ខេត្តព្រៃវែង៖អាជ្ញាធរមូលដ្ឋានបានរាយការណ៍ថារថយន្តដឹកអេតចាយមួយគ្រឿង ត្រូវបានឆ្លង ចរន្តភ្លើងអាគុយបណ្តាលអោយឆាបឆេះអេតចាយមួយចំនួន។
ហេតុការណ៍នេះបានកើតឡើងនៅល្ងាចថ្ងៃទី០៦ ខែកញ្ញា ឆ្នាំ២០២០ ស្ថិតនៅចំណុចភូមិស្វាយអន្ទរទី១ ឃុំស្វាយអន្ទរ ស្រុកស្វាយអន្ទរ ខេត្តព្រៃវែងចំងាយ១០០ម៉ែត្រពីរង្វង់មូលស្វាយអន្ទរ។

លោក អ៊ុង ផាន អធិការនគរបាលស្រុកស្វាយអន្ទរបានបញ្ជាក់ថា រថយន្តដឹកអេតចាយខាងលើនេះ ម៉ាកហ៉ីយ៉ុនដាយ ចំណុះ២៥ តោន អ្នកបើកបរឈ្មោះ ថេត ចាន់ធា ភេទប្រុស អាយុ ២០ឆ្នាំ រស់នៅភូមិសុក្រំជ្រុំ ឃំុគងជ័យ ស្រុកអូរាំងឪ ខេត្តត្បូងឃ្មុំ ។ ក្នុងទិសដៅពី ស្រុកខ្សាច់កណ្តាល ខេត្តកណ្តាល ឆ្លងកាត់ ឃុំព្រៃព្នៅ ទៅស្រុកអូរាំងឪ ខេត្តត្បូងឃ្មុំ។

មូលហេតុដោយសារឆ្លងចរន្តអាគុយអេតចាយចាស់ៗ ដាក់ក្នុងទ្រុងរថយន្ត មិនមានការប្រុងប្រយ័ត្ន។
បើតាមអធិការករណីនេះបានរងការខូចខាត សម្ភារលើរថយន្ត មានដូចជា អាគុយចាស់ៗ សំបកដបជ័រ កំប៉ុង ដែក ។ សរុបការខូចខាតសម្ភារអេតចាយមួយចំនួន ប្រហែល ៣០%។ ក្នុងនោះរថយន្តអគ្គិភ័យស្រុកស្វាយអន្ទរ ប្រើប្រាស់អស់ទឹកចំនួន០៣ឡាន។

ម្ចាស់រថយន្តបានកើតសរសើរនឹងថ្លែងអំណរគុណដល់សមត្ថកិច្ចស្រុកស្វាយអន្ទរជាពិសេសលោក អ៊ុង ផាន អធិការនគរបាលស្រុកស្វាយអន្ទរបន្ទាប់ពីបានដឹងថាមានករណីនេះភ្លាមក៏បានដឹកនាំកម្លាំងចុះជួយពន្លត់ដោយផ្ទាល់តែម្តង។ ម្ចាស់រថយន្តបានបន្តទៀតថាបើកុំតែបានសមត្ថកិច្ចមកជួយទាន់ពេលវេលាម្ល៉េះរថយន្តរបស់គាត់ត្រូវអស់ទាំងស្រុងហើយ៕SRP

ខេត្តកំពង់ចាម​៖លោក​​ អ៊ុន​ ចាន់ដា​ អភិបាលខេត្តកំពង់ចាម​ បានប្រាប់ដល់អាជ្ញាធរគ្រប់មូលដ្ឋាន ត្រូវ​​ជួយ​ជំរុញ​ដល់​បងប្អូន​ប្រជាពលរដ្ឋ​ អោយខិតខំបន្តធ្វើការបង្កបង្កើនផល ហេីយ​បេី​មាន​បញ្ហា​ ឬ​មានកង្វល់​អ្វី​នោះ​ គឺ​ត្រូវ​ប្រញាប់​រាយការណ៍​ជា​បន្ទាន់​ ដេីម្បីយេីង​​មាន​ចំណាត់ការ​ដោះស្រាយ​។​

ការ​ថ្លែង​យ៉ាង​ដូច្នេះ​ក្នុង​ពិធី​សម្ពោធដាក់ឲ្យប្រើប្រាស់ជាផ្លូវការ​នូវ​​អគារ​ស្នាក់ការគណបក្សប្រជាជនកម្ពុជា ឃុំអូរស្វាយ ស្រុកកំពង់សៀម​ កាលពី​ព្រឹក​ថ្ងៃ​ទី​៥​ ខែកញ្ញា​ ឆ្នាំ​២០២០​ ក្រោម​វត្តមាន​ លោក​​ វេង សាខុន ប្រធានក្រុមការងាររាជរដ្ឋាភិបាល និងជាប្រធានក្រុមការងារគណបក្ស​ប្រជាជន​កម្ពុជា​ ចុះមូលដ្ឋានស្រុក​កំពង់សៀម​​។

ក្នុង​ឱកាស​ប្រារព្ធ​ពិធី​បិណ្ឌ​ ភ្ជុំបិណ្ឌ​នេះ​ដែរ​ លោក​​ អ៊ុន​ ចាន់ដា​ បាន​ធ្វើ​ការ​អំពាវនាវដល់បងប្អូន​ប្រជាពលរដ្ឋ​ ឲ្យ​បន្ត​ការអនុវត្ត​ឲ្យ​បានខ្ជាប់ខ្ជួន នូវវិធានការការពារ ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ១៩ ដែលក្រសួងសុខា ភិបាលបានដាក់ចេញឲ្យអនុវត្តនាពេលកន្លងមក ក៏ដូចជាបច្ចុប្បន្ន ឲ្យ​មានប្រសិទ្ធភាព ដើម្បីចូលរួមទប់ស្កាត់ការចម្លងជំងឺនេះចូលក្នុងសហគមន៍។​

ជាមួយគ្នា​នោះ​ លោក​ អ៊ុន ចាន់ដា សមាជិកគណៈកម្មាធិការកណ្តាល​គណបក្សប្រជាជន​កម្ពុជា​ និង​ជាប្រធានគណៈកម្មាធិការគណបក្សខេត្តកំពង់ចាម បានថ្លែងអំណរគុណ និងវាយតម្លៃខ្ពស់ចំពោះ លោក​ លោកស្រី​ ប្រធាន អនុប្រធាន សមាជិកក្រុមការងារឃុំ និងសប្បុរសជន ដែលមានស្មារតីលះបង់​ក្នុង​ការ​បរិច្ចាគថវិកាផ្ទាល់ខ្លួន ដេីម្បី​រួមគ្នាដំណើរការ​កសាង​ស្នាក់ការ​បក្ស​ ដែលសរុប​ជាង៤០,០០០ដុល្លារអាមេរិក​ ដោយ​លោកឧត្តមសេនីយ៍ទោ សោ សាវឿន និងលោកស្រី បានបរិច្ចាគដី​ជា​ទីតាំង​សាងសង់អគារនេះផងដែរ។

ក្នុង​ឱកាសនោះដែរ​ លោក​​ វេង សាខុន បាន​ថ្លែង​អំពីដំណើរការវិវឌ្ឍន៍រីកចម្រើន សុខសន្តិភាព ស្ថិរភាពនយោបាយ សន្តិសុខស្បៀង និងជាពិសេសការអនុវត្តន៍អនុសាសន៍របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្រ្តី បានណែនាំឲ្យប្រជាពលរដ្ឋ និងជាពិសេសក្រសួងកសិកម្ម រុក្ខាប្រមាញ់ និងនេសាទ ឲ្យខិតខំបង្កើនចលនាអភិវឌ្ឍវិស័យកសិកម្ម ឲ្យកាន់តែសកម្មថែមទៀត ដើម្បីបង្កើន និងពង្រឹងភាពម្ចាស់ការក្នុងការផលិត ធានាសន្តិសុខស្បៀង ការផ្គត់ផ្គង់ទីផ្សារ ការបង្កើតឱកាសការងារ តាមរយៈការចិញ្ចឹមត្រី-កង្កែប ជាលក្ខណគ្រួសារក្នុងក្របខណ្ឌ បច្ចេកទេសសមស្របសាមញ្ញ ដោយប្រើប្រាស់រយៈពេលខ្លី ចំណាយដើមទុនតិច ទទួលបានផលច្រើន រក្សាបាននូវស្ថានភាពជីវភាពប្រក្រតី តាមគន្លងថ្មីក្នុងអំឡុងពេល នៃការរីករាលដាលនៃជំងឺឆ្លងកូវីដ-១៩​៕SRP

ខេត្តកំពង់ធំ៖សេចក្ដីរាយការណ៍ព័ត៌មានបឋមបានអោយដឹងថាក្រុមហ៊ុន គ្រួសារសុខសាន្ត ដែលបានធ្វើសកម្មភាពកាប់ទន្ទ្រានដីព្រៃ ត្រូវបានសមត្ថកិច្ចខេត្តកំពង់ធំចុះធ្វើការហាមគាត់។ ការចុះហាមឃាត់នេះ នៅថ្ងៃទី ៤ខែកញ្ញាឆ្នាំ២០២០ វេលាម៉ោង០២និង១៥នាទីស្ថិតនៅក្នុងភូមិសាស្ត្រភូមិពពាយ ឃុំទ្រា ស្រុកស្ទោង ខេត្តកំពង់ធំ។

សមត្ថកិច្ចបានអោយដឹងថាការចុះទប់ស្កាត់កម្មភាពរបស់ក្រុមហ៊ុនគ្រួសារសុខសាន្ត គឺក្រោមបញ្ជារបស់ព្រះរាជអាជ្ញានៃអយ្យការអមសាលាដំបូងខេត្តកំពង់ធំ ដឹកនាំចុះផ្ទាល់ដោយលោក សាយ វាសនា ព្រះរាជអាជ្ញារងនៃអយ្យការអមសាលាដំបូងខេត្តកំពង់ធំ។

សមត្ថកិច្ចបានបញ្ជាក់ថាកម្លាំងជំនាញរដ្ឋបាលព្រៃឈើចុះទៅត្រួតពិនិត្យមើលស្ថានភាពដីព្រៃជិត៣០០ហិកតា របស់ក្រុមហ៊ុនគ្រួសារសុខសាន្ត ដែលសង្ស័យថាជាប់នឹងគម្របព្រៃឈើ។ បើតាមលោក សាយ វាសនា ព្រះរាជអាជ្ញារងអមសាលាដំបូងខេត្តកំពង់ធំបានមានប្រសាសន៍ថា ដីនេះលោកសង្ស័យជាប់នឹងគម្របព្រៃឈើ ដូច្នេះលោកព្រះរាជអាជ្ញាបានអោយជំនាញចុះចុចមើលGPS និងUTDM ដើម្បីយកចំណុចផ្ទៀងផ្ទាត់អោយបានច្បាស់លាស់។ ព្រោះអីក្រុមហ៊ុន គ្រួសារសុខសាន្ត ដែលកំពុងតែមានការអភិវឌ្ឍនៅលើផ្ទៃដីនេះមិនទាន់មានច្បាប់គ្រប់គ្រាន់នៅឡើយទេ។ ដូច្នេះលោកព្រះរាជអាជ្ញាបានប្រាប់ទៅតំណាងក្រុមហ៊ុនគ្រួសារសុខសាន្តដែលកំពុងតែរៀបចំគម្រោងដីឡូតិ៍លក់នេះអោយផ្អាកសិន រង់ចាំជំនាញធ្វើការអោយបានច្បាស់លាស់ថាតើដីនៅចំណុចនេះជាប់គម្របព្រៃឈើឬអត់។

លោក សាយ វាសនា បានបញ្ជាក់ប្រាប់ក្រុមការងារក៏ដូចជាជំនាញនិងតំណាងក្រុមហ៊ុនថា ជាធម្មតាច្បាប់ត្រូវអោយទុកព្រៃនៅតាមមាត់បឹងព្រែកត្រពាំងដែលជារបស់ធម្មជាតិ ឥឡូវលោកព្រះរាជអាជ្ញាបានហាមមិនអោយធ្វើបន្តទៀតទេ រងចាំបញ្ជាក់ពីជំនាញអោយបានច្បាស់លាស់សិន។ ពាក់ព័ន្ធទៅនឹងករណីនេះបណ្ដាញសៀមរាបប៉ុស្តិ៍ នៅមិនទាន់ទទួលបានការបំភ្លឺពីតំណាងក្រុមហ៊ុន គ្រួសារសុខសាន្ត នៅឡើយទេ៕SRP

ខេត្តសៀមរាប៖ប៉ុស្តិ៍នគរបាលរដ្ឋបាលស្លក្រាម មានកិត្តិយសសូមធ្វើការបកស្រាយបំភ្លឺចំពោះគណនេយ្យហ្វេសបុកដែលមានឈ្មោះ Seyha Haem ដែលបានសរសេរបង្ហោះថា «ឈាមដាបពេញផ្លូវ…………………
ក្មេងស្ទាវ 2 ក្រុមជុំជើងគ្នា នៅផ្លូវ 60 ម៉ែត្រ បង្កឲ្យផ្ទុះអំពើហិង្សា វាយ បាញ់ កាប់ចាក់ ប្រឡាក់អំបិលម្ទេស សូមបងៗសន្តិសុខ ការពារសណ្ដាប់ធ្នាប់ ជួយធ្វើអន្តរាគមន៍ផង»។

ដើម្បីចៀសវាងការយល់ច្រឡំលើខ្លឹមសារខាងលើ ប៉ុស្តិ៍នគរបាលរដ្ឋបាលស្លក្រាម ក្រុងសៀមរាប ខេត្តសៀមរាប សូមធ្វើការបញ្ជាក់បំភ្លឺជូនមហាជនដូចខាងក្រោម:
-ការចុះផ្សាយរបស់ម្ចាស់គណនីខាងលើ គឺពុំ
មែនជាការពិតទេ គឺគ្រាន់តែជាការលេងសើចនឹងទាញយកចំណាប់អារម្មណ៍ពីបណ្ដាញសង្គមហ្វេសប៊ុកតែប៉ុណ្ណោះ ។
-ជុំវិញករណីខាងលើសមត្ថកិច្ចយើងបានធ្វើការស្រាវជ្រាវ និងទំនាក់ទំនងជាមួយម្ចាស់ អាខោនខាងលើបានធ្វើការសុំទោសនិងលុបចោលខ្លឹមសារដែលបានបង្ហោះរួចរាល់ហើយ។
-អាស្រ័យហេតុនេះសូមសាធារណៈជន អ្នកសារព័ត៌មាន និងអ្នកនិយមប្រើប្រាស់បណ្ដាញទំនាក់ទំនងសង្គមសូមមេត្តាកុំមានការយល់ច្រឡំ និងមេត្តាទទួលជ្រាបជាព័ត៌មាន។
-ប៉ុស្តិ៍នគរបាលរដ្ឋបាលសង្កាត់ស្លក្រាម ក្រុងសៀមរាប ខេត្តសៀមរាប សូមថ្លែងអំណរគុណចំពោះកិច្ចសហការល្អរបស់សាធារណៈជន និងជាពិសេសបណ្ដាញទំនាក់ទំនងសង្គម ដែលបានចូលរួមចំណែករក្សាការពារសន្តិសុខ សុវត្ថិភាព សណ្តាប់ធ្នាប់សង្គម និងរិះគន់ក្នុងន័យស្ថាបនា និងទទួលយកជាមូលដ្ឋានធ្វើការកែលម្អនិងក៏សូមអំពាវនាវដល់សាធារណៈជន និងបណ្ដាញសង្គមចៀសវាងការអត្ថាធិប្បាយ ចងក្រងខ្លឹមសារ រូបភាពសកម្មភាពបំភ្លើសការពិត ជាហេតុបង្កឲ្យមានភាពវឹកវរបំពុលបរិយាកាសសង្គម ចលាចល បង្កការយល់ច្រឡំក៏ដូចជាភាពភ័យខ្លាចដល់ប្រជាពលរដ្ឋ និងអាចប្រឈមចំពោះមុខច្បាប់ជាធរមាន៕SRP

ខេត្តមណ្ឌលគិរី៖លោក ស្វាយ សំអ៊ាង អភិបាលខេត្តមណ្ឌលគិរី បានមានប្រសាសន៍ក្នុងកិច្ចប្រជុំគណៈបញ្ជាការឯកភាពខេត្ត នៅសាលប្រជុំសាលាខេត្ត នារសៀលថ្ងៃទី០៣ ខែកញ្ញា ឆ្នាំ២០២០ថា បញ្ហាបទល្មើសព្រៃឈើ និងការកាប់ទន្រ្ទានយកដីព្រៃធ្វើជាកម្មសិទ្ធ គឺជាបញ្ហាដ៏ស្មុគស្មាញ ដូច្នេះ បញ្ហាទាំងនេះ គឺទាមទារឱ្យមានការចូលរួមពីគ្រប់អង្គភាពជំនាញ និងសមត្ថកិច្ច រួមទាំងប្រជាពលរដ្ឋទាំងអស់ ដើម្បីធ្វើយ៉ាងណា រួមគ្នាថែរក្សា ការពារធនធានធម្មជាតិ ឱ្យបានស្ថិតស្ថេរគង់វង្ស។

អភិបាលខេត្ត បានណែនាំដល់សមត្ថកិច្ចជំនាញ ត្រូវចូលរួមថែរក្សាការពារសន្តិសុខ សណ្តាប់ធ្នាប់ នៅតាមតំបន់ព្រំដែន និងថែរក្សាការពារបង្គោលព្រំដែន។ ម្យ៉ាងទៀត ក៏ស្នើដល់សមត្ថកិច្ច និងមន្រ្តីជំនាញ ត្រូវសហការគ្នា យកចិតទុកដាក់រៀបចំសន្តិសុខ សណ្តាប់ធ្នាប់សាធារណៈនៅតាមទីវត្តអាមនានា ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌ ដើម្បីធ្វើយ៉ាងណា ឲ្យអនុវត្តតាមការណែនាំរបស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល នូវវិធានការបង្ការ ទប់ស្កាត់ ការរីករាលដាលនៃជំងឺកូវីដ១៩ផងដែរ៕SRP