩គ្រួសាររុះរើលំនៅដ្ឋាន និងសំណង់ការ្យផ្សេងៗចេញពីដីប្រព័ន្ធ ការពារដែលជាដី សាធារណៈរបស់រដ្ឋ និងបានរៀបចំដីសម្រាប់ដោះស្រាយគោលនយោបាយ ស្របតាម គោលការណ៍សម្បទានសង្គមកិច្ចរបស់រដ្ឋ ដើម្បីឲ្យពួកគាត់ទៅរស់នៅទីតាំងផ្សេង៕SRP

ខេត្តសៀមរាប៖លោកតាម្នាក់ត្រូវបានកម្លាំងនគរបាលស្រុកអង្គរជុំឃាត់ខ្លួនពាក់ព័ន្ធករណីរំលោភសេពសន្ទវៈ លើក្មេងស្រី។

ការឃាត់ខ្លួន នៅថ្ងៃទី២១ ខែមីនា ឆ្នាំ២០២១ ម្សិលមិញ ក្រោយពីទទួលបានពាក្យបណ្ដឹងរបស់ម្ដាយក្មេងស្រីរងគ្រោះ។

ជនសង្ស័យឈ្មោះ ម៉ៃ មៀន អាយុ៧៤ឆ្នាំ រស់នៅឃុំចារឈូក ស្រុកអង្គរជុំ ខេត្តសៀមរាប។ចំណែកក្មេងស្រីរងគ្រោះ ឈ្មោះ ឌ. ល.ហ អាយុ១២ឆ្នាំ រស់នៅភូមិ ឃុំជាមួយគ្នា។

ផ្អែកតាមការស្តាប់ចម្លើយរបស់ជនសង្ស័យ បាន សារភាពថា ខ្លួនពិតជាធ្លាប់បានរួមភេទជាមួយ ជនរងគ្រោះ ពិតប្រាកដមែន គឺតាំងពីរយៈពេល២ខែមុនមកម្លេះ ដោយបានសម្រេចដល់ទៅ៦ដង។ ករណីនេះនគរបាលស្រុកអង្គរជុំ កសាងសំណុំរឿងអនុវត្តតាមផ្លូវច្បាប់៕SRP

ខេត្តសៀមរាប៖បុរសម្នាក់ត្រូវបានខ្សែភ្លើងឆក់បណ្ដាលឲ្យរងរបួសធ្ងន់។
ហេតុការណ៍បានកើតឡើងនៅវេលាម៉ោង៨និង១៥នាទី ថ្ងៃច័ន្ទ ទី២២ ខែមីនា ឆ្នាំ២០២១​ នៅចំណុចផ្ទះកំពុងសាងសង់ថ្មី ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប។

សមត្ថកិច្ចបានឱ្យដឹងថាជនរងគ្រោះមានឈ្មោះ ជិន សាវង់ អាយុ៣១ឆ្នាំ មុខរបរជាងសំណង់ រស់នៅភូមិដូនកែវថ្មី ឃុំដូនកែវថ្មី ស្រុកពួក ខេត្តសៀមរាប(រងរបួសធ្ងន់)។

សមត្ថកិច្ចបានបញ្ជាក់ថាមូលហេតុបុរសរូបនេះបានដាក់ជណ្ដើររន្ទាលើខ្សែភ្លើងមេ ដើម្បីឡើងទៅអង្គុយបូកផ្ទះកំពុងសាងសង់ ទើបឆក់ធ្លាក់មកក្រោម តែមិនបណ្ដាលអោយរងគ្រោះដល់អាយុជីវិតនោះទេ។បច្ចុប្បន្ន: ត្រូវបានគេដឹកយកទៅសង្គ្រោះ នៅមន្ទីពេទ្យ សុឹង រិទ្ធីរ៉េត៕SRP

ខេត្តសៀមរាប៖អាជ្ញាធរមូលដ្ឋានស្រុកបន្ទាយស្រីបានឲ្យដឹងថានៅព្រឹកនេះថា ក្មេងប្រុសស្រីចំនួន២នាក់បានលង់ទឹកស្លាប់ ខណ:តាមឪពុកទៅដាក់បង្គោលរបងក្នុងទឹកឲ្យគេ។

ហេតុការណ៍បានកើតឡើងនៅវេលាម៉ោង០៣រសៀលថ្ងៃទី ២១ ខែមីនា ឆ្នាំ២០២១ នៅចំណុចផ្លូវសីហនុ ភូមិពើងឆ័ត្រ ឃុំឃុនរាម ស្រុកបន្ទាយស្រី ខេត្តសៀមរាប។

អាជ្ញាធរបន្តថាជនរងគ្រោះទី១ឈ្មោះប្រុស ហ្វីលីវ ភេទប្រុស អាយុ២ឆ្នាំ ៩ខែ។ ទី២ឈ្មោះថា រ៉ាវិច្ឆិកា ភេទស្រី អាយុ៣ឆ្នាំ រស់នៅភូមិឃុំខាងលើ។

បើតាមអាជ្ញាធរស្រុកបន្ទាយស្រីបានបញ្ជាក់ថា មូលហេតុឪពុកក្មេងទាំងពីរនាក់ ឈ្មោះឡីក ថាអាយុ២១ឆ្នាំនិងឡីក ប្រុស អាយុ២៣ឆ្នាំ បានទៅស៊ីឈ្នួលដាក់បង្គោលរបងក្នុងទឹកឲ្យគេ ហើយយកកូនទៅតាមអោយលេងក្បែៗនោះ ដោយមានអន្លង់ទឺក ដែលអ៊ិចស្កាបានកាយធ្វើផ្លូវជម្រៅប្រហែល១ម៉ែត្រកន្លះ ដោយពេលកំពុងដាក់បង្គោលរបងក៏បានភ្លេចខ្លួនមើលកូន មួយសន្ទុះស្រាប់តែបាត់កូន ភ្លាមៗពួកគាត់បានស្រែកហៅកូនមិនឮក៏ងាកមកឃើញកូនលង់ទឹក ក៏បានចុះស្រង់កូនរបស់គាត់ទាំងពីរនាក់ មកដាក់លើកគោក ប៉ុន្តែកូនរបស់គាត់បានលង់ស្លាប់ទាំងពីរនាក់បាត់ទៅហើយ។

អាជ្ញាធរបានបន្ថែមថាករណីនេះ ក្រុមសមត្ថកិច្ចជំនាញបានពិនិត្យរួចសន្និដ្ឋានថាពិតជាបានស្លាប់ដោយសារលង់ទឹកពិតប្រាកដមែន។ បច្ចុប្បន្នសាកសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តសៀមរាប៖រឿងជម្លោះក្នុងគ្រួសារក្មួយ ប្តឹងម្តាយមីងទៅតុលាការ ទាមទារសំណង ៤០ ម៉ឺនដុល្លារ ករណីនេះភាគីចុងចោទ(មីង)ទទូចសុំអោយស្ថាប័នច្បាប់ពិចារណា និងផ្តល់យុត្តិធម៌។
ដើមបណ្តឹងមានឈ្មោះឈឺន វារ:ណាន់ ភេទស្រីអាយុ១៨ឆ្នាំ។ ចំណែកចុងបណ្តឹងជាម្តាយមីងមាន ឈ្មោះកែវ មូលីណុច អាយុ៣២ឆ្នាំ ទាំងពីរភាគីមានទីលំនៅភូមិសាលាកន្សែង សង្កាត់ស្វាយដង្គុំ ក្រុងសៀមរាប។
បណ្តឹងចុះថ្ងៃទី០២ខែកុម្ភ: ឆ្នាំ២០២១ មានកម្មវត្ថុថាសុំប្តឹងឈ្មោះកែវ មូលីណុច ភេទស្រីអាយុ៣២ឆ្នាំនិងឈ្មោះកែវ មូលីណេ ភេទស្រីអាយុ៣៥ឆ្នាំពីបទ ជេរប្រមាថជាសាធារណ: និងបទញុះញង់អោយមានការរើសអើង។ ប្រព្រឹត្តនៅភូមិសាលាកន្សែង សង្កាត់ស្វាយដង្គុំ ក្រុងសៀមរាប កាលពីអំឡុងខែមករាឆ្នាំ២០២១។

កម្មវត្ថុបន្តថា ឈ្មោះទាំងពីរខាងលើ បានឡាយហ្វេសប៊ុកជេរប្រមាថឪពុកម្តាយនិងរូបនាង(ដើមបណ្តឹង)ថាជាស្រីរកស៊ីលក់ខ្លួន ដែលធ្វើអោយប៉ះពាល់កិត្តិយស។ ការឡាយជេរប្រមាថនោះក៏បានធ្វើអោយប៉ះពាល់ មុខរបរលក់គ្រឿងក្រអូបរបស់នាង ដែលចំណាយដើមទុន២០ម៉ឺនដុល្លារ និងហាងកាហ្វេប្តី ដើមទុន១០ម៉ឺនដុល្លារ(អតិថិជនអស់ទំនុកចិត្ត) ករណីនេះនាងខ្ញុំ(ដើមបណ្តឹង)ទាមទារសំណងខូចខាត២០ម៉ឹនដុល្លារនិងជម្ងឺចិត្ត២០ម៉ឺនដុល្លារ។
ក្នុងករណីនេះស្ត្រីចុងបណ្តឹងឈ្មោះ កែវ មូលីណុច បានបរិយាយថា រូបនាងមិនដែលបានដឹងថាក្មួយស្រីរបស់ខ្លួនប្តឹងទារសំណងរហូត៤០ម៉ឺនដុល្លារនោះឡើយ។ ទើបតែនៅថ្ងៃទី១០ ខែមីនា ឆ្នាំ២០២១នេះ ពេលសមត្ថកិច្ចយកដីកាកោះមកអោយ ហើយតម្រូវអោយចូលខ្លួនទៅបំភ្លឺនៅតុលាការខេត្ត ថ្ងៃទី១៧ ខែ មីនាឆ្នាំ២០២១នេះ ទើបដឹងថាក្មួយប្តឹង។ តែនាងសុំពន្យាពេលហើយ តាមរយ:មេធាវីព្រោះត្រូវរកភស្តុតាងសម្រាប់ឆ្លើយ។
នាងបន្តថា ដើមចមនៃរឿង ដំបូងម្តាយរបស់នាងជេរកូនប្រសារ(ឪពុកដើមបណ្តឹង)លុះពេលបន្ទាប់ក្មួយរបស់នាង(ដើមបណ្តឹង)ព្រោះតែជួយឪពុកក៏បានឈ្លោះជាមួយជីដូនហើយរាលដាលដល់រូបនាង។ តែនៅថ្ងៃបន្ទាប់ រូបនាង(ចុងបណ្តឹង)បានអង្គុយក្នុងផ្ទះឡាយហ្វេសប៊ុក ដោយនិយាយថា សូមញាតិនិងមិត្តៗក្នុងបណ្តាញសង្គមជួយពិចារណា មីក្មួយរមិលគុណ ខំបីបាច់តាំងពីតូចពេលនេះវាប្រមាថជីដូនរហូតដល់មីង រួមទាំងពាក្យពេជ្រមិនល្អច្រើនទៀត តែមិនបានជេរដោយពាក្យអសុរសនោះទេ។ លុះថ្ងៃក្រោយនាងក៏បានឡាយហ្វេសប៊ុកចំនួន៣ដងជាបន្តបន្ទាប់ទៀត ដោយលើកហេតុផលវែកញែកអំពីក្រុមគ្រួសារនេះ។
មូលីណុច បានបញ្ជាក់ថា ចំពោះការឡាយនិយាយក្នុងក្រុមគ្រួសារ អោយមនុស្សខាងក្រៅជួយពិចារណានេះ ក៏ត្រូវក្នួយស្រីប្តឹងទារសំណង៤០ម៉ឺនដុល្លារ ដោយចោទថា ជេរប្រមាថនិងញុះញង់។ នេះជាសិទ្ធិរបស់បុគ្គល តែរូបនាងមិនបានជេរឬញុះញង់នណាទេ។ ចំពោះមុខរបររកស៊ី គឺមិនពាក់ព័ន្ធ នឹងការឡាយរបស់នាងឡើយ។ ចឹងទេករណីនេះ នាងសុំអោយស្ថាប័នច្បាប់ពិនិត្យ ពិចារណា និងជួយផ្តល់ភាពយុត្តិធម៌ដល់នាង ហើយនាងរំពឹងថាតុលាការនឹងស្រាវជ្រាវពិចារណា មុនពេលសម្រេចក្តី។
ជុំវិញការប្តឹងទារសំណង៤០ម៉ឺនដុល្លារនេះ ដើមបណ្តឹង អ្នកនាងឈឺន វារ:ណាន់ បានប្រាប់តាមទូរស័ព្ទថា នាងសុំមិនបកស្រាយទេ ព្រោះនាងបានប្តឹងរួចហើយ៕SRP

ខេត្តសៀមរាប៖នៅទីបំផុតបុរសលេងសម្ដីធ្ងន់វោហាតាមហ្វេសប៊ុក ផែង វណ្ណ: បានលុតជង្គង់ក្រាបសំពះ លំអោនកាយបែបស្រទន់ នៅចំពោះមុខព្រះចៅអធិការវត្តរាជបូណ៌ ព្រះនាមពិន សែម ដែលមានព្រះជន៨០ព្រះវស្សា និងក្រោមក្រសែភ្នែកមន្រ្តីពាក់ព័ន្ធ ជាច្រើននាក់ទៀត។

ការលុតជង្គង់ក្រាបសំពះ របស់លោកផែង វណ្ណ: គឺនៅថ្ងៃទី២០ខែមីនាឆ្នាំ ២០២១ ព្រឹកមិញ ខណ:បានមកក្រាបបង្គំ ព្រះចៅអធិការវត្តរាជបូណ៌ ពិន សែម និង ព្រះមេគណ ខេត្តសៀមរាប ជុំ គឹមឡេង ដើម្បីសុំព្រះរាជទានទោស និងសុំអនុគ្រោះ ពីកំហុសឆ្គងរបស់ខ្លួន

លោកផែង វណ្ណ: បានចាកចេញពីវត្ត ដោយបង្ហាញភាពរីករាយ ក្រោយព្រះចៅអធិការទទួលយកការសុំទោសនេះ។តែលោកសុំមិនអធិប្បាយ ជាមួយអ្នកសារព័ត៌មាននោះទេ។ទោះជាបែបនេះ មន្ត្រីសង្ឃក្នុងហេតុការណ៍ បានបញ្ជាក់ថា គ្រប់យ៉ាងបានបញ្ចប់ហើយ ចំណែកលិខិតថ្កោលទោសរបស់ព្រះមេគណខេត្ត ដែលចុះហត្ថលេខា ដោយព្រះអង្គជុំ គឹមឡេង ក៏បាននិរាករណ៍ផងដែរ។

សូមបញ្ជាក់ថា កាលពីថ្ងៃទី១៣ខែមីនា ឆ្នាំ២០២១ កន្លងទៅនេះ ព្រះចៅអធិការវត្តរាជបូណ៌ បានដាក់វិន័យលើ ភិក្ខុ៣អង្គក្នុងចំណោម៩អង្គ អោយវាម្តងម្នាក់«វាយតគ្នា»។បន្ទាប់មកលោកផែង វណ្ណះ ក៏បានយករូបភាពវាយតគ្នានោះ ទៅឡាយនិយាយ វាយប្រហារមកលើវត្តរាជបូណ៌ ក្នុងលក្ខណ:ជេរប្រមាថ។ លុះថ្ងៃ បន្ទាប់ព្រះមេគណខេត្តចេញលិខិតថ្កោលទោស រហូតដល់ក្រសួងព័ត៌មានបញ្ចប់អាជ្ញាបណ្ណ័ សារព័ត៌មានផែងវណ្ណ: ផងដែរ៕SRP

ខេត្តសៀមរាប៖ប៉ូលិសប៉ុស្ដិ៍ទាំង៩ឃុំ របស់ស្រុកប្រាសាទបាគង បានចេញលិខិតបដិសេធ ថាមិនមានល្បែងស៊ីសង ដូចហ្វេសប៊ុកបានបង្ហោះនោះឡើយ។ ការអះអាងរបស់ប៉ូលិសទាំង៩ឃុំនេះ បន្ទាប់ពីមានហ្វេសប៊ុកបង្ហោះនៅថ្ងៃ សុក្រថ្ងៃទី ១៩ ខែមីនា ឆ្នាំ២០២១ មានខ្លឹមសារថា៖«មានល្បែងស៊ីសងកំពុងកើតមានទាំងយប់ទាំងថ្ងៃយ៉ាងអនាធិបតេយ្យ នៅក្នុងស្រុកប្រាសាទបាគង ខេត្តសៀមរាប ខណ:ដែលរាជរដ្ឋាភិបាលកំពុងរវល់ទប់ស្កាត់កូវីដឆ្លងចូលសហគមន៍។នេះបើយោងតាមអោយដឹងម្ចាស់បន ល្បែង។ ម្ចាស់បនល្បែងមានឈ្មោះ សៀង ប្រិយ និង ភាគហ៊ុន២នាក់ទៀត»។

យោងតាមរបាយការណ៍របស់នគរបាលប៉ុស្ដិ៍ទាំង៩ឃុំ «បណ្ដាញសៀមរាបប៉ុស្ដិ៍ ទទួលបានដែលមានខ្លឹមសារស្រដៀងគ្នា ស្ដីពីការលទ្ធផលនៃការស្រាវជ្រាវ គឺពុំមានល្បែងស៊ីសង ដូចការចោទប្រកាន់របស់ម្ចាស់ អាខោនហ្វេសប៊ុកនោះទេ ដោយការស្រាវជ្រាវ គឺបានបង្ហោះព័ត៌មានមិនពិត។ ពាក់ព័ន្ធករណីលោកលឹម សម្បត្តិ​ អធិការនគរបាលស្រុកប្រាសាទបាគងបានឲ្យដឹងថា«សំឡេង»

ខេត្តសៀមរាប៖បុរសជាឪពុកបានស្លាប់ភ្លាមៗ ចំណែកកូនរងរបួសធ្ងន់ខណៈបើកម៉ូតូបុកជាមួយគោយន្តកន្ត្រៃ។

ហេតុការណ៍បានកើតឡើងនៅវេលាម៉ោង១៩ និង៥០នាទីថ្ងៃទី១៩ ខែមីនា ឆ្នាំ ២០២១នេះ នៅចំណុចភូមិព្រៃខ្នុរ ឃុំស្រែណូយ ស្រុកវ៉ារិន ខេត្តសៀមរាប។

សមត្ថកិច្ចស្រុកវ៉ារិនបានរាយការណ៍ថាករណីគ្រោះថ្នាក់ចរាចរណ៍នេះបង្កដោយម៉ូតូមួយរគ្រឿងឃ្លិចពណ៌ខ្មៅសេរី២០២០ពាក់ស្លាកលេខ ឧត្តរមានជ័យ១E ៦៥៤៤ ដោយបានបុកគោយន្តកន្ត្រៃ បញ្ច្រាសទិសគ្នាបណ្ដាលឲ្យស្លាប់ឪពុក
និងកូនរបួសធ្ងន់។

សមត្ថកិច្ចបានបន្តថាជនរងគ្រោះខាងភាគីម៉ូតូ ១.ឈ្មោះ ខេង ផល្លី ភេទប្រុស អាយុ៥៣ឆ្នាំ រស់នៅភូមិសែនជ័យ ឃុំកន្ទួត ស្រុកស្វាយលើខេត្តសៀមរាប(ស្លាប់)។

២.ឈ្មោះ ខេង ចាន់វាសនា ភេទប្រុស អាយុ២១ឆ្នាំរស់នៅភូមិឃុំជាមួយគ្នាត្រូវជាកូនរបួសធ្ងន់ (បាក់ភ្លៅទាំងពី)។
ដោយឡែកអ្នកបើកបរគោយន្តកន្ត្រៃបានគេចខ្លួនបាត់។បច្ចុប្បន្នសាកសពប្រគល់ឲ្យក្រុមគ្រួសារធ្វើបុណ្យតាមប្រពៃណី។
ចំណែកម៉ូតូនិងគោយន្តកន្ត្រៃត្រូវបានប៉ូលិសចរាចរណ៍យកទៅរក្សាទុកនៅប៉ុស្តិ៍ឃុំស្រែណូយដើម្បីរង់ចាំការដោះស្រាយ៕SRP

ខេត្តសៀមរាប៖មន្ត្រីមួយរូបបានថ្លែងថាស្ត្រីដែលនគរបាល ឃាត់ខ្លួន ករណីចែកចាយផលិតផលក្លែងម៉ាកNNP នៅផ្សារលើធំថ្មីត្រូវបានដោះលែងវិញហើយ។

លោកជ្រិញ គឹមនី នាយការិយាល័យនគរបាលប្រឆាំងបទល្មើសសេដ្ឋកិច្ចខេត្ត បានប្រាប់អ្នកកាសែត តាមទូរស័ព្ទ នៅថ្ងៃទី១៩ ខែមីនា ព្រឹកមិញថា ស្ត្រីឈ្មោះ បូ រ៉ាណា ម្ចាស់ទីតាំងចែកចាយផលិតផលក្លែងម៉ាកNNP ក្នុងផ្សារលើធំថ្មី នៃក្រុងសៀមរាប ដែលបានឃាត់ខ្លួន ក្នុងប្រតិបត្តការបង្ក្រាបផលិតផលក្លែកម៉ាក កាលពីថ្ងៃទី១៨ខែមីនា ម្សិលមិញនេះ បានដោះលែងវិញហើយក្រោយធ្វើកិច្ចសន្យា។
លោកបន្តថា បន្ទាប់ពីសាកសួរនិងស្តាប់ចម្លើយឃើញថា ស្រ្តីរូបនេះមិនចេះអក្សរ ហើយផលិត ផលទាំងនោះពុំបានទិញពីអ្នកណា គឺរូបគាត់ទិញឡេផ្សេងៗ មកផ្សំដោយខ្លួនឯង។ មួយវិញទៀត រូបគាត់សារភាពថា ដោយឃើញផលិតផលម៉ាកNNP លក់ដាច់ខ្លាំងរូបគាត់ក៏គុបពីម៉ាកNNPមកបិទលើប្រអប់ឬកំប៉ុងរបស់ខ្លួនដើម្បីលក់ តែពុំបានដឹងថា ប៉ះពាល់ដល់ក្រុមហ៊ុនដាណា ទ្រី។

លោកបន្ថែមថា ដោយឃើញស្ថានភាពជាក់ស្តែង ទើបលោកស្រីទ្រី ដាណា ម្ចាស់ក្រុមហ៊ុនដាណា ទ្រី សម្រេចបញ្ឍប់ការប្តឹងផ្តល់ ហើយអោយធ្វើកិច្ចសន្យា ឈប់ចែកចាយផលិត ផល NNPក្លែងម៉ាកតទៅទៀត។

សូមបញ្ជាក់ថា នៅព្រឹកថ្ងៃទី១៨ខែមីនាឆ្នាំ ២០២១ នៅចំណុចក្នុងផ្សារលើធំថ្មី ស្ថិតក្នុងភូមិដកពោធិ៍ សង្កាត់ស្លក្រាម ក្រុងសៀមរាប សមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្ត ដែល ដឹកនាំសម្រួលនិតិវិធីដោយលោក ថេង សំ ណាង តំណាងអយ្យកាអមសាលាដំបូងខេត្តសៀមរាប លោកឧត្តមសេនីយ៍ត្រីម៉ក់ ធារ៉ា ស្នងការងទទួលបន្ទុកបង្ក្រាបបទល្មើស និងមានការចូល រួមពីមន្ត្រីនគរបាលប៉ុស្តិ៍មូលដ្ឋាន បង្ក្រាបការចែកចាយ ផលិតលផក្លែងម៉ាក ដោយឃាត់ខ្លួនម្ចាស់ទីតាំងឈ្មោះបូ រ៉ាណា ភេទស្រី យកទៅធ្វើការសាកសួរ។

សមត្ថកិច្ចក្នុងហេតុការណ៍ បញ្ជាក់ថា មុនពេលឈានដល់ការបង្ក្រាបនេះ ក្រុមហ៊ុន ដាណា ទ្រី បានណែនាំដល់ម្ចាស់ទីតាំងខាងលើ អោយបញ្ឍប់សកម្ម ភាពក្លែងម៉ាកផលិតផលNNPយកទៅចែកចាយ។ ប៉ុន្តែម្ចាស់ទីតាំងមិនអនុវត្តតាម ហើយនៅតែបន្តចែកចាយ ទើបក្រុមហ៊ុនដាណាទ្រី ប្តឹងទាមទារសំ ណង១០ម៉ឺនដុល្លារ និងឈានដល់បង្ក្រាបបែបនេះ។ទោះបីយ៉ាងណា ស្ត្រីដែលរងបណ្តឹងពីឈ្មោះទ្រី ដាណាដោយទាមទារសំណង១០ម៉ឺនដុល្លារ រហូតប៉ូលិសឃាត់ខ្លួននោះ ពេលនេះត្រូវបានបញ្ចប់ និងមានសេរីភាពដូចធម្មតាវិញហើយ៕SRP

ខេត្តសៀមរាប៖លោក ទៀ សីហា អភិបាលខេត្តនៅថ្ងៃទី១៨ ខែមីនា ម្សិលមិញបានដឹកនាំប្រតិភូចុះពិនិត្យមណ្ឌលចត្តាឡីស័ក នៅស្រុកក្រឡាញ់ដើម្បីត្រៀម សម្រាប់ប្រជាពលរដ្ឋ ដែលមកពីក្រៅប្រទេស។

ដំណើរចុះពិនិត្យនេះ លោកទៀ សីហា បានជំរុញដល់ក្រុមការងារ ប្រចាំការទាំងអស់ ត្រូវអនុវត្តការងារនេះ ឱ្យបានហ្មត់ចត់ ចៀសវាងការគេចចេញ ពីមណ្ឌលចត្តាឡីស័ក ដោយត្រូវណែនាំដល់បងប្អូន ដែលមកធ្វើចត្តាឡីស័ក អនុវត្តឱ្យខ្ជាប់ខ្ជួន តាមការណែនាំ របស់ក្រសួងសុខាភិបាល។

អភិបាលខេត្តក៏បានអំពាវនាវ សូមបងប្អូនចូលរួមទប់ស្កាត់ ការរីករាលដាលជំងឺកូវីដ-១៩ ដោយអនុវត្ត ៣ការពារ (ត្រូវពាក់ម៉ាស់ ត្រូវលាងដៃនឹងអាកុល ឬជែល និងត្រូវរក្សាគន្លាតបុគ្គល) ៣កុំ (កុំទៅកន្លែងបិទជិតគ្មានខ្យល់ចេញចូល កុំទៅកន្លែងដែលមានមនុស្សច្រើនកុះករ និងកុំប៉ះពាល់គ្នា) ព្រមទាំងចូលរួមយុទ្ធនាការប្រយុទ្ធនឹងកូវីដ-១៩ ប្រើ QR Code “Stop covid-19 ទប់ស្កាត់កូវីដ-១៩”ផងដែរ៕SRP