ខេត្តសៀមរាប៖នៅក្នុងពិភពលោកយើងនេះ មានមនុស្សចំនួនតែ 15 ភាគរយប៉ុណ្ណោះ ដែលហ៊ានសុបិនធំនឹងដាក់គោលដៅត្រូវធ្វើនៅក្នុងជីវិតរបស់ពួកគេ។ ប៉ុន្តែយើងក៏ដឹងហើយថា គ្រប់គ្នាទទួលបានពេលវេលា 24 ម៉ោងក្នុងមួយថ្ងៃ ស្មើគ្នា ប៉ុន្តែតម្លៃនៃការប្រើម៉ោងឬក៏ពេលវេលាមិនដូចគ្នាឡើយ។

មនុស្សដែលបានផ្លាស់ប្ដូរពិភពលោក ពួកគេ ចេះប្រើម៉ោងឱ្យមានតម្លៃហួសពីអ្វីដែលយើងបានគិតនោះដោយសារតែពួកគេ ” គិតធំ “ឬក៏ពួកគេសុបិនធំ មិនត្រឹមតែប៉ុណ្ណោះ ពួកគេត្រូវបានឆ្លងកាត់នូវជីវិតគ្រោតគ្រាតនិងសែនលំបាក ភាគច្រើនបំផុតពួកគេកើតនៅក្នុងត្រកូល ក្រីក្រ ប៉ុន្តែដោយសារតែ ភាពមិនព្រមចុះចាញ់និងឧបសគ្គ ភាពតស៊ូនិងភាពអត់ធ្មត់ពួកគេក្លាយជាអ្នកមានដ៏អស្ចារ្យនៅក្នុងពិភពលោកយើងនេះ ព្រមទាំងផ្ដល់ឱកាសការងារជាច្រើនសម្រាប់មនុស្សលោក និងកែប្រែសេដ្ឋកិច្ចឲ្យរីកចម្រើនទៅដល់មនុស្សជាតិ។ នៅទីនេះសូមលើកយកឧទាហរណ៍មួយចំនួនដើម្បីបញ្ជាក់ជូនដល់មិត្តអ្នកអាន ដើម្បីធ្វើការពិចារណា:

1: Oprah Winfrey .
Oprah Winfrey ត្រូវបានកើតថ្ងៃទី 29 ខែមករា ឆ្នាំ 1954 ជាជនជាតិអាមេរិកាំងនិងជាម្ចាស់កម្មវិធី ” tv show”

ពីអតិតកាលអ្នកស្រីត្រូវបានគេចាប់រំលោភជាច្រើនដងកាលពីគាត់នៅវ័យកុមារភាពហើយត្រូវបានគេដេញចេញទីកម្មវិធី ‘ tv show ” ដោយសារតែរូបរាងរបស់គាត់មិនសាកសមជាមួយនឹងកម្មវិធីក៏ប៉ុន្តែ អ្នកស្រីមិនដែលបោះបង់ចោល ” សុបិនធំ ” របស់គាត់ឡើយគឺគាត់ចង់ផ្លាស់ប្ដូរពិភពលោកតាមរយៈការសម្ដែងនិងការរៀបចំរបស់គាត់ មកទាល់ពេលបច្ចុប្បន្ននេះ Oprah Winfrey មានទឹកប្រាក់ ” Net worth $ 2.6 billions ” ជាង 2 កោដិដុល្លារ ដែលជាស្ត្រីរកលុយតាមសមត្ថភាពនឹងក្លាយជាស្ត្រីអ្នកមានបំផុតក្នុងពិភពលោក នេះដោយយោងទៅតាមទស្សនាវដ្តី Forbes 2020 ។
អ្នកស្រីបានមានប្រសាសន៍នៅក្នុង TV របស់គាត់ថា ”
” នៅក្នុងជីវិត យើងបានបាត់បង់នូវអ្វីៗជាច្រើនប៉ុន្តែសូមកុំឲ្យបាត់ និងបាក់ទឹកចិត្ត យើងឱ្យសោះ”

2: Jack Ma

” គឺជាអ្នកជំនួញនិងជាអ្នកវិនិយោគផ្នែកអ៊ីនធើរណិតរបស់ជនជាតិចិន”
លោក Jack Ma កើតនៅ ឆ្នាំ 1964 ក្នុងគ្រួសារក្រខ្សត់ នៅក្នុងអតីតកាលរបស់គាត់ គាត់ត្រូវបានគេបដិសេធមិនឲ្យធ្វើការរាប់មិនអស់ប៉ុន្តែលោក Jack Ma មិនដែលបាក់ទឹកចិត្តរាល់ការបដិសេធនោះទេហើយគាត់មានសុបិន្តឱ្យក្លាយជាអ្នកបង្កើតការទិញលក់ទំនិញតាមអ៊ីនធឺណិត ខ្នាតយក្សក្នុងប្រទេសចិននិងទូទាំងពិភពលោក។

លោកបានបរាជ័យរាប់មិនអស់ មនុស្សជាច្រើនបានសើចចំអកដាក់លោក ក៏ប៉ុន្តែទាំងអស់នោះ គាត់បានបំលែងការឈឺចាប់ឲ្យក្លាយជាកម្លាំងខ្លាំងឡើង ៗ រហូតដល់ក្រុមហ៊ុនរបស់លោកឈ្មោះ ” ALIBABA ” បានទទួលល្បីល្បាញទូទាំងពិភពលោក ចំពោះការទិញទំនិញតាមប្រព័ន្ធអ៊ីនធឺណិត ។

មកទល់ពេលបច្ចុប្បន្ននេះ លោក Jack Ma មានទ្រព្យ សម្បត្តិជាសាច់ប្រាក់ : Net worth 65.3 billions USD ( Forbes 2020 )
ទាំងអស់នេះគ្រាន់តែជាការលើកឡើង ចំនួនតូចមួយតែប៉ុណ្ណោះ។

សូមចងចាំថា: ការគិតធំធ្វើឲ្យយើងមានការគិតទូលាយ ពង្រីកការយល់ដឹងបានលឿន និងឆាប់យល់អំពីហេតុនិងផល អ្វីៗជុំវិញខ្លួនព្រមទាំងពិភពលោកផងដែរ។
ការគិតធំមិនមែនមានន័យថាយើងប្រថុយធំឬក៏នឹងបាត់បង់ធំនោះឡើយ ផ្ទុយមកវិញ កាកគិតធំធ្វើឲ្យយើងចេះរៀបចំចាត់ចែងការងារតូចៗលំអិត ដែលអាចគ្រប់គ្រងបានដើម្បីឲ្យបានសម្រេចកិច្ចការធំៗ ,។

ពីព្រោះពួកគេយល់ថា ” តើការរៀបចំចាត់ចែងការងារតូចលម្អិតឲ្យបានម៉ត់ចត់គឺជាការទទួលខុសត្រូវដ៏ធំបំផុតចំពោះកិច្ចការធំៗ ដែលនឹងកើតឡើងជាបន្តបន្ទាប់”។ គ្រោះថ្នាក់ទាំងឡាយឬក៏ហានិភ័យធំៗកើតឡើងចំពោះមុខជំនួញ មិនមែនដោយសារតែការគិតធំនោះទេ ភាគច្រើនបំផុតដែលកើតឡើងដោយសារពួកគេចង់បានផ្លែផ្កាលឿនចង់ឃើញលទ្ធផលលឿនដោយប្រើវិធីផ្លូវកាត់ជាច្រើន ជាងការពិចារណាម៉ត់ចត់ ហើយពុំបានយល់ហេតុផលនៃកម្លាំងការងារតូចដើម្បីឱ្យសម្រេចកិច្ចការធំនោះឡើយ។
បំណងនៅក្នុងអត្ថបទថ្ងៃនេះ សូមឱ្យមិត្តអ្នកអានធ្វើការរិះពិចារណាពីព្រោះយើងទាំងអស់គ្នាអាចគិតធំ អាចចូលរួមផ្លាស់ប្ដូរពិភពលោក អាចទទួលបានផលធំ ” តាមរយៈ៉ ការរៀបចំចាត់ចែងការងារតូចៗលម្អិតឲ្យបានមត់ចត់ និង្ ចូលរួមសហការឲ្យបានច្រើនដើម្បីពង្រីកនូវផលបរយោជន៍ទាំងសងខាង ”

ប្រសិនបើគេបានផលប្រយោជន៍ យើងបានផលប្រយោជន៍ ហេតុអ្វីយើងមិនចាប់ដៃគ្នា?

និពន្ធដោយ លោក : សឿន តុលា

ស្ថាបនិកក្រុមហ៊ុន ផា ផា យ៉ា

PAPAYA NEXT STEP CO,.LTD

* PAPAYA REAL ESTATE
(គម្រោងអភិវឌ្ឍន៍អចលនទ្រព្យ)

* PAPAYA HOMESTAY

( គម្រោងលើវិស័យទេសចរណ៍)

* PAPAYA GARDEN

( គម្រោងលើវិស័យកសិកម្មនិងចែកចាយអាហារ)

ភ្នំពេញ៖សម្ដេច ស ខេង រដ្ឋមន្រ្តីក្រសួងមហាផ្ទៃនៅព្រឹកថ្ងៃពុធ ទី១៧ ខែកុម្ភៈ ឆ្នាំ២០២១ នេះ បានអញ្ជើញដឹកនាំកិច្ចប្រជុំឆ្លងខ្លឹមសារសម្រាប់ត្រៀមសន្និបាតក្រសួងមហាផ្ទៃ នៅទីស្ដីការក្រសួងមហាផ្ទៃ។

មានប្រសាសន៍បើកិច្ចប្រជុំ សម្ដេច ស ខេង បានថ្លែងអំណរគុណ និងកោតសរសើរ ថ្នាក់ដឹកនាំគ្រប់អគ្គនាយកដ្ឋាន ដែលបានរៀបចំរបាយការណ៍ ផ្ញើជូនមកកាន់ថ្នាក់ដឹកនាំ និងជាពិសេសថ្លែងអំណរគុណ ក្រុមការងារដឹកនាំដោយ លោក សក់ សេដ្ឋា ដែលបានរៀបចំរបាយការណ៍ទាំងនោះដាក់ឆ្លងកិច្ចប្រជុំនាថ្ងៃនេះ។

លោកនាយឧត្តមសេនីយ៍ ប៉ោង ភក្ដិ អគ្គលេខាធិការ នៃអគ្គលេខាធិការដ្ឋានក្រសួងមហាផ្ទៃ បានធ្វើរបាយការណ៍ស្ដីអំពីដំណើរការរៀបចំខ្លឹមសារសម្រាប់ត្រៀមមហាសន្និបាត មុននឹងសម្ដេចបន្តដឹកនាំកិច្ចប្រជុំពិភាក្សាលើចំណុចសំខាន់ៗ ពាក់ព័ន្ធនឹងសេចក្ដីព្រាងរបៀបវារៈសន្និបាត និងកិច្ចការសំខាន់ៗមួយចំនួនទៀត៕SRP

ខេត្តសៀមរាប៖នគរបាលប្រឆាំង ការជួញដូរមនុស្ស និងការពារអនីតិជន ខេត្តសៀមរាប បានចាប់ខ្លួន បុរសម្នាក់ ករណី រំលោភសេពសន្ថវៈ លើអនីតិជន។

ការចាប់ខ្លួនធ្វើឡើងនៅថ្ងៃទី១៥ ខែកុម្ភៈ ឆ្នាំ ២០២១ បន្ទាប់ពីទទួលបណ្ដឹងពីក្រុមគ្រួសារ របស់ជនរងគ្រោះ។

ជនសង្ស័យ ឈ្មោះ គង់ សំអឿន ភេទប្រុស អាយុ៣០ឆ្នាំ ជនជាតិខ្មែរ មុខរបរ ជាងក្រឡឹងគ្រឿងរថយន្ត មានទីលំនៅបច្ចុប្បន្ន ភូមិសាលាកំរើក សង្កាត់សាលាកំរើក ក្រុងសៀមរាបខេត្តសៀមរាប។

យោងតាមរបាយការណ៍បង្ហាញថានៅថ្ងៃទី ១៤ខែកុម្ភៈ ឆ្នាំ ២០២១ វេលាម៉ោង១៧ នៅចំណុចក្នុងព្រៃ ចំរាក់ភ្នំក្រោម ស្ថិតនៅភូមិភ្នំក្រោម សង្កាត់សៀមរាប (កន្លែងកើតហេតុមិនច្បាស់លាស់ព្រោះយប់ងងឹត) ក្រុង-ខេត្តសៀមរាប ឈ្មោះ គង់ សំអឿន បានបើកម៉ូតូ ឌុបជនរងគ្រោះ ឈ្មោះ ង .ស .ព ភេទស្រី អាយុ១២ឆ្នាំ មុខរបរសិស្ស ស្នាក់នៅក្នុង មណ្ឌលកុមារកំព្រា បាត់ធើផ្លាយ ផារ៉ាដាយ ស្ថិតនៅភូមិកន្ត្រក សង្កាត់ស្វាយដង្កុំ ក្រុងសៀមរាប ជនសង្ស័យ បានឌុប ក្មេងស្រី ទៅដល់ចំណុចខាងលើ ក្នុងព្រៃ ក៏បានធ្វើសកម្មភាព ចាប់បង្ខំ, និងទះកំភ្លៀង ជាច្រើនដៃ រួចធ្វើសកម្មភាព ចាប់ស្រាតខោ របស់ជនរងគ្រោះ រំលោភ បានសម្រេច១ដង ដោយជនសង្ស័យ បាននិយាយមគំរាម ជនរងគ្រោះ មិនឱ្យស្រែក ក្រោយពីធ្វើសកម្មភាព រួមភេទ រួចហើយ ជនសង្ស័យ បើកម៉ូតូឌុប ជនរងគ្រោះមកផ្ទះរបស់គេ រួចហើយ ជនសង្ស័យ បានជិះម៉ូតូគេចខ្លួនបាត់។

របាយការណ៍បន្តថា ក្រោយពីការសាកសួរជនសង្ស័យ បានឆ្លើយសារភាពថា រូបគេ ពិតជាបានធ្វើសកម្មភាព ចាប់បង្ខំ ជនរងគ្រោះ រួមភេទ បានសម្រេច០១ដង ពិតប្រាកដមែន ហើយបាននិយាយ លួងលោម ជនរងគ្រោះ ជិះម៉ូតូមកដល់ផ្ទះរបស់ខ្លួន នឹងបានអោយ ជនរងគ្រោះ ដោះប្តូរខោអាវ រួចយកខោអាវ ប្រពន្ធ របស់ខ្លួនមកអោយជនរងគ្រោះ ស្លៀកពាក់។ ចំណែក ខោអាវរបស់ជនរងគ្រោះ លាក់ទុក នៅក្នុងផ្ទះរបស់គេ ហើយសមត្ថកិច្ច បានធ្វើការដកហូតអាវ របស់ជនរងគ្រោះបានមកវិញ៕SRP

ភ្នំពេញ៖លោកដួង តារា រដ្ឋលេខាធិការ ទីស្ដីការគណ:រដ្ឋមន្ត្រី នឹងជាជំនួយការផ្ទាល់ សម្ដេចតេជោ ហ៊ុន សែន នាយករដ្ឋមន្ត្រី បានលើកឡើងថា «ដាំបង្គោលថ្មលើផ្លូវបែបនេះអាចបង្កគ្រោះថ្នាក់ធំ!»។

លោកដួង តារា បញ្ជាក់ថា កាលពីព្រឹកមិញ ខ្ញុំបានខលនិយាយជាមួយ លោកអភិបាលរងខេត្តបាត់ដំបង ម៉ាទីណាល ព្រោះឮគេថាជាបង្គលថ្មរបស់គាត់ ដែលបានបោះចំ នៅលើកណ្តាលផ្លូវដ៏ធំនេះ។
លោក ម៉ាទីណាល់ បានប្រាប់ខ្ញុំថា មានគេធ្វើផ្លូវរំលោភលើដីម៉ាក់គាត់។ ខ្ញុំមិនមានយោបល់អ្វីទេចំពោះកម្មសិទ្ធិឯកជនរបស់គាត់។ ប៉ុន្តែ ខ្ញុំគ្រាន់តែអាចដឹងថា បើនៅតែបន្តបោះបង្គោលថ្មបែបនេះ នៅចំកណ្តាលផ្លូវដ៏ធំនេះ តទៅទៀតអាចនឹងបង្កគ្រោះថ្នាក់ ដល់ការធ្វើដំណើររបស់ប្រជាពលរដ្ឋមិនខាន ជាពិសេសអ្នកបើកបរពេលយប់។

បើតាមខ្ញុំដឹងថា មេភូមិ មេឃុំ ចៅហ្វាយស្រុក និងចៅហ្វាយខេត្តគាំទ្រអោយដកបង្គោលថ្មចេញពីផ្លូវ ដើម្បីសុវត្ថិភាព ប្រជាពលរដ្ឋ។

យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ ពលរដ្ឋយើងគ្រប់ទីកន្លែងដោយគ្មានការរើសអើង៕SRP

ខេត្តកំពង់ចាម៖អភិបាលខេត្តកំពង់ចាម លោកអ៊ុន ចាន់ដា បាន អះអាងថា ស្រុក ស្ទឹងត្រង់ នឹងប្រែក្លាយ ទៅជាតំបន់ទីប្រជុំជន កសិ ទេសចរណ៍ យ៉ាង សំខាន់ ក្នុងពេលឆាប់ៗខាងមុខនេះ។ ដោយមានការ រៀបចំ ដាក់តាំងរូបផ្លែឈើ នៅចំណុច រង្វង់មូលគល់ស្ពានស្ទឹងត្រង់-ក្រូចឆ្មារ និង រៀបចំ ឲ្យ មាន ការដាក់ លក់ ផ្លែឈើ ផងដែរ ។

ថ្លែងយ៉ាងដូច្នេះក្នុងពិធីសម្ពោធ ដាក់ឲ្យប្រេីប្រាស់ ជាផ្លូវការ សមិទ្ធផលនានា នៃ មន្ទីរពេទ្យ បង្អែក ហ៊ុន សែន ស្ទឹងត្រង់ ស្ថិត ក្នុង ភូមិ ត្នោត តាសាយ ឃុំ ព្រែក កក់ ស្រុក ស្ទឹងត្រង់ ខេត្តកំពង់ចាម នៅថ្ងៃទី១៦ ខែកុម្ភៈ ព្រឹកមិញនេះ។

ក្នុងពិធីនេះដែរ អ៊ុន ចាន់ដា បាន ថ្លែង អំណរគុណ ដល់ សមាគមសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ដែល បាន គាំទ្រ ដល់ វិស័យ សុខាភិបាល ក៏ដូចជា មន្ទីរពេទ្យ បង្អែក ស្រុក ស្ទឹងត្រង់ នេះ ដោយ បាន ផ្កល់ ជាសម្ភារបរិក្ខាពទ្យ បូក រួម ទាំង សំណង់អគារ ផ្លូវបេតុង ប្រព័ន្ធ បង្ហូរ ទឹក និងសួនច្បារ យ៉ាងស្រស់ស្អាត សរុប ជាថវិកាប្រមាណជាង ៣៣ម៉ឺនដុល្លារអាមេរិក ដែល ជា សមិទ្ធផល ដ៏មានសារៈសំខាន់ សម្រាប់ ជួយដល់ ប្រជាពលរដ្ឋ នៅក្នុងស្រុក ស្ទឹងត្រង់ ។

អភិបាលខេត្ត បាន បញ្ជាក់ ថា ថ្វីត្បិតតែ យើងទទួលបានសមិទ្ធផល ល្អហើយ តែចំណុចសំខាន់ គឺសូមឲ្យប្រជាពលរដ្ឋ យើង សូមព្យាបាល សុខភាពនៅឯផ្ទះ ដោយខ្លួនឯងជាមុនសិន ពោលគឺ ត្រូវចេះការពារ ប្រសើរជាង ការព្យាបាល តាមរយៈ ការរស់នៅ អនាម័យសុខភាព និងការទទួល ទានចំណីអាហារផ្សេងៗ ឲ្យបានល្អប្រសើរ។ លោកថា យើងទទួលបានអគារ និងទីកន្លែងល្អហើយ តែសូមឲ្យល្អ ចំពោះ តែអ្នកជំងឺ មកទទួល សេវាសុខាភិបាល តែប៉ុណ្ណោះ ពោលគឺ អ្នកគ្មានជំងឺ ពុំចាំបាច់មកសម្រាកព្យាបាលនោះឡើយ។

លោកក៏បាន លេីក ឡើង ថា តម្លៃ នៃ សុខសន្តិភាព មិន អាច កាត់ ថ្លៃ បាន ឡេីយ មាន សុខសន្តិភាព
ទេីបមានការអភិវឌ្ឍន៍។ ជាក់ស្ដែង ស្រុក ស្ទឹងត្រង់ យើងនេះ ទទួល បាន សមិទ្ធផល ធំ ៗ ជាច្រើន មាន ដូចជា ស្ពាន ផ្លូវ និង មន្ទីរពេទ្យ បង្អែក ជាដើម ដូច្នេះ សូម ពុកម៉ែ បងប្អូន ប្រជាពលរដ្ឋ ទាំងអស់ រួម គ្នា ថែរក្សា សុខសន្តិភាព មួយនេះ ឲ្យបានគង់វង្ស ដេីម្បី បន្ត ការ អនុវត្តន៍ រីកចម្រើន ទៅមុខទៀ៕ SRP

ខេត្តសៀមរាប៖សមត្ថកិច្ចស្រុកអង្គរធំបានដឹងថា សិស្សសាលាម្នាក់ បានស្លាប់ភ្លាមៗ នៅពេលបង្ហោះកង់ ធ្លាក់មកវិញ។

ហេតុការណ៍បានកើតឡើងនៅ ថ្ងៃទី១៦ ខែកុម្ភ:  ឆ្នាំ២០២១ វេលាម៉ោង១១.៣០នាទី បង្កឡើងដោយខ្លួនឯង នៅចំណុចមុខសាលាអនុវិទ្យាល័យអង្គរធំ ស្ថិតនៅភូមិពាក់ស្នែងថ្មី ឃុំពាក់ស្នែង ស្រុកអង្គរធំ ខេត្តសៀមរាប។

សមត្ថកិច្ចស្រុកអង្គរធំបានឲ្យដឹងថាជនរងគ្រោះ មានឈ្មោះគើយ ឧត្តម ភេទប្រុសអាយុ១៥ឆ្នាំ សិស្ស​ ថ្នាក់​ទី​៧​ រៀននៅអនុវិទ្យាល័យ អង្គរធំ រស់នៅភូមិពាក់ស្នែងថ្មី ឃុំពាក់ស្នែង ស្រុកអង្គរធំ ខេត្តសៀមរាប។

សមត្ថកិច្ចស្រុកអង្គរធំបញ្ជាក់ថាមូលហេតុ បង្ហោះ​កង់​ ធ្លាក់បាក់ក​ស្លាប់ តែម្ដង នេះបើតាមការសន្និដ្ឋាន របស់លោកគ្រូពេទ្យ៕SRP

ភ្នំពេញ៖យោងតាមនាយឧត្តមសេនីយ៍ សេង យូអ៊ាន់ អគ្គនាយកនៃអគ្គនាយកដ្ឋានភស្តុភារ និងហិរញ្ញវត្ថុ បានធ្វើរបាយការណ៍ ជូនសម្ដេចស ខេង ថា រថយន្តដែលបានផ្ដល់ជូននាឱកាសនេះ គឺជាប្រភេទរថយន្តFord មានចំនួន ៥០គ្រឿងដោយបែងចែកជូនបណ្ដាអធិការដ្ឋាននគរបាលស្រុក ដាច់ស្រយ៉ាលនៅតាមបណ្ដាខេត្តចំនួន១៩ ក្នុងនោះមាន៖
ស្នងការនគរបាលខេត្តព្រៃវែងទទួលបាន៥គ្រឿង, បាត់ដំបង៥គ្រឿង, បន្ទាយមានជ័យ២គ្រឿង, ស្ទឹងត្រែង២គ្រឿង, ពោធិ៍សាត់២គ្រឿង, ព្រះវិហារ៣គ្រឿង, កណ្ដាល៤គ្រឿង, កំពង់ស្ពឺ៣គ្រឿង, កំពង់ឆ្នាំង២គ្រឿង, កំពង់ចាម២គ្រឿង, ត្បូងឃ្មុំ១គ្រឿង, ក្រចេះ៤គ្រឿង, តាកែវ២គ្រឿង, កំពត២គ្រឿង, ព្រះសីហនុ២គ្រឿង, កោះកុង៣គ្រឿង, កំពង់ធំ២គ្រឿង, សៀមរាប២គ្រឿង, រតនគិរី២គ្រឿង។

សូមបញ្ជាក់ថាពិធីប្រគល់នេះ ក្រសួងមហាផ្ទៃ នាថ្ងៃទី១៦ ខែកុម្ភៈ ឆ្នាំ២០២១ នេះ ក្រោមវត្តមានដ៏ខ្ពង់ខ្ពស់ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ៕SRP

ភ្នំពេញ៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅព្រឹកថ្ងៃទី ១៦ ខែកុម្ភៈ ឆ្នាំ២០២១ នេះ បានចាត់ឱ្យ គណៈប្រតិភូកាកបាទក្រហមកម្ពុជា ដឹកនាំដោយ ឯកឧត្តមវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្ត រាយ និងគណៈកម្មាធិការសាខាកាកបាទក្រហមកម្ពុជា ខេត្តបន្ទាយមានជ័យ អញ្ជើញចូលរួមបុណ្យ៧ថ្ងៃ និងនាំយកគ្រឿងឧបភោគ-បរិភោគ ថវិកា ៥លានរៀល ចូលរួមរំលែកទុក្ខយ៉ាងក្រៀមក្រំបំផុតជាមួយក្រុមគ្រួសារសពលោកអនុសេនីយ៍ត្រី នាង រិទ្ធិឆ័យ យុទ្ធជន កងការពារព្រំដែនលេខ ៥០៣ ដែលបានបាត់បង់ជីវិតកាលពីថ្ងៃពុធ ទី១០ ខែកុម្ភៈ ឆ្នាំ ២០២១ ក្នុងជន្មាយុ ៣៣ឆ្នាំ។ ពិធីបុណ្យប្រារព្ធធ្វើឡើងនៅគេហដ្ឋាន សព ស្ថិត ស្ថិតនៅក្នុងភូមិអូរអំបិល សង្កាត់អូរអំបិល ក្រុងសេរីសោភ័ណ្ឌ ខេត្តបន្ទាយមានជ័យ។

ក្នុងមរណភាពដ៏ក្តុកក្តួលនេះ កាកបាទក្រហមកម្ពុជា សូមឧទ្ទិសបួងសួងដល់ដួង វិញ្ញាណកន្ធ លោកអនុសេនីយ៍ត្រី នាង រិទ្ធិឆ័យ បានចប់កំណើតក្នុងសុគតិភព កុំបីឃ្លៀងឃ្លាតឡើយ៕SRP

ខេត្តបាត់ដំបង៖លោកងួន រតនៈ អភិបាលខេត្តបាត់ដំបង បានប្រកាសមិនលើកលែងចំពោះអ្នកពាក់ព័ន្ធឃុបឃិត នឹងអធិការស្រុកកំរៀង ដែលបានប្រព្រឹត្តខុសនីតិវិធី។

អភិបាលខេត្ត បានសង្កត់ធ្ងន់ថា នឹងមិនលើកលែងឲ្យបុគ្គលណាម្នាក់ដែលពាក់ព័ន្ធឃុបឃិតជាមួយអធិការ ស្រុកកំរៀង ឲ្យពលករគេចវេសពីការធ្វើចត្តាឡីស័ក។

អភិបាលខេត្ត ក៏បានចាត់វិធានការបន្ទាន់ ដើម្បីទប់ស្កាត់ កុំឲ្យពលករគេចវេស ពីការធ្វើចត្តាឡីស័ក ហើយអាជ្ញាធរ និងអ្នកពាក់ព័ន្ធទាំងអស់ ត្រូវអនុវត្តវិធានការ មួយចំនួនភ្លាមៗ។

ក្នុងនោះការរឹតបន្តឹង តាមចាប់ពួកមេខ្យល់នាំពលករ ឆ្លងដែនខុសច្បាប់ ការអប់រំផ្សព្វផ្សាយពីសារសំឡេង របស់សម្ដេចតេជោ នាយករដ្ឋមន្ត្រី ពាក់ព័ន្ធនឹងការទប់ស្កាត់ ការរីករាលដាល ជំងឺកូវីដ១៩ នៅតាមមូលដ្ឋាន នៅតាមមណ្ឌលចត្តាឡីស័កជាដើម។

លោក ងួន រតនៈ បន្តថា អាជ្ញាធរមូលដ្ឋាន ត្រូវធ្វើការជំរឿន ប្រជាពលរដ្ឋ មូលដ្ឋាន ដោយធ្វើការចុះបញ្ជីឈ្មោះពលរដ្ឋ នៅតាមស្រុកជាប់ព្រំដែន ឲ្យបានច្បាស់លាស់ និងមានឯកសារសម្រាប់ពួកគាត់ ក្នុងការកំណត់អត្តសញ្ញាណឲ្យបានត្រឹមត្រូវ ពីលំនៅដ្ឋាន ដើម្បីកុំឲ្យមានពលករទើបចេញពីប្រទេសថៃ ដែលរស់នៅស្រុកខេត្តផ្សេង ប្រាប់ពីព័ត៌មានមិនពិត ថាខ្លួនរស់នៅជាប់ព្រំដែន គេចវេសមិនធ្វើចត្តាឡីស័ក។
ជាមួយគ្នានេះអាជ្ញាធរខេត្ត នឹងជួបអាជ្ញាធរខេត្តចាន់បុរី នៃប្រទេសថៃ បើកកិច្ចប្រជុំពិភាក្សារួមគ្នាទប់ស្កាត់ ការរីករាលដាលជំងឺកូវីដ១៩ ដោយអាជ្ញាធរខាងកម្ពុជា នឹងស្នើភាគីថៃ ឲ្យរថយន្តដឹកពលករ មកតាមច្រកតែមួយ ស្រួលក្នុងការគ្រប់គ្រង។

លោកងួន រតនៈ ថ្លែងព្រមានយ៉ាងដូច្នេះ ក្នុងឱកាសដឹកនាំកិច្ចប្រជុំ ទប់ស្កាត់ ការគេចវេស ធ្វើចត្តាឡីស័ក របស់ពលករ និងពិនិត្យសភាពការនៅច្រកទ្វារអន្តរជាតិដូង ស្រុកកំរៀង ខេត្តបាត់ដំបង នាថ្ងៃទី ១៥ ខែមករា ម្សិលមិញ។

បន្ទាប់ពីរកឃើញកំហុសរបស់លោក គឹម ពន្លក ប្រព្រឹត្តខុសនីតិវិធី ហ៊ានដោះលែង មេខ្យល់ ដោយចិត្តឯង ដែលនាំពលករគេចវេស ពីការធ្វើចត្តាឡីស័ក តាមវិធានការរបស់រាជរដ្ឋាភិបាល និងក្រសួងសុខាភិបាល ក្នុងការទប់ស្កាត់ការរីករាលដាលជំងឺកូវីដ១៩ លោកឧត្តមសេនីយ៍ទោ សាត គឹមសាន ស្នងការខេត្តបាត់ដំបង បានផ្អាកការងារបណ្ដោះអាសន្ន នូវអធិការស្រុកកំរៀងរូបនេះ។

សូមជម្រាបថានៅថ្ងៃទី ១៥ ខែកុម្ភៈឆ្នាំ ២០២១ ម្សិលមិញ នាយករដ្ឋមន្ត្រីហ៊ុន សែន បានចេញអនុក្រឹត្យសម្រេច ដកហូតឋានន្តរស័ក្កិ និងបណ្ដេញចេញពីក្របខ័ណ្ឌមន្ត្រីនគរបាលជាតិកម្ពុជា ចំពោះ វរសេនីយ៍ឯក គឹម ពន្លក អត្តលេខ ១០១៦៨ នាយនគរបាលជាន់ខ្ពស់ក្របខណ្ឌមន្ត្រីនគរបាលជាតិកម្ពុជានៃក្រសួងមហាផ្ទៃ។

គួរបញ្ជាក់ថា ចាប់ពីមានការផ្ទុះឆ្លងរីករាលដាលជំងឺកូវីដ១៩ ក្នុងសហគមន៍ខេត្តសាមុទសាខន ប្រទេសថៃ គឺមានពលករឆ្លងដែនពីថៃ តាមច្រកនានាជាប់ខេត្តបាត់ដំបង មានជាង ៦០០០នាក់ បានបញ្ចប់ការធ្វើចត្តាឡីស័កជាង ៣០០០នាក់ និងកំពុងធ្វើចត្តាឡីស័កជាង ២០០០នាក់ ខណៈអាជ្ញាធរ ក៏បានឃាត់ខ្លួនមេខ្យល់ ដែលនាំពលករឆ្លងដែនខុសច្បាប់ជាបន្តបន្ទាប់ និងបញ្ជូនទៅតុលាការចាត់ការតាមនីតិវិធីច្បាប់ និងបន្តស្វែងរកពួកមេខ្យល់មួយចំនួនទៀត៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធី ប្រគល់រថយន្តជូនស្នងការដ្ឋាននគរបាលខេត្ត នាព្រឹកថ្ងៃអង្គារ ទី១៦ ខែកុម្ភៈ ឆ្នាំ២០២១ នេះបានមានប្រសាសន៍ថា ប្រធានក្រុមការងាររាជរដ្ឋាភិបាល ថ្នាក់ស្រុកត្រូវចុះទៅបណ្តុះបណ្តាល ណែនាំ និងជួយជ្រុមជ្រែងដល់មន្ត្រីដែលបម្រើសេវា ជាមួយប្រជាពលរដ្ឋ ដែលក្នុងនោះរួមមាន៖ទី១ មេឃុំ /ចៅសង្កាត់, ទី២ ស្មៀនឃុំ/ ស្មៀនសង្កាត់, ទី៣ មេប៉ុស្តិ៍ /នគរបាលឃុំ, និងទី៤មេភូមិ ទាំងនៅទីក្រុង និងជនបទ។

សម្តេចស ខេង បានលើកទឹកចិត្ត ឱ្យប្រធានក្រុមការងាររាជរដ្ឋាភិបាល រាជធានី -ខេត្តបន្តណែនាំដល់ក្រុមការងារថ្នាក់ស្រុក ចុះទៅណែនាំដល់មេឃុំ /ចៅសង្កាត់), ស្មៀនឃុំ /ស្មៀនសង្កាត់, មេប៉ុស្តិ៍ /នគរបាលឃុំ, និងមេភូមិទាំងនៅក្រុង និងជនបទ ដែលជាអ្នកធ្វើការងារ បម្រើសេវា ដោយផ្ទាល់ ជូនដល់ប្រជាពលរដ្ឋ
ឱ្យបានល្អ ដោយទង្វើទាំងនេះ ធ្វើឱ្យប្រជាពលរដ្ឋ សប្បាយចិត្ត ហើយនឹងគាំទ្រដល់រាជរដ្ឋាភិបាល។
សម្តេចស ខេងបានបន្ថែមទៀតថា រាល់ការជួបប្រជុំណែនាំ ជាមួយមន្ត្រីបម្រើ សេវាសាធារណ: របស់យើង គឺពុំមែនក្នុងន័យ ស្តីបន្ទោសនោះទេ ប៉ុន្តែដើម្បីធ្វើការតម្រង់ ទិសលើកទឹកចិត្ត និងជួយជ្រុមជ្រែង ឱ្យការងារពួកគាត់ធ្វើកាន់តែល្អប្រសើរឡើង។
សម្តេចស ខេង បានបន្តថា ការផ្តល់សេវាសាធារណៈ បានល្អ គឺស្ថិតនៅក្នុងគោលនយោបាយភូមិ ឃុំ សង្កាត់មានសុវត្ថិភាពដែលក្នុងនោះ មេឃុំ /ចៅសង្កាត់, ស្មៀនឃុំ /ស្មៀនសង្កាត់, មេប៉ុស្តិ៍ /នគរបាលឃុំ, និងមេភូមិ ផ្តល់ជូនដល់ ប្រជាពលរដ្ឋ នូវសេវាចាំបាច់ដូចជាការធ្វើអត្តសញ្ញាណប័ណ្ណ, សំបុត្រកំណើត, សៀវភៅគ្រួសារ, សៀវភៅស្នាក់នៅ, សំបុត្រអាពាហ៍ពិពាហ៍, និងឯកសារសំខាន់ៗ ជាច្រើនទៀត ដូច្នេះការងារនេះ យើងពុំអាចបន្ទោសពីចម្ងាយនោះទេ ត្រូវតែធ្វើការផ្ទាល់ជាមួយពួកគាត់។

សម្តេច ក៏បានបានមានប្រសាសន៍ លើកទឹកចិត្តឱ្យបន្ថែម ការយកចិត្តទុកដាក់ លើការអនុវត្តគោលនយោបាយភូមិ ឃុំ សង្កាត់ មានសុវត្តិភាព ដោយមន្ត្រីពាក់ព័ន្ធ ត្រូវអនុវត្តភារកិច្ច របស់ខ្លួនឱ្យបានល្អ និងជាពិសេស ផ្សព្វផ្សាយពីគោលនយោបាយនេះឱ្យកាន់តែទូលាយថែមទៀតផង៕SRP

ភ្នំពេញ៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃនៅទីស្ដីការក្រសួងមហាផ្ទៃ នាព្រឹកថ្ងៃអង្គារ ទី១៦ ខែកុម្ភៈ ឆ្នាំ២០២១នេះ អញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់រថយន្តជូនស្នងការដ្ឋាននគរបាលខេត្ត ដោយមានការចូលរួមពីរដ្ឋលេខាធិការ អគ្គនាយក នៃអគ្គនាយកដ្ឋានភស្តុភារ និងហិរញ្ញវត្ថុ អគ្គលេខាធិការរង អគ្គស្នងការ អគ្គស្នងការរងនគរបាលជាតិ ប្រធាននាយកដ្ឋានចំណុះអគ្គស្នងការដ្ឋាននគរបាលជាតិ ស្នងការនគរបាលខេត្តចំនួន១៩ អធិការនគរបាលស្រុក និងមន្ត្រីនគរបាលជាតិ សរុបប្រមាណ១៧០រូប៕SRP

ភ្នំពេញ៖រដ្ឋលេខាធិការទីស្តីការគណៈរដ្ឋមន្ត្រី និងជាជំនួយការផ្ទាល់សម្ដេចតេជោហ៊ុន សែននាយករដ្ឋមន្ត្រី លោកដួង តារា បានគាំទ្រពេញទំហឹង ចំពោះចំណាត់ការ របស់សម្ដេចតេជោហ៊ុន សែន ដែលបានដកហូត បុណ្យស័ក្កិ លោកវរសេនីឯក គឹម ពន្លក ចេញអធិការស្រុកកំរៀង និងបណ្ដេញចេញពីក្របខ័ណ្ឌ នៃនគរបាលជាតិ។

លោកដួង តារា បានសរសេរថា៖ «សូមគាំទ្រចំពោះចំណាត់ការវះកាត់មន្រ្តីខិលខូចចេញ»

ខ្ញុំបាទសូមគោរពគាំទ្រ ពេញទំហឹងដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីកម្ពុជា ចំពោះការសម្រេចដ៏ត្រឹមត្រូវ ដកហូតបុណ្យស័ក្តិ តួនាទី និងបណ្តេញចេញពីក្របខ័ណ្ឌ ចំពោះមន្រ្តីខិលខូចណា ដែលមិនយកតួនាទីនិងបុណ្យស័ក្តិ ដែលរាជរដ្ឋាភិបាលប្រគល់ជូន ទៅបម្រើប្រជាពលរដ្ឋ និងប្រទេសជាតិពិតប្រាកដ ផ្ទុយទៅវិញទៅបម្រើត្រឹមតែផលប្រយោជន៍ ផ្ទាល់ខ្លួន និងបក្សពួកខ្លួន។

យើងចូលរួមធ្វើជាមន្រ្តីល្អ កសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ ពលរដ្ឋ យើងគ្រប់ទីកន្លែងដោយគ្មានការរើសអើង។

សូមជម្រាបថានៅថ្ងៃទី ១៥ ខែកុម្ភៈឆ្នាំ ២០២១ ម្សិលមិញ នាយករដ្ឋមន្ត្រីហ៊ុន សែន បានចេញអនុក្រឹត្យសម្រេច ដកហូតឋានន្តរស័ក្កិ និងបណ្ដេញចេញពីក្របខ័ណ្ឌមន្ត្រីនគរបាលជាតិកម្ពុជា ចំពោះ វរសេនីយ៍ឯក គឹម ពន្លក អត្តលេខ ១០១៦៨ នាយនគរបាលជាន់ខ្ពស់ក្របខណ្ឌមន្ត្រីនគរបាលជាតិកម្ពុជានៃក្រសួងមហាផ្ទៃ។

បើតាមលិខិតបង្គាប់ការ របស់ឧត្តមសេនីយ៍ទោ សាត គឹមសាន ស្នងការប៉ូលិសខេត្តបាត់ដំបងបានបញ្ជាក់ថា ការសម្រេចផ្អាកការងារ របស់វរសេនីឯក គឹម ពន្លក អធិការស្រុកកំរៀង មូលហេតុអនុវត្តការងារខុសនីតិវិធី៕SRP