ខេត្តកំពង់ចាម – Page 36

ខេត្តកំពង់ចាម៖អាជ្ញាធរខេត្តកំពង់ចាម នៅព្រឹកមិញនេះ ទទួលសមិទ្ធផល នៃគម្រោងកែលម្អមន្ទីរពេទ្យបង្អែកស្រុកជើងព្រៃ ស្រីសន្ធរ និងស្រុកកងមាស សម្រាប់ឆ្នាំ២០២១ សរុបជាថវិកាប្រមាណ៥៦ម៉ឺនដុល្លារ។

លោក អ៊ុន ចាន់ដា បានថ្លែងអំណរគុណយ៉ាងជ្រាលជ្រៅ ចំពោះសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ដែលបានជួយការកែលម្អអគារ និងសំណង់ហេដ្ឋារចនាសម្ព័ន្ធ បំពាក់សម្ភារបរិក្ខារបម្រើឲ្យមន្ទីរពេទ្យបង្អែកស្រុកទាំង៣ ខាងលេី។

គួរបញ្ជាក់ថាការប្រគល់-ទទួលនេះ បានធ្វើឡើងរវាងសមាគមសាសនាចក្រនៃព្រះយេស៊ូគ្រិស្ត នៃពួក បរិសុទ្ធថ្ងៃចុងក្រោយ ដែលជាភាគីផ្ដល់ជំនួយ តំណាងដោយលោក សៀ សំណាង ប្រធានសមាគម និងរដ្ឋបាលខេត្តកំពង់ចាម ជាភាគីទទួលជំនួយ តំណាងដោយលោក គឹមសួរ ភីរុណ ប្រធានមន្ទីរ សុខាភិបាលខេត្តកំពង់ចាម ក្រោមវត្តមាន លោក អ៊ុន ចាន់ដា អភិបាលខេត្តកំពង់ចាម និងលោក ខ្លូត ផន ប្រធានក្រុមប្រឹក្សាខេត្ត។ សម្រាប់មន្ទីរពេទ្យបង្អែកស្រុកជេីងព្រៃ មានទំហំទឹកប្រាក់ប្រមាណជាង២២ម៉ឺនដុល្លារ ក្នុងនោះបានធ្វើការកែលម្អអគារ សំណង់ហេដ្ឋារចនាសម្ពន្ធ គិតជាថវិកាជាង១៥ម៉ឺនដុល្លារ និងបំពាក់សម្ភារៈ បរិក្ខារបម្រើឲ្យមន្ទីរពេទ្យ ចំនួន ៣៤មុខ ស្មើនឹង ១៨៤គ្រឿង គិតជាថវិកាជាង៦ម៉ឺនដុល្លារ។

មន្ទីរពេទ្យបង្អែកស្រុកស្រីសន្ធរ មានទំហំទឹកប្រាក់ប្រមាណជាង ២៦ម៉ឺនដុល្លារ ក្នុងនោះកែលម្អអគារ និងសំណង់ហេដ្ឋារចនាសម្ពន្ធ គិតជាថវិកាជាង១៥ម៉ឺនដុល្លារ និងបំពាក់សម្ភារៈ បរិក្ខារបម្រើឲ្យមន្ទីរពេទ្យ ចំនួន ៣០មុខ ស្មើនឹង ៥៩គ្រឿង គិតជាថវិកាជាង ១០ម៉ឺនដុល្លារ។

មន្ទីរពេទ្យបង្អែកស្រុកកងមាស មានទំហំទឹកប្រាក់ប្រមាណជាង៧ម៉ឺនដុល្លារ ក្នុងនោះកែលម្អអគារ សំណង់ហេដ្ឋារចនាសម្ព័ន្ធ គិតជាថវិកាជាង៤ម៉ឺនដុល្លារ (សែសិបពីរពាន់បីរយប៉ែតសិបដុល្លារ) និងបំពាក់សម្ភារ បរិក្ខារបម្រើឲ្យមន្ទីរពេទ្យ១មុខ ស្មើនឹង១គ្រឿង គិតជាថវិកាចំនួន៣ម៉ឺនដុល្លារ៕SRP

ខេត្តកំពង់ចាម៖លោក អ៊ុន ចាន់ដា ជាប្រធានគណៈកម្មាធិការសាខាកាកបាទក្រហមខេត្ត បានថ្លែងប្រាប់ពលរដ្ឋថា ពេលមិននៅ ឬចាកចេញពីផ្ទះ ត្រូវបិទកុងតាក់ភ្លើងអគ្គិសនី ពន្លត់ភ្លើងចង្ក្រានហ្គាស ពន្លត់ទៀន ធូប ជាមុនសិន។ ម៉្យាងទៀតការតភ្ជាប់ចរន្តអគ្គិសនី ក៏ត្រូវពិនិត្យរៀបចំឲ្យបានត្រឹមត្រូវ តាមបទដ្ឋានបច្ចេកទេសផងដែរ។

លោកថ្លែងណែនាំបែបនេះនៅព្រឹកមិញ ថ្ងៃទី១៣ ក្នុងឱកាសអញ្ជើញនាំយកអំណោយមនុស្សធម៌ ទៅផ្តល់ជូនប្រជាពលរដ្ឋ ៣គ្រួសារ ដែលរង់គ្រោះដោយអគ្គិភ័យ។

លោកក៏បានពាំនាំនូវប្រសាសន៍ផ្តាំផ្ញើសួរសុខទុក្ខ ដោយក្តីអាណិតអាសូរពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដល់ប្រជាពលរដ្ឋ ទាំងអស់ ត្រូវមានការប្រុងប្រយ័ត្នខ្ពស់ ពីគ្រោះអគ្គីភ័យ ដែលអាចកើតមានឡេីងគ្រប់ពេល ប្រសិនបើមានការធ្វេសប្រហែស។

អំណោយជូនទាំង៣គ្រួសារ ក្នុង១គ្រួសារ ទទួលបាន៖ អង្ករ៥០គក្រ មី២កេស ត្រីខ ២យួរ ទឹកត្រី២យួរ ទឹកស៊ីអ៉ីវ២យួរ ឃីត (មុង ភួយសារុងក្រម៉ា ) ១កញ្ចប់ តង់១ អាវយឺត ៨ សម្ភារផ្ទះបាយ ១សម្រាប់ និងថវិកា ចំនួន ១លានរៀល។

គួររំលឹកថថាកាលពីម៉ោង៩ និង១០នាទី យប់ថ្ងៃទី១២ ខែធ្នូ ឆ្នាំ២០២១មានហេតុការណ៍អគ្គីភ័យ នៅភូមិកោះគល់ ឃុំកោះរកា ស្រុកកំពង់សៀម ដោយករណីឆ្លងចរន្តអគ្គិសនី បណ្តាលឲ្យរងរបួសម្នាក់ ឆេះម៉ូតូចំនួន ៨គ្រឿង និងថវិការអស់ប្រមាណជិត១ម៉ឺន ដុល្លារផងដែរ។

ផ្ទះដែលត្រូវអគ្គិសភ័យឆេះ ១-ឈ្មោះ វ៉ន វឿន អាយុ ៥៦ឆ្នាំ សង់អំពីឈើប្រក់ក្បឿងទំហំ៧ x១៣ម៉ែត្រ ខូចខាតម៉ូតូចំនួន៣គ្រឿង ថវិកា ៣.០០០ ដុល្លារ មាសចំនួន៨ជីកន្លះ និងសម្ភារក្នុងផ្ទះ
២-ឈ្មោះ ញឹក សាវ៉ុន អាយុ៦៣ឆ្នាំ សង់ពីឈើប្រក់ស័ង្កសី ទំហំ៥x៦ម៉ែត្រ ថវិកា៩០ម៉ឺនរៀល និងសម្ភារៈក្នុងផ្ទះ ៣-ឈ្មោះ ស គុយលឹម អាយុ៦០ឆ្នាំ រងរបួស ផ្ទះទំហំ ៧x១៥ម៉ែត្រ សង់អំពីឈើប្រក់ក្បឿង ម៉ូតូចំនួន ៥គ្រឿង ថវិកា ៦.០០០ ដុល្លារ និងសម្ភារក្នុងផ្ទះ។ ករណីនេះសមត្ថកិច្ចបានប្រេីប្រាស់រថយន្តពន្លត់អគ្គីសភ័យចំនួន៦គ្រឿង និងបាញ់ទឹកពន្លត់អស់ចំនួន១០គ្រឿង ដើម្បីទប់ស្កាត់កុំឲ្យឆេះរាលដាលដល់ផ្ទះជិតខាង៕SRP

ខេត្តកំពង់ចាម៖លោកអ៊ុន ចាន់ដា ប្រធានគណៈកម្មាធិការសាខាកាកបាទក្រហមខេត្ត
នៅព្រឹកមិញនេះបានអញ្ជើញចូលរួមប្រារព្ធទិវាអន្ដរជាតិ នៃអ្នកស្ម័គ្រចិត្ត ៥ធ្នូ ឆ្នាំ២០២១ ក្រោមប្រធានបទ «ស្ម័គ្រចិត្តពេលនេះ ដើម្បីអនាគតយើងទាំងអស់គ្នា បន្តធ្វើសកម្មភាព ដោយមិនឈប់ឈរឡើយ» ដែលបានធ្វើឡើងនៅស្រុកកំពង់សៀម។

លោកអ៊ុន ចាន់ដា បានពាំនាំរំឭក របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះ យុវជន និងអ្នកស្ម័គ្រចិត្តកាកបាទក្រហមកម្ពុជាទាំងអស់ ត្រូវរឹតបន្តឹងកម្លាំងសាមគ្គីភាព ដោយបន្តធ្វើសកម្មភាពមិនឈប់ឈរឡើយ ក្នុងប្រតិបត្តិការមនុស្សធម៌ ជួយដល់ជនងាយរងគ្រោះ និងជនរងគ្រោះឲ្យបានឆាប់រហ័ស ទាន់ពេលវេលា តាមទិសស្លោក « កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល» និងបន្តខិតខំសម្រេចឲ្យបាន បាវចនា «សកម្មភាពនៅមូលដ្ឋាន សម្រេចបានគោលដៅសកល»។ ជាមួយនេះ សូមបងប្អូនរួមជាតិ បន្ដពង្រឹងការការពារសុខភាពឲ្យបានខ្ជាប់ខ្ជួន បន្សាំខ្លួនក្នុងការរស់នៅតាមគន្លងប្រក្រតីភាពថ្មី ក្នុងបរិបទនៃជំងឺកូវីដ-១៩ ដោយប្រកាន់ខ្ជាប់នូវវិធានការសុខាភិបាល«៣ការពារ ៣កុំ» ដើម្បីសុខុមាលភាព ពីបុគ្គលម្នាក់ៗ ក្រុមគ្រួសារជាទីស្រឡាញ់ ក៏ដូចជា សហគមន៍ និងសង្គមជាតិទាំងមូល។

លោកក៏បានប្រគល់ប័ណ្ណសរសើរ ដែលសម្តែងនូវការកោតសរសើរ និងថ្លែងអំណរគុណ របស់សម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា ជូនដល់អ្នកស្ម័គ្រចិត្ត ចំនួន ៥០នាក់ ផងដែរ៕SRP

ខេត្តកំពង់ចាម៖ក្នុងពិធីបិទមហាព្រឹត្តិការណ៍ប្រកួតបាល់ទាត់ដណ្ដើមពានរង្វាន់ VIND សន្តិភាព ឆ្នាំ២០២១ (រដូវកាលទី១) នៅស្រុកស្ទឹងត្រង់ នៅរសៀលថ្ងៃទី១២ ខែធ្នូ ម្សិលមិញ លោក អ៊ុន ចាន់ដា អភិបាលខេត្តកំពង់ចាម បានថ្លែងថា ក្រុមកីឡាករនីមួយៗ ពិតជាមានការរីកចម្រើននិងលេងបានល្អ ទោះជាយ៉ាងនេះក្តីត្រូវខិតខំធ្វើការហ្វឹកហាត់បន្ថែមទៀត ដើម្បីត្រៀមខ្លួនចូលរួមប្រកួតកីឡាអូឡាំពិក ឆ្នាំ២០២៣ខាងមុខនេះ ខណៈកីឡានាំមកនូវសុខភាពល្អផងដែរ។

អភិបាលខេត្តបានថ្លែងថា នេះជាលេីកទី១ហើយដែលខេត្តយើងមានរៀបចំពិធីប្រកួតកីឡា ហើយក៏មានការជួបជុំគ្នាច្រើន បន្ទាប់ពីរងវិបត្តិដោយកូវីដ១៩មួយរយៈពេល អ្វីដែលយើងជួបជុំគ្នាសប្បាយរីករាយទៅបាននេះ គឺដោយសារតែប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន លោកបានខ្នះខ្នែងក្នុងការបញ្ជាទិញយកវ៉ាក់សាំងការពារជំងឺកូវីដ-១៩ចាក់ជូនប្រជាពលរដ្ឋយើងស្រោចស្រពពេញផ្ទៃប្រទេសដោយមិនខ្វះចន្លោះឡេីយ ។

អភិបាលខេត្តកំពង់ចាម ក៏បានអំពាវនាវដល់បងប្អូនប្រជាពលរដ្ឋ ឲ្យចូលរួមជាមួយរាជរដ្ឋាភិបាល ដេីម្បីទប់ស្កាត់ការឆ្លងរីករាលដាលនៃជំងឺកូវីដ-១៩ ជាពិសេសត្រូវរួបរួមគ្នាថែរក្សាសុខសន្តិភាពឲ្យបានគង់វង្សយូរអង្វែង ដេីម្បីបន្តការអភិវឌ្ឍន៍ឲ្យកាន់តែរីកចម្រើនទៅមុខទៀត ព្រោះថាមានសន្តិភាព ទេីបមានការអភិវឌ្ឍន៍។

ក្នុងពិធីនេះដែរ លោកអភិបាលខេត្ត ក៏បានប្រគល់ពានរង្វាន់ចំណាត់ថ្នាក់លេខ ១ នូវថវិកាចំនួន ២០លានរៀល ជូនក្រុមកីឡាករ អធិរាជ ស កំពង់ទ្រាស ខេត្តត្បូងឃ្មុំ ពានរង្វាន់ចំណាត់ថ្នាក់លេខ ២ ថវិកា ១២លានរៀល ជូនក្រុមកីឡាករ ព្រាប ស ពាមជីលាំង ខេត្តត្បូងឃ្មុំ ពានរង្វាន់ចំណាត់ថ្នាក់លេខ ៣ ថវិកា ៦លានរៀល ជូនក្រុមកីឡាករ យុវជន ស ស យ ក ខេត្តកំពង់ចាម និងចំណាត់ថ្នាក់លេខ ៤ ថវិកា ២លានរៀល ជូនក្រុមកីឡាករ ពពកខៀវ ភូមិសយ ក្នុងនោះចំណាត់ថ្នាក់វ័យចំណាស់ មានពីរថ្នាក់ លេខ១ ថវិកា ១លានរៀល និងលេខ២ ថវិកា ៥០ម៉ឺនរៀល ព្រមទាំងរង្វាន់លើកទឹកចិត្តថវិកាមួយចំនួន សម្លៀកបំពាក់ និងសម្ភារកីឡា ជូនដល់ក្រុមកីឡាករ ទាំង១៦ក្រុម ដែលមកពីខេត្តត្បូងឃ្មុំ ក្រចេះ រតនគិរី និងខេត្តកំពង់ចាមផងដែរ៕SRP

ខេត្តកំពង់ចាម៖លោក កៅ សុខអាន អភិបាលរងខេត្តកំពង់ចាម បានថ្លែងថា បេីចង់ពង្រីកបរិមាណអប់រំ គឺត្រូវបន្ថែមសាលារៀន បន្ថែមគ្រូបង្រៀន បន្ថែមសម្ភារសិក្សា ពីព្រោះកុមារដល់វ័យសិក្សាកាន់តែមានការកើនឡើង ពីមួយឆ្នាំទៅមួយឆ្នាំ ចំពោះតម្រូវការទីផ្សារ ក៏ដូចជាសង្គម សុទ្ធតែទាមទាររកធនធានមនុស្សប្រកបដោយគុណភាព និងសមត្ថភាពខ្ពស់ ដោយប្រការនេះ សម្ដេចហ៊ុន សែន និងសម្តេច កិត្តិព្រឹទ្ធបណ្ឌិត ប៊ុន រ៉ានី ប៊ុនសន លោកបានកសាងអគារសិក្សាចំនួន ៣៨០ខ្នង ស្មើនឹង ២,៣៨៦បន្ទប់ ក្នុងនោះ វិទ្យាល័យចំនួន ១១១ខ្នង ស្មើនឹង ៨៤៥បន្ទប់ អនុវិទ្យាល័យចំនួន៤៨ខ្នង ស្មើនឹង ២៩៩បន្ទប់ និងបឋមសិក្សាចំនួន ២២១ខ្នង ស្មើនឹង ១២៤២បន្ទប់ និងបានបំពាក់សម្ភារតុ កៅអី សម្ភារ បរិក្ខារ មានម៉ាស៊ីនដេរ កុំព្យូទ័រ ដល់គ្រឹះស្ថានសិក្សានៅទូទាំងខេត្តកំពង់ចាម ដើម្បីលើកកម្ពស់គុណភាពអប់រំឲ្យ មានតុល្យភាព សមស្របទៅនឹងការពង្រីកបរិមាណអប់រំផងដែរ។

លោក កៅ សុខអាន ថ្លែងបែបនេះ រសៀលថ្ងៃទី១០ ខែធ្នូ ម្សិលមិញ ក្នុងពិធីប្រគល់ពានរង្វាន់“ សម្តេច តេជោសែន “ សម្រាប់លាភីនាយកល្អ គ្រូបង្រៀនឆ្នើមភាសាខ្មែរ និងគណិតវិទ្យាថ្នាក់ទី១ដល់ថ្នាក់ទី៣ និងពានរង្វាន់សាលាស្អាតឆ្នាំសិក្សា២០២០-២០២១។

លោក ថោង បូរ៉ាន់ អនុរដ្ឋលេខាធិការក្រសួងអប់រំយុវជននិងកីឡា មានប្រសាសន៍ថា សម្តេចហ៊ុន សែន លោកមានចក្ខុវិស័យខ្ពស់ណាស់ ក្នុងការដឹកនាំបណ្តុះបណ្តាលធនធានមនុស្ស ដូច្នេះសូមឲ្យលោកគ្រូ អ្នកគ្រូ បន្តការយកចិត្តទុកដាក់បំពេញការងារប្រកបដោយមនសិការរបស់ខ្លួន ជាពិសេសត្រូវពង្រឹងគុណភាពអប់រំ បន្ថែមទៀត ដេីម្បីកសាងធនធានមនុស្ស ប្រកបដោយភាពជោគជ័យ។

លោកលី ម៉េងសាន ប្រធានមន្ទីរអប់រំយុវជននិងកីឡាខេត្តកំពង់ចាម បានឲ្យដឹងថា ពានរង្វាន់សម្តេចតេជោ សម្រាប់លាភីគ្រូបង្រៀនល្អ និងគ្រូបង្រៀនឆ្នេីម ជាប់ចំណាត់ថ្នាក់លេខ ៣ ទទួលបានថវិកាលេីកទឹកចិត្ត ចំនួន ៣លានរៀល មានចំនួន ៣នាក់ សម្រាប់លាភីអំណានចំណាត់ថ្នាក់លេខ ២ និងនិពន្ធរឿងប្រលោមលោកខ្លី ថ្នាក់លេខ ៣ ទទួលបានថវិកា ២លានរៀល ចំនួន ២នាក់ ចំពោះការប្រកួតប្រជែងស្នាដៃយុវជនសតវត្សទី២១ ជ័យលាភីលេខ ១ ទទួលបាន មេដាយមាស និងថវិកាលើកទឹកចិត្ត ៤លានរៀល បានទៅលើក្រុមយុវជននៅវិទ្យាល័យហ៊ុនសែនពាមជីកង ស្រុកកងមាស ដោយឡែកការប្រកួតប្រជែងសិស្សពូកែគណិតវិទ្យា ទទួលជ័យលាភីមេដាយប្រាក់ចំនួន ៤ មេដាយសំរឹទ្ឋ ៨ មេដាយកិត្តិយស ២២ បានទៅលើយុវសិស្សនៅវិទ្យាល័យហ៊ុនសែនកំពង់ចាម។
ការប្រកួតប្រជែងសិស្សពូកែគណិតវិទ្យាការីប៊ូជុំទី១ និងជុំទី២ ទទួលជ័យលាភីមេដាយមាស២ ប្រាក់ចំនួន៤ និងមេដាយសំរឹទ្ឋ១៦ បានទៅលើ សិស្សបឋមសិក្សា អនុវត្តហ៊ុន សែន ក្រុងកំពង់ចាម ៕SRP

Sponsored

ខេត្តកំពង់ចាម៖លោក អ៊ុន ចាន់ដា អភិបាលខេត្តកំពង់ចាម បានថ្លែងថា សន្តិភាពត្រូវបានចាត់ទុកជាមូលដ្ឋានគ្រឹះនៃសិទ្ធិមនុស្ស និងការអភិវឌ្ឍ ហើយតម្លៃសន្តិភាពត្រូវបានចារិតទុកក្នុងក្រអៅបេះដូង និងជាសេចក្តីត្រូវការចាំបាច់បំផុតរបស់ប្រជាជនកម្ពុជាទាំងមូល។

លោកថ្លែងយ៉ាងដូច្នេះក្នុងអង្គសិក្ខាសាលាស្តីពីការផ្សព្វផ្សាយរបាយការណ៍ជាតិ និងអនុសាសន៍នៃយន្តការពិនិត្យជាសកលតាមការកំណត់(UPR) ដែលបានធ្វើឡើងនៅព្រឹកមិមិញនេះនៅសាលាខេត្តកំពង់ចាម ក្រោមវត្តមាន លោក កែវ រ៉េមី រដ្ឋមន្រ្តីប្រតិភូអមនាយករដ្ឋមន្ត្រី និងជាប្រធានគណៈកម្មាធិការសិទ្ធមនុស្សកម្ពុជា និងលោក ខ្លូត ផន ប្រធានក្រុមប្រឹក្សាខេត្ត។

លោក អ៊ុន ចាន់ដា បានលេីកឡេីងទៀតថា រាជរដ្ឋាភិបាលកម្ពុជា បានយកចិត្តទុកដាក់ខ្ពស់ក្នុងការការពារសន្តិភាព ការគោរពសិទ្ធិមនុស្ស និងការអភិវឌ្ឍលើគ្រប់វិស័យ ដែលកិច្ចការទាំងនេះមិនត្រូវកាត់ផ្តាច់ ឬរំលងពីការគោរពសិទ្ធិមនុស្ស និងការចូលរួមពីប្រជាពលរដ្ឋគ្រប់រូបនោះឡើយ ហេីយកិច្ចការទាំងនេះអាចប្រព្រឹត្តិទៅបាន គឺអាស្រ័យលើកត្តាសន្តិភាពផងដែរ។

ក្នុងឱកាសនោះដែរ លោកអភិបាលខេត្ត ក៏បានថ្លែងអំណរគុណ ចំពោះគណៈកម្មាធិការសិទ្ធិមនុស្សកម្ពុជាដែលបានជ្រើសរើសយកខេត្តកំពង់ចាម សម្រាប់ការរៀបចំសិក្ខាសាលានេះឡើង ក្នុងន័យផ្សព្វផ្សាយឱ្យយើងទាំងអស់គ្នាបានដឹងអំពីរបាយការណ៍ជាតិ និងអនុសាសន៍ នៃយន្តការជាសកលតាមកាលកំណត់ (UPR) ដែលជាយន្តការមួយនៃអង្គការសហប្រជាជាតិដែលពិនិត្យលើគ្រប់វិស័យពាក់ព័ន្ធនឹងសិទ្ធិមនុស្សនៅកម្ពុជារួមមាន សិទ្ធិស្រ្តី សិទ្ធិកុមារ សិទ្ធិសេរីភាពបញ្ចេញមតិ សិទ្ធិទទួលបានការអប់រំ និងសិទ្ធិទទួលបានព័ត៌មាន ជាដើម។

លោក កែវ រ៉េមី បានលើកឡើងថា សម្តេចតេជោ ហ៊ុន សែន នាយករដ្ឋមន្ត្រីកម្ពុជា លោកយកចិត្តទុកដាក់ខ្លាំងណាស់ អំពីសិទ្ធិរស់រានមានជីវិត បន្ទាប់ពីរំដោះប្រទេសជាតិចេញពីភ្នក់ភ្លើងសង្គ្រាម ហើយបាននាំមកនូវសុខសន្តិភាព ដោយមានការអភិវឌ្ឍន៍លេីគ្រប់វិស័យ ព្រមជាមួយការការពារ និងលើកកម្ពស់សិទ្ធិមនុស្ស នីតិរដ្ឋ ផងដែរ៕SRP

ខេត្តកំពង់ចាម៖អភិបាលខេត្តកំពង់ចាម លោក អ៊ុន ចាន់ដា បានប្រាប់មន្ត្រីជំនាញពាក់ព័ន្ធឲ្យចុះពិនិត្យ និងដោះស្រាយ ករណីរំលោភបំពានដីចំណីផ្លូវ និងការសាងសង់សំណង់មួយចំនួនធ្វេីឲ្យប៉ះពាល់ដល់ ប្រឡាយទឹក ស្ថិតនៅក្នុងឃុំមេសជ្រៃ ស្រុកស្ទឹងត្រង់ ខេត្តកំពង់ចាម។

ការណែនាំយ៉ាងដូច្នេះក្នុងកិច្ចប្រជុំសាមញ្ញលើកទី៣១ អាណត្តិទី៣ របស់ក្រុមប្រឹក្សាខេត្តកំពង់ចាម នៅព្រឹកមិញនេះ។

លោក អ៊ុន ចាន់ដា បានថ្លែងថា ចំពោះករណីរំលោភបំពានដីចំណីផ្លូវ និងការសាងសង់សំណង់មួយចំនួនធ្វេីឲ្យប៉ះពាល់ដល់ប្រឡាតទឹកខាងលើ ដែលលោកសមាជិកក្រុមប្រឹក្សាខេត្ត បានលើកឡើងនេះ សូមឲ្យ លោក ហេង វណ្ណនី អភិបាលរងខេត្ត ដឹកនាំមន្ត្រីពាក់ព័ន្ធ ដែលមានមន្ទីររ៉ែនិងថាមពល មន្ទីរធនធានទឹកនិងឧតុនិយម មន្ទីររៀបចំដែនដី នគរូបនីយកម្ម សំណង់ និងសុរិយោដី និងមន្ទីរសាធារណការនិងដឹកជញ្ជូនខេត្ត រួមនឹងអាជ្ញាធរមូលដ្ឋាន ចុះពិនិត្យ ជាពិសេសគឺត្រូវធ្វើការដោះស្រាយនៅនឹងកន្លែងតែម្ដង។ ប្រសិនជាពិនិត្យទៅឃេីញថាមានបញ្ហាមិនប្រក្រតីណាមួយនោះ ហើយក្នុងនោះក៏ត្រូវអញ្ជើញគូរភាគី រវាងដេីមបណ្តឹង និងអ្នកពាក់ព័ន្ធឲ្យចូលរួមផងដែរ។

ក្នុងកិច្ចប្រជុំនេះដែរ លោក ខ្លូត ផន ប្រធានក្រុមប្រឹក្សាខេត្តកំពង់ចាម បានលើកយកសេចក្តីព្រាងរបៀបវារៈសំខាន់ៗ មកពិភាក្សា រួមមាន ១-ពិនិត្យ និងអនុម័តសេចក្តីព្រាងកំណត់ហេតុនៃកិច្ចប្រជុំសាមញ្ញលើកទី៣០ អាណត្តិទី៣ របស់ក្រុមប្រឹក្សាខេត្ត។
២-ពិនិត្យ ពិភាក្សា និងអនុម័តសេចក្តីព្រាងរបាយការណ៍បូកសរុបលទ្ធផលការងារ ប្រចាំខែវិច្ឆិកា និងលេីកទិសដៅការងារប្រចាំខែធ្នូ ឆ្នាំ២០២១ របស់រដ្ឋបាលខេត្តកំពង់ចាម។ ៣-ពិនិត្យ ពិភាក្សា និងអនុម័តសេចក្តីព្រាងកម្មវិធីវិនិយោគបីឆ្នាំរំកិល (២០២២-២០២៤) របស់រដ្ឋបាលខេត្ត។ ៤-ពិនិត្យ ពិភាក្សា និងអនុម័តសេចក្តីព្រាងប្រតិទិនការងារ កម្មវិធីវិនិយោគបីឆ្នាំរំកិល (២០២៣-២០២៥) របស់រដ្ឋបាលខេត្ត។ ៥-បញ្ហាផ្សេងៗ៕SRP

ខេត្តកំពង់ចាម៖ក្រុមការងារត្រួតពិនិត្យការដាក់តាំងផ្ទាំងផ្សព្វផ្សាយផ្សេងៗខេត្តកំពង់ចាម នៅ

រសៀលថ្ងៃទី៨ ខែធ្នូ ម្ម្សិលមិញ បានចុះត្រួតពិនិត្យ និងណែនាំដល់មូលដ្ឋានអាជីវកម្មក្នុងក្រុងកំពង់ចាម ក្នុងគោលបំណងត្រួតពិនិត្យ របៀបសរសេរអក្សរលើផ្ទាំងយីហោ ផ្ទាំងផ្សាយពាណិជ្ជកម្ម និងផ្ទាំងសញ្ញាផ្សេងៗ។

ក្រុមការបានឲ្យដឹងថាការចុះត្រួតពិនិត្យដោយឲ្យអាជីវកម្មនានា ត្រូវគោរពតាមគោលការណ៍ដែលមានចែងក្នុងប្រកាសឲ្យបានត្រឹមត្រូវ ដោយត្រូវប្រើអក្សរជាតិ នៅខាងលើទំហំធំជាងអក្សរបរទេសពីរដង។ ចំណែកអក្ខរាវិរុទ្ធត្រូវគោរពតាមក្បួនវេយ្យាករណ៍ និងវេចនានុក្រមខ្មែររបស់សម្តេចព្រះសង្ឃរាជព្រះមហា សុមេធាធិបតីជោតញ្ញាណោ ជួន ណាត រីឯគំនូររូបភាពដែលភ្ជាប់ជាមួយផ្ទាំងត្រូវរក្សាឲ្យមានសោភណ្ឌភាព និងលក្ខណៈថ្លៃថ្នូររបស់ជាតិផងដែរ។

ជាមួយគ្នានោះក្រុមការងារក៏បានជំរុញលើការលើកស្លាកអាជីវកម្ម ឲ្យបានត្រឹមត្រូវ តាមការកំណត់ ព្រមទាំងជំរុញឲ្យអាជីវកម្ម ដែលមិនទាន់មានអាជ្ញាប័ណ្ណ ឬវិញ្ញាប័ត្រចុះបញ្ជីពាណិជ្ជកម្ម ឲ្យមកសុំច្បាប់ឲ្យបានត្រឹមត្រូវ ព្រមទាំងផ្សព្វផ្សាយលិខិតបទដ្ឋានគតិយុត្តពាក់ព័ន្ឋផ្សេងៗ។

ក្រុមការងារបានបញ្ជាក់ថាជាលទ្ធផល បានចុះពិនិត្យអាជីវកម្មចំនួន៥ទីតាំង ដែលបានលើកស្លាកជាភាសាបរទេស ដោយបានពន្យល់ណែនាំអំពីច្បាប់ ការលើកស្លាកអាជីវកម្មអនុលោមតាមច្បាប់ ព្រមទាំងជំរុញឲ្យគាត់សុំអាជ្ញាប័ណ្ណប្រកបអាជីវកម្ម ឲ្យបានឆាប់ និងកែសម្រួលស្លាកយីហោអាជីវកម្ម ឲ្យបានត្រឹមឡើងវិញផងដែរ៕SRP

ខេត្តកំពង់ចាម៖អភិបាលខេត្តកំពង់ចាម អ៊ុន ចាន់ដា នៅថ្ងៃទី៧ ខែធ្នូ ម្សិលមិញ បានវេរប្រគេនព្រះសង្ឃ និងប្រគល់ឈាបនដ្ឋានដល់គណៈកម្មការ អាចារ្យ វត្តជោតនារាមបឹងកុក ទុកសម្រាប់ប្រើប្រាស់ ទៅតាមតម្រូវការ នៃព្រះពុទ្ធសានា បន្ទាប់ពីបានជួសជុលកែលម្អ និងកសាង រួចរាល់ជាស្ថាពរ នូវឈាបនដ្ឋានថ្មី ១កន្លែង ស្ថិតក្នុងវត្តជោតនារាមបឹងកុក នៃសង្កាត់បឹងកុក ក្រុងកំពង់ចាម។

លោក អ៊ុន ចាន់ដា មានប្រសាសន៍ថា ក្នុងរយៈពេលកន្លងមក យើងបានយកឈាបនដ្ឋាន វត្តបឹងកុកនេះ ធ្វើជាទីកន្លែង សម្រាប់បូជាសព ជូនដល់ប្រជាពលរដ្ឋ ដែលបានស្លាប់បាត់បង់ជីវិត ដោយសារជម្ងឺកូវីដ ១៩។ ប៉ុន្តែដោយឈាបនដ្ឋាន នៅក្នុងអារាមនេះ មានសភាពចាស់ទ្រុឌទ្រោម មិនអាចរាប់រងដល់កិច្ចការបូជាសព បានចំនួនច្រើនក្នុង១ថ្ងៃៗ ដែលជាការឆ្លើយតបទៅនឹងតម្រូវការតាមវិធានការណែនាំ របស់រដ្ឋាភិបាល លោកក៏សម្រេចចិត្តកសាងនូវឈបនដ្ឋានថ្មីបន្ថែមទៀត និងជួសជុលកែលម្អឈាបនដ្ឋានចាស់ ឡើងវិញ នៅលើទីតាំងចាស់ ដើម្បី ទុកជាប្រយោជន៍ ដល់ប្រជាពលរដ្ឋប្រើប្រាស់ ទៅតាមតម្រូវការជាក់ស្ដែង។ ទន្ទឹមនឹងនោះដែរ ដើម្បីសម្រួលដល់ប្រជាពលរដ្ឋ ក៏ដូចជាកិច្ចការអាជ្ញាធរ យើងក៏បានជ្រើសរើសយកទីតាំង ២កន្លែង គឺស្ថិតនៅវត្តតាមាង និងវត្តកោះប្រាក់ ដើម្បីធ្វើការបូជាសព អ្នកបាត់បង់ជីវិត ដោយសារជម្ងឺកូវីដ ១៩ ជាបណ្ដោះអាសន្នសិន ទម្រាំឈាបនដ្ឋានថ្មីនេះ បានជួសជុល និងសាងសង់រួចរាល់ជាស្ថាពរនោះ។ ដូច្នេះថ្ងៃនេះ ឈាបនដ្ឋានថ្មី បានស្ថាបនារួចរាល់ជាស្ថាពរហើយ ក្នុងនាមក្រុមប្រឹក្សាខេត្ត ក៏ដូចជា គណៈអភិបាលខេត្ត យើងក៏បានធ្វើពិធីវេរប្រគេន ឬប្រគល់ជូនព្រះសង្ឃ ក៏ដូចជា គណៈកម្មការអាចារ្យវត្តបឹងកុក ដើម្បី យកសមិទ្ធផលនេះ ទៅចាត់ចែងប្រើប្រាស់ តាមតម្រូវការ នៃព្រះពុទ្ធសាសនា តទៅថ្ងៃអនាគត។ ឆ្លៀតក្នុងឱកាសនោះដែរ លោកអភិបាលខេត្ត ក៏បានថ្លែងអំណរគុណ និងអំណរព្រះគុណ ដល់ព្រះគ្រូចៅអធិការ និងគណៈកម្មការ អាចារ្យវត្តទាំង ៣ ដែលតែងតែសហការល្អ ជាមួយអាជ្ញាធរខេត្ត ក៏ដូចជា ប្រមុខរាជរដ្ឋាភិបាល ក្នុងការចូលរួមចំណែក ប្រយុទ្ធប្រឆាំងនឹងជម្ងឺកូវីដ ១៩ នៅក្នុងខេត្តកំពង់ចាម ក៏ដូចជា នៅក្នុងប្រទេសកម្ពុជាផងដែរ។

ព្រះចៅអធិការវត្តបឹងកុក ក៏បានសម្ដែងនូវទឹកព្រះទ័យ សប្បាយរីករាយ ក្រៃលែង ចំពោះ ឈាបនដ្ឋានថ្មី ខាងលើនេះ ក៏ព្រោះថា បើព្រះអង្គកៀងគរបច្ច័យពីពុទ្ធបរិស័ទ ក៏ត្រូវការ ពេលវេលាយូរ ទម្រាំងលេចចេញជាសមិទ្ធផល ដូចថ្ងៃនេះ។ ជាមួយគ្នានោះដែរ តាំងនាមព្រះចៅអធិការ វត្តទាំង៣ ព្រះអង្គ ក៏បានសម្ដែងនូវទឹកព្រះទ័យរីករាយ ចំពោះ សមិទ្ធផលជាច្រើនទៀត ដែលខេត្តកំពង់ចាមសម្រេចបាន ទាំងផ្នែកអាណាចក្រ និងផ្នែកពុទ្ធចក្រ នាពេលកន្លងមក ក្រោមការដឹកនាំ ពីអាជ្ញាធរគ្រប់ជាន់ថ្នាក់ តាមរយៈការរួមគ្នាគិត រួមគ្នាធ្វើ និងរួមគ្នាដោះស្រាយ ព្រមទាង ការរួមគ្នាទទួលខុសត្រូវ ដោយឈរលើស្មារតីសាមគ្គីភាព ជាធ្លុងតែមួយ៕SRP

ខេត្តកំពង់ចាម៖អាជ្ញាធរខេត្ត បានសម្រេច
ក្រុងពាលីបើកការដ្ឋានសាងសង់វិមានឯករាជ្យ ស្ថិតនៅក្នុងភូមិទី៦ សង្កាត់វាលវង់។

ពិធីធ្វើឡើងនៅព្រឹកមិញនេះ ដោយមានការចូលរួមពីលោក ខ្លូត ផន ប្រធានក្រុមប្រឹក្សាខេត្តកំពង់ចាម និងមន្ត្រីពាក់ព័ន្ធមួយចំនួនផងដែរ។

ថ្លែងក្នុងពិធីក្រុងពាលី លោក អ៊ុន ចាន់ដា អភិបាលខេត្តកំពង់ចាម បានថ្លែងថា ការកសាងវិមានឯករាជ្យ ពិតជាមានសារៈសំខាន់ណាស់ ដើម្បីរំលេចនូវស្នាព្រះហស្ថ ជាប្រវត្តិសាស្ត្រ នៃការអបអរសាទរ បុណ្យឯករាជ្យជាតិ ក្រោមព្រះរាជបូនីយកិច្ចដឹកនាំដ៏ខ្ពង់ខ្ពស់ របស់ព្រះបរមរតនកោដិ ព្រះបាទ នរោត្ដម សី ហនុ ដែលបានទាមទារឯករាជ្យ ពីអាណានិគមនិយមបារាំង នាថ្ងៃ៩ វិច្ឆិកា ឆ្នាំ១៩៥៣។
លោក អ៊ុន ចាន់ដា បានបន្តថា ក្រៅពីនោះ ការកសាងសង់សំណង់ប្រវត្តិសាស្ត្រនេះ ក៏ជាផ្នែកមួយ បានបន្សល់ទុកនូវស្នាដៃប្រវត្តិសាស្ត្រ ជូនដល់ប្រជាពលរដ្ឋ ក៏ដូចជាកូនចៅជំនាន់ក្រោយ។ ទន្ទឹមគ្នានោះ សំណង់វិមានឯករាជ្យនេះ ក៏បានចូលរួមចំណែក ក្នុងការលើកកម្ពស់សោភណ្ឌភាព ក្រុងកំពង់ចាម និងការទាក់ទាញភ្ញៀវទេសចរណ៍ជាតិ អន្តរជាតិ ពេលមកលេងកំសាន្ត ក្នុងទឹកដីខេត្តកំពង់ចាម ក៏ដូចជាការចូលរួមប្រលងប្រណាំងចលនាទីក្រុងស្អាត នាឆ្នាំបន្តបន្ទាប់ខាងមុខផងដែរ។

លោកអភិបាលខេត្ត បានបញ្ជាក់ដែរថា ផ្អែកតាមផែនការសាងសង់ គម្រោងនេះ គឺចាប់ផ្ដើមអនុវត្តចាប់ពីថ្ងៃទី៦ធ្នូ នេះតទៅ និងគ្រោងបញ្ចប់ ក្នុងរយៈពេល ១ឆ្នាំ ហើយនៅថ្ងៃទី៩ វិច្ឆិកា នៃការប្រារព្ធខួបអនុស្សាវរីយ៍ បុណ្យឯករាជ្យជាតិ សម្រាប់ឆ្នាំ២០២២ យើងនឹងយកថ្ងៃនោះ ដើម្បីដាក់សម្ពោធនូវសមិទ្ធផលនេះ។

គួរកត់សម្គាល់ថា ទីតាំងដែលអាជ្ញាធរ សម្រេចសាងសង់វិមានឯករាជ្យ នាពេលនេះ គឺស្ថិតនៅចំណុចផ្លូវកៅស៊ូ ខាងមុខច្រកចូលទៅសាលាគរុកោសល្យ ខេត្តកំពង់ចាម។ ជាមួយនោះ អាជ្ញាធរ ក៏បានសាងសង់ពង្រីកផ្លូវឲ្យធំទូលាយ នៅចំណុចរង្វង់មូល ជុំវិញវិមានឯករាជ្យនេះ រួមទាំង ការពង្រីកផ្លូវបន្ថែម ចាប់ពីចំណុចរង្វង់មូលនាគព័ន្ធ រហូតមកដល់ចំណុចទន្លេអុំ។ ដោយឡែកដើម្បី សម្រួលដល់កិច្ចដំណើរការ នៃការដ្ឋានអាជ្ញាធរ ក៏បានផ្អាកការចរាចរណ៍ជាបណ្ដោះអាសន្ន ត្រង់ចំណុចកំណាត់ផ្លូវលេខ ៧ចាស់ មួយរយៈសិន ដោយបង្វែទិសចរាចរណ៍ តាមផ្លូវលេខ ៧ ថ្មី ឬវាងតាមទន្លេអ៊ុំវិញ ផងដែរ៕SRP