ព័ត៌មានជាតិ

ខេត្តសៀមរាប៖មនុស្សចំនួន១១៦នាក់ នៅខេត្តសៀមរាប បានស្លាប់ និងរបួសធ្ងន់ស្រាលជាង១០០នាក់ ដោយសារគ្រោះថ្នាក់ចរាចណ៍ ត្រឹមតែ រយ:ពេល៩ខែប៉ុណ្ណោះ។

យោងតាមរបាយការណ៍ គ្រោះថា្នក់ចរាចរណ៍របស់ការិយាល័យនគរបាលចរណ៍ផ្លូវគោកខេត្តសៀមរាបបានឲ្យដឹងថា ករណីគ្រោះថ្នាក់ចរាចណ៍រយ:ពេល ៩ខែ ក្នុងឆ្នាំ២០២២ កើតមាន១២៤លើក កើនឡើង៨៥លើកក្នុងរយៈពេល ៩ខែបើធៀបនិងរយៈពេលដូចគ្នាក្នុងឆ្នាំ២០២១ ដែលមានត្រឹមតែ ៣៩លើកតែប៉ុណ្ណោះ។

ករណីនេះបណ្ដាលឲ្យមនុស្សចំនួន១១៦នាក់ បានស្លាប់ និងរបួសធ្ងន់ស្រាលជាង១០០នាក់។ចំណែកការផាក ពិន័យប្រមាណជិត៦០០០គ្រឿង។

របាយការណ៍បង្ហាញថា មូលហេតុដែល បណ្តាលអោយមានគ្រោះថ្នាក់កើតឡើង ភាគច្រើន គឺបណ្តាលមកពីការបើកបរលើសល្បឿនកំណត់,មិនប្រកាន់ស្តាំ,ជែងក្នុងស្ថានភាពគ្រោះថ្នាក់,បត់ឆ្វេង ស្តាំខ្វះការប្រុងប្រយ័ត្ននិងបើកបរក្នុងស្ថានភាពស្រវឹងជាដើម។

អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បានសម្តែងការសោកស្តាយចំពោះករណីគ្រោះថ្នាក់ចរាចរណ៍ ក្នុងខេត្តដែលបណ្តាលឲ្យមនុស្សស្លាប់និងរបួសជាច្រើននាក់ ព្រមទាំងខូចខាតសម្ភារៈយ៉ាងច្រើនផងដែរ។

អនុគណៈកម្មការសុវត្ថិភាពចរាចរណ៍ផ្លូវគោកខេត្ត បានសំណូមពរឲ្យបងប្អូន ប្រជាពលរដ្ឋទាំងអស់មេត្តា បង្កើនការប្រុងប្រយ័ត្ន និងគោរពច្បាប់ចរាចរឲ្យបានខ្ចាប់ខ្ចួន ដើម្បីបញ្ចៀសករណីគ្រោះតទៅទៀត៕SRP

ខេត្តសៀមរាប៖អំពើចោរកម្ម ហាក់បីកំរើកឡើងវិញនូវភូមិសាស្រ្តក្រុងសៀមរាប តែករណីនេះត្រូវបានសមត្ថកិច្ចបង្ក្រាបទាន់ពេលវេលាជាបន្តបន្ទាប់។

ជនសង្ស័យចំនួន ៣ នាក់ត្រូវបាននគរបាលផ្នែកព្រហ្មទណ្ឌ​ នៃអធិការដ្ឋាននគរបាលក្រុងសៀមរាប​ ឃាត់ខ្លួនពាក់ព័ន្ធនិងករណីអំពើលួចមានស្ថានទម្ងន់ទោស ( កាច់សោ​ កម៉ូតូ ) និងហិង្សាដោយចេតនា​។ ការឃាត់ខ្លួននៅថ្ងៃទី១៨ ខែតុលា ឆ្នាំ២០២២។

អធិការនគរបាលក្រុងសៀមរាបបានឲ្យដឹងថា ហេតុការណ៍លួចម៉ូតូបានកើតឡើងនៅថ្ងៃទី១៦ ខែតុលា ឆ្នាំ២០២២ វេលាម៉ោង០៨ព្រឹក នៅចំណុចក្បែរបន្ទប់ជួលក្នុងភូមិវិហារចិន សង្កាត់ស្វាយដង្គំ ក្រុងសៀមរាប។

ជនសង្ស័យឈ្មោះ​ សារឿន សំណាង ហៅជា ហៅរ៉ាន់ សល់ ហៅស្បែក បានធ្វើសកម្មភាពលួចម៉ូតូម៉ាកហុងដាឌ្រីម ស៊េរីឆ្នាំ២០០៨ ពណ៌ខ្មៅ បិទតែមប្រិ៍​ ស៊េរីឆ្នាំ២០២១ របស់ជនរងគ្រោះ រួចគេចខ្លួន។

ជនសង្ស័យបានឆ្លើយសារភាពថា ពិតជាបានលួចម៉ូតូពិតមែន និងបានលួចកាបូបប្រាក់ និងកំព្យូទ័រ របស់ប្រជាពលរដ្ឋ ព្រមទាំងធ្វើសកម្មភាពជាមួយបក្ខពួកឈ្មោះ​ សៀប កុសល់ ហៅតឿ និងឈ្មោះ ភន់ សុផល កាច់កលួចយកម៉ូតូក្នុងក្រុងសៀមរាប និងស្រុកសូទ្រនិគម ក្នុងពេលថ្មីៗនេះផងដែរ។

អធិការក្រុងសៀមរាបបានបន្តថា ករណីនេះសមត្ថកិច្ច
បន្ទាប់មកយើងបាននាំខ្លួនជនសង្ស័យឈ្មោះ ភន់ សុផល និងឈ្មោះសៀប កុសល់ ហៅតឿ មកសាកសួរ៖

ឈ្មោះ​ ភន់ សុផល បានឆ្លើយថា ខ្លួនពិតជាបានលួចកាច់សោ​ កម៉ូតូ ក្នុងក្រុងសៀមរាប ជាមួយបក្ខពួកឈ្មោះ​ សៀប កុសល់ ហៅតឿ និងឈ្មោះសារឿន សំណាង ហៅជា ហៅរាន់ សល់ ហៅស្បែក ចំណែកសោរកែច្នៃគឺរូបខ្លួនទិញពីមនុស្សប្រុសម្នាក់។

ឈ្មោះ​ សៀប កុសល់ ហៅតឿ បានឆ្លើយសារភាពថាៈខ្លួនពិតជាបានចូលរួមកាច់សោកលួចយកម៉ូតូ ដោយខ្ល្លួនជាអ្នកមើលផ្លូវ។​ ករណីនេះវត្ថុតាងដកហូតបានម៉ូតូ១គ្រឿង​។ បច្ចុប្បន្ន​ ជនសង្ស័យត្រូវបាន​បញ្ជូនទៅកាន់សាលាដំបូងខេត្តសៀមរាប​។ ចំណែក បក្សពួកដែលបានរត់គេចខ្លួន​ កម្លាំងកំពុងស្រាវជ្រាវតាមចាប់បន្ត​៕SRP

ភ្នំពេញ៖ឆ្លើយតបជាមួយអ្នកសារព័ត៌មាន ទាក់ទងទៅនឹងក្រុមប្រឆាំងជ្រុលនិយម សម្ដេចតេជោ ហ៊ុន សែន បានមានប្រសាសន៍ចោទជាសំណួរថា តើអាចក្លាយជាអ្នកដឹកនាំប្រទេសយ៉ាងម៉េចទៅ? បើមិនទាន់កាន់អំណាចផង ខ្លួនហ៊ានចុះកិច្ចព្រមព្រៀងប្រគល់ឱ្យបរទេសនូវដែនដីកម្ពុជានោះ ? សម្តេចតេជោជំរុញឱ្យពលរដ្ឋត្រូវមើលឱ្យឃើញអំពីសារជាតិក្បត់ជាតិ របស់ទណ្ឌិត សម រង្ស៉ី។ សម្តេចតេជោ មានប្រសាសន៍ថា កុំថាឡើយអ្នកឯងមិនកាន់អំណាច សូម្បីតែសម្តេចកាន់អំណាច បើហ៊ានចុះហត្ថលេខាឱ្យទឹកដីទៅប្រទេសណាមួយ សម្តេចក៏នឹងជាប់ទោសធ្ងន់ធ្ងរដូចគ្នា។ ដូច្នេះ សម្តេចតេជោចាត់ទុកថា សាលក្រមកាត់ទោស បុគ្គលសម រង្ស៉ី មួយជីវិត គឺត្រឹមត្រូវបំផុត។ នៅថ្ងៃនេះ សម្តេចតេជោបានមានប្រសាសន៍បញ្ជាក់ច្បាស់ៗថា រឿងទណ្ឌិត សម រង្ស៊ី សម្តេចមិនត្រឹមតែមិនលើកលែងឱ្យនោះទេ ថែមទាំងដាក់ចេញចលនាកម្ចាត់ចោលនូវនយោបាយជ្រុលនិយមទៀតផង។

នៅថ្ងៃនេះ សម្តេចតេជោ ហ៊ុន សែន ថ្លែងអំណរគុណដល់ធនាគារជាតិ និងគ្រឹះស្ថានមីក្រូហិរញ្ញវត្ថុ ដែលបានផ្តល់ការអនុគ្រោះដល់ប្រជាពលរដ្ឋ ដែលរងគ្រោះដោយទឹកជំនន់។

ទាក់ទងទៅនឹងសកម្មភាពសម្ដេចតេជោដែលនឹងអញ្ជើញធ្វើដំណើរទៅកាន់បណ្ដាខេត្តនានាជាប់បឹងទន្លេសាបនៅថ្ងៃស្អែកនេះ សម្តេចតេជោមិនខ្វល់អំពីការរិះគន់ពីក្រុមប្រឆាំងមួយចំនួនដែលថាសម្ដេចយកឱកាសឃោសនារកសំឡេងឆ្នោតនោះទេ ពីព្រោះការដោះស្រាយបញ្ហាជូនប្រជាពលរដ្ឋ ជាការងាររបស់នាយករដ្ឋមន្ត្រី។

សម្ដេចតេជោ ត្រូវតែទៅជួបបងប្អូនប្រជាពលរដ្ឋ ដើម្បីដោះស្រាយនូវការលំបាក និងបញ្ហាប្រឈមរបស់ប្រជាពលរដ្ឋដែលកំពុងរងគ្រោះដោយគ្រោះទឹកជំនន់និងការដោះស្រាយបញ្ហាប្រឈមផ្សេងៗមួយចំនួនទៀត។

សម្ដេចតេជោបានមានប្រសាសន៍ថា ក្នុងនាមជានាយករដ្ឋមន្ត្រីសម្ដេចមិនសម្ងំនៅផ្ទះនោះទេ ខណៈដែលប្រជាពលរដ្ឋរបស់សម្ដេចកំពុងជួបការលំបាកនោះ ដែលទាំងអស់នេះ គឺជាចរិតរបស់នាយករដ្ឋមន្ត្រីកម្ពុជា ដែលតែងតែផ្សារភ្ជាប់ ដឹងសុខទុក្ខប្រជាពលរដ្ឋគ្រប់ពេលវេលា និងគ្រប់ទីកន្លែងតាំងពីដើមរៀងមក។

សូមបញ្ជាក់ថានៅថ្ងៃព្រហស្បតិ៍​ នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញប្តូរព័ត៌មានថ្ងៃខែឆ្នាំកំណើតក្នុងបញ្ជីឈ្មោះបោះឆ្នោត ទៅសាលាសង្កាត់តាខ្មៅ ក្រុងតាខ្មៅ ខេត្តកណ្ដាល ដោយប្តូរពីថ្ងៃទី០៤ ខែមេសា ឆ្នាំ១៩៥១ ទៅថ្ងៃទី០៥ ខែសីហា ឆ្នាំ១៩៥២ វិញ។

កន្លងទៅនេះ សម្តេចតេជោ ហ៊ុន សែន បានយកថ្ងៃទី០៤ ខែមេសា ឆ្នាំ១៩៥១ ប្រើប្រាស់ជាថ្ងៃខែឆ្នាំកំណើតក្នុងឯកសារផ្សេងៗចាប់តាំងពីក្រោយថ្ងៃរំដោះប្រទេសចេញពីរបបប្រល័យពូជសាសន៍ ប៉ុល ពត។ ថ្ងៃទី៤ ខែមេសា ជាថ្ងៃដែលសម្តេចចូលព្រៃតស៊ូវាយផ្តួលរបបសាធារណរដ្ឋខ្មែរ តាមការអំពាវនាវរបស់សម្តេច នរោត្តម សីហនុ។ ឆ្នាំ២០២២នេះ សម្តេចតេជោ ហ៊ុន សែន បានស្នើទៅតុលាការ ដើម្បីផ្លាស់ប្តូរថ្ងៃខែឆ្នាំកំណត់ មកថ្ងៃខែឆ្នាំកំណើតពិតវិញ គឺថ្ងៃទី០៥ ខែសីហា ឆ្នាំ១៩៥២។

បន្ទាប់ពីអញ្ជើញប្ដូរថ្ងៃ ខែ ឆ្នាំកំណើត ទៅតាមនីតិវិធីបែបរដ្ឋបាលរួចមក សម្ដេចតេជោនាយករដ្ឋមន្ត្រី ក៏បានអញ្ជើញថ្លែងសារ ក៏ដូចជាឆ្លើយតបទៅកាន់បងប្អូនអ្នកសារព័ត៌មាននៅក្នុងខ្លឹមសារសំខាន់ៗដូចខាងក្រោម៖ សម្តេចតេជោ ហ៊ុន សែន បានយកឱកាសនេះ អំពាវនាវឲ្យបងប្អូនប្រជាពលរដ្ឋ ជាពិសេសយុវជនដែលគ្រប់អាយុត្រូវបោះឆ្នោត សូមអញ្ជើញមកចុះឈ្មោះបោះឆ្នោត ចាប់ពីថ្ងៃទី ២០ ខែតុលា ឆ្នាំ២០២២ នេះ តទៅ រហូតដល់ថ្ងៃទី៨ ខែធ្នូ ឆ្នាំ២០២២ ដែលមានរយៈពេល៥០ថ្ងៃ។ សម្តេចតេជោ ក៏បានឲ្យអាជ្ញាធរពាក់ព័ន្ធបង្កលក្ខណៈងាយស្រួល ឱ្យបងប្អូនប្រជាពលរដ្ឋបានមកចុះឈ្មោះបោះឆ្នោត ដើម្បីមានឈ្មោះក្នុងបញ្ជីបោះឆ្នោតនាឆ្នាំ២០២៣ខាងមុខ៕SRP

ខេត្តបាត់ដំបង៖អាជ្ញាធរខេត្តបាត់ដំបងនិងខេត្តប៉ៃលិន
បានធ្វើការពិភាក្សារួចមក រដ្ឋបាលខេត្តទាំង២ បានឯកភាពកែសម្រួលផ្ទៃដីជាង១ម៉ឺនហិកតា ស្ថិតក្នុងភូមិសាស្រ្តស្រុកសំឡូត និងស្រុកកំរៀង ខេត្តបាត់ដំបង ឱ្យស្ថិតនៅក្រោមការគ្រប់គ្រង របស់រដ្ឋបាលខេត្តប៉ៃលិនវិញ។ ដោយក្នុងនោះ ព្រំប្រទល់ដែលខេត្តប៉ៃលិនស្នើសុំកែសម្រួលត្រង់ចំណុចភូមិឡាក់ហុកពីរ និងភូមិបឹងអូរជាង ឃុំកំរៀង ចូលព្រំដីនៅក្នុងខេត្តបាត់ដំបង មានទំហំ ១,៣៧៦ហិកតា ព្រំប្រទល់ដែលខេត្តប៉ៃលិន ស្នើសុំកែសម្រួលត្រង់ចំណុចភូមិកំពង់ចម្លងក្រោម ឃុំតាក្រី ចូលព្រំដី ក្នុងខេត្តបាត់ដំបង មានទំហំ ៣,៦១៨ហិកតា ព្រំប្រទល់ដែលខេត្តប៉ៃលិនស្នើសុំកែសម្រួលតាមគោលធម្មជាតិ(ស្ទឹង) ត្រង់ចំណុចភ្នំដំបង និងអូរស្លេវ ឃុំមានជ័យ ស្រុកសំឡូត ចូលព្រំដីក្នុងខេត្តបាត់ដំបង មានទំហំ ៦,៦៨៥ហិកតា។

នៅក្នុងកិច្ចប្រជុំ លោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ បានមានប្រសាសន៍លើកឡើងថា ការកែសម្រួលព្រំប្រទល់រដ្ឋបាល រវាងខេត្តបាត់ដំបង និងខេត្តប៉ៃលិន គឺដើម្បីប្រសិទ្ធភាពក្នុងការគ្រប់គ្រងសន្តិសុខ សណ្ដាប់ធ្នាប់ ការផ្ដល់សេវារដ្ឋបាល សេវាសាធារណៈ និងការអភិវឌ្ឍមូលដ្ឋានរបស់ខ្លួននីមួយៗ ហើយចំពោះនីតិវិធីនៃការកែសម្រួលព្រំប្រទល់នេះ គឺត្រូវធ្វើឡើងដោយព្រះរាជក្រឹត្យ ស្របតាមច្បាប់កំណត់ និងយកគោលធម្មជាតិដែលមានស្ទឹងសង្កែ និងស្ទឹងមង្គលបូរី ក្នុងការកំណត់ជាព្រំប្រទល់រដ្ឋបាល រវាងខេត្តបាត់ដំបង និងខេត្តប៉ៃលិននេះ។

លោកក៏បានធ្វើការណែនាំដល់រដ្ឋបាលខេត្តទាំងពីរ ទាំងរដ្ឋបាលស្រុក-ក្រុង ឃុំ-សង្កាត់ និងភូមិ ត្រូវយកចិត្តទុកដាក់ អនុវត្តន៍នូវការងារនេះ ឱ្យបានល្អ និងបានណែនាំឱ្យមានការឯកភាពស្រុះស្រួលគ្នា រវាងអាជ្ញាធរនិងអាជ្ញាធរ ប្រជាពលរដ្ឋនិងប្រជាពលរដ្ឋ នៅទីនោះផងដែរ។

លោក សក់ សេដ្ឋា ព្រមទាំងប្រតិភូរដ្ឋបាលខេត្តបាត់ដំបង និងខេត្តប៉ៃលិន ក៏បានអញ្ជើញចុះទៅពិនិត្យមើលនៅចំណុចទីតាំងដែលត្រូវកែសម្រួលព្រំប្រទល់រដ្ឋបាល រវាង រដ្ឋបាលខេត្តទាំង២ ផ្ទាល់ផងដែរដោយបានណែនាំបន្ថែមថា បន្ទាប់ពីព្រះរាជក្រឹត្យចូលជាធរមាន រដ្ឋបាលខេត្តទាំងពីរ ត្រូវខិតខំពិនិត្យនូវឯកសារការផ្ទេរដីធ្លី អត្រានុកូលដ្ឋាន ឯកសារស្នាក់នៅ សៀវភៅគ្រួសារ ឱ្យបានឆាប់រហ័ស និងមានប្រសិទ្ធភាព ជូនប្រជាពលរដ្ឋ ចំពោះការថែរក្សាសន្តិសុខសណ្ដាប់ធ្នាប់ និងការគ្រប់គ្រងប្រជាពលរដ្ឋ ត្រូវធ្វើការគ្រប់គ្រងឱ្យបានល្អ តាមស្ថានភាពជាក់ស្ដែងដើម្បីចៀសវាងក្នុងរយៈ ពេលអន្តរកាលនេះ មានការចូលទន្រ្ទាន កាប់បំផ្លាញព្រៃឈើ ហើយចំពោះកងកម្លាំងទាំង៣ ក៏ត្រូវសហការគ្នាទាំងខេត្តបាត់ដំបង និងខេត្តប៉ៃលិន ដើម្បីពិនិត្យផ្ទេររវាង រដ្ឋបាលខេត្តទាំងពីរ ទាំងសន្តិសុខ សណ្ដាប់ធ្នាប់និងការគ្រប់គ្រងប្រជាពលរដ្ឋ ឱ្យបានទាន់ពេលវេលា និងមានភាពច្បាស់លាស់ម៉ត់ចត់ផងដែរ។

សូមជម្រាបថា រដ្ឋបាលខេត្តបាត់ដំបង ថ្ងៃទី១៩ ខែតុលា ម្សិលមិញ បានរៀបចំកិច្ចប្រជុំពិភាក្សាការងារ លើសំណើសុំការកែសម្រួល ព្រំប្រទល់រដ្ឋបាល រវាងខេត្តបាត់ដំបង និងខេត្តប៉ៃលិន ក្រោមអធិបតីភាព លោក សក់ សេដ្ឋា រដ្ឋលេខាធិការប្រចាំការក្រសួងមហាផ្ទៃ និងមានការអញ្ជើញចូលរួមពីប្រតិភូខេត្តបាត់ដំបង ដឹកនាំដោយលោម សុខ លូ អភិបាលខេត្តបាត់ដំបង និងប្រតិភូខេត្តប៉ៃលិន ដឹកនាំដោយលោកជំទាវ បាន ស្រីមុំ អភិបាលខេត្តប៉ៃលិន។

សូមបញ្ជាក់ថា កិច្ចប្រជុំតាមបទបញ្ជាដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា ក្នុងការកែសម្រួលព្រំប្រទល់រដ្ឋបាល រវាងខេត្តបាត់ដំបង និងខេត្តប៉ៃលិន ឲ្យបានត្រឹមត្រូវសម្រាប់បម្រើដល់ផលប្រយោជន៍របស់ប្រជាពលរដ្ឋនៃខេត្តបាត់ដំបង និងខេត្តប៉ៃលិន៕SRP

ភ្នំពេញ៖សម្តេចតេជោ ហ៊ុន សែន នៅថ្ងៃចន្ទ ទី១៧ ខែតុលា ឆ្នាំ២០២២នេះ បានអញ្ជើញជាអធិបតីក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យជាតិគ្រប់គ្រង (NUM) ចំនួន ៦,៤១១នាក់ នារី ៣,៥៦០នាក់ បន្ទាប់ពីបានបញ្ចប់ការសិក្សាដោយជោគជ័យ។

និស្សិតដែលទទួលសញ្ញាបត្រនៅថ្ងៃនេះ រួមមាន៖ និស្សិតថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត។ និស្សិតជ័យលាភីទាំងអស់នេះ សុទ្ធតែមានការងារធ្វើ និងប្រមាណ ១០% នៃនិស្សិតថ្នាក់បរិញ្ញាបត្រ មានអាជីវកម្មខ្លួនឯងផងដែរ។

នៅថ្ងៃនេះ មុននឹងថ្លែងទៅនិស្សិត សម្តេច​តេជោ ហ៊ុន សែន បានស្នើដល់អ្នកចូលរួមក្នុងពិធីចែកសញ្ញាបត្រទាំងអស់ ក្រោកឈរស្មឹងស្មាធិ៍ គោរពវិញ្ញាណក្ខន្ធដល់កុមារា កុមារី ដែលបានស្លាប់បាត់បង់ជីវិតដោយសារការលិចទូក នៅស្រុកលើកដែក ខេត្តកណ្ដាលថ្មីៗនេះ។

សម្តេចតេជោនាយករដ្ឋមន្ត្រីបានសម្តែងនូវការសោកស្តាយ និងចូលរួមរំលែកនូវមរណទុក្ខដ៏ក្រៀមក្រំបំផុតជាមួយគ្រួសារសព។
សម្តេចតេជោ ក៏បានថ្លែងអំណរព្រះគុណយ៉ាងជ្រាលជ្រៅថ្វាយព្រះមហាក្សត្រ និងព្រះមហាក្សត្រី ដែលបានប្រោសព្រះរាជទានព្រះរាជទ្រព្យរំលែកមរណទុក្ខជាមួយគ្រួសារសព។ សម្តេចតេជោក៏បានមានប្រសាសន៍កោតសរសើរដល់កម្លាំងប្រដាប់អាវុធ និងអាជ្ញាធរ ដែលបានប្រឹងប្រែងរួមគ្នាជួយដល់សង្គ្រោះ និងរុករកសពជនរងគ្រោះ។

សម្តេចតេជោ ហ៊ុន សែន បានអបអរសាទរចំពោះនិស្សិតដែលទទួលបានជ័យលាភី និងបានវាយតម្លៃខ្ពស់ចំពោះថ្នាក់ដឹកនាំសាកលវិទ្យាល័យជាតិគ្រប់គ្រង ចំពោះការប្រឹងប្រែងអភិវឌ្ឍន៍ និងពង្រឹងគុណភាពអប់រំឱ្យទទួលបាននូវភាពជោគជ័យជាបន្តបន្ទាប់។ សម្តេចតេជោ បានមានប្រសាសន៍រំលឹក ថា ក្រោយថ្ងៃរំដោះឆ្នាំ១៩៧៩ កម្ពុជាពិតជាខ្វះខាតធនធានមនុស្សខ្លាំងណាស់ តែបច្ចុប្បន្នកម្ពុជាបានបណ្តុះបណ្តាលបានធនធានមនុស្សជាច្រើន។ ការអភិវឌ្ឍជាតិ ត្រូវការជាចាំបាច់នូវធនធានមនុស្ស ដែលមិនអាចមើលរំលងបាននោះទេ។

សម្តេចតេជោ ហ៊ុន សែន បានប្រកាសថា នៅថ្ងៃទី២០ ខែតុលា ខាងមុខនេះ សម្តេចនឹងអញ្ជើញទៅកែព័ត៌មានអត្តសញ្ញាណបណ្ណ ក្នុងបញ្ជីឈ្មោះបោះឆ្នោត ហើយសម្តេច ក៏បានអំពាវនាវដល់យុវជនដែលត្រូវដល់អាយុបោះឆ្នោត សូមនាំគ្នាទៅចុះឈ្មោះបោះឆ្នោត។ នៅថ្ងៃនេះ សម្តេចតេជោ ហ៊ុន សែន ក៏បានណែនាំឱ្យអភិបាលខេត្តបាត់ដំបង និងខេត្តប៉ៃលិន ពន្លឿននីតិវិធីបែងចែកភូមិសាស្ត្រព្រំប្រទល់រវាងខេត្តទាំងពីរឲ្យបានឆាប់។

សម្តេចតេជោបានទម្លាយថា ការមិនអាចកំណត់ព្រំប្រទល់ដែនខេត្តទាំងពីរ ដោយសារមានអ្នកធំមានដីនៅកន្លែងនោះ មិនចង់ឱ្យមានការកាត់ទៅខេត្តប៉ៃលិន ហើយព្យាយាមបង្កការរាំងស្ទះ ដូច្នេះសម្ដេចសូមឲ្យខេត្តទាំងពីរពន្លឿនការងារនេះឲ្យបានឆាប់។

នៅថ្ងៃនេះ ពាក់ព័ន្ធទៅនឹងគ្រោះមហន្តរាយដោយទឹកជំនន់ សម្តេចតេជោនាយករដ្ឋមន្ត្រី បានមានប្រសាសន៍ប្រាប់ដល់អ្នកពាក់ព័ន្ធអោយពន្លឿនការងារវាយតម្លៃផលប៉ះពាល់ និងផ្តល់ពូជស្រូវជូនកសិករឲ្យបានឆាប់បំផុត។ ហើយសម្តេចតេជោក៏បានផ្តាំដល់មន្ត្រីកសិកម្មទាំងអស់ សូមកុំជិះសេះមើលផ្កា ត្រូវគិតគូរពីការលំបាករបស់ប្រជាកសិករជាធំ ជាពិសេសអំឡុងពេលនៃគ្រោះធម្មជាតិទឹកជំនន់ ដែលប៉ះពាល់ដល់ផលដំណាំរបស់ពួកគាត់នេះ។

សម្តេចតេជោក៏បានថ្លែងអំណរគុណដល់សប្បុរសជន និងកាកបាទក្រហមកម្ពុជា ដែលបាននាំជំនួយស្បៀងអាហារជូនពលរដ្ឋរងគ្រោះដោយទឹកជំនន់ ជាបន្តបន្ទាប់រយៈពេលថ្មីៗនេះ។ សម្តេចតេជោក៏បានណែនាំឱ្យសិក្សាស្ថិតិប្រជាពលរដ្ឋរងគ្រោះដោយទឹកជំនន់ ហើយផ្តល់ការឧបត្ថម្ភរយៈពេល៣ខែ ដែលអាចចំណាយទឹកប្រាក់ជាង ២លានដុល្លារ។ សម្តេចតេជោក៏បានអំពាវនាវដល់គ្រឹះស្ថានហិរញ្ញវត្ថុទាំងអស់ អោយមានការយោគយល់ និងអនុគ្រោះដល់ជនរងគ្រោះដោយទឹកជំនន់ផង៕SRP

ខេត្តត្បូងឃ្មុំ៖មានការលើកឡើងថា ឈ្មួញទាំងធំ ទាំងតូច នាំចូលទំនិញ ពីវៀតណាម តាមច្រកដា ហៅច្រកដូង7ដើម យ៉ាងពេញបន្ទុក។ ករណីបែបនេះ គេសង្ស័យលោក មុយ បញ្ញារិទ្ធ ប្រធានការិយាល័យគយច្រកដា ហៅច្រកដូង7ដើម ជាអ្នកបើកដៃឲ្យមានអំពើរត់ពន្ធ។

ប្រភពបានឲ្យដឹងថាទំនិញដែលឈ្មួញធំៗ នាំចូលតាមច្រកព្រំដែនទ្វេភាគីដា បង់ពន្ធមិនដល់៥០ភាគរយនោះទេ ហើយក្រៅពីនេះ ឈ្មួញបែងចែកផលប្រយោជន៍ ជាមួយលោក មុយ បញ្ញារិទ្ធ និងសមត្ថកិច្ចស្ថាប័នផ្សេងៗទៀត។ ចំណែកមេៗគយក្នុងខេត្តត្បូងឃ្មុំ បណ្ដោយឲ្យលោក មុយ បញ្ញារិទ្ធ ធ្វើអ្វីៗតាមអំពើចិត្ត។

មន្រ្តីនៅច្រកព្រំដែនទ្វេភាគីដា បានឲ្យដឹងទៀតថា ឈ្មួញធំៗដែលរកស៊ីនាំចូលទំនិញគេចពន្ធ ទំនិញបង់ពន្ធមិនគ្រប់ និងទំនិញខុសច្បាប់ពីវៀតាម គឺជាប្រភពចំណូលដ៏ធំរបស់លោក មុយ បញ្ញារិទ្ធ រីឯឈ្មួញនាំចេញជ័រកៅស៊ូស្អុយ នាំចេញឈើ អុស ធ្យូង ដំឡូងមី និងកសិផលផ្សេងៗទៅវៀតណាមតាមច្រកព្រំដែនទ្វេភាគីដា ហៅច្រកដូង7ដើម ក៏ជាប្រភពចំណូលដ៏សំខាន់របស់លោក មុយ បញ្ញារិទ្ធ ផងដែរ។

បើទោះបីរឿងអាស្រូវរបស់លោក មុយ បញ្ញារិទ្ធ ប្រធានការិយាល័យគយច្រកដា ហៅច្រកដូង7ដើម ត្រូវបានលាតត្រដាងជាបន្តបន្ទាប់ យ៉ាងណាក៏ដោយក៏មេៗគយនៅខេត្តត្បូងឃ្មុំ រក្សាភាពស្ងៀមស្ងាត់ ធ្វើមិនដឹងមិនឮអ្វីទាំងអស់។ ជាពិសេសលោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា មិនទាន់ចាត់វិធានការណាមួយទៅលើលោក មុយ បញ្ញារិទ្ធ​ នៅឡើយ។

ទីភ្នាក់ងារសៀមរាបប៉ុស្ដិ៍ ធីវី អនឡាញ មិនទាន់ទទួលបានការបំភ្លឺពីលោក មុយ បញ្ញារិទ្ធ ប្រធានការិយាល័យគយច្រកដា នៅឡើយទេ ដោយមិនមានលេខទូរស័ព្ទ៕SRP

ខេត្តសៀមរាប៖យុវជនម្នាក់ត្រូវបាននគរបាលខេត្តសៀមរាបធ្វើការចាប់ខ្លួន នៅថ្ងៃទី១៥ ខែតុលា ឆ្នាំ២០២២ ពាក់ព័ន្ធបានប្រព្រឹត្តបទល្មើស ឃាតកម្ម ដោយមានទារុណកម្ម អំពើឃោរឃៅ និងរំលោភសេពសន្ថវ: និងអំពើលួចមានស្ថានទម្ងន់ទោសដោយប្រើហិង្សា។

ជនសង្ស័យ ឈ្មោះ យ៉ា ឆានី ភេទប្រុស អាយុ ១៨ឆ្នាំ មុខរបរ កម្មករសំណង់ ស្រុកកំណើតភូមិគោកថ្មី ឃុំល្វា  ស្រុកពួក ខេត្តសៀមរាប ទីលំនៅបច្ចុប្បន្ន ស្នាក់នៅកន្លែងធ្វើសំណង់ ស្ថិតភូមិបឹង សង្កាត់ក្របីរៀល ក្រុងសៀមរាប ខេត្តសៀមរាប។

លោកវរសេនីយ៍ឯក ណុប សារ៉ាក់ ស្នងការរង ទទួលដឹកនាំការិយាល័យនគរបាលព្រហ្មទណ្ឌកម្រិតធ្ងន់ បានប្រាប់ពីភ្នាក់ងារសារព័ត៌មានសៀមរាប ប៉ុស្ដិ៍ ធីវី អនឡាញ នៅព្រលប់ថ្ងៃសៅរ៍នេះថា ករណីនេះកើតឡើងវេលាម៉ោង២១និង៣០នាទី នៅថ្ងៃទី១២ ខែតុលា ឆ្នាំ២០២២ ចំណុចក្នុងបន្ទប់ជួល ស្ថិតនៅក្រុមទី៦ ភូមិស្វាយ ឃុំខ្នាត ស្រុកពួក ខេត្តសៀមរាប។

ជនរងគ្រោះឈ្មោះ រឿ សារី ភេទស្រី អាយុ ៣៨ឆ្នាំ ស្រុកកំណើតភូមិចន្លោង ឃុំស្រង៉ែ ស្រុកសៀមរាប ខេត្តសៀមរាប បានស្លាប់នៅក្នុងផ្ទះជួលកន្លែងកើតហេតុខាងលើ។

បើតាមលោកវរសេនីយ៍ឯក ណុប សារ៉ាក់ តាមការស្តាប់ចម្លើយរបស់ឈ្មោះ យ៉ា ឆានី ភេទប្រុស អាយុ ១៨ឆ្នាំ បានសារភាពថា៖ រូបគេជាជនដៃដល់តែម្នាក់ ដែលធ្វើកម្មភាពរំលោភសេន្ថវៈ និងសម្លាប់ទៅលើជនរងគ្រោះ ឈ្មោះ រឿ សារី ភេទស្រី អាយុ ៣៨ឆ្នាំ និងយកទ្រព្យសម្បត្តិ របស់នាង។

ជនសង្ស័យបន្តថាកាលពីល្ងាចថ្ងៃទី១០ និងថ្ងៃទី១១ ខែតុលា ឆ្នាំ២០២២ នៅចន្លោះវេលាម៉ោង ១៩និង០០នាទី ឬ ២០និង០០នាទីល្ងាច រូបគេបានជិះកង់ ឆ្វែលមើលជនរងគ្រោះ នៅចំណុចទីតាំងកន្លែងកើតហេតុខាងលើ លុះដល់ល្ងាចថ្ងៃទី១២ ខែតុលា ឆ្នាំ២០២២ វេលាម៉ោង ២០និង០០នាទី រូបគេបានជិះកង់ចេញពីការដ្ឋានសំណង់ ទៅទិញម៉ីឆា និងប្រហិតចៀន នៅចំណុចផ្សារ ក្របីរៀល រួចហើយជិះកង់សំដៅទៅផ្ទះជនរងគ្រោះ។

ជនសង្ស័យបន្តថា ពេលទៅដល់ខ្លួនឃើញជនរងគ្រោះ អង្គុយនៅមុខផ្ទះតែម្នាក់ឯង  ចំណែកទ្វាផ្ទះគឺបើកចំហរ ពេលនោះរូបគេ បានកាន់ម៉ីឆា និងប្រហិតចៀន ចូលអង្គុយហូបនៅក្នុងផ្ទះជនរងគ្រោះ តែជនរងគ្រោះ.មិនបានចូលរួមហូបជាមួយទេ ហើយក៏មិនបាននិយាយអ្វីមកកាន់រូបខ្លួនផងដែរ។ នៅវេលាម៉ោង ២១និង៣០នាទី ពេលរូបគេហូបម៉ីឆា និងប្រហិតចៀនអស់ ស្រាប់តែជនរងគ្រោះ ដើរចូលទៅបន្ទប់ទឹកក្នុងផ្ទះ ដោយមានចំណង់រួមភេទ និងស្របពេល ដែលមានឱកាសល្អ ព្រោះយប់ស្ងាត់ ហើយជនរងគ្រោះ នៅផ្ទះតែម្នាក់ឯង គេបានក្រោកដើរទៅយកខ្សែភ្លើង មានប្រវែងប្រហែល ១៥០សង់ទីម៉ែត្រ នៅលើតុក្បែរគ្រែដេក របស់ជនរងគ្រោះ មកបត់ជាពីរហើយស្ទុះចូលតាមជនរងគ្រោះ ទៅក្នុងបន្ទប់ទឹក ដែលកំពុងឈរបែខ្នងមកទ្វារ ដោយប្រើដៃទាំងពីររឹតក ជនរងគ្រោះ និងខ្សែភ្លើងរហូតដល់សន្លប់បាត់បង់ស្មារតី  ហើយគេបានដើរទៅបិទទ្វារផ្ទះ (ទ្វាររូត) កុំឲ្យអ្នកដ៏ទៃមើលឃើញពីសកម្មភាព បន្ទាប់ពីបិទទ្វារមុខរួច  រូបគេយកដៃទាំងពីរ សូកចូលក្រោមក្លៀកជនរងគ្រោះទាំងសងខាង ចាប់អូសរូបនាងទៅដាក់លើគ្រែ ក្បាលបែទៅទិសខាងលិច ជើងទៅទិសខាងកើត ហើយចាប់សំរ៉ាតខោសាច់យឺត ជើងខ្លី ពណ៌ខ្មៅ និងខោស្លីបពណ៌សរ ចេញពីខ្លួននាង ហើយស្រាតខោខ្លួនឯងត្រឹមជង្គង់ ហើយធ្វើសកម្មភាពរំលោភសេពសន្ថវះ ទៅលើជនរងគ្រោះ ដោយពុំបានប្រើសោមអនាម័យ ប្រហែល ២ ទៅ ៣នាទី ទើនចេញទឹកកាមដាក់ចូលក្នុងប្រដាប់ភេទជនរគ្រោះ។

ជនសង្ស័យបន្តទៀតថា ដោយពិនិត្យឃើញថាជនរងគ្រោះ នៅមានដង្ហើម និងដៃជើងនៅតែអាចកំរើកបាន ហើយភ័យខ្លាចបែកការំ័ ទើបរូបគេ បានប្រើជើងខាងស្តាំងជាន់ និងកន្រ្តំ ទៅលើកជនរងគ្រោះ ខ្លាំងៗ ជាច្រើនជើង បណ្តាលឲ្យបាក់គ្រែ ទើបជនរងគ្រោះ ដាច់ខ្យល់ស្លាប់។  ប៉ុន្តែមិនបានដឹងថាជនរងគ្រោះ បាក់កនោះទេ។ បន្ទាប់ពីសម្លាប់ជនរងគ្រោះហើយខ្លួនបានយកមានទូរស័ព្ទដៃមួយគ្រឿងម៉ាក OPPO ពណ៌ក្រហម ផ្ទុកស៊ីមកាតលេខ..និងបន្តទៅរើកកាយមើលក្នុងទូរ ឃើញកាបូបដៃមួយ ពណ៌ប្រផះ មានប្រាក់ ចំនួន ២ម៉ឺនរៀល និងបានយកម៉ូតូជនរងគ្រោះ ម៉ាកទ្រីមសង ពណ៌ខ្មៅ សេរីឆ្នាំ២០១៧ ពាក់ស្លាកលេខៈ សៀមរាប 1Z:2423 បើកចេញដោយដៃម្ខាង និងដៃម្ខាងទៀតបណ្តើកង់ ដោយបើកហួសផ្លូវបត់ចូលទៅការដ្ឋានសំណង់ ដែលខ្លួនស្នាក់នៅបណ្តោះអាសន្ន ប្រហែល ៥០ម៉ែត្រ ក៏សម្រេចចិត្តទុកម៉ូតូនោះចោល នៅចំណុចខ្ទមមួយក្បែផ្លូវកៅស៊ូ ព្រោះមិនដឹងយកទៅលក់នៅទីណា ម្យ៉ាងទៀតខ្លាច់បែករឿង។  បន្ទាប់ពីទុកម៉ូតូផ្លុងចោលហើយ រូបគេ បានជិះកង់ទៅដេកនៅការដ្ឋានធ្វើសំណង់ដោយយកទូរស័ព្ទជនរងគ្រោះ ទៅប្រើប្រាស់ផងដែរ លុះដល់វេម៉ោង១១និង៣០នាទីថ្ងៃទី១៥ខែតុលា ឆ្នាំ២០២២ ត្រូវបានសត្ថកិច្ចធ្វើការនាំខ្លួនមកសួរនាំតែម្តង។

សូមជម្រាបថា ប្រតិបត្តិការ បំបែកសំណុំរឿងនេះ ដោយកម្លាំងការិយាល័យនគរបាលព្រហ្មទណ្ឌកម្រិតធ្ងន់ បានសហការជាមួយ ការិយាល័យនគរបាលបច្ចេកទេសវិទ្យាសាស្រ្ត, អធិការដ្ឋាននគរបាលស្រុកពួក, ប៉ុស្តិ៍នគរបាលដ្ឋបាលក្របីរៀល និងគ្រូពេទ្យមន្ទីរពេទ្យបង្អែកពួក តាមការចង្អុលបង្ហាញ ពីរឧត្តមសេនីយ៍ទោតេង ច័ន្ទណាត ស្នងការនគរបាលខេត្តសៀមរាប និងបញ្ជាផ្ទាល់ពីលោក ឧត្តមរាត្រីភឹង ចិន្តារ៉េត ស្នងការរង ទទួលផែនការងារព្រហ្មទណ្ឌ តាមរយ: លោកវរសេនីយ៍ឯក ណុប សារ៉ាក់ ស្នងការរង ទទួលដឹកនាំការិយាល័យនគរបាលព្រហ្មទណ្កម្រិតធ្ងន់ និងអនុវត្តផ្ទាល់ដោយវរសេនីយ៍ទោ សុខ ម៉េងអ៊ាង នាយ នាយការិយាល័យ នគរបាល ព្រហ្មទណ្ឌកម្រិតធ្ងន់៕SRP

ភ្នំពេញ៖លោក​ ឌិត ទីណា ត្រូវបានព្រះមហាក្សត្រ ចេញព្រះរាជក្រឹតត្រាស់បង្គាប់តែងតាំងជារដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ៕SRP

ភ្នំពេញ៖នាយករដ្ឋមន្ត្រីហ៊ុន សែន នៅថ្ងៃសុក្រនេះ បានសរសេរសារចូលរួមរំលែកទុក្ខជាមួយក្រុមគ្រួសារដែលបានបាត់បង់កូនៗនិងចៅៗជាទីស្រឡាញ់នៅក្នុងឧប្បទ្ទវហេតុលិចទូកចម្លងដឹកសិស្សានុសិស្សចេញពីសាលាទៅផ្ទះ។

ក្នុងសាររបស់សម្ដេចតេជោហ៊ុន សែន បានសរសេរថា៖ ខ្ញុំសូមចូលរួមរំលែកទុក្ខយ៉ាងក្រំបំផុតជាមួយបងប្អូនក្រុមគ្រួសារដែលបានបាត់បង់កូនៗនិងចៅៗជាទីស្រឡាញ់នៅក្នុងឧប្បទ្ទវហេតុលិចទូកចម្លងដឹកសិស្សានុសិស្សចេញពីសាលាទៅផ្ទះស្ថិតនៅឃុំកំពង់ភ្នំ ស្រុកលើកដែក ខេត្តកណ្តាល កាលពីយប់ថ្ងៃទី១៣ ខែតុលា ឆ្នាំ២០២២ ដែលបានបណ្តាលអោយស្លាប់ជាច្រើននាក់ និងមួយចំនួនត្រូវបានជួយសង្គ្រោះបន្ទាន់ នៅមន្ទីរពេទ្យ និងមួយចំនួនទៀតនៅកំពុងបាត់ខ្លួននៅឡើយ។

នៅក្នុងសារររបស់សម្ដេចតេជោ ក៏សូមសមត្ថកិច្ចនិងអាជ្ញាធរពាក់ព័ន្ធទាំងអស់ចូលរួមបន្តស្វែងរកអ្នករងគ្រោះ និងចូលរួមដោះស្រាយជួយដល់បងប្អូនក្រុមគ្រួសារនៃសពនិងជនរងគ្រោះអោយបានទាន់ពេលវេលដ៏លំបាកបំផុតនេះ។

សូមបងប្អូនប្រជាពលរដ្ឋ ជាពិសេសដែលរស់នៅតាមមាត់ទន្លេមានការប្រុងប្រយ័ត្នខ្ពស់ក្នុងពេលដែលស្ថានភាពទឹកជំនន់កំពុងកើនឡើង៕SRP

ខេត្តសៀមរាប៖ពលរដ្ឋក្នុងក្រុងសៀមរាប និយាយរឿងអត់មាន ភ្លើងអគ្គិសនីរដ្ឋ ប្រើប្រាស់ ដោយសារពួកគាត់រស់ នៅទិញដីក្នុងតំបន់លក់ដីឡូតិ៍។

ក្នុងវេទិកាផ្សព្វផ្សាយនិងពិគ្រោះ យោបល់របស់ក្រុមប្រឹក្សាក្រុង អាណត្តិទី៣ប្រចាំឆ្នាំ២០២២ នៅថ្ងៃទី១៣ ខែតុលាឆ្នាំ២០២២ នេះ ប្រជាពលរដ្ឋ បានសំណូមពរផ្ទាល់មាត់និយាយ អំពីទុក្ខកង្វល់របស់ពួកគាត់ នៅតាមមូលដ្ឋាន ដោយបានផ្តោតទៅលើបញ្ហា ហេដ្ឋារចនាសម្ព័ន្ធ ការខ្វះខាតទឹកធ្វើស្រែប្រាំង.បញ្ហាក្នុងភូមិពុំ មានភ្លើងអគ្គិសនីរដ្ឋ ប្រើប្រាស់មូលហេតុដោយសារពួកគាត់ រស់នៅទិញដីក្នុងតំបន់លក់ដីឡូតិ៍.បញ្ហាធារាសាស្ត្រ (ជីកស្រះ .ទំនប់ ប្រព័ន្ធប្រឡាយ)  បញ្ហាការធ្វើបញ្ជាក់សំបុត្រកំណើត មានភាពយឺត.បញ្ហាប្រព័ន្ធលូ មានការស្ទះជាច្រើនកន្លែងពេលមានភ្លៀងធ្វើឱ្យទឹកជន់លិច ពាក់ព័ន្ធនឹងបញ្ហាដីធ្លី ការសុំធ្វើផ្លូវ ដាក់លូរំដោះទឹក បញ្ហាជំនន់ទឹកភ្លៀង ស្នើសុំប្រឡាយទឹក.បញ្ហាពុំមានភ្លើងបំភ្លឺ ផ្លូវសាធារណៈ និងវិវាទផ្សេងៗផងដែរ។

ជុំវិញបញ្ហាទាំងនេះ ត្រូវបានលោកប្រធានក្រុមប្រឹក្សាក្រុង បានធ្វើការពន្យល់បកស្រាយ និងបានជំរុញដល់អជ្ញាធរនិងមន្ទីរពាក់ព័ន្ធត្រូវធ្វើការដោះស្រាយឱ្យបានទាន់ពេលវេលាផងដែ។

រដ្ឋបាលក្រុងសៀមរាប បានរៀបចំបើកវេទិកាផ្សព្វផ្សាយនិងពិគ្រោះយោបល់របស់ ក្រុមប្រឹក្សាក្រុងអាណត្តិទី៣ ប្រចាំឆ្នាំ២០២២ នេះ ក្រោមវត្តមាន
លោក ទេព ប៊ុនឆាយ ប្រធានក្រុមប្រឹក្សាក្រុង និងលោកស្រី លឹម ផល្លិកា អភិបាលរងក្រុងសៀមរាប ដោយមានចូលរួមពីអាជ្ញាធរពាក់ព័ន្ធផងដែរ។

សូមជម្រាបថាអង្គវេទិកាផ្សព្វផ្សាយនិងពិគ្រោះយោបល់ នេះ គឺដើមី្បផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ ដែលបានអញ្ជើញមក បានស្វែងយល់ ពីស្ថានភាពទូទៅ នៃការអភិវឌ្ឍខេត្ត ក្រុង សង្កាត់ និង បញ្ហាប្រឈម ដែលកើតកន្លងមក និងមានគោលបំណង ជម្រាបជូនប្រជាពលរដ្ឋនូវ ព័ត៌មានអំពីការធ្វើ សេចក្តីសម្រេចចិត្ត និងសកម្មភាព ដែលក្រុមប្រឹក្សា បានអនុវត្តការងារពេលកន្លងមក ជាពិសេស ដើម្បីបង្កើត ឱកាសពិភាក្សា លើកកម្ពស់គណនេយ្យភាព តាមបែបប្រជាធិបតេយ្យ ថ្នាក់ក្រោមជាតិ ជាចំណែកកែលម្អរ សេវាសាធារណៈ ឈានទៅរកការប្រមូលព័ត៌មាន និងបញ្ហាប្រឈមផ្សេងៗ ក្នុងមូលដ្ឋាន របស់ខ្លួន ដើម្បីដោះស្រាយ នូវបញ្ហាទុក្ខកង្វល់ នានា ជូនបងប្អូនប្រជាពលរដ្ឋ ដែលបានលើកឡើងក្នុងវេទិការ នេះផងដែរ។

នៅក្នុងវេទិកាពិគ្រោះយោបល់ របស់ក្រុមប្រឹក្សា ក្រុងសៀមរាប សមាជិក នៃវេទិកាផ្សព្វផ្សាយ ទទួលបានសួរសំណួរ និងសំណូមពរ ផ្ទាល់មាត់ពីបងប្អូនប្រជាពលរដ្ឋ ដែលត្រូវបានវាគ្មិន លើកយកមកបកស្រាយបំភ្លឺ។ ដោយឡែកសំណួរនិងសំណូមពរជាលាយលក្ខ័ជាអក្សរនៅមិនទាន់ បានឆ្លើយបំភ្លឺសំណួរ-សំណូមពរនៅឡើយទេ ដោយក្រុមការងារទទួលយកទៅពិនិត្យពិភាក្សា ក្នុងក្របខណ្ឌក្រុមប្រឹក្សាក្រុង ហើយនឹងធ្វើការឆ្លើយតប ជម្រាបជូនដំណឹងជាលាយលក្ខណ៏អក្សរ ដល់ម្ចាស់សំណួរ បងប្អូនប្រជាពលរដ្ឋ តាមរយៈក្រុមប្រឹក្សាសង្កាត់ផងដែរ៕SRP