ខេត្តសៀមរាប

ខេត្តសៀមរាប៖សេចក្ដីរាយការណ៍បានអោយដឹងថាអគ្គិភ័យបានឆេះផ្ទះមួយ នៅក្នុងបុរីសៀងណាំ ដោយបំផ្លាញទ្រព្យសម្បត្តិ ប្រមាណ៥ពាន់ដុល្លារ។
ហេតុការណ៍បានកើតឡើងនៅថ្ងៃទី០៦ ខែកញ្ញា ឆ្នាំ២០២០វេលាម៉ោង០៤និង០០នាទី ស្ថិតក្នុងភូមិខ្នារ សង្កាត់ជ្រាវ ក្រុងសៀមរាប។
នគរបាលប៉ុស្តិ៍សង្កាត់ជ្រាវបានអោយដឹងថាម្ចាស់ផ្ទះឈ្មោះសុខ ចិត្រា ភេទស្រី អាយុ៤១ឆ្នាំ មុខរបរលក់ដូរ ស្នាក់នៅបណ្តោះអាសន្នក្នុងបុរីសៀងណាំ(ផ្លូវលេខ១៥) កន្លែងកើតហេតុខាងលើ។នគរបាលប៉ុស្តិ៍បន្តថាករណីនេះបណ្ដាលអោយខូចខាតសម្ភាររួមមានគ្រឿងអលង្កានិងសម្ភារតាំងក្នុងផ្ទះជារបស់ប្រទេសជប៉ុន(ខោ-អាវ តុ ទូរ ចាន ឆ្នាំង ស្បែកជើង)សរុបជាប្រាក់ប្រមាណ៥០០០ដុល្លារ។ បើតាមនគរបាលថាអគ្គិភ័យបានរលត់វិញនៅម៉ោងប្រហែល០៥ និង០០នាទី។មូលហេតុទុស្សេរខ្សែរភ្លើងចេញពីកន្លែងកុងម៉ា៕SRP

ខេត្តសៀមរាប៖ក្នុងនាមក្រុមប្រឹក្សា គណៈអភិបាលខេត្ត មន្រ្តីរាជការ កងកម្លាំងប្រដាប់អាវុធគ្រប់លំដាប់ថ្នាក់ និង ប្រជាពលរដ្ឋទូទាំងខេត្តសៀមរាប សូមគោរពថ្លែងអំណរគុណយ៉ាងជ្រាលជ្រៅបំផុតចំពោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានប្រកាសសម្រេចកញ្ចប់ថវិកា ចំនួន ១៥០លានដុល្លារ ក្នុងកិច្ចប្រជុំពេញអង្គគណៈរដ្ឋមន្រ្តី នាថ្ងៃសុក្រ ២រោច ខែភទ្របទ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី០៤ ខែកញ្ញា ឆ្នាំ២០២០ សម្រាប់ស្ថាបនាផ្លូវ ចំនួន ៣៨ខ្សែ ក្នុងខេត្តសៀមរាប។

ជាថ្មីម្តងទៀត ក្នុងឱកាសនៃពិធីបុណ្យកាន់បិណ្ឌ ភ្ជុំបិណ្ឌនេះ សូមគោរពជូនពរជ័យ សិរីមង្គល គ្រប់ប្រការ ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ព្រមទាំងបុត្រាបុត្រី ចៅប្រុស ចៅស្រីទាំងអស់ សូមសមប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕SRP

ខេត្តសៀមរាប៖ការកូដកម្ម នៅភូមិវប្បធម៌កម្ពុជា នៃខេត្តសៀមរាប ដែលបានអូសបន្លាយជិត ១ ខែមកហើយនោះ ពេលនេះបានឈានដល់ដំណាក់ កាល ចាក់ភ្លេងខ្មោចបំពងសម្លេងហើយ។

ការធ្វើរបៀបនេះ ត្រូវបានអះអាងថា ក្រុមអ្នកតវ៉ា មានការឈឺចាប់ រងទុក្ខបីដូចជាមានមនុស្សស្លាប់អីយ៉ាងចឹង។ ក្រុមអ្នកតវ៉ា នៅព្រឹកថ្ងៃទី៣ខែកញ្ញនេះ បានលើក ឡើងថា ពួកគេបានស្នើសុំដល់ខាងក្រុមហ៊ុនអោយចូលចរចាគ្នានូវ៣ចំណុច។

ទី១ ចូលចរចា អំពីអនុសញ្ញារួមដោយស្មោះត្រង់។
ទី២ រក្សាការិយាល័យសិល្ប:និងតួនាទីនៅដដែល
និងទី៣ សងប្រាក់ឈ្នួលនិងប្រាក់ថ្លៃអាហារដែលបានកាត់កន្លងមក។ ប៉ុន្តែមកទល់ពេលនេះ ភាគីខាងក្រុមហ៊ុនមិនព្រមចរចាអ្វីទាំងអស់។

លោកអេង មុន្នី បុគ្គលិកបំរើការនៅភូមិវប្បធម៌ ផ្នែកគ្រូបង្ហាត់សិល្ប: បានអោយដឹងថា ពួកគេបានធ្វើ កូដកម្មដោយគ្មានហិង្សានេះ ចាប់តាំងពីថ្ងៃទី១៤ ខែ សីហាមកហើយ។ ប៉ុន្តែក្នុងចំណោមជាង៣០០នាក់ គឺមានតែ៦៤នាក់ទេដែលធ្វើកូដកម្មនេះ។

លោកបន្តថា ក្រុមហ៊ុនបានកាត់ប្រាក់ឈ្នួល ២៥ដុល្លារ និងប្រាក់អា ហារ៥ដុល្លារក្នុង១ខែ សម្រាប់ពួកយើង៦៤នាក់ដែលទទួលបានប្រាក់ខែចាប់ពី២០០ដុល្លារឡើងទៅ។ ករណីនេះពួកយើងបានចរចាគ្នានៅសាលាខេត្តច្រើន ដងហើយដែរ តែមិនមានលទ្ធផលនោះឡើយ។

លោកអេង មុន្នី អោយដឹងទៀតថា គិតមកទល់ពេលនេះមានរយ:ជិត១ខែមកហើយ នៅតែគ្មានផ្លូវដោះស្រាយ ចឹងហើយទើបពួកយើងសម្រេចចាក់ភ្លេងខ្មោចបំពងសម្លេងបែបនេះ។

លោកបញ្ជាក់ថា ការចាក់ភ្លេងខ្មោចនេះ គឺបង្ហាញពីការឈឺចាប់ ដែលពួក គេ ជួបទុក្ខសោក ប្រៀបដូចជាមានមនុស្ស(បុគ្គលិក) ស្លាប់នៅទីនេះអីចឹង។ ចឹងទេពួកយើង អាចនឹងប្រគុំតន្ត្រីនៅទីនេះទៀត ប្រសិនបើនៅតែមិនមានដំណោះស្រាយ។

ករណីនេះលោកស្រីលឹម សុភក្រ័ អ្នកគ្រប់គ្រង នៅភូមិវប្បធម៌កម្ពុជា នៃខេត្តសៀមរាប បានបញ្ជាក់យ៉ាងខ្លីថា យើងបានចរចាគ្នាច្រើនដងហើយ តែមិនសម្រេច ចឹងទេបើចង់ដឹងលម្អិតសូមទាក់ទងទៅមន្ទីរការងារខេត្ត ព្រោះឯកសារនៅទីនោះទាំងអស់។

ប្រធានមន្ទីរការងារខេត្តសៀមរាប លោកចន្ទ័ សុខុមចិត្តា នៅព្រឹកថ្ងៃទី៣ខែកញ្ញានេះ មិនបានពន្យល់អំពីសកម្មភាពធ្វើកូដកម្ម និងការចរចានោះទេ នោះទេ ដោយទូរសព្ទ័ហៅចូលច្រើនដង តែគ្មានការឆ្លើយតប។ លោកចន្ទ័ សុខុមចិត្តា បានប្រាប់បណ្ដាញសៀមរាបប៉ុស្ដិ៍ថាការដែលលោកមិនបានលើកទូរស័ព្ទដោយសារជាប់រវល់ប្រជុំ។

ចំណែកលោក នាក់ ណេរ៉ុន អភិបាលរងខេត្តសៀមរាប ដែលជាអ្នកសម្របសម្រួលករណីនេះ បានថ្លែងតាមទូរសព្ទ័ថា រឿងនេះវាហាក់ដូចជាតានតឹងបន្តិច ដោយគូភាគី មិនបន្ទន់ចិត្តក្នុងការចរចាសោះ។

លោកបន្តថា យើងបានព្យាយាមពន្យល់ដល់គូភាគីច្រើនដងមកហើយ តែនៅមិនសម្រេច ចឹងទេរសៀលនេះ លោកនឹងហៅគូភាគីមកនិយាយម្តងទៀត ហើយសង្ឃឹមថា គ្រប់យ៉ាងអាចល្អ។

សូមបញ្ជាក់ថា កូដកម្មទាមទារ៣ចំណុច របស់បុគ្គលិកនៅភូមិវប្បធម៌ បានធ្វើឡើងចាប់តាំងពីថ្ងៃទី ១៤ខែសីហា ហើយមកទល់ថ្ងៃទី៣ខែកញ្ញាឆ្នាំ២០២០ ស្ថានការហាក់នៅតែក្តៅនៅឡើយ។ ចឹងទេនៅថ្ងៃបន្តមិនដឹងថា អាចមានអ្វីនោះទេ តែគេរំពឹងថា អាចរលត់ទៅវិញ ក្រោយថ្នាក់ដឹកនាំខេត្តហៅចរចាជាថ្មី៕SRP

ខេត្តសៀមរាប៖មន្ត្រីនគរបាលក្នុងអង្គភាពស្នាក់ការត្រៀមបណ្តេញចេញខេត្តសៀមរាបបានទម្លាយរឿងភាពឈឺចាប់របស់ខ្លួនប្រាប់បណ្ដាញសៀមរាបប៉ុស្តិ៍ថាសូមស្នើសុំដល់ នាយឧត្តមសេនីយ៍គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ និងនាយឧត្តមសេនីយ៍ កែវ វណ្ណថន អគ្គនាយករងនៃអគ្គនាយកដ្ឋានអន្តោប្រវេសន៍ក្រសួងមហាផ្ទៃនិងជាប្រធានស្នាក់ការត្រៀមបណ្តេញចេញខេត្តសៀមរាប មេត្តាត្រួតពិនិត្យមន្ត្រីក្រោមឱវាទ ដោយគេសង្កេតឃើញថា មានថ្នាក់ដឹកនាំក្រោមឱវាទខ្លះក្នុងអង្គភាពស្នាក់ការត្រៀមបណ្តេញចេញខេត្តសៀមរាបនៅមិនទាន់មានវិជ្ជាជីវ:និងក្រមសីលធម៌ ក៏ដូចជា ភាពជាថ្នាក់ដឹកនាំអនុវត្តការងារជំនាញនៅឡើយទេ។ ដោយប្រកាន់បក្ខពួកដែលជាហេតុធ្វើអោយមន្រ្តីក្នុងអង្គភាពខ្លះមានការអាក់អន់ចិត្ត យ៉ាងខ្លាំង និងខ្លះទៀតមិនពេញចិត្តនិងទង្វើនៃអំនួតដោយអាងខ្សែស្រឡាយ ខ្នងបង្អែក។

មន្ត្រីនគរបាលបន្តថាការប្រើអំណាចនោះ ទើបធ្វើអោយមន្ត្រីក្នុងអង្គភាពខាងលើបែកបាក់សាមគ្គីភាពផ្ទៃក្នុង បាត់បង់ភាពស្និតស្នាលរវាងគ្នានិងគ្នា និងអាចឈានដល់មានផលប៉ះពាល់យ៉ាងខ្លាំងដល់ឈ្មោះអង្គភាពទាំងមូលដោយសារតែនៅមានមន្ត្រីបែបនេះខាងលើ។ ពោលគឺ ដឹកនាំដោយគ្មានភាពទទួលខុសត្រូវ ប្រកាន់បក្ខពួក ចិត្តចង្អៀតចង្អល់ គ្មានការលះបង់គ្រប់បែបយ៉ាងចំពោះការងារ ពិសេសគឺគ្មានទំនួលខុសត្រូវ ក្នុងម៉ោងការងារ និងមានភាពមិនប្រក្រតីជាច្រើនទៀត។(នៅមានត)
ទោះយ៉ាងណាជុំវិញករណីនេះអង្គភាពសៀមរាបប៉ុស្ដិ៍ នៅមិនទាន់ទទួលបានការបកស្រាយបំភ្លឺ ពីប្រធានអង្គភាពស្នាក់ការត្រៀមបណ្តេញចេញខេត្តសៀមរាបនៅឡើយទេ៕SRP

ខេត្តសៀមរាប៖ប៉ូលិសខេត្តសៀមរាបបានធ្វើការច្រានចោលទៅនឹងអាខោនហ្វេសប៊ុក San Prum ដោយអះអាងថាជាការផ្សាយមិនពិត។

នៅថ្ងៃព្រហស្បតិ៍ ទី០៣ខែកញ្ញាឆ្នាំ២០២០នេះបានក្រុមការងារប្រតិកម្មរហ័ស នៃស្នងការដ្ឋាននគបាលខេត្តសៀមរាប សូមបំភ្លឺជូនសាធារណជន អ្នកសារព័ត៌មាន និងពិសេសបណ្ដាញទំនាក់ទំនងសង្គម បានជ្រាបថា៖

កន្លងមកស្នងការដ្ឋាននគរបាលខេត្តសៀមរាបជាស្ថាប័នមួយមានតួនាទីថែរក្សាសន្តិសុខ សណ្តាប់ធ្នាប់ជូនប្រជាពលរដ្ឋក្នុងខេត្តសៀមរាប ដែលស្ថិតក្រោមការដឹកនាំរបស់គណៈបញ្ជាការឯកភារដ្ឋបាលខេត្ត ក្នុងនោះដែរស្នងការដ្ឋានមានថ្នាក់ដឹកនាំ ស្នងការ ស្នងការរង ដែលជាគណៈស្នងការបានខិតខំរួមសាមគ្គីគ្នាថែរក្សាសន្តិសុខ សណ្តាប់ធ្នាប់សង្គម ទប់ស្កាត់បង្កា ប្រឆាំងនូវរាល់បទល្មើសផ្សេងៗ ជាពិសេសសភាពការណ៍កូវីដ១៩កន្លងទៅនេះយើងបានខិតខំថែរក្សាស្ថានការណ៍បានល្អប្រសើរជូនប្រជាពលរដ្ឋ ដោយមិនមានបែងចែកជាក្រុម ឬប្រកាន់បក្ខពួកនៅក្នុងជួរគណៈស្នងការដូចខ្លឹមសារអត្ថាធិប្បាយរបស់អ្នកសារព័ត៌មានបានផ្សាយទេ។

ជាថ្មីម្តងទៀតស្នងការដ្ឋានសូមថ្លែងអំណរគុណយ៉ាងជ្រាលជ្រៅបំផុតចំពោះសាធារណជន អ្នកសារព័ត៌មាន និងពិសេសបណ្ដាញទំនាក់ទំនងសង្គមដែលបានចូលរួមចំណែកក្នុងការការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។ យើងខ្ញុំរីករាយទទួលយកចំពោះមតិរិះគន់ទាំងឡាយ ដើម្បីយកជាមូលដ្ឋានក្នុងការកែលម្អការបំពេញភារកិច្ចបម្រើជាតិ និងប្រជាជន៕SRP

ខេត្តសៀមរាប៖បុរសម្នាក់បានស្លាប់ភ្លាមៗនៅកន្លែងកើតហេតុដោយសារគ្រោះថ្នាក់ចរាចរណ៍។

ហេតុការណ៍បានកើតវេលាម៉ោង០២និង២៥នាទីរសៀលថ្ងៃទីថ្ងៃទី០១ខែកញ្ញាឆ្នាំ២០២០លេីផ្លូវ ជាតិលេខ០៦ចំណុចភូមិតាអុង ឃុំ ល្វែងឫស្សីស្រុកជីក្រែង។

សមត្ថកិច្ចបានឲ្យដឹងថាករណីនេះនៅរវាងរថយន្ត ម៉ាក ISUZUពណ៌ទឹកមាសស្លាកលេខ ភ្នំពេញ ២F២៦៣៨ ទិសដៅពីកេីតទៅលិច។ចំណែកបេីក បរម៉ូតូម៉ាកwave ពណ៌ខ្មៅពាក់ស្លាកលេខកំពត ១L៦២២៦ ទិសដៅពីលិចទៅកេីត បញ្រ្ចាសទិសគ្នា។
សមត្ថកិច្ចបានបញ្ជាក់ថាជនរងគ្រោះ អ្នកបើកម៉ូតូឈ្មោះ យឿន រ័ត្ន អាយុ៣២ឆ្នាំ មានទីលំនៅ ភូមិប្រាសាទ ឃុំព្រៃប្រស់ ស្រុកកំពង់ស្វាយ ខេត្តកំពង់ធំ។ ដោយឡែកអ្នកបេីកបរ រថយន្តគេចខ្លួនបាត់។

ក្រោយកើតហេតុសមត្ថកិច្ចបានយក រថយន្តនិងម៉ូតូ ទៅរក្សាទុកនៅប៉ុស្តិ៍នគរបាលឃុំល្វែងឫស្សី ដើម្បីស្រាវជ្រាវរកម្ចាស់រថយន្តមកដោះស្រាយ។

ទោះយ៉ាងណាសមត្ថកិច្ចមិនទាន់បញ្ជាក់លម្អិតអំពីមូលហេតុករណីគ្រោះថ្នាក់ចរាចណ៍នេះនៅឡើយទេ៕SRP

ខេត្តសៀមរាប៖អាជ្ញាធរខេត្តសៀមរាបបានអះអាងថាជារៀងរាល់ឆ្នាំរដ្ឋបាលខេត្តសៀមរាបតែងតែបានរៀបចំពិធីកាន់បិណ្ឌ-ភ្ជុំបិណ្ឌ​ នៅតាមទីវត្តអារាមចំនួន ៧វត្ត ដើម្បីធ្វើជាគំរូ និងជាបង្ហាញដល់មន្ត្រីរាជការ និងពុទ្ធសាសនិកជនទាំងអស់ បានយល់ដឹង ចូលរួមប្រតិបត្តិ និងចូលរួមអភិវឌ្ឍ វិស័យព្រះពុទ្ធសាសនាអោយខ្ជាប់ខ្ជួន និងកាន់តែមានភាពរុងរឿងទុកជាកេរដំណែលដល់កូនចៅទៅថ្ងៃអនាគត។
សូមបញ្ជាក់ថាលោក​ ពិន​ ប្រាកដ​ អភិបាលរងខេត្ត​ នៅថ្ងៃច័ន្ទ ៣កេីត​ ខែភទ្របទ​ ឆ្នាំជូត​ ទោស័ក​ ព.ស​ ២៥៦៤​ ត្រូវនឹងថ្ងៃទី៣១​ ខែសីហា​ ឆ្នាំ២០២០​ បានដឹកនាំកិច្ចប្រជុំត្រៀមរៀបចំពិធីបុណ្យកាន់បិណ្ឌ-ភ្ជុំបិណ្ឌ របស់រដ្ឋបាលខេត្តសៀមរាប ដោយមានការចូលរួមពីមន្ត្រីជុំវិញខេត្តផងដែរ។បើតាមអាជ្ញាធរខេត្តសៀមរាបថាឆ្នាំ២០២០នេះ ពិធីបុណ្យកាន់បិណ្ឌ-ភ្ជុំ បិណ្ឌ ប្រារព្ធឡើងចាប់ពីថ្ងៃ០១រោច ខែភទ្របទ ដល់ថ្ងៃ១៥រោច ខែភទ្របទ ឆ្នាំជូត ទោស័កព.ស២៥៦៤ ត្រូវនឹងចាប់ពីថ្ងៃពុធ ទី០៣ ខែកញ្ញាដល់ថ្ងៃទី១៧ ខែកញ្ញា ឆ្នាំ២០២០​៕SRP

ខេត្តសៀមរាប៖ជនជាតិបរទេសចំនួនពីរនាក់ត្រូវបានកម្លាំងការិយាល័យស៊ើបអង្កេតនិងអនុវត្តនីតិវិធី សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំឃាត់ខ្លួន នៅវេលាម៉ោង ០៩និង៣០នាទីព្រឹកថ្ងៃទី៣១ ខែសីហា ឆ្នាំ២០២០ចំណុចបន្ទប់ជួល ស្ថិតនៅភូមិ ស្វាយព្រៃ សង្កាត់ស្វាយដង្គំ ក្រុងសៀមរាប។ នគរបាលបានដឹងថាជនបរទេសទាំងពីរនាក់ ពាក់ព័ន្ធករណីស្នាក់នៅខុសច្បាប់(គ្មានលិខិតឆ្លងដែន)។
ជនបរទេសទាំងពីរនាក់នេះមានឈ្មោះ ៖

១-VOLODYMYR BEHAL ភេទប្រុស កើតឆ្នាំ១៩៨៤ ជនជាតិ អ៊ុយក្រែន គ្មានលិខិតឆ្លងដែនជាប់ខ្លួន មុខរបរ បម្រើការងារតាមប្រព័ន្ធអុិនធើណិត ចូលមកព្រះរាជាណាចក្រកម្ពុជា កាលពីឆ្នាំ២០១៧ តាមច្រកទ្វារព្រំដែនអន្តរជាតិប៉ោយប៉ែត ស្នាក់នៅខេត្តព្រះសីហនុ។នៅថ្ងៃទី ០៧-០៦-២០១៩ ត្រូវបានសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ននៅពន្ធនាគារព្រៃស នឹងសម្រេចផ្តន្ទាទោសដាក់ពន្ធនាគារកំណត់ចំនួន ០១ឆ្នាំ ពីបទ អំពើលួចនិងចូលមកព្រះរាជាណាចក្រកម្ពុជាដោយគ្មានការអនុញ្ញាតិ។ក្រោយពីអនុវត្តទោសចប់ បានធ្វើដំណើរទៅកាន់ខេត្តព្រះសីហនុដើម្បីរកលិខិតឆ្លងដែន តែរកមិនឃើញ រហូតដល់ថ្ងៃទី០១-០៨-២០២០ ក៍ធ្វើដំណើរមកកាន់ខេត្តសៀមរាបតែម្តង។

២-SERGY PODOSYN ភេទប្រុស កើតថ្ងៃទី២៧-១២-១៩៦២ ជនជាតិរុស្សុី គ្មានលិខិតឆ្លងដែនជាប់ខ្លួន គ្មានមុខរបរ ចូលមកព្រះរាជាណាចក្រកម្ពុជាកាលពីឆ្នាំ២០១៧ តាមច្រកមិនចាំ ដោយធ្វើដំណើរពីប្រទេសថៃ មកស្នាក់នៅខេត្តព្រះសីហនុ រហូតដល់ខែមិថុនា ឆ្នាំ២០២០ ក៏បានផ្លាស់មកស្នាក់នៅខេត្តសៀមរាប។កាលពីខែកក្កដា ឆ្នាំ២០២០ បានប្រគល់លិខិតឆ្លងដែនឲ្យទៅបុរសជនជាតិខ្មែរម្នាក់មិនស្គាល់ឈ្មោះ យកទៅបន្តសុពលភាពទិដ្ឋាការស្នាក់នៅ ប៉ុន្តែរហូតមកដល់ពេលនេះពុំទាន់ទទួលបានលិខិតឆ្លងដែនវិញទេ ហើយក៏មិនអាចទំនាក់ទំនងទៅបុរសនោះបានដែរ។បញ្ជូនទៅស្នាក់ការត្រៀមបណ្តេញចេញចាត់ការបន្តតាមនីតិវិធី៕SRP

ខេត្តសៀមរាប៖បុរសម្នាក់ត្រូវបានឃាត់ខ្លួនក្រោយធ្វើសកម្មភាពកាប់ប្រហារ ទៅលើឪពុកចុងរបស់ខ្លួន។

ការឃាត់ខ្លួនធ្វើនៅម៉ោង០៩និង០៦នាទីយប់ថ្ងៃទី២៩ខែសីហាម្សិលមិញស្ថិតនៅភូមិទក្សិណត្បូង សង្កាត់គោកចក ក្រុងសៀមរាប បន្ទាប់ពីកើតហេតុ។

ជនសង្ស័យឈ្មោះ ព្រំ កក្កដា ភេទប្រុស អាយុ ២៧ឆ្នាំរស់នៅ ភូមិទក្សិណត្បូង សង្កាត់គោកចក ក្រុងសៀមរាប។

លោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនកណ្តាលព្រហ្មទណ្ឌ ស្នងការខេត្តសៀមរាប បានអោយដឹងថាបុរសរូបនេះបានយកកំាបិតប៉ឹងតោ កាប់ទៅលើជនរងគ្រោះ ឈ្មោះ ភឿក ភឿង ហៅ សេងទ្រី ភេទប្រុស ស្ថិតភូមិគ្រួស សង្កាត់ស្វាយសង្គំ ក្រុងសៀមរាបនៅចំណុចតូបលក់ដូរមួយកន្លែង ខណៈជនរងគ្រោះកំពុងអង្គុយមិនដឹងខ្លួន នៅវេលាម៉ោង៦និង១០នាទីល្ងាចថ្ងៃទី២៩ខែសីហាឆ្នាំ២០២០ បណ្តាលឲ្យរងរបួសក្បាលចំនួន៣កន្លែង (លើថ្ងាស១កន្លែង, ក្បាលផ្នែកខាងក្រោយ១កន្លែង និង លើត្រជៀកខាងឆ្វេង) និង ដាច់ទងស្លឹកត្រជៀកផ្នែកខាងឆ្វេង។

បុរសរូបនេះបានសារភាពថា ខ្លួនត្រូវជាកូនចុងរបស់ជនរងគ្រោះ ដោយខ្លួនធ្លាប់មានទំនាស់តាំងពីរូបគេមានអាយុ១២ឆ្នាំ។ កន្លងមកទំនាស់របស់ពួកខ្លួនទាំងពីរឈានដល់ការប្រើអំពើហិង្សាចំនួន២លើកផងដែរ។

ជនសង្ស័យបន្តថានៅល្ងាចថ្ងៃទី២៩ខែសីហាឆ្នាំ២០២០ វេលាម៉ោង១៧និង៣០នាទី ខ្លួនមានអាការៈឈឺក្បាលក៏ប្រើក្មួយបង្កើតរបស់ខ្លួនឲ្យប្រាប់បងស្រី ឈ្មោះ ព្រំ ស្រីហ៊ុន ដែលកំពុងលក់ដូរនៅឯកតូបរបស់ឪពុកចុង និងម្តាយបង្កើត មួយសន្ទុះក្រោយមកក្មួយបានត្រឡប់មកវិញថា ជីតាឈ្មោះ ភឿក ភឿង (ត្រូវជាឪពុកចុងខ្លួន) បានស្តីបន្ទោសអោយពួកគេខ្លាំងៗ មិនតែប៉ុណ្ណោះមិនអោយថ្នាំមកទេ ធ្វើអោយខ្លួនខឹងសម្បាជាខ្លាំង គួបផ្សំធ្លាប់មានទំនាស់ ក៏ទៅកាប់ជនរងគ្រោះតែម្តង។ ពាក់ព័ន្ធករណីនេះជនសង្ស័យត្រូវបានបញ្ជូនទៅតុលាការដើម្បីអនុវត្តតាមផ្លូវច្បាប់៕SRP

ខេត្តសៀមរាប៖លោក​ ពិន​ ប្រាកដ​ អភិបាល​រងខេត្ត​ តំណាង​ លោក ទៀ​ សីហា​ អភិបាលខេត្តសៀមរាប នៅថ្ងៃទី២៨​ ខែសីហា​ ឆ្នាំ២០២០ ​ បានដឹកនាំក្រុមការងារចម្រុះចុះពិនិត្យការដ្ឋានសាងសង់ផ្លូវ​ និងកំពុងសាងសង់​ផ្លូវកៅស៊ូបេទីម​(AC) ចំនួន​ ២ខ្សែ​ ក្នុងក្រុងសៀមរាប​ រួមមាន៖១-ផ្លូវកៅស៊ូបេទីម (AC) ទទឹង​ ១១ម៉ែត្រ​ បណ្ដោយ​ ២​ ១០០ម៉ែត្រ​ សម្រេចបាន​ ៤០​ ភាគរយ​ កំពុងដំណើរការសាងសង់ផ្លូវ​ និង​ចាក់គ្រឹះដើម្បីធ្វេីការចាក់កៅស៊ូបេទីម(AC)​ ហេីយការ​ចាក់កៅស៊ូបេទីម(AC)នឹងចាប់ផ្ដេីមនៅសប្ដាហ៍ក្រោយនេះ​ ស្ថិតនៅភូមិវត្តដំណាក់​ ចាប់ពីចំណុចវត្តដំណាក់​ កាត់មុខសាលាសង្កាត់កំរេីក​ ដល់ផ្លូវក្រវ៉ាត់ក្រុង​

២-ផ្លូវ​ចាក់កៅស៊ូបេទីម(AC) ទទឹង​ ៧ម៉ែត្រ ​ បណ្ដោយ​ ១​ ៦៨០ម៉ែត្រ ពីផ្លូវជាតិលេខ៦(សាខាពន្ធដារខេត្ត) ដល់ផ្លូវ៣០​ សម្រេចបាន​ ៧៥ភាគរយ​ ក្នុងភូមិសាលាកន្សែង សង្កាត់ស្វាយដង្គំ​ និងភូមិត្រពាំងសេះ​ សង្កាត់គោកចក​ ក្រុងសៀមរាប។
សូមរំលឹកថាផ្លូវជាច្រើនខ្សែទាំងផ្លូវជាតិ ផ្លូវខេត្ត និងផ្លូវលំ ជនបទ នៅក្នុងខេត្តសៀមរាប ត្រូវបានសាងសង់ ជួសជុល និងរៀបចំបណ្តាញលូ បានសាងសង់ជាបន្តបន្ទាប់ ក្រោមការយកចិត្តទុកដាក់ខ្ពស់ពីលោក ទៀ សីហា អភិបាលខេត្តសៀមរាប។ ជាក់ស្តែងក្នុងឆ្នាំ២០២០នេះ រដ្ឋបាលខេត្ត បានគ្រោងចំណាយថវិកាសាងសង់ផ្លូវក្នុងក្រុងសៀមរាប​ ចំនួន២៨ខ្សែ រួមមានផ្លូវកៅស៊ូបេទីម(AC) និងផ្លូវបេតុង។ ដូចនេះផ្លូវទាំង២ខ្សែនេះ គឺស្ថិតនៅក្នុងចំណោមផ្លូវទាំង២៨ខ្សែ ដែលក្រុមការងារចុះពិនិត្យ ដើម្បីពង្រឹងគុណភាព តាមបទដ្ឋានបច្ចេកទេស និងកិច្ចសន្យាសាងសង់ផងដែរ៕SRP

ខេត្តសៀមរាប៖លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាបបានឲ្យដឹងថា ក្នុងខែសីហា ឆ្នាំ២០២០នេះ តាមរយៈការចុះត្រួតពិនិត្យរបស់ក្រុមការងារត្រួតពិនិត្យសុវត្ថិភាពទេសចរណ៍ក្នុងខេត្តសៀមរាបជំហានទី២ ក្រុមការងារបានចុះត្រួតពិនិត្យចំនួន ១៦ទីតាំងអាជីវកម្ម ផ្នែកសេវាកម្មភោជនីយដ្ឋាន និងអាហារដ្ឋានទេសចរណ៍។

តាមរយៈការចុះត្រួតពិនិត្យ និងវាយតម្លៃរបស់ក្រុមការងារផ្នែកសេវាកម្មភោជនីយដ្ឋាននិងអាហារដ្ឋានទេសចរណ៍ទៅលើលក្ខណៈវិនិច្ឆ័យសុវត្ថិភាពទេសចរណ៍បានសម្រេចស្នើសុំការសម្រេចពីអង្គប្រជុំនូវការផ្តល់ឡាប៊ែលសុវត្ថិភាពជូនដល់មូលដ្ឋានអាជីវកម្មចំនួនៈ ១៦ ភោជនីយដ្ឋាន ក្នុងនោះរួមមាន ៖

(១) ភោជនីយដ្ឋាន Starbucks

(២)ភោជនីយដ្ឋាន AKA Japanese Restaurant

(៣)ភោជនីយដ្ឋាន Dairy Queen

(៤)ភោជនីយដ្ឋាន The Pizza Company

(៥) ភោជនីយដ្ឋាន Koi

(៦) ភោជនីយដ្ឋាន Amazon Cafe

(៧)ភោជនីយដ្ឋាន Bar BQ Plaza

(៨)ភោជនីយដ្ឋាន Swensen (៩)ភោជនីយដ្ឋាន Tous Les Jours

(១០)ភោជនីយដ្ឋាន Domino Pizza

(១១)ភោជនីយដ្ឋាន Yummy Korea

(១២)ភោជនីយដ្ឋាន The Hashi

(១៣)ភោជនីយដ្ឋាន De Tummour

(១៤)ភោជនីយដ្ឋាន Green Suki Soup

(១៥)ភោជនីយដ្ឋាន រហាត់កាហ្វេ

(១៦)ភោជនីយដ្ឋាន ឡាណិច ។

ដោយឡែកសម្រាប់អាជីវកម្មដែលពុំទាន់គ្រប់លក្ខណៈក្នុងការស្នើសុំឡាប៊ែលសុវត្ថិភាពក្រុមការងារនឹងធ្វើការណែនាំឲ្យកែតម្រូវតាមស្តង់ដាសុវត្ថិភាពទេសចរណ៍ទើបស្នើសុំឡាប៊ែលជូននៅពេលក្រោយនិងបន្តចុះពិនិត្យវាយតម្លៃឲ្យបានគ្រប់មូលដ្ឋានអាជីវកម្មទេសចរណ៍ដែលកំពុងដំណើរការក្នុងសខេត្តសៀមរាប។

លោកបញ្ជាក់យ៉ាងដូច្នេះក្នុងពេលនៅព្រឹកថ្ងៃទី២៨ខែសីហា ឆ្នាំ២០២០ នៅសាលាខេត្តសៀមរាបក្នុងកិច្ចប្រជុំក្រុមការងារចុះត្រួតពិនិត្យវិធានសុវត្ថិភាពទេសចរណ៍ប្រចាំខែសីហា ឆ្នាំ២០២០ ក្នុងខេត្តសៀមរាប ដើម្បីពិនិត្យសម្រេចក្នុងការផ្តល់ឡាប៊ែលសុវត្ថិភាពដែលក្រុមការងារបានចុះវាយតំលៃ ក្រោមវត្តមានលោក ពៅ ពិសិដ្ឋ អភិបាលរងខេត្ត។

នៅក្នុងកិច្ចប្រជុំលោកពៅ ពិសិដ្ឋបានដាក់នូវវិធានការចំនួន០៤៖
១- ស្នើសុំដល់អភិបាលស្រុកទាំងអស់ឲ្យបន្តផ្សព្វផ្សាយពីបញ្ហាជំងឺកូវីដ-១៩ ពិសេសពេលប្រជុំគណៈបញ្ជាការឯកភាពស្រុក
២- ស្នើសុំដល់ក្រុមការងារទាំងអស់ចុះពិនិត្យចុះវាយតម្លៃគ្រប់អាជីវកម្មសេវាកម្មទេសចរណ៍ដែលកំពុងដំណើរការទាំងអស់ក្នុងខេត្តសៀមរាប និងបន្តចុះពិនិត្យមូលដ្ឋានអាជីវកម្មដែលបានទទួលឡាប៊ែលហើយឲ្យបន្តគោរពតាមការណែនាំរបស់រាជរដ្ឋាភិបាល ក្រសួងសុខាភិបាល និងក្រសួងទេសចរណ៍
៣- ស្នើដល់ក្រុមការងារបន្តចុះពិនិត្យការកែប្រែខារ៉ាអូខេ បៀរហ្កាឌិន ស្កាយបារ ឲ្យទៅជាភោជនីយដ្ឋានបណ្តោះអាសន្ន ដោយក្រុមការងារត្រូវចូលរួមត្រួតពិនិត្យឲ្យបានម៉ត់ចត់ និងបន្តតាមដានការអនុវត្តវិធានសុវត្ថិភាពនានាដែលដាក់ចេញដោយរាជរដ្ឋាភិបាល ក្រសួងសុខាភិបាល និងក្រសួងទេសចរណ៍
៤- ស្នើដល់ក្រុមការងារបន្តចុះអនុវត្តសេចក្តីជូនដំណឹងរបស់ក្រសួងទេសចរណ៍លេខ ១៦៧ សជណ.អរហ និងសេចក្តីជូនដំណឹងលេខ ១៦៨ សជណ.អរហ ចុះថ្ងៃទី ០៧ ខែ មេសា ឆ្នាំ២០២០ របស់ក្រសួងទេសចរណ៍ ស្តីពីការផ្អាកអាជីវកម្មហាងម៉ាស្សាសុខភាព និងស្ប៉ា ដែលស្ថិតក្រោមការគ្រប់គ្រងរបស់ក្រសួងទេសចរណ៍ និងស្ថិតក្រោមការគ្រប់គ្រងរបស់រដ្ឋបាលរាជធានី-ខេត្ត ជាបណ្តោះអាសន្ន រហូតដល់មានការជូនដំណឹងជាថ្មី៕SRP

ខេត្តសៀមរាប៖សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់អំណោយម៉ាស៊ីនផលិតទឹកបរិសុទ្ធដោយបរិយាកាស -WATERGEN (ប្រភេទ GEN-M) ជូនមន្ទីរពេទ្យគន្ធបុប្ផា។
ការផ្ដល់អំណោយនេះនៅថ្ងៃសុក្រ ទី២៨ ខែសីហា ឆ្នាំ២០២០ ក្រោមវត្តមានលោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន តំណាងដ៏ខ្ពង់ខ្ពស់ សម្ដេចហ៊ុន សែន ដោយមានការអញ្ជើញចូលរួមពី លោក Denis Laurent ប្រធាននាយកប្រតិបត្តិនៃមន្ទីរពេទ្យគន្ធបុប្ផា និងបុគ្គលិក ក្រោមឱវាទមន្ទីរពេទ្យ។

ថ្លែងក្នុងពិធីប្រគល់-ទទួលនាឱកាសនោះ រដ្ឋមន្ត្រីស៊ុន ចាន់ថុលបានគូសបញ្ជាក់អំពីលក្ខណៈពិសេស ម៉ាស៊ីនផលិតទឹកបរិសុទ្ធដោយបរិយាកាសធម្មជាតិ-WATERGEN (ប្រភេទ GEN-M) ជាបច្ចេកវិទ្យា មកពីប្រទេសអ៊ីស្រាអែល មានសមត្ថភាពអាចផលិតទឹកបរិសុទ្ធដោយស្វ័យប្រវត្តិពីខ្យល់ក្នុងបរិយាកាស បានប្រមាណ៨០០លីត្រក្នុងមួយថ្ងៃ ដោយមិនចាំបាច់តភ្ជាប់ជាមួយប្រភពទឹកទុយោ និងអាចផ្គត់ផ្គង់ទឹក ប្រកបដោយគុណភាព សុវត្ថិភាពខ្ពស់ និងកាត់បន្ថយផលប៉ះពាល់បរិស្ថានផ្សេងៗថែមទៀតផង។

លោករដ្ឋមន្ត្រី បានលើកឡើងថា៖ ម៉ាស៊ីននេះអាចផ្តល់អត្ថប្រយោជន៍សម្រាប់ បងប្អូនប្រជាពលរដ្ឋដែលនាំយកកូនៗមកសម្រាកព្យាបាលជំងឺនៅមន្ទីពេទ្យនេះ ពោលគឺ៖ ពួកគាត់អាចប្រើប្រាស់ទឹកដែលផលិតដោយម៉ាស៊ីននេះ ចូលរួមកាត់បន្ថយការប្រើប្រាស់ថង់ផ្លាស្ទីកបង្កផលប៉ះពាល់បរិស្ថាន ជួយសន្សំសំចៃថវិកាពួកគាត់បានមួយចំណែក ជាពិសេស ម៉ាស៊ីននេះអាចយកទៅប្រើប្រាស់នៅតាមសាលារៀន មន្ទីរពេទ្យ មណ្ឌលសុខភាពរបស់បណ្ដាភូមិ ឃុំ ស្រុកទាំងឡាយណាដែលខ្វះខាតទឹកប្រើប្រាស់បានផងដែរ។

គួរកត់សម្គាល់ថា៖ អំណោយដ៏ថ្លៃថ្លារបស់សម្តេចតេជោហ៊ុន សែន នាឱកាសនេះ គឺជាការបង្ហាញនូវ កាយវិការប្រកបដោយមនុស្សធម៌ ដែលសម្តេចតែងតែគិតគូរយកចិត្តទុកដាក់ខ្ពស់ចំពោះសុខទុក្ខរបស់បង ប្អូនប្រជាពលរដ្ឋ ធ្វើយ៉ាងណាឱ្យសុខមាលភាព និងជីវភាពរស់នៅរបស់បងប្អូនកាន់តែមានភាពប្រសើរឡើងពីមួយថ្ងៃទៅមួយថ្ងៃ។

ឆ្លៀតក្នុងឱកាសនោះផងដែរ លោកស៊ុនចាន់ថុល បានថ្លែងអំណរគុណយ៉ាងជ្រាលជ្រៅ និងវាយតម្លៃ ខ្ពស់ចំពោះគុណបំណាច់ដ៏ធំធេងរបស់អតីតស្ថានិកមន្ទីរពេទ្យគន្ធបុប្ផា Beat Richner ដែលបានខិត ខំប្រឹងប្រែងលះបង់កម្លាំងកាយចិត្តដើម្បីកុមារកម្ពុជា ពិសេសលោកគ្រូពេទ្យ អ្នកគ្រូពេទ្យ ព្រមទាំង បុគ្គលិកមន្ទីរពេទ្យគន្ធបុប្ផាទាំងអស់ បំពេញការងារមិនខ្លាចនឿយហត់ក្នុងបុព្វ ហេតុជួយសង្គ្រោះកុមារកម្ពុជាឱ្យអស់ពីសមត្ថភាព ដោយឥតគិតថ្លៃ ដែលកិច្ចខិតខំប្រឹងប្រែងនេះ គឺជាការ ចូលរួមចំណែកដ៏ប្រពៃក្នុងការលើកកម្ពស់សុខុមាលភាពកុមារកម្ពុជា។ រដ្ឋមន្ត្រី បានសំណូមពរឱ្យបងប្អូនប្រជាពលរដ្ឋដែលនាំបុត្រធីតាជាទីស្រឡាញ់ របស់ខ្លួនទៅសម្រាកព្យាបាលជំងឺនៅក្នុងមន្ទីរពេទ្យនេះ សូមជួយថែរក្សាម៉ាស៊ីននេះឱ្យបានគង់វង្ស ដើម្បី អាចប្រើប្រាស់បានយូរអង្វែងទាំងអស់គ្នា៕SRP