ភ្នំពេញ៖លោកគុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា និងជាប្រធានគណៈកម្មការទ្រទ្រង់មូលនិធិគន្ធបុប្ផាកម្ពុជាប្រចាំអគ្គនាយកដ្ឋានគយនិងរដ្ឋាករកម្ពុជា បាននាំយកថវិកាបរិច្ចាគប្រចាំឆ្នាំ២០២៣ សរុបចំនួន ១៨៩,៥៧៤,០០០ រៀល និង ៤០,៣០៥ ដុល្លារអាមេរិក ដែលជាថវិកាបរិច្ចាគដោយថ្នាក់ដឹកនាំ មន្ត្រីគយនិងរដ្ឋាករ និងបុគ្គលិក នៃអគ្គនាយកដ្ឋានគយនិងរដ្ឋាករកម្ពុជា មកប្រគល់ជូនមូលនិធិគន្ធបុប្ផាកម្ពុជា។

ការបរិច្ចាគធ្វើឡើងនៅ នៅថ្ងៃអង្គារ ថ្ងៃទី២១ ខែកុម្ភៈ ឆ្នាំ២០២៣ នៅមន្ទីរពេទ្យគន្ធបុប្ផា។

នៅក្នុងពិធីប្រគល់និងទទួលនេះ លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានលេខាធិការដ្ឋានមូលនិធិគន្ធបុប្ផាកម្ពុជា បានថ្លែងអំណរគុណយ៉ាងជ្រាលជ្រៅ និងវាយតម្លៃខ្ពស់ចំពោះការចូលរួមបរិច្ចាគពីសំណាក់ថ្នាក់ដឹកនាំ មន្ត្រីគយនិងរដ្ឋាករ និងបុគ្គលិកនៃអគ្គនាយកដ្ឋានគយនិងរដ្ឋាករកម្ពុជាទាំងអស់ក្នុងស្មារតីជួយគ្នាទៅវិញទៅមក ជាពិសេសគឺទឹកចិត្តខ្មែរជួយខ្មែរ ដែលនេះជាកាយវិការគួរឱ្យគោរពនិងកោតសរសើរ ដើម្បីចូលរួមលើកកម្ពស់សុខុមាលភាពកុមាររាប់លាននាក់ នៅប្រទេសកម្ពុជា។

ឆ្លៀតឱកាសនោះផងដែរ លោក គី សន់ទី ប្រធានមន្ទីរពេទ្យគន្ធបុប្ផា បានថ្លែងអំណរគុណយ៉ាងជ្រាលជ្រៅដល់អគ្គនាយកដ្ឋានគយនិងរដ្ឋាករកម្ពុជា ដែលតែងតែសម្រួលដល់នីតិវិធីនាំចូលនូវមុខទំនិញជាសម្ភារៈនិងបរិក្ខារពេទ្យ ដែលត្រូវយកមកប្រើប្រាស់នៅក្នុងមន្ទីរពេទ្យគន្ធបុប្ផា កន្លងមក។

លោក គុណ ញឹម បានថ្លែងអំណរគុណយ៉ាងជ្រាលជ្រៅចំពោះប្រមុខ រាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រី ដែលបានបង្កើតមូលនិធិគន្ធបុប្ផាកម្ពុជា នេះឡើង ដើម្បីផ្ដល់ភាពងាយស្រួលដល់សប្បុរសជនទាំងអស់ ដែលមានបំណងចូលរួមធានានិរន្តរភាពនៃកិច្ចដំណើរការរបស់មន្ទីរពេទ្យគន្ធបុប្ផាទាំងប្រាំទីតាំង។ លោក ក៏បានថ្លែងអំណរគុណដល់ក្រុមការងារមូលនិធិគន្ធបុប្ផាកម្ពុជា ដែលបានសម្របសម្រួលទទួល និងចាត់ចែងថវិការបស់សប្បុរសជនទាំងអស់ប្រកបដោយប្រសិទ្ធភាពនិងតម្លាភាព។

លោក ក៏បានថ្លែងអំណរគុណដល់ថ្នាក់ដឹកនាំ មន្ត្រីគយនិងរដ្ឋាករ និងបុគ្គលិកនៃអគ្គនាយកដ្ឋានគយនិងរដ្ឋារកម្ពុជា ដែលបានស្ម័គ្រចិត្តចូលរួមបរិច្ចាគថវិកាជូនមូលនិធិគន្ធបុប្ផាកម្ពុជានាពេលនេះ ដែលជាសកម្មភាពសប្បុរសធម៌ដ៏ល្អប្រពៃ ដើម្បីរួមគ្នាធានាឱ្យបាននូវនិរន្តរភាព នៃកិច្ចដំណើរការរបស់មន្ទីរពេទ្យគន្ធបុប្ផានិងដើម្បីស្នាមញញឹមរបស់កុមារក្រោមដំបូលសន្តិភាព៕SRP

ភ្នំពេញ៖រាជរដ្ឋាភិបាលកម្ពុជា បានកាត់ដីចំនួន៦៤៩ហិកតា ដែលស្ថិតនៅក្នុងដែនជម្រកសត្វព្រៃ ភ្នំឱរ៉ាល់ ទៅឱ្យក្រុមហ៊ុន វ័ន ហ្វ្រេតធើនីធី ឯក របស់អ្នកឧកញ្ញ៉ា ជឹង សុគន្ធារី ដែលជាអគ្គនាយិកាក្រុមហ៊ុនផលិតទឹកបរិសុទ្ធវីតាល់ និងក្រុមហ៊ុនផលិតមីជាតិ។

បើតាមអនុក្រឹត្យ ចុះកាលពីថ្ងៃទី២៦ ខែកក្កដា ឆ្នាំ២០២២ ការផ្ដល់សិទ្ធិអភិវឌ្ឍន៍លើដីររបស់រដ្ឋ (សម្បតិ្តឯកជនរបស់រដ្ឋ) ទៅឱ្យក្រុមហ៊ុន វ័ន ហ្វ្រេតធើនីធី (One Fraternity Co, LTD) ខណៈម្ចាស់ក្រុមហ៊ុនដដែលនេះ ទើបតែទទួលបានដីចំនួន២២២ហិកតារ របស់រដ្ឋស្ថិតនៅភ្នំគិរីរម្យផងដែរនោះ គឺសម្រាប់ធ្វើការវិនិយោគ លើគម្រោងអភិវឌ្ឍន៍ទេសចរណ៍ផ្សារភ្ជាប់ធម្មជាតិ។

អនុក្រឹត្យបញ្ជាក់យ៉ាងដូច្នេះថា ផ្ទៃដីទំហំ៦៤៩ហិកតា ស្ថិតក្នុងដែនជម្រកសត្វព្រៃ ភ្នំឱរ៉ាល់ ឃុំក្តុលសែនជ័យ និងឃុំជៀប ស្រុកទឹកផុស ខេត្តកំពង់ឆ្នាំង រដ្ឋាភិបាល បានធ្វើការអនុប្បយោគ ប្តូរចំណាត់ថ្នាក់ពីទ្រព្យសម្បតិ្ត សាធារណៈរបស់រដ្ឋ មកជា ទ្រព្យសម្បតិ្តឯកជនរបស់រដ្ឋ តាមរយៈការផ្ដល់សិទ្ធិជួលឱ្យក្រុមហ៊ុនឯកជនមួយឈ្មោះ វ័ន ហ្វ្រេតធើនីធី (One Fraternity Co, LTD) ដើម្បីយកទៅអភិវឌ្ឍន៍ជាតំបន់ទេសចរណ៍ផ្សារភ្ជាប់នឹងធម្មជាតិ។

អនុក្រឹត្យដដែលនេះ បានបញ្ជាក់ថា ក្រសួងបរិស្ថានដែលជាអ្នកកាន់កាប់ទ្រព្យសម្បត្តិ បន្តនិតិវិធីចាត់ចែងកិច្ចការងារនេះ ដោយមានកិច្ចសហការ ជាមួយក្រសួងសេដ្ឋកិច្ច ជាអាជ្ញាធរគ្រប់គ្រង ទ្រព្យសម្បត្តិរដ្ឋ និងក្រសួងពាក់ព័ន្ធ រួមជាមួយរដ្ឋបាលថ្នាក់ក្រោមជាតិផងដែរ៕SRP

អ្នកឧកញ្ញ៉ា ជឹង សុគន្ធារី ដែលជាអគ្គនាយិកាក្រុមហ៊ុនផលិតទឹកបរិសុទ្ធវីតាល់ និងក្រុមហ៊ុនផលិតមីជាតិ

ខេត្តសៀមរាប៖អធិការនគរបាលស្រុកជីក្រែង បានបញ្ជាក់ករណីគ្រោះថ្នាក់ចរាចរណ៍ មួយរវាងរថយន្ត រថយន្តកែច្នៃ មិនមានមនុស្សរងរបួសធ្ងន់នោះទេ ក្រោយកើតហេតុត្រូវបានបញ្ជូនទៅមន្ទីរពេទ្យផងដែរ។

អធិការជីក្រែង លោក តាំង លីហេង បានប្រាប់សៀមរាប ប៉ុស្តិ៍ ថា ករណីគ្រោះថ្នាក់ចរាចរណ៍ បានកើតឡើង នៅថ្ងៃទី២១
ខែកុម្ភៈ ឆ្នាំ២០២៣ វេលាម៉ោង០៧ និង៣០នាទី  ត្រង់ចំណុចទល់មុខដេប៉ូសាំងេតលា ស្ថិតនៅក្នុងភូមិស្ពានតូច ឃុំឬស្សីលក ស្រុកជីក្រែង ចន្លោះបង្គោលគីឡូម៉ែត្រលេខ២៧២ និង២៧៣ លើផ្លូវជាតិលេខ០៦ រវាងរថយន្ត និង រថយន្តបត់ឆ្វេង។

អធិការរូបនេះបានបញ្ជាក់ថា ទី១ រថយន្តម៉ាក TOYOTA SIENNA ផលិតឆ្នាំ2005 ពាក់ស្លាកលេខភ្នំពេញ 2AC-2368ប្រភេទទេសចរណ៍ ពណ៌ស អ្នក បើកបរឈ្មោះ ណុល ណូន ភេទ ប្រុស អាយុ៣៣ឆ្នាំ រស់នៅភូមិនីពេជខ ឃុំនីពេជ ស្រុកកំពង់ស្វាយ ខេត្តកំពង់ធំ ដឹកមនុស្ស ០២នាក់៖ ០១ឈ្មោះ ធឿនអុល ភេទស្រី អាយុ៤០ឆ្នាំ រស់នៅភូមិនីពេជខ ឃុំនីពេជ ស្រុកកំពង់ស្វាយ ខេត្តកំពង់ធំ ០២,ឈ្មោះ ចិន ចាន់វិបុត្រ ភេទ ប្រុស អាយុ១៥ឆ្នាំ រស់នៅភូមិនីពេជខ ឃុំនីពេជ ស្រុកកំពង់ស្វាយខេត្តកំពង់ធំ ទិសដៅពីកើតទៅលិចបានបុករថយន្តកែឆ្នៃ ស្លាកលេខគ្មាន ពណ៌លឿង លាយត្រួយចេកដឹកទំនិញចំរុះ អ្នកបើកបរឈ្មោះ ស ស្បឿន ភេទប្រុស អាយុ៣៩ឆ្នាំ រស់ភូមិស្វាយជ្រុំ ឃុំស្វាយជ្រុំ ស្រុកមេសាង ខេត្តព្រៃវែង ទិសដៅពីកើតបត់ឆ្វេង។

អធិការបានបញ្ជាក់បន្ថែមថា ក្នុងហេតុការណ៍នេះបណ្ដាលឲ្យ ១.ឈ្មោះ ធឿន អុល ភេទស្រីអ្នករួមដំណើរតាមរថយន្ត របួសស្រាល ០២.ចិន ចាន់វិបុត្រ ភេទប្រុស អ្នករួមដំណើរតាមរថយន្តរបួសស្រាល។ ខូចខាត រថយន្ត ០១គ្រឿងធ្ងន់។និង រថយន្តកែឆ្នៃ ១គ្រឿងស្រាល។ មូលហេតុអ្នករថយន្ដកែឆ្នៃ បត់ឆ្វេងខ្វះការប្រុងប្រយ័ត្ន។រថយន្តពាក់ព័ន្ធរក្សាទុបណ្តោះទុកអាសន្ននៅអង្គភាពដើម្បីអនុវត្តន៍ តាមនិតិវិធីច្បាប់៕SRP

ខេត្តបាត់ដំបង៖លោកសុខ លូ អភិបាលខេត្តបាត់ដំបង និងជាប្រធានគណៈកម្មាធិការសាខាកាកបាទក្រហមកម្ពុជាខេត្តបាត់ដំបង ព្រមទាំងសហការី បានអញ្ជើញសំណេះសំណាល សួរសុខទុក្ខ និងនាំយកអំណោយមនុស្សធម៌ របស់សាខាកាកបាទក្រហមកម្ពុជា ខេត្តបាត់ដំបង ផ្តល់ជូនប្រជាពលរដ្ឋងាយរងគ្រោះបំផុត ដែលជាជនជាតិព័រ ចំនួន១០០គ្រួសារ ស្ថិតនៅភូមិភ្នំរៃ ឃុំតាតោក ស្រុកសំឡូត។

ពិធីសំណេះសំណាលសួរសុខទុក្ខនេះ នៅបរិវេណវត្តភ្នំរៃ ឃុំតាតោក ស្រុកសំឡូត នៅព្រឹកថ្ងៃអង្គារនេះ។

លោក សុខ លូ បានមានប្រសាសន៍លើកឡើងថា ដោយមើលឃើញពីផលលំបាករបស់ប្រជាពលរដ្ឋ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យសាខា អនុសាខា អ្នកស្ម័គ្រចិត្ត និងយុវជនកាកបាទក្រហមកម្ពុជា នាំយកអំណោយមនុស្សធម៌ទាំងនេះ ចែកជូនប្រជាពលរដ្ឋងាយរងគ្រោះបំផុត ជាជនជាតិព័រសរុប១០០គ្រួសាររស់នៅភូមិភ្នំរៃ ឃុំតាតោក ស្រុកសំឡូត ខេត្តបាត់ដំបង។

លោកបានបន្តទៀតថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែផ្តាំផ្ញើសួរសុខទុក្ខ ដោយក្តីអាណិតស្រឡាញ់ ការគិតគូរពីសុខទុក្ខ និងជីវភាពរស់នៅប្រចាំថ្ងៃ របស់បងប្អូនប្រជាពលរដ្ឋ ងាយរងគ្រោះបំផុតដោយក្តីនឹករលឹកយ៉ាងជ្រាលជ្រៅជាទីបំផុត ជាមួយនឹងការផ្តល់អំណោយសម្រាលការលំបាកទាំងអស់នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏តែងតែយកចិត្តទុកដាក់ចំពោះសុខភាពរបស់ប្រជាពលរដ្ឋ ដូចនេះសូមប្រជាពលរដ្ឋទាំងអស់ត្រូវថែទាំសុខភាព បរិភោគទឹកឆ្អិន រស់នៅមានអនាម័យល្អ ចំពោះ ស្ត្រីមានកូនតូច ឬមានផ្ទៃពោះសូមទៅពិនិត្យផ្ទៃពោះនៅមន្ទីរពេទ្យជំនាញយ៉ាងតិចឱ្យបាន ៤ដង ហើយត្រូវសម្រាលកូននៅមណ្ឌលសុខភាព ហើយបើបងប្អូនមានជំងឺសូមប្រញាប់ទៅកាន់មន្ទីរពេទ្យឬមណ្ឌលសុខភាពនៅជិតបំផុតឱ្យបានទាន់ពេលវេលា កុំបង្អង់យូរដែលនាំគ្រោះថ្នាក់ដល់អាយុជីវិត។

លោកបានក្រើនរំលឹកដល់ប្រជាពលរដ្ឋសូមយកចិត្តទុកដាក់អំពីសុវត្ថិភាពក្នុងការធ្វើដំណើរលើដងផ្លូវជៀសវាងមានគ្រោះថ្នាក់ចរាចរណ៍ ព្រោះថាសម័យកាលមុនមានបងប្អូនយើងជាច្រើនបានរងគ្រោះធ្លាក់ខ្លួនពិការដោយសារសង្គា្រម តែបច្ចុប្បន្ននេះយើងរស់នៅក្រោមដំបូលនៃសុខសន្តិភាព យើងក៏មិនត្រូវបណ្តោយខ្លួនយើង ឱ្យក្លាយទៅជាជនពិការដោយសារតែគ្រោះថ្នាក់ចរាចរណ៍នោះដែរ។

លោកបានបញ្ជាក់ថាបងប្អូនរស់នៅក្នុងប្រទេសមានសន្តិភាពហើយ ត្រូវខិតខំកសាងសុភមង្គលគ្រួសារ ដោយមិនត្រូវប្រើអំពើហិង្សាក្នុងគ្រួសារ និងសូមជៀសវាងការប្រព្រឹត្តទង្វើគ្រប់បែបយ៉ាងដែលនាំឱ្យការកើតមានអំពើហិង្សាក្នុងគ្រួសារ។ បន្ថែមពីនេះ សូមប្រជាពលរដ្ឋនាំគ្នាទៅទទួលយកការចាក់វ៉ាក់សាំងបង្ការជំងឺកូវីដ-១៩ តាមកាលកំណត់ឱ្យបានគ្រប់ៗគ្នា បើទោះបីជាប្រទេសយើង បានឆ្លងផុត ពីគ្រោះថ្នាក់នៃជំងឺនេះក៏ដោយ តែពិភពលោកទាំងមូលមិនទាន់លុបបំបាត់ជំងឺនេះទាំងស្រុងនោះឡើយ ដូច្នេះត្រូវនាំគ្នាការពារ ទើបប្រសើរ។

សូមបញ្ជាក់ថា គ្រួសារនីមួយៗទទួលបានអំណោយរួមមាន៖ អង្ករ ២៥គីឡូក្រាម, មី ១កេស,ទឹកត្រី១យួ,ទឹកស៊ីអ៉ីវ១យួរ ទឹកបរិសុទ្ធ១កេសនិង ត្រីខ ១០កំប៉ុង, ផងដែរ៕SRP

ភ្នំពេញ៖បែកធ្លាយរឿងអនុប្រធាននាយករដ្ឋាន កិច្ចការច្បាប់សវនកម្ម និងទំនាក់ទំនងសាធារណៈ នៃអគ្គនាយកដ្ឋានគយ និងរដ្ឋាករកម្ពុជា លោក ប៉ោ សួន ដែលដល់អាយុចូលនិវត្តន៍ បានពន្យាអាយុចូលនិវត្តន៍។

យោងតាមតារាងទូទាត់បៀវត្សឆ្នាំ២០២១ គឺលោក ប៉ោ សួន អនុប្រធាននាយករដ្ឋាន កិច្ចការច្បាប់សវនកម្ម និងទំនាក់ទំនងសាធារណៈ កើតនៅថ្ងៃទី០១ ខែកុម្ភៈ ឆ្នាំ១៩៦៤។ ស្រាប់តែនៅក្នុងតារាងទូទាត់បៀវត្សឆ្នាំ២០២២ គឺមានការកែប្រែឆ្នាំកំណើតដោយលោក ប៉ោ សួន កើតនៅថ្ងៃទី០១ ខែកុម្ភៈ ឆ្នាំ១៩៧៤ ពោលគឺពន្យាអាយុចូលនិវត្តន៍បាន ១០ឆ្នាំ៕SRP

ខេត្តកំពង់ចាម​៖លោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម និងប្រធានក្រុមការងារថ្នាក់ជាតិចុះជួយឃុំបឹងណាយ តំណាង លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជ នឹងជាប្រធានក្រុមការងារថ្នាក់ជាតិចុះមូលដ្ឋានស្រុកព្រៃឈរ និងស្រុកបាធាយ បានថ្លែងថា​ ការជួយដល់ប្រជាជនដោយចិត្តស្មោះស យើងនឹងទទួលបានការស្រលាញ់ពីគាត់វិញ ដោយការបោះឆ្នោតជូនគណបក្សប្រជាជនកម្ពុជា​។

ថ្លែងបែបនេះក្នុងពិធីសំណេះសំណាល និងផ្សព្វផ្សាយសេចក្តីសម្រេចចិត្តនៃមហាសន្និបាតវិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា ជូនគណៈកម្មាធិការគណបក្សឃុំ សាខាបក្សភូមិ សកម្មជន និងយុវជនគណបក្សទូទាំងឃុំ នៅស្នាក់ការគណបក្សឃុំបឹងណាយ ក្នុងស្រុកព្រៃឈរ នៅសៀលថ្ងៃអាទិត្យ ម្សិលមិញ។

លោកជំទាវ តោ ពិឡា ក៏បានជម្រាបជូនពីលទ្ធផលអង្គមហាសន្និបាតដែលបានសម្រេចបន្ត គាំទ្រយ៉ាងពេញទំហឹង សម្តេចតេជោ ហ៊ុន សែន ជាបេក្ខភាពនាយករដ្ឋមន្ត្រីនៅអាណត្តិបន្ទាប់ និងគាំទ្រ លោក ហ៊ុន ម៉ាណែត ជាបេក្ខភាពនាយករដ្ឋមន្រ្តីសម្រាប់ពេលអនាគត។ គណបក្សនឹងបន្តដឹកនាំប្រទេស ដើម្បីលើកកម្ពស់កិត្យានុភាពរបស់កម្ពុជាលើឆាកអន្តរជាតិ និងបន្តរក្សាលំនឹងសេដ្ឋកិច្ចដែលកំពុងបន្តភាពខ្លាំងរបស់ខ្លួនជាសារវន្ត ដែលតាមការរំពឹងទុកអាចនឹងកើនដល់ ៥,៦ ភាគរយ ក្នុងឆ្នាំ២០២៣។ មហាសន្និបាតដាក់ចេញនូវគោលដៅជាយុទ្ធសាស្រ្ត៥ចំនុច និងគោលនយោបាយធំៗជាអទិភាពសម្រាប់រយៈពេល៥ឆ្នាំបន្តទៀត។

លោកជំទាវ តោ ពិឡា បានលើកថា ការបំរើប្រជាជនដោយក្តីស្រលាញ់ ជាចំណែកមួយនៃការបំរើនូវសេចក្តីត្រូវការរបស់គាត់ដែលកំពុងតែជួបការលំបាក មិនថាឡើងការលំបាកនោះជាការកំបាកតូចក្តី ធំក្តី តែយើងត្រូវបំពេញអោយបានដើម្បីអោយគាត់មានជំនឿជឿជាក់ថា គណបក្សប្រជាជនកម្ពុជាមិនទៅណាឡើយគ្រប់ពេលដែលបងប្អូនជួបការលំបាក។

លោកជំទាវរដ្ឋលេខាធិការ​ ក៏បានថ្លែងអំណរអរគុណយ៉ាងជ្រាលជ្រៅបំផុតចំពោះក្រុមការងារគណបក្សចុះជួយមូលដ្ឋានឃុំ បឹងណាយ និងសកម្មជនគណបក្សប្រជាជនកម្ពុជាទាំងអស់ដែលបានចូលរួមយ៉ាងសកម្មក្នុងការសម្រេចជោគជ័យ នៃការបោះឆ្នោតក្រុមប្រឹក្សាឃុំកន្លងមក និងសង្ឃឹមយ៉ាងមុតមាំថាបងប្អូននឹងបន្តគាំទ្រ និងបោះឆ្នោតជូនគណបក្សប្រជាជនកម្ពុជាសម្រាប់អាណត្តិក្រោយៗបន្តទៀត។

លោកជំទាវ តោ ពិឡា ក៏បានអញ្ជើញដឹកនាំក្រុមការងារគណបក្សមូលដ្ឋានឃុំបឹងណាយ សហការណ៍ជាមួយ សមាគមក្រុមយុវជនគ្រូពេទ្យស្ម័គ្រចិត្ត(V.Y.D.A) ចុះពិនិត្យព្យាបាលជម្ងឺសុខភាពភ្នែក មាត់ ធ្មេញ ជូនប្រជាពលរដ្ឋ ឥតគិតថ្លៃចំនួន ៥ភូមិគឺ:ភូមិតាអុក ភូមិថ្មដា ភូមិឈើបាក់ ភូមិចន្លាត់ដៃ និងភូមិត្រើង ក្នុងឃុំបឹងណាយ​ ហើយ​ក៏​បានអញ្ជើញចុះពិនិត្យ និងសិក្សាគម្រោង ធ្វើផ្លូវបេតុង១ខ្សែដែលមានប្រវែងប្រមាណ១៤គីឡូម៉ែត្រ ស្ថិតនៅក្នុងឃុំបឹងណាយ ផងដែរ​៕SRP

ខេត្តត្បូងឃ្មុំ៖ដើម្បីរំលឹករក្សាអភិរក្សកេរ្តិ៍តំណែលពីបុរាណតរៀងមកក្នុងតំបន់ ជារៀងរាល់ឆ្នាំនៅក្នុងខែកុម្ភ: នេះ បន្ទាប់ពីបងប្អូនប្រជាកសិករបានប្រមូលផលកសិកម្មរួចរាល់អស់ហើយនោះ បន្ទាប់មកបងប្អូនប្រជាពលរដ្ឋ តែងតែធ្វើប្រារព្ធពិធី ចាប់ត្រី នៅរមណីយ៍ដ្ឋានបឹងត្រពាំងក្រម ស្ថិតក្នុងភូមិសាទុំ ឃុំជាំក្រវៀន ស្រុកមេមត់ ខេត្តត្បូងឃ្មុំ។

ប្រជាពលរដ្ឋប្រមាណជាង៦ម៉ឺននាក់ មកពី ឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ ។ ហើយ ក៏បងប្អូនប្រជាពលរដ្ឋមានមកពីខេត្តក្រចេះ  កំពង់ចាម ខេត្តព្រៃវែង និងខេត្តស្វាយរៀង ក្នុងស្មារតីភាតរភាពសាមគ្គីភាព ស្រលាញ់រាក់ទាក់គ្នា ប្រកបដោយ សីលធម៌ សុជីវធម៌ យ៉ាងល្អផូរផង់ និងមានលក្ខណៈជាតិនិយមគួរជាទីមោទនៈ។

លោក រិន សំអឿន អាយុ៣៧ឆ្នាំ រស់នៅភូមិសាទុំ ឃុំជាំក្រវៀន ស្រុកមេមត់ បានបញ្ជាក់ឱ្យដឹងថា គាត់មានឧបករណ៍អង្រុតយកមកចុះរុតចាប់ត្រី រាល់ឆ្នាំ ឆ្នាំនេះត្រីសម្បូណ៍ជាងឆ្នាំ២០២០ ដោយទឹកបឹងត្រពាំងនៅច្រើនឆ្នាំនេះមានភ្លៀងច្រើន ហើយយើង ចាប់បានត្រីច្រើន   យកទៅធ្វើម្ហូបជាលក្ខណៈគ្រួសារ យ៉ាងសប្បាយ។

លោកយាយ ស្បោង អ៊ូច ក្នុងវ័យជាង៧៣ឆ្នាំ បានបញ្ជាក់ឱ្យដឹងដែរថា ពីដើមមុននឹងចុះចាប់គេធ្វើពិធីសែនសុំម្ចាស់ទឹក ម្ចាស់ដី សុំឱ្យត្រីដែលមានធ្មុងទាំឡាយ ដូចជាត្រីឆ្លាំង ត្រីអណ្តែង ត្រីកញ្ចុះ ជាដើម សូមឱ្យស្លូតដូចត្រីកំភ្លាញ ធ្វើដូចនេះ ពេលបងប្អូនប្រជាពលរដ្ឋចុះចាប់ត្រីមិនមានបញ្ហាមុតត្រីអ្វីនោះទេ នេះជាទំនៀមបុរាណយើង។

លោក អ៊ូច យឿន មេឃុំជាំក្រវៀន និងជាប្រធានគណៈកម្មការៀបចំកម្មវិធីចាប់ត្រីបឹងត្រពាំងក្រម បានបញ្ជាក់ឱ្យដឹងថា ថ្ងៃនេះជាថ្ងៃនក្ខត្តឫក្សដ៏ល្អត្រចះត្រចង់ ដែលបងប្អូនប្រជាពលរដ្ឋបាននាំគ្នាជាឯកច្ឆ័ន្ទប្រារព្ធពិធីចាប់ត្រីបឹងត្រពាំងក្រមរបស់យើង ជារៀងរាល់ឆ្នាំនៅក្នុងខែកុម្ភះនេះ រយៈពេល៤ថ្ងៃ និង៣យប់ គឺចាប់ពីថ្ងៃទី ១៥.១៦.១៧ និងថ្ងៃទី១៨ ខែកុម្ភ: នេះតែម្តង ។

នៅពីរថ្ងៃដំបូងគឺថ្ងៃទី១៥.១៦ និងថ្ងៃទី១៧ គឺបងប្អូនបានមកជួបជុំគ្នា ដើរលែងកំសាន្ត ទស្សនាទេសភាពស្ថិតនៅជុំវិញតំបន់់បឹងត្រពាំងក្រម ដែលមានកេរ្តិ៍ ដំណែលពីដូនតាយើង រួមមានៈ ថ្មតាជ្រូក ដីពណ៌ឈាម ក្បាលតាជក តាព្រាម កន្លែងឡស្រា និងស្រះទឹកនាងលើមជាដើម។ ក្រៅពីដើរទស្សនាកំសាន្តពីប្រវត្តិ និងកេរ្តិ៍ដំណែល យ៉ាងជក់ចិត្ត សប្យាយអឺងកង នាពេលថ្ងៃ និងពេលរាត្រី មានកម្មវិធី រាំច្រៀងតាមលក្ខណៈប្រពៃណីខ្មែរផងដែរ។ ហើយបន្ទាប់គឺ នៅថ្ងៃទី១៨ ខែកុម្ភ: នេះគឺជាថ្ងៃបងប្អូនប្រជាពលរដ្ឋយើង ប្រមាណជាង៦ម៉ឺននាក់ មកពីឃុំជាំក្រវៀន ឃុំជាំ ស្រុកមេមត់ ខេត្តត្បូងឃ្មុំ ខេត្តកំពង់ចាម ខេត្តក្រចេះ  ខេត្តព្រៃវែង និងខេត្តស្វាយរៀង បានមកប្រារព្ធពិធីចាប់ត្រី នេះដែរ។

លោកមេឃុំបានបញ្ជាក់ទៀតថា បឹងត្រពាំងក្រំមានទំហំ១០០បួនជ្រុង ចំពោះបងប្អូនប្រជាពលរដ្ឋមកចាប់ត្រីនេះគឺ មានឧបករណ៍របៀបបុរាណរួមមានៈ អង្រុត ឈ្នាង ឆ្នុក ត្រក ទ្រូ លប ។ល។ នៅម៉ោងជាង៩ព្រឹកថ្ងៃទី១៨ នេះដែរ គឺបងប្អូននិងនាំគ្នាចុះចាប់ត្រីរួមគ្នាតែម្តង។ ឆ្នាំនេះត្រីមានដូចជា ត្រីរស់ ត្រីឌៀប  ត្រីក្រាញ់ ត្រីឆ្លូញ ត្រីទួក ត្រីអណ្តែង ត្រីកញ្ចុះ ត្រីកន្ត្រប់ ត្រីតាអោន និងត្រីកំភ្លាញ ។ល។ ហើយ ត្រីមិនសម្បូណ៍ជាងឆ្នាំ២០២០ឆ្ងាយណាស់។ ក្នុង១ឆ្នាំយើងអនុញ្ញាត បើកឱ្យបងប្អូនចាប់បានតែម្តងទេ។ ផុតពីថ្ងៃយើងប្រារព្ធពិធីចាប់ត្រី គឺយើងមានកម្លាំងប្រជាការពារភូមិ និងកម្លាំងប៉ុស្តិ៍ការពារ មិនឱ្យមានការនេសាទដោយយកឧបករណ៍ហាមឃាត់ល្មើសច្បាប់មករកនោះទេ ធ្វើបែបនេះ គឺដើម្បីការពារត្រីបឹងធម្មជាតិរបស់យើង៕SRP

ខេត្តសៀមរាប៖ឯកឧត្តមបណ្ឌិតអ្នកឧកញ៉ា សៀង ណាំ អ្នកតំណាងរាស្រ្តមណ្ឌលសៀមរាប និងឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប បានអញ្ជើញចូលរួមក្នុងពិធីបើកការដ្ឋានស្ថាបនាផ្លូវក្រាលកៅស៊ូ DBST ប្រវែង ២៥ គីឡូម៉ែត្រ ចាប់ពីកំណាត់ ផ្លូវជាតិលេខ៦ ដល់កំណាត់ផ្លូវជាតិលេខ៦៨ ឆ្លងកាត់ចំនួន ០៥ឃុំ រួមមាន ឃុំស្រណាល ឃុំរោងគោ ឃុំស្នួល ឃុំក្រូចគរ និងឃុំសែនសុខ ស្រុកក្រឡាញ់ ខេត្តសៀមរាប ដែលជាអំណោយដ៏ថ្លែថ្លារបស់សម្តេចតេជោ នាយករដ្ឋមន្រ្តី ជូនប្រជាពលរដ្ឋ រស់នៅស្រុកក្រឡាញ់។

ថ្លៃងក្នុងពិធីបើកការដ្ឋាននេះ ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប សូមគោរពថ្លែងអំណរគុណចំពោះអំណោយដ៍ថ្លៃថ្លា របស់ សម្តេចតេជោ តាមរយៈ ឯកឧត្តម អ្នកឧកញ៉ា អ្នកតំណាងរាស្ត្រមណ្ឌលសៀមរាប អភិបាលខេត្ត បានផ្តល់ជូនផ្លូវ១ ខ្សែនេះជូនប្រជាពលរដ្ឋចំនួន ៥ ឃុំ នៃស្រុកក្រឡាញ់ ដែលផ្លូវមួយខ្សែនេះ នឹងចូលរួមកាត់បន្ថយការលំបាករបស់ ប្រជាពលរដ្ឋ ជួយសម្រួលដល់ការធ្វើដំណើរ និងការដឹកជញ្ជូនផ្សេងៗ បានងាយស្រួល ឆាប់រហ័ស និង ចំណាយតិច ដែលកត្តានេះ នឹងរួមចំណែក លើកកម្ពស់ជីវភាពរស់នៅ និង កាត់បន្ថយភាពក្រីក្ររបស់ប្រជាពលរដ្ឋ។

ជាមួយនឹង សមិទ្ធផលនេះ ឯកឧត្តម អ៊ាន ឃុន ក៏បានសូមអំពាវនាវដល់សាធារណជន និង បងប្អូនប្រជាពលរដ្ឋ ដែលរស់នៅតាមបណ្តោយផ្លូវនេះ សូមជួយថែរក្សា និងការពារផ្លូវ នេះឱ្យបានល្អ ដោយត្រូវគោរពច្បាប់ចរាចរណ៍ផ្លូវគោក ឱ្យបានម៉ឺងម៉ាត់ដើម្បីសុវត្ថិភាព និងបញ្ជៀសនូវ ការឆាប់ខូចផ្លូវដោយសារការដឹកជញ្ជូនលើសទំងន់ណាមួយដោយខានតែបាន។

សូមជម្រាបថា ពិធីបើកការដ្ឋាននេះរៀបចំនៅបរិវេណវត្តរតន:មុន្នីរោងគោ ហៅវត្តរោងគោ ស្ថិតនៅភូមិរោងគោ ឃុំរោងគោ ស្រុកក្រឡាញ់ នៅថ្ងៃសៅរ៍ម្សិលមិញ៕SRP

ខេត្តកំពង់ចាម៖លោកហ៊ុន ម៉ានិត បានមានប្រសាសន៍ថា គោលការណ៍របស់សម្តេចតេជោ គឺជំរុញឱ្យមានវប្បធម៌ចែករំលែក ជំរុញឱ្យមានភាពត្រជាក់ត្រជុំ​ ដើម្បីនាំមកនូវការអភិវឌ្ឍរីកចម្រើន ជូនប្រជាពលរដ្ឋ ជាក់ស្តែងដូចថ្ងៃនេះដែលយើងបានបើកការដ្ឋានស្ថាបនាផ្លូវបេតុង ២ខ្សែ ប្រវែង ជាង ១៨គីឡូម៉ែត្រ ពីឃុំព្រែករំដេង ដល់ឃុំបារាយណ៍ និងឃុំព្រែកដំបូក ស្រុកស្រីសន្ធ ដើម្បីបម្រើឱ្យការធ្វើ ដំណើរការផ្លាស់ប្តូរពាណិជ្ជកម្ម និងដឹកកសិផលទៅកាន់ទីផ្សារបស់ប្រជាកសិករ សំដៅជំរុញការ អភិវឌ្ឍន៍សេដ្ឋកិច្ចមូលដ្ឋាន លើកកម្ពស់កម្រិតជីវភាពប្រជាជននៅតាមជនបទ ដើម្បីបង្ខិតជនបទឱ្យ មានជីវភាពប្រហាក់ប្រហែល នឹងទីប្រជុំជនផងដែរ។​

លោក ហ៊ុន ម៉ានិត នាយករងខទ្ទកាល័យសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណចក្រកម្ពុជា និងជាអនុប្រធានទី១ក្រុមការងាររាជរដ្ឋាភិបាលចុះជួយខេត្តកំពង់ចាម អះអាងបែបនេះក្នុងឱកាសអញ្ជើញបើកការដ្ឋានស្ថាបនាផ្លូវបេតុង ២ខ្សែ ប្រវែង ១៨.២៤គីឡូម៉ែត្រ ខ្សែទី១ ប្រវែងជាង១១គីឡូម៉ែត្រ ចាប់ពីឃុំព្រែករំដេង ដល់ឃុំបារាយណ៍ និងខ្សែទី២ ប្រវែងជាង ៧គីឡូម៉ែត្រ ចាប់ពីឃុំព្រែកដំបូក ដល់ឃុំបារាយណ៍ ស្រុកស្រីសន្ធរ ខេត្តកំពង់ចាម នៅថ្ងៃសុក្រម្សិលមិញ។

មានប្រសាសន៍សំណេះសំណាល ក្នុងឱកាសនោះ លោក ហ៊ុន ម៉ានិត បានពាំនាំនូវប្រសាសន៍ផ្តាំ ផ្ញើសាកសួរសុខទុកពីសំណាក់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះលោកយាយ លោកតា បង់ប្អូនប្រជាពលរដ្ឋទាំងអស់ ផងដែរ។

លោក អ៊ុន ចាន់ដា អភិបាលខេត្តកំពង់ចាម បានថ្លែងថា ផ្លូវទាំងពីរខ្សែនេះ ពិតជាមានសារៈសំខាន់ និងបានតភ្ជាប់ឃុំបារាយណ៍ ដែលជាឃុំដាច់ ស្រយាលមួយរបស់ស្រុកស្រី សន្ធរ និងជាសសៃឈាមសេដ្ឋកិច្ចដ៏សំខាន់មួយរបស់ស្រុកស្រីសន្ធរ ក្នុង ការដឹកជញ្ជូនកសិផល របស់ប្រជាកសិករពីផ្នែកខាងក្នុងមកកាន់ទីផ្សា។ ទន្ទឹមនេះ ជាបណ្តាញ​ គមនាគមន៍ដ៏សំខាន់មួយ ភ្ជាប់ទៅកាន់ដែនដីប្រវត្តិសាស្រ្តរបស់កម្ពុជា គឺរាជធានីបុរាណទូលបាសាន សតវត្សទី១៥ ដែលនឹងបង្ខិតរមណីយដ្ឋានប្រវត្តិសាស្ត្រមួយនេះ មកកាន់តែកៀក និងបង្កើនការ ទាក់ទាញទេសចរ ណ៍ជាតិ និងអន្តរជាតិទៅកាន់តំបន់ប្រវត្តិសាស្ត្រនេះបន្ថែមទៀត នៅពេលផ្លូវ ទាំងពីរខ្សែនេះបានស្ថាបនារួច។

អភិបាលខេត្ត បានសង្កត់ធ្ងន់ថា ការ​បោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ កន្លងទៅនេះ បានបង្ហាញច្បាស់ថាប្រជាពលរដ្ឋគាំទ្រសន្តិភាព គាំទ្រការអភិវឌ្ឍ និងគាំទ្រសម្តេចហ៊ុន សែន ដើម្បីបន្តដឹកនាំការអភិវឌ្ឍន៍ និងលើកកម្ពស់កិត្យានុភាពជាតិ ឱ្យស្មើមុខស្មើមាត់ជាមួយបណ្តាប្រទេសនានាក្នុងតំបន់ និងក្នុងពិភពលោកផងដែរ៕SRP