ខេត្តសៀមរាប

ខេត្តសៀមរាប៖ខ្ញុំបាទ សឹង្ហ សំរឹទ្ធិ អនុប្រធានក្រុមការងារគណបក្សប្រជាជនកម្ពុជា ចុះជួយឃុំកណ្ដែក ប្រធានក្រុមការងារបក្សចុះជួយភូមិត្រាង និងភូមិអូរ សូមបួងសួងដល់វត្ថុស័ក្តិសិទ្ធិក្នុងលោក ប្រោសប្រទានពរជ័យសិរីមង្គល វិបុលសុខ មហាប្រសើរជូនចំពោះ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្រ្តីក្រសួងការពារជាតិ នាឱកាសដ៏មហាជ័យមង្គលចម្រើនជន្មាយុ គម្រប់ខួប៧៦ ឈានចូល ៧៧ឆ្នាំ។

ខ្ញុំបាទ  សូម សម្តេច មានសុខភាពល្អបរិបូរណ៍ អាយុយឺនយូរ និងមានកម្លាំងខ្លាំងក្លា ឈ្នះអស់មារសត្រូវគ្រប់ទិសទី ដើម្បីបន្តបេសកកម្មដ៏ថ្លៃថ្លាបម្រើប្រទេសជាតិ មាតុភូមិ និងប្រជាជន ឱ្យរីកចម្រើនរុងរឿង៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថា ជម្លោះក្នុងវង់ផឹកស៊ីនៅភោជនីយដ្ឋាន ថិម ភល ប៉ូលិសបានបាញ់មួយគ្រាប់បណ្ដាលឲ្យបុរសម្នាក់រងរបួសធ្ងន់។

របាយការណ៍របស់សមត្ថកិច្ចជំហានដំបូងបានឲ្យដឹងថា ហេតុការណ៍បានកើតឡើងនៅវេលាម៉ោង៣និង១០នាទី​ ថ្ងៃសុក្រ ទី០៥ ខែវិច្ឆិកា ឆ្នាំ២០២១ នៅភោជនីដ្ឋានថិម ភល ស្ថិតក្នុងភូមិស្ទឹងថ្មី សង្កាត់ស្វាយសង្គំ ក្រុងសៀមរាប។

របាយការណ៍បានបន្តថា ករណីបាញ់បោះនេះបណ្តាលអោយត្រូវជនរងគ្រោះ ឈ្មោះភាព ប៊ុណ្ណារឹទ្ធ ភេទប្រុសអាយុ៣០ឆ្នាំ មុខរបរជាងភ្លេីង នៅភូមិសំរោងត្បូង ឃុំសំរោង ស្រុកសូទ្រនិគម ខេត្តសៀមរាប ត្រូវចំក្រោមក្លៀកខាងឆ្វេង១គ្រាប់ បណ្តាលអោយរងរបួសធ្ងន់កំពុងសង្រោះបន្ទាន់នៅមន្ទីរពេទ្យបង្អែកខេត្តសៀមរាប។

ស្នងការរងទទួលផែនព្រហ្មទណ្ឌនៃស្នងការខេត្តសៀមរាប លោកភឹង ចិន្តារ៉េត បានថ្លែងប្រាប់ សៀមរាបប៉ុស្តិ៍ តាមទូរស័ព្ទថា ករណីនេះ ជនសង្ស័យត្រូវបានប៉ូលិសព្រហ្មទណ្ឌខេត្តសៀមរាបចាប់ខ្លួនបានហើយ។

លោកភឹង ចិន្តារ៉េត ថា សមត្ថកិច្ចរបស់លោកកំពុងសាកសួរជនដៃដល់។ តែលោក បានបញ្ជាក់ថា ករណីនេះអំពើហិង្សា វាយទៅវាយមកឈានដល់បាញ់។ វាយប៉ូលិស១ដបមុន ប៉ូលិសក៏បាញ់វិញទៅ។ ហ្ចឹងទុកលទ្ធភាពអោយស៊ើបអង្កេតសិន។ ទោះជាយ៉ាងណាមិនទាន់បង្ហាញអត្តសញ្ញាណជនដៃដល់នៅឡើយទេ។

យោងតាមប្រភពបានឲ្យដឹងថា ភាគីទាំងពីរមានទំនាស់ករណីហិង្សាក្នុងកន្លែងផឹកសុី ដោយមូលហេតុ ភាគីម្ខាងទៀតនោះគ្នាច្រើន ហើយប៉ូលីសគ្នាតិចគេវាយមកប៉ូលិស ដោយគ្នាគេច្រើនក៏បាញ់ការពារខ្លួនតែម្ដង។ តែទោះជាយ៉ាងណាក៏ដោយនេះគ្រាន់តែជាប្រភពលើកឡើងតែប៉ុណ្ណោះ៕SRP

ខេត្តសៀមរាប៖មន្ត្រីយោធាម្នាក់ ត្រូវបានសមត្ថកិច្ចខេត្តសៀមរាប ចាប់ខ្លួនក្រោយពីបានធ្វើសកម្មភាពផ្ទុះអាវុធបង្កឱ្យភ្ញាក់ផ្អើល។ ការចាប់ខ្លួនធ្វើឡើងនៅរសៀលថ្ងៃទី ៤ ខែវិច្ឆិកាឆ្នាំ ២០២១នេះ។

មន្ត្រីនគរបាលព្រហ្មទណ្ឌខេត្តសៀមរាបបានថ្លែងប្រាប់សៀមរាប ប៉ុស្តិ៍ ថា ករណីផ្ទុះអាវុធ ត្រង់ចំណុចមុខភោជនីយដ្ឋាន ស្នាដៃម៉ែក្មែក៥ ស្ថិតក្នុងភូមិសាលាកន្សែង សង្កាត់ស្វាយដង្គំ ក្រុងសៀមរាប នៅយប់ថ្ងៃទី៣ ខែវិច្ឆិកាឆ្នាំ២០២១។

មន្ត្រីនគរបាលបានបន្តថា ជនបង្កមានឈ្មោះ កែវ វី ភេទប្រុសអាយុ៣៧ឆ្នាំមុខរបរ ជាទាហ៊ានកងវិស្វកម្ម ក្រសួងការពារជាតិ បច្ចុប្បន្ន រស់នៅភូមិទួលគោក ខណ្ឌទួលគោក រាជធានីភ្នំពេញ។ មន្ត្រីថា ឈ្មោះ កែវ វី ជាភ្ញៀវចូលមកផឹកសុីក្នុងហាងស្នាដៃម៉ែក្មែក៥ពេលនោះ ឈ្មោះ កែវ វី មានទំនាស់ពាក្យសម្តី ជាមួយនារីជាសង្សារ នៅពេលចេញមកមុខហាង កន្លែងចតម៉ូតូក៏បានដកកាំភ្លើងខ្លីម៉ាក G Lock ១៩ ពីចង្កេះ បាញ់ផ្ទុកដី ០១គ្រាប់ ហើយឡើងជិះរថយន្ត ជាមួយមិត្តភ័ក្រគេចខ្លួន។ ចំណែកនារីជាសង្សារបានជិះម៉ូតូ តាមពីក្រោយចេញទៅបាត់។ ក្រោយកើតហេតុសមត្ថកិច្ចបានចុះ ទៅដល់រកឃើញវត្ថុតាងសំបកគ្រាប់មួយ។

មន្ត្រីនគរបាលបានដកស្រង់ចម្លើយរបស់ ឈ្មោះ កែវ វី ថា រូបគាត់ជាទាហ៊ាន កងវិស្មកម្ម ក្រសួងការពារជាតិ ដោយចុះបេសកកម្ម មកធ្វើផ្លូវក្នុងខេត្តសៀមរាប បានរយៈពេល ០៣ថ្ងៃហើយ។ នៅវេលាម៉ោង២១យប់ ថ្ងៃទី០៣ ខែវិច្ឆិកា ម្សិលមិញ រូបគាត់និងសង្សារ ឈ្មោះ ឈ. ច.ឌ ភេទស្រី២៧ឆ្នាំ បានជិះម៉ូតូ ទៅផឹកសុីជាមួយមិត្តភ័ក្រ នៅហាងម៉ែក្មែក៥ លុះចេញវិញ ដើរមកកន្លែងចតម៉ូតូ បំណងទៅដេក ដោយពេលនោះ គាត់បានហៅអោយសង្សារគាត់ឡើងជិះម៉ូតូ ប៉ុន្តែសង្សារគាត់មិនព្រម ពេលនោះគាត់ និងសង្សារ មានទំនាស់ពាក្យសម្តីនិងគ្នា គាត់ក៏បានដកកាំភ្លើងបាញ់ ០១គ្រាប់ ផ្ទុបទៅនឹងដី ហើយក៏ឡើងជិះរថយន្ត ជាមួយមិត្តភ័ក្រ ម៉ាកluxes570 ពណ៌ខ្មៅស្លាកលេខ រដ្ឋ06.2-9998 គេចខ្លួនបាត់។ ករណីនេះសមត្ថកិច្ច កសាងសំណុំរឿងបញ្ជូនជនដៃដល់ អនុវត្តតាមផ្លូវច្បាប់៕SRP

ខេត្តសៀមរាប៖អាជ្ញាធរខេត្តបានកំពុងជំរុញ ការបើកដំណើរទទួលភ្ញៀវទេសចរណ៍ឡើងវិញ។

ការជំរុញបើកឲ្យមានដំណើរការទេសចរណ៍ឡើងវិញនៅថ្ងៃទី ០៣ ខែ វិច្ឆិកា ម្សិលមិញ ក្នុងឱកាសលោកទៀ សីហា អភិបាលខេត្តសៀមរាប ចុះពិនិត្យ តំបន់កំពង់ផែចុងឃ្នៀស។

លោកទៀ សីហា បានលើកឡើងថា បន្ទាប់ពីរាជរដ្ឋាភិបាលសម្រេចដកហូតទីតាំងវិនិយោគរបស់ក្រុមហ៊ុន ស៊ូជីង និង បានប្រគល់ភារកិច្ចជូនដល់រដ្ឋបាលខេត្តធ្វើការគ្រប់គ្រងជាបណ្តោះអាសន្ន ដោយធ្វើកិច្ចសហការជាមួយគ្រឹះស្ថានអង្គរ នឹងសម្រេចឲ្យរៀបចំបើក ទេសចរណ៍ឡើងវិញ។

លោកអភិបាលខេត្ត ក៏បានជំរុញដល់គណៈកម្មការ រៀបចំធ្វើលិខិតដាក់ទៅក្រសួងសេដ្ឋកិច្ច និងហិរញ្ញវត្ថុ ដើមី្បធ្វើការ ដោះស្រាយជាមួយក្រុមហ៊ុន ស៊ូជីង និង បានជំរុញដល់គ្រឹះស្ថានអង្គរ ធ្វើការជួសជុលជាបណ្តោះអាសន្ន ជាបន្ទាន់លើ ហេដ្ឋារចនាសម្ព័ន្ធនៅតំបន់កំពង់ផែចុងឃ្នៀស ដើមី្បត្រៀមលក្ខណៈ ទទួលស្វាគមន៍នៅពេលបើកទេសចរណ៍ឡើងវិញ នៅដើមឆ្នាំ២០២២ខាងមុខ។ ចំពោះទិសដៅ និង គម្រោងផែនការដែលគ្រឹះស្ថានអង្គរលើកឡើង និង ត្រូវអនុវត្តបន្តក្រោយពេលបើកដំណើរការទទួលភ្ញៀវទេសចរណ៍ឡើងវិញនេះ។ ក្នុងនោះដែរគម្រោងរបស់គ្រឹះស្ថានអង្គរ ត្រូវធ្វើការជួសជុល កែសម្រួលជាបន្ទាន់នោះ គឺកន្លែងភ្ញៀវអង្គុយរងចាំ , បញ្ជរលក់សំបុត្រ , ច្រកចុះនិងឡើងពីកាណូត ,ទីតាំងចំណតរថយន្តធំតូច និង បន្ទប់ទឹកផងដែរ ។

លោកបន្តថាយើងត្រូវបន្តធ្វើការដោះស្រាយនូវរាល់បញ្ហា ដែលក្រុមហ៊ុនបង្កើតជាបញ្ហាកន្លងមក។ កត្តាសំខាន់នោះគ្រឹះស្ថានអង្គរ ក៏ត្រូវយកចិត្តទុកដាក់ខ្ពស់ពីសុវត្ថិភាពភ្ញៀវ ក្នុងពេលឡើង ចុះកាណូត ព្រមទាំងអនាម័យបរិស្ថាន នៅក្នុងតំបន់កំពង់ផែចុងឃ្នៀស ដើមី្បទាក់ទាញអារម្មណ៍ដល់ភ្ញៀវជាតិ និង អន្តរជាតិ ចូលមកទស្សនានៅតំបន់ធម្មជាតិបឹងទន្លេសាប៕SRP

ខេត្តសៀមរាប៖ស្នងការរងប៉ូលិសខេត្តសៀមរាប បានបំភ្លឺថា រថយន្តស៊េរីទំនើបពាក់ស្លាកលេខរដ្ឋ ដែលបណ្ដាញសង្គមហ្វេសប៊ុកនិងសារព័ត៌មានមួយចំនួនបានធ្វើការចុះផ្សាយថាជនបង្កនោះ យោងតាមការស្រាវជ្រាវរបស់សមត្ថកិច្ច រថយន្តពាក់ស្លាកលេខរដ្ឋ២៦.២-៩៩៩៨ មិនពាក់ព័ន្ធក្នុងរឿងផ្ទុះអាវុធនោះទេ។

លោកភឹង ចិន្តារ៉េត ស្នងការរងទទួលផែនព្រហ្មទណ្ឌនៃស្នងការនគរបាលខេត្តសៀមរាបបានបញ្ជាក់ប្រាប់សៀមរាបប៉ុស្ដិ៍ថា រថយន្តស៊េរីទំនើបពាក់ស្លាកលេខរដ្ឋដែលអ្នកសារព័ត៌មាននិងសង្គមហ្វេសប៊ុកបានធ្វើការចុះផ្សាយមិនពាក់ព័ន្ធក្នុងករណីផ្ទុះអាវុធកាលពីយប់មិញនោះទេ។ លោកថាកំពុងស្រាវជ្រាវបន្តក្នុងករណីនេះ។

សូមបញ្ជាក់ថានៅថ្ងៃទី៣ឈានចូលថ្ងៃទី៤ខែ វិច្ឆិកាឆ្នាំ ២០២១ យប់មិញនេះ មានផ្ទុះអាវុធ១ គ្រាប់នៅ ទល់មុខស្នាដៃម៉ែក្មេក៥ ក្នុងសង្កាត់ស្វាយដង្គំ ក្រុងសៀមរាប។

បើតាមប្រភពពីសមត្ថកិច្ចបានឲ្យដឹងថានគរបាលព្រហ្មទន្ទកំរិតធ្ងន់បាននាំយកថៅកែហាង ស្នាដៃម៉ែក្មេង៥ ឈ្មោៈ រស់ រតនា  ប្រុស អាយុ៥១  ដែលមានទីតាំងស្ថិតនៅភូមិសាលាកន្សែង សង្កាត់ស្វាយដង្គំ ក្រុងសៀមរាប ដែលជានៅកន្លែងកើតហេតុ ទៅសាកសួរនិងធ្វើកំណត់ហេតុផងដែរ។ ទោះជាយ៉ាងណាជុំវិញហេតុការណ៍នេះគេនៅពុំទាន់ដឹងអំពីមូលហេតុនៅឡើយខណៈសមត្ថកិច្ចចម្រុះកំពុងចុះស្រាវជ្រាវដើម្បីស្វែងរកការពិត៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថា មានផ្ទុះអាវុធ១ គ្រាប់នៅកណ្ដាលក្រុងសៀមរាប បានបង្កឱ្យមានការភ្ញាក់ផ្អើលដល់សមត្ថកិច្ច។

ប្រភពព័ត៌មានបានឱ្យដឹងថា ហេតុការណ៍បានកើតឡើងនៅយប់ថ្ងៃ០៣ ខែ វិច្ឆិកា ឆ្នាំ២០២១ ស្ថិតនៅក្រោយស្តាតចាស់ ហួសម្លុប់ជ្រៃត្រជាក់៧០ ទល់មុខស្នាដៃម៉ែក្មេក៥ ក្នុងសង្កាត់ស្វាយដង្គំ ក្រុងសៀមរាប។

ប្រភពពីសមត្ថកិច្ចបានឲ្យដឹងនៅព្រឹកនេះថា ពិតជាមានករណីផ្ទុះអាវុធប្រាកដមែន។ ជនបង្កប្រើប្រាស់កាំភ្លើងប្រភេទឡុក។ ករណីនេះ ក្រុមសមត្ថកិច្ចកំពុងតែស្រាវជ្រាវ។

អធិការនគរបាលក្រុងសៀមរាប លោកដា ចំរើន បានប្រាប់បណ្ដាញអង្គភាពសៀមរាបប៉ុស្ដិ៍ ថាកំលាំងជំនាញកំពុងចុះពិនិត្យ។ ជុំវិញករណីផ្ទុះអាវុធនេះ គេនៅពុំទាន់ដឹងអំពីមូលហេតុនៅឡើយខណៈសមត្ថកិច្ចចម្រុះកំពុងចុះទៅដល់កន្លែងកើតហេតុនៅព្រឹកនេះ។

មន្ត្រីនគរបាលព្រហ្មទណ្ឌកម្រិតធ្ងន់នៃស្នងការនគរបាលខេត្តសៀមរាបបានបញ្ជាក់ថា ចំពោះរថយន្តស៊េរីទំនើបពាក់ស្លាកលេខរដ្ឋ ដែលបណ្ដាញសង្គមហ្វេសប៊ុកនិងសារព័ត៌មានមួយចំនួនបានធ្វើការចុះផ្សាយថាជនបង្កនោះ យោងតាមការស្រាវជ្រាវរបស់សមត្ថកិច្ច រថយន្តពាក់ស្លាកលេខរដ្ឋ២៦.២-៩៩៩៨ មិនពាក់ព័ន្ធក្នុងរឿងផ្ទុះអាវុធនោះទេ។

ខេត្តសៀមរាប៖សម្តេចតេជោនាយករដ្ឋមន្រ្តីហ៊ុន សែន បានផ្តល់ថវិកា២០លានរៀល និងផ្ទះ២ខ្នង ដល់គ្រួសារក្មេងប្រុស គង់ សីហា អាយុ៧ឆ្នាំ រស់នៅក្នុងភូមិត្មាតពង ឃុំរុនតាឯក ស្រុកបន្ទាយស្រី ខេត្តសៀមរាប។

ការផ្ដល់នៅថ្ងៃទី០៣ ខែវិច្ឆិកា ឆ្នាំ២០២១នេះ តាមរយៈលោកទៀ សីហា អភិបាលខេត្តសៀមរាប បន្ទាប់ពីសម្តេច ហ៊ុន សែន បានឃើញរូបភាពក្មេងប្រុសរូបនេះ ឈរដោះស្បែកជើង ពាក់ម៉ាស និងមានចងព្យួរស្បោងកាតចាក់វ៉ាក់សាំងនៅនឹងក ពេលទៅរៀននៅសាលាបឋមសិក្សាជ័យ ហើយសម្ដេចបានបង្ហោះតាមហ្វេសប៊ុក។ ក្រៅពីនេះរដ្ឋបាលខេត្តសៀមរាបក៏បានផ្តល់ទូរស័ព្ទ និងស្បៀងអាហារមួយចំនួនទៅដល់គ្រួសារក្មេងប្រុស គង់ សីហា នេះផងដែរ។

សូមជម្រាបថាក្មេងប្រុស គង់ សីហា ជាសិស្សរៀនថ្នាក់ទី១ នៅក្នុងសាលាបឋមសិក្សាជ័យ នៃឃុំរុនតាឯក មានប្អូនស្រីម្នាក់ទៀតអាយុ៣ឆ្នាំ និងស្ថិតក្នុងគ្រួសារដែលមានជីវភាពខ្វះខាត ដែលមានឪពុកម្តាយជាកសិករដើរប្រវាស់ដីស្រែគេធ្វើនៅក្នុងស្រុកស្វាយលើ ដោយហេតុតែមិនមានដីស្រែចម្ការផ្ទាល់ខ្លួនសម្រាប់ធ្វើនោះទេ។ កន្លងមក ពួកគាត់តែងតែយកកូនទៅធ្វើស្រែនៅឯស្រុកស្វាយលើជាមួយ ដោយសារតែមិនទាន់អាចចូលរៀនបាន តែដល់ពេលសាលាបើកទទួលឱ្យចូលរៀន ទើបយកកូនមកផ្ញើរជាមួយមីង ឬអ្នកជិតខាងនៅជាប់ផ្ទះឱ្យជួយមើល និងដើម្បីឱ្យកូនបានចូលរៀននឹងគេ។

លោក ទៀ សីហា បានមានប្រសាសន៍ថា ដោយសារតែក្មួយប្រុសមានចិត្តចង់រៀនសូត្រ តែជីវភាពក្នុងគ្រួសារមានការលំបាកដូច្នេះហើយបានជាសម្តេច ក៏ដូចជាសប្បុរសជនផ្សេងៗជាច្រើនបានជួយដល់ពួកគាត់ អាចឱ្យក្មេងប្រុសនេះ មានសម្ភារបានរៀនសូត្រ និងមានផ្ទះសម្បែងរស់នៅដូចជាគេដូចឯង។

លោកអភិបាលក៏បានណែដល់ឪពុកម្តាយរបស់កុមារ គង់ សីហា ត្រូវតែឱ្យកូនទៅរៀន ដោយខាងអាជ្ញាធរ និងជួយជ្រោមជ្រែង។ ហើយអាជ្ញាធរក៏កំពុងសិក្សាមើល ដើម្បីរកវិធីជួយគាត់ដើម្បីមានមុខរបរ ឬការងារធ្វើនៅក្នុងភូមិ ងាយស្រួលឱ្យកូនៗបានរៀនសូត្រ ទទួលបានចំណេះដឹង។

សូមបញ្ជាក់ថា សម្រាប់ផ្ទះ២ខ្នងដែលសម្តេចផ្តល់ជូននេះ ១ខ្នងជូនដល់គ្រួសារក្មេងប្រុស គង់ សីហា និង១ខ្នងទៀតផ្តល់ជូនដល់គ្រួសារប្អូនស្រីរបស់ម្តាយ គង់ សីហា ដែលមានជីវភាពខ្វះខាតដែរ៕SRP

ខេត្តសៀមរាប៖ក្រុមមន្ត្រីចម្រុះខេត្តសៀមរាបបានឃាត់ខ្លួនមនុស្ស៣នាក់ ពាក់ព័ន្ធប្រើប្រាស់សារធាតុញៀន ក្នុងនោះតៃកុងឡានពីរនាក់និងព្រូម្នាក់។

មន្ត្រីមន្ទីរសាធារណការខេត្តសៀមរាបបានឲ្យដឹងថា នៅថ្ងៃទី​០២ ខែ​វិច្ឆិកាឆ្នាំ២០២១ ក្រុមការងារចម្រុះចុះរឹតបន្តឹងច្បាប់ចរាចរណ៍ផ្លូវគោក​ និងត្រួតពិនិត្យយានយន្តកែច្នៃខុសលក្ខណៈបច្ចេកទេស តាមដងផ្លូវជាតិលេខ៦ នៅ
ភូមិរលួសលិច ឃុំរលួស ស្រុកប្រាសាទបាគង​ ខេត្តសៀមរាប ដោយទទួលបានលទ្ធផលដូចខាងក្រោម៖
-បានត្រួតពិនិត្យយានយន្តសរុបចំនួន​ ១៥៩គ្រឿង យានយន្តត្រឹមត្រូវចំនួន ១៥២ គ្រឿង យានយន្តខុសលក្ខណៈបច្ចេកទេសចំនួន​ ០៧គ្រឿងមាន៖
-បានពិន័យអ្នកបើកបរមិនពាក់ខ្សែក្រវ៉ាត់សុវត្ថិភាពចំនួន ០២នាក់
-បានពិន័យរថយន្តផ្ទុកទំនិញខុសលក្ខណៈបច្ចេកទេសចំនួន ០២គ្រឿង
-រថយន្តពាក់ព័ន្ធជាមួយអ្នកបេីកបរមានសារធាតុញៀនចំនួន​ ០២គ្រឿង​
-ត្រួតពិនិត្យរកសារធាតុញៀនសរុប​ចំនួន ២០នាក់​ មានសារធាតុញៀនក្នុងខ្លួនចំនួន​ ០៣នាក់​ (អ្នកបេីកររថយន្ត​ ០២នាក់​ និងព្រូរថយន្ត០១នាក់​៕SRP

ខេត្តសៀមរាប៖ប្រជាពលរដ្ឋបានលើកឡើងថាសាលាអន្តរជាតិ អាយ ឃ្យូ បានយកចិញ្ចឹមផ្លូវសាធារណៈ ធ្វើជាកន្លែងផ្ញើកង់ម៉ូតូ យ៉ាងអាណាធិបតេយ្យបណ្ដាលឱ្យខូចបាត់បង់សណ្ដាប់ធ្នាប់ផងដែរ។

ទីតាំងសាលាអន្តរជាតិ អាយ ឃ្យូ ស្ថិតនៅសង្កាត់សាលាកំរើក ក្រុងសៀមរាប តាមបណ្ដោយផ្លូវបេតុងមួយខ្សែក្រោយអតីតមន្ទីរពេទ្យនាគទេព។

ប្រជាពលរដ្ឋក៏ដូចជាអ្នកធ្វើដំណើរបានលើកថា ការយកចិញ្ចើមផ្លូវ សាធារណៈរបស់រដ្ឋធ្វើជាកន្លែងដាក់ផ្ញើកងម៉ូតូ ជាហេតុនាំឲ្យមានការបាត់បង់នូវសណ្តាប់ធ្នាប់និងកកស្ទះចរាចរណ៍ក្នុងការធ្វើដំណើរទៅដែរ។

ប្រជាពលរដ្ឋបានបន្តថាពួកគាត់តែងតែឃើញសមត្ថកិច្ចចម្រុះចុះអប់រំនិងណែនាំមិនឲ្យមានការចតរថយន្តម៉ូតូនៅលើចិញ្ចើមផ្លូវនោះទេ ក៏ប៉ុន្តែបែរជាសាលាអន្តរជាតិ អាយ ឃ្យូ មួយនេះ យកចិញ្ចើមផ្លូវធ្វើជាកន្លែងផ្ញើកង់និងម៉ូតូ ដោយមិនគោរពតាមការណែនាំរបស់អាជ្ញាធរខេត្តនោះឡើយ។

ករណីនេះប្រជាពលរដ្ឋរំពឹងថាអាជ្ញាធរសមត្ថកិច្ចចម្រុះនិងចុះរៀបចំសណ្ដាប់ធ្នាប់របៀបរៀបរយនៅចំណុចខាងលើនេះជាក់ជាពុំខានឡើយ។

សូមបញ្ជាក់ថា កាលពីកន្លងទៅថ្មីៗនេះអាជ្ញាធរខេត្តសៀមរាបបានចេញលិខិតមួយ ដោយហាមការចតរថយន្តឬម៉ូតូនៅលើចិញ្ចើមផ្លូវ។ ការចេញបម្រាមហាមចតនៅលើចិញ្ចើមផ្លូវដើម្បីរៀបចំសណ្តាប់ធ្នាប់របៀបរៀបរយអោយមានសណ្ដាប់ធ្នាប់ល្អបែបនេះមានការគាំទ្រយ៉ាងខ្លាំងពីប្រជាពលរដ្ឋ៕SRP

ខេត្តសៀមរាប៖មានការលើកឡើងថា បទល្មើសនេសាទ ក្នុងស្រុកសូទ្រនិគម នៅតែបន្តកើតមានឡើងក្នុងដែននេសាទសហគមន៏កំពង់ឃ្លាំង។

ជាក់ស្ដែងសមត្ថកិច្ចចម្រុះ នៅថ្ងៃម្សិលមិញបានចុះបង្ក្រាបបទល្មើស នេសាទដោយខុសច្បាប់ នៅក្នុងដែននេសាទសហគមន៍កំពង់ឃ្លាំង ក្នុងស្រុកសូទ្រនិគម ខេត្តសៀមរាប។

ប្រភពបានឲ្យដឹងថាការបង្រ្កាបលទ្ធផល កាប់បង្គោលឆ្នុក១០កន្លែង បង្គោល៤០ដើម, ក្បាលប៧គ្រឿង, របាំងសាច់អួន ៦០០ ម៉ែត្រ, ចម្រឹង៣០០ ដើម នឹងលែងកូនត្រី១៥ គីឡូក្រាម៕SRP

ខេត្តសៀមរាប៖លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងថាកម្លាំងជំនាញកងរាជអាវុធហត្ថខេត្តសៀមរាប បានចុះស៊ើបអង្កេត ប្រមូលវត្ថុតាង និងបាននាំខ្លួនលោក អាង សែន បញ្ជូនមកទីបញ្ជាការកងរាជអាវុធហត្ថខេត្តសៀមរាប ដើម្បីបន្តធ្វើការស្រាវជ្រាវ និងអនុវត្តតាមនីតិវិធី។

លោកអេង ហ៊ី បានឲ្យដឹងថាកងរាជអាវុធហត្ថ នឹងបន្តធ្វើការស៊ើបអង្កេត ស្រាវជ្រាវរកភស្តុតាង និងបុគ្គលដែលពាក់ព័ន្ធនឹងអំពើល្មើសនេះ ដោយភាពយុត្តិធម៌ និងម៉ឺងម៉ាត់បំផុត។ ជាមួយគ្នានេះដែរ កងរាជអាវុធហត្ថ សូមអភ័យទោសជាសាធារណៈចំពោះទង្វើរបស់យោធិននៃកងរាជអាវុធហត្ថខាងលើ ក៏ដូចជាយោធិនចំនួន០២រូប នៃកងរាជអាវុធហត្ថខេត្តក្រចេះ ដែលបានប្រព្រឹត្តនាពេលកន្លងទៅផងដែរ។

លោកអេង ហ៊ី បានបន្តថាកងរាជអាវុធហត្ថខេត្តសៀមរាប ០១រូប បានប្រើប្រាស់អាវុធខ្លីបាញ់ផ្ចុកដី ដោយសារទំនាស់ពាក្យសម្តី កាលពីវេលាម៉ោង២២និង១៥នាទី ថ្ងៃទី០១ ខែវិច្ឆិកា ឆ្នាំ២០២១ នៅចំណុចការ៉ាសសាំងសូរិយា ភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប។

តាមសេចក្តីរាយរបស់លោកប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាបបានឱ្យដឹងថា នៅវេលាម៉ោងនិងចំណុចខាងលើ លោកវរសេនីយ៍ត្រី អាង សែន នាយការិយាល័យប្រឆាំងការជួញដូរមនុស្ស កងរាជអាវុធហត្ថខេត្តសៀមរាប បានមានទំនាស់ពាក្យសម្តីគ្នាជាមួយឈ្មោះ ហាត សុភា ភេទប្រុស អាយុ៣៧ឆ្នាំ មុខរបរអាជីករ ទីលំនៅភូមិឃុនមោគ ឃុំកណ្តែក ស្រុកប្រាសាទបាគង ខេត្តសៀមរាប ហើយលោកវរសេនីយ៍ត្រី អាង សែន បានយកកាំភ្លើងខ្លី ម៉ាកCF98 ប័ណ្ណសម្គាល់អាវុធខ្លីសមូហភាព ចុះបញ្ជី បខ.២៩៤៧៤ កពជ លេខអាវុធ 015892 បាញ់ផ្ចុកដីចំនួន០១គ្រាប់ បានខ្ទាតបំណែកថ្មត្រូវឈ្មោះ ហាត សុភា រលាត់ក្រោមត្របកភ្នែកខាងស្តាំ បណ្តាលអោយរបួសស្រាល។ បន្ទាប់មកភាគីម្ខាងទៀតរបស់ឈ្មោះ ហាត សុភា បាននាំគ្នីគ្នា (មិនស្គាល់ឈ្មោះ) មកជាបន្តបន្ទាប់រួចក៏បានបាញ់ចំនួន០២គ្រាប់ ដោយអាវុធខ្លី មិនស្គាល់ម៉ាក់ តែមិនបណ្តាលអោយមានរបួសនោះទេ។

លោកអេង ហ៊ី បញ្ជាក់ថាកងរាជអាវុធហត្ថ នឹងបន្តធ្វើការស៊ើបអង្កេត ស្រាវជ្រាវរកភស្តុតាង និងបុគ្គលដែលពាក់ព័ន្ធនឹងអំពើល្មើសនេះ ដោយភាពយុត្តិធម៌ និងម៉ឺងម៉ាត់បំផុត៕SRP

ខេត្តសៀមរាប៖ប៉េអឹមខេត្តសៀមរាប ម្នាក់ឈ្មោះ អាំង សែន ហៅចិត្របានបាញ់មួយគ្រាប់គំរាមប៉ូលិសអន្តរាគមន៍ ក្នុងពេលប៉ូលិសចុះសាកសួររឿងជម្លោះសម្ដីកន្លែង។

ហេតុការណ៍បានកើតឡើង នៅវេលាម៉ោង២២និង១៥នាទីថ្ងៃទី១ ខែវិច្ឆិកា ឆ្នាំ២០២១ ចំណុចទីតាំងនឹងផ្ទះលក់សាំង ស្ថិតភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប ដែលមានម្ចាស់ឈ្មោះយ៉ា ភេទស្រី។

ប្រភពពីសមត្ថកិច្ចដែលនៅកន្លែងកើតហេតុបានឲ្យដឹងថា អ្នកបង្កជាមន្ត្រីអាវុធហត្ថឈ្មោះ អាំង សែន ហៅចិត្រឋាន:នាយការិយាល័យប្រឆាំងការជួញដូរមនុស្ស និង ការពារអនីតិជន កងរាជអាវុធហត្ថខេត្តសៀមរាប។

ប្រភពដដែលបានបន្តថា មុនពេលកើតហេតុ នៅទីតាំងនឹងផ្ទះលក់សាំង ភូមិតាវៀន ម្ចាស់ឈ្មោះយ៉ា ភេទស្រី អាយុប្រហែល៤០ឆ្នាំ ដោយឈ្មោះ អាំង សែន ហៅចិត្រ ជាប៉េអឹម បានទៅផឹកស៊ីនៅទីតាំងខាងលើ ដោយក្នុងនោះក៏មានមនុស្សប្រុសម្នាក់ទៀតអាចជាដៃគូរម្ចាស់ផ្ទះឈ្មោះយ៉ា។

សមត្ថកិច្ចបន្តទៀតថានៅពេលនោះក៏កើតមានពាក្យគងគ្នា ហើយម្នាក់ប្រុស ដែលអាចជាដៃគូរឈ្មោះយ៉ា ក៏បានខលហៅលោក នួន សារុន នាយការិយាល័យ អន្តរាគមន៍ស្នងការខេត្តសៀមរាប អោយជួយអន្តរាគមន៍ក្រែងមានរឿង លុះពេលទៅដល់សាកសួរបានបន្តិច ឈ្មោះ អាំង សែន ហៅចិត្រ ជាប៉េអឹម បានបាញ់ទៅលើទាំងកំរោលសាបមុខផ្ទះតែម្ដង។ ជុំវិញករណីនេះ អង្គភាពសៀមរាបប៉ុស្ដិ៍ មិនទាន់ទទួលបានការបំភ្លឺពីលោកអាំង សែន ហៅចិត្រ នាយការិយាល័យប្រឆាំងការជួញដូរមនុស្ស និង ការពារអនីតិជន កងរាជអាវុធហត្ថខេត្តសៀមរាប នៅឡើយទេ។

ចំណែកលោក នួន សារុន នាយការិយាល័យ អន្តរាគមន៍ស្នងការប៉ូលិសខេត្តសៀមរាប សៀមរាបប៉ុស្ដិ៍ មិនអាចទាក់ទង ដើម្បីបំភ្លឺបានទេ ដោយទូរស័ព្ទនៅក្រៅតំបន់សេវា។ បើតាមប្រភពបានបន្តថាករណីនេះ ជនរងគ្រោះបានដាក់ពាក្យបណ្ដឹងនៅការិយាល័យនគរបាលព្រហ្មទណ្ឌខេត្តសៀមរាប៕SRP