Siem Reap Post – Page 14 – Siem Reap News, Cambodia News

ប៉ូលិសផ្កាយ២គង់ វុទ្ធី ចូលបំភ្លឺ ករណីយកលុយ២លានដុល្លារ រត់ការមិនបានសម្រេច

ភ្នំពេញ៖តាមរយៈបណ្ដាញសារព័ត៌មានក្នុងស្រុកបានចុះផ្សាយជាបន្តបន្ទាប់ថានៅព្រឹកថ្ងៃទី ៣០ ខែ តុលា ឆ្នាំ ២០២៥ លោកឧត្ដមសេនីយ៍ទោ គង់ វុទ្ធី អគ្គនាយករងនៃអគ្គនាយកដ្ឋានអត្តសញ្ញាណកម្ម បានចូលខ្លួនបំភ្លឺដល់ក្រុមប្រឹក្សាវិន័យ នៃ អគ្គនាយកដ្ឋានអត្តសញ្ញាណកម្ម ពាក់ព័ន្ធករណីយកលុយជនរងគ្រោះ ២លានដុល្លារ ដេីម្បីរត់ការការងារមិនបានសម្រេចហើយបែជាមិនព្រមប្រគល់លុយជូនជនរងគ្រោះវិញ។

ករណីនេះលោកឧត្ដមសេនីយ៍ទោ គង់ វុទ្ធី បានបដិសេដមិនបានឆបោកជនរងគ្រោះ ដូចសារព័ត៌មានបានផ្សាយនោះទេ តែបានទទួលស្គាល់ថា នៅខ្វះលុយជនរងគ្រោះប្រមាណ ២លានដុល្លារពិតប្រាកដមែន។ ជាមួយគ្នានេះដែរជនរងគ្រោះ នឹងចូលបំភ្លឺនៅ អគ្គនាយកដ្ឋានអត្តសញ្ញាណកម្មនៅព្រឹកស្អែកដោយយកឯកសារជាភស្តុតាងទៅជាមួយផងដែរ។ នៅរសៀលថ្ងៃទី ៣០ ខែ តុលា ឆ្នាំ ២០២៥ នេះ អគ្គាធិការដ្ឋាន ក្រសួងមហាផ្ទៃ ក៏បានអញ្ជេីញលោកឧត្ដមសេនីយ៍ទោ គង់ វុទ្ធី ទៅបំភ្លឺផងដែរ។

សូមជម្រាបថា លោកឧត្ដមសេនីយ៍ទោ គង់ វុទ្ធី អគ្គនាយករង នៃ អគ្គនាយកដ្ឋាន អត្តសញ្ញាណកម្ម បានទទួលប្រាក់ចំនួន ២លានដុល្លារ ដេីម្បីរត់ការការងារអោយជនបរទេស។ ប៉ុន្តែចាប់តាំងពីលោកឧត្ដមសេនីយ៍ទោ គង់ វុទ្ធី ទទួលបានលុយពីជនរងគ្រោះហើយ មានរយះពេលជាង ១ឆ្នាំហើយ លោកមិនបានធ្វើការអោយជនរងគ្រោះបានសម្រេចទេ ហេីយលុយ ២លានដុល្លារ ក៏មិនព្រមប្រគល់ជូនជនរងគ្រោះវិញដែរ។

ជុំវិញការបែកធ្លាយរឿងអាស្រូវរត់ការមិនបានសម្រេចនេះ ពីភ្នាក់ងារសារព័ត៌មាន សៀមរាប ប៉ុស្តិ៍ នៅពុំទាន់ទទួលបានការបំភ្លឺពីលោកឧត្ដមសេនីយ៍ទោ គង់ វុទ្ធី អគ្គនាយករង នៃ អគ្គនាយកដ្ឋាន អត្តសញ្ញាណកម្ម បាននៅឡើយទេរហូតដល់ម៉ោងផ្សាយនេះ៕SRP

ខេត្តសៀមរាប៖នគរបាលក្រុងសៀមរាបបានបញ្ជូនជនសង្ស័យចំនួនពីរនាក់ទៅកាន់សាលាដំបូងខេត្តសៀមរាបដើម្បីអនុវត្តតាមផ្លូវច្បាប់ពាក់ព័ន្ធករណីលួចម៉ូតូ។

ជនសង្ស័យ
១-ឈ្មោះ ទឺ សីហា ហៅតយ ភេទប្រុស អាយុ ១៥ឆ្នាំ មុខរបរសិស្ស មានស្រុកកំណើតភូមិពោធិ៍ដុះ ឃុំត្រពាំងធំខាងជើង ស្រុកត្រាំកក់ ខេត្តតាកែវ និងទីលំនៅបច្ចុប្បន្នភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប (ប្រវត្តិទោសគ្មាន)។
២-ឈ្មោះ ណាក់ មិនា ភេទប្រុស អាយុ ១៦ឆ្នាំ មុខរបរសិស្ស មានស្រុកកំណើតភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប និងទីលំនៅបច្ចុប្បន្នភូមិខ្នារផ្ទោល ឃុំស្រែណូយ ស្រុកវ៉ារិន ខេត្តសៀមរាប (ប្រវត្តិទោសគ្មាន)។

ជនសង្ស័យឈ្មោះ ទឺ សីហា ហៅតយ បានឆ្លើយសារភាពថា ខ្លួនជាអ្នកធ្វើសកម្មភាពចូលលួចម៉ូតូ ឈ្មោះ ណាក់ មិនា ជាអ្នកឈរមើលផ្លូវ និងជាអ្នកធាក់រុញម៉ូតូយកទៅធ្វើសោរ និងជិះរត់គេចខ្លួនទៅស្រុកវ៉ារិន បន្ទាប់មកពួកខ្លួនបានយកម៉ូតូដែលលួចបាននោះទៅដោះប្ដូរអាវម៉ាកហុងដាឌ្រីមពណ៌ខ្មៅ ស៊េរីឆ្នាំ២០១៤។

នគរបាលក្រុងសៀមរាបបានឲ្យដឹងថា ហេតុការណ៍លួចម៉ូតូបានកើតឡើង នៅថ្ងៃទី២៦ ខែតុលា ឆ្នាំ២០២៥ វេលាម៉ោង០៦និង១៨នាទី នៅចំណុចសណ្ឋាគារ ស្ថិតក្នុងភូមិវត្តបូព៌ សង្កាត់សាលាកំរើក ក្រុងសៀមរាប ដោយយកម៉ាកហុងដាឌ្រីម សេ១២៥ ស៊េរីឆ្នាំ២០២២ ពាក់ផ្លាកលេខ បាត់ដំបង ១AS ០១០៥។ ការចាប់ខ្លួនបានធ្វើឡើងថ្ងៃទី២៨ ខែតុលា ឆ្នាំ២០២៥ ដោយកម្លាំងអធិការដ្ឋាននគរបាលក្រុងសៀមរាប សហការណ៍ជាមួយកម្លាំងអធិការដ្ឋាននគរបាលស្រុកវ៉ារិន។

នគរបាលបានបញ្ជាក់ថា ជនរងគ្រោះ ម្ចាស់ម៉ូតូ
ឈ្មោះ ឋនរ-វ.ម ភេទស្រី អាយុ១៩ឆ្នាំ មុខរបរនិស្សិត មានទីលំនៅបច្ចុប្បន្នភូមិចំបកហែរ ឃុំកំពង់ថ្កូវ ស្រុកក្រឡាញ់។

ករណីនេះនគរបាលដកហូតវត្ថុតាង៖ ម៉ូតូចំនួន២គ្រឿងៈ ទី០១ម៉ាកហុងដាZOOMBER X ស៊េរីឆ្នាំ២០១៧ ពណ៌ខៀវក្រហម សេ១២៥ ពាក់ផ្លាកលេខ តាកែវ ១O ៦១០០ ដែលមានលេខតួ និងលេខម៉ាស៊ីន ៥០០១៦៩០ មានកញ្ចក់ ,ទី២ម៉ាកហុងដាឌ្រីម សេ១២៥ មានលេខតួ និងលេខម៉ាស៊ីន៦៣៩៤៣៣១ គ្មានផ្លាកលេខ បំពាក់អាវម៉ូតូស៊េរីឆ្នាំ២០១៤ ,ផ្លាកលេខ ចំនួន១សន្លឹក បាត់ដំបង ១AS ០១០៥ ,អាវម៉ូតូហុងដាឌ្រីម ពណ៌ខ្មៅ ស៊េរីឆ្នាំ២០២២ ចំនួន១ឈុត តែពុំមានគម្របអាវផ្នែកអាគុយ និងកន្រ្តកចំនួន១។

សូមជម្រាបថាប្រតិបត្តិការបង្ក្រាបនេះដោយមានការយកចិត្តទុកដាក់ជាប្រចាំពីសំណាក់ ឯកឧត្តម ប្រាក់ សោភ័ណ អភិបាលខេត្ត និងជាប្រធានគណៈបញ្ជាការឯកភាពខេត្តសៀមរាប ស្តីពីការពង្រឹងសន្តិសុខ សណ្តាប់ធ្នាប់សង្គម បង្ការ បង្រ្កាបរាល់បទល្មេីសគ្រប់ប្រភេទ និងអនុវត្តតាមអនុសាសន៍ណែនាំរបស់ ឯកឧត្ដម នាយឧត្ដមសេនីយ៍ ស ថេត អគ្គស្នងការនគរបាលជាតិ ដោយមានការចង្អុលដឹកនាំពីលោក ឧត្តមសេនីយ៍ទោ ហួត សុធី ស្នងការនគរបាលខេត្តសៀមរាប និងដឹកនាំផ្ទាល់ពីលោក វរសេនីយ៍ឯក ដា ចំរើន អធិការនគរបាលក្រុងសៀមរាប៕SRP

ចាប់ជនដៃដល់ពីរនាក់ ករណីបាញ់ប្រហារនគរបាលខេត្តកំពង់ធំ បណ្ដាលឱ្យស្លាប់ម្នាក់របួសធ្ងន់ម្នាក់

កម្លាំងនាយកដ្ឋាននគរបាលព្រហ្មទណ្ឌ បំបែកសំណុំរឿងបាញ់ប្រហារដល់នគរបាលខេត្តកំពង់ធំ, ជនដៃដល់២នាក់ត្រូវចាប់ខ្លួនបាននៅខេត្តបន្ទាយមានជ័យ

នៅថ្ងៃទី២៣ ខែតុលា ឆ្នាំ២០២៥ មានករណីជនសង្ស័យម្នាក់បានយកកាំភ្លើង ០១ដើមម៉ាក AK47 បាញ់រះទៅលើមន្រ្តីនគរបាលចំនួន០២នាក់ បណ្តាលឲ្យស្លាប់ម្នាក់ និងរបួសធ្ងន់ម្នាក់ នៅចំណុច ភូមិបែកចាន ឃុំអណ្តូងពោធិ ស្រុកតាំងគោក ខេត្តកំពង់ធំ និងបានយកកាំភ្លើង០១ដើម ម៉ាក K59 ពីរបស់សមត្ថកិច្ចរត់គេចខ្លួន។

ក្រោយពីមានហេតុការណ៍ខាងលើកើតឡើង ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងលោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ, កម្លាំងជំនាញរបស់នាយកដ្ឋាននគរបាលព្រហ្មទណ្ឌ ដឹកនាំលោកឧត្តមសេនីយ៍ត្រី ហ៊ុន មុន្នីរ័ត្ន, វរសេនីយ៍ឯក ហែម បូណា និងវរសេនីយ៍ឯក ឆាន់ គីមលី អនុប្រធាននាយកដ្ឋាន បានដឹងនាំសហការជាមួយស្នងការដ្ឋាននគរបាលខេត្តកំពង់ធំ ខេត្តកំពង់ចាម ខេត្តបន្ទាយមានជ័យ ធ្វើការស្រាវជ្រាវតាមនីតិវិធី និងជំនាញ រហូតកំណត់បានទីតាំងលាក់ខ្លួនរបស់ជនសង្ស័យខាងលើ។

លុះនៅថ្ងៃទី២៧ ខែតុលា ឆ្នាំ២០២៥ កម្លាំងជំនាញបានធ្វើការឃាត់ខ្លួនបានជនសង្ស័យចំនួន២នាក់ រួមមាន៖
១.ឈ្មោះ ថន ឌីណា ភេទប្រុស អាយុ៣៤ឆ្នាំ ជនជាតិខ្មែរ
២.ឈ្មោះ ថន សៀងហៃ ភេទប្រុស អាយុ២៩ឆ្នាំ ជនជាតិខ្មែរ (ជាអ្នកដឹកជនសង្ស័យរត់គេចខ្លួន) ឃាត់ខ្លួនត្រង់ចំណុចភូមិទួលពង្រ សង្កាត់ផ្សារកណ្តាលក្រុងប៉ោយប៉េត ខេត្តបន្ទាយមានជ័យ។

ដកហូតវត្ថុតាង អាវុធ១ម៉ាក AK47 បង់ចំនួន០១ គ្រាប់ចំនួន២២ នៅចំណុច ភូមិម្រាមទាក ឃុំជីរោទិ៍ទី២ ស្រុកត្បូងឃ្មុំ ខេត្តត្បូងឃ្មុំ។ ជនដៃដល់ត្រូវបានប្រគល់ជូនស្នងការដ្ឋាននគរបាលខេត្តកំពង់ធំ ដើម្បីចាត់ការបន្ដតាមនីតិវិធី៕SRP

Sponsored

ភ្នំពេញ៖លោកផែង វណ្ណៈ នៅមុននេះបន្តិចបានទម្លាយរឿងមួយដ៏រសើបពាក់ព័ន្ធនឹងទឹកលុយប្រមាណ ២លានដុល្លារ។

លោកផែង វណ្ណៈបានសរសេរបង្ហោះលើ account ទំព័រផេកផ្លូវការរបស់លោកថា៖ លោកឧត្ដមសេនីយ៍ទោ គង់ វុទ្ធី អគ្គនាយករង នៃ អគ្គនាយកដ្ឋាន អត្តសញ្ញាណកម្ម បានទទួលប្រាក់ចំនួន ២លានដុល្លារ ដេីម្បីរត់ការចូលសញ្ជាតិអោយជជនបរទេស។ ប៉ុន្តែ ចាប់តាំងពីលោកឧត្ដមសេនីយ៍ទោ គង់ វុទ្ធី ទទួលបានលុយពីជនរងគ្រោះហើយ មានរយះពេលជាង ១ឆ្នាំហើយ លោកមិនបានធ្វើការអោយជនរងគ្រោះបានសម្រេចទេ ហេីយលុយ ២លានដុល្លារ ក៏មិនព្រមប្រគល់ជូនជនរងគ្រោះវិញដែរ។

ការប្រេីប្រាស់តួនាទី បុណ្យស័ក្តិអួតអាង ដេីម្បីបោកប្រាស់ជនបរទេសមានច្រេីនករណីណាស់ ហេីយក៏មានអស់តួនាទី បុណ្យស័ក្តិរហូតជាប់គុកជាហូរហែរដែរ។ ប៉ុន្តែបុគ្គលខូចនៅតែខូច។ ចាំមេីលករណីនេះ តេី ឧត្ដមសេនីយ៍ទោ គង់ វុទ្ធី អគ្គនាយករងអត្តសញ្ញាណកម្ម មានវាសនាបែបណា ?

ជុំវិញការបង្ហោះសាររបស់លោកផែង វណ្ណៈ យ៉ាងដូច្នេះ ពីភ្នាក់ងារសារព័ត៌មានសៀមរាប ប៉ុស្តិ៍ មិនទាន់ទទួលបានការបំភ្លឺពី លោកឧត្ដមសេនីយ៍ទោ គង់ វុទ្ធី អគ្គនាយករង នៃ អគ្គនាយកដ្ឋាន អត្តសញ្ញាណកម្ម បាននៅឡើយទេគិតត្រឹមម៉ោងផ្សាយនេះ៕SRP

សម្ដេចតេជោ ហ៊ុន សែន៖ បញ្ហាព្រំដែនកម្ពុជា-ថៃ បានដើរហួសពីកិច្ចព្រមព្រៀងទីក្រុងប៉ារីស ព្រោះបានប្តឹងទៅ ICJ និងក្រុមប្រឹក្សាសន្ដិសុខ UN

សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា ដែលជាតួអង្គសំខាន់ផ្ដួចផ្ដើមចរចាសម្របសម្រួលជាមួយគ្រប់ភាគីទាំងអស់ រហូតឈានទៅបង្កើតបានទាំងស្រុងនូវកិច្ចព្រមព្រៀងសន្ដិភាពទីក្រុងប៉ារីស ២៣តុលា ១៩៩១ បានប្រតិកម្មចំពោះអ្នកដែលលើកឡើងឲ្យយកបញ្ហាព្រំដែនកម្ពុជា-ថៃ ប្ដឹងទៅសហប្រធាននៃកិច្ចព្រមព្រៀងសន្ដិភាពទីក្រុងប៉ារីស ដើម្បីកោះប្រជុំបន្ទាន់លើបញ្ហាព្រំដែននេះ។

ក្នុងសម័យប្រជុំលើកទី៤ នីតិកាលទី៥ នៃព្រឹទ្ធសភា នាព្រឹកថ្ងៃទី២៤ ខែតុលា ឆ្នាំ២០២៥ សម្ដេចតេជោ ហ៊ុន សែន បានអះអាងថា បញ្ហាព្រំដែនរវាងកម្ពុជា-ថៃ គឺបានដើរហួសពីកិច្ចព្រមព្រៀងសន្ដិភាពទីក្រុងប៉ារីសហើយ ព្រោះរាជរដ្ឋាភិបាលកម្ពុជា បានផ្ដល់ទៅកាន់តុលាការយុត្តិធម៌អន្ដរជាតិ(ICJ) និងក្រុមប្រឹក្សាសន្ដិសុខអង្គការសហប្រជាជាតិ ព្រមទាំងវេទិកាអន្ដរជាតិនានាដទៃទៀត។

បើតាមប្រសាសន៍របស់សម្ដេចតេជោ ហ៊ុន សែន, កិច្ចព្រមព្រៀងសន្ដិភាពទីក្រុងប៉ារីស មិនមានសមត្ថកិច្ចក្នុងការដោះស្រាយ ឬសម្របសម្រួលបញ្ហាព្រំដែនរវាងកម្ពុជា-ថៃឡើយ ហើយធាតុចូលរបស់កិច្ចព្រមព្រៀងនេះ បានដាក់បញ្ចូលក្នុងរដ្ឋធម្មនុញ្ញរបស់កម្ពុជាផងដែរ។ ម្យ៉ាងទៀតកិច្ចព្រមព្រៀងនេះ ក៏អស់សុពលភាពនៅពេលសភាធម្មនុញ្ញ បានក្លាយទៅជាសភាជាតិ បង្កើតរដ្ឋាភិបាល និងបានបញ្ចប់បេសកកម្មរបស់អង្គការសហប្រជាជាតិនៅកម្ពុជា។

សម្ដេចតេជោ ហ៊ុន សែន បានមានប្រសាសន៍យ៉ាងដូច្នេះថា «ឥឡូវមានអ្នកអំពាវនាវឲ្យប្ដឹងទៅសហប្រធានកិច្ចព្រមព្រៀងទីក្រុងប៉ារីស កោះប្រជុំជាបន្ទាន់ ទាក់ទិននឹងការឈ្លានពានរបស់ប្រទេសជិតខាង។ ប៉ុន្ដែសួរថា សហប្រធានគាត់ព្រមទេ? សាកល្បងសួរទៅឥណ្ឌូនេស៉ី និងបារាំងមើល តើគេព្រមកោះដែរទេ? ហើយហត្ថលេខីទាំងឡាយគេព្រមចូលរួមទេ ហើយដោះស្រាយរបៀបម៉េច […] នេះ! បានទៅហួសពីកិច្ចព្រមព្រៀងទីក្រុងប៉ារីស ដោយប្ដឹងទៅតុលាការយុត្តិធម៌អន្ដរជាតិ (ICJ) និងក្រុមប្រឹក្សាសន្ដិសុខអង្គការសហប្រជាជាតិ និងវេទិការអន្ដរជាតិដទៃទៀត»។

ទាក់ទិននឹងបច្ចុប្បន្នភាពនៃបញ្ហាព្រំដែនកម្ពុជា-ថៃ ត្រូវបានសម្ដេចតេជោ ប្រធានព្រឹទ្ធសភានៃកម្ពុជា គូសបញ្ជាក់ថា បានឈានដល់ដំណាក់កាលមួយនៃការធូរស្រាលហើយ បន្ទាប់ពីភាគីទាំងពីរកម្ពុជា-ថៃ បានបញ្ចប់នូវកិច្ចប្រជុំសំខាន់ៗប៉ុន្មានថ្ងៃមកនេះ ដែលទទួលបានលទ្ធផលប្រកបដោយផ្លែផ្កា ហើយក៏ឈានទៅការចុះហត្ថលេខាលើកិច្ចព្រមព្រៀងសន្ដិភាពមួយនៅថ្ងៃទី២៦ ខែតុលាខាងមុខ រវាងនាយករដ្ឋមន្ដ្រីកម្ពុជា និងនាយករដ្ឋមន្ដ្រីថៃ នៅប្រទេសម៉ាឡេស៊ី ក្នុងកិច្ចប្រជុំកំពូលអាស៊ាន៕SRP

សម្តេចតេជោ ហ៊ុន សែន៖ កម្ពុជា-ថៃ ជាម្ចាស់ហត្ថលេខី កំពុងមានទំនាស់ជាមួយគ្នា ដូច្នេះ កិច្ចព្រមព្រៀងទីក្រុងបារីសមិនអាចយកមកដោះស្រាយជម្លោះបានទេ

សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានថ្លែងអះអាងថា កិច្ចព្រមព្រៀងទីក្រុងបារីសមិនអាចយកមកដោះស្រាយជម្លោះខ្មែរ-ថៃបានទេ ព្រោះកម្ពុជា-ថៃ ដែលជាម្ចាស់ហត្ថលេខី កំពុងមានទំនាស់ជាមួយគ្នានឹងលើកយកហេតុផលពីការគោរពអធិបតេយ្យភាពគ្នាយកត្រូវតែរៀងៗខ្លួន។

ឆ្លើយតបទៅនឹងអ្នកចង់ឱ្យយកកិច្ចព្រមព្រៀងសន្តិភាពទីក្រុងបារីសទៅដោះស្រាយជាមួយថៃ សម្តេចតេជោ ហ៊ុន សែន បានថ្លែងថា«ឥឡូវមានអ្នកអំពាវនាវឱ្យប្ដឹងទៅសហប្រធានកិច្ចព្រមព្រៀងទីក្រុងបារីស កោះប្រជុំជាបន្ទាន់ទាក់ទិនជាមួយនឹងការឈ្លានពានរបស់ប្រទេសជិតខាង ត្រូវហើយ ប៉ុន្តែសួរថា សហប្រធានគាត់ព្រមទេ ? សាកល្បងសួរទៅឥណ្ឌូនេស៊ី និង ទៅបារាំងមើល៍ តើគេព្រមកោះទេ ? ហើយហត្ថលេខី ទាំងឡាយគេព្រមចូលរួមទេ ? ហើយដោះរបៀបម៉េច ? បើខាងថៃគេថា យើងរំលោភដីគេ យើងថាគេរំលោភដីយើង ចឹងគេៗ គោរពអធិបតេយ្យ របស់ខ្មែរតើ ប៉ុន្តែខ្មែរ ទៅឈ្លានពានគេ អើ យើងៗថា គោរពអធិបតេយ្យ របស់ថៃតើ ប៉ុន្តែថៃឈ្លានពានយើង ចោទគ្នាតែរបៀបហ្នឹង ដោះស្រាយបានទេ ? វាដោះស្រាយមិនបានទេ ? ឥឡូវដំណើរការឈានទៅរកការស្រុះស្រួលគ្នា ដែលប្រជុំប៉ុន្មានថ្ងៃនេះ វាមានការស្រុះស្រួលច្រើនហើយ ហើយអាចនឹងថ្ងៃទី២៦នេះ នឹងមានការចុះហត្ថលេខាលើកិច្ចព្រមព្រៀងសន្តិភាព»។

ប្រសាសន៍របស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជាខាងលើ ធ្វើឡើងក្នុងកិច្ចប្រជុំព្រឹទ្ធសភា នីតិកាលទី៥ សម័យប្រជុំលើកទី៤ ថ្ងៃទី២៤ ខែតុលា ឆ្នាំ២០២៥៕ ផ្សាយ៖ កន ចំណាន

Sponsored

ពលរដ្ឋសម្តែងការកោតសសើរ ចំពោះលោក ស្រេង សុផល ចាប់តាំងពីលោកឡើងកាន់តំណែងជាអភិបាលក្រុងសិរីសោភ័ណមក មានការរីកចំរើនពិសេសលើហេដ្ឋារចនាសម្ព័ន្ធផ្លូវថ្នល់

ខេត្តបន្ទាយមានជ័យ៖ប្រជាពលរដ្ឋនៅក្នុងក្រុងសិរីសោភ័ណ បានសម្តែងការកោតសសើរ និងអគុណលោក ស្រេង សុផល អភិបាលក្រុងសិរីសោភ័ណ្ឌ ដែលតែងតែយកចិត្តទុកដាក់គិតគូពីសុខទុករបស់ពួកគាត់។

ប្រជាពលរដ្ឋបានលើកឡើងថា ចាប់តាំងពី លោក ស្រេង សុផល កាន់តំណែងជាអភិបាលក្រុងសិរីសោភ័ណមក ឃើញថា មានការរីកចំរើន ពិសេសកែលម្អក្រុងឲ្យមានសោភាពស្រស់ស្អាតដើម្បីទាក់ទាញភ្ញៀវទេសចរណ៍ កសាងសមទ្ធផលនានា ដូចជាហេដ្ឋារចនាសម្ព័ន្ធ ផ្លូវថ្នល់ ប្រព័ន្ធលូជាដើម ដោយលោកតែងតែចុះជាប់ជាមួយប្រជាពលរដ្ឋជាប្រចាំ ដើម្បីចង់ដឹងពីសុខទុក ការលំបាក ខ្វះខាតយ៉ាងណាដើម្បីមានលទ្ធភាពជួយ និងរាការណ៍បន្តដល់ថ្នាក់ដឹកនាំ ។

ជាក់ស្តែងថ្មីៗនេះ លោកបានដឹកនាំក្រុមការងារមូលដ្ឋានចុះសម្របសម្រួលជាមួយប្រជាពលរដ្ឋ និងម្ចាស់ដី ក្នុងការបើកផ្លូវមួយខ្សែតាមសំណូមពររបស់ប្រជាពលរដ្ឋចំនួន២០គ្រួសារ ដែលបានស្នើសុំបើកផ្លូវសាធារណៈទទឹងទំហំ ៨ម៉ែត្រ ចាប់ពីចំណុចខាងត្បូងជាប់នឹងរបងអង្គការកុមារមេគង្គ រហូតដល់ ផ្លូវឡើងទៅផ្លូវទ្រខ្មែរ ពីមុនមកទីតាំងនេះពុំមានផ្លូវឡើយ។

ជាលិតផលប្រជាពលរដ្ឋ និងម្ចាស់ដី ក៏បានស្ម័គ្រចិត្តបរិច្ចាគដី និងរុះរើរបងថ្មរឹងមាំដោយយកគ្រឿងចក្រវាកម្ទេចចោល ដើម្បីប្រជាពលរដ្ឋក្នុងការធ្វើដំណើរ ពិសេសសិស្សានុសិស្សចេញចូលទៅសាលារៀន។

ជាមួយគ្នានោះដែរលោក អភិបាលក្រុង បានប្រាប់អ្នកសារព័ត៌មានថា ពាក់ព័ន្ធការបើកផ្លូវនៅចំណុចខាងលើនេះអាជ្ញាធរក្រុងសិរីសោភ័ណ បានសហការជាមួយមន្ត្រីជំនាញ អាជ្ញាធរសង្កាត់ ភូមិ និងប្រជាពលរដ្ឋ ចូលរួមសហការបើកផ្លូវនេះ នាថ្ងៃទី២១ ខែតុលា ឆ្នាំ២០២៥។ ហើយផ្លូវមួយខ្សែនេះអាជ្ញាធរគ្រោងធ្វើការសាងសង់ផ្លូវនាពេលខាងមុខដើម្បីបម្រើប្រយោជន៍សាធារណៈ។

លោក ស្រេង សុផល អភិបាលក្រុងសិរីសោភ័ណ បានបញ្ជាក់ថា លោកពិតជាអរគុណខ្លាំងណាស់នូវទឹកចិត្តដ៏ធំធេងរបស់បងប្អូនប្រជាពលរដ្ឋដែលលះបង់ដី ចាប់ពីដើមផ្លូវដល់ចុងផ្លូវ រហូតស្ម័គ្រចិត្តលះបង់វាយរបងថ្មពង្រីកផ្លូវ ចូលរួមជាមួយអាជ្ញាធរ ដើម្បីជាគុណប្រយោជន៍ដ៏សំខាន់សម្រាប់គោលនយោបាយរបស់រាជរដ្ឋាភិបាលកម្ពុជាសម្រាប់ឆ្នាំ២០៣០-២០៥០ខាងមុខនេះជាគោលដៅសម្រេច។

លោកអភិបាលក្រុងបានបញ្ជាក់ទៀតថា សម្រាប់ក្រុងសិរីសោភ័ណ្ឌមានសង្កាត់ចំនួន៧ នៅក្នុងសង្កាត់៤ ខាងក្នុងបើកបានជាង១០ខ្សែហើយ ក្នុងផ្លូវមួយខ្សែៗមធ្យមចន្លោះខ្ទង់ជាង៥០០ម៉ែត្រ ដែលបើកទម្លោះ ដែលពីមុនមកមិនមានផ្លូវ ហើយសង្កាត់ខាងក្រៅ ៣ថែមទៀតនោះ ក៏បើកបានបីខ្សែដែរ សុទ្ធតែជាការចូលរួមពីប្រជាពលរដ្ឋ៕SRP

ខេត្តបាត់ដំបង៖ឯកឧត្តម សុខ លូ អភិបាលខេត្តបាត់ដំបង នៅថ្ងៃទី២២ ខែតុលា ឆ្នាំ២០២៥ នេះ បានអញ្ជើញដឹកនាំកិច្ចប្រជុំក្រុមការងារចងក្រងខ្លឹមសារប្រវត្តិល្អាងនានានៅរមណីយដ្ឋានភ្នំសំពៅ ដើម្បីដាក់តាំងបង្ហាញផ្សព្វផ្សាយដល់ភ្ញៀវទេសចរជាតិ និងអន្តរជាតិក៏ដូចជាយុវជនជំនាន់ក្រោយបានសិក្សាស្វែងយល់ពីប្រវត្តិជាក់លាក់ច្បាស់លាស់ សំដៅបង្កើនការទាក់ទាញភ្ញៀវទេសចរទៅទស្សនាកំសាន្តឱ្យបានច្រើនបន្ថែមទៀត។

កិច្ចប្រជុំនេះបានឯកភាព និងសម្រេចទាំងស្រុងលើខ្លឹមសារប្រវត្តិល្អាងនានាដើម្បីត្រៀមរៀបចំចារឹកឡើងសម្រាប់តាំងបង្ហាញនៅរមណីយដ្ឋានប្រវត្តិសាស្រ្តភ្នំសំពៅផ្ទាល់តែម្ដងក្នុងពេលឆាប់ៗខាងមុខនេះ។

ក្នុងកិច្ចប្រជុំដដែលនេះ ឯកឧត្តម សុខ លូ ក៏បានណែនាំដល់អាជ្ញាធរក្រុង ស្រុក ត្រូវយកចិត្តទុកដាក់ក្នុងការរក្សាដីចំណីផ្លូវ និងរៀបចំសួនសាធារណៈនៅតាមទីប្រជុំជនដើម្បីឱ្យប្រជាពលរដ្ឋហាត់ប្រាណរក្សាសុខភាព។

ជាមួយគ្នានេះ ឯកឧត្តម សុខ លូ បានដឹកនាំពិភាក្សាលើការរៀបចំសួនសុវត្ថិភាពចរាចរណ៍ សួនសាធារណៈនិងទីធ្លាសម្រាប់ពលរដ្ឋហាត់ប្រាណ រៀបចំផ្លូវដើរ និងសណ្ដាប់ធ្នាប់សាធារណៈនៅបរិវេណផ្សារណាត់ក្រុងបាត់ដំបង។

ឯកឧត្តមអភិបាលខេត្ត ក៏បានដឹកនាំពិភាក្សាលើការរក្សាដីចំណីផ្លូវពីទីតាំងរង្វង់មូល«ព្រាបសន្តិភាព» រហូតដល់ផ្លូវជាតិលេខ៥ថ្មី និងពីរង្វង់មូលនាងរំសាយសក់ទៅដល់ភ្នំសំពៅ ដើម្បីរៀបចំសណ្តាប់ធ្នាប់របៀបរៀបរយសម្រួលដល់ការធ្វើដំណើរលើដងផ្លូវ និងលើកកម្ពស់សោភ័ណភាពនៅតាមទីប្រជុំជន៕SRP

Sponsored

ខេត្តកំពង់ចា៖ឯកឧត្ដម អ៊ុន ចាន់ដា អភិបាលខេត្តកំពង់ចាម នៅថ្ងៃនេះ បានដឹកនាំក្រុមការងារ និងមន្ត្រីបច្ចេកទេស អញ្ជើញចុះពិនិត្យវឌ្ឍនភាពការងារសាងសង់អគាររដ្ឋបាលសាលាខេត្តកំពង់ចាម (ថ្មី) ដែលសម្រេចបានប្រមាណ៨០% ហើយរំពឹងថានឹងកសាងរួចរាល់100% នៅមុនចូលឆ្នាំខ្មែរ ឆ្នាំ2026។

ឯកឧត្តម អ៊ុន ចាន់ដា បានថ្លែងថា ដោយមើលឃើញ ពីការលំបាករបស់មន្ត្រី ដែលកំពុងបម្រើការងារនៅសាលាខេត្ត ក៏ដូចជា ការផ្តល់នូវទីកន្លែងសមរម្យ សម្រាប់មន្ត្រីបំពេញការងារប្រចាំថ្ងៃ ក្នុងការបម្រើសេវាសាធារណៈ ជូនដល់បងប្អូនប្រជាពលរដ្ឋ ក៏ដូចជាសាធារណៈជនផងនោះ គណៈអភិបាល បានឯកភាព និងអនុញ្ញាតឱ្យក្រុមការងារជាង ធ្វើការសាងសង់អគាររដ្ឋបាលថ្មីនេះ ឱ្យបានឆាប់រហ័សតាមការគ្រោងទុក ក្នុង ររយៈពេល6ខែ ពោលគឺដេីមខែ4 មុនចូលខ្មែរ ឆ្ឆ្នាំ2026 ខាងមុខនេះ។

ឯកឧត្តមអភិបាលខេត្ត បានណែនាំដល់ក្រុមការងារជាង ធ្វេីយ៉ាងណាត្រូវសាងសង់អគាររដ្ឋបាលថ្មី ជាពិសេសត្រូវរៀបចំរចនាបទ និងសោភ័ណភាព នៅខាងក្នុងឱ្យបានឆាប់រួចរាល់ ដេីម្បីប្រារព្ធពិធីសម្ពោធដាក់ឱ្យប្រើប្រាស់ជាផ្លូវការ នៅមុនពេលចូលឆ្នាំថ្មី ប្រពៃណីជាតិខ្ខ្មែរ ឆ្នាំ2026។

គួរបញ្ជាក់ផងដែរថា បច្ចុប្បន្នសំណង់នេះកំពុងសាងសង់លទ្ធផលសម្រេចបានប្រមាណជិត80% ហើយ ខណៈគម្រោងអាគារថ្មី នៃរដ្ឋបាលសាលាខេត្តនេះ ត្រូវបានសាងសង់ឡើងអំពីបេតុងអាមេ ជញ្ជាំងរៀបឥដ្ឋ និងតំបូលប្រក់ក្បឿង ដែលមានទំហំបណ្តាយជាង 53ម៉ែត្រ ទទឹង 24ម៉ែត្រ និងកម្ពស់ 3ជាន់ ដោយមានទីតាំងនៅក្នុងបរិវេណសាលាខេត្ត ស្ថិតក្នុងភូមិទី៧ សង្កាត់កំពង់ចាម ក្រុងកំពង់ចាម។ ក្រៅពីអគារថ្មីនេះដែរ រដ្ឋបាលខេត្តកំពង់ចាម ក៏មានអគារចាស់ជាច្រើន និងទីធ្លាក្នុងសាលាខេត្ត ត្រូវបានធ្វើការជួសជុលកែលម្អ ទុកសម្រាប់មន្ត្រីបម្រើការងារ ជារៀងរាល់ថ្ងៃផងដែរ៕SRP

សម្ដេចតេជោហ៊ុន សែន មានការខកចិត្តចំពោះអំពើ
មិនគប្បីរបស់លោកKO1

https://t.me/srpeoplenews
https://t.me/srpostnews
#SRP #ខេត្តសៀមរាប #សៀមរាបប៉ុស្ដិ៍

ភ្នំពេញ៖សម្ដេចតេជោហ៊ុន សែន នៅយប់ថ្ងៃទី 20 ខែតុលា ឆ្នាំ 2025 នេះ បានបង្ហោះសារតាមរយៈទំព័រ ទំព័រផេកfacebook ថា៖

ខ្ញុំទើបបានមើលវីដេអូមានរយៈពេល
ជាង៨នាទីរបស់ក្រុមដែលដឹកនាំដោយលោកKO1ទាក់ទងដល់ការធ្វើពហិការឈប់ប្រើប្រាស់ទំនិញថៃ។

ខ្ញុំពិតជាមានការខកចិត្តចំពោះអំពើ
មិនគប្បីរបស់បងប្អូនទាំងនេះពិសេស
សម្រាប់លោកKO1តែម្តង។
ការដុតចោលទំនិញថៃ ការដាក់បណ្តាសាចំពោះអ្នកលក់ទំនិញថៃដែលនៅសេសសល់លក់មិនទាន់អស់គឺជាអំពើទៅហួសពីស្នេហាជាតិនិងជា
របៀបក្រុមនិយមជ្រុលហួសហេតុ។
ប្រជាជនកម្ពុជាច្រើនណាស់ដែលធ្វើ
ពហិការមិនប្រើប្រាស់ទំនិញថៃមាន
ស្ទើរតែ៩៩ភាគរយទៅហើយមិនថា
ប្រជាជននៅក្នុងប្រទេសឬបងប្អូនខ្មែរ
នៅក្រៅប្រទេសនោះទេ។

ចំណោទបញ្ហានៅត្រង់អាជីវកលក់ដូរ
ដែលមានទំនិញថៃនៅសល់តើឲ្យពួក
គាត់យកទៅណា? ដុតបំផ្លាញចោល
ឬបន្តលក់ដើម្បីប្រមូលដើមទុនមកវិញ?ប្រសិនបើ Ko1 មានប្រាក់សូមយកទៅទិញទំនិញដែលនៅសេសសល់ទាំងនេះធ្វើជាចំណីសត្វប្រសើរជាងដុតចោលដូចKo1បានធ្វើដែលមានក្នុងវីដេអូនេះ។បើមនុស្សមិនទទួលទាន ទុកឲ្យសត្វសុីប្រសើរជាងដុតឬកំទេចចោល។

ខ្ញុំសូមឲ្យKo1បញ្ឈប់សកម្មភាពបែប
ឆ្កួតៗនេះជាបន្ទាន់និងចូលរួមពង្រឹង
តម្លៃសិលធម៌ សុជីវធម៌ គុណធម៌និង
ភាពថ្លៃថ្នូររបស់ជាតិ៕SRP

ខេត្តសៀមរាបសម្ពោធស្ថានីយ៍ច្រកទឹកពិសារថ្មីចំនួនពីរ ពិសារស្អាតដោយឥតគិតថ្លៃ

លោក យុន លីណេ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលខេត្តសៀមរាប នៅថ្ងៃទី១៩ ខែតុលា ឆ្នាំ២០២៥ បានអញ្ជើញចូលរួមពិធីប្រគល់-ទទួល និងបានសម្ពោធដាក់ឱ្យប្រើប្រាស់ស្ថានីយ៍ច្រកទឹកពិសារថ្មីចំនួនពីរទីតាំង ដែលស្ថិតនៅមជ្ឈមណ្ឌលព័ត៌មានទេសចរណ៍ខេត្តសៀមរាប។

ស្ថានីយ៍ទាំងនេះផ្តល់ជូនទឹកពិសាស្អាតដោយឥតគិតថ្លៃ សម្រាប់ភ្ញៀវទេសចរ និងប្រជាពលរដ្ឋ ក្នុងគោលបំណងលើកទឹកចិត្តឲ្យមានការប្រើប្រាស់ដប ដែលអាចប្រើឡើងវិញបាន និងកាត់បន្ថយការពឹងផ្អែកលើដបជ័រនៅទូទាំងទីក្រុង។

នេះជាសហប្រតិបត្តិការដ៏សំខាន់មួយរវាងអាជ្ញាធររដ្ឋ ដៃគូពីវិស័យឯកជន អង្គការមិនមែនរដ្ឋាភិបាល និងទីភ្នាក់ងារអភិវឌ្ឍន៍ ដើម្បីពង្រឹងការអនុវត្តទេសចរណ៍ប្រកបដោយចីរភាពនៅខេត្តសៀមរាប។

សូមបញ្ជាក់ថា ស្ថានីយ៍ច្រកទឹកពិសាមានតួនាទីសំខាន់ណាស់នៅក្នុងទីក្រុងទេសចរណ៍ដូចជាខេត្តសៀមរាប ព្រោះវា ជួយដោះស្រាយបញ្ហាធ្ងន់ធ្ងរនៃសំណល់ផ្លាស្ទិក ដែលកើតចេញពីភ្ញៀវទេសចររាប់លាននាក់ជារៀងរាល់ឆ្នាំ។ លើសពីនេះ ស្ថានីយ៍ទាំងនេះជួយកាត់បន្ថយការបំពុលដោយផ្លាស្ទិក ដែលអាចគំរាមកំហែង ដល់ទីតាំងបេតិកភណ្ឌវប្បធម៌ និងធម្មជាតិដ៏សម្បូរបែបរបស់កម្ពុជា ដោយផ្តល់ជម្រើសងាយស្រួល និងជាមិត្តនឹងបរិស្ថាន ជំនួសឲ្យការប្រើប្រាស់ដបផ្លាស្ទិកប្រើតែគម្រោងលើកកម្ពស់ការគ្រប់គ្រងសំណល់រឹងក្រុងអាស៊ាន (AMUSE) ត្រូវបានចាត់ចែងដោយក្រសួង សហប្រតិបត្តិការសេដ្ឋកិច្ច និងអភិវឌ្ឍន៍សហព័ន្ធអាល្លឺម៉ង់ (BMZ) និងអនុវត្តដោយទីភ្នាក់ងារអាល្លឺ ម៉ង់សម្រាប់កិច្ចសហប្រតិបត្តិការអន្តរជាតិ (GIZ) ក្នុងការសហការយ៉ាងជិតស្និទ្ធជាមួយក្រសួងបរិស្ថាន។

គម្រោងសហប្រតិបត្តិការអាស៊ាន-អាល្លឺម៉ង់នេះ មានគោលបំណងកែលម្អគុណភាពបរិស្ថាននៅ ក្នុងទីក្រុងទេសចរណ៍ខ្នាតតូច និងមធ្យមនៅក្នុងតំបន់អាស៊ាន តាមរយៈការធ្វើឱ្យប្រសើរឡើងនូវការ ចោលសំណល់ និងការកែច្នៃឡើងវិញ៕SRP

Sponsored