ខេត្តសៀមរាប

ខេត្តសៀមរាប៖សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប បានបើកកិច្ចប្រជុំវិសាមញ្ញលើកទី១ របស់ខ្លួន។

កិច្ចប្រជុំនេះធ្វើឡើងនៅ ថ្ងៃព្រហស្បតិ៍ ទី ២០ ខែឧសភា ឆ្នាំ២០២១ នៅសាលប្រជុំធំ ក្រុមហ៊ុនបាគង ជេសវិន (ផ្លូវចូលTop Town) ស្ថិតនៅក្រុងសៀមរាប ក្រោមវត្តមាន លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប លោក សឹង្ហ សំរឹទ្ធិ និង លោក ញ៉ែម សំណាង អនុប្រធាន ដោយមានការចូលរួមពីប្រធាន អនុប្រធាន ប្រធានផ្នែករបស់សាខាក្រុង ស្រុកទាំងអស់ក្នុងខេត្តសៀមរាបផងដែរ។

ក្នុងកិច្ចប្រជុំលើកដំបូងនេះ លោកប្រធាន ហ៊ុន ប៉ូគា និងលោកអនុប្រធាន លោក សឹង្ហ សំរឹទ្ធិ និង លោក ញ៉ែម សំណាង បានលេីកឡេីងពីលទ្ធផលការងារសង្គម និង ការងារមនុស្សធម៌ ដែលបានអនុវត្តនាពេលកន្លងមក និង លេីកទិសដៅការងារបន្ត សម្រាប់ការងារជួយសង្គម និង ការងារមនុស្សធម៌ ក្នុងក្រុងសៀមរាប និង តាមបណ្តាស្រុកផ្សេងៗក្នុងខេត្តសៀមរាប ផងដែរ។

ក្នុងពិធីបិទកិច្ចប្រជុំ លោក ហ៊ុន ប៉ូគា បានថ្លែងកោតសរសេីរដល់ អនុប្រធានសាខាខេត្ត និង ប្រធានសាខាក្រុង និង ស្រុកព្រមទាំងសមាជិកសមាជិកា ទាំងអស់ ដែលមានកិច្ចសហការគ្មាបានល្អ ក្នុងការអនុវត្តតួនាទីភារកិច្ចទទួលបានលទ្ធផលល្អ ក្នុងការងារមនុស្សធម៌ ក្នុងខេត្តសៀមរាប និងបានជម្រុញឲ្យខិតខំប្រឹងបន្ថែមទៀត ដេីម្បីអោយសាខាខេត្តសៀមរាបមានការរីកចម្រើនទៅមុខ និងបន្តកៀរគរដល់សប្បុរសជនជាតិ អន្តរជាតិ ក្រុមហ៊ុនឯកជន មន្ត្រីរាជការ ដើម្បីចូលរួមជាវិភាគទានទ្រទ្រង់គាំទ្រសកម្មភាព សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប ក្នុងការជួយសង្គ្រោះ ប្រជាពលរដ្ឋ ងាយរងគ្រោះ ដែលកំពុងជួបនូវបញ្ហាខ្វះខាត ក្នុងជីវភាពប្រចាំថ្ងៃ និងជួបនូវគ្រោះមហន្តរាយផ្សេងៗទៀត ដែលអាចកើតមានឡើងជាយថាហេតុ។

សូមជម្រាបថា ក្នុងកិច្ចប្រជុំនេះ លោកប្រធានអនុប្រធាន សាខាខេត្តសៀមរាប ក៏បានមានមតិដោះស្រាយនូវសំនួរ និង សំណូមពរមួយចំនួនពីសមាជិកនានាផងដែរ។ ក្នុងនោះផងដែរលោកក៏បានមានមតិផ្តាំផ្ញេី ក៏ដូចជាក្រេីនរំលឹកដល់សមាជិក សមាជិកា ទាំងអស់អោយថែរក្សា សុខភាព និង រក្សាអនាម័យ ដោយត្រូវចូលរួមអនុវត្តតាម ប្រសាសន៍របស់ សម្តេច (៣ការពារ ៣កុំ) ឲ្យបានខ្ជាប់ខ្ជួនដើម្បីចៀសផុតពីជំងឺ កូវីដ-១៩ ដ៏កាចសាហាវនេះ៕SRP

ខេត្តសៀមរាប៖ប៉ូលិសស្រុកពួកបានធ្វើការបដិសេធថា ការបង្ហោះទីតាំងសង្វៀនជល់មាន់របស់សារព័ត៌មាន មួយចំនួនគឺរូបភាពចាស់។

យោងតាមរបាយការណ៍របស់នគរបាលស្រុកពួកដែលបណ្ដាញ សៀមរាបប៉ុស្តិ៍ ទទួលបាន បញ្ជាក់ថា អធិការដ្ឋាននគរបាលស្រុកពួក ខេត្តសៀមរាប សូមឆ្លើយបំភ្លឺជូនសាធារណៈជនក្នុងបណ្ដាញប្រព័ន្ធហ្វេសប៊ុកឲ្យបានជ្រាបថា កាលពីថ្ងៃទី១៨ ខែឧសភា ឆ្នាំ២០២១ មានសារព័ត៌មានឈ្មោះ “គេហទំព័រ រស្មីឧត្តរ” និង “សារព័ត៌មាន អាណាចក្រខ្មែរ” ព្រមទាំងសារព័ត៌មានមួយចំនួនទៀតក៏បានចំលងព័ត៌មាន និងរូបភាពផ្សព្វផ្សាយដូចៗគ្នាដែលមានខ្លឹមសារថា÷
“ពិតជាខ្លាំងមែនលោក ទេព្យ ពុំសែន អធិការស្រុកពួក ទោះបីក្រសួងសុខាភិបាលប្រកាសក្តែងៗផ្អាក់លែងអោយមានការជួបជុំគ្នា សង្វៀនជល់មាន់របស់ លោក ឆៃ ពៅ នៅតែបន្តយ៉ាងរលូន,
(សៀមរាប)នៅថ្ងៃទី១៨ខែឧសភាឆ្នាំ២០២១នេះមានសេចក្តីរាយការណ៍ពីពលរដ្ឋភូមិត្រពាំងធំ ឃុំ រើល ស្រុកពួកខេត្តសៀមរាប។…” (មានដាក់រូបភាពជល់មាន់ និងរូបលោកអធិការនគរបាលស្រុកពួក)។
សូមជម្រាបជូនសាធារណៈជនមេត្តាជ្រាបថាទីតាំងខាងលើមិនមានសៃវៀនជល់មាន់ទេដោយទីតាំងកន្លែងនោះយើងធ្លាប់បានបង្ក្រាបម្ដងរួចមកហើយគឺនៅថ្ងៃទី០៣ ខែឧសភា ឆ្នាំ២០២១ វេលាម៉ោង១៥រសៀល កម្លាំងរបស់អធិការដ្ឋាននគរបាលស្រុក និងប៉ុស្តិ៍នគរបាលរដ្ឋបាល មន្ត្រីសាលាស្រុក ដែលដឹកនាំដោយគណៈបញ្ជាការឯកភាពរដ្ឋបាលស្រុកពួកបានចុះបង្ក្រាបម្ដងរួចមកហើយនឹងធ្វើការរុះរើដុតកម្ទេចសីវៀននិងវត្ថុតាងមួយចំនួនឯអ្នកលេងជល់មាន់បានរត់គេចខ្លួនអស់។ ចំពោះរូបភាពមាន់ជល់ និងមនុស្សដែលសារព័ត៌មានបានផ្សព្វផ្សាយមិនមែនមាននៅក្នុងទីតាំងខាងលើនោះទេគឺជារូបភាពដែលយកពីកន្លែងផ្សេងមកផ្សព្វផ្សាយ។
ជាមួយគ្នានេះដែរអង្គភាពអធិការដ្ឋាននគរបាលស្រុកពួក សូមជម្រាបថាដើម្បីចូលរួមទប់ស្កាត់ការរីករាលដាលឆ្លងនៃជម្ងឺCOVID-19 និងការរក្សាសន្តិសុខសណ្ដាប់ធ្នាប់ និងសុវត្ថិភាពជូនប្រជាពលរដ្ឋនៅក្នុងភូមិសាស្ត្រស្រុកកងកម្លាំងពីអធិការដ្ឋាននគរបាលស្រុក និងប៉ុស្តិ៍នគរបាលរដ្ឋបាលបានសហការជាមួយបណ្ដាលកងកម្លាំងគណៈបញ្ជាការឯកភាពស្រុក និងគណៈបញ្ជាការឯកភាពឃុំដែលដឹកនាំដោយគណៈបញ្ជាការឯកភាពស្រុកពួកតែងតែយកចិត្តទុកដាក់ធ្វើការផ្សព្វផ្សាយជូនប្រជាពលរដ្ឋអនុវត្តនូវវិធានការការពារ ការរីករាលដាលនៃជម្ងឺCOVID-19 បីកុំ បីការពារ និងចុះតាមដាន និងត្រួតពិនិត្យតាមមូលដ្ឋានភូមិឃុំជារៀងរាល់ថ្ងៃ។ អង្គភាពអធិការរដ្ឋាននគរបាលស្រុកពួកពិតជាមានការសោកស្ដាយចំពោះការផ្សព្វផ្សាយនៅព័ត៌មានមិនពិតធ្វើឲ្យប៉ះពាល់កិត្តិយសសេចក្តីថ្លៃថ្នូរដល់បុគ្គលថ្នាក់ដឹកនាំ និងអង្គភាព។ អធិការដ្ឋាននគរបាលស្រុកពួកទទួលយករាល់សេចក្តីរាយការណ៍ ព័ត៌មានពិត និងសហការ ដឹកនាំកម្លាំងបង្ក្រាបបានទាន់ពេលវេលារាល់បទល្មើសជាក់ស្ដែង។សូមថ្នាក់ដឹកនាំគ្រប់លំដាប់ថ្នាក់ និងសាធារណ:ជនមេត្តាជ្រាបជាព័ត៌មាន៕SRP

ខេត្តសៀមរាប៖យ៉ាងហោចណាស់មនុស្សម្នាក់បានស្លាប់និង២នាក់ទៀតបានរងរបួសធ្ងន់ស្រាល ក្នុងករណីគ្រោះថ្នាក់ចរាចណ៍។

ហេតុការណ៍នេះបានកើតឡើងនៅវេលាម៉ោង១៣និង១០នាទីថ្ងៃទី១៩ខែឧសភាឆ្នាំ២០២១ ត្រង់ចំណុចខាងលិចស្ពានទឹកវិល លើផ្លូវ ជាតិលេច៦ ស្ថិតភូមិប្រិយ៍ថ្មី សង្កាត់ទឹកវិល ក្រុងសៀមរាប។

សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្តម៉ាកលុចស៊ីសRX 330  ពណ៌ស ពាកស្លាកលេខ ភ្នំពេញ 2AW 8458 បើកបរមានទិសដៅ ពីកើតទៅលិច បានបុកអ្នកជិះកង់ប៉ើងធ្លាក់ចូលប្រឡាយបណ្តាលឲ្យស្លាប់ នៅនឹងកន្លែងរួច បើករត់ជ្រុលទៅបុកម៉ូតូ មានទិសដៅពីលិចទៅកើតបណ្តាលឲ្យប្តីបាក់ជើងនិងប្រពន្ធរបួសស្រាល។

សមត្ថកិច្ចបន្តថា សពអ្នកជិះកង់មាន ឈ្មោះ ម៉ី រដ្ឋា ភេទប្រុស អាយុ៣៧ឆ្នាំ មានស្រុកកំណើតនៅ ឃុំកោះសូទិន ស្រុកកោះសូទិន ខេត្តកំពង់ចាម។ បច្ចុប្បន្ននៅរាជធានីភ្នំពេញ។

ចំណែកអ្នកជិះម៉ូតូមានឈ្មោះប៊ុន ប៉ូ ភេទប្រុស អាយុ ៥១ឆ្នាំ មានដឹកប្រពន្ឋពីក្រោយ ពួកគាត់រស់នៅភូមិតាប៉ាង ឃុំអំពិល ស្រុកប្រាសាទបាគង។

សមត្ថកិច្ចបានដាក់ករណីនេះ សង្ស័យអ្នកបើកបររថយន្ត ងងុយដេក។បច្ចុប្បន្ននជំនាញ បានអូសយកវត្ថុតាង និងរៀបចំសំណុំរឿង ដើម្បីអនុវត្តតាមផ្លូវច្បាប់៕SRP

ខេត្តសៀមរាប៖មន្ត្រីមូលដ្ឋាននៅថ្ងៃទី១៩ខែ ឧសភា នេះ បានអះអាងថា ករណីភ្លើងឆេះព្រៃលិចទឹកនៅតំបន់បឹងពារាំង ដែលមានរយ:ពេលជិត១សប្តាហ៍នេះ ពន្លត់បានស្ទើទាំងស្រុងហើយ។

ចៅសង្កាត់ជ្រាវ លោកក្អោប រ៉ន បានអះអាងថា រយ:ពេលជិត១សប្តាហ៍នេះភ្លើងបានឆេះបំផ្លាញព្រៃលិចទឹកដែលជាជម្រកត្រីពង កូន អស់ប្រមាណជា៥៥ហិកតា។ ក្នុងនោះ ក្រៅពីព្រៃលិចទឹក ក៏បានបំផ្លាញសត្វស្លាបដែលកំពុងពងកូន ប្រភេទសត្វល្មូន និងជីវ:ចម្រុះយ៉ាងច្រើនផងដែរ។

លោកចៅសង្កាត់បន្ថែមថា ករណីខាងលើនេះ ថ្នាក់ដឹកនាំខេត្ត.ក្រុង.ព្រមទាំងតំណាងរាស្ត្រមណ្ឌលសៀមរាប ក៏បានចុះទៅជួយពន្លត់ផ្ទាល់ ហើយបានបន្ថែមរថយន្តពន្លត់អគ្គិសភ័យជាច្រើនគ្រឿងទៀត រហូតគ្រប់គ្រងស្ទើទាំងស្រុងហើយ។

ទោះជាបែបនេះក្ដី លោកចៅសង្កាត់ មិនទាន់បានបញ្ជាក់ថា បុគ្គលណាមួយ ជាអ្នកផ្តើមគំនិតដុតព្រៃនេះទេ។ តែលោកបានបង្ហើបថា មានអ្នកលួចដុត បំណងវាទយកដីធ្វើជាកម្មសិទ្ធិ។ ខណ:នេះសមត្ថកិច្ចកំពុងបើកការស៊ើបអង្កេត ដើម្បីចាប់ខ្លួនជនប្រព្រឹត្ត មកផ្តន្ទាទោសតាមច្បាប់។

សូមបញ្ជាក់ថា កាលពីថ្ងៃទី១៣ខែឧសភាឆ្នាំ ២០២១នេះ ភ្លើងបានឆេះព្រៃលិចទឹកនៅតំបន់បឹងពារាំងផ្នែកខាងលិច្ច ក្នុងអស់ជាង២០ហិកតា។ លុះថ្ងៃបន្ទាប់ ភ្លើងបានឆេះរាលរហូតមកដល់ចំណុចផ្លូវ ចូលបឹងពាងរាំងក្នុងសង្កាត់ជ្រាវអស់ជាង២០ហិកតាថែមទៀត។ លុះមកទល់ថ្ងៃទី១៩ខែឧសភានេះ អាជ្ញាធរនិងសមត្ថកិច្ចសហការ អន្តរាគមន៍ បាញ់ពន្លត់ជោគជ័យស្ទើទាំងស្រុងហើយ៕SRP

ខេត្តសៀមរាប៖លោកយាយចាស់ជរាម្នាក់ គ្មានទីពឹង រស់នៅនឹង សំយ៉ាបផ្ទះរបស់គេ បណ្តោះអាសន្ន ដែលស្ថិតក្នុងភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាប ទទួលបានអំណោយ ពីលោក ងួន មាន ប្រធានសមាគមចលនាយុវជនកម្ពុជា (ក្រុម១៥៧) ស្រុកប្រាសាទបាគង និងដឹកនាំសមាជិក។

អំណោយដែលប្រគល់ជូនរួមមាន៖
⁃ អង្ករ ៥០ គីឡូក្រាម
⁃ មី ម៉ាម៉ា ១កេស
⁃ ត្រីខ ១យួរ
⁃ ទឹកត្រី ១យួរ
⁃ ទឹកស៊ីអ៉ីវ ១យួរ
⁃ ប្រេងឆា ១ដប
⁃ ស្ករស ១គីឡូក្រាម
⁃ ប៊ីចេង កន្លះគីឡូ
⁃ អំបិល ១គឺឡូ
⁃ ទឹកសុទ្ធ៤យួរ
⁃ ខ្ទឹម កន្លះគីឡូ
⁃ ថវិកា ១២មុឺនរៀល។
ឆ្លៀតក្នុងឱកាសនោះដែរ លោក ងួន មាន បានមានមតិផ្តាំផ្ញេី ដល់លោកយាយ សូមឲ្យថែរក្សា សុខភាព និង រក្សាអនាម័យ ដោយត្រូវចូលរួមអនុវត្តតាម ប្រសាសន៍របស់ សម្តេច (៣ការពារ ៣កុំ) ឲ្យបានខ្ជាប់ខ្ជួនដើម្បីចៀសផុតពីជំងឺ កូវីដ-១៩។

នៅថ្ងៃនេះដែរ លោក មាស ផានិត ប្រធានផ្នែកបុគ្គលិក សហការណ៍ជាមួយ លោក ថាញ់ រ៉ូ អនុប្រធានចលនាយុវជនកម្ពុជា(ក.១៥៧) ស្រុកក្រឡាញ់ បានប្រគល់ថវិកា 1,080,000.00រៀល (១លាន៨ម៉ីន រៀល) ជូនដល់គ្រួសារសព លោក ឡាំង ពៅ ដែលត្រូវជា ឪពុកក្មេក លោក រើន រួម សមាជិក សមាគមចលនាយុវជនកម្ពុជា(ក១៥៧)ស្រុកក្រឡាញ់ ដែលបានទទួលមរណ:ភាព ដោយជរាពាធ៕SRP

ខេត្តសៀមរាប៖កុដិ១ខ្នងនិងសម្ភារមួយចំនួន នៅវត្តភ្នំក្រោម ត្រូវបានអគ្គីភ័យ លេបត្របាក់ទាំងស្រុង។

ហេតុការណ៍បានកើតឡើង នៅព្រឹកមិញនេះនៅត្រង់ចំណុចវត្ត ព្រះព្រហ្មភ្នំរំចង់ ក្រឡះវិលវង្ស សុវណ្ណបុប្ផា គិរីចុងកោះ ជម្ពូព្រឹក្សា (ហៅវត្តខ្នងភ្នំក្រោម) ស្ថិតនៅភូមិភ្នំក្រោម សង្កាត់សៀមរាប ក្រុងសៀមរាប។

មន្ត្រីប៉ូលិសក្រុងសៀមរាបបានឲ្យដឹងថា ករណីអគ្គិភ័យនេះបណ្ដាលឱ្យ កុដិព្រះសង្ឃ០១ខ្នងទំហំ៤×៦ម៉ែត្រ សង់អំពីឈើប្រក់ស័ង្កសីជញ្ជាំងស័ង្កសីឆេះទាំងស្រុង រួមជាមួយរថយន្តកែច្នៃ០១គ្រឿង ម៉ូតូ០១គ្រឿង ម៉ាស៊ីនភ្លើង០១គ្រឿង នឹងសម្ភារផ្សេងៗមួយចំនួន។

មន្ត្រីប៉ូលិសបានបន្តថាមូលហេតុអគ្គីភ័យនេះ
បណ្តាលមកពីទុស្សេខ្សែភ្លើង។ ទោះជាយ៉ាងណា ដោយសារវត្តភ្នំក្រោមមានកម្ពស់ខ្ពស់ពេក ទើបរថយន្តពន្លត់អគ្គិភ័យមិនអាចឡើងរួច ហើយពលរដ្ឋនិងសមត្ថកិច្ចបានសហការ ជួយពន្លត់មិនឱ្យរាលដាលបន្ត៕SRP

ខេត្តសៀមរាប៖បុរសម្នាក់ត្រូវបានសមត្ថកិច្ចឃាត់ខ្លួនពាក់ព័ន្ធករណីលួចកាត់ខ្សែភ្លើង។ ការឃាត់ខ្លួនធ្វើឡើងនៅថ្ងៃទី១៦ ខែឧសភា ឆ្នាំ២០២១ ស្ថិតនៅក្នុងក្រុមទី៥ ភូមិមណ្ឌល៣ សង្កាត់ស្លក្រាម ក្រុងសៀមរាប។

ជនសង្ស័យ​ឈ្មោះ​ ចាន់ ខេម អាយុ ៣១ឆ្នាំមុខរបរកម្មករធ្វើផ្លូវថ្នល់ មានស្រុកកំណើតនៅ​ ភូមិថ្នល់កោង ឃុំរំដោះ ស្រុករវៀង ខេត្តព្រះវិហារ ទីលំនៅបច្ចុប្បន្ននៅភូមិអញ្ចាញសង្កាត់នគរធំ ក្រុងសៀមរាប។

ប្រភពបានឲ្យដឹងថាជនរងគ្រោះឈ្មោះ ហឿន វីរៈ ភេទប្រុសអាយុ៣៥ឆ្នាំ មុខរបរលក់ដូរ កំពុងស្ថិតនៅក្នុងផ្ទះក៏ស្រាប់តែដាច់ចរន្តអគ្គិសនី ដែលប្រើប្រាស់ប្រចាំថ្ងៃ ដោយមានការសង្ស័យជនរងគ្រោះ បានដើរទៅមើលប្រអប់ឌីសង់ទ័រ​ ត្រង់បង្គោលភ្លើងរបស់អគ្គីសនីសៀមរាប មានចម្ងាយពីផ្ទះប្រហែល២០០ម៉ែត្រ​ ស្រាប់តែបានឃើញជនសង្ស័យ កំពុងតែឈរស្រាវខ្សែភ្លើង ដែលតភ្ជាប់ចូលទៅផ្ទះរបស់ខ្លួន។ ជនសង្ស័យ ក៏បានទម្លាក់ខ្សែភ្លើងដែលខ្លួនកំពុងតែឈរស្រាវហើយរត់គេចខ្លួន តែត្រូវបានជនរងគ្រោះ ដេញចាប់បានភ្លាមៗតែម្ដង។

ជនសង្ស័យបានឆ្លើយសារភាពថារូបគេពិតជាបានធ្វើសកម្មភាព យកកូនពូថៅកាត់ខ្សែភ្លើង របស់ជនរងគ្រោះឈ្មោះ ហឿន វីរៈ ទំហំ២×២.៦ស.ម ពិតប្រាកដមែន​។

សមត្ថកិច្ចបានឲ្យដឹងថាករណីនេះដកហូតវត្ថុតាងមានខ្សែភ្លើងទំហំ២×២.៦ស.ម ប្រវែង២០ម៉ែត្រប្រគល់ឲ្យជនរងគ្រោះវិញ។ បច្ចុប្បន្នជនសង្ស័យនិងវត្ថុតាងត្រូវបាន នគរបាលកសាងសំណុំរឿង​ និងបញ្ជូនជនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖មន្ត្រីបានអះអាងថាខ្លួននឹងធ្វើការដោះលែង សត្វស្លាប៣ប្រភេទផ្សេងទៀត ឲ្យមានសេរីភាព នៅក្នុងព្រៃធម្មជាតិឧទ្យានអង្គរ។

មន្ត្រីជាន់ខ្ពស់អាជ្ញាធរជាតិអប្សរា បានថ្លែងប្រាប់អ្នកសារព័ត៌មាន នៅរសៀលថ្ងៃចន្ទ ទី១៧ ខែឧសភា ឆ្នាំ២០២១នេះថា៖ កាលពីចុងសប្ដាហ៍កន្លងទៅ គម្រោងដោះលែងសត្វព្រៃក្នុងឧទ្យានអង្គរ ក្រោមកិច្ចសហការរវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance  បានដឹកជញ្ជូនសត្វស្លាប៣ប្រភេទផ្សេងទៀត សរុបចំនួន១១ក្បាល មកកាន់ព្រៃរមណីយដ្ឋានអង្គរ។ សត្វស្លាបទាំងនោះរួមមាន សត្វក្ងោក(Peafowl) ចំនួន៥ក្បាល សត្វកេងកងធំ(Great Hornbill) ចំនួន៣ក្បាល និងសត្វព្វាំង(Wreathed Hornbill) ចំនួន៣ក្បាល ដែលទទួលបានជាអំណោយពីអង្គការអភិរក្សសត្វព្រៃនានា និងប្រជាពលរដ្ឋ យកមកផ្សាំនៅក្នុងព្រៃរមណីយដ្ឋានអង្គរ ដែលក្រុមការងារគម្រោងនឹងធ្វើការដោះលែងសត្វស្លាបទាំងនេះចេញពីទ្រុងចូលទៅក្នុងព្រៃនាពេលខាងមុខ។

មន្ត្រីដដែលបានបន្តថា៖កន្លងមកគម្រោងទទួលបានជោគជ័យក្នុងការដោះលែងសត្វព្រៃជាច្រើនប្រភេទចូលក្នុងព្រៃធម្មជាតិនៃឧទ្យានអង្គរ មានដូចជា សត្វទោចមកុដ(Pileated gibbon) ចំនួន១១ក្បាល(កើតកូនបានចំនួន៤ក្បាល) សត្វឈ្លូស(Red muntjac) ចំនួន៤ក្បាល សត្វស្វាព្រាម(Silvered langurs) ចំនួន១២ក្បាល សត្វសំពោចក្រអូប(Common palm civets) ចំនួន៥ក្បាល សត្វភេខ្លួនរលោង(Smooth-coated otter) ចំនួន៤ក្បាល(កើតកូនបានចំនួន២ក្បាល) សត្វឆ្មារដាវ(Leopard Cat) ចំនួន២ក្បាល និងសត្វកេងកងតូច(Oriental Pied Hornbill) ចំនួន២ក្បាល និងសត្វផ្សេងៗមួយចំនួនទៀត។  មកដល់សព្វថ្ងៃសត្វទាំងអស់នេះនៅតែមានវត្តមាននៅទីនោះនៅឡើយ ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារ។

បើតាមមន្ត្រីអាជ្ញាធរបានបញ្ជាក់ថា ដើម្បីឲ្យសត្វព្រៃទាំងអស់បន្តវត្តមាននៅក្នុងព្រៃធម្មជាតិនៃឧទ្យានអង្គរយើង និងបង្កើនចំនួនបន្ថែមទៀត អាជ្ញាធរជាតិអប្សរា និងគម្រោងដោះលែងសត្វព្រៃក្នុងឧទ្យានអង្គរ សូមអំពាវនាវជូនសាធារណជន ភ្ញៀវជាតិ អន្តរជាតិ ជាពិសេសប្រជាពលរដ្ឋដែលរស់នៅតំបន់នោះ ចូលរួមថែរក្សាសត្វព្រៃទាំងនោះទាំងអស់គ្នា ជៀសវាងពេលប្រទះឃើញមានបំណងមិនល្អ និងមេត្តាកុំផ្តល់ចំណីឲ្យសត្វទាំងនោះ៕SRP

ខេត្តសៀមរាប៖លោក ហ៊ុន ប៉ូគា​ ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប​ ព្រមជាមួយប្រធាន អនុប្រធានសាខាក្រុង-ស្រុក និងសមាជិក​ ​សមាជិកា​ បានប្រគល់អណ្តូងទឹកមួយ និង អំណោយមួយចំនួនជូនប្អូនស្រី ឃិន សុជាតា​ ដែលត្រូវបីបាច់ប្អូនចំនួន២នាក់​ ដោយឪពុកម្តាយទៅធ្វេីការនៅប្រទេសថៃ​ ដោយបាត់ដំណឹងរហូតដល់បច្ចុប្បន្ន និងមានអំណោយជូនគ្រួសារ​ ដែលមានជីវភាពខ្វះខាត​ ចំនួន១៩គ្រួសារ ថែមទាំងប្រជាការពារភូមិ​ ចំនួន២០នាក់ផងដែរ។

ការចែកនេះ ធ្វើឡើងនៅថ្ងៃអាទិត្យ ទី១៦ខែឧសភា ឆ្នាំ២០២១ ស្ថិតនៅក្នុងភូមិអារញ្ញ សង្កាត់សៀមរាប ក្រុងសៀមរាប ខេត្តសៀមរាប ដោយមានការចូលរួមពីលោក ឃុន សាវឿន អនុរដ្ឋលេខាធិកាក្រសួង កសិកម្ម រុក្ខាប្រមាញ់ និងនេសាទ និង លោក ម៉ៃ សាម៉េត ចៅសង្កាត់ក្រុងសៀមរាប លោក នួន ពុទ្ធារ៉ា អភិបាលក្រុងសៀមរាប ព្រមទាំង មានការចូលរួមពី ស.ស.យ.ក សង្កាត់សៀមរាប ផងដែរ។

អំណោយដែលប្រគល់ជូនគ្រួសារប្អូនស្រី ឃិន សុជាតា រួមមាន៖
⁃ អណ្តូងទឹកចំនួន ១
⁃ អង្ករ ២០គីឡូក្រាម
⁃ មី ១កេស
⁃ ត្រីខ ១យួរ
⁃ ទឹកត្រី ១យួរ
⁃ ទឹកសុីអុីវ ១យួរ
⁃ ប្រេងឆា ១ដប
⁃ ស្ករស ១គីឡូ
⁃ អំបិល ១គីឡូ
⁃ ប៊ីចេង ១កញ្ចប់
⁃ ម៉ាស ចំនួន ៥០ម៉ាស
⁃ ជែលលាងដៃ ៥០០មល ១ដប
⁃ ថវិកា ២មុឺនរៀល

+ អំណោយដែលប្រគល់ជូន១៩គ្រួសារដោយក្នុងមួយគ្រួសារទទួលបាន៖
⁃ អង្ករ ២០គីឡូក្រាម
⁃ មី ១កេស
⁃ ត្រីខ ១យួរ
⁃ ទឹកត្រី ១យួរ
⁃ ទឹកសុីអុីវ ១យួរ
⁃ ប្រេងឆា ១ដប
⁃ ស្ករស​ ១គីឡូ
⁃ អំបិល ១គីឡូ
⁃ ប៊ីចេង ១កញ្ចប់
⁃ ម៉ាស ចំនួន ៥០ម៉ាស
⁃ ជែលលាងដៃ ៥០០មល ១ដប
⁃ ថវិកា ២មុឺនរៀល

-ប្រជាការពារភូមិចំនួន ២០នាក់ ដោយក្នុងមួយនាក់ ទទួលបានថវិកា ២មុឺនរៀល
⁃ មេឃុំ ៤មុឺនរៀល
⁃ មេភូមិ ៣មុឺនរៀល។

នៅព្រឹកមិញនេះផងដែរ លោក សយ សិរីវុឌ្ឍ​ ប្រធានសមាគមចលនាយុវជាកម្ពុជា(ក្រុម១៥៧)​ ស្រុកពួក ព្រមជាមួយសមាជិក សមាជិកា​ បាននាំយកអំណោយជាគ្រឿងឧបភោគបរិភោគជូន លោក ប៉ក់ ម៉ៃ ដែលកំពុងជួបការខ្វះខាតប្រចាំថ្ងៃ រស់នៅ ភូមិអាង ឃុំកែវពណ៌ ស្រុកពួក ដោយមានការចូលរួមពីលោក សាម ជឿយ ជំទប់ទី២ នឹងលោក ទេពអុី និស្សិត និង កញ្ញ ម៉េង ចាន់វត្តី សមាជិក ស.ស.យ.ក​។

+ អំណោយដែលត្រូវប្រគល់ជូនរួមមាន៖
⁃ អាកុល ៥លីត្រ
⁃ ម៉ាសចំនួន​ ២៥០ ម៉ាស
⁃ អង្ករ៥០គីឡូក្រាម
⁃ មី​ ចំនួន២កេស
⁃ ត្រីខ កំប៉ុងចំនួន១យួរ
⁃ ទឹកសុីអុីវ ចំនួន១យួរ
⁃ ទឹកត្រី ចំនួន១យួរ
⁃ ប្រេងឆា ចំនួន១ដប
⁃ ស្ករស ចំនួន១គីឡូក្រាម
⁃ ប៊ីចេង ចំនួន១គីឡូក្រាម
⁃ អំបិល ចំនួន១គីឡូក្រាម
⁃ ខ្ទឹម ចំនួន១គីឡូក្រាម
⁃ ប្រហុក ចំនួន១គីឡូក្រាម។

ក្នុងពិធីសំណេះសំណាល និងចែកអំណោយនេះផងដែរ លោក ហ៊ុន ប៉ូគា បានមានផ្តាំផ្ញេីដល់ប្រជាពលរដ្ឋ និង ប្រជាការពារភូមិ​ សូមឲ្យចូលរួមរក្សាអនាម័យ និង ចូលរួមអនុវត្តតាម ប្រសាសន៍របស់ សម្តេចតេជោ (៣ការពារ ៣កុំ) ឲ្យបានខ្ជាប់ខ្ជួន​ ដើម្បីចៀសផុតពីជំងឺកូវីដ-១៩ ទាំងអស់គ្នាផងដែរ៕SRP

ខេត្តសៀមរាប៖ចលនាយុវជនកម្ពុជា(ក្រុម១៥៧) សាខាស្រុកចំនួន៣ នៅក្នុងខេត្តសៀមរាប នាថ្ងៃទី១៥ខែឧសភា ឆ្នាំ២០២១ នេះ បានចុះសំណេះសំណាលនិងចែកអំណោយនិងសម្ភារ ចំនួន៣គោលដៅផ្សេងៗគ្នា។គោលដៅទី០១

លោក ទេព ពិទូរ្យ ប្រធានសមាគមចលនាយុវជនកម្ពុជា(ក្រុម១៥៧)ស្រុកស្រីស្នំ បានដឹកនាំសមាជិក និងសប្បុរសជន នាំយកជំនួយជាសម្ភារប្រើប្រាស់សម្រាប់ប្រយុទ្ធប្រឆាំងនឹងជំងឺកូវីដ-១៩ ជូនដល់រដ្ឋបាលលស្រុកស្រីស្នំ  កងកម្លាំងឈរជើងត្រួតពិនិត្យតាមព្រំប្រទល់  និងអំណោយដល់ជូនដល់គ្រួសារក្រីក្រ ដោយមានការចូលរួមពីសមាជិក ស.ស.យ.ក  និងអាជ្ញាធរស្រុក។

អំណោយដែលត្រូវប្រគល់ជូនលោកអភិបាលស្រុករួមមាន៖

⁃ អាកុល ចំនួន ៣០លីត្រ

⁃ ម៉ាសចំនួន ៥០០ ម៉ាស

⁃ ទឹកសុទ្ធចំណុះ៥០០មីលីម៉ីត ចំនួន ២០កេស

⁃ មីចំនួន៥កេស

អំណោយជូនដល់កងកម្លាំងឈរជើង២គោលដៅ  រួមមាន៖

–  អាកុលចំនួន៣០លីត្រ

–  ម៉ាសចំនួន៥០០ម៉ាស

–  ទឹកសុទ្ធចំណុះ៥០០មីលីម៉ីតចំនួន៣០យួរ

–  ទឹកផ្លែឈើចំនួន៥កេស

–  មីចំនួន៣កេស

+ អំណោយជូនដល់គ្រួសារក្រីក្រចំនួន៨គ្រួសារ រួមមាន៖

–  អង្ករចំនួន២០គីឡូ

–  មី១កេស

–  ត្រីខ១យួរ

–  ទឹកត្រី១យួរ

–  ទឹកស៊ីអ៊ីវ១យួរ

–  ប្រេងឆា១ដប

–  ស្ករ១គីឡូ

–  អំបិល១គីឡូ

–  ប៊ីចេង១គីឡូ

–  ថវិការចំនួន២០,០០០រៀល

ទី២

លោក  ផយ  ម៉ក់  ប្រធានសមាគមចលនាយុវជនកម្ពុជា(ក្រុម១៥៧)ស្រុកវ៉ារិន នឹងលោក  សន  សុខហេង  ប្រធានទំនាក់ទំនងសាធារណៈ  ថ្នាក់ខេត្តបានដឹកនាំសមាជិក សមាជិកា  នាំយកអំណោយមួយចំនួនសម្រាប់ប្រើប្រាស់យុទ្ធនាការ ប្រយុទ្ធប្រឆាំងនឹងជំងឺកូវីដ-១៩ ជូនដល់រដ្ឋបាលស្រុកវ៉ារិន  នឹងអធិការនគរបាលស្រុកវ៉ារិន  ដោយមានការចូលរួមពី លោក ប៊ុត  វិបុល ប្រធាន ស.ស.យ.ក  ស្រុកព្រមទាំងសមាជិក ផងដែរ។

អំណោយដែលត្រូវប្រគល់ជូនរដ្ឋបាលស្រុករួមមាន៖

_អាកុល ២០ លីត្រ

_ម៉ាសចំនួន ៥០០ ម៉ាស

_ទឹកបរិសុទ្ធ៣៥យួ+៥កេស

_ពងមាន់ចំនួន ១៥០  គ្រាប់

_មីម៉ាម៉ា ៥កេស

អំណោយដែលត្រូវប្រគល់ជូនរអធិការស្រុករួមមាន៖

_អាកុល ២០  លីត្រ

_ម៉ាសចំនួន ៥០០ ម៉ាស

_ទឹកបរិសុទ្ធ ៣៥យួ+៥កេស

_ពងមាន់ចំនួន ១៥០  គ្រាប់

_មីម៉ាម៉ា ៥កេស

ទី៣

លោក ចែម ចន្ថា ប្រធានសមាគមចលនាយុវជនកម្ពុជា (ក្រុម១៥៧) ស្រុកជីក្រែង ព្រមជាមួយសមាជិក  សមាជិកា បាននាំយកអំណោយប្រគល់ជូន លោកតាំង លីហេង អធិការនគរបាលស្រុកជីក្រែង សម្រាប់សម្រួលការងារចរាចរណ៍ផ្សេងៗ។

អំណោយដែលប្រគល់ជូនរួមមាន៖

-បារ៉ាស់ ចរាចរណ៍ចំនួន ៧ ផ្ទាំង

-ដំបងភ្លើងចរាចរណ៍ ចំនួន១០ដំបង

– ថ្ម សម្រាប់ដាក់ដំបងភ្លើងចរាចរណ៍ចំនួន២០ដុំ។ ក្នុងឱកាសនេះដែរ លោកប្រធានសាខាទាំង៣ស្រុក បានមានមតិសំណេះសំណាល និងផ្ដាំផ្ញើសូមឲ្យចូលរួមអនុវត្តតាមប្រសាសន៍របស់ សម្តេច (៣ការពារ ៣កុំ) ឲ្យបាន ដើម្បីចៀសផុតពីជំងឺកូវីដ-១៩ទាំងអស់គ្នា៕SRP

ខេត្តសៀមរាប៖ការឈូសឆាយដីព្រៃជាច្រើនហិកតានៅក្នុងភូមិសាស្រ្តស្រុកស្វាយលើ មានការសង្ស័យថា ករណីនេះអាចមានការឃុបឃិតគ្នាជាប្រព័ន្ធ។

ប្រជាពលរដ្ឋបានរាយការណ៍ថា ទីតាំងឈូសឆាយដីព្រៃ ស្ថិតនៅ(ខាងក្រោយស្នាក់ការ បរិស្ថាន អូរថ្មដាប់) ក្នុងស្រុកស្វាយលើខេត្តសៀមរាប។

ទោះជាយ៉ាងណាពាក់ព័ន្ធករណីឈូសឆាយដីព្រៃនេះ អាជ្ញាធរស្រុកស្វាយលើ បានចាប់អេស្កាចំនួន២គ្រឿងដែលកំពុងធ្វើសកម្មភាព
ឈូសឆាយព្រៃជាក់ស្ដែង។

ការចាប់គ្រឿងចក្រចំនួន២គ្រឿងនេះ ធ្វើឡើងនៅរសៀលថ្ងៃទី១៤ខែឧសភា ឆ្នាំ២០២១ ម្សិលមិញ ស្ថិតនៅភូមិត្រពាំងឫស្សី ឃុំបឹងមាលា ស្រុកស្វាយលើ ខេត្តសៀមរាប។

យោងតាមប្រភពពីប្រជាពលរដ្ឋបានរាយការណ៍បន្តថាការឈូសឆយនេះធ្វើឡើងជិត១សប្តាហ៍មកហើយ ដោយអស់ផ្ទៃដីព្រៃជាច្រើនហិកតា។ ក្នុងនោះបណ្ដាលឲ្យខូចខាតមានដើមឈើធ្នង់និងដើមឈើលេខ២ជាច្រើនដើមត្រូវបានផ្តួលរលំ ហើយថ្មភក់ជាច្រើនផ្ទាំងត្រូវបានគេឈូសចោល។ ប្រភពបានបន្តថា ថៅកែដែលឲ្យគ្រឿងចក្រឈូសឆាយដីព្រៃខាងលើ រស់នៅភូមិសាលាកន្សែង សង្កាត់ស្វាយដង្គំ ក្រុងសៀមរាប។

នាយសង្កាត់រដ្ឋបាលព្រៃឈើស្រុកស្វាយលើ លោកម៉ែន វុទ្ធី បានប្រាប់អ្នកសារព័ត៌មានថា ករណីនេះ ក្រុមសមត្ថកិច្ច ចុះពិនិត្យតីតាំងខាងលើ និងដកហូតយកអេស្ការ ចំនួន២គ្រឿងយកមករក្សាទុកនៅសង្កាត់រដ្ឋបាលព្រៃឈើស្រុកស្វាយលើ រង់ចាំចំណាត់ការបន្តទៀត។លោកថា ខាងលោកកំពុងនៅរង់ចាំម្ចាស់ដីយកប្លង់ដីដែលគេអះអាងថា មានប្លង់ត្រឹមត្រូវដើម្បីពិនិត្យទាំងអស់គ្នា៕SRP

ខេត្តសៀមរាប៖លោក សឿន តុលា ស្ថាបនិកក្រុមហ៊ុន ផា ផាយ៉ា បានសរសេរនូវអត្ថបទ មួយក្រោមចំណងជើងថា “គុណតម្លៃនៃការផ្ដោតយកចិត្តទុកដាក់”។
លោកសឿន តុលា បានសរសេរថា៖ “ភាពជោគជ័យ និងភាពមានបាន នៅមិនឆ្ងាយពីលោកអ្នកទេ ប្រសិនបើអ្នកផ្ដោតយកចិត្តទុកដាក់ ធ្វើរឿងតែមួយឲ្យបានសម្រេច”

-ប្រសិនបើអ្នកសម្រេចចិត្តធ្វើអ្វីមួយសូមទទួលខុសត្រូវ ដោយខ្លួនឯងចំពោះការសម្រេចចិត្តនោះ ពីព្រោះអ្នកនឹងទទួលយកហានិភ័យ ធំជាងកម្លាំងរបស់អ្នក ប្រសិនបើអ្នក មិនធ្វើការផ្ដោត ធ្វើរឿងនោះឱ្យចប់ចុងចប់ដើមទេនោះ ។
សំណួរដែលត្រូវសួរថា : តើអ្នកណា ធ្វើឱ្យបាត់បង់ពេលវេលារបស់អ្នក ប្រសិនបើអ្នក មានចិត្តរីករាយនោះ?
អ្នកនឹងអាចបង្កើតឱកាសថ្មីសម្រាប់អនាគត បន្ថែមទៀតបាន នៅពេលដែល អ្នកបានយល់ដឹង មូលដ្ឋានគ្រឹះគ្រប់គ្រាន់ ចេញពីតម្លៃនៃការផ្ដោត យកចិត្តទុកដាក់ ដែលអ្នកបានបំពេញហើយនោះ។
មានមនុស្សជាច្រើនក្នុងលោកនេះ បានប្រឈមមុខ ជាមួយ ការបាត់បង់ ទ្រព្យសម្បត្តិ និងដើមទុន នៅពេលដែលអាជីវកម្មរបស់ខ្លួនបរាជ័យ នោះមានន័យថា នៅពេលដែលពួកគេ បាន
បាត់បង់់ការផ្ដោតយកចិត្តទុកដាក់ ទៅលើអាជីវកម្មនោះ។ សូមចង់ចាំថា” ប្រសិនបើអ្នកផ្ដោត និងបម្រើដល់អាជីវកម្មរបស់អ្នក អាជីវកម្មរបស់អ្នកនិងបម្រើអ្នកវិញ”
ការស្វែងរកចំណេះដឹងបន្ថែម គឺជាការងាររបស់ម្ចាស់អាជីវកម្ម នៅក្នុងលោកយើងនេះ គ្មានអ្នកជោគជ័យណា ដែលក្លាហាន បិទភ្នែក បិទត្រចៀក នឹងអាងចំណេះដឹង របស់ខ្លួន ដោយមិនបានស្វែងរក ចំណេះដឹងបន្ថែមទៀតនោះទេ។
ភាពក្លាហានពិតប្រាកដ
គឺមិនមែនជាការ លោតផ្លោះនោះទេ ” គឺធ្វើកិច្ចការដដែល ប៉ុន្តែឲ្យប្រសើរជាងមុនជារៀងរាល់ថ្ងៃ ពីព្រោះ ពេលណាដែលយើងធ្វើ យើងមានកំហុស ពេលដែលយើងមានកំហុស នោះគឺ កុំហុស គឺជាមេរៀន ដើម្បីកែលម្អ ដើម្បី ឆ្ពោះទៅភាពប្រសើរឡើង” ដើម្បីឲ្យបានគុណភាពការងារ ប្រសើរឡើង ។
សូមចងចាំថា: សម្រាប់អ្នករៀន ពួកគេឈឺចាប់បំផុត នៅពេលដែលបណ្ដោយឲ្យមានកំហុសកើតឡើងដដែល ៗ។
ជាទូទៅអ្នកដែលបរាជ័យ កើតចេញពីការងារដែលគ្មានគុណភាព ពីព្រោះពួកគេគ្មានបានរៀនអ្វីពីកំហុសឡើយ ។

សូមចងចាំថា: ដើម្បីអោយមានភាពប្រសើរឡើង គឺត្រូវចំណាយពេលវេលា រៀនពីបទពិសោធ និងបន្តធ្វើ
#បញ្ហាដ៏ធំនោះ គឺសំនួរមួយ ដែលត្រូវសួរថា:
តើអ្នកធ្វើ និងរៀន ដើម្បីឲ្យមានជំនាញជាសហគ្រិន ឬ ជំនាញអ្វីមួយ ដើម្បី ក្លាយជាបុគ្គលិក?
ពីព្រោះ ទាំងសហគ្រិន ទាំងបុគ្គលិក ពួកគេមានកិច្ចការធ្វើផ្សេងៗគ្នា ប៉ុន្តែ គ្រប់កិច្ចការទាំងអស់ តម្រូវឲ្យមានការផ្ដោត យកចិត្តទុកដាក់ ទើបពួកគេ យល់អំពីតម្លៃខ្លួនពិតប្រាកដ។
និពន្ធដោយលោក សឿន តុលា
ស្ថាបនិកក្រុមហ៊ុន ផា ផាយ៉ា PAPAYA NEXT STEP CO,.LTD. * PAPAYA REAL ESTATE (គម្រោងអភិវឌ្ឍន៍អចលនទ្រព្យ)*PAPAYA HOMESTAY see(គម្រោងលើវិស័យទេសចរណ៍)*PAPAYA GARDEN  (គម្រោងលើវិស័យកសិកម្ម)