ភ្នំពេញ៖លោកសុង ច័ន្ទសុជាតិ ប្រធានស្ដីទីនៃមន្ទីរបរិស្ថានខេត្តព្រះវិហារត្រូវបានអង្គភាពប្រឆាំងអំពើពុករលួយកោះហៅឲ្យចូលខ្លួនទៅបំភ្លឺ ភាពមិនប្រក្រតីពាក់ព័ន្ធការកាប់ព្រៃឈើនៅតំបន់ព្រៃឡង់។
បើតាមពាក្យបណ្ដឹងមកអង្គភាពប្រឆាំងអំពើពុករលួយទទួលបាននៅថ្ងៃទី២៨ ខែមេសា ឆ្នាំ២០២០និងស្មារតីអង្គប្រជុំពិនិត្យ ពាក្យបណ្ដឹងនៅថ្ងៃទី២៩ ខែមេសា បានជម្រាបជូនលោកសុង ច័ន្ទសុជាតិ ប្រធានស្ដីទីថា អង្គភាពប្រឆាំងអំពើពុករលួយ បានទទួលនិងពិនិត្យពាក្យប្ដឹងដែលបានលើកឡើងថាឈ្មោះ សោម រដ្ឋា មន្ដ្រីបរិស្ថានខេត្តព្រះវិហារនិងសហគមន៍ព្រៃឈើ បានទារប្រាក់ពីឈ្មួញដឹកឈើព្រៃឡង់ក្នុងមួយគោយន្ដចាប់ពី៨០.០០០រៀល ដល់១០០.០០០រៀល។
អង្គភាពប្រឆាំងអំពើពុករលួយបានជម្រាបជូនបន្ដថាមន្ដ្រី បរិស្ថានបានឃុបឃិតគ្នាជាប្រព័ន្ឋជាមួយឈ្មួញឈើមានលុយម្នាក់នៅភូមិពើក ហើយប្រសិនបើគោយន្ដមិនមែនជាអ្នកលក់ឈើឲ្យឈ្មោះ ឡេង នោះទេគឺមិនឲ្យដឹកចេញពីភូមិពើកឡើយ ទោះបីជាគោយន្ដនោះបានបង់ប្រាក់ចេញពីព្រៃមកក៏ដោយក៏មន្ដ្រីបរិស្ថាននៅតែចាប់ឲ្យបង់ប្រាក់ម្ដងទៀតចំនួន១.០០០.០០០រៀល។
តាមប្រភពដដែលបានបន្ថែមថាឈ្មោះ ឡេង និងឈ្មោះ ឌី កំពុងតែឃុបឃិតគ្នាជាមួយក្រុមគោយន្ដ ចូលទៅកាប់ឈើនៅក្នុងព្រៃឡង់ដោយសេរី ហើយ គោយន្ដរបស់ពួកគេចូល ទៅដឹកជញ្ជូនឈើក្នុងមួយថ្ងៃ៣ជើងទៅ៥ជើង ដោយមាន មេក្លោងឈ្មោះឌី ឈ្មោះរឿន ឈ្មោះម៉េត និងឈ្មោះយាយ លែន ជាអ្នកដើរប្រមូលទិញឈើពីអ្នកស្រុកដែលបានចុះទៅអារឈើក្នុងព្រៃឡង់នៅជុំវិញភូមិទ្រានិងភូមិពើក ដោយសហការជាមួយ មន្ដ្រីបរិស្ថានសហគមន៍ព្រៃឈើនិងមន្ដ្រីប៉ុស្ដិ៍រដ្ឋបាល។
សូមបញ្ជាក់ថាឈ្មោះ ឆាយ គឹមហូវ មានប្ដីមុខងារ ជាមេព្រៃ(ផ្នែករដ្ឋបាលព្រៃឈើ)មានឡានសាំយ៉ុង០២គ្រឿងនិងឡាន ធំកង់១០ចំនួន ០២គ្រឿង កំពុងតែដឹក ជញ្ជូនឈើនៅតំបន់ព្រៃឡង់នោះផងដែរ។
ជុំវិញករណីនេះបណ្ដាញសារព័ត៌មានសៀមរាបប៉ុស្ដិ៍ មិនទាន់ទទួលបានការបកស្រាយបំភ្លឺពីលោកសុង ច័ន្ទសុជាតិ ប្រធានស្ដីទីនៃមន្ទីរបរិស្ថានខេត្តព្រះវិហារនៅឡើយទេ។ក៏ប៉ុន្តែលោកសុង ច័ន្ទសុជាតិ បានថ្លែងប្រាប់អ្នកសារព័ត៌មានកាលនៅថ្ងៃទី១១ខែមិថុនា ឆ្នាំ២០២០ថាលោកក៏ទទួលបានលិខិតកោះ អញ្ជើញរបស់អង្គភាពប្រឆាំងអំពើពុករលួយផងដែរហើយរូបលោកកំពុងបើកការស្រាវជ្រាវ ដើម្បីរៀបចំឯកសារឆ្លើយជូនអង្គភាពប្រឆាំងអំពើពុករលួយនៅថ្ងៃខាងមុខ៕SRP
