ខេត្តបន្ទាយមានជ័យ៖លោកឌី វិជ្ជា និងលោកជំទាវ ហ៊ុនម៉ាណា នៅរសៀលថ្ងៃទី ២១ខែមីនា ឆ្នាំ២០២១ ម្សិលមិញ បានចាត់អោយលោក ជិន ប៊ុនធឿន និង ក្រុមការងារមនុស្សធម៌ នាំយកអំណោយទៅប្រគល់ជូនជីវិតដ៏កំសត់គ្រួសារក្មួយប្រុស អាយ បញ្ញា ដែលស្ថិតក្នុងភូមិដំណាក់ថ្មី ឃុំតាគង់ ស្រុកម៉ាឡៃ ខេត្តបន្ទាយមានជ័យ។

ក្នុងឱកាសនោះលោកឌី វិជ្ជានិងលោកជំទាវ បានផ្តាំផ្ញើសាកសួរសុខទុក្ខក្មួយប្រុស និងក្រុមគ្រួសារព្រមទាំងលើកទឹកចិត្តក្មួយ អោយខិតខំសិក្សារៀនសូត្រ អោយបានខ្ពង់ខ្ពស់ ជាពិសេសក្នុងស្ថានភាពពេលបច្ចប្បន្ននេះ សូមក្មួយ និងក្រុមគ្រួសារ រក្សាអោយបាននូវអនាម័យ រស់នៅស្អាត ហូបស្អាត និងរក្សាគម្លាតសង្គម ពាក់ម៉ាសអោយបានគ្រប់ពេល ដែលទៅកន្លែងមនុស្សកុះករ ដើម្បីបង្ការការឆ្លងជំងឺកូវីដ-១៩ដែលកំពុងរីករាលដាល។

សូមជម្រាបថា សព្វថ្ងៃនេះក្មួយប្រុស អាយ​ បញ្ញា​ មានអាយុ១២ឆ្នាំ​ កំពុងរៀនថ្នាក់ទី២​ នៅសាលាបឋមសិក្សាដំណាក់ថ្មី​។​ កុមារ​ អាយ​ បញ្ញា​ មានប្អូនស្រី​១នាក់អាយុ៥ឆ្នាំ​ និងមានឪពុកម្តាយ​ជាអ្នកស៊ីឈ្នួលឃ្វាលគោអោយគេ​ គឺទាំងពីរនាក់ប្តីប្រពន្ធទទួលបានប្រាក់ឈ្នួលបន្តិចបន្តួចដើម្បីផ្គត់ផ្គង់ជីវភាពគ្រួសារប្រចាំថ្ងៃ។ គ្រួសារនេះ​ ជាប្រជាជនរស់នៅក្នុងខេត្តបាត់ដំបង​ និងបានចំណាកស្រុកមករកការងារធ្វើនៅក្នុងមូលដ្ឋានខាងលើ ដោយមកសុំជ្រកនៅផ្ទះខ្ទមចាំស្រែគេ អស់រយៈពេល​ជាង៨ឆ្នាំកន្លងមកហើយ និងជីវភាពរស់នៅ​សព្វថ្ងៃនេះ​ មានការលំបាកខ្លាំងណាស់។

អំណោយមនុស្សធម៌ ដែលបានផ្ទល់ជូនគ្រួសារក្មួយ ដើម្បីជួយសម្រួលក្នុងការរស់នៅ និងបង្កលក្ខណៈអោយក្មួយបានរៀនសូត្របន្តរួមមាន៖

០១-ថវិកា ២លានរៀល

០២-កង់ដ៏ស្រស់ស្អាត ០១គ្រឿង

០៣-មី ០៥កេសតូច

០៤-អង្ករ ១០០គីឡូ

០៥-ភួយ ០២

០៦-ខ្នើយ ០២

០៧-ម៉ុង ០២

០៨-សាប៊ូ ១២ដុំតូច

០៩-វិទ្យុ ១ និង ថ្មពិល ០៤គ្រាប់

១០-តែ ១០កញ្ចប់

១១-ស្កសរ ៥គីឡូ

១២-ពូក ០១

១៣-ស្បែកជើង ០៤សម្រាប់

១៤-ឆ្នាំង ០២

១៥-ខ្ទះ ០១

១៦-កំសៀវ ០១

១៧-កាធុន ០១

១៨-កន្ទេល ០២

១៩-ត្រីខ ០១កេសធំ

២០-កាតាប ០២ ក្នុងនោះរួមមានសៀវភៅ ០៤ក្បាល, ប៊ិច ០៤ដើម, ជែលលាងដៃ ២ដប, សាប៊ូ ០២ដុំតូច, កន្សែងពោះគោ ០២ , សំលៀកបំពាក់ ០២សម្រាប់,ជ័រលុប ០២ដុំ៕SRP

ខេត្តសៀមរាប៖អាជ្ញាធរមូលដ្ឋានស្រុកបន្ទាយស្រីបានឲ្យដឹងថានៅព្រឹកនេះថា ក្មេងប្រុសស្រីចំនួន២នាក់បានលង់ទឹកស្លាប់ ខណ:តាមឪពុកទៅដាក់បង្គោលរបងក្នុងទឹកឲ្យគេ។

ហេតុការណ៍បានកើតឡើងនៅវេលាម៉ោង០៣រសៀលថ្ងៃទី ២១ ខែមីនា ឆ្នាំ២០២១ នៅចំណុចផ្លូវសីហនុ ភូមិពើងឆ័ត្រ ឃុំឃុនរាម ស្រុកបន្ទាយស្រី ខេត្តសៀមរាប។

អាជ្ញាធរបន្តថាជនរងគ្រោះទី១ឈ្មោះប្រុស ហ្វីលីវ ភេទប្រុស អាយុ២ឆ្នាំ ៩ខែ។ ទី២ឈ្មោះថា រ៉ាវិច្ឆិកា ភេទស្រី អាយុ៣ឆ្នាំ រស់នៅភូមិឃុំខាងលើ។

បើតាមអាជ្ញាធរស្រុកបន្ទាយស្រីបានបញ្ជាក់ថា មូលហេតុឪពុកក្មេងទាំងពីរនាក់ ឈ្មោះឡីក ថាអាយុ២១ឆ្នាំនិងឡីក ប្រុស អាយុ២៣ឆ្នាំ បានទៅស៊ីឈ្នួលដាក់បង្គោលរបងក្នុងទឹកឲ្យគេ ហើយយកកូនទៅតាមអោយលេងក្បែៗនោះ ដោយមានអន្លង់ទឺក ដែលអ៊ិចស្កាបានកាយធ្វើផ្លូវជម្រៅប្រហែល១ម៉ែត្រកន្លះ ដោយពេលកំពុងដាក់បង្គោលរបងក៏បានភ្លេចខ្លួនមើលកូន មួយសន្ទុះស្រាប់តែបាត់កូន ភ្លាមៗពួកគាត់បានស្រែកហៅកូនមិនឮក៏ងាកមកឃើញកូនលង់ទឹក ក៏បានចុះស្រង់កូនរបស់គាត់ទាំងពីរនាក់ មកដាក់លើកគោក ប៉ុន្តែកូនរបស់គាត់បានលង់ស្លាប់ទាំងពីរនាក់បាត់ទៅហើយ។

អាជ្ញាធរបានបន្ថែមថាករណីនេះ ក្រុមសមត្ថកិច្ចជំនាញបានពិនិត្យរួចសន្និដ្ឋានថាពិតជាបានស្លាប់ដោយសារលង់ទឹកពិតប្រាកដមែន។ បច្ចុប្បន្នសាកសពប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕SRP

ខេត្តកំពត៖នគរបាលខេត្តកំពតបានឲ្យដឹងថានៅថ្ងៃទី២១ ខែមីនា នេះបាននាំខ្លួនបុរសម្នាក់ទៅបង្ហាញឡើងវិញ នៅទីតាំងសកម្មភាព គាស់ផ្ទះលួចទូរស័ព្ទដែលមានតម្លៃជាង២០ម៉ឺនដុល្លារ។

លោកលក ញ៉ាវ ស្នងការរងទទួលផែនព្រហ្មទណ្ឌស្នងការប៉ូលិសខេត្តកំពត បានឱ្យដឹងថា បុរសរូបនេះ ឈ្មោះហែម ហ៊ី អាយុ ៣៨ឆ្នាំ រស់នៅភូមិស្វាយ ឃុំបឹងរាំង ស្រុកកំរៀង ខេត្តបាត់ដំបង ត្រូវបាន នគរបាលព្រហ្មទណ្ឌ ខេត្តកំពត សហការ ជាមួយនគរបាលខេត្តបាត់ដំបង ចាប់ខ្លួននៅថ្ងៃទី១៩ ខែមីនា ឆ្នាំ២០២១ នៅខេត្តបាត់ដំបង ត្រូវបាននាំខ្លួនមកខេត្តកំពត។

លោកបន្តថា ករណីលើកទី១ កាលពីរំលង អធ្រាត្រឈានចូលថ្ងៃទី២៧ ខែកុម្ភៈ មានចោរ គាស់ផ្ទះលួចទូរស័ព្ទ នៅហាងលក់មួយកន្លែង ឈ្មោះ ធី បញ្ញាពេជ្រ ស្ថិតក្នុងភូមិ កំពង់បាយខាងជើង សង្កាត់កំពង់បាយ ក្រុងកំពត ដោយយកបានទូរស័ព្ទទំនើប ជិត៣០០គ្រឿងមាន តម្លៃប្រមាណ២២ម៉ឺនដុល្លារ។

ករណីលើក​ទី​ ២ នៅ​យប់ថ្ងៃ​ទី​១៨​ ខែមករា​ ឆ្នាំ​២០២១​ មិន​ចាំ​ម៉ោង​ នៅ​ហាង​ទូរស័ព្ទ​ យីហោ​ទូក​មាស​ថ្មី​ ស្ថិត​ភូមិ​ព្រៃ​ក្រ ឡា​ខាងលិច​ ឃឃុំទូក​មាស​ខាងលិច​ ស្រុកបន្ទាយមាស ខេត្តកំពត បាន​ទូរស័ព្ទ​ដៃ​ចំនួន​៨០​គ្រឿង​។

ជនសង្ស័យបានសារភាពថា កាលពីរំលងអធ្រាត្រ ឈានចូលថ្ងៃទី២៧ ខែ កុម្ភៈ ឆ្នាំ២០២១ ខ្លួនពិតជាបានចូលគាស់ផ្ទះលួចទូរស័ព្ទដៃនៅភូមិកំពង់បាយខាងជើង សង្កាត់កំពង់បាយ ក្រុងកំពតប្រាកដមែន ដោយនៅម៉ោងប្រហែល ១រំលងអធ្រាត្រ ខ្លួនបានចូលតាម ចន្លោះផ្លូវចង្អៀត ផ្នែកខាងជើងផ្ទះ រួចឡើងទៅជាន់លើបំផុត ហើយគាស់បង្អួចដើរចុះមកជាន់ទីពីរ។ ដោយសារ គ្រប់ទ្វារទាំងអស់ សុទ្ធតែចាក់សោ ខ្លួនក៏ចូលតាមក្រោយខ្នងកុងម៉ា ទើបលោតចុះដល់ ជាន់ផ្ទាល់ដី រួចយកក្រណាត់ គ្របមុខកាមេរ៉ាស្វ័យប្រវត្តិ មុននឹងដើរប្រមូលយកទូរស័ព្ទ បានចំនួន២៩៧គ្រឿង។
សូមជម្រាបថាការលួចទូរស័ព្ទដៃ នៅក្នុងភូមិសាស្ត្រខេត្តកំពតនេះមាន ចំនួនពីរករណី ដែលជនសង្ស័យប្រមូលទូរសព្ទបាន ចំនួន៣៧៧គ្រឿង។ ទោះជាយ៉ាងណាសមត្ថកិច្ចខេត្តកំពតបានបញ្ជូនខ្លួនបុរសរូបនេះ ទៅកាន់តុលាការ ដើម្បីអនុវត្តតាមផ្លូវច្បាប់៕SRP

ភ្នំពេញ៖នាយករដ្ឋមន្ដ្រីសម្ដេច ហ៊ុន សែន បានសម្រេចឲ្យមន្ដ្រីរាជការ កម្មករនិយោជិត ឈប់សម្រាករយៈពេល៣ថ្ងៃ នៃពិធីបុណ្យចូលឆ្នាំខ្មែរ នៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២១ខាងមុខនេះ តែត្រូវអនុវត្តវិធានសុខាភិបាល ដើម្បីការពារ និងទប់ស្កាត់ជំងឺកូវីដ-១៩៕SRP

ខេត្តឧត្តរមានជ័យ៖ដីសម្បទានសង្គមកិច្ច របស់រដ្ឋចំនួន៧.៨៣៨ហិកតា មានទីតាំងស្ថិតនៅ ស្ថានីយផ្សព្វផ្សាយនិងស្ថានីយស្តារព្រៃឈើ ជាប់ ព្រំប្រទល់ចំនួន៤ឃុំ ឃុំពង្រ ឃុំចុងកាល់ សង្កាត់ សំរោង សង្កាត់កូនក្រៀល ក្នុងក្រុង ស្រុកចំនួន២ គឺក្រុងសំរោង ស្រុកចុងកាល់នៃខេត្តឧត្តរមានជ័យ ត្រូវបានក្រសួងកសិកម្មរុក្ខាប្រមាញ់និងនេសាទ ជួលឲ្យក្រុមហ៊ុន សាន្ត ហ៊ាង (កម្ពុជា) អាហរ័ណ នីហរ័ណ ដើម្បីស្តារព្រៃឈើឡើងវិញ តាមគោលការណ៍ពីរាជរដ្ឋាភិបាលកម្ពុជា។

អាជ្ញាធរខេត្តឧត្តរមានជ័យ នៅប៉ុន្មានថ្ងៃជាប់ៗគ្នានេះបានដឹកនាំមន្ត្រីចម្រុះនិងម្ចាស់ក្រុមហ៊ុន ចុះពិនិត្យមើលជាក់ស្តែង និងដាក់គ្រឿងចក្រ ធ្វើសកម្មភាព រៀបចំផែនការចុះកំណត់ចំណុចនិយាមការ បោះបង្គោល កាយព្រំស្តារផ្លូវឡើងវិញ។

ក្នុងពេលចុះត្រួតពិនិត្យនេះ លោក វ៉ាត ប៉ារ៉ានីន អភិបាលរងខេត្ត ជំរុញអោយ មន្ត្រីជំនាញ អាជ្ញាធរមូលដ្ឋាន និងម្ចាស់ក្រុមហ៊ុនរួមគ្នាសហការ ត្រួតពិនិត្យមើលទៅលើ គ្រឿងចក្រដែលកាយព្រំនិងស្តារផ្លូវ ឲ្យបានចំគោលដៅផ្ទៃដីចាស់ តាមផែនទី លេខនិយាមការ ចៀសវាងប៉ះពាល់ដីធ្លី ប្រជាពលរដ្ឋ ដែលអាស្រ័យផល់នៅព្រំក្បែគ្នា។

លោកក៏បានអោយម្ចាស់ក្រុមហ៊ុន ធ្វើយ៉ាងណាគោរពតាមគោលការណ៍ និងលក្ខខណ្ឌសេចក្តីណែនាំ របស់ក្រសួងកសិកម្មរុក្ខាប្រម៉ាញ់និងនេសាទ ដែលបានដាក់ចេញ នៅ ស.ជ.ណ.ក្នុងកិច្ច ព្រមព្រៀង វិនិយោគ ដាំដំណាំ ឧស្សាហកម្ម ដាំឈើ អោយដំណើរការ ទៅបានយ៉ាងរលូន៕SRP

ខេត្តកំពង់ចាម៖លោកឯម កុសល ស្នងការខេត្តកំពង់ចាម បានបញ្ជា នគរបាលចម្រុះឲ្យចុះស្រាវជ្រាវ បង្ក្រាបទីតាំងលួចលេងល្បែងស៊ីសងខុសច្បាប់ (ជល់មាន់ភ្នាល់ដាក់ប្រាក់) មួយកន្លែង នៅចំណុចក្រោមដើមចារ ព្រៃខ្លោង នៅខាងត្បូង ឈាងខាងលិចភូមិត្នោត(ខ) ចម្ងាយប្រហែល ៦០០០ម៉ែត្រ ស្ថិតក្នុងឃុំព្រែករំដេង ស្រុកស្រីសន្ធរ ខេត្កំពង់ចាម បន្ទាប់ពីទទួលព័ត៌មានបាន។ ប៉ុន្តែកម្លាំងសមត្ថកិច្ចបានចុះទៅដល់ពិនិត្យឃើញថា ពុំមានសកម្មភាពលេងល្បែងជល់មាន់ ដូចការចុះផ្សាយរបស់គេហទំព័រ ម្ចាស់ទន្លេមេគង្គ នោះឡើយ ហើយតាមការពិនិត្យស្ថានភាពទីតាំងខាងលើ គឺមានសភាពចាស់យូរហើយ។

ផ្អែកតាមរបាយការណ៍ របស់អាជ្ងាធរពាក់ព័ន្ធ បានឲ្យដឹងថា៖ កន្លងមកនៅចំណុចខាងលើ ធ្លាប់បានឃើញ គេមកលួចលេងល្បែង ជល់មាន់ ពីរមួយគូ ទៅពីរគូ​ ហើយក៏ឈប់លេងទៅវិញ ដោយសមាសភាព ដែលមកលេង ភាគច្រើនជាអ្នកមកពីចម្ងាយ។ ប៉ុន្តែត្រូវបានសមត្ថកិច្ចចុះមកបង្ក្រាបជាច្រើនលើ។ រហូតដល់បច្ចុប្បន្ននេះពុំមានការលួចលេងល្បែងជល់មាន់ទៀតនោះទេ​ ហើយទីតាំងនេះសមត្ថកិច្ចមូលដ្ឋាន បានដាក់កម្លាំងចុះល្បាតត្រួតពិនិត្យរៀងរាល់ថ្ងៃផងដែរ។

ពាក់ព័ន្ធនឹងកិច្ចប្រតិបត្តិការស្រាវជ្រាវ ខាងលើនេះ លោកសុខ យ៉េន អធិការនគរបាលស្រុក បានទូរស័ព្ទទៅម្ចាស់​ គេហទំព័រ ម្ចាស់ទន្លេមគង្គ ដើម្បីស្នេីសុំឲ្យមកចង្អុលបង្ហាញពីទីតាំង និងចូលរួមក្នុងកិច្ចប្រតិបត្តិការ ជាមួយសមត្ថកិច្ចប៉ុន្តែ ម្ចាស់គេហទំព័រ សារព័ត៌មាននេះ បានបដិសេធ ដោយឆ្លើយថា ជាប់រវល់នៅឆ្ងាយ មិនអាចចូលរួមបានទេ។

ក្រុមការងារព័ត៌មាន​ និងប្រត្តិកម្មរហ័ស​ស្នងការខេត្ត​កំពង់ចាម​ សុំអំពាវនាវដល់សាធារណជន ពិសេសបណ្ដាញទំនាក់ទំនងសង្គម សុំកុំមានការយល់ច្រឡំ ចំពោះព័ត៌មានក្លែងក្លាយផ្ទុយពីការពិតនេះ និងសូមចៀសវាងការចែករំលែកបន្ត ដែលអាចបង្កការលំបាកក្នុងការស្រាវជ្រាវរបស់ជំនាញ ដើម្បីនាំខ្លួនជនទុច្ចរិតខាងលើមកអនុវត្តនីតិវិធី និងក៏អាចប្រឈមមុខចំពោះការស្រាវជ្រាវ របស់មន្ត្រីជំនាញផងដែរ។

ការអះអាងរបស់ក្រុមការងារ ស្នងការប៉ូលិសខេត្ត​កំពង់ចាម​ បែបនេះ បន្ទាប់ពីទទួលបានព័ត៌មាន របស់សារព័ត៌មានគេហទំព័រ ម្ចាស់ទន្លេមេគង្គកាលពីថ្ងៃទី១៨ ខែមីនា ឆ្នាំ២០២១ ចុះផ្សាយមានខ្លឹមសារថា៖ (សង្វៀនជល់មាន់មួយកន្លែង នៅភូមិព្រែករំដេង ឃុំព្រែករំដេង ស្រុកស្រីសន្ធរ ខេត្តកំពង់ចាម មានផ្លូវចូលពីភូមិវាលស្បូវ ឃុំឬស្សីស្រុក ស្រុកស្រីសន្ធរ ខេត្តកំពង់ចាម មានចម្ងាយប្រហែលជា៣គីឡូម៉ែត្រ បើកលេងរាល់ថ្ងៃគ្មានអ្នកណាហ៊ានចុះបង្ក្រាបឡើយ)៕SRP

ខេត្តសៀមរាប៖មនុស្សមួយក្រុមបានយកដុំថ្មគប់ទៅលើបុរសម្នាក់បណ្ដាលឱ្យរងរបួសធ្ងន់ធ្ងរ។

ហេតុការណ៍បានកើតឡើងនៅវេលាម៉ោង១៥និង៥០នាទី ថ្ងៃទី២០ ខែមីនា ឆ្នាំ២០២១នេះ ត្រង់ចំណុច ផ្លូវចូលខ្លោងទ្វារយាយតា ប្រហែល៥០០ម៉ែត្រ ស្ថិតក្នុងភូមិខ្វៀន សង្កាត់គោកចក ក្រុងសៀមរាប។

សមត្ថកិច្ចខេត្តសៀមរាប បានថ្លែងប្រាប់បណ្ដាញសៀមរាបប៉ុស្ដិ៍ នៅយប់ថ្ងៃនេះថា ករណីហិង្សាដោយចេតនា មានស្ថានទម្ងន់ទោសនេះគឺបង្កឡើងដោយជនសង្ស័យមួយក្រុម មិនស្គាល់អត្តសញ្ញាណ បានធ្វើសកម្មភាពគប់ដុំថ្ម ទៅលើជនរងគ្រោះ បណ្ដាលឲ្យរងរបួសធ្ងន់តែម្ដង។

សមត្ថកិច្ចខេត្តបានបន្តថា ជនរងគ្រោះ មានឈ្មោះឈៀង ម៉ៃ ភេទប្រុស អាយុ២០ឆ្នាំ រស់នៅភូមិព្រៃធំ សង្កាត់ស្រង៉ែ ក្រុងសៀមរាប
ជិះម៉ូតូម៉ាកសង់សេ១២៥ ឆ្នាំ២០០៥ ពណ៌ខ្មៅ ពាក់ស្លាកលេខ សៀមរាប1B0598។

សមត្ថកិច្ចបានបញ្ជាក់ថាករណីនេះក្រោយធ្វើសកម្មភាពរួច ក្រុមជនបង្ក បានជិះម៉ូតូគេចខ្លួនបាត់។ ជនរងគ្រោះ ត្រូវបានដឹកយកទៅព្យាបាល នៅមន្ទីរពេទ្យ។ ចំណែកម៉ូតូត្រូវបានយកទៅរក្សាទុក នៅប៉ុស្ដិ៍នគរបាលរដ្ឋបាល សង្កាត់ទឹកវឹល។ ទោះជាយ៉ាងណាសមត្ថកិច្ចបានបញ្ជាក់ថាកំពុងស្រាវជ្រាវតាមរកចាប់ខ្លួនជនបង្កយកមកផ្ដន្ទាទោសតាមផ្លូវច្បាប់៕SRP

ខេត្តត្បូងឃ្មុំ៖លោក ជាម ច័ន្ទសោភ័ណ អភិបាលខេត្តត្បូងឃ្មុំ បានលើកឡើងថា«ចំពោះ​មន្ត្រីដែលឈរជើងតាមព្រំដែន បន្តពង្រឹងការងារឲ្យមានប្រសិទ្ធភាពបំផុត រាល់ទំនិញចេញចូល និងការធ្វើដំណើរឆ្លងកាត់ទៅមក ត្រូវអនុវត្តទៅតាមវិធានសុខាភិបាល ពិសេសហាមដាច់ខាត ការគប់គិត ជាមួយមេខ្យល់ នាំពលករចេញចូល បើមានមន្ត្រីទទួលសំណូក ត្រូវទទួលទោសតាមផ្លូវច្បាប់​»។

លោក ជាម ច័ន្ទសោភ័ណ ក៏បានរំលឹកដល់ ថ្នាក់ដឹកនាំ និងកងកម្លាំងនគរបាលទូទាំងខេត្តត្បូងឃ្មុំ ឲ្យ​ចុះពិនិត្យ វាយតម្លៃតាមអធិការ និងតាមបណ្តាប៉ុស្តិ៍ទាំងអស់ ដើម្បីទទួលបានព័ត៌មាន ច្បាស់លាស់ពីតម្រូវការរបស់ប្រជាពលរដ្ឋ។ ជាពិសេស​ត្រូវ​បន្តអនុវត្ត ៣ការពារ ៣កុំ​ ទោះចាក់វ៉ាក់សាំងហើយក្តី។

ថ្លែងយ៉ាងដូច្នេះ នៅថ្ងៃទី២០ ខែមីនា ព្រឹកមិញ នាឱកាសលោកបាន​នាំយក​ថវិកា​ចំនួន​៥លានរៀល​ ​អង្ករ៤០បេ មី២០កេសធំ ម៉ាស១កេសធំ និង​ទឹកសុទ្ធ១០០កេស ឧបត្ថម្ភ​​ជូនកងកម្លាំងនគរបាលជាតិ នៃស្នងការដ្ឋាននគរបាលខេត្តត្បូងឃ្មុំ។ ​

លោក ជាម ច័ន្ទសោភ័ណ ក៏ និងវាយតម្លៃខ្ពស់ចំពោះ លោកស្នងការនគរបាលខេត្ត និងកងកម្លាំងនគរបាលទាំងអស់ ក្នុងការខិតខំការពារសន្តិសុខសណ្តាប់ធ្នាប់ សាធារណៈ រក្សាបាននូវគោលនយោបាយភូមិ-ឃុំមានសុវត្ថិភាព​ ដែល​មាន​លក្ខណៈ​សម្បត្តិ​ ៧យ៉ាង​។ ពិសេសជាកម្លាំងយ៉ាងសំខាន់ ជាមួយរាជរដ្ឋាភិបាលការទប់ស្កាត់ជំងឺឆ្លងកូវីដ-១៩ នៅក្នុងខេត្តត្បូងឃ្មុំ៕SRP

ខេត្តសៀមរាប៖រឿងជម្លោះក្នុងគ្រួសារក្មួយ ប្តឹងម្តាយមីងទៅតុលាការ ទាមទារសំណង ៤០ ម៉ឺនដុល្លារ ករណីនេះភាគីចុងចោទ(មីង)ទទូចសុំអោយស្ថាប័នច្បាប់ពិចារណា និងផ្តល់យុត្តិធម៌។
ដើមបណ្តឹងមានឈ្មោះឈឺន វារ:ណាន់ ភេទស្រីអាយុ១៨ឆ្នាំ។ ចំណែកចុងបណ្តឹងជាម្តាយមីងមាន ឈ្មោះកែវ មូលីណុច អាយុ៣២ឆ្នាំ ទាំងពីរភាគីមានទីលំនៅភូមិសាលាកន្សែង សង្កាត់ស្វាយដង្គុំ ក្រុងសៀមរាប។
បណ្តឹងចុះថ្ងៃទី០២ខែកុម្ភ: ឆ្នាំ២០២១ មានកម្មវត្ថុថាសុំប្តឹងឈ្មោះកែវ មូលីណុច ភេទស្រីអាយុ៣២ឆ្នាំនិងឈ្មោះកែវ មូលីណេ ភេទស្រីអាយុ៣៥ឆ្នាំពីបទ ជេរប្រមាថជាសាធារណ: និងបទញុះញង់អោយមានការរើសអើង។ ប្រព្រឹត្តនៅភូមិសាលាកន្សែង សង្កាត់ស្វាយដង្គុំ ក្រុងសៀមរាប កាលពីអំឡុងខែមករាឆ្នាំ២០២១។

កម្មវត្ថុបន្តថា ឈ្មោះទាំងពីរខាងលើ បានឡាយហ្វេសប៊ុកជេរប្រមាថឪពុកម្តាយនិងរូបនាង(ដើមបណ្តឹង)ថាជាស្រីរកស៊ីលក់ខ្លួន ដែលធ្វើអោយប៉ះពាល់កិត្តិយស។ ការឡាយជេរប្រមាថនោះក៏បានធ្វើអោយប៉ះពាល់ មុខរបរលក់គ្រឿងក្រអូបរបស់នាង ដែលចំណាយដើមទុន២០ម៉ឺនដុល្លារ និងហាងកាហ្វេប្តី ដើមទុន១០ម៉ឺនដុល្លារ(អតិថិជនអស់ទំនុកចិត្ត) ករណីនេះនាងខ្ញុំ(ដើមបណ្តឹង)ទាមទារសំណងខូចខាត២០ម៉ឹនដុល្លារនិងជម្ងឺចិត្ត២០ម៉ឺនដុល្លារ។
ក្នុងករណីនេះស្ត្រីចុងបណ្តឹងឈ្មោះ កែវ មូលីណុច បានបរិយាយថា រូបនាងមិនដែលបានដឹងថាក្មួយស្រីរបស់ខ្លួនប្តឹងទារសំណងរហូត៤០ម៉ឺនដុល្លារនោះឡើយ។ ទើបតែនៅថ្ងៃទី១០ ខែមីនា ឆ្នាំ២០២១នេះ ពេលសមត្ថកិច្ចយកដីកាកោះមកអោយ ហើយតម្រូវអោយចូលខ្លួនទៅបំភ្លឺនៅតុលាការខេត្ត ថ្ងៃទី១៧ ខែ មីនាឆ្នាំ២០២១នេះ ទើបដឹងថាក្មួយប្តឹង។ តែនាងសុំពន្យាពេលហើយ តាមរយ:មេធាវីព្រោះត្រូវរកភស្តុតាងសម្រាប់ឆ្លើយ។
នាងបន្តថា ដើមចមនៃរឿង ដំបូងម្តាយរបស់នាងជេរកូនប្រសារ(ឪពុកដើមបណ្តឹង)លុះពេលបន្ទាប់ក្មួយរបស់នាង(ដើមបណ្តឹង)ព្រោះតែជួយឪពុកក៏បានឈ្លោះជាមួយជីដូនហើយរាលដាលដល់រូបនាង។ តែនៅថ្ងៃបន្ទាប់ រូបនាង(ចុងបណ្តឹង)បានអង្គុយក្នុងផ្ទះឡាយហ្វេសប៊ុក ដោយនិយាយថា សូមញាតិនិងមិត្តៗក្នុងបណ្តាញសង្គមជួយពិចារណា មីក្មួយរមិលគុណ ខំបីបាច់តាំងពីតូចពេលនេះវាប្រមាថជីដូនរហូតដល់មីង រួមទាំងពាក្យពេជ្រមិនល្អច្រើនទៀត តែមិនបានជេរដោយពាក្យអសុរសនោះទេ។ លុះថ្ងៃក្រោយនាងក៏បានឡាយហ្វេសប៊ុកចំនួន៣ដងជាបន្តបន្ទាប់ទៀត ដោយលើកហេតុផលវែកញែកអំពីក្រុមគ្រួសារនេះ។
មូលីណុច បានបញ្ជាក់ថា ចំពោះការឡាយនិយាយក្នុងក្រុមគ្រួសារ អោយមនុស្សខាងក្រៅជួយពិចារណានេះ ក៏ត្រូវក្នួយស្រីប្តឹងទារសំណង៤០ម៉ឺនដុល្លារ ដោយចោទថា ជេរប្រមាថនិងញុះញង់។ នេះជាសិទ្ធិរបស់បុគ្គល តែរូបនាងមិនបានជេរឬញុះញង់នណាទេ។ ចំពោះមុខរបររកស៊ី គឺមិនពាក់ព័ន្ធ នឹងការឡាយរបស់នាងឡើយ។ ចឹងទេករណីនេះ នាងសុំអោយស្ថាប័នច្បាប់ពិនិត្យ ពិចារណា និងជួយផ្តល់ភាពយុត្តិធម៌ដល់នាង ហើយនាងរំពឹងថាតុលាការនឹងស្រាវជ្រាវពិចារណា មុនពេលសម្រេចក្តី។
ជុំវិញការប្តឹងទារសំណង៤០ម៉ឺនដុល្លារនេះ ដើមបណ្តឹង អ្នកនាងឈឺន វារ:ណាន់ បានប្រាប់តាមទូរស័ព្ទថា នាងសុំមិនបកស្រាយទេ ព្រោះនាងបានប្តឹងរួចហើយ៕SRP

ភ្នំពេញ៖ប្រធានរដ្ឋសភាជាតិ សម្តេចហេង សំរិន បានផ្ញើសារ បន្តអំពាវនាវ សូមឲ្យជនរួមជាតិបន្ថែមការប្រុងប្រយ័ត្ន នៅក្នុងការការពារនឹងទប់ស្កាត់ជំងឺកូវីដ-១៩។

សម្ដេចហេង សំរិន បានលើកឡើងថាជាមឋមខ្ញុំនិងភរិយា សូមចូលរួមរំលែកមរណៈទុក្ខជាមួយគ្រួសារពលរដ្ឋ ដែលបាត់បង់អាយុជីវិតដោយសារជំងឺដ៏កាចសាហាវនេះ។ ចំនួនពលរដ្ឋបានស្លាប់ និងអត្រាឆ្លងបានកើនឡើងជាលំដាប់ ពីមួយថ្ងៃទៅមួយថ្ងៃ ករណីវិជ្ជមានបានរកឃើញនៅលើមនុស្សគ្រប់វ័យ មិនប្រកាន់ថា ជាមនុស្សចាស់ ឬក្មេងនោះឡើយ។

នៅក្នុងកាលៈទេសៈនេះ ការរីករាលដាលនៃជំងឺកូវីដ១៩ បានបង្កហានិភ័យខ្ពស់បំផុត ដល់យើងគ្រប់គ្នា នៅគ្រប់ពេលវេលា គ្រប់ទីកន្លែង។

សូមបងប្អូនកូនក្មួយទាំងអស់គ្នា ចូលរួមបំពេញកាតព្វកិច្ចជាពលរដ្ឋល្អឱ្យបានគ្រប់ៗគ្នា ដោយប្រកាន់ឱ្យខ្ជាប់រាល់វិធានការណ៍របស់ក្រសួងសុខាភិបាលបានដាក់ចេញ ពិសេសចូលរួមអនុវត្តច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលយើងទើបអនុវត្តថ្មីនេះៗ ឱ្យបានទាំងអស់គ្នា។ មានតែការចូលរួមរបស់យើងទាំងអស់គ្នាប៉ុណ្ណោះ ទើបអាចថែរក្សាសុខភាពខ្លួនឯង សុខភាពគ្រួសារ និងសង្គមជាតិរបស់យើងបាន។

ឆ្លៀតឱកាសនេះ ខ្ញុំសូមជូនពរដល់ ប្រជាពលរដ្ឋដែលកំពុងសម្រាកព្យាបាលជំងឺកូវីដ១៩ នៅតាមមន្ទីរពេទ្យនានាសូមឱ្យបានឆាប់ជាសះស្បើយ នឹងបានវិលទៅជួបជុំក្រុមគ្រួសារវិញ។

ខ្ញុំសូមថ្លែងនូវការកោតសរសើរជាថ្មី ចំពោះរាជរដ្ឋាភិបាល កងកម្លាំង អាជ្ញាធរគ្រប់ជាន់ថ្នាក់ ពិសេសពលីកម្មដ៏ធំធេង របស់ក្រុមគ្រូពេទ្យអាវស ដែលជាកម្លាំងជួរមុខបានខិតខំប្រឹងប្រែងអស់ពីកំលាំង កាយចិត្តនៅក្នុងការប្រយុទ្ធប្រឆាំងជំងឺកូវីដ-១៩ ទាំងថ្ងៃទាំងយប់ ក្នុងបេសកកម្មមនុស្សធម៌ ដ៏ថ្លៃថ្លាមិនអាចកាត់ថ្លៃបាន នៅក្នុងការថែរក្សាការពារសុខមាលភាពប្រជាពលរដ្ឋយើង។

សូមឱ្យកម្ពុជាយើង ក៏ដូចជាពិភពលោកទាំងមូល បានរួចចាកផុតពីជំងឺដ៏កាចសាហាវនេះ ក្នុងពេលឆាប់ៗនេះ។ ខ្ញុំសូមជនរួមជាតិទាំងអស់បានប្រកបតែសុចក្តីសុខនិងសុភមង្គល គ្រប់ក្រុមគ្រួសារ៕SRP

ខេត្តសៀមរាប៖នៅទីបំផុតបុរសលេងសម្ដីធ្ងន់វោហាតាមហ្វេសប៊ុក ផែង វណ្ណ: បានលុតជង្គង់ក្រាបសំពះ លំអោនកាយបែបស្រទន់ នៅចំពោះមុខព្រះចៅអធិការវត្តរាជបូណ៌ ព្រះនាមពិន សែម ដែលមានព្រះជន៨០ព្រះវស្សា និងក្រោមក្រសែភ្នែកមន្រ្តីពាក់ព័ន្ធ ជាច្រើននាក់ទៀត។

ការលុតជង្គង់ក្រាបសំពះ របស់លោកផែង វណ្ណ: គឺនៅថ្ងៃទី២០ខែមីនាឆ្នាំ ២០២១ ព្រឹកមិញ ខណ:បានមកក្រាបបង្គំ ព្រះចៅអធិការវត្តរាជបូណ៌ ពិន សែម និង ព្រះមេគណ ខេត្តសៀមរាប ជុំ គឹមឡេង ដើម្បីសុំព្រះរាជទានទោស និងសុំអនុគ្រោះ ពីកំហុសឆ្គងរបស់ខ្លួន

លោកផែង វណ្ណ: បានចាកចេញពីវត្ត ដោយបង្ហាញភាពរីករាយ ក្រោយព្រះចៅអធិការទទួលយកការសុំទោសនេះ។តែលោកសុំមិនអធិប្បាយ ជាមួយអ្នកសារព័ត៌មាននោះទេ។ទោះជាបែបនេះ មន្ត្រីសង្ឃក្នុងហេតុការណ៍ បានបញ្ជាក់ថា គ្រប់យ៉ាងបានបញ្ចប់ហើយ ចំណែកលិខិតថ្កោលទោសរបស់ព្រះមេគណខេត្ត ដែលចុះហត្ថលេខា ដោយព្រះអង្គជុំ គឹមឡេង ក៏បាននិរាករណ៍ផងដែរ។

សូមបញ្ជាក់ថា កាលពីថ្ងៃទី១៣ខែមីនា ឆ្នាំ២០២១ កន្លងទៅនេះ ព្រះចៅអធិការវត្តរាជបូណ៌ បានដាក់វិន័យលើ ភិក្ខុ៣អង្គក្នុងចំណោម៩អង្គ អោយវាម្តងម្នាក់«វាយតគ្នា»។បន្ទាប់មកលោកផែង វណ្ណះ ក៏បានយករូបភាពវាយតគ្នានោះ ទៅឡាយនិយាយ វាយប្រហារមកលើវត្តរាជបូណ៌ ក្នុងលក្ខណ:ជេរប្រមាថ។ លុះថ្ងៃ បន្ទាប់ព្រះមេគណខេត្តចេញលិខិតថ្កោលទោស រហូតដល់ក្រសួងព័ត៌មានបញ្ចប់អាជ្ញាបណ្ណ័ សារព័ត៌មានផែងវណ្ណ: ផងដែរ៕SRP