ខេត្តសៀមរាប៖បុរសម្នាក់បានលង់ទឹកស្លាប់បង្កឲ្យមានការភ្ញាក់ផ្អើល។

ហេតុការណ៍បានកើតឡើង ល្ងាចថ្ងៃទី ២ ខែកញ្ញា ឆ្នាំ ២០២៣ ចំណុចប្រឡាយខាងកេីតភូមិ ស្ថិតក្នុងភូមិកកោះ ឃុំគោកធ្លកក្រោម ស្រុកជីក្រែង ខេត្តសៀមរាប។

សមត្ថកិច្ចប្រាប់ថា ជនរងគ្រោះ ឈ្មោះ ជា ជៀង ភេទប្រុសអាយុ៣៤ឆ្នាំ។ តាមការបំភ្លឺរបស់សាច់ញ្ញាតិ្ត និងមានការធ្វេីកោសល្យវិច័យរបស់សមត្ថកិច្ច ជនរងគ្រោះ ស្រវឹងស្រាជាប្រចាំ ចុះក្នុងទឹកប្រឡាយ ធ្លាក់ទឹកជ្រៅហែលមិនរួច បណ្តាលអោយលង់ទឹកស្លាប់តែម្ដង៕ដោយនាគខៀវ

ខេត្តកំពង់ឆ្នាំង៖រថយន្តលុចស៊ិសបានបុកម៉ូតូបណ្ដាលឲ្យស្លាប់មនុស្សម្នាក់និងរបួសម្នាក់។

ហេតុការណ៍បានកើតឡើង នៅរសៀលថ្ងៃទី២ ខែកញ្ញា ឆ្នាំ២០២៣ នៅលេីកំណាត់ផ្លូវជាតិលេខ៥ ស្ថិតក្នុងភូមិក្បាលដំរី ឃុំត្រពាំងចាន់ ស្រុកបរិបូណ៍ ខេត្តកំពង់ឆ្នាំង។

សមត្ថកិច្ចបានប្រាប់ថា ករណីគ្រោះថ្នាក់ចរាចរណ៍ នេះ បង្កដោយរថយន្តម៉ាកលុចស៊ិស RX300 ពណ៌ខ្មៅ ពាក់ស្លាកលេខ ភ្នំពេញ2AE-5443 អ្នកបើកបរមិនស្គាល់អត្តសញ្ញាណ (រត់គេចខ្លួនបាត់) បេីកបរពីលិចទៅកើត ក៏បុកម៉ូតូ១គ្រឿង ជិះឌុបគ្នាពីរនាក់ ម៉ាកគុប90 ពណ៌បៃតង ពាក់ស្លាកលេខ កំពង់ឆ្នាំង 1B-1008 អ្នកបើកបរឈ្មោះ ស្រ៊ុន ភេទប្រុស អាយុ៤១ឆ្នាំ រស់នៅភូមិ ឃុំកើតហេតុខាងលើ (ក្នុងដំណើរខ្វែងទិសគ្នា) បណ្តាលអោយស្លាប់ និងរងរបួសមនុស្សធ្ងន់។

បើតាមសមត្ថកិច្ចហេតុការណ៍នេះ មូលហេតុ បណ្ដាលមកពីបើកបរក្នុងល្បឿនលឿនខ្វះការប្រុងប្រយ័ត្ន៕ដោយនាគខៀវ

ដោយ ប៉ែន បូណា អ្នកនាំពាក្យរាជរដ្ឋាភិបាល បានសរសេរថា៖ រាជរដ្ឋាភិបាលអាណត្តិទី៧ ដឹកនាំដោយឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត បានដាក់ឲ្យអនុវត្តភ្លាមៗចាប់ពីឆ្នាំ ២០២៣ នេះតទៅនូវគោលនយោបាយអាទិភាព ៦ចំណុចដែលជាក្តីសង្ឃឹមដ៏រឹងមាំរបស់រដ្ឋ៖

ទី១៖ ពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសាកល ពោលគឺនៅពេលមានជំងឺ មន្ត្រីរាជការស៊ីវិល កម្លាំងប្រដាប់អាវុធ និងប្រជាពលរដ្ឋ ជាពិសេសពលរដ្ឋក្រីក្រនិងងាយរងគ្រោះ ត្រូវទទួលបាននូវសេវាថែទាំសុខភាពគ្រប់ៗគ្នា។

ទី២៖ យុវជនដែលជាកូនអ្នកក្រីក្រនិងងាយរងគ្រោះនឹងទទួលបានការបណ្ដុះបណ្ដាលជំនាញវិជ្ជាជីវៈដើម្បីពួកគេអាចយកទៅប្រកបរបរចិញ្ចឹមជីវិតបានងាយស្រួល។ ការបណ្ដុះបណ្ដាលនេះធ្វើឡើងដោយឥតបង់ប្រាក់ហើយថែមទាំងទទួលបានការឧបត្ថម្ភកំឡុងពេលបណ្ដុះបណ្ដាលបន្ថែមទៀត។

ទី៣៖ ពលរដ្ឋក្រីក្រនិងងាយរងគ្រោះនឹងទទួលបាននូវភាពកក់ក្តៅតាមរយៈកម្មវិធីជាតិជំនួយសង្គមដែលនឹងត្រូវពង្រឹងឲ្យទៅជាកម្មវិធីជាតិរឹងមាំមួយ ពោលគឺ នៅពេលពលរដ្ឋជួបវិបត្តិឫហានិភ័យផ្សេងៗ កម្មវិធីជាតិជំនួយសង្គមនិងរង់ចាំជួយពួកគេប្រកបដោយប្រសិទ្ធភាពខ្ពស់។

ទី៤៖ អ្នកប្រកបរបរក្រៅប្រព័ន្ធនិងទទួលបានការយកចិត្តទុកដាក់ ហើយពួកគេក៏អាចទទួលបានអត្ថប្រយោជន៍ដូចអ្នកប្រកបរបរក្នុងប្រព័ន្ធដែរនៅពេលដែលពួកគេជួបវិបត្តិឫហានិភ័យផ្សេងៗ។
ទី៥៖ ប្រជាកសិករនិងទទួលបាននូវការគាំពារតាមរយៈការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន (ការផ្ដល់ប្រាក់កម្ចីដើម្បីប្រកបមុខរបរកសិកម្ម) ជាពិសេសគឺទទួលបាននូវការការពារតម្លៃកសិផលឲ្យបានសមរម្យ ដោយមិនឲ្យកសិករខាតបង់ឡើយ។

ទី៦៖ រាជរដ្ឋាភិបាលនិងបញ្ជូនមន្ត្រីបច្ចេកទេសកសិកម្មទៅជួយកសិករនៅគ្រប់ឃុំសង្កាត់ដែលមានពលរដ្ឋប្រកបរបរកសិកម្ម និងបង្កើតសហគមន៍កសិករនៅទូទាំងប្រទេសដើម្បីការពារផលប្រយោជន៍របស់កសិករ។

សរុបមកវិញ គោលនយោបាយរបស់រាជរដ្ឋាភិបាលអាណត្តិទី៧ ដឹកនាំដោយឯកឧត្តមបណ្ឌិត ហ៊ុន ម៉ាណែត គឺជាគោលនយោបាយគាំពារប្រជាពលរដ្ឋ ជាពិសេសពលរដ្ឋក្រីក្រនិងងាយរងគ្រោះ។ គោលនយោបាយនេះគឺជាក្តីសង្ឃឹមយ៉ាងកក់ក្តៅរបស់ប្រជាពលរដ្ឋខ្មែរ បន្តពីរាជរដ្ឋាភិបាលសម្តេចតេជោ៕ដោយនាគខៀវ

មានការលើកឡើងថាក្រុមគយបានដាក់ប៉ុស្ដិ៍ តាមផ្លូវជាតិ លេខ៧ នៅឃុំក្រែក ស្រុកពញាក្រែក ខេត្តត្បូងឃ្មុំ កំពុងតែត្រូវប៉ាន់យ៉ាងខ្លាំង ពីក្រុមឈ្មួញដឹកទំនិញ ចេញចូលកម្ពុជា វៀតណាម។

ប្រភពបានរាយការណ៍ថាក្រុមនៅទីតាំងខាងលើ បានប្រឹងប្រមូលលុយពីក្រុមអាជីវករ ម្ចាស់រថយន្តដឹកទំនិញ ឆ្លងដែនពីប្រទេសវៀតណាម។

ប្រភពបន្តថាកម្លាំងគយមួយក្រុមដាក់នៅលើផ្លូវជាតិលេខ៧ ខាងឆ្វេងដៃ គេមិនដឹងថាតើគយចំណុចនេះជាអង្គភាពខាងណានោះទេ? គយខេត្ត? ឬមួយក៏គយចល័តចេញពីក្រសួងសេដ្ឋកិច្ចនិងហិរញ្ញវត្ថុ ចាំបង្ក្រាបបទល្មើស? គយនៅចំណុចនេះគឺកាប់ថ្លៃខ្ពស់ៗណាស់។

អាជីវករដឹកទំនិញបានប្រាប់ថា ក្នុងទំនិញ១រថយន្តសាំយ៉ុង បង់ឱ្យគយនៅទីតាំងខាងលើ ចំនួន៨០ម៉ឺនរៀល ឬ ១លានរៀល ដែលនាំទំនិញចូលពីវៀតណាម មកកម្ពុជា។ បណ្ដាទំនិញទាំងឡាយដែលឆ្លងពីប្រទេសវៀតណាម មកនោះសុទ្ធតែត្រូវបង់ពន្ធនៅព្រំដែនរួចហើយ។ ហេតុដូចម្ដេចបានជាមានពួកគយនៅមិនឆ្ងាយពីគយព្រំដែន១កន្លែងទៀត ដែលចាំយកលុយស្រួលៗយ៉ាងដូច្នេះ។ ករណីនេះ តើវាជាបទបញ្ជារបស់ក្រសួងសេដ្ឋកិច្ច និងហិរញ្ញវត្ថុ ឬអគ្គនាយកដ្ឋានគយ និងរដ្ឋាករមែនដែរឬទេ? បើវាជាគយស្របច្បាប់ គួរតែលើកផ្លាកទីស្នាក់ការឲ្យបានច្បាស់លាស់និងសមរម្យផងទៅ។

គួរបញ្ជាក់ថែមទៀតថា គយមួយកន្លែងនេះ គឺឃើញតែរថយន្ត១គ្រឿង ដែលបិទផ្លាកគយ តែមិនឃើញលើកផ្លាកទីស្នាក់ការឱ្យបានត្រឹមនៅទេ។ តែយ៉ាងណាក៏ ដោយគេឃើញតែរថយន្តដឹកទំនិញឆ្លងកាត់ ចូលបង់ ដោយមិនឃើញការត្រួតពិនិត្យឱ្យបានត្រឹមត្រូវនោះទេ។ រថយន្តដឹកទំនិញមិនថាតិច តួចឬច្រើននោះទេ សុទ្ធតែត្រូវចូលទៅជួបពួកមន្ត្រីគយតែប្រចាំការនៅទីនោះ។

ប្រជាពលរដ្ឋនៅក្បែរខាងទីតាំងនោះនិយាយថា គយនៅទីនេះមិនបានត្រួតពិនិត្យទំនិញ អ្វីឲ្យច្បាស់លាស់នោះទេ គឺយកតែលុយប៉ុណ្ណោះ។ ទំនិញដែលនាំចូលពីប្រទេស វៀតណាម ដូចជាគ្រឿងឧបភោគ បរិភោគបន្លែបង្ការ គ្រឿងសំណង់ ជារួមឲ្យតែទំនិញគ្រប់ប្រទគឺគយដឹងតែពីយកលុយ មិនបានត្រួតពិនិត្យអ្វីឡើយ។ ដូច្នេះវាបង្កហានិភ័យ និងគ្រោះថ្នាក់យ៉ាងខ្លាំងសម្រាប់សុខភាព ប្រជាពលរដ្ឋ។

ការលើកឡើងបែបនេះ អង្គភាពសៀមរាប ប៉ុស្តិ៍ នៅពុំទាន់ទទួលបានការបំភ្លឺ ពីមន្ត្រីគយនៅចំណុចខាងលើនៅឡើយទេ ដោយពុំមានលេខទំនាក់ទំនង៕ដោយនាគខៀវ

ថ្លែងក្នុងពិធីសំណេះសំណាល ជាមួយកម្មករ-និយោជិត តាមរោងចក្រ-សហគ្រាស នៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល នៅថ្ងៃសុក្រ ទី១ ខែកញ្ញា ឆ្នាំ២០២៣ ថាឯឧត្តមបណ្ឌិត ហ៊ុន ម៉ាណែត នាយករដ្ឋមន្ត្រី បានផ្តាំផ្ញើ និងដាស់តឿនដល់រដ្ឋមន្ត្រីទាំងអស់ ត្រូវខិតខំពង្រឹងសមត្ថភាព និងប្រសិទ្ធភាពស្ថាប័ន និងខិតខំថែរក្សាសាមគ្គីភាពផ្ទៃក្នុង ទើបយើងរស់ ព្រោះយើងអាចបញ្ចប់សង្គ្រាម គឺដោយសារយើងឈរលើស្មារតី នៃការយោគយល់ និងអធ្យាស្រ័យគ្នាខ្ពស់។

នាយករដ្ឋមន្ត្រីហ៊ុន ម៉ាណែត បន្តថា
ចំពោះការតែងតាំង និងចាត់តាំងមន្ត្រី ត្រូវពិចារណាលើ គុណភាព និងអតីតភាព ដោយឈរលើការផ្ស៊ាំ និងបន្ស៊ីគ្នា រវាងមន្ត្រីចាស់ និងមន្ត្រីថ្មី ព្រោះថាឈាមចាស់ និងឈាមថ្មី គឺជាឈាមតែមួយ។

ខាងក្រោមប្រសាសន៍សំខាន់ៗ.របស់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត៖

ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងបើកពិធីសំណេះសំណាលជាមួយបងប្អូនកម្មករ-និយោជិត ដោយសង្កត់ធ្ងន់ទៅលើការគិតគូរបស់រាជរដ្ឋាភិបាលចំពោះប្រជាជន រាប់ចាប់ពីពេលមានផ្ទៃពោះ រហូតដល់ក្រោយពេលសម្រាលបុត្រ ដែលជាការធានាបាននូវផលប្រយោជន៍ជូនប្រជាជនឲ្យរស់រវើក និងល្អប្រសើរ និង ការធានានូវសមត្ថភាពក្នុងការប្រកួតប្រជែងរបស់ប្រជាពលរដ្ឋ។ ក្នុងន័យនេះ ដរាបណាបងប្អូនជឿទុកចិត្ត និងបោះឆ្នោតជូនគណបក្សប្រជាជនកម្ពុជា សម្រាប់បន្តដឹកនាំ នោះគោលនយោបាយបង្កើតការងារ និងកែលម្អជីវភាពប្រជាពលរដ្ឋ និងត្រូវបន្តជានិច្ច។ សូមឲ្យភាសា “សម្លេងបេះដូង” ការជឿទុកចិត្តចំពោះ សម្តេចតេជោ និងថ្នាក់ដឹកនាំនៃគណបក្សប្រជាជនកម្ពុជា បន្តមានជានិច្ច ដូចអ្វីដែលបងប្អូនបានផ្តល់ជូនរួចមកហើយ តាមរយៈការបោះឆ្នោតជូនគណបក្សប្រជាជនកម្ពុជា យ៉ាងភ្លូកទឹកភ្លូកដី កាលពីថ្ងៃទី២៣ កក្កដា ២០២៣កន្លងទៅ។

បន្ថែមពីនេះ ឯកឧត្តមកិត្តិទេសាភិបាលបណ្ឌិតនាយករដ្ឋមន្ត្រី ក៏បានគោរពថ្លែងអំណរគុណចំពោះ សម្តេចតេជោ និងថ្នាក់ដឹកនាំជាច្រើនដែលបានលះបង់តស៊ូគ្រប់បែបយ៉ាងក្នុងការរំដោះប្រទេសជាតិពីសង្គ្រាម បានបង្រួបបង្រួមទឹកដី និងបានកសាងសមិទ្ធផលជាច្រើនរាប់មិនអស់ ជូនជាតិ និងប្រជាជន។ អ្វីដែលជាការសោកស្តាយរបស់ សម្តេចតេជោ តាមរយៈការផ្តល់បទសម្ភាសន៍កាលពីថ្ងៃទី២២ ខែសីហា ឆ្នាំ២០២៣ នៅវិមានរដ្ឋសភា គឺសម្តេចតេជោ មានការសោកស្តាយចំពោះខណៈដែលកម្ពុជាបានរងគ្រោះក្នុងដំណាក់កាលនៃការរាលដាលជំងឺកូវីដ-១៩ ដែលបានធ្វើឲ្យកំណើនសេដ្ឋកិច្ច ដែលធ្លាប់តែកើនរៀងរាល់ឆ្នាំក្នុងរង្វង់ ៧% ត្រូវបានធ្លាក់ចុះ ហើយបង្កផលប៉ះពាល់ជីវភាពប្រជាពលរដ្ឋ ហើយផែនការថវិកាបម្រុងទុករបស់រាជរដ្ឋាភិបាលសម្រាប់អភិវឌ្ឍហេដ្ឋារចនាសម្ព័ន្ធ និងគម្រោងអាទិភាពផ្សេងៗត្រូវបានផ្អាក ដោយបង្វែរមកជាថវិកាសម្រាប់អន្តរាគមន៍បន្ទាន់សម្រាប់ជួយសង្គ្រោះ និងការពារអាយុជីវិតប្រជាជនជំនួសវិញ។ អ្វីដែលជាការគិតគូរ ការដឹកនាំ និងការផ្តល់ជាអាទិភាពរបស់ថ្នាក់ដឹកនាំ និងគណបក្សប្រជាជន គឺជាការដឹកនាំប្រទេសជាតិ ការពង្រឹងគុណភាព និងការលើកស្ទួយជីវភាពប្រជាជនប្រកបដោយចីរភាព តាមរយៈការជួយប្រជាពលរដ្ឋឲ្យមានជីវភាពល្អ ការបង្កើតការងារឲ្យបានច្រើន ការធានាសមធម៌ និងភ្ជាប់ជាមួយនឹងយុត្តិធម៌សង្គម ឈរលើសិទ្ធិសេរីភាព និងការរស់នៅថ្លៃថ្នូរ។ ជាមួយគ្នានេះ គោលការណ៍ក្នុងការបង្កើតការងារ គឺជាកិច្ចការសំខាន់ ទាំងបរិមាណ និងគុណភាព ដោយបរិមាណ ត្រូវគិតទាំងចំនួន និងទីតាំង ហើយគុណភាព គឺការងារអនុវត្តទៅតាមច្បាប់៖ ការពារសិទ្ធិសេរីភាពរបស់កម្មករ-និយោជិត, បង្កើនយន្តការអធិការកិច្ច, លើកកកម្ពស់សុខមាលភាពរបស់កម្មករ-និយោជិត និងប្រជាពលរដ្ឋ, លើកកម្ពស់ជីវភាពរបស់ប្រជាពលរដ្ឋ និងប្រាក់បៀវត្ស ប្រភេទការងារ និងសុខសុវត្ថិភាពការងារ។

បន្ថែមពីនេះ ឯកឧត្តមកិត្តិទេសាភិបាលបណ្ឌិតនាយករដ្ឋមន្ត្រី ក៏បានរំលឹកឡើងវិញផងដែរនូវគោលនយោបាយអាទិភាពទាំង ៦ និងទិសដៅការងារទាំង ៤ ដូចដែលបានបញ្ជាក់កាលពីជំនួបជាមួយកម្មករ-និយោជិត នៅថ្ងៃទី២៩ ខែសីហា ឆ្នាំ២០២៣ នៅតំបន់ព្រៃស្ពឺ ខណ្ឌពោធិ៍សែនជ័យកន្លងទៅ ហើយជាក៏បានដាក់ចេញបន្ថែមនៅចក្ខុវិស័យក្នុងការយកចិត្តទុកដាក់ចំពោះបងប្អូនដែលចាត់ទុកជាអ្នកបម្រើការ និងប្រកបរបរចិញ្ចឹមជីវិតក្នុងសេដ្ឋកិច្ចក្រៅប្រព័ន្ធ តាមរយៈការពិនិត្យលទ្ធភាពជួយឲ្យសេដ្ឋកិច្ចក្រៅប្រព័ន្ធ អាចចូលក្នុងប្រព័ន្ធ គឺដើម្បីឲ្យដឹងពីទំហំនៃការជួយ ហើយជួយឲ្យចំគោលដៅ។ ជាឧទាហរណ៍ និងគំនិតយោបល់ ឯកឧត្តមកិត្តិទេសាភិបាលបណ្ឌិតនាយករដ្ឋមន្ត្រី បានលើកឡើងអំពីគោលការណ៍មួយចំនួនក្នុងការរៀបចំ៖ ១. ការលើកលែងការផាកពិន័យ និងបំណុលសម្រាប់សេដ្ឋកិច្ចក្រៅប្រព័ន្ធណាមួយដែលមានបំណងចូលរួម និងចុះបញ្ជីត្រឹមត្រូវតាមគោលការណ៍លក្ខខណ្ឌ និងច្បាប់តម្រូវ, ២. លើកទឹកចិត្តផ្នែកពន្ធដារ និងចុះបញ្ជី លើកលែងការផាកពិន័យ និងទោសទណ្ឌផ្សេងៗ។

មុននឹងបញ្ចប់ ឯកឧត្តមកិត្តិទេសាភិបាលបណ្ឌិតនាយករដ្ឋមន្ត្រី បានគូសបញ្ជាក់ថា រាជរដ្ឋាភិបាលថ្មី ដែលកើតចេញពីការបោះឆ្នោត ទោះបីជាតួអង្គនៃការដឹកនាំក្រសួង ស្ថាប័នថ្មីក៏ដោយ តែលំនឹង និងគោលនយោបាយ គឺមិនផ្លាស់ប្តូរទេ។ កន្លងមកមានការចាប់អារម្មណ៍ និងវិភាគជាច្រើនអំពីករណីក្បាលម៉ាស៊ីនដឹកនាំរបស់រាជរដ្ឋាភិបាល ឯកឧត្តមកិត្តិទេសាភិបាលបណ្ឌិតនាយករដ្ឋមន្ត្រី បានធ្វើការបង្ហាញច្បាស់អំពីគោលបំណងសំខាន់ៗ និងសារៈប្រយោជន៍ដូចជា៖ ១. ដើម្បីធានាការអនុវត្តគោលនយោបាយឲ្យបានប្រសិទ្ធភាព តម្រូវឲ្យមានតួអង្គជាអ្នកអនុវត្ត ដែលជាក្បាលម៉ាស៊ីនរាជរដ្ឋាភិបាល, ២.ចំពោះទីប្រឹក្សា ជំនួយការ យើងឈរលើគោលការណ៍ រក្សាចាស់ បង្កើនថ្មី ហើយជាទម្លាប់អ្វីដែលយើងបានធ្វើរាប់អាណត្តិមកហើយ គឺដើម្បីធានាប្រសិទ្ធភាពការងារ និងយន្តការនៃការលើកទឹកចិត្តសម្រាប់មន្ត្រីដែលជាថ្នាក់ដឹកនាំចាស់ មានស្នាដៃ តែនៅអាចមានលទ្ធភាពធ្វើការ សម្រាប់បន្តធ្វើការ និងជាការផ្តល់កិត្តិយស ព្រោះនេះ គឺជាគុណធម៌ក្នុងការរៀបចំមន្ត្រី។ ការរៀបចំបែបនេះ គឺការរៀបចំតែងតាំងមន្ត្រីភាគច្រើន ជាមន្ត្រី ដែលនៅជាមួយយើង ហើយនៅជាមួយគ្នាយូរឆ្នាំ ពិតបង្ហាញច្បាស់ថាយើងមិនចោលអ្នកដែលធ្លាប់ធ្វើការជាមួយអស់រយៈកាលជាង ៤០ឆ្នាំមកនេះ ហើយរាជរដ្ឋាភិបាល គឺមិនមានទម្លាប់ឡើងលើទូករួចដុតស្ពានចោលនោះទេ៕ដោយនាគខៀវ

ភ្នំពេញ៖លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសថ្ងៃទី១ ខែកញ្ញា ឆ្នាំ២០២៣ នេះបានប្រកាសប្រកាសព័ត៌មាន ជូនសាធារណជន អ្នកសារព័ត៌មាន និងបុគ្គលពាក់ព័ន្ធជ្រាបថា៖ កងរាជអាវុធហត្ថ បានឃើញតាមបណ្តាញសារព័ត៌មានមួយចំនួន ធ្វើការផ្សព្វផ្សាយរូបភាពវីដេអូនិងខ្លឹមសារប៉ះពាល់ដល់កិត្តិយសរបស់យោធិននៃកងរាជអាវុធហត្ថខេត្តឧត្តរមានជ័យ៊

អ្នកនាំពាក្យកងរាជអាវុធហត្ថលើផ្ទៃប្រទេស បានអះអាងថា
១-តាមសេចក្តីរាយការណ៍របស់លោកឧត្តមសេនីយ៍ត្រី លី ដារិទ្ធ មេបញ្ជាការកងរាជអាវុធហត្ថខេត្តឧត្តរមានជ័យ បានឱ្យដឹងថា “នៅវេលាម៉ោង១៧ និង០០នាទី ថ្ងៃទី២១ ខែសីហា ឆ្នាំ២០២៣ មានពាក្យបណ្ដឹងពីឈ្មោះ ខុន សុចាន់ ភេទប្រុស អាយុ៣៧ ឆ្នាំជនជាតិខ្មែរ រស់នៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ ត្រូវបានក្រុមអ្នកសារព័ត៌មាន មានគ្នាចំនួន៣នាក់ ជិះរថយន្ត១គ្រឿង តាមថតឡានដឹកឈើកែឆ្នៃ ធ្វើសិប្បកម្ម បន្តិចបន្តួចរបស់ខ្លួន (សុចាន់) ហើយបានទារលុយចំនួន២លានរៀល ជាថ្នូរមិនបង្ហោះផ្សាយតាមបណ្ដាញសង្គម បន្ទាប់មកទារចុះសល់២០០ដុល្លារ ក្រោយមកខ្លួន(សុចាន់) បានចរចារចុះនៅសល់៣០ម៉ឺនរៀល ខណៈនោះក្រុមអ្នកសារព័ត៌មាន បានយល់ព្រមដោយឲ្យដាក់លុយ តាមវីង ដែលមានលេខទូរស័ព្ទ ០៧១៥៥២២០៥២។

ក្រោយទទួលបានបណ្ដឹង មន្ត្រីនគរបាលយុត្តិធម៌ បានរាយការណ៍សុំការដឹកនាំ សម្របសម្រួលពី ឯកឧត្តម តូច សុភក្តី ព្រះរាជអាជ្ញានៃអយ្យការអមសាលាដំបូងខេត្តឧត្តរមានជ័យ។ នៅថ្ងៃខែឆ្នាំដដែល កម្លាំងកងរាជអាវុធហត្ថ បានចុះទៅកន្លែងវេរលុយ (វីង) ដែលក្រុមអ្នកសារព័ត៌មាន ទាំង០៣នាក់ កំពុងដកប្រាក់នៅចំណុចក្បែររង្វង់មូលស្ថិតក្នុងភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ពេលកម្លាំងក៏បានធ្វើការឃាត់ខ្លួនករណីជាក់ស្តែង។

ជនសង្ស័យចំនួន៣នាក់រួមមាន៖ ១-ឈ្មោះ ផៃ សោភ័ណ្ឌ ភេទប្រុស អាយុ៤៣ឆ្នាំ មុខរបរអ្នកសារព័ត៌មានមាន (គេហទំព័រ រស្មីភ្នំដងរែក) ទីលំនៅភូមិទំនប់ថ្មី ឃុំត្រពាំងប្រាសាទ ស្រុកត្រពាំងប្រាសាទ ខេត្តរមានជ័យ។ ២-ឈ្មោះ នៅ សារួន ភេទប្រុស អាយុ៥២ឆ្នាំ មុខរបរអ្នកសារព័ត៌មាន (គេហទំព័រ រស្មីភ្នំដងរែក) ទីលំនៅភូមិរំដួល ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។ ៣-ឈ្មោះ ឈិន សុជាតិ ភេទប្រុស អាយុ៥៧ឆ្នាំ មុខរបរអ្នកសារព័ត៌មានរស្មីអង្គរ រស់នៅភូមិស្រះជ្រៃ ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។

ចាប់យកវត្ថុតាង៖ ១-រថយន្តម៉ាក នីសាន់ (ចង្កូតស្តាំ) ស្លាកលេខODM1050 ពណ៌ប្រាក់០១គ្រឿង (សូមបញ្ជាក់: ស្លាកលេខនិងក្រដាសបង់ពន្ធផ្លូវដែលបំពាក់លើរថយន្ត គឺក្លែងក្លាយ), ២-ម៉ាស៊ីនថត (កាមេរ៉ា)០១គ្រឿង, ៣-ទូរស័ព្ទ០៤គ្រឿង។

ជនសង្ស័យចំនួន៣នាក់និងវត្ថុតាង បានបញ្ជូនទៅអយ្យការអមសាលាដំបូងខេត្តឧត្តរមានជ័យតាមនីតិវិធី។ អ្នកនាំពាក្យកងរាជអាវុធហត្ថលើផ្ទៃប្រទេស សូមបញ្ជាក់ថា ជនសង្ស័យទាំង៣នាក់ មានសិទ្ធិពេញលេញចំពោះមុខច្បាប់ ក្នុងការតវ៉ារឿងក្តីនេះ។

២-នៅថ្ងៃទី២៥និងថ្ងៃទី២៩ ខែសីហា ឆ្នាំ២០២៣ មានគេហទំព័រស្រទាប់យុវវ័យនិងសំឡេងឯករាជ្យ បានចុះផ្សាយដោយចោទប្រកាន់មកលើកងរាជអាវុធហត្ថខេត្តឧត្តរមានជ័យថា ឈ្មោះ ចាន់ (ដើមបណ្តឹង) ឲ្យប្រាក់ចំនួន៣០ម៉ឺនរៀល ទៅឱ្យក្រុមសារព័ត៌មាន ៣នាក់ខាងលើ ជាលក្ខណៈមនោសញ្ចេតនា មិនគួរចាប់វាយខ្នោះ។

សារព័ត៌មានខាងលើ បានកាត់តរូបភាពដាក់ជាលក្ខណៈដឹកឈើទ្រង់ទ្រាយធំដែលពុំមែនជាការពិតវាជារូបភាពចាស់ៗកន្លងទៅ។ អ្នកនាំពាក្យកងរាជអាវុធហត្ថលើផ្ទៃប្រទេស សុំឱ្យសារព័ត៌មានទាំង២ខាងលើ និងសារព័ត៌មានដែលមានការផ្សព្វផ្សាយករណីនេះ ធ្វើការកែតម្រូវតាមច្បាប់ស្តីពីរបបសារព័ត៌មាន។

៣-កងរាជអាវុធហត្ថ នៅតែរងចាំទទួលយកនូវព័ត៌មានដែលពាក់ព័ន្ធនឹងកងរាជអាវុធហត្ថ និងការផ្តល់មតិក្នុងន័យស្ថាបនាដែលជាធាតុចូល៕ដោយនាគខៀវ

ភ្នំពេញ៖រដ្ឋសភាជាតិ បានចេញសេចក្ដីប្រកាសលទ្ធផលសម័យប្រជុំរដ្ឋសភា លើកទី១ នីតិកាលទី៧ ថ្ងៃទី៣១ ខែសីហា ឆ្នាំ២០២៣។ ក្នុងសេចក្ដីប្រកាសព័ត៌មាននេះ រដ្ឋសភាបានទទួលស្គាល់ សុពលភាព សំណាងរាស្ត្រថ្មី ចំនួន ២៩ រូប៕

ភ្នំពេញ៖មន្ត្រីស៊ើបអង្កេតសាខា ក.ប.ប.បានអះអាងថា សាច់បង្កកខូចគុណភាព ដែលឈ្មួញលួចនាំចូល តាមច្រករបៀង ប្រមាណ ៣២៥គីឡូក្រាម ត្រូវបានមន្ត្រីជំនាញដុតកម្ទេចចោល។

ការដុតកម្ទេចចោលបែបនេះ នៅថ្ងៃទី២៩ ខែសីហា ឆ្នាំ២០២៣ ដោយមន្ត្រីស៊ើបអង្កេតសាខា ក.ប.ប. ខេត្តកំពត សហការជាមួយសាខាគយនិងរដ្ឋាករខេត្តកំពត។

មន្ត្រីបានបន្តថាកាលពីយប់ថ្ងៃទី២៨ ខែសីហា ឆ្នាំ២០២៣ បានចុះត្រួតពិនិត្យទំនិញ សាច់បង្កក មានសរុបចំនួន ៩កញ្ចប់ ស្មើនឹង ៣២៣គីឡូក្រាម។ ទំនិញទាំងនេះត្រូវបានឈ្មួញទុច្ចរិតលួចនាំចូលពីប្រទេសវៀតណាមតាមទូកនៃច្រករបៀងព្រែកចាក ខេត្តកំពត។

មន្ត្រីជំនាញបញ្ជាក់ថា យោងតាមលទ្ធផលនៃការត្រួតពិនិត្យ ទំនិញសាច់បង្កកទាំងនោះគឺខូចគុណភាព និងបានសម្រេចមតិជាឯកច្ឆន្ទជាមួយមន្ត្រីនៃសាខា គយនិងរដ្ឋាករ ដុតកម្ទេចចោលនូវទំនិញទាំងនោះ នៅទីតាំងដីតារាយន្តហោះចាស់ ក្នុងភូមិអូរតូច សង្កាត់អណ្តូងខ្មែរ ក្រុងកំពត ដើម្បីការពារកុំឱ្យមានការចរាចរទំនិញខូចគុណភាពទាំងនោះទៅក្នុងទីផ្សារ។ គួរបញ្ជាក់ផងដែរថា មន្ត្រីជំនាញបាននិងកំពុងបន្តនីតិវិធីចំពោះឈ្មួញទុច្ចរិតនោះផងដែរ ស្របតាមច្បាប់ជាធរមាន៕ដោយនាគខៀវ

សម្ដេចពិជ័យសេនា ទៀ បាញ់ បានជំរុញឲ្យប្រធានគណបក្សខេត្ត យកចិត្តទុកដាក់ខ្ពស់ និងកិច្ចសហការល្អ ជាមួយគ្រប់ស្ថាប័នពាក់ព័ន្ធ ក្នុងការអនុវត្តផែនការណែនាំ និងគោលការណ៍របស់រាជរដ្ឋាភិបាល ចំពោះបងប្អូន ប្រជាពលរដ្ឋដែលបានស្ម័ត្រចិត្ត ចាកចេញពីតំបន់រមណីយដ្ឋានអង្គរ ទៅរស់នៅតំបន់អភិវឌ្ឍន៍រុនតាឯក និងពាក់ស្នែង ត្រូវយកចិត្តទុកដាក់អំពីជីវភាពរស់នៅរបស់បងប្អូនល្អប្រសើរថែមទៀតផង។

សម្ដេចទៀ បាញ់ ជំរុញបែបនេះ ក្នុងឱកាសប្រកាសតែងតាំង លោកប្រាក់ សោភ័ណ ជាប្រធានគណ:កម្មាធិការគណបក្សប្រជាជនកម្ពុជា ខេត្តសៀមរាបថ្មី ជំនួស លោកទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។

សម្ដេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា និង ជាប្រធានក្រុមការងារគណ:កម្មាធិការកណ្តាលចុះជួយមូលដ្ឋានខេត្តសៀមរាប បានផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជូនដល់ថ្នាក់ដឹកនាំ សមាជិក សមាជិកា គណបក្សទាំងអស់ ដែលមានវត្តមានក្នុងពិធីប្រកាសនេះ។

សម្តេចទៀ បាញ់ បានថ្លែងថា ក្រោមការដឹកនាំរបស់ សម្តេចតេជោ ហ៊ុន សែន បានធ្វើឲ្យប្រទេសជាតិមានសុខសន្តិភាព មានការអភិវឌ្ឍន៍លើគ្រប់វិស័យ បើទោះបីជាប្រទេសជាតិ ស្ថិតក្នុងបរិបទជួបប្រទះបញ្ហា ដោយសារការឆ្លងរីករាលដាល ជម្ងឺកូវីដ-១៩ ក៏ដោយ គឺសម្តេចតេជោ ហ៊ុន សែន ក្នុងតួនាទីជានាយករដ្ឋមន្ត្រី នៃកម្ពុជា និងជាប្រធានគណបក្សប្រជាជនកម្ពុជា នៅតែខិតខំពុះពារស្តារឡើងវិញនូវវិបត្តិផ្សេងៗ ជាពិសេសខិតខំស្វែងរកវ៉ាក់សាំងចាក់ ជូនប្រជាពលរដ្ឋទូទាំងប្រទេស ដើម្បីធ្វើយ៉ាងណាការពារសុខមាលភាព និងអាយុជីវិតប្រជាពលរដ្ឋ រួមនឹងការស្តារសេដ្ឋកិច្ចឡើងវិញ និងឈានទៅឲ្យបើកដំណើរការប្រទេសជាធម្មតា ទៀតផង។

សម្តេចទៀ បាញ់ ស្នើឲ្យ ប្រធានគណបក្សខេត្តថ្មី ត្រូវផ្តោតលើការងារ កសាងកម្លាំងថ្មី និង ពង្រីកបន្ថែមនូវសមាជិក គណបក្ស បន្តទៀត ជាពិសេសក្នុងស្រទាប់យុវជន គឺសំដៅឈានទៅយកប្រៀបឈ្នះនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងការបោះឆ្នោតជ្រើសតាំងតំណាងរាស្ត្រ នៅអាណត្តិ បន្តបន្ទាប់ របស់ គណបក្សប្រជាជនកម្ពុជា សម្រាប់បន្តអាណត្តិដឹកនាំប្រទេស ដើម្បីថែរក្សសន្តិភាព និងការអភិវឌ្ឍ ឲ្យមានការរីកចម្រើន បន្តទៅមុខទៀត។

សម្តេច ក្នុងនាមជាអនុប្រធានគណបក្សប្រជាជនកម្ពុជា សូមសម្តែងនូវអំណរគុណ ដល់សមាជិក សមាជិកា និងថ្នាក់ដឹកនាំគ្រប់ជាន់ថ្នាក់នៃ គណបក្សប្រជាជនកម្ពុជា ក៏ដូចប្រជាពលរដ្ឋ ទូទាំង ខេត្តសៀមរាប ដែលបានអញ្ជើញទៅបោះឆ្នោត គាំទ្រជូនគណបក្សប្រជាជនកម្ពុជា នីតិកាលទី៧ ដើមី្បបន្តកិច្ចដឹកនាំ និងអភិវឌ្ឍប្រទេស ឲ្យមានការរីកចម្រើនលើគ្រប់វិស័យនៅគ្រប់មូលដ្ឋាន។

សូមជម្រាបថា លោកប្រាក់ សោភ័ណអនុប្រធាន គណ:កម្មាធិការគណបក្សប្រជាជនកម្ពុជាខេត្តសៀមរាប ត្រូវបាន សម្តេចហ៊ុន សែន ប្រធាន គណបក្សប្រជាជនកម្ពុជា សម្រេចតែងតាំងដំឡើងឋាន:ជាប្រធាន គណ:កម្មាធិការគណបក្សខេត្តសៀមរាប៕ដោយនាគខៀវ

ខេត្តត្បូងឃ្មុំ៖ទីតាំងទីតាំងផលិតបារីក្លែងក្លាយមួយកន្លែងត្រូវបានសមត្ថកិច្ចចុះបង្ក្រាប។ ការបង្ក្រាបធ្វើឡើង នៅថ្ងៃទី២៨ ខែសីហា ឆ្នាំ២០២៣ ដោយកម្លាំងគយចល័តតំបន់៦ និង
កម្លាំងឣាវុធហត្ថខេត្ត ស្រុកមេមត់ មានការសម្របសម្រួលពី លោកសូរ សុវិទ្យា ព្រះរាជអាជ្ញារង អមសាលាដំបូងខេត្ត។

សមត្ថកិច្ចក្នុងហេតុការណ៍បង្ក្រាបបានប្រាប់ថាការបង្ក្រាបទីតាំងផលិតបារីក្លែងក្លាយ ស្ថិតនៅភូមិដារកណ្តាល ឃុំដារ ស្រុកមេមត់។ ក្នុងប្រតិបត្តិការនេះ សមត្ថកិច្ចបានរកឃើញ ម៉ាស៊ីនផលិត បារីចំនួន០២គ្រឿង.ម៉ាស៊ីនវេចខ្ចប់បារី០២គ្រឿង .បារីម៉ាក ESSE ចំនួន១,២៧៣ប៊ិច. បារីម៉ាក HUANG HELOU ចំនួន១៩០ប៊ិច. សំបកវិចខ្ចប់បារី ចំនួន២,៤០៨កេស ស្មើ៥២,៩០០គីឡូក្រាម (គ្មានបិតត្រាពន្ធគយ)។

បច្ចុប្បន្នវត្ថុតាង ត្រូវបានកម្លាំងជំនាញ នាំយកទៅរក្សាទុកនៅផែស្ងួត ច្រកអន្តរជាតិត្រពាំផ្លុង ភូមិត្រពាំងផ្លុង១ ឃុំត្រពាំងផ្លុង ស្រុកពញាក្រែក៕

បណ្ឌិតនាយករដ្ឋមន្ត្រី ហ៊ុន ម៉ាណែត នៅអង្គារនេះបានជួបសំណេះសំណាល ជាមួយកម្មករ-និយោជិត តាមរោងចក្រ-សហគ្រាសចំនួន ១៨,០០០នាក់ នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ។

នាយករដ្ឋមន្រ្តី ហ៊ុន ម៉ាណែត បានពាំនាំការផ្តាំផ្ញើការសួរសុខទុក្ខពីសំណាក់ សម្តេចតេជោ និងសម្តេចកិត្តិព្រឹទ្ធបណ្ឌិត ជូនដល់បងប្អូនកម្មករ-និយោជិតទាំងអស់ប្រកបដោយមនោសញ្ចេតនាជ្រាលជ្រៅ និងជាទីស្រលាញ់។ ជាមួយគ្នានេះ លោកបណ្ឌិត បានគូសបញ្ជាក់អំពីគុណបំណាច់នៃការតស៊ូ ដឹកនាំលះបង់ ដើម្បីកម្ពុជារបស់ថ្នាក់ដឹកនាំជំនាន់មុន ហើយបានបន្សល់ទុកសម្រាប់ថ្នាក់ដឹកនាំបច្ចុប្បន្ន នូវសមិទ្ធផលជាច្រើន សម្រាប់ប្រជាជនកម្ពុជាទាំងមូលនិយាយជារួម ព្រមទាំងជាពិសេសសម្រាប់បងប្អូនកម្មករ-និយោជិត បាន និង កំពុងទទួលបាន ដែលកើតចេញពីការដឹកនាំដោយផ្ទាល់របស់ សម្តេចតេជោ និងថ្នាក់ដឹកនាំគ្រប់ក្រសួង ស្ថាប័ន រួមទាំងក្រសួងការងារ និងបណ្តុះបណ្តាលវិជ្ជាជីវៈផងដែរ។ សមិទ្ធផល និងអត្ថប្រយោជន៍នាថ្ងៃនេះ គឺមិនមែនកើតមកដោយចៃដន្យនោះទេ ហើយជាសមិទ្ធផលដែលកើតចេញពីការខិតខំប្រឹងប្រែងរបស់យើងគ្រប់គ្នា រួមគ្នាជាមួយនឹងរាជរដ្ឋាភិបាលដែលជាប្រតិបត្តិករក្នុងការអនុវត្តគោលនយោបាយ និងយន្តការផ្សេងៗសំដៅបម្រើដល់ផលប្រយោជន៍ជូនជាតិ និងប្រជាជន ហើយជាគោលការណ៍គ្រឹះនៃការបែងចែកផលលាភប្រកបដោយសមធម៌។

បន្ថែមជាមួយគ្នានេះ, បណ្ឌិតនាយករដ្ឋមន្ត្រី ក៏បានឆ្លៀតឱកាសដើម្បីថ្លែងអំណរគុណដល់បងប្អូនប្រជាជនខ្មែរច្រើនលើសលប់ បន្តផ្តល់ជំនឿជឿជាក់ និងផ្តល់ឱកាសដល់គណបក្សប្រជាជនកម្ពុជា តាមរយៈការចេញទៅបោះឆ្នោតយ៉ាងច្រើនលើសលប់ ដោយមិនជឿលង់នឹងការញ៉ុះញ៉ង់ ឬឧបាយកលអាក្រក់ណាមួយ ដោយមានអត្រាអ្នកចេញទៅបោះឆ្នោតចំនួន ៨៤,៥៨% ក្នុងនោះចំនួនអ្នកដែលបានបោះឆ្នោតជូនគណបក្សប្រជាជនកម្ពុជា ៨២,៣០% ដើម្បីឱ្យគណបក្សប្រជាជនកម្ពុជា បានបន្តដឹកនាំ និង បម្រើ ការពារ តាមរយៈការបន្តបង្កើតផលប្រយោជន៍បន្ថែមទៀតសម្រាប់ជាតិ និងប្រជាជន។ យន្តការការដឹកនាំ កម្មវិធីនយោបាយ និងគោលនយោបាយ របស់គណបក្ស គឺក្លាយជាយន្តការ កម្មវិធីនយោបាយ និងគោលនយោបាយ របស់រាជរដ្ឋាភិបាលសម្រាប់ឱ្យយកទៅអនុវត្តក្នុងការបម្រើឧត្តមប្រយោជន៍សម្រាប់ជាតិ និងប្រជាជន។ ក្នុងន័យនេះ និងឈរលើជំនឿចិត្ត ការស្រលាញ់ និងការគាំទ្ររបស់ប្រជាជនចំពោះគណបក្សប្រជាជនកម្ពុជា លោកបណ្ឌិតហ៊ុន ម៉ាណែត បានធ្វើការប្តេជ្ញាចិត្តខ្ពស់ដើម្បីដឹកនាំ អនុវត្តកម្មវិធីនយោបាយ ជាពិសេសការធានាទាំង៥ គោលដៅអាទិភាពទាំង៦ និងយុទ្ធសាស្ត្របញ្ចកោណ- ដំណាក់កាលទី១ ឱ្យសម្រេចបានជោគជ័យ ហើយផ្តល់ផលប្រយោជន៍ពិតប្រាកដចំពោះជាតិ និងប្រជាជន។

ឆ្លៀតក្នុងឱកាសនេះផងដែរ នាយករដ្ឋមន្ត្រី ក៏បានធ្វើការគូសបញ្ជាក់ផងដែរ អំពីមតិមួយចំនួនដែលបានលើកឡើងដោយចោទរាជរដ្ឋាភិបាលថ្មី កើតចេញពីការបោះឆ្នោតក្លែងក្លាយ ហើយមិនមានអន្តរជាតិ ទទួលស្គាល់ ដោយលោកបណ្ឌិត ឱ្យអ្នកទាំងនោះទៅមើលទិន្នន័យ នៃអ្នកចេញទៅបោះឆ្នោត ហើយជាពិសេសត្រូវគោរពសិទ្ធិអ្នកបោះឆ្នោត ចំនួនជាង ៨,២លាននាក់ ស្មើនឹង ៨៤,៥៨% ហើយអ្នកដែលបានបោះឆ្នោត ជូនគណបក្សប្រជាជនកម្ពុជា ជាង ៦លាននាក់ ស្មើនឹង ៨២,៣០% ដែលនេះបានបង្ហាញច្បាស់អំពីគោលការណ៍ប្រជាធិបតេយ្យរឹងមាំ និងមានភាពចាស់ទុំ ហើយបានផ្តល់សិទ្ធិស្របច្បាប់ដែលមានចែងក្នុងរដ្ឋធម្មនុញ្ញសម្រាប់គណបក្សប្រជាជនកម្ពុជាដឹកនាំប្រទេស។

ជាមួយគ្នានេះ បណ្តាប្រទេសជាច្រើនបានផ្ញើសារអបអរសាទរដល់ លោកបណ្ឌិត ដែលបានបង្ហាញពីមនោសញ្ចេតនា និងទំនាក់ទំនងកិច្ចសហប្រតិបត្តិការ ហើយជាពិសេសស្ថាប័នសំខាន់ៗ មួយចំនួនក៏បានបន្តមកជួបផ្ទាល់ជាមួយលោកមកធ្វើការជាមួយ និងមិនមានប្រទេសណាមួយដកចេញនូវអង្គទូតរបស់ខ្លួននោះឡើយ ហើយអ្វីដែលពិសេសនាថ្ងៃទី២១ កញ្ញា ២០២៣ ខាងមុខនេះ។ លោកនឹងឡើងថ្លែងសន្ទុរកថាក្នុងនាមកម្ពុជា ដែលជារដ្ឋអធិបតេយ្យស្មើមុខស្មើមាត់ ឋានៈជាសមាជិកអង្គការសហប្រជាជាតិ នៅក្នុងកិច្ចប្រជុំមហាសន្និបាតអង្គការសហប្រជាជាតិនាទីក្រុងញ៉ូយ៉ក សហរដ្ឋអាមេរិក។

ទន្ទឹមនឹងនេះដែរ នាយករដ្ឋមន្ត្រី បានដាក់ចេញនូវការណែនាំ និងប្រគល់ភារកិច្ចជូនដល់ក្រសួងការងារ និងបណ្តុះបណ្តាលវិជ្ជាជីវៈ និងក្រសួង ស្ថាប័នពាក់ព័ន្ធ ដោយត្រូវអនុវត្តការងារអាទិភាពចំពោះមុខ ក្នុងឆ្នាំ២០២៣ ដូចជា៖
១. ខិតខំសម្របសម្រួលប្រាក់ឈ្នួលអប្បបរមាឱ្យបានល្អ និងឱ្យបាន មុនការឈប់សម្រាកបុណ្យភ្ជុំបិណ្ឌ, ២. រៀបចំលិខិតបទដ្ឋានគតិយុត្តជាបន្ទាន់ ដើម្បីដាក់ឱ្យដំណើរការរបបសន្តិសុខសង្គមផ្នែកថែទាំសុខភាព តាមរបបភាគទានដោយស្ម័គ្រចិត្ត សម្រាប់អ្នកក្នុងបន្ទុកសមាជិក ប.ស.ស., ៣. រៀបចំដាក់ឱ្យដំណើរការកម្មវិធីបណ្តុះបណ្តាលជំនាញបច្ចេកទេសវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យទូទាំងប្រទេសប្រមាណ ១,៥លាននាក់, ៤.ត្រូវជំរុញការអនុវត្តកាតព្វកិច្ចហ្វឹកហ្វឺនកូនជាងឱ្យបានពេញលេញស្របតាមច្បាប់ស្តីពីការងារ, ៥. យកចិត្តទុកដាក់ការអនុវត្តកម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះ ទាំងមុនពេលសម្រាលកូន ពេលសម្រាលកូន និងក្រោយពេលសម្រាលកូនឱ្បបានល្អ និងកាន់តែមានភាពងាយស្រួល និង ៦. បង្កើតឱ្យមានកម្មវិធីប្រកួតប្រជែងលើប្រធានបទ ភាពសុខដមរមនានៅកន្លែងធ្វើការ ដើម្បីប្រែក្លាយ “សហគ្រាសមួយជាសហគមន៍សុខសាន្តមួយ” ចាប់ពីឆ្នាំ២០២៤តទៅ។ សម្រាប់រយៈពេល២ឆ្នាំខាងមុខ ក្រសួងការងារ និងបណ្តុះបណ្តាលវិជ្ជាជីវៈ ត្រូវ៖ ១. សហការជាមួយក្រសួងកិច្ចការនារី ក្រសួងអប់រំ យុវជន និងកីឡា តំណាងភាគីនិយោជក និងតំណាងភាគីកម្មករ-និយោជិត រួមគ្នាសិក្សាលទ្ធភាពបង្កើតទារកដ្ឋាន និងមត្តេយ្យសហគមន៍ នៅតាមតំបន់ដែលមានរោងចក្រ, ២. សហការជាមួយភាគីពាក់ព័ន្ធ ជំរុញការកែលម្អកន្លែងហូបបាយ ឬអាហារដ្ឋាននៅតាមរោងចក្រដែលកំពុងដំណើរឱ្យបានសមរម្យសម្រាប់កម្មករ-និយោជិត, ៣. សហការជាមួយភាគីពាក់ព័ន្ធសិក្សាយន្តការគាំទ្រ និងលើកទឹកចិត្តឱ្យមានការផ្លាស់ប្តូរជាបណ្តើរនូវមធ្យោបាយដឹកជញ្ជូនកម្មករ-និយោជិត ដែលស្របតាមបទដ្ឋានបច្ចេកទេស និងផាកសុខភាពជាងមុន ត្រឹមឆ្នាំ២០២៧ និង ៤. ជំរុញកម្មវិធីធ្វើតេស្តទទួលស្គាល់ជំនាញ ដែលជាឱកាសសម្រាប់បងប្អូនកម្មករ-និយោជិតទាំងក្នុងប្រទេស និងក្រៅប្រទេសអាចមានវិញ្ញាបនបត្រទទួលស្គាល់ជំនាញមួយ ដើម្បីបង្ហាញពីសមត្ថភាព និងកម្រិតជំនាញរបស់ខ្លួន៕