កសិកម្ម កីឡា.ទេសចណ៍ ពាណិជ្ជកម្ម

បានចំណូលបានជាង $២៤លាន ពីការលក់សំបុត្រឱ្យភ្ញៀវទេសចរចូលទស្សនាអង្គរ

ខេត្តសៀមរាប៖គ្រឹះស្ថានអង្គរ បានលក់សំបុត្រឱ្យភ្ញៀវទេសចរអន្តរជាតិចូលទស្សនាអង្គរចំនួន ៥២ ៧៦៧នាក់ នៅក្នុងខែឧសភា ឆ្នាំ២០២៥ កើនឡើង ១១,៧១ ភាគរយ ធៀបនឹងឆ្នាំ២០២៤ នឹងរកចំណូល បានចំនួន ២៤ ៥៦៩ ០២៤  ដុល្លារអាមេរិក កើនឡើង ១០,៦៤ភាគរយ ធៀបនឹងរយៈពេលដូចគ្នា កាលពីឆ្នាំ២០២៤។

នេះបើយោងតាមសេចក្ដីប្រកាសព័ត៌មានរបស់គ្រឹះស្ថានអង្គរ ដែលចេញផ្សាយនៅថ្ងៃទី១ ខែមិថុនានេះ ក៏បានបង្ហាញថា សម្រាប់ក្នុងខែឧសភា ឆ្នាំ២០២៥ មានភ្ញៀវទេសចរអន្តរជាតិទិញបណ្ណចូលទស្សនាអង្គរ មានចំនួន ៥២ ៧៦៧នាក់ បើធៀបនឹងខែឧសភា ឆ្នាំ២០២៤ កើនឡើងជាង ៣ភាគរយ និងរកចំណូលបានចំនួន ២ ៣៦០ ២១៤ដុល្លារអាមេរិក កើនឡើងជាង ៣ភាគរយ បើធៀបក្នុងរយៈពេលដូចគ្នាកាលពីឆ្នាំ២០២៤។

របាយការណ៍ដដែល បានបញ្ជាក់ទៀតថា ក្នុងខែឧសភា ឆ្នាំ២០២៥នេះដែរ ភ្ញៀវទេសចរបរទេសដែលទិញសំបុត្រចូលទស្សនារមណីយដ្ឋានអង្គរ គឺភ្ញៀវទេសចរចិន ជាប់លំដាប់លេខ១, សហរដ្ឋអាមេរិកលេខ២, អង់គ្លេសលេខ៣, អូស្ត្រាលីលេខ៤, បារាំងលេខ៥ និងជប៉ុនលេខ៦។ ប៉ុន្តែរយៈពេល៥ខែ ពីខែមករាដល់ខែឧសភានេះ ភ្ញៀវទេសចរអន្តរជាតិដែលទិញសំបុត្រច្រើនជាងគេ គឺសហរដ្ឋអាមេរិកលេខ១, អង់គ្លេសលេខ២, ប្រទេសបារាំងលេខ៣, ចិនលេខ៤ និងលេខ៥ ប្រទេសកូរ៉េខាងត្បូង៕SRP

អត្ថបទ៖ លោក ឈិត សាវី
កែសម្រួល៖ លោក អ៊ុន ណារាជ្យ

ខេត្តសៀមរាប៖យុវសិស្សចំនួន៣រូប ឈ្មោះ ពៅ ជុំរតនៈ ជាសិស្សថ្នាក់ទី១២ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ១ លេីមុខវិជ្ជារូបវិទ្យា ទូទាំងខេត្ត និងទូទាំងប្រទេស មួយរូបទៀតទទួលបានជ័យលាភី ចំណាត់ថ្នាក់លេខ១ លេីមុខវិជ្ជាគណិតវិទ្យា ទូទាំងខេត្ត ឯមួយរូបទៀតទទួលបានជ័យលាភី ចំណាត់ថ្នាក់លេខ៣ លេីមុខវិជ្ជារូបវិទ្យា ទូទាំងខេត្ត ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ។

ការផ្ដល់រង្វាន់អបអរសាទរសិស្សពូកែនេះធ្វើឡើងនៅព្រឹក ថ្ងៃទី១៣ ខែឧសភា ឆ្នាំ២០២៥ នៅសាលាអន្តរជាតិ ស្មាធ ឃីដ ខេត្តសៀមរាប សាខាទី៣ ដោយមានការអញ្ជើញចូលរួមពីអគ្គនាយកសាលា គណៈគ្រប់គ្រង លោកគ្រូអ្នកគ្រូ សិស្សានុសិស្ស និងមាតាបិតារបស់សិស្សពូកែទាំងបីរូបនោះផងដែរ។

យុវសិស្សឈ្មោះ ពៅ ជុំរតនៈ ជាសិស្សថ្នាក់ទី១២ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ១ លេីមុខវិជ្ជារូបវិទ្យា ទូទាំងខេត្ត និងទូទាំងប្រទេស ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ ចំនួន ៣លាន៥សែនរៀល។

-យុវសិស្សឈ្មោះ មាស សុវណ្ណរ័ត្ន ជាសិស្សថ្នាក់ទី៩ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ១ លេីមុខវិជ្ជាគណិតវិទ្យា ទូទាំងខេត្ត ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ និងក្រុមហ៊ុនហ្វតតេ អ៊ិនសួរីនស៍ (ខេមបូឌា) ចំនួន ១លានរៀល។

-យុវសិស្សឈ្មោះ វ៉ាន់ ដារ៉ាវិជ្ជា ជាសិស្សថ្នាក់ទី៩ មកពីសាលាអន្តរជាតិ ស្មាធ ឃីដ ទទួលបានជ័យលាភី ចំណាត់ថ្នាក់លេខ៣ លេីមុខវិជ្ជារូបវិទ្យា ទូទាំងខេត្ត ទទួលបានរង្វាន់លើកទឹកចិត្តពីសាលាអន្តរជាតិ ស្មាធ ឃីដ និងក្រុមហ៊ុនហ្វតតេ អ៊ិនសួរីនស៍ (ខេមបូឌា) ចំនួន ១លានរៀល។

យុវសិស្សទាំង៣រូប មកពីសាលាអន្តរជាតិ ស្មាធ ឃីដ បានសម្ដែងនូវការរីករាយនិងមានមោទនភាពយ៉ាងខ្លាំងចំពោះការខិតខំប្រឹងរៀនសូត្ររហូតទទួលបានចំណាត់ថ្នាក់នឹងបានថ្លែងអំណរគុណដល់សាលាអន្តរជាតិ ស្មាធ ឃីដ ដែលបានផ្ដល់ចំណេះដឹងដល់រូបគេជាសាលាអន្តរជាតិមានគុណភាពផងដែរ។

សូមជម្រាបថា តាមការបញ្ជាក់ពីសាលាអន្តរជាតិ ស្មាធ ឃីដ បានបើកសម្ភោធជាផ្លូវការតាំងពីថ្ងៃទី៧ ខែមករា ឆ្នាំ ២០០៩ មានរយៈពេល ១៦ ឆ្នាំមកហើយដោយមានការអនុញ្ញាតពីក្រសួងអប់រំយុវជននិងកីឡា និងមានការគាំទ្រពីឧត្តមភាពសិក្សាមានគុណភាព ហើយបានពង្រីកសាខាជាច្រើនកន្លែងផងដែរ។

សាលាស្មាធ ឃីដមានកម្មវិធីសិក្សា៖
-ចំណេះទូទៅភាសាខ្មែរ (ពីកម្រិតមត្តេយ្យ ដល់ថ្នាក់ទី១២)
-ចំណេះទូទៅភាសាអង់គ្លេស-ចិន (ពីកម្រិតមុនមត្តេយ្យ ដល់ថ្នាក់ទី១២)
-ភាសាអង់គ្លេសត្រៀមអាហារូបករណ៍ (IELTS 7-12) តាមកម្មវិធី British Council
-សហគ្រិនភាព តាមកម្មវិធី Venture Lab  របស់សហរដ្ឋអាមេរិក
-សំណេរកូដ (Coding) តាមកម្មវិធី Tynker  របស់សហរដ្ឋអាមេរិក
-Robotic & Stick’Em  តាមកម្មវិធី  របស់សឹង្ហបុរី

បាវចនា៖ មូលដ្ឋានអប់រំរឹងមាំ អនាគតរុងរឿង

ចក្ខុវិស័យ៖ អប់រំសិស្សឱ្យទទួលបាន មូលដ្ឋានអប់រំរឹងមាំ ដើម្បីអនាគតរុងរឿង។

បេសកកម្ម៖ អប់រំសិស្សឱ្យមានឧត្តមភាពលើសូចនាករបួន ចំណេះដឹង ចំណេះធ្វើ សីលធម៌ និងទំនុកចិត្តលើខ្លួនឯង។

ឧត្តមភាពអប់រំ៖ ប្តេជ្ញាចំពោះឧត្តមភាពអប់រំ ដោយបន្តជំរុញបរិយាកាសសិក្សាដោយភាពច្នៃប្រឌិត បរិយាបន្ន ដែលសិស្សគ្រប់រូបមានសិទ្ធិសម្រេចសក្តានុពលរបស់ខ្លួន។

សិស្ស ឪពុកម្តាយ បុគ្គលិក សហគមន៍៖ សសរស្តម្ភទាំងបួននេះ ជួយដល់ឧត្តមភាពអប់រំ ពោលគឺ ការចង់ដឹងចង់ឃើញរបស់សិស្ស គប្បីមានការគាំទ្រពី មាតាបិតា បុគ្គលិកជំនាញរបស់សាលា និងសហគមន៍។

សុវត្ថិភាពសិក្សា ប្រសិទ្ធភាពអប់រំ៖ យកចិត្តទុកដាក់លើឧត្តមភាពអប់រំ និងបរិស្ថាន ផ្តល់បរិក្ខារសិក្សាមានសុវត្ថិភាព ប្រើវិធីសាស្រ្តមានប្រសិទ្ធភាពដែលធានាដល់ការសិក្សាដែលមិនផ្តល់ផលអវិជ្ជមានដល់ភពផែនដី។

ថ្នាលអប់រំគាំទ្របរិស្ថាន៖ ផ្តល់សេវាអប់រំ និងសេវាគាំទ្រ ស្របច្បាប់ក្នុងថ្នាលអប់រំដែលគាំទ្របរិស្ថាន សាលាប្រកួតប្រជែងបង្កើតបរិយាកាសសិក្សាដែលមិនប៉ះពាល់ដល់បរិស្ថាន ប៉ុន្តែជំរុញការសិក្សា និងការស្រឡាញ់ថែរក្សាបរិស្ថាន៕

សម្ដេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ បានអញ្ជើញទស្សនាផ្ទះកំណើត របស់ សម្ដេចតេជោ ហ៊ុន សែន ស្ថិតក្នុងភូមិពាមក្រៅ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម កាលពីរសៀលថ្ងៃអាទិត្យ ទី១១ ខែឧសភា ឆ្នាំ២០២៥។

ក្នុងឱកាសនោះ ក៏មានវត្តមានអញ្ជើញចូលរួមពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ភរិយាថ្នាក់ដឹកនាំ និងក្រុមការងារជាច្រើនរូបទៀត បន្ទាប់ពីបានចូលរួមក្នុងពិធីបុណ្យវិសាខបូជា នៅបូជនីយដ្ឋាន រូបសំណាកនាគ នាឃុំកោះពីរ ស្រុកក្រូចឆ្មាររួចមក។

នេះជាដំណើរជាប្រវត្តិសាស្ត្រលើកដំបូង របស់សម្តេចកិត្តិសង្គហបណ្ឌិត ម៉ែន សំអន ដែលបានអញ្ជើញមកទស្សនាដោយដោយផ្ទាល់ ដល់ផ្ទះកំណើតសម្តេចតេជោ ហ៊ុន សែន ដោយបានទទួលបដិសណ្ឋារកិច្ចយ៉ាងកក់ក្តៅពី ឯកឧត្តម អ៊ុន ចាន់ដា អភិបាលខេត្តកំពង់ចាម អាជ្ញាធរមូលដ្ឋាន និងបងប្អូនប្រជាពលរដ្ឋដែលរស់នៅម្តុំនោះ និងបានសំណេះសំណាល រួចហូបផ្លែឈើប្រចាំគ្រួសារជុំគ្នាក្នុងបរិយាកាសសប្បាយរីករាយ និងស្និទ្ធស្នាលក្រៃលែង។

តាមរយៈ ឯកឧត្តម ច្រឹង គឹមស្រ៊ាន អតីតសមាជិកព្រឹទ្ធសភានីតិកាលទី៤ បច្ចុប្បន្នជាទីប្រឹក្សាសម្តេចតេជោ ហ៊ុន សែន បានបញ្ជាក់ថា កាលពីអំឡុងខែមករា ឆ្នាំ១៩៨៨ ដោយមើលឃើញថា ផ្ទះចាស់មានសភាពទ្រុឌទ្រោមខ្លាំង ទើបលោកសុំការឯកភាពពី សម្ដេច ហ៊ុន នាង រុះរើផ្ទះចាស់នោះចេញ ជំនួសដោយផ្ទះថ្មី ដែលសង់អំពីឈើប្រក់ក្បឿង ទំហំ ៦ម×១៤ម ដែលមានអ្នកស្រី សុន ជូ និងស្វាមី ជាអ្នកមើលថែទាំរហូតដល់សព្វថ្ងៃនេះ។

បើតាមតាមការបង្ហើបឲ្យដឹងពី ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នាឱកាសនោះ ឯកឧត្តមមានគម្រោងកែច្នៃ និងរៀបចំផ្ទះនេះ ទៅជារមណីយដ្ឋានប្រវត្តិសាស្ត្រតេជោសែន ដើម្បីទុកជាកេរ្តិ៍ដំណែលប្រវត្តិសាស្ត្ររបស់សម្តេចតេជោ ហ៊ុន សែន និងជាកំណប់ទ្រព្យរបស់អ្នកស្ទឹងត្រង់, ទុកជាការសិក្សាស្រាវជ្រាវរបស់យុវជនជំនាន់ក្រោយៗទៀត ក៏ដូចជាការបង្កើនចំណូលសេដ្ឋកិច្ចគ្រួសារ តាមរយៈការពឹងផ្អែកទៅលើវិស័យទេសចរណ៍ និងលើកស្ទួយមុខមាត់ខេត្តកំពង់ចាមឲ្យកាន់តែមានភាពរីកចម្រើនប្រកបដោយសក្តានុពល និងភាពទាក់ទាញ។

ជាការឆ្លើយតប សម្តេចកិត្តិសង្គហបណ្ឌិត ក៏បាន សម្តែងនូវការកោតសសើរ ពេញចិត្ត និងគាំទ្រទាំងស្រុងចំពោះគំនិតផ្តួចផ្តើមក្នុងការប្រែក្លាយផ្ទះនៅស្រុកកំណើតសម្តេចតេជោ ទៅជារមណីយដ្ឋានប្រវត្តិសាស្ត្រតេជោសែន និងបានជំរុញឲ្យ ឯកឧត្តម ហួត ហាក់ និង ឯកឧត្តម អ៊ុន ចាន់ដា រួមសហការគ្នាសិក្សាអំពីនីតិវិធីក្នុងរៀបចំ៕SRP

តើសម្តេចធិបតី ហ៊ុន ម៉ាណែត ឆ្លើយតបដូចម្តេចចំពោះបុគ្គលដែលឌឺដងថា «គង់តែមានមិនបាច់ខំ»?

សម្តេចបវរធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា មាន បុគ្គលមួយចំនួន បានឌឺដងមករាជរដ្ឋាភិបាលថា បើគង់តែនៅឆ្នាំ២០៥០ កម្ពុជាក្លាយទៅជាប្រទេស អ្នកមានហើយ រាជរដ្ឋាភិបាលមិនចាំបាច់ប្រឹងទេ ដែលការលើកឡើងបែបនេះ មិនមែនជារឿងត្រឹមត្រូវនោះឡើយ។

ក្នុងពិធីសំណេះសំណាលជាមួយមន្រ្តីរាជការ បុគ្គលិក កម្មករនិយោជិត នៃកំពង់ផៃស្វយ័តក្រុងព្រះសីហនុ ក្នុងឱកាសអបអរសាទរទិវាពលកម្មអន្តរជាតិ១ឧសភា នាព្រឹកថ្ងៃទី១ ខែឧសភា ឆ្នាំ២០២៥ សម្តេចបវរធិបតី ហ៊ុន ម៉ាណែត បានថ្លែងថា មានប្រទេសខ្លះជាប្រទេសអ្នកមានហើយ ប៉ុន្តែបានធ្លាក់ខ្លួនក្រីក្រវិញដោយសារសង្រ្គាម ដូចនេះ ទោះបីជាប្រទេសនោះអ្នកមានក៏ដោយ ក៏ត្រូវតែបន្តខិតខំប្រឹងប្រែងតទៅទៀតដើម្បីកុំឱ្យធ្លាក់ខ្លួនទៅជាប្រទេសក្រីក្រវិញ។

សម្តេចបវរធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាល បន្តខិតខំប្រឹងប្រែងដើម្បីថែរក្សា សុខសន្តិភាព ទប់ស្កាត់កុំឱ្យមានសង្រ្គាមកើតឡើងដែលអាចធ្វើឱ្យប្រទេសដើរថយក្រោយ និងធ្វើឱ្យស្លាប់បាត់បង់អាយុជីវិតប្រជាពលរដ្ឋយើង៕SRP

អាជ្ញាធរខេត្តសៀមរាប បង្ហាញភាពស្ញប់ស្ញែង និងក្ដីមោទកៈចំពោះជោគជ័យនៃព្រឹត្តិការណ៍អង្គរសង្ក្រាន្ត

រដ្ឋបាលខេត្តសៀមរាបបានកោតសរសើរ ព្រមទាំងបង្ហាញភាពស្ញប់ស្ញែង និងក្ដីមោទកៈជាទីបំផុត ចំពោះការរក្សាបាននូវសន្តិសុខ សណ្តាប់ធ្នាប់សាធារណៈយ៉ាងល្អប្រសើរ រួមទាំងសុវត្ថិភាពចរាចរណ៍ ក្នុងឱកាសនៃព្រឹត្តិការណ៍អង្គរសង្ក្រាន្ត រយៈពេល៣ថ្ងៃ ចាប់ពីថ្ងៃទី១៤ រហូតដល់ថ្ងៃទី១៦ ខែមេសា ឆ្នាំ២០២៥។ ការកោតសរសើរនេះបានធ្វើឡើងបន្ទាប់ពីខេត្តសៀមរាប បានទទួលការរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ ពីសហភាពសហព័ន្ធយុវជនកម្ពុជា ដែលប្រព្រឹត្តទៅដោយជោគជ័យ និងទទួលបានភ្ញៀវទេសចរជាតិ និងអន្តរជាតិរាប់សែននាក់។

ជាក់ស្តែងក្នុងរយៈពេល៣ថ្ងៃនៃព្រឹត្តិការណ៍អង្គរសង្ក្រាន្តឆ្នាំ២០២៥នេះ ខេត្តសៀមរាបទទួលបានភ្ញៀវទេសចរជាតិ អន្តរជាតិ និងបងប្អូនប្រជាពលរដ្ឋ ចូលមកទស្សនាកម្សាន្តចំនួនប្រមាណ ២,៧៥២,៨១៨ នាក់ ក្នុងនោះរួមមានភ្ញៀវទេសចរអន្តរជាតិប្រមាណចំនួន ១២,៨១៨នាក់ និងភ្ញៀវទេសចរជាតិ និងបងប្អូនប្រជាពលរដ្ឋមានចំនួន ប្រមាណ ២,៧៤០,០០០នាក់ ស្របពេលដែលខេត្តសៀមរាបមានកម្មវិធីធំៗជាច្រើនទៀតបន្ថែមពីកម្មវិធីអង្គរសង្រ្កាន្ត ក្នុងនោះមានព្រះរាជពិធីបួងសួងចម្រើនសេចក្តីសុខជូនព្រះរាជាណាចក្រកម្ពុជា ក្រោមព្រះរាជាធិបតីដ៏ខ្ពង់ខ្ពស់បំផុត ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជានៅប្រាសាទអង្គរវត្ត។

តាមរយៈទំព័រហ្វសប៊ុកផ្លូវការ នាថ្ងៃទី១៨ ខែមេសានេះ រដ្ឋបាលខេត្តសៀមរាប ក៏បានថ្លែងអំណរគុណយ៉ាងជ្រាលជ្រៅចំពោះអនុគណៈកម្មការនីមួយៗ នៃព្រឹត្តិការណ៍អង្គរសង្ក្រាន្ត ដែលបានរៀបចំ និងសម្របសម្រួលបានយ៉ាងល្អប្រសើរ និងថ្លែងអំណរគុណចំពោះកងកម្លាំងប្រដាប់អាវុធទាំងអស់ដែលបានសម្រួលចរាចរណ៍ដែលមិនឱ្យមានការកកស្ទះយូរ និងបានការពារបាននូវសន្តិសុខ សណ្តាប់ធ្នាប់បានយ៉ាងល្អ ទាំងការងារសម្អាតអនាម័យបរិស្ថាន បានយកអស់កម្លាំងកាយចិត្តក្នុងការសម្អាត ដឹកយកកាកសំណល់ចេញបានទាន់ពេលវេលា ដែលធ្វើឱ្យអនាម័យបរិស្ថានក្នុងព្រឹត្តិការណ៍អង្គរសង្ក្រាន្ត ពោពេញដោយសោភណភាពល្អប្រសើរ។

សូមបញ្ជាក់ផងដែរថាក្នុងព្រឹត្តិការណ៍អង្គរសង្រ្កាន្ត បើតាមលោក ហួត សុធី ស្នងការ នៃស្នងការដ្ឋាននគរបាលខេត្តសៀមរាប អនុវត្តតាមបទបញ្ជាដ៏ម៉ឺងម៉ាត់របស់គណៈបញ្ជាឯកភាពខេត្ត លោករៀបចំកម្លាំងរបស់ស្នងការដ្ឋាននគរបាលខេត្តជាង២ពាន់នាក់ បូករួមទាំងកម្លាំងប្រជាការពារ និងកម្លាំងអន្តរាគមន៍សរុបទាំងអស់ជាង៣ពាន់នាក់ ដែលមាន១៥ស្ថាប័ន នៃអង្គភាពដែលពាក់ព័ន្ធចំណុះគណៈបញ្ជាការឯកភាពខេត្ត គឺបានត្រៀមខ្លួនក្នុងការការពារសុវត្ថិភាពជូនភ្ញៀវជាតិ និងអន្តរជាតិដែលអញ្ជើញមកចូលរួមទស្សនាកម្សាន្តសប្បាយ ទាំងពេលយប់និងពេលថ្ងៃ ពោលគឺ២៤លើ២៤ម៉ោងនៅគ្រប់គោលដៅទាំងអស់៕

ដោយ សេង បូលីន
មន្រ្តីព័ត៌មានក្រុមអ្នកនាំពាក្រសួងមហាផ្ទៃ