ភ្នំពេញ៖សម្ដេច ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នៅថ្ងៃអង្គារ ថ្ងៃទី៩ ខែកុម្ភៈ ឆ្នាំ២០២១ព្រឹកមិញបានអញ្ជើញជាអធិបតី ពិធីប្រកាសចូលកាន់មុខតំណែង ប្រធានលេខាធិការដ្ឋាន អនុប្រធាន សមាជិក និងក្រុមជំនួយការ នៃលេខាធិការដ្ឋានគ្រប់គ្រងគ្រោះមហន្ដរាយក្រសួងមហាផ្ទៃ ដែលបានប្រារព្ធនៅទីស្តីការក្រសួងមហាផ្ទៃ។

យោងតាមសេចក្ដីសម្រេច ក្រសួងមហាផ្ទៃបានកែសម្រួលសមាភាពលេខាធិការដ្ឋានគ្រប់គ្រងគ្រោះមហន្ដរាយដោយប្រគល់ភារកិច្ចបន្ថែមជូន លោក បណ្ឌិត ស៊ាង ប៊ុនលាង រដ្ឋលេខាធិការក្រសួងមហាផ្ទៃ ជាប្រធានលេខាធិការដ្ឋាន អមដោយអនុប្រធាន និងសមាជិក សមាជិកាមួយចំនួនទៀត។ ក្រសួងក៏បានបង្កើតក្រុមជំនួយការនៃលេខាធិការដ្ឋានគ្រប់គ្រងគ្រោះមហន្ដរាយ ដោយប្រគល់ភារកិច្ចជូនលោកឧត្តមឧត្តមសេនីយ៍ឯក មួង សុធា អគ្គសង្នការរងនៃអគ្គស្នងការដ្ឋាននគរបាលជាតិ ជាប្រធានក្រុមជំនួយការ ដោយមានសមាភាពសមាជិកក្រុមជំនួយការលេខាធិការដ្ឋានមួយចំនួនទៀត។

សម្ដេច ស ខេងបានថ្លែងកោតសរសើរដល់ឯកឧត្តមលោកជំទាវ អស់លោក លោកស្រី ជាថ្នាក់ដឹកនាំ និងសមាជិកលេខាធិការដ្ឋានទាំងអស់ដែលខិតខំបំពេញភារកិច្ចដោះស្រាយបញ្ហាគ្រោះមហន្តរាយផ្សេងៗទាំងកម្រិតផ្ទៃក្នុងក្រសួង និងចូលរួមជាមួយគណៈកម្មាធិការជាតិ។

សម្ដេច បានមានប្រសាសន៍ថា តួនាទីភារកិច្ចរបស់លេខាធិការគ្រោះមហាន្តរាយក្រសួងមហាផ្ទៃមានពីរសំខាន់ ទី១គឺផ្ទៃក្នុងក្រសួង ដែលលេខាធិការដ្ឋានមានតួនាទីភារកិច្ចទទួលជួយជួយសង្គ្រោះមន្រ្តីរាជការស៊ីវិល នគរបាលជាតិ មន្រ្តីពន្ធនាគារ ដែលជួបបញ្ហាគ្រោះមហន្តរាយ និងទី២ គឺចូលរួមជាមួយគណៈកម្មាធិការជាតិគ្រប់គ្រងគ្រោះមហន្តរាយដើម្បីជួយដល់ប្រជាពលរដ្ឋរងគ្រោះ។

ពាក់ព័ន្ធនឹងសំណើរសម្រួលការិយាល័យ និងថវិកាទ្រទ្រង់របស់លេខាធិការដ្ឋានគ្រប់គ្រងគ្រោះមហាន្តរាយ សម្ដេចក្រឡាហោមបានសន្យាខិតខំសម្រួល ដើម្បីឱ្យក្រុមការងារអាចបំពេញភារកិច្ចបានដោយរលូន។ សម្ដេចមានសេចក្ដីសសង្ឃឹម ជាមួយនឹងការត្រៀមខ្លួនចូលរួមអស់ពីលទ្ធភាព ដើម្បីឱ្យលេខាធិការដ្ឋានដំណើរការបានដោយជោគជ័យ។

សូមបញ្ជាក់ថានៅក្នុងឱកាសនោះដែរ សម្ដេច ក៏បានមានប្រសាសន៍ពាក់ព័ន្ធនឹងវឌ្ឍនភាពការងារមួយចំនួនរបស់ក្រសួងមហាផ្ទៃដែរ ដូចការបង្កាទប់ស្កាត់គ្រោះថ្នាក់ចរាចរណ៍, ការប្រយុទ្ធប្រឆាំងអំពើជួញដូរមនុស្ស, បញ្ហាគ្រឿងញៀន និងការដាក់ចេូគោលនយោបាយភូមិឃុំសង្កាត់មានសុវត្ថិភាពជាដើម៕SRP

ខេត្តសៀមរាប៖មន្ទីរព័ត៌មានខេត្តសៀមរាប នៅថ្ងៃទី០៩ ខែកុម្ភៈ ឆ្នាំ២០២១ នេះ មានរៀបចំសិក្ខាសាលាស្តីពី «តួនាទី ភារកិច្ច និងការពង្រឹងសមត្ថភាពផ្នែកទំនាក់ទំនងព័ត៌មាន» ជូនដល់មន្ត្រីព័ត៌មាននិងអ្នកសារព័ត៌មាន មកពីអង្គភាពស្ថាប័ន ផ្សេងៗ ក្នុងខេត្តចំនួនជាង៣០រូប ចូលរួមជាវាគ្មិននិងធ្វើបទបង្ហាញ ដោយ លោក មឿន ឈានណារិទ្ធ ទីប្រឹក្សានៃក្រសួងព័ត៌មាន និងជាសាស្ត្រាចារ្យផ្នែកព័ត៌មាននៅសាកលវិទ្យាល័យកម្ពុជា។

សិក្ខាសាលានេះ​ ក្នុងគោលបំណង ពិភាក្សាជាមួយ អ្នកពាក់ព័ន្ធទាំងអស់ ក្នុងការប្រមូលធាតុចូល និងការចែករំលែកនូវបទពិសោធន៍ ជុំវិញការប្រតិបត្តិការការងាររៀងៗខ្លួន នៃស្ថាប័នពាក់ព័ន្ធ ដោយពិនិត្យពិភាក្សាលើលទ្ធផលសម្រេចបាន រយៈពេលកន្លងមក រួមមាន ចំណុចវិជ្ជមាន អវិជ្ជមាន បញ្ហាប្រឈម ដំណោះស្រាយ និងសំណូមពរ ដើម្បីពង្រឹងសមត្ថភាពដល់ អ្នកសារព័ត៌មាន នៅក្នុងខេត្តសៀមរាប។

លោកលីវ សុខុន ទីប្រឹក្សានៃក្រសួងព័ត៌មាន និងជាប្រធានមន្ទីរព័ត៌មានខេត្តសៀមរាប មានប្រសាសន៍ថា៖ការរៀបចំសិក្ខាសាលានេះ ក្នុងន័យពង្រឹងការគោរពច្បាប់ ក្រមសីលធម៌វិជ្ជាជីវៈអ្នកសារព័ត៌មាន និងបង្ខិតឲ្យជិតគ្នាស៊ីសង្វាក់ ធ្វើការជាមួយគ្នារ វាងអាជ្ញាធរខេត្ត មន្ទីរព័ត៌មានខេត្ត និងអ្នកសារព័ត៌មាន គ្រប់និន្នាការទាំងអស់ក្នុងខេត្តសៀមរាប ។

លោកបន្តថា៖កាលពីឆ្នាំ១៩៩៥ ច្បាប់របបសារព័ត៌មានត្រូវបានបង្កើតឡើង ដើម្បីត្រួសត្រាយផ្លូវសម្រាប់អ្នកសារព័ត៌មាន មានមូលដ្ឋានក្នុងការអនុវត្ត ក្នុងនាមជាអ្នកកាសែត ដែលជាប្រទីប និងជាកាព្វកិច្ចរបស់អ្នកសារព័ត៌មាន។ សកម្មភាព និងសមិទ្ធផល ការងារដែលមន្ទីរព័ត៌មានខេត្ត សម្រេចបានកន្លងមក និងកំពុងអនុវត្តមានជាច្រើដោយ  អនុលោមតាមប្រកាសស្តីពីការប្រព្រឹត្តទៅរបស់ក្រសួងព័ត៌មាន បានកំរិតអំពីតួនាទី និងភារៈកិច្ចឲ្យមន្ទីរព័ត៌មានរាជធានី-ខេត្ត ធ្វើជាសេនាធិការ ក្នុងការសម្របសម្រួល ការងារវិស័យព័ត៌មាន នៅក្នុងដែនសមត្ថកិច្ចរបស់ខ្លួន ជាមួយអាជ្ញាធរដែនដីស្របតាមលិខិតបទដ្ឋានគតិយុត្តរាជរដ្ឋាភិបាល។

ដូចនេះរយៈកាលកន្លងមក មន្ទីរព័ត៌មានខេត្តសៀមរាប បាននឹងកំពុងបំពេញតួនាទីយ៉ាងខ្ជាប់ខ្ជួន ហើយសម្រេចលទ្ធផលបានយ៉ាងល្អប្រសើរ ទៅតាមគោលការណ៍ និងផែនការណែនាំរបស់ក្រសួង និងអាជ្ញាធរខេត្តក្នុងកិច្ចសហការ សម្របសម្រួលរវាងមន្ទីរព័ត៌មានខេត្ត ជាមួយអ្នកសារព័ត៌មានជាតិ និងអន្តរជាតិ ជាពិសេសអ្នកសារព័ត៌មានក្នុងស្ថាប័នរដ្ឋ ជាមួយអ្នកសារព័ត៌មានឯកជន។

លោក លីវ សុខុន បញ្ជាក់ថា៖ក្នុងច្បាប់បានកំណត់យ៉ាងច្បាស់នូវព្រំដែន របស់អ្នកការសែតថា គួរធ្វើត្រឹមកម្រិតណា ហើយប្រការណាខ្លះត្រូវចៀសវាង ក្នុងនាមជាអ្នកផ្សព្វផ្សាយព័ត៌មាន ទៅដល់សាធារណៈជន ទៅរាជរដ្ឋាភិបាល ហើយពាំនាំដំណឹង សកម្មភាពការងាររបស់រាជរដ្ឋាភិបាល មកជូនប្រជាជនវិញ ក្នុងន័យស្ថាបនាកែលម្អ សំដៅជួយអភិវឌ្ឍន៍សង្គមជាតិ ប្រកប ដោយកិត្តិយស និងសេចក្តីថ្លៃថ្នូរ ។

យោងតាមរបាយការណ៍របស់មន្ទីរព័ត៌មានខេត្តសៀមរាប បង្ហាញថា៖ក្នុងខេត្តសៀមរាបមាន៖

– ស្ថានីយវិទ្យុកំពុងដំណើរការផ្សាយមាន ចំនួន ៣៩ស្ថានីយ ក្នុងនោះស្ថានីយវិទ្យុFMផ្សាយផ្ទាល់មានចំនួន ១៨ស្ថានីយ ស្ថានីយវិទ្យុFMផ្សាយបន្តមានចំនួន ២១ស្ថានីយ ។

– ស្ថានីយទូរទស្សន៍ កំពុងដំណើរការផ្សាយមានចំនួន២៣ស្ថានីយ ក្នុងនោះស្ថានីយទូរទស្សន៍រលកធាតុអាកាសផ្សាយបន្តមានចំនួន ១៣ស្ថានីយ ស្ថានីយទូរទស្សន៍ខ្សែកាប មានចំនួន១០ស្ថានីយ ។

– អង្គភាពសារព័ត៌មានដែលកំពុងមានសកម្មភាពក្នុងខេត្ត មានចំនួន៨៨អង្គភាព ក្នុងនោះ     អង្គភាព សារព័ត៌មានជាភាសាបរទេស ចំនួន០២ អង្គភាពសារព័ត៌មានជាភាសាខ្មែរ ចំនួន៨៤ អង្គភាព   និងទស្សនាវដ្ដីមានចំនួន ០២អង្គភាព ។ ស្នាក់ការសារព័ត៌មានសរុបមាន ចំនួន៣៩អង្គភាព ក្នុងនោះស្នាក់ការកាសែតភាសាខ្មែរមានចំនួន ១៥អង្គភាព ស្នាក់ការទស្សនាវដី្តភាសារបរទេសមានចំនួន០២អង្គភាព ស្នាក់ការគេហទំព័រមានចំនួន២២អង្គភាព។ អ្នកសារព័ត៌មាន ដែលកំពុងធ្វើសកម្មភាពក្នុងខេត្តសៀមរាប មានចំនួន៣២២រូប ស្រី ៣៤រូប៕SRP

ខេត្តសៀមរាប៖ក្នុងកិច្ចប្រជុំសាមញ្ញលើកទី២១ របស់ក្រុមប្រឹក្សាខេត្តសៀមរាប អាណត្តិទី៣ នៅថ្ងៃទី០៨ ខែកុម្ភ: ម្សិលមិញ លោកទៀ សីហា អភិបាលខេត្ត បានលើកបង្ហាញនូវគំនិតផ្តួចផ្តើមមួយ ថា បើអាចធ្វើបានចាប់ពីឆ្នាំ២០២១ នេះ តទៅការប្រើប្រាស់មូលនិធិឃុំ-សង្កាត់ មិនគួរយកគម្រោងស្ថាបនា ផ្លូវគ្រួសក្រហម មកប្រើប្រាស់ទៀតនោះឡើយ។ លោកធានាបានថា ការប្រើប្រាស់ផ្លូវជនបទ ពីផ្លូវក្រាលដីគ្រួសក្រហម ទៅជាផ្លូវបេតុងក្នុងការប្រើប្រាស់ឲ្យបានយូរអង្វែង តាមស្តង់ដារសុពលភាព​។ យ៉ាងណាក៏ដោយ ការលើកឡើងបែបនេះ គឺសំដៅទៅរកការអនុវត្តផែនការថ្មី គឺការកសាងផ្លូវបតុង នៅមូលដ្ឋានជនបទ ដែលផែនការនេះ គឺជាការឆ្លុះបញ្ចាំង ឲ្យឃើញអំពីវឌ្ឍនភាព នៃការឆ្លងកាត់អន្តរកាល របស់កម្ពុជា ដែលមាន សម្តេចហ៊ុន សែន ជាប្រមុខដឹកនាំ ចេញពីឋានៈជាប្រទេស កំពុងអភិវឌ្ឍន៍ ចូលទៅកាន់ឋានៈ ជាប្រទេសអភិវឌ្ឍតិចតួច ជាបណ្តើរៗ នាបណ្តាឆ្នាំខាងមុខ លើវិស័យនៃការអភិវឌ្ឍបណ្តាញផ្លូវថ្នល់ នៅជនបទ​។

លោកទៀ សីហា បន្តថា ជាមួយគ្នានេះ ដើម្បីឆ្ពោះទៅរកជំហានថ្មីនេះ ផែនការកសាងផ្លូវបេតុង សម្រាប់មូលដ្ឋានជនបទ បើទោះជាស្ថិត ក្នុងលទ្ធភាពណា មួយក៏ដោយ តែវាជាជំហានគីង្គក់ ត្រូវបានដើរទន្ទឹមនឹងការថែទាំ ផ្លូវគ្រួសក្រហម ដែលមានស្រាប់ ដើម្បីបានបន្តនិរន្តរភាព នៃតម្រូវការប្រើប្រាស់ របស់ប្រជាពលរដ្ឋនៅក្នុងសហគមន៍។

អភិបាលខេត្តបញ្ជាក់ថា សម្រាប់ការពង្រឹងលទ្ធភាព គំនិតផ្តួចផ្តើមនេះ និងធ្វើដំណើរ ឈានចូលទៅក្នុងទំនាក់ទំនង នៃកិច្ចសហការ ជាមួយដៃគូអភិវឌ្ឍន៍ រួមទាំងត្រូវបានស្ថិត នៅក្នុងការគាំទ្រ និងសម្រួបសម្រួលជាមួយក្រុមការងារថ្នាក់ជាតិ ចុះជួយមូលដ្ឋាន និងភាគីពាក់ព័ន្ធផ្សេងៗទៀតផងដែរ។ ក្នុងគោលបំណងពីរសំខាន់ៗ ដែលជាចម្បងនោះ គឺទៅថ្ងៃអនាគត មូលដ្ឋានជនបទ នឹងមានបណ្តាញផ្លូវ គមនាគមន៍ ប្រើប្រាស់ដែលត្រូវបានធានាគុណភាព និងទី២ បានកាត់បន្ថយការ ប្រើប្រាស់ថវិកា ក្នុងការជួសជុលផ្លូវគ្រួសក្រហមដែលមិនធានាគុណភាពនោះផងដែរ៕SRP

ខេត្តសៀមរាប៖លោកទៀ សីហា ក្នុងនាមគណៈបញ្ជាការឯកភាពរដ្ឋបាលខេត្ត បានដាក់វិធានការ មួយចំនួន ដល់កងកម្លាំងសមត្ថកិច្ច ក៏ដូចអាជ្ញាធរក្រុង ស្រុក ទោះបីកំពុងជួបនូវវិបត្តិជំងឺកូវីដ១៩ ក៏ពិតមែន តែត្រូវយកចិត្តទុកដាក់ខ្ពស់ លើការងារសន្តិសុខ សណ្តាប់ធ្នាប់ សាធារណៈ។ ជាមួយគ្នានេះដែរ លោកបានស្នើឲ្យកម្លាំងសមត្ថកិច្ច ធ្វើការលុបបំបាត់ កុងត្រូលជជុះ និង ក្រុមអ្នកកាសែត អាណាធិបតេយ្យ ដែលបានដើរដាក់កុងត្រូល ស្ទាក់ទារប្រាក់ ពីប្រជាពលរដ្ឋ ដឹកជញ្ជូនផលអនុផល។ អភិបាលខេត្តក៏បានណែនាំឲ្យដល់មន្ត្រី បង្រ្កាបទប់ស្កាត់ បទល្មើសព្រៃឈើ ការកាប់ទន្រ្ទានដីព្រៃ ព្រមទាំងមុនចេញប័ណ្ណកម្មសិទ្ធិ ក៏ត្រូវត្រួតពិនិត្យ ឲ្យបានត្រឹមត្រូវ ដើមី្បចៀសវាង ការប៉ះពាល់ ដល់តំបន់បូរាណដ្ឋាន បេងបួរ អូរប្រឡាយជាដើមម។

លោកបញ្ជាក់យ៉ាងដូច្នោះ​នារសៀលថ្ងៃទី ០៨ ខែ កុម្ភៈ ម្សិលមិញ នៅសាលប្រជុំសាលាខេត្តសៀមរាប ក្នុង ប្រជុំសាមញ្ញលើកទី២១ របស់ក្រុមប្រឹក្សាខេត្តសៀមរាប អាណត្តិទី៣ ក្រោមការដឹកនាំរបស់ លោក អ៊ាន ឃុន ប្រធានក្រុមប្រឹក្សាខេត្តស្តីទី​។

បើតាមសេចក្ដីរាយការណ៍បានឲ្យដឹងថា បទល្មើសព្រៃឈើ នៅស្រុកស្វាយលើ ស្រុកជីក្រែង នៅតែបន្តកើតមានយ៉ាងអណាធិបតេយ្យ បើទោះបីជាមានការរឹតបណ្តឹងពីអាជ្ញាធរជំនាញពាក់ព័ន្ទយ៉ាងណាក៏ដោយ៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប រួមជាមួយ លោកនួន ពុទ្ធារ៉ាអភិបាលក្រុងសៀមរាប វេលាម៉ោង ១១ និង៣០នាទី ថ្ងៃទី ០៩ ខែកុម្ភ: ឆ្នាំ២០២១ នេះ
បានអញ្ជើញចុះមើលស្ថានភាព ផ្លូវក្រោយសាលារៀនបឋមសិក្សាបន្ទាយចាស់ ដែលស្ថិតនៅភូមិចុងកៅស៊ូ សង្កាត់ស្លរក្រាម ក្រុងសៀមរាប ដោយគ្រោងនឹងសាងសង់ ក្នុងពេលឆាប់ៗនេះ។

ប្រជាពលរដ្ឋ បានសប្បាយចិត្តយ៉ាងខ្លាំង បន្ទាប់ពីឮដំណឹងថា ផ្លូវនៅខាងលើ នឹងមានការកសាងសង់។

ប្រជាពលរដ្ឋ នៅក្រោយសាលារៀន ទាំងអស់សូមអរគុណ ដល់ លោកអភិបាលខេត្ត ទៀ សីហា ដែលបានឆ្លៀតពេល ចុះមើលស្ថានភាពផ្លូវនេះ។

ពលរដ្ឋបានដឹងថា រយ:ពេលជាង៣០ឆ្នាំហើយ ដែលមិនងាយមាន អភិបាលខេត្ត រូបណា ចុះមកមើលផ្លូវទាំង២ខ្សែនេះទេ។
សូមជម្រាបថាផ្លូវខាងលើ នៅទល់មុខផ្សារលើធំថ្មី ក្រោយអរុណរះឱសថស្ថាន និងក្រោយសាលារៀនបន្ទាយចាស់៕SRP

ខេត្តបាត់ដំបង៖នគរបាលស្រុកបាណន់ បានឲ្យដឹងថា បុរសម្នាក់ បានស្លាប់ភ្លាមៗ ខណ: ឈរបញ្ជា អេស្កាវ៉ាទ័រ ថយក្រោយ ហើយកិនគាត់ខ្ទេចខ្លួន។

មានហេតុការណ៍ គួរឲ្យសង្វែក នេះបានកើត ឡើង នៅរសៀល ថ្ងៃទី៧ ខែកុម្ភៈ ឆ្នាំ២០២១ នៅចំណុចអណ្ដូងដេកា ភូមិថ្មី ឃុំកន្ទឺ១ ស្រុកបាណន់។

លោកវរសេនីយ៍ឯក ប៉ាន់វ៉ានី អធិការនគរបាលស្រុកបាណន់ បានឲ្យដឹងថា ជនរងគ្រោះ ឈ្មោះ វ័ន្ត អាយុ៤៨ ឆ្នាំ រស់នៅភូមិបោះពោធិ ឃុំអូរដំបង១ ស្រុកសង្កែ ខេត្តបាត់ដំបង។មូលហេតុ ជនរងគ្រោះ ឈរបញ្ជាអេស្កាវ៉ាទ័រ នៅលើពំនូកដី ផ្នែកខាងក្រោយ ដោយតៃកុង មើលមិនឃើញ កិនស្លាប់តែម្ដង។

អ្នកបើកអេស្កាវ៉ាទ័រ ឈ្មោះ រី ចំរ៉ុង ភេទប្រុស អាយុ ៣៦ ឆ្នាំ នៅភូមិអូរស្រឡៅ ឃុំអូរដំបង១ ស្រុកសង្កែ។ បច្ចុប្បន្នស្នាក់នៅជាមួយ ឈ្មោះ ចៅ វ៉ិត ភេទប្រុស អាយុ៤៣ ឆ្នាំ ដែលជាថៅកែអេស្កាវ៉ាទ័រ នៅភូមិព្រែកមហាទេព សង្កាត់ ស្វាយប៉ោ ក្រុងបាត់ដំបង។

សពជនរងគ្រោះ ត្រូវបានសាច់ញាតិ ដឹកយកទៅគេហដ្ឋាន នៅភូមិបោះពោធិ៍ ឃុំអូរដំបង១ ស្រុកសង្កែ ដើម្បីធ្វើបុណ្យ តាមប្រពៃណី។

បើតាមលោកអធិការបញ្ជាក់បន្ថែមថា សមត្ថកិច្ច បានស្រាវជ្រាវចាប់ខ្លូន តៃកុងអេស្កាវ៉ាទ័រ ដោយអនុវត្តតាម ការសម្របសម្រួល របស់លោក គឺ ប៊ុណ្ណារា ព្រះរាជអាជ្ញា នៃអយ្យការ អមសាលាដំបូងខេត្តបាត់ដំបង។

ជនសង្ស័យ ត្រូវបាននគរបាល ស្រុកបាណន់ កសាងសំណុំរឿង បញ្ជូនទៅ ការិយាល័យជំនាញ ដើម្បីអនុវត្តតាមផ្លូវច្បាប់៕SRPដោយប៊ុន ថេត

ខេត្តព្រះវិហារ៖អាជ្ញាធរខេត្តព្រះវិហារ នៅរសៀលថ្ងៃចន្ទ ទី០៨ ខែកុម្ភៈ ឆ្នាំ២០២១ ម្សិលមិញ បានរៀបចំកិច្ចប្រជុំស្តាប់របាយការណ៍ វឌ្ឍនភាព ការងារ របស់មន្ទីរកសិកម្ម រុក្ខាប្រមាញ់ និងនេសាទ ខេត្តព្រះវិហារ បញ្ហាប្រឈម និងទិសដៅបន្ត ក្រោមវត្តមានលោកលី សារ៉ារិទ្ធ អភិបាលរងខេត្តព្រះវិហារ។

កិច្ចប្រជុំនេះធ្វើនៅរដ្ឋបាលខេត្តព្រះវិហារ ដោយមានការចូលរួមពី លោក ពឹង ទ្រីដា ប្រធានមន្ទីរ អនុប្រធានមន្ទីរ នាយខណ្ឌរដ្ឋបាលព្រៃឈើព្រះវិហារ នាយរងខណ្ឌរដ្ឋបាលជលផល ប្រធាន អនុប្រធានការិយាល័យជំនាញក្រោមឱវាទមន្ទីរ និងមន្រ្តីសាលាខេត្តព្រះវិហារ សរុបទាំងអស់
១៨នាក់ស្រី្ត៣នាក់៕SRP

ខេត្តសៀមរាប៖នារីម្នាក់បានស្លាប់ភ្លាមៗ ខណ:កំពុងជិះកង់មកផ្សារ ត្រូវបានរថយន្តបុកចំពេញទំហឹង។

ហេតុការណ៍បានកើតឡើងម៉ោង៤និង៣០នាទីទៀបភ្លឺថ្ងៃទី០៩ ខែមករា ឆ្នាំ២០២១ នៅលើផ្លូវជាតិលេខ៦ មុខស្នាក់ការបក្សឃំុសសរស្តម្ភ ស្រុកពួក ខេត្តសៀមរាប។

សមត្ថកិច្ចបានបន្ដថា ជនរងគ្រោះ ឈ្មោះ ដឿន កាន់ អាយុ២១ឆ្នាំ រស់នៅ ភូមិស្វាយ ឃំុសសរស្តម្ភ ស្រុកពួក ខេត្តសៀមរាប។ ចំណែករថយន្ត មិនត្រូវបានស្គាល់ម៉ាកនោះទេ ដោយសារបុករួចបើកគេចបាត់។ បើតាមសមត្ថកិច្ច ថាករណីគឺនារីរងគ្រោះ ជិះកង់មកផ្សារ៕SRP

ខេត្តសៀមរាប៖ទីតាំងជល់មាន់មួយកន្លែងត្រូវបានកម្លាំងអាវុធហត្ថស្រុកសូទ្រនិគមបង្រ្កាប។ ចំណែកអ្នកលេងរត់គេចខ្លួនអស់។
ការបង្ក្រាបនេះធ្វើឡើង វេលាម៉ោង១៤និង៣០នាទី ថ្ងៃទី០៨ ខែកុម្ភ: ឆ្នាំ២០២១ នៅចំណុចគោគដុបពីងពួង ក្នុងភូមិគោកឬស្សីជើង ឃុំដានរុន ស្រុកសូទ្រនិគម ខេត្តសៀមរាប ដឹកនាំកម្លាំងដោយលោកវរសេនីយ៍ត្រីអុឹម មុន្នី មេបញ្ជាការមូលដ្ឋានស្រុក។

លោកវរសេនីយ៍ត្រីអុឹម មុន្នី មេបញ្ជាការមូលដ្ឋានស្រុក សូទ្រនិគមបានឲ្យដឹងថា ប្រតិបត្តិការនេះ អ្នកលេងបានរត់គេចខ្លួនអស់ ប៉ុន្តែបានបំផ្លាញចោលសង្វៀន ជល់មាន់ចល័ត០១កន្លែងដកហូតម៉ូតូបានចំនួន០៦គ្រឿង។ បច្ចុប្បន្ន រក្សារទុក នៅមូលដ្ឋានកងរាជអាវុធហត្ថ ស្រុកសូទ្រនិគម៕SRP

ខេត្តសៀមរាប៖អាជ្ញាធរខេត្តសៀមរាប បានប្រកាសថាគិតត្រឹមថ្ងៃទី៨ ខែកុម្ភៈ ឆ្នាំ២០២១នេះ ក្រុមស្ថាបនា ផ្លូវថ្នល់ទាំង៣៨ខ្សែ ក្នុងក្រុងសៀមរាប កំពុងសាងសង់យ៉ាងសស្រាក់សស្រាំ ដើម្បីឲ្យរួចរាល់ តាមផែនការគម្រោងទុក នាដំណាច់ ឆ្នាំ២០២១ ខាងមុខនេះ។

ជាមួយនឹងការសាងសង់នេះ រដ្ឋបាលខេត្ត សូមការអធ្យាស្រ័យ ពីបងប្អូនដែលបានធ្វើចរាចរណ៍ នៅតាមដងផ្លូវ ក្នុងក្រុង សំខាន់ផ្លូវទាំង៣៨ខែ្ស។ ដោយសារផ្លូវមួយចំនួន ត្រូវបានបិទការធ្វើចរាចរណ៍បណ្តោះអាសន្ន ដើម្បីសម្រួលដល់ដំណើរការសាងសង់ រៀបចំដាក់បណ្តាញលូទឹកភ្លៀង និង លូទឹកកខ្វក់ ទឹកស្អាត បណ្តាញអគ្គិសនី និង ខ្សែកាប។

ដូច្នេះ សូមសាធារណជន មេត្តាយោគយល់ អធ្យាស្រ័យ ចំពោះការបិទផ្លូវ ឬបិទចរាចរណ៍ ដោយតម្រូវការសាងសង់ឲ្យបានលឿន ឆាប់រហ័ស និងប្រកបដោយគុណភាព។ ខណៈពេលនេះ កំណាត់ផ្លូវមួយចំនួន ដែលបានបិទចរាចរទាំងស្រុង ឬបិទដោយកំណាត់ផ្លួវ រួមមាន៖

១. ផ្លូវ អ៊ុ ឃុន( ផ្លូវជាប់ខាងត្បូងគណបក្សប្រជាជន ទៅផ្លូវស៊ីវុត្ថា)
២. ផ្លូវមន្ទីរពេទ្យនាគទេពថ្មី
៣. ផ្លូវជន្លង់ ចេញមកស្ទឹងសៀមរាប
៤. ផ្លូវវត្តរាជបូព៍ ទៅស្តុបកោះកេរ្តិ៍ទៅត្បូង និងទៅវត្តពោធិ៍លង្កា
៥. ផ្លូវកូម៉ៃ ពីស្តុបសុខា ដល់មុខវត្តថ្មី ឬវត្តទេពពោធិ៍វង្ស
៦. ផ្លូវ ៣០ម៉ែត្រ
៧. ផ្លូវស្តុបទន្លេសាប ទៅជើង
៨.កំណាត់ផ្លូវវាងក្រុងពីក្រោលសេះ ទៅទីស្នាក់ការគយ (ភូមិសណ្តាន់ សង្កាត់ទឹកវិល )

ដោយឡែកក្រៅពីនេះ កំណាត់ផ្លូវបានបិទខ្លះត្រូវបានបិទរយៈពេលខ្លី ឬផ្នែកណាមួយ តែមានផ្លូវដែលអាចបញ្ចៀសចរាចរណ៍បាន៕SRP

ខេត្តសៀមរាប៖ម៉ូតូចំនួនពីរគ្រឿង បានបុកគ្នាបណ្តាលឲ្យស្លាប់ម្នាក់ នឹងរបួសធ្ងន់ម្នាក់។

ហេតុការណ៍បានកើតឡើង នៅវេលាម៉ោង០៧និង៣៥នាទី ថ្ងៃទី០៨ ខែកុម្ភ: ឆ្នាំ២០២១ ចំណុចភូមិតានី ឃំុរុនតាឯកស្រុកបន្ទាយស្រី ខេត្តសៀមរាប ក្នុងទិសដៅបញ្ច្រាស់ទិសគ្នា។

សមត្ថកិច្ចស្រុកបន្ទាយស្រីបានរាយការណ៍ថា ម៉ូតូទី១ម៉ាកវ៉េវពណ៌ខ្មៅស្លាកលេខសៀមរាប១AB១០៨៧ បើកបរដោយឈ្មោះហៅ ហ៊ាប ភេទប្រុសអាយុ៣៨ឆ្នាំ មានទីលំនៅ ភូមិតានី ឃំុរុនតាឯក ស្រុកបន្ទាយស្រី រងរបួសធ្ងន់ ស្លាប់នៅពេលបញ្ជូន ដល់មន្ទីរពេទ្យ ដោយបានបុកជាមួយម៉ូតូម៉ាកហុងដាឌ្រីមC១២៥ពណ៌ខ្មៅ ឆ្នាំ២០២០ បើកបរដោយឈ្មោះយូ សំអាង ភេទប្រុសអាយុ២៧ឆ្នាំ នៅភូមិវាល សង្កាត់គោកចក ក្រុងសៀមរាបខេត្តសៀមរាប របួសស្រាល។

សមត្ថកិច្ច បានប្រគល់សាកសព ជូនក្រុមគ្រួសារ។ ចំណែកម៉ូតូត្រូវបាននគរបាលនាំយកទៅរក្សាទុក៕SRP

ខេត្តសៀមរាប៖វត្ថុបុរាណធ្វើពីថ្មភក់ចំនួន៤ប្រភេទ ដែលប្រជាពលរដ្ឋ រក្សាទុកនៅភូមិល្វា ឃុំស្រែណូយ ស្រុកវ៉ារិន ខេត្តសៀមរាប ត្រូវបានប្រគល់ជូន អាជ្ញាធរជាតិអប្សរាដើម្បីរក្សាទុក។ វត្ថុបុរាណ ទាំងនោះរួមមាន៖ ថ្មគោលធ្វើពីថ្មភក់ចំនួន១ ព្រះហស្ថឆ្វេងទេពស្រី (ប្រាជ្ញាបារមិតា?) ធ្វើពីថ្មភក់ចំនួន១ និងជើងទម្រចំនួន២ ដែលជើងទម្រមួយមានចារជាអក្សរខ្មែរបុរាណចំនួន៤ជួរនៅផ្ទៃចំហៀង។

មន្ត្រីអាជ្ញាធរជាតិអប្សរាបានឲ្យដឹងថា វត្ថុទាំងនោះ ត្រូវបានយកចេញពី ទីតាំងដើមដោយប្រជាពលរដ្ឋ ក្នុងគោលបំណងរក្សាទុកបណ្តោះអាសន្ន ប៉ុន្តែក្រុមការងារ កំណត់បុរាណដ្ឋាននៃអាជ្ញាធរជាតិអប្សរា ក្នុងគោលដៅស្រុកវ៉ារិន បានស្នើសុំឱ្យយកមករក្សាទុកនៅមជ្ឈមណ្ឌលអាជ្ញាធរជាតិអប្សរា ដើម្បីសុវត្ថិភាពនឹងទុកសិក្សាស្រាវជ្រាវ និងចុះបញ្ជីកំណត់អត្តសញ្ញាណវត្ថុទាំងអស់នោះផង។

លោក ឈូក សុម៉ាឡា មន្ត្រីទទួលបន្ទុកការងារចុះបញ្ជីវត្ថុសិល្បៈ នាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានឱ្យដឹងថា នេះមិនមែន ជាលើកទី១ទេ ដែលក្រុមការងារ បានចុះទៅទទួលយករូបចម្លាក់ផ្សេងៗ ដែលប្រជាពលរដ្ឋ រស់នៅតាមតំបន់ឆ្ងាយៗ ក្នុងតំបន់រដ្ឋបាលខេត្តសៀមរាបទាំងមូល។ ដូចករណីនេះ ចម្លាក់ព្រះហស្ថឆ្វេងប្រាជ្ញាបារមិតា គឺត្រូវបានយកមកពីប្រាសាទទាវប៉ាត់ ភូមិរលំរុនថ្មី ឃុំស្រែណូយ។ ឯជើងទម្រចំនួន២ដែលមួយមានសិលាចារិក ត្រូវបានគេយកចេញពីប្រាសាទត្រពាំងឈូក ភូមិល្វា ឃុំស្រែណូយ ស្រុកវ៉ារិន ខេត្តសៀមរាប។

លោក សុម៉ាឡា បានបន្តថា ការដឹកយកវវត្ថុបុរាណ ដ៏មានតម្លៃទាំងនេះ ទៅរក្សាទុកឱ្យទាន់ពេលវេលា គឺជាការប្រសើរខ្លាំងណាស់ ដ្បិតវត្ថុមួយចំនួន អាចនឹងត្រូវបែកបាក់ខូចខាតដោយប្រការណាមួយជាយថាហេតុ។ តួយ៉ាងដូចជាជើងទម្រ ដែលយើងបានដឹកមករក្សាទុកនេះ គឺមានសិលាចារិកយ៉ាងសំខាន់ ដែលមានផ្នែកខ្លះ ត្រូវបានគេយកកាំបិតទៅសំលៀង និងមានផ្នែកខ្លះទៀតមានស្នាមដំបំបែកខូចខាតជាដំណំ។

តាំងនាមឱ្យអាជ្ញាធរជាតិអប្សរា លោក សុម៉ាឡា ក៏សូមថ្លែងអំណរគុណយ៉ាងជ្រាលជ្រៅ ចំពោះបងប្អូនប្រជាពលរដ្ឋ ដែលបានជួយចូលរួមថែរក្សាប្រាសាទបុរាណ និងវត្ថុបុរាណទាំងឡាយនេះ ជាពិសេសអាជ្ញាធរមូលដ្ឋាន ភូមិឃុំ និងស្រុក ដែលបានសហការណ៍ យ៉ាងកក់ក្តៅដើម្បីដឹករតនវត្ថុទាំងនេះ យកមករក្សាទុកឱ្យមានសុវត្ថិភាពសម្រាប់ជាកេរមរតក ដូនតាយើងទាំងអស់គ្នា៕SRP