ខេត្តសៀមរាប៖បុរសចំនួន៥នាក់ត្រូវបានកម្លាំងអាវុធហត្ថស្រុកជីក្រែងចាប់ខ្លួន ពាក់ព័ន្ធចាត់ចែងចែកចាយ រក្សាទុកប្រើប្រាស់សារធាតុញៀនខុសច្បាប់។

ការចាប់ខ្លួនធ្វើឡើងវេលាម៉ោង០៨និង៣០នាទីថ្ងៃទី០៦ ខែមីនា ឆ្នាំ២០២១ នៅចំណុចព្រៃស្វាយ ភូមិពន្លឺព្រះផុស ឃុំកំពង់ក្ដី ស្រុកជីក្រែង។

ជនសង្ស័យ៖
១ ឈ្មោះ ប៊ុន លន អាយុ៣៦ឆ្នាំ មានទីលំនៅភូមិពន្លឺព្រះផុស ឃុំកំពង់ក្ដី ស្រុកជីក្រែង ខេត្តសៀមរាប។
២ ឈ្មោះ ស៊ាប ធារ៉ា អាយុ២៨ឆ្នាំមានទីលំនៅភូមិអូរលើ ឃុំស្ពានត្នោត ស្រុកជីក្រែង ខេត្តសៀមរាប។
៣ ឈ្មោះ ឡន លាប(ហៅម៉ៅ) អាយុ២២ឆ្នាំ នៅទីលំនៅភូមិសំរោងធំ ឃុំអន្លង់សំណរស្រុកជីក្រែង ខេត្តសៀមរាប។
៤ ឈ្មោះចាន់ ជា(ហៅតឹង) អាយុ៣០ឆ្នាំមានទីលំនៅភូមិសំរោងធំ ឃុំអន្លង់សំណរ ស្រុកជីក្រែង ខេត្តសៀមរាប។
៥ ឈ្មោះធឿន សុភា អាយុ២៦ឆ្នាំ មានទីលំនៅភូមិកំពង់ស្នោខាងកើត ឃុំជីក្រែង ស្រុកជីក្រែង ខេត្តសៀមរាប។
ករណីសមត្ថកិច្ចដកហូត
វត្ថុតាងរួមមាន៖ ម្សៅក្រាមសថ្លាចំនួន៣កញ្ចប់ ទូរស័ព្ទចំនួន៤គ្រឿង នឹង
បញ្ជូនទៅការិយាល័យប្រឆាំងគ្រឿងញៀន អាវុធហត្ថខេត្តសៀមរាប ដើម្បី អនុវត្តតាមផ្លូវច្បាប់៕SRP

ខេត្តសៀមរាប៖សេចក្ដីរាយការណ៍បានឲ្យដឹងថាបុរសម្នាក់ បើកម៉ូតូដួលបោកក្បាល ស្លាប់ភ្លាមៗ។

ហេតុការណ៍បានកើតឡើង នៅវេលាម៉ោង១០ និង៤៥ នាទី ថ្ងៃទី០៦ ខែមីនា ឆ្នាំ២០២១ នៅចំណុភូមិស្ពានក្អែក ឃុំកណ្ដែក ស្រុកប្រាសាទបាគង។

សមត្ថកិច្ចស្រុកប្រាសាទបាគងបានរាយការណ៍ថា ជនរងគ្រោះ ឈ្មោះ ជៀប ជួន អាយុ៤៧ឆ្នាំ មុខរបរធ្វើស្រែ រស់នៅភូមិឃុំកើតហេតុខាងលើ ជិះម៉ូតូម៉ាកហុងដា២០១២ ពណ៌ខ្មៅស្លាកលេខបាត់ដំបង១K៦២០៤។

បើតាមសមត្ថកិច្ចបញ្ជាក់ថា មូលហេតុស្រវឹងស្រា ហើយជនរងគ្រោះ មិនសូវចេះបើកម៉ូតូនោះទេ៕SRP

ខេត្តសៀមរាប៖ពលរដ្ឋម្នាក់ នៅភូមិរលួសខាងកើត ឃុំរលួស ស្រុកប្រាសាទបាគង ខេត្តសៀមរាប លោក ចាប សូវៀត នៅថ្ងៃសៅរិ៍ទី០៦ ខែមីនា ឆ្នាំ២០២១ នេះបានទទួលផ្ទះមួយខ្នងទំហំ៤គុណ៥ធ្វើពីអំពីឈើប្រក់ស័ង្កសី ពីអង្គការគោសប្បុរសដើម្បីកម្ពុជា។

នាយកប្រតិបត្តិអង្គការគោសប្បុរសដើម្បីកម្ពុជា(Cows for Cambo dia) លោក ចាន់ វិចិត្រ បានឱ្យដឹងថា បន្ទាប់ពីក្រុមការងាររបស់អង្គការគោសប្បុរសដើម្បីកម្ពុជា បានចុះមកឃើញស្ថានភាពគ្រួសារគាត់ មានការលំបាកគ្មានដីគ្មានផ្ទះសម្រាប់ នៅដោយសុំដីគេចងតង់សម្រាប់នៅបណ្តោះអាសន្ននោះ អង្គការគោសប្បុរសដើម្បីកម្ពុជា ក៏បានសម្រេចទិញដី និងធ្វើផ្ទះជូនគ្រួសារគាត់ដែលជាផ្ទះទី២៤។ ហើយសម្រាក់ការចំណាយទាំងអស់ទាំងការចាក់ដី និងការសាងសង់ គឺខាងអង្គការជាអ្នកចំណាយទាំងអស់។

លោកបញ្ជាក់ថា អង្គរគោសប្បុរសដើម្បីកម្ពុជា បានធ្វើសកម្មភាពមនុស្សធម៌ ជាច្រើនដូចជាការជួយធ្វើផ្ទះ ចែកអង្ករ និងការចិញ្ចឹមសត្វគោ និងសត្វពពែរ គឺក្នុងន័យមនុស្សធម៌ ជួយដល់ប្រជាពលរដ្ឋ ដែលជួបការខ្វះខាត តាមរយៈឱ្យប្រជាពលរដ្ឋ ខ្ចីសត្វគោយកទៅចិញ្ចឹម យកកូនធ្វើពូជបន្ត មានន័យថា អង្គការផ្តល់មេគោ ទៅឱ្យប្រជាពលរដ្ឋចិញ្ចឹម ពេលបានកូនមួយ អង្គការយកមេគោមកវិញ ដោយទុកកូនគោឱ្យប្រជាពលរដ្ឋធ្វើពូជ។ លោកបានបន្តថា ចំពោះសត្វពពែរបើប្រជាពលរដ្ឋណាដែលមានដីទំនេរ ហើយចង់ចិញ្ចឹាមសត្វពពែរ គឺខាងអង្គការនិងផ្តល់ជូនដូចគ្នាដែរ។

បើតាមលោក ប្លោក ចាម ជំទប់ទី១ឃុំរលួស ខេត្តសៀមរាប បានឱ្យដឹងដែរថា គ្រួសារ លោក ចាប សូវៀត ពិតជាមានស្ថានភាពក្រីក្រមែនកន្លងមកនេះ អាជ្ញាធរឃុំតែងតែជួយដល់គ្រួសារគាត់ជាបន្តបន្ទាប់។ ហើយគ្រួសារនេះ ក៏បានទទួលបានប្រាក់ឧបត្ថម្ភ ពីរាជរដ្ឋាភិបាល នៅក្នុងអំឡុងនៃការជួបវិបត្តិកូវិដផងដែរ។
លោកក៏បានកោតសរសើរ ដល់អង្កការគោសប្បុរសដើម្បីកម្ពុជា ដែលបានជួយដល់ប្រជាពលរដ្ឋ ចំគោលដៅដែលពួកគាត់កំពុងមានតម្រូវការចាំបាច់។

លោក ចាប សូវៀត បានថ្លែងអំណរគុណដល់អាជ្ញាធរនិងអង្គការ ដែលបានជួយដល់គ្រួសារលោកនៅពេលនេះ ជួយឱ្យគាត់មានដីមានផ្ទះរស់នៅសមរម្យនិងគេ៕SRP

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថា សិស្សរៀននៅវិទ្យាល័យសំរោង ជិត៥០នាក់ ស្រែកយំ និងដួលសន្លប់ ជាបន្តបន្ទាប់។

ហេតុការណ៍បានកើតឡើងវេលាម៉ោង០៩ព្រឹកថ្ងៃទី០៦ ខែមីនា ឆ្នាំ២០២១ នេះស្ថិតនៅវិទ្យាល័យសំរោង ស្ថិតនៅភូមិសំរោងត្បូង ឃុំរោង ស្រុកសូទ្រនិគម ខេត្តសៀមរាប។

អាជ្ញាធរស្រុកសូទ្រនិគមបានរាយការណ៍ថាករណីនេះគឺមានសិស្សស្រីចំនួន៤៩នាក់ បានស្រែកយំ និងដួលសន្លប់ ជាបន្តបន្ទាប់ត្រូវបានដឹកទៅជួយសង្គ្រោះ នៅមន្ទីរពេទ្យបង្អែកស្រុកសូទ្រនិគម និងមណ្ឌលសុខភាពសំរោង។

ទោះជាយ៉ាងណាអាជ្ញាធរបានបញ្ជាក់ថា បច្ចុប្បន្នសិស្ស ទាំងនោះ មានអាការ: ធូស្បើយវិញហើយ។ ដោយគ្រូពេទ្យបានពិនិត្យ ថាពុំមានរោគសញ្ញាអ្វីឡើយ។មូលហេតុ សង្ស័យពាក់ព័ន្ធ និងរឿងអបិយជំនឿ ហើយខាងសាលាកំពុងធ្វើពិធីសែនប្រគេនផងដែរ៕SRP

ខេត្តត្បូងឃ្មុំ៖មានការលើកឡើងថាគយនិងរដ្ឋាករដូង បានគាបយកលុយពីអាជីវករខ្មែរ ដែលបានដឹកផ្លែស្វាយ ទៅលក់នៅប្រទេសវៀតណាម តាមតែអំពើចិត្ត ករណីនេះធ្វើឲ្យមានការរិះគន់យ៉ាងខ្លាំងពីក្រុមអាជីវករ។

ប្រភពពីអាជីវករបានប្រាប់អ្នកសារព័ត៌មានថា មន្ត្រីគយនិងរដ្ឋាករដូង«ហៅដូង៧ដើម»ស្រុកមេមត់ ខេត្តត្បូងឃ្មុំ ជាប់ព្រំដែនវៀតណាម បានតម្រូវឲ្យពួកគាត់បង់លុយយ៉ាងច្រើន ជាថ្នូរនិងការអនុញ្ញាតឱ្យដឹកទំនិញចេញចូលពីវៀតណាម មកខ្មែរនិងពីខ្មែរទៅវៀតណាម តាមច្រកទ្វារព្រំដែនមួយនេះ ដោយមិនមានការចេញវិក្កយបត្រ នោះទេ។

ក្រុមអាជីវករបានបន្តថាការដឹកផ្លែស្វាយកែវរមៀត ទៅលក់នៅវៀតណាម តាមច្រកទ្វារព្រំដែនដូង៧ដើម ពិតជាពិបាករកស៊ីណាស់ ដោយមិនសូវបានចំណេញទេ ព្រោះផ្លែស្វាយធ្លាក់ថ្លៃខ្លាំង ចាប់តាំងពី១គីឡូក្រាម ១ពាន់រៀលចុះមកនៅត្រឹម២រយរៀលប៉ុណ្ណោះ។ ពួកគាត់ថាផ្លែស្វាយធ្លាក់ថ្លៃ ជាបន្ទុកមួយទៅហើយសម្រាប់កសិករនិងពួកខ្លួនជាអាជីវករ អ្នកដឹកជញ្ជូន ប៉ុន្តែអ្វីដែលកាន់តែលំបាកនោះ គឺមន្ត្រីការិយាល័យគយនិងរដ្ឋាករដូង គាបយកលុយពីពួកខ្លួនគ្មានបន្ធូរដៃនោះឡើយ។ ដោយរថយន្តប្រភេទភ្លៅបីដឹកផ្លែស្វាយ១ឡាន ត្រូវបានមន្ត្រីគយ កំណត់យកលុយពីខ្លួនចំនួន៣២ម៉ឺន.រថយន្តចំណុះ៥តោន១ឡាន ត្រូវបង់ឱ្យគយចំនួន២៥ម៉ឺនរៀល .រថយន្តចំណុះ២តោនកន្លះ ត្រូវបង់ចំនួន១៦ម៉ឺនជាកំហិត ដោយមន្ត្រីគយថា យកលុយទាំងនេះ ទៅចែកគ្នាជាមួយ.ស្នាក់ការនិងនគរបាលការពារព្រំដែន ពុំមែនយកតែមួយស្ថាប័នរបស់ខ្លួននោះទេ។

ចំណែកអាជីវករ ដឹកដំឡូងមី ទៅលក់ឱ្យឈ្មួញវៀតណាម ដឹក១ឡាន បង់លុយឱ្យមន្ត្រីគយដូងចំនួន១២៥.០០០រៀល យ៉ាងទៀងទាត់ ប៉ុន្តែមន្ត្រីនៅទីនោះ មិនយកលុយពីពួកខ្លួនផ្ទាល់ដៃឡើយ ដោយតម្រូវឱ្យមេការជាអ្នកកំណត់យកលុយ ពោលគឺមន្ត្រីប្រើយុទ្ធសាស្ត្រ ខ្ចីដៃមេការប្រើ ទើបអាចបន្តដំណើរឆ្លងដែន ទៅលក់ដំឡូង ឱ្យឈ្មួញវៀតណាមបាន។

បើតាមអាជីវករបានលើកឡើងថា ក្នុងមួយថ្ងៃៗ មានរថយន្តដឹកដំឡូងមី ចាប់ពី២០០ឡាន ទៅ៣០០ឯណោះ ដែលត្រូវឆ្លងកាត់តាម«ច្រកទ្វារព្រំដែនទ្វេភាគីដារ(ហៅគយដូង៧ដើម)»ដើម្បីយកដំឡូងមី ទៅលក់ឱ្យឈ្មួញវៀតណាម ដូច្នោះគយអាចរកលុយបានរាប់រយលានរៀលក្នុងមួយថ្ងៃៗ។

ដោយឡែកថយន្តដឹកទំនិញគ្រឿងជ័រ ឬទំនិញចាបហួយពីវៀតណាម មកលក់នៅខ្មែរ ត្រូវបានមន្ត្រីគយតម្រូវឲ្យបានបង់លុយជាប្រចាំខែ ទើបអាចរកស៊ីដឹកទំនិញបាននៅច្រកមួយនេះ។ ករណីតាមរយ:«បណ្ដាញសៀមរាបប៉ុស្ដិ៍» ក្រុមអាជីវករ សុំសំណូមពរដល់សួងពាក់ព័ន្ធ មេត្តាជួយពិនិត្យមើលគយនិងរដ្ឋាករដូងផង ពួកគាត់មានការលំបាកខ្លាំងណាស់។

ជុំវិញការចោទប្រកាន់នេះ «បណ្ដាញសៀមរាបប៉ុស្ដិ៍» នៅមិនទាន់ទទួលបានការបកស្រាយបំភ្លឺពីការិយាល័យគយនិងរដ្ឋាករដូង នៅឡើយទេ ដោយមិនមានលេខទំនាក់ទំនង៕SRP

ខេត្តសៀមរាប៖លោក គឹម សុធិន អគ្គនាយករងអាជ្ញាធរជាតិអប្សរា រួមទាំងសហការី និងមន្ត្រីមន្ទីរវប្បធម៌ និងវិចិត្រសិល្បៈខេត្តសៀមរាប អាជ្ញាធរមូលដ្ឋាន បានប្រជុំផ្សព្វផ្សាយ ដល់ប្រជាពលរដ្ឋ ប្រកបអាជីវកម្មដុតឥដ្ឋ និងក្បឿង បញ្ឈប់ការកាយ យកអាចម៍ដី ពីទំនប់ព្រែក។

កិច្ចប្រជុំធ្វើនៅសាលាឃុំដានរុន ស្រុកសូទ្រនិគម នាថ្ងៃទី០៤ ខែមីនា ម្សិលមិញ ក្នុងគោលបំណងអប់រំ និងផ្សព្វផ្សាយដល់ប្រជាពលរដ្ឋ ចំនួន១១គ្រួសារ មានអាជីវកម្ម ដុតឥដ្ឋនៅលើខ្នងទំនប់ព្រែកស្រមោច ឬហៅថាផ្លូវសំពៅ ដែលជាទំនប់បុរាណ មានប្រភពពីជើងភ្នំគូលែន ដល់បឹងទន្លេសាប ដើម្បីសុំកុំឲ្យមានការជីកកាយ យកអាចម៍ដី ពីខ្នងទំនប់បន្តទៀត។

លោក គឹម សុធិន លើកឡើងថា ដើម្បីចូលរួមថែរក្សាកេរដំណែល របស់ដូនតា ក៏ដូចជាសម្បត្តិបេតិកភណ្ឌជាតិ សូមបងប្អូនអាជីវករផលិតឥដ្ឋនិងក្បឿង អាចប្រើប្រាស់ទីតាំងរបស់ខ្លួន ដូចដើម ប៉ុន្តែត្រូវយកអាចម៍ដី ពីកន្លែងផ្សេងមកធ្វើ ចៀសវាងការខូចខាត ឬធ្វើឲ្យបាត់បង់ស្លាកស្នាមប្រវត្តិសាស្រ្ត។ លោក ក៏បានស្នើសុំឲ្យជួយថែរក្សាបុរាណដ្ឋានមួយចំនួនផ្សេងៗទៀត មានដូចជាប្រាសាទ បឹងបុរាណ ទួលបុរាណ សម្រាប់កូនចៅជំនាន់ក្រោយ។

សូមជម្រាបថា ព្រែកជីកខាងលើនេះ មានប្រភពពីជើងភ្នំគូលែន រហូតដល់បឹងទន្លេសាប។ ថ្វីត្បិតសព្វថ្ងៃបានបាត់ដានខ្លះៗនៅជិតភ្នំ ប៉ុន្តែផ្នែកខាងក្រោម មានដានកាន់តែច្បាស់មានទឹកប្រើប្រាស់ជាព្រែកនៅឡើយ។ កាលពីសម័យបុរាណ ព្រែកជីកនេះមានតួនាទីសំខាន់ ក្រៅពីផ្តល់ទឹកសម្រាប់កសិកម្ម ដល់សហគមន៍ ជុំវិញ គឺជាផ្លូវដឹកជញ្ជួនថ្ម ពីភ្នំគូលែន មកតំបន់អង្គរ និងសម្រាប់ធ្វើជំនួញផងដែរ។ល៕SRPអត្ថបទ និងរូបភាព៖ លោក យី សុថា

ខេត្តសៀមរាប៖បុរសជាឃាតក រំលោភសម្លាប់ នារីបុគ្គលិកកាស៊ីណូ ត្រូវបានចាប់ខ្លួន នៅក្រុងសៀមរាប ក្នុងករណីឃាតកម្មគិតទុក។

ការចាប់ខ្លួនធ្វើឡើង នៅម៉ោង២១និង៤០នាទី ថ្ងៃទី០៤ ខែមីនា ឆ្នាំ២០២១ នៅចំណុចបន្ទប់ផ្ទះសំណាក់យីហោប៊ុនថា III ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ដោយកម្លាំងក្រុម១ ការិយាល័យនគរបាលព្រហ្មទណ្ឌកំរិតធ្ងន់ នៃស្នងការខេត្តសៀមរាប សហការជាមួយ នគរបាលខេត្តបន្ទាយមានជ័យ។

លោកវរសេនីយ៍ឯកណុប សារ៉ាក់ ស្នងការរងខេត្តសៀមរាប ទទួលជំនួយការដឹកនាំកម្លាំងការិយាល័យព្រហ្មទណ្ឌ បានឲ្យដឹងថា
ជនដៃដល់ឈ្មោះ រឿន ធារិន ភេទប្រុស អាយុ ៣៨ឆ្នាំ មិនមានមុខរប រស់នៅភូមិដីថ្មី សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

ជនរងគ្រោះ ឈ្មោះ ហួន ស្រី ភេទស្រី អាយុ ២៣ឆ្នាំ មុខរបរ បុគ្គលិកកាស៊ីណូ រស់នៅចំណុចបន្ទប់ជួល ស្ថិតនៅភូមិក្បាលស្ពាន១ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។

ជនដៃដល់សារភាពថា ខ្លួនពិតជាបានធ្វើសកម្មភាពខាងលើនេះពិតមែន ដោយនៅអំឡុងដើមឆ្នាំ២០១៨ ខ្លួនបានស្គាល់ និងលង់ស្រឡាញ់នារីរងគ្រោះ តែនាងមិនដឹងខ្លួននោះទេ។ លុះនៅវេលាម៉ោង០៨ ព្រឹក ថ្ងៃ០២មីនា ឆ្នាំ២០២១ ខ្លួនបានទៅកោះទ្វារបន្ទប់ជនរងគ្រោះ ពេលនាងបើទ្វារ ខ្លួនក៏បានច្រាននាងចូលក្នុងបន្ទប់ ចាប់នាងផ្តួលទៅលើការ៉ូ បានយកកូនកាំបិតភ្ជុងទៅជនរងគ្រោះ បន្ទាប់មកក៏វាយចំពោះនាងបណ្តាលឲ្យចុកឆ្អល់គ្មានកំលាំងរើបំរាស់ ហើយបានធ្វើសមក្មភាពរំលោភ ទៅលើជនរងគ្រោះបានសម្រេច១លើក។ ដោយបារម្ភខ្លាចជនរងគ្រោះ ប្តឹងគេក៏បានយកកូនកំបិតចាក់ច្រត់ទៅលើបំពង់ក បណ្តាលឲ្យដាច់ខ្យល់ស្លាប់ភ្លាមៗនៅនិងកន្លែង។ បន្ទាប់មករូបគេក៏បានប្រមូលយកសម្ភាររបស់ជនរងគ្រោះមានដូចជា ទូរស័ព្ទម៉ាក Oppo ១គ្រឿង, ជិញ្ចៀន ២វង់, ខ្សែក ១ខ្សែ, ប្រាក់បាត ៦.០០០ បាត, ប្រាក់ដុល្លា ១២០$ ហើយឡើងជិះរថយន្តឈ្មួលគេចខ្លួនមកខេត្តសៀមរាប។

លោកវរសេនីយ៍ឯកណុប សារ៉ាក់ បានបន្តថាករណីនេះសមត្ថកិច្ចបានពិនិត្យឃើញ មាន
កាបូបស្ទាយពណ៌ខ្មៅ១ផ្ទុកនូវ ទូរស័ព្ទម៉ាក Oppo ១គ្រឿង (ជារបស់ជនរងគ្រោះ), ខ្សែរកលោហធាតុពណ៌ទង់ដែង ១ខ្សែ (ជារបស់ជនរងគ្រោះ), ជិញ្ជៀនលោហធាតុពណ៌ទង់ដែង ២វង់ (ជារបស់ជនរងគ្រោះ) កូនកាំបិតបត់ដងលឿង១ (ដែលគេយកទៅចាក់សម្លាប់ជនរងគ្រោះ) និងខោអាវ។

បច្ចុប្បន្ន សមត្ថកិច្ចបានប្រគល់ ជនសង្ស័យ និង វត្ថុតាង ឲ្យទៅកម្លាំងការិយាល័យ នគរបាលព្រហ្មទណ្ឌកំរិតធ្ងន់ខេត្តបន្ទាយមានជ័យ បន្តនីតិវិធី៕SRP

ភ្នំពេញ៖សម្ដេច ហ៊ុន សែន នាយករដ្ឋមន្ត្រី នៅថ្ងៃទី០៤ ខែមីនា ឆ្នាំ២០២១ ព្រឹកមិញនេះ ក្រោយពីទទួលបានវ៉ាក់សាំងរួចហើយ បានអញ្ជើញធ្វើសន្និសីទសារព័ត៌មានជុំវិញការវិវឌ្ឍន៍ថ្មីៗ នៃស្ថានភាពជំងឺកូវីដ-១៩ និងការប្រើប្រាស់វ៉ាក់សាំងកូវីដ-១៩ នេះផងដែរ។

សម្តេច ហ៊ុន សែន បានមានប្រសាសន៍ថា កម្ពុជាអាចមានលទ្ធភាពក្នុងការទទួលបានជំនួយវ៉ាក់សាំងប្រឆាំងកូវីដឈ្មោះ (ស៊ីណូហ្វាម Sinopharm ) ពីចិនលើសពី១លានដូស ខណៈចំនួន ៤០ម៉ឺនដូសបន្ថែម នឹងមកដល់កម្ពុជាមុនចូលឆ្នាំខ្មែរខាងមុខនេះ។ សម្តេចតេជោនាយករដ្ឋមន្ត្រី បានមានប្រសាសន៍បញ្ជាក់ជាថ្មីអំពីមូលហេតុដែលសម្តេចមិនអាចចាក់វ៉ាក់សាំងស៊ីណូហ្វាមរបស់ចិន ដោយសារតែកត្តាអាយុដែលកំណត់គឺ១៨ឆ្នាំដល់៥៩ឆ្នាំ ហើយវ៉ាក់សាំងថ្មីឈ្មោះ អាស្ត្រាហ្សេនីកា (AstraZeneca )នេះ មិនមានការកំណត់អាយុនោះទេ។

នាយករដ្ឋមន្ត្រី បានថ្លែងអំណរគុណដល់ដៃគូអន្តរជាតិនានា ដែលបានជួយសម្រួបសម្រួលក្នុងការផ្តល់ជំនួយវ៉ាក់សាំងដល់ប្រទេសកម្ពុជានាពេលនេះ។ ប្រទេសកម្ពុជាជាប្រទេសទី១ នៅអាស៊ីប៉ាស៊ីហ្វិក ដែលទទួលបានវ៉ាក់សាំងពីមជ្ឈមណ្ឌលកូវ៉ាក់ (COVAX Facility) នាពេលនេះ។

នៅពេលខាងមុខ កម្ពុជានឹងអាចនឹងទទួល វ៉ាក់សាំង២០ភាគរយ នៃចំនួនប្រជាពលរដ្ឋ ពីមជ្ឈមណ្ឌលកូវ៉ាក់ ប៉ុន្តែការទទួលនេះ នឹងធ្វើឡើងតាមដំណាក់កាលដែលឆមាសទី១ កម្ពុជានឹងបានជាង១លានដូស និងជំហានបន្តបន្ទាប់ទៀត។ សម្តេចតេជោ ហ៊ុន សែន បានស្នើឲ្យក្រសួងសុខាភិបាលរៀបចំចាក់វ៉ាក់សាំងឈ្មោះ អាស្ត្រាហ្សេនីកា (AstraZeneca ) ជូនប្រជាពលរដ្ឋទូទៅដែលមានអាយុចាប់ពី៦០ឆ្នាំឡើង ជាពិសេសជំហានដំបូងអាទិភាពសំខាន់គឺខេត្តក្រុងគោលដៅចំនួនបីគឺរាជធានីភ្នំពេញ ខេត្តកណ្តាល និងខេត្តព្រះសីហនុ ដែលជាខេត្តក្រុងប្រឈមនឹងការរីករាលដាលជំងឺកូវីដ-១៩ ដែលទាមទារឲ្យមានការចាក់ជាបន្ទាន់ទៅដល់ប្រជាពលរដ្ឋដែលកំពុងប្រឈមនឹងការឆ្លងជំងឺនេះ។

នាយករដ្ឋមន្ត្រីបានមានប្រសាសន៍បញ្ជាក់ថា ការរក្សាទុក វ៉ាក់សាំងស៊ីណូហ្វាម (Sinopharm) មានរយៈពេល១ឆ្នាំ នឹងផុតកំណត់ ចំណែកវ៉ាក់សាំង អាស្ត្រាហ្សេនីកា (AstraZeneca )មានរយៈពេលត្រឹម៩ខែប៉ុណ្ណោះ នឹងហួសពេលកំណត់ហើយ។ សម្តេចតេជោបានអនុញ្ញាតឱ្យមន្រ្តីទូត ដៃគូអភិវឌ្ឍ អង្គការសង្គមស៊ីវិលដែលកំពុងបម្រើការងារ និងរស់នៅក្នុងប្រទេសកម្ពុជាអាចទទួលបាន វ៉ាក់សាំង Astra Zeneca នៅកម្ពុជាបាន ដោយមិនមានការគិតថ្លៃអ្វីនោះទេ។ សម្តេចតេជោបានប្រកាសថា មន្រ្តី និងប្រជាពលរដ្ឋទូទៅ ដែលមានអាយុចាប់ពី៦០ឆ្នាំឡើងលើ នឹងផ្តល់លទ្ធភាពឱ្យចាក់វ៉ាក់សាំង ឈ្មោះ អាស្ត្រាហ្សេនីកា (Astra Zeneca ) ចំណែកអ្នកអាយុ៥៩ឆ្នាំ ចុះក្រោម អនុញ្ញាតឱ្យចាក់វ៉ាក់សាំងឈ្មោះ ស៊ីណូហ្វាម( Sinopharm)ដោយសារចំនួនវ៉ាក់សាំងមានកម្រិត។

នាយករដ្ឋមន្ត្រីបានមានប្រសាសន៍បញ្ជាក់ថា ការចាក់វ៉ាក់សាំងមិនមែនជាដំណោះស្រាយ ក្នុងការលុបបំបាត់កូវីដ-១៩ពីកម្ពុជានោះទេ ប៉ុន្តែត្រូវបូករួមជាមួយនឹងវិធានការ (បីកុំ និងបីការពារ )ថែមទៀតទើបជាដំណោះស្រាយដ៏ល្អ និងមានប្រសិទ្ធភាពដើម្បីទប់ស្កាត់ការរីករាលដាលនៃជំងឺកូវីដ-១៩។ រហូតមដល់ពេលនេះ មិនមានប្រភពណាបញ្ជាក់ច្បាស់ថា ការចាក់វ៉ាក់សាំងនឹងមានប្រសិទ្ធភាពការពារ ក្នុងរយៈពេលណាមួយ ឬ១ជីវិតនោះទេ ដូច្នេះមានតែវិធីការពារអនុវត្តតាមការណែនាំរបស់ក្រសួងសុខាភិបាលតែប៉ុណ្ណោះទើបល្អប្រសើរ។

សម្តេច ហ៊ុន សែន មានប្រសាសន៍ប្រកាសថា កម្ពុជាទទួលយកការផ្គត់ផ្គង់វ៉ាក់សាំង១សែនដូសពីឥណ្ឌា ប៉ុន្តែកម្ពុជានឹងស្នើទិញ១លានដូសថែមទៀត នៅខែឧសភា ខាងមុខនេះ។ ក្រៅពីវ៉ាក់សាំងស៊ីណូហ្វាម និង អាស្ត្រាហ្សេនីកា កម្ពុជាកំពុងពិនិត្យមើលវ៉ាក់សាំងប្រភេទផ្សេងៗមួយចំនួនទៀតផងដែរ។

នៅថ្ងៃនេះ នាយករដ្ឋមន្ត្រី បានអំពាវនាវដល់ពលរដ្ឋ កុំធ្វើដំណើរចេញចូលខេត្តព្រះសីហនុ បើមិនចាំបាច់នោះទេ និងអំពាវនាវដល់ពលរដ្ឋខេត្តព្រះសីហនុ កុំចេញឆ្លងខេត្តដទៃទៀតក្នុងមួយរយៈពេលនេះ ដោយសារតែជំងឺកូវីដ-១៩ កំពុងតែមានការឆ្លងជាហូរហែនោះ។
ទន្ទឹមនឹងនោះសម្ដេចតេជោ ក៏បានសម្រេចផ្អាកការធ្វើដំណើររបស់ប្រជាពលរដ្ឋទេសចរណ៍ចូលខេត្តព្រះសីហនុ ប៉ុន្តែការដឹកទំនិញចេញចូលនៅប្រព្រឹត្តដដែល និងបានបន្តអំពាវនាវជាថ្មីឱ្យប្រជាពលរដ្ឋនៅភ្នំពេញ កុំចេញពីផ្ទះ បើសិនជាគ្មានភាពចាំបាច់នោះទេ ដើម្បីចូលរួមទប់ស្កាត់ការចម្លងជំងឺកូវីដ-១៩ទាំងអស់គ្នា។ សម្តេចតេជោ ក៏បានឯកភាពជាមួយសំណើក្រសួងអប់រំ ឱ្យបិទសាលារៀន នៅរាជធានីភ្នំពេញ ខេត្តកណ្តាល និងខេត្តព្រះសីហនុ មួយរយៈបន្តទៀត៕SRP

ខេត្តកំពង់ចាម៖ក្នុង កិច្ចប្រជុំសាមញ្ញលើកទី២២ អាណត្តិទី៣ របស់ក្រុមប្រឹក្សាខេត្តកំពង់ចាម នា
ថ្ងៃទី៤ ខែមិនា ឆ្នាំ ២០២១ ពព្រឹកមិញនេះ លោក អ៊ុន ចាន់ដា អភិបាលខេត្តកំពង់ចាម បាន ណែនាំដល់មន្ទីរសង្គមកិច្ចអតីតយុទ្ធជន និង យុវនីតិសម្បទា សហការ ជាមួយ អាជ្ញាធរពាក់ព័ន្ធ ដេីម្បី រួមគ្នា ធ្វើ ការ ដោះស្រាយ បញ្ហាជនអនាថា និងជន វិបល្លាស ស្មារតី ធ្វើ យ៉ាងណា កុំ ឲ្យមាន ការ បង្ក ភាព អនាធិបតេយ្យ ដែល នាំ ឲ្យ ប៉ះពាល់ ដល់ អារម្មណ៍ មហាជន ពោលគឺ ត្រូវ ប្រេីប្រាស់ ទីតាំង សំចត ដែល យើង មាន ស្រាប់ ចំពោះ ជន វិបល្លាស ស្មារតី គឺត្រូវ ជួយ ពិនិត្យ ព្យាបាល និង ធ្វើការ ស្វែងរក សាច់ញាតិ គាត់ ឲ្យ ជួយ ទទួល ខុសត្រូវ ។

អភិបាលខេត្តកំពង់ចាម ក៏បានស្នើមន្ទីរអប់រំ យុវជន និង កីឡា ឲ្យ ធ្វើ ការ រៀបចំ ស្តាតកីឡាដ្ឋាន ខេត្តកំពង់ចាម ទៅតាម ជំហាន ៗ ដោយ ត្រូវ សំអាត បរិស្ថាន ទាំង ទីធ្លា ខាង ក្នុង និង ខាងក្រៅ ពោលគឺ ត្រូវ ខិតខំ ធ្វើ យ៉ាងណា ឲ្យមានសោភ័ណភាពស្រស់ស្អាត ជា ប្រយោជន៍ ដល់ ពលរដ្ឋ ជាពិសេស ក្រុម កីឡាករ កីឡាការិនី ធ្វើ ការ ហ្វឹកហាត់ លេង កីឡា និង ហាត់ប្រាណ ដេីម្បី សុខភាព ផង ដែរ ។

កិច្ចប្រជុំនេះដែរ លោក ខ្លូត ផន ប្រធានក្រុមប្រឹក្សាខេត្ត បាន លេីក យក របៀបវារៈ សំខាន់ ៗ រួមមាន ៖

១-ពិនិត្យនិងអនុម័តលើសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី២១ អាណត្តិទី៣ របស់ក្រុមប្រឹក្សាខេត្តកំពង់ចាម ។

២-ពិនិត្យពិភាក្សានិងអនុម័តសេចក្តីព្រាងរបាយការណ៍បូកសរុបការងារប្រចាំខែកុម្ភៈ និងទិសដៅ ខែមិនាឆ្នាំ២០២១ របស់រដ្ឋបាលខេត្ត។

៣-ពិនិត្យ ពិភាក្សា និងអនុម័តលើពង្រាងសេចក្តីសម្រេចស្តីពីការបិទបញ្ជីចំណូលចំណាយរបស់រដ្ឋបាលខេត្ត សម្រាប់ការគ្រប់គ្រងឆ្នាំ២០២០ រួមនឹង បញ្ហាផ្សេងៗ មួយ ចំនួន ទៀរ៕SRP

ខេត្តកំពង់ធំ៖យ៉ាងហោចណាស់មនុស្សចំនួន ៥ នាក់បានស្លាប់និង១០នាក់ទៀតរងរបួសធ្ងន់ ដោយសាររថយន្តសាំយ៉ុងរត់តាក់ស៊ីបុកជាមួយរថយន្តបែនដឹកដី ក្នុងទិសដៅបញ្ច្រាស់គ្នា។

សេចក្ដីរាយការណ៍បានដឹងថាគ្រោះថ្នាក់ចរាចរណ៍នេះ តៃកុងរថយន្តទាំងពីរ បានគៀបជាប់នឹងរថយន្ត ក្នុងនោះនារីម្នាក់ ក្មេងតូចម្នាក់ទៀតស្លាប់ អ្នករងរបួសធ្ងន់ប្រុសស្រីចំនួន១០នាក់។

ហេតុការណ៍បានកើតឡើង តាមបណ្តោយផ្លូវលេខ៦ ផ្លូវអាស៊ានវាងផ្សារកំពង់ថ្ម ស្ថិតភូមិទួលសង្កែ ឃុំកំពង់ថ្ម ស្រុកសន្ទុក ខេត្តពង់ធំ នៅវេលាម៉ោង៥និង២៥នាទីល្ងាចថ្ងៃទី០៣ មីនា ឆ្នាំ២០២១។

សមត្ថកិច្ចបានដឹងថាជនរងគ្រោះទី១
ជាតៃកុងរថយន្តសាំងយ៉ុង ឈ្មោះតិច ចាន់វាសនា ភេទប្រុសអាយុ៤៣ឆ្នាំ(ស្លាប់នៅកន្លែងកើតហេតុ)មានទីលំភូមិវាល ឃុំសាន់គរ ស្រុកំពង់ស្វាយ ខេត្តកំពង់ធំ។

ទី២តៃកុងរថយន្តបែនដឹកដី ឈ្មោះ ឃួងស្រ៊ាន់ ភេទប្រុសអាយុ ២៥ឆ្នាំ(ស្លាប់នៅកន្លែងកើតហេតុ)មានទីលំនៅភូមិ ស្រឡៅតូង ឃុំបល្ល័ង្គ ស្រុកបារាយណ៍ ខេត្តកំពង់ធំ។

ទី៣ឈ្មោះ ម៉េតសៀងលួន អាយុ៣១ (ស្លាប់នៅកើតហេតុ)មានទីលំនៅភូមិវាលឃុំសាន់គរ ស្រុកកំពង់ស្វាយ នារីគ្រោះគ្រោងនិងរៀបការ នៅថ្ងៃអាទិត្យទី០៧ខែកុម្ភ:នេះ។
ទី៤កូនតូចអាយុប្រមាណ១ខួបបានស្លាប់បន្ទាប់ពីបញ្ជូនទៅដល់មន្ទីរពេទ្យបង្អែកបារាយណ៍ សន្ទុក។

ទី៥ ក្មេងស្រីម្នាក់ទៀតស្លាប់ នៅពីមន្ទីរពេទ្យបង្អែកបារាយណ៍ សន្ទុក។

ចំណែកអ្នករងរបួសធ្ងន់ប្រុសស្រី ចាស់ក្មេង១០នាក់ ត្រូវបានបញ្ជូនយកទៅសង្រ្គោះនៅមន្ទីពេទ្យខេត្តកំពង់ធំ និងទៅសង្រ្គោះទីក្រុងភ្នំពេញ។

សូមបញ្ជាក់ផងដែរថា អ្នករងរបួសធ្ងន់ទាំង១០នាក់នេះ ភាគច្រើនបែកប្រអប់ជើង និងបាក់ភ្លៅ និងបាក់ខ្មងជើង ព្រោះថា រថយន្តសាំងយ៉ុង ដែលរត់តាក់ស៊ីនេះ មិនចាប់ខ្ចៅ មិនប៉ាឡុងនោះទេ ដើម្បីងាយស្រួលលើកអីវ៉ាន់ដាក់ចុះដាក់ឡើង។

យោងតាមប្រភពឲ្យដឹងថា រថយន្តសាំងយ៉ុងចេញពីត្បូងទៅជើង ហើយរថយន្តបែនដឹកដីប៉ុន្តែចាក់ដីអស់ហើយ ចេញពីជើងទៅត្បូងស្រាប់តែមិនដឹងថា ខាងតៃកុងរថយន្តគាត់កើតអីទេ ក៏រ៉េចង្កូតទៅបុករថយន្តសាំងយ៉ុង ពេញទំហឹងម្តង។

រថយន្តទាំង២គ្រឿង ត្រូវបានសមត្ថកិច្ច
ស្ទូចយកទៅរក្សារទុកនៅអធិការដ្ឋាន នគរបាលស្រុកសន្ទុក ដើម្បីរងចាំធ្វើការដោះស្រាយទៅតាមនិតិវិធី៕SRP

ខេត្តសៀមរាប៖មនុស្សចំនួន២នាក់បានរងរបួសធ្ងន់ស្រាល ខណ:បើករថយន្តបុកត្រាក់ទ័រសណ្តោងរ៉ឺម៉កពីក្រោយ។

ហេតុការណ៍បានកើតឡើង នៅវេលាម៉ោង៣ទៀបភ្លឺ ថ្ងៃទី០៤ ខែមីនា ឆ្នាំ២០២១ លើផ្លូវជាតិលេខ៦ ត្រង់ចំណុចចន្លោះគីឡូម៉ែត្រ លេខ ៣៥៧_៣៥៨ ស្ថិត នៅភូមិ គំរូ ឃុំ ស្រណាល ស្រុកក្រឡាញ់ រវាងរថយន្តកូរ៉ូឡានិង ត្រាក់ទ័រ សណ្តោងរ៉ឺម៉ក។

សមត្ថកិច្ចបានដឹងថា ម្ចាស់រថយន្តឈ្មោះ ព្រំ សុខ ចំរើន ភេទប្រុស អាយុ៣៣ឆ្នាំ បច្ចុប្បន្ន ស្នាក់ នៅសង្កាត់ ច្បារអំពៅ ១ រាជធានី ភ្នំពេញ ររងរបួសធ្ងន់បាក់ដៃខាងស្តាំ ប្រពន្ធឈ្មោះ វង្ស ម៉ីគីម អាយុ ៣៣ឆ្នាំ របួសស្រាល។

សមត្ថកិច្ចបានបន្តថា មូលហេតុ បណ្តាល មកពី រថយន្ត ម៉ាក កូរ៉ូឡា ពណ៌ស ពាក់ស្លាកលេខ ភ្នំពេញ 2A:4623 ក្នុងល្បឿនលឿន បានបុកត្រាក់ទ័រសណ្តោងរ៉ឹម៉ក ស្របទិសគ្នា ក្នុងពីកើតទៅលិច ចំពីក្រោយពេញទំហឹង ដែលមិនស្គាល់អត្តសញ្ញាណអ្នកបើកបរ ដោយគ្មាន ភ្លើង សញ្ញា សម្គាល់ ចរាចរណ៍ ត្រឹមត្រូវ។

ករណីនេះកម្លាំងនគរបាលចរាចរណ៍ បានចុះត្រួត ពិនិត្យ និងហៅរថយន្តដឹកទៅសង្គ្រោះនៅមន្ទីពេទ្យបង្អែកស្រុក។ ចំណែករថយន្តរងការខូចខាតធ្ងន់ ត្រាក់ទ័រ សណ្តោងរ៉ឺម៉ក រងកាខូចខាតស្រាល ជំនាញយកទៅមករក្សាទុកនៅអធិការដ្ឋាននគរបាលស្រុក ដើម្បីដោះស្រាយតាមនិតិវិធីច្បាប់៕SRP