ខេត្តសៀមរាប៖ក្មេងទំនើងចំនួន១៥នាក់ ត្រូវបាននគរបាលការិយាល័យព្រហ្មទណ្ឌកម្រិតស្រាល សហការជាមួយនគរបាលអន្តរាគមន៍ស្នងកាខេត្តសៀមរាប ឃាត់ខ្លួននៅមាត់ស្ទឹងសៀមរាប។

ការឃាត់ខ្លួនធ្វើឡើងនៅវេលាម៉ោង០០និង រំលងអាធ្រាតចូលថ្ងៃទី៣០ ខែកក្ដដា ឆ្នាំ២០២០ចំណុចភូមិមណ្ឌល២ សង្កាត់ស្វាយដង្គំ ក្រុងសៀមរាប។

នាយការិយាល័យព្រហ្មទណ្ឌកំរិតស្រាលស្នងការខេត្តសៀមរាប លោកវរសេនីយ៍ឯក ហង្ស សូផាតភីរម្យ បានឲ្យដឹងថា ដោយមានការយកចិត្តទុកដាក់ពីលោកឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប និងមានការចង្អុលបង្ហាញពីលោកឧត្តមសេនីយ៍ត្រី ស្នងការរង ភឹងចិន្តារ៉េត ទទួលផែនការងារនគរបាលព្រហ្មទណ្ឌ ទើប រូបលោកបានសហការល្បាត ជាមួយកម្លាំងការិយាល័យនគរបាលការពារនិងអន្តរាគមន៍ ក្នុងភូមិសាស្រ្ត ក្នុងសង្កាត់ធំៗទាំង០៤ក្នុងក្រុងសៀមរាប ដោយចុះប្រមូលជនទំនើងដើរដេកនិងគ្មានសណ្តាប់ធ្នាប់ដែលប្រមូលផ្ដុំគ្នា នៅតាមសួនច្បារបឹងហ្កាឡូ នៅតាមមាត់ស្ទឹង បានចំនួន០២ក្រុម ស្មើនិង១៥នាក់។
ក្រុមទី១
.១.ឈ្មោះ លឹតលីឆាតផោយងាមសែង ភេទប្រុស អាយុ១៨ឆ្នាំ ទីលំនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរ មិនពិតប្រាកដ។
-២.ឈ្មោះ ជា រ៉ាភី ភេទប្រុស អាយុ១៥ ឆ្នាំ ទីលំនៅភូមិស្វាយដង្គំ សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរ មិនពិតប្រាកដ។
-៣.ឈ្មោះ វ៉ាត់ សេរីវឌ្ឍនាភេទប្រុស អាយុ១៦ឆ្នាំ ស្នាក់នៅបន្ទប់ជួល ភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប មុខរបរមិនពិតប្រាកដ។
-៤.ឈ្មោះ ណារិន សុផារ៉ា ភេទប្រុស អាយុ១៦ឆ្នាំ ទីលំនៅភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប មុខរបរ មិនពិតប្រាកដ។
-៥.ឈ្មោះ ជី សាមាយ ភេទប្រុស អាយុ ១៥ឆ្នាំ ទីលំនៅភូមិត្រៀក សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរ មិនពិតប្រាកដ។
-៦.ឈ្មោះ ចក់ លាងម៉េង ភេទប្រុស អាយុ១៤ឆ្នាំ ទីលំនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប មុខរបរមិនពិតប្រាកដ។
-៧.ឈ្មោះ លី វាសនា ភេទប្រុស អាយុ១៧ឆ្នាំ ទីលំនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរមិនពិតប្រាកដ។
-៨.ឈ្មោះយ៉ា អារីហ្វីន(ឥស្លាម) ភេទប្រុស អាយុ១៦ឆ្នាំ ទីលំនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរមិនពិតប្រាកដ។
-៩.ឈ្មោះលី ចាន់ ភេទប្រុស អាយុ១៤ឆ្នាំ ទីលំនៅភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរមិនពិតប្រាកដ។
-១០.ឈ្មោះ គីយ៉ូមរីកា ភេទប្រុស អាយុ១៦ឆ្នាំ ទីលំនៅភូមិស្ទឹងថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរមិនពិតប្រាកដ។
-១១.ឈ្មោះ ជាតិ កុសល ភេទប្រុស អាយុ១៩ឆ្នាំ ទីលំនៅភូមិវិហារចិន សង្កាត់ស្វាយដង្គំ ក្រុងសៀមរាប ខេត្តសៀមរាប មុខរបរមិនពិតប្រាកដ។
ក្រុមទី២-
១.ឈ្មោះ ស៊ុន តុលា ភេទប្រុស អាយុ១៧ឆ្នាំ ស្នាក់នៅបន្ទប់ជួលភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប មុខរបរមិនពិតប្រាកដ។ – ២.ឈ្មោះគង់ មាក់ ភេទប្រុស អាយុ១៥ឆ្នាំ ទីលំនៅភូមិធ្លកអណ្តូង សង្កាត់ស្លក្រាម ក្រុងសៀមរាប ខេត្តសៀមរាប មុខរបរមិនពិតប្រាកដ។-
៣.ឈ្មោះប៉ុន សុភី ភេទប្រុស អាយុ ១៦ឆ្នាំ ទីលំនៅភូមិត្រាំនាគ សង្កាត់ស្លក្រាម ក្រុងសៀមរាប ខេត្តសៀមរាប មុខរបរមិនពិតប្រាកដ ។
-៤.ឈ្មោះ សៀងសែប ភេទប្រុស អាយុ១៨ឆ្នាំ ទីលំនៅភូមិវាល សង្កាត់គោកចក ក្រុងសៀមរាប ខេត្តសៀមរាប មុខរបរមិនពិតប្រាកដ។
លោកបន្តថា ក្មេងទំនើងទាំង១៥នាក់ខាងលើមកធ្វើការសាកសួរ ឃើញថាពុំមានជាប់ពាក់ពន័្ធនិងបទល្មើសព្រហ្មទណ្ឌទេ និងបានធ្វើតេស្តទឹកនោមរកសារធាតុញៀនឃើញថាអវិជ្ជមានទាំងអស់ បានធ្វើកិច្ចសន្យាអប់រំលើកទី១ និងប្រគល់ជូនទៅអាណាព្យាបាលឲ្យយកទៅលំនៅដ្ឋានអប់រំវិញ៕SRP

ខេត្តព្រៃវែង៖ ពលរដ្ឋ ប្រជាកាពារ និងអាជ្ញាធរឃុំរាប នគរបាលប៉ុស្តិ៍ បានសហការគ្នា បើកផ្លូវកសិកម្មឬថ្មើរជើងមួយខ្សែទទឹង៤ម៉ែត្រ និងបណ្តោយប្រវែង១៦០០ម៉ែត្រនៅចំណុចកន្លែងរលៀង ស្ថិតភូមិពារាំង ឃុំរាប ស្រុកពារាំង។

លោក ផន សុផល មេឃុំរាប បានលើកឡើងថា ដោយការធ្វើដំណើររបស់ពលរដ្ឋ ក៏ដូចការលំបាក របស់ពួកគាត់ក្នុងការដឹកជញ្ជូនផលកសិកម្ម ទើបសម្រេច ធ្វើផ្លូវនេះឡើង។ លោក ផន សុផល បានបន្តថា ផ្លូវថ្មើរជើងឬផ្លូវកសិកម្មមួយខ្សែនេះបានចាប់ផ្តើមធ្វើនៅអំឡុងដើមខែមិថុនា បានបញ្ចាប់កសាងរួចរាល់នៅថ្ងៃទី២០ ខែកក្កដា ឆ្នាំ២០២០នេះ។ លោកមេឃុំថា ទំរាំតែ បើកផ្លូវមួយខ្សែនេះបានគឺមិនងាយទេ ត្រូវដើរសម្របសម្រួល ជាមួយពលរដ្ឋដែលមានក្បាលដីជាប់ផ្លូវនឹង ថែមទាំងផ្តល់សំណងពីផលប៉ះពាល់ដល់ពួកគាត់។

លោកបានបញ្ជាក់ថា ផ្លូវនេះ ចំណាយថវិកាអស់ចំនួន៩,៥០០,០០០រៀល ដោយមានការសហការណ៍ និងឧបត្ថមពីសប្បុរសជនក្នុងភូមិពារាំងចំនួន១,៥០០,០០០រៀល និងលោកឧញ្ញ៉ា ប៊ុត ចាន់ធូ ចំនួន៤លានរៀល ព្រមទាំង ថវិកាផ្ទាល់ខ្លួនរបស់លោក៤លានរៀល។

លោក សាន់ សៀប តំណាងឲ្យពលរដ្ឋក្នុងភូមិពារាំង បានថ្លែងថា ខ្ញុំបាទពិតជា រីករាយចំពោះការសហកាណ៍ របស់ប្រជាពលរដ្ឋ ដែលបានរួមគ្នាបើកផ្លូវមួយខ្សែនេះ ដើម្បីជាប្រយោជន៍រួម ក្រោមការសម្របសម្រួលពីថ្នាក់ដឹងនាំស្រុកពារាំងជាពិសេស អាជ្ញាធរឃុំរាប តែម្តង។

លោក សាន់ សៀប បានសុំសំណូមពរដល់ពលរដ្ឋ ទាំងអស់ ដែលអាស្រ័យផលឬប្រើប្រាស់លើផ្លូវមួយខ្សែនេះត្រូវជួយថែរក្សាទាំងអស់គ្នា ព្រោះជាសម្បត្តិរួមរបស់ពួកយើងទាំងអស់គ្នា។

ជាមួយគ្នានេះ លោក ផន សុផល មេឃុំរាប ក៏បានចែកសារ៉ុង ដល់ពលរដ្ឋ កងកំលាំងនគរបាលប៉ុស្តិ៍និងប្រជាការពារភូមិមួយចំនួនផងដែរ៕SRPដោយសូ សុខា

ខេត្តបន្ទាយមានជ័យ៖មន្ត្រីបានថ្លែងប្រាប់នៅរសៀលថ្ងៃនេះថាការិយាល័យស្រាវជ្រាវ អំពើរត់ពន្ធតំបន់៥ ប្រចាំខេត្តបន្ទាយមានជ័យ នៅថ្ងៃទី៣០ ខែកក្កដា ឆ្នាំ២០២០នេះ ចុះបង្ក្រាបទូរស័ព្ទគេចពន្ធចំនួន ៣០០គ្រឿង នៅក្រុងសិរីសោភណ ក្រោមកាសម្របសម្រួលពីលោក មាស ច័ន្ទពិសិដ្ឋ ព្រះរាជាអាជ្ញាអមសាលាដំបូងខេត្ត។
បើតាមមន្ត្រីថ្លែងបន្តថាវត្ថុតាងទូរស័ព្ទដៃគេចពន្ធដែលដកហូតបានចំនួន ៣០០គ្រឿង រួមមាន៖ ម៉ាក SAM SUN, ម៉ាក OPO និងម៉ាក ViVO ត្រូវបានរឹបអូសបញ្ជូនទៅតំបន់ឈរជើងការិយាល័យស្រាវជ្រាវអំអើរត់ពន្ធតំបន់ ៥ នៅស្ពានទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យដើម្បីឱ្យម្ចាស់ចូលបង់ពន្ធតាមនីតិវិធី៕SRP

ខេត្តកំពង់ធំ៖គ្រូពេទ្យម្ចាស់គ្លីនិក មួយកន្លែងដែលបានព្យួរសេរ៉ូមបណ្ដាលឲ្យពលរដ្ឋម្នាក់បានស្លាប់ទាំងដៃកំពុងភ្ជួរសេរ៉ូម បង្កឲ្យមានការភ្ញាក់ផ្អើល នោះបានរត់គេចខ្លួនបាត់។ ប៉ុន្តែករណីនេះសមត្ថកិច្ចកំពុងស្រាវជ្រាវតាមចាប់ខ្លួនយកមកអនុវត្តតាមផ្លូវច្បាប់ផងដែរ។

ស្នងការនគរបាលខេត្តកំពង់ធំលោកឧត្តមសេនីយ៍ទោ អ៊ុក កុសល បានប្រាប់បណ្ដាញសៀមរាបប៉ុស្ដិ៍នៅព្រឹកថ្ងៃព្រហស្បតិ៍ ទី៣០ខែកក្កដាឆ្នាំ២០២០នេះថា បានអោយសមត្ថកិច្ច ពិនិត្យស្រាវជ្រាវ និងកសាងសំណុំរឿងហើយ ។ លោកឧត្តមសេនីយ៍ទោ អ៊ុក កុសល បន្តថាជនសង្ស័យបានគេចខ្លួន មុនពេលសមត្ថកិច្ច ទទួលបានព័ត៌មាននេៈម្លេៈ។ ទោះយ៉ាងណាលោកស្នងការខេត្តបញ្ជាក់ថាករណីនេះមិនចប់ទេ ការកសាងនិងនីតិវិធីសំណុំរឿង បន្តបន្ទាប់។

សូមរម្លឹកថាករណីមនេះបានកើតឡើងនៅវេលាម៉ោង ២៣និង៤០នាទីយប់ ថ្ងៃទី ២៨ ខែកក្កដា ឆ្នាំ២០២០ នៅក្នុងគ្លីនិក ឯកជនមួយ យីហោ វេជ្ជ. ច្រឹប សុធី ស្ថិតនៅក្នុងភូមិសំពៅមាស ឃុំសានគរ ស្រុកកំពង់ស្វាយ ខេត្តកំពង់ធំ។ គ្រូពេទ្យឯកជនខាងលើ ឈ្មោះ ច្រឹប សុធី ។ ចំណែក
ជនរងគ្រោះឈ្មោះ ឈួន ឈួត ភេទប្រុស អាយុ៥២ឆ្នាំជាកម្មករក្រុមហ៊ុនចិញ្ចឹមស្វា នៅក្នុងភូមិព្រៃព្រាល(ខ) ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
យោងតាមប្រពន្ធជនរងគ្រោះប្រាប់អ្នកសារព័ត៌មានថា ប្តីគាត់និយាយថាឈឺដៃឈឺជើង មិនទៅធ្វើការទេថ្ងៃនេះ ហើយក៏បានទៅឲ្យពេទ្យខាងលើពិនិត្យជំងឺឲ្យ។ គ្រូពេទ្យប្រាប់ថាគាត់មានជំងឺគ្រុនឈិក ក៏ដាក់សេរ៉ូមឲ្យនៅកន្លែងពេទ្យតែម្ដង។ រហូតដល់វេលាម៉ោងប្រហែល ២០,០០ នាទីយប់ អស់សេរ៉ូម០៣ កំប្លោក ក៏ចាប់ផ្តើមរៀបចំដាក់សេរ៉ូមបន្តទៀត។ ប៉ុន្តែមុនដាក់សេរ៉ូមបានឲ្យថ្នាំគ្រាប់លេបសិន រួចក៏ដាក់សេរ៉ូមបន្តរហូត ដល់ម៉ោង ២៣និង៤០នាទី ជនរងគ្រោះក៏បានដាច់ខ្យល់ស្លាប់តែម្ដង ដោយដៃនៅកំពុងជាប់សេរ៉ូម។បើតាមសមត្ថកិច្ចខេត្ត គ្រូពេទ្យ និងជំនាញស្រុក បានចុះទៅដល់កន្លែងកើតហេតុដើម្បីធ្វើកោសល្យពិច័យសាកសព បានសន្និដ្ឋានជាបឋមថាការស្លាប់របស់ជនរងគ្រោះគឺអាចបណ្ដាលមកពីប្រតិកម្មថ្នាំ។ទោះយ៉ាងណាអង្គភាព សៀមរាបប៉ុស្ដិ៍ នៅមិនទាន់ទទួលបានការបំភ្លឺពីម្ចាស់គ្លីនិកនៅឡើយទេ ដោយមិនមានលេខទំនាក់ទំនង។ ពាក់ព័ន្ធហេតុការណ៍នេះ អធិការនគរបាលស្រុកកំពង់ស្វាយ លោកវរសេនីយ៍ទោ លោកកែ កញ្ចានា បានបញ្ជាក់ថាទីតាំងគ្លីនិក វេជ្ជ. ច្រឹប សុធី ជនជាតិខ្មែរនឹងមានច្បាប់អនុញាត។ តែបានគេចខ្លួនបាត់ហើយ។ មជ្ឈដ្ឋាននានាសង្ឃឹមថាសមត្ថកិច្ចជំនាញពាក់ព័ន្ធនឹងឃាត់ខ្លួនគ្រូពេទ្យខាងលើយកមកទទួលខុសត្រូវតាមផ្លូវច្បាប់ជាក់ជាមិនខាន៕SRP

ខេត្តកំពង់ចាម៖នគរបាលខេត្តកំពង់ចាមបានធ្វើការច្រានចោលចំពោះព័ត៌មានដែលផ្សាយថានៅស្រុកព្រៃឈរមានល្បែងស៊ីសងជល់មាន់និងអាប៉ោង។
ភ្នាក់ងារ សៀមរាបប៉ុស្តិ៍ បានរាយការណ៍ថា ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម សូមជម្រាបជូនសាធារណជន និងអ្នកនិយមប្រើប្រាស់នូវបណ្តាញទំនាក់ទំនងសង្គមហ្វេសប៊ុក ជ្រាបជាព័ត៌មានថា៖ ដោយមួយរយៈពេលនេះ មានគេហទំព័ររបស់អ្នកសារព័ត៌មានមួយចំនួន បានយករូបភាពចាស់ៗ ពាក់ព័ន្ធនិងករណីមានក្រុមអ្នកញៀនល្បែងលួចលេងល្បែងសុីសងខុសច្បាប់ ដែលករណីលើកឡើងខាងលើនេះ សមត្ថកិច្ចយើងខ្ញុំបានធ្វើការបង្រ្កាបជាយូរមកហើយ។

ស្នងការដ្ឋាននគរបាលខេត្តកំពង់ចាមយើងខ្ញុំ ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ទោ ឯម កុសល ស្នងការនគរបាលខេត្ត បានដាក់បទបញ្ជាយ៉ាងមឹុងម៉ាត់ ដល់គ្រប់គណៈជំនាញទាំងថ្នាក់ខេត្ត និងថ្នាក់ស្រុក ចុះអនុវត្តគោលនយោបាយភូមិ-ឃុំ មានសុវត្ថិភាព ដោយធ្វើការបង្រ្កាបបាន បទល្មើសជាច្រើនករណីមកហើយដែរ កន្លងមកនេះ។

សូមបញ្ជាក់ថា ចំពោះការចុះផ្សាយរបស់ជនខិលខូច តាមរយៈគេហទំព័រអ្នកសារព័ត៌មាន ដែលមិនគោរពវិជ្ជាជីវៈមួយចំនួនតូចនោះ មានចេតនាមិនល្អ ក្នុងរូបភាពចង់បានការទាក់ទាញប្រជាប្រិយភាពតាមរយៈគេហទំព័ ក្នុងបណ្ដាញសង្គមរបស់ខ្លួន ដែលធ្វើឲ្យមានការប៉ះពាល់យ៉ាងធ្ងន់ធ្ងរដល់កិត្តិយសរបស់អង្គភាពស្នងការដ្ឋាននគរបាលខេត្ត ក៏ដូចជាកិត្តិយសរបស់នគរបាលជាតិទាំងមូល។

អាស្រ័យដូចបានជម្រាបជូនខាងលើនេះ ក្រុមប្រតិកម្មរហ័ស នៃស្នងការដ្ឋាននគរបាលខេត្តកំពង់ចាម សូមអំពាវនាវដល់សាធារណជនទាំងអស់ សូមកុំមានការយល់ច្រឡំ ចំពោះការចុះផ្សាយ ដោយគ្មានមូលដ្ឋានច្បាស់លាស់ ក្នុងរូបភាពមិនពិត ជាចេតនាបំពុលព័ត៌មាន ធ្វើឲ្យមានភាពអាណាធិបតេយ្យក្នុងសង្គម និងសូមបន្ដការសហការជាមួយកម្លាំងសមត្ថកិច្ចយើងខ្ញុំ រាល់បទល្មើសដែលកើតមានឡើងក្នុងមូលដ្ឋានរបស់បងប្អូន ដើម្បីយើងខ្ញុំចុះជួយអន្តរាគមន៍បានទាន់ពេលវេលា។
សុំបញ្ជាក់ថារយៈពេលប៉ុន្មានថ្ងៃកន្លងទៅនេះគេហទំព័រសារព័ត៌មានមួយចំនួននិងបណ្ដាញសង្គម បានធ្វើការបង្ហោះរូបភាព និងខ្លឹមសារថា នៅស្រុកព្រៃឈរខេត្តកំពង់ចាម មានល្បែងស៊ីសងជល់មាន់និងអាប៉ោង បានបើកលេងយ៉ាងអនាធិបតេយ្យ។ ការផ្សាយបែបនេះត្រូវបាននគរបាលខេត្តកំពង់ចាម ចេញសេចក្ដីបដិសេធ ជាករណីមិនពិត៕SRP

ខេត្តកំពង់ចាម៖លោក​​ អ៊ុន​ ចាន់ដា​ អភិបាលខេត្ត​កំពង់ចាម​ និង​លោក​​ ខ្លូត​ ផន​ ប្រធាន​ក្រុមប្រឹក្សា​ខេត្ត​ កាលពីរសៀលថ្ងៃទី២៩ ខែកក្កដា ឆ្នាំ២០២០នេះ បាន​ដឹកនាំ​មន្រ្តីរាជការ​ ​​អញ្ជើញ​ចូលរួម​គោរពវិញាណក្ខន្ធសព ឧបាសក សុខ សារឿន ត្រូវជាស្វាមី របស់លោកស្រី សម ផល្លា ប្រធានមន្ទីរព័ត៌មាន ខេត្តកំពង់ចាម ដែលបានទទួលមរណៈភាព កាលពីថ្ងៃទី២៨ ខែកក្កដា ឆ្នាំ២០២០ ក្នុងជន្មាយុ៦៧ឆ្នាំ ដោយរោគាពាធ ហើយត្រូវបានតម្កល់ទុក​ធ្វើ​បុណ្យ​នៅគេហដ្ឋាន​ស្ថិតនៅក្នុងភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម។

នៅក្នុងឱកាសនោះដែរ លោក​​ អ៊ុន​ ចាន់ដា​ និង​លោក​ ខ្លូត​ ផន​ ព្រមទាំង​សមាជិក​ក្រុម​ប្រឹក្សា​ខេត្ត​ អភិបាល​រង​ខេត្ត​ និង​ថ្នាក់ដឹកនាំ​មន្ត្រី​រាជការ​ បានចូលរួមសម្ដែងនូវសមានទុក្ខយ៉ាងគ្រៀមក្រំ ជាមួយគ្រួសារសព និងអញ្ជើញអុចធូប បួងសួងសូមឲ្យឌួងវិញាណក្ខន្ធសព ឧបាសក សុខ សារឿន បានសោយសុខទៅកាន់ដ្ឋានបរមសុខ
កុំបីភ្លាំងភ្លាត់ឡើយ ។
​ជាមួយគ្នា​នោះ​ លោក​អភិបាលខេត្ត​ ក៏បាននាំយកថវិកា​ ចំនួន​២លានរៀល​ លោកស្រី​​ ញួង​ ចរិយា​ អ៊ុន​ ចាន់ដា​ ​១០០ដុល្លារ​ លោក​លោកស្រី​​ ប៉ាង​ ដានី​ អភិបាល​រង​ខេត្ត​ ​៥០ម៉ឺន​រៀល​ លោកស្រី​​ អន​ ហេង​លក្ខិណា​ ៣០ម៉ឺន​រៀល​ ដេីម្បី​ចូលរួមក្នុងពិធីរៀបចំបុណ្យសពនេះផងដែរ ។
សូមបញ្ជាក់ថា ក្រុមគ្រួសារសព ក៏បានមូលមតិគ្នា ដង្ហែរទៅបូជា នៅបរិវេណ វត្តនគរបាជ័យក្រៅ ស្ថិតនៅឃុំអំពិល ស្រុកកំពង់សៀម វេលាម៉ោង ៧ព្រឹកថ្ងៃទី៣០ ខែកក្កដានេះ ហើយគ្រោងប្រារព្ធធ្វើបុណ្យទក្ខិណានុប្បទាន គម្រប់ខួប ៧ថ្ងៃ និង១០០ថ្ងៃ ទៅតាមកិច្ចសាសនា ដើម្បី ឧទ្ទិសកុសលផលបុណ្យ ដល់ឌួងវិញ្ញាណក្ខ័ន្ធ របស់ឧបាសក សុខ សារឿន នៅថ្ងៃទី០២ ខែសីហា ឆ្នាំ២០២០ ខាងមុខនេះ​៕SRP

ខេត្តសៀមរាប៖ អភិបាលខេត្ត លោក ទៀ សីហា បានរាយការណ៍ជូនគណ:កម្មការជំនាញនៃរដ្ឋសភា អំពីសភាពការណ៍រួមទូទៅ និង វឌ្ឍនភាពរីកចម្រើន ព្រមទាំងលទ្ធផលការងារសំខាន់ៗ ដែលរដ្ឋបាលខេត្តសៀមរាបសម្រេចបានកន្លងមក និង បានលើកឡើងពីការលំបាក បញ្ហាប្រឈមដែលខេត្តបានជួបប្រទះនាពេលកន្លងមក ដោយបានស្នើសុំគណៈកម្មការជំនាញទី៣នៃរដ្ឋសភា ជួយធ្វើអន្តរាគមន៍ ដើម្បីរកមធ្យោបាយដោះស្រាយផងដែរ។
អភិបាលខេត្តបានលើកផងដែរអំពីបញ្ហាប្រឈមមួយចំនួន ដែលទាក់ទងទៅនឹងការងារគណៈកម្មការទី៣ អំពីកង្វះនូវបច្ចេកទេសក្នុងការប្រើប្រាស់ពូជ ជី ក្នុងការដាំដុះរបស់ប្រជាកសិករ អំពីការគ្រប់គ្រងប្រមូលសំរាមនិងទីធ្លាចាក់សំរាមមិនទាន់ត្រឹមត្រូវតាមបទដ្ឋានបច្ចេកទេស ដែលធ្វើឲ្យប៉ះពាល់បរិស្ថាន និងការលួចកាប់ទន្ទ្រានដីព្រៃ និង ព្រៃលិចទឹក និងប្រព័ន្ធស្រោចស្រពប្រើប្រាស់ទឹកមិនគ្រប់គ្រាន់នៅក្នុងរដូវប្រាំង ធ្វើឲ្យការងារផលិតរបស់ប្រជាកសិកររងផលប៉ះពាល់។

លោកបានលើកឡើងយ៉ាងដូច្នោះក្នុងពេលចូលជួបពិភាក្សាការងារជាមួយលោក ឡូយ សុផាត ប្រធានគណៈកម្មការទី៣ និងសមាជិកគណៈកម្មការ ដើម្បីសិក្សាស្វែងយល់ពីវិស័យ ការងារពាក់ព័ន្ធនឹងការទទួលខុសត្រូវ របស់គណៈកម្មការទី៣ ដោយមានការងារផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកក្នុងដែនសមត្ថកិច្ចខេត្តសៀមរាប នៅព្រឹកមិញនេះ។

ក្នុងកិច្ចពិភាក្សានេះនេះ លោក ឡូយ សុផាត បានវាយតម្លៃខ្ពស់ចំពោះថ្នាក់ដឹកនាំ ខេត្តសៀមរាប និងភាគីពាក់ព័ន្ធដែលបានខិតខំប្រឹងប្រែងធ្វើការងារ ក្នុងការបម្រើប្រជាពលរដ្ឋ។ចំពោះការលំបាក និង បញ្ហាប្រឈមដែលខេត្តបានលើកឡើង គណៈកម្មការបានបញ្ជាក់ថា នឹងពាំនាំទៅជម្រាបជូនសម្តេចប្រធានរដ្ឋសភា ដើម្បីធ្វើអន្តរាគមន៍ទៅតាមនីតិវិធីរបស់រដ្ឋសភា ដើម្បីឲ្យខេត្តមានលទ្ធភាព ពេញលេញក្នុងការបំពេញភារកិច្ចបម្រើប្រជាពលរដ្ឋ ។ ម៉្យាងទៀត ការកាប់បំផ្លាញព្រៃឈើនៅតំបន់ខ្នងភ្នំគូលែន ដែលធ្វើឲ្យស្ថានភាពបរិស្ថាននៅខ្នងភ្នំមានការប្រែប្រួល ព្រមទាំងប៉ះពាល់ដល់វិស័យកសិកម្មនៅខេត្តសៀមរាបផងដែរ។ កត្តាសំខាន់អាជ្ញាធរខេត្ត និងមន្ទីរជំនាញត្រូវបង្កើនការយកចិត្តទុកដាក់ លើការបណ្តុះបណ្តាលបច្ចេកទេសដល់កសិករ លើការដាំដុះដំណាំបន្លែសរីរាង្គប្រកបដោយ សុវត្ថិភាព ក្នុងការបាន ជម្រុញឲ្យប្រជាកសិកបង្កើនការផលិតបន្លែ សុវត្ថិភាពឲ្យបានច្រើន ដើម្បីឈានទៅបញ្ឈប់ការនាំចូលបន្លែ ពីខាងក្រៅ ព្រមទាំងបង្កើនការងារដល់បងប្អូនប្រជាពលរដ្ឋ ក្នុងកាត់បន្ថយការធ្វើចំណាកស្រុកទៀតផង។ ដូច្នេះត្រូវតែបង្កើនការផលិតបន្លែ ផ្លែឈើសុវត្ថិភាពសម្រាប់ផ្គត់ផ្គង់ឲ្យទីផ្សារដោយគិតពីនិរន្តរភាពទៅពេលអនាគត មិនចាំបាច់នាំចូលបន្លែមកពីខាងក្រៅ ដោយហើយក្រោយពីបញ្ចប់កូវីដ១៩ និងធ្វើឲ្យខេត្តទេសចរណ៍មួយនេះ មានការអភិវឌ្ឍ ធ្វើឲ្យប្រជាពលរដ្ឋមានភាពរីកចម្រើន។

លោក ឡូយ សុផាត ក៏បានជំរុញថ្នាក់ដឹកនាំខេត្តសៀមរាប ត្រូវរៀបចំធ្វើការស្តារឡើងវិញក្នុងវិស័យទេសចរណ៍ និង ផែនការមេ និងចក្ខុវិស័យវែងឆ្ងាយ ក្នុងការទាក់ទាញអ្នកវិនិយោគមកកាន់ខេត្តសៀមរាប ដោយសារខេត្តមួយនេះមានអំណោយផលខាងវិស័យទេសចរណ៍ កសិកម្ម និង កសិទេសចរណ៍ជាដើម ដើម្បីឆ្លើយតបចំពោះការដឹកនាំ របស់រាជរដ្ឋាភិបាល ដែលបានដាក់ចេញនូវផែនការសកម្មភាពស្របទៅតាមស្ថានភាពបច្ចុប្បន្ន និងការប្ដេជ្ញាចិត្ត ក្នុងការបម្រើប្រជាពលរដ្ឋ៕SRP

ខេត្តកំពង់ធំ៖ពលរដ្ឋម្នាក់បានស្លាប់ទាំងដៃកំពុងភ្ជួរសេរ៉ូម បង្កឲ្យមានការភ្ញាក់ផ្អើល។
ហេតុការណ៍នេះបានកើតឡើងនៅវេលាម៉ោង ២៣និង៤០នាទីយប់ ថ្ងៃទី ២៨ ខែកក្កដា ឆ្នាំ២០២០ នៅក្នុងគ្លីនិក ឯកជនមួយ យីហោ វេជ្ជ. ច្រឹប សុធី ស្ថិតនៅក្នុងភូមិសំពៅមាស ឃុំសានគរ ស្រុកកំពង់ស្វាយ ខេត្តកំពង់ធំ។
គ្រូពេទ្យឯកជនខាងលើ ឈ្មោះ ច្រឹប សុធី ហៅឈុច។
ជនរងគ្រោះឈ្មោះ ឈួន ឈួត ភេទប្រុស អាយុ៥២ឆ្នាំជាកម្មករក្រុមហ៊ុនចិញ្ចឹមស្វា នៅក្នុងភូមិព្រៃព្រាល(ខ) ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ។
យោងតាមប្រពន្ធជនរងគ្រោះប្រាប់អ្នកសារព័ត៌មានថា ប្តីគាត់និយាយថាឈឺដៃឈឺជើង មិនទៅធ្វើការទេថ្ងៃនេះ ហើយក៏បានទៅឲ្យពេទ្យខាងលើពិនិត្យជំងឺឲ្យ។ គ្រូពេទ្យប្រាប់ថាគាត់មានជំងឺគ្រុនឈិក ក៏ដាក់សេរ៉ូមឲ្យនៅកន្លែងពេទ្យតែម្ដង។ រហូតដល់វេលាម៉ោងប្រហែល ២០,០០ នាទីយប់ អស់សេរ៉ូម០៣ កំប្លោក ក៏ចាប់ផ្តើមរៀបចំដាក់សេរ៉ូមបន្តទៀត។ ប៉ុន្តែមុនដាក់សេរ៉ូមបានឲ្យថ្នាំគ្រាប់លេបសិន រួចក៏ដាក់សេរ៉ូមបន្តរហូត ដល់ម៉ោង ២៣និង៤០នាទី ជនរងគ្រោះក៏បានដាច់ខ្យល់ស្លាប់តែម្ដង ដោយដៃនៅកំពុងជាប់សេរ៉ូម។បើតាមសមត្ថកិច្ចខេត្ត គ្រូពេទ្យ និងជំនាញស្រុក បានចុះទៅដល់កន្លែងកើតហេតុដើម្បីធ្វើកោសល្យពិច័យសាកសព បានសន្និដ្ឋានជាបឋមថាការស្លាប់របស់ជនរងគ្រោះគឺអាចបណ្ដាលមកពីប្រតិកម្មថ្នាំ។ទោះយ៉ាងណាអង្គភាព សៀមរាបប៉ុស្ដិ៍ នៅមិនទាន់ទទួលបានការបំភ្លឺពីម្ចាស់គ្លីនិកនៅឡើយទេ ដោយមិនមានលេខទំនាក់ទំនង៕SRP

ខេត្ត​កំពង់ចាម​៖នៅសៀលថ្ងៃទី២៩ ខែកក្កដា ឆ្នាំ២០២០ នេះ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន អមដំណើរ ដោយ លោក រដ្ឋលេខាធិការ លោក ជាអគ្គនាយក និងឯកឧត្ដម ជាទីប្រឹក្សាក្រសួងព័ត៌មាន បាន​​អញ្ជើញគោរពវិញាណក្ខន្ធសព ឧបាសក សុខ សារឿន ត្រូវជាស្វាមី របស់លោកស្រី សម ផល្លា ប្រធានមន្ទីរព័ត៌មាន ខេត្តកំពង់ចាម ដែលបានទទួលមរណៈភាព កាលពីថ្ងៃទី២៨ ខែកក្កដា ឆ្នាំ២០២០ ក្នុងជន្មាយុ ៦៧ឆ្នាំ ដោយរោគាពាធ ។
នៅក្នុងឱកាសនោះដែរ លោក រដ្ឋមន្ត្រី ខៀវ កាញារីទ្ធ និងប្រតិភូអមដំណើរ បានចូលរួមសម្ដែងនូវសមានទុក្ខយ៉ាងគ្រៀមក្រំ ជាមួយគ្រួសារសព និងអញ្ជើញអុចធូប បួងសួងសូមឲ្យឌួងវិញាណក្ខន្ធសព ឧបាសក សុខ សារឿន បានសោយសុខទៅកាន់ដ្ឋានបរមសុខ
កុំបីភ្លាំងភ្លាត់ឡើយ ។
​លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងប្រតិភូអមដំណើរ ក៏បាននាំយកថវិកា ១លានរៀល ចូលរួមក្នុងពិធីរៀបចំបុណ្យសព ខាងលើផងដែរ។
សូមបញ្ជាក់ថា បច្ចុប្បន្ន សពរបស់ឧបាសក សុខ សារឿន ត្រូវបានក្រុមគ្រួសារ សាច់ញ្ញាតិ តម្កល់ទុកនៅគេហដ្ឋាន នៅគេហដ្ឋានសព ស្ថិតនៅក្នុងភូមិជង្ហុក ឃុំអំពិល ស្រុកកំពង់សៀម ខេត្តកំពង់ចាម។ ក្រុមគ្រួសារ ក៏បានមូលមតិគ្នា ដង្ហែរទៅបូជា នៅបរិវេណ វត្តនគរបាជ័យក្រៅ ស្ថិតនៅឃុំអំពិល ស្រុកកំពង់សៀម វេលាម៉ោង ៧.០០នាទី នាព្រឹកថ្ងៃទី៣០ ខែកក្កដានេះហើយគ្រោងប្រារព្ធធ្វើបុណ្យទក្ខិណានុប្បទាន គម្រប់ខួប ៧ថ្ងៃ និង ១០០ថ្ងៃ ទៅតាមកិច្ចសាសនា ដើម្បី ឧទ្ទិសកុសលផលបុណ្យ ដល់ឌួងវិញ្ញាណក្ខ័ន្ធ របស់ឧបាសក សុខ សារឿន នៅថ្ងៃទី០២ ខែសីហា ឆ្នាំ២០២០ខាងមុខ។ អាស្រ័យហេតុនេះ សូមគោរពអញ្ជើញសម្ដេច ទ្រង់ ឯកឧត្ដម លោកឧកញ៉ា លោកជំទាវ លោក លោកស្រី អ្នកនាងកញ្ញា ញ្ញាតិនិមិត្តជិតឆ្ងាយ អញ្ជើញចូលរួមដង្ហែរ និងពិធីបុណ្យនេះ ឲ្យបានអធិកអធម ដើម្បី អនមោទនា ទទួលយកផល្លានិសង្ឃ តាមកម្លាំងសទ្ធាជ្រះថ្លា រៀងៗខ្លួន៕SRP

ខេត្តកំពង់ចាម​៖ក្រុម​ប្រឹក្សា​ខេត្ត​កំពង់ចាម​ បាន​បេីក​កិច្ចប្រជុំ​វិសាមាញ​លេីក​ទី​៥​​ អាណត្តិ​ទី​៣​ របស់​ខ្លួន​ ដេីម្បី​ពិនិត្យ​ និង​អនុម័ត​សេចក្តី​ព្រាង​ស្តីពី​ផែនការ​ចំណូល​-ចំណាយ​ថវិកា​សម្រាប់​ឆ្នាំ​២០២១​ របស់មន្ទីរសុខាភិបាលខេត្ត។
កិច្ចប្រជុំបានធ្វើឡើងនៅព្រឹកថ្ងៃទី២៩ ខែកក្កដា​ ឆ្នាំ​២០២០​ ក្រោម​វត្តមាន​​ លោក​​ ខ្លូត​ ផន​ ប្រធាន​ក្រុមប្រឹក្សា​ខេត្ត​ និង​លោក​​ អ៊ុន​ ចាន់ដា​ អភិបាលខេត្តកំពង់ចាម​ ព្រមទាំង​មាន​ការ​អញ្ជើញ​ចូល​រួម​ពី​ លោក​ លោកស្រី​​ជា​សមាជិក​ក្រុម​ប្រឹក្សា​ខេត្ត​ និង​មន្ត្រី​ពាក់ព័ន្ធ​ជា​ច្រើន​រូប​ទៀត​។

លោក​​ខ្លូត​ ផន​ ប្រធាន​ក្រុមប្រឹក្សា​ខេត្ត​កំពង់ចាម​ បាន​លើក​យក​របៀបវារៈ​អំពី​ការអនុម័ត​សេចក្តី​ព្រាង​ស្តីពី​ផែនការ​ចំណូល​-ចំណាយ​ថវិកា​សម្រាប់​ឆ្នាំ​២០២១​ របស់​មន្ទីរ​សុខាភិបាល​ខេត្តមក​ ដើម្បី​អនុម័ត​នាសម័យ​ ប្រជុំវិសាមញនេះ។

បេី​តាម​របាយការណ៍​លោក​វេជ្ជបណ្ឌិត​ គឹម​ ​សួរ​ភីរុណ​ ប្រធាន​មន្ទីរ​សុខាភិបាល​ខេត្ត​កំពង់ចាម​ បាន​ឲ្យ​ដឹង​ថា​ យោងតាម​សារាចរ​ណែនាំ​របស់​ក្រសួង​សេដ្ឋកិច្ច​ និង​ហិរញ្ញវត្ថុ​ ស្តីពី​នីតិវិធី​បច្ចេកទេស​ នៃ​ការ​រៀបចំ​គម្រោង​ថវិកា​ របស់​ថ្នាក់​ក្រោម​ជាតិ​សម្រាប់​ការ​គ្រប់គ្រង​ឆ្នាំ​២០២១​ ។ របាយការណ៍​បាន​បញ្ជាក់ទៀត​ថា​ឥណទាន​ដែល​បាន​គ្រោង​សម្រាប់​ការ​គ្រប់គ្រង​ថវិកា​ឆ្នាំ​២០២១​ ដែល​មាន​ទឹកប្រាក់​ចំណូល​សរុប​ប្រមាណ​ជាង​៨០លានរៀល​ និង​ទឹកប្រាក់​ចំណាយ​សរុប​ប្រមាណ​ជាង​៤០លានរៀល​ គឺ​ស្រប​តាម​នីតិវិធី​បច្ចេកទេស​នៃ​ការ​រៀបចំ​គម្រោង​ថវិកា​ឆ្នាំ​២០២១​ របស់​ថ្នាក់​ក្រោម​ជាតិ​។
ក្នុងកិច្ចប្រជុំ លោក​​ អ៊ុន​ ចាន់ដា​ អភិបាលខេត្ត​កំពង់ចាម​ បាន​ថ្លែង​ថា​ វិស័យ​សុខាភិបាល​ គឺ​មាន​តួនាទី​យ៉ាង​សំខាន់​ និងសេវា​ដេីរ​ជួរ​មុខ​ ក្នុង​ការចូល​រួមចំណែក​ជា​មួយ​រដ្ឋបាល​ខេត្ត​ ដើម្បី​បម្រើ​លេី​សេចក្តី​ត្រូវការ​របស់​បងប្អូន​ប្រជាពលរដ្ឋ​ ហេីយ​លោក​អភិបាលខេត្ត​ ក៏​បាន​ជូនពរ​ដល់​ការ​គ្រប់គ្រង​ថវិកា​ឆ្នាំ​២០២១​ របស់​មន្ទីរ​សុខាភិបាល​ខេត្ត​នេះ​ ឲ្យ​​ទទួល​បាន​ផ្លែផ្កា​ប្រកប​ដោយ​ភាព​រីកចម្រេីន​ផងដែរ​៕SRP

ខេត្តកំពង់ចាម៖អតីត​ព្រះ​រាជអាជ្ញា​រង​ នៃ​អយ្យការ​អម​សាលា​ដំបូង​រាជធានី​ភ្នំពេញ​ លោក​ វង្ស​ ប៊ុន​វិសុទ្ធ​​ ត្រូវបានប្រកាសចូលកាន់មុខតំណែងជាព្រះរាជអាជ្ញា នៃអយ្យការអមសាលាដំបូងខេត្តកំពង់ចាម ជំនួស​លោក​ ច្រឹង​ ខ្មៅ​ ដែលត្រូវ​ផ្ទេរ​ទៅ​កាន់​ជា​ព្រះរាជអាជ្ញា​ នៃ​អយ្យការ​អម​សាលា​ដំបូង​រាជធានី​ភ្នំពេញ​។
ពិធីធ្វើឡើងនារសៀលថ្ងៃទី២៨ ខែកក្កដា​​ ឆ្នាំ២០២០ នៅសាលា​ដំបូង​ខេត្ត​កំពង់ចាម​ ក្រោម​វត្តមាន​លោក កេីត​ រិទ្ធ​ រដ្ឋមន្ត្រី​ក្រសួងយុត្តិធម៌ និង​ប្រតិភូ​អមដំណើរ​ ដោយមានការ​អញ្ជើញ​ចូលរួម​ពី​ លោក ខ្លូត​ ផន​ ប្រធាន​ក្រុមប្រឹក្សា​ខេត្ត​ លោក អ៊ុន​ ចាន់ដា​ អភិបាលខេត្តកំពង់ចាម​ និង​ថ្នាក់ដឹកនាំ​កងកម្លាំង​ មន្ទីរ​ ​អង្គភាព​ ពាក់ព័ន្ធ​ជុំវិញខេត្ត​ជាច្រើន​រូប​ទៀត។

បន្ទាប់ពីពិធីប្រគល់ត្រា និងការប្ដេជ្ញាចិត្តរបស់លោក វង្ស​ ប៊ុន​វិសុទ្ធ​ ព្រះរាជអាជ្ញា នៃអយ្យការអមសាលាដំបូងខេត្តកំពង់ចាម។
លោក​​ អ៊ុន ចាន់ដា អភិបាលខេត្តកំពង់ចាម បានសំដែងការកោតសរសើរចំពោះលោក​ ច្រឹង​ ខ្មៅ​ ដែល​ត្រូវ​ដូរទៅកាន់តំណែងថ្មី ដោយកន្លងមក​បេី​ទោះបីជាមាន​រយៈពេល​ខ្លី​ក៏​ពិត​មែន​ តែ​លោកបានខិតខំបំពេញការងារយ៉ាងល្អនៅក្នុងមុខតំណែង ជាមួយគ្នា​នោះ​លោក​​អភិបាលខេត្ត​ ក៏​បាន​ទទួល​ស្វាគមន៍​ចំពោះ​​ លោក​ វង្ស​ ប៊ុន​វិសុទ្ធ​ ដែល​ត្រូវ​បាន​ប្រកាស​ចូល​កាន់​មុខ​តំណែង​ជា​ព្រះរាជអាជ្ញានៃអយ្យការអមសាលាដំបូងខេត្តកំពង់ចាម ដោយ​​សង្ឃឹម​ថា​លោក​ព្រះរាជអាជ្ញា​ថ្មី​នឹងចូលរួមសហការយ៉ាងល្អជាមួយនឹងរដ្ឋបាលខេត្ត មន្ទីរអង្គភាព អាជ្ញាធរ​ពាក់ព័ន្ធ​ អនុវត្តកិច្ចការរបស់ខ្លួនប្រកបដោយភាពជោគជ័យ គ្រប់បុព្វហេតុផ្ដល់នូវសេវាយុត្តិធម៌ ជូនប្រជាពលរដ្ឋ ក្នុងទឹកដីខេត្តកំពង់ចាម ។

លោក​​ កេីក​ រិទ្ធ​ រដ្ឋមន្ត្រី​ក្រសួងយុត្តិធម៌ បាន​ធ្វើ​ការ​ណែនាំ​ដល់​ ​មន្ត្រី​នៃ​ក្រសួង​យុត្តិធម៌​ ជាពិសេស​លោក​ វង្ស​ ប៊ុន​វិសុទ្ធ​ ដែល​ទើប​តែ​ទទួល​ការ​តែងតាំង​ថ្មី​ ជា​ព្រះរាជអាជ្ញា​នៃ​អយ្យការ​អម​សាលា​ដំបូង​​ខេត្តកំពង់ចាម​ ត្រូវ​ខិតខំធ្វើការអនុវត្តតួនាទី ភារកិច្ច​របស់​ខ្លួនឲ្យបានត្រឹមត្រូវ ដើម្បីចូលរួមជាមួយរាជរដ្ឋាភិបាល ក្នុងការកែទម្រង់វិស័យច្បាប់ និងយុតិ្តធម៌ឲ្យកាន់តែ​មាន​ភាព​ល្អប្រសើរទ្បើង និងសំដៅធ្វើឲ្យកាន់តែទទួលបាននូវជំនឿទុកចិត្តខ្ពស់ ពីប្រជាពលរដ្ឋលើវិស័យយុតិ្តធម៌​។ ជាពិសេស​ត្រូវ​រួម​សហការ​គ្នា​ ដេីម្បី​ធ្វើ​ការ​ដោះស្រាយបញ្ហាសំណុំរឿងកកស្ទះ តាមគោលនយោបាយរបស់រដ្ឋាភិបាល ក៏ដូចជាអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន ជាប្រមុខដឹកនាំរាជរដ្ឋាភិបាល​៕SRP

ខេត្តសៀមរាប៖លោកឃឹម ហ្វីណង់
អភិបាលស្រុកបន្ទាយស្រីបានអះអាងថា សំណង់គ្មានច្បាប់ដែលបានសង់នៅអមសងខាងផ្លូវឡើងលើភ្នំគូលែន ត្រូវតែបន្តរុះរើរហូតអស់ទាំងស្រុង ព្រោះជាតំបន់ឧទ្យានជាតិ។
លោកអះអាងនេះគឺ ក្រោយរដ្ឋបាលស្រុកបានប្រជុំត្រៀមលក្ខណៈដោះស្រាយបញ្ហាវិវាទដីធ្លីដែលនៅសេសសល់ទ្រង់ទ្រាយធំ ក្នុងស្រុកបន្ទាយស្រី ដើម្បីជាមូលដ្ឋានឈានទៅដល់ការបញ្ចប់វិវាទរ៊ាំរ៉ៃជាច្រើន ដែលបានអូសបន្លាយអស់ជាយូរឆ្នាំមកហើយ។
លោកឃឹម ហ្វីណង់ អភិបាលស្រុកបន្ទាយស្រី នៅព្រឹកថ្ងៃទី២៧ខែកក្កដាឆ្នាំ២០២០នេះ បានថ្លែងតាមទូរស័ព្ទថា រដ្ឋាភិបាលកំពុងធ្វើសិក្សាកាត់ឆ្វៀលនិងផ្តល់កម្មសិទ្ធិជូនដល់ប្រជាពលរដ្ឋ ដែលបានកាន់កាប់និងអាស្រ័យផលជាក់ស្តែងយូរឆ្នាំនៅលើដីសាធារណៈរបស់រដ្ឋ។ រដ្ឋបាលស្រុកបន្ទាយស្រីចាំបាច់ត្រូវប្រុងប្រៀបប្រមូលនិងគ្រប់គ្រងរាល់ទិន្នន័យពាក់ព័ន្ធនឹងបញ្ហាដីធ្លីនេះពីថ្នាក់មូលដ្ឋានផ្ទាល់អោយបានគ្រប់ជ្រុងជ្រោយជាមុនសិន ដើម្បីចៀសវាងការឆ្លៀតឱកាសពីសំណាក់ជនខិលខូចនិងសកម្មជនដីធ្លីមួយចំនួន យកលេសនេះមកទាមទារចំណែកអោយអាជ្ញាធរដោះស្រាយជូនដែរ។
លោកហ្វីណង់បន្តថា បញ្ហាដែលរដ្ឋបាលស្រុកត្រូវតែគ្រប់គ្រងអោយបានក្នុងពេលនេះគឺ កំណត់មុខសញ្ញាជនឱកាសនិយម និងសកម្មជនដីធ្លី ដែលក្លែងបន្លំជាជនក្រីក្រ ឬគ្រាន់តែសំអាងមូលហេតុផ្សេងៗ ហើយបានកាប់រានទន្ទ្រានវាទទីដីរដ្ឋ រួចទាមទារអោយអាជ្ញាធរទទួលស្គាល់។ ទប់ស្កាត់ការរុករានទន្ទ្រានយកដីរដ្ឋថ្មីៗបន្ថែម ការដាំដំណាំ ឬសាងសង់សំណង់ថ្មីៗ ដើម្បីបំភ័ន្តភ្នែកជាការកាន់កាប់អាស្រ័យផលយូរមកហើយ។សកម្មភាពទាំងនេះ ទាំងចាស់ថ្មី នឹងត្រូវបានចាត់ទុកជាការទង្វើអនាធិបតេយ្យរំលោភច្បាប់។ ដើម្បីត្រៀមលក្ខណៈទុកជាមុនរដ្ឋបាល ស្រុកបានតម្រូវអោយមេភូមិ មេឃុំ សហការជាមួយតំណាងរដ្ឋបាលព្រៃឈើ និងតំណាងក្រសួងបរិស្ថានចុះស្រង់ទិន្នន័យ។ ពលរដ្ឋដែលអាចនឹងត្រូវបានកាត់ឆ្វៀលនិងផ្តល់កម្មសិទ្ធិជូនបានពីសំណាក់រាជរដ្ឋាភិបាល ដោយផ្តល់អាទិភាពចម្បងទៅលើលក្ខណៈវិនិច្ឆ័យចំនួន០៤ .ការកាន់កាប់អាស្រ័យផលជាក់ស្តែងយូរមកហើយ.ដីដែលមិនមានទំនាស់.ដីដែលមានឯកសារបញ្ជាក់ពីរយៈពេលកាន់កាប់ និងអត្តសញ្ញាណច្បាស់លាស់.ការកាន់កាប់អាស្រ័យផលលើដីទំហំតូចៗជាលក្ខណៈគ្រួសារ។
អភិបាលស្រុកថ្លែងបញ្ជាក់ថា បើទោះបីជាត្រូវសិក្សាដើម្បីដោះស្រាយទំនាស់រ៉ាំរ៉ៃ ដែលអូសបន្លាយច្រើនឆ្នាំនៅក្នុងស្រុកនេះ ប៉ុន្តែចំពោះសំណង់ខ្ទមនិងផ្ទះ ដែលសាងសង់អមសងខាងផ្លូវឡើងទៅ លើខ្នងភ្នំគូលែនខុសច្បាប់ទាំងនោះ គឺនៅតែបន្តរុះរើចេញរហូតអស់ទាំងស្រុង។ ពីព្រោះតំបន់នោះជាឧទ្យានជាតិភ្នំគូលែន។ កាលពីកន្លងទៅ រដ្ឋបាលស្រុកបានចាត់វិធានការរុះរើអស់៤៩ខ្នងរួចមកហើយ។ ចឹងទេសំណង់ដែលនៅសល់ មិនថាតូចឬធំ ផ្ទះឬខ្ទម គឺត្រូវតែចាត់វិធានការ។
បើតាមលោកឃឹម ហ្វីណង់រយ:ពេល០៩ខែ ក្នុងអាណត្តិដែលរូបលោក ជាអភិបាលស្រុក មិនមានការសាង សង់ថ្មីនោះទេ។ សំណង់ខុសច្បាប់ដែលរីករាលទាំង នោះ គឺកើតមុនពេលរូបលោក ជាអភិបាលស្រុកបន្ទាយស្រី៕SRP