ខេត្តកំពង់ចាម៖ផ្ទះមួយខ្នងនិងទ្រព្យសម្បត្តិ ត្រូវបានអគ្គីភ័យឆាបឆេះបំផ្លាញទាំងស្រុង។

ហេតុការណ៍បានកើតឡើង នៅថ្ងៃទី០៩ ខែ មីនា ឆ្នាំ ២០២១ វេលាម៉ោង១៨ និង៣០នាទីស្ថិតនៅភូមិរលៀក ឃុំអំពិល ស្រុកកំពង់សៀម។

សមត្ថកិច្ចបានបន្ដថាម្ចាស់ផ្ទះ ឈ្មោះ សឿន ណាង ភេទប្រុស អាយុ៥១ឆ្នាំ ប្រពន្ធ ឈ្មោះគាន ចាន់ណា អាយុ៤៩ ឆ្នាំ។

ករណីនេះ ត្រូវបាន លោកប៊ិន ឡាដា អភិបាលស្រុក ដឹកនាំសហការី រួមជាមួយ កងម្លាំងទាំង៣ ជួយពន្លត់ផងដែរ។ ទោះជាយ៉ាងណាអគ្គីភ័យនេះ បណ្ដាលឲ្យបាត់បង់ ដូចជា៖ ផ្ទះធ្វើពី ឈើប្រក់ក្បឿងជញ្ជាំងក្តារ ទំហំ ០៦ម×១០មសង់ខ្ពស់ពីដី ចំនួន០១ខ្នង និង ប្រាក់រៀលចំនួន២លានរៀលជាង ស្រូវ ចំនួន ២៥០០ គ.ក្រ ម៉ាសុីនស្រូវ ចំនួន០១គ្រឿង ទូរឈើចំនួន០១, ទូរកញ្ចក់០២ ,ខោអាវ និងសម្ភារមួយចំនួន។មូលហេតុបណ្ដាមកពីការ ឆ្លងចរន្តអគ្គីសនី៕SRP

ខេត្តសៀមរាប៖បុរសម្នាក់បានស្លាប់និងម្នាក់ទៀតរងរបួសធ្ងន់ ដោយគ្រោះថ្នាក់ចរាចរណ៍បង្កឡើងដោយខ្លួនឯង ក្នុងករណីពីរផ្សេងគ្នា។

សមត្ថកិច្ចស្រុកអង្គរជុំបានដឹងថា ករណីទី១បានកើតឡើង នៅវេលាម៉ោង១៤និង៤០នាទីថ្ងៃទី០៩ ខែមីនា ឆ្នាំ​២០២១ នៅចំណុចភូមិគោកភ្នៅ ឃុំគោកដូង។

ជនរងគ្រោះ​ឈ្មោះ​ ប្លោក ស្នា អាយុ​៣២ឆ្នាំ ជិះម៉ូតូម៉ាក​ហុងដា​ឌ្រីម​សេរី២០២០ពាក់ស្លាកលេខ1AE 1579 សៀមរាប ដួលដោយខ្លួនឯង រស់នៅភូមិឃុំកើតហេតុខាងលើ (ស្លាប់)។ មូលហេតុ​ ស្រវឹងស្រា។

ករណីទី២នៅវេលាម៉ោង15និង30 នាទីថ្ងៃទី09 ខែមីនា ឆ្នាំ2021លើកំណាត់ផ្លូហាយវ៉េស្ថិតក្នុងភូមិតានី ឃំុរុនតាឯក ស្រុកបន្ទាយស្រី។

សមត្ថកិច្ចបានបន្តថាជនរងគ្រោះ ឈ្មោះ ហ៊ន់ ភក់ អាយុ46 ឆ្នាំ ទីលំនៅ ភូមិ ព្រៃខ្នុរ ឃុំស្រែណូយ ស្រុកវ៉ារិន ខេត្តសៀមរាប ជិះម៉ូតូហុងដាឌ្រីមពណ៌ខ្មៅសេរីឆ្នាំ2019 ពាក់ស្លាកលេខសៀមរាប1×5079 ដួលដោយខ្លួនឯង បណ្តាលអោយរងរបួសធ្ងន់ ត្រូវបានបញ្ជួនទៅសង្គ្រោះ នៅមន្ទីពេទ្យខេត្តសៀមរាប។ ចំណែកម៉ូតូនគរបាលរក្សាទុកនៅប៉ុស្តិ៍រដ្ឋបាលឃំុរុនតាឯក៕SRP

ខេត្តសៀមរាប៖អាជ្ញាធរខេត្តសៀមរាបបានអះអាងនៅមុននេះបន្តិចថា៖ គណៈបញ្ជាការឯកភាពរដ្ឋបាលខេត្តសៀមរាប ដាក់ប៉ុស្តិ៍ត្រួតពិនិត្យសុខភាព នៅព្រំប្រទល់ ខេត្តសៀមរាបជាមួយខេត្តកំពង់ធំ។

អាជ្ញាធរខេត្តបានបន្តថា៖គិតមកទល់ពេលនេះ ស្ថានភាពកូវីដ១៩ កំពុងរីករាលដាល ក្នុងសហគមន៍ នៅរាជធានីភ្នំពេញ និងបណ្តាខេត្តមួយចំនួន ហើយរាជរដ្ឋាភិបាល ក៏បានបង្កើនការចាត់វិធានការកំរិតខ្ពស់បន្ថែមទៀត។

ជាមួយគ្នានេះ លោក ទៀ សីហា អភិបាលនិងជាប្រធានគណៈបញ្ជាការឯកភាពរដ្ឋបាលខេត្តសៀមរាប និងក្រុមការងារស្រាវជ្រាវ និងតាមដានបុគ្គលសង្ស័យ មានផ្ទុកជំងឺកូវីដ-១៩ នៅក្នុងខេត្តសៀមរាប បានសម្រេចដាក់ចេញវិធានការត្រួតពិនិត្យសុខភាពនៅចំណុចព្រំប្រទល់ស្រុកជីក្រែង ខេត្តសៀមរាប និងស្រុកស្ទោង ខេត្តកំពង់ធំ។ ការដឹកទំនិញ និងប្រជាពលរដ្ឋ អាចធ្វើដំណើរឆ្លងកាត់ បានជាធម្មតា ដោយមិនមានការហាមឃាត់នោះឡើយ ដោយគ្រាន់តែមានការត្រួតពិនិត្យសុខភាព។

ដូចនេះ ចាប់ពីថ្ងៃទី៩ ខែមីនា ឆ្នាំ២០២១ នេះ ក្រុមការងារក៏បានដាក់ដំណើរត្រួតពិនិត្យសុខភាពបឋម និងស្រង់ស្ថិតិ នៅចំណុចព្រំប្រទល់នេះ ដើម្បីងាយស្រួលក្នុងការគ្រប់គ្រង ព្រមណែនាំឲ្យអនុវត្តការស្កែន QR Code Stop COVID-19 “ទប់ស្កាត់ ជំងឺកូនវីដ១៩”ផងដែរ។

ដូចនេះ សូមបងប្អូនធ្វើដំណើរឆ្លងកាត់ចំណុចនេះ សូមចូលរួមអនុវត្តតាមការណែនាំរបស់ក្រុមការងារដែលប្រចាំការនៅទីនោះកុំបីខាន៕SRP

ខេត្តកំពង់ចាម ៖លោក អ៊ុន ចាន់ដា អភិបាលខេត្តកំពង់ចាម នាព្រឹកថ្ងៃទី៩ ខែមីនា ឆ្នាំ២០២១នេះ បានអញ្ជើញចុះពិនិត្យមណ្ឌលចត្តាឡីសក័ កំពង់ចាម ដែលមានពលករចំណូលស្រុក ត្រឡប់ មកពីប្រទេសថៃ និងអ្នកពាក់ពន្ធ័ព្រឹត្តិការណ៍២០ កុម្ភៈ សរុប ចំនួន ១៨៣នាក់ ។

លោក អ៊ុន ចាន់ដា បាន ធ្វេី ការ ផ្តាំផ្ញេី ដល់ ពលករ និង អ្នក ពាក់ព័ន្ធ ទាំងអស់ សូម អនុវត្ត ឲ្យ បានខ្ជាប់ខ្ជួន ទៅ តាម ប្រសាសន៍ ណែនាំរបស់ សម្ដេច ហ៊ុន សែន ក៏ ដូច ជា ក្រសួង សុខាភិបាល នូវវិធានការ ៣ការពារ ៣កុំ ដើម្បីបង្ការការរីករាលដាលនៃជំងឺកូវីដ-១៩ ក្នុងសហគមន៍យើង ក៏ដូចជាប្រទេសកម្ពុជាទាំងមូល ផងដែរ ។

អភិបាលខេត្ត ក៏បាន សំណូមពរ ដល់ ពលករ និង អ្នក ពាក់ព័ន្ធ ទាំងអស់ សូម ឲ្យ មានការ ស៊ូទ្រាំ អត់ធ្មត់ មួយ រយៈ ពេល ព្រោះបន្ទាប់ពីអនុវត្តការធ្វើចត្តាឡីស័កបានត្រឹមត្រូវ ក្នុង រយៈពេល សរុប ១៦ថ្ងៃ ប្រសិន បើ លទ្ធផល ឃើញ ថា អវិជ្ជមានទេនោះ គឺ បងប្អូន អាច ចាកចេញ ត្រឡប់ ទៅ ផ្ទះ វិញ ដោយ គ្មាន អ្នក ណា ហាម ឃាត់ នោះឡើយ។

គួរ បញ្ជាក់ ថា បច្ចុប្បន្ន មណ្ឌល ចត្តាឡីស័ក កំពង់ចាម មាន ពលករ ចំណូល ស្រុក ត្រឡប់ មក ពី ប្រទេស ថៃ និង អ្នក ពាក់ព័ន្ធ ព្រឹត្តិការណ៍ ២០ កុម្ភៈ សរុប ១៨៣នាក់ ដែលកំពុងធ្វើចត្តឡីសក័ នៅសាលាគរុកោសល្យភូមិភាគខេត្តកំពង់ចាម ចំនួន៩៨នាក់ និងនៅសណ្ឋាគារមេគង្គចំនួន៨៥នាក់។ ដោយ មាន កម្លាំង សមត្ថកិច្ច យាមកាម បុគ្គលិក ក្រុមគ្រូពេទ្យប្រចាំការ និងទីតាំង សម្រាប់ យកសំណាក ទៅ ពិនិត្យ ផងដែរ ។

គួរ រំលឹក ថា បន្ទាប់ ពី ទទួល បានសេចក្តី ណែនាំ ដ៏ខ្ពង់ខ្ពស់ របស់ សម្តេច ហ៊ុន សែន នាយករដ្ឋមន្ត្រី នាព្រឹក ថ្ងៃទី៨ ខែមីនា ឆ្នាំ ២០២១ លោកអ៊ុន ចាន់ដា បានដឹកនាំកិច្ចប្រជុំ ក្រុមការងារថ្នាក់ខេត្ត ដើម្បីដាក់ចេញនូវយន្តការ ក្នុងការគ្រប់គ្រង និងចាត់ឲ្យ អភិបាលរងខេត្ត ដឹកនាំក្រុមការងារ ទៅទទួលពលករ ចំណូលស្រុក ពីប្រទេសថៃ តាមច្រកព្រំដែននានា និងមណ្ឌលចត្តាឡីស័កនៅតាមព្រំដែនថៃ ដេីម្បី យកមកបន្តធ្វើចត្តាឡីស័កនៅ ខេត្តកំពង់ចាម ៕SRP

ខេត្តកំពង់ចាម៖ប្រតិបត្តិការស្វែងរក គ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចក្នុងទន្លេ ស្ថិតនៅភូមិវាល ឃុំមានជ័យ ស្រុកស្រីសន្ធរ ខេត្តកំពង់ចាម ត្រូវបានកំណត់លើទីតាំងទំហំ១៥០០០ម៉ែត្រការ៉េ ឬស្មើនឹង១៥០ហិកតា ដែលបានចាប់ផ្ដើមពីខែតុលា ឆ្នាំ២០២០ ហើយគ្រោងបញ្ចប់នៅខែឧសភា ពោលគឺមុនការមកដល់នូវរដូវវស្សា។ យ៉ាងណាក៏ដោយ សម្ដេចស ខេង បានសង្កត់ធ្ងន់ថា ប្រតិបត្តិការ មិនអាចធ្វើដោយប្រញាប់ប្រញាល់ពេកនោះឡើយ ពោលគឺត្រូវគិតលើសុវត្ថិភាពក្រុមការងារជាអាទិភាពបំផុត។

សម្ដេច ស ខេង រដ្ឋមន្ត្រីក្រសួងមហាផ្ទៃ នៅថ្ងៃទី០៨ ខែមីនា ព្រឹកមិញនេះ បានដឹកនាំក្រុមការងារអន្តរក្រសួង ដើម្បីចុះសិក្សានិងដោះស្រាយករណី រកឃើញគ្រាប់យុទ្ធភណ្ឌមិនទាន់ផ្ទុះក្នុងនាវាដែលលិចក្នុងទន្លេ
ស្ថិតនៅភូមិវាលនេះ។

ចាប់តាំងពីខែតុលា ឆ្នាំ២០២០ រហូតមកដល់ខែមីនា ឆ្នាំ២០២១នេះ ក្រុមការងារបានរកឃើញ គ្រាប់យុទ្ធភណ្ឌមិនទាន់ផ្ទុះ ចំនួន១៥,២៨២គីឡូក្រាម រួមទាំងឆ្អឹងសពមនុស្ស និងសម្ភារសឹកមួយចំនួនទៀត។

ដោយឡែកនៅក្នុងសប្ដាហ៍ទី១ នៃខែមីនា ឆ្នាំ២០២១នេះ ក្រុមការងារប្រតិបត្តិការ បានបន្តបេសកកម្មមុជទឹកចុះស្រង់គ្រាប់យុទ្ធភណ្ឌមិនទាន់ផ្ទុះបានជាបន្តបន្ទាប់ទៀត ក្នុងនោះរួមមាន គ្រាប់ប្រភេទ១២.៧ម.មចំនួន១៩,០៨៧គ្រាប់, គ្រាប់៦០ ម.ម ៨៧គ្រាប់, គ្រាប់៨១ ម.ម ៦១គ្រាប់, ឆ្អឹងសពមនុស្ស១៦បំណែក, អាវុធAK៤៧៨ដើម និងសម្ភារសឹកមួយចំនួន៕SRP

ខេត្តព្រះវិហារ៖ទីតាំងសិប្បកម្មកែច្នៃផលអនុផលព្រៃឈើ និងបង្កើតរោងសន្និធិលក់ចែកចាយផល អនុផលព្រៃឈើ គ្មានលិខិតអនុញ្ញាត មួយកន្លែងស្ថិតនៅភូមិ ភ្នំដែក ឃុំរមណី ស្រុករវៀង ខេត្តព្រះវិហារ ត្រូវបានសមត្ថកិច្ចព្រះវិហារចុះបង្ក្រាប។

ការបង្ក្រាបនេះធ្វើឡើងនៅថ្ងៃទី០៨ ខែមីនា ឆ្នាំ២០២១ ដោយមន្ត្រីព្រៃឈើ និងសហការជាមួយនាយកដ្ឋានប្រឆាំងចារកម្មក្រសួងមហាផ្ទៃ ក្រោមការសម្របសម្រួល ពីលោក វុធ សាវី ព្រះរាជអាជ្ញារងខេត្តព្រះវិហារ។

ប្រតិបត្តិការនេះ សមត្ថកិច្ចដកហូតបាន ឈើធ្នង់បេង កកោះ ឈើកែច្នៃ ម៉ូទ័រខាត ជាច្រើនទៀត។

លោក វុធ សាវី ព្រះរាជអាជ្ញារងខេត្តខេត្តព្រះវិហារ បានថ្លែងប្រាប់សារព័ត៌មានថា វត្ថុតាង ខាងលើ នឹងយកមករក្សាទុក នៅរដ្ឋបាលព្រៃឈើ ដើម្បីកសាងសំណុំរឿងបញ្ជូនទៅតុលាការ៕SRP

ខេត្តសៀមរាប៖រដ្ឋបាលខេត្តសៀមរាប រួមជាមួយសហភាព សហព័ន្ធ យុវជនកម្ពុជាខេត្តសៀមរាប និងសាខាកាកបាទក្រហមខេត្ត បានរៀបចំពិធីសំណេះសំណាល់សួរសុខទុក្ខ រៀបចំម្ហូប អាហារ និងផ្តល់អំណោយដល់កុមារគថ្លង់ និងកុមារពិការភ្នែកខេត្តសៀមរាប ក្នុងគោលបំណងគាំទ្រ និង លើកទឹកចិត្តពួកគេ ឱ្យរស់នៅក្នុងជីវិតមានន័យក្នុងសង្គមជាតិ។

ពិធីនេះបានប្រារព្ធធ្វើឡើង នៅវិទ្យាល័យអប់រំពិសេសសៀមរាប( សាលាកុមារគ ថ្លង់ និងកុមារពិការភ្នែក ខេត្តសៀមរាប )នាព្រឹកថ្ងៃទី០៨ខែមីនាឆ្នាំ២០២១ គឺជាថ្ងៃទិវាសិទ្ធិនារីអន្តរជាតិ ក្រោមវត្តមានសៀង ណាំ អ្នកតំណាង រាស្ត្រមណ្ឌលសៀមរាប លោក អ៊ាន ឃុន ប្រធានក្រុមប្រឹក្សាខេត្ត លោក ទៀ សីហា អភិបាលខេត្តសៀមរាប និងលោកជំទាវ ព្រមទាំងមានការអញ្ជើញចូលរួមពីសំណាក់ឯកឧត្តមលោកជំទាវ លោក-លោកស្រី សមាជិក-សមាជិកាក្រុមប្រឹក្សាខេត្ត ថ្នាក់ដឹកនាំមន្ទីរ អង្គភាពជុំវិញខេត្តនិង ថ្នាក់ដឹកនាំសហភាព សហព័ន្ធ យុវជនកម្ពុជាខេត្តសៀមរាប សាខាកាកបាទក្រហមខេត្តអញ្ជើញចូលរួមផងដែរ។

តាមរបាយការណ៍របស់លោកស្រី ហុង ធារី នាយិកាវិទ្យាល័យ អប់រំពិសេសសៀមរាប បានអោយដឹងថា វិទ្យាល័យអប់រំពិសេសសៀមរាប(សាលាគថ្លង់ និងកុមារពិការភ្នែកខេត្តសៀមរាប ) បង្កើតឡើងនៅថ្ងៃទី០១ខែធ្នូ ឆ្នាំ២០០០ ដែលមានទីតាំងនៅភូមិមណ្ឌល៣ សង្កាត់ស្លក្រាម ក្រុងសៀមរាប ក្រោមកិច្ចសហការរវាងអង្គការគ្រួសារថ្មី និងក្រសួងអប់រំយុវជននិងកីឡា ដោយសាលាបានទទួលបង្រៀន និងអប់រំ តែកុមារពិការពីរប្រភេទប៉ុណ្ណោះឱ្យចូលរៀន គឺកុមារគថ្លង់ និងកុមារពិការភ្នែក។ នៅចុងឆ្នាំ២០១៧ អង្គការគ្រួសារថ្មីបានផ្ទេរសាលាអោយស្ថិតនៅ ក្រោមការគ្រប់គ្រងរបស់ក្រសួងអប់រំ យុវជន និងកីឡា ដោយមានពីថ្នាក់មត្តេយ្យដល់ថ្នាក់ទី១២ ហើយ ក្រសួងអប់រំក៍បានប្តូរឈ្មោះសាលាទៅជា វិទ្យាល័យអប់រំពិសេស សៀមរាប ហើយសិស្សគថ្លង់ និងសិស្សពិការភ្នែករៀន តាមកម្មវិធីរបស់ក្រសួងអប់រំ ដោយបកប្រែពីសៀវភៅសិក្សា គោលគ្រប់មុខវិជ្ជា ជាភាសាសញ្ញាខ្មែរសម្រាប់បង្រៀនសិស្សថ្លង់ និងអក្សរប្រៃយ៍សម្រាប់បង្រៀនសិស្សពិការភ្នែក ហើយរៀនពេញមួយថ្ងៃ។

លោកស្រី ហុង ធារី បានអោយដឹងថា វិទ្យាល័យអប់រំពិសេសសៀមរាប មានអគារចំនួន១២ខ្នងសម្រាប់ថ្នាក់រៀនផង និងសម្រាប់សិស្សមកពីឆ្ងាយៗស្នាក់នៅដើម្បីរៀនសូត្រផងដែរ ។

លោក ទៀ សីហា បានមានប្រសាសន៍ថា ថ្ងៃនេះជាខួបលើកទី១១០ នៃទិវាអន្តរជាតិនារី ៨មីនា ឆ្នាំ២០២១ ក្រោមប្រធានបទ «ស្រ្តីនិងការអភិវឌ្ឍក្នុងបរិការណ៍កូវីដ-១៩»។ ប្រធានបទនេះបង្ហាញយ៉ាងច្បាស់ពីតម្លៃនិងតួនាទីស្រ្តី ដែលមិនអាចខ្វះបាននៅក្នុងសង្គមជាតិ នៅគ្រប់កាលៈទេសៈ ហើយរាជរដ្ឋាភិបាលកម្ពុជា បានយកចិត្តទុកដាក់ក្នុងការលើកកម្ពស់ សមភាពយេនឌ័រ ការពង្រឹងភាពអង់អាចក្លាហានរបស់កុមារី ដើម្បីអាចឱ្យពួកគេក្លាយជាកម្លាំងចលករ ដ៏សំខាន់ក្នុងកិច្ចអភិវឌ្ឍសង្គម និងសេដ្ឋកិច្ច តាមរយៈការដាក់ចេញនូវគោលនយោបាយជាតិស្ដីពី សមភាពយេនឌ័រ សម្រាប់ជាផែនទីបង្ហាញផ្លូវ ក្នុងការលើកកម្ពស់ និងបញ្ជ្រាបយេនឌ័រ នៅតាមស្ថាប័ន។

លោក ទៀ សីហា ក៏បានមានប្រសាសន៍ណែនាំ និងក្រើន រម្លឹក ដល់ក្មួយៗកុមារគថ្លង់ និងពិការភ្នែកក្នុងមណ្ឌលទាំងអស់ ត្រូវខិតខំសិក្សារៀនសូត្រ និង ស្តាប់នូវដំបូន្មានរបស់លោកគ្រូ អ្នកគ្រូ មាតាបិតា អាណាព្យាបាល ព្រមទាំងចាក ចេញ ឱ្យ ឆ្ងាយពីគ្រឿងញៀន។

លោកថា ជារៀងរាល់ឆ្នាំ ថ្នាក់ដឹកនាំ ដែលមានសម្ដេចពិជ័យសេនា ទៀ បាញ់ និងថ្នាក់ដឹកនាំខេត្ត រួមនិងថ្នាក់ដឹកនាំ ក្រុមគ្រួសារ សហភាព សហព័ន្ធ យុវជនកម្ពុជាខេត្តសៀមរាប តែងតែយកថ្ងៃសិទ្ធិនារីអន្តរជាតិ ៨ មីនា អញ្ជើញមកជួបសំណេះសំណាល់ សួរសុខទុក្ខ រៀបចំអាហារ ចែកអំណោយដល់កុមារគថ្លង់ កុមារពិការភ្នែក លោកគ្រូ អ្នកគ្រូ និងបុគ្គល រួមនិងការកសាងនូវសមិទ្ធិផលជាច្រើនទៀតហើយ សម្រាប់ការរីកចម្រើន និងការឧបត្ថម្ភ គាំទ្រ ដូចជាការកសាងអគារ និងការឧត្ថម្ភផ្សេងៗមួយចំនួន គឺមានការជួយជ្រោមជ្រែង ពីសម្ដេចពិជ័យសេនា ទៀ បាញ់ និងលោកជំទាវផងដែរ៕SRP

ភ្នំពេញ៖សម្ដេចហេង សំរិន ប្រធានរដ្ឋសភាជាតិនៃកម្ពុជា បានលើកឡើងថា ថ្ងៃនេះជាខួបលើកទី១១០ នៃទិវាអន្តរជាតិនារី ៨មីនា ឆ្នាំ២០២១ ក្រោមប្រធានបទ «ស្រ្តីនិងការអភិវឌ្ឍក្នុងបរិការណ៍កូវីដ-១៩»។ ប្រធានបទនេះបង្ហាញយ៉ាងច្បាស់ពីតម្លៃនិងតួនាទីស្រ្តី ដែលមិនអាចខ្វះបាននៅក្នុងសង្គមជាតិ នៅគ្រប់កាលៈទេសៈ ជាពិសេសនៅក្នុងបរិការណ៌មានវិបត្តិឬហានិភ័យអ្វីមួយ។ ជាក់ស្តែងនៅក្នុងបរិការណ៍នៃជំងឺកូវីដ-១៩ ដ៏កាចសាហាវ ដែលកំពុងរាតត្បាតនេះយើងកាន់តែមិនអាចខ្វះបាននូវវត្តមានអ្នកគ្រូពេទ្យដែលជាទ័ពជួរមុខក្នុងសមរភូមិដែលយើងមិនស្គាល់ពីសត្រូវច្បាស់នៅឡើយនោះ។ វីរភាពរបស់អ្នកគ្រូពេទ្យនៅក្នុងពេលនេះ មិនត្រឹមជាអ្នកគ្រូពេទ្យមើលថែអ្នកជំងឺនោះទេ តែពួកគាត់ប្រៀបដូចជាមាតា ជាភរិយា បងនិងជាប្អូនស្រី ដែលមើលថែ ផ្តល់ភាពកក់ក្តៅ កម្លាំងចិត្តដល់ប្រជាពពលរដ្ឋដែលងាយនឹងរងគ្រោះទំាងអស់។

ជារៀងរាល់ឆ្នាំនៅក្នុងឱកាសដ៏មានតម្លៃនេះ ខ្ញុំតែងតែទទួលជួបប្រតិភូស្រ្តីមកពីវិស័យផ្សេងៗទំាងនៅក្នុងជួររាជរដ្ឋាភិបាល អង្គការសង្គមស៊ីវិល និងធុរកិច្ច ដើម្បីស្តាប់នូវរបាយការណ៍វឌ្ឍនភាព សំណូមពរ និងបានផ្តល់អនុសាសន៍សំដៅលើកកម្ពស់តម្លៃស្រ្តីឱ្យស្របតាមចក្ខុវិស័យរបស់រដ្ឋាភិបាលកម្ពុជា និងគោលដៅអភិវឌ្ឍន៌ប្រកបដោយចីរភាព (SDG)។ ក្នុងនាមថ្នាក់ដឹកនាំស្ថាប័ននីតិប្បញត្តិខ្ញុំតែងតែគំាទ្រដល់ការបង្កើតច្បាប់និងយន្តការនានាដើម្បីលើកកម្ពស់តួនាទីស្រ្តីនៅលើគ្រប់វិស័យ ជាអាទិ៍វិស័យនយោបាយ អប់រំ សង្គម សេដ្ឋកិច្ច និងវិស័យផ្សេងៗទៀត។

ខ្ញុំសូមវាយតម្លៃខ្ពស់និងកោតសរសើរយ៉ាងក្រៃលែងដល់រាជរដ្ឋាភិបាល ក្រសួងកិច្ចការនារី ក្រុមប្រឹក្សាជាតិកម្ពុជាដើម្បីស្ត្រី ក្រសួងស្ថាប័នពាក់ព័ន្ធ ដៃគូអភិវឌ្ឍន៍ វិស័យឯកជន ព្រមទាំងអង្គការជាតិនិងអន្តរជាតិទាំងអស់ដែលបានរួមចំណែកគាំទ្រការលើកកម្ពស់ស្ថានភាព ជីវភាព សិទ្ធិ ឋានៈតួនាទី សុខមាលភាពស្ត្រី និងកុមារ ហើយមានជំនឿជាក់ជាក់យ៉ាងមុតមាំថា ទោះបីជាយើងកំពង់ប្រឈមនឹងវិបត្តិកូវីដ-១៩ នេះក៏ដោយ ក៏យើងទាំងអស់គ្នាបន្តខិតខំប្រឹងប្រែង និងពង្រឹងកិច្ចសហការរួមគ្នាបន្ថែមទៀតសំដៅលើកកម្ពស់ស្រ្តីរបស់យើងឱ្យកាន់តែមានភាពប្រសើរថែមទៀត។

ឆ្លៀតឱកាសនេះ ទួលបង្គំជាខ្ញុំសូមរាជានុញ្ញាតលំឱនកាយសម្តែងនូវអំណរព្រះគុណ និងថ្វាយព្រះពរជ័យសេរីមង្គល សម្តេចព្រះវររាជមាតាជាតិខ្មែរ និងព្រះករុណាជាអម្ចាស់ ព្រះមហាក្សត្រនៃព្រះរាជាណាចក្រកម្ពុជា ដែលព្រះអង្គទាំងទ្វេតែងតែយកព្រះទ័យទុក្ខដាក់អំពីសុខទុក្ខ នឹងជីវភាពរបស់កូនចៅ ពិសេសការលើកកម្ពស់សមភាពយែនឌ័ររបស់ស្ត្រី និងក្មេងស្រីនៅព្រះរាជាណាចក្រកម្ពុជាយើង៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីបានរំឭកថា ចាប់តាំងពីថ្ងៃរំដោះ ៧ មករា រហូតដល់ពេលបច្ចុប្បន្ន រាជរដ្ឋាភិបាលកម្ពុជាបានយកចិត្តទុកដាក់ជានិច្ចក្នុងការលើកកម្ពស់ស្រ្តី រហូតបង្កើតបានជាពាក្យស្លោកថា «ស្រ្តីជាឆ្អឹងខ្នងសេដ្ឋកិច្ចជាតិ»។ «ស្ត្រីនិងការអភិវឌ្ឍក្នុងបរិការណ៍កូវីដ-១៩» គឺជាប្រធានបទដ៏មានអត្ថន័យនៃទិវាអន្តរជាតិនារី ៨ មីនា លើកទី១១០ ដែលជាការបង្ហាញឱ្យឃើញពីតួនាទីយ៉ាងសំខាន់របស់ស្រ្តីនៅក្នុងសង្គមជាតិ ជាពិសេសក្នុងការប្រយុទ្ធប្រឆាំងជំងឺកូវីដ-១៩ នាពេលបច្ចុប្បន្ននេះ ដែលជាបុព្វលក្ខខណ្ឌមិនអាចប្រកែកបានឡើយក្នុងការរួមចំណែកជួយដល់ការលើកកម្ពស់សិទ្ធិសេរីភាពរបស់ស្ត្រី និងជួយឱ្យស្ត្រីមានតម្លៃកាន់តែខ្ពស់ឡើងនៅក្នុងសង្គមជាតិ និងលើឆាកអន្តរជាតិ។

នៅថ្ងៃនេះ សម្តេចហ៊ុន សែន បានថ្លែងអបសារអបអរសាទរទិវាអន្តរជាតិនារី ៨ មីនា ២០២១ លើកទី១១០ និងជូនពរស្ត្រី កម្ពុជាទូទាំងប្រទេស ជួបតែសេចក្តីសុខ សេចក្តីចម្រើន មានសុខសុភមង្គលនៅក្នុងក្រុមគ្រួសារគ្រប់ៗគ្នាកុំបីខាន ពិសេសសូមបងប្អូនជនរួមជាតិថែរក្សាសុខភាពកុំឱ្យឆ្លងជំងឺកូវីដ-១៩។

សម្ដេចហ៊ុន សែន ថា ទិវាអន្តរជាតិនារី ៨មីនា ត្រូវបានពិភពលោកប្រារព្វធ្វើឡើងជារៀងរាល់ឆ្នាំ ដើម្បីរំឭកនូវការតស៊ូ និងគំរូវីរភាពរបស់ស្រ្តីក្នុងការទាមទារសិទ្ធិសេរីភាព និងគេចផុតពីទង្វើជិះជាន់នានា៕SRP

ភ្នំពេញ៖លោកហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើងថា៖ ក្នុងឱកាសខួបទី១១០ ទិវាអន្តរជាតិនារី ឆ្នាំ២០២១ ក្រោមប្រធានបទ “ស្រ្តី និងការអភិវឌ្ឍក្នុងបរិការណ៏កូវីដ-១៩” ជំនួសមុខឲ្យក្រុមការងារទាំងអស់ ខ្ញុំសូមជូនពរដល់លោកយាយ មាតា និងស្រ្តីទាំងអស់ ជួបប្រទះតែសេចក្តីសុខ និងទទួលបាននូវភាពជោគជ័យជាបន្តបន្ទាប់ទៀតដើម្បីរួមជ្រោងក្រុមគ្រួសារ សង្គម និងពិភពលោកឆ្ពោះទៅកាន់សន្តិភាព និងការអភិវឌ្ឍ។

ពិតណាស់ ក្នុងបរិបទកម្ពុជា ភាពសំខាន់នៃស្រ្តីបានឆ្លុះបញ្ចាំងយ៉ាងច្បាស់តាមទម្រង់របប “សង្គមមាតាធិបតេយ្យ” ដែលស្មារតីនេះបានឆ្លុះបញ្ចាំងយ៉ាងច្បាស់ពីការឲ្យតម្លៃយ៉ាងខ្ពស់ទៅដល់ស្រ្តី ក្នុងភាពជាអ្នកដឹកនាំ ទាំងក្នុងក្រុមគ្រួសារ និងសង្គម។

ក្នុងបរិបទសកល ពាក្យថា “ស្រ្តីជាមាតាពិភពលោក” ជាពាក្យដែលមានអត្ថន័យមិនសាបសូន្យ ដោយពាក្យនេះ បានឆ្លុះបញ្ចាំងយ៉ាងច្បាស់ពីវីរភាព ភាពធន់ និងសារសំខាន់របស់ស្ត្រីនៅក្នុងសង្គមជាតិ។ ទោះក្នុងកាលៈទេសៈណាក៏ដោយ ស្រ្តី ជាដៃគូសំខាន់ និងស្មើរភាពជាមួយនឹងបុរស។ អ្វីដែលបុរសធ្វើបាន ក៏គង់តែស្រ្តីនឹងអាចធ្វើបានដូចគ្នា។ ជាក់ស្តែង ជាមួយនឹងវត្តមានរបស់បុរសជាថ្នាក់ដឹកនាំ និងជាក្រុមគ្រូពេទ្យជួរមុខក្នុងយុទ្ធនាការប្រយុទ្ធប្រឆាំងនឹងជំងឺកូវីដ១៩ យើងក៏ឃើញមាននូវវត្តមានថ្នាក់ដឹកនាំ និងក្រុមគ្រូពេទ្យជាស្រ្តីជាច្រើនរូបនៅក្នុងបេសកកម្មដ៏មានអត្ថន័យនេះផងដែរ។ «រួមគ្នាលើកកម្ពស់ និងផ្តល់ស្មាមញញឹមដល់ស្រ្តី!»

ខេត្តសៀមរាប៖ក្រុមហ៊ុនបុរីកុមារមាស ឯ.ក នៅថ្ងៃទី០៧ ខែមីនា ឆ្នាំ២០២១ ព្រឹកមិញ បានធ្វើបុណ្យឡើងអ្នកតាគង់ ដោយមានប្រជាពលរដ្ឋ ចូលរួមយ៉ាងច្រើនកុះករ។

ពិធីបុណ្យឡើងអ្នកតាគង់ នេះ ស្ថិតនៅភូមិខ្នារ ឃុំខ្នារសណ្ដាយ ស្រុកបន្ទាយស្រី។

បើតាមក្រុមហ៊ុនបុរីកុមារមាស ឯ.ក បានឲ្យដឹងថាពិធីបុណ្យនេះ បានរៀបចំនូវចង្ហាន់ ប្រគេនដល់ព្រះសង្ឃចំនួន០៥អង្គរ ក្នុងនោះដោយពេលព្រឹកមានរៀបចំនូវអាហារបបរ នឹងបាយពេលថ្ងៃ។ ជាមួយគ្នានេះដែរលោកតា លោកយាយ ដែលបានចូលរួម ក្នុងម្នាក់ៗទទួលបាន ក្រមារ១ និងលុយ៥ពាន់រៀល។

ក្រុមហ៊ុនបុរីកុមារមាស ឯ.ក បានបន្តថាការធ្វើបុណ្យឡើងអ្នកតាគង់ នេះនឹងធ្វើជារៀងរាល់ឆ្នាំម្ដង។ សូមជម្រាបថាក្រុមហ៊ុនបុរីកុមារមាស ឯ.ក គឺជាក្រុមហ៊ុនមួយមានគម្រោងលក់ដីឡូតិ៍ និងផ្ទះល្វែងនៅស្រុកប្រទេសស្រីផងដែរ៕SRP

ខេត្តសៀមរាប៖លោកជំទាវ ទាង អេង ទៀ សីហា អនុប្រធានគណៈកម្មាធិការសាខា កាកបាទក្រហមកម្ពុជា ខេត្តសៀមរាប នៅថ្ងៃទី០៧ ខែមីនា ឆ្នាំ២០២១ ព្រឹកមិញ បានអញ្ជើញប្រគល់ ជូនដល់លោកយាយឈ្មោះប៊ិន ហ៊ាវ អាយុ៨៦ឆ្នាំ (ជារាទុរគត) គ្មានកូនចៅមានសុខភាពជរា ជើងទាំង២ទន់ ដើរពឹងលើឈើច្រត់ ភ្នែកខាងស្ដាំពិការ (បាយ) ត្រចៀកធ្ងន់ ពេលថ្ងៃនៅផ្ទះម្នាក់ឯង លុះយប់ឡើងទៅសម្រាននៅផ្ទះក្មួយ (ព្រោះព្រួយពីសុខភាព)។

លោករស់នៅក្នុងភូមិត្រីញ័រ ឃុំត្រីញ័ ស្រុកពួក ខេត្តសៀមរាប។

ផ្ទះមនុស្សធម៌១ខ្នងនេះ មានមានទំហំ ៦ម៉ែត្រ x ៦ម៉ែត្រ មាន២បន្ទប់ ដំបូលប្រក់ស័ង្កសីភ្លីក្បឿងជញ្ជាំងស្មាតបត ក្រាលការ៉ូ ជាអំណោយ របស់លោកស្រី ទាង លី អគ្គនាយិកាសិប្បកម្ម បាលិលេយ្យ បានផ្តល់តាមរយៈសាខាកាកបាទក្រហមកម្ពុជាខេត្តសៀមរាប។

លោកស្រី ទាង លី ដែលជាម្ចាស់អំណោយ បានមានប្រសាសន៍បញ្ជាក់ថា ដោយមើលឃើញភាពខ្វះខាតជាក់ស្តែង របស់បងប្អូនប្រជាពលរដ្ឋក្រីក្រនៅតាមមូលដ្ឋានសំខាន់ជនពិការ ចាស់ជរាគ្មានទីពឹង ស្ត្រីម៉េម៉ាយ កុមារកំព្រា ដែលគ្មានទីជម្រករស់នៅបានសមរម្យនឹងគេនៅក្នុងសង្គមជាតិ ជាពិសេសលោកយាយខាងលើ ទើប
លោកស្រីក៏បានឧបត្ថម្ភ នូវផ្ទះមួយខ្នងនេះ ដើម្បីជាជម្រកដ៏កក់ក្តៅសម្រាប់ លោកយាយតរៀងទៅ។

លោកស្រីក៏បានបន្ថែទៀតថា ពិតជាសប្បាយចិត្តខ្លាំងណាស់ នៅពេលដែលឃើញសមិទ្ធផល ដែលលោកស្រីបានចូលរួមតាមរយៈកាកបាទក្រហមកម្ពុជា ហើយមកដល់ដៃបងប្អូនប្រជាពលរដ្ឋ ដែលងាយរងគ្រោះ និងជួបការលំបាកពិតប្រាកដ ជាពិសេសផ្ទះដែលបានប្រគល់នាពេលនេះ គឺស្អាតសមរម្យហួសពីការគិតរបស់គាត់ទៅទៀត។

មានប្រសាសន៍ ក្នុងឱកាសនោះដែរ លោកជំទាវ ទាង អេង ទៀសីហា ក៍បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម
កម្ពុជា ក៏ដូចជាលោក ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល”។

លោកជំទាវក៏បានបន្ថែមទៀតថា ផ្ទះមនុស្សធម៌ដែលប្រគល់ជូនលោកយាយចាប់ពីពេលនេះទៅ និង សូមអោយកូនក្មួយ ដែលមើលថែរក្សាលោកយាយ ជួយសម្អាត ថែរក្សាផ្ទះថ្មីនេះ ដើម្បីបានជាជម្រក បានជាម្លប់ដ៏កក់ក្តៅតរៀងទៅ។

អំណោយមនុស្សធម៌បន្ថែមសម្រាប់លោកយាយទទួលបានផ្ទះមាន៖ មុង១ ភួយ១ សារុង១ ក្រមា១ កន្ទេល១ អង្ករ៦០គីឡូក្រាម មី១កេស ត្រីខ១យួរ អាវយឺត២ សម្ភារផ្ទះបាយមួយចំនួន និងថវិកា៤សែនរៀល។ ជាមួយគ្នានេះដែរ សមាគមនារីកម្ពុជាដើម្បីសន្ដិភាព និងអភិវឌ្ឍន៍ ខេត្តសៀមរាប បានឧបត្ថម្ភផ្ទាំងសូឡា និងអំពូល១ឈុត និងប្រតិភូរួមដំណើរក៏បានឧបត្ថម្ភនូវថវិកាមួយចំនួនផងដែរ។

ក្នុងឱកាសនេះដែរសម្រាប់លោកតា លោកយាយ ចូលរួមក្នុងពិធីប្រគល់ផ្ទះនេះចំនួន៥នាក់ ម្នាក់ៗទទួលបាន៖ អង្ករ១០គីឡូក្រាម មី១កេស ត្រីខ១យួរ មុង១ ភួយ១ សារុង១ ក្រមា១ អាវយឺត២ និងថវិកា៥ម៉ឺនរៀល។

សូមបញ្ជាក់ថាផ្ទះមនុស្សធម៌នេះជាសមិទ្ធផលថ្មីទី៥ សម្រាប់សាខាកាកបាទក្រហមកម្ពុជា ខេត្តសៀមរាប ក្នុងអាណត្តិទី៥ និងជាមផ្ទះមនុស្សធម៌ទី ៧៧ របស់សាខាកាកបាទក្រហមកម្ពុជា៕SRP