ខេត្តកំពង់ចាម – Page 46

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅព្រឹកមិញនេះបាននាំយកអំណោយ ចែកជូនប្រជាពលរដ្ឋ មានជីវភាពខ្វះខាត ចំនួន៤០០គ្រួសារ នៅឃុំព្រែកពោធិ៍ ស្រុកស្រីសន្ធរ។

លោក អ៊ុន ចាន់ដា បានថ្លែងថា ជំងឺកូវីដ១៩ នេះ មានផលប៉ះពាល់ ច្រើនណាស់ ដល់ប្រជាពលរដ្ឋ ដូចជា ប៉ះពាល់ដល់សុខភាពធ្វើទុក្ខក្នុងរាងកាយ និងអាចឈានទៅបាត់បង់អាយុជីវិត ដែលជាក់ស្ដែងខេត្តកំពង់ចាម មានអ្នកស្លាប់ដោយសារជំងឺកូវីដ១៩ កើនឡើងជាបន្តបន្ទាប់។ ម្យ៉ាងវិញទៀត ធ្វើឲ្យប៉ះពាល់ដល់ជីវភាពរស់នៅ របស់បងប្អូន ព្រោះនៅពេលដែលប្រជាពលរដ្ឋ យើងមានឆ្លងជំងឺនេះ ត្រូវសម្រាកព្យាបាល រីឯអ្នកប៉ះពាល់ផ្សេងទៀត ត្រូវយកទៅធ្វើចត្តាឡីស័ក ហើយក្នុងរយៈពេលព្យាបាល និងធ្វើចត្តាឡីស័ក គឺពួកគាត់មិនអាច ចេញទៅខាងក្រៅ ដើម្បីប្រកបរបរចិញ្ចឹមជីវិតបានឡេីយ ដែលប្រការនោះធ្វើឲ្យជីវភាពជួបនូវការខ្វះខាត។

អភិបាលខេត្ត ក៏បានរំលឹកដល់ពលរដ្ឋ ឲ្យបង្កើនការថែទាំសុខភាព ការពារសុវត្ថិភាពផ្ទាល់ខ្លួន ឲ្យបានគ្រប់ៗគ្នា ក្នុងការចូលរួមទប់ស្កាត់ ការឆ្លងរីករាលដាលនៃជំងឺកូវីដ-១៩ តាមរយៈពាក់ម៉ាសនៅគ្រប់ទីសាធារណៈ លាងសម្អាតដៃជាមួយសាប៊ូ អាកុល ឬជែល និងរក្សាគម្លាត។

គួរបញ្ជាក់ថា អំណោយដែលបានផ្ដល់ជូនប្រជាពលរដ្ឋ ទាំង៤០០គ្រួសារ ក្នុង ១គ្រួសារទទួលបាន អង្ករ ២៥គីឡូក្រាម ត្រីខកំប៉ុង១យួរ ទឹកត្រី ១យួរ ទឹកស៊ីអ៉ីវ ១យួរ និងមី ១កេស៕SRP

ខេត្តកំពង់ចាម៖ក្នុងពិធីចែកអំណោយជូនប្រជាពលរដ្ឋចំនួន១៦៦គ្រួសារ នៅសួនគ្រញូងនគរបាជ័យ សង្កាត់សំបួរមាស ក្រុងកំពង់ចាម នៅថ្ងៃទី៣ ខែកក្កដា ព្ព្រឹកមិញនេះ លោក អ៊ុន ចាន់ដា អភិបាលខេត្តកំពង់ចាម បានអំពាវនាវដល់ប្រជាពលរដ្ឋ ឲ្យទទួលការចាក់វ៉ាក់សាំងបង្ការជំងឺកូវីដ-១៩ ឲ្យបានគ្រប់ៗគ្នា ដេីម្បីការពារអាយុជីវិតពលរដ្ឋយើង។

លោកក៏បានរំលឹកដល់ប្រជាពលរដ្ឋ ឲ្យបង្កើនការថែទាំសុខភាព ការពារសុវត្ថិភាពផ្ទាល់ខ្លួន ឲ្យបានគ្រប់ៗគ្នា ក្នុងការចូលរួមទប់ស្កាត់ ការឆ្លងរីករាលដាលនៃជំងឺកូវីដ-១៩ ទោះក្នុងពេលបំពេញការងារ ឬប្រកបមុខរបររកស៊ីផ្សេងៗ បេីទោះជាទទួលបានការចាក់វ៉ាក់សាំងរួចហើយក្តី ក៏មិនត្រូវធ្វេសប្រហេស ឬមើលស្រាលបានឡើយ។ ជាងនេះទៅទៀត សូមកុំភ្លេចអនុវត្តវិធានការ ” ៣ការពារ ៣កុំ ” ឲ្យបានជាប់ជាប្រចាំ ពាក់ម៉ាស ការលាងសំអាតដៃជាមួយសាប៊ូ អាកុល ឬជែល អោយបានញឹកញាប់
រក្សាគម្លាតសុវត្ថិភាពបុគ្គល។

អភិបាលខេត្តបានបន្តថា មេឃុំចៅសង្កាត់ ប៉ុស្តិ៍នគរបាលរដ្ឋបាល មេភូមិអនុភូមិ និងមន្ត្រីសុខាភិបាល គឺជាតួរអង្គយ៉ាងសំខាន់ទាំង៤ ក្នុងការគ្រប់គ្រងពលរដ្ឋចំណូលស្រុក ដើម្បីបញ្ជូនពួកគាត់ទៅធ្វើចត្តាឡីស័ក តាមការកំណត់ ហេីយក៏សូមឲ្យបងប្អូនប្រជាពលរដ្ឋ ចូលរួមជាមួយ តួរអង្គទាំង៤នេះ ដើម្បីដាក់ចេញជាសកម្មភាពមកភ្លាមដឹងភ្លាម និងគ្រប់គ្រងទាន់សភាពការណ៍។

អភិបាលខេត្ត ក៏បានបញ្ជក់ថា ទោះបីជាស្ថិតក្នុងបរិបទកូវីដ-១៩ ធ្វេីឲ្យប៉ះពាល់ដល់វិស័យខ្លះៗ តែអាជ្ញាធរនៅតែខិតខំ ធ្វើការអភិវឌ្ឍ ហហេដ្ឋារចនាសម្ព័ន្ធ ដោយមានការស្ថាបនាផ្លូវកៅស៊ូ និងផ្លូវបេតុង ជូនប្រជាពលរដ្ឋ ក្នុងក្រុងកំពង់ចាម ដែលត្រូវបេីកការដ្ឋាន នៅពេលឆាប់ៗខាងមុខនេះផងដែរ។

គួរបញ្ជាក់ថា អំណោយដែលបានផ្ដល់ជូនប្រជាពលរដ្ឋទាំង ១៦៦គ្រួសារ ក្នុង ១គ្រួសារទទួលបាន អង្ករ២៥គីឡូក្រាម ត្រីខកំប៉ុង១យួរ ទឹកត្រី១យួរ ទឹកស៊ីអ៉ីវ១យួរ និងមី១កេស៕SRP

ខេត្តកំពង់ចាម៖អាជ្ញាធរស្រុកស្ទឹងត្រង់បានដាក់ឲ្យដេញថ្លៃស្ថាបនាផ្លូវចំនួន៧គម្រោងនៅព្រឹកនេះ។ គម្រោងនេះគឺជាមូលនិធិឃុំ-សង្កាត់ ឆ្នាំ២០២១ របស់គណៈកម្មការជាតិសម្រាប់ការអភិវឌ្ឍន៍តាមបែបប្រជាធិបតេយ្យ នៅថ្នាក់ក្រោមជាតិ ក្នុងការស្ថាបនាហេដ្ឋារចនាសម្ពន្ធ័។

អភិបាលស្រុកស្ទឹងត្រង់ លោកទុន នេត បានលេីកឡេីងថា ទោះស្ថិតក្នុងបរិបទកូវីដ-១៩ ស្រុកស្ទឹងត្រង់ នៅតែបន្តធ្វើការអភិវឌ្ឍន៍ ជាក់ស្ដែងថ្ងៃនេះ គម្រោងមូលនិធិឃុំចំនួន៧គម្រោងត្រូវបានដាក់ឲ្យដេញថ្លៃដើម្បីអនុវត្តការងារសាងសង់ ក្នុងនោះមាន៖
១-ឃុំខ្ពបតាងួន សាងសង់ផ្លូវបេតុងអាមេ ប្រវែង ០.៥៧៦ គ.ម ទទឹង៤ម កម្រាស់០.១៥ម នៅភូមិ ឈើទើ។

២-ឃុំពាមកោះស្នា ស្តារអូរក្របៅ ប្រវែង ០.៥០០ គ.ម ទទឹងមធ្យម ៤៧.១៤ម ជម្រៅ១.៨ម នៅភូមិ កោះកណ្តាល ភូមិស្រែសង្កែ។

៣-ឃុំពាមកោះស្នា សាងសង់ផ្លូវបេតុងអាមេ ប្រវែង ០.២០០ គ.ម ទទឹង៤ម នៅភូមិ កោះកណ្តាល ភូមិស្រែសង្កែ។

៤-ឃុំព្រែកកក់ សាងសង់ផ្លូវបេតុងអាមេ ប្រវែង ០.៩៨១ គ.ម ទទឹង៤ម នៅភូមិ អូរប្រាំទី២ និងអូរប្រាំទី១។

៥-ឃុំព្រះអណ្តូង សាងសង់ផ្លូវបេតុងអាមេ ប្រវែង ០.២៧៧គ.ម ទទឹង៤ម នៅភូមិព្រែកស្តី។

៦-ឃុំមេសជ្រៃ សាងសង់ផ្លូវបេតុងអាមេ ប្រវែង ០.៥១៧គ.ម ទទឹង៥ម នៅភូមិ អូរបេង និងត្រពាំងឈូក។

៧-ឃុំសូភាស សាងសង់ផ្លូវបេតុងអាមេ ប្រវែង ០.៥០០ គ.ម ទទឹង៤ម នៅភូមិ សូភាស និងភូមិអង្ភោល។

លោក ឡី មិច នាយករងរដ្ឋបាលខេត្ត បានសំណូមពរដល់អ្នកទទួលការទាំងអស់ ឲ្យចូលរួមជាមួយអាជ្ញាធរ ដេីម្បីបង្ការទប់ស្កាត់ការឆ្លងរីករាលដាលនៃជំងឺកូវីដ-១៩ ព្រមទាំងថ្លែងអំណរគុណចំពោះអាជ្ញាធរស្រុកស្ទឹងត្រងដែលបានរៀបចំការដេញថ្លៃនេះ ឲ្យមានសណ្ដាប់ធ្នាប់ និងរបៀបរៀបរយផងដែរ៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណ និងជូនពរដល់ សប្បុរសជន ដែលបានឧបត្ថម្ភគាំទ្រដល់គណៈកម្មការ ប្រឆាំងជំងឺកូវីដ-១៩ជាពិសេសបានជួយរំលែកទុក្ខលំបាក ខ្វះខាត របស់ ពលករចំណូលស្រុក ពលរដ្ផងដែរ។

លោកថ្លែងអរគុណនេះក្នុងឱកាទទួលអំណោយជាសម្ភារពីសប្បុរសជន នៅព្រឹកមិញនេះ។

គួរបញ្ជាក់ផងដែរថា ពិធីប្រគល់ និងទទួលអំណោយនេះ ដោយលោកឧកញ៉ា ផែ ហុកឈួន និងលោកឧកញ៉ា អ៊ឹង ស៊ីស្រ៊ន បានជួយឧបត្ថម្ភទឹកបរិសុទ្ធOral ចំនួន២០០កេស និងក្រុមហ៊ុនភេសជ្ជៈកម្ពុជាកូកាកូឡា បានជួយឧបត្ថម្ភ ភេសជ្ជៈកូកាកូឡា ចំនួន១០០កេស។ អភិបាលខេត្ត ក៏បានប្រគល់ភេសជ្ជៈខាងលើ ជូនក្រុមគ្រូពេទ្យចាក់វ៉ាក់សាំងបង្ការជំងឺកូវីដ-១៩ នៅតាមគោលដៅនីមួយៗផងដែរ៕SRP

ខេត្តកំពង់ចាម៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បប្រធានកាកបាទក្រហមកម្ពុជា បានផ្ដល់អំណោយសម្ភារ និងថវិកា ចូលរួមបុណ្យសព ស្ត្រីមេម៉ាយ ឈ្មោះអឿន រដ្ឋា អាយុ៣០ឆ្នាំ ដែលបានស្លាប់ក្នុងករណីអគ្គិភ័យ នៅភូមិពព្រេង ឃុំស្ពឺ ស្រុកចំការលើ ខេត្តកំពង់ចាម បន្សល់ទុកនៅកូនស្រីម្នាក់ អាយុ ៨ឆ្នាំ ឲ្យនៅកំព្រាផងដែរ។

ការផ្ដល់អំណោយនៅព្រឹកមិញនេះតាមរយ:
លោក ស្រី ប៉ាង ដានី អនុប្រធានអចិន្ត្រៃយ៍សាខាកាកបាទក្រហមខេត្ត។

លោក ស្រី ប៉ាង ដានីបានពាំនាំប្រសាសន៍ លោក អ៊ុន ចាន់ដា ប្រធានកាកបាទក្រហមកម្ពុជា ខេត្តកំពង់ចាម ជាពិសេសសម្តេចកិត្តិព្រឹទ្ធបណ្ឌិតត ប៊ុន រ៉ានី ហ៊ុនសែន ដែលផ្តាំផ្ញើរំលែកទុក្ខយ៉ាងក្រៀមក្រំ ក្នុងក្តីអាណិតអាសូរ និង ការសោកស្តាយក្រៃលែង ចំពោះការបាត់បង់ កូន ចៅ និងម្តាយ ជាទីស្រឡាញ់ នេះ។

លោកស្រី បញ្ជាក់ថា ជានិច្ចកាល សម្ដេចតែងតែយកចិត្តទុកដាក់គិតគូរអំពីសុខទុក្ខដល់ប្រជាពលរដ្ឋដែលរងគ្រោះ និងងាយរងគ្រោះ នៅគ្រប់ទីកន្លែង មិនប្រកាន់និន្នាការនយោបាយ ប្រកាន់ពូជសាសន៍ ឬ សាសនា អ្វីឡើយ។

លោកស្រី ក៏បានផ្តាំផ្ផ្ញើ លោក ជឹម រឺន ជាជីតាបង្កើត អោយជួយមើលថែ ចៅស្រីកំព្រាកំសត់ម្នាក់នេះ អោយរស់នៅបានកក់់ក្តៅ ជួយផ្ចុងផ្តើមចៅស្រីបានសិក្សារៀនសូត្រជ្រៅជ្រះ ក្លាយជាពលរដ្ឋ មានអនាគតល្អ ដើម្បីស្តារជីវភាពគ្រួសារឡើងវិញ។ ជាមួយនោះ លោក ស្រីបានអំពាវនាវ ប្រជាពលរដ្ឋទាំងអស់ ត្រូវតែបង្កើនស្មារតីប្រុងប្រយ័ត្នជាប់ជានិច្ចក្នុងការទប់ស្កាត់ការឆ្លងរាលដាល នៃជម្ងឺកូវីដ-១៩ ដោយត្រូវ ថែទាំសុខភាពអនាម័យ និងសុវត្ថិភាពផ្ទាល់ខ្លួន ជាប្រចាំ ពិសេស ចូលរួមអនុវត្តអោយបានខ្ជាប់ខ្ជួន វិធានសុខាភិបាល ” ៣ការពារ ៣កុំ។

សូមជម្រាបថាសម្ភារ ដែលបានចូលរួមបុណ្យសពមាន៖ អង្ករ ១០០គក្រ, មី ៥កេស, ត្រីខ ៥យួរ , ទឹកក្រូច ៥កេស និងថវិកា ចំនួន ៥,០០០,០០០រៀល។

ដោយឡែក សាលាគណស្រុកនិង អនុសាខា ស្រុកចំការលើ ក៏បានផ្តល់ជូន អង្ករ ២២០គក្រ , មី ៤កេស ត្រីខ ២យួរ ទឹកត្រី ២យួរ ទឹកសុទ្ធ ២០យួរ ,ឃីត ៧ ,សម្ភារៈផ្ទះបាយ និងថវិកា ចំនួន ២,០០០,០០០រៀល ផងដែរ។

គួររំលឹកថា ករណីគ្រោះអគ្គិភ័យនេះបានកើតមានឡើង កាលពីវេលាម៉ោង៦ ព្រលប់ ថ្ងៃទី២៩ ខែមិថុនា ឆ្នាំ២០២១ ខណៈស្ត្រីរងគ្រោះ អឿន រដ្ឋា កំពុងបង្ហូរសាំងដាក់ស៊ីទែនក្នុងដី ស្រាប់តែ ចរន្តអគ្គិសនីបានឆ្លងពីដំបូល ជះអណ្តាតភ្លើង ឆាបឆេះស្ថានីយ៍ប្រេង ភ្លាមៗ ហើយឆេះរាលដល់ផ្ទះ ៣ខ្នង ក្បែរនោះ ទំហំ ៧ម × ៩ម ធ្វើពីឈើលើ ថ្មខាងក្រោមផងដែរ។
ក្រោយពេលជំលៀសជីដូនជរាម្នាក់ចេញក្រៅរួចហើយ ស្ត្រីរងគ្រោះក៏ស្ទុះចូលទៅក្នុងផ្ទះម្តងទៀត ដើម្បីប្រមូលយកលុយនៅក្នុងទូ តែជាអកុសល ភ្លើងបានឆេះពេញបន្ទុក មិនអាចចេញក្រៅមករួច ក្មួយស្រី ក៏បានស្លាប់យ៉ាងអណោចអធ័មបំផុត បន្សល់ទុកកូនស្រីអោយនៅកំព្រាម្នាក់ឯង ។
ក្នុងឱកាសនោះ លោកស្រី ប៉ាង ដានី បានសម្តែងការសោកស្តាយ ជាមួយក្រុមគ្រួសារសព ចំពោះឧបទ្ទវហេតុដែលកើតឡើងស្មានមិនដល់នេះ ធ្វើអោយបាត់បង់អាយុជីវិតមនុស្ស និងលំនៅដ្ឋាន ព្រមទាំងទ្រព្យសម្បត្តិ លុយកាក់គ្មានសល់៕SRP

Sponsored

ខេត្តកំពង់ចាម៖កូនស្រីថៅកែលក់សាំងតេលាបានស្លាប់ខណៈចូលយកទ្រព្យសម្បត្តិក្នុងផ្ទះ ករណីអគ្គិភ័យ។

ហេតុការណ៍បានកើតឡើងនៅវេលាម៉ោង៦និង៤៥នាទីល្ងាច ថ្ងៃទី២៩ ខែមិថុនា ឆ្នាំ២០២១ នៅចំណុចការ៉ាស់លក់សាំងតេលា ១កន្លែង និងផ្ទះប្រជាពលរដ្ឋ ១ខ្នង នៅចំណុចភូមិពព្រេង ឃុំស្ពឺ ស្រុកចំការលើ ខេត្តកំពង់ចាម។

សមត្ថកិច្ចបានឲ្យដឹងថា ម្ចាស់ផ្ទះនិងស្ថានីយលក់សាំងតេលា មានឈ្មោះ ជឹម រីន ភេទប្រុស អាយុ ៥៥ឆ្នាំ ជាតិខ្មែរ នៅភូមិពព្រេង ឃុំស្ពឺ ស្រុកចំការលើ។ ករណីនេះ បណ្តាលឲ្យស្លាប់ឈ្មោះ អឿន រដ្ឋា ភេទស្រី អាយុ ៣០ឆ្នាំ ជាតិខ្មែរ (ត្រូវជាកូន) ខណៈដែល ជនរងគ្រោះ ចូលយកទ្រព្យសម្បត្តិក្នុងផ្ទះ។

តាមការសន្និដ្ឋានរបស់សមត្ថកិច្ចបានឲ្យដឹងថា មូលហេតុដែលបង្កឲ្យមានអគ្គិភ័យនេះ ដោយសារឆ្លងចរន្តអគ្គិសនី ពេលបាញ់ប្រេងបញ្ចូលកានបណ្តាលឲ្យផ្ទុះ ដែលធ្វើឲ្យខូចខាត ផ្ទះសង់អំពីឈើ ប្រក់ក្បឿងអស់ ១ខ្នងទំហំ ៧ម៉ត្រ គុណ ៩ម៉ែត្រ និងការ៉ាស់សាំង ១កន្លែង អស់ទាំងស្រុង ព្រមទាំងរថយន្តម៉ាកលុចស៊ីស ៣៣០ ១គ្រឿង ម៉ូតូ ១គ្រឿង និងប្រាក់ចំនួនទៀត។

គូសបញ្ជាក់ដែរថា ក្នុងកិច្ចប្រតិបត្តិការនេះ សមត្ថកិច្ចបានប្រើប្រាស់រថយន្តពន្លត់អគ្គិភ័យ ៨គ្រឿង រថយន្តស្រុកស្ទឹងត្រង់ ចំនួន ២គ្រឿង រថយន្តខេត្ត ៣គ្រឿង រថយន្តស្រុកព្រៃឈរ ១គ្រឿង រថយន្តស្រុកកំពង់សៀម ១គ្រឿង រថយន្តស្រុកចំការលើ ១គ្រឿង ប្រើប្រាស់អស់ទឹក៩ឡាន ទើបធ្វើការគ្រប់គ្រងស្ថានការណ៍នោះ ឲ្យរលត់ទាំងស្រុង ១០០% នៅវេលាមោង ៨និង៤០នាទី យប់៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម នៅថ្ងៃទី២៩ ខែមិថុនា ព្រឹកមិញនេះ បានប្រកាស់បេីកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋ នៅ៤៦ទីតាំង។ ក្រុងកំពង់ចាម មាន៤ទីតាំង ស្រុកកំពង់សៀម ៨ទីតាំង ស្រុកព្រៃឈរ ១៥ទីតាំង ស្រុកជើងព្រៃ ១៦ទីតាំង និងស្រុកបាធាយ មាន ៣ទីតាំង។

លោកអ៊ុន ចាន់ដា បានថ្លែងថា បន្ទាប់ពីទទួលបានវ៉ាក់សាំងបង្ការហើយ បងប្អូននឹងមានប្រព័ន្ធការពារ ដ៏រឹងមាំ នៅក្នុងសារពាងកាយ ហើយធន់នឹងការឆ្លង នៃជំងឺកូវីដ-១៩។

លោកលើកឡើងថា បន្ទាប់ពីព្រឹត្តិការណ៍សហគមន៍ ២០ កុម្ភៈ នាពេលកន្លងមក ប្រជាពលរដ្ឋ ក្នុងខេត្តកំពង់ចាម ជាច្រើននាក់ បានឆ្លងជំងឺនេះជាបន្តបន្ទាប់ និងធ្វើឲ្យប៉ះពាល់ដល់ជីវភាពរស់ នៅប្រចាំថ្ងៃ។ ក្រោមការយកចិត្តទុកដាក់ របស់សម្ដេចតេជោ ដោយបានផ្ដល់នូវវ៉ាក់សាំងបង្ការមកចាក់ជូនប្រជាពលរដ្ឋទាំង ៥ក្រុង/ស្រុក មានប្រមាណជា ៣៥ម៉ឺននាក់ ។ ដូច្នេះ សូមឲ្យបងប្អូនចូលរួមអនុវត្ត ទៅតាមវិធានសុខាភិបាល ដើម្បី ធ្វើឲ្យវ៉ាក់សាំងដែលក្រុមគ្រូពេទ្យ ចាក់ឲ្យហើយនោះ មានប្រសិទ្ធភាព ។

លោកមានប្រសាសន៍ថា ការចាក់វ៉ាក់សាំងបង្ការនេះ មិនត្រឹមតែការជួយសង្គ្រោះ ដល់អាយុជីវិតមនុស្សឡើយ តែវាបានរួមចំណែកជួយសង្គ្រោះ ដល់សេដ្ឋកិច្ចជាតិទាំងមូល ផងដែរ។ តាមរយៈនេះ សូមបងប្អូនប្រជាពលរដ្ឋ រស់នៅតាមបណ្តាក្រុង/ស្រុក ខាងលើ ចូលរួមជាមួយរាជរដ្ឋាភិបាលកម្ពុជា ដើម្បី ទទួលយកវ៉ាក់សាំងការពារជម្ងឺកូវីដ ១៩ ដោយស្ម័គ្រចិត្ត និងឥតគិតថ្លៃ នេះ ដើម្បី បញ្ឈប់ការឆ្លងរាលដាល នៃជម្ងឺកូវីដ ១៩ នៅក្នុងសហគមន៍យើង ជាបន្តទៀត។

បើតាមលោក គីមសួរ ភិរុណ ប្រធានមន្ទីរសុខាភិបាលខេត្តកំពង់ចាម បានគូសបញ្ជាក់ថា យុទ្ធនាការចាក់វ៉ាក់សាំង នាពេលនេះ មានមន្ត្រីសុខាភិបាល និងពេទ្យស័្មគ្រចិត្តចំនួន ៧៦០នាក់ និងបែងចែកជា ៧៦ក្រុម។ កន្លងមក មន្ទីរសុខាភិបាល បានចាក់វ៉ាក់សាំងការពារជម្ងឺកូវីដ ១៩ ជូនមន្ត្រីរាជការ កងកម្លាំងនគរបាល មន្ត្រីចូលនិវត្តន៍ និងប្រជាពលរដ្ឋ នៅក្នុងខេត្ត បានចំនួន ២លើក រួចមកហើយ ក្នុងនោះ លើកទី១ បានចំនួន ៥.៤២៧នាក់ និងលើកទី២ បានចំនួន ២២.៩១២នាក់ ដែលសរុបទាំង ២លើក បានចំនួន ២៨.៣៣៩នាក់។

យោងតាមសេចក្ដីជូនដំណឹង រដ្ឋបាលខេត្តកំពង់ចាម គឺបានជម្រាបដល់ប្រជាពលរដ្ឋ និងសាធារណៈជនទាំងអស់ថា ប្រមុខរាជរដ្ឋាភិបាលកម្ពុជា «បានដាក់ចេញនូវយុទ្ធនាការជាតិ ចាក់វ៉ាក់សាំង» សំដៅបង្កើតឲ្យមានភាពស៊ាំ ក្នុងសហគមន៍ ទប់ទល់នឹងការឆ្លងរាលដាល នៃជម្ងឺកូវីដ ១៩ នៅក្នុងសហគមន៍ ។ ដើម្បី ចូលរួមជាមួយរាជរដ្ឋាភិបាលកម្ពុជា ក្នុងការទប់ស្កាត់ការឆ្លងរាលដាល នៃជម្ងឺនេះ រដ្ឋបាលខេត្តកំពង់ចាម បានរៀបចំផែនការ ចាក់វ៉ាក់សាំងការពារជម្ងឺកូវីដ ១៩ ជូនដល់បងប្អូនប្រជាពលរដ្ឋ ដែលបានស្ម័គ្រចិត្តចុះឈ្មោះចាក់វ៉ាក់សាំងជាមួយ អាជ្ញាធរឃុំ/សង្កាត់ ក្នុងស្រុកបាធាយ ជើងព្រៃ ព្រៃឈរ កំពង់សៀម និងក្រុងកំពង់ចាម ចាប់ពីថ្ងៃទី២៩ ខែមិថុនា ឆ្នាំ២០២១ តទៅ ដោយមានរយៈពេល ១៤ថ្ងៃ ក្នុងការចាក់ដូសលើកទី ១ ដោយចាប់ផ្ដើមពេលព្រឹកពីម៉ោង ៨ ដល់ម៉ោង ១១ នាពេលរសៀល ចាប់ពីម៉ោង១ដល់ម៉ោង៤ល្ងាច៕SRP

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានប្រកាសបើកយុទ្ធនាការចាក់វ៉ាក់សាំងកូវីដ១៩ ជូនប្រជាពលរដ្ឋ នៅក្នុងស្រុកចំនួន៤ ចាប់ពីថ្ងៃស្អែក គឺថ្ងៃទី ២៩ ខែមិថុនា ឆ្នាំ ២០២១ តទៅ ។ ក្នុងនោះ ទី១ ស្រុកកំពង់សៀម ទី២ ស្រុកព្រៃឈរ ទី៣ ស្រុកជើងព្រៃ និងទី៤ ស្រុកបាធាយ។

លោកថ្លែងយ៉ាងដូច្នេះក្នុងឱកាសចូលរួមចែកអំណោយដល់គ្រិស្តបរិស័ទ ចំនួន១០០គ្រួសារ នៅវត្តបឹងកុក សង្កាត់បឹងកុក ក្រុងកំពង់ចាម នាព្រឹកថ្ងៃទី២៨ ខែមិថុនា ឆ្នាំ ២០២១នេះ។

អភិបាលខេត្ត បានបញ្ជាក់ថា វ៉ាក់សាំងការពារជំងឺកូវីដ១៩ ដែលជាអំណោយរបស់សម្ដេចតេជោនាយករដ្ឋមន្ត្រី សម្រាប់ចាក់ជូនប្រជាពលរដ្ឋ ដោយឥតគិតថ្លៃ បានដឹកបញ្ជូនមកដល់រដ្ឋបាលខេត្តកំពង់ចាមហើយ។ ដោយ ក្រុមគ្រូពេទ្យ ក៏បានរៀបចំទុកដាក់រួចរាល់ហើយដែរ សម្រាប់ត្រៀមចាក់ជូនប្រជាពលរដ្ឋរបស់យើង។ ដូច្នេះរដ្ឋបាលខេត្ត សូមប្រកាសអញ្ជើញ ដល់ប្រជាពលរដ្ឋ ដែលរស់នៅក្នុងទីប្រជុំជន អាជីវករលក់ដូរតាមផ្សារ និងមន្ត្រីរាជការ សូមទៅចាក់វ៉ាក់សាំងការពារជំងឺកូវីដ១៩ ទៅតាមគោលដៅនីមួយៗ ដែលក្រុមគ្រូពេទ្យបានរៀបចំ និងសូមកុំភ្លេចយកអត្តសញ្ញាណប័ណ្ណ សំគាល់ខ្លួនមកផង។

អភិបាលខេត្ត បានរំលឹកផងដែរថា មកដល់ពេលនេះខេត្តកំពង់ចាមមានប្រជាពលរដ្ឋ បានធ្លាក់ទៅក្នុងភាពក្រីក្រក្នុងរង្វង់ ៤៧,០០០ គ្រួសារ ដោយសារតែជួបគេបាត់ជំងឺកូវីដ១៩។ ជាមួយគ្នានេះរាជរដ្ឋាភិបាល ក៏បានដាក់ចេញនូវកម្មវិធីឧបត្ថម្ភសាច់ប្រាក់ ជូនដល់ប្រជាពលរដ្ឋដែលធ្លាក់ទៅក្នុងភាពក្រ១ ក្រ២ ក្នុងបរិបទជំងឺកូវីដ១៩ ផងដែរ ដែលសរុបទឹកប្រាក់ដល់ពេលនេះសម្រាប់ខេត្តកំពង់ចាម អស់ជាង ២០លានដុល្លារហើយ។

អភិបាលខេត្ត ក៏បានអំពាវនាវដល់ប្រជាពលរដ្ទទាំងអស់ ត្រូវបង្កើនការ ការពារខ្លួន ចៀសអោយផុតពីការឆ្លង ជំងឺកូវីដ-១៩ ដោយត្រូវអនុវត្តអោយបានខ្ជាប់ខ្ជួននូវវិធានសុខាភិបាល ” ៣ការពារ និង ៣កុំ ” ពិសេស ការលាងសម្អាតដៃជាប្រចាំ, ការអនុវត្តន៍កាតព្វកិច្ចពាក់ម៉ាស់ , កាតព្វកិច្ចរក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គល៕SRP

ខេត្តកំពង់ចាម៖អាជ្ញាធរខេត្តកំពង់ចាម បានទទួលអំណោយជាស្បៀងអារហារ ពីសមាគមសាសនាចក្រនៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ប្រចាំនៅកម្ពុជា។ពិធីទទួលនេះនៅល្ងាចថ្ងៃទី ២៣ ខែមិថុនា ម្សិលមិញ នៅរដ្ឋបាលខេត្តកំពង់ចាម។

ក្នុងឱកាសទទួលអំណោយ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណកម្មការខេត្តប្រយុទ្ធប្រឆាំងនឹងជំងឺកូវីដ-១៩បានថ្លែងអំណរគុណយ៉ាងជ្រាលជ្រៅ ចំពោះ សមាគមសាសនាចក្រ នៃព្រះយេស៊ូគ្រីស្ទ នៃពួកបរិសុទ្ធថ្ងៃចុងក្រោយ ប្រចាំនៅកម្ពុជា ដែលបាននាំយកអង្ករ ចំនួន ៩៣,០២៥ គីឡូក្រាម មី ៣,៧២១កេស ត្រីខ ៣,៧២១យួរ ទឹកត្រី ៣,៧២១យួរ និងទឹកសុីអ៊ុីវចំនួន ៣,៧២១យួរ ប្រគល់ជូនគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្តកំពង់ចាម សម្រាប់យកទៅប្រេីប្រាស់ជាប្រយោជន៍ ក្នុងការប្រយុទ្ធ ប្រឆាំងនឹងជំងឺកូវីដ១៩៕SRP

ខេត្តកំពង់ចាម៖លោក ប៉ាទ្រីក ម័រហ្វី (W. PATRICK MURPHY) ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា បានថ្លែងថា យេីងពិតជាមានមោទនភាព ចំពោះការរីកចម្រើនរបស់ខេត្តកំពង់ចាម យេីងបានដឹងអំពីប្រវត្តិសាស្ត្រ ប្រពៃណី និងការប្រឈមនានាក្នុងខេត្ត ហេីយយើងក៏មានដៃគូសហការជាច្រើន ដែលផ្តោតទៅលេីការធ្វើមុខជំនួញការជួបប្រាស្រ័យទាក់ទងជាមួយនឹងយុវជននិងកម្មវិធីផ្សេងៗជាច្រើនទៀត។

លោកថ្លែងយ៉ាងដូច្នេះឱកាសចូលរួមជាវាគ្មិនកិត្តិយស ក្នុងកម្មវិធីសន្ទនាមតិលើប្រធានបទ«ការពង្រឹងកិច្ចសហប្រតិបត្តិការ រវាងស្ថានទូតអាមេរិក ជាមួយខេត្តកំពង់ចាម » នៃវិទ្យុជាតិភ្នំប្រុសភ្នំស្រី FM92.50MHz ខេត្តកំពង់ចាម នៅថ្ងៃទី២៣ ខែមិថុនា ព្រឹកមិញនេះ។

លោក ម័រហ្វី បានថ្លែងថា ក្នុងបរិបទកូវីដ-១៩នេះ សហរដ្ឋអាមេរិក ជាប្រទេសជំនួយដ៏ធំបំផុត ដែលបានផ្តល់វ៉ាក់សាំង តាមយន្តការកូវ៉ាក់ ដោយប្រធានាធិបតីអាមេរិក ចូ បៃដិន បានប្រកាសផ្ដល់ជំនួយវ៉ាក់សាំង ទៅកាន់ពិភពលោក ហើយក្នុងនោះប្រទេសកម្ពុជា ក៏ជាគោលដៅមួយដែរ ក្នុងដំណើរការនេះ។

លោកបានថ្លែងបន្តថា យេីងមានយន្តការជជំនួយសុខាភិបាល ទាក់ទងនឹងសុខភាពសាធារណៈ ជាច្រើនទៀតក្រោមឆត្ររបស់រដ្ឋាភិបាលអាមេរិក យេីងមានមជ្ឈមណ្ឌលគ្រប់គ្រងអ្នកជំងឺ មជ្ឈមណ្ឌលសេវាសុខភាពសាធារណៈ ដែលកាលពីឆ្នាំកន្លងទៅ សហរដ្ឋអាមេរិក បានផ្ដល់ជំនួយក្នុងការប្រយុទ្ធប្រឆាំងនឹងជំងឺកូវីដ-១៩ ក្នុងទឹកប្រាក់ចំនួន១១លានដុល្លារអាមេរិក ហើយយើងសង្ឃឹមថាឆ្នាំនេះយើងនឹងបន្តទៀតដែលអាចមានចំនួនច្រើនជាងមុន ដោយយន្តការសេវាសុខភាពសាធារណៈ គឺមានវត្តមានស្រាប់ក្នុងប្រទេសកម្ពុជារួចហើយ។

ប្រធានមន្ទីរព័ត៌មានខេត្តកំពង់ចាម លោកស្រី សម ផល្លា បានថ្លែងអរគុណដល់ លោកឯកអគ្គរដ្ឋទូតសហរដ្ឋអាមេរិក ប្រចាំកម្ពុជា ដែលបានអញ្ជើញចូលរួមជាវាគ្មិនកិត្តិយស ក្នុងកម្មវិធីសន្ទនាមតិ លើប្រធានបទ«ការពង្រឹងកិច្ចសហប្រតិបត្តិការ រវាងស្ថានទូតអាមេរិក ជាមួយខេត្តកំពង់ចាម » នៃវិទ្យុជាតិភ្នំប្រុសភ្នំស្រី FM92.50MHz ខេត្តកំពង់ចាម ដេីម្បីឆ្លេីយតបសំណួរទាក់ទង នឹងសេវាសុខភាពសាធារណៈ និងការផ្ដល់ជំនួយ៕SRP

Sponsored

ខេត្តកំពង់ចាម៖លោក W. Patrick Murphy ឯកអគ្គរដ្ឋទូត សហរដ្ឋអាមេរិកប្រចាំនៅកម្ពុជា
បានថ្លែងអំណរគុណ យ៉ាងជ្រាលជ្រៅបំផុត ចំពោះ អាជ្ញាធរខេត្តកំពង់ចាម ដែលបានអនុញ្ញាត ឱ្យលោកជួបពិភាក្សាការងារ ជាមួយគ្នានេះ ឯកអគ្គរដ្ឋទូត ក៏មានចំណាប់អារម្មណ៍តំបន់រមណីយដ្ឋានទេសចរណ៍ របស់ខេត្ត និងសក្តានុពល ដែលជាទីកន្លែងគួរឱ្យទាក់ទាញនូវឱកាសវិនិយោគនានា ផងដែរ។

លោក W. Patrick Murphy សម្ដែងនូវការចាប់អារម្មណ៍តំបន់ទេសចរណ៍នៅខេត្តកំពង់ចាម យ៉ាងដូច្នេះ នៅរសៀលថ្ងៃទី២២ ខែមិថុនា ម្សិលមិញ ក្នុងឱកាសជួបសំណេះសំណាល និងពិភាក្សាការងារ ជាមួយលោក អ៊ុន ចាន់ដា អភិបាល ខេត្តកំពង់ចាម។

លោក W. Patrick Murphy បានបញ្ជាក់ថា ដំណើរទស្សនកិច្ច របស់ពួកលោក ដើម្បី ស្វែងយល់អំពីការងារគ្រប់គ្រង និងការទប់ស្កាត់ការឆ្លងរីករាល នៃជម្ងឺកូវីដ ១៩។ ស្វែងយល់អំពីសក្តានុពល និងការងារអភិវឌ្ឍន៍ នៅក្នុងខេត្តកំពង់ចាម។

ឯកអគ្គរដ្ឋទូត បានបញ្ជាក់ដែរថាសហរដ្ឋអាមេរិក បានផ្តល់ថវិកាមួយផ្នែក ដល់យន្តការកូវ៉ាក់។ តាមរយៈ យន្តការនេះ កម្ពុជា ក៏បានទទួលនូវវ៉ាក់សាំង សម្រាប់បង្ការជម្ងឺកូវីដ-១៩ ផងដែរ។

លោក អ៊ុន ចាន់ដា បានបញ្ជាក់ថា ទាក់ទងការគ្រប់គ្រង និងការទប់ស្កាត់ការឆ្លងរាលដាល នៃជម្ងឺកូវីដ ១៩ នៅក្នុងខេត្តយើងបានរួមសហការគ្នា ជាមួយអ្នកពាក់ព័ន្ធ ក៏ដូចជា វិស័យឯកជន។ យ៉ាងណាម៉ិញ អនុវត្តតាមការណែនាំ របស់រាជរដ្ឋាភិបាលកម្ពុជា ចាប់តាំងពីឆ្នាំ២០២០មក យើងមានបញ្ហាការគម្រាមកំហែងដោយសារជម្ងឺកូវីដ ១៩ ជាបន្តបន្ទាប់។ ជាក់ស្ដែង ក្នុងដំណាក់កាលចុងក្រោយនេះ ជាពិសេស ចាប់តាំងពីព្រឹត្តិការណ៍ ២០កុម្ភៈ មក គឺជម្ងឺដ៏កាចសាហាវនេះ មានការឆ្លងរាលដាលនៅក្នុងខេត្តកំពង់ចាមកាន់តែខ្លាំងឡើង ដោយសារតែ ខេត្តកំពង់ចាមយើង មានកម្មកររោងចក្រ ក៏ដូចជា ប្រជាពលរដ្ឋចំណាកស្រុក ទៅធ្វើការនៅប្រទេសផ្សេងៗ ហើយបានវិលមកស្រុកកំណើតវិញ។ ឆ្លើយតបទៅនឹងបញ្ហាកូវីដ ១៩ នាពេលកន្លងមក ក៏ដូចជា នាពេលបច្ចុប្បន្ន នេះដែរ អាជ្ញាធរមូលដ្ឋាន គ្រប់លំដាប់ថ្នាក់ តែងបានសហការ ជាមួយអ្នកពាក់ព័ន្ធ ធ្វើការស្រាវជ្រាវរកអ្នកសង្ស័យ និងពាក់ព័ន្ធធ្វើតេស្តរកមេរោគកូវីដ ១៩ និងនាំយកទៅព្យាបាលបានទាន់ពេលវេលា។ ជាមួយគ្នានេះ អ្នកពាក់ព័ន្ធដោយផ្ទាល់ត្រូវបាននាំយកមកធ្វើចត្តាឡីស័ក នៅតាមមណ្ឌលចត្តាឡីស័ក ហើយអ្នកដែលពាក់ព័ន្ធដោយប្រយោល ត្រូវដាក់ឱ្យធ្វើចត្តាឡីស័ក នៅតាមផ្ទះរៀងៗខ្លួន។ ក្រៅពីនោះ យើងបានធ្វើការពង្រឹងគុណភាព នៃការព្យាបាល ដោយបានកែប្រែអតីតសណ្ឋាគារមេគង្គ ទៅជាមន្ទីរពេទ្យ សម្រាប់ព្យាបាលជម្ងឺកូវីដ ១៩ កម្រិតធ្ងន់ និងបានរៀបចំកន្លែង សម្រាប់ព្យាបាលកម្រិតស្រាល នៅវិទ្យាល័យព្រះសីហនុ ក្រុងកំពង់ចាម។
ទន្ទឹមជាមួយនោះ អាជ្ញាធរ ក៏បានយកចិត្តទុកដាក់ផងដែរ ទៅលើជីវភាព អ្នកដែលកំពុងធ្វើចត្តាឡីស័ក ទាំងនៅតាមមណ្ឌលចត្តាឡីស័ក និងអ្នកដែលធ្វើចត្តាឡីស័ក នៅតាមខ្នងផ្ទះ ដោយក្នុងនោះ រាជរដ្ឋាភិបាលកម្ពុជា បានឧបត្ថម្ភអាហារ ៣ពេល ដល់អ្នកធ្វើចត្តាឡីស័ក នៅតាមមណ្ឌល។ ក្រៅពីនោះក៏បានការឧបត្ថម្ភ ជាគ្រឿងឧបភោគបរិភោគ ដល់ក្រុមគ្រួសារប្រជាពលរដ្ឋ ដែលមានជីវភាពខ្វះខាត ដែលធ្វើចត្តាឡីស័ក នៅតាមខ្នងផ្ទះផងដែរ។ យ៉ាងណាម៉ិញ គិតមកដល់បច្ចុប្បន្ននេះ យើងបានជួយឧបត្ថម្ភគាំទ្រ ដល់ពួកគាត់ បានប្រមាណ ៥.០០០គ្រួសារ រួចមកហើយ។ មួយផ្នែកទៀត អាជ្ញាធរ ក៏បានធ្វើការអប់រំផ្សព្វផ្សាយ ដល់ប្រជាពលរដ្ឋ នៅតាមសហគមន៍ អំពីវិធានការពារការឆ្លងរីករាល នៃជម្ងឺកូវីដ-១៩ និងការបង្កើនការប្រុងប្រយ័ត្នខ្ពស់ ដោយជៀសវាងការធ្វើដំណើរ ទៅកាន់ទីតាំង ដែលមិនចាំបាច់..។ល។ ដោយឡែក នាបច្ចុប្បន្ន រដ្ឋបាលខេត្ត បានដាក់ចេញនូវវិធានការចាំបាច់នានា ដើម្បី បិទខ្ទប់ទីតាំងដែលមានបញ្ហាប្រឈមខ្លាំង ដើម្បី កាត់ផ្តាច់ខ្សែចម្លងជម្ងឺកូវីដ មួយនេះផងដែរ៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម បានថ្លែងថា តាមរយៈគោលនយោបាយ អាទិភាព របស់រាជរដ្ឋាភិបាលកម្ពុជាគឺ មនុស្ស ទឹក ភ្លើង និងផ្លូវ។ ជាក់ស្ដែងថ្ងៃនេះយើងបានទទួលផ្លូវបេតុងអាមេមួយខ្សែ ប្រវែងជាង៤ពាន់ម៉ែត្រ ដេីម្បីសម្រួលដល់ការរស់នៅរបស់ប្រជាពលរដ្ឋផងដែរ។

ថ្លែងយ៉ាងដូច្នេះក្នុងពិធីបើកការដ្ឋានសាងសង់ផ្លូវបេតុងអាមេ១ខ្សែប្រវែង៤,៦០០ ម៉ែត្រ ស្ថិតនៅក្នុងភូមិរាយប៉ាយក្រោម ឃុំរាយប៉ាយ ស្រុកកងមាស ខេត្តកំពង់ចាម នៅថ្ងៃទី២២ ខែមិថុនា ព្រឹកមិញនេះ។

លោកអ៊ុន ចាន់ដា បានថ្លែងថា តាមរយៈការខិតខំប្រឹងប្រែងរបស់អាជ្ញាធរ ពលរដ្ឋទទួលបានសមិទ្ធផលថ្មី ផ្លូវបេតុងមួយខ្សែនេះ ហើយសម្រាប់សប្តាហ៍ក្រោយនេះ ស្រុកកងមាសនឹងទទួលបានផ្លូវកៅស៊ូ ប្រភេទDBST ១ខ្សែ ប្រវែង២៧ គីឡូម៉ែត្រ បន្ថែមទៀត ដែលជាអំណោយដ៏ថ្លៃថ្លារបស់ សម្តេចហ៊ុន សែន។

លោកក៏បានអំពាវនាវដល់ ប្រជាពលរដ្ឋ ឲ្យមានការអត់ធ្មត់ ក្នុងអំឡុងស្ថាបនាផ្លូវមួយខ្សែនេះ ទាំងអ្នកធ្វើដំណើរ និងប្រជាពលរដ្ឋ ដែលមានលំនៅឋានអមសងខាងផ្លូវ បើមានការប៉ះពាល់អ្វីមួយ សូមជួបពិភាក្សាជាមួយអាជ្ញាធរមូលដ្ឋាន ដេីម្បីរកដំណោះស្រាយ ឬសំណងតាមសន្តិវិធី។

អភិបាលខេត្ត ក៏ណែនាំដល់ពលរដ្ឋ ឲ្យអនុវត្តវិធានការ ៣ការពារ ៣កុំ ដែលជាអាវក្រោះសម្រាប់ការពារកុំឲ្យឆ្លងរីករាលដាលនៃជំងឺកូវីដ-១៩៕SRP