លោកបណ្ឌិត ហ៊ុន ម៉ាណែត បានលើកឡើងថាសព្វថ្ងៃសាកលវិទ្យាល័យអង្គរ ក៏មានឈ្មោះល្បីល្បាញ និងត្រូវបានទទួលស្គាល់ថា ជាសាកលវិទ្យាល័យឈានមុខមួយក្នុងខេត្តសៀមរាប ដែលបណ្ដុះបណ្ដាល មុខជំនាញជាច្រើន ដោយរាប់ចាប់ពីជំនាញក្សេត្រសាស្រ្ដ ដល់ជំនាញសុខាភិបាល។
លោកបណ្ឌិត ក៏បានវាយតម្លៃខ្ពស់ថា ទាំងនេះ គឺជាគុណតម្លៃនៃការខិតខំប្រឹងប្រែង ដ៏សកម្មរបស់ អ្នកឧកញ៉ា បណ្ឌិត សៀង ណាំ, ថ្នាក់ដឹកនាំសាកលវិទ្យាល័យអង្គរ, សាស្ត្រាចារ្យ និងបុគ្គលិកសិក្សាទាំងអស់ នៅក្នុងការចូលរួមចំណែកកសាងធនធានមនុស្ស និងការពង្រឹងគុណភាពអប់រំ ស្របតាមគោល នយោបាយ របស់រាជរដ្ឋាភិបាលផងដែរ។
លោកបណ្ឌិត ហ៊ុន ម៉ាណែត ក៏បានសម្តែងនូវការសាទរចំពោះ សាកលវិទ្យាល័យអង្គរ ទទួលបានវិញ្ញាបនបត្រ សម្រាប់ ឆ្នាំ២០២២-២០២៦ ពីគណៈកម្មាធិការ ទទួលស្គាល់គុណភាព អប់រំ នៃកម្ពុជា នៃក្រសួងអប់រំ យុវជន និងកីឡា ព្រមជាមួយនឹងការសម្ពោធ អគារសិក្សាថ្មី ដ៏ទំនើប និងធំស្កឹមស្កៃនេះផងដែរ។
លោកបណ្ឌិត ហ៊ុន ម៉ាណែត មានប្រសាសន៍ថា៖ រាជរដ្ឋាភិបាល ដែលមាន សម្តេចតេជោ ជាប្រមុខ មានបំណងប្រាថ្នា ចម្បងតែមួយគត់ គឺការផ្តល់ឱ្យប្រជាពលរដ្ឋ នូវជីវភាពធូរធាចម្រុងចម្រើន និងការរស់នៅប្រកបដោយភាព សុខសាន្ត ក្រោមម្លប់នៃសន្តិភាព ព្រមជាមួយនឹងសិទ្ធិសេរីភាព និងឱកាសគ្រប់បែបយ៉ាង ក្នុងការកសាងអភិវឌ្ឍ ខ្លួនឱ្យទទួលបានជោគជ័យ។ ពិតណាស់ ការប្រែក្លាយគំនិតឱ្យចេញជាលទ្ធផលជាក់ស្តែង ប្រកបដោយនិរន្តរភាពនៃការរីកចម្រើន គឺទាមទារនូវចក្ខុវិស័យវែងឆ្ងាយ និងច្បាស់លាស់ ក៏ដូចជាការប្តេជ្ញាចិត្តខ្ពស់ពីគ្រប់ភាគីពាក់ព័ន្ធក្នុងការជម្នះនូវរាល់គ្រប់ឧបសគ្គ។ ក្នុងន័យនេះ សូមប្រជាពលរដ្ឋគ្រប់មជ្ឈដ្ឋាន ចូលរួមថែរក្សា និងប្រឹងប្រែង ចាប់យកឱកាសអំណោយផល ពីកត្តាសុខសន្តិភាព ស្ថិរភាព និងកំណើន ឱ្យបានជាប្រយោជន៍សម្រាប់ខ្លួន ក្រុមគ្រួសារ និងសង្គមជាតិ។
លោកបណ្ឌិត ហ៊ុន ម៉ាណែត ប្រធានគណៈកម្មាធិការអាហារូបករណ៍សិស្ស-និសិ្សតក្រីក្ររបស់សម្ដេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន មានប្រសាសន៍យ៉ាងដូច្នេះ នៅថ្ងៃអង្គារនេះ ក្នុងឱកាសអញ្ជើញជាអធិបតី កាត់ខ្សែបូរសម្ពោធអគារសិក្សាថ្មី នៃសាកលវិទ្យាល័យអង្គរ។
លោកបណ្ឌិត សៀង ណាំ ប្រធានក្រុមប្រឹក្សានៃសាលវិទ្យាល័យអង្គរមានប្រសាសន៍ថា៖ សាកលវិទ្យាល័យអង្គរ ស្ថិតក្នុងសង្កាត់ជ្រាវ ក្រុងសៀមរាបខេត្តសៀមរាប បានបង្កើតឡើងនៅឆ្នាំ២០០៤។
បច្ចុប្បន្នសាកលវិទ្យាល័យអង្គរ បានបង្កើតរចនាសម្ព័ន្ធ សម្រាប់គាំទ្រដល់ការរៀន និងបង្រៀនប្រកបដោយគុណ ភាពខ្ពស់ ដែលមានសាកលវិទ្យាធិការដ្ឋាន ការិយាល័យចំនួន០៤ មជ្ឈមណ្ឌលចំនួន០៤ បណ្ណាល័យចំនួន ០១ និងក្លឹបចំនួន០៤។
ដោយសារតែមានកំណើននិស្សិត ជាមធ្យម ៥០ភាគរយជារៀងរាល់ឆ្នាំ តម្រូវការសំណង់ និងធនធាន រូបវន្តនានាសម្រាប់ការងារបណ្តុះបណ្តាល ជាពិសេស ដើម្បីឆ្លើយតបទៅ នឹងតម្រូវការទីផ្សារការងារ ក្រុមប្រឹក្សាភិបាល សាកលវិទ្យាល័យ. បានសម្រេចសាងសង់នូវអគារសិក្សាថ្មីនៅខែកុម្ភៈ ឆ្នាំ២០២២ កន្លងទៅ។
សូមជម្រាបថា អគារសិក្សាថ្មីមួយខ្នង សាងសង់អស់រយៈជាង១៥ខែលើផ្ទៃដី១៤០០ម៉ែត្រក្រឡា ទទឹង២៨ម បណ្តោយ៤៤ម មានកម្ពស់៥ជាន់ ចំណាយថវិកាស រុបចំនួនប្រមាណជាង១ លាន៥០ម៉ឺនដុល្លារ។ អគារសិក្សាថ្មីនេះ ចែកចេញជា បន្ទប់សិក្សា បណ្ណាល័យ ការិយាល័យ បន្ទប់ទទួលភ្ញៀវ សាលប្រជុំ បន្ទប់ហាត់ការ ទីកន្លែងហាត់ប្រាណ ព្រមទាំងបំពាក់ដោយជណ្តើរយន្ត និងបំពាក់សម្ភារឧបទេសសិក្សា៕ដោយនាគខៀវ
