ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៅព្រឹកនេះ បានធ្វើការអំពាវនាវ ដល់ប្រជាពលរដ្ឋ ឲ្យមានការប្រុងប្រយ័ត្ន ចំពោះបញ្ហាជំងឺកូវីដ19។

សម្ដេច ហ៊ុន សែន បានលើកឡើងថាថ្ងៃទី២៥ ខែធ្នូ នេះជាថ្ងៃបុណ្យគ្រីស្ទម៉ាស(Christmas) ដែលជាបុណ្យដ៏សំខាន់របស់បងប្អូនអ្នកគ្រីស្ទបរិស័ទ (Christian)។ ដោយសារប្រទេសយើងកំពុងតែស្ថិតក្នុងការប្រុងប្រយ័ត្នប្រយុទ្ធប្រឆាំងទប់ស្កាត់ការរីករាលដាលជំងឺឆ្លងកូវីដ-១៩ ដូច្នេះហើយបងប្អូនគ្រីស្ទបរិស័ទយើងមិនបានប្រារព្ធពិធីនេះឲ្យបានអធិកអធ័មនោះទេ ប៉ុន្តែគឺធ្វើជាលក្ខណៈគ្រួសារនៅតាមគេហដ្ឋានរៀងៗខ្លួនដោយមានការប្រុងប្រយ័ត្នខ្ពស់។

សូមជូនពរបងប្អូនគ្រីស្ទបរិស័ទ ក៏ដូចជាប្រជាពលរដ្ឋខ្មែរទូទាំងប្រទេស មានសុខភាពល្អ ជៀសផុតពីជំងឺកូវីដ-១៩ ទាំងអស់គ្នា ទន្ទឹមនឹងនេះ សូមបងប្អូនប្រជាពលរដ្ឋយកចិត្តទុកដាក់ការពារកុំអោយឆ្លងកូវីដ ១៩ ដោយពាក់ម៉ាស និងឧស្សាហ៍ដុសលាងសម្អាតដៃជាមួយសាប៊ូ ជឹល ទឹកអាល់កុល រក្សាគម្លាតសុវត្ថិភាព ហើយចំពោះបងប្អូនកូនក្មួយដែលកំពុងធ្វើចត្តាឡីស័ក សូមអនុវត្តអោយបានខ្ជាប់ខ្ជួនត្រឹមត្រូវតាមការណែនាំរបស់ក្រសួងសុខាភិបាល៕SRP

ខេត្តសៀមរាប៖រថយន្តដឹកកូនជ្រូក បានបុក ផាស់ស្អាប់ បណ្ដាលឲ្យមនុស្សម្នាក់រងរបួសធ្ងន់។

ហេតុការណ៍បានកើតឡើងនៅវេលាម៉ោង១៨និង០០នាទី ទី២៤ ខែធ្នូ​ ឆ្នាំ២០២០ លេីផ្លូវជាតិលេខ៦៧ ស្ថិតនៅចំណុចភូមិគោកត្រាច ឃុំបាគង ស្រុកប្រាសាទបាគង ខេត្តសៀមរាប។

សមត្ថកិច្ចស្រុកប្រាសាទបាគង បាន
រាយការណ៍ថា គ្រោះថ្នាក់ចរាចរណ៍ នេះ រវាងរថយន្ត ម៉ាកហ៊ីយ៉ាន់ដាយពណ៌ស ដឹកកូនជ្រូក ចំនួន៥០០ក្បាល ពាក់ស្លាកលេខ កពង់ស្ពី៣A០៤៥៦ អ្នកបើកបរមិនស្គាល់អត្តសញ្ញាណ រត់គេចខ្លួនបាត់ មានទិសដៅពីត្បួងទៅជើង។ ចំណែក
ម៉ូតូកង់បី ផាស់ស្អាប់ ពាក់ស្លាកលេខ សៀមរាប ១AH ០៦៧៩ អ្នកបើកបរដោយឈ្មោះ ត្រា ភេទ ប្រុសអាយុ​៤០ ឆ្នាំ​ភូមិគោកត្រាច​ ឃុំ​បាគង ស្រុកប្រាសាទបាគង ខេត្ត​សៀមរាប​ ពីជើងទៅត្បួង បណ្ដាលឲ្យរបួសធ្ងន់ ត្រូវបានគេបញ្ជូនទៅមន្ទីពេទ្យ។

តាមសមត្ថកិច្ចបញ្ជាក់ថា មូលហេតុ អ្នក​បេីកបរម៉ូតូកង់បី ផាស់ស្អាប់ សង្ស័យអបើកបរល្បឿនលឿន មិនប្រកាន់ស្ដាំ ខ្វះការប្រុងប្រយ័ត្ន។

សុំបញ្ជាក់ថារថយន្តនិងម៉ូតូកង់បី ផាស់ស្អាប់ សមត្ថកិច្ច យកទៅ រក្សាទុកនៅអធិការនគរបាលស្រុកប្រាសាទបាគង ដើម្បីរង់ចាំការដោះស្រាយ៕SRP

ភ្នំពេញ៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា​ នៅរសៀលថ្ងៃពុធ​ ថ្ងៃទី ២៣​ ខែធ្នូ ឆ្នាំ២០២០ ម្សិលមិញ
បានអញ្ជើញដឹកនាំកិច្ចប្រជុំគណៈកម្មាធិការកណ្តាលកាកបាទក្រហមកម្ពុជា​ ដេីម្បីពិភាក្សានិងអនុម័ត​លេីរបៀបវារៈសំខាន់ៗដូចខាងក្រោម​ ៖
១/ របាយការណ៍សកម្មភាពឆ្នាំ២០២០ និងទិសដៅឆ្នាំ២០២១។
២/ របាយការណ៍ចំណូល ចំណាយ ឆ្នាំ២០២០​ និងការព្យាករណ៍ ចំណូលថវិកានៅឆ្នាំ២០២១។
៣/ ការស្នើសុំអនុម័តផែនការថវិកាសម្រាប់ចំណាយជាអាទិភាពនៅ ឆ្នាំ២០២១។
៤/ បញ្ហាផ្សេងៗ។

ក្នុងឱកាសនោះ​ សម្តេចកិត្តិព្រឹទ្ធបណ្ឌិត​ប្រធាន​ បានថ្លែងនូវការកោតសរសេីរយ៉ាងក្រៃលែង​ចំពោះ​ ថ្នាក់ដឹកនាំ​ សមាជិក​ សមាជិកា​ គណៈកម្មាធិការកណ្តាល​ និងមន្ត្រី​កាកបាទក្រហមកម្ពុជាទាំងអស់​គ្រប់លំដាប់ថ្នាក់ ដែលបានខិតខំប្រឹងប្រែងបំពេញការងារមនុស្សធម៌ជួយដល់ប្រជាជនងាយរងគ្រោះបំផុតនៅទូទាំងប្រទេសប្រកបដោយប្រសិទ្ធភាពខ្ពស់​ ជាពិសេសក្នុងការឆ្លេីយតបគ្រោះទឹកជំនន់នាពេលកន្លងមក​ និងចូលរួមប្រយុទ្ធទប់ស្កាត់ការឆ្លងរីករាលដាលនៃជំងឺកូវីដ-១៩។

ជាមួយគ្នានេះ​ សម្តេចកិត្តិព្រឹទ្ធបណ្ឌិតប្រធាន​ បានថ្លែងអំណរគុណយ៉ាងជ្រាលជ្រៅចំពោះសប្បុរសជនជាតិ​ អន្តរជាតិទាំងអស់​ដែលផ្តល់សេចក្តីទុកចិត្ត​ និងបរិច្ចាគធនធានជូនដល់កាកបាទក្រហមកម្ពុជា​ បេីទោះបីជា​ កាកបាទក្រហមកម្ពុជា​ បានផ្អាកការប្រារព្ធទិវា​ពិភពលោកកាកបាទក្រហម​ និងអឌ្ឍចន្ទក្រហម​ ៨ឧសភា​ ដោយសារតែជំងឺកូវីដ-១៩ក៏ដោយ​ ហេីយជាពិសេសនោះ គឺព្រះរាជូបត្ថម្ភនូវព្រះរាជទ្រព្យដ៏ឧត្តុង្គឧត្តមបំផុតរបស់​ ព្រះករុណា​ ព្រះមហាក្សត្រ​ និងសម្តេចព្រះមហាក្សត្រី​ ព្រះវររាជមាតាជាតិខ្មែរ​ ហេីយដែលកាកបាទក្រហមកម្ពុជា​ បានយកទៅចាត់ចែងជួយដល់ប្រជានុរាស្ត្រងាយរងគ្រោះ​ និងរងគ្រោះដោយគ្រោះមហន្តរាយផ្សេងៗ​ប្រកបដោយតម្លាភាព​ និងគណនេយ្យភាព។

ទន្ទឹមនឹងនេះ សម្តេចកិត្តិព្រឹទ្ធបណ្ឌិតប្រធាន បានផ្តល់អនុសាសន៍ដល់មន្ត្រីប្រតិបត្តិទាំងអស់ ទាំងថ្នាក់កណ្តាល សាខា-អនុសាខា ព្រមទាំងយុវជន និងអ្នកស្ម័គ្រចិត្តកាកបាទក្រហមកម្ពុជា ត្រូវបន្តរក្សាសាមគ្គីភាព ពង្រឹងភាពរឹងមាំ ភាព​ម្ចាស់ការ​ និងខិតខំបំពេញការងារបន្ថែមទៀត ដើម្បីជួយសម្រាលការលំបាកជូនដល់ប្រជាពលរដ្ឋបានកាន់តែច្រើនថែមទៀត៕SRP

ភ្នំពេញ៖សម្តេចអគ្គមហាពញាចក្រី ហេង សំរិន ប្រធានរដ្ឋសភា នៅព្រឹកថ្ងៃទី២៤ ខែធ្នូ ឆ្នាំ២០២០ បានដឹកនាំកិច្ចប្រជុំគណៈកម្មាធិការអចិន្រ្តៃយ៍រដ្ឋសភា។ អង្គប្រជុំបានអនុម័តកំណត់កាលបរិច្ឆេទ បន្តសម័យប្រជុំរដ្ឋសភាលើកទី៥ នីតិកាលទី៦ នៅព្រឹកថ្ងៃទី២៩ ខែធ្នូ ឆ្នាំ២០២០ ខាងមុខ។

សម័យប្រជុំរដ្ឋសភានៅព្រឹកថ្ងៃទី២៩ ខែធ្នូ នឹងប្រកាសសុពលភាព នៃអាណត្តិតំណាងរាស្រ្តទាំងពីររូប មានឯកឧត្តម លី ស៊ុគ្រី ជាតំណាងរាស្រ្តថ្មីមណ្ឌលខេត្តតាកែវ ជំនួសឯកឧត្តម សុខ សូកាន ដែលបានសុំលាលែង និងឯកឧត្តម សៅ សារ៉ាត់ ជាតំណាងរាស្រ្តថ្មីមណ្ឌលខេត្តប៉ៃលិន ជំនួសលោកជំទាវ បាន ស្រីមុំ ដែលបានលាលែង។

ក្នុងសម័យប្រជុំរដ្ឋសភានាពេលនោះ នឹងរៀបចំបោះឆ្នោតជ្រើសតាំង សមាជិកថ្មី នៃគណៈកម្មការអបរំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ និងគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង ផងដែរ៕SRP

ខេត្តសៀមរាប៖នារីម្នាក់ត្រូវបាន នគរបាលប៉ុស្តិ៍ឃុំប្រដាក់ស្រុកបន្ទាយស្រីឃាត់ខ្លួន ករណីជួញដូរនិង ប្រើប្រាស់នូវសារធាតុញៀនខុសច្បាប់។

ការឃាត់ខ្លួននៅម៉ោង១៩និង ៣០នាទី ថ្ងៃទី ២៣ខែធ្នូ ២០២០ ចំណុចក្រោយវត្តព្រះដាក់ ភូមិព្រះដាក់​ ឃុំព្រះដាក់ ស្រុកបន្ទាយស្រី ខេត្តសៀមរាប។

ជនសង្ស័យ ឈ្មោះខា សំអាត រស់នៅភូមិ តាវៀន សង្កាត់សាលាកំរើក ក្រុងសៀមរាប ខេត្តសៀមរាប។

ដកហូតវត្ថុតាង​ ម្សៅ​មេ​តំ​ហ្វេ​តា​មីន​ ០១កញ្ចប់តូច ទូរស័ព្ទ០១គ្រឿង។ករណីនេះ សមត្ថកិច្ចជំនាញកំពុងកសាងសំណុំរឿងតាមនិតិវិធី៕SRP

ខេត្តសៀមរាប៖ផ្ទះមួយខ្នងរួមនឹងទ្រព្យសម្បត្តិត្រូវបានបំផ្លាញដោយអគ្គីភ័យ។ ហេតុការណ៍បានកើតឡើង នៅវេលាម៉ោង១៥និង00នាទី ថ្ងៃទី២៣ខែធ្នូ ឆ្នាំ២០២០ នៅចំណុច ភូមិព្រៃក្មេង ឃុំខ្នាត ស្រុកពួក ខេត្តសៀមរាប។

អធិការនគរបាលស្រុកពួកលោកវរសេនីយ៍ឯក
ទេព ពុំសែន បានឲ្យដឹងថា ម្ចាស់ផ្ទះ.រងគ្រោះឈ្មោះ សៅ កុសល់ ភេទស្រី អាយុ៤៤ឆ្នាំ (ប្រពន្ធ) និងប្ដីឈ្មោះ សេង មេត អាយុ៥៧ឆ្នាំ ជាកសិករ។

ករណីនេះបណ្ដាលឲ្យឆេះផ្ទះ១ខ្នងទាំងស្រុង ទំហំ៤ម៉ែត្រ × ៦ម៉ែត្រ ក្រាលក្ដារ ជញ្ជីងក្ដារ ប្រក់ស័ង្កសី កំពស់ពីដីទៅក្ដារក្រាល ២,៥០ម៉ែត្រ។និងឆេះអស់រួមមាន÷
-ស្រូវ ៨ការុងធំ (800Kg)
-អង្ករ ៧០គីឡូក្រាម
-ប្រាក់ចំនួន ២០.០០០០៛(ម្ភៃម៉ឺន)រៀល
-កង់ចំនួន ២គ្រឿង
-ទូរទស្សន៍ ១គ្រឿង
និងសម្ភាខោអាវពូកដេកចានឆ្នាំងមួយចំនួន។

ការអះអាងរបស់ម្ចាស់ផ្ទះមូលហេតុ៖ បណ្ដាលមកពីទុសេខ្សែភ្លើងត្រង់ចំណុចបារ៉ែតភ្លើង ឆេះ ហើយពួកគាត់ស្រែកហៅគ្នីគ្នាពន្លត់ភ្លើងមិនឈ្នះ។

មានការជួយអន្តរាគមន៍ ពីឡានទឹករបស់អធិការដ្ឋាន ប៉ុន្តែចូលមិនដល់ ដោយផ្លូវចង្អៀត មានចំងាយ២៥០ម៉ែត្រ ក្នុងនោះមានការជួយអន្ដាគមន៍ ពីកងកម្លាំង និងប្រជាពលរដ្ឋ ដោយប្រើម៉ូទ័របាញ់ និងដោយដៃ   ផងដែរ៕SRP

ខេត្តសៀមរាប៖ប៉ូលិសស្រុកស្វាយលើ បានឃាត់ខ្លួន កម្មករសំណង់ម្នាក់ ទៅតាមបណ្តឹង
របស់គ្រួសារជនរងគ្រោះ ករណីចាប់រំលោភក្មេងស្រី បានសម្រេច។

ការឃាត់ខ្លួន ធ្វើឡើងនៅរសៀល ថ្ងៃទី២៣ ខែធ្នូ ម្សិលមិញ ស្ថិតនៅភូមិខ្នារក្រៅ ឃុំកន្ទួត ស្រុកស្វាយលើ ខេត្តសៀមរាប។

លោកវរសេនីយ៍ឯកស៊ុន អេង អធិការនគរបាលស្រុកស្វាយលើ បានឲ្យដឹងថា ជនសង្ស័យ មាន ឈ្មោះមួក ម៉េង ភេទប្រុស អាយុ៣៥ឆ្នាំ មានស្រុកកំណើតភូមិដូនស្វា ឃុំសំរោងយា ស្រុកពួក ខេត្តសៀមរាប។ ស្នាក់នៅបណ្តោះអាសន្នភូមិខ្នារក្រៅឃុំកន្ទួត ស្រុកស្វាយលើ ខេត្តសៀមរាប ដែលពាក់និងបទល្មើសរំលោភសេពសន្ថវៈ។

លោកអធិការបន្តថា នៅវេលាម៉ោង១០និង៤០នាទីថ្ងៃទី២២ ខែធ្នូឆ្នាំ២០២០ ជនរងគ្រោះឈ្មោះ រ ស.ត អាយុ១០ឆ្នាំ រស់នៅ ស្រុកពួក ខេត្តសៀមរាប។

ជនរងគ្រោះបានទៅដាំបង្គោលរបង និងដាក់លួសបន្លា នៅចំណុចដីចំការឈ្មោះរៀម វ៉ាន់សាក់ ភូមិខ្នារក្រៅឃុំកន្ទួតស្រុកស្វាយលើ ខេត្តសៀមរាប ជាមួយឪពុកបង្កើតនិងពូ ព្រមទាំងជនសង្ស័យ។ ពេលទៅដល់ចំណុចដីចំការ ឪពុកជនរងគ្រោះ បានដាំបង្គោលរបង នៅចំងាយពី ជនរងគ្រោះប្រហែល២០០ម៉ែត្រ។

ចំណែកជនសង្ស័យនិងជនរងគ្រោះ បានវាយបន្លាលួស ជាមួយគ្នាដោយជនរងគ្រោះ ជាអ្នកទាញបន្លាលួសជនសង្ស័យ ជាអ្នកដំបន្លាលួសភ្ជាប់និងបង្គោលរបង។

នៅពេលជនរងគ្រោះ ហត់អស់កម្លាំង ក៏បានទៅសំរាកនៅព្រៃល្បះក្នុងចំការ។ ជនសង្ស័យ ក៏ដើរតាមពីក្រោយ សំដៅទៅរក ហើយបានធ្វើសកម្មភាព ចាប់ផ្តូល ទៅនិងដីរួច សង្កត់ សំរាតខោ ត្រឹមក្បាលជង្គង រួច រំលោភតែម្ដង
ធ្វើឲ្យជនរងគ្រោះ ឈឺចុកចាប់ ក៏ខំរើបំរាស់
និងស្រែកយំ ស្របពេលនោះ ឪពុក មកទាន់ជនសង្ស័យ ក៏ឈប់សកម្មភាព ហើយគេចខ្លួននៅក្នុងដីចំការ។

ជនសង្ស័យ សារភាពថា ពិតជាបានប្រព្រឹត្ត ដូចការចោទប្រកាន់មែន។បច្ចុប្បន្ន កសាងសំណុំរឿង ដើម្បីបន្តនិតិវិធីទៅតាមផ្លូវច្បាប់៕SRP

ខេត្តកំពង់ចាម៖លោក អ៊ុន​​ ចាន់ដា​ អភិបាលខេត្តកំពង់ចាម​ ​នារសៀល​ ថ្ងៃទី២៣ ខែធ្នូ ម្សិលមិញ បាន​ដឹកនាំ​មន្ត្រី​ជំនាញ​ពាក់ព័ន្ធ​ និង​អាជ្ញាធរ​មូលដ្ឋាន​ អញ្ជេីញចុះ​ពិនិត្យ​គម្រោង​ស្ថាបនា​​ផ្លូវ​ក្រាល​កៅស៊ូ​បេទីម​ លើកំណាត់ផ្លូវកម្ពុជាក្រោម ប្រវែង​៨៤០ម៉ែត្រ ទទឹង​៨ម៉ែត្រ​ ចាប់ពីរង្វង់មូល (១-៧៩) ដល់ក្រោយអង្គភាពរដ្ឋករទឹក ស្ថិតនៅក្នុងសង្កាត់បឹងកុក ក្រុងកំពង់ចាម ដេីម្បី​ជំរុញ​ដល់​ការ​សាងសង់​ ឲ្យមានគុណភាពល្អ និង​ការ​ប្រើប្រាស់​បាន​យូរ​អង្វែង​។​

ឆ្លៀត​​​​ក្នុង​ឱកាស​អញ្ជើញ​​ ចុះពិនិត្យគម្រោងស្ថាបនា ផ្លូវ នេះដែរ លោក​​ អ៊ុន​ ចាន់ដា បានជួបសំណេះសំណាលាល​ និងសាកសួរសុខទុក្ខ បងប្អូន​ ប្រជាពលរដ្ឋ ដែល​រស់នៅ​អម​សងខាង​ផ្លូវនោះ​ ដោយ​​គាត់​ពិត​ជា​​មាន​ការ​ត្រេកអរ​ ជាខ្លាំង ចំពោះ​រដ្ឋបាល​ ខេត្តកំពង់ចាម ដែល​បាន​ផ្តល់​កញ្ចប់​ថវិកា​ប្រចាំឆ្នាំ​​ សម្រាប់​ការ​កសាង​ផ្លូវ​មួយ​ខ្សែ​នេះ​ឡើង​ បង្ក​លក្ខណៈ​ងាយ​ស្រួល​ដល់​ការ​​ធ្វើដំណើរ​ ​ក៏ដូចជា​ការ​ដឹក​ជញ្ជូន​ទំនិញ​​យក​ទៅ​លក់​នៅ​ផ្សារ​បឹងកុក​ផងដែរ។

គួរ​បញ្ជាក់​ផង​ដែរ​ថា​ ជាមួយ​គ្នា​នោះ​ក៏មាន​ការ​ស្ថាបនា​ផ្លូវ​ក្រាល​កៅស៊ូ​ប្រភេទ​AC​ ចំនួន​៣ខ្សែ​ផ្សេង​ទៀត​ ​រួមមាន​៖​ ខ្សែទី១ (ផ្លូវលេខ ៧ ចាស់ ) ប្រវែង ១,៥៦២ ម៉ែត្រ ទទឹង ១០ ម៉ែត្រ ចាប់ពីកែងវរង្វង់មូល ១-៧៩ ភូមិទី៦ សង្កាត់វាលវង់ ដល់ផ្លូវមុនីវង្ស ភូមិទី៤ សង្កាត់ វាលវង់ ក្រុងកំពង់ចាម។

ខ្សែទី២ (ផ្លូវលេខ ៥១) ប្រវែង​ ៥១២ ម៉ែត្រ ទទឹង ៨ ម៉ែត្រ ចាប់ពីស្តុបលំហែរផ្លូវជាតិលេខ៧ថ្មី​ ភូមិបឹងស្នាយ​ សង្កាត់សំបួរមាស​ ដល់ផ្លូវលេខ៧ចាស់​ ភូមិទី៦ សង្កាត់វាលវង់​ ក្រុងកំពង់ចាម។

និង​ខ្សែទី៣ (ផ្លូវលេខ ៥៥) ប្រវែង ៧៧១ ម៉ែត្រ ទទឹង ៧,៥ម៉ែត្រ ៨ម៉ែត្រ ចាប់ពីផ្លូវភ្លោះព្រះបាទ មុនីវង្ស ភូមិទី៤ សង្កាត់វាលវង់ ទល់ផ្លូវលេខ ៨៥ ភូមិទី៦ សង្កាត់វាលវង់ ក្រុងកំពង់ចាម​ ៕SRP

ខេត្តកំពង់ចាម៖លោ អ៊ុន​ ចាន់ដា​ អភិបាលខេត្ត​កំពង់ចាម​ បាន​ថ្លែង​ថា​ យើងត្រូវប្រើប្រាស់ឲ្យអស់លទ្ធភាពធនធាន ដែលបានពីថ្នាក់ជាតិតាមរយៈក្រសួង ឬធនធានពីដៃគូនានា ដើម្បីបន្តការអភិវឌ្ឍន៍ជារៀងរាល់ឆ្នាំ ធ្វើយ៉ាងណាឲ្យជីវភាពរស់នៅ​ របស់ ប្រជាពលរដ្ឋ មានភាពប្រសើរឡើង ឲ្យបានទាន់ពេលវេលា។​

លោកថ្លែងយ៉ាងដូច្នេះក្នុងកិច្ចប្រជុំ ពិគ្រោះយោបល់លើសេចក្តីព្រាងកម្មវិធីវិនិយោគបីឆ្នាំរំកិល (២០២១-២០២៣)​ ដែល​បាន​ធ្វើ​ឡើង​នាព្រឹក​ថ្ងៃទី២៣​ ខែធ្នូ ឆ្នាំ២០២០​ នៅ​មន្ទីរ​ផែនការ​ខេត្តកំពង់ចាម​ ។

ថ្លែង​ក្នុង​កិច្ច​ប្រជុំ​នោះ​ដែរ​ លោក​​ អ៊ុន​ ចាន់ដា បាន​លេីក​ឡើង​ថា​​ លទ្ធផលសិក្ខាសាលា សមាហរណកម្ម កម្មវិធីវិនិយោគ ឃុំ សង្កាត់ ក្រុង ស្រុក ទទួលបានការគាំទ្រ​ សរុបចំនួន ២ ៣៧៤គម្រោង ស្មើនឹង៤៨% នៃគម្រោងស្នើឡើងចំនួន ៤ ៩១៣ គម្រោង ក្នុងនោះមានមន្ទីរ អង្គភាពគាំទ្របានចំនួន ២ ២២៤ គម្រោង និងអង្គការសង្គមស៊ីវិលគាំទ្របានចំនួន ១៥០គម្រោង។ ដោយឡែក គម្រោងវិនិយោគ កំពុងដំណើរការរបស់រដ្ឋបាលខេត្តមានចំនួន ៣៩គម្រោង ដែលត្រូវចំណាយថវិកាចំនួន ៣៥ ៥៤០ លានរៀល និងគម្រោងដែលមានថវិកាគាំទ្រមានចំនួន ៣៥៣ គម្រោង ដែលត្រូវចំណាយថវិកាចំនួន ១ ៥៦៧ ០៣៨ លានរៀល ដែលត្រូវអនុវត្តក្នុងឆ្នាំ២០២១។

លោក​អភិបាលខេត្ត​ បាន​សង្កត់​ធ្ងន់ថា​ គម្រោងទាំងអស់ នៅក្នុងកម្មវិធីវិនិយោគបីឆ្នាំរំកិល (២០២១-២០២៣) គឺជាផែនការសម្រាប់អនុវត្តនៅឆ្នាំ២០២១ សូមលោក -លោកស្រី ប្រធានមន្ទីរ អង្គភាពជំរុញការអនុវត្តគម្រោង នីមួយៗឲ្យចប់តាមការកំណត់ ដោយធ្វើការសហការជាមួយអាជ្ញាធរមូលដ្ឋានឲ្យបានជិតស្និទ្ធ។​ ជាមួយគ្នា​នោះ​ ក្រុមការងារកសាងផែនការខេត្ត រដ្ឋបាលក្រុង ស្រុក រដ្ឋបាលឃុំ សង្កាត់ ត្រូវត្រៀមខ្លួន ចាប់ផ្តើមដំណើការប្រមូលតម្រូវការអាទិភាពរបស់មូលដ្ឋាន នៅចុងខែមករា ដើម្បីដាក់ក្នុងផែនការ យុទ្ធសាស្រ្តថវិកាឲ្យបានទាន់ពេលវេលា ស្របតាមប្រកាសអន្តរក្រសួងលេខ ០១៤៩ ផក .ប្រក ចុះថ្ងៃទី០៧ ខែតុលា ឆ្នាំ២០២០​ របស់ក្រសួងផែនការ និងក្រសួងមហាផ្ទៃ ស្តីពី ការដាក់ឲ្យ ប្រើប្រាស់សេចក្តីណែនាំបំពេញបន្ថែម លើសេចក្តីណែនាំបច្ចេកទេស ស្តីពីការរៀបចំ និងកសាង កម្មវិធីវិនិយោគបីឆ្នាំរំកិលរាជធានី ខេត្ត ក្រុង ស្រុក ខណ្ឌ និងឃុំ សង្កាត់​ ៕SRP

ខេត្តបាត់ដំបង៖ផ្ទះនិងរោងស្តុកឥវ៉ាន់ ត្រូវបាន អគ្គិភ័យបំផ្លាញ ដោយការដុតទៀនទុកចោល។

ហេតុការណ៍បានកើតឡើង នៅវេលាម៉ោង ៣និង៤០នាទីទៀបភ្លឺ ឈានចូលថ្ងៃទី២៣ ខែធ្នូ ឆ្នាំ២០២០ នេះ នៅចំណុចក្រុមទី១៩ ភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង។

សមត្ថកិច្ចមូលដ្ឋានបានអោយដឹងថា ផ្ទះត្រូវឆេះ មានទំហំ ៤ម៉ែត្រX៥ម៉ែត្រ ធ្វើអំពីឈើ ប្រក់ស័ង្កសី ដំបូលស័ង្កសី និងជញ្ជីងស័ង្កសី (ខូចខាតទាំងស្រុង ) មានម្ចាស់ឈ្មោះ យាន វឿត ភេទប្រុស អាយុ៦៣ឆ្នាំ រស់នៅភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង រួមនិងសម្ភារខូចខាតមាន -កង់ចំនួន០១ គ្រឿង និងគ្រែដេក០១ សរុបជាទឹកប្រាក់ចំនួន ១០០០ដុល្លារនឹងរបស់របរជាច្រើនទៀត។

ចំណែករោងទាមស្តុកឥវ៉ាន់០១ខ្នង មានទំហំ ៦ម៉ែត្រX៩ម៉ែត្រ ធ្វើអំពីឈើ ប្រក់ស័ង្កសី ដំបូលស័ង្កសី និងជញ្ជាំងស្បូវ (ខូចខាត២០%) ដែលមានម្ចាស់រោងឈ្មោះ
វង់ សុផាន់ណា ភេទប្រុស អាយុ៣៨ឆ្នាំ រស់នៅភូមិព្រៃទទឹង ឃុំជ្រៃ ស្រុកថ្មគោល ខេត្តបាត់ដំបង សរុបជាទឹកប្រាក់ ចំនួន១០០ដុល្លារ។

ករណីនេះ សមត្ថកិច្ច ចុះអន្តរាគមន៍ ពន្លត់ដោយប្រើប្រាស់ទឹកអស់ចំនួន០១ឡានទើប អាចគ្រប់គ្រង បានទាំងស្រុង មិនអោយឆេះរាលដាល ទៅផ្ទះអ្នកជិតនោះទេ។

សមត្ថកិច្ចបានសន្និដ្ឋានថា មូលហេតុ ដែលផ្តើមអោយមានអគ្គិភ័យនេះ គឺបណ្តាលមកពីលោក យាន វឿត ដែលជាម្ចាស់ផ្ទះខាងលើបានដុតទៀនទុកចោល ដើម្បីថ្វាយបង្គំព្រះពេលទៀបភ្លឺ ទើបបណ្តាលអោយឆេះតែម្តង៕SRPដោយប៊ុនថេត

ភ្នំពេញ៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានៅថ្ងៃទី ២២ ខែធ្នូ ឆ្នាំ២០២០នេះ បានសម្រេចផ្តល់ថវិកាចំនួន ៧៩.០៦០.០០០រៀល ដល់សាខាកាកបាទក្រហមកម្ពុជា ខេត្តមណ្ឌលគីរី បន្ថែមពីលើថវិការបស់សាខាចំនួន ២១.២៤០.០០០រៀល ដើម្បីចាត់ចែងទិញស្បៀងអាហាររួមមាន អង្ករ មី និងត្រីខ សម្រាប់ចែកជូនប្រជាពលរដ្ឋងាយរងគ្រោះបំផុតចំនួន ១.១៨០គ្រួសារ រស់នៅក្នុងស្រុកកោះញែក និងស្រុកពេជ្រាដា ខេត្តមណ្ឌលគិរី។ គ្រួសារងាយរងគ្រោះបំផុតនីមួយៗនឹងទទួលបាន អង្ករ ២៥គីឡូក្រាម មី ១កេស និងត្រីខ ១០កំប៉ុង ដើម្បីសម្រាលដល់ជីវភាពប្រចាំថ្ងៃ។

សូមបញ្ជាក់ថា ក្នុងឆ្នាំ២០២០នេះ កាកបាទក្រហមកម្ពុជា ដែលមាន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានផ្តល់អំណោយមនុស្សធម៌ជូនប្រជាពលរដ្ឋរងគ្រោះ និងងាយរងគ្រោះបំផុតបានសរុបចំនួន ១០៤.៩៤២ គ្រួសារ។ ដោយឡែក ចាប់ពីថ្ងៃទី ១ ខែតុលា ដល់ថ្ងៃទី ២២ ខែធ្នូ ឆ្នាំ២០២០នេះ បានផ្តល់អំណោយមនុស្សធម៌ជូនប្រជាពលរដ្ឋរងគ្រោះដោយទឹកជំនន់ និងប្រជាពលរដ្ឋងាយរងគ្រោះបំផុត បានសរុបចំនួន ៤០.៥៩៣គ្រួសារ រស់នៅភូមិចំនួន១០៤១ ឃុំចំនួន៤៤៨ ស្រុកចំនួន១៧៩ និងរាជធានី-ខេត្តចំនួន២៥ (ក្នុងនោះឆ្លើយតបដោយទីស្នាក់ការថ្នាក់កណ្តាលចំនួន ១៤.៩៨៦គ្រួសារ និងដោយសាខាចំនួន ២៥.៦០៧គ្រួសារ)៕SRP

ខេត្តកំពង់ចាម៖ប្រជាពលរដ្ឋ​ នៅឃុំថ្មពូន ស្រុក​ព្រៃឈរ​ ខេត្តកំពង់ចាម​ ដែល​និយម​​ប្រកប​មុខរបរ​កសិកម្ម​ ប្រមាណ​ជា​៦០%​ លេី​ផ្ទៃដី​ប្រមាណ​ ជាង៥ពាន់ហិកតា នៅ​តែ​បន្ត​ដាំដុះ​ដំណាំ​ចេកណាំវ៉ា​ ព្រោះ​វា​មាន​ទីផ្សារ​ ដែលអាចផ្គត់ផ្គង់ ជីវភាពក្នុងគ្រួសារ
បានយ៉ាងល្អប្រសើរ ។

លោកស្រី​ សុទ្ធ​ សុភាព​ ជា​អ្នក​ដាំ​ដំណាំ​ចេក​ណាំវ៉ា​ និង​ជាឈ្មួញ​កណ្ដាល​ម្នាក់​ រស់នៅភូមិទួលថ្ម ឃុំ​ថ្មពូន​ បាន​ឲ្យដឹងថា​ ការ​ដាំ​ចេក​ណាំវ៉ា​នេះ​ ក្នុង​រយៈពេល​១ខែ​ ត្រូវប្រមូលផលបាន២ដង ដោយ​ក្នុង​១ដងបានពី​៣០០ទៅ៦០០ស្និត​។ ចំពោះ​ការ​ប្រមូល​ទិញ​ចេកណាំវ៉ា​ ជារៀងរាល់ថ្ងៃនេះ គឺ​គាត់​បាន​ទិញ​ចូល​ក្នុង​១ស្និត​តម្លៃ​១៥០០រៀល​ ហើយ​ដឹក​យក​ទៅ​លក់​ នៅរាជធានីភ្នំពេញ ក្នុង​១ស្និត​តម្លៃ​១៨០០រៀល​ ដោយ​ក្នុង​១រថយន្ត​ ពី២ទៅ៤ពាន់ស្និត។

ដោយ​ឡែក​ លោក​ស្រី​ ថ្លាង​ ចាន់លីម​ រស់នៅ​ភូមិទួលថ្ម​ ឃុំ​ថ្មពូន​ បាន​ឲ្យដឹងផងដែរថា​ ការ​ប្រមូល​ទិញ​ ចេកណាំវ៉ានេះ ដែរ គាត់​បាន​ទិញ​ចូល​ក្នុង​១ស្និត​តម្លៃ​១៥រៀល​ ហើយ​ដឹក​យក​ទៅ​លក់​នៅ​រាជធានីភ្នំពេញ​ ក្នុង​១ស្និត​តម្លៃ១៧០០រៀលទៅ១៨០០រៀល​ ដោយ​ក្នុង​១​​រថយន្ត​ ដឹកបានពី៣ពាន់ស្និត ទៅ​៤ពាន់​ស្និត​ ហេីយ​ក្នុង​ខែ​ដឹក​បានពី​៧ទៅ​៨ជេីង​ ​ចំពោះ​ប្រាក់​ចំណេញ​ត្រូវ​បែងចែក​ ទៅឲ្យថ្លៃឈ្នួល កម្មករ និង​ការ​ដឹក​ជញ្ជូន​ផងដែរ​។

លោក​ វុទ្ធី​ រស់នៅ​ក្នុង​ឃុំ​ថ្មពូន​ បាន​ឲ្យដឹងថា​ ការ​ប្រកប​មុខ​របរ​ ដាំដំណាំចេកណាំវ៉ានេះ គឺ​វា​ពិបាក​កំណត់​ដែរ​ ព្រោះ​ទិន្នន័យ​មិន​សូវ​ទៀងទាត់​ អាស្រ័យ​លើ​ចេក​ដាំ​ថ្មី​ និង​ចេក​ចាស់​ ព្រមជាមួយ​អាកាសធាតុ​ តាមរដូវកាលទៀតផង ក្នុង​នោះ​គាត់​មាន​ដី​ទំហំ​ជាង​៣​ហិកតា​ ដោយ​ប្រមូល​ផល​បាន​២ដង​ក្នុង​១ខែ​ ដែល​បាន​ប្រាក់​កម្រៃ​​​ចាប់​ពី​​៤០​ម៉ឺន​រៀល​ទៅ៥០​ម៉ឺន​រៀល​ ក្នុង​១ហិកតា​ គ្រាន់​ដោះស្រាយ​ជីវភាព​ក្នុង​គ្រួសារ​ ។

សូមបញ្ជាក់ផងដែរថា ដំណាំចេកគឺមានសារសំខាន់ណាស់ សំរាប់ធ្វើម្ហូប និងចំនីអាហាររួមមាន យកផ្លែចេកមកធ្វើ ចេកឆាប ចេកចៀន ស្ករគ្រាប់ចេក ចំរាញ់ចេញជាស្រាចេក ហើយត្រសូង​ និងដើមគេយកធ្វើម្ហូប ឬអន្លក់ផងដែរ៕SRP