ខេត្តសៀមរាប៖សំណុំរឿងព្រហ្មទណ្ឌ ដែលដើមបណ្តឹងប្តឹងទាមទារសំណង ១.២០០ .០០០ដុល្លារ តុលាការប្រកាសសាលក្រមអោយចុងចោទសងត្រឹមតែ៣០លានរៀល និងដាក់ពន្ធនាគារក្នុងម្នាក់០២ឆ្នាំ។

អង្គសវនាការនេះ បានធ្វើឡើងនៅព្រឹកថ្ងៃទី១៧ ខែមិថុនា ឆ្នាំ២០២០ ដែលមានលោក មុយ សុភក្ត្រ័ ចៅក្រមជំនំុជម្រះ លោក ស្រេង វុទ្ធា តំណាងអយ្យការនិងលោក ទី សុខណាង ជាក្រឡាបញ្ជី ព្រមទាំងវត្តមានដើមបណ្តឹង ឯតួអង្គចុងបណ្តឹងអវត្តមាន។

ដើមបណ្តឹង នៃសំណុំរឿងព្រហ្មទណ្ឌលេខ១១៦ ចុះថ្ងៃទី៧ខែកុម្ភ:ឆ្នាំ២០១៩ មានឈ្មោះ ស៊ីម ឈីវឈានពិសិដ្ឋ អតីតអនុប្រធានមន្ទីរបរិស្ថានខេត្ត សៀមរាប។ ចំណែកចុងបណ្តឹងមានឈ្មោះ គង់ មង្គល ប្រធានសហគមន៍បឹងពារាំង រួមនិងមន្ត្រីសហគមន៍០៤នាក់ទៀត។

លោក ស៊ីម ឈីវឈានពិសិដ្ឋ ដើមបណ្តឹង បាថ្លែងតាមទូរស័ព្ទនារសៀលថ្ងៃទី១៧ខែមិថុនានេះថា រឿងក្តីរបស់លោក តុលាការបានប្រកាសសាលក្រមហើយ ដោយតម្រូវអោយចុងបណ្តឹង សងជម្ងឺចិត្តមករូប លោក៣០លានរៀល។ ចុងចោទត្រូវទទួលទោសដោយជាប់ពន្ធនាគារក្នុងម្នាក់ៗ២ឆ្នាំ។ តែផ្តល់សិទ្ធិ៣០ថ្ងៃអោយចុងបណ្តឹង ប្តឹងទៅសាលាឧទ្ធណ៍។ លោកបន្តថាក្នុងបណ្តឹង រូបលោកបានប្តឹងពីបទ(ឃាតកម្មដោយគុំនុំ គិតទុកជាមុន)។ ឯ តុលាការបានចោទប្រកាន់ពីបទ(ហិង្សាដោយចេតនាមានស្ថានទម្ងន់ទោស)។ មិនតែប៉ុណ្ណោះសាលក្រមបានប្រកាសអោយសងជម្ងឺចិត្ត ត្រឹមតែ៣០លានរៀលប៉ុណ្ណោះ។ករណីនេះ រូបលោកមិនអាចទទួលយកបាននោះឡើយ ហើយលោកកំពុងអោយមេធាវី រៀបចំបណ្តឹង ប្តឹងទៅឧទ្ធណ៍ ទាមទារសំណងជម្ងឺចិត្ត ១.៤០០.០០០ដុល្លារ។ កាដែលសម្រេច ប្តឺងបន្តនេះព្រោះតែពួកគេ(ក្រុមលោក គង់ មង្គល ) ព្រួតគ្នាវ៉ៃមកលើរូបលោកយ៉ាងព្រៃផ្សៃ កាលពីម៉ោង ជាង៧យប់ ថ្ងៃទី២៦ខែមករាឆ្នាំ២០១៩ កន្លងទៅ ក្នុងខណ: ដែលរូបលោកចុះទៅថតរូបភាពបទល្មើសនៅតំបន់បឹងពារាំង។

ចំណែកលោក គង់ មង្គល ប្រធានសហគមន៍បឹងពារាំង មិនអាចសុំការបកស្រាយបានទេ ចំពោះសាល ក្រមដែលប្រកាសផ្តន្ទារូបលោក អោយជាប់ពន្ធនាគារ០២ឆ្នាំរួមទាំងមន្រី០៤រូប និងសងប្រាក់ទៅដើមបណ្តឹម៣០លានរៀល ដោយទូរស័ព្ទហៅចូលច្រើនដងមិនមានអ្នកទទួល។សូមបញ្ជាក់ថារឿងរាវមួយនេះបានប្តឹងតតាំងគ្នារយះពេលជាង១ឆ្នាំមកហើយទើបតែចេញលទ្ធផល។ជាមួយនិងហេតុការណ៍ទាំងនេះ មហាជនបានមើលឃើញថាគឺផ្តើមចេញពីការ ដណ្តើមប្រយោជន៍គ្នានៅក្នុងតំបន់បឹងពារាំង៕SRP

ខេត្តកំពង់ធំ៖អធិការនគរបាលស្រុកប្រាសាទសំបូរ ខេត្តកំពង់ធំ នៅព្រឹកថ្ងៃព្រហស្បតិ៍ទី១៨ខែមិថុនានេះ បានបញ្ជូនខ្លួនមនុស្ស០៣នាក់ ទៅកាន់ស្នងការនគរបាលខេត្ត ដើម្បីចាត់ការបន្តរតាមផ្លូវច្បាប់ ពាក់ព័ន្ធបទល្មើសក្លែងបន្លំឯកសារសាធារណៈ និងយកឈ្មោះ លោកជំទាវ ឃួន ឃុនឌី សមាជិកព្រឹទ្ធសាភាមកប្រើដើម្បីដើរជំរិតយកលុយពីពលរដ្ឋ។

ជនសង្ស័យទាំង៣នាក់រួមមានៈ
១.ឈ្មោះ ខេង ខែម ភេទប្រុស អាយុ៤៣ឆ្នាំ ទីលំនៅភូមិប្រឡាយ ឃុំតាំងក្រសៅ ស្រុកប្រាសាទសំបូរ ជាអ្នកក្លែងឯកសាររដ្ឋបាលខេត្តកំពង់ធំ បង្កើតក្រុមឌឺបេរបស់ខេត្ត រួមទាំងក្លែងលិខិតជាច្រើនទៀត ដោយខ្លួនឯង ដើរទារលុយពីអ្នកដឹកអុស ដឹកឈើ តាមឡាន តាមគោយន្ត ក្នុងភូមិសាស្រ្តស្រុកសណ្តាន់ ស្រុកប្រាសាទសំបូរ និងស្រុកសន្ទុក នឹងតាំងខ្លួនជាប្រធានឌឺបេខេត្ត
២.ឈ្មោះ អឿន នឿន ភេទប្រុស អាយុ ៥៣ ឆ្នាំ ទីលំនៅភូមិទំនប់ ឃុំស្រើង ស្រុកប្រាសាទសំបូរ ជាអនុប្រធានឌឺបេនិង
៣.ឈ្មោះ នុត ខា ភេទប្រុស អាយុ៦៣ឆ្នាំ ទីលំនៅភូមិសែនអភិវឌ្ឍន៍១ឃុំទីពោរ ស្រុកសន្ទុកជាសមាជិកឌឺបេ រួមជាមួយវត្ថុតាងដកហូតមាន៖
-លិខិតរដ្ឋបាលខេត្ត ស្តីពីការបង្កើតក្រុមឌឺបេ ចំនួន០៧ច្បាប់(០៧នាក់)
-លិខិតរដ្ឋបាលខេត្ត អនុញ្ញាតឲ្យឈ្មោះ សួន ជាតិ ឈួសឆាយដី០១ច្បាប់
-លិខិតរដ្ឋបាលខេត្ត អនុញ្ញាតឲ្យឈ្មោះធួន តុងហេង ទិញលក់ឈើ
យកមកចាត់ការតាមផ្លូវច្បាប់។
ពាក់ព័ន្ធករណីនេះ លោកជំទាវ ឃួន ឃុនឌី សមាជិកព្រឹទ្ធសភា បានសំណូមពរដល់តុលាកាខេត្តកំពង់ធំ សូមមានវិធានការឲ្យបានតឹងរឹងបំផុតចំពោះជនសង្ស័យខាងលើ ដែលបានក្លែងបន្លំឯកសារ នឹងយកឈ្មោះលោកជំទាវទៅប្រើប្រាស់ក្នុងផ្លូវមិនល្អនេះ៕SRP

ខេត្តកំពង់ចាម៖លោក​ អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃព្រហស្បតិ៍ទី១៨ខែមិថុនានេះបានអញ្ជើញចូលរួមប្រារព្ធពិធីបែបសាសនាបួងសួងសូមពរសេចក្ដីសុខចម្រើន ពីម្ចាស់ទឹក ម្ចាស់ដី ដើម្បី​បន្ត​ការ​កសាងអគាររដ្ឋបាលថ្មី របស់សាលាខេត្តកំពង់ចាម ក្រោយពីបានផ្អាកការសាងសង់មួយរយៈ។
នាឱកាសនោះដែរ​ លោក​ អ៊ុន ចាន់ដា បានអញ្ជើញអុចធូបបួងសួងសូមពរ សេចក្ដីសុខពី រូបសំណាកព្រះអង្គខ្មៅ ក៏ដូចជាបារមី វត្ថុស័ក្ដិសិទ្ធទាំងអស់ ដែលបីបាច់ថែរក្សាសាលាខេត្តទាំងមូល សូមឲ្យកិច្ចដំណើរការសាងសង់បន្ត នូវអគារដ្ឋបាលថ្មី ប្រព្រឹត្តទៅប្រកបដោយសេចក្ដីសុខ សេចក្ដីចម្រើន និងសម្រេចលទ្ធផលជោគជ័យ ទៅតាមការគ្រោងទុក។
លោក​អ៊ុន ចាន់ដា បានបញ្ជាក់ថា ដោយមើលឃើញ ពីការលំបាករបស់មន្ត្រី ដែលកំពុងបម្រើការងារនៅសាលាខេត្ត ក៏ដូចជា ការផ្តល់នូវទីកន្លែងសមរម្យ សម្រាប់មន្ត្រីបំពេញការងារប្រចាំថ្ងៃ ក្នុងការបម្រើសេវាសាធារណៈ ដល់បងប្អូនប្រជាពលរដ្ឋ និងសាធារណៈជន ដែលមកទទួលសេវាសាធារណៈ នៅសាលាខេត្តនោះ គណៈអភិបាល បានឯកភាព និងអនុញ្ញាតឲ្យបន្តការសាងសង់ អគាររដ្ឋបាលថ្មីនេះឡើងវិញជាបន្តទៀត។
គួរ​បញ្ជាក់ផងដែរថា គម្រោងអាគារថ្មី​ នៃរដ្ឋបាលសាលា​ខេត្ត​នេះ​ ត្រូវ​បាន​សាងសង់ឡើង​អំពី​បេតុង​អាមេ​ ជញ្ជាំងរៀបឥដ្ឋ និងតំបូលប្រក់ក្បឿង ដែលមានទំហំបណ្តាយជាង៥៣ម៉ែត្រ ទទឹង២៤ម៉ែត្រ និងកម្ពស់​៣ជាន់​ មានទីតាំងនៅ​ក្នុងបរិវេណសាលាខេត្ត ស្ថិត​ក្នុង​ភូមិទី៧ សង្កាត់កំពង់ចាម ក្រុងកំពង់ចាម។ ក្រៅពីអគារថ្មីនេះដែរ រដ្ឋបាលខេត្តកំពង់ចាម ក៏មានអគារចាស់ជាច្រើន ត្រូវ​បានធ្វើការជួសជុលកែលម្អ ទុកសម្រាប់មន្ត្រី​បម្រើ​ការងារ ជារៀងរាល់ថ្ងៃ ផងដែរ៕SRP

ខេត្តត្បូងឃ្មុំ៖បន្ទាប់ពីជួបដោយចៃដន្យឃើញលោកយាយអង្គុយយ៉ាងកំសត់ លក់នំប៉័ងនិងនំប៉ោងក្នុងផ្សារខ្នារ ក្នុងស្រុកត្បូងឃ្មុំ ក៏បានសាកសួរដឹង ភ្លាមៗលោកស្រី ម៉េងវ៉ាន់ដានីន ជាមច័ន្ទសោភ័ណ ប្រធានកិត្តិយសសមាគមនារីដើម្បីសន្តិភាពនិងការអភិវឌ្ឍខេត្តត្បូងឃ្មុំ បានចាត់ឲ្យក្រុមការងារចុះទៅដល់ផ្ទះលោកយាយ ដោយឃើញសភាពផ្ទះចាស់ទ្រុឌទ្រោម ក៏បានអោយជួសជុលឡើងវិញ និងបានសាងសង់បន្តខាងមុខផ្ទះ ដំបូលនិងជញ្ជាំងស័ង្កសីរៀបចំកន្លែងកាត់សក់ឲ្យចៅប្រុសទី០២ មានចំណូល ដើម្បីជួយសម្រួលជីវភាពគ្រួសារប្រចាំថ្ងៃ និងសម្រាប់បន្តអនាគតរបស់ខ្លួន។

បន្ទាប់ពីជាងជួសជុលផ្ទះ និងសាងសង់តូបកាត់សក់រួចរាល់ នៅថ្ងៃទី១៦ ខែមិថុនា ឆ្នាំ២០២០ លោកស្រី​ ម៉េងវ៉ាន់ដានីន ជាមច័ន្ទសោភ័ណ ប្រធានកិត្តិយសសមាគមនារីដើម្បីសន្តិភាពនិងការអភិវឌ្ឍខេត្តត្បូងឃ្មុំ បានដឹកនាំសមាជិក ចុះទៅសួរសុខទុក្ខ និងនាំយកថវិកាបន្ថែមមួយចំនួនបង្គ្រប់ក្នុងការសាងសង់ និងជួសជុល ក៏ដូចជាឧបត្ថម្ភថវិកាបន្ថែមមួយចំនួនទៀតផងដែរ ដើម្បីសម្រួលជីវភាពប្រចាំថ្ងៃ។

ក្នុងឱកាសនោះ លោកស្រី​ បានសម្ដែងនូវក្តីអាណិតអាសូរ និងពាំនាំប្រសាសន៍ផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុនរ៉ានីហ៊ុនសែន ប្រធានកាកបាទក្រហមកម្ពុជា និងលោកជំទាវកិត្តិសង្គហបណ្ឌិតម៉ែនសំអន ប្រធានសមាគមនារីដើម្បីសន្តិភាពនិងការអភិវឌ្ឍកម្ពុជា ជូនចំពោះលោកយាយនិងចៅៗគួរឱ្យអាណិតទាំងអស់។

បន្ថែមលើសពីនោះ លោកស្រី​ បានទំនុកបម្រុងឲ្យចៅប្រុសទី០៣ទៅរៀនធ្វើជាងម៉ាស៊ីនត្រជាក់ ដើម្បីអនាគតខ្លួននិងសម្រួលជីវភាពលោកយាយ ព្រមទាំងបន្តធ្វើបង្គន់អនាម័យមួយបន្ថែមទៀតជូនលោកយាយនិងចៅៗផងដែរ។

លោកយាយ ឈាវ គឹមសៀង និងចៅទាំង០៤នាក់ បានសម្ដែងនូវក្តីរំភើបរីករាយ និងថ្លែងអំណរគុណក្រោមដំណក់ទឹកភ្នែក លោកស្រី​ ម៉េង វ៉ាន់ដានីន និងសមាជិកសមាគមនារីខេត្តត្បូងឃ្មុំទាំងអស់ ដែលបានជួយស្រោចស្រង់លោកយាយ និងចៅឱ្យមានទីជម្រកសមរម្យ ចៅៗឱ្យមានមុខរបរចិញ្ចឹមជីវិត និងបានជួយសម្រួលជីវភាពគ្រួសារ ឲ្យមានក្តីសង្ឃឹមក្នុងជីវិតឡើងវិញ។

សូមជម្រាបថា លោកយាយ ឈាវ គឹមសៀង អាយុ៧៩ឆ្នាំ រស់នៅក្នុងភូមិត្រពាំងគូរ ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ មានជីវភាពក្រលំបាក មានមុខរបបដើរលក់នំប៉័ងនិងនំប៉ោង នៅក្នុងផ្សារខ្នារ ស្រុកត្បូងឃ្មុំ ដោយងើបលក់តាំងពីព្រលឹម ចំនេញបានត្រឹម៤០០០រៀលក្នុងមួយថ្ងៃ ដើម្បីចិញ្ចឹមចៅក្នុងបន្ទុក០៤នាក់ ក្នុងនោះប្រុស៣ ស្រី០១ កំព្រាតាំងពីតូចក្រូចឆ្មារ រហូតមកដល់ពេលនេះជាង១០ឆ្នាំហើយ៕SRP

ភ្នំពេញ៖ព្រះមហាក្សត្របានចេញព្រះរាជក្រឹតត្រាស់បង្គាប់ ផ្ទេរក្របខ័ណ្ឌលោកលឹម ម៉ៅ ពីឋានន្តរស័ក្តិ ឧត្តមមន្ត្រី ថ្នាក់លេខ៥នៃក្របខ័ណ្ឌមន្ត្រីរដ្ឋបាលជាន់ខ្ពស់ក្រសួងមហាផ្ទៃមកឋានន្តរស័ក្តិឧត្តមសេនីយ៍ត្រីអត្តលេខ៨៧៥៥៤នាយនគរបាលថ្នាក់ឧត្តមសេនីយ៍នៃក្របខ័ណ្ឌមន្ត្រីនគរបាលជាតិកម្ពុជាក្រសួងមហាផ្ទៃ។នេះបើយោងតាមព្រះរាជក្រឹតចុះថ្ងៃទី២២ខែឧសភាឆ្នាំ២០២០។

សូមបញ្ជាក់ថាបើយោងតាមលិខិតចុះថ្ងៃទី២៥ខែកក្កដាឆ្នាំ២០១៩របស់លោកលឹម ម៉ៅ អភិបាលរងស្រុងត្បែងមានជ័យ ដោយមានការឯកភាពពីលោកនុត សោភ័ណ្ឌ អភិបាលស្រុងត្បែងមានជ័យ ចុះថ្ងៃទី២៥ខែកក្កដាឆ្នាំ២០១៩ និងមានការឯកភាពពីស្នងការនគរបាលខេត្តព្រះវិហារចុះថ្ងៃទី២៦ខែកក្កដាឆ្នាំ២០១៩ ដោយឧត្តមសេនីយ៍ទោ សួស សុខដារ៉ា សូមគោរពជូនសម្ដេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ។ សំណើសុំផ្ទេរក្របខ័ណ្ឌ របស់លោកលឹម ម៉ៅ ឆ្នាំកំណើត១៩៧១អត្តលេខមន្ត្រីរាជការ១៧១០៧០០០៥៥ឋានន្តរស័ក្តិឧត្តមមន្ត្រីថ្នាក់លេខ៦ ឋាន:ជាអភិបាលរងស្រុកត្បែងមានជ័យនៃខេត្តព្រះវិហារ មកបម្រើការងារក្រមខ័ណ្ឌនគរបាលជាតិនៃក្រសួងមហាផ្ទៃនិងជាសូមតែងតាំងមុខតំណែងជាស្នងការរងនៃស្នងការនគរបាលខេត្តព្រះវិហារ។

ទោះយ៉ាងណាគេមិនទាន់ដឹងថាលោកឧត្តមសេនីយ៍ត្រីលឹម​ ម៉ៅ បានមុខតំណែងជាស្នងការរងខេត្តព្រះវិហារ ហើយឬយ៉ាងណានោះទេ។ ប៉ុន្តែបើលោក លឹម ម៉ៅ មានឋាន:ផ្កាយមួយរួចហើយនោះ ការចង់បានមុខតំណែងជាស្នងការរងខេត្តព្រះវិហារ ងាយដូចបកចេកទុំអីចឹង? ។ អង្គភាពសៀមរាបប៉ុស្ដិ៍ នៅពុំទាន់ទទួលបានការបកស្រាយបំភ្លឺពីលោកឧត្តមសេនីយ៍ត្រីលឹម​ ម៉ៅ នៅឡើយទេជុំវិញករណីនេះ៕SRP

ខេត្តកំពង់ចាម៖លោក​​ កៅ​ សុខអាន​ អភិបាល​រង​ខេត្ត​ តំណាង​លោក​​ អ៊ុន​ ចាន់ដា​ អភិបាលខេត្ត​កំពង់ចាម​​ បាន​អញ្ជើញ​ចូលរួម​ក្នុង​ពិធី​ប្រកាស​តែងតាំង​ និង​ប្រគល់​ភារកិច្ច​ជូន​មន្ត្រី​រាជការ​នៃ​មន្ទីរ​វប្បធម៌​និង​វិចិត្រ​សិល្បៈ​ខេត្ត​កំពង់ចាម​ ចំនួន​០៣រូប​ គឺប្រធាន​ការិយាល័យ​១រូប​ និង​អនុ​ប្រធាន​ការិយាល័យ​ចំនួន​០២រូប​​។
ពិធីនេះត្រូវបានធ្វេីឡេីងនាព្រឹកថ្ងៃទី​១៧​ ខែមិថុនា​ ឆ្នាំ​២០២០​ ដោយ​មាន​ការ​ចូលរួម​ពីលោកប្រធានមន្ទីរវប្បធម៌និងវិចិត្រសិល្បៈខេត្ត​ លោកនាយករងទីចាត់ការ​ធនធាន​មនុស្ស​ លោក​ លោកស្រី​អនុប្រធាន​មន្ទីរ និង​មន្ត្រីរាជការ​ជា​ច្រើន​រូប​ផង​ដែរ​​៕SRP

ភ្នំពេញ៖ ក្រសួងមហាផ្ទៃ បានសម្រេចបង្កើត ក្រុមការងារតាមដានអំពីការដោះស្រាយចំពោះមតិ យោបល់ ឬសំណូមពរ (Comment) របស់មហាជន ក្នុងPage Facebook របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ៕SRP

ខេត្តសៀមរាប៖លោកសូរ ប្លាតុងអភិបាលស្រុក បានអះអាងថាការិយាល័យច្រកចេញចូលតែមួយនិង​ ការិយាល័យប្រជាពលរដ្ឋ របស់រដ្ឋបាលស្រុកប្រាសាទបាគង ពេលនេះ​ ទីកន្លែងនេះ​ ជាកន្លែងនិងពេលវេលា ដែលយើង​ត្រូវ​រួមគ្នា​​ បន្តបំរើសេវាសាធារណៈ ជូនបងប្អូនប្រជាពលរដ្ឋ​ អោយ​កាន់តែមានភាពល្អប្រសើរឡើង ជាងមុន​ ស្របតាម​តម្រូវ​កា​ររបស់ បងប្អូនប្រជាពលរដ្ឋ ដោយតម្លាភាព រហ័ស​ និងគ្មានអំពើពុករលួយ។
លោកអះអាងយ៉ាងដូច្នោះក្នុងពិធីសម្ពោធជាផ្លូវការការិយាល័យច្រកចេញចូលតែមួយនិង​ ការិយាល័យប្រជាពលរដ្ឋ របស់រដ្ឋបាលស្រុកប្រាសាទបាគង នៅថ្ងៃអង្គារទី១៦ ខែមិថុនាម្សិលមិញ ក្រោមវត្តមានអាជ្ញាធរខេត្តសៀមរាប លោកទៀ សីហា ៕SRP

លោកម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរសុីវិល បានថ្លែងថាការសាងសង់អាកាសយានដ្ឋានអន្តរជាតិសៀមរាបអង្គរថ្មី (AIAI) ដែលនឹងបញ្ចប់ការសាងសង់រួចរាល់ ជាស្ថាពរនៅឆ្នាំ ២០២៣ខាងមុខ។
លោកថ្លែងបញ្ជាក់យ៉ាងដូច្នោះកាលពីថ្ងៃច័ន្ទទី១៥ខែមិថុនាឆ្នាំ២០២០ ក្នុងពេល ដឹកនាំមន្ត្រីបច្ចេកទេស ចុះពិនិត្យការសាងសង់អាកាសយានដ្ឋានអន្តរជាតិសៀមរាបអង្គរថ្មី(AIAI)។
សូមបញ្ជាក់ថាអំពីវឌ្ឍនភាពការងារ ពេលបច្ចុប្បន្ននេះក្រុមហ៊ុន បានកំពុងចាប់ផ្តើមដំណើរការសាងសង់អាកាសយានដ្ឋានអន្តរជាតិសៀមរាបថ្មី ចាប់តាំងពីថ្ងៃទី១៥ខែមីនា ឆ្នាំ២០២០ មកម្លេះ និងគ្រោងបញ្ចប់ការសាងសង់ឱ្យរួចរាល់ជាស្ថាពរនៅថ្ងៃទី១៤ខែមីនា ឆ្នាំ២០២៣ ដោយប្រើពេលវេលាទាំងអស់រយៈពេល៣៦ខែ។

ចំពោះដំណើរការសាងសង់ក្រុមហ៊ុនបានសហការយ៉ាងជិតស្និតជាមួយក្រុមការងារបច្ចេកទេសរបស់រដ្ឋលេខាធិការដ្ឋានអាកាសចរស៊ីវិល ដោយផ្តោតសំខាន់ទៅនឹងការបំពាក់ឧបករណ៍បច្ចេកទេស និងរចនាបទអាកាសយានដ្ឋានផងដែរ៕SRP

ខេត្តសៀមរាប៖លោក ទៀ សីហា អភិបាលខេត្ដបានថ្លែងថាពីមុនមានពាក្យស្លោកពោលថា ខ្យល់បក់ដីហុយ ប៉ុន្ដែសម្រាប់នៅខេត្ដសៀមរាបនាពេលនេះ នឹងលែងមានពាក្យថា ខ្យល់បក់ដីហុយទៀតហើយ បន្ទាប់ពីមានរថយន្ដសម្រាប់បោសសំអាតផ្លូវទាំងបីគ្រឿងនេះ។ លោកបានបន្ថែមថាក្រោយពីប្រើប្រាស់រថយន្ដបោសសំអាតបរិស្ថាននេះ ខេត្ដសៀមរាប ត្រូវដូរពាក្យថា ខ្យល់បក់ដើរបានស្រួល ហើយនឹងលែងមានដីនៅលើផ្លូវទៀតហើយ ។ លោកបានបន្ដថា រថយន្តនេះ នៅពេលបោសសំអាតមិនហុយ ឬរំខានដល់ប្រជាពលរដ្ឋឡើយ និងមានប្រព័ន្ធបញ្ជាទំនើប មិនចាំបាច់ប្រើមនុស្សច្រើន ដើម្បីជម្រុញ ឲ្យការងារបរិស្ថាន និងអនាម័យនៅទីក្រុងអោយកាន់តែមានសោភ័ណភាពល្អប្រសើឡើង។
លោកថ្លែងបញ្ជាក់យ៉ាងដូច្នោះក្នុងពេលអញ្ជើញផ្ដល់រថយន្ដបោសសំអាតផ្លូវចំនួយ៣គ្រឿង ដល់រដ្ឋបាលក្រុងសៀមរាប នៅរសៀលថ្ងៃទី១៦ខែមិថុនា ឆ្នាំ២០២០នេះ។
បើតាមលោក នួន ពុទ្ធារ៉ា អភិបាលក្រុងសៀមរាប បានបញ្ជាក់ថា រថយន្ដបោសសំអាតបរិស្ថាននៅតាមដងផ្លូវនេះ ជាជំនួយពីប្រទេសចិនពីរគ្រឿង និងសហរដ្ឋអាមេរិកមួយគ្រឿង ដែលផ្ដល់ជូនតាមរយៈអាជ្ញាធរខេត្ដសៀមរាប ដើម្បីជម្រុញការងារបរិស្ថាន និងអនាម័យទីក្រុង ជាពិសេសជួយលើកកំពស់ អនាម័យបរិស្ថាន នៅក្រុងសៀមរាបអង្គរឲ្យកាន់តែមានសោភ័ណភាព និងទាក់ទាញភ្ញៀវទេសចរជាតិ និងអន្ដរជាតិឲ្យចូលមកទស្សនាកាន់តែច្រើនឡើងថែមទៀត។
លោកនួន ពុទ្ធារ៉ា បន្ថែមថា ប្រភេទរថយន្តដែលមានលក្ខណៈទំនើប ដោយមានភ្ជាប់ឧបករណ៍បោសដី បូមដី និងបាញ់ទឹកមិនឲ្យហុយនៅពេលបោស ដែលផ្ទុកធូលីដី មិនប្រើមនុស្សច្រើន ដែលមានសមត្ថភាពដែលអាចទុកចិត្ដបានព្រោះជាប្រភេទរថយន្ដដែលមានបច្ចេកវិទ្យាក្នុងការសំអាតបរិស្ថានយ៉ាងស្ទាត់ជំនាញ ខណៈផ្លូវកៅស៊ូជាច្រើនខ្សែដែលរដ្ឋបាលខេត្ដកំពុងតែស្ថាបនារួចហើយនោះ រថយន្ដទាំងបីគ្រឿងនេះ និងត្រូវធ្វើការងារនោះដើម្បីកុំអោយហុយដីដល់អ្នកធ្វើដំណើរតទៅទៀត៕SRP

ខេត្តសៀមរាប៖ ទីស្នាក់ការសាខាកាកបាទក្រហមកម្ពុជា ខេត្តសៀមរាបនារសៀលថ្ងៃអង្គារ លោក ទៀ សីហា ប្រធានគណៈកម្មាធិការសាខា បានជួបសំណេះសំណាល និងទទួលថវិកាអបអរខួបលើកទី១៥៧ ទិវាពិភពលោកកាកបាទក្រហម អឌ្ឍចន្ទក្រហម ឆ្នាំ២០២០ ពីលោក លោកជំទាវ ក្រុមប្រឹក្សាខេត្តសៀមរាប និងសប្បុរសជនក្នុងខេត្ត។

ក្នុងឱកាសនោះ លោក អុឹង ហឿន ប្រធានក្រុមប្រឹក្សាខេត្តសៀមរាប បានមានប្រសាសន៍ថា ថវិកាដែលប្រគល់ជូនសាខាកាកបាទក្រហមកម្ពុជា ខេត្តសៀមរាប នាពេលនេះ គឺជាទឹកចិត្តសប្បុរសរបស់លោក លោកជំទាវ សមាជិកក្រុមប្រឹក្សាខេត្ត និងថវិកាលោកផ្ទាល់ គឺបរិច្ចាគដោយសទ្ធាជ្រះថ្លា ក្នុងការរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ហើយនេះក៏ជាវប្បធម៌នៃការចែករំលែកជួយគ្នា ទោះតិចក្ដីច្រើនក្ដី តែជាទឹកចិត្តជួយគ្នាក្នុងគ្រាក្រ គ្រាលំបាក ។

លោក ទៀ សីហា បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌របស់ លោកប្រធានក្រុមប្រឹក្សាខេត្ត លោកលោកជំទាវ សមាជិក សមាជិកាក្រុមប្រឹក្សាខេត្ត និងសប្បុរសជន ដែលបានយកចិត្តទុកដាក់ចូលរួមចំណែកក្នុងសកម្មភាពមនុស្សធម៌ គឺសបញ្ជាក់ពីទឹកចិត្តដ៏ប្បុរសធម៌ចំពោះបងប្អូនប្រជាពលរដ្ឋរងគ្រោះ និងងាយរងគ្រោះបំផុត។ ក្នុងកាយវិកាដ៏មនុស្សធម៌នេះ គឺជាការចូលរួមរបស់សប្បុរសជនជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។ សាខាកាកបាទក្រហមកម្ពុជា ខេត្តសៀមរាប នឹងប្រើប្រាស់នូវថវិកានេះ ឱ្យចំគោលដៅមនុស្សធម៌ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម។
សូមបញ្ជាក់ថាថវិកាដែលមានទទួលមាន៖

– ក្រុមប្រឹក្សាខេត្តសៀមរាប ថវិការចំនួន ៩,០០០,០០០(ប្រាំបួនលាន)រៀល និង ២,៤៥០(ពីរពាន់បួនរយហាសិប)ដុល្លារអាមេរិក។

– គណៈអភិបាលខេត្តសៀមរាប ថវិកាចំនួន ២,០០០,០០០(ពីរលាន)រៀល និង ១,៥០០(មួយពាន់ប្រាំរយ)ដុល្លារអាមេរិក។

– ទីចាត់ការ និងអង្គភាព នៃរដ្ឋបាលខេត្តសៀមរាប ថវិកាចំនួ ៦,៨៦០,០០០(ប្រាំមួយលានប្រាំបីសែនប្រាំមួយម៉ឺន)រៀល។

– លោក សុខ ថុល និលោកស្រី ហុង សុជាតា ថវិកាចំនួន ៥០០(ប្រាំរយ)ដុល្លារអាមេរិក។

– លោក ហេង ពិសិដ្ឋ និងលោកស្រី ថវិកាចំនួន ២០,០០០,០០០(ម្ភៃលាន)រៀល។

– ឯកឧត្តម រ៉ិត ចាន់ថា (Apsara Tours Co., Ltd) ថវិកាចំនួន ៥០០(ប្រាំរយ)ដុល្លារអាមេរិក

– លោក ម៉ៅ ដារ៉េត និងលោកស្រី ហង្ស សូលីនដា ថវិកាចំនួន ១,០០០,០០០(មួយលាន)រៀល

– លោកជំទាវ លី ដាណា សមាជិកាគណៈកម្មាធិការសាខាកាកបាទក្រហមកម្ពុជា ខេត្តសៀមរាប ថវិកាចំនួន ៣,០០០(បីពាន់)ដុល្លារអាមេរិក

– ក្រុមហ៊ុន រីត្រូ អ៊ិនវេសម៉ិន ថវិកាចំនួន ៥០០(ប្រាំរយ)ដុល្លារអាមេរិក៕SRP

ខេត្តសៀមរាប៖សេចក្ដីរាយការណ៍បានឲ្យដឹងថាបុរសម្នាក់ បើកម៉ូតូដួលដោយខ្លួនឯង បណ្ដាលឲ្យស្លាប់។
ហេតុការណ៍បានកើតឡើងថ្ងៃទី១៦ខែមិថុនា ឆ្នាំ២០២០ វេលាម៉ោង ១៣:៣០នាទីរសៀលនៅត្រង់ចំណុចផ្លូវកែងអក្សរតេ(T) លើផ្លូវជាតិលេខ៦ ស្ថិតនៅភូមិ កំពង់ថ្កូវ២ ឃុំកំពង់ថ្កូវ ស្រុកក្រឡាញ់។

លោកវរសេនីយ៍ឯក ជី បេងជនអធិការនគរបាលស្រុកក្រឡាញ់ បានឲ្យដឹងថាជនរងគ្រោះ ឈ្មោះ សៅ សុភាព ភេទប្រុស អាយុ៥៧ឆ្នាំ រស់នៅភូមិក្រឡាញ់ ឃុំក្រឡាញ់ ស្រុកក្រឡាញ់ ខេត្តសៀមរាប បើកបរម៉ូតូ ម៉ាក ហុងដាវ៉េវ ពណ៌ឈាមជ្រូក បានបើកពីទិសខាងកើតមកទិសខាងលិច ហើយបានរ៉េធ្លាក់កន្លងផ្លូវរួចដួលខ្លួនឯង តែម្តង។ជនរងគ្រោះត្រូវបានក្រុមគ្រួសារដឹកតាមរថយន្តមកមន្ទីពេទ្យបង្អែកស្រុកប៉ុន្តែដោយសភាពមិនស្រួល ក្រុមគ្រួសារក៏បានបញ្ជូនបន្តទៅកាន់មន្ទីពេទ្យបង្អែកខេត្ត តែពេលទៅដល់ស្រុកពួក បានដាច់ខ្យល់ស្លាប់ ក៏ដឹកត្រឡប់មកគេហដ្ឋានវិញ៕SRP