ខេត្តកំពង់ធំ៖ស្ត្រីម្នាក់ត្រូវបានរថយន្តមួយគ្រឿងបុកចំពេញទំហឹងបណ្ដាលឲ្យស្លាប់ភ្លាមៗនៅកន្លែងកើតហេតុ។ គ្រោះថ្នាក់ចរាចណ៍នេះបានកើតឡើងនៅល្ងាចថ្ងៃទី២៦ខែសីហាឆ្នាំ២០២០នៅលើផ្លូវជាតិលេខ៦ចន្លោះគីឡូម៉ែត្រ២៣៤,២៣៥ស្ថិតក្នុងភូមិកំពង់វាំង ឃុំប្រឡាយ ស្រុកស្ទោង ខេត្តកំពង់ធំ។ រវាងថ្មើជើងនឹងរថយន្តម៉ាកហ្វត។

អធិការនគរបាលស្រុកស្ទោងលោកវរសេនីយ៍ឯកយ៉ង សំ បានប្រាប់បណ្ដាញសៀមរាបប៉ុស្ដិ៍ថារថយន្តម៉ាកហ្វត ពណ៌ទឹកក្រូច ពាក់ស្លាកលេខព្រះវិហារ២B៩៩៩៩ អ្នកបើកបរបានចុះគេចខ្លួនបាត់ក្រោយកើតហេតុដោយ មិនទាន់ស្គាល់អត្តសញ្ណាណនោះឡើយ។ ចំណែកស្ត្រីរងគ្រោះឈ្មោះវិន សុខាន អាយុ៥១ឆ្នាំ នៅភូមិកំពង់វាំង ឃុំប្រឡាយ ស្រុកស្ទោង ខេត្តកំពង់ធំ។ បើតាមអធិការបញ្ជាក់ថាមូលហេតុបឋម ស្ត្រីរងគ្រោះដើរឆ្លងកាត់ផ្លូវខ្វះការប្រុងប្រយ័ត្ន។ ដោយឡែករថយន្តមានល្បឿនលឿនបុកពេញទំហឹងតែម្តង។ក្រោយបានចុះពិនិត្យសាកសពរួចបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។វត្ថុតាងរថយន្តយកមករក្សាទុកនៅអធិការដ្ឋាននគរបាលស្រុកស្ទោងដើម្បីរងចាំការដោះស្រាយ៕SRP

ខេត្តត្បូងឃ្មុំ៖លោកជាមច័ន្ទសោភ័ណអភិបាលខេត្តត្បូងឃ្មុំ បានប្រាប់ទៅអាជ្ញាធរសមត្ថកិច្ចថាត្រូវកំណត់អត្តសញ្ញាណឲ្យបានជាក់លាក់នូវអ្នកតវ៉ាដោយខុសច្បាប់ អ្នកញុះញង់ និងមេខ្លោងដែលនៅពីក្រោយរឿងនេះ ដើម្បីឈានទៅវែកមុខយកមកចាត់ការទៅតាមនីតិវិធីច្បាប់ បញ្ចប់បញ្ហាឲ្យបានឆាប់ ព្រោះថានៅទីនេះជាចំណុចដ៏ក្តៅគគុក ដោយកន្លងមកអ្នកនយោបាយមួយចំនួនតូចបានយកទីតាំងនេះ ដើម្បីកេងចំណេញនយោបាយ។ អភិបាលបញ្ជាក់ថាក្នុងនាមអាជ្ញាធរមានសមត្ថកិច្ចទាំងអស់ មិនត្រូវប្រងើយកន្តើយនោះឡើយ ឲ្យតែមានការញុះញង់បំផុសបំផុល ប្រជាពលរដ្ឋ ឃើញបទល្មើសជាក់ស្តែង ត្រូវតែចាប់ឃាត់ខ្លួនតែម្តង។

ការដាក់បទបញ្ជានេះធ្វើឡើងនៅថ្ងៃទី២៦ខែសីហា ឆ្នាំ២០២០នេះ ក្នុងពេលដឹកនាំមន្ត្រីពាក់ព័ន្ធប្រជុំនៅសាលប្រជុំសាខាគយនិងរដ្ឋាករប្រចាំច្រកទ្វារព្រំដែនអន្តរជាតិត្រពាំងផ្លុង លើបញ្ហាដីធ្លីតាមបន្ទាត់ព្រំដែនកម្ពុជា-វៀតណាម។

លោកជាម ច័ន្ទសោភ័ណ បានលើកឡើងថាកិច្ចប្រជុំនេះដើម្បីផ្សព្វផ្សាយនិងពង្រឹងការថែរក្សាសន្តិសុខ សណ្ដាប់ធ្នាប់សាធារណៈ ជូនប្រជាពលរដ្ឋ ពិសេសពិនិត្យ ពិភាក្សារៀបចំដាក់ផែនការ សុំអនុសាសន៍ និងប្រតិបត្តិការទប់ស្កាត់ការទន្ទ្រានចូលកាន់កាប់ដោយខុសច្បាប់លើដីសំណល់ពីការបោះបង្គោលព្រំដែនរវាងកម្ពុជា-វៀតណាម ក្នុងភូមិសាស្ត្រស្រុកពញាក្រែក និងស្រុកមេមត់ ដែលភាគីទាំងពីរមិនទាន់ធ្វើពិធីប្រគល់ទទួលនៅឡើយ។

អភិបាលខេត្តត្បូងឃ្មុំបញ្ជាក់ថាកងកម្លាំងទាំង៣អាជ្ញាធរស្រុកនិងអ្នកពាក់ព័ន្ធទាំងអស់ ត្រូវតែថែរក្សាឲ្យខានតែបាននូវការចូលកាន់កាប់ដីដោយខុសច្បាប់ ពីសំណាក់ជនខិលខូច ក៏ដូចជាប្រទេសជិតខាង សូម្បីតែ១មីលីម៉ែត្រក៏ដោយ ត្រូវតែធ្វើឲ្យខានតែបាន ដោយម៉ឺងម៉ាត់ និងម៉ត់ចត់បំផុត។

លោកជាម ច័ន្ទសោភ័ណ ក៏បានចាត់ឲ្យរដ្ឋបាលស្រុកនិងកងកម្លាំងវរៈការពារព្រេំដែន ត្រូវបន្តធ្វើវេទិការសាធារណៈផ្សព្វផ្សាយ ដល់ប្រជាពលរដ្ឋ ឲ្យយល់ច្បាស់ជ្រួតជ្រាបជុំវិញបញ្ហាដីធ្លីនេះ។ដោយឡែកបើប្រជាពលរដ្ឋ ដែលខ្វះដីនិងមិនមានដីពិតប្រាកដនោះ ត្រូវស្នើសុំមករដ្ឋបាលខេត្ត ដើម្បីរៀបចំឲ្យបងប្អូននូវដីសម្បទានសង្គមកិច្ច តាមគោលនយោបាយរបស់រាជរដ្ឋាភិបាលកម្ពុជា៕SRP

ខេត្តបាត់ដំបង៖ក្រុមការងារអធិការកិច្ចមន្ទីរទេសចរណ៍ខេត្ត សហការជាមួយនគរបាលក្រុងបាត់ដំបងនៅយប់ថ្ងៃទី២៤និង២៥ ខែសីហា ឆ្នាំ២០២០ បានចុះពិនិត្យទីតាំងភោជនីយដ្ឋានចំនួនពីរកន្លែងទី១ស្ថិតនៅក្នុងសង្កាត់ព្រែកព្រះស្តេចយីហោ(ldol)ទី២ឡឺវេល (អតីតក្លិបឡឺវែល) ស្ថិតក្នុងភូមិរំចេក៤សង្កាត់រតនៈ ក្រុងបាត់ដំបង។

ជុំវិញការចុះពិនិត្យទីតាំងភោជនីយដ្ឋានខាងលើ លោក អ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបានឲ្យដឹងថាទីតាំងអាជីវកម្មទាំងនេះ មិនមានការប្រមូលផ្តុំ ចាក់ភ្លេងរាំ ឬបើកភ្លើងញាក់ឡើយ។ តាមការត្រួតពិនិត្យជាក់ស្តែង ឃើញថាបុគ្គលិកពាក់ម៉ាស់ មានអ្នកចាំបាញ់អាល់កុល វាស់កម្តៅ គម្លាតសុវត្ថិភាព និងបិតស្លាកផ្សព្វផ្សាយពីកូវីដ១៩ និងបានបានកត់ត្រាឈ្មោះ និងវាស់កម្តៅ បុគ្គលិករាល់ម៉ោងចេញចូលផងដែរ។

លោកប្រធានមន្ទីរបន្តថា ក្រុមការងារក៏បានណែនាំអោយគាត់បិតគំនូសផ្លូវចេញចូល និងគំនូសគម្លាតសុវត្ថិភាពនៅកន្លែងរង់ចាំបន្ថែម ព្រមទាំងកាត់បន្ថយម៉ាស៊ីនត្រជាក់ក្នុងទីតាំងភោជនីយដ្ឋានទៀតផង។

បើតាមប្រធានមន្ទីរទេសចរណ៍ បានសង្កត់ធ្ងន់ថារាជរដ្ឋាភិបាល មិនទាន់អនុញ្ញាតអោយបើកដំណើរការខារ៉ាអូខេ ឬក្លិបកម្សាន្តនៅឡើយទេ។ ក្នុងករណីដែលអាជីវកម្មណាមួយបំពានខុសពីកិច្ចសន្យា ដែលបានធ្វើជាមួយមន្ទីរទេសចរណ៍ ត្រូវអនុវត្តតាមច្បាប់ជាធរមាន។ ជាមួយគ្នានេះដែរមន្ទីរទេសចរណ៍នឹងបន្តសហការជាមួយអាជ្ញាធរ និងសមត្ថកិច្ចពាក់ព័ន្ធដើម្បីចុះតាមដាន ពិនិត្យពីការអនុវត្តវិធានសុវត្ថិភាពតាមមណ្ឌលកម្សាន្តទេសចរណ៍នានាក្នុងខេត្តបាត់ដំបងបន្តទៀត។ ទោះយ៉ាងណាប្រធានមន្ទីរក៏បានស្នើសុំអោយប្រជាពលរដ្ឋ និងភ្ញៀវទេសចរសូមចូលរួមអនុវត្តអោយបានខ្ជាប់ខ្ជួនតាមការណែនាំរបស់រាជរដ្ឋាភិបាល និងក្រសួងទេសចរណ៍ ដើម្បីទប់ស្កាត់ការរីករាលដាលជំងឺកូវីដ១៩ទាំងអស់គ្នា៕SRP ដោយប៊ុនថេត

ខេត្តបាត់ដំបង៖បុរសម្នាក់ គេសង្ស័យបែកថ្នាំ បានដុតផ្ទះខ្លួនឯងផ្អើលអ្នកភូមិទាំងយប់។
ហេតុការណ៍បានកើតឡើងនៅវេលាម៉ោង២២និងង០០នាទីយប់ថ្ងៃទី២៥ខែសីហាឆ្នាំ២០២០ស្ថិត នៅត្រង់ចំណុចក្រុមទី០៨ ភូមិព្រៃកូនសេក សង្កាត់អូរចារ ក្រុងបាត់ដំបង។
សមត្ថកិច្ចមូលដ្ឋានបានឲ្យដឹងថា ករណីអគ្គិភ័យនេះ បង្កដោយបុរសម្នាក់ សង្ស័យបែកថ្នាំញៀនមានឈ្មោះ ធា ចានទ្រី អាយុ២៣ឆ្នាំ មុខរបរ មិនពិតប្រាកដ មានទីលំនៅភូមិ/សង្កាត់កើតហេតុខាងលើ។
មន្ត្រីមូលដ្ឋានបន្តថាផ្ទះដែលរងការឆាបឆេះទំហំ៤គុណ៧ ម៉ែត្រ ធ្វើអំពីឈើប្រក់ស័ង្កសី។ ម្ចាស់ផ្ទះឈ្មោះរស់ ចិន្តា អាយុ៥៥ឆ្នាំ ត្រូវជាម្ដាយជនសង្ស័យ។បច្ចុប្បន្ននគរបាលក្រុងបាត់ដំបងកំពុងធ្វើកំណត់ហេតុ។ ចំណែកជនសង្ស័យដែលបានដុតផ្ទះ បានរត់គេចខ្លួនបាត់បន្ទាប់ពីធ្វើសកម្មភាពរួច៕SRPដោយប៊ុនថេត

ខេត្តព្រៃវែង៖ជនជាតិចិនចំនួនពីរនាក់ត្រូវបាននគរបាលស្រុកស្វាយអន្ទរ ចាប់ខ្លួន
ករណីគាស់ទ្វារឡានដឹកស្រូវយកលុយ។ហេតុការណ៍នេះបានកើតឡើងនៅថ្ងៃទី២៥ ខែសីហា ឆ្នាំ២០២០ វេលាម៉ោង១២នឹង៧នាទីនៅចំណុចរង្វង់មូលស្វាយអន្ទរ ស្រុកស្វាយអន្ទរ ខេត្តព្រៃវែង។លោក អ៊ុង ផាន អធិការស្រុកស្វាយអន្ទរបានឲ្យដឹងថាករណីនេះពលរដ្ឋ បានរាយការណ៍ថាបានឃើញក្រុមចោរមានគ្នា៤នាក់កំពុងតែធ្វើសកម្មភាពគាស់ទ្វារឡានដឹកស្រូវនៅចំណុចខាងលើ លោកបានដឹកនាំកម្លាំងដេញស្ទាក់ជនសង្ស័យដែលជិះម៉ូតូមួយគ្រឿងម៉ាកឌ្រីមសង់សេ១២៥ ពណ៌ខ្មៅពាក់ស្លាកលេខ ភ្នំពេញ: CI 9767 ជិះចូលផ្សារឈូកមាស រហូតដល់ប៉ុស្តិ៍នគរបាលព្រៃខ្លា ក៏បានបត់ក្រោយ មកបុកចំពីមុខរថយន្ត របស់លោក ក៏ចាប់បានចំនួន២នាក់ ដោយម្នាក់រងរបួសបាក់ភ្លៅ។

លោក អ៊ុង ផាន អធិការស្រុកស្វាយអន្ទរបានបញ្ជាក់ទៀតថាជនសង្ស័យទាំងពីនាក់ ជាជនជាតិចិន
ទី១,មានឈ្មោះ ជិញ ឈាវ ភេទប្រុស អាយុ៣២ ឆ្នាំ មានទីកំណើតនៅភូមិ កានថាង ឃុំធីងធ័ន ស្រុកលាវជាំង ខេត្តគង់ស៊ី ទី២,ឈ្មោះ ធាន ឈួយ ភេទប្រុស អាយុ៣៥ឆ្នាំ មានទីកំណើតនៅភូមិផានសឿ ឃុំជីងធ័ន ស្រុកលាវជាំង ខេត្តគង់ស៊ី រងរបួសបាក់ភ្លៅត្រូវបានដឹកយកទៅសង្គ្រោះនៅមន្ទីពេទ្យបង្អែកខេត្តព្រៃវែង។បច្ចុប្បន្នសមត្ថកិច្ចធ្វើការសាកសួរកសាងសុំណុំរឿងចាត់ការតាមនិតិវិធី។ ចំណែកបក្ខពួកនឹងស្រាវជ្រាវដើម្បីចាប់ខ្លួនបន្ត៕SRPដោយសូ សុខា

ខេត្តកំពង់ធំ៖យ៉ាងហោចណាស់មានមនុស្ស បីនាក់បានរងរបួសធ្ងន់ក្នុងហេតុការណ៍គ្រោះថ្នាក់ចរាចរណ៍។
ហេតុការណ៍នេះបានកើតឡើងនៅវេលាម៉ោង១២និង១០នាទីរសៀល ថ្ងៃទី២៥ខែសីហាឆ្នាំ២០២០ តាមបណ្តោយផ្លូវជាតិលេខ៦ ចន្លោះគីឡូម៉ែត្រលេខ(៩៥-៩៦) ត្រង់ចំណុចភូមិសូយោង ឃុំសូយោង ស្រុកតាំងគោក។
សមត្ថកិច្ចបានដឹងថាគ្រោះថ្នាក់នេះគឺរថយន្តហ៊ីយិនដាយដឹកស៊ីម៉ង់មួយគ្រឿង បានឡើងជែងរថយន្តមួយគ្រឿងទៀត តែមិនផុត ក៏ជ្រុលទៅបុករថយន្តស្តារ៉ិច ពេញទំហ៊ឹងតែម្ដង។
សមត្ថកិច្ចបន្តថាករណីនេះរវាង រថយន្តបុករថយន្ត ក្នុងដំណើរទិសដៅផ្ទុយគ្នា បណ្តាលឲ្យរបួសមនុស្សចំនួនបីនាក់(ធ្ងន់) និងខូចខាតរថយន្តពីរគ្រឿងផងដែរ។
សមត្ថកិច្ចបញ្ជាក់ថារថយន្តបង្កហេតុម៉ាកហ៊ីយ៉ាន់ដាយ ពណ៌ស ពាក់ស្លាកលេខកំពង់ចាម3A-7354 បើកបរដោយឈ្មោះ ជៀន ចេក ភេទប្រុស អាយុ៣៧ឆ្នាំ រស់នៅភូមិស្វាយពក ឃុំបាធាយ ស្រុកបាធាយ ខេត្តកំពង់ចាម រត់គេចខ្លួនបាត់ បានបើកទៅបុករថយន្តម៉ាកស្តារ៉ិច ពណ៌ស ពាក់ស្លាកលេខសៀមរាប2B-6706 បើកបរដោយឈ្មោះ ម៉េត សុខេង ភេទប្រុស អាយុ៤៥ឆ្នាំ រស់នៅភូមិជុបរំដេង ឃុំកន្ទួត ស្រុកស្វាយលើ ខេត្តសៀមរាប(ធ្ងន់)។
-អ្នករួមដំណើរឈ្មោះ ឆាន់ ស្រីម៉ៅ ភេទស្រី អាយុ៤១ឆ្នាំ រស់នៅភូមិ-ឃុំ ជាមួយគ្នា(ធ្ងន់)។
-អ្នករួមដំណើរឈ្មោះ ម៉ុក អាត ភេទប្រុស អាយុ២៨ឆ្នាំ រស់នៅភូមិដូនលៃ ឃុំគរ ស្រុកព្រៃឈរ ខេត្តកំពង់ចាម(ធ្ងន់)។ជនរងគ្រោះបញ្ជូនទៅមន្ទីរពេទ្យបង្អែកបារាយណ៍-សន្ទុក។
ចំណែកវត្ថុតាងរក្សាទុកនៅអធិការដ្ឋាននគរបាលស្រុកតាំងគោក។បើតាមអាជ្ញាធថាមូលហេតុបង្កមកពីរថយន្តម៉ាកហ៊ីយ៉ាន់ឡើងជែងក្នុងស្ថានភាពគ្រោះថ្នាក់៕SRP

ភ្នំពេញ៖ទាក់ទងទៅនឹងបញ្ហាព្រំដែន ប្រមុខដឹកនាំកម្ពុជា សម្តេចតេជោ ហ៊ុន សែន បានអោយ លោក វ៉ា គឹមហុង ប្រធានគណៈកម្មាធិការចម្រុះ កិច្ចការព្រំដែន កម្ពុជា ចុះទៅជួបប្រជាពលរដ្ឋ ដែលអះអាងថា បាត់ដីនៅខេត្តត្បូងឃ្មុំ ក្រោយការបោះបង្គោលព្រំដែន។ ជាមួយគ្នានេះដែរ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានណែនាំទៅកាន់ លោកឧបនាយករដ្ឋមន្រ្តី ប៊ិន ឈិន រដ្ឋមន្រ្តីទីស្ដីការគណៈរដ្ឋមន្រ្តី អោយបើកសិក្ខាសាលាមួយដើម្បីឲ្យប្រជាពលរដ្ឋ សិស្ស និស្សិតចូលស្តាប់ និងសួរអំពីរឿងព្រំដែន ផងដែរ។

សម្តេចតេជោ ហ៊ុន សែន បានថ្លែងយ៉ាងដូច្នោះនៅព្រឹកថ្ងៃអង្គារ ទី២៥ ខែសីហា ឆ្នាំ២០២០នេះ ក្នុងពេលអញ្ជើញជាអធិបតីភាពប្រជុំបូកសរុបការងារឆមាសទី៤ របស់ឧត្តមក្រុមប្រឹក្សាពិគ្រោះ និងផ្តល់យោបល់។

សូមបញ្ជាក់ថា ឧត្តមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងតាមព្រះរាជក្រឹត្យចុះថ្ងៃទី៦ ខែកញ្ញា ឆ្នាំ២០១៨ ដោយមានការស្នើសុំរបស់សម្តេចតេជោ ហ៊ុន សែន ក្រោយពេលបោះឆ្នោតជាតិអាណត្តិទី៦។ ឧត្តមក្រុមប្រឹក្សាពិគ្រោះ និងផ្តល់យោបល់ មានសមាសភាពមកពីគណបក្សយោបាយចំនួន១៦ ក្នុងចំណោមគណបក្សនយោបាយចំនួន២០ ដែលបានចូលរួមការបោះឆ្នោតជាតិឆ្នាំ២០១៨។ ឧត្តមក្រុមប្រឹក្សាពិគ្រោះ និងផ្តល់យោបល់ មានតួនាទីផ្តល់យោបល់ជូនរាជរដ្ឋាភិបាលក្រៅក្របខណ្ឌសភា ក្នុងគោលដៅលើកស្ទួយប្រសិទ្ធភាពការងារ ដើម្បីជាប្រយោជន៍ដល់ការបម្រើសេវាប្រជាពលរដ្ឋ និងការអភិវឌ្ឍសង្គមប្រកបដោយសក្តានុពល៕SRP