ខេត្តព្រះវិហារ៖លោកសំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឲ្យដឹងនៅល្ងាចថ្ងៃទី០១ខែមិថុនានេះថាស្ពានស្ទឹងស្ដៅ ដែលរងការឆេះដោយភ្លើងព្រៃនារដូវប្រាំងកន្លងទៅ បច្ចុប្បន្ននេះ កំពុងមមាញឹកក្នុងការស្ថាបនាឡើងវិញ ជំនួសដោយស្ពានដែកបេឡេត៍ក្រាលឈើ ក្រោមការជួយឧបត្ថម្ភជ្រោមជ្រែងពី លោក មាស សុភា ទេសរដ្ឋមន្ត្រីទទួលបន្ទុកបេសកកម្មពិសេស ប្រធានក្រុមមការងាររាជរដ្ឋាភិបាលចុះជួយមូលដ្ឋានខេត្តព្រះវិហារ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក សាយ សំអាល់ រដ្ឋមន្ត្រីក្រសួងបរិស្ថាន លោកអភិបាលខេត្តព្រះវិហារ អនុវត្តការសាងសង់ ដោយមន្ទីរសាធារណការ និងដឹកជញ្ជូនខេត្តព្រះវិហារ។
លោកសំ លាងទ្រី បានបញ្ជាក់ថា

ស្ពាននេះមានប្រវែង៤៨ម៉ែត្រទទឹង៤,២០ម៉ែត្រស្ថិតក្នុងឃុំស្ដៅ ស្រុកសង្គមថ្មី ខេត្តព្រះវិហារ ឆ្ពោះទៅកាន់ដែនអភិរក្សសត្វព្រៃភ្នំត្នោត ភ្នំពក៕SRP

ខេត្តកំពង់ចាម៖ អាជ្ញាធរខេត្តនៅព្រឹកមិញបានបើកកិច្ចប្រជុំពិនិត្យស្ថានភាពដីធ្លីនៅ តំបន់ខុនមាស ស្ថិតនៅក្នុងភូមិសំបូរ ឃុំសំបូរ ស្រុកបាធាយ។
កិច្ចប្រជុំនេះធ្វើនៅរដ្ឋបាលខេត្តដឹកនាំដោយលោក អ៊ុន ចាន់ដា អភិបាលខេត្តកំពង់ចាម ដោយមានការចូលរួមពីសំណាក់អភិបាលរងខេត្ត នាយក នាយករងរដ្ឋបាលសាលាខេត្ត អាជ្ញាធរស្រុកបាធាយ និងតំណាងប្រជាពលរដ្ឋជាម្ចាស់បណ្តឹងផងដែរ។

សូមបញ្ជាក់ថាជាលទ្ធផលលោក អ៊ុន ចាន់ដា បានដាក់ចេញគោលការណ៍ ០៤ចំណុច ដើម្បីការពារផលប្រយោជន៍ប្រជាពលរដ្ឋ ក្នុងសហគមន៍។

ទី០១៖ ចាត់តាំង លោក កែវ នាឬទ្ធិ អភិបាលរងខេត្ត ជាតំណាង អភិបាលខេត្ត ដឹកនាំក្រុមការងារមួយ ចូលរួមដោយមន្ទីរជំនាញ ដោយមានវត្តមានប្រធានមន្ទីរ និងអាជ្ញាធរស្រុក ឃុំ សហការ ជាមួយព្រះរាជអាជ្ញា និងកម្លាំងមានសមត្ថកិច្ច ចុះទៅពិនិត្យជាក់ស្ដែង ថាតើតំបន់នោះជាដីមេទឹកពិតប្រាកដឬអត់? ហើយមាននៅក្នុងផែនទីក្រសួងធនធានទឹកដែរឬទេ? មានទំហំប៉ុន្មាន? ត្រូវកំណត់ឲ្យច្បាស់និងរាយការណ៍មករដ្ឋភិបាលខេត្តវិញ។ ក្នុងករណីដីខាងលើនេះជាដីមេទឹក សូមរក្សាទុកជាសម្បត្តិរបស់រដ្ឋ។ តែបើពិនិត្យឃើញថា ដីខាងលើនេះមិនមានក្នុងផែនទី ថាជាដីមេទឹកទេ ត្រូវផ្ដល់ជូនដល់ប្រជាពលរដ្ឋទាំង១៨គ្រួសារ។

ទី០២៖ ចំពោះអ្នកទាំង៤០គ្រួសារផ្សេងទៀត នៅពេលក្រុមការងារសម្រេចយ៉ាងណាហើយនោះ គឺអ្នកទាំងនោះមិនមានសិទ្ធិមកកាងដីខាងលើនោះទៀតបានទេ។ ប្រសិនបើមានអ្នកណាមកកាងដីនេះទុកឲ្យឈ្មួញ អាជ្ញាធរខេត្តនឹងអនុវត្តតាមផ្លូវច្បាប់ដោយត្រូវឃាត់ខ្លួនតែម្ដង។ តែបើអ្នកទាំង៤០ គ្រួសារនោះការពារដីខាងលើទុកជាសម្បត្តិរបស់រដ្ឋ អាជ្ញាធរខេត្តសូមគាំទ្រទាំងស្រុង។

ទី០៣៖ ត្រូវមានការចូល និងការសហការពី ព្រះរាជអាជ្ញា និងកងកម្លាំងមានសមត្ថកិច្ច មុនចុះអនុវត្តការងារ។

ទី០៤៖ មិនត្រូវធ្វើឲ្យប៉ះពាល់ដល់ផលប្រយោជន៍របស់សហគមន៍ឡើយ៕SRP

ខេត្តសៀមរាប៖សមត្ថកិច្ចបានរាយការណ៍ថាកសិករម្នាក់ ទៅភ្ជួរស្រែ រួចចុះទៅងូតទឹកអូរ បណ្តាលអោយលង់ស្លាប់។ហេតុការណ៍បានកើតឡើងនៅវេលាម៉ោង១១និង១០នាទីថ្ងៃទី០១ខែមិថុនាឆ្នាំ២០២០នេះនៅចំណុចអូររំហាច ស្ថិតនៅក្នុងភូមិតាងួនឃុំល្វែងឫស្សី ស្រុកជីក្រែង។

សមត្ថកិច្ចថាជនរងគ្រោះឈ្មោះឌិន គី ភេទប្រុសអាយុ៥០ឆ្នាំរស់នៅភូមិ ឃុំ កើតហេតុខាងលើ។បើតាមសមត្ថកិច្ចថាមូលហេតុជនរងគ្រោៈទៅភ្ជួរស្រែក្នុងស្ថានភាពស្រវឹងរួចចុះទៅងូតទឹកអូរ បណ្តាលអោយលង់ស្លាប់តែម្ដង៕SRP

ប្រមុខដឹកនាំកម្ពុជា សម្តេចតេជោនាយករដ្ឋមន្ត្រី ហ៊ុន សែន នៅព្រឹកថ្ងៃទី០១ខែមិថុនានេះ បានអញ្ជើញពិនិត្យលទ្ធផលដំបូងនៃការស្ថាបនាផ្លូវនៅក្នុងក្រុងព្រះសីហនុ ដែលជាផ្លូវផែនការយុទ្ធសាស្ត្រក្នុងការធ្វើឱ្យក្រុងព្រះសីហនុ ក្លាយជាទីក្រុងទេសចរណ៍ និងពាណិជ្ជកម្មដ៏ស៊ីវិល័យ។

នៅព្រឹកមិញនេះផងដែរ ប្រមុខដឹកនាំកម្ពុជា ក៏បានធ្វើដំណើរចេញពីអាកាសយានដ្ឋានអន្តរជាតិកងកេង នៃខេត្តព្រះសីហនុ ឆ្ពោះមកកាន់សមុទ្ររាម ដោយឆ្លងកាត់ឆ្នេរសមុទ្រ និងជ្រលងភ្នំជាច្រើនកន្លែង និងបន្តមកឆ្នេរអូត្រេស ឆ្នេរអូឈើទាល ដែលជាផ្លូវក្រវាត់ក្រុងនៃក្រុងព្រះសីហនុ និងផ្លូវក្នុងក្រុងព្រះសីហនុចំនួន៣៤ខ្សែ ដែលពេលនេះបានសម្រេចការសាងសង់បានប្រមាណ ៩០% ហើយ។

សូមបញ្ជាក់ថា រាជរដ្ឋាភិបាលកម្ពុជាបានសម្រេចបញ្ចេញកញ្ចប់ថវិកាជាតិប្រមាណ ៣០០លានដុល្លារអាមេរិក ដើម្បីកសាងផ្លូវចំនួន ៣៤ខ្សែ នៅក្នុងខេត្តព្រះសីហនុ ដែលជាផ្លូវប្រកបដោយព្រណិតភាពដំបូងបំផុតនៅក្នុងប្រទេសកម្ពុជា។ ផ្លូវទាំង ៣៤ខ្សែនេះ ត្រូវបានសម្តេចតេជោនាយករដ្ឋមន្ត្រី អញ្ជើញបើកការដ្ឋានសាងសង់កាលពីថ្ងៃទី១៦ខែវិច្ឆិកា ឆ្នាំ២០១៩កន្លងទៅ។

សូមរម្លឹកថារាជរដ្ឋាភិបាលបានកំណត់ផែនក្នុងការរៀបចំប្លង់គោលប្រើប្រាស់ដីធ្លីក្នុងខេត្តព្រះសីហនុ ជាមួយចក្ខុវិស័យឆ្នាំ២០៣០ គឺរៀបចំនិងអភិវឌ្ឍខេត្តព្រះសីហនុ ជាប៉ូលអភិវឌ្ឍជាតិប្រកបដោយចីរភាពនៅតំបន់ឆ្នេរសមុទ្រកម្ពុជា តាមរយៈការអភិវឌ្ឍទីក្រុងទំនើប ជាមួយរមណីយដ្ឋានឆ្នេរសមុទ្រដែលស្អាតបំផុតលើសកលលោក និងជាតំបន់សេដ្ឋកិច្ចពិសេសគំរូពហុបំណង ដែលនឹងទាក់ទាញទេសចរ និងការវិនិយោគថ្មីៗបន្ថែមទៀតពីបរទេស និងបំរើដល់ការរស់នៅដ៏ល្អប្រសើរសម្រាប់ប្រជាពលរដ្ឋខ្មែរយើងផងដែរ៕SRP

នាយករដ្ឋមន្ត្រីកម្ពុជាសម្ដេចតេជោ ហ៊ុន សែន នៅព្រឹកនេះបានធ្វើដំណើរ ឆ្ពោះទៅកាន់ខេត្តព្រះសីហនុ ដើម្បីពិនិត្យមើលការកសាងផ្លូវ និងសមិទ្ធិផលផ្សេងទៀត។
សម្ដេចតេជោ ហ៊ុន សែន បានសរសេរសារនៅលើទំព័រហ្វេសប៊ុកផ្លូវការរបស់សម្ដេចថាដំណើរឆ្ពោះទៅកាន់ខេត្តព្រះសីហនុដើម្បីពិនិត្យមើលការកសាងផ្លូវនិងសមិទ្ធិផលផ្សេងទៀតនៅក្នុងខេត្ត
មួយនេះ។
សម្ដេចតេជោ បន្ដថាខ្ញុំអង្គុយខាងមុខជាមួយអ្នកបើកបរពិនិត្យឃើញថាពលរដ្ឋយើងភាគច្រើនគោរពច្បាប់ចរាចរណ៍​ តែក៏នៅមានបងប្អូនមួយ
ចំនួនតូចជិះម៉ូតូមិនពាក់មួកសុវត្ថិភាពដែរ។

ចំណែកការពាក់ម៉ាស់ការពារកូវីដ១៩
ពិនិត្យឃើញថាមានពាក់តិចតួចប៉ុណ្ណោះ៕SRP

ខេត្តព្រៃវែង៖ សេចក្ដីរាយការណ៍បានឲ្យដឹងថាសង្វៀនជល់មាន់ និងអាប៉ោងដ៏ធំមួយ កន្លែង ស្ថិតនៅក្នុង ភូមិស្វាយសាក់ ឃុំពោធិ៍ទីស្រុកស៊ីធរកណ្តាល ខេត្តព្រៃវែង ក្នុងវីឡា ទល់មុខវត្តស្វាយសាក់ ដោយមិនទាន់មានការបង្ក្រាបឡើយ។

ប្រជាពលរដ្ឋ ដែលរស់នៅជិតកន្លែងទីតាំងល្បែងខាងលើបានឲ្យដឹងថា រាល់ថ្ងៃឃើញក្រុមអ្នកញៀនល្បែងជាច្រើនបានជិះឡាន ម៉ូតូ ដឹកមាន់ចូលទៅក្នុងសង្វៀនមាន់ ព្រមទាំងស្រែកហ៊ោកញ្រ្ជៀវឡូឡាពេញទីតាំងពេលគេចាញ់ឈ្នះម្តងៗ។

បើយោងប្រភពបានបង្ហើបថា សង្វៀនមាន់អាប៉ោង មួយនេះបើកលេងបានយ៉ាងរលូន ដោយមានមេការឈ្មោះបុលនិងមេសង្វៀនដ៏ធំម្នាក់ទៀត
ជាអ្នករត់ការដល់សមត្ថកិច្ចតាំងពីថ្នាក់ក្រោមរហូតដល់ថ្នាក់លើក្នុងខេត្តដេីម្បីបិតមាត់ មិនឲ្យមានការចាប់ចងឬបង្រ្កាបឡេីយ៕SRP

ខេត្តកំពង់ធំ៖ដេប៉ូឈើអត់ច្បាប់នៅក្នុងស្រុកស្ទោងចំនួន០៦និងទីតាំងស្ដុក០៥កន្លែងទៀតត្រូវបានកម្លាំងសមត្ថកិច្ចចំរុះចុះបង្ក្រាបរយ:ពេល២ថ្ងៃ ដឹកនាំដោយ លោក ស៊ិន វិរ: ព្រះរាជអាជ្ញាអមសាលា ដំបូងខេត្តកំពង់ធំ។
ការបង្ក្រាបធ្វើឡើងនៅថ្ងៃទី៣០និង៣១ ខែឧសភាឆ្នាំ២០២០ នៅស្រុកស្ទោង ខេត្តកំពង់ធំ។

មន្ត្រីរដ្នបាលព្រៃឈើស្ទោង បានអោយដឹងថាករណីនេះសមត្ថកិច្ចចំរុះរឹបអូសយកឈើក្រៅលំដាប់ថ្នាក់បានជាង១៥០ម៉ែត្រគូប ពេលនេះកំពុងតែដឹកជញ្ចូន ចេញ យកមករក្សាទុកនៅសង្កាត់រដ្នបាលព្រៃឈើស្ទោង៕SRP

ខេត្តសៀមរាប៖លោក ង៉ាន់ ភិរុណ ប្រធានក្រុមការងារថ្នាក់កណ្តាលចុះជួយស្រុកបន្ទាយស្រី នៅព្រឹកមិញបានចុះសួរសុខទុក្ខ និងចែកអំណោយជូនដល់បងប្អូនប្រជាពលរដ្ឋក្រីក្រចំនួន ៤៦១គ្រួសារ ស្ថិតនៅឃុំឃុនរាម និងឃុំរំចេក ស្រុកបន្ទាយស្រី ខេត្តសៀមរាប។

លោក ង៉ាន់ ភិរុណ បានថ្លែងជម្រុញរក្សាបាននូវវិធានការការពារនឹងការឆ្លងរីករាលដាលជំងឺកូវីដ-១៩ (COVID-19) ដើម្បីរក្សាបាននូវសុវត្ថិភាព អនាម័យ និងទប់ស្កាត់កុំឲ្យមានការឆ្លងនៅក្នុងសហគមន៍របស់ខ្លួន។

លោកបានមានប្រសាសន៍បន្ថែមថាប្រទេសកម្ពុជា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី អ្វីៗបាននឹងកំពុងរីកចំរើនជឿនលឿនទៅមុខឥតឈប់ឈរ​ ក្រោមដំបូលសន្តិភាពតែមួយ ហើយសម្តេច​ លោកតែងតែគិតគូរពីសុខទុក្ខបងប្អូនប្រជាពលរដ្ឋគ្រប់ទីកន្លែង​ និងគ្រប់ពេលវេលា ដោយមិនទុកឱ្យបងប្អូនប្រជាពលរដ្ឋណាម្នាក់ខ្វះខាតស្បៀងអាហារឡើយ។ន

អំណោយដែលបានផ្តល់ជូនក្នុងមួយគ្រួសារទទួលបាអង្ករ ១០គីឡូក្រាម ទឹកត្រី ០១យួរ និងទឹកស៊ីអុីវចំនួន ០១យួរ។

ឆ្លៀតក្នុងឱកាសនោះផងដែរ​ លោកក៏ បានចុះពិនិត្យការដ្ឋានជីកស្រះទឹកទំហំ​ ៥០ម៉ែត្រគុណ​ ១០០ម៉ែត្រ​ ស្ថិតនៅក្នុងវត្តព្រៃជាំ​ ភូមិត្រពាំងថ្ម​ ឃុំឃុនរាម​ ដេីម្បីរក្សាទឹកជូនបងប្អូនប្រជាពលរដ្ឋសម្រាប់ប្រេីប្រាស់ និងបង្កបង្កើនផលផងដែរ៕SRP

ភ្នំពេញ៖នាយករដ្ឋមន្ត្រីកម្ពុជា សម្ដេចតេជោហ៊ុន សែន បានបង្ហោះរូបថត ជាមួយក្រុមគ្រួសារ និងរំលឹកដល់ពលរដ្ឋប្រុងប្រយ័ត្ន ចំពោះជំងឺឆ្លងកូវីដ១៩។
សម្តេចតេជោ ហ៊ុន សែន បានសរសេរថា
សូមបងប្អូនជនរួមជាតិបន្តយកចិត្តទុកដាក់ថែរក្សាសុខភាពដោយមានការប្រុងប្រយ័ត្នខ្ពស់ជានិច្ចចំពោះជំងឺឆ្លងកូវីដ១៩​ ដ៏កាចសាហាវ​ បេីទោះបីពេលនេះអត្រាឆ្លងនៅក្នុងប្រទេសមានកម្រិតទាបក៏ដោយ។

យេីងមិនបានភ្លេចទេពីការតស៊ូលំបាកគ្រប់យ៉ាងកាលពីមុនចាប់តាំងពីសម័យសង្គ្រាមរហូតដល់ប្រទេសមានសុខសន្តិភាពនិងរីកចម្រេីនមកដល់សព្វថ្ងៃ។

សុំអរគុណអ្នកដែលបានបង្ហោះរូបខ្ញុំនិងក្រុមគ្រួសារ​ដែលបានរំលឹកពីជីវិតនឹងការតស៊ូរបស់ខ្ញុំក៏ដូចជាការតស៊ូខិតខំប្រឹងប្រែងរបស់បងប្អូនជនរួមជាតិទម្រាំយេីងបានមកដល់ដំណាក់កាលនេះ។ ដូច្នេះយេីងមិនត្រូវបណោ្តយខ្លូនអោយរងគ្រោះថ្នាក់ដោយសារតែការធ្វេសប្រហែសនឹងការមេីលស្រាលចំពោះស្ថានការនៃការឆ្លងរាតត្បាតជំងឺកូវីដ​១៩នោះទេ។

អរគុណបងប្អូនជនរួមជាតិក្នុងការចូលរួមថែរក្សាសន្តិភាព​ និងទប់ស្កាត់ការរីករាលដាលជំងឺឆ្លងកូវីដ១៩​ នៅទូទាំងប្រទេស។ សូមជូនពរបប្អូនចៀសផុតពីជំងឺឆ្លងកូវីដ១៩​ ទាំងអស់គ្នា៕SRP

ខេត្តសៀមរាប៖សេចក្ដីរាយការណ៍បឋម
បានឲ្យដឹងថានៅព្រឹកថ្ងៃទី៣១ខែឧសភាឆ្នាំ២០២០គេបានឃើញរថយន្តយីឌុបដឹកទំនិញមួយគ្រឿង សង្ស័យផ្ទុកលើសទម្ងន់ បានជាប់ផុង នៅលើផ្លូវ នៅទល់មុខក្លឹបកីឡាជន្លង់ក្នុងភូមិជន្លង់ សង្កាត់សាលាកំរើកក្រុងសៀមរាប ។

មហាជនរិះគន់ថាការដែលរថយន្តដឹកទំនិញជាប់ផុងជ្រៅបែបនេះគឺទំនង ស្ថានីយជញ្ជីងអាចមានការឃុបឃិតក្មុងការបើកដៃឲ្យរថយន្តធុនធំៗដែលជាការបង្កឲ្យខូចខាតផ្លូវថ្នល់ជារៀងរាល់ថ្ងៃ។
សូមបញ្ជាក់ថានៅខេត្តសៀមរាប មានស្ថានីយ៍ថ្លឹងរថយន្តចំនួន០២កន្លែងទីមួយនៅស្រុកពួកទី០២នៅស្រុកប្រាសាទបាគង។
ជុំវិញករណីនេះអង្គភាពសៀមរាបប៉ុស្ដិ៍ នៅមិនទាន់ទទួលបានការបំភ្លឺពីអាជ្ញាធរនិងមន្ទីរសាធារណការនិងដឹកជញ្ជូនខេត្តសៀមរាបនៅឡើយទេ៕SRP

ខេត្តសៀមរាប៖ស្ត្រីវ័យចំណាស់ម្នាក់
ត្រូវបានសមត្ថកិច្ចអះអាងថា
ចងក សម្លាប់ខ្លួន។
ហេតុការណ៍បានកើតឡើង
នៅវេលាម៉ោង០៤និង១០នាទី ថ្ងៃទី៣១ខែឧសភាឆ្នាំ២០២០ នៅលេីផ្ទះខ្លួនឯង ក្នុងភូមិពោធិ៍សិរី ឃុំកំពង់ក្តី ស្រុកជីក្រែង។
ជនរងគ្រោះឈ្មោះ ភេម ឃ៉ែម ភេទស្រីអាយុ៧៣ឆ្នាំ រស់នៅភូមិ ឃុំកេីតហេតុខាងលេី។
តាមការបំភ្លឺរបស់សាច់ញ្ញាតិ និងអ្នករស់នៅជិតខាង« ជនរងគ្រោះមានជម្ងឺវង្វេង វង្វាន់ស្មារតី ជាយូរមកហើយធ្លាប់ចងកជាច្រើនលើក តែកូនចៅជួយទាន់ លើកនេះកូនចៅអត់ដឹងលុះព្រឹកឡើង ឃើញចងកនៅលើផ្ទះស្លាប់តែម្ដង៕SRP