ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៅវិមានសន្តិភាពនាថ្ងៃទី១២ ខែតុលា ឆ្នាំ ២០២០ព្រឹកមិញនេះបានជួបពិភាក្សាការងារជាមួយនឹងឯកឧត្តម វ៉ាង យី (Wang Yi)
ទីប្រឹក្សារដ្ឋនិងជារដ្ឋមន្ត្រីការបរទេសនៃប្រទេសចិន។
ក្នុងជំនួបនោះ ឯកឧត្តម វ៉ាង យី បានពាំនាំនូវការផ្ដាំផ្ញើសួរសុខទុក្ខពីឯកឧត្តមស៊ី ជិនពីង (Xi Jinping) ប្រធានាធិបតីចិន និងឯកឧត្តម លី ខឺឈាង (Li Keqiang) នាយករដ្ឋមន្ត្រីចិន ជូនចំពោះសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។បានឯកឧត្តមក៏បានពាំនាំនូវការផ្ដាំសួរសុខទុក្ខពីសំណាក់ប្រជាជនចិនជូនចំពោះសម្ដេចតេជោថែមទាំងបានជូនពរសម្ដេចតេជោឲ្យទទួលបាននូវសុខភាពល្អបរិបូណ៍ ដើម្បីដឹកនាំប្រទេសកម្ពុជាឆ្ពោះទៅមុខបន្តទៀត។

ឯកឧត្តម វ៉ាង យី បានមានប្រសាសន៍បន្តទៀតថា ដំណើរទស្សនកិច្ចរបស់សម្ដេចតេជោទៅកាន់ប្រទេសចិនកាលពីអំឡុងខែកុម្ភះកន្លងទៅនេះ គឺឆ្លុះបញ្ចាំងពីការយកចិត្តទុកដាក់ដ៏ល្អរបស់សម្ដេចតេជោចំពោះប្រជាជនចិន និងរដ្ឋាភិបាលចិន។ លើសពីនោះទៅទៀត បានបង្ហាញនូវភាពស្និទ្ធស្នាលមិត្តភាពដ៏រឹងមាំនៃទំនាក់ទំនងនិងការយកចិត្តទុកដាក់រវាងកម្ពុជា និងចិនផងដែរ។ លើសពីនេះទៅទៀត

ឯកឧត្តមបានបញ្ជាក់ថានេះគឺជាសណ្តានទឹកចិត្តមួយរបស់សម្ដេចតេជោមិនត្រឹមតែចំពោះប្រជាជនចិនប៉ុណ្ណោះទេ គឺចំពោះប្រជាជនទូទាំងពិភពលោកតែម្ដងជាក់ស្តែង កន្លងមកដូចជាការទទួលប្រជាជនជាប់នៅនាវា Westerdam ដែលឆ្លុះបញ្ចាំងសន្ដានចិត្តមនុស្សធម៌របស់សម្ដេចតេជោដែលនៅពេលនោះអន្តរជាតិទាំងមូលបានទទួលស្គាល់ថាព្រះរាជាណាចក្រកម្ពុជា គឺជាប្រទេសដ៏តូចមួយតែមានបេះដូងធំ។

ឯកឧត្តមក៏បានគោរពរាយការណ៍ជូនសម្ដេចតេជោអំពីកិច្ចពិភាក្សារវាងឯកឧត្តមផ្ទាល់ជាមួយនឹងឯកឧត្តមឧបនាយករដ្ឋមន្ត្រី ហោ ណាំហុង និងជាមួយឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា អំពីកិច្ចសហប្រតិបត្តិការរវាងកម្ពុជា និងចិន លើគ្រប់វិស័យនិងមានភាពទូលំទូលាយ។

ឯកឧត្តមបានមានប្រសាសន៍ថាកិច្ចសហប្រតិបត្តិការនេះបានឈានទៅដល់ការយល់ព្រមពីភាគីទាំងពីរថានឹងបន្តជំរុញកិច្ចសហប្រតិបត្តិការឱ្យកាន់តែស៊ីជម្រៅបន្ថែមទៀត។ លើសពីនេះទៅទៀត ឯកឧត្តមក៏បានជម្រាបជូនសម្ដេចតេជោថា ចិននៅតែបន្តគាំទ្រកម្ពុជាយ៉ាងរឹងមាំ ធ្វើយ៉ាងណាឲ្យកម្ពុជារក្សាបាននូវអធិបតេយ្យភាពថ្លៃថ្នូររបស់កម្ពុជា។

ជាការឆ្លើយតប សម្ដេចតេជោ ហ៊ុន សែន បានថ្លែងអំណរគុណចំពោះការផ្ដាំផ្ញើសួរសុខទុក្ខពីសំណាក់ឯកឧត្តម ស៊ី ជីងពីង ប្រធានាធិបតីនិង ឯកឧត្តម លី ខឺឈាង នាយករដ្ឋមន្ត្រី និងប្រជាជនចិន ដែលសួរសុខទុក្ខចំពោះសម្ដេចផ្ទាល់។ សម្ដេចតេជោក៏បានថ្លែងអំណរគុណផងដែរចំពោះការវាយតម្លៃខ្ពស់ នៃទំនាក់ទំនងរវាងកម្ពុជា និងចិន។ សម្ដេចតេជោក៏បានអបអរសាទរចំពោះមិត្តចិនដែលទទួលបាននូវភាពជោគជ័យក្នុងការប្រយុទ្ធប្រឆាំងជំងឺ covid-19។

សម្ដេចតេជោបានមានប្រសាសន៍ថា ប្រទេសចិនមានប្រជាជន ជាង 1000 លាននាក់ប៉ុន្តែអ្នកដែលទទួលរងនូវជំងឺនេះមានភាគរយតិចបំផុត បើប្រៀបធៀបទៅនឹងប្រទេសដទៃ ក្នុងន័យនេះប្រទេសចិនគឺមានសមត្ថភាពគ្រប់គ្រាន់នឹងបានទប់ស្កាត់ជំងឺកូវី-19 បានជោគជ័យ។

សម្ដេចតេជោនាយករដ្ឋមន្ត្រីក៏បានសំដែងនូវការគាំទ្រ និងអបអរសាទរចំពោះកិច្ចពិភាក្សាប្រកបដោយផ្លែផ្ការវាងឯកឧត្តម វ៉ាង យី ជាមួយនឹងឯកឧត្តមឧបនាយករដ្ឋមន្ត្រី ហោ ណាំហុង និងឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា។

សម្ដេចតេជោក៏បានជម្រាបជូនឯកឧត្តម វ៉ាង យី អំពីដំណើរការនៃការទប់ស្កាត់ជំងឺកូវីដ-១៩ របស់ប្រទេសកម្ពុជា ក៏ដូចជាដំណើរការសេដ្ឋកិច្ចរបស់កម្ពុជា។

សម្ដេចតេជោបានមានប្រសាសន៍ថាការទប់ស្កាត់ជំងឺកូវីដ-១៩ គឺទទួលបានជោគជ័យប្រជាជនកម្ពុជាបានអនុវត្តតាមគោលការណ៍របស់រាជរដ្ឋាភិបាល គោលការណ៍របស់ក្រសួងសុខាភិបាល ហើយរដ្ឋាភិបាលកម្ពុជាក៏មានយន្តការច្បាស់លាស់ក្នុងការទប់ស្កាត់ជំងឺកូវីដ-១៩ផងដែរ។

ជាទីបញ្ចប់សម្ដេចតេជោក៏បានថ្លែងអំណរគុណចំពោះមិត្តចិន ដែលបានផ្ដល់ជំនួយដល់កម្ពុជាការចុះហត្ថលេខានៅកិច្ចព្រមព្រៀងពាណិជ្ជកម្មសេរីថ្ងៃនេះ ពិតជាមានសារៈសំខាន់ណាស់​ សម្ដេចតេជោក៏បានបញ្ជាក់ថា EBA គង់មានថ្ងៃណាមួយនឹងបាត់បង់ តែកិច្ចព្រមព្រៀងពាណិជ្ជកម្មសេរីរវាងកម្ពុជា និងចិនគឺនៅជារៀងរហូត៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី និង វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសចិន នៅវិមានសន្តិភាព ថ្ងៃទី១២ ខែតុលា ឆ្នាំ២០២០ព្រឹកមិញបានអញ្ជើញជាអធិបតីនៅក្នុងពិធីចុះហត្ថលេខាលើឯកសារសំខាន់ៗមួយចំនួនដូចជា៖

១) កិច្ចព្រមព្រៀងពាណិជ្ជកម្មសេរី រវាង សាធារណរដ្ឋប្រជាមានិតចិន និងព្រះរាជាណាចក្រកម្ពុជា។

២)កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេស សំរាប់ការផ្តល់ហិរញ្ញប្បទានឥតសំណង។

៣)លិខិតប្ដូរសារ ស្តីពីការសិក្សាសមិទ្ធិលទ្ធភាពគម្រោងធ្វើឲ្យប្រសើរឡើងមន្ទីរពេទ្យបង្អែកខេត្តព្រះសីហនុ។

៤)លិខិតប្ដូរសារស្តីពីការសិក្សាសមិទ្ធិលទ្ធភាពគម្រោងអភិវឌ្ឍន៍ហេដ្ឋារចនាសម្ព័ន្ធ ប្រព័ន្ធលូ និងប្រព្រឹត្តកម្មទឹកកខ្វក់នៅខេត្តព្រះសីហនុ និង ពិធីប្រគល់ទទួលជំនួយឧបករណ៍វេជ្ជសាស្ត្រពីមិត្តចិន៕SRP

ខេត្តសៀមរាប៖លោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប នៅព្រឹកថ្ងៃច័ន្ទទី១២ ខែតុលា ឆ្នាំ២០២០ បានអញ្ជើញជួបសំណេះសំណាល និងផ្តល់ថវិកាគោលនយោបាយ ជូនដល់មន្ត្រីនគរបាលចូលនិវត្តន៍ និងក្រុមគ្រួសារមន្ត្រីមរណៈ សរុបចំនួន ៤៩ នាក់ ស្មើនឹងទឹកប្រាក់សរុបចំនួន ៤៩៣,៨២៣,២៨០ រៀល ( បួនរយកៅសិបបីលានប្រាំបីសែនពីរម៉ឺនបីពាន់ពីររយប៉ែតសិបរៀល)។

ថ្លែងក្នុងឱកាសជួបសំណេះសំណាលនេះ លោកស្នងការ បានរំលឹកពីអនុស្សាវរីយ៍ចាស់ៗ ស្នាដៃ និងការបូជាកម្លាំងកាយចិត្ត ពេលវេលារបស់កងកម្លាំងក្នុងកិច្ចការការពារ ថែរក្សាសន្តិសុខ សណ្តាប់ធ្នាប់សាធារណៈ ជូនថ្នាក់ដឹកនាំ និងបងប្អូនប្រជាពលរដ្ឋក្នុងខេត្តសៀមរាបតាំងពីសម័យសង្គ្រាមស៊ីវិលរហូតដល់ប្រទេសជាតិមានសុខសន្តិភាព។

ជួសមុខអោយថ្នាក់ដឹកនាំក្រសួងមហាផ្ទៃ និងលោកនាយឧត្តមសេនីយ៍សន្តិបណ្ឌិត នេត សាវឿន អគ្គរស្នងការនគរបាលជាតិ លោកស្នងការបានគោរពថ្លែងអំណរគុណយ៉ាងជ្រាលជ្រៅចំពោះមន្ត្រីនគរបាលចូលនិវត្តន៍ និងក្រុមគ្រួសារមន្ត្រីមរណ: ចំពោះការលះបង់គ្រប់យ៉ាងរបស់មន្ត្រីនគរបាលទាំងអស់នាពេលកន្លងមកចំពោះជាតិមាតុភូមិ។

ថវិកាដែលត្រូវផ្ដល់គោលនយោបាយដល់មន្ត្រីនគរបាលចូលនិវត្តន៍ចំនួន ៣៨ នាក់ ស្មើនឹងទឹកប្រាក់សរុបចំនួន ២៩៥,១៧៦,០០០រៀល (ពីររយកៅសិបប្រាំលានមួយសែនប្រាំពីរម៉ឺប្រាំមួយពាន់រៀលគត់) ។
-មន្ត្រីនគរបាលមរណៈចំនួន ១១ នាក់ ស្មើនឹងទឹកប្រាក់សរុបចំនួន ១៩៨,៦៤៧,២៨០ រៀល (មួយរយកៅសិបប្រាំបីលានប្រាំមួយសែនបួនម៉ឺនប្រាំពីរពាន់ពីរយប៉ែតសិបរៀល)៕SRP

ខេត្តសៀមរាប៖ជនសង្ស័យចំនួន៦នាក់ត្រូវបានកម្លាំងអាវុធហត្ថខេត្តសៀមរាបចាប់ខ្លួន ពីបទ ជួញដូរ និងចាត់ចែង ប្រើប្រាស់ដោយខុសច្បាប់នូវសារធាតុញៀន។
ការបង្ក្រាបនេះធ្វើឡើងនៅវេលាម៉ោង ១៨ និង ៣០នាទី ថ្ងៃទី ១១ខែតុលា ឆ្នាំ២០២០ នៅចំណុចភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប ដោយកម្លាំងការិយាល័យគ្រឿងញៀនខេត្តដឹកនាំដោយលោក វសេនីយ៍ត្រី ធាវ ច័ន្ទ តារា។
ជនសង្ស័យ
១.ឈ្មោះ ឆោម តារា ភេទប្រុស អាយុ ២៥ឆ្នាំមុខរបរធ្វើស្រែ រស់នៅភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប។
២.ឈ្មោះឈួន សារួន ភេទប្រុស អាយុ៤២ឆ្នាំ មុខរបររត់ម៉ូតូកង់បី រស់នៅភូមិរលួស ឃុំរលួស ស្រុកប្រាសាទបាគង ខេត្តសៀមរាប។
៣.ឈ្មោះតាន់ រស្មី ភេទ ប្រុសអាយុ ២៧ឆ្នាំ មុខរបរលក់អីវ៉ាន់អនឡាញ រស់នៅភូមិធ្លកអណ្ដូង សង្កាត់ស្លក្រាម ក្រុងសៀមរាប ខេត្តសៀមរាប។
៤.ឈ្មោះទុំ ទិញ ភេទប្រុស អាយុ១៨ឆ្នាំ មុខរបរមិនពិតប្រាកដ រស់នៅភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប។
៥.ឈ្មោះអ៊ុល ចំណាប់ ភេទប្រុស អាយុ២៨ ឆ្នាំមុខរបររត់រ៉ឺម៉ក រស់នៅភូមិ១៣មករា ព្រែកព្រះស្ដេច ក្រុងបាត់ដំបង ខេត្តបាត់ដំបង។
៦.ឈ្មោះ រ៉ូប អុីត្រេស ភេទប្រុស អាយុ៣៥ ឆ្នាំជនជាតិខ្មែរអ៊ីស្លាម មុខរបរចិញ្ចឹមគោ រស់នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប
ខេត្តសៀមរាប។
ករណីនេះកម្លាំងអាវុធហត្ថដកហូត
វត្ថុតាង ថ្នាំញៀនម្សៅក្រាមពណ៌សថ្លាចំនួន០៩កញ្ចប់ទម្ងន់ ២២.៥៤ក្រាម
-ជញ្ជីងថ្លឹងថ្នញៀ១គ្រឿង
– ទូរស័ព្ទដៃ២គ្រឿងធ្វើតេស្តទឹកនោមចំនួន០៦នាក់ វិជ្ជមាន។បច្ចុប្បន្ន ជនសង្ស័យនិងវត្ថុតាង ត្រូវបានកម្លាំងអាវុធហត្ថបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ភ្នំពេញ៖ជំជួបពិភាក្សារវាងលោក ឧបនាយករដ្ឋមន្ត្រី ហោ ណាំហុង និងរដ្ឋមន្ត្រីការបរទេសចិន លោក វ៉ាង យី គឺចិននឹងផ្ដល់វ៉ាក់សាំងប្រឆាំងនិងCovid-19 ដល់ប្រទេសកំពុងអភិវឌ្ឍ ជាពិសេសកម្ពុជា ជាមិត្តដែកថែប។
ក្នុងឱកាសលោករដ្ឋមន្ត្រី ហោ ណាំហុង ជួបប្រជុំការងារជាមួយ លោក វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន នៅថ្ងៃទី១១ ខែតុលា ២០២០ម្សិលមិញ។

លោកឧបនាយករដ្ឋមន្ត្រី បានលើកជាអាទិ៍ថា ការប្រើប្រាស់ឥណទានសម្បទាន(Loan) និងហិរញ្ញប្បទានឥតសំណង(Grant) សម្រាប់បេក្ខភាពគម្រោងអាទិភាពឆ្នាំ២០២០ ដើម្បីអនុវត្តន៍គម្រោងចំនួន៨ រួមមាន៖
-គម្រោងត្រៀមចុះហត្ថលេខាមាន៖
-គម្រោងខ្សែកាប្លិ៍អុបទិកក្រោមបាតសមុទ្រ ទីក្រុងព្រះសីហនុ-ទីក្រុងហុងកុង។
-គម្រោងសាងសង់ផ្លូវជាតិលេខ71C
-គម្រោងខ្សែបញ្ជូនអគ្គិសនីជនបទជំហានទី៧
-គម្រោងជម្រុញផលិកម្មស្រូវ និងនាំចេញអង្ករ។

-គម្រោងដែលកំពុងរៀបចំមាន៖
-គម្រោងប្រព័ន្ធស្រោចស្រព និងការពារទឹកជំនន់ស្ទឹងព្រែកត្នោត
-គម្រោងពង្រីក និងលើកកម្រិតផ្លូវជាតិលេខ៤១ លេខ៣៣ និងលេខ៣១។
-ក្នុងឱកាសនេះដែរ លោកឧបនាយករដ្ឋមន្ត្រី ស្នើមិត្តចិនជួយដោះស្រាយបញ្ហាផ្ដាច់មុខ របស់ក្រុមហ៊ុនCOFCOរបស់ចិន ដែលជារបាំងសម្រាប់ការនាំចូលអង្ករកម្ពុជា ដែលមានចំនួន៤០០.០០០តោន។
-លោកឧបនាយករដ្ឋមន្ត្រី លើកទៀតថា ភាគីមិត្តចិនបានយល់ព្រមទិញស្វាយ(ដែលបានចុះអនុស្សារណរួចហើយ) និងត្រីទៅប្រទេសចិន ស្នើជំរុញការនាំចូលឲ្យបានឆាប់។
-ឆ្លៀតឱកាសនេះដែរ លោកឧបនាយករដ្ឋមន្ត្រី បានលើកថាកន្លងមកមិត្តចិនបានទិញកសិផលយើងបានច្រើនមួយចំនួនហើយ ដូចជាចេក ស្វាយ ដំឡូងមី កៅស៊ូ គ្រាប់ស្វាយចន្ទីជាដើម ខ្ញុំក៏បានស្នើមិត្តចិនជួយទិញឲ្យបានច្រើនថែមទៀត ព្រមទាំងស្នើឲ្យមិត្តចិនជួយទិញៈ ម្រេច ទុរេន ស្ករស ផ្លែតាង៉ែន។ល។
-លើសពីនេះ លោកឧបនាយករដ្ឋមន្ត្រី ស្នើភាគីមិត្តចិនពិនិត្យលទ្ធភាពលើកទឹកចិត្តដល់វិនិយោគិនចិនក្នុងការផ្ទេររោងចក្រពីប្រទេសចិន មកប្រទេសកម្ពុជាឲ្យបានច្រើន ស្របតាមគោលនយោបាយជាតិ អភិវឌ្ឍន៍កសិកម្ម។
-លោក ឧបនាយករដ្ឋមន្ត្រី ក៏បានលើកករណីវ៉ាក់សាំងការពារជម្ងឺកូវីដ១៩ ដែលអាចប្រើប្រាស់ជាផ្លូវការបាន ស្នើភាគីមិត្តចិនផ្តល់វ៉ាក់ សាំងនេះ ជាអំណោយដល់ប្រទេសកម្ពុជា។

-លោក វ៉ាង យី បានលើកជាអាទិ៍ដូចតទៅ៖
-រដ្ឋាភិបាល និងប្រជាជនចិន ចងចាំមិនភ្លេចនូវដំណើរទស្សនៈកិច្ចរបស់ សម្ដេចតេជោ កាលពីខែកុម្ភៈកន្លងមក។
ការចុះហត្ថលេខា FTA នៅថ្ងៃនេះ គឺដោយសារសម្ដេចតេជោ និងលោក ឧបនាយករដ្ឋមន្ត្រី បានខិតខំកន្លងមក។
-ក្រោយ Covid-19 ចិន និងកម្ពុជានឹងរៀបចំផែនការអភិវឌ្ឍរួម គ្នា។
-វិនិយោគចិននៅកម្ពុជាមិនបានប៉ះពាល់ដោយCovid-19 ទេ តែកាន់តែមានច្រើន។
-ភាគីមិត្តចិនបានប្រគល់នូវកំណត់ទូតអំពីជំនួយឥតសំណងសម្រាប់គម្រោងប្រញាប់ក្នុងការអភិវឌ្ឍកម្ពុជាដែលមានទឹកប្រាក់ ចំនួន950លានយាន់(ប្រហែល140លានដុល្លារ)។
-ចិននឹងផ្ដល់វ៉ាក់សាំងប្រឆាំងនិងCovid-19 ដល់ប្រទេសកំពុងអភិវឌ្ឍន៍ ជាពិសេសកម្ពុជា ជាមិត្តដែកថែប
-សន្យានាំចូលកសិផលកម្ពុជាថែមទៀតដែលមានគុណភាព តាមសំណើរបស់កម្ពុជា។
-ចិននឹងពង្រីកកិច្ចសហប្រតិបត្តិការលើវិស័យផ្សេងៗទៀត។
-ចិនបានផ្ដួចផ្ដើមគំនិតការពារសុវត្ថិភាពទិន្នន័យ ឌីជីថល ស្នើអោយកម្ពុជាគាំទ្រ។
លោក វ៉ាង យី ក៏បានើកសរសើរសម្ដេចតេជោ ដែលបាន ទប់ស្កាត់Covid-19 បានជោគជ័យ។ លោកឧបនាយករដ្ឋមន្ត្រីបានឆ្លើយថា កម្ពុជានឹងចិន បានទទួលជោគជ័យរួមក្នុងការទប់ស្កាត់ Covid-19។
មុនបញ្ចប់ លោក វ៉ាង យី បានលើកថា លោកឧបនាយករដ្ឋមន្ត្រី ជាមិត្តចាស់របស់ចិនជាអ្នកការទូត និងនយោបាយជើងចាស់ដែលគាត់សុំរៀនសូត្រតាម៕SRP

ខេត្តសៀមរាប៖ក្រុមហ៊ុន «វប្បធម៌កម្ពុជា » បានប្រកាសបិទអាជីវកម្មរបស់ខ្លួនទាំងស្រុង ចាប់ពីថ្ងៃទី ០៧ ខែវិច្ចិកា ឆ្នាំ ២០២០ តទៅ។ នេះបើយោងតាមសេចក្ដីប្រកាសរបស់ក្រុមហ៊ុនវប្បធម៌កម្ពុជា ដែលបណ្ដាញ «សៀមរាបប៉ុស្តិ៍»
ទទួលបាននៅថ្ងៃទី ១១ ខែតុលាឆ្នាំ ២០២០ នេះ។
ក្នុងសេចក្ដីប្រកាស បានបញ្ជាក់ថាការបិទនេះដោយសារតែការរីករាលដាល ជំងឺកូវីដ-១៩ បានធ្វើឱ្យចំនួនភ្ញៀវមកចូលទស្សនា មានការថយចុះយ៉ាងគំហុកជាច្រើនខែកន្លងមកនេះ ក្រុមហ៊ុនយើងខ្ញុំបានជួបការលំបាកផ្នែកសេដ្ឋកិច្ចនិងហិរញ្ញវត្ថុយ៉ាងខ្លាំង ពោលគឺក្រុមហ៊ុនមិនអាចផ្គត់ផ្គង់ លើការចំណាយនានា ជុំវិញដំណើរការអាជីវកម្ម បន្តទៀតបាននោះទេ។ ដូច្នេះចាប់ពីថ្ងៃទី ០៧ ខែវិច្ឆិកាឆ្នាំ ២០២០ ខាងមុខនេះតទៅ ក្រុមហ៊ុនយើងខ្ញុំ និងបិទដំណើរការជីវកម្មនៅភូមិវប្បធម៌កម្ពុជាទាំងស្រុង។

ក្រុមហ៊ុន «វប្បធម៌កម្ពុជា »​បានបញ្ជាក់ថាការបិទអាជីវកម្មនេះ នាំអោយមានការបញ្ចប់កិច្ចសន្យាការងារជាមួយបុគ្គលិកគ្រប់ផ្នែកទាំងអស់ ដូច្នេះគណៈគ្រប់គ្រងនៃក្រុមហ៊ុនវប្បធម៌កម្ពុជា នឹងធ្វើការទូទាត់ប្រាក់សំណងជូនបុគ្គលិកទាំងអស់ស្របតាមបទប្បញ្ញត្ដិស្ដីពីការងារ។
ទាក់ទងទៅនឹងការបិទអាជីវកម្មរបស់ក្រុមហ៊ុនវប្បធម៌កម្ពុជាដែលល្បីល្បាញដ៏អស្ចារ្យ មួយនៅខេត្តសៀមរាប នៃតំបន់ទេសចរណ៍វប្បធម៌នេះ អង្គភាព«សៀមរាបប៉ុស្តិ៍»នៅមិនទាន់ទទួលបានការបំភ្លឺបន្ថែមពីខាងក្រុមហ៊ុននៅឡើយទេ៕SRP

ខេត្តសៀមរាប៖ជនសង្ស័យចំនួន៨នាក់ត្រូវបានកម្លាំងមូលដ្ឋានអាវុធហត្ថស្រុកពូកសហការណ៍ ជាមួយ ការិយាល័យគ្រឿងញៀនខេត្ត ដឹកនាំដោយលោកវសេនីយ៍ត្រី ធាវ ច័ន្ទ តារា ឃាត់ខ្លួនពីបទ ជួញដូរ និង ប្រើប្រាស់ដោយខុសច្បាប់នូវសារធាតុញៀន។

ការបង្ក្រាបនេះនៅវេលាម៉ោង ១៨ និង ៣០នាទី ថ្ងៃទី ១០ខែតុលា ឆ្នាំ២០២០ នៅចំណុចភូមិវិហាចិន សង្កាត់ស្វាយដង្គំ ក្រុងសៀមរាប ខេត្តសៀមរាប។

ជនសង្ស័យ

១.ឈ្មោះសួន រ៉ាត់ ភេទប្រុស អាយុ ៣៤ឆ្នាំ មុខរបរកម្មករសំណង់ រស់នៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប។

២.ឈ្មោះសុ ផា ភេទប្រុស អាយុ៣៥ឆ្នាំ មុខរបរលក់ដូរ រស់នៅភូមិស្វាយព្រៃ សង្កាត់ស្វាយដង្គំ ក្រុងសៀមរាប ខេត្តសៀមរាប។

៣.ឈ្មោះសុខ ប៊ៃ ភេទ ប្រុសអាយុ១៩ ឆ្នាំ មុខរបរកសិករ រស់នៅភូមិត្រាច ឃុំបល្ល័ង្គ ស្រុកប្រាសាទបាគង ខេត្តសៀមរាប។

៤.ឈ្មោះសុីន ប៊ុទ្រី ភេទប្រុស អាយុ២៨ ឆ្នាំ មុខរបរកសិករ រស់នៅភូមិគោកត្រាច់ ឃុំខ្នាត ស្រុកពូក ខេត្តសៀមរាប។

៥.ឈ្មោះសយ ចិត្រ ភេទប្រុសអាយុ៣៥ ឆ្នាំ មុខរបរកម្មករសំណង់ រស់នៅភូមិវាល សង្កាត់គោកចក ក្រុងសៀមរាប ខេត្តសៀមរាប។

៦.ឈ្មោះ ពិធី ហើម ភេទប្រុស អាយុ៣៤ ឆ្នាំ មុខរបរកម្មករសំណង់ រស់នៅភូមិស្វាយដង្គំ សង្កាត់ស្វាយដង្គំ ក្រុងសៀមរាប ខេត្តសៀមរាប។

៧.ឈ្មោះសុី នរ ភេទប្រុស អាយុ២៤ឆ្នាំ មុខរបរកម្មករសំណង់ រស់នៅភូមិគោកត្រាច ឃុំខ្នាត ស្រុកពូក ខេត្តសៀមរាប។

៨.ឈ្មោះទូច ដេត ភេទប្រុស អាយុ៣៦ ឆ្នាំ មុខរបរកម្មករសំណង់ រស់នៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប។ ករណីអាវុធហត្ថដកហូត

វត្ថុតាង៖ថ្នាំញៀនម្សៅក្រាមពណ៌សថ្លាចំនួន ១កញ្ចប់ទម្ងន់ ៤.០៤ក្រាម។

(ទូរស័ព្ទដៃចំនួន០៧គ្រឿង)

ធ្វើតេស្តទឹកនោមចំនួន០៨នាក់ប្រុស ០៨ ( វិជ្ជមានចំនួន ០៧នាក់)។

បច្ចុប្បន្ន ជនសង្ស័យ និងវត្ថុតាង ត្រូវបានកសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖សមត្ថកិច្ចបានដឹងថា ជនជាតិថៃម្នាក់ ស្ទះសរសៃឈាមបេះដូង បណ្ដាលឲ្យស្លាប់។
ហេតុការណ៍បាននៅវេលាម៉ោង ០៦និង០០នាទីព្រឹក ថ្ងៃទី១១ ខែតុលា ឆ្នាំ២០២០ នៅចំណុចវាលស្រែព្រៃរនាមត្រពាំងគង់ ភូមិដូនតុក ឃុំព្រៃជ្រូក ស្រុកពួក ខេត្តសៀមរាប។

ជនរងគ្រោះឈ្មោះ JIKKRATHOK VIRAT ភេទ ប្រុស កើតថ្ងៃទី២២-០៩-១៩៨៧ ជនជាតិថៃ កាន់លិខិត ឆ្លងដែនលេខAB២០៩៨០០០៤ មុខរបរ ធ្វើស្រែ ស្នាក់នៅផ្ទះជាមួយប្រពន្ធ(ខ្មែរ)ស្ថិតនៅភូមិ ស្វាយចន្ទោ ឃុំព្រៃជ្រូក ស្រុកពួក ខេត្តសៀមរាប។

តាមការស្រាវជ្រាវរបស់សមត្ថកិច្ចជំនាញនិងលោកវេជ្ជបណ្ឌិត អុិត ឆបឆរត័្ន គ្រូពេទ្យអមតុលាការបានសនិ្នដ្ឋានថា៖ជនរងគ្រោះស្លាប់ដោយសារ ស្ទះសរសៃឈាមបេះដូង។

បច្ចុប្បន្នសាកសពបញ្ជូនមកតម្កល់ទុកបណ្តោះអាសន្ននៅផ្ទះប្រពន្ធ ដើម្បីរង់ចាំការសម្រេចពីស្ថានទូត៕SRP

ខេត្តកំពង់ចាម៖ភ្នាក់ងារសៀមរាបប៉ុស្ដិ៍បានរាយការណ៍ថា បុរសម្នាក់ បានចងក ធ្វើអត្តឃាតនៅលើដងទង់ មានកម្ពស់ជាង២០ម៉ែត្របង្កឲ្យមានការភ្ញាក់ផ្អើល។
ហេតុការណ៍បានកើតឡើងនៅព្រឹកថ្ងៃទី ១១ ខែតុលា ឆ្នាំ២០២០នេះ ចំណុចមុខវិហារវត្តព្រែកពោធិ៍មង្គល ក្នុងភូមិព្រែកពោធិ៍ក្រោម ឃុំព្រែកពោធិ៍ ស្រុកស្រីន្ធរ ខេត្តកំពង់ចាម។
លោក ស៊ីម គង់ អភិបាលស្រុកស្រីសន្ធរ បានឲ្យដឹងថា ករណីនេះកម្លាំងប៉ុស្តិ៍សហការ ជាមួយផ្នែកជំនាញអធិការស្រុក បានចុះដល់កន្លែងកើតហេតុ ដើម្បីធ្វើ ការពិនិត្យសាកសព។
លោកថាជនរងគ្រោះបាន ចងក ជិតដល់ចុងដងទង់ដែលមានកម្ពស់ប្រហែល ២០ម៉ែត្រពីដី ចងនឹងខ្សែភ្លើង ពណ៌ស។ ជនរងគ្រោះ ជាមនុស្សប្រុសអាយុប្រហែល ៤២ឆ្នាំ មិនស្គាល់អត្តសញ្ញាណ មានភិនភាគសក់ស្លូក មានកម្ពស់ ១៦.៥ ស.ម ពាក់អាវយឺតដៃវែង ពណ)ស ប្រផេះ មួយកំណាត់ក្រោម ស្លៀកខោកៅស៊ូ ជើងខ្លីត្រឹមជង្គង់ពណ៌ខ្មៅ មានលាយផ្កាពណ៌ខៀវ នៅលើដងខ្លួនមានចាក់សាក់រូបនាគ ដៃខាងស្តាំ ដៃខាងឆ្វេង សាក់រូបស្ទាំង នឹងផ្នែកកជើងខាងឆ្វេងមានសាក់រូបយ័ន្ត។
លោកអភិបាលស្រុកបានឲ្យដឹងទៀតថា សមត្ថកិច្ចប៉ុស្តិ៍រដ្ឋបាល បានបង្កើតគណៈកម្មការ មានមេភូមិ អាចារ្យ គណៈកម្មការវត្ត ចូលរួមធ្វើការត្រួតពិនិត្យសាកសពឃើញថា ផ្នែកក្បាល មិនមានស្នាកស្នាមបាក់បែកឆ្អឹងអ្វីនោះទេ។ ផ្នែក ក មានស្នាមជាំខ្មៅ ខូងជ្រៅដោយប៉ះនឹងខ្សែចងក ឯផ្នែកដងខ្លួនមិនមានស្នាកស្នាមឬបាក់ឆ្អឹងអ្វីទេ និងផ្នែក អវៈយវៈ មិនមានស្នាកស្នាមបាក់ឆ្អឹងអ្វីឡើយ។
បើតាម​សមត្ថកិច្ចសន្និដ្ឋានថា សាកសពពិតជាធ្វើអត្តឃាត ដោយចងកខ្លួនឯង មិនពាក់ព័ន្ធនឹងបទល្មើសព្រហ្មទណ្ឌនោះឡើយ។ ក្រោយធ្វើការត្រួតពិនិត្យរួច បានប្រគល់ជូនគណៈកម្មការវត្ត ដើម្បី ធ្វើបុណ្យតាមប្រពៃណី៕SRP

ខេត្តកំពង់ចាម៖អភិបាលខេត្ត លោក អ៊ុន ចាន់ដា បានថ្លែងអំពាវនាវដល់ប្រជាពលរដ្ឋ យុវជន ទាំងអស់ឲ្យស្រឡាញ់ថែរក្សា និងបន្តការដាំដុះដើមឈើក្នុងសហគមន៍ឲ្យបានច្រើន។ អភិបាលខេត្តថា សូមឲ្យបងប្អូនប្រជាពលរដ្ឋ ជាពិសេស​អាជ្ញាធរ​មូលដ្ឋាន​ ចូលរួម​ការពារ​ថែរក្សា​ទុក​ជាមរតកសម្រាប់​ឲ្យ​កូនចៅ​ជំនាន់ក្រោយ​។ ក្នុងឱកាសអញ្ជើញដឹកនាំមន្ត្រីដាំកូនឈើ ១ពាន់ដើមជាមួយនិងលោក ខ្លូត ផន ប្រធានក្រុមប្រឹក្សាខេត្ត ​នៅ​អម​សងខាង​ផ្លូវ​ថ្មី​ ខណៈ​ដែលស្ពាន​ឆ្លងកាត់​ស្រុក​​ស្ទឹងត្រង់​-ក្រូចឆ្មារ​ ក្នុងស្រុកស្ទឹងត្រង់ នាព្រឹកមិញ លោក​​ អ៊ុន​ ចាន់ដា​អភិបាលខេត្ត បាន​លើក​ឡើង​ថា​ ការដាំដើមឈើនៅថ្ងៃនេះ មានគោលបំណង រួមគ្នាក្នុងអភិរក្សធនធានធម្មជាតិដែលកំពុងតែរិចរិល និងចូលរួមក្នុងការកាត់បន្ថយការបម្រែបម្រួលអាកាសធាតុ ហើយ​ក៏​ជា​ការលើកកម្ពស់សោភ័ណភាពបរិស្ថានបៃតងនៅក្នុងទីប្រជុំជនផងដែរ។ សូមជម្រាបថាស្ពានឆ្លងកាត់ទន្លេមេគង្គស្ទឹងត្រង់-ក្រូចឆ្មារ” គឺជាចំណងដៃដ៏ថ្លៃថ្លារបស់សម្ដេចតេជោហ៊ុនសែន ជូនចំពោះ ប្រជាពលរដ្ឋ ក្នុងស្រុកស្ទឹងត្រង់ ជាស្ពានដ៏ល្អប្រណិត ដែល​បម្រើ​ដល់សេដ្ឋកិច្ចជាតិ ក៏ដូចជាសេដ្ឋកិច្ចក្នុងខេត្តកំពង់ចាម ការសាងសង់សម្រេចបាន៩០ភាគរយហើយ៕SRP    

ខេត្តសៀមរាប៖កូនប្ញស្សីពូជសាំងម៉ុន (Dendrocalamus sp.)ចំនួន២០០០ដើម ត្រូវបានចែកជូនសហគមន៍ព្រៃឈើទឹកជប់ខ្នាពោធិ៍ និងសហគមន៍ព្រៃឈើគោកចាស់ ដោយសហគមន៍នីមួយៗទទួលបានកូនឫស្សីចំនួន ១ពាន់ដើម។
ពិធីចែកនេះធ្វើនៅល្ងាចថ្ងៃសៅរ៍ ថ្ងៃទី១០ ខែតុលា ឆ្នាំ២០២០ សហគមន៍ព្រៃឈើទឹកជប់ខ្នារពោធិ៍ ស្ថិតក្នុងភូមិថ្នល់ដាច់ឃុំខ្នារពោធិ៍ ស្រុកសូទ្រនិគម ខេត្តសៀមរាប ក្រោមវត្តមានលោកវេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ។
យោងតាមលោក គង់ ប៉ុនលួស អនុប្រធានគណកម្មការគ្រប់គ្រងសហគមន៍ព្រៃឈើទឹកជប់ខ្នាពោធិ៍ បានឲ្យដឹងថាសហគមន៍បានបង្កើតនៅឆ្នាំ១៩៩៩ មានផ្ទៃដី១០២២ ហ.ត និងមានសមាជិក ៤៩នាក់។
រដ្ឋមន្ត្រីកសិកម្មបានថ្លែងវាយតម្លៃខ្ពស់ចំពោះមន្ទីរកសិកម្ម រុក្ខាប្រមាញ់ និងនេសាទ អាជ្ញាធរមូលដ្ឋាន រដ្ឋបាលព្រៃឈើ ដែលបានសហ ការគ្នារៀបចំបង្កើតសហគមន៍ព្រៃឈើ ជាពិសេសរៀបចំពិធីចែក និងដាំឫស្សី ដើម្បីជាប្រយោជន៍ក្នុងការបង្កើតគម្របព្រៃឈើឡើងវិញ ធ្វើការអភិវឌ្ឍ និងអភិរក្សព្រៃឈើ សត្វព្រៃ ជីវ:ចំរុះ ធានាបាននូវនិរន្តរភាពនៃការអាស្រ័យផល និងអនុផលព្រៃឈើ និងចូលរួមថែរក្សា ការពារធនធានធម្មជាតិ (ព្រៃ និងសត្វព្រៃ) សម្រាប់កូនចៅជំនាន់ក្រោយ។

ដើម្បីរក្សាបាននូវនិរន្តរភាពនៃការ គ្រប់គ្រងសហគមន៍ព្រៃឈើ និរន្តរភាពនៃការផ្គត់ផ្គង់ស្បៀង ផងដែរ៕SRP