ខេត្តសៀមរាប – Page 99

ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថាមេភូមិជ្រៃ ឃុំខ្ចាស់ ស្រុកសូទ្រនិគម ខេត្តសៀមរាបបានស្លាប់បាត់បង់ជីវិតភ្លាមៗ ខណៈកំពុងបើកម៉ូតូត្រូវបានរថយន្តដឹកសំរាមបុកចំពេញទំហឹង។

ហេតុការណ៍នេះបានកើតឡើងតាមបណ្ដោយផ្លូវជាតិលេខ ៦ ត្រង់ចំណុមុខការាស់សាំង ចេង ប៊ុនអៀង ស្ថិតនៅភូមិស្វាយជ័យ ឃុំត្រពាំងធំស្រុកប្រាសាទបាគងខេត្តសៀមរាប វេលាម៉ោង១និង៣៥នាទីរសៀល ថ្ងៃទី១៧ ខែមករា ឆ្នាំ២០២២។

មន្ត្រីនគរបាលចរាចរណ៍នៅកន្លែងកើតហេតុបានប្រាប់ថា ភាគីរថយន្តដឹកសំរាមធ្វើដំណើរពីទិសខាងកើតទៅទិសខាងលិច បានបុកនឹងម៉ូតូដែលធ្វើដំណើរពីទិសខាងលិចមកទិសខាងកើត ក្នុងទិសដៅបញ្ច្រាស់គ្នា។

ទោះជាយ៉ាងណាមន្ត្រីនគរបាលចរាចរណ៍មិនបានព័ត៌មានលម្អិតចំពោះហេតុការណ៍គ្រោះថ្នាក់ចរាចរណ៍នេះនៅឡើយទេ។ ប៉ុន្តែលោកលឹម សម្បត្តិ អធិការស្រុកប្រាសាទបាគង បានបញ្ជាក់នៅលើប្រព័ន្ធតេឡេក្រាមថា ជនបង្កភាគីខាងរថយន្តត្រូវបានសមត្ថកិច្ចឃាត់ខ្លួនភ្លាមៗក្រោយបង្កហេតុ។

របាយការណ៍របស់ចរាចរណ៍បានបញ្ជាក់ថា
រថយន្តមួយគ្រឿងពណ៌ខៀវគ្មានផ្លាកលេខ(ក្រុមហ៊ុនដឹកសំរាមកាយ៉ា)បើកបរដោយឈ្មោះថម ឡាក់ ភេទប្រុស អាយុ៤០ឆ្នាំ នៅភូមិប្រិយ៍ ឃុំខ្នារសណ្តាយ ស្រុកបន្ទាយស្រីខេត្តសៀមរាប មានទិសដៅពីកើតទៅលិច ដល់ចំណុចកើតហេតុខាងលើបានរ៉េចង្កូតទៅបុកនឹងម៉ូតូមួយគ្រឿងម៉ាកហុងដាទ្រីម.សេ១២៥ពណ៌ខ្មៅ ផ្លាកលេខកំពង់ចាម១E៧៧៥០ បើកបរដោយឈ្មោះចឹង ម៉ី ភេទប្រុស អាយុ៥៦ឆ្នាំ មេភូមិជ្រៃ ឃុំខ្ចាស់ ស្រុកសូទ្រនិគម ខេត្តសៀមរាបបើកបរមានទិសដៅពីលិចទៅកើត ស្លាប់នៅនឹងកន្លែង។ ករណីចរាចរណ៍នេះ អ្នកបើកបររថយន្តសមត្តកិច្ចឃាត់ខ្លួនរៀបចំសំណុំរឿងតាមនិតិវិធីច្បាប់។មូលហេតុអ្នកបើកបររថយន្តដឹកសំរាមបើកបរមិនប្រកាន់ស្តាំ។ វត្ថុតាងទាំង២យកមករក្សាទុកនៅអធិការស្រុករង់ចាំដោះស្រាយតាមច្បាប់៕SRP

ខេត្តសៀមរាប៖គេហទំព័រសៀមរាបប៉ុស្ដិ៍ ធីវី អនឡាញ បានបើកកិច្ចប្រជុំលើកទី២របស់ខ្លួន ដើម្បីលើកទិសដៅការងាររបន្តឆ្នាំ២០២២។

កិច្ចប្រជុំធ្វើឡើងនៅរសៀលថ្ងៃអាទិត្យទី១៦ ខែមករា ឆ្នាំ២០២២នេះ ដឹកនាំដោយលោកប៊ុត វិចិត្រ ចាងហ្វាងគេហទំព័រសៀមរាបប៉ុស្តិ៍ ធីវី អនឡាញ។

នៅក្នុងកិច្ចប្រជុំនេះក៏មានប្រកាស សមាសភាព របស់ក្រុមការងារគេហទំព័រសៀមរាបប៉ុស្តិ៍ ប្រចាំការតាមបណ្ដារខេត្តក្រុងនិងមានមតិលើកឡើងរបស់អ្នកចូលរួមនីមួយៗផងដែរ។

ក្នុងនាមអង្គភាពគេហទំព័រសៀមរាបប៉ុស្ដិ៍ ធីវី អនឡាញ លោក ប៊ុត វិចិត្រ បានថ្លែងអំណរគុណយ៉ាងជ្រាលជ្រៅ បំផុតចំពោះសមាជិក របស់សារព័ត៌មានសៀមរាបប៉ុស្ដិ៍ទាំងអស់ ដែលបានចូលរួមក្នុងការចុះយកព័ត៌មានទាន់ហេតុការណ៍នានា សម្រាប់ការផ្សាយអំពីហេតុការណ៍ផ្សេងៗនិងសមិទ្ធផល របស់ថ្នាក់ដឹកនាំ។

លោក ប៊ុត វិចិត្រ ក៏បានលើកឡើងពីផលវិជ្ជមាននិងអវិជ្ជមានមួយចំនួនសម្រាប់អ្នកយកព័ត៌មានដើម្បីជាទិសដៅការងារបន្តដោយអនុវត្តនូវវិជ្ជាជីវៈនិងក្រមសីលធម៌អ្នកសារព័ត៌មាន ឲ្យបានជាប់ជាប្រចាំ។

លោកក៏បានលើកឡើងពីអនុសាសន៍ណែនាំដ៏ខ្ពង់ខ្ពស់ពីសំណាក់រដ្ឋមន្ត្រីរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ដល់សមាជិករបស់ខ្លួនក្នុងការយកព័ត៌មាន តាមវិជ្ជាជីវៈនិងក្រមសីលធម៌។ ជាមួយគ្នានេះដែរលោកបានថ្លែងអំណរគុណចំពោះអាជ្ញាធរសមត្ថកិច្ចគ្រប់លំដាប់ថ្នាក់ដែលបានផ្ដល់កិច្ចសហការល្អជាមួយ សមាជិកអ្នកយកសារព័ត៌មានសៀមរាបប៉ុស្តិ៍ ទាំងអស់ កន្លងមកនិងស្នើសុំឲ្យអាជ្ញាធរសមត្ថកិច្ចជួយបន្តកិច្ចសហការដើម្បីបង្កលក្ខណៈងាយស្រួលដល់សមាជិកសៀមរាបប៉ុស្ដិ៍ បន្ថែមទៀត៕SRP

ខេត្តសៀមរាប៖អ្នកលក់មាន់អាំងនៅចំណុចផ្លូវជាតិលេខ៦ ក្បែរគល់ស្ពានក្អែក ស្ថិតក្នុងភូមិលលៃ ស្រុកប្រាសាទបាគង អាចរកប្រាក់ចំណូលបានពី ២០ ម៉ឺនរៀល ទៅ១លានរៀលក្នុងមួយថ្ងៃ។

ប្អូនស្រីឈ្មោះ ចាប ច្រៀប ជាអ្នកប្រកបមុខរបលក់មាន់អាំង នៅចំណុចផ្លូវជាតិលេខ៦ ក្បែរ គល់ ស្ពានក្អែក ស្ថិតក្នុងភូមិលលៃ ឃុំបាគង ស្រុកប្រាសាទបាគង បានលើកឡើងថា ការលក់មាន់អាំង និងគ្រឿងឧបភោគបរិភោគ កន្លងមកក្នុងមួយថ្ងៃៗ យើងលក់ដាច់គួរសមអាចផ្គត់ផ្គង់ជីវភាពគ្រួសារបានល្អប្រសើរជាងមុន ដែលការប្រកបមុខរបរលក់មាន់អាំងនេះ គឺប្អូនលក់អស់រយ:ពេលជាង៣ឆ្នាំមកហើយ ដែលកាលពីមុនធ្លាប់ធ្វើការនៅសណ្ឋាគារមួយ ក្នុងក្រុងសៀមរាប ប៉ុន្តែប្រាក់ខែតិចពេកមិនអាចផ្គត់ ផ្គង់ជីវភាពគ្រួសារបានប្រសើរ ដូច្នេះទើបប្អូនសម្រេចចិត្តផ្លាស់ប្តូរពីការងារ ហើយងាកមករកស៊ីការលក់មាន់អាំងវិញ។

ប្អូនស្រីឈ្មោះ ចាប ច្រៀប បានឲ្យដឹងទៀតថា ជាការពិតណាស់សម្រាប់ថ្ងៃធម្មតា ពួកយើងអាចលក់មាន់អស់ចាប់ពី ៣០ក្បាល រហូតទៅដល់ ៤០ក្បាល ក្នុងមួយថ្ងៃៗ តែបើថ្ងៃសៅរ៍ ថ្ងៃអាទិត្យ ឬក៏ថ្ងៃបុណ្យទាននានា ពួកយើងអាចលក់បានរហូតដល់ទៅចំនួន១០០ក្បាលជាងឯណោះ ដែលជាមធ្យមយើងអាចរកប្រាក់ចំណូលបានពី២០ ម៉ឺនរៀល ទៅ១លានរៀលក្នុងមួយថ្ងៃ ដែលអាចផ្គត់ផ្គង់ជីវភាពគ្រួសាររស់នៅប្រចាំថ្ងៃបានយ៉ាងសុខស្រួល។

លោក ហេង សុខលី ជាអ្នកប្រកបមុខរបលក់មាន់អាំង ដែរនោះ បានបង្ហាញនូវទស្សនៈស្រដៀងៗគ្នាថា យើងបានរកស៊ីលក់មាន់អាំងនេះ ជាច្រើនឆ្នាំមកហើយ យើងឃើញថាមុខរបមួយនេះ វាមិនស្រួលហើយក៏មិនពិបាកណាស់ណាដែរ តែយើងទទួលបានកម្រៃទៅតាមភ្ញៀវដែលមកហូបនៅទីនេះផ្ទាល់តែម្តង បើមានភ្ញៀវច្រើនយើងលក់ដាច់បានច្រើន បើតិចលក់បានតិចប៉ុណ្ណោះឯង ប្រាក់ចំណូលដែលបានមកពីការលក់មាន់អាំង គឺយើងបានបែងចែកសម្រាប់ប្រាក់ខែបុគ្គលិក សម្រាប់ឲ្យកូនរៀនសូត្រ នឹងទូទាត់ប្រាក់ដើមដែលយើងបានចំណាយទៅលើគ្រឿងឧបភោគបរិភោគ ក្រៅពីនោះ នៅសល់ប៉ុន្មាន គឺទុកធ្វើដើមទុនបន្តមុខរបនេះទៀត ។

លោក ហេង សុខលី បានបន្ថែមថា ពាក់ព័ន្ធនឹងផ្នែកសេវាកម្មនោះ គឺមិនមានអ្វីគួរឲ្យកត់សម្គាល់ឡើយ កន្លែងយើងមានការរាក់ទាក់ចំពោះភ្ញៀវជានិច្ច ជាពិសេស មានរសជាតិឆ្ងាញ់ មានតម្លៃ សមរម្យ មានអនាម័យល្អ និង បរិស្ថានល្អ ហើយសម្ភារៈសម្រាប់បម្រើឲ្យការវិចខ្ចប់នោះ គឺយើងប្រើដោយស្លឹកឈូកដ៏ប្រណិត ដែលមើលទៅគួរឲ្យទាក់ទាញ។

សូមរំលឹកថា មុខរបរលក់មាន់អាំងនេះ គឺជាមុខ របរមួយដែលអាជ្ញាធរខេត្តសៀមរាប តែង តែបានគិតគូរ និង យកចិត្តទុកដាក់ ជាពិសេស ក្នុងថ្ងៃឈប់សម្រាកសងថ្ងៃបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២០ ពីថ្ងៃទី១៧ ដល់ថ្ងៃទី២១ ខែសីហា ឆ្នាំ២០២០ រដ្ឋបាលខេត្តសៀមរាប សហការជាមួយសហភាពសហព័ន្ធយុវជនខេត្ត បានរៀបចំជាព្រឹត្តិការណ៍សម្រាកសៀមរាប ដោយមានកម្មវិធីកម្សាន្ដៗជាច្រើន ក្នុងនោះ ក៏មានកម្មវិធីប្រកួតម្ហូបអាហារ ពានរង្វាន់មាន់អាំងឆ្ងាញ់ជាងគេនៅខេត្តសៀមរាបផងដែរ។ ដោយមាន ចុងភៅមកពីតំណាង១២ ក្រុង ស្រុក បានចូលរួមប្រកួតក្នុងព្រឹត្តិការណ៍នេះ ដោយមានគណៈកម្មការដាក់ពិន្ទុផងដែរ។
ជាលទ្ធផលក្រុមចុងភៅតំណាងមកពីស្រុកបន្ទាយស្រីជាប់ចំណាត់ថ្នាក់លេខ១ , ខណ:លេខ២ បានទៅស្រុកសូទ្រនិគម និងក្រុងសៀមរាបចំណាត់ថ្នាក់លេខ៣ ហើយសម្រាប់ពានរង្វាន់ក្នុងការប្រកួតនោះ៖ ក្រុមលេខ១ ទទួលបានពាន ១ ប័ណ្ណសរសើរ ១ និងទឹកប្រាក់ ២លានរៀល ,ក្រុម លេខ២ ទទួលបានពាន១ ប័ណ្ណសរសើរ ១ និងទឹកប្រាក់ ១,៥លានរៀល និងក្រុមលេខ៣ ទទួលបាន ពាន ១ ប័ណ្ណសរសើរ ១ និងទឹកប្រាក់ ១លាន។

ប្រការដែលជាកិត្តិយសបំផុតសម្រាប់កម្មវិធីប្រកួតម្ហូបអាហារ ពានរង្វាន់មាន់អាំងឆ្ងាញ់ជាងគេនៅខេត្តសៀមរាបនោះ គឺ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអញ្ជើញចូលរួមភ្លក់រសជាតិ មាន់អាំងឆ្ងាញ់ជាងគេ ដែលជាប់ចំណាត់ថ្នាក់លេខ១ ក្នុងកម្មវិធីប្រកួតម្ហូបអាហារនោះ៕SRPអត្ថបទ និង រូបថត ៖ លោក ស៊ាន សុផាត

ខេត្តសៀមរាប៖ប៉ូលិសខេត្តសៀមរាប បានកំពុងពង្រឹងវិធានការ គ្រប់គ្រងសន្តិសុខសង្គម ឱ្យកាន់តែល្អ ដើម្បីផ្តល់ភាពកក់ក្តៅជូនប្រជាពលរដ្ឋ ភ្ញៀវទេសចរ និងក្រុមវិនិយោគិនជាតិ អន្តរជាតិ ដែលកំពុងរស់នៅប្រកបអាជីវកម្ម នៅក្នុងខេត្តទេសចរណ៍ វប្បធម៌មួយនេះ។

មេប៉ូលិសខេត្តសៀមរាប លោកតេង ច័ន្ទណាត បានថ្លែងប្រាប់អ្នកសារព័ត៌មានថា ស្នងការដ្ឋាននគរបាលខេត្តសៀមរាប បានដាក់ផែនការដល់អធិការក្រុងស្រុក ក៏ដូចជាមេប៉ុស្តិ៍នៅទូទាំងខេត្តសៀមរាប ឱ្យអនុវត្តនូវគោលនយោបាយភូមិឃុំមានសុវត្ថិភាព ដើម្បីពង្រឹងការថែរក្សាសន្តិសុខសណ្តាប់ធ្នាប់ និងសុវត្ថិភាពជូនប្រជាពលរដ្ឋ ពិសេសអ្នកទេសចរដែលមកលេងកម្សាន្តនៅក្នុងខេត្តនេះ។

លោកតេង ច័ន្ទណាត ថ្លែងបន្តថា កម្លាំងប៉ូលិសនៅទូទាំងខេត្តសៀមរាប បានប្រចាំការសម្រាប់ការងាររបស់ខ្លួន២៤ម៉ោង លើ២៤ម៉ោង ព្រមទាំងការដើរល្បាត និងការផ្ដល់សេវាសាធារណៈផ្សេងៗ និងការដាក់បញ្ចូលនូវប្រព័ន្ធទូរស័ព្ទ hot line នៅតាមទីសាធារណៈ តាមផ្ទះសំណាក់ ឬ តាមសណ្ឋាគារ និងរមណីយដ្ឋាននានា ដើម្បីបង្កលក្ខណៈងាយស្រួល ក្នុងការឆ្លើយតប ឬ កិច្ចអន្តរាគមន៍ ជួយប្រជាពលរដ្ឋ និងភ្ញៀវទេសចរឱ្យបានទាន់ពេលវេលា ក្នុងពេលដែលមានបញ្ហាមិនប្រក្រតីផ្សេងៗ ដូចជា បទល្មើសចោរឆក់ ប្លន់ គ្រឿងញៀន ក្មេងទំនើង ដែលកើតឡើងក្នុងខេត្ត។

លោកស្នងការបន្តថា ការពង្រឹងវិធានការការពារសន្តិសុខសណ្ដាប់ធ្នាប់ជូនប្រជាពលរដ្ឋ ភ្ញៀវទេសចរ និងក្រុមវិនិយោគិនជាតិ អន្តរជាតិនេះមានសារៈសំខាន់ណាស់ ព្រោះវាផ្ដល់ភាពកក់ក្តៅជូនដល់ពួកគាត់ ឱ្យមកវិនិយោគឬក៏បំពេញការងារផ្សេងៗនៅក្នុងខេត្ត ប្រកបដោយសុវត្ថិភាព។

លោកថ្លែងដូច្នេះថា៖«គឺយើងធ្វើការផ្សព្វផ្សាយនិងចែកលិខិត ទៅកាន់ម្ចាស់សណ្ឋាគារឬក្រុមហ៊ុនឯកជន ផ្ទះសំណាក់ និងទីតាំងអាជីវកម្មគ្រប់ប្រភេទដែល មានម្ចាស់ជាជនជាតិខ្មែរឬជនបរទេសដែលរស់នៅក្នុងទឹក ដីខេត្តសៀមរាប នេះ ដើម្បីធ្វើការអន្តរាគមន៍ បានទាន់ពេលវេលា នៅពេលដែលពួកគាត់មានលេខទូរសព្ទរបស់កងកម្លាំងយើងនេះ។ ហើយជាប្រចាំយើងក៏បានត្រួតពិនិត្យរុករកអាវុធគ្រឿងផ្ទុះនៅតាមភូមិសាស្រ្តមួយចំនួន ដែលអាចនឹងបង្កបញ្ហាផ្សេងៗកើតឡើង ហើយយើងក៏បំផុសឱ្យប្រជាពលរដ្ឋ គ្រប់មជ្ឈដ្ឋានចូលរួមរាយការណ៍អំពីសកម្មភាពល្មើសច្បាប់ ហើយយើងក៏បានធ្វើការចូលរួមបំផុសចលនាប្រជាការពារ ដែលជាជំនួយសមត្ថកិច្ច ដើម្បីធ្វើការថែរក្សាសន្តិសុខនិងសណ្ដាប់ធ្នាប់។ ក្នុងនោះយើងក៏បើកទ្វារទៅរដ្ឋបាលប៉ុស្តិ៍ ២៤ម៉ោងលើ ៧ ថ្ងៃដើម្បីទទួលព័ត៌មាននិងពាក្យបណ្ដឹងផ្សេងៗពីប្រជាពលរដ្ឋ ហើយក៏សហការជាមួយអង្គភាពពាក់ព័ន្ធ ដើម្បីការពារតំបន់រមណីយដ្ឋាន ដែលជាកន្លែងទស្សនកិច្ចរបស់ភ្ញៀវជាតិនិងអន្តរជាតិ»។

បើតាមលោកកតេង ច័ន្ទណាត ក្រៅពីស្នងការដ្ឋាននគរបាលខេត្តសៀមរាប មេបញ្ជាការដ្ឋានកងរាជអាវុធហត្ថ សឹករងខេត្ត ដែលជាកម្លាំងក្នុងចំណុះគណៈបញ្ជាការឯកភាព ខេត្តសៀមរាប រួមទំាងមានអង្គភាពពីរដែលស្ថិតនៅក្រោមចំណុះ អគ្គស្នងការនគរបាលជាតិ នៅក្នុងទឹកដីខេត្តសៀមរាប ដោយ ទី១គឺនាយកដ្ឋានការពារបេតិកភណ្ឌ និងទី២ គឺនគរបាលទេសចរណ៍ បានធ្វើការយ៉ាងស្អិតល្មួតជាមួយកងកម្លាំងនគរបាលខេត្តសៀមរាប ក្នុងការថែរក្សាសុខសុវត្ថិភាព ជូនភ្ញៀវជាតិនិងអន្តរជាតិ ក៏ដូចជាការថែរក្សាកន្លែងមណ្ឌលវប្បធម៌ឬក៏ទីកន្លែងប្រាសាទនានានៅក្នុងខេត្តសៀមរាបផងដែរ៕

ខេត្តសៀមរាប៖តុលាការបានកោះហៅមនុស្ស ៩នាក់អោយចូលខ្លួនបំភ្លឺរឿងជម្លោះដីធ្លី ក្រុមអ្នកភូមិលើកគ្នាប្រមាណជិត៤០នាក់មកកាន់តុលាការ។
ក្រុមអ្នកភូមិដែលបានលើកគ្នាមកកាន់តុលាការសៀមរាប នៅរសៀលថ្ងៃទី១៣ខែមករាឆ្នាំ២០២២នេះ បានអោយដឹងថា ការដែលពួកគាត់លើគ្នាមកនេះ គឺក្នុងគោលដៅផ្តល់កម្លាំងចិត្តដល់អ្នកទទួលដីការតែប៉ុណ្ណោះ គឺមិនមែនមកប្រឆាំងឬតវ៉ានិងអំណាចដីកានោះឡើយ។ ប៉ុន្តែក្នុងករណីតុលាការសាកសួរហើយមិនអោយចេញមកវិញ(ឃុំខ្លួន)ពួកគាត់ទាំងអស់ក៏មិនវិលទៅផ្ទះវិញដែរ គឺសុខចិត្តដេកនៅទីនោះរហូតមានការដោះលែង។ ចំពោះឈ្មោះដែលត្រូវបានកោះហៅមានរហូត១៨នាក់ តែសម្រាប់ថ្ងៃទី១៣ ខែមករា ឆ្នាំ២០២២នេះ ត្រូវចូលខ្លួនតែ៩នាក់។ អីចឹងទេក្នុងសំណុំរឿងជម្លោះដីធ្លីនេះ ពួកគាត់មានការបារម្ភយ៉ាងខ្លាំងចំពោះផ្លូវតុលាការ។ ពីព្រោះថា ក្នុងដីកាបានចោទពីបទ ធ្វើអោយខូចខាតដោយចេតនា។ ហេតុដូច្នេះពួកគាត់លើកគ្នាមកកាន់តុលាការនេះ ក្រៅពីផ្តល់កម្លាំងចិត្តដល់អ្នកចូលបំភ្លឺ ពួកគាត់ក៏ទទូចសុំស្ថាប័នពាក់ព័ន្ទក៏ដូចជាថ្នាក់លើកំពូលៗមេត្តាជួយដោះ ស្រាយដោយក្ដីអនុគ្រោះ។

ក្រុមអ្នកភូមិបានអោយដឹងទៀតថា ដីទំនាស់រាំរ៉ៃនេះមានទំហំ៤១០ហិកតា ស្ថិតក្នុងភូមិស្រះខ្វាវ ឃុំត្បែង ស្រុកបន្ទាយស្រី ខេត្តសៀមរាប បច្ចុប្បន្នពលរដ្ឋ ៣០២គ្រួសារកំពុងរស់នៅនិងអាស្រ័យផល។ ដីនេះផ្តើមមានទំនាស់ ជាមួយខាងយោធា និងខាងបរិស្ថានចាប់ពីឆ្នាំ២០០៣មក។ កាលពីឆ្នាំ១៩៨៧រហូតឆ្នាំ ២០០២ ពួកគាត់គ្រប់គ្រងច្រើនរយហិកតា លុះឆ្នាំ ២០០៣ អាជ្ញាធរបានដកហូតមួយចំនួន ដើម្បីដាំដើមឈើធ្វើឧទ្យានជាតិ ដោយនៅសល់៤១០ហិកតាដែលពួកគាត់៣០២គ្រួសារ គ្រប់គ្រងអាស្រ័យផល។ ប៉ុន្តែថ្មីៗ នេះ ក៏លេចឈ្មោះ លី ស្រី ភេទស្រីជាដើមបណ្តឹងទៅវិញ។ ហេតុផលដូច្នេះហើយ ដែលពួកគាត់ទទូចសុំអោយថ្នាក់លើ ក៏ដូចជាស្ថាប័នពាក់ព័ន្ធជួយដោះ ស្រាយ ពីព្រោះពួកគាត់ធ្លាប់ដាក់ពាក្យសុំអន្តរាគមន៍ ទៅសម្តេច ហេង សំរិន ប្រធានរដ្ឋសភា រួចហើយ។យោងតាមលិខិតរដ្ឋសភាលេខ០១៣.សរ.គ១ ដែលបានជម្រាបជូនអភិបាលខេត្តសៀមរាបបញ្ជាក់ថា គណ:កម្មការសិទ្ធិមនុស្សទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា សូមបញ្ជូនសំណុំរឿងនេះជូនអភិបាលខេត្តពិនិត្យនិងដោះស្រាយតាមការគួរ ហើយផ្តល់លទ្ធផលនៃការដោះស្រាយមកគណ:កម្មការ ដើម្បីមានមូលដ្ឋានជម្រាបជូនម្ចាស់សំណើរវិញ។

ជុំវិញករណីនេះ សារព័ត៌មានសៀមរាបប៉ុស្ដិ៍ នៅពុំទាន់ទទួលបានការបំភ្លឺ ពីឈ្មោះ លី ស្រី ភេទស្រីជាដើមបណ្តឹង នៅឡើយទេ៕SRP

Sponsored

ខេត្តសៀមរាប៖ប៉ូលិសខេត្តសៀមរាបបានបដិសេធចំពោះព័ត៌មានចុះផ្សាយថាមានល្បែងស៊ីសង online រីកដូចផ្សិតនៅក្រុងសៀមរាប។

អ្នកនាំពាក្យស្នងការនគរបាលខេត្តសៀមរាបនៅរសៀលថ្ងៃទី ១៣ ខែមករាឆ្នាំ ២០២២នេះបានឲ្យដឹងថា ៖កន្លងទៅថ្មីៗនេះ មានសារព័ត៌មាន ដើមរាំង Dermrang News បានបង្ហោះនៅតាមបណ្ដាញទំនាក់ទំនងសង្គម ដែលមានខ្លឹមសារថា៖ ល្បែង អនឡាញ រីកដូចផ្សិតនៅក្នុងក្រុងសៀមរាប កំពុងពង្វក់ស្មារតីសិស្សានុសិស្ស ពលរដ្ឋឲ្យចូលលេងភ្លុកទឹក ភ្លុកដី។

អ្នកនាំពាក្យបានបន្តថា បន្ទាប់ពីទទួលបានព័ត៌មាន លោកតេង ច័ន្ទណាត ស្នងការខេត្តសៀមរាប បញ្ជាឲ្យលោក ដា ចំរើន អធិការនគរបាលក្រុងសៀមរាប ដើម្បីចុះស្រាវជ្រាវជាបន្ទាន់ ដែលជាលទ្ធផលទទួលបានមានដូចខាងក្រោម៖

ជាក់ស្ដែងកាលពីថ្ងៃទី០៤ ខែមករា ឆ្នំា២០២២ កម្លាំងរបស់ ប៉ុស្ដិ៍នគរបាលរដ្ឋបាលសង្កាត់ស្វាយដង្គំ និងប៉ុស្ដិ៍នគរបាលរដ្ឋបាលស្លក្រាម នៃអធិការដ្ឋាននគរបាលក្រុងសៀមរាប បានចុះទៅកាន់បណ្ដាទីតាំងទាំង៤កន្លែងដែលសារព័ត៌មាន ដើមរាំង បានចុះផ្សាយ មានដូចជា៖ទីតាំងទី ១: ក្បែរស្ដុប ទន្លេសាប
ទីតាំងទី ២: នៅក្បែរផ្លូវលោកតាណឺយ ទីតាំងទី ៣: នៅផ្លូវបាក់ខែងទីតាំងទី ៤: នៅក្នុងបុរីមួយកន្លែង ទល់មុខផ្សារសាមគ្គី។

អ្នកនាំពាក្យបានបញ្ជាក់ថា ក្រោយពីបានចុះពិនិត្យជាក់ស្ដែងរបស់សមត្ថកិច្ចមូលដ្ឋាន រួមមកគឺ ពុំមានការបើកល្បែងស៊ីសងខុសច្បាប់ ភ្នាល់តាមប្រព័ន្ធ អនឡាញ ដូចអ្វីដែលសារព័ត៌មាន បានចុះផ្សាយតាមFacebook នោះទេ។

ទន្ទឹមនឹងនេះដែរ ស្នងការដ្ឋាននគរបាលខេត្តសៀមរាប សូមថ្លែងអំណរគុណយ៉ាងអនេកចំពោះប្រជាពលរដ្ឋ អ្នកសារព័ត៌មាន អ្នកនិយមតាមដានព័ត៌មានតាមបណ្ដាទំនាក់ទំនងសង្គម ដែលតែងតែចូលរួមផ្ដល់ព័ត៌មាន ពាក់ព័ន្ធទៅនឹង សកម្មភាពល្មើសច្បាប់ បទល្មើសគ្រប់ប្រភេទ ដែលកើតមានឡើងនៅតាមមូលដ្ឋានក្នុងន័យដើម្បីចូលរួមចំណែក ក្នុងការអនុវត្តគោលនយោបាយ ភូមិ-ឃុំ-សង្កាត់ មានសុវត្ថិភាពរបស់រាជរដ្ឋាភិបាលកម្ពុជា៕SRP

ខេត្តសៀមរាប៖លោក ង៉ាន់ ភិរុណ អភិបាលរងខេត្តសៀមរាប និងជាអនុប្រធានក្រុមការងាររាជរដ្ឋាភិបាល ចុះមូលដ្ឋានស្រុកបន្ទាយស្រី បានស្នើស្នេីសុំឲ្យសមាជិក សមាជិកា នៃក្រុមការងារទាំងអស់ រៀបចំវេទិកាសាធារណៈ តាមគោលដៅឃុំនីមួយៗ ដេីម្បីដោះស្រាយសំណួរ សំណូមពរ និងបំពេញតម្រូវការជាក់ស្តែងរបស់ពលរដ្ឋរស់នៅក្នុងមូលដ្ឋានផ្ទាល់ និងជំរុញដល់រដ្ឋបាលស្រុកបន្ទាយស្រី ត្រូវដោះស្រាយនូវបញ្ហា និងក្តីកង្វល់របស់ប្រជាពលរដ្ឋជាម្ចាស់សំណួរ និងសំណូមពរដោយឈរលើគោលការណ៍រួម និងអនុវត្តតាមគោលនយោបាយឈ្នះឈ្នះ។

លោក ង៉ាន់ ភិរុណ បានបន្តថាការប្រឹងប្រែងស្តាឡើងវិញនូវវិស័យទេសចរណ៍នៅក្នុងស្រុកដើម្បីកាត់បន្ថយផលប៉ះពាល់ពីបញ្ហាវិបត្តិកូវីដ-១៩ មកលើជីវភាពរស់នៅប្រចាំថ្ងៃរបស់ប្រជាពលរដ្ឋដែលពឹងផ្អែកប្រាក់ចំណូលមកពីវិស័យទេសចរណ៍។ ក្នុងនោះវិធានការចំពោះការរំលោភបំពានដីរដ្ឋដែលមិនត្រូវបានចាត់បញ្ចូលទៅក្នុងបញ្ជីស្នើសុំកាត់ឆ្វៀល ជាពិសេសនៅក្នុងបរិវេណជើងភ្នំគូលែន។

លោកក៏បានស្នើសុំជាថ្មីម្តងទៀតទៅអាជ្ញាធរជាតិអប្សរាដើម្បីអនុញ្ញាតឱ្យគម្រោងមូលនិធិបឹងទន្លេសាបអាចសាងសង់ផ្លូវបេតុង និងផ្លូវកៅស៊ូនៅក្នុងភូមិថ្នល់ទទឹង និងភូមិថ្នល់បណ្តោយ នៃឃុំព្រះដាក់។

បើតាម លោក ង៉ាន់ ភិរុណ ចំពោះបញ្ហាណាដែលថ្នាក់ស្រុកដោះស្រាយមិនបាន ឬហួសសមត្ថកិច្ចរបស់ស្រុក រដ្ឋបាលស្រុកត្រូវលើកបញ្ហានេះជូនថ្នាក់ដឹកនាំពិនិត្យ និងដោះស្រាយ ជៀសវាងទុកបញ្ហានៅនឹងកន្លែង ដែលធ្វើឱ្យមានការថ្នាំងថ្នាក់រវាងប្រជាពលរដ្ឋជាមួយនឹងអាជ្ញាធរ។

លោកមានប្រសាសន៏យ៉ាងដូច្នេះក្នុងកិច្ចប្រជុំបូកសរុបលទ្ធផល ការងារប្រចាំឆ្នាំ២០២១ និងលេីកទិសដៅបន្តសម្រាប់អនុវត្តការងារឆ្នាំ២០២២ របស់ក្រុមការងាររាជរដ្ឋាភិបាលចុះមូលដ្ឋានស្រុកបន្ទាយស្រី នៅរសៀលថ្ងៃពុធ ទី១២ ខែមករា ឆ្នាំ២០២២ ម្សិលមិញ៕SRP

ខេត្តសៀមរាប៖លោកគុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប នៅថ្ងៃទី ១២ ខែមករា ឆ្នាំ២០២២ បានចូលរួមរំលែកទុក្ខដ៏ក្រៀមក្រំជាមួយក្រុមគ្រួសារសព ដែលជាក្រុមការងារកម្ទេចមីនរបស់អង្គការដោះមីនកម្ពុជា ដែលជួបឧបទ្ទេវហេតុក្នុងករណីផ្ទុះគ្រាប់មីនតោនកាលពីថ្ងៃទី១០ ខែមករា ឆ្នាំ២០២២ បណ្ដាលឱ្យស្លាប់បាត់បង់ជីវិត៣នាក់ នៅភូមិសែនតេជៈ ឃុំមរតក ស្រុកជាំក្សាន្ត ខេត្តព្រះវិហារ។

ក្នុងចំណោមអ្នកស្លាប់ចំនួន ៣រូប ក្នុងនោះមានអ្នករស់នៅខេត្តសៀមរាប ២នាក់ ដែលមានអត្តសញ្ញាណដូចខាងក្រោម ៖

១- លោក ម៉ា ស៊ីម៉េត អាយុ៣៣ឆ្នាំ រស់នៅភូមិប៉ោយស្មាច់ ឃុំតាយែក ស្រុកសូទ្រនិគម ខេត្តសៀមរាប។

២. លោក ម៉ន ចក់ អាយុ ៣៧ឆ្នាំ រស់នៅភូមិសំរោងត្បួង ឃុំសំរោង ស្រុកសូទ្រនិគម ខេត្តសៀមរាប។

ក្នុងទិដ្ឋភាពដ៏សោកសង្រេងនិងក្ដុកក្ដូលនាពេលនេះ លោក គុជ លីណា ក្នុងនាមគណៈកម្មាធិការសាខា ក្រុមប្រតិបតិ្ត អ្នកស្ម័គ្រចិត្ត និងយុវជនកាកបាទក្រហមកម្ពុជា សូមចូលរួមរំលែកមរណទុក្ខយ៉ាងក្រៀមក្រំជាទីបំផុតជាមួយក្រុមគ្រួសារជនរងគ្រោះ និងសាច់ញាតិទាំងអស់នៃសព ដែលពួកគាត់បានជួបនូវឧបទ្ទេវហេតុអាក្រក់មួយនេះ ហើយយើងខ្ញុំទាំងអស់គ្នា ពិតមានក្តីក្តុកក្តួលរំជួលចិត្តឥតឧបមា បន្ទាប់ពីបានទទួលដំណឹងដ៏សែនក្រៀមក្រំបំផុត ចំពោះមរណភាពរបស់ពួកគាត់។

ក្នុងថ្នាក់ដឹកនាំគ្រប់លំដាប់ថ្នាក់ យើងខ្ញុំនឹងចងចាំនូវគម្រូវីរភាពដ៏អង់អាចក្លាហានរបស់លោក ដែលបានបំពេញការងារមនុស្សធម៌ និងសង្គ្រោះជីវិតមនុស្សឱ្យរួចផុតពីការគំរាមកំហែងដោយសារគ្រាប់មីនរយៈកាលកន្លងមក។

លោកក៏បានលើកទឹកចិត្តដល់ក្រុមគ្រួសារសពសូមអស់សង្ឃឹម ត្រូវបន្តប្រកបរបរចិញ្ចឹមជីវិតប្រចាំថ្ងៃ និងមើលថែកូនៗដើម្បីឱ្យពួកគាត់មានអនាគតតទៅថ្ងៃមុខ និងសូមបួងសួងដល់វិញ្ញាណក្ខន្ធនៃសព បានទៅកាន់សុគតិភពកុំបីខានឡើយ។

ក្នុងនោះសាខាកាកបាទក្រហមខេត្តក៏បាននាំយកអំណោយមនុស្សធម៌ចូលរួមបុណ្យ ក្នុង១សពមាន៖ អង្ករ៣០គីឡូក្រោម មី១កេស ត្រីខ១យួរ មុង១ ភួយ១ សារុង១ ក្រមា១ និងថវិកា២លានរៀលផងដែរ៕SRP

ខេត្តសៀមរាប៖លោកទៀ សីហា បានចេញថ្លៃសេវាពិនិត្យសុខភាពជូនមគ្គុទ្ទេសក៍ទេសចរណ៍ចំនួន៥១១៧នាក់ សម្រាប់បន្តអាជ្ញាប័ណ្ណមគ្គុទេសក៍ទេសចរណ៍ក្នុងឆ្នាំ២០២២នេះ។

អភិបាលខេត្តសៀមរាប លោកទៀ សីហា បានមានប្រសាសន៍ថាលោកនឹងជួយដោះស្រាយជូនមួយចំនួនដូចជា ការបន្តអាជ្ញាប័ណ្ណសម្រាប់ឆ្នាំ២០២២ ដោយមិនបាច់បង់ប្រាក់ព្រោះខាងមន្ទីរជំនាញបានស្នើទៅថ្នាក់លើរួចហើយរង់ចាំការសម្រេច។ ដោយឡែកចំពោះការពិនិត្យសុខភាពសម្រាប់យកអាជ្ញាប័ណ្ណមកបន្តដោយម្នាក់ៗត្រូវបង់១០ដុល្លារ លោកនឹងចេញថ្លៃសេវាជំនួសសម្រាប់បងប្អូនមគ្គុទ្ទេសក៍ទេសចរណ៍ជាង៥ពាន់១១៧នាក់ ស្រី៧០៩នាក់ ដោយឡែកសម្រាប់ ប័ណ្ណ (ប.ស.ស ) មន្រ្តីជំនាញនឹងពិភាក្សាមើលអំពីលិខិតបទដ្ឋាន ដើម្បីពិនិត្យលទ្ធភាពជូន។

ការចេញថ្លៃសេវាពិនិត្យសុខភាពនេះ នៅក្នុងឱកាសជួបសំណេះសំណាលជាមួយបងប្អូនមគ្គុទ្ទេសក៍ទេសចរណ៍ នៅថ្ងៃទី១១ខែមករា នេះ។

សូមជម្រាបថា ក្នុងឱកាសជួបអភិបាលខេត្ត តំណាងសមាគមមគ្គុទ្ទេសក៍ទេសចរណ៍នីមួយៗ បានស្នើសុំមិនឱ្យយកកម្រៃលើការបន្តអាជ្ញាប័ណ្ណសម្រាប់ឆ្នាំ២០២២ ស្នើសុំមិនបាច់បង់លុយពិនិត្យសុខភាព សម្រាប់យកមកបន្តអាជ្ញាប័ណ្ណ ស្នើសុំឲ្យមានការផ្តល់ប័ណ្ណ(ប.ស.ស) ស្នើឱ្យមានការផ្តល់ប្រាក់១ខែ៤០ដុល្លារដូចបុគ្គលិកសណ្ឋាគារជាដើម។

លោកទៀ សីហា បានមានប្រសាសន៍ថា ដោយសារតែវិបត្តិនៃជំងឺរាតត្បាតកូវីដ-១៩ នៅក្នុងរយៈពេល២ឆ្នាំមកនេះ មគ្គុទ្ទេសក៍ទេសចរណ៍នៅតំបន់អង្គរ បានជួបការលំបាកយ៉ាងខ្លាំងផ្នែកជីវភាព ដោយសារតែគ្មានភ្ញៀវទេសចរមកកម្សាន្ត ដោយអ្នកខ្លះបានងាកទៅរកការងារផ្សេងៗធ្វើ ដើមី្បផ្គត់ផ្គង់ជីវភាពគ្រួសារ ដោយខ្លះធ្វើជាកម្មករសំណង់ អ្នកខ្លះរត់ម៉ូតូឌុប និងរបរផ្សេងៗទៀតជាដើម។ ដោយមានការយកចិត្តទុកដាក់ខ្ពស់ពីសុខទុក្ខប្រជាពលរដ្ឋ សម្តេចតេជោ នាយករដ្ឋមន្ត្រីបានប្រើយុទ្ធនាការស្រោចវ៉ាក់សាំងទូទាំងប្រទេសទើបធ្វើឱ្យស្ថានភាពកូវីដមានភាពធូស្រាលបន្តិច ព្រមទាំងបើកប្រទេសឡើងវិញ ហើយភ្ញៀវទេសចរក្នុងស្រុកក៏បានចាប់ផ្តើមដើរកម្សាន្តតាមរមណីយដ្ឋាននានា ហើយសម្រាប់ភ្ញៀវទេសចរជាតិ និងបរទេសនៅក្នុងស្រុកដែលបានមកកម្សាន្តនៅតាមប្រាសាទនានាក្នុងរមណីយដ្ឋានអង្គរ ក៏ងាកមកប្រើប្រាស់សេវា មគ្គុទ្ទេសក៍ទេសចរណ៍ ក្នុងពន្យល់បកស្រាយអំពីប្រាសាទនិមួយៗផងដែរ។ ការប្រើប្រាស់សេវានេះ ធ្វើឱ្យបងប្អូនមគ្គុទ្ទេសក៍ទេសចរណ៍រកចំណូលបានខ្លះៗឡើងវិញ ប៉ុន្តែមគ្គុទ្ទេសក៍ទេសចរណ៍បានប្រែមកជាអង្គុយរង់ចាំភ្ញៀវដែលគេត្រូវការមគ្គុទ្ទេសក៍ទេសចរណ៍ នៅតាមក្រោមម្លប់ឈើតាមផ្លូវចូលទៅប្រាសាទ ឬអាចនិយាយថា អង្គុយចាំចាប់ម៉ូយ ទៅតាមលទ្ធភាពរៀងៗខ្លួន។ សកម្មភាពភាពទាំងនេះ ធ្វើឱ្យមានការពិបាកមើល ចំពោះបងប្អូនដែលគ្មានទីតាំងប្រចាំការច្បាស់លាស់ ក្នុងការបម្រើសេវាជូនដល់ភ្ញៀវក្នុងស្រុក ដែលមកទស្សនា ដើម្បីដឹងនិងយល់ពីជីវប្រវត្តិ និង អត្ថន័យនៃរូបចន្លាក់តាមជញ្ជាំងប្រាង្គប្រាសាទ។

អភិបាលខេត្តបានបន្តថា ដើម្បីជួយដល់មគ្គុទ្ទេសក៍ទេសចរណ៍ នៅក្នុងគ្រាលំបាកនេះ លោកមានគម្រោងជួបពិភាក្សាជាមួយអាជ្ញាធរជាតិអប្សរា រៀបចំឲ្យមានកន្លែងមួយសមរម្យនៅគ្រប់ប្រាសាទដោយដាក់ថា កន្លែងផ្តល់សេវាមគ្គុទ្ទេសក៍ទេសចរណ៍ ដើម្បីភាពងាយស្រួលដល់សមាគមមគ្គុទ្ទេសក៍ទេសចរណ៍នីមួយៗរៀបចំសមាជិក របស់ខ្លួនឱ្យទៅនៅផ្តល់សេវាទីនោះ ដោយមានការប្តូរវេនគ្នា។ ការរៀបចំបែបនេះ ងាយស្រួលដល់ភ្ញៀវទេសចរ ដែលត្រូវការសេវាមគ្គុទ្ទេសក៍ទេសចរណ៍ គេទៅរក និង មានសណ្តាប់ល្អទៀតផង។

លោកក៏បានជំរុញឱ្យបងប្អូនបានទៅទទួលការចាក់វ៉ាក់សាំងដូលទី៣ (ដូសជំរុញ) ឱ្យបានគ្រប់ៗគ្នា និងបន្តអនុវត្តវិធានការ ៣កុំ ៣ការពារ ព្រមទាំងសម្របខ្លួនរស់នៅតាមគន្លងបែបថ្មី។

នាឱកាសសំណេះសំណាល លោកក៏បានផ្តល់ស្បៀងអាហារមួយចំនួនដល់មគ្គុទ្ទេសក៍ទេសចរណ៍ ដែលបានចូលរួមក្នុងកម្មវិធីនេះចំនួន២៦៣នាក់ ដោយម្នាក់ទទួលបាន អង្ករ ២០គីឡូក្រាម ,ត្រីខ ១យួរ ,ទឹកត្រី១យួរ ,ទឹកស៊ីអុីវ ១យួរ និង ថវិកា ២ម៉ឺនរៀលផងដែរ៕SRP