ខេត្តសៀមរាប – Page 201

ខេត្តសៀមរាប៖ប្រធានក្រុមប្រឹក្សាក្រុង លោក ទេព ប៊ុនឆាយ បានថ្លែងថាអាជ្ញាធរក្រុងមិនលើកលែងចំពោះជនណាដែលបានកាប់ទន្ទ្រានព្រៃលិចទឹកឡើយ។

លោក ទេព ប៊ុនឆាយ បន្តថា១-គណៈបញ្ជាការឯកភាពរដ្ឋបាលក្រុង សង្កាត់ បន្តដឹកនាំបង្ក្រាបបទល្មើសឈូសឆាយព្រៃលិចទឹកអោយកាន់តែសកម្ម។
២-ស្នើសុំរដ្ឋបាលក្រុង សង្កាត់ និងមន្ត្រីរាជការ ប្រជាពលរដ្ឋ បន្តអនុវត្តយុទ្ធនាការនេះអោយបានច្រើនក្នុងក្រុង សង្កាត់។
៣-សូមប្រជាពលរដ្ឋ ចូលរួមបង្កា បង្រ្កាប និងទប់ស្កាត់ការរុករានទន្ទ្រានព្រៃលិចទឹក។
៤-យើងមិនលើកលែងអោយជនល្មើសឡើយ។
៥-សូមសហគមន៍ទាំងអស់ក្នុងក្រុងសៀមរាប បន្តបណ្តុះកូនឈើព្រៃលិចទឹក និងដឹកនាំអនុវត្តភារកិច្ចអោយកាន់តែសកម្ម។

លោកថ្លែងយ៉ាងដូច្នេះក្នុងយុទ្ធនាការដាំកូនឈើព្រៃលិចទឹកឡើងវិញ បន្ទាប់ពីមានការឈូសឆាយរុករានទន្រ្ទានដីព្រៃពីជនល្មើស នារដូវប្រាំងកាលពីកន្លងទៅ។

ការដាំកូនឈើព្រៃលិចទឹក នៅថ្ងៃទី០៧ខែសីហានាព្រឹកមិញនេះ ធ្វើនៅចំណុចខ្មោចហាំង ក្នុងភូមិសាស្រ្តសង្កាត់សៀមរាប នៅចំណុចភ្ញាជ័យ កន្រ្តក ក្នុងភូមិសាស្រ្តសង្កាត់ស្វាយដង្គំ និងនៅចំណុចរហាល ត្រស់ក្នុងភូមិសាស្ត្រ សង្កាត់ស្រង៉ែ ដោយមានការចូលរួមពីមន្ត្រីក្រុងសង្កាត់ភូមិនិងធនាគារABA ដោយកូនឈើព្រៃលិចទឹកចំនួន២០០០ដើម ដែលបានដាំគឺបានមកពីសហគមន៍បឹងពារាំង៕SRP

ខេត្តសៀមរាប៖ជនសង្ស័យបីនាក់ពាក់ព័ន្ធអំពើលួចមានស្ថានទម្ងន់កាត់សោរផ្ទះនៅពេលយប់ ត្រូវបានកម្លាំងការិយាល័យនគរបាលព្រហ្មទណ្ឌកម្រិតធ្ងន់ ស្នងការខេត្តសៀមរាប សហការណ៍ ជាមួយនគរបាលក្រុងសៀមរាប ចាប់ខ្លួន។
ហេតុការណ៍ឃាត់ខ្លួននៅថ្ងៃទី០៦ខែ សីហា ឆ្នាំ២០២០ក្នុងភូមិសាស្ត្រក្រុងសៀមរាប។
មន្ត្រីនគរបាលបានថ្លែងថាក្រោយឃាត់ខ្លួនសមត្ថកិច្ចបាននាំយកម៉ូតូដែលគ្មានឯកសារចំនួន០២គ្រឿង
១.ម៉ាក សាដូ គ្មានស្លាកលេខ លេខតួ+ម៉ាស៊ីនMBK៣៩៨CM,
២.ម៉ាកហុងដាឌ្រីម សេរីឆ្នាំ២០១២ ពណ៌ខ្មៅ ពាក់ស្លាកលេខសៀមរាប 1H-7186 លេខតួ+លេខម៉ាស៊ីន៨៥៨៥៥០៦ ។
ជនសង្ស័យទី១.ឈ្មោះ សេន តាំ ភេទស្រី អាយុ៦០ឆ្នាំ មុខរបរនៅផ្ទះ ទីលំនៅភូមិធ្លកអណ្តូង សង្កាត់ស្លក្រាម ក្រុងសៀមរាប។
២.ឈ្មោះ វី ភ្លី ភេទប្រុស ៣៧ឆ្នាំ មុខរបរមិនពិតប្រាកដ ទីលំនៅភូមិធ្លកអណ្តូង សង្កាត់ស្លក្រាម ក្រុងសៀមរាប (មុខសញ្ញាចាស់)។
៣.ឈ្មោះ ម៉ាត់ សាលី ភេទប្រុស មុខរបរមិនពិតប្រាកដ ទីលំនៅភូមិធ្លកអណ្តូង សង្កាត់ស្លក្រាម ក្រុងសៀមរាប (មុខសញ្ញាចាស់)រួមនឹងសម្ភារវត្ថុតាង ដែលសង្ស័យពាក់ព័ន្ធបទល្មើស ម៉ូនីទ័រកំព្យូទ័រ២គ្រឿង, ម៉ូទ័រឈូសឈើ២គ្រឿង, កន្ត្រៃកាត់ដែក២, កៅអីឈើ២, តុឈើ២, ទូរឈើ១, កូនឈើក្រឡឹង២១គ្រាប់, កង់ជិះ៣គ្រឿង, កង់ឡាន៥គ្រាប់, អំពូលភ្លើងហ្វា៤, ខ្សែភ្លើង១ដុំ, កាំមេរ៉ាសុវត្ថិភាព១០គ្រាប់, ម៉ាស៊ីនត្រជាក់២គ្រឿង, និងកែវ១ធុង។

តាមការស្តាមចម្លើយរបស់ឈ្មោះ ម៉ាត់ សាលី និងឈ្មោះ រី ភ្លី បានឆ្លើយសារភាពថា វត្ថុដែលសមត្ថកិច្ចធ្វើការចាប់យកខាងលើគឺពួកខ្លួន និងគូកនឈ្មោះ មិនស្គាល់១នាក់បានធ្វើសកម្មភាពលួចនាពេលកន្លងមក។
បើតាមមន្ត្រីនគរបាលបញ្ជាក់ថា
ជាក់ស្តែងនៅវេលាម៉ោង១២និង៣០នាទីយប់ ឈានចូលថ្ងៃទី០៦ខែសីហា ពួកគេទាំង៣នាក់ បានជិះម៉ូតូសណ្តោងរ៉ឺម៉ក ១គ្រឿង ប្រដាប់ដោយកន្ត្រៃកាត់ដែក ឌុបគ្នាចេញពីផ្ទះរបស់ឈ្មោះ រី ភ្លី ទៅធ្វើសកម្មភាពកាត់សោរនៅចំណុចឃ្លាំងផ្ទុកសម្ភារមួយកន្លែងស្ថិតនៅក្រុមទី៩ ភូមិស្វាយដង្គំ សង្កាត់ស្វាយដង្គំ ក្រុងសៀមរាប ពេលកាត់សោរទ្វាឃ្លាំងបានហើយ ឈ្មោះ រី ភ្លី ជាអ្នកនៅលើរ៉ឺម៉កចាំមើលផ្លូវ ចំណែកឈ្មោះ ម៉ាត់ សាលី និងឈ្មោះ មិនស្គាល់ជាអ្នកចូលលួចយកសម្ភារមានដូចជាៈ ម៉ាស៊ីនត្រជាក់ម៉ាក LG ១គ្រឿង, ម៉ាកPanasonic ១គ្រឿង, ម៉ូនីទ័រកុំព្យូទ័រ ១, អំពូលភ្លើងម៉ាក FFL ៤គ្រាប់, កំាមេរ៉ាសុវត្តិភាព ២គ្រាប់, ភ្លើងបានចំនួន ៤គ្រាប់, ខ្សែភ្លើង ១ដុំ និងគ្រឿងភ្លើងលម្អមួយចំនួន។
ផ្អែកតាមការស្តាប់ចម្លើយរបស់ឈ្មោះ សេន តាំ បានឆ្លើយថារូបខ្លួនត្រូវជាម្តាយបង្កើតរបស់ជនសង្ស័យឈ្មោះ រី ភ្លី ហើយសម្ភារមួយចំនួនមានដូចជា តុឈើកូនក្រឡឹងចំនួន ៦គ្រាប់, ម៉ាស៊ីនព្រីន ១គ្រឿង, ម៉ាស៊ីនត្រជាក់ម៉ាក LG ១គ្រឿង, ម៉ាកPanasonic ១គ្រឿង,អំពូលភ្លើម៉ាក FFL ៤គ្រាប់ និងកៅអីជ័រចំនួន១៤ គឺជនមិនស្គាល់ឈ្មោះ២នាក់បានយកទៅផ្ញើនិងរូបខ្លួន។ ករណីនេះ តេស្តន៍រកសារធាត់ញៀន លើឈ្មោះ រី ភ្លី និងឈ្មោះ ម៉ាត់ សាលី លទ្ធផលវិជ្ជមាន។
បច្ចុប្បន្នកសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖នៅទីបំផុតអគាររួមទាំងបរិវេណសាលាស្រុកសូទ្រនិគមទាំងមូល ដែលជាកន្លែងផ្តល់សេវាកម្មគ្រប់ប្រភេទ ដល់ពលរដ្ឋទូទៅ ពេលនេះបានក្លាយទៅជាផ្ទះល្វែងសម្រាប់លក់ទៅវិញ។
ការប្រែប្រួលពីអគារសាលាស្រុក ទៅជាផ្ទះល្វែងយ៉ាងស្គឹមស្គៃនេះ ក៏បានក្លាយទៅជាប្រធានបទ សំណួរនិងចម្លើយ របស់មហាជនទូទាំងស្រុក។

អ្នកខ្លះលើកឡើងជាសំណួរថា ហេតុអ្វីបានជា ទីតាំងសាលាស្រុក ស្ងាត់បាត់អក្សរ សរសេរថា សាលា ស្រុកសូទ្រនិគម ហើយបែជាឃើញពាក្យថា(ផ្ទះល្វែង) សម្រាប់លក់ទៅវិញ?។ អ្នកខ្លះទៀតលើកឡើងថា កន្លងមកឃើញមានការរុះរើ និងសាងសង់ថ្មី ស្មានថា ចៅហ្វាយស្រុកជួសជុលអគារ ដឹងអីពេលកើតថ្មី ប្រែជាផ្ទះល្វែងបែបនេះ!។ ចំណែកអ្នកខ្លះទៀត ក៏បានលើកឡើងបែបដឹងល្ហៀងៗថា គេដោះដូរតើ..។
ស្ត្រីអាជីវករលក់ដូរក្នុងផ្សារដំដែក នៃស្រុកសូទ្រ និគមម្នាក់បានបរិយាយថា ចាប់តាំងរូបគាត់លក់ដូរនៅផ្សារនេះ អគារសាលាស្រុកហាក់មិនមានការប្រែប្រួលអ្វីទេ។តែឥឡូវនេះទីធ្លាសាលាស្រុកបានប្រែទៅជាផ្ទះល្វែងទៅហើយ មិនដឹងថាគេលក់ឬដោះដូរទីតាំងគ្នាឡើយ។ បើអីចឹងមែនល្អហើយ តែគួរអោយសោកស្តាយ ក្នុងនាមជាពលរដ្ឋ។
ជុំវិញករណីខាងលើនេះ អភិបាលស្រុក សូទ្រ និគម លោកម៉ក់ ប្រុស បានថ្លែងប្រាប់តាមទូរស័ព្ទនារសៀលថ្ងៃទី៦ខែសីហា ឆ្នាំ២០២០នេះថា ទីតាំងសាលាស្រុករួមទាំងអគារផងនោះ គឺជារបស់ធនាគារជាតិ។ មិនមែនជាដីរបស់សាលាស្រុកនោះទេ។ តាមពិតសាលាស្រុកបានខ្ចីអគាររបស់ធនាគារជាតិ សម្រាប់ប្រើបាស់តែប៉ុណ្ណោះ។
ដោយឡែកលោកលី សំរិទ្ធ អភិបាលរងខេត្ត និងជាអ្នកនាំពាក្យសាលាខេត្តសៀមរាប ក៏បានមានប្រសាសន៍នៅរសៀលថ្ងៃដដែលនេះដែរថា ទីតាំងសាលាស្រុកសូទ្រនិគម ពិតជារបស់ធនាគារជាតិមែន។ ពីមុនស្រុកខ្ចីអគារគេប្រើ តែឥឡូវគឺបានសង់សាលាស្រុកវិញហើយ នៅខាងត្បូងទីតាំងមុនបន្តិច៕SRP

Sponsored

ខេត្តសៀមរាប៖ជីក្រែងគឺជាស្រុកមួយរបស់ខេត្តសៀបរាប ដែលមានចម្ងាយពីទីរួមក្រុងសៀមរាបជាង៦០គីឡូ
ត្រូវបានបង្កើតតំបន់ទេសចរណ៍ថ្មីពីរកន្លែងផ្សេងទៀតគឺរមណីយដ្ឋាន ទឹកធ្លាក់ចំកាដូងអូររមាសនិង រមណីយដ្ឋានទំនប់ខ្សាកបន្ទាប់ពីរមណីយដ្ឋានទំនប់ម្កាក់ ។

ថ្វីត្បិតរមណីយដ្ឋានទឹកធ្លាក់ចំការដូងអូររមា សនិងទំនប់ខ្សាក ជាតំបន់អភិវឧ្បន៍ទេសចរណ៍អេកូឡូសុីថ្មី ប៉ុន្តែគេសង្កេតឃើញថា មានភ្ញៀវទេសចរណ៍ក្នុងស្រុកជាច្រើនទៅកម្សាន្ដនៅនោះ ដោយភ្ញៀវទេសចរខ្លះបានទៅសំរាកទទួលទានអាហារថ្ងៃត្រង់នៅរមណីដ្ឋានទឹកធ្លាក់ចំការដូងអូររមាសនាពេលថ្ងៃ ឯពេលល្ងាចពួកគេប្ដូរទៅលំហែកាយនៅខ្នងទំនប់ខ្សាកជាទីដែលអាចមើលថ្ងៃលិចបាន។ ទាកទង់ទៅនឹងការអភិវឌ្បន៍តំបន់ទសចរណ៍ទាំងនេះ អភិបាលស្រុកជីក្រែង លោក ពៅ ប៊ុនធឿន បានប្រាប់បណ្ដាញសាព័ត៌មានសៀមរាបប៉ុស្ដិ៍ តាមទរស័ព្ទនៅពីថ្ងៃទី០៦ ខែសីហា ២០២០ ថាលោកនឹងបន្តគម្រោងអភិវឌ្បទេសចរណ៍៍ អេកូឡូស៊ី Ecolozi បន្ថែមមួយកន្លែងផ្សេងទៀត បន្ទាប់ពីគម្រោងចាស់ស្ថាបនារួចរាល់ជាស្ថាពរ។ ក្នុងនោះដែរ លោក ពៅ ប៊ុនធឿន ក៏សូមអោយបណ្ដាញព័ត៌មាននានាជួយផ្សព្វផ្សាយព័ត៌មានស្ដីអំពីតំបន់ទេសចរណ៍នេះផងដែរ។ លោកក៏រំពឹងថានិងមានភ្ញៀវទេសចរ កើនឡើងជាបន្តបន្ទាប់។

ដោយឡែកលោក ភឹង វិទូ ដែលជាម្ចាស់គម្រោងអភិវឌ្បន៍តំបន់ថ្មី រមណីយដ្ឋាន ទឹកធ្លាក់ចំកាដូងអូររមាស បានថ្លែងប្រាប់អ្នកយកព័ត៌មាន សៀមរាបប៉ុស្ដិ៍ ដែលកំពុងទទួលទានអាហារថ្ងៃត្រង់ក្នុងរមណីយដ្ឋានទឹកធ្លាក់ អូរមាស នៅថ្ងៃទី ០៥ខែសីហា២០២០ ថា លោកនឹងរៀបចំប្រព័ន្ធសុវត្ថិភាពជូនភ្ញៀវទេសចរណ៍ អោយបានខ្ពស់ ដូចជាការមិនអោយមានទឹកច្រើនពេក ការពាក់អាវពោងសុវត្តិភាពជាប្រចាំ និងការជិះទូកមានចំនួនកំណត់ ។

បើតាម លោក ភឹង វិទូ បានផ្ដោតសំខាន់នៅរមណីយ ដ្ឋានទឹកធ្លាក់ចំការដូងអូររមាសគឺការអនាម័យ មិនអោយចោលសំរាម ពាសវាលពាសកាលឡើយ។ ជាមួយគ្នាភ្ញៀវជាតិនិងអន្តរជាតិអាចយកបាយម្ហូបស្រាទៅពីខាងក្រៅបាន ដោយម្ចាស់ទីតាំងគិតតែថ្លៃតូបនិងភេសជ្ជៈប៉ុណ្ណោះ។

សូមបញ្ជាក់ថារមណីយដ្ឋានទឹកធ្លាក់ចំការដូងអូររមាស មានកញ្ចុះជាង៤០ ដែលបានធ្វើនៅជាប់មាត់ទឹកហូរ មានលក់ម្ហូបអាហារ សម្រាប់ទទួលភ្ញៀវ។ រមណីយដ្ឋានទឹកធ្លាក់ចំការដូងអូររមាសស្ថិតក្នុងភូមិត្រពាំងភ្លោះ ឃុំ ពង្រលើ ស្រុកជីក្រែង ខេត្តសៀមរាប មានចំងាយពីទីប្រជុំជនស្រុកជីក្រែងទៅជាង២០គីឡូតាមផ្លូវលេខ២៦៦។

ចំណែកទំនប់ខ្សាកស្ថិតក្នុងភូមិអូរ ឃុំ ខ្វាវ ស្រុកជីក្រែង ខេត្តសៀមរាប ពីទីប្រជុំជនស្រុកជីក្រែងទៅតាមផ្លូវលេខ ២៦៦មានចម្ងាយជាង៤០គីឡូ។
សូមបញ្ជាក់ផងដែរថាក្នុងស្រុកជីក្រែងក្រៅពីមានរមណីយដ្ឋានទាំងពីរខាងលើ ក៏មានរមណីយដ្ឋានមួយកន្លែងទៀតដែលពលរដ្ឋក៏ដូចជាភ្ញៀវជាតិអន្តរជាតិនិយមចូលចិត្តមកលេងកម្សាន្តគឺរមណីយដ្ឋានទំនប់ម្កាក់ មានចំងាយពីទីរួមស្រុកជីក្រែងទៅមានចម្ងាយជាង១០គីឡូ៕SRP

ខេត្តសៀមរាប៖ រដ្ឋបាលខេត្តនៅព្រឹកមិញ បានសហការជាមួយក្រសួងទេសចរណ៍បានរៀបចំសិក្ខាសាលាបណ្តុះបណ្តាលជនបង្គោលវិធានសុវត្ថិភាពទេសចរណ៍សម្រាប់ប្រតិបត្តិករទេសចរណ៍ក្នុងខេត្តសៀមរាបក្រោមអធិបតីភាពលោក ទៀ សីហា អភិបាលខេត្ត និងមានការអញ្ជើញចូលរួមពីអ្នកពាក់ព័ន្ធ។

សិក្ខាសាលាបណ្តុះបណ្តាលជនបង្គោលវិធានសុវត្ថិភាពទេសចរណ៍នេះ ដើម្បីឱ្យមានជនបង្គោលសម្រាប់អនុវត្តវិធានការការពារសុវត្ថិភាពសង្គមក្នុងការបម្រើសេវាទេសចរណ៍ក្នុងអំឡុងវិបត្តិជំងឺកូវីដ១៩ ឱ្យស្របទៅតាមការណែនាំរបស់រាជរដ្ឋាភិបាល និងក្រសួងសុខាភិបាល ដើម្បីកាត់បន្ថយហានិភ័យនៃជំងឺកូវីដ១៩។

លោកអភិបាលខេត្ត បានផ្តាំផ្ញើថា បន្ទាប់ពីសិក្ខាសាលានេះ ឯកឧត្តម សង្ឃឹមយ៉ាងមុតមាំថាលោក លោកស្រីដែលជាជនបង្គោលទាំងអស់នឹងយកពិសោធន៍ទាំងនេះទៅអនុវត្តនិងបម្រើសេវាទេសចរណ៍ឱ្យបានប្រសិទ្ធភាពខ្ពស់ ដើម្បីជៀសវាងការឆ្លងជំងឺកូវីដ១៩ក្នុងសហគមន៍។ លោក បានបញ្ជាក់ថា ទោះបីជាប្រទេសយើងមានការឆ្លងជំងឺកូវីដ១៩ក្តី តែជំងឺនេះ គឺជាការនាំចូល ហើយក៏មិនទាន់មានករណីស្លាប់ផងដែរ។

បន្ទាប់ពីសិក្ខាសាលានេះ លោក លោកស្រីដែលជាសិក្ខាកាមក្នុងថ្ងៃនេះ អាចយកចំណេះជំនាញទាំងនេះទៅអនុវត្តឱ្យមានប្រសិទ្ធភាពខ្ពស់ស្របតាមការណែនាំ និងនីតិវិធីដែលបានបង្ហាញនាថ្ងៃនេះ៕SRP

ខេត្តសៀមរាប៖ តាមរយៈការិយាល័យកុងស៊ុលចិន ប្រចាំខេត្តសៀមរាប នៅ រសៀលថ្ងៃទី ០៥ ខែសីហា ម្សិលមិញ បានប្រគល់រថយន្តសម្អាតផ្លូវចំនួន ២គ្រឿង និង ម៉ាស់ចំនួន ២២.០០០ម៉ាស់ជូនដល់រដ្ឋបាលខេត្តក្រោមវត្តមានរបស់លោក ពិន ប្រាកដ អភិបាលរងខេត្ត និង លោក LIU ZHI JIE ប្រធានការិយាល័យកុងស៊ុលចិន ប្រចាំខេត្តសៀមរាប និង លោក YANG ZHAO អនុប្រធានក្រុមប្រឹក្សាភិបាលអគ្គនាយក នៃក្រុមហ៊ុនវិនិយោគអាកាសយានដ្ឋានអន្តរជាតិអង្គរ នៅសាលាខេត្តសៀមរាប។

តាមការបញ្ជាក់របស់លោក YANG ZHAO អនុប្រធានក្រុមប្រឹក្សាភិបាលអគ្គនាយក នៃក្រុមហ៊ុនវិនិយោគអាកាសយានដ្ឋានអន្តរជាតិអង្គរ បានគូសបញ្ជាក់ថា ក្នុងរយៈពេលកន្លងមកអាជ្ញាធរខេត្តសៀមរាប តែងតែធ្វើការគាំទ្រ និង សម្របសម្រួលរាលសកម្មភាព របស់ក្រុមហ៊ុន ក្នុងកិច្ចដំណើរការកសាងស្ថាបនាអាកាសយានដ្ឋានអន្តរជាតិ ហើយក្រុមហ៊ុននិងស្ថាបនាឲ្យបានរួចរាលនៅក្នុងឆ្នាំ២០២៣។

ក្នុងនាមប្រជាជនខេត្តយូណាន លោកក៏បានបញ្ជាក់ថា នេះគឺជាសមិទ្ធិសង្គម ប្រកបដោយប្រសិទ្ធភាព ដែលបានជួយផ្តល់ នូវរថយន្តសម្អាតបរិស្ថានក្នុងក្រុង ដើមី្បគាំទ្រក្នុងកិច្ចអភិវឌ្ឍន៍ក្រុងទេសចរណ៍ប្រវត្តិសាស្ត្រសៀមរាប។

លោក ពិន ប្រាកដ ក៏បានសម្តែងនូវអំណរគុណចំពោះ ប្រជាជនខេត្តយូណាន ក៏ដូចក្រុមហ៊ុនវិនិយោគអាកាសយានដ្ឋានអន្តរជាតិអង្គរ ដែលបានផ្តល់នូវរថយន្តសម្អាតបរិស្ថានតាមដងផ្លូវក្នុង ក្រុងសៀមរាប ចំនួន០២គ្រឿង រួមទាំងម៉ាស់ ២២.០០០ម៉ាស់ ជូនដល់រដ្ឋបាលខេត្តសៀមរាប ដោយខេត្តសៀមរាប និង ខេត្តយូណាន បានចងនូវសម្ព័ន្ធមេត្រីភាពនឹងគ្នា ចាប់តាំង ពីឆ្នាំ២០០៦មកដល់ពេលនេះ បានធ្វើការទំនាក់ទំនង សហប្រតិបត្តិការល្អនឹងគ្នា។

លោកក៏បានលើកឡើងថា ស្របពេលដែលខេត្តសៀមរាប កំពុងធ្វើការអភិវឌ្ឍន៍ ហើយ ក៏ជាការចាំបាច់បំផុតរបស់រដ្ឋបាលខេត្តសៀមរាប ដើមី្បធ្វើការសម្អាតអនាម័យ បរិស្ថានក្នុងក្រុងទេសចរណ៍មួយនេះ ឲ្យកាន់តែស្រស់ ស្អាត ប្រកបដោយបរិស្ថាន អនាម័យល្អ ក្នុងការទទួលស្វាគមន៍ភ្ញៀវទេសចរណ៍ជាតិ អន្តរជាតិ ចូលមកទស្សនាកម្សាន្ត។ លោកបាន បន្តទៀតថា ទោះបីនៅលើពិភពលោកជួបនូវបញ្ហាវបត្តិកូវិដ១៩ក៏ពិតមែន តែអាជ្ញាធរខេត្តសៀមរាបក៏មិនប្រងើយកន្តើយ លើកិច្ចអភិវឌ្ឍខេត្ត ដោយបានធ្វើការជួសជុល ស្ថាបនានូវហេដ្ឋារចនាសម្ព័ន្ធក្នុងខេត្តឡើង កាន់តែមានភាពទាក់ទាញ ដល់ភ្ញៀវទេសចរណ៍។

លោក អភិបាលរងខេត្តក៏បានថ្លែងអំណរគុណចំពោះប្រធានការិយាល័យកុងស៊ុល ចិន ប្រចាំខេត្តសៀមរាប ដែលតែងតែជួយធ្វើការសម្របសម្រួលដល់កិច្ចការទាំងនេះផងដែរ។
លោក LIU ZHI JIE ប្រធានការិយាល័យកុងស៊ុលចិន ប្រចាំខេត្តសៀមរាប ក៏បានបញ្ជាក់ផងដែរថា រាល់កិច្ចទំនាក់ទំនងរវាង ខេត្តទាំងពីរ ឯកឧត្តមនឹងធ្វើការសម្របសម្រួលជម្រុញឲ្យកាន់តែខ្លាំងក្លាថែមទៀត នឹងធ្វើឲ្យខេត្តសៀមរាប កាន់តែមានការអភិវឌ្ឍន៍ឡើង ថែមទៀត ក្នុងវិស័យទេសចរណ៍ ក្រោយពេលដែលការសាងសង់អាកាសយានដ្ឋានអន្តរជាតិអង្គរ បានរួចរាល់នោះ លោកសង្ឃឹមជឿ ជាក់ថា សេដ្ឋកិច្ចរបស់ប្រជាពលរដ្ឋខេត្តសៀមរាប និងមានការឈានឡើងទៀតផង៕SRP

ខេត្តសៀមរាប៖តៃកុងគ្រឿងចក្រចំនួនពីរនាក់ ត្រូវរដ្ឋបាលព្រៃឈើសៀមរាប បញ្ជូនខ្លួនទៅតុលាការ។
លោកម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប បានអោយដឹងថា ជនសង្ស័យទាំងពីរ បានបញ្ជូនទៅតុលាការនៅថ្ងៃទី០៤ ខែ សីហា ឆ្នាំ២០២០នេះ ក្នុងបទល្មេីសកាប់រានព្រៃ ឈូសឆាយដីព្រៃ ហំព័ទ្ធកាន់កាប់ដីព្រៃឈេីដោយខុសច្បាប់។
បុរសទាំងពីរដែលត្រូវបញ្ជូនទៅតុលាការ ទី០១ ឈ្មេាះ រិន ដែន ជាតៃកុងត្រាក់ទ័រ រស់នៅស្រុកមង្គលបូរី ខេត្តបន្ទាយមានជ័យ។ទី០២ ឈ្មេាះ គា គុល ជាតៃកុង អេស្ការវទ័រ រស់នៅស្រុកបន្ទាយស្រី ខេត្តសៀមរាប។
លោកម៉ុង ប៊ុនលីមបន្តថា ក្នុងប្រតិបត្តិការ ក្រៅពីឃាត់ខ្លួនជនសង្ស័ុយ
សមត្ថកិច្ចក៏បានរឹបអូស ត្រាក់ទ័រចំនួនមួយគ្រឿង ម៉ាកគូបូតា៦០៤០ ពណ៌ក្រហម និងអេស្ការ មួយគ្រឿងម៉ាកGAT120។
សូមបញ្ជាក់ថា កាលពីថ្ងៃទី០៣ ខែសីហា ឆ្នាំ ២០២០ ផ្នែករដ្ឋបាលព្រៃឈេីបន្ទាយស្រី និងសង្កាត់រដ្ឋបាលព្រៃឈេីអង្គរធំ បានសហការជាមួយកម្លាំង
កងរាជអាវុធហត្ថខេត្តសៀមរាប ចុះ បង្ក្រាបបទល្មេីសកាប់រានព្រៃ ឈូសឆាយដីព្រៃ ហំព័ទ្ធកាន់កាប់ដីព្រៃឈេី នៅត្រង់ ចំណុចភូមិស្វាយចេក ឃុំស្វាយចេក ស្រុកអង្គរធំ ខេត្តសៀមរាប ដោយបានធ្វេីការរឹប អូសវត្ថុតាងរួមមាន ត្រាក់ទរ័ចំនួនមួយគ្រឿង និងអេស្ការ ចំនួនមួយគ្រឿង យករក្សាទុកនៅស្នាក់ការសង្កាត់រដ្ឋបាលព្រៃ ឈេីអង្គរធំ។ ជាមួយគ្នានោះ ក៏បានឃាត់ខ្លួនបុរសដែលជាតៃកុងគ្រឿងចក្រចំនួនពីរនាក់ផងដែរ៕SRP