ខេត្តកំពង់ធំ៖ លោក ឡង់ គីសឹង អភិបាលស្រុកសណ្ដាន់ នៅថ្ងៃទី ១២ ខែ សីហាព្រឹកមិញ បានដឹកនាំកម្លាំងនគរបាល ស្រុកសណ្ដាន់ ចុះរុះរើទីតាំងបនល្បែងស៊ីសងខុសច្បាប់ មួយកន្លែង ត្រូវបានរុះរើបំផ្លាញចោល។

សូមបញ្ជាក់ថាទីតាំងល្បែងសុីសងខាងលើស្ថិតក្នុង ចំការស្វាយចន្ទី មួយកន្លែង នៅភូមិ អូរពកសាមគ្គី ឃុំមានរិទ្ធ ស្រុកសណ្តាន់ ខេត្តកំពង់ធំ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម នៅរសៀលថ្ងៃទី ១១ខែសីហាម្សិលមិញអញ្ជើញចុះពិនិត្យការដាំដើមឈើ (ប្រភេទឈើប្រណិត) នៅតាមសួនច្បារសាធារណៈក្នុងក្រុងកំពង់ចាម។គួរបញ្ជាក់ថា ដើម្បីចូលរួមកែលម្អសោភណភាពទីក្រុង បង្កើតជាតំបន់បៃតង ឲ្យសាកសមនឹងជ័យលាភីរំដួល៣ទង ដែលខេត្តកំពង់ចាមទទួលបានក្នុងចលនាប្រឡងប្រណាំងទីក្រុងស្អាត ក៏ដូចជាដើម្បីជាការទាក់ទាញសម្រាប់ភ្ញៀវទេសចរជាតិ អន្តរជាតិ ដែលមកលេងកំសាន្តនៅលើទឹកដីនៃដងទន្លេមេគង្គ លោក អ៊ុន ចាន់ដា បានណែនាំដល់មន្ត្រីជំនាញខណ្ឌរដ្ឋបាលព្រៃឈើនៃមន្ទីរកសិកម្ម រុក្ខាប្រមាញ់ និងនេសាទខេត្ត រៀបចំដាំដើមឈើប្រណិតប្រភេទធ្នង់ ប្រមាណ១០០ដើម នៅតាមសួនច្បារផ្លូវព្រះមុនីវង្ស និងសួនច្បារតាមមាត់ទន្លេមេគង្គ ក្នុងក្រុងកំពង់ចាម។ ជាមួយគ្នានេះ លោក បានណែនាំដល់មន្ត្រីជំនាញ ពាក់ព័ន្ធចូលរួមថែរក្សា ដើមឈើដែលបានដាំផងដែរ៕SRP

ខេត្តសៀមរាប៖ អាជ្ញាធរស្រុកវ៉ារិនបានឲ្យដឹងថាគ្រូបង្រៀនម្នាក់ ជួបគ្រោះថ្នាក់ចរាចរណ៍ បណ្ដាលឲ្យស្លាប់។

ហេតុការណ៍បានកើតឡើង នៅវេលាម៉ោង០៦និងព្រឹក ថ្ងៃទី១២ ខែសីហាឆ្នាំ២០២០ នៅភូមិកញ្ចន់រុន ភូមិប្រាសាទ ស្រុកវ៉ារិន ខេត្តសៀមរាប។
អាជ្ញាធរបន្តថាករណីនេះបង្កឡើងដោយខ្លួនឯង ជនរងគ្រោះមាន ឈ្មោះឡុក ក្រូច ភេទប្រុសអាយុ២៦ឆ្នាំ មុខរបរ គ្រូបង្រៀន។ រស់នៅភូមិគោកភ្នំ ឃុំវ៉ារិន ស្រុកវ៉ារិនខេត្តសៀមរាប។

បើតាមសមត្ថកិច្ចមូលហេតុគឺជនរងគ្រោះ បើកម៉ូតូធ្លាក់ក្នុងលូទឹក បណ្ដាលឲ្យស្លាប់តែម្ដង។ បច្ចុប្បន្នសពជនរងគ្រោះ និងម៉ូតូប្រគល់អោយ ក្រុម គ្រួសារយកទៅធ្វើបុណ្យតាមប្រពៃណី៕SRP

ខេត្តកំពង់ចាម​៖ក្នុងកិច្ចប្រជុំដោះស្រាយបញ្ហាដីធ្លីជូនប្រជាពលរដ្ឋ ប្រមាណជាង ៣០គ្រួសារនៅតំបន់ទំនប់តាសេក ភូមិតាសេក ឃុំកោះរកា ស្រុកកំពង់សៀម​ ​នៅព្រឹកថ្ងៃទី១១ ខែសីហាម្សិលមិញ
លោក​​ អ៊ុន ចាន់ដា អភិបាល​ខេត្ត​កំពង់ចាម​ បានបញ្ជាដល់មន្ត្រីពាក់ព័ន្ធរួមគ្នាការពារផ្ទៃបឹងធម្មជាតិ ក្នុងគោលបំណង ទុករំដោះទឹកជំនន់
ចេញពីក្រុងកំពង់ចាម និងទុកជាផ្លូវនាំទឹក ដើម្បីបម្រើសេចក្តីត្រូវការដល់ប្រជាពលរដ្ឋ ប្រើប្រាស់លើវិស័យកសិកម្មផងដែរ។

លោក​អភិបាលខេត្ត​ ក៏បាន​លេីក​ឡើង​ដែរ​ថា​ ផ្ទៃបឹងធម្មជាតិ មានប្រយោជន៍ក្នុងការរំដោះទឹកជំនន់ ហើយក៏ជាផ្លូវ នាំទឹកចូលទៅកាន់តំបន់ទំនាប ដើម្បីឱ្យប្រជាពលរដ្ឋ ប្រើប្រាស់លើវិស័យកសិកម្មរបស់ពួកគាត់។ ដូច្នេះ​មន្ត្រីជំនាញពាក់ព័ន្ធ​ ត្រូវចុះសិក្សា និងកំណត់ព្រំឲ្យបានត្រឹមត្រូវ ចៀសវាងមានអ្នកឆ្លៀតឱកាសចាក់ដីលុបបឹងយកធ្វើកម្មសិទ្ធិរបស់ខ្លួន។
ទាក់ទិនទៅនឹងដំណោះស្រាយបញ្ហាដីធ្លីប្រជាពលរដ្ឋ៣៤គ្រួសារ នៅតំបន់ទំនប់តាសេក លោកអភិបាលខេត្ត ក៏បានចាត់តាំង​លោក កែវ នាឬទ្ធិ អភិបាល​រង​ខេត្ត​ ដឹកនាំក្រុមការងារចុះសិក្សាស្រាវជ្រាវឲ្យបានច្បាស់លាស់សិន ដើម្បីរៀបចំរបាយការណ៍ និងធ្វើការប្រជុំដោះស្រាយលើបញ្ហានោះ នៅពេលក្រោយទៀត​៕SRP

ខេត្តបាត់ដំបង៖ បុរសម្នាក់ត្រូវបានកម្លាំងការិយាល័យ នគរបាលព្រហ្មទណ្ឌកម្រិតធ្ងន់នៃស្នងការនគរបាលខេត្តបាត់ដំបង ឃាត់ខ្លួនពីបទកាន់កាប់អាវុធដោយខុសច្បាប់។

លោកវរសេនីយ៍ឯក អូន ហ្វៃ នាយការិយាល័យនគរបាល ព្រហ្មទណ្ឌកម្រិតធ្ងន់នៃស្នងការនគរបាលខេត្តបាត់ដំបង បានអោយដឹងថា ប្រតិបត្តិការខាងលើធ្វើឡើងនៅវេលាម៉ោង១៣និង៤០នាទីថ្ងៃទី១១ ខែសីហា ឆ្នាំ២០២០ នៅចំណុចក្រុមទី២៣ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខណ:ដែលជន សង្ស័យកាន់កាប់អា វុធខ្លីមួយដេីមម៉ាក K59 និងគ្រាប់ចំនួន០៦ គ្រាប់ ដោយខុសច្បាប់និងកំពុងស្វែងរកការធ្វេីស កម្មភាព(ជួញដូរ) អាវុធ មួយដេីមនេះ។

ជនសង្ស័យឈ្មោះ សែម សុគន្ធា ហៅ ម៉ាប់ ភេទប្រុស អាយុ៣២ឆ្នាំ រស់នៅចំណុចក្រុមទី២៣ ភូមិកម្មករ សង្កាត់ស្វាយប៉ោ ក្រុងបាត់ដំបង។

លោកប្រធានការិយាល័យបានបញ្ជាក់ថា ជនសង្ស័យខាងលេីគឺជាមុខសញ្ញាដែលស្ថិតក្នុងការតាមដាន របស់សមត្ថកិច្ចផងដែរ ហេីយ ក្នុងពេលធ្វេីការសា កសួរ ជនសង្ស័យបានឆ្លេីយសារភាពថា អា វុធខ្លីមួយដេីមនេះ គេបានធ្វេីសក ម្មភាព(លួច)យកបាន នា ពេលកន្លមក។

ក្រោយសាកសួរបញ្ជូនខ្លួនរួមនិងវត្ថុតាងទៅកាន់អយ្យការអមសាលាដំបូងខេត្តបាត់ដំបងចាត់ការតាមផ្លូវច្បាប់៕SRP

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងក្រុមគ្រួសារនៅ ថ្ងៃអង្គារ ៧រោច ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី១១ ខែសីហា ឆ្នាំ២០២០ នេះ បានរៀបចំពិធីបុណ្យទក្ខិណានុប្បទានគម្រប់ ១០០ថ្ងៃ ដើម្បីឧទ្ទិសកុសលផលបុណ្យជូនអ្នកឧញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ដែលត្រូវជាមាតាក្មេក មាតាបង្កើត និងជាជីដូនដែលបានទទួលមរណភាព នៅវេលាម៉ោង ២:១២នាទីទៀបភ្លឺ ថ្ងៃ១៣កើត ខែពិសាខ ឆ្នាំជូត ទោស័ក ពុទ្ធសករាជ ២៥៦៣ ត្រូវនឹងថ្ងៃទី៤ ខែឧសភា ឆ្នាំ២០២០ ក្នុងជន្មាយុ ៩៦ឆ្នាំ ដោយជរាពាធ។

ពិធីបុណ្យទក្ខិណានុប្បទានគឺរៀបចំធ្វើឡើងនៅគេហដ្ឋានរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅសង្កាត់ចតុមុខ ខណ្ឌដូនពេញ រាជធានីភ្នំពេញ។

នៅវេលាម៉ោង ២:៣០នាទីរសៀលថ្ងៃនេះ គឺមានការជួបជុំញាតិមិត្តបងប្អូន និងក្រុមគ្រួសារបស់សម្តេចទាំងទ្វេ បន្ទាប់មកមានពិធ៏ថ្វាយគ្រឿងសក្ការៈបូជាព្រះពុទ្ធរូប នមស្សការព្រះរតនត្រ័យ សមាទានសីល និមន្តសម្តេចព្រះរាជគណៈចំនួន ១២អង្គចម្រើនព្រះបរិត្ត និងនិមន្តសម្តេចព្រះវនរ័ត ណយ ច្រឹក សម្តេចព្រះសង្ឃនាយករងទី២នៃព្រះរាជាណាចក្រកម្ពុជា ប្រទានព្រះសទ្ធម្មវិសេសទេសនា។

នៅថ្ងៃពុធ ៨រោច ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី១២ ខែសីហា វេលាម៉ោង ៨:៣០ ព្រឹកស្អែកនេះ នឹងមានពិធីថ្វាយគ្រឿងសក្ការៈបូជាព្រះពុទ្ធរូប នមស្សការព្រះរតនត្រ័យសមាទានសីល បន្ទាប់មកសម្តេចព្រះរាជាគណៈចំនួន ១២អង្គ ស្វាធ្យាយព្រះសត្តប្បករណាភិធម្ម និងប្រគេនសម្តេចព្រះរាជាគណៈ មន្ត្រីសង្ឃចំនួន ៩៦អង្គ ពហូទេវាឆ្លង បត្តិទានគាថា។ បន្ទាប់ពីនោះនឹងមានការយាង និងនិមន្តសម្តេចព្រះរាជាគណៈ មន្ត្រីសង្ឃចំនួន ៩៦អង្គ បិណ្ឌបាត្រ ជាកិច្ចបង្ហើយបុណ្យ៕SRP

ខេត្តកំពង់ធំ៖សេចក្ដីរាយការណ៍បានឲ្យដឹងថាទីតាំងបនល្បែងជល់មាន់និងអាប៉ោងមួយកន្លែងបានបើកលេងយ៉ាងអនាធិបតេយ្យ។ ការដែលមានបនល្បែងបែបនេះមិនទាន់ឃើញត្រូវបានអាជ្ញាធរសមត្ថកិច្ចចុះបង្ក្រាបឥឡូវទេ។
តាមសេចក្ដីរាយការណ៍បញ្ជាក់ថាទីតាំងបនល្បែងខាងលើនៅចំណុចផ្លូវចូល​ព្រះ​អាទិត្យ​ ភូមិ​99 ឃុំមានរិទ្ធ ស្រុក​សណ្តាន់​ ខេត្តកំពង់ធំ៕SRP

ខេត្តសៀមរាប៖អធិការដ្ឋាននគរបាលក្រុងសៀមរាប សូមធ្វើការអំពាវនាវដោយទទូច​ ដល់បងប្អូនប្រជាពលរដ្ឋក្នុងក្រុងសៀមរាប​ អោយបង្កើនការប្រុងប្រយ័ត្នបន្ថែមទៀតជាពិសេសរាល់ពេល​ ចតម៉ូតូទុកនៅតាមទីសាធារណ:។ អធិការនគរបាលថាសូមធ្វើការចាក់សោរកងឬច្រវ៉ាក់ និងបិទសន្ទះសោរ អោយបានត្រឹមត្រូវ ដើម្បីរក្សាសុវត្តិភាពចៀសវាង មានការធ្វេសប្រហែស ផ្តល់ឱកាសអោយជនសង្ស័យ ងាយស្រួលធ្វើសកម្មភាពលួច។
អធិការនគរបាលក្រុងសៀមរាបបញ្ជាក់នៅថ្ងៃទី១១ខែសីហាឆ្មាំ២០២០នេះថាគិតចាប់ ពីខែមករា ដល់ខែ កក្កដា ឆ្នាំ២០២០នេះ​ កម្លាំងនគរបាល​ ចំណុះអោយ​ អធិការដ្ឋាននគរបាលក្រុងសៀមរាប បានធ្វើការ​ស្រាវជ្រាវ​ បង្ក្រាប​ និងឃាត់បានមុខសញ្ញាជនសង្ស័យ​ ពាក់ព័ន្ធករណីអំពើលួច​ម៉ូតូ និងលួចកាច់សោរកយកម៉ូតូមានស្ថានទម្ងន់ទោស បានសរុបចំនួន១១ នាក់ ស្រី០១(ពាក់ព័ន្ទអំពើសមគំនិត) ក្នុងនោះដកហូតម៉ូតូ បានចំនួន១៦គ្រឿង ដោយម៉ូតូជនសង្ស័យជិះធ្វើសកម្មភាព២គ្រឿង និងម៉ូតូរបស់ជនរងគ្រោះ មានចំនួន១៤គ្រឿង។ ជជាមួយគ្នានេះនគរបាលបានធ្វើការប្រគល់ទទួលជូនជនរងគ្រោះយកទៅប្រើប្រាស់វិញបានចំនួន​១៤គ្រឿងផងដែរ។

ដោយឡែក​បក្ខពួករបស់ជនសង្ស័យ ខាងលើបានកំណត់អត្តសញ្ញាណ ដើម្បីធ្វើការស្វែងរកចាប់ខ្លួនជាបន្តបន្ទាប់ទៀត។

បើតាមនគរបាលថាទោះបីជាជនសង្ស័យពាក់ព័ន្ធ​នឹង​ករណីនេះទាំង​ ត្រូវបានធ្វើការឃាត់ខ្លួននិងកសាងសំណុំរឿងបញ្ជូនទៅតុលាការ ដើម្បីទទួលការផ្តន្ទាទោស​តាមផ្លូវច្បាប់​ ជាបន្តបន្ទាប់យ៉ាងណាក្តី​ សូមបងប្អូនប្រជាពលរដ្ឋបង្កើនការប្រុងប្រយ័ត្នឲ្យបានខ្ពស់៕SRP

ខេត្តសៀមរាប៖សេចក្ដីរាយការណ៍បានឲ្យដឹងថាដើមឈើគ្រញូងមួយដើមដែលដុះនៅក្នុងតំបន់គ្រប់គ្រងដោយអាជ្ញាធរជាតិអប្សរាត្រូវបានជនមិនស្គាល់អត្តសញ្ញាណរួចកាត់យកបាត់ដោយសុវត្ថិភាព។
ហេតុការណ៍បានកើតឡើងនៅវេលាម៉ោង០៩និង៣០នាទីព្រឹកថ្ងៃទី១១ខែសីហាឆ្នាំ២០២០ចំណុចគោកបាខែង ក្រុមទី៦ភូមិត្រពាំងសេះ សង្កាត់កោកចក ក្រុងសៀមរាប។
យោងតាមកំណត់ហេតុរបស់សមត្ថកិច្ចបានឲ្យដឹងថាស្តីពីការចុះត្រួតពិនិត្យករណីកាប់ឈើគ្រញូង។ ការចុះត្រួតពិនិត្យដល់ទីតាំងជាក់ស្ដែង ឃើញថាពិតជាមានការលួចកាត់ឈើគ្រញូងដែលមានមុខកាត់ ០.២ម៉ែត្រពិតប្រាកដមែន ដោយជនមិនស្គាល់មុខ ហើយដើមគ្រញូងនេះត្រូវជនមិនស្គាល់មុខនោះលួចយកកំណាត់ពាក់កណ្ដាលអស់ប្រវែងប្រមាណ៣ម៉ែត្រ ដោយបន្សល់ទុកគល់នឹងចុងប៉ុណ្ណោះ។
បើយោងតាមរបាយការណ៍ដដែលបញ្ជាក់ថាករណីនេះក្រុមការងារនឹងបន្តស្រាវជ្រាវរកជនប្រព្រឹត្តមកផ្តន្ទាទោសតាមផ្លូវច្បាប់។
សូមរំលឹកថាកាលនៅវលាម៉ោង១៤និង០០នាទីថ្ងៃទី១៦ ខែមេសា ឆ្នាំ២០២០ចំណុច
ព្រៃឧទ្យានអង្គរភូមិក្រវ៉ាន់ សង្កាត់នគរធំក្រុងសៀមរាប មានជនសង្ស័យពុំស្គាល់មុខបានលួចកាប់ឈេីគ្រញូងអស់ចំនួន៤ដេីម ផងដែរ។
ទោះយ៉ាងណាពាក់ព័ន្ធទៅនឹងករណីលួចកាប់ឈើគ្រញូងនៅក្នុងតំបន់គ្រប់គ្រងដោយអាជ្ញាធរជាតិអប្សរា ជាបន្តបន្ទាប់ បែបនេះ គេនៅមិនទាន់ឃើញអាជ្ញាធរជាតិអប្សរាចាប់បានជនសង្ស័យយកមកផ្ដន្ទាទោសតាមផ្លូវច្បាប់នៅឡើយទេ ខណៈនៅក្នុងតំបន់ឧទ្យានអង្គរគ្រប់គ្រងដោយអាជ្ញាធរជាតិអប្សរា មានកម្លាំងការពារយ៉ាងរឹងតឹងពីសំណាក់មន្ត្រីអាជ្ញាធរជាតិអប្សរា សូម្បីប្រជាពលរដ្ឋជួសជុលលំនៅដ្ឋានបន្តិចបន្តួចត្រូវបានកម្លាំងរបស់អាជ្ញាធរជាតិអប្សរាចុះទៅដល់ភ្លាមនឹងវាកម្ទេចចោលទៀតផង។
ជាការកត់សម្គាល់បើទោះបីជានៅក្នុងតំបន់គ្រប់គ្រងដោយអាជ្ញាធរជាតិអប្សរាបានហាមឃាត់មិនឲ្យមានការសាងសង់សំណង់យ៉ាងណាក៏ដោយក៏ប៉ុន្តែគេសង្កេតឃើញនៅក្នុងតំបន់រមណីយដ្ឋានឧទ្យានអង្គរ មានផ្ទះសាងសង់ជាច្រើនផងដែរ មិនដឹងថាមានលិខិតអនុញាតឬយ៉ាងណានោះទេ។
ជុំវិញករណីនេះមជ្ឈដ្ឋាននានាកំពុងរង់ចាំមើលអាជ្ញាធរជាតិអប្សរាតើអាចមានសមត្ថភាពចាប់ជនសង្ស័យដែលលួចកាប់ឈើគ្រញូងបានដែរឬយ៉ាងណា៕SRP

ខេត្តកំពង់ចាម​​៖លោក​​​ ឡី​ មិច​ នាយក​រង​រដ្ឋបាល​សាលា​ខេត្ត​កំពង់ចាម​ នៅព្រឹកថ្ងៃទី១១ ខែសីហា​ ឆ្នាំ​២០២០​ បាន​អញ្ជើញ​ចូលរួម​ដំណើរ​ការ​ដេញ​ថ្លៃ​គម្រោង​មូលនិធិ​ឃុំ​-សង្កាត់​ ​ឆ្នាំ​២០២០​ របស់​គណៈកម្មការ​ជាតិ​សម្រាប់​ការអភិវឌ្ឍន៍​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​​​ ​ចំនួន៤គម្រោង​​ ​​​បន្ថែមទៀតនៅ​សាលា​ស្រុក​កំពង់សៀម​​​​​​​​ ក្រោម​វត្តមាន​​លោក​ ឈួន​ វិបុល​ អភិបាល​រង​ស្រុក​ ដោយ​មាន​ការ​ចូលរួម​ពី​​ គណៈកម្មការ​ម្ចាស់​លទ្ធកម្ម​ និង​តំណាង​ក្រុម​ហ៊ុន​ អ្នក​ទទួល​ការ​ផងដែរ។
ក្នុង​នាម​អាជ្ញាធរ​ខេត្ត​ លោក​ ​ឡី​ មិច​​ បាន​ថ្លែង​អំណរគុណ​ដល់​អាជ្ញាធរ​ស្រុក​កំពង់សៀម ដែល​បាន​រៀបចំ​នីតិវិធី​នៃ​ការ​ដេញ​ថ្លៃ​នេះ​ ឲ្យ​មាន​សណ្ដាប់​ធ្នាប់​ របៀបរៀបរយ​ល្អ​ ព្រមទាំង​បាន​សំណូមពរ​ដល់​តំណាង​ក្រុម​ហ៊ុន​​ ឲ្យ​គោរព​តាម​ក្រមសីលធម៌​របស់​អ្នក​ទទួល​ការ​ និង​ចូលរួម​​សហការ​ជាមួយ​អាជ្ញាធរ​ ដេីម្បី​លុបបំបាត់នូវ​ភាព​អនាធិបតេយ្យ​ ដែល​បង្ក​ឡើង​ដោយ​ក្រុម​ឆ្លៀត​ឱកាស​មួយ​ចំនួន​។

គួរ​បញ្ជាក់​ផង​ដែរ​ថា​ គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​៤ខ្សែ​​ ដែល​ត្រូវ​ស្ថាបនា​​ ជូន​ប្រជាពលរដ្ឋ​​ប្រើប្រាស់​ ក្នុង​នោះ​មាន​ ១-ឃុំ​កោះទន្ទឹម​ សាងសង់ផ្លូវបេតុងអាមេ ប្រវែង៣៥០​ម៉ែត្រ​ ទទឹង៤ម៉ែត្រ​កម្រាស់០.១៥ម៉ែត្រ​ នៅភូមិកោះប្រាក់ក្នុង។
២-ឃុំ​កោះ​មិត្ត​ ជួសជុលផ្លូវដីប្រវែង១.៥៣០គ.ម ទទឹង៦ម៉ែត្រ​ នៅភូមិស្វាយជ្រុំ ភូមិកោះព្រលូង។
៣-ឃុំ​កោះ​សំរោង​ សាងសង់ផ្លូវបេតុងអាមេ ប្រវែង២០០ម៉ែត្រ​ ទទឹង៤ម៉ែត្រ​ នៅភូមិទី៨។
៤-ឃុំ​ទ្រាន​ សាងសង់ផ្លូវបេតុងអាមេប្រវែង៣៥០ម៉ែត្រ​ទទឹង៤ម៉ែត្រ​កម្រាស់ នៅភូមិទួលត្រាច និង​ភូមិច្រកស្តៅ​៕SRP

ខេត្តសៀមរាប៖តាមការពិតគ្រោះថ្នាក់ចរាចរណ៍នៅស្រុកពួកបណ្ដាលឲ្យស្ត្រីម្នាក់ស្លាប់ភ្លាមៗនិង ពីរនាក់ទៀតរងរបួសគឺម៉ូតូបុកជាមួយរថយន្តពាក់ស្លាកលេខនគរបាល។

យោងតាមរបាយការណ៍បានដឹងថា នៅថ្ងៃទី១០ ខែសីហា ឆ្នាំ២០២០ ម៉ោង២១និង០០នាទី មានករណីគ្រោះថ្នាក់ចរាចរណ៍រវាងរថយន្ត និងម៉ូតូនិងរថយន្តកើតហេតុចំណុច ផ្លូវជាតិលេខ៦ចំណុច ផ្លូវបំបែកភូមិទឹកថ្លា ឃុំខ្នាត ស្រុកពួក ខេត្តសៀមរាប។

របាយការណ៍បន្តថាម៉ូតូម៉ាហុងដាឃ្លិច ផលិតឆ្នាំ2016ពណ៌ស ពាក់ស្លាក សៀមរាប1T4409 បើកបរដោយឈ្មោះរឹទ្ធ ធារ៉ា ភេទប្រុស អាយុ22ឆ្នៅភូមិជ្រាវ សង្កាត់ជ្រាវ ក្រុងសៀមរាប ខេត្តសៀមរាប រងរបួសស្រាល ដឹកមនុស្ស២នាក់

1/ឈ្មោះ ធាស្រី ភេទស្រី អាយុ21ឆ្នៅភូមិវិហារចិន សង្កាត់ស្វាយដង្កុំ ក្រុងសៀមរាប ខេត្តសៀមរាប របួសស្រាល

2/ឈ្មោះ ឡាម ហ៊ីង ភេទស្រី អាយុ20ឆ្នាំនៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ស្លាប់នៅកន្លែងកើតហេតុ បើកបរទិសដៅពីកើតទៅលិចបានបុកជាមួយរថយន្តម៉ាកព្រូស ពណ៌ស ពាក់ស្លាកលេខ នគរបាល2-4507 បើកបរដោយឈ្មោះនៅ ពុទ្ធារឹទ្ធ ភេទប្រុស អាយុ37ឆ្នាំនៅភូមិប្រយុទ្ធ ឃុំពួក ស្រុកពួក ខេត្តសៀមរាប បើកបរទិសដៅពីលិចទៅកើត ពេលបុកម៉ូតូហើយក៏បានខ្ទាតទៅឆ្វេងបានបុកនិងរថយន្តមួយគ្រឿងទៀតម៉ាកBMW X3 ពណ៌ទឹកប្រាក់ពាក់ស្លាក លេខ ភ្នំពេញ2AO1685 បើកបរដោយឈ្មោះសេង ហ៊ានប៊ុនសា ភេទប្រុស អាយុ២៩ឆ្នាំនៅផ្លូវកម្ពុជាក្រោម សង្កាត់ដេប៉ូ3 ខណ្ឌទួលគោក រាជធានីភ្នំពេញ បើកបរទិសដៅពីលិចទៅកើត។
របាយការណ៍បញ្ជាក់ថាករណីនេះ បណ្តាលឲ្យស្លាប់មនុស្សម្នាក់របួសស្រាលមនុស្សពីរនាក់។
ខូចខាតរថយន្ត២គ្រឿងស្រាល និងម៉ូតូ១គ្រឿងធ្ងន់។ បើតាមរបាយការណ៍មូលហេតុ៖

-រថយន្តព្រូសបត់ឆ្វេង
-ម៉ូតូបើកបរលឿន។

ក្រោយពេលកើតហេតុកម្លាំងជំនាញបានចុះវាស់វែង និងប្រគល់សាកសពជូនក្រុមគ្រួសាយកទៅធ្វើបុណ្យតាមប្រពៃណី។​ វត្ថុតាងពាក់ព័ន្ធរក្សាទុកនៅអធិការដ្ឋាននគរបាលស្រុកដើម្បីចាត់ការតាមនិតិវិធី។

សូមបញ្ជាក់ថារថយន្តម៉ាកព្រូសពាក់ស្លាកលេខនគរបាល ក្រោយកើតហេតុបានទុករថយន្តចោល រត់គេចខ្លួនបាត់។ បើតាមប្រភពថាតៃកុងរថយន្តម៉ាកព្រូសជានគរបាលផងដែរ៕SRP