ខេត្តសៀមរាប – Page 199

ខេត្តសៀមរាប៖ លោក ទៀ សីហា អភិបាលខេត្តសៀមរាប នៅព្រឹកមិញបាននេះជួបសំណេះសំណាលជាមួយបងប្អូនជាសមាគមមគ្គុទេសក៏ទេសចរណ៍ រថយន្តតាក់ស៊ី រ៉ឺម៉ក់កង់បី រួមទាំងម៉ូតូកង់បីឥណ្ឌា(Pass app)នៅក្នុងខេត្ត ចំនួនប្រមាណ ១៦០នាក់ នៅបន្ទប់ប្រជុំសាលាខេត្តសៀមរាប។

ក្នុងពិធីជួបសំណេះសំណាលជាមួយបងប្អូននាពេលនេះ សំដៅផ្តោតទៅលើរាល់ផលប៉ះពាល់ចំពោះបងប្អូន នៅពេលនៅលើពិភពលោក បានកំពុងជួបវិបត្តិជម្ងឺកូវិដ១៩ សំខាន់ចំពោះខេត្តសៀមរាប ដែលជាប៉ូលសេដ្ឋកិច្ចទេសចរណ៍ដ៏សំខាន់នៃព្រះរាជាណាចក្រកម្ពុជាបានធ្វើឲ្យបាត់បង់នូវភ្ញៀវទេសចរណ៍ជាតិ អន្តរជាតិឲ្យប្រតិបត្តិករ និង អ្នករត់រ៉ឺម៉កបី ទាំងអស់លើកនូវបញ្ហាទុក្ខកង្វល់ សំណូមពរ នៅក្នុងអំឡុងជួបវិបត្តិជម្ងឺកូវិដ១៩ ដែលធ្វើឲ្យប៉ះពាល់ដល់មុខរបបរប្រចាំថ្ងៃ ដើមី្បធ្វើកិច្ចពិភាក្សារកនូវផ្លូវគន្លឹះល្អ ធ្វើជាមូលដ្ឋានគ្រឹះក្នុងការស្តារឡើងវិញនូវវិស័យទេសចរណ៍នៅខេត្តសៀមរាបឲ្យមានភាពប្រសើរឡើងវិញ ។

លោក ទៀ សីហា បានលើកឡើងថាការជួបជុំពិភាក្សានាពេលនេះ គឺជាការរកនូវដំណោះស្រាយនូវទុក្ខកង្វល់របស់បងប្អូនប្រតិបត្តិករទាំងអស់ ក្នុងពេលជួបនូវវិបត្តិកូវីដ១៩នេះ ហើយដោះស្រាយនូវទុក្ខលំបាកនេះ រដ្ឋបាលខេត្ត បានសហការជាមួយសហភាពសហព័ន្ធយុវជនកម្ពុជាខេត្ត សុខាភិបាលខេត្ត និង អាជ្ញាធរមូលដ្ឋានទាំង១២ក្រុង ស្រុក រៀបចំកម្មវិធីសម្រាកសៀមរាប ក្នុងពេលដែលមន្ត្រីរាជការ កម្មករ វិយោជិកបានឈប់សម្រាក់សងថ្ងៃចូលឆ្នាំថ្មីប្រពៃណីជាតិ ឆ្នាំជូត ទោស័ក ព.ស២៥៦៤ នាថ្ងៃខាងមុខនេះ ក្នុងការទាក់ទាញដល់ភ្ញៀវក្នុងស្រុកចូលមកកាន់ខេត្តសៀមរាប។ កត្តាសំខាន់នោះក៏ជាឱកាសសម្រាប់ប្រជាពលរដ្ឋកម្ពុជាបានសិក្សាស្វែងយល់ពីសម្បត្តិវប្បធម៌ អរិយធម៌ ប្រពៃណី ទំនៀមទម្លាប់របស់ប្រជាពលរដ្ឋនៅខេត្តសៀមរាប ពីការថែរក្សា អភិរក្សនូវវប្បធម៌ ទំនៀមទម្លាប់នៅតាមមូលដ្ឋាន។

លោកក៏បានលើផងដែរ អំពីកម្មវិធីទាំងឡាយនៅពេលដំណើរការព្រឹត្តិការណ៍សម្រាកសៀមរាបនេះ ជូនដល់បងប្អូនប្រតិបត្តិករ បានចូលរួម ព្រមទាំងជាការផ្តល់នូវឱកាសដល់បងប្អូនក្នុងការរកនូវចំណូលប្រចាំថ្ងៃ ដើមី្បផ្គត់ផ្គងជីវភាពក្នុងគ្រួសារទៀតផង។

លោកក៏បានបន្តទៀតថា កម្មវិធីសម្រាកសៀមរាបនេះ រដ្ឋបាលខេត្តក៏មានតម្រូវការដល់បងប្អូនមគ្គុទេសក៍ទេសចរណ៍បានចូលរួមធ្វើការពន្យល់បង្ហាញដល់ភ្ញៀវជាតិឲ្យបានស្គាល់កាន់តែច្បាប់អំពីប្រវត្តិសាស្ត្រ សម្បត្តិវប្បធម៌ជាតិ ព្រមទាំងពីស្ថានភាពភូមិសាស្ត្រធម្មជាតិព្រៃភ្នំទៀតផង។

អភិបាលខេត្ត បានគូសបញ្ជាក់ថា សកម្មភាពនេះយើងមិនមែនធ្វើក្នុងពេលឈប់សម្រាក់នោះឡើយ គឺត្រូវបន្តធ្វើជារៀងរាល់ថ្ងៃឈប់សម្រាកប្រចាំសប្តាហ៍ ដោយនៅខេត្តសៀមរាប តាមបណ្តាមូលដ្ឋានស្រុកមួយចំនួន ក៏បានធ្វើការពង្រីកនូវតំបន់ទេសចរណ៍ធម្មជាតិ និង កែច្នៃ ដើមី្បបម្រើដល់ភ្ញៀវទេចរជាតិ អន្តរជាតិ មកពីគ្រប់មជ្ឈដ្ឋាន ក្រោយពេលបញ្ចប់នូវវិបត្តិជម្ងឺកូវិដនេះទៅទៀតផង៕SRP

ខេត្តសៀមរាប៖គម្រោងរីសតនិងពុះដីឡូត៍លក់របស់ឧកញ៉ាមាសសត្យាបានកំពុងដំណើរការដោយឈូសឆាយរំលោភបំពានលើដីគម្របព្រៃឈើរបស់រដ្ឋជាង១៥០ហិកតា។ករណីនេះខណ្ឌរដ្ឋបាលព្រៃឈើសៀមរាបអះអាងថានឹងចុះទៅពិនិត្យ ហើយអនុវត្តតាមច្បាប់។

ទីតាំងរីសតនិងពុះជាដីឡូត៍របស់ឧកញ៉ាមាសសត្យាស្ថិតក្នុងភូមិប្រិយ៍ឃុំខ្នារសណ្តាយស្រុកបន្ទាយស្រីខេត្តសៀមរាប ត្រង់ចំណុចខាលិច ឬក្រោយវត្តប្រិយ៍ ប្រហែល៥០០ម៉ែត្រ។

ទីតាំងខាងលើក្នុងពេលកន្លងមកនិងបច្ចុប្បន្នត្រូវបានឧកញ៉ាខាងលើដាក់ពង្រាយគ្រឿងចក្រប្រមាណជិត២០គ្រឿងធ្វើសកម្មភាពឈូសឆាយដីព្រៃយ៉ាងគគ្រឹកគគ្រែងតែអាជ្ញាធរមានសមត្ថកិច្ចហាក់ធ្វើមិនដឹងរឿងអីសោះ ទុកឲ្យគ្រឿងចក្រធ្វើការឈូសឆាយទាំងកម្រោល។ករណីនេះកំពុងធ្វើអោយមានការងឿងឆ្ងល់ថា តើវាមានហេតុផលអី?។

អ្នកភូមិម្តុំវត្តប្រិយ៍និយាយថាព្រៃខាងលើនេះពីមុនមកមិនមាននណាម្នាក់ហ៊ានកាប់គាស់ធ្វើស្រែចំការឡើយព្រោះជាតំបន់ហាមឃាត់។ ក្រុមអ្នកភូមិក៏បានបង្ហាញពីអារម្មណ៍មិនសប្បាយចិត្ត ដោយលើកហេតុផលថា ក្នុងរយ:កាលកន្លងមកនេះពួកគាត់ទទួលរងនូវការចាប់ចង ដោយសារតែឈូសព្រៃច្រើននាក់មកហើយព្រោះមិនដឹងថាជាប់គម្របព្រៃឈើរបស់រដ្ឋ។តែឧកញ៉ាមាសសត្យាហេតុអីមិនរងការចាប់ចងដូចពួកគាត់? ឬមួយថាងារជាឧកញ៉ាច្បាប់និងសមត្ថកិច្ចមិនហ៊ាន?។ ពួកខ្ញុំពលរដ្ឋ ហ៊ានត្រឹមតែឆ្ងល់ប៉ុណ្ណោះ។តែក៏ចង់អោយស្ថាប័នច្បាប់ អនុវត្តដោយកុំមើលម្ខាងជាពលរដ្ឋ ហើយម្ខាងជាឧកញ៉ា។

ជួបសម្ភាសន៍ផ្ទាល់អភិបាលស្រុកបន្ទាយស្រីលោកឃឹម ហ្វីណង់បានលើឡើងថាគម្រោងដីពុះឡូត៍នៅក្នុងស្រុកបន្ទាយស្រីគឺគ្មានច្បាប់ទាំងអស់។ទោះបីម្ចាស់ពុះឡូត៍ហើយក៍ដោយតែអាជ្ញាធរស្រុកមិនអាចកាត់ឈ្មោះអោយនោះឡើយ។

លោកអភិបាលបន្តថាចំពោះគម្រោងដីឡូត៍និងរីសតរបស់ឧកញ៉ាមាស សត្យាក៏មិនមានសុំច្បាប់ពីអាជ្ញាធរស្រុកដែរ។តែគេអាចសុំទៅថ្នាក់លើក៏មិនដឹងព្រោះខាងស្រុកមានសិទ្ធិអនុញាតិច្បាប់ត្រឹមតែលើទំហ៊ំដី៥០០០ម៉ែត្រការ៉េប៉ុណ្ណោះ។លោកអភិបាលបញ្ជាក់ថា បើដីមានលិខិតកាន់កាប់ យើងមិនអាចហាមឃាត់ការឈូសឆាយរៀបចំរបស់គេបានទេ។ប៉ុន្តែបើគេបោះបង្គោលពុះជាឡូត៍ដាក់ស្លាកលក់ ឬសាងសង់អ្វីមួយយើងចុះទៅហាមឃាត់ភ្លាម។

លោកឧកញ៉ាមាស សត្យា នៅព្រឹកថ្ងៃទី១៣ខែសីហាឆ្នាំ២០២០នេះបានថ្លែងប្រាប់អ្នកសារព័ត៌មានតាមទូរសព្ទ័ថាទីតាំងដីរបស់លោកកំពុងរត់ច្បាប់រៀបចំធ្វើចម្រោះទឹកស្អាត។ពេលបន្ទាប់ធ្វើរីសតនិងពុះជាឡូត៍។លោកបន្តថាដីរបស់លោកមានលិខិតកាន់កាប់ហើយរឿងជាប់គម្របព្រៃឈើលោកមិនដែលដឹងទេ។គឺមិនមានជាប់អ្វីឡើយ។ចឹងទេការងារលោកនៅតែបន្តធ្វើ។

លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាបបានបញ្ជាក់តាមប្រពន្ធ័ តេឡេក្រាមនៅព្រឹកថ្ងៃទី១៣ខែសីហានេះថា ដីដែលឧកញ៉ាមាស សត្យា កំពុងឈូសឆាយគឺជាប់គម្របព្រៃឈើរបស់រដ្ឋទាំងអស់។ លោកបន្តថាពេលនេះមន្ត្រីនិងនាយសង្កាត់រដ្ឋបាលព្រៃឈើកំពុងចុះពិនិត្យ។

ទោះជាបែបនេះក្តីលោកនាយខណ្ឌនៅមិនទាន់ឆ្លើយតបថានឹងចុះទៅផ្អាកសកម្មភាពឈូសឆាយដីគម្របព្រៃឈើរដ្ឋពីសំណាក់លោកឧកញ៉ាមាសសត្យាឬយ៉ាងណានោះទេ។ប៉ុន្តែលោកធ្លាប់បញ្ជាក់ថាជនណាដែលរំលោភកាន់កាប់ដីព្រៃរបស់រដ្ឋត្រូវតែអនុវត្តតាមច្បាប់។យោងតាមការបញ្ជាក់របស់នាយខណ្ឌគេរំពឹងថាទីតាំងដីដែលឧកញ៉ាមាសសត្យាកំពុងឈូសឆាយអាចនិងផ្អាកសកម្មភាព ហើយអនុវត្តតាមផ្លូវច្បាប់៕SRP

ខេត្តសៀមរាប៖ក្រោយពេលបែកធ្លាយព័ត៌មានតាមបណ្ដាសារព័ត៌មាននិងការបង្ហោះតាមហ្វេសប៊ុកថាម្ចាស់ឡានពាក់ស្លាកលេខនគរបាលនេះ ជាប៉ូលីសម្នាក់ធ្វើការនៅស្នងការនគរបាលខេត្តសៀមរាប បែកថ្នាំនិងប្រើប្រាស់គ្រឿងញៀន ធ្វើឲ្យមានការចាប់អារម្មណ៍យ៉ាងខ្លាំងពីមន្ត្រីរាជការនិងអ្នកនិយមតាមដានព័ត៌មាននានា។

បន្ទាប់ពីមានការបែកធ្លាយថានគរបាលរូបនេះមានផ្ទុកសារធាតុញៀនក្នុងខ្លួន ស្នងការនគរបាលខេត្តសៀមរាបបានធ្វើការបំភ្លឺផងដែរ។

យោងតាមទំព័រផេកហ្វេសប៊ុករបស់ស្នងការនគរបាលខេត្តសៀមរាបបានអះអាងថា
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តសៀមរាប សូមធ្វើការបំភ្លឺជូនសាធារណជន អ្នកសារព័ត៌មាន និងពិសេសអ្នកនិយមប្រើប្រាស់បណ្ដាញទំនាក់ទំនងសង្គមមេត្តាជ្រាបថា តាមការស្រាវជ្រាវរបស់មន្ត្រីជំនាញនៃស្នងការដ្ឋាននគរបាលខេត្តសៀមរាបបានរកឃើញថា កម្មសិទ្ធិករ និងអ្នកបើកបររថយន្តម៉ាក Mazda ពាក់ស្លាកលេខ នគរបាល 2-2355 ដែលបានចតនៅចំណុចជិតរបងវត្តគោកចក ស្ថិតនៅភូមិវាល សង្កាត់គោកចក ក្រុង/ខេត្តសៀមរាបនោះ គឺលោកអនុសេនីយ៍ទោ សាង រ៉ាយូ នាយរងការិយាល័យនៃស្នងការនគរបាលខេត្តសៀមរាប ។

បន្ទាប់ពីទទួលបានបទបញ្ជាពីឧត្តមសេនីយ៍ទោ ទិត្យ ណារ៉ុង ស្នងការនគរបាលខេត្តសៀមរាប ក្រុមការងារអនុវត្តវិន័យនៃស្នងការដ្ឋាន បានកោះហៅសាម៉ីខ្លួនខាងលើមកធ្វើការបំភ្លឺ ក្នុងនោះលោកអនុសេនីយ៍ទោ សាង រ៉ាយូ បានបញ្ជាក់ថា លោកពិតជាបានបើកបររថយន្តពាក់ស្លាកលេខនគរបាលខាងលើនោះពិតប្រាកដមែន គឺបើកបរចេញពីកន្លែងហូបចុកជាមួយមិត្តភក្កិ ក្នុងស្ថានភាពស្រវឹង ទើបលោកសម្រេចចិត្តចតរថយន្តនៅចំណុចខាងលើដើម្បីចៀសវាងបង្កគ្រោះថ្នាក់ដល់ខ្លួនឯង ក៏ដូចជាអ្នកដទៃ ។

បន្ទាប់ពីការបំភ្លឺ ជំនាញបានយកទឹកនោមសាមីខ្លួនខាងលើ ដើម្បីទៅពិនិត្យវិភាគស្វែងរកសារធាតុញៀន ។ ក្នុងករណីនេះប្រសិនរកឃើញមានសារធាតុញៀនថ្នាក់ដឹកនាំនៃស្នងការដ្ឋាននគរបាលខេត្តសៀមរាបនឹងចាត់វិធានការយ៉ាងម៉ឺងម៉ាត់បំផុត ឈានដល់ការអនុវត្តវិន័យរបស់កងកម្លាំងនគរបាលជាតិបន្ថែមផងដែរ។
ទោះយ៉ាងណាក្នុងនាមថ្នាក់ដឹកនាំស្នងការនគរបាលខេត្តសៀមរាប សូមថ្លែងអំណរគុណយ៉ាងជ្រាលជ្រៅបំផុតចំពោះសាធារណជន អ្នកសារព័ត៌មាន និងពិសេសបណ្ដាញទំនាក់ទំនងសង្គមដែលបានចូលរួមចំណែកក្នុងការការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ ជាមួយគ្នានេះដែរ
សូមអំពាវនាវសូមបងប្អូនកុំធ្វើការសន្និដ្ឋានវាយតម្លៃដោយខ្វះមូលដ្ឋានស៊ើបបញ្ជាក់ឲ្យបានច្បាស់លាស់ ដើម្បីចៀសវាងការសន្និដ្ឋាននោះ មានឥទ្ធិពលប៉ះពាល់ដល់កិត្តិយស និងសេចក្តីថ្លៃថ្នូររបស់បុគ្គល ឬស្ថាប័ន។

ពាក់ព័ន្ធករណីខាងលើនេះលោកឧត្តមសេនីយ៍ត្រី តូច សាកល ស្នងការស្ដីទីខេត្តសៀមរាប បានថ្លែងប្រាប់បណ្ដាញសៀមរាបប៉ុស្ដិ៍ តាមទូរស័ព្ទថានគរបាលខាងលើឈ្មោះសាង សាង រ៉ាយូ ត្រូវបានជំនាញបានយកទឹកនោមទៅពិនិត្យរកឃើញថានគរបាលរូបនេះមានសារធាតុញៀនក្នុងខ្លួន។ លោកឧត្កមសេនីយ៍ត្រី តូច សាកល បញ្ជាក់ថានគរបាលរូបនេះត្រូវបានប្រគល់ឲ្យទៅការិយាល័យនគរបាលប្រឆាំងគ្រឿងញៀន អនុវត្តតាមវិន័យកម្លាំង។ ទោះយ៉ាងលោកលោកឧត្កមសេនីយ៍ត្រី តូច សាកល មិនបានបញ្ជាក់លម្អិតនោះទេ។ នេះជាសារសម្លេងរបស់លោកឧត្តមសេនីយ៍ត្រី តូច សាកល ស្នងការស្ដីទីខេត្តសៀមរាប៖សូមចុចស្ដាប់

ជុំវិញករណីនេះមិនអាចទាក់ទងលោកវរសេនីយ៍ឯក អ៊ុំ សាអាត នាយការិយាល័យនគរបាលប្រឆាំងគ្រឿងញៀន ស្នងការខេត្តសៀមរាប បាននោះទេដោយទូរស័ព្ទនៅក្រៅសេវា។ ប៉ុន្តែលោកវរសេនីយ៍ឯកអៀង មករា នាយការិយាល័យបុគ្គលិកនៃស្នងការនគរបាលខេត្តសៀមរាប បានបញ្ជាក់ប្រាប់បណ្ដាញសៀមរាបប៉ុស្ដិ៍ ថាលោកអនុសេនីយ៍ទោ សាង រ៉ាយូ មានតួនាទីនាយរងការិយាល័យសន្តិសុខផ្ទៃក្នុង នៃស្នងការនគរបាលខេត្តសៀមរាប។ ករណីនេះលោកវរសេនីយ៍ឯកអៀង មករា បានបន្ថែមថាខ្ញុំ បានទទួលព័ត៌ មាននឹងហើយនិងកំពុងចំណាត់រឿងនេះ។

បើតាមលោកវរសេនីយ៍ឯកអៀង មករា ថាការិយល័យបុគ្គលិកកំពុងធ្វើរបាយការណ៍មន្ត្រីខាងលើនេះទៅនាយកដ្ឋានបុគ្គលិកដើម្បីអនុវត្តវិន័យមន្ត្រីរូបនេះតាមវិន័យរបស់កងកម្លាំង។ យោងតាមប្រភពច្បាស់ការណ៍បានឲ្យដឹងថាលោកអនុសេនីយ៍ទោ សាង រ៉ាយូ មានឪពុកជានគរបាលខេត្តសៀមរាបផងដែរដោយឪពុករបស់លោកមានតូនាទីជានាយការិយាល័យសន្តិសុខផ្ទៃក្នុង នៃស្នងការនគរបាលខេត្តសៀមរាប៕SRP

ខេត្តសៀមរាប៖នគរបាលតាមបណ្ដាប៉ុស្ដិ៍នៃអធិការនគរបាលក្រុងសៀមរាប បានបន្តចុះណែនាំដល់ពលរដ្ឋ កុំឲ្យមានការទុកម៉ូតូនៅក្រៅបន្ទប់ចៀសវាងការបាត់បង់ដោយប្រការណាមួយ។
លោកវរសេនីយ៍ឯក ណុប សារ៉ាក់ អធិការដ្ឋាននគរបាលក្រុងសៀមរាបបានឲ្យដឹងនៅព្រឹកថ្ងៃទី១៣ខែសីហានេះថា កម្លាំងប៉ុស្តិ៍បានសហការជាមួយកម្លាំងប្រជាការពារ ចេញល្បាតនៅក្នុងមូលដ្ឋាននិងបានចុះណែនាំតាមបន្ទប់ជួល ភូមិស្វាយដង្គំនិងភូមិគ្រួស ដែលមានម៉ូតូទុកក្រៅបន្ទប់អោយគាត់យកម៉ូតូទុកក្នុងបន្ទប់។
ក្នុងនាម អធិការដ្ឋាននគរបាលក្រុងសៀមរាប លោកវរសេនីយ៍ឯក ណុប សារ៉ាក់ សូមធ្វើការអំពាវនាវដល់ ប្រជាពលរដ្ឋ ដែលបានស្នាក់នៅតាមបន្ទប់ជួល ក៏ដូចពលរដ្ឋដ៏ទៃទៀត មេត្តាចូលរួមសហការនិងសមត្ថកិច្ចក្នុងការថែរក្សាឡាន ម៉ូតូ អោយមានការប្រុងប្រយ័ត្នខ្ពស់ ដោយមុនចូលសម្រាកត្រូវយកម៉ូតូដាក់ក្នុងបន្ទប់ បើបន្ទប់ចង្អៀតសូមទិញសោរសុវត្ថិភាព ចាក់កង់មុខ ឬកង់ក្រោយបន្ថែម លើសោរកផង ចៀសវាងការបាត់បង់ដោយប្រការណាមួយ៕SRP

ខេត្តសៀមរាប៖បន្ទាប់ពីមានការបង្ហើបព័ត៌មាននិងការបង្ហោះតាមហ្វេសប៊ុកថាម្ចាស់ឡាននេះជាប៉ូលីសម្នាក់ធ្វើការនៅស្នងការនគរបាលខេត្តសៀមរាបបែកថ្នាំនិងប្រើប្រាស់គ្រឿងញៀន ស្នងការនគរបាលខេត្តសៀមរាបសុំបកស្រាយករណីនេះ។
ក្រុមការងារប្រតិកម្មរហ័សនៃស្នងការដ្ឋាននគរបាលខេត្តសៀមរាប សូមធ្វើការបំភ្លឺជូនសាធារណជន អ្នកសារព័ត៌មាន និងពិសេសអ្នកនិយមប្រើប្រាស់បណ្ដាញទំនាក់ទំនងសង្គមមេត្តាជ្រាបថា តាមការស្រាវជ្រាវរបស់មន្ត្រីជំនាញនៃស្នងការដ្ឋាននគរបាលខេត្តសៀមរាបបានរកឃើញថា កម្មសិទ្ធិករ និងអ្នកបើកបររថយន្តម៉ាក Mazda ពាក់ស្លាកលេខ នគរបាល 2-2355 ដែលបានចតនៅចំណុចជិតរបងវត្តគោកចក ស្ថិតនៅភូមិវាល សង្កាត់គោកចក ក្រុង/ខេត្តសៀមរាបនោះ គឺលោកអនុសេនីយ៍ទោ សាង រ៉ាយូ នាយរងការិយាល័យនៃស្នងការនគរបាលខេត្តសៀមរាប ។

Sponsored

ខេត្តសៀមរាប៖ ស្នងការរងទទួលការងារព្រហ្មទណ្ឌ នៃស្នងការខេត្តសៀមរាបលោកឧត្តមសេនីយ៍ត្រីភឹង ចិន្តារ៉េត បានឲ្យដឹងថានគរបាលស្រុកអង្គរជុំបានឃាត់ជនសង្ស័យម្នាក់ឈ្មោះ ឈឿម ឆេន ភេទប្រុសអាយុ ៤៣ឆ្ឆ្នាំនៅ ភូមិតាកួយ ឃុំគោល ស្រុកអង្គជុំ ខេត្តសៀមរាប ពីបងហិង្សាដោយចេតនាមានស្ថានទម្ងន់ទោស។

លោកឧត្តមសេនីយ៍ត្រីភឹង ចិន្តារ៉េត បន្តថានៅថ្ងៃទី១១ ខែសីហា ឆ្នាំ២០២០ វេលាម៉ោង ១៤,00 នាទី មាន ឈ្មោះ លឿម គា ភេទប្រុស អាយុ២៧ ឆ្នាំ នៅភូមិគោកក្នាំង ឃុំស្រែខ្វាវ ស្រុកអង្គរជុំ ខេត្តសៀមរាប បានទៅលេងផ្ទះរបស់ឈ្មោះ ឈើយ ម៉ាប់ ភេទស្រីអាយុ ៤០ ឆ្នាំនៅភូមិតាកួយ ឃុំគោល ស្រុកអង្គជុំ (មេម៉ាយ) បាននាំគ្នាផឹកស្រាជាមួយ ឈ្មោះ ឈឿម ឆេន ភេទប្រុស(ជនសង្ស័យ) ដោយពួកគរបានស្រលាញ់ម្ចាស់ផ្ទះ ទាំង២នាក់ ហើយច្រណែនគ្នាទៅវិញទៅមក។
លោកថា នៅពេលជនរងគ្រោះស្រវឹងខ្លាំងក៏ឡើងដេកលើអង្រឹងក្បែកន្លែងផឹក ចំណែកជនសង្ស័យនិងម្ចាស់ផ្ទះក៏បានផឹកជាមួយគ្នាបន្តទៀត។

ក្រោយមកជនសង្ស័យឈ្មោះ ឈឿម ឆេន បានទាញកំណល់ឈើអង្គុយវាយមកលើជនរងគ្រោះចំក្បាលបណ្ដាលអោយរបួសធ្ងន់។ ក្រោយកើតហេតុជនរងគ្រោះត្រូវបានបញ្ជូនទៅមន្ទីពេទ្យបង្អែកស្រុកអង្គរជុំ ដើម្បីសង្គ្រោះ។ចំណែកជនសង្ស័យបានរត់កេចខ្លួន។

លោកបានបញ្ជាក់ថានៅថ្ងៃទី12ខែសីហាឆ្នាំ2020 វេលាម៉ោង១១នគរបាលស្រុកអង្គរជុំបានសហការជាមួយ គរបាលស្រុកក្រឡាញ់ បានឃាត់ខ្លួនជនសង្ស័យបាននៅចំណុច ភូមិខ្សី ឃុំសែនសុខ ស្រុកក្រឡាញ់ ខេត្តសៀមរាប។
ជនសង្ស័យបានសារភាពថា ខ្លួនពិតជាបានប្រព្រឹត្តទៅលើ ជនរងគ្រោះពិតមែន។ ករណីនេះសមត្ថកិច្ចកសាងសំណុំរឿងបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖ លោកឧត្តមសេនីយ៍ត្រីភឹង ចិន្ដារ៉េត ស្នងការរងខេត្តសៀមរាបទទួលផែនកណ្ដាលព្រហ្មទណ្ឌខេត្តបានឲ្យដឹងថាកម្លាំងនគរបាលព្រហ្មទណ្ឌកម្រិតស្រាលនៅថ្ងៃទី ១២ខែ សីហា ឆ្នាំ២០២០នេះបាន សហការជាមួយការិយាល័យប្រឆាំងគ្រឿងញៀន អធិការក្រុង ប៉ុស្តិ៍នគរបាលរដ្ឋបាលសង្កាត់ស្វាយដង្គំ នឹងប្រជាការពារភូមិសង្កាត់ ស្វាយដង្គំ ស្រាវជ្រាវនិងសើុបអង្កេត ចាប់ខ្លួននារីម្នាក់។

ជនសង្ស័យឈ្មោះ តាំង ជែនី ភេទស្រី អាយុ២៧ឆ្នាំ មុខរបរមិនពិតប្រាកដ មានទីលំនៅ ភូមិសាលាកន្សែង សង្កាត់ស្វាយដង្គំ ក្រុងសៀមរាប ស្នាក់នៅបន្ទប់ជួល ភូមិសាលាកន្សែងសង្កាត់ស្វាយដង្គំ ក្រុងសៀមរាប។ លទ្ធផលធ្វើតេស្ត វិជ្ជមាន។

លោកឧត្តមសេនីយ៍ត្រីភឹង ចិន្ដារ៉េត បន្តថាករណីនេះដកហូតគ្រឿងញៀន ៩កញ្ចប់ … ៨កញ្ចប់តូច និង១កញ្ចប់ធំ និងថង់សម្រាប់វេចខ្ជប់គ្រឿនញៀនមួយចំនួន។ លោកថាបានប្រគល់ជនសង្ស័យអោយទៅការិយាល័យប្រឆាំងការជួញដូរគ្រឿងញៀន ដើម្បីបន្តនីតិវិធី៕SRP

ខេត្តសៀមរាប៖ពិតជាហ៊ានណាស់ឃើញគេអង្គុយផឹកមុខបន្ទប់បែជាដេញកាប់រួចយកទូរស័ព្ទបានសម្រេច គេចខ្លួនតែត្រូវបាននគរបាលឃាត់ខ្លួនបាន។
ជនសង្ស័យឈ្មោះ ណិប វណ្ណា ហៅព្រំ ភេទប្រុស អាយុ 29 ឆ្នាំមុខរបរកម្មករសំណង់ មានទីលំនៅបច្ចុប្បន្នភូមិបន្ទាយចាស់ សង្កាត់ស្លក្រាម ក្រុងសៀមរាប ពាក់ព័ន្ធករណីអំពើលួចដោយមានស្ថានទម្ងន់ទោស (ប្រើប្រាស់អាវុធ) និងបទប្រើប្រាស់ដោយខុសច្បាប់នូវសារធាតុញៀន។
លោកវរសេនីយ៍ឯកណុប សារ៉ាក់ អធិការនគរបាលក្រុងសៀមរាបបានឲ្យដឹងថា
ករណីនេះនៅថ្ងៃទី 07 ខែសីហា ឆ្នាំ 2020 វេលាម៉ោង 21,30 នាទីស្ថិតនៅក្រុមទី 12 ភូមិបន្ទាយចាស់សង្កាត់ស្លក្រាម ក្រុង-ខេត្តសៀមរាប ជនរងគ្រោះឈ្មោះ ផែនទីណារឹទ្ធ ស្រីស្រស់ ភេទស្រីអាយុ ១៨ ឆ្នាំ មុខរបស់សិស្សស្នាក់នៅបន្ទប់ជួលភូមិបន្ទាយចាស់ សង្កាត់ស្លក្រាម ក្រុងសៀមរាប និងមិត្តភក្កិចំនួន 03 នាក់ទៀត បាននាំគ្នាអង្គុយផឹកស៊ីនៅមុខបន្ទប់ជួលពេលនោះស្រាប់តែមានជនសង្ស័យចំនួន 02 នាក់ ដែលជាមនុស្សប្រុស អាយុប្រហែលជាង 20 ឆ្នាំមិនធ្លាប់ស្គាល់គ្នាបានធ្វើសកម្មភាពប្រើកាំបិតដេញកាប់ទៅលើជនរងគ្រោះនិងមិត្តភ័ក្ររបស់គាត់ហើយបាននាំគ្នារត់ចូលក្នុងបន្ទប់ ពេលដែលជនរងគ្រោះ និងមិត្តភ័ក្រ្តរត់ចូលក្នុងបន្ទប់ ដោយបានទុកទូរស័ព្ទចំនួន 02 គ្រឿង នៅកន្លែងតុអង្គុយផឹកស៊ីគឺទូរស័ព្ទម៉ាក iphone 8,plus ពណ៌ស និងម៉ាក iphone 7 plus ពណ៌ផ្កាឈូកពេលនោះត្រូវបានជនសង្ស័យទាំង 2នាក់បានលួចយកទូរស័ព្ទទាំង 2 គ្រឿងហើយរត់គេចខ្លួនបាត់បាត់។
ក្រោយមកជនរងគ្រោះបានមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់ស្លក្រាម។ លោកអធិការថា ក្រោយពីទទួលពាក្យបណ្តឹងសមត្ថកិច្ចបានចុះស្រាវជ្រាវជុំវិញកន្លែងកើតហេតុ និងកំណត់មុខសញ្ញាបាន ។ លុះមកដល់ថ្ងៃទី 11 ខែសីហា ឆ្នាំ 2020 វេលាម៉ោង 08 និង 00 នាទីព្រឹក បានធ្វើការនាំខ្លួនឈ្មោះ ចេវ ឧត្តម ហៅដំ ភេទប្រុស អាយុ33ឆ្នាំ មុខរបរកម្មករសំណង់ និងប្អូនប្រុសរបស់គេឈ្មោះ ចេវ វិដេត ហៅតាក់ ភេទប្រុស អាយុ 25 ឆ្នាំ មុខរបរកម្មករសំណង់ ទាំងពីរនាក់មានទីលំនៅបច្ចុប្បន្នភូមិបន្ទាយចាស់ សង្កាត់ស្លក្រាម។ ដោយបានធ្វើការឆែកឆេរនៅក្នុងបន្ទប់លើផ្ទះរបស់អ្នកទាំងពីរនាក់បានឃើញទូរស័ព្ទមួយគ្រឿង iphone 8plus ពណ៌ស ដែលជាទូរស័ព្ទរបស់ជនរងគ្រោះ នៅក្នុងបន្ទប់លើផ្ទះរបស់ពួកគេ។
ក្រោយពីការសាកសួរអ្នកទាំងពីរអ្នកបានឆ្លើយសារភាពថាទូរស័ព្ទមួយគ្រឿងនេះរូបគេបានឃើញឈ្មោះ ណិប វណ្ណា ហៅព្រំ និងប្អូនប្រុសបង្កើតរបស់ពួកគេឈ្មោះ ចេវ ពិដោ ហៅតោ អាយុ 23 ឆ្នាំ បានយកមកបង្ហាញពួកគេ ប៉ុន្តែពួកគេមិនបានដឹងថាបានមកពីណានោះទេ។
លោកអធិការបញ្ជាក់ថា លុះមកដល់ថ្ងៃទី 12 ខែសីហា ឆ្នាំ 2020 វេលាម៉ោង 09 និង 00 នាទីព្រឹកបានធ្វើការស្រាវជ្រាវនិងនាំខ្លួនឈ្មោះ ណិប វណ្ណា ហៅព្រំ មកធ្វើការសាកសួរ។ ជនសង្ស័យឈ្មោះ ណិប វណ្ណា បានឆ្លើយសារភាពថារូបខ្លួននឹងឈ្មោះ ចែវ ពិដោ ហៅតោ ពិតជាបានធ្វើសកម្មភាពប្រើកាំបិតដេញកាប់ជនរងគ្រោះរួច និងយកទូរសព្ទដៃរបស់ជនរងគ្រោះទាំងពីរគ្រឿងខាងលើពិតប្រាកដមែន។ ដោយទូរស័ព្ទមួយគ្រឿងម៉ាក 7 plus ពណ៌ផ្កាឈូក រូបគេនឹងឈ្មោះ ចេវ ពិដោរ យកទូរស័ព្ទមួយគ្រឿងទៀតពួកខ្លួនទុកចោលនៅក្នុងបន្ទប់លើផ្ទះរបស់ឈ្មោះ ចេវឧត្តម។
បើតាមអធិការថាបានធ្វើការដកហូតទូរស័ព្ទទាំងពីរគ្រឿងបានមកវិញ និងធ្វើការប្រគល់ឲ្យជនរងគ្រោះយកទៅប្រើប្រាស់។ ចំណែកជនសង្ស័យឈ្មោះ ចេវ ពិដោ បានរត់គេចខ្លួនបាត់។
ជុំវិញករណីនេះសមត្ថកិច្ចរៀបចំសំណុំរឿងបញ្ជូនទៅតុលាការដើម្បីអនុវត្តតាមច្បាប់៕SRP