ខេត្តបាត់ដំបង៖កាសុីណូហ្គោលខាសល្យ GOLD CASTLE បានបើកដៃឱ្យប្រជាពលរដ្ឋខ្មែរចូលទៅលេងល្បែងដោយសេរីផ្ទុយពីលិខិតអនុញ្ញាតរបស់ក្រសួងពាក់ព័ន្ធ។

ទីតាំងកាសុីណូហ្គោលខាសល្យខាងលើស្ថិតនៅត្រង់ចំណុចភូមិអូរ ឃុំពេជ្រចិន្តា ស្រុកភ្នំព្រឹក ខេត្តបាត់ដំបង។
ប្រភពពីពលរដ្ឋបានអោយទៀតថា ពួកគាត់សង្កេតឃើញមានអ្នកចូលទៅលេងចាប់ថ្ងៃរសៀលរហូតដល់យប់សុទ្ធសឹងជាជនជាតិខ្មែរ។

ប្រភពពីអ្នកដែលញៀនល្បែងចូលលេងនៅកាសុីណូបានលួចបង្ហើបថា ទីតាំងខាងលើមានបើកលេងល្បែងគ្រប់ប្រភេទដូចជា ជល់មាន់ យូគី អាប៉ោង បៀរជាច្រើនប្រភេទ ដោយការចូលទៅលេងមានគេចាំយកថ្លៃកៅអីជាស្រេចនៅច្រកមាត់ទ្វារចូលតែម្តង។

ពាក់ព័ន្ធករណីនេះលោកសុង សុភ័ក្ត្រ អភិបាលស្រុកភ្នំព្រឹក បានថ្លែងតាមទូរស័ព្ទប្រាប់អ្នកយកព័ត៌មាននៅរសៀលថ្ងៃទី២៨ខែសីហាថា បញ្ហារឿងកាសុីណូហ្គោលខាសល្យ មានលួចបើកលេងល្បែងស៊ីសងនោះ លោកពុំបានដឹងនោះទេ។ លោកថាពុំមានសិទ្ធអនុញាតបើកអោយមានលេងល្បែងដែរ រួចក៏បានបិទទូរស័ព្ទថារវល់ជាប់ប្រជុំ។

ប្រជាពលរដ្ឋបានបន្ថែមថាចាប់តាំងពីមានការស៊ីណូកូខាងលើមក នៅក្នុងមូលដ្ឋានរបស់ពួកគាត់តែងតែកើតមានអំពើចោរកម្មជាញឹកញាប់ ធ្វើឲ្យពួកគាត់ព្រួយបារម្ភយ៉ាងខ្លាំងពីបញ្ហាសន្តិសុខរស់នៅ។ ដូច្នេះពួកគាត់សុំសំណូមពរដល់អាជ្ញាធរសមត្ថកិច្ចរដ្ឋបាលខេត្តជួយចាត់វិធានការទៅលើកាស៊ីណូហ្គោលខាសល្យ ផងទាន!៕SRP

ខេត្តសៀមរាប៖លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានឲ្យដឹងថា ក្នុងខែសីហា ឆ្នាំ២០២០នេះ តាមរយៈការចុះត្រួតពិនិត្យរបស់ក្រុមការងារត្រួតពិនិត្យសុវត្ថិភាពទេសចរណ៍ក្នុងខេត្តសៀមរាបជំហានទី២ ក្រុមការងារបានចុះត្រួតពិនិត្យចំនួន ១៦ទីតាំងអាជីវកម្ម ផ្នែកសេវាកម្មភោជនីយដ្ឋាន និងអាហារដ្ឋានទេសចរណ៍។

តាមរយៈការចុះត្រួតពិនិត្យ និងវាយតម្លៃរបស់ក្រុមការងារផ្នែកសេវាកម្មភោជនីយដ្ឋាននិងអាហារដ្ឋានទេសចរណ៍ទៅលើលក្ខណៈវិនិច្ឆ័យសុវត្ថិភាពទេសចរណ៍បានសម្រេចស្នើសុំការសម្រេចពីអង្គប្រជុំនូវការផ្តល់ឡាប៊ែលសុវត្ថិភាពជូនដល់មូលដ្ឋានអាជីវកម្មចំនួនៈ ១៦ ភោជនីយដ្ឋាន ក្នុងនោះរួមមាន ៖

(១) ភោជនីយដ្ឋាន Starbucks

(២)ភោជនីយដ្ឋាន AKA Japanese Restaurant

(៣)ភោជនីយដ្ឋាន Dairy Queen

(៤)ភោជនីយដ្ឋាន The Pizza Company

(៥) ភោជនីយដ្ឋាន Koi

(៦) ភោជនីយដ្ឋាន Amazon Cafe

(៧)ភោជនីយដ្ឋាន Bar BQ Plaza

(៨)ភោជនីយដ្ឋាន Swensen (៩)ភោជនីយដ្ឋាន Tous Les Jours

(១០)ភោជនីយដ្ឋាន Domino Pizza

(១១)ភោជនីយដ្ឋាន Yummy Korea

(១២)ភោជនីយដ្ឋាន The Hashi

(១៣)ភោជនីយដ្ឋាន De Tummour

(១៤)ភោជនីយដ្ឋាន Green Suki Soup

(១៥)ភោជនីយដ្ឋាន រហាត់កាហ្វេ

(១៦)ភោជនីយដ្ឋាន ឡាណិច ។

ដោយឡែកសម្រាប់អាជីវកម្មដែលពុំទាន់គ្រប់លក្ខណៈក្នុងការស្នើសុំឡាប៊ែលសុវត្ថិភាពក្រុមការងារនឹងធ្វើការណែនាំឲ្យកែតម្រូវតាមស្តង់ដាសុវត្ថិភាពទេសចរណ៍ទើបស្នើសុំឡាប៊ែលជូននៅពេលក្រោយនិងបន្តចុះពិនិត្យវាយតម្លៃឲ្យបានគ្រប់មូលដ្ឋានអាជីវកម្មទេសចរណ៍ដែលកំពុងដំណើរការក្នុងសខេត្តសៀមរាប។

លោកបញ្ជាក់យ៉ាងដូច្នេះក្នុងពេលនៅព្រឹកថ្ងៃទី២៨ខែសីហា ឆ្នាំ២០២០ នៅសាលាខេត្តសៀមរាបក្នុងកិច្ចប្រជុំក្រុមការងារចុះត្រួតពិនិត្យវិធានសុវត្ថិភាពទេសចរណ៍ប្រចាំខែសីហា ឆ្នាំ២០២០ ក្នុងខេត្តសៀមរាប ដើម្បីពិនិត្យសម្រេចក្នុងការផ្តល់ឡាប៊ែលសុវត្ថិភាពដែលក្រុមការងារបានចុះវាយតំលៃ ក្រោមវត្តមានលោក ពៅ ពិសិដ្ឋ អភិបាលរងខេត្ត។

នៅក្នុងកិច្ចប្រជុំលោកពៅ ពិសិដ្ឋបានដាក់នូវវិធានការចំនួន០៤៖
១- ស្នើសុំដល់អភិបាលស្រុកទាំងអស់ឲ្យបន្តផ្សព្វផ្សាយពីបញ្ហាជំងឺកូវីដ-១៩ ពិសេសពេលប្រជុំគណៈបញ្ជាការឯកភាពស្រុក
២- ស្នើសុំដល់ក្រុមការងារទាំងអស់ចុះពិនិត្យចុះវាយតម្លៃគ្រប់អាជីវកម្មសេវាកម្មទេសចរណ៍ដែលកំពុងដំណើរការទាំងអស់ក្នុងខេត្តសៀមរាប និងបន្តចុះពិនិត្យមូលដ្ឋានអាជីវកម្មដែលបានទទួលឡាប៊ែលហើយឲ្យបន្តគោរពតាមការណែនាំរបស់រាជរដ្ឋាភិបាល ក្រសួងសុខាភិបាល និងក្រសួងទេសចរណ៍
៣- ស្នើដល់ក្រុមការងារបន្តចុះពិនិត្យការកែប្រែខារ៉ាអូខេ បៀរហ្កាឌិន ស្កាយបារ ឲ្យទៅជាភោជនីយដ្ឋានបណ្តោះអាសន្ន ដោយក្រុមការងារត្រូវចូលរួមត្រួតពិនិត្យឲ្យបានម៉ត់ចត់ និងបន្តតាមដានការអនុវត្តវិធានសុវត្ថិភាពនានាដែលដាក់ចេញដោយរាជរដ្ឋាភិបាល ក្រសួងសុខាភិបាល និងក្រសួងទេសចរណ៍
៤- ស្នើដល់ក្រុមការងារបន្តចុះអនុវត្តសេចក្តីជូនដំណឹងរបស់ក្រសួងទេសចរណ៍លេខ ១៦៧ សជណ.អរហ និងសេចក្តីជូនដំណឹងលេខ ១៦៨ សជណ.អរហ ចុះថ្ងៃទី ០៧ ខែ មេសា ឆ្នាំ២០២០ របស់ក្រសួងទេសចរណ៍ ស្តីពីការផ្អាកអាជីវកម្មហាងម៉ាស្សាសុខភាព និងស្ប៉ា ដែលស្ថិតក្រោមការគ្រប់គ្រងរបស់ក្រសួងទេសចរណ៍ និងស្ថិតក្រោមការគ្រប់គ្រងរបស់រដ្ឋបាលរាជធានី-ខេត្ត ជាបណ្តោះអាសន្ន រហូតដល់មានការជូនដំណឹងជាថ្មី៕SRP

ខេត្តសៀមរាប៖សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់អំណោយម៉ាស៊ីនផលិតទឹកបរិសុទ្ធដោយបរិយាកាស -WATERGEN (ប្រភេទ GEN-M) ជូនមន្ទីរពេទ្យគន្ធបុប្ផា។
ការផ្ដល់អំណោយនេះនៅថ្ងៃសុក្រ ទី២៨ ខែសីហា ឆ្នាំ២០២០ ក្រោមវត្តមានលោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ សម្ដេចហ៊ុន សែន ដោយមានការអញ្ជើញចូលរួមពី លោក Denis Laurent ប្រធាននាយកប្រតិបត្តិនៃមន្ទីរពេទ្យគន្ធបុប្ផា និងបុគ្គលិក ក្រោមឱវាទមន្ទីរពេទ្យ។

ថ្លែងក្នុងពិធីប្រគល់-ទទួលនាឱកាសនោះ រដ្ឋមន្ត្រីស៊ុន ចាន់ថុលបានគូសបញ្ជាក់អំពីលក្ខណៈពិសេស ម៉ាស៊ីនផលិតទឹកបរិសុទ្ធដោយបរិយាកាសធម្មជាតិ-WATERGEN (ប្រភេទ GEN-M) ជាបច្ចេកវិទ្យា មកពីប្រទេសអ៊ីស្រាអែល មានសមត្ថភាពអាចផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស បានប្រមាណ៨០០លីត្រក្នុងមួយថ្ងៃ ដោយមិនចាំបាច់តភ្ជាប់ជាមួយប្រភពទឹកទុយោ និងអាចផ្គត់ផ្គង់ទឹក ប្រកបដោយគុណភាព សុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង។

លោករដ្ឋមន្ត្រី បានលើកឡើងថា៖ ម៉ាស៊ីននេះអាចផ្តល់អត្ថប្រយោជន៍សម្រាប់ បងប្អូនប្រជាពលរដ្ឋដែលនាំយកកូនៗមកសម្រាកព្យាបាលជំងឺនៅមន្ទីពេទ្យនេះ ពោលគឺ៖ ពួកគាត់អាចប្រើប្រាស់ទឹកដែលផលិតដោយម៉ាស៊ីននេះ ចូលរួមកាត់បន្ថយការប្រើប្រាស់ថង់ផ្លាស្ទីកបង្កផលប៉ះពាល់បរិស្ថាន ជួយសន្សំសំចៃថវិកាពួកគាត់បានមួយចំណែក ជាពិសេស ម៉ាស៊ីននេះអាចយកទៅប្រើប្រាស់នៅតាមសាលារៀន មន្ទីរពេទ្យ មណ្ឌលសុខភាពរបស់បណ្ដាភូមិ ឃុំ ស្រុកទាំងឡាយណាដែលខ្វះខាតទឹកប្រើប្រាស់បានផងដែរ។

គួរកត់សម្គាល់ថា៖ អំណោយដ៏ថ្លៃថ្លារបស់សម្តេចតេជោហ៊ុន សែន នាឱកាសនេះ គឺជាការបង្ហាញនូវ កាយវិការប្រកបដោយមនុស្សធម៌ ដែលសម្តេចតែងតែគិតគូរយកចិត្តទុកដាក់ខ្ពស់ចំពោះសុខទុក្ខរបស់បង ប្អូនប្រជាពលរដ្ឋ ធ្វើយ៉ាងណាឱ្យសុខមាលភាព និងជីវភាពរស់នៅរបស់បងប្អូនកាន់តែមានភាពប្រសើរឡើងពីមួយថ្ងៃទៅមួយថ្ងៃ។

ឆ្លៀតក្នុងឱកាសនោះផងដែរ លោកស៊ុនចាន់ថុល បានថ្លែងអំណរគុណយ៉ាងជ្រាលជ្រៅ និងវាយតម្លៃ ខ្ពស់ចំពោះគុណបំណាច់ដ៏ធំធេងរបស់អតីតស្ថានិកមន្ទីរពេទ្យគន្ធបុប្ផា Beat Richner ដែលបានខិត ខំប្រឹងប្រែងលះបង់កម្លាំងកាយចិត្តដើម្បីកុមារកម្ពុជា ពិសេសលោកគ្រូពេទ្យ អ្នកគ្រូពេទ្យ ព្រមទាំង បុគ្គលិកមន្ទីរពេទ្យគន្ធបុប្ផាទាំងអស់ បំពេញការងារមិនខ្លាចនឿយហត់ក្នុងបុព្វ ហេតុជួយសង្គ្រោះកុមារកម្ពុជាឱ្យអស់ពីសមត្ថភាព ដោយឥតគិតថ្លៃ ដែលកិច្ចខិតខំប្រឹងប្រែងនេះ គឺជាការ ចូលរួមចំណែកដ៏ប្រពៃក្នុងការលើកកម្ពស់សុខុមាលភាពកុមារកម្ពុជា។ រដ្ឋមន្ត្រី បានសំណូមពរឱ្យបងប្អូនប្រជាពលរដ្ឋដែលនាំបុត្រធីតាជាទីស្រឡាញ់ របស់ខ្លួនទៅសម្រាកព្យាបាលជំងឺនៅក្នុងមន្ទីរពេទ្យនេះ សូមជួយថែរក្សាម៉ាស៊ីននេះឱ្យបានគង់វង្ស ដើម្បី អាចប្រើប្រាស់បានយូរអង្វែងទាំងអស់គ្នា៕SRP

ខេត្តសៀមរាប៖លោកឧត្តមសេនីយ៍ទោទិត្យ ណារ៉ុង ស្នងការនគរបាលខេត្តសៀមរាប នៅព្រឹកថ្ងៃសុក្រ ទី២៨ ខែសីហា ឆ្នាំ២០២០នេះ បានដឹកនាំមន្ត្រីក្រោមឱវាទ ចុះសួរសុខទុក្ខ លោក ប៉ែន សាមី (អតីតនាយរងការិយាល័យសន្តិសុខផ្ទៃក្នុង) និងលោកស្រី ឡុង វណ្ណៈ (អតីតនាយរងការិយាល័យប្រឆាំងការជួញដូរមនុស្ស និងការពារអនីតិជន) ជាមន្ត្រីនគរបាលចូលនិវត្តន៍ទាំងពីរនាក់ប្ដីប្រពន្ធ ដែលកំពុងសម្រាកព្យាបាលជំងឺនៅគេហដ្ឋាន ស្ថិតក្នុងភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប។ ជាមួយគ្នានេះដែរ លោកឧត្តមសេនីយ៍ទោទិត្យ ណារ៉ុង ក៏បាននាំយកថវិកាចំនួន២.៥០០.០០០រៀល រួមជាមួយនឹងគ្រឿងឧបភោគ បរិភោគ មួយចំនួន ប្រគល់ជូនលោក-លោកស្រីទាំងពីរ ក្នុងគុណបំណាច់ របស់លោក-លោកស្រីទាំងពីរ ដែលបានខិតខំបំពេញការងារ ថែរក្សាសន្តិសុខ សុវត្ថិភាព សណ្ដាប់ធ្នាប់ ជូនបងប្អូនប្រជាពលរដ្ឋ អស់រយៈពេលជិត៤០ឆ្នាំ តាំងពីឆ្នាំ១៩៨០ រហូតដល់ថ្ងៃចូលនិវត្តន៍។

លោកឧត្តមសេនីយ៍ទោទិត្យ ណារ៉ុង បានមានមតិផ្ដាំផ្ញើលោក-លោកស្រីទាំងពីរឲ្យខិតខំបន្តថែរក្សាសុខភាព ធ្វើតាមការណែនាំរបស់វេជ្ជបណ្ឌិត និងជូនពរឱ្យលោក-លោកស្រីទាំងពីរ ឆាប់បានជាសៈស្បើយពីជំងឺ ផងដែរ៕SRP

ខេត្តសៀមរាប៖គណៈកម្មាធិការកណ្ដាលគណបក្សប្រជាជនកម្ពុជានៅថ្ងៃទី២៧ខែសីហាឆ្នាំ២០២០បានសម្រេចតែងតាំងលោកសូរ ប្លាតុង ជាប្រធានគណៈកម្មាធិការគណបក្សប្រជាជនកម្ពុជាស្រុកប្រាសាទបាគង។

ពិធីនេះក្រោមវត្តមានរបស់លោកទៀ សីហា សមាជិកគណៈកម្មធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សខេត្តសៀមរាប ព្រមទាំងប្រតិភូ អមគណៈអធិបតី ដែលបានផ្តល់កិត្តិយស អញ្ជើញចូលរួមយ៉ាងច្រើនកុះករផងដែរ។

លោក សូរ ប្លាតុង បានប្ដេជ្ញាចិត្តថាភារកិច្ចថ្មីនេះ នឹងប្រើប្រាស់សម្រាប់ការចូលរួមថែរក្សាអោយបានដាច់ខាតនូវរាល់សមិទ្ធិផលដែលសម្រេចបានដោយគណបក្សប្រជាជនកម្ពុជាក្នុងការដឹកនាំកសាងប្រទេស និងចូលរួមគ្រប់សកម្មភាព ជាមួយគណបក្សប្រជាជនកម្ពុជា ក្នុងបុព្វហេតុបម្រើជាតិនិងប្រជាជនអោយបានកាន់តែល្អប្រសើរឡើងថែមទៀត៕SRP

ខេត្តកំពង់ចាម៖ស្រុកកំពង់សៀមរាបបានបន្តការកសាងផ្លួវបេតុងចំនួន០៥គម្រោងបន្ថែមទៀត ដែលជាមូលនិធិឃុំ-សង្កាត់ ឆ្នាំ២០២០របស់ គណៈកម្មការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ ការដាក់ដេញថ្លៃគម្រោងបានធ្វើនៅនៅព្រឹកថ្ងៃទី២៨ខែសីហានេះនៅសាលាស្រុកកំពង់សៀមក្រោមវត្តមានលោកឡីមិច នាយក រងរដ្ឋបាលសាលាខេត្តកំពង់ចាមនិងលោកឈួនវិបុលអភិបាលរងស្រុកកំពង់សៀមដោយមានការចូលរួមពីគណៈកម្មការម្ចាស់លទ្ធកម្មនិងតំណាងក្រុមហ៊ុនអ្នកទទួលការជាច្រើនរូបផងដែរ។

គួរបញ្ជាក់ថាគម្រោងដែលបានដាក់ឲ្យដេញថ្លៃខាងលើនេះគឺមានផ្លូវចំនួន៥ខ្សែដែលត្រូវស្ថាបនាជូនប្រជាពលរដ្ឋប្រើប្រាស់ ក្នុង នោះមាន

១-ឃុំ ស្រកសាងសង់ផ្លូវបេតុងអាមេប្រវែង២៥០ម៉ែត្រទទឹង៤ម៉ែត្រនៅភូមិព្រែកកុយ។

២-ឃុំអំពិលសាងសង់ផ្លូវបេតុងអាមេ ប្រវែង ៦៤៤ម៉ែត្រទទឹង៤ម៉ែត្រនៅភូមិអណ្តូងច្រុះភូមិវាលស្បូវ។

៣-ឃុំអូរស្វាយសាងសង់ផ្លូវបេតុងអាមេប្រវែង៤៥៨ម៉ែត្រទទឹង៤ម៉ែត្រនៅភូមិអំពិលក្រញាញ់។

៤-ឃុំរអាង សាងងស់ផ្លូវបេតុងអាមេប្រវែង ២៥៤ម៉ែត្រទទឹង៤ម៉ែត្រនៅភូមិរអាងលើ។

៥-ឃុំក្រឡាសាងងស់ផ្លូវបេតុងអាមេប្រវែង២៦៩ម៉ែត្រទទឹង៤ម៉ែត្រនៅភូមិត្រពាំងជ្រៃ៕SRP

ខេត្តសៀមរាប៖លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនការងារនគរបាលព្រហ្មទណ្ឌ បានដឹកនាំកិច្ចប្រជុំស្តីពីការពង្រឹងបង្ការ បង្ក្រាបបទល្មើស លួចឆក់ប្លន់ និងពង្រឹងការល្បាតតាមគោលដៅសំខាន់ៗ នៅក្រុងសៀមរាប។
កិច្ចប្រជុំនេះធ្វើឡើងនាព្រឹក ថ្ងៃទី២៨ ខែសីហា ឆ្នាំ២០២០នេះនៅអធិការដ្ឋាននគរបាលក្រុងសៀមរាប ដោយមានកាចូលរួមពលោកនាយ-នាយរងការិយាល័យ លោកនាយ-នាយរងផ្នែក-មន្រ្តី ចំណុះផែនការងារនគរបាលព្រហ្មទណ្ឌអធិការក្រុងសៀមរាប និងលោកនាយប៉ុស្តិ៍ទាំង១២ ក្នុងក្រុងសៀមរាបផងដែរ៕SRP

ខេត្តសៀមរាប៖កម្លាំងនគរបាលក្រុងសៀមរាបសហការជាមួយប៉ុស្តិ៍នគរបាលសង្កាត់សាលាកំរើក បានឃាត់ខ្លួនជនសង្ស័យម្នាក់ទៀតពាក់ព័ន្ធករណីឲលួចម៉ូតូនិងប្រើប្រាស់គ្រឿងញៀន។
ការឃាត់ខ្លួនធ្វើឡើងនៅរសៀលថ្ងៃទី ២៧ខែសីហាឆ្នាំ២០២០នេះនៅក្នុងភូមិសាស្ត្រក្រុងសៀមរាប។លោកវរសេនីយ៍ឯក ណុប សារ៉ាក់ អធិការនគរបាលក្រុងសៀមរាបបានឲ្យដឹងថាជនសង្ស័យឈ្មោះ ការីម រ៉ូស្នា ភេទប្រុសអាយុ ៣០ ឆ្នាំ មានទីលំនៅពុំពិតប្រាកដ។ ជនសង្ស័យបានឆ្លើយសារភាពថា៖ កាលពីថ្ងៃទី ១៦ ខែសីហាឆ្នាំ ២០២០ វេលាម៉ោង ១និង៣០នាទីយប់ បានធ្វើសកម្មភាពលួចម៉ូតូ០១គ្រឿង ម៉ាកគ្លិច ដែលមានលេខតួនិងលេខម៉ាស៊ីន ០០១០៩៥៣ បានយកម៉ូតូពីផ្ទះសំណាក់ Dancing Frog (កង្កែបរាំ)ស្ថិតនៅភូមិវិហារចិន សង្កាត់ស្វាយដង្គំ ក្រុងសៀមរាប ជារបស់ជនរងគ្រោះឈ្មោះ Circourt David ភេទប្រុស អាយុ៥០ឆ្នាំ ស្នាក់នៅភូមិវិហារចិន សង្កាត់ស្វាយដង្គំ ក្រុងសៀមរាប។  ក្រោយលួចបានហើយយកម៉ូតូទៅទុកនៅបន្ទប់ជួលស្ថិតនៅភូមិត្រៀក សង្កាត់សៀមរាប ក្រុងសៀមរាប។

បើតាម លោកវរសេនីយ៍ឯក ណុប សារ៉ាក់ បញ្ជាក់ថាបុរសរូបនេះជាបក្ខពួករបស់ជនសង្ស័យឈ្មោះ ឆេង ឌីណា ភេទស្រី អាយុ ៣១ឆ្នាំ ស្នាក់នៅបន្ទប់ជួលភូមិត្រៀក សង្កាត់សៀមរាប ក្រុងសៀមរាប ដែលបានចាប់ខ្លួនពីថ្ងៃម្សិលមិញ  ពាក់ព័ន្ធករណីលួចម៉ូតូ លួចម៉ូតូនៅភូមិជន្លង់ សង្កាត់សាលាកំរើក ក្រុង ខេត្តសៀមរាប កាលពីថ្ងៃទី២៥ខែសីហាឆ្នាំ២០២០។
លោកវរសេនីយ៍ឯក ណុប សារ៉ាក់ បន្តថា
ក្រោយពីកិច្ចសហប្រតិបត្តិការ ទទួលបានជោគជ័យ ដោយដកហូតម៉ូតូទាំង០២គ្រឿងខាងលើ មករក្សាទុកនៅអធិការដ្ឋាននគរបាលក្រុងសៀមរាប ជាបណ្តោះអាសន្នរងចាំធ្វើការប្រគល់អោយជនរងគ្រោះវិញ៕SRP