ខេត្តសៀមរាប៖បុរសលួចរថយន្តនៅស្រុកព្រះនេត្រព្រះ ខេត្តបន្ទាយមានជ័យ ហើយគេចខ្លួនមកជាប់អន្ទាក់ របស់ចរាចរណ៍ នៅរង្វង់មូលព្រះរាជដំណាក់។

មន្ត្រីជំនាញបានប្រាប់សៀមរាប ប៉ុស្ដិ៍ នៅព្រឹកថ្ងៃចន្ទនេះថា ការឃាត់ខ្លួននៅព្រឹកថ្ងៃទី៣ ខែធ្នូ ឆ្នាំ២០២២ ចំណុចរង្វង់មូលព្រះរាជដំណាក់ ខេត្តសៀមរាប។

ជនសង្ស័យឈ្មោះ ឌុក វាសនា អាយុ៣៣ឆ្នាំ នៅភូមិខ្វាវលិច ឃុំស្វាយចេក ស្រុកស្វាយចេក ខេត្តបន្ទាយមានជ័យ។ ចំណែករថយន្តដែលលួច ម៉ាកហ៊ីយាន់ដាយ ពណ៌ស ពាក់ស្លាកលេខ ភ្នំពេញ 3A-4414 ប្រភេទ ដឹកទំនិញធុនធំ នៅលើរថយន្តនោះមានដឹក កន្ទក់ចំនួន ១០តោន ដែលមានម្ចាស់រថយន្តឈ្មោះ អ៊ូច សំបូរ ភេទប្រុស អាយុ៣១ឆ្នាំ រស់នៅភូមិរំដួល ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ។

ម្ចាស់រថយន្តបានប្រាប់មន្ត្រីជំនាញថា មុនពេលកើតហេតុ វេលាម៉ោង១១ យប់ ថ្ងៃទី០២ ខែធ្នូ លោកបានយករថយន្ត ទៅចតទុកនៅចំណុចមុខ ហាងបាយម្ដាយនៅភូមិរំដួល ប៉ែកខាងលិចភូមិ គ្មានរបង នៅជាប់ផ្លូវជាតិ លេខ៦ រួចទៅដេក ដោយមិនបានដកសោ កុងតាក់ នោះទេ លុះព្រឹកថ្ងៃទី០៣ ខែធ្នូ ក្រោកមកមើលស្រាប់តែបាត់រថយន្ត រួចក៏ប្តឹងនគរបាលប៉ុស្តិ៍ជួយអន្តរាគមន៍តែម្ដង។

សូមបញ្ជាក់ថាករណីនេះ ត្រូវបាននគរបាលខេត្តសៀមរាប ប្រគល់ឲ្យនគរបាលខេត្តបន្ទាយមានជ័យ ចាត់ការតាមនីតិវិធី៕SRP

ខេត្តត្បូងឃ្មុំ៖រូបសេះ និងរូបសំណាក់ហ្លួងព្រះស្ដេចកន ធ្វើពីស្ព័ន សាងសង់បាន ៩០ភាគរយហើយ។ នៅថ្ងៃអាទិត្យ នេះ​ លោម ជាម ច័ន្ទសោភ័ណ អភិបាលខេត្តត្បូងឃ្មុំ និងលោកជំទាវ ម៉េង វ៉ាន់ដានីន និងលោក ស៊ាក ឡេង ប្រធានក្រុមប្រឹក្សាខេត្ត និងលោកជំទាវ រួមទាំងថ្នាក់ដឹកនាំ មន្ត្រីរាជការជុំវិញខេត្ត បានប្រារព្ធពីធីក្រុងពាលីលើករូបសេះ និងរូបសំណាក់ហ្លួងព្រះស្ដេចកន ធ្វើពីស្ព័ន តាមបែបប្រពៃណីសាសនា នៅរង្វង់មូលហ្លួងព្រះស្តេចកន ចំណុចផ្លូវចូលតំបន់រដ្ឋបាលខេត្ត លើកំណាត់ផ្លូវជាតិលេខ៧ ត្រង់គីឡូម៉ែត្រ១៥៧+២១០ ស្ថិតនៅភូមិនិគមលើ ឃុំស្រឡប់ ស្រុកត្បូងឃ្មុំ ទីរួមខេត្តត្បូងឃ្មុំ។

គូសបញ្ជាក់ថា ៖ រូបសំណាក់ហ្លួងព្រះស្ដេចកន កម្ពស់ពីដីដល់ចុងកំពូល១៣,៣៥ម៉ែត្រ កម្ពស់សេះ និង រូប១១ម៉ែត្រ ធ្វើពីស្ព័ន គ្រឹះបេតុង និងរង្វង់មូលមានអង្កត់ផ្ចិត៣៦ម៉ែត្រ និងមានផ្ទៃក្រឡា១,០១៧ ម៉ែត្រការ៉េ ដោយចាប់ផ្តើមដំណើរការសាងសង់ នៅថ្ងៃ០៥ ខែវិច្ឆិកា ឆ្នាំ២០២១ និងគ្រោងបញ្ចប់ការសាងសង់ នាពេលឆាប់ៗខាងមុខនេះ។ ក្នុងនោះ រង្វង់មូលនេះ ធ្វើឡើងក្នុងគោលបំណង ដើម្បី លើកកម្ពស់សោភ័ណភាព របៀបរៀបរយសណ្ដាប់ធ្នាប់សាធារណៈ បញ្ចៀសគ្រោះថ្នាក់ចរាចរណ៍ ធានាសុវត្ថិភាពក្នុងការធ្វើដំណើរឆ្លងកាត់ចេញ-ចូលតំបន់រដ្ឋបាលខេត្ត និងសម្រួលដល់ការធ្វើដំណើរ និងដឹកបញ្ជូន។

រង្វង់មូលដ៍ល្អមួយនេះ បានលេចចេញជារូបរៀងឡើង ពិតជាឆ្លុះបញ្ចាំងបង្ហាញយ៉ាងច្បាស់ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលធ្វើឱ្យប្រទេសជាតិ មាន សុខសន្តិភាព ស្ថិរភាព នយោបាយ និងការអភិវឌ្ឍសេដ្ឋកិច្ច សង្គមមានវឌ្ឍនភាពលើគ្រប់វិស័យគួរជាទីមោទន។

ជាពិសេសក្រោមការផ្តួចផ្តើមពីសំណាក់លោក ជាម ច័ន្ទសោភ័ណ បានដឹកនាំរដ្ឋបាលខេត្តត្បូងឃ្មុំ និងថ្នាក់ដឹកនាំ មន្ត្រីរាជការគ្រប់លំដាប់ថ្នាក់ បានធ្វើឲ្យសន្ទុះនៃការអភិវឌ្ឍន៍គ្រប់មូលដ្ឋាន នៅក្នុងខេត្ត បាននឹងកំពុងអភិវឌ្ឍន៍កាន់តែប្រសើរឡើង ខណៈដែរការបម្រើសេវាសាធារណៈ ជូន ប្រជាពលរដ្ឋប្រកបដោយគុណភាព តម្លាភាព និងប្រសិទ្ធភាព។

សូមជម្រាបផងដែរថា រង្វង់មូល(ហ្លួងព្រះស្ដេចកន)នេះ គឺជាសមិទ្ធផលមួយថ្មី បន្ថែមលើសមិទ្ធផលជាច្រើនទៀត នៅតំបន់រដ្ឋបាលប្រមូលផ្តុំទីរួមខេត្តត្បូងឃ្មុំ រួមមាន បុរីរដ្ឋបាលសាលាខេត្ត មន្ទីរអង្គភាពជុំវិញខេត្ត មន្ទីរពេទ្យ សាលារៀន សួនច្បារសាធារណៈ ទន្លេសិប្បនិម្មិតហេដ្ឋារចនាសម្ព័ន្ធរូបវន្ត ប្រព័ន្ធគមនាគមន៍ ប្រព័ន្ធធារាសាស្ត្រ បណ្តាញអគ្គិសនី បណ្តាញទឹកស្អាត បង្គោលភ្លើងបំភ្លឺសាធារណៈ ដាំកូនឈើ ដាំផ្កាលម្អសោភ័ណភាព .ល. ដែលត្រូវបានស្ថាបនារួច ក៏ដូចជាកំពុងស្ថាបនាសាងសង់ និងរៀបចំជាបន្តបន្ទាប់​៕SRP

ខេត្តត្បូងឃ្មុំ៖នៅចំពោះមុខយុវជន ក្នុងពិធីប្រកាស សមាសភាព ក្រុមការងារគណបក្សចុះមូលដ្ឋានស្រុកតំបែរ និងស្រុកពញាក្រែក ទទួលបន្ទុកលើការងារយុវជន ខេត្តត្បូងឃ្មុំ នៅថ្ងៃសៅរ៍ ម្សិលមិញ ឯកឧត្តម បណ្ឌិត ហ៊ុន ម៉ាណែត បានថ្លែងថា ការបន្ថែមកម្លាំងរបស់គណៈពង្រឹង លើការជួយដល់ គណបក្សមូលដ្ឋាន គឺជាយន្តការ ដើម្បីរួមកម្លាំង នៅក្នុងយន្តការដែលមានស្រាប់ និងដើម្បីកៀរគរធនធាន ចូលរួមចំណែកបម្រើប្រជាពលរដ្ឋ និងដោះស្រាយបញ្ហា ប្រឈមនានា នៅថ្នាក់មូលដ្ឋាន ឱ្យកាន់តែមានប្រសិទ្ធភាព។

ឯកឧត្តម បណ្ឌិត ហ៊ុន ម៉ាណែត បន្តថា សន្ទុះនៃការចុះឈ្មោះបោះឆ្នោតថ្មី.ក្នុងស្រទាប់យុវជននៅទូទាំងប្រទេស កំពុងមានកំណើនគួរឱ្យកត់សម្គាល់។ ដូច្នេះការពង្រឹងការងារយុវជន នៅថ្នាក់មូលដ្ឋាន រឹតតែមានសារៈសំខាន់ខ្លាំងណាស់។

ឯកឧត្តម បានសង្កត់​ធ្ងន់ថា​ មូលដ្ឋាន គឺជាប្រភពកម្លាំងពិត នៃជ័យជម្នះ និងភាពរឹងមាំ របស់ថ្នាក់កណ្តាល ដើម្បីថ្នាក់កណ្តាលអាចមានលទ្ធភាព ដាក់ចេញនូវគោលនយោបាយ បម្រើឱ្យសេចក្តីត្រូវការ របស់ថ្នាក់មូលដ្ឋានវិញ។

ក្នុងន័យនេះ ទោះបី គណបក្សប្រជាជនកម្ពុជា បានទទួលជោគជ័យ លើសលប់ នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ កាលពីខែមិថុនា ឆ្នាំ២០២២ កន្លងទៅ ក៏យើងទាំងអស់គ្នា ជា សមាជិក- សមាជិកាគណបក្ស ចាំបាច់ត្រូវខិតខំឱ្យបានខ្លាំងក្លាបន្ថែមទៀត ទាំងលើការងារពង្រឹងរចនាសម្ព័ន្ធ, ការងារកសាងសមាជិក និងការងារឃោសនា-អប់រំ ក៏ដូចជាកិច្ចការសង្គម និងមនុស្សធម៌ផ្សេងៗ ដើម្បីថែរក្សា និងបង្កើនប្រៀបឈ្នះរបស់គណបក្ស ឱ្យមាននិរន្តរភាពរឹងមាំ​។

ប្រធានយុវជនគណបក្សប្រជាជនកម្ពុជាថ្នាក់កណ្តាល រូបនេះថ្លែងថា ការពង្រឹងប្រៀបឈ្នះ របស់ គណបក្សប្រជាជនកម្ពុជា មានគោលបំណងតែមួយគត់ គឺការបន្តអនុវត្តបន្ទាត់ នយោបាយ ដឹកនាំដ៏ត្រឹមត្រូវ ដើម្បីធានាអនាគតមួយ ដ៏ច្បាស់លាស់សម្រាប់កម្ពុជា តាមរយៈការការពារ សុខសន្តិភាព ស្ថិរភាព និងការអភិវឌ្ឍ ដែលជាផលបុណ្យ និងពរជ័យ ស្របតាមបំណងប្រាថ្នា របស់ប្រជាជាតិខ្មែរក្នុងការរស់នៅ ដោយមានសុភមង្គល និងភាពសុខសាន្ត។

ឯកឧត្តម បណ្ឌិត ហ៊ុន ម៉ាណែត ក៏បានចូលរួមអបអរសាទរចំពោះ សមាសភាព ក្រុមការងារគណៈពង្រឹងមូលដ្ឋានស្រុកតំបែរ និងស្រុកពញាក្រែក នៃខេត្តត្បូងឃ្មុំ ដែលទទួលបានការចាត់តាំង ឱ្យទទួលបន្ទុកលើការងារយុវជន ដើម្បីបន្តចូលរួមចំណែកបំពេញភារកិច្ច ស្របតាមគោលការណ៍ចាត់តាំងរបស់ គណបក្សប្រជាជនកម្ពុជា ឱ្យកាន់តែសកម្មបន្ថែមទៀត ជាពិសេសក្នុងការត្រៀមលក្ខណៈសម្រាប់ការបោះឆ្នោតជ្រើស តាំងតំណាងរាស្រ្ត នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី​ បានសម្រេចបង្កើត «មូលនិធិកម្ពុជាគ្មានមីនឆ្នាំ២០២៥»។ នេះបើតាមសម្រេចបង្កើត «មូលនិធិកម្ពុជាគ្មានមីនឆ្នាំ២០២៥» ចុះនៅថ្ងៃទី០៣ ខែធ្នូ ឆ្នាំ​២០២២​ ម្សិលមិញ ដែល សៀមរាប ប៉ុស្ដិ៍ ទើបទទួលបាននៅព្រឹកថ្ងៃអាទិត្យនេះ៕SRP

ខេត្តបន្ទាយមានជ័យ៖ពិតជាខ្លាំង និងមិនធម្មតាមែន ! លោក ឈឿន ក្រៃយ៉ុង អភិបាលរងខេត្តបន្ទាយមានជ័យ និងលោកសាំង គង់ មន្ត្រីទីចាត់ការវិនិយោគខេត្ត តំណាងឲ្យ ក្រុមហ៊ុន គង់ មាន បានគម្រាមកំហែង អ្នកសារព័ត៌មាន មិនឲ្យផ្សាយព័ត៌មានពីបាតុភាពមិនប្រក្រតី ដែលប្រជាពលរដ្ឋ តវ៉ា និងការប៉ះទង្គិចគ្នាជាមួយនឹងក្រុមហ៊ុន គង់ មាន ទៅចាប់ដីភ្នំដូងព្រះនៅក្រុងសិរីសោភ័ណ។

ការផ្ទុះការតវ៉ារបស់ប្រជាពលរដ្ឋ បានកើតឡើងបន្ទាប់ពីមន្ត្រីថ្នាក់ដឹកនាំ រដ្ឋបាលខេត្តបន្ទាយមានជ័យ រដ្ឋបាលក្រុងសិរីសោភ័ណ មន្ទីរបរិស្ថានខេត្ត មន្ទីររ៉ែនិងថាមពលខេត្ត មន្ទីររៀបចំដែនដី នគរូបនីយ៍សំណង និងសុរិយោដីខេត្ត ក្រុង និងមន្ត្រីពាក់ព័ន្ធជាច្រើននាក់ទៀត បានទៅពេលវាស់វែងចំណុចដីភ្នំដូងព្រះ ដើម្បីយកទៅឲ្យក្រុមហ៊ុន គង់ មាន របស់លោកសាំង គង់ ។

មន្ត្រីសាលាខេត្តបន្ទាយមានជ័យបានឲ្យដឹងថា លោក ឈឿន ក្រៃយ៉ុង អភិបាលរងខេត្តបន្ទាយមានជ័យ បានដឹកនាំប្រធាន អនុប្រធានមន្ទីរបរិស្ថានខេត្ត មន្ទីររ៉ែនិងថាមពលខេត្ត មន្ត្រីសូរិយោដីខេត្ត អភិបាលរង នៃរដ្ឋបាលសាលាក្រុងសិរីសោភ័ណ និងមន្ត្រីពាក់ព័ន្ធជាច្រើននាក់ទៀត រួមនឹងលោកសាំង គង់ មន្ត្រីទីចាត់ការវិនិយោគខេត្ត កាលពីថ្ងៃទី២៨-២៩ ខែវិច្ឆិកា ឆ្នាំ២០២២ បាននាំគ្នាឡើងទៅវាស់វែងដីជើងភ្នំ ចង្កេះភ្នំនៃភ្នំដូងព្រះ ឲ្យបានត្រឹមត្រូវដើម្បីប្រគល់ទៅឲ្យក្រុមហ៊ុន គង់ មាន យកទៅវិនិយោគជារមណីយដ្ឋានទេសចរណ៍។ ប៉ុន្តែសកម្មភាពនេះ បានធ្វើឲ្យប្រជាពលរដ្ឋ មានព្រួយបារម្ភ និងបាននាំគ្នាជំទាស់ប្រឆាំងតវ៉ា។

ប្រជាពលរដ្ឋបានអះអាងថា ក្រុមហ៊ុន គង់ មាន បានបង្កផលប៉ះពាល់និងរំលោភយកដីភោគ:របស់ពួកគាត់។ ចំណែកអ្នកសារព័ត៌មាន ដែលបានចុះទៅយកព័ត៌មាន នៅកន្លែងកើតហេតុ ត្រូវបានលោក ឈឿន ក្រៃយ៉ុង អភិបាលរងខេត្តបន្ទាយមានជ័យ និងលោកសាំង គង់ មន្ត្រីទីចាត់ការវិនិយោគខេត្ត តំណាងឲ្យក្រុមហ៊ុន គង់ មាន គំរាមកំហែង និងហាមឃាត់មិនឲ្យផ្សាយព័ត៌មាន ទាក់ទងបាតុកម្ម មិនប្រក្រតីនិងការតវ៉ារបស់ប្រជាពលរដ្ឋ។

លោក សាំង គង់ បានគម្រាមកំហែងអ្នកសារព័ត៌មានថា បើថតរូបនិងធ្វើការផ្សព្វផ្សាយព័ត៌មាននេះ នឹងមានបញ្ហា។ ឯលោកឈឿន ក្រៃយ៉ុង អភិបាលរងខេត្តបន្ទាយមានជ័យ បានដាក់សម្ពាធដល់អ្នកសារព័ត៌មាន មិនឲ្យផ្សាយព័ត៌មាន អំពីបាតុភាពមិនប្រក្រតី ដែលប្រជាពលរដ្ឋតវ៉ា ជាមួយនឹងក្រុមហ៊ុន គង់ មាន នោះទេ។ ដោយលោកបានអះអាងថា រដ្ឋបាលខេត្តបន្ទាយមានជ័យ បានអនុញ្ញាត ឬសម្រេចប្រគល់ដីភ្នំដូងព្រះ អោយក្រុមហ៊ុន គង់ មាន ធ្វើការអភិវឌ្ឍន៍ជារីសត។ ហើយករណី ដែលមានប្រជាពលរដ្ឋតវ៉ាថា ប៉ះពាល់និងរំលោភយកដីពួកគាត់ អាជ្ញាធរនិងជំនាញនឹងពិនិត្យ ផ្ទៀងផ្ទាត់ ហើយដោះស្រាយជាក្រោយ។

ប្រជាពលរដ្ឋជាច្រើនគ្រួសារ នៅជាប់ជើងភ្នំដូងព្រះក្នុងសង្កាត់អូរអំបិល និងក្នុងសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ កាលពីថ្ងៃទី២៨ ខែវិច្ឆិកា ឆ្នាំ២០២២ បាននាំគ្នាតវ៉ាជាមួយនឹងក្រុមហ៊ុន គង់ មាន ដែលបានឡើងទៅចាប់ដីភ្នំដូងព្រះ។ ពូកគាត់កាន់កាប់ដីនៅជើងនិងចង្កេះភ្នំដូងព្រះ ហើយត្រូវបានក្រុមហ៊ុន គង់ មាន ជីកចូកកាយ ចាក់លុបប៉ះពាល់រំលោភយកដី របស់ពួកគាត់។

ប្រជាពលរដ្ឋបានបញ្ជាក់ថា ដីតំបន់ភ្នំដូងព្រះនេះ កាលពីជំនាន់លោកសួន បវរ ជាអភិបាលខេត្តបន្ទាយមានជ័យ ដែលបានគ្រោងយកទីតាំដីភ្នំព្រះនេះទំហំជាង ២០ហិកតា សំរាប់គម្រោងសាងសង់ស្តាត ដោយរដ្ឋបាលខេត្ត បានប្រគល់អោយក្រុមហ៊ុនអ៊ី អិល អេច(ELH ) របស់លោក តាន់ គឹមហួត ធ្វើជាដៃគូអភិវឌ្ឍន៍ ដោយត្រួសត្រាយកាយពង្រាបភ្នំនិងចូកកាយដឹកដីចេញយកទៅលក់។ ប៉ុន្តែក្រៅពីកាយពង្រាប ចូលជីកដឹកដីរាប់រយពាន់ឡានលក់រួចហើយ គម្រោងសាងសង់ស្តាតខេត្ត អគារលេខាធិការដ្ឋាននៃគណ:កម្មាធិការខេត្តរៀបចំការបោះឆ្នោត ការសាងសង់មជ្ឈមណ្ឌលរដ្ឋបាលកីឡា អន្តេវាសិក ឬក្រុងរណបរផងនោះ បានក្ស័យធន៕SRP

ខេត្តសៀមរាប៖យ៉ាងហោចណាស់មនុស្សក្មេងចាស់ចំនួនបីនាក់បានលង់ទឹកស្លាប់កាលពីម្សិលមិញ។

ហេតុការណ៍កើតឡើងនៅព្រឹកថ្ងៃទី០២ខែធ្នូឆ្នាំ២០២២ នៅចំណុចស្រះតារី ក្នុងភូមិអភិវឌ្ឍន៍ ឃុំកន្ទួត ស្រុកស្វាយលើ ខេត្តសៀមរាប។

នគរបាលស្រុកស្វាយលើ បានឲ្យដឹងថា ករណីនេះគឺ មនុស្សស្រីក្មេងចាស់ចំនួន៣នាក់ បាននាំគ្នាទៅមើលទ្រូ ស្រាប់តែរអិលជើងធ្លាក់ទឹកស្រះ បណ្តាលឲ្យលង់ទឹកស្លាប់ជាបន្តបន្ទាប់ដោយសារមិនចេះហែលទឹក។

នគរបាលបន្តថា សពជនរងគ្រោះទី១. ឈ្មោះ ស៊ឹង លៀវ ភេទស្រី អាយុ ៤៥ឆ្នាំ មុខរបរកសិករ រស់នៅភូមិអភិវឌ្ឍន៍ ឃុំកន្ទួត ស្រុកស្វាយលើ ខេត្តសៀមរាប (ត្រូវជាម្ដាយ)។ ២. ឈ្មោះ គាន លីសា ភេទស្រី អាយុ០៦ឆ្នាំ រស់នៅភូមិ ឃុំជាមួយគ្នា (ត្រូវជាកូន)។៣. ឈ្មោះគីម សាលីន ភេទស្រី អាយុ០៧ឆ្នាំ រស់នៅភូមិឃុំជាមួយគ្នា (ត្រូវជាអ្នកជិតខាង)។

នគរបាលបញ្ជាក់ថា យោងតាមការពិត្យទីតាំងកើតហេតុ៖ស្រះមានប្រវែង ៨×១២ ម៉ែត្រ-ទឹកមានជម្រៅ ២.៥០ ម៉ែត្រ-មាត់ស្រះមានសភាពចោតរអិល។ ចំណែកការពិនិត្យសាកសព៖-ផ្នែកក្បាល លលាដ៏ក្បាល ដងខ្លួន និងអវៈយវៈ ពុំមានស្លាកស្នាមពាក្យព័ន្ធនិងបទល្មើសព្រហ្មទណ្ឌឡើយ។

សមត្ថកិច្ចបានធ្វើសន្និដ្ឋាន ដោយយោងតាមការបំភ្លឺពីសាក្សីនៅកន្លែងកើតហេតុ ការពិនិត្យរបស់កម្លាំងជំនាញ ជនរងគ្រោះពិតជាស្លាប់ដោយសារលង់ទឹកពិតប្រាកដមែន៕SRP

ភ្នំពេញ៖គណៈកម្មការជាតិ សូមបញ្ជាក់ថា ចាប់ពីថ្ងៃប្រកាសព័ត៌មានតទៅ រាល់មធ្យោបាយដែលដឹកជញ្ជូនឈើមិនមានលិខិតអនុញ្ញាតពីជំនាញត្រឹមត្រូវតាមច្បាប់ ត្រូវធ្វើការបំផ្លាញចោល ដើម្បីបំបាត់ឧក្រិដ្ឋកម្មព្រៃឈើ រក្សាបានព្រៃឈើគង់វង្ស។

អ្នកនាំពាក្យគណៈកម្មការជាតិ ដើម្បីទប់ស្កាត់និងបង្ក្រាបបទល្មើសធនធានធម្មជាតិ នៅថ្ងៃសុក្រ ទី០២ ខែធ្នូ ឆ្នាំ២០២២ សូមជម្រាបជូនសាធារណជន និងអ្នកសារព័ត៌មានជ្រាបថា ដោយទទួលបានព័ត៌មាន ឯកឧត្តម នាយឧត្តមសេនីយ៍ សៅ សុខា ប្រធានគណៈកម្មការជាតិ បានបញ្ជាឱ្យក្រុមការងារស្រាវជ្រាវនិងបង្ក្រាបបទល្មើសធនធានធម្មជាតិ នៃកងរាជអាវុធហត្ថលើផ្ទៃប្រទេស ធ្វើការស្រាវជ្រាវករណីដែលសារព័ត៌មានបានចុះផ្សាយថា “បទល្មើសព្រៃឈើកំពុងកើតយ៉ាងរង្គាល នៅតំបន់ស្នួលព្រៃឡង់ក្នុងស្រុករវៀង ខេត្តព្រះវិហារ…”។

កម្លាំងស្រាវជ្រាវព័ត៌មានកងរាជអាវុធហត្ថលើផ្ទៃប្រទេស បានចុះដល់ទីតាំងក្នុងភូមិសាស្ត្រខេត្តព្រះវិហារ នៅថ្ងៃទី២៥ ដល់ថ្ងៃទី២៩ ខែវិច្ឆិកា បានធ្វើការស្រាវជ្រាវ ពិនិត្យទីតាំងជាក់ស្តែង ស្តាប់ការបំភ្លឺពីមេភូមិ ពីនាយផ្នែករដ្ឋបាលព្រៃឈើរវៀង ពីនាយសង្កាត់រដ្ឋបាលព្រៃឈើរវៀង និងត្រួតពិនិត្យឯកសារពាក់ព័ន្ធរបស់ក្រុមហ៊ុនដែលធ្វើអាជីវកម្មនៅភូមិសាស្ត្រនោះ ជាលទ្ធផល៖ ពុំមានសកម្មភាពការកៀរគរកម្មករ គោយន្ត និងឈរចាំទិញឈើពីខាងក្រៅអូសចូលក្រុមហ៊ុន ដូចការចុះផ្សាយនោះឡើយ។

ចំណែកឯ ឈ្មោះ ចាប សារ៉ន ចាប់ខែកក្កដា ឆ្នាំ២០២២ សាក្សីបញ្ជាក់ថា មិនដែរឃើញបុគ្គលនេះទេ។ ឈ្មោះ ចាប់ សារ៉ន នេះ ត្រូវបានដាក់ឱ្យចូលនិវត្តន៍តាមច្បាប់ និងកាត់ចេញពីក្របខណ្ឌកងរាជអាវុធហត្ថ នាពេលកន្លងទៅ។ ប៉ុន្តែទោះយ៉ាងណា ក្រុមការងារស្រាវជ្រាវព័ត៌មាន រងចាំទទួលគ្រប់ពេលនូវរាល់ព័ត៌មានពិត ដើម្បីធ្វើការបង្ក្រាបបទល្មើសឧក្រិដ្ឋកម្មព្រៃឈើនេះ។

កាលពីនៅថ្ងៃទី០១ ខែវិច្ឆិកា ឆ្នាំ២០២២ កម្លាំងកងរាជអាវុធហត្ថ បានបង្ក្រាបចាប់រថយន្តម៉ាកសាំយ៉ុងកែច្នៃចំនួន២គ្រឿង ដឹកឈើអារគ្រឿងប្រហែល១០ម៉ែត្រត្រីគុណ នៅចំណុចភូមិឈើទើ ឃុំខ្ពបតាងួន ស្រុកស្ទឹងត្រង់ ខេត្តកំពង់ចាម វត្ថុតាងបានរក្សាទុកនៅសង្កាត់រដ្ឋបាលព្រៃឈើស្រុកព្រែកប្រសព្វ។ រថយន្តម៉ាកសាំយ៉ុងកែច្នៃចំនួន២គ្រឿងខាងលើ នឹងធ្វើការបំផ្ទុះដោយម្សៅ TNT នៅថ្ងៃទី៥ ខែធ្នូ នាពេលខាងមុខនេះ ដើម្បីបំផ្លាញចោលឱ្យរាងចាល។

គណៈកម្មការជាតិដើម្បីទប់ស្កាត់និងបង្ក្រាបបទល្មើសធនធានធម្មជាតិ សូមថ្លែងអំណរគុណចំពោះការចូលរួមយ៉ាងសកម្មពីសំណាក់ពលរដ្ឋល្អ អ្នកសារព័ត៌មាន យើងខ្ញុំសូមអំពាវនាវបន្តផ្តល់ព័ត៌មានអំពីបទល្មើសព្រៃឈើនេះ ទៅដល់អាជ្ញាធរដែនដី ជំនាញរដ្ឋបាលព្រៃឈើ ជំនាញបរិស្ថាន ជាពិសេសគណៈបញ្ជាការឯកភាពរដ្ឋបាលគ្រប់ជាន់ថ្នាក់។

អាស្រ័យហេតុដូចបានជម្រាបជូនខាងលើ សូមសាធារណជន និងអ្នកសារព័ត៌មានមេត្តាជ្រាប៕SRP

ភ្នំពេញ៖ការបែកធ្លាយព័ត៌មានតាមបណ្ដាញសង្គមថា នៅ ទឹកដីខណ្ឌសែនសុខ មានជនជាតិចិនជួលសណ្ឋាគារបង្កើតជាល្បែងកាស៊ីណូ។

ប្រភពបានបានបង្ហើបថា ករណីនេះមានឧត្តមសេនីយ៍មួយចំនួន នៅក្រសួងមហាផ្ទៃ (សុំមិនបញ្ចេញឈ្មោះ) និងនៅអគ្គនាយកដ្ឋានសវនកម្មផ្ទៃក្នុង ឈ្មោះ​ រិទ្ធ​ បានរកស៊ីជាមួយជនជាតិចិន ដោយជួលសណ្ឋាគារ បង្កើតជាកាស៊ីណូ ក្នុងទឹកដីខណ្ឌសែនសុខ។

ជាមួយនឹងល្បែងកាស៊ីណូខុសច្បាប់នេះ អាជ្ញាធរសមត្ថកិច្ចមូលដ្ឋានមិនហ៊ានបង្ក្រាបនោះទេ។ ក្នុងនោះហើយមានឧត្តមសេនីយ៍ម្នាក់ ជាអ្នកចាំទទួលបញ្ជាពីមេរបស់ខ្លួន រត់ការចាំអន្តរាគមន៍ នៅពេលដែលមានអ្នកសារព័ត៌មានចុះផ្សាយ ឬមានអ្នកទៅរំខានទីតាំងល្បែងស៊ីសងខុសច្បាប់នោះ។

ជុំវិញការបែកធ្លាយព័ត៌មាននេះ សៀមរាប ប៉ុស្តិ៍ មិនទាន់ទទួលបានការបកស្រាយពីលោកសាន សុខសីហា អ្នកនាំពាក្យស្នងការនគរបាលរាជធានីភ្នំពេញនៅឡើយទេ៕SRP

ខេត្តសៀមរាប៖លោក ម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានឲ្យដឹងថា ដើមធ្នង់១ដើម ដែលជនមិនស្គាល់មុខលួចកាត់ កាលពីថ្ងៃខែកញ្ញា ឆ្នាំ២០២២ នៅភូមិបន្ទាយស្រី ឃុំខ្នារសណ្ដាយ ស្រុកបន្ទាយស្រី ខេត្តសៀមរាប ត្រូវបានជំនាញ យកទៅរក្សាទុកនៅសង្កាត់រដ្ឋបាលព្រៃឈើបន្ទាយស្រី ក្នុងស្រុកបន្ទាយស្រី រួចហើយ។

សូមជម្រាបថាកាលពីថ្ងៃទី២៨ ខែកញ្ញា ឆ្នាំ២០២២ មានករណីជនល្មេីសលួចកាប់ដើមធ្នង់ចំនួនមួយដើម មុខកាត់គល់ ១,២០ ម ប្រវែង ៦ម ក្នុងភូមិបន្ទាយស្រី​ឃឃុំសណ្ដាយស្រុកបន្ទាយស្រី ខេត្តសៀមរាប។ ដោយកាលនោះចំពោះវត្ថុតាង​ មិនអាចយកចេញបានទេ ដោយសារទឹកលិចផ្លូវ ហេីយរក្សាទុកនៅនឹងកន្លែងកេីតហេតុសិន៕SRP

ខេត្តកំពង់ចាម៖ជនសង្ស័យ ឈ្មោះ ថា យឺ ម៉េងឈៀក​ ភេទប្រុស អាយុ២០ឆ្នាំ មុខរបរមិនពិតប្រាកដ រស់នៅភូមិដំណាក់អំពិល ឃុំស្ដើងជ័យ ស្រុកជើងព្រៃ ខេត្តកំពង់ចាម បានឆ្លើយសារភាពថា៖ ខ្លួនពិតជាបាន ធ្វើសកម្មភាព (អារក) សម្លាប់ជនរងគ្រោះឈ្មោះ វៀត ចន្ទ្រា ភេទស្រី អាយុ២០ឆ្នាំ ជនជាតិខ្មែរ មុខរបរជានិស្សិតឆ្នាំទី២ រៀននៅសាកលវិទ្យាល័យវេស្ទើន ក្រុងកំពង់ចាម និងមានទីលំនៅនៅភូមិក្តុយ ឃុំស្ដើងជ័យ ស្រុកជើងព្រៃ ខេត្តកំពង់ចាម ដោយយកកាំបិតបន្លែទៅអាករសម្លាប់ជនរងគ្រោះ បណ្ដាលឲ្យស្លាប់នៅក្នុងបន្ទប់ជួល របស់ឈ្មោះ លី ឈាងគី​ នៅទីតាំងកើតហេតុ កាលពីថ្ងៃទី១ ខែធ្នូ ឆ្នាំ២០២២ វេលាម៉ោង ០៤:០៥នាទី ពិតប្រាកដមែន។

មូលហេតុ កន្លងមកនេះរូបខ្លួន និងជនរងគ្រោះធ្លាប់ស្គាល់រាប់អានគ្នា កាលពីរៀននៅអនុវិទ្យាល័យព្រីងជ្រុំ អំឡុងឆ្នាំ២០១៩ រហូតពេលកើតហេតុ ក៏ជិះម៉ូតូជួបគ្នាដោយចៃដន្យ រួចក៏បបួលគ្នាដើរលេង នឹងបានជូនជនរងគ្រោះ ទៅបន្ទប់ដេកវិញ ដោយខឹងជនរងគ្រោះមិនឲ្យខ្លួនដេករួមភេទជាមួយ ក៏អាករសម្លាប់តែម្ដង។

ករណីនេះសមត្ថកិច្ចនគរបាល បានដកហូត កាំបិតចិតបន្លែបាក់ដង ១ និងម៉ូតូម៉ាកសេ១២៥ ផលិតឆ្នាំ២០១៩ ពណ៌ខ្មៅ (គ្មានស្លាកលេខ)១គ្រឿង។

សូមបញ្ជាក់ថា ករណីឃាតកម្មនេះ កើតឡើងនៅ
ថ្ងៃទី០១ ខែធ្នូ ឆ្នាំ២០២២ ក្នុងភូមិទី២ សង្កាត់វាលវង់ក្រុងកំពង់ចាម។ សមត្ថកិច្ច បាននាំខ្លួនជនសង្ស័យ ទៅអធិការដ្ឋាននគរបាលក្រុងកំពង់ចាម ដើម្បីបន្តកសាងសំណុំរឿង តាមនីតិវិធី៕SRP

ខេត្តសៀមរាប៖បុរសអ្នកដើរតាមផ្លូវម្នាក់ត្រូវបានរថយន្តបុកចំពេញទំហឹងពីក្រោយបណ្ដាលឱ្យស្លាប់ភ្លាមៗ។

ហេតុការណ៍បានកើតឡើងម៉ោង២២ និង៤០ ថ្ងៃទី១ ខែធ្នូ ឆ្នាំ២០២២ នៅលេីចំណុចផ្លូវជាតិលេខ៦ ស្ថិតនៅភូមិកកោះ ឃុំគោកធ្លក ស្រុកជីក្រែង។

ប្រភពបានឲ្យដឹងថា ករណីគ្រោះថ្នាក់ចរាច​ណ៍នេះ បង្កឡេីងរវាងរថយន្តមិនស្គាល់ម៉ាក (ទិសដៅពីកើតទៅលិច) បានបុកមនុស្សកំពុងដេីរ បណ្តាលឲ្យស្លាប់តែម្ដង។

ជនរងគ្រោះឈ្មោះលុយ តេង ភេទប្រុស អាយុ៤៨ឆ្នាំ នៅភូមិ ឃុំ ស្រុកខាងលេី។ មូលហេតុ ជនរងគ្រោះដេីរឆ្លងថ្នល់មិនបានប្រុងប្រយ័ត្ន ទើបបណ្តាលឲ្យកើតមានគ្រោះថ្នាក់កើតឡើង៕SRP

ខេត្តសៀមរាប៖ទីតាំងស្តុកសត្វព្រៃមួយកន្លែងត្រូវបានមេព្រៃខេត្តសៀមរាបបង្ក្រាប។ ការបង្ក្រាបធ្វើឡើង នៅពីថ្ងៃទី៣០ ខែវិច្ឆិកា ឆ្នាំ២០២២ ត្រង់ចំណុចភូមិខ្នារ​ សង្កាត់ជ្រាវ​ ក្រុងសៀបរាប​។

លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានឱ្យដឹងថា ការបង្ក្រាបនេះ ដោដោយសង្កាត់រដ្ឋបាលព្រៃឈេីប្រាសាទបាគង​ ជាមួយក្រុមអន្តរាគមន៍បង្រ្កាបបទល្មើសព្រៃឈើ សត្វព្រៃ ចល័តរដ្ឋបាលព្រៃឈើ និងកងរាជអាវុធហត្ថលើផ្ទៃប្រទេស ដឹកនាំដោយលោកស្រី ឆេង ហាក់ងិន ព្រះរាជអាជ្ញារងអមអយ្យការសាលាដំបូងខេត្តសៀមរាប។

លោក ម៉ុង ប៊ុនលីម បានបន្តថាការបង្រាបបទល្មើសសត្វព្រៃ​ នេះដកហូតវត្ថុតាង សត្វព្រៃចំនួន៧៥ក្បាល៖
 1/-ប្រវឹករស់ ចំនួន =16ក្បាល
 2/-ទោមរស់ ចំនួន =7ក្បាល
 3/-មាន់ទឹករស់ចំនួន=3ក្បាល
 4/-សារិកាកែវក្របីរសចំនួន=49ក្បាល។ ម្ចាស់មានឈ្មោះកែវ វាសនា ភេទប្រុស អាយុ33ឆ្នាំ​ ជាម្ចាស់ទទួលខុស និងដកហូតសត្វព្រៃទាំងអស់ជាបណ្តោះអាន្ន​  ដេីម្បីចងក្រងសំណុំរឿងទៅតាមច្បាប់ព្រៃឈេី៕SRP