ខេត្តកំពង់ធំ៖ក្រុមការងារចល័តរបស់ក្រសួង ដឹកនាំដោយលោកប្រធានលេខាធិការដ្ឋាន នៃគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំត្រួតពិនិត្យយានយន្តលើសទម្ងន់កម្រិតកំណត់ សហការជាមួយប្រធានមន្ទីរសាធារណការ និងដឹកជញ្ជូនខេត្តកំពង់ធំ និងប្រធានស្ថានីយជញ្ជីងប្រាសាទ ស្ថានីយថ្នលកែង និងស្ថានីយខែលជ័យ

នៅថ្ងៃច័ន្ទ ទី៣១ ខែសីហា ឆ្នាំ២០២០ នៅវេលាម៉ោង ៦ល្ងាច បានចុះត្រួតពិនិត្យយានយន្តដឹកជញ្ជូន នៅឃុំបឹងល្វា ស្រុកសន្ទុក ខេត្តកំពង់ធំ ត្រួតពិនិត្យ ១០គ្រឿង និងឃាត់បានរថយន្តដឹកលើសទម្ងន់ចំនួន ៨គ្រឿង ដែលដឹកលើសទម្ងន់ចាប់ពី ១២តោន ដល់ ២៧តោន។

ក្នុងនោះរថយន្ត ៤គ្រឿងដែលដឹកលើសទម្ងន់កម្រិតកំណត់ចាប់ពី ២០តោនឡើងទៅ នឹងត្រូវរក្សាទុក និងដោះស្រាយដោយអនុលោមតាមច្បាប់ផ្លូវថ្នល់មាត្រា ៦០។

សូមបងប្អូនម្ចាស់អាជីវករ ម្ចាស់រថយន្តដឹកទំនិញ និងបងប្អូនប្រជាពលរដ្ឋទាំងអស់មេត្តាជ្រាបថា ការដឹកជញ្ជូនលើសទម្ងន់កម្រិតកំណត់បានបង្កមហន្តរាយដល់ផ្លូវជាតិ និងគ្រោះថ្នាក់ចរាចរណ៍ធ្ងន់ធ្ងរ ៕SRP

ខេត្តកំពង់ចាម ៖លោក ស្រី សម ផល្លា ប្រធាន មន្ទីរ ព័ត៌មាន ខេត្ត កំពង់ចាម បាន ស្នើ ដល់ ក្រុម អ្នក សារព័ត៌មាន ទាំង វិស័យ ឯកជន និង ស្ថាប័ន រដ្ឋ នៅ ក្នុង ខេត្តកំពង់ចាម រួម សហការ គ្នា ដេីម្បី ធ្វើ ការ ប្រឆាំង ទប់ស្កាត់ រាល់ ព័ត៌មាន ក្លែងក្លាយ ពី គ្រប់ មជ្ឈដ្ឋាន ដែល ក្រុម ជ្រុល និយម មួយ ចំនួន បាន ឆ្លៀត ឱកាស បំពុល សង្គម ឲ្យ ធ្លាក់ ក្នុង សភាព វឹកវរ ។

ការ ស្នើ ឡើង យ៉ាង ដូច្នេះ ក្នុង កិច្ច ប្រជុំ រវាង អ្នក សារព័ត៌មាន មក ពី ស្ថាប័ន ឯកជន និង រដ្ឋ ប្រមាណ ជាង ២០នាក់ កាល ពី រសៀល ថ្ងៃ ទី ៣១ ខែសីហា ឆ្នាំ ២០២០ នៅ មន្ទីរ ព័ត៌មាន ខេត្ត កំពង់ចាម ។

ក្នុង កិច្ច ប្រជុំ នោះ ដែរ លោក ស្រី សម ផល្លា ប្រធាន មន្ទីរ ព័ត៌មាន បាន ធ្វើ ការ ណែនាំ ដល់ អ្នក សារព័ត៌មាន ទាំង អស់ អោយគោរពតាមក្រមសីលធម៌វិជ្ជាជីវៈជាអ្នកសារព័ត៌មាន ដេីម្បី នាំ យកដំណឹង ពី មហាជន ជូនដល់ថ្នាក់ដឹកនាំរាជរដ្ឋាភិបាល និង នាំ យក ដំណឹង ពី រាជរដ្ឋាភិបាល ជូនទៅមហាជនវិញ ប្រកប ដោយ និរន្តភាព ដើម្បីឆ្លើយតបទៅនឹងតម្រូវការបច្ចុប្បន្ន និងអនាគតរបស់ភាគីពាក់ព័ន្ធទាំងអស់។

លោកស្រី ប្រធាន មន្ទីរ បាន បញ្ជាក់ ថា កិច្ច ប្រជុំ នេះ បាន ធ្វើ ឡើង ក្នុង គោលបំណង ដើម្បី បង្កើន ភាព ទំនាក់ទំនង ជិតស្និទ្ធ និង ស្វែងយល់ ពី គ្នា ទៅ វិញ ទៅមក រវាង បងប្អូនជា អ្នក សារព័ត៌មាន វិស័យ ឯកជន និង ស្ថាប័ន រដ្ឋ ធ្វើ យ៉ាងណា យេីង ត្រូវ រួម សហការ គ្នា ហើយ ចងក្រង ជា ក្រុម ដេីម្បី រួមចំណែក បម្រើ វិស័យ ព័ត៌មាន ក្នុង ខេត្តកំពង់ចាម ជាមួយគ្នា អោយកាន់តែមានការរីកចម្រើនទៅមុខទាំងអស់ គ្នា ពោល គឺ ត្រូវ ស្គាល់ ពី ទុក្ខ លំបាក និង ត្រូវ ចេះ ជួយ គ្នា គ្រា ដែលមាន អាសន្ន ។

លោកស្រី ក៏បាន អនុញ្ញាត អោយបង្កើតហ្គ្រុបTelegram ដេីម្បី ងាយស្រួល ក្នុង ការ ទំនាក់ទំនង គ្នា ជា ពិសេស ការ ចែករំលែក ដោះដូរ ព័ត៌មាន គ្នា ទៅវិញ ទៅ មក ក៏ដូចជា ការ ចែករំលែក បទពិសោធន៍ ប្រកប ដោយ ភាព ស្និទ្ធស្នាល ផង ដែរ ៕SRP

ខេត្តសៀមរាប៖អាជ្ញាធរខេត្តសៀមរាបបានអះអាងថាជារៀងរាល់ឆ្នាំរដ្ឋបាលខេត្តសៀមរាបតែងតែបានរៀបចំពិធីកាន់បិណ្ឌ-ភ្ជុំបិណ្ឌ​ នៅតាមទីវត្តអារាមចំនួន ៧វត្ត ដើម្បីធ្វើជាគំរូ និងជាបង្ហាញដល់មន្ត្រីរាជការ និងពុទ្ធសាសនិកជនទាំងអស់ បានយល់ដឹង ចូលរួមប្រតិបត្តិ និងចូលរួមអភិវឌ្ឍ វិស័យព្រះពុទ្ធសាសនាអោយខ្ជាប់ខ្ជួន និងកាន់តែមានភាពរុងរឿងទុកជាកេរដំណែលដល់កូនចៅទៅថ្ងៃអនាគត។
សូមបញ្ជាក់ថាលោក​ ពិន​ ប្រាកដ​ អភិបាលរងខេត្ត​ នៅថ្ងៃច័ន្ទ ៣កេីត​ ខែភទ្របទ​ ឆ្នាំជូត​ ទោស័ក​ ព.ស​ ២៥៦៤​ ត្រូវនឹងថ្ងៃទី៣១​ ខែសីហា​ ឆ្នាំ២០២០​ បានដឹកនាំកិច្ចប្រជុំត្រៀមរៀបចំពិធីបុណ្យកាន់បិណ្ឌ-ភ្ជុំបិណ្ឌ របស់រដ្ឋបាលខេត្តសៀមរាប ដោយមានការចូលរួមពីមន្ត្រីជុំវិញខេត្តផងដែរ។បើតាមអាជ្ញាធរខេត្តសៀមរាបថាឆ្នាំ២០២០នេះ ពិធីបុណ្យកាន់បិណ្ឌ-ភ្ជុំ បិណ្ឌ ប្រារព្ធឡើងចាប់ពីថ្ងៃ០១រោច ខែភទ្របទ ដល់ថ្ងៃ១៥រោច ខែភទ្របទ ឆ្នាំជូត ទោស័កព.ស២៥៦៤ ត្រូវនឹងចាប់ពីថ្ងៃពុធ ទី០៣ ខែកញ្ញាដល់ថ្ងៃទី១៧ ខែកញ្ញា ឆ្នាំ២០២០​៕SRP

ខេត្តសៀមរាប៖ជនជាតិបរទេសចំនួនពីរនាក់ត្រូវបានកម្លាំងការិយាល័យស៊ើបអង្កេតនិងអនុវត្តនីតិវិធី សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំឃាត់ខ្លួន នៅវេលាម៉ោង ០៩និង៣០នាទីព្រឹកថ្ងៃទី៣១ ខែសីហា ឆ្នាំ២០២០ចំណុចបន្ទប់ជួល ស្ថិតនៅភូមិ ស្វាយព្រៃ សង្កាត់ស្វាយដង្គំ ក្រុងសៀមរាប។ នគរបាលបានដឹងថាជនបរទេសទាំងពីរនាក់ ពាក់ព័ន្ធករណីស្នាក់នៅខុសច្បាប់(គ្មានលិខិតឆ្លងដែន)។
ជនបរទេសទាំងពីរនាក់នេះមានឈ្មោះ ៖

១-VOLODYMYR BEHAL ភេទប្រុស កើតឆ្នាំ១៩៨៤ ជនជាតិ អ៊ុយក្រែន គ្មានលិខិតឆ្លងដែនជាប់ខ្លួន មុខរបរ បម្រើការងារតាមប្រព័ន្ធអុិនធើណិត ចូលមកព្រះរាជាណាចក្រកម្ពុជា កាលពីឆ្នាំ២០១៧ តាមច្រកទ្វារព្រំដែនអន្តរជាតិប៉ោយប៉ែត ស្នាក់នៅខេត្តព្រះសីហនុ។នៅថ្ងៃទី ០៧-០៦-២០១៩ ត្រូវបានសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ននៅពន្ធនាគារព្រៃស នឹងសម្រេចផ្តន្ទាទោសដាក់ពន្ធនាគារកំណត់ចំនួន ០១ឆ្នាំ ពីបទ អំពើលួចនិងចូលមកព្រះរាជាណាចក្រកម្ពុជាដោយគ្មានការអនុញ្ញាតិ។ក្រោយពីអនុវត្តទោសចប់ បានធ្វើដំណើរទៅកាន់ខេត្តព្រះសីហនុដើម្បីរកលិខិតឆ្លងដែន តែរកមិនឃើញ រហូតដល់ថ្ងៃទី០១-០៨-២០២០ ក៍ធ្វើដំណើរមកកាន់ខេត្តសៀមរាបតែម្តង។

២-SERGY PODOSYN ភេទប្រុស កើតថ្ងៃទី២៧-១២-១៩៦២ ជនជាតិរុស្សុី គ្មានលិខិតឆ្លងដែនជាប់ខ្លួន គ្មានមុខរបរ ចូលមកព្រះរាជាណាចក្រកម្ពុជាកាលពីឆ្នាំ២០១៧ តាមច្រកមិនចាំ ដោយធ្វើដំណើរពីប្រទេសថៃ មកស្នាក់នៅខេត្តព្រះសីហនុ រហូតដល់ខែមិថុនា ឆ្នាំ២០២០ ក៏បានផ្លាស់មកស្នាក់នៅខេត្តសៀមរាប។កាលពីខែកក្កដា ឆ្នាំ២០២០ បានប្រគល់លិខិតឆ្លងដែនឲ្យទៅបុរសជនជាតិខ្មែរម្នាក់មិនស្គាល់ឈ្មោះ យកទៅបន្តសុពលភាពទិដ្ឋាការស្នាក់នៅ ប៉ុន្តែរហូតមកដល់ពេលនេះពុំទាន់ទទួលបានលិខិតឆ្លងដែនវិញទេ ហើយក៏មិនអាចទំនាក់ទំនងទៅបុរសនោះបានដែរ។បញ្ជូនទៅស្នាក់ការត្រៀមបណ្តេញចេញចាត់ការបន្តតាមនីតិវិធី៕SRP

ខេត្តព្រៃវែង៖ពលរដ្ឋជិត៥០នាក់នៅព្រឹកថ្ងៃទី៣១ ខែសីហា ឆ្នាំ២០២០នេះបាននាំគ្នាមកដល់សាលាស្រុកកំចាយមា ដោយសុំអោយដូរអាចារ្យ ចេញពីវត្តត្រពាំងស្គន់ ហៅស្គន់ធិរាម។

ពលរដ្ឋខាងលើបានប្រាប់ដល់អ្នកសារព័ត៌មានថា មូលហេតុដែលពួកគាត់មកទីនេះគឺមកស្នើសុំដល់លោក សឿន សុជាតិ អភិបាលស្រុកកំចាយមា ជួយដោះស្រាយរឿង របស់ពួកគាត់ដែលកើតឡើងរយ:ពេល៦ឆ្នាំមកហើយ នៅតែដោះស្រាយមិនចេញ ទើបសម្រេចចិត្តនាំគ្នាមកដល់សាលាស្រុក។

ប្រជាពលរដ្ឋ រស់នៅក្នុងភូមិត្រពាំងស្គន់ ឃុំស្មោងខាងជើង ស្រុកកំចាយមា ខេត្តព្រៃវែង បានអោយដឹងថា ពួកគាត់មកនេះគឺសុំអោយដូរអាចារ្យសព្វថ្ងៃនេះចេញ និងសុំអោយអាចារ្យចាស់ចូលវិញ ព្រោះអាចារ្យសព្វថ្ងៃនេះ ឃើញតែរៃអង្គាសសឹងតែរាល់ថ្ងៃហើយក៏មានជំពាក់បំណុលគេច្រើន អាចារ្យខ្លះទៀតប្រព្រឹត្តល្បែងស៊ីសង ទើបវត្តអារាមមួយនេះមិនមានការរីកចម្រើន។
ពលរដ្ឋបានលើកឡើងទៀតថាព្រះគ្រូចៅអធិការវត្តព្រះនាម វង្ស ពិសិដ្ឋ ដែលមានតួនាទីជាគ្រូចៅអធិការវត្តផងនឹងជាព្រះគ្រូអនុណស្រុកផងសង្ស័យ ឃុបឃិតគ្នារើសយកតែគ្នាឯង។

ពលរដ្ឋបន្ថែមទៀតថាករណីនេះកាលពីថ្ងៃទី២៦ ខែសីហា ឆ្នាំ២០២០កន្លងទៅថ្មីៗក៏មានការយល់ព្រមរំលាយអាចារ្យចោល និងរើសអាចារ្យថ្មីដោយមានឯកភាពពីព្រះគ្រូចៅអធិការ វង្ស ពិសិទ្ឋ ព្រះអនុគុណស្រុក ដែលជាព្រះគ្រូចៅអធិការសព្វថ្ងៃនេះដែរ។ ប៉ុន្តែរហូតដល់បច្ចុប្បន្នមិនទាន់មានការផ្លាស់ប្ដូរនៅឡើទេ។

ពាក់ព័ន្ធករណីខាងលើនេះ លោក សឿន សុជាតិ អភិបាលស្រុកកំចាយមា បានលើកឡើងនៅចំពោះមុខ ប្រជាពលរដ្ឋថាលោកទទួលយកសំណើរមួយនេះនឹងដឹកនាំក្រុមប្រឹក្សាស្រុកក៏ដូចជាមន្ត្រីធម្មការចុះទៅដោះស្រាយ។
បើតាមអភិបាលស្រុកបញ្ជាក់ថានឹងទៅដោះស្រាយនៅរសៀលថ្ងៃទី៣១ ខែសីហា ឆ្នាំ២០២០ នេះនៅវត្តត្រពាំងស្គន់ធិរាមនេះតែម្តង តែឥឡូវនេះសុំប្រជាពលរដ្ឋ ត្រឡប់ទៅវិញសិន។

សូមបញ្ជាក់ថានៅរសៀលថ្ងៃនេះ ពលរដ្ឋបានទូរស័ព្ទ ប្រាប់ភ្នាក់ងារសារព័ត៌មានថា ឥឡូវនេះលោកគ្រូចៅអធិការ ក៏កំពុងតែនាំគ្នាផ្តិតមេដៃដែរ តែអ្នកមកផ្តិតមេដៃនោះភាគច្រើនអ្នកមកពីចំងាយមិនមែនអ្នកនៅស្រុកភូមិនេះទេ។
ទោះយ៉ាងណាពួកគាត់សុំសំណូមដល់លោកអភិបាលស្រុកមេត្តាជួយដោះស្រាយរឿងនេះដល់ពួកគាត់ផងពុំដូច្នេះទេពួកគាត់នៅតែបន្តតវ៉ាទៅមុខទៀតជាក់ជាមិនខានឡើយ៕SRP

ខេត្តកំពង់ធំ៖ក្មេងប្រុសពីរនាក់ចុះងូតទឹកអូរ បណ្ដាលអោយលង់ស្លាប់យ៉ាងអាណោចអាធ័ម ពេលទៅតាមម្តាយច្រូតស្មៅនិងជីកដំឡូងជ្រូក ដោយម្ដាយស្រែកយំអោប សពកូនស្ទើគាំងបេះដូង។

ហេតុការណ៍បានកើតឡើងនៅម៉ោង១៣និង៣០នាទីរសៀលថ្ងៃទី៣០សីហាឆ្នាំ២០២០ចំណុចអូរកប់ឆ្កែ ភូមិសាស្រ្ត ភូមិសុភមង្គល ឃុំក្រយា ស្រុកសន្ទុក ខេត្តកំពង់ធំ។

ជនរងគ្រោះទី១ឈ្មោះសុខ ខែត អាយុ១០ឆ្នាំត្រូវជាបង។ ទី២ឈ្មោះសុខ ខុនអាយុ៧ឆ្នាំ។

សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះទាំង២នាក់បានតាមម្តាយទៅច្រូតស្មៅ ដោយម្តាយកំពុងតែច្រូត ហើយឆ្លៀតទៅជីកដំឡូងជ្រូកដើម្បីស្ងោហូប ពេលចេញមករកកូន ស្រាប់តែប្រទះឃើញកូនទាំងពីរនាក់លង់ទឹកអូរស្លាប់ទៅហើយ។ ដោយអោបគ្នារមីរមូសន្និដ្ឋាន ប្អូនលង់ទឹកមុនបងចុះជួយ បានជាស្រវេស្រវ៉ាស្លាប់ទាំងពីរ។

សមត្ថកិច្ចបានបញ្ជាក់ថាក្រោយពិនិត្យគឺ

ក្មេងប្រុសទាំង២នាក់ ពិតបានលង់ទឹកស្លាប់ដោយខ្លួនឯងប្រាកដមែន និងប្រគល់អោយឪពុកម្តាយយកទៅធ្វើបុណ្យតាមប្រពៃណី៕SRPអ៊ុងសំអាត

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម អះអាងថាប្រសិនបើអាជ្ញាធរ សមត្ថកិច្ច នៅតែបណ្ដែតបណ្ដោយ មិនចុះធ្វើការរៀបចំសណ្ដាប់ធ្នាប់នៅតាមទីប្រជុំជនជនក្នុងដែនសមត្ថកិច្ចរបស់ខ្លួន រហូតបណ្ដាលឲ្យមានការកកស្ទះ និងបង្កអោយមានភាពអនាធិបតេយ្យកើតឡើង គឺជាកំហុសមួយយ៉ាងធ្ងន់ធ្ងរ មិន ខាន តែទោះជា យ៉ាងណា ពេល នេះ យេីង បាន ធ្វេី ការ ងារ នេះ សម្រេចបាន ជោគជ័យ ហើយ។

អភិបាលខេត្តបញ្ជាក់យ៉ាងដូច្នេះនៅសាលាឃុំផ្អាវ ក្នុងពេលអញ្ជើញជួបសំណេះសំណាល និង ឧបត្ថម្ភជា ថវិកា មួយ ចំនួន ដល់សមត្ថកិច្ចចម្រុះ បន្ទាប់ ពី រៀបចំសណ្ដាប់ធ្នាប់ នៅ តំបន់ ទីប្រជុំជនផ្សារផ្អាវ។

បើតាម លោក ផេន សុផល អភិបាល ស្រុក បាធាយ បានអោយដឹងថាអាជ្ញាធរ ខេត្តកំពង់ចាម បានប្រគល់កិច្ចការរៀបចំសណ្ដាប់ធ្នាប់ ទីប្រជុំជនផ្សារផ្អាវ អោយមកអាជ្ញាធរស្រុកបាធាយ ជាអ្នកធ្វើបន្ត។លោកថា ការរៀបចំសណ្ដាប់ធ្នាប់ទីប្រជុំជនផ្សារផ្អាវនេះ បានប្រព្រឹត្តទៅដោយរលូនក្នុងរយ:ពេល៣៣ថ្ងៃ ដោយក្នុងប្រតិបត្តិការ ប្រជាពលរដ្ឋ នៅតាមអមសងខាងផ្លូវ នៃទីប្រជុំជនផ្សារមានការសហការល្អជាមួយនឹងអាជ្ញាធរ ពេលចុះធ្វើការឈូសឆាយរៀបចំសម្អាតដីចំណី។

អភិបាលស្រុកបាធាយ បញ្ជាក់ថានឹងរៀបចំបង្កើតគណៈកម្មការ និងមិនអនុញ្ញាត អោយអាជីវករលក់ដូរលើចិញ្ចើមផ្លូវ ដែលហួសគំនូស ដែលបានកំណត់ឡើយ។ ប្រសិនពលរដ្ឋ ចង់សាងសង់ ចាក់សាបឬកែសោភ័ណភាព មុខផ្ទះរបស់ខ្លួន ត្រូវរង់ចាំគណៈកម្មការបច្ចេកទេស មកត្រួតពិនិត្យ ទើបសាងសង់បាន៕SRP

ខេត្តបាត់ដំបង៖សេចក្តីរាយការណ៍ថាស្ត្រីម្នាក់បានស្លាប់ក្រោយពេលបញ្ជូនទៅដល់មន្ទីរពេទ្យបន្ទាប់ពីបើកម៉ូតូត្រូវបានរថយន្តបុកចំពេញទំហឹង។

ហេតុការណ៍បានកើតឡើងនៅព្រឹក ថ្ងៃទី៣០ខែ សីហាឆ្នាំ២០២០ នៅត្រង់ចំណុចក្រុមទី៣១ ភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។

សមត្ថកិច្ចបានឲ្យដឹងថារថយន្តម៉ាកហុីយិនដាយពណ៌ខៀវ ពាក់ស្លាកលេខភ្នំពេញ ៣B៧៤៣០ បើកបរ​ទិសដៅពីជើងទៅត្បូង បានបុកម៉ូតូម៉ាកហ្វីណូ ពណ៌ក្រហម ពាក់ស្លាកលេខភ្នំពេញ១Z៦១៣១។ មូលហេតុ ស្ត្រីរងគ្រោះបានជិះម៉ូតូឆ្លងកាត់ថ្នល់ផ្លូវលំឡើងមកផ្លូវកៅស៊ូ(ពីលិចទៅកើត) មិនមានការប្រុងប្រយ័ត្នលុះពេលឡើងដល់ថ្នល់ ក៏ត្រូវរថយន្តបុកតែម្ដង។ ស្ត្រីជាជនរងគ្រោះឈ្មោះគីរី សន្យា អាយុ៣៥ឆ្នាំ មុខរបរលក់ដូរ មានទីលំនៅភូមិវត្តតាមឹម ឃុំអូរដំបង១ ស្រុកសង្កែ ខេត្តបាត់ដំបង។ ចំណែកតៃកុងរថយន្តចុះរត់គេចខ្លួនបាត់។

បើតាមសមត្ថកិច្ចថាក្រោយកើតហេតុបានចុះវាស់វែងនិងយកម៉ូតូនិងរថយន្តទៅរក្សាទុកនៅអធិការនគរបាលស្រុកសង្កែរដើម្បីរង់ចាំការដោះស្រាយ។ ដោយឡែកសាកសពត្រូវបានប្រគល់អោយក្រុមគ្រួសារយកធ្វើបុណ្យតាមប្រពៃណី៕SRPដោយប៊ុន ថេត

ខេត្តសៀមរាប៖បុរសម្នាក់ត្រូវបានឃាត់ខ្លួនក្រោយធ្វើសកម្មភាពកាប់ប្រហារ ទៅលើឪពុកចុងរបស់ខ្លួន។

ការឃាត់ខ្លួនធ្វើនៅម៉ោង០៩និង០៦នាទីយប់ថ្ងៃទី២៩ខែសីហាម្សិលមិញស្ថិតនៅភូមិទក្សិណត្បូង សង្កាត់គោកចក ក្រុងសៀមរាប បន្ទាប់ពីកើតហេតុ។

ជនសង្ស័យឈ្មោះ ព្រំ កក្កដា ភេទប្រុស អាយុ ២៧ឆ្នាំរស់នៅ ភូមិទក្សិណត្បូង សង្កាត់គោកចក ក្រុងសៀមរាប។

លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌ ស្នងការខេត្តសៀមរាប បានអោយដឹងថាបុរសរូបនេះបានយកកំាបិតប៉ឹងតោ កាប់ទៅលើជនរងគ្រោះ ឈ្មោះ ភឿក ភឿង ហៅ សេងទ្រី ភេទប្រុស ស្ថិតភូមិគ្រួស សង្កាត់ស្វាយសង្គំ ក្រុងសៀមរាបនៅចំណុចតូបលក់ដូរមួយកន្លែង ខណៈជនរងគ្រោះកំពុងអង្គុយមិនដឹងខ្លួន នៅវេលាម៉ោង៦និង១០នាទីល្ងាចថ្ងៃទី២៩ខែសីហាឆ្នាំ២០២០ បណ្តាលឲ្យរងរបួសក្បាលចំនួន៣កន្លែង (លើថ្ងាស១កន្លែង, ក្បាលផ្នែកខាងក្រោយ១កន្លែង និង លើត្រជៀកខាងឆ្វេង) និង ដាច់ទងស្លឹកត្រជៀកផ្នែកខាងឆ្វេង។

បុរសរូបនេះបានសារភាពថា ខ្លួនត្រូវជាកូនចុងរបស់ជនរងគ្រោះ ដោយខ្លួនធ្លាប់មានទំនាស់តាំងពីរូបគេមានអាយុ១២ឆ្នាំ។ កន្លងមកទំនាស់របស់ពួកខ្លួនទាំងពីរឈានដល់ការប្រើអំពើហិង្សាចំនួន២លើកផងដែរ។

ជនសង្ស័យបន្តថានៅល្ងាចថ្ងៃទី២៩ខែសីហាឆ្នាំ២០២០ វេលាម៉ោង១៧និង៣០នាទី ខ្លួនមានអាការៈឈឺក្បាលក៏ប្រើក្មួយបង្កើតរបស់ខ្លួនឲ្យប្រាប់បងស្រី ឈ្មោះ ព្រំ ស្រីហ៊ុន ដែលកំពុងលក់ដូរនៅឯកតូបរបស់ឪពុកចុង និងម្តាយបង្កើត មួយសន្ទុះក្រោយមកក្មួយបានត្រឡប់មកវិញថា ជីតាឈ្មោះ ភឿក ភឿង (ត្រូវជាឪពុកចុងខ្លួន) បានស្តីបន្ទោសអោយពួកគេខ្លាំងៗ មិនតែប៉ុណ្ណោះមិនអោយថ្នាំមកទេ ធ្វើអោយខ្លួនខឹងសម្បាជាខ្លាំង គួបផ្សំធ្លាប់មានទំនាស់ ក៏ទៅកាប់ជនរងគ្រោះតែម្តង។ ពាក់ព័ន្ធករណីនេះជនសង្ស័យត្រូវបានបញ្ជូនទៅតុលាការដើម្បីអនុវត្តតាមផ្លូវច្បាប់៕SRP