Siem Reap Post – Page 596 – Siem Reap News, Cambodia News

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម នៅល្ងាចថ្ងៃទី០៤ខែមិថុនាម្សិលមិញបានអញ្ជើញចុះសាកសួរសុខទុក លោកទុំ លឹមយុន សមាជិកក្រុមប្រឹក្សាខេត្ត ដែលបានសម្រាកព្យាបាលជំងឺដោយវះកាត់ពោះវៀនដោះខ្នែង នៅមន្ទីរពេទ្យខេត្តកំពង់ចាម។

លោកអ៊ុន ចាន់ដា បានសម្ដែងនូវមនោសញ្ចេតនា និងទឹកចិត្តព្រួយបារម្ភ ព្រមទាំងបានលើកទឹកចិត្ត ដល់គ្រួសារ និងអ្នកជំងឺ ដើម្បីឲ្យបានឆាប់ជាសះស្បើយពីជំងឺ គឺត្រូវអនុវត្តតាមការណែនាំរបស់ក្រុមគ្រូពេទ្យ ដែលបានពិនិត្យ វិភាគព្យាបាលជំងឺ។ដោយត្រូវពិសារឱសថ ឲ្យបានទៀងទាត់ តាមពេលវេលាដែលបានកំណត់ ព្រមទាំងបរិភោគម្ហូបអាហារប៉ូវកម្លាំង រួមផ្សំនឹងការសម្រាកឲ្យបានគ្រប់គ្រាន់ ទើបទទួលបានសុខភាពល្អឡើងវិញ។
លោកអ៊ុន ចាន់ដា ក៏បានឧបត្ថម្ភនូវថវិកា ចំនួន១លានរៀលជូនដល់លោកទុំ
លឹមយុន ដេីម្បីជួយសម្រាលបន្ទុកក្នុងការព្យាបាលផងដែរ។
អភិបាលខេត្ត ក៏បានបន្តសាកសួរសុខទុក្ខប្រជាពលរដ្ឋ ដែលបាននាំសមាជិកក្រុមគ្រួសារមកសម្រាកព្យាបាលជំងឺនៅមន្ទីរពេទ្យខេត្តកំពង់ចាម ព្រមទាំងឧបត្ថម្ភថវិកា ក្នុងម្នាក់ៗ ចំនួន៥ម៉ឺនរៀល៕SRP

ខេត្តសៀមរាប៖អាជ្ញាធរបានឲ្យដឹងថាគិតត្រឹមថ្ងៃទី០៤ខែមិថុនាឆ្នាំ២០២០ ក្រុមការងារចម្រុះរដ្ឋបាលខេត្តបាន និងកំពុងដំណើរការដាក់លូរំដោះទឹកអមសងខាងផ្លូវមុខកាត់១ម៉ែត្រចាប់ពីចំណុចផ្លូវក្រវ៉ាត់ក្រុងទៅផ្លូវកែងដើមក្រសាំង(កែងផ្លូវBBU)កាត់មុខផ្សារក្រោមប្រវែង ១៦៤០ម៉ែត្រ ព្រមទាំងជួសជុលលុបសំបុកមាន់ កែលម្អ និងរៀបចំទីតាំងចំណតរថយន្តធុនតូច។

អាជ្ញាធរបានបន្តថាការជួសជុលកែលម្អដាក់លូរំដោះទឹកអមសងខាងនិងរៀបចំទីតាំងចំណត់រថយន្តធុនតូចនៅផ្លូវផ្សារក្រោមនេះជាគម្រោងរបស់រដ្ឋបាលខេត្ត។បើតាមអាជ្ញាធរបញ្ជាក់ថាទិសដៅការងារឆ្នាំ២០២០រដ្ឋបាលខេត្តសៀមរាប បានកំណត់យកការងារបើកផ្លូវ និងការសាងសង់ផ្លូវ ជាការងារអាទិភាពតាមរយៈសេចក្តីសម្រេចសន្និបាតបូកសរុបលទ្ធផលការងារប្រចាំឆ្នាំ២០១៩ និងលើកទិសដៅការងារឆ្នាំ២០២០របស់រដ្ឋបាលខេត្ត៕SRP

ខេត្តសៀមរាប៖សេចក្ដីរាយការណ៍បានឲ្យដឹងថាមានជនមិនស្គាល់មុខបានកាត់សោទ្វារកុដិព្រះសង្ឃ លួចយកលុយបាន គេចខ្លួនដោយសុវត្ថិភាព។

អំពើលួចដោយមានស្ថានទម្ងន់ទោស(គាស់ទំលុះទំលាយ)បានកើតឡើងនៅវេលាម៉ោង១១និង៤៥នាទីថ្ងៃទី០៤ខែមិថុនាឆ្នាំ២០២០ នៅចំណុច វត្តគោកធ្លក ភូមិគោកធ្លក ឃុំគោកធ្លកលើស្រុកជីក្រែង ខេត្តសៀមរាប។

សមត្ថកិច្ចបានឲ្យដឹងនៅមុននេះបន្តិចថាករណីនេះបង្កដោយជនមិនស្គាល់អត្តសញ្ញាណ បានលួចធ្វើសកម្មភាពកាត់សោទ្វារកុដិព្រះសង្ឃព្រះនាម ស៊ុយ ហ៊ីង ព្រះជន៧៧វស្សា ដែលគង់នៅក្នុងវត្តខាងលើ។

សមត្ថកិច្ចបានបញ្ជាក់ថាសម្ភារបាត់បង់លុយចំនួន១.៦០០.០០០រៀល។ចំពោះហេតុការណ៍នេះជនសង្ស័យបានបន្សល់វត្ថុតាង ទុកនៅចំណុចកើតហេតុមាន៖ញញួរ០១ ដង្កាប់០១ ដែក១៦លីប្រវែង៣ម៉ែត្រ០១ដើមនិងសោបាក់ចំនួន០២ផងដែរ។

សមត្ថកិច្ចបានបញ្ជាក់បន្ថែមថាក្រោយពីធ្វើសកម្មភាពរួចជនសង្ស័យបានគេចខ្លួនបាត់តែម្ដង។បើតាមសមត្ថកិច្ចថាមូលហេតុដោយព្រះសង្ឃខាងលើនៅពេលដល់ម៉ោងឆាន់បាយ បានចេញទៅឆាន់នៅកុដិផ្សេង ដោយមិនមានព្រះសង្ឃនៅចាំកុដិនោះទេ។ទោះយ៉ាងណាពាក់ព័ន្ធករណីនេះសមត្ថកិច្ចបានបញ្ជាក់ផងដែរថាបច្ចុប្បន្នកម្លាំងសមត្ថកិច្ចស្រុកបានចុះទៅដល់កន្លែងកើតហេតុ និងកំពុងស៊ើបអង្កេត ស្រាវជ្រាវរកមុខសញ្ញាដើម្បីយកមកអនុវត្តន៍តាមផងដែរ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានថ្លែងថា វិស័យកសិកម្មក៏កំពុងមានការប្រែប្រួលថ្មី តាមរយៈការយល់ដឹង ការប្រែប្រួលទម្លាប់អន់ថយការធ្វើស្រែតាមយកផល ការផលិតសម្រាប់តែផ្គត់ផ្គង់គ្រួសារ ទៅជាការផលិតកម្មតាមបែបវប្បកម្ម សម្រាប់ការធ្វើជំនួញ និងបម្រើការនាំចេញ។
លោកអ៊ុន ចាន់ថា ថាសព្វថ្ងៃការភ្ចួររាស់ដោយគ្រឿងយន្តកសិកម្ម ដូចជាត្រាក់ទ័រគោយន្ត។ល។ មានប្រមាណជា៩១%នៃការភ្ជួររាស់សរុប។ បច្ចុប្បន្នទូទាំងខេត្តមានត្រាក់ទ័រសរុបចំនួន៨២១គ្រឿង គោយន្តចំនួន៧ ៩៤៣គ្រឿង ម៉ាស៊ីនច្រូតកាត់៥៤៣គ្រឿង។
លោកអភិបាលខេត្តបានបញ្ជាក់ថា ពាក់ព័ន្ធដល់ធ្វើបង្ហាញផលិតកម្មស្រូវដោយប្រើប្រាស់គ្រឿងយន្តនិងបច្ចេកទេសដាំដុះទំនើប នាពេលនេះ ពិតជាមានសារៈសំខាន់ ក្នុងកាលៈទេសៈដែលកម្លាំងពលកម្មមនុស្សក្នុងវិស័យកសិកម្មថយចុះ ជាពិសេសបានធ្វើអោយថ្លៃដើមផលិតថយចុះតាមរយៈកាត់បន្ថយពូជ និងពេលវេលា កសិករនឹងបានយល់ដឹងបច្ចេកវិទ្យាថ្មីៗបន្ថែមទៀតនៅក្នុងផលិតកម្មស្រូវ។
លោកបានបញ្ជាក់យ៉ាងដូច្នេះនៅព្រឹកមិញនេះក្នុងពេលអមដំណើរជាមួយលោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមក្នុងពិធីធ្វើបង្ហាញផលិតកម្មស្រូវដោយប្រើប្រាស់គ្រឿងយន្ត និងបច្ចេកទេសដាំដុះទំនើបដល់ប្រជាកសិករ នៅឃុំផ្តៅជុំ ស្រុកជើងព្រៃ ខេត្តកំពង់ចាម ក្រោមវត្តមានលោក Pablo Kang ឯកអគ្គរដ្ឋទូតប្រទេសអូស្ត្រាលីប្រចាំប្រទេសកម្ពុជា។
ក្នុងឱកាសនោះដែរលោក វេង សាខុន បានថ្លែងថា កម្មវិធីនេះ គឺជានិមិត្តរូបនៃការចាប់ផ្តើមរដូវដាំដុះស្រូវ រដូវវស្សាឆ្នាំ២០២០ និងជាការបង្ហាញអំពីការវិវឌ្ឍរីកចម្រើន នៃវិស័យផលិតកម្មដំណាំស្រូវ ពីការប្រើប្រាស់កម្លាំងពលកម្មមនុស្ស និងសត្វពាហនៈ មកប្រើប្រាស់គ្រឿងយន្តជំនួសវិញ។ ទាំងនេះស្តែងចេញពីការខិតខំប្រឹងប្រែង និងការយកចិត្តទុកដាក់ខ្ពស់បំផុត របស់រាជរដ្ឋាភិបាល ក្នុងការដាក់ចេញនូវគោលនយោបាយ ជំរុញកំណើនផលិតកម្មកសិកម្ម ដើម្បីជួយទ្រទ្រង់កំណើនសេដ្ឋកិច្ច តាមរយៈការធានាបាននូវសន្តិសុខស្បៀង អាហារូបត្ថម្ភ និងជំរុញការនាំចេញ ដោយការប្រើប្រាស់បច្ចេកវិទ្យាកសិកម្មទំនើបទាន់សម័យធានាបាននូវប្រសិទ្ធភាពសេដ្ឋកិច្ច បរិយាប័ន នរវានុវត្តន៍ និងការប្រែប្រួលអាកាសធាតុ។
តាមរយៈកម្មវិធីជំនួយឧបត្ថម្ភដ៏ធំធេងនេះ រដ្ឋមន្ត្រី វេង សាខុន ក្នុងនាមរាជរដ្ឋាភិបាលកម្ពុជា បានថ្លែងអំណរគុណ ដល់ប្រជាជន និងរដ្ឋាភិបាលប្រទេសអូស្រ្តាលី និងវាយតម្លៃខ្ពស់ចំពោះកិច្ចសហប្រតិបត្តិការ និងជំនួយសម្រាប់អភិវឌ្ឍន៍វិស័យកសិកម្ម នៅកម្ពុជានាពេលកន្លងមក ហើយពិតណាស់ជំនួយនេះ បានចូលរួមចំណែក យ៉ាងសកម្ម ក្នុងការអភិវឌ្ឍវិស័យកសិកម្មកម្ពុជា ដើម្បីចូលរួមសម្រេច ឲ្យបាននូវចក្ខុវិស័យរបស់រាជរដ្ឋាភិបាល នាឆ្នាំ២០៣០និង២០៥០៕SRP

Sponsored

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រីបានអំពាវនាវ ដល់ប្រជាពលរដ្ឋ ឲ្យអនាមម័យ ផ្ទាល់ខ្លួនទប់ស្កាត់ ការឆ្លងរាលដាល ជំងឺកូវីដ១៩។
សម្ដេចតេជោ ហ៊ុន សែន បានលើកឡើងថាយើងទាំងអស់គ្នាត្រូវមានស្មារតីប្រុងប្រយ័ត្នខ្ពស់ជានិច្ចក្នុងការថែរក្សាសុខភាពអនាមម័យផ្ទាល់ខ្លួនទប់ស្កាត់ការឆ្លងរាលដាលជំងឺរលាកផ្លូវដង្ហើមកូវីដ១៩។ ជំងឺរាតត្បាតនេះងាយឆ្លងសាហាវខ្លាំងណាស់។ អញ្ចឹងហើយបានជាប្រទេសជាច្រើនកំពុងបិទប្រទេសដាក់បម្រាមហាមឃាត់មិនអោយពលរដ្ឋធ្វើដំណើរ។ សូមបងប្អូនឧស្សាហ៍ដុសលាងសម្អាតដៃជាមួយសាប៊ូ ចឹល ឬទឹកអាល់កុល និងពាក់ម៉ាសការពារជំងឺឆ្លងគ្រប់ទីកន្លែង។ ទន្ទឹមនឹងនេះ សូមតាមដានព័ត៌មាននឹងស្តាប់តាមការណែនាំរបស់ក្រសួងសុខាអោយបានជាប់ជាប្រចាំ។

តាមការបញ្ជាក់ពីអង្គការសុខភាពពិភពលោក (WHO) មកដល់ថ្ងៃព្រហស្បតិ៍ ទី០៤ ខែមិថុនា ឆ្នាំ២០២០ នេះ ចំនួនអ្នកឆ្លងជំងឺកូវីដ១៩ (COVID-19) នៅក្នុង ២១៦ប្រទេស គឺបានកើនឡើងជាង៦លាននាក់ (៦,២៨៧,៧៧១ នាក់) ក្នុងនោះអ្នកស្លាប់ក៏បានកើនដល់ ៣៧៩,៩៤១។ មកទល់ពេលនេះពុំទាន់មានថ្នាំព្យាបាលនៅឡើយទេ។ ចំពោះប្រទេសកម្ពុជាយើងវិញទោះបីចំនួនអ្នកឆ្លងតិចមែន តែក៏យើងមិនត្រូវធ្វេសប្រហែសមើលស្រាលជំងឺដ៏កាចសាហាវនេះឡើយ។

សូមជូនពរបងប្អូនជួបតែសេចក្តីសុខ និងចៀសផុតពីជំងឺឆ្លងកូវីដ១៩នៅទូទាំងប្រទេស៕SRP

ខេត្តសៀមរាប៖ សមត្ថកិច្ចបានឲ្យដឹងថាមនុស្សម្នាក់បានស្លាប់និងម្នាក់ទៀតរងរបួសដោយគ្រោះថ្នាក់ចរាចណ៍។

ហេតុការណ៍បានកើតឡើងថ្ងៃទី០៤ ខែឧសភាឆ្នាំ២០២០វេលាម៉ោង ១និង៣០នាទី នៅលើផ្លូវ ជាតិលេខ៦៨ ត្រង់ចន្លោះគីឡូម៉ែត្រលេខ១០លេខ១១ ចំណុចខាងជើងថ្នល់ដាច់ចម្ងាយ២០០ម៉ែត្រ ស្ថិតក្នុងភូមិសាស្ត្រភូមិកំបោរ ឃុំចន្លាស់ដៃ ស្រុកក្រឡាញ់ ខេត្តសៀមរាប។ សមត្ថកិច្ចបានបន្តថាករណីនេះគឺរថយន្តម៉ាកកាម៉ារីពណ៌ស្លែពាក់ស្លាកលេខ ភ្នំពេញ២H.១២៦៧បើកបរដោយឈ្មោះ អូន ធន ភេទប្រុស អាយុ២១ឆ្នាំ(ស្លាប់) ក្នុងទិសដៅពីជើងទៅត្បូង មានអ្នករួមដំណើរជាមួយម្នាក់ឈ្មោះ ណែម ណាក់ អាយុ៤៥ឆ្នាំ(រងរបួសធ្ងន់) អ្នកទាំងពីររស់នៅភូមិភ្នៀត សង្កាត់សំរោង ក្រុងសំរោង ខេត្តឧត្ដរមានជ័យ បានបុកគោយន្តកន្ត្រៃម៉ាកគូបូតាពណ៌ក្រហមពីក្រោយបើកបរដោយឈ្មោះ វុធ យ៉ាន ភេទ ប្រុស អាយុ៣០ឆ្នាំរស់នៅភូមិព្រែកជីក ឃុំព្រែកជីក ស្រុកម៉ោងឬស្សីខេត្តបាត់ដំបង និងអ្នករួមដំណើរជាមួយម្នាក់ឈ្មោះ អួច សម្ផស្ស ភេទស្រីអាយុ៣៣ឆ្នាំរស់នៅ ភូមិឃុំជាមួយគ្នាបើកបរក្នុងទិសដៅស្របទិសគ្នាពីជើងទៅត្បូង។
សមត្ថកិច្ចបានបញ្ជាក់ថារថយន្តកាមរីបានរេចង្កូតទៅខាងឆ្វេងដៃទៅបុកនឹងរថយន្តធំB២ពណ៌ខៀវ ពាក់ស្លាកលេខ ត្បូងឃ្មុំ ៣A៣១៣២ ដែលបើកបរដោយឈ្មោះ អ៊ាត សុធី ភេទប្រុស អាយុ៥៤ ឆ្នាំ(រត់គេចខ្លួន)រស់នៅ ភូមិស្រែស្ពៃ ឃុំអូររាំងឪស្រុកត្បូងឃ្មុំ ខេត្តត្បូងឃ្មុំ ដែលបើកបរច្រាស់ទិសគ្នាពីត្បូងទៅជើង ដែលមានរួមដំណើរនៅក្នុងរថយន្តចំនួន០៦នាក់។

១/.ឈ្មោះចាន ដូង ភេទប្រុសអាយុ២០ឆ្នាំ
២/.ឈ្មោះ យូ យ៉ាង ភេទប្រុអាយុ២០ឆ្នាំ
៣/.ឈ្មោះយ៉ាន យ៉នភេទប្រុស អាយុ២០ឆ្នាំ
៤/.ឈ្មោះ ស្រី ស្រះភេទប្រុស អាយុ២០ឆ្នាំ
៥/.ឈ្មោះ រ៉េន ហាក់ ភេទប្រុសអាយុ៣៤ឆ្នាំ
៦./ធឿន វុធ ភេទប្រុសអាយុ ១៨ឆ្នាំរស់នៅភូមិបល្ល័ង្គ ឃុំបល្ល័ង្គ ស្រុកប្រាសាទបាគង ខេត្តសៀមរាប ជាមួយគ្នា។

បើតាមសមត្ថកិច្ចថាក្នុងហេតុការណ៍នេះបណ្តាលអោយស្លាប់មនុស្សម្នាករបួសម្នាក់ ខូចខាតរថយន្តធ្ងន់២គ្រឿងនិងគោយន្តកន្ត្រៃ១គ្រឿង។
មូលហេតុគ្រោះថ្នាក់បណ្តាលមកពីអ្នកបើកបររថយន្តម៉ាកកាម៉ារី បើកមានល្បឿនលឿន៕SRP

Sponsored

ខេត្តសៀមរាប៖សំណុំរឿងព្រហ្មទណ្ឌ ដែលដើមបណ្តឹងប្តឹងទាមទារសំណង ១២០ម៉ឺនដុល្លារតុលាការសម្រេចប្រកាសសាលក្រមខាងមុខនេះ។
អង្គសវនាការនេះ បានធ្វើឡើងនៅព្រឹកថ្ងៃទី៣ខែមិថុនាឆ្នាំ២០២០ ដែលមានលោកមុយ សុភក្ត្រ័ ចៅក្រមជំនំុជម្រះ លោកស្រេង វុទ្ធា តំណាងអយ្យការនិងលោកទី សុខណាង ជាក្រឡាបញ្ជី ព្រមទាំងវត្តមានគូរភាគី។
ឆ្លងកាត់ការសាកសួររបស់តុលាការ និងផ្តល់សិទ្ធិដល់មេធាវីទាំងសងខាង ក្នុងការចោទប្រកាន់ដាក់ បន្ទុក និងឆ្លើយដោះបន្ទុក ដែលមានរយ:ពេលពេញមួយព្រឹករួចមក តុលាការបានសម្រេចប្រកាសសាល ក្រមនៅថ្ងៃទី១៧ខែមិថុនាឆ្នាំ២០២០ខាងមុខនេះ។
ដើមបណ្តឹង នៃសំណុំរឿងព្រហ្មទណ្ឌលេខ១១៦ ចុះថ្ងៃទី៧ខែកុម្ភ:ឆ្នាំ២០១៩មានឈ្មោះស៊ីម ឈីវឈានពិសិដ្ឋ អតីត អនុប្រធានមន្ទីរបរិស្ថានខេត្តសៀមរាប។ ចំណែកចុងបណ្តឹងមានឈ្មោះគង់ មង្គល ប្រធានសហគមន៍បឹងពារាំង រួមនិងមន្ត្រីសហគមន៍០៤នាក់ទៀត។
លោកស៊ីម ឈីវឈានពិសិដ្ឋ ដើមបណ្តឹង បានថ្លែងតាមទូរស័ព្ទនារសៀលថ្ងៃទី៣ខែមិថុនានេះថា អង្គសវនាការបានចប់ហើយ។ តុលាការនឹងប្រកាសសាល ក្រមនៅថ្ងៃទី១៧ខែមិថុនាឆ្នាំ២០២០ខាងមុខនេះ។
លោកបន្តថា ក្នុងបណ្តឹង រូបលោកបានប្តឹងពីបទ (ឃាតកម្មដោយគុំនុំ គិតទុកជាមុន)។ ប៉ុន្តែ តុលាការបានចោទប្រកាន់ពីបទ(ហិង្សាដោយចេតនាមានស្ថានទម្ងន់ទោស) តាមមាត្រា២១៨នៃក្រមព្រហ្មទណ្ឌ។ មាត្រា២១៨នៃក្រមព្រហ្មទណ្ឌនេះ ត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ តែតុលាការបែជាមិនចាប់ក្រុមជនដៃដល់ផ្តន្ទាទោសនោះទេ។ ផ្ទុយទៅវិញ បែជាផ្តល់សិទ្ធិក្នុងការឆ្លើយដោះបន្ទុកថែមទៀត។ លោក ពិ សិដ្ឋ បានបន្ថែមថា មិនចំពោះថាយ៉ាងណានោះទេ នៅថ្ងៃទី១៧ខែមិថុនាខាងមុខនេះ ប្រសិនបើសាល ក្រមចូលជាស្ថាពរ ដែលបានប្រកាសនោះ វាសាកសមអោយរូបលោកទទួលយកបាន លោកនឹងទទួលយក តែបើមិនអាចទទួលយកបាន(អយុត្តិធម៌)លោកនិងបន្តប្តឹងទៅសាលាឧទ្ធណ៍បន្តទៀត។
ដើមបណ្តឹងរូបនេះបញ្ជាក់ថា នៅតុលាការខេត្តសៀមរាបគឺប្តឹងទាមទារសំណង ១.២០០.០០០ដុល្លារតែបើបន្តប្តឹងទៅឧទ្ធណ៍ទៀត ត្រូវគិតរយ:ពេល។ក្នុង ១ខែទាមទារ២០.០០០ដុល្លារបន្ថែម គិតចាប់ពីថ្ងៃប្តឹង ចឹងទេបើមានរយ:ពេល១ឆ្នាំទើបចប់២០.០០០ដុល្លារគុណ១២ខែ។ ត្បិតពួកគេ(ក្រុមលោក គង់ មង្គល ) ព្រួតគ្នាវ៉ៃមកលើរូបលោកយ៉ាងព្រៃផ្សៃ កាលពីម៉ោង ជាង ៧យប់ ថ្ងៃទី២៦ខែមករាឆ្នាំ២០១៩ កន្លងទៅ ក្នុងខណ:ដែលរូបលោកចុះទៅថតរូបភាពបទល្មើសនៅតំបន់បឹងពារាំង។
ដោយឡែកលោកគង់ មង្គល ប្រធានសហគមន៍បឹងពារាំង ក៏បានផ្តល់បទសម្ភាសន៍តាមទូរសព្ទ័ នៅព្រលប់ថ្ងៃនេះផងដែរថា អង្គសវនាការបានចប់ហើយ នៅថ្ងៃទី១៧ខែមិថុនាខាងមុខនេះ តុលាការនឹងប្រកាសសាលក្រម។ លោកបន្តថា ក្នុងអង្គសវនាការ មេធាវីខាងដើមបណ្តឹង សំណូមពរអោយតុលាការផ្តន្ទាទោសរូបលោកនិងមន្រីសហគមន៍០៤រូបទៀត។តែក៏ត្រូវបានមេធាវីរបស់លោក ស្នើសុំដល់តុលាការ អោយទម្លាក់ការចោទប្រកាន់នេះផងដែរ។ ការស្នើសុំនេះដោយសាដើមចម ដែលបណ្តាលអោយមានហិង្សាគឺ កាលពីអំឡុងចុងខែមករា ឆ្នាំ២០១៩ វេលាម៉ោងជាង៧យប់ លោកពិសិដ្ឋដែលជាដើមបណ្តឹង បានចូលទៅកាន់បឹងពារាំង ជាតំបន់ដែលការពារត្រីមេពូជ សត្វស្លាបនិងសត្វល្មូន ដោយសហគមន៍ ដោយមិនមានការសុំសហការ។ គ្រានោះលោកពិសិដ្ឋ បានថត ឆ្នាំងបាយ និងកន្លែងដេករបស់មន្ត្រីសហគមន៍។ ក្រៅពីនោះក៏បានប្រកាស ប្រាប់មន្ត្រីសហគមន៍ថា រូបគេមកនេះគឺ បានការអនុញាតិពីអាជ្ញាធរក្រុង និងខេត្ត ដើម្បីមកប្រកាសរំលាយសហគមន៍ បឹងពារាំងចោល។ បន្ទាប់ពីឮពាក្យដូច្នេះ មន្ត្រីសហគមន៍ សួររកឯកសារដែលត្រូវរំលាយសហគមន៍ ហើយក៏មានការប្រកែករហូតផ្ទុះជាហិង្សាវាយតប់គ្នាតែម្តង។ចឹងទេការប្តឹងទារសំណងជាសិទ្ធិរបស់បុគ្គល តែរូបលោកជឿជាក់ទៅលើការស៊ើប អង្កេត និងការសម្រេចរបស់តុលាការ។
សូមបញ្ជាក់ថា ក្រោយបញ្ចប់សវនាការ នាថ្ងៃទី០៣ខែមិថុនា លោកស៊ីម ឈីវឈានពិសិដ្ឋ ដែលជាដើមបណ្តឹង បានធ្វើការឡាយវីដេអូ នៅមុខតុលាការ ជេរប្រមាថ និងដាក់បណ្តាសារ ទៅលោកគង់ មង្គល យ៉ាងចាស់ដៃ។ប៉ុន្តែ គេមិនទាន់ឃើញការប្រតិកម្ម ឆ្លើយតប ដោយជេរប្រមាថ ពីគូរភាគីវិញនោះឡើយ។ ចឹងទេយ៉ាងណានោះ មហាជនដែលកំពុងតាមដានរឿងដ៏ក្តៅគគុកមួយនេះ ទន្ទឹងរងចាំមើលថា តើភាគីមួយណា មានវាសនាល្អជាង៕SRP