ខេត្តសៀមរាប

មិនធ្លាប់មាននៅសៀមរាប! ជើងខ្លាំង​ពាក់ព័ន្ធ”សញ្ចារកម្ម” ទៅលើក្មេងស្រីជាច្រើននាក់ ត្រូវបានឃាត់

ខេខេត្តសៀមរាប៖កងរាជអាវុធហត្ថខេត្តសៀមរាបបានឱ្យដឹងនៅរសៀលថ្ងៃសៅរ៍ថាដោយអនុវត្តតាមបទបញ្ជាលោកឧត្តមសេនីយ៍ត្រី​ សៀ ទីន មេបញ្ជាការ កងរាជអាវុធហត្ថខេត្តសៀមរាប កម្លាំងមូលដ្ឋានកងរាជអាវុធហត្ថក្រុងសៀមរាប សហការ​ជាមួយ​ការិយាល័យប្រឆាំងការជួញដូរមនុស្ស បានឃាត់ខ្លួនជនសង្ស័យ ឈ្មោះ យឿប ឌីណា ហៅ ម៉េង ភេទប្រុស អាយុ ៣១ឆ្នាំ មុខរបរ លក់កាហ្វេ ជនជាតិខ្មែរ ទីលំនៅបច្ចុប្បន្ន ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប ពាក់ព័ន្ធករណី “សញ្ចារកម្ម” (ទាញយកអត្ថប្រយោជន៍ហិរញ្ញវត្ថុពីអំពើពេស្យាចាររបស់អ្នកដទៃ)..។

ការឃាត់ខ្លួនធ្វើ នៅវេលាម៉ោង ១៩:០០នាទី ថ្ងៃទី០៧ ខែសីហាឆ្នាំ២០២៥ នៅចំណុចភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប។

ដោយ​យោងតាមពាក្យបណ្ដឹងរបស់ជនរងគ្រោះ៖​
១-របស់ម្ដាយក្មេងស្រីរងគ្រោះ ភេទស្រី អាយុ ៣៧ឆ្នាំ កូនស្រីរងគ្រោះ អាយុ ១៤ឆ្នាំ ។
២-ក្មេងស្រី អាយុ ១៦ឆ្នាំ (គ្មានអាណាព្យាបាល)។
៣-ក្មេងស្រី អាយុ ១៦ឆ្នាំ។
ប្តឹងអំពីករណី “សញ្ចារកម្ម” ប្រព្រឹត្តកាលពីអំឡុងខែកុម្ភៈ ឆ្នាំ២០២៥ រហូតមកដល់បច្ចុប្បន្ន នៅចំណុច ផ្ទះជួល ភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប (កន្លែងលក់កាហ្វេមេត្រីរបស់ជនសង្ស័យ)។
ជនរងគ្រោះជាអនីតិជនទាំង០៣នាក់បានបំភ្លឺជូនសមត្ថកិច្ចដូចៗគ្នាថា៖
ពួកខ្លួនត្រូវបាន ត្រូវបានឈ្មោះ យៀប ឌីណា ហៅម៉េង លួងលោមឲ្យជួលបន្ទប់របស់គាត់ ស្នាក់នៅ ដោយមិនចាំបាច់បង់ប្រាក់ជាមុនទេ នៅពេណារកប្រាក់បានចាំបង់ជាក្រោយ រួមទាំងម្ហូបអាហារ និងកាហ្វេទៀតផង។

នៅពេលពួកខ្លួនទាំង០៣នាក់គ្មានប្រាក់បង់ឲ្យគាត់ ដោយគាត់បានបង្ខំឲ្យពួកខ្លួនទៅបំរើផ្លូវភេទជាមួយភ្ញៀវ ដើម្បីយកប្រាក់សងថ្លៃដែលពួកខ្លួនជំពាក់គាត់ បើមិនព្រមធ្វើតាមគាត់ទេ គាត់គំរាមថា ចំណាយតែ៣០០បាត កាត់ដៃ-ជើង មិនឲ្យបានសុខទេ មិនតែប៉ុណ្ណោះ ឈ្មោះ យឿប ឌីណា ហៅម៉េង បានដក១០% នៃប្រាក់ ដែលខ្លួនទៅបំរើផ្លូវភេទជាមួយភ្ញៀវទៀតផង បើភ្ញៀវឲ្យបានក្នុង១០០$ គាត់ដកអស់ ២៥$ ពេលខ្លះបានតែ ៥០$ រូបគាត់ដកអស់១០$ ហើយចំណែកប្រាក់ដែលនៅសល់ពីការបំរើផ្លូវភេទ ពួកខ្លួនមិនដែលបានយកមកចាយវាយនោះទេ គឺឈ្មោះ យឿប ឌីណា ហៅម៉េង ត្រូវបង់ថ្លៃបន្ទប់ជួល ថ្លៃម្ហូបអាហារ ថ្លៃកាហ្វេ ថ្លៃជួលម៉ូតូ ថ្លៃជួលទូរស័ព្ទប្រើ។

ឈ្មោះ អ.ធ.ត. ដែលជាជនរងគ្រោះ អាយុ១៤ឆ្នាំ បានរៀបរាប់ជូនសមត្ថកិច្ចដោយក្តុកក្តួលទៀតថា៖ នៅកំឡុងខែឧសភាឆ្នាំ២០២៥ ខ្លួនបានខ្ចីម៉ូតូម៉ាកហុងដាវ៉ារីអូឃ្លីក របស់ឈ្មោះ តេង ចាន់រតន: ភេទប្រុស ត្រូវជាប្អូនធម៌ឈ្មោះ យឿប ឌីណា ហៅ ម៉េង ដើម្បីដើរលេងតែត្រូវបានជួបគ្រោះថ្នាក់ចរាចរណ៍នៅផ្លូវ៦០ម៉ែត្រ បណ្តាលឲ្យខូចខាតម៉ូតូបាក់បូម វៀចតួ ពេលនោះពួកគាត់ ( តេង ចាន់រតន:និងឈ្មោះ យឿប ឌីណា) បានឲ្យខ្លួនសងថ្លៃជួសជុលម៉ូតូចំនួន ៨០០$ ដោយសារគ្មានប្រាក់ ទើបខ្លួនមកផ្ទះជួលរបស់ឈ្មោះ យឿប ឌីណា ហៅម៉េង ទើបមាន បញ្ហានេះកើតឡើងតែម្តង។

ដោយមានការសម្របសម្រួលពីឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប ការិយាល័យជំនាញកសាងសំណុំរឿងដើម្បីអនុវត្តតាមនីតិវិធី ចំណែក​ជនរងគ្រោះ​ប្រគល់ជូន​មន្ទីរ​សង្គម​កិច្ច អតីត​យុវជន និងយុវនីតិសម្បទាខេត្តសៀមរាប៕SRP

សហរដ្ឋអាមេរិកបន្តគាំទ្រចំពោះបទឈប់បាញ់ផ្តួចផ្តើមដោយប្រធានាធិបតី Donald Trump ក្រោមការដឹកនាំដោយប្រទេសម៉ាឡេស៊ី ក្នុងនាមជាប្រធានអាស៊ានប្តូរវេណ

នាថ្ងៃទី៦ ខែសីហា ឆ្នាំ២០២៥ ឯកឧត្តម ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិបានជួបប្រជុំជាមួយនាយឧត្តមនាវី Samuel Paparo មេបញ្ជាការ បញ្ជាការដ្ឋានឥណ្ឌូ-ប៉ាស៊ីហ្វិក សហរដ្ឋអាមេរិក (USINDOPACOM) និងឯកឧត្តម Edgard Kagan ឯកអគ្គរដ្ឋទូតសហរដ្ឋអាមេរិក ប្រចាំប្រទេសម៉ាឡេស៊ី។

ក្នុងកិច្ចជំនួបនេះ ភាគីទាំងពីរ បានបញ្ជាក់ពីជំហររឹងមាំរបស់សហរដ្ឋអាមេរិកក្នុងការគាំទ្របទឈប់បាញ់ ដែលបានផ្តួចផ្តើមដោយប្រធានាធិបតី Donald Trump ហើយដឹកនាំដោយប្រទេសម៉ាឡេស៊ី ក្នុងនាមជាប្រធានអាស៊ានប្តូរវេណបច្ចុប្បន្ន។

សហរដ្ឋអាមេរិកបានប្តេជ្ញាថា នឹងតាមដានការអនុវត្តន៍យ៉ាងជិតស្និទ្ធ ដើម្បីធានាឲ្យមានភាពជោគជ័យ និងប្រសិទ្ធភាពខ្ពស់។ ភាគីទាំង២ក៏បង្ហាញពីការគាំទ្រផ្នែកភស្តុភារ និងបច្ចេកទេស ដើម្បីបង្កើតក្រុម AMT (ASEAN Monitoring Team) ឲ្យបានលឿន និងមានសមត្ថភាព។

បន្ថែមពីនេះ សហរដ្ឋអាមេរិកក៏បានបង្ហាញពីការអនុវត្តបន្ត រួមមាន៖ ការធ្វើផែនការយោធា, ការផ្គត់ផ្គង់គ្រឿងបរិក្ខារ, ប្រព័ន្ធបញ្ជូនកម្លាំង, ប្រព័ន្ធឃ្លាំមើលតាមអាកាស និងបច្ចេកវិទ្យាទំនើបជាច្រើនទៀត។

សូមបញ្ជាក់ថា៖ ជំនួបដ៏មានសារៈសំខាន់នេះបានបង្ហាញថា សហរដ្ឋអាមេរិកបានត្រៀមខ្លួន និងឆន្ទៈពិតប្រាកដក្នុងការគាំទ្រដល់សន្តិភាពយូរអង្វែងនៅក្នុងតំបន់៕SRP

សមត្ថកិច្ចខេត្តសៀមរាបសន្និដ្ឋានថា «ជនរងគ្រោះស្លាប់ដោយសារធ្លាក់ពីលើចិញ្ចើមផ្លូវ អាចបណ្តាលមកពីគាំងបេះដូង

ខេត្តសៀមរាប៖តាម សេចក្តីប្រកាសព័ត៌មាន ស្តីពីស្ត្រីជនជាតិបារាំងម្នាក់ដែលប្រទះឃើញ ស្លាប់នៅក្នុងប្រឡាយអមផ្លូវ៦០ម៉ែត្រ ត្រង់ចំណុចក្បែរ អាហារដ្ឋានមាន់ស្រែ ស្ថិតនៅភូមិអារក្សស្វាយ សង្កាត់នគរធំ ខេត្តសៀមរាប អ្នកនាំពាក្យស្នងការនគរបាលខេត្តសៀមរាបបានបញ្ជាក់ថា យោងតាមការរស្រាវជ្រាវ និងការធ្វើកោសល្យវិច័យរបស់សមត្ថកិច្ចជំនាញ ជាមួយគ្រូពេទ្យអមសាលាដំបូងខេត្តសៀមរាប ព្រមទាំងមានការចូលរួមដោយតំណាងស្ថានកុងស៊ុលកិត្តិយសបារាំងប្រចាំខេត្តសៀមរាប បានសន្និដ្ឋានថា៖ ជនរងគ្រោះស្លាប់ដោយសារធ្លាក់ពីលើចិញ្ចើមផ្លូវ (អាចបណ្តាលមកពីគាំងបេះដូង) ហើយសាកសពត្រូវបានសមត្ថកិច្ច យើងបញ្ជូនទៅតម្កល់ទុកនៅមន្ទីរពេទ្យ មិត្តភាពខ្មែរសូវៀត រាជធានីភ្នំពេញរង់ចាំការសម្រេចពីក្រុមគ្រួសារ និងស្ថានទូត។

សេចក្ដីប្រកាសបានបញ្ជាក់ថា ក្នុងរយៈពេលប៉ុន្មានថ្ងៃចុងក្រោយនេះ មជ្ឈដ្ឋានជាតិ-អន្តរជាតិ មួយចំនួនមានការចាប់អារម្មណ៍ទៅលើការ ស្លាប់ស្ត្រីជនជាតិបារាំងម្នាក់ឈ្មោះ GIRARD FABRE LISA CELINE VERONICA នៅក្នុងប្រឡាយអមផ្លូវ៦០ម៉ែត្រ ត្រង់ចំណុចក្បែរអាហារដ្ឋានមាន់ស្រែ ស្ថិតនៅភូមិអារក្សស្វាយ សង្កាត់នគរធំ ខេត្តសៀមរាប។ ពាក់ព័ន្ធនឹងករណី នេះក្រុមការងារប្រតិកម្មរហ័ស និងជាអ្នកនាំពាក្យស្នងការដ្ឋាននគរបាលខេត្តសៀមរាប សូមធ្វើការបំភ្លឺជូនសាធារណជន ជ្រាបដូចតទៅ៖

នៅថ្ងៃទី២ ខែសីហា ឆ្នាំ២០២៥ សមត្ថកិច្ចនគរបាលយើងបានទទួលព័ត៌មាន ពីតំណាងស្ថានកុងស៊ុល កិត្តិយសបារាំងប្រចាំខេត្តសៀមរាប និងបុគ្គលិកអង្គការ PSE ពាក់ព័ន្ធនឹងករណីបាត់ដំណឹងស្ត្រីជនជាតិបារាំងម្នាក់ នៅ ម្តុំប្រាសាទតាសោម អំឡុងពេលរត់សាកល្បងកម្មវិធីម៉ារ៉ាតុន ជាមួយមិត្តភក្តិ។

ក្រោយពីទទួលបានព័ត៌មាននេះភ្លាមសមត្ថកិច្ចយើង បានប្រើប្រាស់ កម្លាំងសរុប-មធ្យោបាយសរុប និង វិធានការជំនាញ កម្លាំងជំនាញរបស់ស្នងការដ្ឋាននគរបាលខេត្តសៀមរាប,អធិការដ្ឋាននគរបាលក្រុង-ស្រុក និងប៉ុស្តិ៍ នគរបាលរដ្ឋបាល សហការជាមួយសមត្ថកិច្ចពាក់ព័ន្ធ (អង្គភាពនគរបាលការពារបេតិកភណ្ឌ, អង្គភាពនគរបាល ទេសចរណ៍,) ចុះស្រាវជ្រាវដល់ទីតាំងដែលបាត់ដំណឹងចុងក្រោយ ពីចំណុចប្រាសាទតាសោម បន្តមកតាមព្រៃ ឧទ្យានអង្គរមកដល់កស្សិណអង្គរខាងលិច កែងផ្លូវ៦០ម៉ែត្រ ចាប់ថ្ងៃទី២ ខែសីហា ឆ្នាំ២០២៥ រហូតដល់ព្រឹកថ្ងៃទី៤ ខែសីហា ឆ្នាំ២០២៥ ជាលទ្ធផលពុំមានតម្រុយពាក់ព័ន្ធនឹងដំណើររបស់ស្ត្រីជនជាតិបារាំងនោះឡើយ។ លុះមកដល់ ម៉ោងប្រហែល ១០:០៥នាទី ថ្ងៃទី៤ ខែសីហា ឆ្នាំ២០២៥ ដដែលសមត្ថកិច្ចយើងទទួលបានសេចក្តីរាយការណ៍ពី ប្រជាពលរដ្ឋមកថា៖ “នៅជម្រាលប្រឡាយអមផ្លូវ ៦០ម៉ែត្រ ត្រង់ចំណុចមុខចំហៀងខាងត្បូងអាហារដ្ឋានមាន់ស្រែ ឃើញសត្វរុយកំពុងរោមអ្វីមួយប៉ុន្តែមិនដឹងជាអ្វីនោះទេ” បន្ទាប់ពីទទួលបានព័ត៌មាននេះភ្លាមសមត្ថកិច្ចយើងមាន ការសង្ស័យ ក៏បានចុះទៅពិនិត្យជាក់ស្តែងដល់កន្លែងកើតហេតុទើបដឹងថា “គឺពិតជាសពរបស់ស្ត្រីជនជាតិបារាំងដែល បានបាត់ខ្លួននោះមែន” ។
អាស្រ័យដូចបានជម្រាបជូនខាងលើសូម សាធារណជនគ្រប់មជ្ឈដ្ឋាន មេត្តាជ្រាបជាព័ត៌មាន៕SRP

កុមារចំនួន ៣ ០០១នាក់ ទទួលបានការវះកាត់ដោយមិនគិតថ្លៃ នៅមន្ទីរពេទ្យគន្ធបុប្ផា ក្នុងខែកក្កដា ឆ្នាំ២០២៥ នេះ

រយៈពេលពេញមួយខែកក្កដា ក្នុងឆ្នាំ២០២៥ នេះ មន្ទីរពេទ្យគន្ធបុប្ផាទាំងនៅគន្ធបុប្ផាភ្នំពេញ និងសៀមរាបបានជួយវះកាត់កុមារដែលមានជំងឺចំនួន៣០០១នាក់ ដោយឥតគិតថ្លៃគ្រប់ៗគ្នា និងដោយគ្មានការរើសអើង។

ក្នុងចំណោមនេះមន្ទីរពេទ្យគន្ធបុប្ផាទាំងនៅភ្នំពេញ និងសៀមរាប បានវះកាត់បេះដូង និងភ្ជិតតប្រហោងបេះដូងតាមសរសៃឈាមលើកុមារចំនួន៨៤នាក់។ នេះបើតាមព័ត៌មានពិតនៃតួលេខ នៃការព្យាបាលរបស់មន្ទីរពេទ្យគន្ធបុប្ផា ក្នុងខែកក្កដា ឆ្នាំ២០២៥។

ជារួមនៅក្នុងរយៈពេលពេញ១ខែកក្កដា មន្ទីរពេទ្យគន្ធបុប្ផាទាំងនៅភ្នំពេញ និងនៅសៀមរាប បានពិនិត្យព្យាបាលលើកុមារដែលឈឺប្រមាណ ១០ ម៉ឺននាក់ ក្នុងនោះចំនួន ៩២ ១៤៨នាក់ នៅក្នុងផ្នែកពិគ្រោះជំងឺក្រៅ, កុមារមានជំងឺធ្ងន់ៗ ២២ ៩១៧នាក់ ត្រូវបានដាក់ឲ្យសម្រាកព្យាបាលនៅក្នុងមន្ទីរពេទ្យ និងកុមារមានជំងឺគ្រុនឈាម ចំនួន ៣ ៩១៨នាក់។

ក្រៅពីព្យាបាលកុមារ នៅផ្នែកសម្ភពនៃមន្ទីរពេទ្យជ័យវរ្ម័នទី៧ (គន្ធបុប្ផាទី៣) ក៏បានពិនិត្យផ្ទៃពោះ និងព្យាបាលជូនស្ត្រីមានផ្ទៃពោះចំនួន៨ ៩៣៣នាក់ ដែលមកពិនិត្យតាមដានផ្ទៃពោះ និងទទួលសេវាព្យាបាល។ នៅក្នុងផ្នែកពិគ្រោះជំងឺក្រៅនៃមន្ទីរសម្ភព ក្រុមគ្រូពេទ្យជំនាញបានជួយសម្រាលកូនបានលើស្ត្រីចំនួន ១ ៦០២នាក់។

មូលនិធិគន្ធបុប្ផាកម្ពុជា អះអាងថារាល់ការព្យាបាលទាំងអស់ គឺឥតគិតថ្លៃ និងដោយគ្មានការរើសអើង សម្រាប់អ្នកមកទទួលសេវាគ្រប់ៗគ្នា។

គួរឱ្យដឹងថា តាំងពីមន្ទីរពេទ្យគន្ធបុប្ផា ចាប់ផ្តើមដំណើរការឡើងវិញនៅឆ្នាំ១៩៩២, មន្ទីរពេទ្យនេះបានទទួលការពិនិត្យ និងព្យាបាលនៅផ្នែកពិគ្រោះជំងឺក្រៅ កុមារ និងស្រ្តីមានផ្ទៃពោះចំនួនប្រមាណ ២៣ លានករណី, បានទទួលកុមារមកសម្រាកព្យាបាលធ្ងន់ធ្ងរប្រមាណ ២,៨ លាននាក់ និងសម្រាលកូនជូនស្រ្តីមានផ្ទៃពោះចំនួនប្រមាណ ៤១ម៉ឺននាក់។

កាលពីឆ្នាំ២០២៤ កន្លងទៅ មន្ទីរពេទ្យគន្ធបុប្ផាភ្នំពេញ និងនៅសៀមរាប បានពិនិត្យ និងព្យាបាលលើកុមារ ទារក និងស្ត្រីមានផ្ទៃពោះ ឆ្លងទន្លេ ដោយឥតគិតថ្លៃសរុប ១ ២៥៣ ៧៧៤ករណី ខណៈក្នុង១ឆ្នាំៗ មន្ទីរពេទ្យគន្ធបុប្ផា ត្រូវចំណាយថវិកាជាង៤០លានដុល្លារសហរដ្ឋអាមេរិក ដើម្បីសង្គ្រោះអាយុជីវិតកុមារកម្ពុជា។

លោកជំទាវបណ្ឌិតពេជ ចន្ទមុន្នី ប្រធានកិត្តិយស នៃមូលនិធិគន្ធបុប្ផា ធ្លាប់បាន ថ្លែងថា មន្ទីរពេទ្យគន្ធបុប្ផាបានព្យាបាល ដណ្ដើមជីវិតកុមារកម្ពុជាជាច្រើនពីមាត់មច្ចុរាជ ក្រោយមកកុមារដែលធ្លាប់ទទួលបានការព្យាបាលទាំងនោះ ក្លាយជាគ្រូពេទ្យហើយបានជួយព្យាបាលអ្នកជំងឺដទៃទៀត និងខ្លះទៀតបានក្លាយជាធនធានមនុស្សដ៏មានតម្លៃសម្រាប់សង្គមកម្ពុជា។

ជានិច្ចកាល លោកជំទាវស្ត្រីទី១ តែងតែអំពាវានាវឱ្យសប្បុរសជនបរិច្ចាគថវិកាចូលក្នុងមូលនិធិគន្ធបុប្ផាកម្ពុជា សម្រាប់ទ្រទ្រង់ដំណើរការរបស់មន្ទីរពេទ្យ ឱ្យបានបំពេញបេសកកម្មដ៏ថ្លៃថ្លាសង្គ្រោះជីវិតកុមារកម្ពុជា។ លោកជំទាវបណ្ឌិត បានចាត់ទុកការបរិច្ចាគរបស់សប្បុរសជននានាជូនមន្ទីរពេទ្យ ដើម្បីទុកព្យាបាលជំងឺកុមារ ថាគឺជាការធ្វើទានមួយដ៏ត្រឹមត្រូវ ពីព្រោះបានជួយស្រោចស្រង់អាយុជីវិតកុមារផង និងជួយឱ្យកុមារទាំងនោះទទួលបានឱកាស និងអនាគតល្អ ក៏ដូចបានជួយសង្គមជាតិ៕SRP

ការបរិច្ចាគរបស់លោកអ្នកពិត ជាមានតម្លៃណាស់ ក្នុងជួយសង្រ្គោះជីវិត ទារក និងកុមារនៅកម្ពុជា។ ដូច្នេះសូមចូលរួមបរិច្ចាគតាមរយៈតំណនេះ ៖ https://epayment.acledabank.com.kh/wRx1Z4Gzqzi8zMDq/pay

លោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្តសៀមរាប ផ្ញើសារលិខិតគោរពជូនពរ សម្ដេចតេជោ ហ៊ុន សែន ក្នុងឱកាសចម្រើនជន្មាយុ

លោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្តសៀមរាប សូមផ្ញើសារលិខិតគោរពជូនពរ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, នាយឧត្តមសេនីយ៍ផុតលេខផ្កាយមាស៥ និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ ក្នុងឱកាសដ៏មង្គលសួស្ដីប្រពៃថ្លៃថ្លា ចម្រើនជន្មាយុគម្រប់៧៣ឆ្នាំ ដែលនឹងប្រព្រឹត្តទៅនាថ្ងៃអង្គារ ១១កើត ខែស្រាពណ៍ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី០៥ ខែសីហា ឆ្នាំ២០២៥។

យើងខ្ញុំសូមអនុញ្ញាតចូលរួមសម្តែង នូវសេចក្តីអំណរសាទរឥតឧបមា ជូននូវសព្ទសាធុការពរ បវរសួស្តី សិរីមង្គល វិបុលសុខ មហាប្រសើរគ្រប់ប្រការ ជូនចំពោះសម្តេចតេជោ និងសម្តេចកិត្តិព្រឹទ្ធបណ្ឌិត ប្រកបដោយមនោសញ្ចេតនា គោរពស្រឡាញ់ដ៏ជ្រាលជ្រៅ និងកតញ្ញូកតវេទីតាធម៌យ៉ាងស្មោះស្ម័គ្របំផុត ចំពោះកិច្ចខិតខំប្រឹងប្រែង យកអស់កម្លាំងកាយចិត្ត ប្រាជ្ញាស្មារតី និងបទពិសោធន៍ ប្រកបដោយគតិបណ្ឌិត ក្នុងការដឹកនាំនាវាកម្ពុជាទទួលបាននូវសុខសន្តិភាពពេញលេញ។

ឆ្លៀតក្នុងឱកាសដ៏ប្រពៃថ្លៃថ្លានេះ យើងខ្ញុំទាំងអស់គ្នាសូមអនុញ្ញាតចូលរួមសម្តែងនូវសេចក្តីអំណរសាទរឥតឧបមា ជូននូវសព្ទសាធុការពរ បវរសួស្តី សិរីមង្គល វិបុលសុខ មហាប្រសើរគ្រប់ប្រការ ជូនចំពោះសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត និងសូមសម្ដែងនូវការគោរពដឹងគុណ យ៉ាងជ្រាលជ្រៅបំផុតចំពោះ សម្តេចដែលបានយកអស់កម្លាំងកាយចិត្ត ប្រាជ្ញាស្មារតី និងបទពិសោធន៍ប្រកបដោយគំរូវីរភាពដ៏អស្ចារ្យ ក្នុងការដឹកនាំប្រទេសកម្ពុជា នាពេលកន្លងមក រហូតដល់ពេលបច្ចុប្បន្ន ដោយបានជួយស្រោចស្រង់ប្រទេសកម្ពុជាចេញពីរបបប្រល័យពូជសាសន៍ ប៉ុលពត និងសង្គ្រាមឈ្លានពាន ធ្វើឱ្យជាតិមាតុភូមិ និងប្រជាជនកម្ពុជាទទួលបានសន្តិភាពពេញលេញ។

យើងខ្ញុំទាំងអស់គ្នា នឹងប្តេជ្ញាបន្តថែរក្សាមរតកសន្តិភាព ភារកិច្ចជាអមតៈ និងសមិទ្ធផលគ្រប់យ៉ាងដែល សម្តេចតេជោ សម្រេចបានដើម្បីជាតិមាតុភូមិ និងប្រជាពលរដ្ឋកម្ពុជា។

ជាថ្មីម្ដងទៀត យើងខ្ញុំ សូមបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិក្នុងលោក សូមប្រោសប្រទានពរជ័យជូន សម្ដេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងបុត្រា-បុត្រី ចៅប្រុស-ចៅស្រីជាទីស្រឡាញ់ សូមបានសមប្រកបដោយពុទ្ធពរ និងពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕SRP

លិខិតជូនដំណឹងស្តីពីបំណងនៃការរំលាយសហគ្រាស
សហគ្រាស ជីធីភីអេស ហ្គ្រោ ថឹហ្គេឌើរ ផន សប (GTPS GROW TOGETHER PAWN SHOP) ដែលបានចុះបញ្ជីពាណិជ្ជកម្មក្រោមលេខ៖ ៥០០០៤២៨៨៦៣ ចុះថ្ងៃទី២៨ ខែកញ្ញា ឆ្នាំ២០២៤ និងមានទីស្នាក់ការតាំងនៅ#បុរីទេសចរណ៍ ផ្ទះលេខS1005 ជាន់ផ្ទាល់ដី ផ្លូវបាគង7 ភូមិ គោកត្នោត ឃុំកណ្ដែក ស្រុកប្រាសាទបាគង ខេត្តសៀមរាប ប្រទេសកម្ពុជា ត្រូវបានប្រកាសរំលាយ និងដាក់ឲ្យស្ថិតនៅក្នុងការជម្រះបញ្ជីចាប់ពីកាលបរិច្ឆេទនៃការចុះផ្សាយលិខិតជូនដំណឹងនេះតទៅ ។ អាស្រ័យហេតុនេះ សូមអតិថិជន ឬភាគីដែលពាក់ព័ន្ធសហគ្រាសមេត្តាជ្រាបជាព័ត៌មាន។ សូមអគុណ!

មេបញ្ជាការកងកងរាជអាវុធហត្ថខេត្តសៀមរាប ចាត់ឱ្យក្រុមការងារចូលរួមគោរពវិញ្ញាណក្ខន្ធ លោកឧត្តមសេនីយ៍ត្រី ពៅ សំណាង​ ដែលបានពលីជីវិតនៅលើសមរភូមិប្រយុទ្ធ

ខេត្តសៀមរាប៖លោកឧត្តម​សេនីយ៍​ត្រី សៀ ទីន មេបញ្ជាការ កងកងរាជអាវុធហត្ថខេត្តសៀមរាប នៅថ្ងៃអាទិត្យ​ ទី៣ ខែសីហា ឆ្នាំ២០២៥ ក្រុមកាងារដឹកនាំដោយ លោកវរសេនីយ៍ត្រី ឡេង តាំងគួយ​ មេបញ្ជាការមូលដ្ឋាន​កងរាជអាវុធហត្ថ​ស្រុកបន្ទាយស្រី​ បានចូលរួម​គោរពវិញ្ញាណក្ខន្ធសព លោកឧត្តមសេនីយ៍ត្រី ពៅ សំណាង ជំនួយការសេនាធិការ​ វរ:សេនាតូចស៊ើបការណ៍កងពលធំអន្តរាគមន៍លេខ២ កងទ័ពជើងគោក ដែលបានពលីជីវិតនៅលើសមរភូមិប្រយុទ្ធព្រំដែនកម្ពុជា-ថៃ​ កាលពីថ្ងៃសុក្រ ទី១ ខែសីហា​ ឆ្នាំ២០២៥ ជន្មាយុ ៥៦ ឆ្នាំ។

មរណភាពរបស់ លោកឧត្តមសេនីយ៍ត្រី ពៅ សំណាង​ គឺជាការបាត់បង់នូវឧត្តមស្វាមី ឪពុក ដែលប្រកបដោយព្រហ្មវិហារធម៌ជាទីគោរពស្រឡាញ់បំផុតដែល លោកបានបូជាកម្លាំងកាយ កម្លាំងចិត្ត បញ្ញា ស្មារតី ក្នុងការចិញ្ចឹមបីបាច់ថែរក្សា និងផ្តល់ដំបូន្មានល្អៗ ដល់កូនៗ ឱ្យក្លាយទៅជា ធនធានមនុស្សដ៏មានតម្លៃ ប្រកបដោយគុណធម៌នៅក្នុងសង្គមជាតិ ជាពិសេសគឺបាត់បង់ឥស្សរជនស្នេហាជាតិដ៏ឧត្តុងឧត្តម ដែលបានរួមចំណែក យ៉ាងធំធេងក្នុងការប្រយុទ្ធតស៊ូជាមួយខ្មាំងសៀម ដែលកំពុងធ្វើការឈ្លានពានមកលើដែនអធិបតេយ្យភាពកម្ពុជាយើង។

លោកឧត្ដមសេនីយ៍ត្រី ពៅ សំណាង បានចូលរួមប្រយុទ្ធយ៉ាងអង់អាចក្លាហាន និងស្វិតស្វាញប្រឆាំងជាមួយពួកចោរសៀមឈ្លានពានដែល បានបង្ហាញគំរូវីរភាពដែលយុវជន និងប្រជាពលរដ្ឋខ្មែរគ្រប់រូបត្រូវចងចាំនូវគុណូបការៈដ៏ថ្លៃថ្លានេះ។​

នៅក្នុងឱកាសរំលែកទុក្ខដ៏ក្រៀមក្រំនេះ ក្រុមការងារក៏បាននាំយកថវិកាចំនួន ៥០០,០០០រៀល  ចូលរួមរំលែកទុក្ខជាមួយក្រុមគ្រួសារ នៅគេហដ្ឋាននៃសពស្ថិតក្នុងភូមិសាលាក្រវ៉ាន់ ឃុំរំចេក ស្រុកបន្ទាយស្រី ខេត្តសៀមរាប​។​

សូមបួងសួង ដល់តេជៈបារមីនៃព្រះពុទ្ធ ព្រះធម៌ ព្រះសង្ឃ តាមជួយថែរក្សាដួងវិញ្ញាណក្ខន្ធរបស់ លោកឧត្តមសេនីយ៍ត្រី ពៅ សំណាង​ បានទៅសោយសុខក្នុងឋានសុគតិភពកុំបីឃ្លៀងឃ្លាតឡើយ៕SRP

ឯកឧត្តមប្រាក់​ សោភ័ណ នាំយកថវិកា​ និងសារំលែកទុក្ខរបស់សម្តេចធិបតី​ និងលោកជំទាវជូនដល់គ្រួសារយោធិនពលីនៅសមរភូមិជួរមុខ

ឯឯកឧត្តមប្រាក់​ សោភ័ណ​ អភិបាលខេត្តសៀមរាប និងក្រុមការងារ នៅថ្ងៃនេះបាននាំយកនូវថវិកាចំនួន​ ៨០លានរៀល​ និងសាររំលែកទុក្ខរបស់សម្តេចមហាបវរធិបតី​ ហ៊ុន​ ម៉ាណែត​ នាយករដ្ឋមន្ត្រី​ និងលោកជំទាវបណ្ឌិត​ ពេជ​ ចន្ទមុន្នី​ ដេីម្បីប្រគល់ជូនដល់គ្រួសារលោក អនុសេនីយ៍ត្រី​ ថន​ ញ៉ាញ់​ ដែលបានពលីកាលថ្ងៃទី២៧៥ ខែកក្កដា ឆ្នាំ២០២៥​ តំបន់ភ្នំទ្រព្យ។

ឯកឧត្តម​អភិបាលខេត្តក៏បានថ្លែងអំណរគុណយ៉ាងជ្រាលជ្រៅចំពោះសម្តេចធិបតី​ នាយករដ្ឋមន្ត្រី​ និងលោកជំទាវ​បណ្ឌិត​ ដែលបានគិតគូរនិងចូលរួមរំលែកទុក្ខដ៏សែនក្រៀមក្រំ​ និងសោកសង្រែកជាមួយនឹងក្រុមគ្រួសារយោធិនពលីនៅតំបន់សមរភូមិជួរមុខនេះ។

ឯកឧត្តម​ អភិបាលខេត្តបានពាំនាំនូវការផ្តាំផ្ញេីរបស់សម្តេចធិបតីក្នុងការរំលែកទុក្ខនៃមរណភាពរបស់លោក អនុសេនីយ៍ត្រី​ ថន​ ញ៉ាញ់​ គឺជាការបាត់បង់ដ៏ធំធេង មិនត្រឹមតែចំពោះក្រុមគ្រួ សារប៉ុណ្ណោះទេ តែក៏ជាការបាត់បង់ នូវវីរយុទ្ធជនខ្មែរ ដ៏ អង់អាចក្លាហានម្នាក់ ដែលបានបូជាសាច់ស្រស់ ឈាមស្រស់ ក្នុងកិច្ចការពារបូរណភាពទឹកដី ការពារអធិបតេយ្យជាតិ ពីការឈ្លានពានរបស់ពួកខ្មាំងសត្រូវលើសមរភូមិមុខ គួរឱ្យស្ញប់ស្ញែងជាទីបំផុត។

ឯកឧត្តម​ អភិបាលខេត្ត​ ក្នុងវេលាប្រកបដោយសេចក្តីទុក្ខដ៏ក្រៀមក្រំនេះ យេីងខ្ញុំសូមចូលរួមរំលែកនូវមរណទុក្ខជាមួយក្រុមគ្រួសាររបស់វីរៈយុទ្ធជនដ៏អង់អាចក្លាហាន ដោយសេចក្តីសោកស្តាយ អាឡោះ អាល័យបំផុត និងសូមឧទ្ទិសបួងសួងដល់ដួងវិញ្ញាណក្ខន្ធរបស់ លោក អនុសេនីយ៍ត្រី​ ថន​ ញ៉ាញ់​ បានសោយសុខក្នុងសុគតិភព កុំបីឃ្លៀងឃ្លាតឡើយ៕SRP

សម្ដេចធិបតីហ៊ុន ម៉ាណែត បង្ហាញថា លទ្ធផល
ដ៏ត្រចះត្រចង់ពីចំនួបរវាងខ្ញុំ និងឯកឧត្ដម Phumtham Wechayachai នាយករដ្ឋមន្ត្រីស្តីទីនៃព្រះរាជាណាចក្រថៃ ដោយភាគីទាំងពីរកម្ពុជា-ថៃបានឯកភាពគ្នាដូចខាងក្រោម៖

1. បទឈប់បាញ់បន្ទាន់ ឥតលក្ខខណ្ឌ ដែលនឹងចូលជាធរមាននៅវេលាម៉ោង2400 ថ្ងៃទី28 ខែកក្កដា ឆ្នាំ2025។ នេះជាជំហានដ៏សំខាន់ ឆ្ពោះទៅការបន្ថយការតានតឹង នឹងការស្តារឡេីងវិញនៅសន្តិភាព និងសន្តិសុខ។

2. រៀបចំកិច្ចប្រជុំក្រៅផ្លូវការថ្នាក់មេបញ្ជាការយោធភូមិភាគ (ភាគីថៃ យោធភូមិភាគទី1 និងទី2 និងភាគីកម្ពុជាយោធភូមិភាគទី4 និងទី5) នៅវេលាម៉ោង0700 ថ្ងៃទី29 ខែកក្កដា ឆ្នាំ2025 និងបន្តរៀបចំកិច្ចប្រជុំជាមួយបណ្តាសេនានុព័ន្ធ និងអនុព័ន្ធយោធា ដឹកនាំដោយប្រធានអាស៊ាន បេីមានការឯកភាពពីភាគីទាំងពីរ និង

3. រៀបចំកិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នៅថ្ងៃទី4 ខែសីហា ឆ្នាំ2025 ដែលកម្ពុជានឹងធ្វើជាម្ចាស់ផ្ទះ។

ខ្ញុំសូមអរគុណឯកឧត្តមនាយករដ្ឋមន្ត្រី Anwar Ibrahim ដែលបានផ្តួចផ្តើមគំនិតសម្របសម្រួលអោយមានកិច្ចប្រជុំ និងធ្វើជាម្ចាស់ផ្ទះ។ ខ្ញុំក៏សូមអរគុណឯកឧត្តមប្រធានាធិបតី Donald Trump ដែលបានផ្តល់ការគាំទ្រដល់ដំណើរការចរចាររកការឈប់បាញ់ភ្លាមដើម្បីកសាងសន្តិភាព តាមរយៈសហរដ្ឋអាមេរិកធ្វើជាសហអ្នករៀបចំនៃជំនួបថ្ងៃនេះ។ ខ្ញុំក៏សូមអរគុណដល់រដ្ឋាភិបាលចិនដែលតែងតែគាំទ្រលើកទឹកចិត្តអោយភាគីទាំងពីរស្វែងរកការឈប់បាញ់និងចូលរួមយ៉ាងសកម្មគាំទ្រដល់ជំនួបពិសេសនេះផងដែរ៕SRP

ឃាត់ខ្លួនយុវជនម្នាក់នៅសៀមរាប ពីបទបង្ហោះព័ត៌មានក្លែងក្លាយពាក់ព័ន្ធនឹងការផ្ទុះអាវុធតាមព្រំដែនកម្ពុជា-ថៃ

រាជធានីភ្នំពេញ៖សមត្ថកិច្ចនៃក្រុមការងារ Hotline Scam 24/7 នៃអគ្គស្នងការដ្ឋាននគរបាលជាតិ សហការជាមួយស្នងការដ្ឋាននគរបាលខេត្តសៀមរាប នៅថ្ងៃទី២៥ ខែកក្កដា ឆ្នាំ២០២៥ នេះ បានឃាត់ខ្លួនយុវជនម្នាក់ឈ្មោះ ស.ល.ហ ភេទប្រុស អាយុ១៩ឆ្នាំ រស់នៅស្រុកវ៉ារិន ខេត្តសៀមរាប ដែលបានបង្ហោះវីដេអូសារសម្លេងអនាមិកមួយ ដោយញុះញង់ឲ្យប្រជាពលរដ្ឋដែលរស់នៅក្រុងប៉ោយប៉ែត ខេត្តបន្ទាយមានជ័យ ចាកចេញពីលំនៅដ្ឋាន។

ប្រតិបត្តិការនេះ តាមបទបញ្ជាផ្ទាល់ពី ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងដោយមានការចង្អុលដឹកនាផ្ទាល់ពី ឯកឧត្តម ឧត្តមសេនីយ៍ឯក ជា ពៅ អគ្គស្នងការរងនគរបាលជាតិ និងជាប្រធានក្រុមការងារ Hotline Scam 24/7 សហការជាមួយលោកឧត្តមសេនីយ៍ទោ ហួត សុធី ស្នងការ នៃស្នងការដ្ឋាននគរបាលខេត្តសៀមរាប ដោយមានការសម្របសម្រួលពីអយ្យការអមសាលាដំបូងខេត្តសៀមរាប ។

បន្ទាប់ពីការសាកសួរបំភ្លឺពីយុវជនខាងលើនេះ បានឆ្លើយសារភាពថា ការបង្ហោះវីដេអូសារសម្លេងពិតជាពុំមានប្រភពច្បាស់លាស់នោះទេ ។

អគ្គស្នងការដ្ឋាននគរបាលជាតិ សូមអំពាវនាវដល់ប្រជាពលរដ្ឋដែលប្រើប្រាស់បណ្តាញសង្គម មេត្តាចូលរួមសហការទប់ស្កាត់ឲ្យបានម៉ឺងម៉ាត់រាល់ការផ្សព្វផ្សាយព័ត៌មានក្លែងក្លាយ ដែលបង្កភាពចលាចលអសន្តិសុខសណ្តាប់ធ្នាប់សង្គម ក្នុងកាលៈទេសៈដែលរាជរដ្ឋាភិបាលកម្ពុជាកំពុងរារាំង និងទប់ស្កាត់ការរំលោភបំពានអធិបតេយ្យភាពកម្ពុជាពីប្រទេសជិតខាង៕SRP

ឯកឧត្តមរដ្ឋមន្ត្រី នេត្រ ភក្ត្រា ៖ កិច្ចប្រជុំ AMS នឹងជះឥទ្ធិពលជាវិជ្ជមាន ចំពោះអនាគតរបស់វិស័យព័ត៌មាននៅក្នុងតំបន់ និងពិភពលោក

ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានបង្ហាញថា សន្និសីទកំពូលប្រព័ន្ធផ្សព្វផ្សាយអាស៊ី ហៅកាត់ថា AMS នឹងជះឥទ្ធិពលជាវិជ្ជមាន ចំពោះអនាគតរបស់វិស័យព័ត៌មាននៅក្នុងតំបន់ និងពិភពលោក ដែលធ្វើឱ្យប្រជាពលរដ្ឋទទួលបាននូវព័ត៌មានដែលមានគុណភាព ធានាបាននូវសិទ្ធិទទួលព័ត៌មានគ្រប់ជ្រុងជ្រោយ រួមទាំងការទប់ស្កាត់ព័ត៌មានក្លែងក្លាយ។

ក្នុងពិធីជប់លៀងផ្លូវការ និងប្រគល់រង្វាន់ជូនគណៈប្រតិភូជាតិ និងអន្តរជាតិ ដែលបានអញ្ជើញចូលរួមសន្និសីទកំពូលប្រព័ន្ធផ្សព្វផ្សាយអាស៊ី លើកទី២០ នៅខេត្តសៀមរាប នារាត្រីថ្ងៃទី២២ ខែកក្កដា ឆ្នាំ២០២៥ ឯកឧត្តមរដ្ឋមន្ត្រី នេត្រ ភក្ត្រា បានមានប្រសាសន៍ថា ក្នុងរយៈពេល២ទសវត្សរ៍ កិច្ចប្រជុំនេះបានក្លាយជាវេទិកាដ៏សំខាន់សម្រាប់ការពិភាក្សា កិច្ចសហប្រតិបត្តិការ និងបំណងច្នៃប្រឌិតក្នុងវិស័យព័ត៌មានមិនត្រឹមតែក្នុងអាស៊ីទេ ប៉ុន្តែជាសកលផងដែរ។ ការជួបជុំគ្នានាពេលនេះ គឺដើម្បីអបអរសាទរដល់ការលើកកម្ពស់នៃភាពល្អឆ្នើម ដែលជាភស្តុតាងនៃការច្នៃប្រឌិត បំណងការងារ និងការរួមចំណែកដល់សហគមន៍ និងឧស្សាហកម្មព័ត៌មានផ្សព្វផ្សាយ។

ឯកឧត្តមរដ្ឋមន្ត្រី មានប្រសាសន៍ទៀតថា ការទាក់ទង និងការផ្លាស់ប្តូរខាងគំនិតនៅក្នុងកិច្ចប្រជុំ AMS នឹងជះឥទ្ធិពលយ៉ាងខ្លាំងចំពោះអនាគតរបស់វិស័យព័ត៌មាននៅក្នុងតំបន់របស់យើង។ ចំណេះដឹងដែលត្រូវបានចែករំលែកក្នុងថ្ងៃនេះ ជាពិសេសអំពីឧបករណ៍ឌីជីថលថ្មីៗ វិធីសាស្ត្រផ្ទៀងផ្ទាត់ព័ត៌មាន និងយុទ្ធសាស្ត្រចែកចាយចំណេះដឹងឌីជីថល បានផ្តល់នូវការយល់ដឹងថ្មីៗ និងវិធីសាស្ត្រប្រកបដោយប្រសិទ្ធភាពក្នុងការបង្កើនការយល់ដឹងសាធារណៈ និងការតស៊ូប្រឆាំងនឹងព័ត៌មានក្លែងក្លាយ។ បន្ថែមពីនោះ នៅក្នុងកិច្ចប្រជុំថ្ងៃនេះ ក៏បានបញ្ចេញចំណុចសំខាន់ជាច្រើន ដែលទាក់ទងនឹងគោលបំណងធំបំផុតដែលយើងស្វែងរកនៅក្នុងសន្និសីទដែលនឹងបន្ត។

ឯកឧត្តមសង្ឃឹមថា កិច្ចប្រជុំកំពូលនេះនឹងផ្តល់នូវវេទិកាដ៏មានតម្លៃ សម្រាប់អ្នកជំនាញផ្នែកប្រព័ន្ធផ្សព្វផ្សាយដើម្បីផ្លាស់ប្តូរគំនិត ជំរុញកិច្ចសហប្រតិបត្តិការ និងដោះស្រាយ បញ្ហាប្រឈម និងឱកាសដែលកំពុងវិវត្តនៅក្នុងទិដ្ឋភាពប្រព័ន្ធផ្សព្វផ្សាយ។

លោក ឌី រ៉ាដូ អភិបាលរងខេត្តសៀមរាប មានប្រសាសន៍ថា ជាការពិតណាស់ ខេត្តសៀមរាប បានដើរតួជាម្ចាស់ផ្ទះនៃសន្និសីទជាតិ និងអន្តរជាតិ កិច្ចប្រជុំ និងវេទិកាជាច្រើន ព្រមទាំងសកម្មភាពសង្គម និងប្រពៃណីផងដែរ។ ទាំងនេះបានធ្វើឱ្យយើងខ្ញុំ និងប្រជាជន ខេត្តសៀមរាបមានមោទកភាព និងកិត្តិយសយ៉ាងខ្លាំង។ សម្រាប់កិច្ចប្រជុំនេះបានប្រមូលផ្ដុំអ្នកជំនាញប្រព័ន្ធផ្សព្វផ្សាយ ទីប្រឹក្សាប្រព័ន្ធផ្សព្វផ្សាយ និងអ្នកជំនាញ អ្នកកែសម្រួលជាន់ខ្ពស់ និងអ្នកសារព័ត៌មាននៅក្នុងតំបន់។ ពួកគាត់ សុទ្ធតែជាអ្នកនាំសារ ដែលយើងសង្ឃឹមយ៉ាងមុតមាំថា នៅពេលដែលលោកអ្នកត្រឡប់ទៅប្រទេសរៀងៗខ្លួនវិញ លោកអ្នកនឹងនាំសារឆ្លងទៅកាន់សាច់ញាតិ មិត្តភក្តិ មិត្តរួមការងារ និងសហគមន៍របស់លោកអ្នកអំពីជីវិត ដ៏សុខសាន្តនៅទីនេះក្នុងប្រទេសកម្ពុជា ជាមួយនឹងបដិសណ្ឋារកិច្ចដ៏កក់ក្ដៅរបស់ប្រជាជនរបស់ខ្លួន និង អនុស្សាវរីយ៍ដ៏អស្ចារ្យផ្សេងទៀតដែលលោកអ្នកបានទទួលក្នុងអំឡុងពេលស្នាក់នៅខេត្តសៀមរាប។

សូមជម្រាបថា ការប្រគល់ពានរង្វាន់អន្តរជាតិ AIBD ឆ្នាំ២០២៥ ដោយម្ចាស់ជ័យលាភី កម្មវិធីទូរទស្សន៍ល្អបំផុត បានទៅលើទូរទស្សន៍ KBS ដែលបានដាក់កម្មវិធីមានចំណងជើងថា ភ្នំភ្លើងនឹងពួកយើង-ភ្នំយ៉ាស៊ូ , កម្មវិធីវិទ្យុល្អបំផុត បានទៅលើវិទ្យុជាតិកម្ពុជា ដែលបានដាក់កម្មវិធីមានចំណងជើងថា ប្រាសាទភ្នំដា ជាទីកំណើតប្រជាជនខ្មែរ, ពានរង្វាន់និរន្តរភាព និងបច្ចេកវិទ្យាបៃតង ដំណោះស្រាយកាកសំណល់ បានទៅលើទូរទស្សន៍ និងវិទ្យុ MRTV ដែលកម្មវិធីមានចំណងជើងថា ការកែប្រែសំរាម ដើម្បីភាពប្រសើរនៅថ្ងៃស្អែក និងពានរង្វាន់គណៈវិនិច្ឆ័យប្រព័ន្ធផ្សព្វផ្សាយអន្តរជាតិ AIBD ឆ្នាំ២០២៥ បានទៅលើ វិទ្យុសំឡេង វៀតណាម VOV ដែលកម្មវិធីមានចំណងជើងថា ដីល្អទាក់ទាញសត្វបក្សី៕

អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
#មន្ទីរព័ត៌មានខេត្តសៀមរាប

លិខិតមិនទាន់ចេញ! តែធ្វើសកម្មភាពចាក់ដីលុបត្រពាំងវៀនខេត្តសៀមរាប៖ក្រុមមន្ត្រីជំនាញពាក់ព័ន្ធបាននាំគ្នាចុះទៅហាមឃាត់ការចាក់ដីលុបត្រពាំងមួយកន្លែង។

ការចុះទៅហាមឃាត់យ៉ាងដូច្នេះបន្ទាប់ពីមានការចាក់ដីលុបត្រពាំងហើយត្រូវបានបណ្ដាញសារព័ត៌មានផ្សព្វផ្សាយផងដែរ។

ទីតាំងត្រពាំងវៀន ស្ថិតនៅភូមិ សាលាកន្សែង សង្កាត់ស្វាយដង្គំ ក្រុងសៀមរាប។ ការចុះហាមឃាត់ នៅថ្ងៃអង្គារ ទី២២ ខែកក្កដា ឆ្នាំ២០២៥។

ម្ចាស់ទីតាំងដែលបានចាក់ដីលុបត្រពាំង ឈ្មោះ ណក់ រ័ត្ន ដែលអះអាងថា ជាម្ចាស់ដីឡូត៍មួយកន្លែងជាប់និងត្រពាំងបូរាណដ្ឋានខាងលើ ដោយបានស្នើសុំចាក់ដីតាមលិខិតស្នើសុំតាមរយៈ សង្កាត់ស្វាយដង្គំ ចុះហេត្ថលេខាដោយលោកហ៊ា ហាវ ចៅសង្កាត់។

លោកហៃ យ៉ុង អភិបាលរងក្រុងសៀមរាបបានប្រាប់បណ្តាញព័ត៍មាន ឲ្យដឹងថា ពាក់ព័ន្ធនិងការស្នើសុំចាក់ដីពីម្ចាស់ខាងលើនេះជាក្បាលដីដែលនៅជាប់និងបូរាណដ្ឋានតែប៉ុណ្ណោះ ប៉ុន្តែអ្វីដែលម្ចាស់ខាងលើបានប្រព្រឹត្តលំលោភច្បាប់នោះ ទី១ គឺការស្នើសុំតាមរយៈសង្កាត់ស្វាយដង្គំ បានដាក់នៅច្រកចេញចូលតែមួយរបស់រដ្ឋបាលក្រុងសៀមរាបមរួចហើយតែមិនទាន់ចេញច្បាប់អនុញ្ញាតនោះទេ បែជាម្ចាស់ដីខាងលើធ្វើសកម្មភាពចាក់ដីទៅវិញ។

ទី២ ម្ចាស់ដីខាងលើ បានចាក់ដីលើត្រពាំងបូរាណនិងធ្វើចរាចណ៍ដឹកជញ្ជូនដីបណ្តាលធ្វើអោយប៉ះពាល់ត្រពាំងបូរាណដ្ឋានយ៉ាងខ្លាំង។ ករណីនេះ លោកមិនបានបញ្ជាក់ថា អាជ្ញាធរក្រុងនិងអាជ្ញាធរជាតិអប្សរាដែលបានចុះទៅបញ្ឈប់សកម្មភាព ត្រូវបន្តមានវិធានការផ្លូវច្បាប់ណាមួយចំពោះម្ចាស់ដីដែលបានល្មើសរំលោភនិងច្បាប់អនុញ្ញាតនោះទេ៕SRP