ភ្នំពេញ៖សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានថ្លែងអំណរគុណដល់អង្គការទេសចរណ៍ពិភពលោក (World Tourism Organization UNWTO) ដែលបានកោតសរសើរដល់កម្ពុជា ក្រោមការដឹកនាំរបស់សម្តេចតេជោផ្ទាល់ដែលបានដាក់ចេញវិធានការទប់ស្កាតការចម្លងជំងឺកូវីដ-១៩ ដ៏សកម្មនឹងមានប្រសិទ្ធភាពបំផុត។ ទន្ទឹមនឹងនេះដែរ គឺអង្គការទេសចរណ៍ពិភពលោកក៏បានកោតសរសើរដល់ការងើបឡើងវិញនូវភ្ញៀវទេសចរក្នុងស្រុកដែលមានការយល់ដឹងពីអនាម័យសុខភាព និងសុវត្ថិភាពខ្ពស់ក្នុងការថែរក្សាសុវត្ថិភាពសុខភាពចៀសផុតពីជំងឺឆ្លងកូវីដ១៩។

សូមបងប្អូនប្រជាពលរដ្ឋ និងភ្ញៀវទេសចរណ៍ក្នុងស្រុកបន្តប្រើប្រាស់ម៉ាស់នៅពេលចាំបាច់ និងឧស្សាហ៍ដុសលាងសម្អាតដៃជាមួយសាប៊ូ ទឹកអាល់កុល ឬជឹលសម្លាប់មេរោគកុំអោយឆ្លងជំងឺកូវីដ-១៩៕SRP

ខេត្តកណ្ដាល៖លោកជំទាវឧកញ៉ា អ៊ាន សៀវម៉ី នៅល្ងាចថ្ងៃទី២៧ ខែសីហា ឆ្នាំ២០២០នេះ បានបរិច្ចាគថវិការផ្ទាល់ខ្លួនបន្ថែមចំនួន ៥០,០០០ដុល្លារទៀត (ប្រាំម៉ឺន$) និងចេលលាងដៃចំនួន១០០ដប ស្ព្រេយបាញ់អាកុលចំនួន១០០ដប ជូនដល់កាកបាទក្រហមកម្ពុជាខេត្តកណ្តាល។

ការប្រគល់ខាងលើក្រោមវត្តមានរបស់លោក គង់ សោភ័ណ្ឌ អភិបាលខេត្តកណ្តាល និង ជាប្រធានគណៈកម្មាធិការសាខាកាកបាទក្រហមកម្ពុជាខេត្តកណ្តាល ព្រមទាំងមានការអមដំណើរជាកិត្តិយសពីសំណាក់ លោកជំទាវ ញ៉ែម មរកត អនុរដ្ឋលេខាធិការនៃ ក្រសួងកិច្ចការនារី និង សប្បុរសជននានា រួមមានលោក ហុង ឃាង និងភរិយា បានឧបត្ថម្ភអង្ករចំនួន២តោន ផងដែរ។ ជាមួយគ្នានេះលោកជំទាវ ឧកញ៉ា អ៊ាន សៀវម៉ី ក៏បានឧបត្ថម្ភថវិកា ចំនួន២០០០ដុល្លារ សំរាប់ជួយជួសជុលផ្លូវលំមួយខ្សែប្រវែង៤៧០ម៉ែត្រ ដែលស្ថិតនៅ ក្នុងភូមិកំពង់សំណាញ់១ សង្កាត់កំពង់សំណាច់ ក្រុងតាខ្មៅ ខេត្តកណ្តាលផងដែរ។

សូមបញ្ជាក់ថានៅល្ងាចថ្ងៃនេះ ឧកញ៉ា អ៊ាន សៀវម៉ី ក៏បានចុះទៅសាកសួរសុខទុក្ខផ្ទាល់ដល់គ្រួសារមួយ កំពុងតែជួបទុក្ខលំបាកយ៉ាងខ្លាំង ដែលបានគ្រោះថ្នាក់ចរារណ៍ ដោយបានឧបត្ថម្ភ ប្រាក់ចំនួន៥០០ដុល្លារ អង្ករ៥០គីឡូ គ្រឿងបរិក្ខា ឧបភោគបរិភោគ មួយចំនួនជូនដល់ពួកគាត់ និងជនពិការ១០០ដុល្លារ ព្រមទាំង៥គ្រួសារជិតខាងផ្សេងទៀត ចំនួន២០ម៉ឺនរៀល ក្នុងមួយគ្រួសារ។ឧកញ៉ា អ៊ាន សៀវម៉ី ក៏សូមប្រសិទ្ធិពរជ័យជូនដល់ពលរដ្ឋកម្ពុជាទាំងអស់ សូមជួបតែសំណាងល្អ សុខភាពល្អ គ្រប់ក្រុមគ្រួសារ និង ចូលរួម ការពារទប់ស្កាត់ជំងឺខូវីត១៩ទាំងអស់គ្នា៕SRP

ខេត្តកំពង់ធំ៖សេចក្ដីរាយការណ៍បានឲ្យដឹងថាក្រុមឈ្មួញបានធ្វើសកម្មភាពដឹកជញ្ជូនឈើចេញពីទឹកដីខេត្តព្រះវិហារចូលទៅចែកចាយតាមដេប៉ូក្នុងខេត្តកំពង់ធំនិងបន្តទៅលក់តាមបណ្ដាខេត្តផ្សេងៗទៀតបានកំពុងកើតមានយ៉ាងពេញពន្ទុកខណ:អាជ្ញាធរសមត្ថកិច្ចជំនាញនៃខេត្តទាំងពីរហាក់ព្យាយាមរក្សាភាពស្ងប់ស្ងាត់ធ្វើមិនដឹងមិនឮអ្វីទាំងអស់។

សេចក្ដីរាយការណ៍បានបន្តថាក្រុមឈ្មួញទាំងនោះបានប្រើប្រាស់រថយន្តសាំយ៉ុង រថយន្តតាកូម៉ា រថយន្តសេរីទំនើប រថយន្តកូរ៉េ និងតាមកាឡេថង ដោយបាន ដឹកជញ្ជូនដូហែរកឋិន ចន្លោះពីម៉ោង១២យប់ ដល់ម៉ោងជិតភ្លឺ ដើម្បីបំភ័នភ្នែកសមត្ថកិច្ច តាមផ្លូវជាតិលេខ៦២ បើទោះបីជានៅតាមដងផ្លូវមានការស្នាក់ការសមត្ថកិច្ចបណ្ដាក់គ្នាដូចខ្យងយ៉ាងណាក៏ដោយក៏ក្រុមឈ្មួញនៅតែអាចដឹកជញ្ជូនបានដោយរលូន។

យោងតាមសេចក្ដីរាយការណ៍បានបញ្ជាក់ថា ឈ្មួញដែលបានដឹកជញ្ជូនឈើចេញពីខេត្តព្រះវិហារចូលមកខេត្តកំពង់ធំ ត្រូវបានគេបង្ហើបឲ្យដឹងឈ្មោះថា(ឈ្មោះ តេន)( ឈ្មោះ ហួង)( ឈ្មោះញ៉ី)(ឈ្មោះ យេន)( ឈ្មោះឌីណា)( ឈ្មោះហឿន)ឈ្មោះធី)និងឈ្មួញមួយចំនួនទៀត។ ដោយក្រុមឈ្មួញទាំងនេះពួកគេរកស៊ីដឹកជញ្ជូនឈើរាប់ឆ្នាំមកហើយ មិនដែលមានអាជ្ញាធរសមត្ថកិច្ចជំនាញណាធ្វើការបង្ក្រាបបានម្ដងឡើយ។

ទោះយ៉ាងណាពាក់ព័ន្ធករណីនេះមជ្ឍដ្ឋាននានាសង្ឃឹមថាអាជ្ញាធរជំនាញពាក់ព័ន្ធនិងចាត់វិធានការទប់ស្កាត់បង្ក្រាបការដឹកជញ្ជូនឈើដោយមានប្រសិទ្ធិភាពបំផុត៕SRP

ខេត្តសៀមរាប៖នៅទីបំផុតអាជ្ញាធរខេត្តសៀមរាបបានសម្រេចពង្រីកផ្លូវជាតិលេខ៦ចាប់ពីភ្លើងស្ដុបសុខាអង្គរដល់រង្វង់មូលព្រះបាទជ័យវរ័ន្មទី៧ ដោយធ្វើជា៦គន្លង។

អាជ្ញាធរខេត្តសៀមរាបបានអះអាងថាផ្លូវនេះនឹងចាប់ផ្តើមអនុវត្តសាងសង់ចាប់ពីខែតុលាឆ្នាំ២០២០ខាងមុខដោយមានប្រវែងបណ្តោយសរុប៥៨០០ម៉ែត្រ ទទឹងសរុប២៩ម៉ែត្រ ដោយបែងចែកគន្លងផ្លូវទៅមក ៦គន្លង ផ្លូវទៅមកសម្រាប់រថយន្ត និងផ្លូវទៅមកសម្រាប់ម៉ូតូ កង់ ផ្លូវថ្មើជើងទទឹងសរុប៣ម៉ែត្រ ព្រមទាំងរៀបចំសួនច្បារពុះចែកទ្រូងផ្លូវទទឹង២ម៉ែត្រ។

អាជ្ញាធរបានបន្តថានៅថ្ងៃអង្គារទី២៥ ខែសីហាឆ្នាំ២០២០ ក្រុមការងារចម្រុះរដ្ឋបាលខេត្ត បានចុះអនុវត្តរើការ៉ូឡា និងដកដើមឈើ នៅសងខាងផ្លូវជាតិលេខ៦ ចាប់ពីរង្វង់មូលព្រះបាទជ័យវរ័ន្មទី៧ ដល់ភ្លើងស្ដុបសុខាអង្គរក្រុងសៀមរាប ដើម្បីធ្វើការបើកពង្រីក និងសម្រួលដល់ការធ្វើចរាចរណ៍ ឲ្យមានសណ្តាប់ធ្នាប់ល្អ និងធានាសុវត្ថិភាពចរាចរណ៍។ផ្លូវនេះគ្រោងស្ថាបនានៅចុងឆ្នាំ២០២០នេះ ដែលជាជំនួយរបស់គម្រោងរបស់ធានាគារអភិវឌ្ឍន៍អាស៊ី(ADB )។

អាជ្ញាធរខេត្តបញ្ជាក់ថាការរៀបចំសាងសង់ផ្លូវនេះក្នុងគោលបំណងដើម្បីសម្រួលចរាចរណ៍ដល់បងប្អូនប្រជាពលរដ្ឋដែលតែងតែធ្វើដំណើរទៅមក ក៏ដូចជារៀបចំសោភ័ណភាពក្នុងក្រុងសៀមរាបអោយបានស្អាតជាងមុន។

បើតាមអាជ្ញាធរខេត្តថាមកដល់ថ្ងៃនេះអាជ្ញាធរបានបំពេញភារកិច្ចរបស់ខ្លួន ដោយធ្វើការរុះរើបង្គោលបំភ្លឺ គាស់កម្រាលការ៉ូឡា តាមចិញ្ចើមផ្លូវ និងធ្វើការគាស់ដើមឈើផ្កាលម្អតាមដងផ្លូវ ដើមី្បយកទៅរក្សាទុក សម្រាប់ធ្វើការដាំឡើងវិញផងដែរ។

សូមបញ្ជាក់ថាគោលការណ៍ដឹកនាំរបស់លោកទៀ សីហា អភិបាលខេត្ត បានយកចិត្តទុកដាក់ខ្ពស់លើការងារការកែលម្អសោភ័ណភាព និងហេដ្ឋារចនាសម្ព័ន្ធផ្លូវថ្នល់ លូ ប្រឡាយក្នុងខេត្ត។អាស្រ័យដូចបានជំរាបខាងលើនេះសូមបងប្អូនសាធារណជនដែលធ្វើចរាចរណ៍ក្នុងតំបន់ដែលកំពុងអនុវត្តការងារមេត្តាអធ្យាស្រ័យ និងយោគយល់ ដោយក្តីដោយអនុគ្រោះ៕SRP

ខេត្តកំពង់ធំ៖ស្ត្រីម្នាក់ត្រូវបានរថយន្តមួយគ្រឿងបុកចំពេញទំហឹងបណ្ដាលឲ្យស្លាប់ភ្លាមៗនៅកន្លែងកើតហេតុ។ គ្រោះថ្នាក់ចរាចណ៍នេះបានកើតឡើងនៅល្ងាចថ្ងៃទី២៦ខែសីហាឆ្នាំ២០២០នៅលើផ្លូវជាតិលេខ៦ចន្លោះគីឡូម៉ែត្រ២៣៤,២៣៥ស្ថិតក្នុងភូមិកំពង់វាំង ឃុំប្រឡាយ ស្រុកស្ទោង ខេត្តកំពង់ធំ។ រវាងថ្មើជើងនឹងរថយន្តម៉ាកហ្វត។

អធិការនគរបាលស្រុកស្ទោងលោកវរសេនីយ៍ឯកយ៉ង សំ បានប្រាប់បណ្ដាញសៀមរាបប៉ុស្ដិ៍ថារថយន្តម៉ាកហ្វត ពណ៌ទឹកក្រូច ពាក់ស្លាកលេខព្រះវិហារ២B៩៩៩៩ អ្នកបើកបរបានចុះគេចខ្លួនបាត់ក្រោយកើតហេតុដោយ មិនទាន់ស្គាល់អត្តសញ្ណាណនោះឡើយ។ ចំណែកស្ត្រីរងគ្រោះឈ្មោះវិន សុខាន អាយុ៥១ឆ្នាំ នៅភូមិកំពង់វាំង ឃុំប្រឡាយ ស្រុកស្ទោង ខេត្តកំពង់ធំ។ បើតាមអធិការបញ្ជាក់ថាមូលហេតុបឋម ស្ត្រីរងគ្រោះដើរឆ្លងកាត់ផ្លូវខ្វះការប្រុងប្រយ័ត្ន។ ដោយឡែករថយន្តមានល្បឿនលឿនបុកពេញទំហឹងតែម្តង។ក្រោយបានចុះពិនិត្យសាកសពរួចបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។វត្ថុតាងរថយន្តយកមករក្សាទុកនៅអធិការដ្ឋាននគរបាលស្រុកស្ទោងដើម្បីរងចាំការដោះស្រាយ៕SRP

ខេត្តត្បូងឃ្មុំ៖លោកជាមច័ន្ទសោភ័ណអភិបាលខេត្តត្បូងឃ្មុំ បានប្រាប់ទៅអាជ្ញាធរសមត្ថកិច្ចថាត្រូវកំណត់អត្តសញ្ញាណឲ្យបានជាក់លាក់នូវអ្នកតវ៉ាដោយខុសច្បាប់ អ្នកញុះញង់ និងមេខ្លោងដែលនៅពីក្រោយរឿងនេះ ដើម្បីឈានទៅវែកមុខយកមកចាត់ការទៅតាមនីតិវិធីច្បាប់ បញ្ចប់បញ្ហាឲ្យបានឆាប់ ព្រោះថានៅទីនេះជាចំណុចដ៏ក្តៅគគុក ដោយកន្លងមកអ្នកនយោបាយមួយចំនួនតូចបានយកទីតាំងនេះ ដើម្បីកេងចំណេញនយោបាយ។ អភិបាលបញ្ជាក់ថាក្នុងនាមអាជ្ញាធរមានសមត្ថកិច្ចទាំងអស់ មិនត្រូវប្រងើយកន្តើយនោះឡើយ ឲ្យតែមានការញុះញង់បំផុសបំផុល ប្រជាពលរដ្ឋ ឃើញបទល្មើសជាក់ស្តែង ត្រូវតែចាប់ឃាត់ខ្លួនតែម្តង។

ការដាក់បទបញ្ជានេះធ្វើឡើងនៅថ្ងៃទី២៦ខែសីហា ឆ្នាំ២០២០នេះ ក្នុងពេលដឹកនាំមន្ត្រីពាក់ព័ន្ធប្រជុំនៅសាលប្រជុំសាខាគយនិងរដ្ឋាករប្រចាំច្រកទ្វារព្រំដែនអន្តរជាតិត្រពាំងផ្លុង លើបញ្ហាដីធ្លីតាមបន្ទាត់ព្រំដែនកម្ពុជា-វៀតណាម។

លោកជាម ច័ន្ទសោភ័ណ បានលើកឡើងថាកិច្ចប្រជុំនេះដើម្បីផ្សព្វផ្សាយនិងពង្រឹងការថែរក្សាសន្តិសុខ សណ្ដាប់ធ្នាប់សាធារណៈ ជូនប្រជាពលរដ្ឋ ពិសេសពិនិត្យ ពិភាក្សារៀបចំដាក់ផែនការ សុំអនុសាសន៍ និងប្រតិបត្តិការទប់ស្កាត់ការទន្ទ្រានចូលកាន់កាប់ដោយខុសច្បាប់លើដីសំណល់ពីការបោះបង្គោលព្រំដែនរវាងកម្ពុជា-វៀតណាម ក្នុងភូមិសាស្ត្រស្រុកពញាក្រែក និងស្រុកមេមត់ ដែលភាគីទាំងពីរមិនទាន់ធ្វើពិធីប្រគល់ទទួលនៅឡើយ។

អភិបាលខេត្តត្បូងឃ្មុំបញ្ជាក់ថាកងកម្លាំងទាំង៣អាជ្ញាធរស្រុកនិងអ្នកពាក់ព័ន្ធទាំងអស់ ត្រូវតែថែរក្សាឲ្យខានតែបាននូវការចូលកាន់កាប់ដីដោយខុសច្បាប់ ពីសំណាក់ជនខិលខូច ក៏ដូចជាប្រទេសជិតខាង សូម្បីតែ១មីលីម៉ែត្រក៏ដោយ ត្រូវតែធ្វើឲ្យខានតែបាន ដោយម៉ឺងម៉ាត់ និងម៉ត់ចត់បំផុត។

លោកជាម ច័ន្ទសោភ័ណ ក៏បានចាត់ឲ្យរដ្ឋបាលស្រុកនិងកងកម្លាំងវរៈការពារព្រេំដែន ត្រូវបន្តធ្វើវេទិការសាធារណៈផ្សព្វផ្សាយ ដល់ប្រជាពលរដ្ឋ ឲ្យយល់ច្បាស់ជ្រួតជ្រាបជុំវិញបញ្ហាដីធ្លីនេះ។ដោយឡែកបើប្រជាពលរដ្ឋ ដែលខ្វះដីនិងមិនមានដីពិតប្រាកដនោះ ត្រូវស្នើសុំមករដ្ឋបាលខេត្ត ដើម្បីរៀបចំឲ្យបងប្អូននូវដីសម្បទានសង្គមកិច្ច តាមគោលនយោបាយរបស់រាជរដ្ឋាភិបាលកម្ពុជា៕SRP

ខេត្តបាត់ដំបង៖ក្រុមការងារអធិការកិច្ចមន្ទីរទេសចរណ៍ខេត្ត សហការជាមួយនគរបាលក្រុងបាត់ដំបងនៅយប់ថ្ងៃទី២៤និង២៥ ខែសីហា ឆ្នាំ២០២០ បានចុះពិនិត្យទីតាំងភោជនីយដ្ឋានចំនួនពីរកន្លែងទី១ស្ថិតនៅក្នុងសង្កាត់ព្រែកព្រះស្តេចយីហោ(ldol)ទី២ឡឺវេល (អតីតក្លិបឡឺវែល) ស្ថិតក្នុងភូមិរំចេក៤សង្កាត់រតនៈ ក្រុងបាត់ដំបង។

ជុំវិញការចុះពិនិត្យទីតាំងភោជនីយដ្ឋានខាងលើ លោក អ៊ុច អ៊ុភីនីស្សារ៉ា ប្រធានមន្ទីរទេសចរណ៍ខេត្តបានឲ្យដឹងថាទីតាំងអាជីវកម្មទាំងនេះ មិនមានការប្រមូលផ្តុំ ចាក់ភ្លេងរាំ ឬបើកភ្លើងញាក់ឡើយ។ តាមការត្រួតពិនិត្យជាក់ស្តែង ឃើញថាបុគ្គលិកពាក់ម៉ាស់ មានអ្នកចាំបាញ់អាល់កុល វាស់កម្តៅ គម្លាតសុវត្ថិភាព និងបិតស្លាកផ្សព្វផ្សាយពីកូវីដ១៩ និងបានបានកត់ត្រាឈ្មោះ និងវាស់កម្តៅ បុគ្គលិករាល់ម៉ោងចេញចូលផងដែរ។

លោកប្រធានមន្ទីរបន្តថា ក្រុមការងារក៏បានណែនាំអោយគាត់បិតគំនូសផ្លូវចេញចូល និងគំនូសគម្លាតសុវត្ថិភាពនៅកន្លែងរង់ចាំបន្ថែម ព្រមទាំងកាត់បន្ថយម៉ាស៊ីនត្រជាក់ក្នុងទីតាំងភោជនីយដ្ឋានទៀតផង។

បើតាមប្រធានមន្ទីរទេសចរណ៍ បានសង្កត់ធ្ងន់ថារាជរដ្ឋាភិបាល មិនទាន់អនុញ្ញាតអោយបើកដំណើរការខារ៉ាអូខេ ឬក្លិបកម្សាន្តនៅឡើយទេ។ ក្នុងករណីដែលអាជីវកម្មណាមួយបំពានខុសពីកិច្ចសន្យា ដែលបានធ្វើជាមួយមន្ទីរទេសចរណ៍ ត្រូវអនុវត្តតាមច្បាប់ជាធរមាន។ ជាមួយគ្នានេះដែរមន្ទីរទេសចរណ៍នឹងបន្តសហការជាមួយអាជ្ញាធរ និងសមត្ថកិច្ចពាក់ព័ន្ធដើម្បីចុះតាមដាន ពិនិត្យពីការអនុវត្តវិធានសុវត្ថិភាពតាមមណ្ឌលកម្សាន្តទេសចរណ៍នានាក្នុងខេត្តបាត់ដំបងបន្តទៀត។ ទោះយ៉ាងណាប្រធានមន្ទីរក៏បានស្នើសុំអោយប្រជាពលរដ្ឋ និងភ្ញៀវទេសចរសូមចូលរួមអនុវត្តអោយបានខ្ជាប់ខ្ជួនតាមការណែនាំរបស់រាជរដ្ឋាភិបាល និងក្រសួងទេសចរណ៍ ដើម្បីទប់ស្កាត់ការរីករាលដាលជំងឺកូវីដ១៩ទាំងអស់គ្នា៕SRP ដោយប៊ុនថេត