ខេត្តសៀមរាប៖បុរសចំនួន៣នាក់ត្រូវបានកម្លាំងអាវុធហត្ថស្រុកអង្គរជុំឃាត់ខ្លួន ពាក់ព័ន្ធគ្រឿងញៀន។ ការឃាត់ខ្លួនធ្វើឡើង នៅថ្ងៃទី២២ ខែកុម្ភៈ ម្សិលមិញ នៅចំណុចភូមិគោកត្របែក ឃុំគោកដូង ស្រុកអង្គរជុំ ខេត្តសៀមរាបដឹកនាំដោយលោកវរសេនីយ៍ត្រី ស្មៀន រិទ្ធ មេបញ្ជាការស្រុក។

ជនសង្ស័យ១ឈ្មោះខុត ពា អាយុ២៤ឆ្នាំ នៅភូមិគោកត្របែក ឃុំគោកដូង ស្រុកអង្គរជុំ។ ២ឈ្មោះយ៉ុន ចាន់ណា អាយុ១៨ឆ្នាំ នៅភូមិគោកដូងថ្មី ឃុំគោកដូង ស្រុកអង្គរជុំ។ ៣ឈ្មោះហ៊ុយ ស៊ីធូ អាយុ១៦ឆ្នាំ នៅភូមិគោកដូងថ្មី ឃុំគោកដូង ស្រុកអង្គរជុំ។ ករណីនេះសមត្ថកិច្ចដកហូតវត្ថុតាងរួមមាន៖ ម្សៅគ្រើមពណ៌សថ្លា១កញ្ចប់តូច ទូរស័ព្ទ២គ្រឿង។ ជនសង្ស័យត្រូវបានអាវុធហត្ថបញ្ជូនទៅកាន់ទីបញ្ជាការកងរាជអាវុធហត្ថខេត្តសៀមរាប ដើម្បីកសាងសំណុំរឿងបន្ត៕SRP

ខេត្តកំពង់ចាម៖លោកជំទាវ ប៉ាង ដានី អភិបាលរងខេត្ត​ និងជាអនុប្រធានអចិន្ត្រៃយ៍សាខាកាកបាទក្រហម កម្ពុជា ខេត្តកំពង់ចាម តំណាង លោក អ៊ុន ចាន់ដា អភិបាលខេត្ត និងជាប្រធានគណៈកម្មាធិការ សាខា ខេត្តកំពង់ចាម រួមជាមួយនឹងអាជ្ញាធរមូលដ្ឋាន នារសៀលថ្ងៃទី២២ ខែកុម្ភៈ ឆ្នាំ២០២១​ ម្សិលមិញ
បាន​ចុះសាកសួរសុខទុក្ខ និងនាំយកអំណោយរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម កម្ពុជា ចូលរួមរំលែកទុក្ខ ដល់បងប្អូនខ្មែរឥស្លាម ១គ្រួសារ ឈ្មោះ ម៉ាត់ សាឡេះ អាយុ៣៦ឆ្នាំ (ងងឹតភ្នែក )និងប្រពន្ធ ឈ្មោះ ចាហ្វា រ៉ាយះ អាយុ៣៥ឆ្នាំ មានកូន៤នាក់( កូនទី ៤ ស្លាប់)សល់៣នាក់ ក្នុង​បន្ទុក ររស់នៅក្នុងភូមិទួលពោធិ៍ ឃុំព្រែកកក់ ស្រុកស្ទឹងត្រង់ ដែលមានទុក្ខ ដោយសារកូនទី៥ ទើបនឹងកើត បានស្លាប់ទៅវិញ ក្រោយពេលសម្រាល បានត្រឹមតែ ៤ម៉ោង។

សូមបញ្ជាក់ថា គ្រួសារ ប្អូន ម៉ាត់ សាឡេះ នេះ មានជីវភាពក្រខ្សត់​លំបាក​ រស់នៅជាមួយម្តាយជរា ហើយត្រូវទៅ​យាមចំការ អោយបង នៅ​ខេត្ត​កំពង់ធំ ដោយទុកកូនអោយម្តាយមើលថែ។
នៅព្រឹកថ្ងៃទី២១ ខែកុម្ភៈ ឆ្នាំ២០២១ គាត់​បាននាំប្រពន្ធដែលគ្រប់ខែមកផ្ទះម្តាយ ដើម្បីត្រៀមសម្រាល ស្រាប់តែ​នៅ​វេលា​ម៉ោង១០ព្រឹកក៏ឈឺពោះ ហើយសម្រាលតែម្តង ដោយឆ្មបបុរាណក្នុងភូមិ​ ជាអកុសល ក្រោយកើតបាន ៤ម៉ោង ទារកអភ័ព្វ ក៏បានបាត់បង់ជីវិតទៅវិញ។

ក្នុងឱកាសនោះ លោកជំទាវ ប៉ាង ដានី បានអំពាវនាវ ដល់បងប្អូនស្ត្រីមានផ្ទៃពោះទាំងឡាយ ត្រូវថែទាំ និងពិនិត្យសុខភាព ផ្ទៃពោះ អោយទៀងទាត់ ហើយត្រូវសម្រាល នៅតាមមន្ទីរពេទ្យ រួមជាមួយ ការតាមដានការលូតលាស់របស់កូន អោយមានសុខភាពល្អ។ ជាមួយនោះ ត្រូវការពារខ្លួន ចៀសអោយផុតពីការឆ្លងរាលដាល នៃជំងឺកូវីដ១៩ តាមរយៈ វិធានការ ” ៣ការពារ និង ៣កុំ ” របស់ សម្តេចតេជោ ហ៊ុន សែន និងវិធានការអប់រំនានា របស់ក្រសួងសុខាភិបាល។

អំណោយ ចូលរួមរំលែកទុក្ខគ្រួសារ សពទារក មាន ៖ អង្ករ១០០គក្រ មីជាតិ៥កេស ទឹកក្រូច៥កេស ត្រីខ៥០កំប៉ុង និងថវិកាចំនួន​៥០ម៉ឺនរៀលផងដែរ​៕SRP

ខេត្តសៀមរាប៖សេចក្ដីរាយការណ៍បានឲ្យដឹងថារថយន្តចំនួន២គ្រឿងបានបុកគ្នាលាន់ឮដូចរន្ទះ។

ហេតុការណ៍បានកើតឡើងនៅម៉ោង១៣និង៤០នាទី ថ្ងៃទី២២ ខែមករា ឆ្នាំ ២០២១ នៅចន្លោះបង្គោលគីឡូលេខ ២៩៩-៣០០ ភូមិឪឡោក ឃុំបាគង ស្រុកប្រាសាទបាគង លើផ្លូវជាតិលេខ៦ ក្នុងទិសដៅ  ច្រាសទិសគ្នា។
យោងតាមរបាយការណ៍បានបង្ហាញថាគ្រោះថ្នាក់ចរាចណ៍នេះគឺ
រថយន្តហ្វត ពណ៌ស ពាក់លេខភ្នំពេញ 2AN-84 64  បើកបរដោយឈ្មោះ  លីម  អីវ ភេទប្រុសអាយុ៤៤ឆ្នាំ នៅភូមិត្រពាំងថ្លឹង សង្កាត់ចោមចៅ ខណ្ឌពោធិ័សែនជ័យ រាជធានីភ្នំពេញ មានទិសដៅ
ពីកើត ទៅលិច បុកនឹងរថយន្តហ៊ីយិនដាយពណ៌ស ពាក់ស្លាកលេខកំពង់ចាម 3A 65 93 បើកបរដោយឈ្មោះ រ៉ាវី ហ្វីនីន ភេទប្រុសអាយុ២៧ឆ្នាំនៅភូមិរកាលើ សង្កាត់សំបួរមាស ក្រុងកំពចាម ខេត្តកំពង់ចាម ទិសដៅពីលិច ទៅកើត។ ករណីនេះអ្នកបើកបរគ្មានរបួសទាំងសងខាង។
មូលហេតុរថយន្តហ្វត បើកបរក្នុងភាពងងុយដេក៕SRP

ខេត្តកំពង់ចាម៖លោក អ៊ុន ចាន់ដា ប្រធានគណៈកម្មាធិការសាខា កាកបាទក្រហម កម្ពុជា ខេត្តកំពង់ចាម បានអំពាវនាវ ដល់ស្ត្រីមានផ្ទៃពោះទាំងអស់ សូមឲ្យ មកពិនិត្យ ថែទាំ សុខភាព ឲ្យ បាន គ្រប់ៗគ្នា ចាប់ពី ពេល ពពោះ រហូត ដល់ពេល សម្រាល និងកូន ដល់ អាយុ ២ឆ្នាំ ដែល ជា យុទ្ធសាស្ត្រ របស់ រាជរដ្ឋាភិបាល ក្នុង ការ លេីក កម្ពស់ សុខុមាលភាព នៅកម្ពុជា។

ថ្លែងយ៉ាងដូច្នេះ ក្នុងឱកាសប្រារព្ធទិវាជាតិ សុខភាពមាតា ទារក និងកុមារ ២១ កុម្ភៈ ២០២១ ដែលប្រព្រឹត្តទៅ នៅមន្ទីរសុខាភិបាល ខេត្តកំពង់ចាម នៅថ្ងៃទី២២ ខែកុម្ភៈ ឆ្នាំ ២០២១ ព្រឹកមិញនេះ។

លោក អ៊ុន ចាន់ដា ក៏បានណែនាំដល់ គ្រប់ថ្នាក់ គ្រប់ផ្នែក ត្រូវយកចិត្តទុកដាក់ អនុវត្តតាមអនុសាសន៍ ដ៌ខ្ពង់ខ្ពស់ទាំងឡាយ ដែល សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា បានផ្តល់ក្នុងសារលិខិតនេះ ដោយត្រូវរួមគ្នា ជួយអោយស្រ្តីមានផ្ទៃពោះ ទាំងអស់ ទទួលបានការពិនិត្យថែទាំ តាំងពីពរពោះរហូតដល់ពេលសម្រាល និងបន្ទាប់ពីសម្រាល ត្រូវបន្តថែទាំសុខភាពទាំងម្តាយទាំងទារក រហូតកូនមានអាយុ២ឆ្នាំ។
ប្រការដែលសំខាន់ គឺស្ត្រីជាមាតាទាំងអស់ ត្រូវដឹងអោយបានច្បាស់ពីការចិញ្ចឹមទារក និងកុមារតូច ការតាមដានការលូតលាស់របស់កូន ការពន្យារកំណើត ជួយអោយម្តាយមានសុខភាពរឹងមាំ ហើយកូនអាចទទួលបានការថែទាំពេញលេញពីម្តាយ និងមានសុខភាពល្អ ។

ក្នុងស្ថានភាពដែលប្រទេសយើង មានការរំខាន ពីមេរោគកូវីដ ១៩ នេះ លោកបានក្រើនរំលឹកដល់ ស្ត្រីមានផ្ទៃពោះ ស្ត្រីជាមាតា និងអ្នកចូលរួមទាំងអស់ ត្រូវ បន្ត«រស់នៅធម្មតា តាមបែបគន្លងថ្មី» ដោយអនុវត្តអោយបានខ្ជាប់ខ្ជួននូវវិធានការការពារខ្លួន តាមរយៈ យុទ្ធសាស្ត្រ ” ៣ការពារ និង ៣កុំ ” របស់សម្តេចតេជោ សែន និងវិធានការើណែនាំនានា របស់ក្រសួងសុខាភិបាល។

សូមបញ្ជាក់ថា អំណោយ របស់សម្តេចកិត្តិព្រឹទ្ធបណ្ឌិត ឥស្សរជន ឆ្នើម ថ្នាក់ជាតិ បានផ្តល់ ជូន ស្ត្រី ចំនួន ១៥៨ នាក់ នោះ ម្នាក់ៗ ទទួលបាន៖ មី ជាតិ១ កេស , ឃី ត ១ កញ្ចប់ , ស្ករស ១ គ . ក . ទឹកដោះខាប់ ១ កំប៉ុង , ម្សៅ លាប ខ្លួន ទារក ១ ដប , សាប៊ូ ដុស ខ្លួន ទារក ១ ដប , ខោ ទឹកនោម ទារក ១ យួរ និង ថវិកា ២០,០០០ រៀល។  ជាមួយគ្នានេះដែរ ស្ត្រីម្នាក់ដែល ត្រូវ ឪពុកចុង ចាប់រំលោភ មាន ផ្ទៃពោះ ត្រូវបាន ផ្តល់ជូន ទឹកប្រាក់ ចំនួន ២០០,០០០ រៀល ។

សូម ជម្រាប ផងដែរ ថា បន្ទាប់ពី ពិធី សំណេះសំណាល និង ចែក អំណោយ ដល់ ស្ត្រី នៅ មន្ទីរ សុខាភិបាល ខេត្ត លោកជំទាវ ញូ ង ចរិយា អ៊ុន ចាន់ ដា និង ក្រុមការងារ បាន បន្តដំណើរ អញ្ជើញ ចុះសួរសុខទុក្ខ អ្នក ជំងឺជាស្ត្រីទើបសម្រាលកូន កំពុង សម្រាក ក្នុងមន្ទីរពេទ្យខេត្ត និង បាន ឧបត្ថម្ភ ថវិកា ជូន ក្នុង ម្នាក់ៗ ៥០,០០០ រៀល ផងដែរ៕ SRP

ខេត្តសៀមរាប៖លោក សឹង្ហ សំរឹទ្ធិ សមាជិកសភាពាណិជ្ជកម្ម ខេត្តសៀមរាប-ឧត្តរមានជ័យ តំណាង សភាពាណិជ្ជកម្មខេត្ត សៀមរាប-ឧត្តរមានជ័យ នៅថ្ងៃចន្ទ ទី២២ ខែកុម្ភៈ ឆ្នាំ២០២១ នេះ បានចូលរួមជាភ្ញៀវកិត្តិយស ក្នុងវេទិកាផ្សព្វផ្សាយ និង ពិគ្រោះយោបល់ របស់ក្រុមប្រឹក្សាខេត្តសៀមរាប អាណត្តិទី៣ ឆ្នាំ២០២១។

ក្នុងវេទិកាផ្សព្វផ្សាយ និង ពិគ្រោះយោបល់ នេះធ្វើក្នុងគោលដៅទី២ នៅស្រុកវ៉ារិន និង ស្រុកអង្គរជុំ ដែលបានប្រារព្ធធ្វើឡើង នៅសាលាស្រុកអង្គរជុំ ក្រោមវត្តមាន លោក អ៊ាន ឃុន ប្រធានក្រុមប្រឹក្សាខេត្ត និង លោក ពិន ប្រាកដ អភិបាលរង តំណាង លោក ទៀ សីហា អភិបាលខេត្តសៀមរាប។

សូមជម្រាបថាក្នុងវេទិកានេះ លោក អ៊ាន ឃុន ប្រធានអង្គប្រជុំ បានទទួលយក សំណួរ សំណូមពរ របស់ប្រជាពលរដ្ឋ ចំនួន១១ ចំណុច ដោយបានដោះស្រាយផ្ទាល់បាន ៩ចំណុច និង ២ចំណុចទៀត ដោះស្រាយ ជាលាយលក្ខ័អក្សរក្នុងពេលក្រោយ៕SRP

ខេត្តត្បូងឃ្មុំ៖ក្នុងឱកាសប្រារព្ធទិវាជាតិសុខភាពមាតា ទារក និងកុមារ ២១កុម្ភៈ ២០២១ ក្រោមប្រធានបទ «បន្តផ្តល់សេវាគាំពារមាតា និងទារកក្នុងអំឡុងពេលការរាតត្បាត ជាសាកលនៃជំងឺកូវីដ-១៩» លោក ជាម ច័ន្ទ សោភ័ណ អភិបាលខេត្ត និងជាប្រធានគណៈកម្មាធិការសាខាកាកបាទក្រហមខេត្តត្បូងឃ្មុំ បាន អំពាវនាវ ដល់មាតា និង ទារក ទាំងអស់ ឲ្យ ពិនិត្យផ្ទៃពោះយ៉ាងតិច៤ដង មុនពេលសម្រាល ក្រោយឆ្លងទន្លេរួច ត្រូវបំបៅកូនដោយទឹកដោះយ៉ាងតិចណាស់៦ខែ ព្រោះ ក្នុងទឹកដោះម្តាយ សំបូរដោយជីវជាតិ មានអង់ទីគ័រការពារជំងឺខ្ពស់ប្រឆាំងការពារជំងឺផ្សេងៗ ជាពិសេស ត្រូវនាំកូនតូចៗចាក់វ៉ាក់សាំង១១មុខ បង្ការជំងឺផ្សេងៗ ផងដែរ ។

លោក ជាម ច័ន្ទសោភ័ណ បានថ្លែង ថា សម្តេចតេជោ និងសម្តេចកិត្តិព្រឹទ្ធបណ្ឌិត ពិត ជា បានខិតខំប្រឹងប្រែងណាស់ ក្នុងការលើកកម្ពស់សុខភាពស្ត្រីក្នុងប្រទេសខ្មែរ ពិសេសមាតា និងទារក ដោយម្តាយដែលមានកូនអាយុ២ឆ្នាំចុះ ទទួលប្រាក់ឧបត្ថម្ភពី សម្តេចតេជោ ថវិកាចំនួន៧៦មុឺនរៀល ក៏ដូចជាពីកាកបាទក្រហមកម្ពុជាផងដែរ។ ដោយឡែកកម្មការិនី ទទួលបានសេវាសុខភាពសង្គមដោយឥតគិតថ្លៃ តាមរយៈប័ណ្ណ ប.ស.ស ទាំងនេះជាឆន្ទៈដ៏មុះមុតដែលសម្តេចទាំងទ្វេខិតខំសម្រេចបាន។

ក្នុងបរិបទជំងឺកូវីដ១៩ លោក បានអំពាវនាវដល់បងប្អូនទាំងនៅទីនេះ និងទូទាំងខេត្ត ត្រូវបន្តផ្សព្វផ្សាយ និងអនុវត្តន៍តាមវិធានការ ៣ការពារ និង៣កុំ ដើម្បីរួមគ្នាទប់ស្កាត់ការឆ្លងរាលដាលជំងឺដ៏កាចសាហាវនេះ។
ក្នុងឱកាសនោះ គណៈអធិបតី និងឯកឧត្តមលោកជំទាវ គណៈកម្មធិការសាខាកាកបាទក្រហមខេត្ត កងកម្លាំង អាជ្ញាធរ និងលោកគ្រូអ្នកគ្រូពេទ្យ អញ្ជើញចែកអំណោយជូនមាតាដែលចូលរួម និងកំពុងសម្រាកនៅមន្ទីរពេទ្យនោះ ចំនួន២០៦នាក់ ផងដែរ ៕SRP

ខេត្តសៀមរាប៖នៅក្នុងលោកយើងនេះគ្មានអ្នកណាមួយ កើតមកហើយភ្ជាប់មកជាមួយជំនាញទំនាក់ទំនងឡើយ។

ចំពោះអ្នកពូកែទំនាក់ទំនង ” ពួកគាត់ពូកែ ពីព្រោះពួកគាត់រៀនកែលម្អឲ្យមានគុណភាព ទំនាក់ទំនង ប្រសើរឡើងៗ ” ពួកគាត់យល់អំពីហេតុផល នៃការអភិវឌ្ឍន៍ខ្លួនឯង ជាពិសេស គឺការឲ្យគុណតម្លៃ រាល់ការជួប នឹងប្រាស័យទាក់ទងជាមួយគ្នា។

” ហេតុអ្វីទើបពួកគាត់មាន ជំនាញទំនាក់ទំនង ?”
# ចម្លើយ : អនុវត្តន៍ ទំនាក់ទំនងបានច្រើន និងរៀនបានច្រើន ហើយយល់ច្រើន និងការកែប្រែបានច្រើន។

ដូច្នេះហើយអ្នកពូកែទំនាក់ទំនងគឺតែងតែយល់អ្នកណាដែលអាចយល់អំពីតម្លៃនៃភាពទំនាក់ទំនងជាមួយខ្លួន ឬ យល់ អំពីហេតុផលនិមួយៗ ដែលបានកើតឡើង។
ក្នុងពិភពធ្វើជំនួញ អ្នកត្រូវតែចេះភាពទំនាក់ទំនង ពីព្រោះទំនាក់ទំនង គឺជាការ តភ្ជាប់ រវាងមនុស្សជាមួយ និងមនុស្ស ហើយរវាង មនុស្សជាមួយនិងផលិតផល ព្រមទាំងការយល់ ពីរកម្រិតដៃគូ ក្នុងភាពទំនាក់ទំនង ឱ្យ ប្រសើរឡើង។

មានសំនួរមួយចំនួនដើម្បីឲ្យលោកធ្វើការពិចារណាដូចខាងក្រោមនេះ

* តើអ្នកអាចចងចាំបានទេនៅក្នុងជីវិតរបស់អ្នកមកដល់ថ្ងៃនេះ តើអ្នកសម្រេចចិត្តឈប់រាប់អានគេ ប៉ុន្មាននាក់ហើយ ? តើនោះមកពីមូលហេតុអ្វី ?

ប្រហែលជាអ្នកមិនចង់និយាយរកពួកគេទៀត ឬ ក៏មិនចង់ជួបមុខពួកគេ ដោយយោងទៅតាមហេតុផលណាមួយនោះ ប៉ុន្តែទុកអស់នោះប្រហែលជា ចេញមកពីហេតុផលផ្ទាល់ខ្លួនតែប៉ុណ្ណោះ។
ដោយយោងតាមសភាពការសេដ្ឋកិច្ចពិភពលោកបច្ចុប្បន្នដោយសារជម្ងឺរាតត្បាត Covid-19 អាត្រាភាពក្រីក្របានកើនឡើង ភាពមិនចុះសំរុងគ្នាក្នុងគ្រួសារ នៅក្នុងស្ថាប័នការងារ និងក្នុងពិភពលោកបានកើនឡើងជារៀងរាល់ថ្ងៃផងដែរ ទាំងនោះដោយសារតែខ្វះតុល្យភាពការស្ដាប់និងការនិយាយ ” នៅពេលដែលគ្មានទំនាក់ទំនងល្អ ជម្លោះនិងវិវាទ តែងតែកើតឡើង” ។

” ភាពមិនចុះសំរុងគ្នាកើតឡើង នៅពេលដែលពួកគេបានធ្វើឲ្យធ្លាក់ចុះនៃតម្លៃក្នុងការស្តាប់គ្នាទៅវិញទៅមក ” ប្រសិនបើអ្នកព្យាយាមនិយាយ ឬ ពន្យល់ អ្នកនឹងបាត់បង់ការយកចិត្តទុកដាក់ចំពោះការស្ដាប់” ប៉ុន្តែជីវិតរបស់មនុស្សខ្លីណាស់ អ្នកមិនគួរចំណាយពេលដើម្បី ពន្យល់ដល់អ្នកដែលមិនចង់ស្ដាប់ឡើយ ” ម្យ៉ាងវិញទៀតអ្នកប្រហែលជាយល់ហើយថា មនុស្សចង់ស្ដាប់តែអ្វីដែលគេចង់តែប៉ុណ្ណោះ ហេតុដូច្នេះហើយ ការស្វែងយល់ តើដៃគូរបស់អ្នក អ្នកត្រូវនិយាយទៅកាន់ ឬទំនាក់ទំនងជាមួយ តើពួកគេត្រូវការអ្វី?

១. ប្រកាន់យកការស្តាប់ហើយពិចារណាឲ្យបានច្រើន:
” ជំនាញស្ដាប់គឺជាទម្លាប់ ដែលអ្នកអាចធ្វើបាន ”

អ្នកដែលមានទំនាក់ទំនងល្អពួកគាត់មិនមែនពូកែនិយាយច្រើន ឬ និយាយដើម្បីបញ្ជាក់ថាខ្លួនអ្នកចេះ ឬ ខ្លួនជាអ្នកខ្លាំងជាងអ្នកដទៃឡើយ ពីព្រោះពួកគាត់យល់ថាមានតែ ការស្ដាប់ប៉ុណ្ណោះទើបធ្វើឲ្យពួកគាត់យល់អំពីហេតុផល ក្នុងជំនួបទំនាក់ទំនង ” សូមធ្វើជាអ្នកស្តាប់ដើម្បី ដើម្បីឲ្យមានការយល់ប្រាកដ ប្រសើរជាងស្តាប់ដើម្បីរង់ចំាឱកាស ដើម្បីនិយាយតបតការពារខ្លួន ។

២. ប្រកាន់ឲ្យមានតុល្យភាពក្នុងការទំនាក់ទំនង:

” ការសន្ទនាល្អ គឺជាការសន្ទនាដែលមានតុល្យភាពរវាងអ្នកនិយាយនឹងអ្នកស្ដាប់ ”

នៅក្នុងអង្គភាព ឬ សង្គមគ្រួសារ មេដឹកនាំមានការងារដ៏ធំមួយចំពោះការបង្កើតឲ្យមានតុល្យភាពឲ្យសមាជិករបស់ខ្លួនរៀនពីគ្នាទៅវិញទៅមកពោល គឺពួកគេចេះស្តាប់គ្នានិងគោរពគ្នាទៅវិញទៅមក។
ប្រសិនបើភាគីម្ខាងចេះតែនិយាយហើយភាគីម្ខាងទៀតចេះតែស្តាប់នោះមិនមែនជាបរិយាកាសទំនាក់ទំនងឡើយ។

៣. ទទួលយកការពិត: ” Accept the reality “

” មនុស្សជឿនូវការពិត ជាជាងសម្ដី នោះមានន័យថាពួកគេជឿលើសកម្មភាពនិងលទ្ធផល ឬក៏សកម្មភាពល្អសម្រាប់ពួកគេ ”

នៅក្នុងដំណើរជីវិតមនុស្សម្នាក់ៗ មានលក្ខណៈអត្តចរិកផ្សេងៗគ្នាទៅតាមកម្រិតនៃបុគ្គលនីមួយៗ ទាំងអស់នោះជារឿងពិតដែលត្រូវតែទទួលស្គាល់ ទៅលើសកម្មភាពនិងលទ្ធផលដែលពួកគេបានធ្វើ នៅក្នុងកម្រិតណាមួយដែលអ្នកគួរតែកត់សម្គាល់ ទោះបីជាពួកគេអាចគិត
ផ្ទុយពីនាក់ សកម្មភាពផ្ទុយពីអ្នក លទ្ធផលក៏ផ្ទុយពីអ្នក
ប៉ុន្តែពួកគេនៅតែមានផ្នែកណាមួយ សម្រាប់បើកផ្លូវទំនាក់ទំនងជាមួយមិត្តភាព ឬ ហេតុផលការងារណាមួយ នៅថ្ងៃក្រោយ ពីព្រោះផែនដីតូចណាស់ គង់មានថ្ងៃណាមួយនឹងជួបគ្នា ។
សូមកុំព្យាយាមកែប្រែមនុស្សឲ្យដូចអ្នកចង់បាន តាមតែពាក្យសម្ដីរបស់អ្នក ” ពួកគេអាចកែ ប្រសិនបើអ្នក
កែខ្លួនឯងជាមុនសិន ” វាពិតជាលំបាកខ្លាំងប្រសិនបើអ្នកកាន់កែវស្រា ហើយប្រាប់អ្នកដទៃទៀតកុំឲ្យផឹកស្រានោះ ។

៤. សូមកុំវិនិច្ឆ័យចេញពីគំនិតអ្នក:

” Avoid judgment and personal comparison”

គំនិតខ្លួនឯង ឬ ការវិនិច្ឆ័យគឺសម្រាប់តែពាក្យចុងក្រោយ ” Saying Good Bey ” នៃទំនាក់ទំនងតែប៉ុណ្ណោះជំនួសមកវិញអ្នកអាចបង្ហាញអ្វីដែលជាផលប្រយោជន៍ចេញពីភាពទំនាក់ទំនងនៅក្នុងកម្រិតណាមួយ នៅក្នុងលោកនេះ គ្មានអ្វីដែលអត់ប្រយោជន៍ឡើយ ប្រសិនបើយើងមើលគ្រប់់ជ្រុងជ្រោយនោះ។

៥. រក្សាបច្ចុប្បន្នភាព: ” Keep the moment alive “

ការរៀបចំចិត្តគំនិតនិងស្មារតីឲ្យនៅជាប់ខ្លួនក្នុងពេលទំនាក់ទំនង គឺជាឬសគល់នៃការយកចិត្តទុកដាក់ទៅលើតម្លៃនៃភាគីម្ខាងទៀត ពីព្រោះអ្វីដែលជួប ” គឺបច្ចុប្បន្នដែលបង្កើតឲ្យមានគុណភាព ទំនាក់ទំនង
និពន្ធដោយ លោក : សឿន តុលា
ស្ថាបនិកក្រុមហ៊ុន ផា ផា យ៉ា
PAPAYA NEXT STEP CO,.LTD

ខេត្តព្រះវិហារ៖លោក មាស សុភា ប្រធានក្រុមការងារថ្នាក់កណ្តាលចុះមូលដ្ឋានខេត្តព្រះវិហារ បានអញ្ជើញសម្ពោធ អគារស្នាក់ការថ្មី របស់ គណបក្សប្រជាជនកម្ពុជា ឃុំរអាង ស្រុកសង្គមថ្មី ខេត្តព្រះវិហារ និងសមទ្ធិផល ជាច្រើនទៀត តម្លៃជាង១០០លានរៀល។

ពិធីសម្ពោធ ធ្វើឡើង នៅថ្ងៃទី២១ ខែមករា ឆ្នាំ២០២១នេះ។

ដោយមានការចូលរួមពី លោក ប្រាក់ សុវណ្ណ ប្រធានគណ:កម្មាធិការគណបក្សប្រជាជនកម្ពុជាខេត្ត និងក្រុមការងារថ្នាក់កណ្តាល ថ្នាក់ខេត្ត ស្រុក ឃុំ ជាច្រើនរូបទៀត។

លោក មាស សុភា បានមានប្រសាសន៍ថា សមិទ្ធិផលថ្មីដែលសម្ពោធ នៅថ្ងៃនេះ ជាសមិទ្ធិផល រួមរបស់គណបក្សប្រជាជនកម្ពុជា ដែលបានមកពីការចូលរួមចំណែក ដោយការតាំងចិត្តយ៉ាងមុតមាំរបស់ក្រុមការងារថ្នាក់កណ្តាល ថ្នាក់ខេត្ត ចុះជួយស្រុកសង្គមថ្មី ដែលជាវប្បធម៌នៃសិល្បះចែករំលែកគ្នា។

លោក មាស សុភា ក៏បានថ្លែងនៅការអរគុណដល់ក្រុមការថ្នាក់កណ្តាល ថ្នាក់ខេត្តចុះជួយស្រុកសង្គមថ្មី ដែលបានខិតខំរួមសហការគ្នាកសាងអគារស្នាក់ការគណបក្សបានគ្រប់ឃុំទាំង៥៕SRP

ខេត្តកំពង់ចាម៖ក្នុងពិធីបិទវគ្គបណ្ដុះបណ្ដាល ក្រុម យុវជន សកម្ម ផ្នែក បណ្ដាញ សង្គម វគ្គទី ១ របស់ ក្រុម ការងារ យុវជន គណបក្សប្រជាជន កម្ពុជា ខេត្ត កំពង់ចាម នៅថ្ងៃ ទី ២១ ខែកុម្ភៈ ឆ្នាំ ២០២១ ម្សិលមិញ លោក អ៊ុន ចាន់ដា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សខេត្តកំពង់ចាម បានប្រាប់ដល់ក្រុមយុវជនសកម្ម ផ្នែកបណ្ដាញសង្គម ឲ្យ ធ្វើ ការ ចងក្រង ជា ក្រុម ហើយ ផ្សព្វផ្សាយ ព័ត៌មាន តាមបណ្តាញសង្គមហ្វេសប៊ុក នូវ អ្វី ដែល មាន ប្រយោជន៍ បម្រើដល់សង្គមជាតិទាំងមូល។

ក្នុង ពិធី សំណេះសំណាល ននេះដែរ លោក អ៊ុន ចាន់ដា បាន ថ្លែង ថា វគ្គបណ្ដុះបណ្ដាល ផ្នែកបណ្ដាញសង្គមលើកទី១នេះ ពិតជា មាន សារៈសំខាន់ណាស់ ដេីម្បី ឲ្យ ក្រុមយុវជន របស់ គណបក្សប្រជាជនកម្ពុជាខេត្ត រួម គ្នា ផ្សព្វផ្សាយ អំពីសមិទ្ធផលផ្សេងៗ ជាពិសេសសមិទ្ធផល ដែលរាជរដ្ឋាភិបាល ខិតខំកសាងឡេីង នៅតាមមូលដ្ឋាន រួមទាំង គម្រោងអភិវឌ្ឍន៍ ផ្សេងៗ របស់ អង្កការ ជា ដៃគូ ដែល មាន ដូចជា ស្ពាន ផ្លូវថ្នល់ ប្រព័ន្ធ ធារាសាស្ត្រ និង ហេដ្ឋារចនាសម្ព័ន្ធ ជាច្រើនទៀត ដើម្បី ឲ្យ មហាជន បាន ជ្រាប និង បាន យល់ដឹង ។

លោក អ៊ុន ចាន់ដា ក៏បាន សំណូមពរ សូមឲ្យក្រុមយុវជនសកម្ម ផ្នែកបណ្ដាញសង្គមទាំងអស់ រួមគ្នា ចងក្រង ឡេីងជា ក្រុម មាន ដូចជា ក្រុម ឃោសនឹក ធ្វើ ការ ផ្សព្វផ្សាយ ក្រុម វាគ្មិន និង ក្រុម តស៊ូ មតិ ដេីម្បី ធ្វើ ការ ពី ចម្ងាយ និង ផ្សព្វផ្សាយ ពីការ អភិវឌ្ឍន៍ រីកចម្រើន ជាពិសេស កម្មវិធី នយោបាយ របស់ រាជរដ្ឋាភិបាល ក៏ ជា សកម្មភាព ដឹកនាំ ដ៏រស់រវើក របស់គណបក្សប្រជាជនកម្ពុជា នៅ គ្រប់ មូលដ្ឋាន រហូត ដល់ ថ្នាក់ ជាតិ ពោលគឺ ត្រូវ ប្រេីប្រាស់ បណ្តាញ សង្គម ឲ្យចំទិសដៅ និង មាន ផលប្រយោជន៍ ដល់សង្គមជាតិ
យើងទាំងមូល៕SRP

ខេត្តសៀមរាប៖លោកជំទាវ ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច តំណាង សម្តេច ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញ
សម្ពោធដាក់ឱ្យដំណើរការប្រាសាទកណ្តាលស្រះស្រង់។

ពិធីនេះធ្វើនៅ ថ្ងៃទី ២១ ខែកុម្ភៈ ឆ្នាំ២០២១ នៅប្រាសាទកណ្តាលស្រះស្រង់ ស្ថិតក្នុងសង្កាត់នគរធំ ក្រុងសៀមរាប ដោយមានការចូលរួមពីលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ និងជាប្រធានក្រុមប្រឹក្សាភិបាលរបស់អាជ្ញាធរជាតិអប្សរា និងមន្ត្រីរាជរដ្ឋាភិបាល អាជ្ញាធរខេត្ត ព្រមទាំងមន្ត្រីជាច្រើនរូបទៀត។

«ការជួសជុលប្រាសាទកណ្តាលស្រះស្រង់»

ស្រះស្រង់សាងសង់ នៅលើផ្ទៃដីរាបស្មើមានបណ្តោយ ទំហំ ៧៩០ ម៉ែត្រ ពីទិសខាងកើតទៅខាងលិច និង មានទទឹងប្រវែង ៣៩០ ម៉ែត្រ ពីខាងជើងទៅខាងត្បូង ព្រមទាំងមានរានហាលនៅច្រាំងខាងលិច ដែលស្ថិតនៅចំ អ័ក្សលិច-កើតរបស់ប្រាសាទបន្ទាយក្តី។
នៅចំកណ្តាលស្រះមានប្រាសាទមួយសាងសង់ឡើងអំពីថ្មភក់ លើខឿន ថ្មបាយក្រៀមប្រាំថ្នាក់។

តាមរយៈឯកសារប្រវត្តិជាច្រើនបានសរសេរថា ស្រះស្រង់បានសាងសង់ឡើងនៅក្នុងរជ្ជកាលព្រះបាទ . ៩៤៤ ដល់ ៩៦៨) ដែលក្នុងឆ្នាំ៩៥២ មានមន្ត្រីជាន់ខ្ពស់ ជេន្ទ្រវរ្ម័នទី២ នាពាក់កណ្តាលសតវត្សរ៍ទី១០ (គ.ស ខាងពុទ្ធសាសនាឈ្មោះ Kavindrarimathana ដោយមានគំនិតស្ថាបត្យកម្មខ្មែរ បានផ្តួចផ្តើមជីកស្រះនេះឡើង ហើយបន្ទាប់មកត្រូវបានកែលម្អដោយព្រះបាទជ័យវរ្ម័នទី៧នៅសតវត្សរ៍ទី១២ (គ.ស.១១៨១ ដល់ ១២១៨) ដើម្បីឧទ្ទិសដល់ពុទ្ធសាសនា។

ការឯកសារសិក្សាស្រាវជ្រាវចាស់ៗ ដែលទាក់ទងនឹងរចនាសម្ព័ន្ធប្រាសាទកណ្តាលស្រះស្រង់នេះមាន តិចតួចបំផុត។
នៅឆ្នាំ១៩១៨ លោក Henri Marchal បានទៅពិនិត្យរចនាសម្ព័ន្ធប្រាសាទកណ្តាលស្រះស្រង់ ដែលនៅលើកូនកោះនោះមានសំណង់ថ្មបាយក្រៀមទ្រថ្មភក់ពីរបីដុំស្ថិតនៅទីតាំងដើម រីឯថ្មភក់ដ៏ទៃផ្សេងទៀត បានដួលរលំ។ ប្រាំពីរឆ្នាំក្រោយមក គាត់បានត្រលប់មកប្រាសាទនេះ ដើម្បីសិក្សាពីសំណល់ ថ្មបាយក្រៀម និងថ្ម ភក់ម្តងទៀត ហើយគាត់សង្កេតឃើញថាក្រៅពីថ្មបាយក្រៀម និងថ្មភក់ ដែលស្ថិតនៅរាយប៉ាយនោះ នៅមាន

សំណង់ថ្មបាយក្រៀមដែលនៅរក្សាជំហរបានល្អ បើទោះបីជាសំណង់នោះបានសឹករិចរិលខ្លាំងពិបាកមើលរូបរាង ដើមក៏ដោយ។
ក្រោយមកក្នុងខែឧសភា ឆ្នាំ១៩៣២ លោកHenri Marchal បានទៅថតរូបស្ថានភាពប្រាសាទ ហើយគាត់សង្កេតឃើញមានសំណង់ថ្មបាយក្រៀមទ្រថ្មភក់កម្ពស់១,៣០ម៉ែត្រ និងថ្មដែលផ្សេងទៀតបានរលំខ្នាត ចេញពីអង្កត់ផ្ចិតទួលចម្ងាយប្រមាណពី៥ ទៅ ៦ ម៉ែត្រជុំវិញ។

ដោយសង្កេតឃើញរចនាសម្ព័ន្ធប្រាសាទដួលរលំស្ទើរទាំងស្រុង និងស្ថានភាពថ្មីមានសភាពពុកផុយ

អាជ្ញាធរជាតិអប្សរា បានធ្វើការសិក្សាគម្រោងជួសជុលប្រាសាទនេះឲ្យមានរូបរាងឡើងវិញ ដើម្បីថែរក្សា និងលើក តម្លៃប្រាសាទឲ្យបានរឹងមាំ គង់វង្ស យូរអង្វែង។ គម្រោងនេះបានទទួលការឧបត្ថម្ភថវិកាចំនួន ១៩០.០០០ ដុល្លារ អាមេរិក ពីលោក ស្រី សៀង ចាន់ហេង អគ្គនាយិកាក្រុមហ៊ុន ហេង អភិវឌ្ឍន៍ តាមរយៈព្រះ សទ្ធម្មប្បកាសនី បណ្ឌិត តាត មហាទី ចៅអធិការវត្តព្រះឥន្ទកោសា។

សូមជម្រាបថាកាលពីថ្ងៃទី៣០ ខែកញ្ញា ឆ្នាំ២០១៩ អាជ្ញាធរជាតិអប្សរាបានរៀបចំពិធីប្រុងពលីបើកការដ្ឋានជួសជុល ប្រាសាទកណ្តាលស្រះស្រង់ ហើយត្រូវរង់ចាំរហូតដល់ពេលទឹកស្រកទើបអាចសាងសង់ទំនប់ព័ទ្ធជុំវិញដើម្បីធ្វើ ការជុលជុលបាន។
គម្រោងជួសជុលរចនាសម្ព័ន្ធប្រាសាទនេះ យើងចាំបាច់ត្រូវធ្វើការសិក្សាលើឯកសារចាស់ៗ ការផ្ដុំថ្មប្រាសាទឡើងវិញ ព្រមទាំងការធ្វើកំណាយស្រាវជ្រាវដើម្បីស្វែងយល់ និងកំណត់ពីរូបរាងដើមនៃប្រាសាទ ដោយគោរពតាមធម្មនុញ្ញអង្គរ។ ក្នុងការធ្វើកំណាយស្រាវជ្រាវបុរាណវិទ្យា យើងប្រទះឃើញមានវត្ថុសំខាន់ៗជា ច្រើនដូចជា គ្រាប់កួតត្រីសូល៍ធ្វើពីលោហៈ អណ្តើកថ្ម ក្បាលនាគ ជាដើម ដែលវត្ថុបុរាណទាំងនោះត្រូវបានយក ទៅរក្សាទុកបានយ៉ាងត្រឹមត្រូវ និងដាក់តាំងបង្ហាញជូនសាធារណជនទស្សនានៅសារមន្ទីរព្រះនរោត្តម សីហនុ អង្គរខេត្តសៀមរាប។

ការងារជួសជុលប្រាសាទកណ្តាលស្រះស្រង់នេះ បានចាប់ផ្តើមនាដើមឆ្នាំ២០២០ ដោយអ្នកជំនាញជាតិ នៃអាជ្ញាធរជាតិអប្សរា ហើយបានបញ្ចប់ទាំងស្រុងដោយជោគជ័យដោយប្រើរយៈពេល ១២ខែ៕SRP

ខេត្តកំពង់ស្ពឺ៖លោកហ៊ុន ម៉ានី ប្រធានគណៈកម្មការ អប់រំយុវជនកីឡា កិច្ចការសាសនា វប្បធម៌ និងទេសចរណ៍នៃរដ្ឋសភា និងជាអ្នកតំណាងរាស្រ្ដមណ្ឌលកំពង់ស្ពឺ អមដំណើរដោយឯកឧត្តមអ្នកតំណាងរាស្រ្ត សមាជិកព្រឹទ្ធសភា លោកអភិបាលនៃគណៈអភិបាលខេត្តកំពង់ស្ពឺ ថ្នាក់ដឹកនាំ មន្រ្តីរាជការ រដ្ឋបាលក្រុង-ស្រុក មន្ទីរ អង្គភាពជុំវិញខេត្ត បានអញ្ជើញជាអធិបតីក្នុងពិធីក្រុងពាលីបុកគ្រឹះសាងសង់អគារ ទីលានកីឡា និងហេដ្ឋារចនាសម្ព័ន្ធជុំវិញនៃពហុកីឡដ្ឋានខេត្តកំពង់ស្ពឺ នាព្រឹកថ្ងៃទី២១ ខែកុម្ភៈ ឆ្នាំ២០២១។

កីឡដ្ឋានបាល់ទាត់លក្ខណៈស្ដង់ដារនេះ ស្ថិតនៅតាមបណ្ដោយផ្លូវជាតិលេខ៤៤ ចម្ងាយប្រមាណ ៤គីឡូម៉ែត្រពីផ្លូវជាតិលេខ៤ នៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ដែលសាងសង់លើផ្ទៃដីជាង ៤ហិកតា។ កីឡដ្ឋានខេត្តកំពង់ស្ពឺនេះ ជាគំនិតផ្ដួចផ្ដើមរបស់ លោក ហ៊ុន ម៉ានី ព្រមទាំងថ្នាក់ដឹកនាំខេត្តកំពង់ស្ពឺ។ គម្រោងនេះត្រូវបានទទួលការគាំទ្រយ៉ាងពេញទំហឹង ពីគម្រោងណាហ្គាវើលបេះដូងសប្បុរស និងពីសំណាក់ស ប្បុរសជននានាផងនោះ កីឡដ្ឋាននេះមិនត្រឹមតែជាទីតាំងប្រកួតកីឡាបាល់ទាត់សម្រាប់ខេត្តកំពង់ស្ពឺនោះទេ កីឡដ្ឋាននេះក៏នឹងក្លាយជាទីតាំងបណ្ដុះបណ្ដាលថ្នាលយុវជនក្នុងខេត្តកំពង់ស្ពឺ ដែលស្រឡាញ់ នឹងមានទេពកោសល្យក្នុងវិស័យបាល់ទាត់ឲ្យក្លាយជា កីឡាករ កីឡាការិនី ដែលមានគុណភាព និងសមត្ថភាពខ្ពស់ដែលចេញពីខេត្តកំពង់ស្ពឺ។ កីឡដ្ឋានខេត្តកំពង់ស្ពឺ ជាកីឡដ្ឋានស្ដង់ដារអន្ដរជាតិដែលមានសមត្ថភាពគ្រប់គ្រាន់អាចធ្វើជាម្ចាស់ផ្ទះនៃការប្រកួតថ្នាក់ជាតិ និងអន្ដរជាតិបានផងដែរ។

លោក វ៉ី សំណាង អភិបាលខេត្តកំពង់ស្ពឺ បានមានប្រសាសន៍ថា វិស័យកីឡាខេត្តកំពង់ស្ពឺ ជាពិសេសកីឡាបាល់ទាត់នារីដ៏ឆ្នើមបានក្លាយទៅជាជម្រើសជាតិហើយ ។ ចំពោះការកសាងកីឡដ្ឋាននេះគឺជាកន្លែងពង្រឹងសមត្ថភាពហ្វឹកហាត់យុវជន ទៅតាមប្រសាសន៍ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា (មនុស្សម្នាក់កីឡាមួយប្រភេទ) ហើយកសាងនេះទោះបីយូបន្តិចតែការកសាងត្រូវមានគុណភាព និងសោភ័ណភាពជាចាំបាច់។

អភិបាលខេត្តបានបន្ថែមថា ចំពោះគុណភាព និងសោភ័ណភាព បូកទាំងការកសាងកីឡដ្ឋានសំណង់រឹងមាំ យ៉ាងហោចណាស់ក្រុមការងារចំណាយពេលវេលាយ៉ាងតិច១៥ខែចាប់ពីថ្ងៃបុកគ្រឹះទៅ ឬរួចរាល់កំឡុងមុនចូលឆ្នាំខ្មែរឆ្នាំ២០២២ ។ ការកសាងនេះដើម្បីសម្រេចបានឆ្នាំ២០២៣ ដែលកម្ពុជានិងធ្វើជាម្ចាស់ផ្ទះ នៃការប្រកួតកីឡាស៊ីហ្គេម ហើយកីឡដ្ឋានខេត្តកំពង់ស្ពឺ និងក្លាយជាកន្លែងលេងកីឡាចម្រុះដែលបម្រើឲ្យសក្តានុពលនៃកីឡាតែម្តង ។

លោក អ៊ុង រដ្ឋា តំណាងក្រុមការងារត្រួតពិនិត្យការសាងសង់កីឡដ្ឋានខេត្តកំពង់ស្ពឺ បានបញ្ជាក់ថា យើងសាងសង់នេះគឺចង់បានកីឡដ្ឋានស្ដង់ដារមួយដែលអាចប្រកួតថ្នាក់តំបន់បាន ហើយការសាងសង់នេះ ជាផ្នែកមួយ នៃការអភិវឌ្ឍន៍វិស័យកីឡា ក្នុងខេត្តកំពង់ស្ពឺ ដោយផ្អែកលើគម្រោងជារួម ដែល លោកហ៊ុន ម៉ានី តែងតែយកចិត្តទុកដាក់ ក្នុងន័យចូលរួមអភិវឌ្ឍវិស័យកីឡាជាតិ ឆ្ពោះទៅកាន់ការ ប្រកួតកីឡាស៊ីហ្គេម ឆ្នាំ២០២៣ ដូចជាការកសាងថ្នាលកីឡាករ ពង្រឹងសមត្ថភាពគ្រូបង្ហាត់ និងផ្ដល់ឱកាសឲ្យប្អូនៗ ដែលមានទេពកោសល្យ បានចូលរួមលេងកីឡា ព្រោះឯកឧត្តមមានមហិច្ឆតាចង់ឃើញប្អូនៗកីឡាករជម្រើសជាតិនាថ្ងៃអនាគត កាន់តែច្រើនឡើងមានប្រភពចេញពីខេត្តកំពង់ស្ពឺ» ។

បើតាមផែនការនៃការសាងសង់កីឡដ្ឋានបាល់ទាត់នេះ ការសាងសង់នឹងបែងចែក ជា ២ដំណាក់កាល ដែលដំណាក់កាលទី១ គឺជាការសាងសង់ ក្លោងទ្វារធំចំនួន២ របងជុំវិញ សួនកុមារ និងទីលានរត់ កន្លែងអង្គុយVIP ៣០០០កៅអី ទីលានបាល់ ទាត់ ដែលបំពាក់ដោយភ្លើងបំភ្លឺទីលាន រួមជាមួយការរៀបចំបរិវេណជុំវិញ និងដំណាក់កាលទី២ ជាការសាងសង់ កន្លែងអ្នកទស្សនាកើនដល់ ៦០០០នាក់។ កីឡដ្ឋាខេត្តកំពង់ស្ពឺនេះនឹងប្រែក្លាយខេត្តកំពង់ស្ពឺដែលធ្លាប់តែជាខេត្តដែលបង ប្អូនប្រជាពលរដ្ឋធ្វើដំណើរទៅហួសមកហួស មកជាទីតាំងសក្ដានុពលដែលលើកកម្ពស់មុខមាត់ និងកិត្យានុភាពខេត្តកំពង់ស្ពឺ ជាពិសេសវិស័យកីឡាបាល់ទាត់។

គូសបញ្ជាក់ផងដែរថា តាមការគ្រោងទុក កីឡដ្ឋានដ៏ធំស្កឹមស្កៃ ប្រកបដោយសោភ័ណភាពល្អប្រណិតនេះនឹងត្រូវសាងសង់បញ្ចប់ដំណាក់កាលទី១ ក្នុងឆ្នាំ២០២២៕SRP