ខេត្តកំពង់ចាម៖លោក​​ អ៊ុន​ ចាន់ដា​ ប្រធាន​គណៈកម្មាធិការប្រយុទ្ធប្រឆាំងការជួញដូរមនុស្ស​ខេត្តកំពង់ចាម​ បាន​បានថ្លែងជំរុញឲ្យមន្ត្រីខិតខំទប់ស្កាត់នូវអំពើជួញដូរមនុស្ស និងអាជីវកម្មផ្លូវភេទ។ លោកបន្តថាអំពើជួញដូរមនុស្ស និងអំពើធ្វើអាជីវកម្មផ្លូវភេទ គឺជាឧក្រិដ្ឋកម្មមួយដ៏ធ្ងន់ធ្ងរ ពោលគឺជនរងគ្រោះមួយចំនួនដែលធ្លាក់ចូលក្នុងអន្ទាក់នៃឧក្រិដ្ឋកម្មនេះ គឺអាចប្រឈមនឹងការបាត់បង់សតិ ញៀនគ្រឿងញៀន ក្លាយជាស្រី្តបម្រើសេវាផ្លូវភេទ និងកាន់តែអាក្រក់ជាងនេះទៅទៀតនោះ គឺការបាត់បង់អាយុជីវិត។​ ដូច្នេះ​សូម​ឲ្យ​​កងកម្លាំងប្រដាប់អាវុធគ្រប់លំដាប់ថ្នាក់ ក៏ដូចជាអាជ្ញាធរក្រុង-ស្រុក មេត្តាអង្កេត និងធ្វើការកត់សម្គាល់នូវទំនោរនៃទម្រង់ក្នុងការជួញដូរមនុស្ស និងអាជីវកម្មផ្លូវភេទ ក្នុងសម័យបច្ចេកវិទ្យា​ ដែលមេខ្យល់ ជនរងគ្រោះ អាណាព្យាបាលរបស់ជនរងគ្រោះ និងជនល្មើស បានធ្វើការទាក់ទងគ្នាតាមប្រព័ន្ធសង្គម ឬក្នុងទម្រង់ផ្សេងៗទៀត ដែលបញ្ចៀសពីការតាមដានពីក្រសែភ្នែករបស់សមត្ថកិច្ច។
លោកថ្លែងយ៉ាងដូច្នេះក្នុងឱកាសបើកអង្គសិក្ខាសាលា ស្តីពី «កិច្ចរបស់មន្រ្តីនគរបាលយុត្តិធម៌ក្នុងសំណុំរឿងជួញដូរមនុស្ស និងអំពើធ្វើអាជីវកម្មផ្លូវភេទ»​ កាលពី​ព្រឹក​ថ្ងៃ​ទី​២៥​ ខែសីហា​ ឆ្នាំ​២២០​ នៅ​សណ្ឋាគារ​ភ្នំ​ប្រុស​ ​ក្រុងកំពង់ចាម​។

លោក​​ អ៊ុន​ ចាន់ដា​ បាន​ថ្លែង​ថា​​ អំពើជួញដូរមនុស្ស និងអំពើធ្វើអាជីវកម្មផ្លូវភេទ និងការបន្តរាតដ្បាតនៃជម្ងឺឆ្លងកូវីដ១៩ ជាសាកល គឺបានបង្កផលប៉ះពាល់ផ្នែកសេដ្ឋកិច្ចដល់ប្រជាពលរដ្ឋ បានបន្តរុញច្រានឲ្យប្រជាពលរដ្ឋមួយចំនួនឲ្យជួបប្រទះនឹងបញ្ហាលំបាកផ្នែកជីវភាព និងងាយស្រួលចាញ់បោកការអូសទាញរបស់ មេខ្យល់ ដែលធ្វើការអូសទាញប្រជាពលរដ្ឋ ឲ្យធ្លាក់ខ្លួនទៅក្នុងអន្ទាក់នៃទម្រង់ជួញដូរមនុស្ស និងអំពើធ្វើអាជីវកម្មផ្លូវភេទ។ ដូច្នេះ​សូមឲ្យ​អាជ្ញាធរគ្រប់លំដាប់ថ្នាក់ និងកងកម្លាំងត្រូវធ្វើការពិនិត្យពិច័យលើករណីនេះ និងយកចិត្តទុកដាក់ក្នុងករណីដែលមានការអូសទាញណាមួយនាំ​ឲ្យ​មានចំណាកស្រុកខុសច្បាប់ ឬនាំ​ឲ្យ​មានការបំលាស់ទីដែលមានគោលដៅ។

លោក​ វង្ស ប៊ុនវិសុទ្ធ​ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម​ បាន​ថ្លែង​ថា​ ​បញ្ហាជួញដូរមនុស្ស និងអំពើធ្វើអាជីវកម្មផ្លូវភេទ មិនមែនជាបញ្ហាផ្តាច់មុខរបស់ស្ថាប័នអយ្យការ ឬស្ថាប័ន អនុវត្តច្បាប់ (ស្នងការដ្ឋាន បញ្ជាការដ្ឋាន គណៈកម្មធិការ ឬរដ្ឋបាលខេត្ត)​តែឯងនោះទេ ប៉ុន្តែ វាជាបញ្ហារួមរបស់​យើង​ទាំង​អស់​គ្នា​ ហើយ​វាទាមទារការចូលរួម​ឲ្យ​កាន់តែសកម្មពីគ្រប់ភាគី និងតួអង្គដែលពាក់ព័ន្ធ ក្នុងគោលដៅ ការពារប្រជាពលរដ្ឋនៅក្នុងខេត្តរបស់យើង ហើយជាពិសេសជាងនេះទៅទៀត គឺការពារស្រ្តី និងកុមារ ដែលពួកគេជាជនងាយរងគ្រោះ និងងាយធ្លាក់ចូលក្នុងអន្ទាក់របស់ពួកមេខ្យល់ និងជនល្មើសនៃអំពើជួញដូរមនុស្ស និងអំពើធ្វើអាជីវកម្មផ្លូវភេទ​៕SRP

ខេត្តព្រះវិហារ៖យ៉ាងហោចណាស់មនុស្ស ២នាក់បានស្លាប់និង៥នាក់ទៀតបានរងរបួសធ្ងន់ស្រាល ដោយគ្រោះថ្នាក់ចរាចរណ៍។

ក្នុងហេតុការណ៍បានកើតឡើងនៅវេលាម៉ោង០២និង១០នាទីរសៀល
នៅថ្ងៃទី២៣ខែសីហាឆ្នាំ២០២០ តាមបណ្តោយផ្លូវជាតិលេខ៦២ ទៅកាន់តំបន់ប្រាសាទព្រះវិហារ ត្រង់ចំណុច គីឡូ ៤១/៤២ ភូមិបាក់កាំ ស្រុក ត្បែងមានជ័យ ខេត្តព្រះវិហារ។
សមត្ថកិច្ចបានអោយដឹងថារថយន្ត រងគ្រោះ ម៉ាកតូយ៉ូតាពណ៌ទឹកពាក់ស្លាកលេខភ្នំពេញ២z.៧៥១២ បើកបរក្នុងល្បឿនលឿន ពីទិសកើតទៅទិសលិចលុះមកដល់កន្លែងកើតហេតុក៏បានបើកវ៉ាជែងរថយន្តមួយគ្រឿងទៀត ដែលបើកបរស្របទិសគ្នា ប៉ុន្តែដោយសាររងគ្រោះខ្វះកាប្រុងប្រយ័ត្ន ក៏បានរេចង្កូតធ្លាក់ផ្លូវបណ្តាលអោយក្រឡាប់ជាច្រើនត្រឡប់តែម្តង។

លោកអធិការស្រុកត្បែងមានជ័យ
លោកវរសេនីយ៍ឯក រឹទ្ធសូណា បានបញ្ជាក់ថាករណីគ្រោះថ្នាក់ចរាចរណ៍នេះបណ្តាលអោយមាន មនុស្សប្រុសស្រីស្លាប់ពីរនាក់នឹងរបួសធ្ងន់ស្រាលចំនួន៥នាក់។
ជនរងគ្រោះទី១មានឈ្មោះណាល់ ផានិតភេទប្រុសអាយុ១២ឆ្នាំស្លាប់ភ្លាមៗនៅនឹងកន្លែងកើតហេតុ។
ទី២ឈ្មោះស្រី និច ភេទស្រីអាយុ២៥ឆ្នាំស្លាបក្រោយបញ្ជូនដល់មន្ទីរពេទ្យ។
ទី៣ឈ្មោះម៉ៅ សិលា ភេទស្រីរងរបួសធ្ងន់។
ទី៤ឈ្មោះម៉ៅ រិទ្ធយុង ភេទប្រុសរងរបួសធ្ងន់។
ទី៥ឈ្មោះស្រី សៅ ភេទប្រុសអាយុ២១ឆ្នាំរងរបួស។
ទី៦ឈ្មោះម៉ុច មឿង ភេទស្រីអាយុ៦២ឆ្នាំរងរបួសធ្ងន់។
ទី៧ឈ្មោះលឿន ភេទប្រុស៦៣ឆ្នាំរងរបួសធ្ងន់។ ជនរងគ្រោះទាំងអស់រស់នៅនៅភូមិបរិបូរ ឃុំត្បែងពីរ ស្រុក
គូលែន ខេត្តព្រះវិហារ។

គួរបញ្ជាក់ថាក្រោយកើតហេតុជនរងគ្រោះត្រូវបានរថយន្តសង្គ្រោះបន្ទាន់របស់មណ្ឌលសុខភាពស្រុកគូលែនដឹកយកទៅជួយសង្គ្រោះនៅមន្ទីរពេទ្យបង្អែក១៦មករាខេត្តព្រះវិហារផងដែរ៕SRPគីម គឹមឡាយ

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅព្រឹកថ្ងៃចន្ទ ទី២៤ ខែសីហា ឆ្នាំ២០២០ នេះ បានអញ្ជើញចូលរួមកិច្ចប្រជុំកំពូលមេគង្គ-ឡានឆាងលើកទី៣ តាមប្រព័ន្ធវីដេអូ (video conference) ពីវិមានសន្តិភាព។

អញ្ជើញអម សម្តេចតេជោនាយករដ្ឋមន្រ្តី នៅក្នុងកិច្ចប្រជុំព្រឹកនេះ មានសមាសភាព ឯឧ ឧបនាយករដ្ឋមន្ត្រី ហោ ណាំហុង, ឯឧ ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ, ឯឧ ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, ឯឧ ទេសរដ្ឋមន្ត្រី ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និង ឯឧ ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ព្រមទាំងឥស្សរជនជាន់ខ្ពស់នៃរាជរដ្ឋាភិបាលកម្ពុជាមួយចំនួនទៀត។

កិច្ចប្រជុំកំពូលមេគង្គ-ឡានឆាងលើកទី៣ ឆ្នាំ២០២០ នេះ គឺប្រទេសឡាវធ្វើជាម្ចាស់ផ្ទះរៀបចំកិច្ចប្រជុំ ដែលមាន ឯឧ ថងលូន ស៊ីស៊ូលីត នាយករដ្ឋមន្ត្រីឡាវ និង ឯឧ លី ខឺឈាង នាយករដ្ឋមន្ត្រីចិន ធ្វើជាសហប្រធាននៃកិច្ចប្រជុំ ក្រោមមូលបទ «ពង្រឹងភាពជាដៃគូ ដើម្បីវិបុលភាពរួម»។ ថ្នាក់ដឹកនាំទាំងអស់ នឹងពិនិត្យឡើងវិញនូវវឌ្ឍនភាព ដែលសម្រេចបានស្របតាមទិសដៅនៃសេចក្ដីថ្លែងការណ៍សាន់យ៉ាឆ្នាំ២០១៦, សេចក្ដីថ្លែងការណ៍ទីក្រុងភ្នំពេញឆ្នាំ២០១៨ និងផែនការសកម្មភាពសម្រាប់រយៈពេល៥ឆ្នាំ ស្តីពីកិច្ចសហប្រតិបត្តិការមេគង្គ-ឡានឆាង (២០១៨-២០២២) កំណត់ទិសដៅអនាគតសម្រាប់ការពង្រីកវិស័យនៃកិច្ចសហប្រតិបត្តិការ និងជំរុញបន្ថែមនូវទំនុកចិត្តទៅវិញទៅមក ក៏ដូចជាពង្រឹងភាពជាដៃគូក្នុងចំណោមបណ្តាប្រទេសមេគង្គ-ឡានឆាងទាំង៦ ដែលមាន ១)កម្ពុជា ២)ថៃ ៣)ឡាវ ៤)មីយ៉ាន់ម៉ា ៥)វៀតណាម និង ៦)ចិន ។

ភ្ជាប់មកជាមួយនេះ គឺជាបទអន្តរាគមន៍របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃ ព្រះរាជាណាចក្រកម្ពុជា ថ្លែងក្នុងកិច្ចប្រជុំកំពូលនៃកិច្ចសហប្រតិបត្តិការមេគង្គ-ឡានឆាង លើកទី៣។

ខេត្តកំពង់ចាម៖លោក​​​​ អ៊ុន​ ចាន់ដា​​ សមាជិកគណៈកម្មាធិការកណ្តាលគណបក្សប្រជាជនកម្ពុជា និង​ជាប្រធានគណៈកម្មាធិការបក្សខេត្តកំពង់ចាម បាន​អញ្ជើញ​ជា​អធិបតី​​ ​ក្នុង​ពិធី​ប្រកាស​​បញ្ចូល​ជា​សមាជិក​ថ្មី​ ចំនួន​១២០រូប​ នៃ​គណបក្ស​ប្រជាជន​កម្ពុជា​ ឃុំ​មហាខ្ញង​ ស្រុកកោះសូទិន។

ពិធីធ្វើឡើងនាព្រឹកថ្ងៃទី២៣ ខែសីហា​​ ឆ្នាំ​២០២០​ ក្រោម​វត្តមាន​លោក​ ងួន ស៊ឹមអាន អ្នកតំណាងរាស្ត្រមណ្ឌលខេត្តកំពង់ចាម​ និងជាប្រធានក្រុមការងារចុះជួយឃុំមហាខ្ញូង។

ឆ្លៀតក្នុងឱកាសនោះដែរ លោក​​​​ អ៊ុន​ ចាន់ដា​​ ប្រធាន​គណៈកម្មាធិការ​គណបក្សប្រជាជន​ បាន​ថ្លែង​នូវគោលនយោបាយសំខាន់ៗ​ របស់គណបក្សប្រជាជនកម្ពុជា​ ដោយប្រកាន់ភ្ជាប់នូវចក្ខុវិស័យរបស់ខ្លួនជាយូរអង្វែង​ ដោយប្រមូល​កម្លាំង​គ្រប់និន្នាការ​ នយោបាយ​រួបរួម​គ្នា​ កសាងប្រទេស​ជាតិ​​ឲ្យ​កាន់តែមានភាព​រីកចម្រើន​ឡើង​ សំបូររុងរឿងស្ថិតស្ថេរគង់វង្ស​ ឲ្យ​ប្រទេស​យើង​ដែលស្ថិតក្នុងឯករាជ្យជាតិ អធិតេយ្យ បូរភាព អព្យាក្រឹត្យ វឌ្ឍនៈភាព​ និងទទួលបាននូវសុភមង្គលជាតិខ្មែរតែមួយ។​

លោក​​ អ៊ុន​ ចាន់ដា​ ក៏បាន​​ថ្លែង​អំណរគុណ​ដល់​បងប្អូនប្រជាពលរដ្ឋ​ ក៏ដូចជា​សមាជិក​បក្ស​ទាំងអស់​ ដែល​បាន​បោះឆ្នោត​ជូន​ ​គណបក្សប្រជាជនកម្ពុជា​ ដើម្បី​គាំទ្រ​សម្តេចតេជោ ហ៊ុន​ សែន​ បាន​ដឹកនាំ​ប្រទេស​ជាតិ​ឲ្យ​មាន​ការ​អភិវឌ្ឍន៍​រីកចម្រើន​​។ ​ព្រមទាំង​សូម​ឲ្យ​​​បងប្អូន​ប្រជាពលរដ្ឋ​ ដែល​ទើបតែ​ទទួល​ការ​ប្រកាស​បញ្ចូល​​ជា​សមាជិក​ សមាជិការ​ គណបក្សប្រជាជនកម្ពុជា​ ​ទាំងអស់​ ចូលរួម​ថែរក្សា​នូវ​សុខសន្តិភាព​ ដើម្បី​ធ្វើការ​អភិវឌ្ឍន៍​សង្គម​ជាតិ​យើង​ ឲ្យ​បាន​រីក​លូតលាស់​ជា​បន្ត​ទៅ​ទៀត​។

ជាមួយគ្នា​នោះ​ តំណាង​សមាជិក​ថ្មី​ បានឡេីង​ធ្វើសច្ចាប្រណិធាន​ ប្តេជ្ញាស្មោះត្រង់ ជឿជាក់លើការដឹកនាំ​ របស់គណបក្សប្រជាជនកម្ពុជាអស់មួយជីវិត និងអនុវត្តតាមគោលការណ៍ គោលនយោបាយ របស់គណបក្សជារៀងរហូតដោយឥតងាករេ។ ដោយ​រួមចំណែកអនុវត្តកម្មវិធីនយោបាយ និងយុទ្ធសាស្ត្រចតុកោណតំណាក់កាលទី៤​ របស់រាជរដ្ឋាភិបាល​ សម្រាប់នីតិកាលទី៦​ នៃរដ្ឋសភា​ ព្រមទាំង​អនុវត្តឲ្យបានខ្ជាប់ខ្លួនតាមលក្ខន្តិកៈ និងបទបញ្ជាផ្ទៃក្នុងគណបក្ស សំដៅ​ពង្រឹងការសាមគ្គីភាពឯកភាពផ្ទៃក្នុងឲ្យបានរឹងមាំទាំងខាងនយោបាយ សតិអារម្មណ៍​ និងការចាត់តាំង។​ ជាពិសេស​គឺប្តេជ្ញាគាំទ្រ និងបោះឆ្នោតជូនគណបក្យប្រជាជនកម្ពុជារហូត៕SRP

ខេត្តសៀមរាប៖រថយន្តដឹកឈើចំនួន០២គ្រឿងរួមនិងមនុស្សពីរនាក់ត្រូវបានកម្លាំងអាវុធហត្ថស្រុកពួកនៃបញ្ជាការកងរាជអាវុធហត្ថខេត្តសៀមរាប សហការជាមួយនគរបាលស្រុកពួក បង្ក្រាបបាននៅយប់មិញនេះ។

ហេតុការណ៍បានធ្វើឡើងនៅវេលាម៉ោង២ និង៣០នាទីថ្ងៃទី២២ ០៨ ២០២០ ក្នុងពេលចុះគោលដៅត្រួតពិនិត្យសន្តិសុខផ្លូវជាតិលេខ(៦)ត្រង់ចំណុចភូមិគោកជួន ឃំុពួក ស្រុកពួកខេត្តសៀមរាប។
មន្ត្រីអាវុធហត្ថបានថ្លែងប្រាប់បណ្ដាញសៀមរាបប៉ុស្ដិ៍នៅរសៀលថ្ងៃនេះថា ការត្រួតពិនិត្យសន្តិសុខផ្លូវជាតិលេខ៦កម្លាំងខាងលើធ្វើការឃាត់រថយន្តចំនួន២គ្រឿងពាក់ព័ន្ធករណីដឹកជញ្ជូនផលអនុផលព្រៃឈើដោយគ្មានលិខិតអនុញ្ញាត.(ប្រភេទឈើគ្រញូង)មិនទាន់វាស់វែងនិងឃាត់ខ្លូនអ្នកបើកបរចំនួន២នាក់ផងដែរ។រថយន្តទី១ម៉ាកវីសស្តូពណ៌សពាក់ស្លាកលេខភ្នំពេញ២U៣៣៧០បើកបរដោយឈ្មោះស៊ុយ ប៊ុនហេង ភេទប្រុសអាយុ២២ឆ្នាំ រស់នៅស្រុកត្រាំកក់ខេត្តតាកែវ។ទី២រថយន្តម៉ាកកូរ៉េទំងន់១តោនពណ៌ខៀវពាក់ស្លាកលេខតាកែវ ២A១៤ ៥៦បើកបរដោយ ឈ្មោះសល់ វី ភេទប្រុសអាយុ៤០ឆ្នាំ នៅស្រុកមុខកំពូល ខេត្តកណ្តាល។បើតាមមន្ត្រីអាវុធហត្ថបច្ចុប្បន្នវត្ថុតាងនិងអ្នកបើកបរទាំងពីរនាក់បានប្រគល់អោយខណ្ឌរដ្ឋបាលព្រៃឈើសៀមរាបដើម្បីអនុវត្តនិតិវិធី៕SRP

ខេត្តកំពង់ចាម៖ក្នុងឱកាសឈប់សម្រាកសងថ្ងៃចូលឆ្នាំថ្មី​ប្រពៃណី​ជាតិ​ខ្មែរ​ ចាប់​ពី​ថ្ងៃ​ទី​១៧​ ដល់​ថ្ងៃ​ទី​២១​ ខែសីហា​ ឆ្នាំ​២០២០​នេះ​​ ខេត្តកំពង់ចាម មានភ្ញៀវទេសចរណ៍ជាតិ និង​អន្តរជាតិ​ធ្វើ​ដំណើរ​កម្សាន្ត​នៅ​តាម​តំបន់​រមណីយដ្ឋាន​នានា​ ជាង០៣ម៉ឺននាក់។

លោក​ស៊ាន​ សុគុន្ធ​ ប្រធាន​មន្ទីរ​ទេសចរណ៍​ខេត្ត​កំពង់ចាម​ បាន​ឲ្យដឹងថា​ រយៈពេល៥ថ្ងៃនេះ គឺ​ភ្ញៀវ​ទេសចរណ៍​ជាតិ​ និង​អន្តរជាតិ​ មកទស្សនាកម្សាន្តនៅតាមរមណីយនានានៅ​ទូទាំង​ខេត្តកំពង់ចាម​ ​សរុប​ចំនួន​៣៥៤៣៦នាក់​ ក្នុង​នោះមាន​បរទេស​១៤៦នាក់​។

លោក​ស៊ាន​ សុគុន្ធ​ បន្តថានៅស្រុកព្រៃឈរ មានរមណីយដ្ឋាន​ ចំនួន​២កន្លែង​ ១-​រមណីយដ្ឋាន​ក្បាល​ហុង​ទឹក​ឆា​ មាន​ភ្លៀង​ទេសចរណ៍​ ចំនួន​២៥៩៧៩នាក់​ ២-​កសិទេសចរណ៏ គាត ខេង ថ្មដាទឹកឆា​​៣២៧១នាក់​។ ដោយឡែក​នៅ​ក្នុង​ស្រុក​កំពង់សៀម​ មាន​រមណីយដ្ឋាន​ចំនួន​៤កន្លែង​ ១-រមណីយដ្ឋាន​ភ្នំ​ប្រុស​ ភ្នំ​ស្រី​ ​មាន​ភ្ញៀវ​ទេសចរ​ ចំនួន​១៤៨៥​នាក់​ ២-រមណីយដ្ឋាន​ភ្នំ​ហាន់​ជ័យ​១៥១៣​នាក់​ ៣-រមណីយដ្ឋាន​ឬស្សី​៣៤១នាក់​​ និង​៤-រមណីយដ្ឋាន​នគរបាជ័យ​១១៤៩នាក់​ ។ ចំពោះ​​​​អាហារដ្ឋាន​ស្មៅ​ទន្លេ​ នៅក្រុង​កំពង់ចាម​ មាន​​១៦៩៨នាក់​ ពោល​គឺ​​ភ្ញៀវ​ទេសចរណ៍​​មក​ទស្សនា​កម្សាន្ត​នៅ​រមណីយដ្ឋាន​ក្បាល​ហុង​ទឹក​ឆា​​ មាន​ចំនួន​ច្រើន​ជាង​រមណីយដ្ឋាន​ដ៏ទៃ​ ។​ ដោយនៅតាមរមណីយដ្ឋាននីមួយៗ មានសន្តិសុខ សណ្តាប់ធ្នាប់ របៀបរៀបរយល្អ និង​មានការយាមប្រចាំការពីកម្លាំងសមត្ថកិច្ច ទៀត​ផង​។ ​លោកអ៊ុន ចាន់ដា អភិបាលខេត្តកំពង់ចាមបានឲ្យដឹងថាថ្ងៃឈប់សម្រាករយ:ពេល៥ថ្ងៃ​ ខេត្ត​កំពង់ចាម​មាន​ភ្ញៀវទេសចរ​ចំនួន៣៥.៤៣៦នាក់​ មកលេងកំសាន្តតាមរម្មណីយដ្ឋាននានាក្នុងខេត្ត​ រួមជាមួយ​សន្តិសុខ​មានសភាពការណ៍ល្អប្រសេីរ​ គ្រោះថ្នាក់ចរាចរណ៍កេីតឡេីងតែ២ករណីប៉ុណ្ណោះ។ ទាំងនេះបានបង្ហាញអោយឃេីញពីការយល់ដឹងរបស់បងប្អូនប្រជាពលរដ្ឋ បេីកបរមានការយោគយល់​ និងចេះអធ្យាស្រ័យអោយគ្នា។ ខ្ញុំ​សូមថ្លែងអំណរគុណចំពោះកងកម្លាំង​ អាជ្ញាធរមានសមត្ថិច្ច​ទាំងអស់ដែលបានខិតខំបំពេញភារកិច្ចបានយ៉ាងល្អ។ សូមអរគុណ​ភ្ញៀវទេសចរជាតិ​ អន្តរជាតិ​ ដែលបានមកលេងកំសាន្តសប្បាយក្នុងខេត្តកំពង់ចាម។សូមបញ្ជាក់ថាអាជ្ញាធរខេត្តកំពង់ចាម ក៏មានការយកចិត្តទុកដាក់ពី ក្នុង​ការ​អនុវត្ត​វិធានការ​​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​១៩​ តាម​សេចក្តី​ណែនាំ​របស់​ក្រសួង​សុខាភិបាល​ ផងដែរ​​៕SRP