ខេត្តសៀមរាប – Page 204

ខេត្តសៀមរាប៖ យុវជនម្នាក់ចងកសម្លាប់ខ្លួនបង្កឲ្យមានការភ្ញាក់ផ្អើល។ហេតុការណ៍បានកើតឡើងនៅ នៅថ្ងៃទី១៧ខែកក្កដាឆ្នាំ២០២០វេលាម៉ោង១៦និង០០នាទី ចំណុចខ្ទមចាំស្រែប្រាំង) ស្ថិតនៅត្រពាំងអណ្ដូង ដែលមានចម្ងាយពីមាត់ត្រពាំងប្រហែល២០ម៉ែត្រ ឃុំសំបួរ ស្រុកក្រឡាញ់ ខេត្តសៀមរាប ។ ជនរងគ្រោះឈ្មោះ យ៉ាង សាល អាយុ១៨ឆ្នាំ រស់នៅភូមិដំណាក់ខ្ចាស់ ឃុំសំបួរ ស្រុកក្រឡាញ់ ខេត្តសៀមរាប។

សមត្ថកិច្ចបានឲ្យដឹងថាករណីនេះមុនកើតហេតុម្ដាយជនរងគ្រោះបានស្ដីបន្តោសកូន កុំអោយមើលទូរស័ព្ទយូរពេកឆាប់ហូបបាយហូបទឹក ឆាប់បានទៅមើលស្រែប្រាំង។ ពេលនោះជនរងគ្រោះមិនបានឆ្លើយតបអ្វីទេ ក៏បានយកម៉ូតូជិះទៅទិសខាងកើតភូមិ តម្រង់ទៅខ្ទមស្រែប្រាំង ពេលនោះឈ្មោះ អ៉ឹម សុផាន់ ភេទប្រុសអាយុ២៤ឆ្នាំរស់នៅភូមិជាមួយគ្នាត្រូវជាបងជីដូនមួយបានឃើញអាការ:ជនរងគ្រោះដូចជាខឹងនិងម្ដាយស្ដីបន្ទោសក៏បានជិះម៉ូតូតាមពីក្រោយ។ ប៉ុន្តែដោយជិះតាមមិនទាន់ជនរងគ្រោះ ពេលទៅដល់ខ្ទមស្រែប្រាំងក៏បានប្រទះឃើញជនរងគ្រោះធ្វើអត្តឃាតចងកសម្លាប់ខ្លួននឹងខ្ទមស្រែប្រាំងបាត់ទៅហើយ។ ពេលនោះឈ្មោះ អ៉ឹម សុផាន់ បានសង្ស័យថាមិនទាន់ដាច់ខ្យល់ ក៏បានកាត់ចំណង ហើយក៏ហៅបងប្អូនសាច់ញាតិ លើកដាក់ម៉ូតូយកជនរងគ្រោះ ទៅសង្រ្គោះនៅ មណ្ឌលសុខភាពឃុំសំបួរ ពេលទៅដល់មណ្ឌលសុខភាព ក្រុមគ្រូពេទ្យបានពិនិត្យហើយប្រាប់ថា ជនរងគ្រោះបានដាច់ខ្យល់ស្លាប់បាត់ទៅហើយ។

បើតាមសមត្ថកិច្ចបានឲ្យដឹងថាក្រោយពីបានទទួលព័ត៌មានកម្លាំងជំនាញបច្ចេកទេសនៃអធិការដ្ឋាននគរបាលស្រុកបានសហការជាមួយគ្រូពេទ្យបានចុះទៅដល់កន្លែងកើតហេតុបានធ្វើកោសល្យពិច័យនៅកន្លែងកើតហេតុដោយបានពិនិត្យឃើញថាមិនមែនពាក់ព័ន្ធនិងរឿងឃាតកម្មទេ។តាមការសន្និដ្ឋានរបស់សម្ថកិច្ចនិងគ្រូពេទ្យបានបញ្ជាក់ថាជនរងគ្រោះពិតជាស្លាប់ដោយសារចងកពិតប្រាកដមែន។ សាកសពបានធ្វើកំណត់ហេតុប្រគល់ជូន ឪពុកម្តាយ ធ្វើបុណ្យតាមប្រពៃណី៕SRP

ខេត្តសៀមរាប៖ លោកយាយអាយុ១១៥ឆ្នាំ រួមទាំងកូនស្រីមេម៉ាយអាយុជាង៦០ម្នាក់ផង បានអង្គុយអោបរូបថតអត្តសញ្ញាណផ្ទះទេវតា ដែលផ្តល់អោយដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដង្ហោយសុំអាជ្ញាធរគ្រប់ជាន់ថ្នាក់ ជួយអន្តរាគមន៍ ខណ:នៅសុខៗមានបុគ្គលម្នាក់ទៅសង់ផ្ទះលើដីរបស់គាត់ ហើយគ្នាននណាជួយរកខុសត្រូវឲ្យគាត់។

ស្រ្តីវ័យជាង៦០ឆ្នាំឈ្មោះ លួន ថន ដែលត្រូវជាកូនបង្កើតរបស់លោកយាយឈ្មោះ មឿន អាន អាយុ១១៥ឆ្នាំបានរៀបរាប់ថា ដីដែលត្រូវគេរំលោភបំពានទាំកម្រោលនោះ មានទំហំ២៤ម៉ែត្រគុណ៤០០ម៉ែត្រ ស្ថិតនៅភូមិរំចេក ឃុំស្វាយលើ ស្រុកស្វាយលើ ខេត្តសៀមរាប ជាប្រភេទដីស្រែ។ ដីនោះត្រូវបានឈ្មោះ ដួង នី ភេទប្រុស ជាអ្នកនៅក្បែរគ្នា ចូលមករំលោភបំពានដោយសង់ផ្ទះនិងបោះបង្គោលរបង កាលពី២ឆ្នាំមុន (ឆ្នាំ២០១៨)។ ក្នុងពេលភ្លាមៗរូបគាត់បានទៅសុំអន្តរាគមន៍ ពីថ្នាក់ឃុំនិងស្រុក តែមន្ត្រីទាំងនោះឆ្លើយថា ដីរបស់លោកយាយមានការក្តីក្តាំគ្នាដល់តុលាការហើយ ចឹងថ្នាក់ឃុំនិងស្រុកមិនអាចដោះស្រាយទេ។ ស្ត្រីលួនថន បន្តថា តាមពិតដីរបស់គាត់ ពីមុនមានទំនាស់ជាមួយអ្នកនៅខេត្តផ្សេង ហើយត្រូវបានតុលាការ សម្រេចអោយគ្រួសារគាត់ឈ្នះក្តី ប្រគល់ដីអោយគ្រប់គ្រងអាស្រ័យផល តាំងពីឆ្នាំ២០១៦មកម្លេះ។ តែពេលនេះអ្នកក្បែរខាងមករំលោភដោយសង់ផ្ទះនៅលើដី ចុងឆ្នាំ២០១៨ថ្មីៗនេះឯង។ ក្រៅពីមិនដោះស្រាយ កាលថ្ងៃ ទី២៩ខែមិថុនាឆ្នាំ២០២០ មន្ត្រីស្រុកឈ្មោះ សាត ពៅ បានទៅវាស់ដីគាត់ ហើយតម្រូវអោយផ្តិតមេដៃប្រគល់ដីនោះអោយទៅគេ តែរូបគាត់មិនយល់ព្រម។លុះថ្ងៃ ទី១ខែកក្កដានេះ មន្ត្រីឈ្មោះសាត ពៅ បានទៅប្រគល់ដីរបស់គាត់២៤គុណ៤០០ម៉ែត្រអោយទៅឈ្មោះដួង នី ដែលជាបុគ្គលសង់ផ្ទះលើដីរបស់គាត់ថែមទៀតតែម្តង។
ស្ត្រីឈ្មោះលួន ថន បន្ថែមថា ដោយឃើញមន្ត្រីប្រើអំណាច ដោយយកដីគាត់ទៅប្រគល់អោយគេ រូបគាត់បានទៅដាក់ពាក្យប្តឹងនៅ គណ:កម្មការសម្រប សម្រួលឃុំស្វាយលើ កាលពីថ្ងៃទី៣ខែកក្កដាឆ្នាំ ២០២០នេះ។
ក្នុងវ័យ១១៥ឆ្នាំលោកយាយមឿង អាន រួមទាំងកូនស្រីមេម៉ាយវ័យជាង៦០ឆ្នាំ បានអង្គុយអោបរូបថត អត្តសញ្ញាណតំណាងផ្ទះទេវតា ដែលផ្តល់អោយដោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ហើយរៀបរាប់ថា ដីកេរ្តិ៍ពីដូនតានេះ ចាប់ផ្តើម មានទំនាស់នៅមុនឆ្នាំ២០១០ តាំពីរូបគាត់អាយុ១០៤ឆ្នាំ។ លុះព័ត៌មានបានផ្សព្វផ្សាយ ជាបន្តបន្ទាប់ នៅដើមឆ្នាំ២០១២ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអោយអភិបាលខេត្ត គឺលោកសូ ភិរិន្ទ ចុះមកដោះ ស្រាយបញ្ចប់ ហើយប្រទានផ្ទះទេវតា មួយខ្នងដល់ គ្រួសារគាត់ទៀត។ ក្នុងពេលសម្ពោធផ្ទះ លោកជំទាវហ៊ុន ម៉ាណា បានចុះមកផ្ទាល់ដោយថតរូបនិងផ្ទះ ទុករហូតមកទល់ពេលនេះ។ នៅឆ្នាំ២០១៦ តុលាការខេត្តសៀមរាប បានមកប្រកាសអោយគ្រួសារគាត់ឈ្នះក្តី ហើយប្រគល់ដីនេះអោយកាន់កាប់អាស្រ័យផលរហូតមក។ តែពេលនេះ នៅសុខៗឈ្មោះដួង នី មកធ្វើផ្ទះលើដីរបស់គាត់ ក្រៅពីនោះ មន្ត្រីស្រុកឈ្មោះសាត ពៅ មកប្រគល់ដីនោះអោយគេទាំងគ្រួសារគាត់មិនបានព្រមព្រៀង រួបគំរាមកំហែងអោយដើរប្តឹង។មិនដឹងថា មន្ត្រីខាងលើនេះ ទទួលបានផលអ្វីនោះទេ ព្រោះគេឃើញគ្រួសារគាត់ សុទ្ធតែស្រីៗវ័យចំណាស់។

ម្តាយនិងកូនទាំងពី បានដង្ហោយសុំអាជ្ញាធរគ្រប់ជាន់ថ្នាក់ មេត្តាជួយអន្តរាគមន៍ អោយបុគ្គលខាងលើរើផ្ទះចេញពីដីរបស់គាត់ ព្រោះគេសង់នៅ២ឆ្នាំមកហើយ។ ក្រៅពីនោះ ក៏សុំរក្សាគ្រប់គ្រង និងអាស្រ័យផលលើដីរបស់គាត់វិញផងដែរ។ ត្បិតដីនេះពួកគាត់មានលិខិតកាន់កាប់ស្របច្បាប់។

លោកស្រី គឿន ព្រម មេឃុំស្វាយលើ បានអោយដឹងតាមទូរស័ព្ទថា ខាងឃុំបានទទួលបណ្តឹងនេះហើយ។ លោកស្រីនឹងធ្វើរបាយការណ៍បញ្ជូនទៅស្រុកដើម្បីពិនិត្យ។

ចំណែកលោក អ៊ាង ពិសិទ្ធ អភិបាលស្រុកស្វាយលើ ក៏បានថ្លែងតាមទូរស័ព្ទ នាល្ងាចថ្ងៃទី១៧ខែកក្កដានេះថា លោកទើបតែទទួលដំណឹងនេះ។ តែលោកនិងអោយមន្ត្រីចុះទៅសិក្សាម្តងទៀត លទ្ធផលយ៉ាងណានោះ លោកនឹងដោះស្រាយតាមជាក់ស្តែង។ លោកបន្តថា ចំពោះការសុំអោយឈ្មោះដួង នី រើផ្ទះចេញពីលើដីកំពុងទំនាស់ តាមការសុំរបស់ឈ្មោះលួន ថន ធ្វើមិនទាន់បាននោះទេ។ ព្រោះរងចាំការចុះស្រាវជ្រាវជាថ្មីសិន។ លោកអភិបាលបញ្ជាក់ថា ឈ្មោះ សាត ពៅ គឺជាអភិបាលរងស្រុក គាត់ជាអ្នកដឹកនាំមន្ត្រីចុះដោះ ស្រាយរឿងវិវាទដីនៅក្បែរនោះ។ តែថារូបគាត់យកដីឈ្មោះលួន ថន អោយឈ្មោះ ដួង នី លោកមិនទាន់ដឹងច្បាស់នោះឡើយ។ តែក្នុងនាមអាជ្ញាធរ លោកព្យាយាមរកដំណោះស្រាយ ហើយលោកនឹងផ្តល់ព័ត៌មានជាក់លាក់មកវិញ ក្រោយពេលចុះស្រាវជ្រាវ។

យ៉ាងណាគេរំពឹងថា អាជ្ញាធរនឹងរកដំណោះស្រាយ ហើយផ្តល់ដីស្រែដល់គ្រួសារចាស់ជរានេះ អោយបានអាស្រ័យផលក្នុងពេលដ៏ខ្លីខាងមុខនេះ៕SRP

ខេត្តសៀមរាប៖ លោកពិន ប្រាកដ អភិបាលរងខេត្តនិងជាប្រធានក្រុមការងារទទួលបន្ទុកចុះស្រុកប្រាសាទបាគង និងស្រុកសូទ្រនិគម នៅរសៀលថ្ងៃសុក្រទី១៧ខែកក្កដា ឆ្នាំ២០២០ បានដឹកនាំកិច្ចប្រជុំស្ដីពីការចាត់វិធានការទប់ស្កាត់ និងបង្រ្កាប ការកាប់រាន ដុត ឈូសឆាយ ទន្រ្ទានហ៊ុមព័ទ្ធ ដីព្រៃសហគមន៍ព្រៃឈើ ដីតំបន់ព្រៃលិចទឹក ដីតំបន់ការពារធនធានធម្មជាតិ ឬដីតំបន់ការពារ អភិរក្ស ក្នុងភូមិសាស្រ្តស្រុកប្រាសាទបាគង នៅសាលប្រជុំសាលាស្រុកសូទ្រនិគម។

ក្នុងកិច្ចប្រជុំនេះមានរបៀបវារៈ

១.មតិបើកអង្គប្រជុំរបស់លោកពិនប្រាកដ
២. អានរបាយការណ៍សង្ខេបរបស់រដ្ឋបាលស្រុកសូទ្រនិគម ដោយ លោក ម៉ក់ ប្រុស អភិបាលស្រុកសូទ្រនិគម
៣.មតិចូលរួមពីសមាជិកសមាជិកានៃអង្គប្រជុំ
៤.មតិបូកសរុប និងបិទអង្គប្រជុំដោយ ប្រធានអង្គប្រជុំ។
ដោយយោងតាមអនុសាសន៍ណែនាំរបស់ប្រមុខរាជរដ្ឋាភិបាលកម្ពុជា ក្នុងកិច្ចប្រជុំគណៈរដ្ឋមន្រ្តី កាលពីថ្ងៃទី០៣ ខែកក្កដាឆ្នាំ២០២០កន្លងមកហើយកិច្ចប្រជុំក្នុងថ្ងៃនេះផ្ដោតសំខាន់ទៅលើពីរចំណុចគឺ៖
១.អាជ្ញាធរភូមិ ឃុំ ស្រុក ត្រូវបន្តតាមដាន និងហាមឃាត់ដាច់ខាតកុំឲ្យមានការចូលកាប់ទន្រ្ទានដីព្រៃគ្រប់ប្រភេទរបស់រដ្ឋបន្តទៀត។
២. អាជ្ញាធរភូមិ ឃុំ ត្រូវស្រង់ទិន្នន័យអាស្រ័យផលយូរឆ្នាំរបស់ប្រជាពលរដ្ឋ៕SRP

ខេត្តសៀមរាប៖ លោកង៉ាន់ ភិរុណ អភិបាលរងខេត្ត និងជាប្រធានក្រុមទី៤ នៃក្រុមការងារតាមដាន និងទប់ស្កាត់ការរុករានទន្ទ្រានដីរដ្ឋគ្រប់ប្រភេទ ដើម្បីវាតយកដីធ្វើជាកម្មសិទ្ធក្នុងភូមិសាស្ដ្រខេត្តសៀមរាប នៅថ្ងៃទី១៦ខែកក្កដា
ម្សិលមិញបានបានកិច្ចប្រជុំស្ដីពីការជំរុញការទប់ស្កាត់ការកាប់រានទន្ទ្រានវាតយកដីរដ្ឋដោយខុសច្បាប់នៅក្នុងតំបន់ការពារធម្មជាតិក្នុងខេត្ត នៅរដ្ឋបាលខេត្តសៀមរាប។

កិច្ចប្រជុំទទួលបានលទ្ធផលដូចខាងក្រោម៖

-បន្ថែមការយកចិត្តទុកដាក់ក្នុងការគ្រប់គ្រងនូវទិន្នន័យ និងស្ថិតិប្រជាពលរដ្ឋ និងដីធ្លីដែលប្រជាពលរដ្ឋកំពុងកាន់កាប់ និងអាស្រ័យផលជាក់ស្ដែងយូរឆ្នាំមកហើយនៅលើទីតាំងដែលស្ថិតនៅក្នុងផែនទីតំបន់ការពារធម្មជាតិ និងគម្របព្រៃ ដើម្បីចាត់ចែងធ្វើការកាត់ឆ្វៀលដី និងផ្ដល់កម្មសិទ្ធជូនពួកគាត់ ព្រមទាំងត្រៀមរៀបចំបម្រុងដី ១០% សម្រាប់ការប្រើប្រាស់រួមរបស់សហគមន៍។
-ត្រូវបង្កើនការតាមដាន និងគ្រប់គ្រងសភាពការណ៍វិវត្តន៍ពាក់ព័ន្ធនឹងការកាន់កាប់ដីធ្លីរបស់ប្រជពលរដ្ឋនៅតាមតំបន់ការពារធម្មជាតិ និងគម្របព្រៃ ដើម្បីបង្ការ ទប់ស្កាត់កុំឲ្យមាននិន្នាការរុករានទន្ទ្រានកាន់កាប់ដីព្រៃ ឬដីរដ្ឋដោយខុសច្បាប់ ហើយរាល់ទង្វើខុសច្បាប់ទាំងនេះ ត្រូវហាមឃាត់ដាច់ខាត និងត្រូវប្រើប្រាស់វិធានការរដ្ឋបាល និងវិធានការច្បាប់ឲ្យតឹងរឹងនិងម៉ឺងម៉ាត់ដេីម្បីទប់ស្កាត់។

-ត្រូវខិតខំអប់រំ ណែនាំ និងបកស្រាយបំភ្លឺអំពីស្ថានភាព នៃការកាន់កាប់ដីធ្លីរបស់បងប្អូនប្រជាពលរដ្ឋ និងឆន្ទៈរបស់រាជរដ្ឋាភិបាលក្នុងការប្រឹងប្រែងដោះស្រាយដីធ្លីជូនប្រជាពលរដ្ឋ ដើម្បីឲ្យពួកគាត់ចូលរួមសហការជាមួយអាជ្ញាធរពាក់ព័ន្ធ។

-ចំពោះដីធ្លីដែលមានទំនាស់ ត្រូវខិតខំសម្រុះសម្រួលដោយសន្ដិវិធី តម្លាភាព សុចរិតភាព និងយុត្តិធ៌មដោយត្រូវចុះជួបផ្ទាល់ជាមួយប្រជាពលរដ្ឋ ដើម្បីស្រាវជ្រាវស្វែងយល់ឲ្យបានច្បាស់អំពីសាវតាដីទំនាស់ សាវតាប្រជាពលរដ្ឋ និងការទាមទារតវ៉ារបស់ប្រជាពលរដ្ឋ។

-ត្រូវណែនាំដល់រដ្ឋបាលក្រុង ស្រុក ឃុំ សង្កាត់ ឲ្យធ្វើការបញ្ជាក់ ឬចុះហត្ថលេខាលើលិខិស្នាម ឬឯកសារនានាពាក់ព័ន្ធដីធ្លីឲ្យបានត្រឹមត្រូវតាមច្បាប់បែបបទនីតិវិធីនិងគោលការណ៍ណែនាំជាធរមាន។

-ក្នុងការចាត់ចែងអនុវត្តការងារខាងលើ រដ្ឋបាលស្រុក រដ្ឋបាលខេត្តត្រូវរាយការណ៍ និងស្នើសុំយោបល់ពីក្រសួងរៀបចំដែនដី នគរូបនីយកម្ម និងសំណង់ ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ស្របតាមសមត្ថកិច្ចទទួលខុសត្រូវរបស់ក្រសួងពាក់ព័ន្ធនីមួយៗ។

រដ្ឋបាលខេត្តសង្ឃឹមយ៉ាងមុតមាំថា បងប្អូនប្រជាពលរដ្ឋនឹងចូលរួមទាំងអស់គ្នា ដើម្បីថែរក្សាការពារបរិស្ថាន ធនធានធម្មជាតិ ការពារដីធ្លីសាធារណៈ ដីសហគមន៍ និងចូលរួមអនុវត្តច្បាប់ ដើម្បីរួមគ្នាបង្ការទប់ស្កាត់ការចូលទន្ទ្រានកាន់កាប់ដីព្រៃ ការរានពៃដើម្បីកាន់កាប់ដី ការចូលទ្ទ្រានកាន់កាប់ដីសាធារណៈ ដីសហគមន៍ និងដីឯកជនាមគ្រប់រូបភាព។

សូមរំលឹកថាកាលពីថ្ងៃទី០៣ខែកក្កដាឆ្នាំ២០២០ដោយផ្អែកតាមលទ្ធផលនៃកិច្ចប្រជុំគណៈរដ្ឋមន្ត្រី សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់អនុសាសន៍ណែនាំដ៏ខ្ពង់ខ្ពស់ឲ្យរដ្ឋមន្ត្រីក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលថ្នាក់ក្រោមជាតិ ត្រូវកាត់ឆ្វៀលដី និងផ្ដល់កម្មសិទ្ធដីជូនដល់បងប្អូនប្រជាពលរដ្ឋដែលបានកាន់កាប់ និងអាស្រ័យផលជាក់ស្ដែងយូរឆ្នាំមកហើយនៅលើទីតាំងដីដែលស្ថិតនៅក្នុងផែនទីតំបន់ការពារធម្មជាតិ និងគម្របព្រៃនៅតាមខេត្ត និងត្រូវបន្ថែមការត្រៀមបម្រុងដី ១០% សម្រាប់ការប្រើប្រាស់រួម បស់សហគមន៍។ ដូច្នេះ រដ្ឋបាលថ្នាក់ក្រោមជាតិត្រូវទប់ស្កាត់ខាច់ខាតកុំឲ្យមានការរុករានទន្ទ្រានវាតយកដីរដ្ឋដោយខុសច្បាប់បន្តទៀត ដើម្បីបង្ការកុំឲ្យក្លាយជាសង្គ្រាមដីធ្លី៕SRP

Sponsored

ខេត្តសៀមរាប៖ ឫស្សីទំពាំងផ្អែមជារុក្ខជាតិដំណាំបន្លែប្រភេទថ្មីមួយទៀត ដែលបានដាំដុះនៅក្នុងប្រទេសកម្ពុជាយើងក្នុងរយៈពេលប៉ុន្មានឆ្នាំចុងក្រោយនេះ។ ដោយសារតែរសជាតិឆ្ងាញ់របស់វា បានធ្វើឱ្យទំពាំងផ្អែមក្លាយជាអាហារដ៏ពេញនិយម និងមានការគាំទ្រខ្លាំងនៅលើទីផ្សារ។ក្នុងនោះយុវជនមួយរូបរស់នៅក្នុងស្រុកក្រឡាញ់ ក៏បានចាប់អារម្មណ៍និងការងារនេះរហូតទទួលបានជោគជ័យ និងគ្រោងចែកពូជប្រភេទពូជឬស្សីផ្អែមនេះទៅកាន់ប្រជាពលរដ្ឋដទៃទៀត។

នៅក្នុងកិច្ចសម្ភាសន៍តាមរយៈទូរស័ព្ទជាមួយអ្នកយកព័ត៌មានវិទ្យុជាតិកម្ពុជានារសៀលថ្ងៃព្រហស្បតិ៍ ទី១៦ ខែកក្កដា ឆ្នាំ២០២០នេះ លោកចំរើន ចំរ៉ុង សមាជិកយុវជនស្រុកក្រឡាញ់ ខេត្តសៀមរាបបានឲ្យដឹងថា ការដាំដុះប្រភេទពូជទំពាំងផ្អែមនេះ ជាមុខរបរបន្ទាប់បន្សំមួយរបស់លោក ដោយបានចាប់ផ្តើមដាំដុះនិងហាត់រៀនដោយខ្លួនឯង រយៈពេលប្រហែលជិត២ឆ្នាំមកហើយ។លោកបន្តថា ចំពោះពូជទំពាំងនេះ ទទួលបានតៗគ្នាមកប៉ុណ្ណោះ ហើយក៏ទទួលបានជោគជ័យ និងបានលក់ទៅកាន់ទីផ្សារមានតម្លៃថ្លៃគួរសម។ បន្ថែមពីនេះលោកក៏គ្រោងនិងចែកពូជឬស្សីផ្អែមនេះទៅកាន់ប្រជាពលរដ្ឋដែលមានជីវភាពក្រីក្រនៅក្នុងមូលដ្ឋានផងដែរ។

ចាប់ពីយើងកាប់រណ្តៅដល់យើងទទួលផលប្រើរយៈពេល០៨ខែ ដោយយកចិត្តទុកដាក់ថែទំា ដោយយើងដាក់ជីលាមកសត្វ គ្រប់ប្រភេទហើយយើងស្រោចទឹកជាប្រចាំយើងនិងឆាប់ទទួលផល ហើយតម្លៃនៅរដូវប្រាំងលក់បាន០១គីឡូ៨០០០រៀល ហើយរដូវវស្សាលក់បានពី៤០០០រៀលទៅ៥០០០រៀល ហើយជាជំហានតំបូងខ្ញុំធ្វើចំនួន៥គ្រួសារ ដោយក្នុងមួយគ្រួសារឲ្យគាត់បាន០៥ដើមយកទៅដាំ ហើយយើងនិងបន្តដាំទំពាំផ្អែមនេះពេញមួយឃុំក្រឡាញ់នេះតែម្តង។

លោកចំរើន ចំរ៉ុង សមាជិកយុវជនស្រុកក្រឡាញ់សំណូមពរឲ្យប្រជាពលរដ្ឋខិតខំយកចិត្តទុកដាក់ដាំទំពាំងឲ្យបានគ្រប់ៗគ្រួសារ សម្រាប់ផ្គត់ផ្គង់ការទទួលទានក្នុងគ្រួសារ និងលក់ចេញដើម្បីលើកកម្ពស់ជីវភាពប្រចាំថ្ងៃខ្លះផង»។

ឆ្លើយតបនិងបញ្ហានេះលោកសុខណារ៉េត អភិបាលរងនៃគណអភិបាលស្រុកក្រឡាញ់បានឲ្យដឹងផងដែរថា រដ្ឋបាលស្រុកតែងតែយកចិត្តទុកដាក់ ក្នុងការលើកកម្ពស់ជីវភាពចំពោះគ្រួសារក្រីក្រនៅតាមសហគមន៍ តាមរយៈគម្រោងកម្មវិធីវិនិយោគនៅក្នុងស្រុកឬឃុំ និងអង្គការដៃគូនានា ជាពិសេសចំពោះវិស័យកសិកម្មផ្ទាល់។លោកបន្តថា បើសិនប្រជាពលរដ្ឋដែលខិតខំព្យាយាម ប្រកបរបរនេះនិងទទួលបានជោគជ័យ។ចំណែកបញ្ហាទីផ្សារវិញ សូមបងប្អូនប្រជាពលរដ្ឋកុំព្រួយបារម្ភ អាជ្ញាធស្រុកគ្រោងនិងរៀបចំជាក្រុមផលិតមួយដើម្បីរកទីផ្សាលក់ចេញ ឬក៏រៀបចំផ្សារណាត់សហគមន៍ដើម្បីលក់នៅក្នុងឃុំ។

ទើបតែឆ្នាំ២០២០នេះឃើញមានការចាប់អារម្មណ៍ដាំ ជាគំនិតផ្តួចផ្តើមទី១គឺធ្វើឲ្យគាត់រក្សាលំនឹងជីភាពសិន ឲ្យគាត់បានដោះការចំណាយហូបចុកប្រជាំថ្ងៃ ហើយទីផ្សារយើងនិងឲ្យជនបង្គោល ប្រមូលទិញយកទៅលក់នៅទីផ្សារ នៅពេលមានការីកចម្រើនទៅមុខទៀតយើងនិងរៀបចំគាត់ជាក្រុមផលិតមួយ ហើយមានតំណាងក្រុមទៅចរចារជាមួយឈ្មួញ ធ្វើអញ្ចឹងឈ្មួញមិនអាចទំលាក់តម្លៃបានទេ ហើយយើងនិងធ្វើឲ្យមានកន្លែងណាត់លក់នៅក្នុងភូមិគាត់ដែរ នៅក្នុងភូមិក៏ដឹងនៅក្នុងឃុំក៏ដឹង ផ្សារក៏ដឹង ធ្វើយ៉ាងណាឲ្យគេចំណាំបានថា ថ្ងៃណាលក់ទំពាំងផ្អែមថ្ងៃណាលក់អ្វីធ្វើដូចជាផ្សារណាត់សហគមន៍»។

សូមជម្រាបថា ទំពាំងផ្អែមដែលប្រជាពលរដ្ឋនៅក្នុងស្រុកក្រឡាញ់ដាំដុះបានយកទៅលក់នៅទីផ្សារមានតម្លៃចាប់ពី៤០០០៛ទៅ៦០០០៛រៀលទៅតាមរដូវកាលនីមួយៗ។ហើយកម្មវិធីនេះបានចាប់ផ្តើមក្រោមគំនិតផ្តួចផ្តើមពីសំណាក់ឯកឧត្តមជា ចន្ទបរិបូរណ៍ រដ្ឋលេខាធិការក្រសួងមាន និងជាប្រធានក្រុមការងារថ្នាក់ជាតិចុះជួយស្រុកក្រឡាញ់ខេត្តសៀមរាប៕SRP

ខេត្តសៀមរាប៖ក្មេងប្រុសមានអាយុទើបតែ០៤ឆ្នាំ ត្រូវបានខ្សែភ្លើងឆក់ បណ្ដាលឲ្យស្លាប់យ៉ាងអាណោចអាធ័ម។ហេតុការណ៍បានកើឡើងនៅវេលាម៉ោងប្រហែល០៩ព្រឹកថ្ងៃទី១៧ខែកក្កដាឆ្នាំ២០២០ចំណុចផ្ទះការ៉ាស់សាំងស្ថិតក្នុងក្រុមទី២ភូមិចំបក់ហែ ឃុំពួក ស្រុកពួក ខេត្តសៀមរាប។

សមមត្ថកិច្ចបានឲ្យដឹងថាជនរងគ្រោះឈ្មោះ ប៉េង សារ:នាត ភេទប្រុសអាយុ៤ឆ្នាំ (ក្នុងបន្ទុក),ឪពុកឈ្មោះ ប៉ាត មករា អាយុ៤០ឆ្នាំ មុខរបរលក់សាំង, ម្ដាយឈ្មោះ លាង សាវិញ អាយុ២៩ឆ្នាំ មុខរបរគ្រូបង្រៀន រស់នៅ ភូមិ-ឃុំកើតហេតុ។

សមត្ថកិច្ចបានបន្តថាក្រោយទទួលសេចក្ដីរាយការណ៍ នគរបាលផ្នែកបច្ចេកទេសស្រុក និងនគរបាលប៉ុស្តិ៍ បានចុះស្រាវជ្រាវ ពិនិត្យដល់កន្លែងកើតហេតុចំណុចឆក់)ជាតុដែកសម្រាប់ដាក់ប្រេងម៉ាស៊ីនលក់,កំពស់២ម៉ែត្រ,និងមានខ្សែភ្លើងត.ជាប់អំពូលម៉ែត្រចំនួន២អំពូល(អំពូលមូល១,អំពូលមែត្រវែង១)។ សមត្ថកិច្ចពិនិត្យឃើញសង្ស័យចំណុចខ្សែភ្លើងត.ភ្ជាប់អំពូលវែងមានកូដរលាត់ស្រោម.ខ្លោចជាប់តុដែក។

ការពិនិត្យសពជនរងគ្រោះឃើញមានផ្នែកអវយ:វមានស្លាកស្នាមរលាកចំណុចកដៃឆ្វេង១កន្លែង,រលាកកន្លាក់ដៃឆ្វេង១កន្លែង, រលាកដើមដៃស្មាខាងស្ដាំ១កន្លែង,ផ្នែកក្បាល: គ្មានស្លាកស្នាម។

តាមការបំភ្លឺរបស់ឈ្មោះប៉ាត មករា ជាឪពុកជនរងគ្រោះបានឲ្យដឹងថានៅល្ងាចថ្ងៃទី១៦ខែកក្កដាឆ្នាំ២០២០រូបគាត់បានចាប់អំពូលដែលដាក់ជាប់និងតុដែក(តុដែកឆក់)ពេលនោះគាត់សង្ស័យមានការចំលងឆក់ពីខ្សែភ្លើង,តែរូបគាត់បានដកតែឌុយខ្សែភ្លើងអំពូលមូលមួយតែប៉ុណ្ណោះ,ឯខ្សែអំពូលភ្លើងមួយទៀតជាប់តុដែកដែរ(អំពូល២) មិនបានដកខ្សែភ្លើងទេ។

ជាក់ស្ដែងនៅព្រឹកកើតហេតុគាត់បានចេញពីផ្ទះ ចំណែកប្រពន្ធនៅផ្ទះមើលកូនប្រុស២នាក់ លុះក្រោយមកស្រាប់តែប្រពន្ធគាត់តេទូរស័ព្ទប្រាប់ថាកូនប្រុសបង(សព)ត្រូវខ្សែភ្លើងឆក់ចំណុចតុដែកដាក់ប្រេងម៉ាស៊ីន។រូបគាត់បានទៅទាន់កូននៅមន្ទីរពេទ្យបង្អែកពួក ខណ:បន្តជូនសង្គ្រោះទៅមន្ទីរពេទ្យបង្អែកខេត្ត ពេលទៅដល់ពេទ្យខេត្តគ្រូពេទ្យពិនិត្យនិងប្រាប់ថា កូនគាត់ផុតដង្ហើមស្លាប់បាត់ទៅហើយ ក៏បានជូនកូនមកផ្ទះវិញ។

ការសន្និដ្ឋានឪពុកម្ដាយសពថាពិតជាស្លាប់ដោយខ្លួនឯងមូលហេតុ ការធ្វេសប្រហែសលើការត.ភ្ជាប់ប្រព័ន្ធខ្សែភ្លើងក្នុងផ្ទះ។សមត្ថកិច្ចសន្និដ្ឋានថាហេតុការណ៍ខ្សែភ្លើងឆក់បណ្ដាលឲ្យស្លាប់ពុំពាក់ព័ន្ធបទឃាតកម្ម។សពរងគ្រោះប្រគល់ជូនឪពុក.ម្ដាយធ្វើបុណ្យតាមប្រពៃណី៕SRP

ខេត្តសៀមរាប៖មន្ត្រីអាជ្ញាធរជាតិអប្សរា បានប្រកាសចាត់វិធានការតាមផ្លូវច្បាប់ ចំពោះបុគ្គលមួយរូប ដែលបានប្រកាសលក់ដីក្នុងតំបន់រមណីយដ្ឋានតាម Facebook ប្រសិនបើមិនបញ្ឈប់សកម្មភាពរបស់ខ្លួន។

តាមរយ:Pageផ្លូវការ របស់អាជ្ញាធរជាតិអប្សរា ដែលបានបង្ហោះកាលពីថ្ងៃទី១៥ខែកក្កដា បញ្ជាក់ថា ដើម្បីអនុវត្តគោលការណ៍ច្បាប់ក្នុងកិច្ចការអភិរក្ស និងអភិវឌ្ឍន៍រមណីយដ្ឋានអង្គរ ប្រកបដោយចីរភាព អាជ្ញាធរជាតិអប្សរាសូមធ្វើការអំពាវនាវដល់បុគ្គល ដែលមានគណនីហ្វេសប៊ុក Choch Choub និងបុគ្គលផ្សេងទៀត ដែលកំពុងតែប្រកាសលក់ដីធ្លីក្នុងតំបន់រមណីយដ្ឋានអង្គរ តាមប្រព័ន្ធទំនាក់ទំនងសង្គម ឲ្យបញ្ឈប់នូវសកម្មភាពរបស់ខ្លួនជាបន្ទាន់។

ក្នុងករណី មិនព្រមបញ្ឈប់សកម្មភាពនេះទេ អាជ្ញាធរជាតិអប្សរានឹងចាត់វិធានការទៅតាមផ្លូវច្បាប់ជាធរមាន។ ម្យ៉ាងទៀត ដេីម្បីបង្ការការខូចខាតផលប្រយោជន៍របស់សាធារណជន ដែលកេីតឡេីងពីការទិញដីធ្លីក្នុងតំបន់រមណីយដ្ឋានអង្គរ អាជ្ញាធរជាតិអប្សរាក៏សូមអំពាវនាវផងដែរ ដល់សាធារណជនដែលមានបំណងទិញដីធ្លីក្នុងតំបន់នេះ សូមកុំទិញឱ្យសោះ និងសូមធ្វើការទំនាក់ទំនងមកកាន់អាជ្ញាធរជាតិអប្សរា បេីមានចម្ងល់ទាំងឡាយណាពាក់ព័ន្ធនឹងការគ្រប់គ្រងដីធ្លីក្នុងតំបន់រមណីយដ្ឋានអង្គរតាមលេខទូរសព្ទ ០៩២ ៨៩ ៩៩ ៦៦។

បើតាមPageអាជ្ញាធរបញ្ជាក់ថា ដីធ្លីក្នុងតំបន់រមណីយ ដ្ឋានអង្គរ គឺជាតំបន់មានស្ថានីយបុរាណវត្ថុសំខាន់ៗដែលត្រូវការកិច្ចការពារ កម្រិតខ្ពស់បំផុត (តំបន់១) និងជាតំបន់សម្បូរសំណល់បុរាណវត្ថុ ដែលត្រូវការពារទប់ទល់នឹងការប្រេីប្រាស់ដីធ្លីផ្តេសផ្តាសនិងការអភិវឌ្ឍន៍មិនសមស្រប(តំបន់២)។ ការលក់ទិញដីធ្លីក្នុងតំបន់នេះ គឺផ្ទុយនឹងច្បាប់ដែលមានចែងក្នុងព្រះរាជក្រឹត្យលេខ០០១ ន.ស ចុះថ្ងៃទី២៨ ខែឧសភា ឆ្នាំ១៩៩៤ ស្តីពីការកំណត់ និងការចាត់ចែងគ្រប់គ្រងតំបន់សៀមរាបអង្គរ និងសេចក្តីសម្រេចលេខ៧០ សសរ ចុះថ្ងៃទី១៦ ខែវិច្ឆិកា ឆ្នាំ២០០៤ របស់រាជរដ្ឋាភិបាល ស្តីពីការកំណត់បទដ្ឋាននៃការប្រើប្រាស់ដីធ្លីនៅតំបន់១ និងតំបន់២៕SRP

ខេត្តសៀមរាប៖ លោក ង៉ាន់ ភិរុណ អភិបាលរងខេត្តថ្លែងថាដើម្បីសម្រចបាននូវទស្សនវិស័យឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់។ លោកថាខេត្តសៀមរាបត្រូវការកំណើនផ្នែកទឹកស្អាតអនាម័យក្នុងរង្វង់យ៉ាងតិច ៥%-៦% ក្នុងមួយឆ្នាំ។ ដូចនេះ ត្រូវយកចិត្តទុកដាក់ក្នុងការអនុវត្ត ក៏ដូចជាការផ្សព្វផ្សាយបន្តដល់អ្នកពាក់ពន្ធ័នានា ធ្វើយ៉ាងណាជួយបញ្ជ្រាប ផែនការផ្គត់ផ្គង់ទឹកស្អាត និងអនាម័យទៅក្នុងផែនការអភិវឌ្ឍន៍ ក្រុង ស្រុក ឃុំ សង្កាត់ និងត្រូវលើកជាគម្រោងអាទិភាពក្នុងមូលដ្ឋានរបស់ខ្លួន។
លោក ង៉ាន់ ភិរុណ បន្តថាកិច្ចប្រជុំនេះ ជាការពង្រឹងតួនាទី ភារកិច្ចរបស់ក្រុមការងារបច្ចេកទេសផ្គត់ផ្គង់ទឹកស្អាត និង អនាម័យជនបទ ព្រមទាំងធ្វើការបូកសរុបការងារឆមាសទី១ ឆ្នាំ២០២០ និង ពិនិត្យវឌ្ឍនភាពក្នុងការអនុវត្តសកម្មភាពរបស់មន្ទីរ និង អង្គការដៃគូ និងធ្វើការចែករំលែកបទពិសោធន៍នានាពាក់ព័ន្ធ និង បញ្ហាប្រឈម និង ដំណោះស្រាយក្នុងការអនុវត្តការងារ និង ធ្វើការពង្រឹងចំណងទំនាក់ទំនងឲ្យកាន់តែប្រសើរឡើង រវាងស្ថាប័ន អង្គការ សហគមន៍ដែលពាក់ព័ន្ធ។ ការផ្គត់ផ្គង់ទឹកស្អាត និងការលើកកម្ពស់អនាម័យនៅជនបទ គឺជាផ្នែកមួយយ៉ាងសំខាន់ ដែលមិនអាចខ្វះបាន ក្នុងការធ្វើឲ្យប្រសើរឡើងនូវកម្រិតជីវភាព នៃការរស់នៅរបស់ប្រជាពល រដ្ឋ ស្របទៅតាមគោលនយោបាយកាត់បន្ថយភាពក្រីក្រ របស់រាជរដ្ឋាភិបាលកម្ពុជា។

ដោយបានយល់ច្បាស់ពីផលប៉ះពាល់អវិជ្ជមាន នៃកង្វះខាតការផ្គត់ផ្គង់ទឹកស្អាត និង ការលើកកម្ពស់អនាម័យល្អនៅជនបទ រាជរដ្ឋាភិបាល ក៏ដូចជាបណ្តាដៃគូរអភិវឌ្ឍន៍ អង្គការជាតិ និងអន្តរជាតិនានា បានយកចិត្តទុកដាក់ខ្ពស់ក្នុងការរិះរកនូវយុទ្ធសាស្ត្រគន្លឹះផ្សេងៗ ដើម្បីវិភាគអំពីលទ្ធភាព នៃប្រភពធនធានធ្វើយ៉ាងណាសម្រេចឲ្យបាននូវគោលដៅឆ្នាំ២០២៣ សម្រេចឲ្យបាន ៩០% នូវអត្រាផ្គត់ផ្គង់ទឹកស្អាត និង អត្រាគ្របដណ្តប់អនាម័យឲ្យបាន៩០% ហើយលើសពីនេះទៅទៀតគឺ ការសម្រេចឲ្យខានតែបាននូវទស្សនវិស័យរបស់រាជរដ្ឋាភិបាល “នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវមានការផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថាន ដែលមានអនាម័យប្រកបដោយនិរន្តរភាព”។

លោកថ្លែងយ៉ាងដូច្នោះ នៅថ្ងៃទី១៥ ខែកក្កដា ឆ្នាំ២០២០នេះ នៅមន្ទីរអភិវឌ្ឍន៍ជនបទខេត្តសៀមរាប ក្នុងកិច្ចប្រជុំត្រួតពិនិត្យលើ វឌ្ឍនភាពនានា ក្នុងការអនុវត្តផែនការសកម្មភាព ស្តីពី ការផ្គត់ផ្គង់ទឹកសម្អាត និង អនាម័យជនបទ ឆ្នាំ២០២០-២០២៣។

សូមបញ្ជាក់ថាក្នុងឆមាសទី១ឆ្នាំ២០២០នេះ ការផ្តល់សេវាផ្គត់ផ្គង់ទឹកស្អាតកម្រិតមូលដ្ឋានមាន ៧៣,៩០% ,សេវាអនាម័យ ៧៤,៦០% និង ភូមិបញ្ឈប់ បន្ទោរបង់ពាសវាលពាសកាល ចំនួន ១៦៩ភូមិ ក្នុងឃុំចំនួន៥ ។ ក្នុងនោះដែរសាងសង់អណ្តូងអាហ្វ្រិដេវ ថវិកាមន្ទីរបាន១៤អណ្តូង និង អណ្តូងអាហ្រ្វីដេវជំនួយរបស់សាធារណរដ្ឋប្រជាមានិតចិន ចំនួន១០០អណ្តូង និង ជីកស្រះសហគមន៍បាន ៧ស្រះ ដោយរៀបថ្មភ្នំ បានចំនួន៤ស្រះ ព្រមទាំងសាងសង់បង្គន់អនាម័យបាន ២០០បង្គន់ផងដែរ៕SRP