ភ្នំពេញ៖នាយកដ្ឋានព័ត៌មានវិទ្យា បានឲ្យដឹងថា៖បច្ចុប្បន្នដោយសារបញ្ហាផ្ទុះឡើងនៃជំងឺកូវីដ១៩ ការលក់ដូរមួយចំនួនធំ បានប្រែក្លាយមកជាការលក់ដូរ និងកម្មង់អនឡាញ។ ដោយសារមូលហេតុនេះ ឧក្រិដ្ឋជន និងជនខិលខូចមួយចំនួន បានឆ្លៀតឱកាសបង្កើតគណនីបណ្តាញសង្គម (Facebook Telegram ។ល។) ឬទំព័រហ្វេសប៊ុកផេក ធ្វើការផ្សព្វផ្សាយលក់ទំនិញ (ទំនិញហូបចុក ផលិតផល មាសពេជ្រ។ល។) ឬការផ្តល់សេវាកម្មផ្សេងៗ (រួមទាំងសេវាកំសាន្ត។ល។) ក្នុងគោលបំណងបោកបញ្ឆោត ទទួលបានប្រាក់កក់ ឬប្រាក់ទិញផលិតផល ឬសេវាពីសំណាក់អតិថិជន… ៕SRP

ខេត្តសៀមរាប៖ហ៊ានទទួលយកការលំបាក” មនុស្សដែលជោគជ័យពិតប្រាកដ គឺអ្នកដែល ហ៊ានទទួលយកការលំបាក ច្រើនជាងមនុស្សធម្មតា”។ នេះជាការសរសេររបស់លោក សឿន តុលា ស្ថាបនិកក្រុមហ៊ុនផាផាយ៉ា។

លោកលោក សឿន តុលាបានសរសេរថា៖
នៅក្នុងលោកយើងនេះ មានការភ័ន្តច្រឡំជាច្រើន ដោយពួកគេគិតថា ខ្លួនពួកគេនឹងជោគជ័យ ដោយគ្រាន់តែអានសៀវភៅជោគជ័យ ឬចូលរួមសិក្ខាសាលាជោគជ័យ ប៉ុន្តែ ប្រសិនបើ ការគិតនោះ ដោយប្រើ ” ពាក្យជោគជ័យ ” តាមរយៈ ការចាប់ផ្ដើមដោយប្រើផ្លូវកាត់ ដើម្បីអោយបានផលច្រើនហើយលឿន នោះ ពួកគេនឹងមិនបានរុករក ” អ្វីខ្លះនៅពីក្រោយភាពជោគជ័យ ” និង ហេតុអ្វីពួកគេបានជោគជ័យ ” ការប្រើផ្លូវកាត់ ពុំបានរៀនអ្វី ពីភាពអត់ធ្មត់ តស៊ូ និងការតាំងចិត្តឡើយ។

ភាពរឹងមាំដែលកើតចេញពីភាពក្លាហាន ប្រឈមនឹងការលំបាក ប្រឈមជាមួយការរិះគន់ ពីអ្នកដទៃ ដោយសារតែយើងប្រែប្រួល មិនដូចការគិត ឬការចង់បាន របស់ អ្នកដទៃ គឺជាគ្រឹះនៃភាពជោគជ័យ ។ពីព្រោះភាពរឹងមាំជាមូលដ្ឋានសំខាន់នៃប្រភពថាមពលបង្កើតឲ្យមានភាពស្ដុកស្ដម្ភ សន្តិភាព ព្រមទាំងសុភមង្គលផងដែរ។គ្រប់ម្ចាស់ជំនួញទាំងអស់នៅក្នុងលោកនេះ ត្រូវបានបែងចែកជាពីរ ” ម្ចាស់ជំនួញដែលរឹងមាំ និង ទន់ជ្រាយ” ប៉ុន្តែអ្នកដែលរឹងមាំ គឺជាអ្នកជោគជ័យ ក្នុងអំឡុងកាលណាមួយ ចំណែកអ្នកដែលទន់ជ្រាយ តែងតែ ទម្លាក់កំហុស ទៅលើអ្នកដទៃ នៅពេលដែល បរាជ័យ នៅតាមដងផ្លូវ ដែលត្រូវធ្វើដំណើរទៅមុខ។ ជាការពិតណាស់ ” មេដឹកនាំ គឺជាអ្នកទទួលកំហុសទាំងអស់តែម្នាក់ឯង ប៉ុន្តែ នៅពេលជោគជ័យ ពួកគេ តែងតែចែករំលែក សក្ការៈ ទៅដល់អ្នកដទៃ ដោយផ្ទាល់ឬដោយ ប្រយោល ដែលមនុស្សធម្មតាលំបាកយល់អំពីបញ្ហានេះ”អ្នកណាៗ ក៏ ក្លាយជាម្ចាស់ជំនួញឈរជើងរយៈពេលយូរបានដែរប្រសិនបើពួកគេ មានការធានាភាពជោគជ័យដោយការតាំងចិត្តខ្ពស់ចំពោះខ្លួនឯង នោះមានន័យថា ” អ្នកត្រូវចេះធ្វើចៅហ្វាយនាយខ្លួនឯងសិន មុននឹងអ្នកធ្វើចៅហ្វាយដល់អ្នកដទៃ” អ្នកមិនអាចដឹកនាំអ្នកដទៃបានទេ ប្រសិនបើអ្នកមិនអាចដឹកនាំខ្លួនឲ្យបាន នោះ ពីព្រោះការដឹកនាំ ជាការសម្រេចចិត្តធ្វើ ហើយរៀន គឺជាការរៀនពីភាពជាក់ស្ដែង ការយល់អំពីភាពជាក់ស្ដែង និង ផលសម្រាប់ពេលអនាគត។”អ្នកដែលអាចដឹកនាំខ្លួនឯងបាន អ្នកនោះអាចបង្កើតកេរ្តិ៍ឈ្មោះបាន សូមចងចាំថា ការធ្វើអាជីវកម្ម គឺជាការបង្កើតកេរ្តិ៍ឈ្មោះ”គួរឱ្យសោកស្ដាយ ជីវិតរបស់យើងមានទាំងល្អ មានទាំងអាក្រក់ មានទាំងភាព ក្លាហាន និងភាពភ័យខ្លាច ហើយជីវិតរបស់យើង មិនអាចឋិតនៅចំកណ្ដាលបានឡើយ ” ប្រសិនបើយើងភ័យខ្លាចខ្លាំង យើងបាត់បង់ភាពក្លាហាន ប៉ុន្តែ ប្រសិនបើយើងប្រើភាពក្លាហាន ឲ្យលើសពីភាពភ័យខ្លាច យើងនឹងបានកសាងរឹងមាំ ” មានតែភាពរឹងមាំទេ ដែលធ្វើឱយ មានជំនឿ លើកខ្លួនឯង នឹង ទទួលបានភាពជោគជ័យ” ៕

និពន្ធដោយលោក សឿន តុលា ស្ថាបនិកក្រុមហ៊ុន ផា ផាយ៉ា PAPAYA NEXT STEP CO,.LTD.

* PAPAYA REAL ESTATE
( គម្រោងអភិវឌ្ឍន៍អចលនទ្រព្យ)
*PAPAYA HOMESTAY
(គម្រោងលើវិស័យទេសចរណ៍)
*PAPAYA GARDEN
( គម្រោងលើវិស័យកសិកម្ម និងចែកចាយអាហារ)

ភ្នំពេញ៖លោកនេត សាវឿន អគ្គស្នងការនគរបាលជាតិ នៅថ្ងៃទី០៥ ខែមេសា នេះបានដឹកនាំប្រជុំពីចម្ងាយតាមប្រព័ន្អអេឡិចត្រូនិច ស្ដីពី “ វិធានការធានាស្ថិរភាព សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ក្នុងឱកាសបុណ្យចូលឆ្នាំខ្មែរប្រពៃណីជាតិ “។

កិច្ចប្រជុំនេះមានការចូលរួមពីថ្នាក់អគ្គស្នងការរងទាំងអស់ លោកប្រធាននាយកដ្ឋាន អង្គភាពពាក់ព័ន្ធ និងស្នងការនគរបាលរាជធានី-ខេត្តផងដែរ។

ក្នុងកិច្ចប្រជុំនេះ លោកនេត សាវឿន ដាក់ចេញនូវគោលការណ៍រួមដូចខាងក្រោម៖

ទី១.គ្រប់នាយកដ្ឋាន អង្គភាពចំណុះ និងស្នងការដ្ឋាននគរបាលរាជធានី-ខេត្ត ត្រូវប្រកាសចំណុចខ្ពស់ ពង្រឹងវិធានការសន្តិសុខ សណ្ដាប់ធ្នាប់សាធារណៈសម្រាប់ពិធីបុណ្យចូលឆ្នាំខ្មែរប្រពៃណីជាតិ ពិសេសនៅតាមគោលដៅអាទិភាព វត្តអារាម រមណីយដ្ឋាន និងទីតាំងកន្លែងកម្សាន្តសប្បាយនានា ដោយត្រូវមានផែនការចាត់តាំងអនុវត្តច្បាស់លាស់។

ទី២.គ្រប់នាយកដ្ឋាន អង្គភាព ត្រូវមានកម្មវិធីការងារជាក់ស្ដែងដូចខាងក្រោម៖
ក.ធ្វើការប្ដូរវេនប្រចាំការ ២៤/២៤ម៉ោង ដើម្បីធានានិរន្តរភាពការងារ
ខ.ត្រូវពង្រឹងក្រុមប្រចាំបញ្ជា ទាំងនៅតាមនាយកដ្ឋាន អង្គភាព និងស្នងការដ្ឋាននគរបាលរាជធានី-ខេត្ត ដើម្បីទទួលសំណូមពររបស់មហាជន និងត្រូវត្រៀមកម្លាំង មធ្យោបាយ ឧបករណ៍ សម្ភារៈ ដើម្បីអន្តរាគមន៍ដោះស្រាយជូនប្រជាពលរដ្ឋឱ្យបានទាន់សភាពការណ៍។

ទី៣.ក្រើនរំលឹកដាស់តឿនដល់គ្រប់នាយកដ្ឋាន អង្គភាព ស្នងការដ្ឋាននគរបាលរាជធានី-ខេត្ត ឱ្យអប់រំណែនាំមន្ត្រីក្រោមឱវាទអំពីការអនុវត្តវិធានសុខាភិបាល ពិសេសអនុសាសន៍ដឹកនាំរបស់សម្ដេចតេជោ នាយករដ្ឋមន្ត្រី “ ៣ការពារ ៣កុំ “ ដើម្បីថែរក្សាសុខភាពផ្ទាល់ខ្លួន ព្រមទាំងក្រុមគ្រួសារ និងត្រូវធ្វើជាគំរូដល់សាធារណជន៕SRP

ខេត្តកំពង់៖​ចាមលោក អ៊ុន ចាន់ដា អភិបាលខេត្តកំពង់ចាម និង ជា ប្រធាន គណកម្មការខេត្ត ប្រយុទ្ធប្រឆាំងនឹងជំងឺកូវីដ-១៩ រួមនឹង អភិបាលរងខេត្តនៅថ្ងៃទី៥ ខែមេសាព្រឹកមិញនេះ បានអញ្ជើញទទួលអំណោយជាសម្ភា ស្បៀងអាហារ និងថវិកាពី លោក ស៊ុយ ភូនាថ នាយកក្រុម ហ៊ុន អេស ធី អេស អែតវេីថាយស៉ីង ឯ.ក និង មន្ទីរ សាធារណការ និងដឹកជញ្ជូនខេត្តកំពង់ចាមរួមជាមួយ សប្បុរសជននានា ដែលបានចូលរួមជាមួយរាជរដ្ឋាភិបាលដេីម្បីទប់ស្កាត់ការឆ្លងរីករាលដាលនៃជំងឺកូវីដ -១៩។

គួរបញ្ជាក់ថាក្នុងពិធីប្រគល់និងទទួលអំណោយនេះ លោក ស៊ុយ ភូនាថ នាយកក្រុម ហ៊ុន អេស ធី អេស អែតវេីថាយស៉ីង ឯ.ក បាន ឧបត្ថម្ភ អង្ករ ១តោន មីម៉ាម៉ា ២០កេស ទឹកបរិសុទ្ធ ២០កេស ម៉ាស១ម៉ឺន ម៉ាស និង ទឹកអាល់កុល ៦០លីត្រ .
មន្ទីរសាធារណការ និងដឹកជញ្ជូនខេត្តកំពង់ចាមឧបត្ថម្ភ ទឹក បរិសុទ្ធ ៥០០យួរ .
ធនាគារអេស៊ីលីដា ៨សាខា ក្នុងខេត្តកំពង់ចាមឧបត្ថម្ភ ម៉ាសចំនួន ១ម៉ឺនម៉ាសអាល់កុល ២៤០លីត្រ មី១៦កេស និងទឹកបរិសុទ្ធ ១៦កេស .
លោក ឧកញ៉ា សាយ ហាង និង លោកជំទាវ ឧបត្ថម្ភ ថវិកា ៤លានរៀល ម៉ាសចំនួន ១ម៉ឺន ម៉ាសទឹកបរិសុទ្ធ ១០០កេស និង អាល់កុល ១៥០លីត្រ .
គណៈ អាជីវករ ផ្សារ បឹងកុក ឧបត្ថម្ភថវិកា២លានរៀល .
ក្រុមហ៊ុន CP ឧបត្ថម្ភ ម៉ាសចំនួន ១២.៥០០ម៉ាស អាល់កុល ១២០លីត្រ និងទឹកបរិសុទ្ធ ចំនួន ៥០កេស .
ឯកឧត្តម លី ថៃហាក់ ឧបត្ថម្ភទឹកបរិសុទ្ធ ចំនួន៥០០យួរ និងក្រុមហ៊ុនថាណាខន ឧបត្ថម្ភធូកមូស៣កេស ថ្នាំបាញ់មូស ១កេស អាល់កុល៣០លីត្រ ខោទឹកនោម ១បាវ និងទឹកបរិសុទ្ធ ចំនួន៥កេស។

ក្នុងឱកាសនោះដែរ លោក អ៊ុន ចាន់ដា អភិបាលខេត្តកំពង់ចាម បាន ថ្លែងអំណរគុណចំពោះ ម្ចាស់ក្រុមហ៊ុនក៏ដូចជា សប្បុរសជន នានា ដែលបានគាំទ្រឧបត្ថម្ភ ជាសម្ភារស្បៀងអាហារ និងថវិកា ជូន ដល់គណៈកម្មការប្រយុទ្ធប្រឆាំង នឹងជំងឺកូវីដ -១៩ ដែលជាការរួមចំណែកយ៉ាងសំខាន់ក្នុងសកម្មភាពនានាដើម្បីប្រយុទ្ធ ប្រឆាំងនឹងជំងឺកូវីដ-១៩ ហើយក៏ជាការជួយរំលែកទុក្ខលំបាកការខ្វះខាត របស់បងប្អូនពលករចំណូលស្រុកនិងអ្នកពាក់ព័ន្ធ ព្រឹត្តិការណ៍២០កុម្ភៈដែលកំពុងធ្វើចត្តាឡីស័កផងដែរ៕SRP

ខេត្តសៀមរាប៖លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានឲ្យដឹងថា៖រថយន្តដឹកឈើខុសច្បាប់មួយគ្រឿងត្រូវបានក្រុមចល័តរបស់ខណ្ឌរដ្ឋបាលព្រៃឈើរបស់លោកចាប់បញ្ជូនអនុវត្តតាមផ្លូវច្បាប់។

ការបង្ក្រាបនេះធ្វើឡើង នៅវេលាម៉ោង០៨និង៣៩នាទីយប់ថ្ងៃទី០៤ ខែមេសា ឆ្នាំ២០២១នៅក្នុងភូមិខ្នាថ្មី សង្កាត់ជ្រាវក្រុងសៀមរាបខេត្តសៀមរាប។

លោកម៉ុង ប៊ុនលីម បានបន្តថារថយន្តដឹកឈើដោយល្មើសច្បាប់នេះម៉ាកអីស៊ុយហ្សុយ ឌុយមិចព៌ណត្រេអី គ្នានស្លាកលេខ បានដឹកឈើអារប្រភេទលេខ១(ផ្ចឹក)ចំនួន២០ដុំស្មើ០,៨០ម៉ែត្រ3៣ ត្រូវបាននាំយកទៅករក្សាទុកនៅផ្នែករដ្ឋបាលព្រៃឈើបន្ទាយស្រី ក្នុងភូមិព្រះដាក់ឃុំព្រះដាក់ស្រុកបន្ទាយស្រី ខេត្តសៀមរាប។

ទោះជាយ៉ាងណា លោកម៉ុង ប៊ុនលីម មិនបានបញ្ជាក់អត្តសញ្ញាណម្ចាស់រថយន្តដឹកឈើនេះទេ។

សូមជម្រាបថាសកម្មភាពដឹកជញ្ជូនឈើចេញពីខេត្តព្រះវិហារ ចូលមកខេត្តសៀមរាប នៅតែបន្តកើតមាន បើទោះបីជាមានការរឹតបន្តឹងពីអាជ្ញាធរជំនាញពាក់ព័ន្ធក្នុងការទប់ស្កាត់បង្ក្រាបយ៉ាងណាក៏ដោយ ក៏ពួកឈ្មួញនៅតែអាចដឹកជញ្ជូនឈើបានដោយរលូនដដែល៕SRP

ខេត្តសៀមរាប៖បុរសម្នាក់ត្រូវបានច្រាំងអូរបាក់សង្កត់បណ្ដាលឲ្យស្លាប់ភ្លាមៗ។

ហេតុការណ៍បានកើតឡើងវេលាម៉ោង៥និង៣០នាទី ថ្ងៃអាទិត្យ ទី០៤ ខែមេសា ឆ្នាំ២០២១ នៅស្ពានតូច ស្ថិតក្នុងភូមិរហាល ឃុំតាសៀម ស្រុកស្វាយលើ ខេត្តសៀមរាប។

សមត្ថកិច្ចបានឲ្យដឹងថាជនរងគ្រោះឈ្មោះ ចក់ ចែម អាយុ២១ឆ្នាំនៅភូមិរហាល ឃុំតាសៀម ស្រុកស្វាយលើ ខេត្តសៀមរាប។

យោងតាមការបំភ្លឺរបស់ឈ្មោះ ហ៊ុន ចក់ ភេទប្រុស អាយុ៥៩ឆ្នាំនៅកន្លែងកើតហេតុខាងលើ(ត្រូវជាឪពុកបង្កើតរបស់ជនរងគ្រោះ) និងឈ្មោះ ឌឿន ដាភេទ ប្រុស អាយុ៣៧ឆ្នាំត្រូវជាបងប្អូនជីដូន បានឲ្យដឹងស្រដៀងគ្នា ថាមុនពេលកើតហេតុខ្លួនបាននាំកូនទៅបង់សំណាញ់នៅស្ពានតូចប្រហែលម៉ោង១និង៣០នាទីរសៀល លុះដល់ម៉ោង៥និង៣០នាទី ល្ងាចស្រាប់តែកូនរបស់ខ្លួនបានយកសំណាញ់ ទៅគ្របនៅនឹងច្រាំងក្រោមគុម្ពឬស្សី ចំណែកខ្លួនក៏នៅក្បែរនោះដែរ ពេលកំពុងតែមុជរាវស្រវ៉ារកត្រីស្រាប់តែបាក់មាត់ច្រាំងសង្កត់មកលើកូន ខ្លួនក៏បានរាយការណ៍ជូនសមត្ថកិច្ច និងបានហៅអាអ៊ិច (អេស្កាវទ័រ)មកកាយយកកូនរបស់ខ្លួនចេញពីក្នុងទឹក។

ការពិនិត្យរបស់កម្លាំងជំនាញបច្ចេកទេសឃើញថាសពមានស្លាកស្នាមដាច់រលាត់នៅលើ ភ្នែក និង ខ្ទង់ច្រមុះដែលបណ្ដាលមកពីការបាក់សង្កត់នៃច្រាំងអូរ។

តាមការធានាអះអាងរបស់ឪពុកបង្កើតថាកូនរបស់ខ្លួនពិតជាត្រូវបានបាក់ច្រាំងអូរសង្កត់ស្លាប់ពិតប្រាកដមែន ពុំមានពាក់ព័ន្ធករណីបទល្មើសព្រហ្មទណ្ឌឡើយ។
សមត្ថកិច្ចបញ្ជាក់ថាក្រោយការពិនិត្យយើងពុំឃើញមានអ្វីពាក់ព័ន្ធ និង ករណីបទល្មើសព្រហ្មទណ្ឌឡើយ ក៏បានធ្វើកំណត់ហេតុប្រគល់សពជូនក្រុមគ្រួសារធ្វើបុណ្យតាមប្រពៃណី៕SRP

ខេត្តសៀមរាប៖សមត្ថកិច្ចបានឃាត់ខ្លួនតាម្នាក់ តាមពាក្យបណ្ដឹងក្រុមគ្រួសារជនរងគ្រោះ ករណីរំលោភសេពសន្ទវៈលើកុមារអាយុ៤ឆ្នាំ។

ការកត់ខ្លួននេះធ្វើឡើងនៅថ្ងៃទី០៣ ខែមេសាឆ្នាំ ២០២១ ម្សិលមិញ នៅសង្កាត់ស្រង៉ែ ក្រុងសៀមរាប តាមបញ្ជា របស់លោកកើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប។

តាមរបាយការណ៍បានបង្ហាញថាករណីរំលោភសេពសន្ថវៈ នេះ បានកើតឡើងកាលពីអំឡុងខែកុមម្ភៈ ឆ្នាំ ២០២១ នៅភូមិស្រង៉ែ សង្កាត់ស្រង៉ែ ក្រុងសៀមរាប។

របាយការណ៍បានបន្តថានៅថ្ងៃទី ០៣ ខែមេសា ឆ្នាំ ២០២១ ឈ្មោះធី ជា បានមកប្តឹង នៅប៉ុស្តិ៍រដ្ឋបាលស្រង៉ែ ថា ក្មេងរងគ្រោះឈ្មោះ ទ.អ អាយុ ៤ឆ្នាំ បានប្រាប់ថា តាបង្កើត ឈ្មោះលាក់ លាង បានរំលោភសេពសន្ថវៈមកលើខ្លួនបាន៣ដង។ ក្រោយពីទទួលបណ្តឹងរួច សមត្ថកិច្ចបានរាយការជូន លោកកើត វណ្ណារ៉េត ព្រះរាជអាជ្ញា សុំគោលការកោះហៅ ជនសង្ស័យមកសាកសួរ។
ជនសង្ស័យឈ្មោះ លាក់ លាង អាយុ៥២ឆ្នាំ បានសារភាពថា រូបគេបានរំលោភសេពសន្ថវៈ មកលើ កុមារងគ្រោះត្រូវជាចៅបង្កើតរបស់ខ្លួន បានចំនួន២ ដងពិតប្រាកដមែន។

បើតាមរបាយការណ៍បានបន្ថែមថាជនរងគ្រោះ ជាក្មេងកំព្រា រស់នៅជាមួយជីតា ដែលជាជនសង្ស័យ។ ដោយឡែកជនរងគ្រោះ បានប្រគល់ឲ្យមន្ទីរសង្គមកិច្ចខេត្តសៀមរាប។

សូមជម្រាបថាកុមារងគ្រោះ ត្រូវបាន
ឪពុកស្លាប់ចោល ហើយម្តាយទៅតាមប្តីថ្មី ទុកនាងអោយនៅជាមួយជីតាជួយមើល។

ករណីនេះសមត្ថកិច្ចកសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ភ្នំពេញ៖អគ្គស្នងការដ្ឋាននគរបាលជាតិ បាន ច្រានចោលទាំងស្រុងចំពោះព័ត៌មាន ប្រឌិតថា លោកនេត សាវឿន បានទទួលមរណភាព។

អ្នកនាំពាក្យអគ្គស្នងការដ្ឋាននគរបាលជាតិបានសូមជម្រាបជូនសាធារណជន អ្នកសារព័ត៌មាន និងពិសេសបណ្ដាញទំនាក់ទំនងសង្គម មេត្តាជ្រាបថា ថ្មីៗនេះ ពិនិត្យឃើញថានៅលើបណ្ដាញសង្គមមានជនអគតិបានបង្កើតគណនីហ្វេសប៊ុកបង្ហោះរូបភាពកែឆ្នៃ និងខ្លឹមសារព័ត៌មានមិនពិតដោយបំភ្លៃថា​ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិទទួលមរណភាព។
ការផ្សព្វផ្សាយនេះផ្ទុយពីការពិតទាំងស្រុង ដែល​បច្ចុប្បន្ននេះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន មានសុខភាពរឹងមាំ បាននិងកំពុងបញ្ជាដឹកនាំកម្លាំងនគរបាលជាតិទូទាំងប្រទេស ក្នុងប្រតិបត្តិការក្សាការពារសន្តិសុខ សណ្តាប់ធ្នាប់សារធារណ: និងសុវត្ថិភាពសង្គមជាពិសេស ក្នុងយុទ្ធនាការប្រយុទ្ធប្រឆាំងនឹងសង្រ្គាមកូវីដ-១៩ ក៏ដូចជាក្នុងឱកាសបុណ្យចូលឆ្នាំប្រពៃណីជាតិខ្មែរដែលនឹងប្រព្រឹត្តទៅនាពេលខាងមុខនេះ។

អ្នកនាំពាក្យនៃអគ្គស្នងការដ្ឋាននគរបាលជាតិ សូមប្រកាសបដិសេធ និងច្រានចោលទាំងស្រុងនូវព័ត៌មានប្រឌិត​ ដែលមិនត្រឹមតែប្រមាថដល់កិត្តិយស​ អាយុជីវិតរបស់ ឯកឧត្តម នាយឧត្តមសេនីយ៍ សន្តិបណ្ឌិត នេត​ សាវឿន​ ជាមេបញ្ជាការជាន់ខ្ពស់នៃកងកម្លាំងនគរបាលជាតិប៉ុណ្ណោះទេ​ គឺថែមទាំងមានចេតនាបង្កភាពវឹកវរក្នុងជួរកងកម្លាំងនគរបាលជាតិ​ និងធ្វេីឱយប៉ះពាល់ដល់ស្ថិរភាពសន្តិសុខ​ សណ្តាប់ធ្នាប់សង្គមទៀតផង​ ។ យេីងខ្ញុំសូមធ្វេីការថ្កោលទោសដាច់អហង្ការការចំពោះទង្វេីទុច្ចរិត​គ្មានវិចារណញាណរបស់ជនអគតិទាំងនោះ និងស្នេីដល់អង្គភាពជំនាញបើកការស៊ើបអង្កេត ស្រាវជ្រាវ ស្វែងរកជនល្មេីស រួមទាំងបក្ខពួក និងមេក្លោងយកមកផ្តន្ទាទោស
តាមច្បាប់ជាធរមាន​។

អាស្រ័យហេតុនេះ សូមសាធារណជន អ្នកសារព័ត៌មាន ពិសេសបណ្ដាញទំនាក់ទំនងសង្គម សូមកុំយល់ច្រឡំ និងសូមអំពាវនាវកុំចូលរួមចែករំលែកព័ត៌មានក្លែងក្លាយនេះដើម្បីចៀសវាងបង្កការលំបាកក្នុងការអនុវត្តភារកិច្ចស្រាវជ្រាវរបស់នាយកដ្ឋានជំនាញ និងអាចប្រឈមមុខចំពោះការអនុវត្តគោលការណ៍ជំនាញរបស់មន្ត្រីអនុវត្តច្បាប់៕SRP

ខេត្តព្រះសីហនុ៖កម្លាំងកងរាជអាវុធហត្ថ នៃទីបញ្ជាការកងរាជអាវុធហត្ថខេត្ដព្រះសីហនុ កាលពីថ្ងៃព្រហស្បតិ៍ ថ្ងៃទី០១ ខែមេសា ឆ្នាំ២០២១ បានឃាត់ខ្លួន បុរសម្នាក់ឈ្មោះ ហ៊ឹន ត្រឹង ហៅ ហេង សុវណ្ណា ពាក់ព័ន្ធករណីឆបោក រំលោភលើទំនុកចិត្ត និងកំហែងយក កាលថ្ងៃទី១៨ ខែមីនា ឆ្នាំ២០២០ ដល់ថ្ងៃទី២៥ ខែមករា ឆ្នាំ២០២១ ដែលបានប្រព្រឹត្តនៅក្រុង-ខេត្ដព្រះសីហនុ។

ការឃាត់ខ្លួនធ្វើឡើងតាមដី កាបញ្ជាឱ្យចូលខ្លួនលេខ០៧ អ.យុង/២១ របស់អយ្យការអមសាលាដំបូងខេត្តព្រះសីហនុចុះថ្ងៃទី៣១ ខែមីនា ឆ្នាំ២០២១ ចេញដោយលោក ពេញ ពិសិដ្ឋ ព្រះរាជអាជ្ញារងអមសាលាដំបូងខេត្តព្រះសីហនុ។

បុរសឈ្មោះ ហ៊ឹន ត្រឹង ហៅ ហេង សុវណ្ណា ភេទប្រុស អាយុ៤៩ឆ្នាំ ជនជាតិខ្មែរ មុខរបរអាជីវករ ស្នាក់នៅបច្ចុប្បន្នភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ។

ពាក់ព័ន្ធករណីខាងលើនេះ លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បានដាក់លិខិតជូនអភិបាលខេត្តព្រះសីហនុ និងជាប្រធានគណៈកម្មការការទប់ស្កាត់ការឆ្លងរាលដាល នៃជំងឺកូដ-១៩ ដោយសំណើសុំពិនិត្យយកសំណាក និងធ្វើចត្តាឡីស័កលើបុរសរូបនេះ ដើម្បីបន្តនីតិវិធីបញ្ជូនទៅសាលាដំបូងខេត្តព្រះសីហនុចាត់ការតាមនីតិវិធីច្បាប់៕SRP

ខេត្តព្រះវិហារ៖បុរសចំនួន៣នាក់ត្រូវសមត្ថកិច្ចឃាត់ខ្លួនបញ្ជូនទៅតុលាការដើម្បីអនុវត្តតាមផ្លូវច្បាប់ពាក់ព័ន្ធករណីគ្រឿងញៀន។

តាមរបាយការណ៍បានឲ្យដឹងថានៅយប់ថ្ងៃទី៣០-៣១ ខែមីនា ឆ្នាំ២០២១ នគរបាលរដ្ឋបាលស្រយ៉ង់ សហការជាមួយកម្លាំងនគរបាលផ្នែកប្រឆាំងបទល្មើស នៃអធិការដ្ឋាននគរបាលស្រុកគូលែន បានល្បាតពួនស្ទាក់ពេលយប់ធ្វើការបំបែកក្រុមក្មេងទំនើង១ក្រុមដោយ ឃាត់ខ្លួនមុខសញ្ញា១នាក់ ឈ្មោះ ពិសី ប៊ុនថេន ភេទប្រុស អាយុ២២ឆ្នាំ មុខរបរមិនពិតប្រាកដ រស់នៅភូមិស្រយ៉ង់ជើង ឃុំស្រយ៉ង់ ស្រុកគូលែន ខេត្តព្រះវិហារ រកឃើញម្ស៉ៅក្រាមពណ៌សថ្លាសង្ស័យថាជាសារធាតុញៀន០១កញ្ចប់តូច ទូរស័ព្ទ១គ្រឿង ធ្វើតេស្តិ៍ទឹកនោមរកសារធាតុញៀន(វិជ្ជមាន)។
របាយការណ៍បន្តថា ថ្ងៃទី៣១ ខែមីនា ឆ្នាំ២០២១ វេលាម៉ោង៦និង៤០នាទី កម្លាំងជំនាញសហការ នគរបាលរដ្ឋបាលស្រយ៉ង់ និងដោយមានការយល់ព្រមពីម្ចាស់ផ្ទះ ឈ្មោះ លី ព្រួច ភេទស្រី អាយុ៥០ឆ្នាំ មុខរបរកសិករ រស់នៅភូមិស្រយ៉ង់ជើង ឃុំស្រយ៉ង់ ស្រុកគូលែន បានអនុញាតអោយកម្លាំងធ្វើការឆែកឆេរ
ផ្ទះបានរកឃើញមុខសញ្ញាចំនួន០២នាក់ទៀត មានឈ្មោះដូចខាងក្រោម៖
១. ឈ្មោះ ប៉ាវ ពេជ្រ ភេទប្រុស អាយុ២០ឆ្នាំ មុខរបរមិនពិតប្រាកដ រស់នៅភូមិស្រយ៉ង់ជើង ឃុំស្រយ៉ង់ ស្រុកគូលែន បានឆែកឆេរលើខ្លួនឃើញម្ស៉ៅក្រាមពណ៌សថ្លាសង្ស័យថាជាសារធាតុញៀន០១កញ្ចប់តូច។
២. ឈ្មោះ ពល់ ធីរ៉ា ភេទប្រុស អាយុ២០ឆ្នាំ មុខរបរមិនពិតប្រាកដ រស់នៅភូមិស្រយ៉ង់ជើង ឃុំស្រយ៉ង់ ស្រុកគូលែន ឆែកឆេរឃើញម្ស៉ៅក្រាមពណ៌សថ្លាសង្ស័យថាជាសារធាតុញៀន សរុបចំនួន១០កញ្ចប់(០៩កញ្ចប់តូច និង០១កញ្ចប់ធំ)បន្ថែមទៀត និងដកហូតឧបករណ៍ប្រើប្រាស់គ្រឿងញៀន ថង់វេចខ្ចប់មួយចំនួន ទូរស័ព្ទដៃចំនួន០៣គ្រឿង។

របាយការណ៍បានបញ្ជាក់ថាក្នុងកិច្ចប្រតិបត្តិការនេះ សរុបមុខសញ្ញាចំនួន០៣នាក់ ម្ស៉ៅក្រាមពណ៌សថ្លាសង្ស័យថាជាសារធាតុញៀនចំនួន១២កញ្ចប់(១១កញ្ចប់តូច និង០១កញ្ចប់ធំ) ឧបករណ៍ប្រើប្រាស់គ្រឿងញៀន ថង់សម្រាប់វេចខ្ចប់មួយចំនួន និងទូរស័ព្ទដៃចំនួន០៤គ្រឿង៕SRP

ភ្នំពេញ៖នៅថ្ងៃអាទិត្យ ៧រោច ខែចេត្រ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៤ ខែមេសា ឆ្នាំ២០២១​នេះ ជាថ្ងៃខួបកំណើតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា គម្រប់ ៧០ ឈានចូល ៧១ ឆ្នាំ។

សម្ដេចតេជោហ៊ុន សែន បានបង្ហោះសារនៅក្នុង
ទំព័រ page facebook ផ្លូវការរបស់សម្ដេច ថា«ចៅ៤នាក់យកនំនិងផ្កាមកជូនពរជីតា ពេលជីតាកំពុងហាត់ប្រាណដើម្បីបានឆាប់ត្រឡប់ទៅផ្ទះវិញឱ្យបានមុនម៉ោង៧យប់។
ចៅមាសចៅស្រីទី៩គូររូបនិងសរសេរលិខិតជា
ភាសាខ្មែរ អង់គ្លេស និងចិនជូនពរជីតា។
ដំណាក់កាលកូវីដគឺមានតែធ្វើបែបនេះ
ហើយទើបល្អ៕SRP

ខេត្តសៀមរាប៖លំនៅដ្ឋានប្រជាពលរដ្ឋមួយក្នុងផ្លូវបានអគ្គិភ័យឆាបឆេះទាំងស្រុង រសៀលថ្ងៃទី០៣ ខែមេសា ម្សិលមិញុ។

ហេតុការណ៍បានកើតឡើងស្ថិត
នៅភូមិខាងត្បូង ឃុំមោង ស្រុកស្រីស្នំ ខេត្តសៀមរាប។

មន្ត្រីមូលដ្ឋានឲ្យដឹងថាផ្ទះដែលរងការឆេះ ប្រភេទឈើលើថ្មក្រោម មានទំហំ​ ៩ម៉ែត្រគុណ៦ម៉ែត្រ ម្ចាស់ឈ្មោះ សរ សួល ភេទប្រុស អាយុ៤១ឆ្នាំ​។

ករណីនេះបណ្តាលអោយខូចខាត គ្រែដេក៤ ទូរដាក់ខោអាវ៤ និងទូរទស្សន៍ ១គ្រឿង។​ ចំណែកមាសប្រាក់ នឹងរបស់របរសម្ភារមួយចំនួនផ្សេងៗត្រូវបានពលរដ្ឋ អ្នកជិតខាងជួយយកចេញទាន់ពេល។

សមត្ថកិច្ចបញ្ជាក់ថា បានជួយអន្តរាគមន៍ពន្លត់ ដោយកម្លាំងនគរបាលស្រុកស្រីស្នំប្រើទឹកអស់១ឡាន។ មូលហេតុដោយសារឆ្លងចរន្តអគ្គិសនី ពីផ្នែកខាងលើផ្ទះ៕SRP