Siem Reap Post – Page 89 – Siem Reap News, Cambodia News

ខេត្តបាត់ដំបង៖លោក សុខ លូ អភិបាលខេត្តបាត់ដំបង បានមានប្រសាសន៍លើកឡើងថា បើយើងក្រឡេកមើលទៅប៉ុន្មានឆ្នាំមុននេះ ប្រៀបធៀបនឹងបច្ចុប្បន្ន

យើងឃើញថា ប្រទេសជាតិយើងមានការអភិវឌ្ឍន៍លើគ្រប់វិស័យ ដោយឡែកខេត្តបាត់ដំបងមានការប្រែប្រួល និងរីកចម្រើនលើគ្រប់វិស័យ ដែលសបញ្ជាក់ឱ្យឃើញថា ជីវភាពប្រជាពលរដ្ឋពីមួយថ្ងៃទៅមួយថ្ងៃមានការប្រសើរឡើង។

លោកបានបន្តទៀតថា កន្លងមកការធ្វើដំណើរ មានភាពលំបាក ពីទីកន្លែងមួយទៅទីកន្លែងមួយ តែបច្ចប្បន្ន គឺមានភាពល្អប្រសើរច្រើន ជាពិសេសនៅតាមជនបទ ក៏មានផ្លូវធ្វើដំណើរស្រួល ងាយស្រួល ក្នុងការដឹកជញ្ជូនផលិតផល កសិផល របស់ប្រជាពលរដ្ឋ និងងាយស្រួល ក្នុងការធ្វើដំណើរជាប្រចាំផងដែរ។

លោកក៏បានអំពាវនាវ ដល់ប្រជាពលរដ្ឋ ដែលនៅតាមដងផ្លូវ សូមចូលរួមសម្រួល ដល់ក្រុមការងារស្ថាបនាផ្លូវ ដើម្បីអនុវត្តការងារ បានសម្រេចជោគជ័យ និងមិនត្រូវធ្វើការរំលោភលើដីចំណីផ្លូវឡើយ ហើយបើសិនជាមានការសាងសង់អ្វីនៅដីចំណីផ្លូវ សូមមេត្តារុះរើចេញ ដើម្បីឱ្យក្រុមការងារស្ថាបនាផ្លូវ ធ្វើការសាងសង់ផ្លូវ ហើយក្រោយពីផ្លូវនេះ បានសាងសង់រួច សូមប្រជាពលរដ្ឋ មេត្តាជួយថែទាំ ទប់ស្កាត់ ការដឹកជញ្ជូនធ្ងន់ៗ ជួយកាយទឹកចេញពីផ្លូវដើម្បីឱ្យផ្លូវយើងប្រើប្រាស់បានយូរអង្វែង។

លោកមានប្រសាសន៍យ៉ាងដូច្នេះក្នុងឱកាសអញ្ជើញជាអធិបតីភាព បើកការដ្ឋានសាងសង់ផ្លូវក្រាលកៅស៊ូមួយខ្សែ ស្ថិតក្នុងស្រុកបាណន់ ខេត្តបាត់ដំបង
នៅថ្ងៃចន្ទ នេះ។

បើតាមលោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានលើកឡើងថា ផ្លូវ១៥៧នេះ បានធ្លាប់ធ្វើការបើកការដ្ឋឋានសាងសង់តាំងពីខែមីនា ឆ្នាំ២០២២ម្ដងហើយ មានប្រវែង ៣,២០០ម៉ែត្រ ចាប់ពីគ.ម១៣+000 ដល់គ.ម ១៧+០០០ តែពេលនេះ បានបើកការដ្ឋានសាងសង់ផ្លូវ១៥៧A បន្តទៀតដែលមានប្រវែង៣,១០០ម៉ែត្រ ទទឹង៧ម៉ែត្រ ដែលមានតួចិញ្ចើមផ្លូវចាក់ល្បាយថ្ម០.៥ម៉ែត្រសងខាង មានស្ថាបនាលូមូលកាត់ទទឹងផ្លូវមុខកាត់១ម៉ែត្រ ១ជួរចំនួន៣កន្លែង លូមូលកាត់ទទឹកផ្លូវមុខកាត់១ម៉ែត្រ ២ជួរ ២កន្លែង និងមានគូសគំនូសស្លាកចរាចរណ៍១៦ស្លាកតាមដងផ្លូវ៕

ខេត្តសៀមរាប៖លោកតាម្នាក់កំពុងដើរត្រូវបានម៉ូតូមួយគ្រឿងបានបុកពេញទំហឹងបណ្ដាលឲ្យស្លាប់នៅនឹងកន្លែងកើតហេតុ។

ហេតុការណ៍បានកើតឡើង វេលាម៉ោង ប្រហែល២យប់ នៅចំណុចមុខ សាលាវិទ្យាល័យហ៊ុនសែនបាគងស្ថិត នៅភូមិលលៃ ឃុំបាគង ស្រុកប្រាសាទបាគង លើកំណាត់ផ្លូវជាតិលេខ៦រវាងម៉ូតូនិងថ្មើរជើង ស្របទិសគ្នា។

សមត្ថកិច្ចស្រុកប្រាសាទបាគងបានប្រាប់ថា គ្រោះថ្នាក់ចរាចរណ៍នេះ មានម៉ូតូមួយគ្រឿងមិនស្គាល់ម៉ាក មិនស្គាល់អត្ដសញ្ញាណ អ្នកបើកបរ បើកបរមានទិសដៅពីកើត ទៅលិចដល់ត្រង់ចំណុចមុខសាលាវិទ្យាល័យហ៊ុនសែន បាគង បានបុកអ្នកថ្មើរជើងតែម្ដង។

សមត្ថកិច្ចបានបន្តថា ជនរងគ្រោះមាន ឈ្មោះ យឿម ប៉ក ភេទប្រុស អាយុ៧១ឆ្នាំសញ្ជាតិខ្មែរដែលមានទីលំនៅភូមិកន្ទ្រាំឃុំកន្ទ្រាំង ស្រុកប្រាសាទបាគង ខេត្ដសៀមរាប ដើរពីកើតទៅលិច។ ករណីនេះ ក្រោយពេលកើតហេតុ រួចអ្នកបើកបរម៉ូតូបានបើកបររត់គេចខ្លួនបាត់។ សាកសព ត្រូវបានសមត្ថកិច្ច ប្រគល់ឲ្យអោយទៅក្រុមគ្រួសារយកទៅធ្វើបុណ្យតាមប្រពៃណីខ្មែរ។ មូលហេតុ ម៉ូតូបើកបរមានល្បឿន លឿនខ្វះការប្រុសប្រយ័ត្ន៕

ខេត្តសៀមរាប៖មនុស្សចំនួន២នាក់ត្រូវបានសមត្ថកិច្ចចាប់ខ្លួនពាក់ព័ន្ធករណីឃាតកម្ម។ ការចាប់ខ្លួនធ្វើឡើងនៅថ្ងៃទី២៤ខែមីនា ឆ្នាំ២០២៤ នេះ ដោយកម្លាំងនគរបាលស្រុកស្វាយលើ។

ជនសង្ស័យទី១ ឈ្មោះ យិន សុខលីន ភេទប្រុស អាយុ ៣០ឆ្នាំ មុខរបរ កម្មករ ទីកន្លែងកំណើតភូមិព្រៃទទឹង ឃុំខ្ពប ស្រុកស្អាង ខេត្តកណ្តាល ស្នាក់នៅបណ្ដោះអាសន្នភូមិដំបូកខ្ពស់ ឃុំតាសៀម ស្រុកស្វាយលើ។ ២.ឈ្មោះ ហាក់ ហៃ ភេទស្រី អាយុ ២៨ឆ្នាំ មុខរបរ កសិករ ទីកន្លែងកំណើតភូមិត្រាចពក ឃុំពពេល ស្រុកសូទ្រនិគម ទីលំនៅបច្ចុប្បន្នភូមិដំបូកខ្ពស់ ឃុំតាសៀម ស្រុកស្វាយលើ។

ករណីឃាតកម្ម បានកើតឡើង កាលពីវេលាម៉ោង២០:០០នាទី ថ្ងៃទី២២ ខែមីនា ឆ្នាំ២០២៤ នៅចំណុចភូមិដំបូកខ្ពស់ ឃុំតាសៀម ស្រុកស្វាយលើ។

បើតាមរបាយការណ៍បានឲ្យដឹងថា ស្ត្រី ឈ្មោះ ហាក់ ហៃ មានកូនប្រុសឈ្មោះ ផ្លាវ សុចិត្រា ភេទប្រុស អាយុ ២២ខែ រស់នៅក្នុងបន្ទុក ជាមួយនិងឈ្មោះ យិន សុខលីន (ជាប្តីទី៤ និងជាឪពុកចុង) រស់នៅភូមិដំបូកខ្ពស់ ឃុំតាសៀម ស្រុកស្វាយលើ ដោយពីរនាក់ប្តីប្រពន្ធបានប្រកបមុខរបរ ស៊ីឈ្នួលដាំដំឡូង និងបេះគ្រាប់ស្វាយចន្ទី។

នៅវេលាម៉ោង ២៣:៣០នាទីយប់ ថ្ងៃទី២១ ខែមីនា ឆ្នាំ២០២៤ អ្នករស់ជិតខាងបានឮសម្លេងស្រែកយំខ្លាំងៗរបស់កុមារាឈ្មោះផ្លាវ សុចិត្រា ចេញពីក្នុងផ្ទះ លុះដល់ថ្ងៃទី២២ ខែមីនា ឆ្នាំ២០២៤ បាត់កុមារាខាងលើ មិនឃើញរត់លេងដូចរាល់ដង ដោយមានការសង្ស័យ អ្នករស់នៅជិតខាង បានប្តឹងរាយការណ៍ ដល់សមត្ថកិច្ចនគរបាលស្រុកស្វាយលើ ចុះនាំខ្លួនជនសង្ស័យទាំង២នាក់ខមកធ្វើការសាកសួរ។

តាមការស្តាប់ចម្លើយរបស់ឈ្មោះ ហាក់ ហៃ ភេទស្រី
ម្ដាយក្មេងរងគ្រោះ បានសារភាពថា នៅថ្ងៃទី២០ ខែមករា ឆ្នាំ២០២៤ ខ្លួនរួមរស់ជាឈ្មោះ យិន សុខលីន អាយុ ៣០ឆ្នាំ (ប្តីទី៤) ដំបូងឡើយប្តីមិនដែលបង្ហាញពីអារម្មណ៍ ស្អប់ខ្ពើមកូនឈ្មោះ ផ្លាវ សុចិត្រា ទើបតែមួយរយៈចុងក្រោយនេះ ដោយសារឃើញរូបខ្លួនឆាតជាមួយឈ្មោះ ប៉ាត ផ្លាវ (ប្តីទី៣) ទើបគេមានការខឹងសម្បារ ហើយប្រើហិង្សាកុមារារងគ្រោះជាបន្តបន្ទាប់។

ជាក់ស្តែងនៅថ្ងៃទី២១ ខែមីនា ឆ្នាំ២០២៤ នៅវេលាម៉ោង២០:០០នាទី ឈ្មោះ យិន សុខលីន បានប្រើដៃម្ខាង (ដៃឆ្វេង) ចាប់ដៃខាងឆ្វេងកូនលើកយួរផុតពីកម្រាល(ដោយមិនបានត្រកងពីផ្នែកខាងក្រោម) ទេ ទៅដាក់លើភួយ ស្ថិតនៅជ្រុងខាងត្បូង ពេលនោះកូនក៏ភ្ញាក់ស្រែកយំ ប្តីបាននិយាយថា “អាត្រាស្ងាត់ កុំមាត់ ឆាប់គេង” ប៉ុន្តែកូននៅតែបន្តយំ ទើបប្តី ស្ទុះទៅវាយដើមទ្រូងកូនចំនួន ០១ដៃ ដោយប្រើដៃខាងស្តាំ បន្ទាប់មកកូនស្រែកយំរឹតតែខ្លាំង ហើយគេបានយកដៃស្តាំច្របាច់ក ចំណែកដៃឆ្វេង ខ្ទប់មាត់ និងច្រមុះបានប្រហែល ២០វិនាទី ទើបដកដៃទាំងពីរចេញ។ បន្ទាប់មកយកដៃឆ្វេងចាប់លើកជើងកូន ខាងឆ្វេង ដាក់ក្បាលចុះក្រោមទល់និងខ្នើយ ហើយគេវាយដោយក្តាប់ដៃខាងស្តាំ ចំត្រង់ស្លាបប្រជៀវខាងឆ្វេង ចំនួន ០១ដៃ ហើយទាញកន្ត្រាក់បោះទៅលើកម្រាលបន្ទាប់មកវាយចំផ្នែកក្បាល និងគុម្ពត្រចៀកផ្នែកខាងឆ្វេងចំនួន ០១ដៃទៀត។ ភ្លាមនោះកូនក៏ប្រកាច់ក្បាលឡើងលើដកចង្ការមាន់ ហើយគេបានយកភួយទៅដណ្តប់ឱ្យកូន។ រូបខ្លួនពិតជាបានឃើញសកម្មភាពដូចបានរៀបរាប់ខាងលើពិតមែន ប៉ុន្តែមិនហ៊ានចូលទៅហាមឃាត់ប្តីដោយខ្លាចគេវាយធ្វើបាប ឬកាប់សម្លាប់ ពីព្រោះគេមានដាវសាំម៉ូរៃ ចំនួន ០១ដើម រក្សាទុកនៅលើធ្នើរដាក់ចានឆ្នាំងក្បែរដៃគេតែម្តង។ បន្ទាប់ពីធ្វើសកម្មភាពខាងលើរួចហើយ ប្តីបាននាំខ្លួនចូលដេកដោយនិយាយថាកូនវាមិនអីទេ។

ស្ត្រីដដែលបន្តថា លុះម៉ោង០៤:០០នាទី ទាបភ្លឺ ឈានចូលថ្ងៃទី២២ ខែមីនា ឆ្នាំ២០២៤ ទើបដឹងថា កូនបានដាច់ខ្យល់ស្លាប់បាត់ទៅហើយ ពេលបើកភ្លើងទូរស័ព្ទបញ្ចាំងមើលឃើញលាមកកូននៅលើកម្រាល ហើយពេលយកដៃច្រត់ដើមទ្រូងកូន ក៏មានហៀរទឹកនោមចេញមក បន្ទាប់មកខ្លួនបានយកកូនទៅងូតទឹកសំអាតខ្លួន ហើយពាក់ខោរអាវឲ្យកូន។

ទន្ទឹមនោះប្តី (ឈ្មោះ យិន សុខលីន) បានលើកដៃសំពះ និងនិយាយអង្វរថា “កុំប្តឹងប៉ូលិសអី គេមិនចង់ជាប់គុកទេ គេមិនរត់ទៅណាចោលរូបខ្លួនទេ គឺបន្តរស់នៅជាមួយគ្នារហូត”។ ដើមឡើយគិតថាទុកសពកូនដល់ពេលល្ងាច ក្នុងគោលបំណងហៅម្តាយមកកុហកថា កូនបានស្លាប់ដោយជម្ងឺ ប៉ុន្តែនៅម៉ោង០៨:០០នាទី ថ្ងៃទី២២ ខែមីនា ឆ្នាំ២០២៤ សពកូនចាប់ផ្តើមមាន ក្លិនតិចៗ ទើបខ្លួន និងប្តីសម្រេចយកសពទៅកប់ក្នុងដីជាប់និងលូបង្គន់ក្រោយផ្ទះ។

ស្រ្តីបញ្ជាក់ថា លុះដល់ម៉ោង១៦:៣០នាទី ថ្ងៃ.ខែ.ឆ្នាំដដែល ទើបសមត្ថកិច្ចនគរបាល ចុះនាំរូបខ្លួននិងប្តី មកធ្វើការសួរតែម្តង។ ដោយខ្លួនបានសារភាពថា អំពើខាងលើប្រព្រឹត្តតែម្នាក់ឯងដោយសារអាណិត និងស្រឡាញ់ប្តី ម្យ៉ាងទៀតគាត់មានកូនដើមត្រូវចិញ្ចឹម ចំណែកខ្លូនពុំមានកូននៅជាមួយទៀតទេ។

ស្ត្រីជនសង្ស័យបានសារភាពបន្ថែមថា កន្លងមករូបនាងធ្លាប់ប្រើហិង្សាជាច្រើនលើក ទៅលើកុមាររងគ្រោះ តាំងពីគេមានអាយុ០៨ខែ រហូតមកថ្ងៃស្លាប់ ដោយការប្រើហិង្សានោះគឺ នាងវាយកូនដោយប្រើដៃដោយប្រើរំពាត់ និងវាយដោយដើមដំឡូងមីជាដើម បណ្តាលកូនមានស្នាមដាច់រលាត់ និងស្នាមជាំលើដងខ្លួន។

ចំណែកចម្លើយឈ្មោះ យិន សុខលីន ជាប្ដីចុងបានសារភាពថា រូបគេធ្លាប់ប្រើហិង្សា លើកុមាររងគ្រោះ ប៉ុន្តែចំពោះករណីឃាតកម្មខាងលើនេះ គេមិនបានប្រព្រឹត្តនោះទេ។ តាមការពិនិត្យសាកសពកុមារារងគ្រោះ មានស្នាមជាំងផ្នែកក្បាល និងផ្ទៃមុខផ្នែកខាងឆ្វេង, ស្នាមដាច់រលាត់ចុងភ្នែកឆ្វេង, បាក់ឆ្អឹងដងកាំបិតខាងឆ្វេង និងមានស្នាមដាច់រលាត់កខាងស្តាំ។វត្ថុតាងដកហូត ដាវសាំម៉ូរៃ១ដើម ប្រវែង៧០សង់ទីម៉ែត្រ។

បច្ចុប្បន្នកម្លាំងនគរបាលកសាងសំណុំរឿងបញ្ជូនទៅការិយាល័យជំនាញដើម្បី ចាត់ការទៅតាមផ្លូវច្បាប់៕

Sponsored

ខេត្តសៀមរាប៖ស្ត្រីម្នាក់បានស្លាប់ភ្លាមៗនៅកន្លែងកើតហេតុខណៈបើកម៉ូតូត្រូវបានរថយន្តបុកចំពេញទំហឹង។

ហេតុការណ៍បានកើតឡើង នៅវេលាម៉ោង១៥និង២០នាទី ថ្ងៃទី២២ ខែមីនាឆ្នាំ២០២៤ នៅចំណុចផ្លូវជាតិលេខ៦ ចន្លោះគីឡូម៉ែត្រលេខ២៧៧-២៧៨ ស្ថិតក្នុងភូមិជ្រៃ ឃុំកៀនសង្កែ ស្រុកសូទ្រនិគម ខេត្តសៀមរាប។

សមត្ថកិច្ចបានប្រាប់ថា គ្រោះថ្នាក់ចរាចរណ៍នេះ បង្កដោយរថយន្តម៉ាកHyundai Starex ពណ៌ខ្មៅ ពាក់ផ្លាកលេខភ្នំពេញ 2BS- 2087 បើកបរដោយឈ្មោះថរ មិនាកា ភេទប្រុស អាយុ៣៥ឆ្នាំ រស់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ បើកបរ ក្នុងទិសដៅពីកើតទៅលិច បានបុកម៉ូតូ០១គ្រឿងម៉ាក C125 ហុងដាឌ្រីម ពណ៌ខ្មៅ ពាក់ផ្លាកលេខបាត់ដំបង1N- 5925 បើកបរដោយឈ្មោះចិន សាឡោម ភេទស្រី បើកបរតែម្នាក់ឯង។

សមត្ថកិច្ចបានបន្តថា ជនរងគ្រោះឈ្មោះចិន សាឡោម ភេទស្រី អាយុ៣៥ឆ្នាំ រស់នៅភូមិរុនខាងត្បូង ឃុំដានរុន ស្រុកសូទ្រនិគម ខេត្តសៀមរាប។

បច្ចុប្បន្នសាកសព សមត្ថកិច្ច បានប្រគល់អោយក្រុមគ្រួសារ យកទៅធ្វើបុណ្យតាមប្រពៃណី។ ចំណែករថយន្ត និងម៉ូតូរក្សាទុកនៅអធិការនគរបាលស្រុក៕

ខេត្តបន្ទាយមានជ័យ៖ការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ បានប្រកាសឲ្យម្ចាស់អាជីវកម្មទំនិញ ដែលរងការបង្ក្រាបរួសរាន់ចូលខ្លួនបង់ពន្ធអាករនិងពិន័យតាមច្បាប់ស្តីពីគយជាធរមាន។ នេះបើតាមសេចក្ដីជូនដំណឹងចុះធ្វើនៅខេត្តបន្ទាយមានជ័យ, ថ្ងៃទី១៩ ខែមករា ឆ្នាំ២០២៤ ដែលទីភ្នាក់ងារសារព័ត៌មាន សៀមរាប ប៉ុស្ដិ៍ ទទួលបាននៅថ្ងៃទី នៅថ្ងៃទី២១ ខែមីនា ឆ្នាំ២០២៤នេះ។

តាមសេចក្តីជូនដំណឹងបានបង្ហាញថា ការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ នៃនាយកដ្ឋានបង្ការនិងបង្ក្រាបបទល្មើស នៃអគ្គ នាយកដ្ឋានគយនិងរដ្ឋាករកម្ពុជា មានកិត្តិយស សូមជម្រាបលោក-លោកស្រី ជាម្ចាស់ទំនិញ (ទោចក្រក្រយានយន្តរថយន្តទំនិញ ព្រមទាំងមធ្យោបាយដឹកទំនិញល្មើស) ដែលត្រូវបានបង្ក្រាបកន្លងមក ដោយមន្ត្រីគយនៃ ការិយាល័យស្រាវជ្រាវនិងបង្ក្រាបអំពើរត់ពន្ធតំបន់៥ ចាប់ពីថ្ងៃទី៣០ ខែមេសា ឆ្នាំ២០២០ រហូតដល់ថ្ងៃជូន ដំណឹងនេះ (ដូចមានក្នុងតារាងកំណត់ហេតុល្មើសច្បាប់គយភ្ជាប់ជាមួយ) ដែលមិនទាន់បានចូលខ្លួនបង់ពន្ធ អាករ និងពិន័យ មេត្តាជ្រាបថា៖ ដើម្បីទទួលបានទំនិញរបស់លោក-លោកស្រីទៅប្រើប្រាស់ ឬធ្វើអាជីវកម្ម សូមលោក-លោកស្រីមេត្តារួសរាន់ចូលខ្លួនបង់ពន្ធអាករនិងពិន័យតាមច្បាប់ស្តីពីគយជាធរមាន។

ក្នុងករណី លោក-លោកស្រី មិនបានចូលខ្លួនមកបំពេញកាតព្វកិច្ចគយឲ្យបានមុនរយៈពេល៩០ថ្ងៃ (កៅសិបថ្ងៃ) នៃការ ជូនដំណឹងនេះ នោះទំនិញរបស់លោក-លោកស្រីនឹងក្លាយជាទំនិញគ្មានការទាមទារ (លោក-លោកស្រីពុំមាន សិទ្ធិបង់ពន្ធអាករនិងពិន័យលើទំនិញរបស់ខ្លួនទៀតឡើយ)។

អាស្រ័យដូចបានជម្រាបជូនខាងលើ សូមលោក-លោកស្រីជាម្ចាស់ទំនិញទាំងអស់ដែលមាននៅក្នុងតារាង កំណត់ហេតុល្មើសច្បាប់គយ មេត្តាជ្រាបជាដំណឹង និងរួសរាន់មកបំពេញកាតព្វកិច្ចបង់ពន្ធ អាករ និងពិន័យ ឲ្យបានទាន់តាមវេលាកំណត់។

ព័ត៌មានបន្ថែមលោក-លោកស្រីអាចធ្វើការទំនាក់ទំនងតាមរយៈលេខទូរស័ព្ទនិងអាសយដ្ឋានខាងក្រោម៖ 085 777 550/ 017449 959 សូមលោក-លោកស្រី ទទួលនូវការស្រលាញ់រាប់អានពីខ្ញុំ។ សូមអរគុណ!