ខេត្តសៀមរាប

ខេត្តសៀមរាប៖ក្រោយពីបាន ពិនិត្យឃើញថា មានហានិភ័យខ្ពស់ របស់ដើមឈើ ដែលដុះនៅក្នុងបរិវេណវត្តព្រះសិអារ្យមេត្រី និងវត្តតាំងតុ នៃអតីតក្រុងអង្គរធំ ក្រុមជំនាញ នៃនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតអប្សរា បានសហការ ជាមួយផ្នែកពាក់ព័ន្ធ បានចុះពិនិត្យ និងអនុវត្តវិធានការបន្ទាន់ចំពោះដើមឈើទាំងនោះ ដើម្បីធានាសុវត្ថិភាព ជូនពុទ្ធបរិស័ទ ព្រះសង្ឃ ចៀសវាងគ្រោះថ្នាក់ ប៉ះពាល់ដល់អាយុជិវិត និងជួយសម្រាលតួដើម ការពារ កុំឲ្យបាក់រលំ ខូចខាតដល់រចនាសម្ព័ន្ធ របស់ព្រះវិហារ កុដិ និងយានយន្តគ្រប់ប្រភេទ។

សូមជម្រាបថា ដើមឈើ ដែលបានកាត់ក្រីមែកចំនួន៣៤មែករួមមាន ដើមស្រឡៅ១ដើម ដើមឈើទាល៩ដើម ដើមស្លែង១ដើម។

ចំណែកឯដើមឈើ ងាប់ ដែលបានដកហូតចំនួន៤ដើមរួមមាន ដើមឈើទាល ដើមពង្រ ដើមស្រឡៅ និងដើមស្លែង៕SRP

ខេត្តសៀមរាប៖ក្រុមការងារសហគមន៍នៃអាជ្ញាធរជាតិអប្សរា ចំនួន២គោលដៅ នៅថ្ងៃទី២០ ខែមករា ឆ្នាំ២០២១ បានសហការជាមួយអាជ្ញាធរមូលដ្ឋាន បានចុះពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងឧទ្យានអង្គរ។

គោលដៅទី១ ក្រុមការងារប្រចាំស្រុកពួក ដឹកនាំដោយ លោក អឿន សំអុន បានពិនិត្យ និងដោះស្រាយស្ថិតនៅក្នុងភូមិគោកត្រាច ភូមិជ្រលង ឃុំខ្នាត។ ក្រោយពីពិនិត្យទីតាំង និងឯកសារជាក់ស្តែងក្រុមការងារបានអនុញ្ញាតចំនួន៨សំណើ។

គោលដៅទី២ ក្រុមការងារប្រចាំក្រុងសៀមរាបដឹកនាំដោយ លោក នង សុវណ្ណរិទ្ធ បានពិនិត្យ និងដោះស្រាយនៅក្នុងភូមិខ្វៀន សង្កាត់គោកចក។ ក្រោយពីពិនិត្យទីតាំង និងឯកសារជាក់ស្តែងក្រុមការងារបានអនុញ្ញាតចំនួន៦សំណើ។

សរុបមក នៅថ្ងៃទី២០ ខែមករា ឆ្នាំ២០២១ ក្រុមការងារសហគមន៍នៃអាជ្ញាធរជាតិអប្សរាទាំង២គោលដៅបានពិនិត្យ និងដោះស្រាយសំណើសុំជួសជុលផ្ទះរបស់ប្រជាពលរដ្ឋក្នុងតំបន់ឧទ្យានអង្គរ បានចំនួន១៤សំណើ។

សូមបញ្ជាក់ថា រាល់ការស្នើសុំច្បាប់ជួសជុល គឺពុំមានការបង់ប្រាក់ទេ៕SRP

ខេត្តសៀមរាប៖ស្ពានតាអោងឬតាអុង មានទីតាំងស្ថិតនៅក្នុងភូមិចុងស្ពាន ឃុំខ្វាវ ស្រុកជីក្រែង ខេត្តសៀមរាប គឺជាស្ពានបុរាណវែងជាងគេក្នុងចំណោម ស្ពានបុរាណ ចំនួន២៣លើដងផ្លូវបុរាណពីអង្គរ ទៅបាកាណ (ព្រះខ័នកំពង់ស្វាយ)។ សព្វថ្ងៃស្ពានបុរាណនេះមានសភាពទ្រុឌទ្រោម ខ្លាំង ដែលបង្កឡើងពីកត្តាមនុស្សនិងធម្មជាតិ ធ្វើឱ្យផ្នែកជាច្រើនរបស់ស្ពានបុរាណ បានប្រេះញែកចេញពីគ្នា ហើយនៅផ្នែកកណ្តាលតួស្ពានសងខាង ថ្មមួយចំនួនបានរលុះធ្លាក់ និងផ្នែកផ្សេងទៀត កំពុងប្រឈមនឹងការរលុះធ្លាក់ដែរ។

តាមការបញ្ជាក់របស់ លោក ពុទ្ធ សុទ្ធ មន្ត្រីនាយកដ្ឋានអភិរក្សប្រាសាទក្រៅឧទ្យានអង្គរនិងជាប្រធានគម្រោង ជួសជុលស្ពានតាអោង ឱ្យដឹងថា៖ អាជ្ញាធរជាតិអប្សរា ផ្តើមគម្រោងជួសជុលដំណាក់កាលទី១នេះ ចំនួន២ចំណុចសំខាន់ៗ គឺនៅជញ្ជាំងស្ពាន ផ្នែកខាងជើង ដែលបានរលុះធ្លាក់និងមានរហែកធំចេញក្រៅ ប្រឈមនឹងការរលុះធ្លាក់។ ក្រុមការងារនឹងធ្វើសម្រង់ប្លង់ ចុះបញ្ជីថ្ម ការជួសជុលថ្ម ការរៀបចំពង្រឹងជើងសសរថ្ម ដែលរលុះធ្លាក់ឡើងវិញ ការបង្ហាប់ដីកន្លែងច្រោះ នៅគល់ស្ពានខាងលិច និងការរៀបចំបង្កាន់ដៃ នាគដាក់ចូល តាមទីតាំងដើមឡើងវិញ។

ចំពោះប្រវត្តិនិងចំណុចសំខាន់ នៃស្ពានបុរាណមួយនេះ លោក ពុទ្ធ សុទ្ធ បានប្រាប់ថា៖ ស្ពានតោអោងឬតាអុង មានបណ្តោយប្រវែង៧០ម៉ែត្រ ទទឹង១៣ម៉ែត្រ និងមានរន្ធត្រដេវចំនួន១៤។ រន្ធត្រដេវនីមួយៗ មានទទឹងប្រវែង២ម៉ែត្រនិងកម្ពស់៦ម៉ែត្រ។ ស្ពាននេះធ្វើអំពីថ្មបាយក្រៀម លម្អ ដោយបង្កាន់ដៃនាគក្បាល៩ និងមានព្រះពុទ្ធសមាធិ នៅចំកណ្តាលក្បាលនាគ ធ្វើអំពីថ្មភក់។ ចំពោះកាលបរិច្ឆេទនៃស្ពាននេះ គេពុំដឹងច្បាស់ថា វាចាប់ផ្តើមកសាងឡើង ក្នុងរាជ្យណាទេ គឺគ្រាន់តែដឹងជាទូទៅថា ស្ពាននេះ សាងឡើងនាសម័យអង្គរ។ ប៉ុន្តែបើមើលលើចម្លាក់បង្កាន់ដៃនាគ គេអាចដឹងថា វាស្ថិតក្នុងរចនាបថបាយ័ន្ត (ឆ្នាំ១១៨១-១២២០នៃគ្រិស្តសករាជ)។

សូមបញ្ជាក់ថា ស្ពានបុរាណដែលមានអាយុកាលជិត៩០០ឆ្នាំនេះ បានប្រារព្ធពិធីប្រុងពលីសែនបួងសួងសុំសេចក្តីសុខចម្រើន និងជោគជ័យ ក្នុងការជួសជុល លើកដំបូងក្នុងប្រវត្តិសាស្ត្រ កាលពីថ្ងៃទី១៥ ខែមករា ឆ្នាំ២០២១ ដែលមាន លោក គឹម សុធិន អគ្គនាយករងអាជ្ញាធរជាតិអប្សរា និងសហការី រួមនឹងលោកអភិបាលស្រុក មន្ត្រីសាលាស្រុក មេឃុំ មេភូមិ កងរាជអាវុធហត្ថ និងប្រជាជនដែលរស់នៅក្នុងភូមិ ជាច្រើននាក់ បានចូលរួមឱ្យពរជ័យផងដែរ។ គម្រោងជួសជុល ស្ពានបុរាណនេះ បានប្រើថវិកាមូលនិធិ របស់អាជ្ញាធរជាតិអប្សរា ហើយនឹងបញ្ចប់គម្រោង នៅខែមិថុនា ឆ្នាំ២០២១៕SRP

ខេត្តសៀមរាប៖ទោះបីបច្ចុប្បន្ន កំណើនភ្ញៀវទេសចរ បានធ្លាក់ចុះ ដោយសារជំងឺកូវីដ១៩ ក៏ពិតមែន ប៉ុន្តែកិច្ចការងារ ជួសជុល អភិរក្សនៅក្នុងតំបន់ រមណីយដ្ឋានអង្គរ នៅតែមមាញឹក។

ជាក់ស្តែង កម្រាលឈើ ថ្មើជើង នៅក្នុងបរិវេណបន្ទាយស្រី ត្រង់ចំណុច គោបុរៈទី២ ឬច្រកចូលទី៣នៃប្រាសាទ ត្រូវបានក្រុមការងារ របស់នាយកដ្ឋានអភិរក្ស ប្រាសាទ ក្នុងឧទ្យានអង្គរនិងបុរាណវិទ្យាបង្ការ ដែលមានការចូលរួមសហការជាមួយក្រុមភ្នាក់ងារ ទេសចរ រួមទាំងភ្នាក់ងារសណ្ដាប់ធ្នាប់ កំពុងរៀបចំជួសជុល ផ្លាស់ប្តូរកម្រាលឈើថ្មី។

ការជួសជុលនេះ ត្រូវបានអនុវត្តជា ប្រចាំដើម្បីលើកតម្លៃរមណីយដ្ឋានអង្គរ និងបង្កភាពងាយស្រួល ដល់ភ្ញៀវ ទេសចរក្នុងការ ធ្វើដំណើរទស្សនាប្រាសាទ៕SRP

ខេត្តសៀមរាប៖លោក ហង់ ពៅ អគ្គនាយកអាជ្ញាធរជាតិអប្សរា នៅថ្ងៃទី១៩ ខែមករា ឆ្នាំ២០២១ ដឹកនាំកិច្ចប្រជុំនៅតាមទីតាំងជាក់ស្តែង នៃការងារដើម្បីតាមដាន ការអនុវត្តការងារផ្សេងៗ នាពេលកន្លងមក ព្រមទាំងផ្តល់យោបល់បច្ចេកទេស និងដំណោះស្រាយ នានាសម្រាប់កិច្ចការទាំងនោះ។

ក្នុងដំណើរការត្រួតពិនិត្យការងារនេះ អង្គប្រជុំបានចុះពិនិត្យ ទីតាំងមួយចំនួន ដែលចាំបាច់ត្រូវកែសម្រួលប្រព័ន្ធរំដោះទឹក លើកកម្ពស់សោភ័ណភាព ទូទៅក្នុងតំបន់ប្រាសាទ ក៏ដូចជាបង្កើនគុណភាព សេវាកម្មទេសចរណ៍រមណីយដ្ឋានអង្គរក្រោយជំងឺកូវីដ-១៩។

ជាចុងបញ្ចប់នៃដំណើរត្រួតពិនិត្យ ប្រចាំខែមករានេះ លោកអគ្គនាយក និងអ្នកជំនាញគ្រប់នាយកដ្ឋាន ក៏បានចុះទៅពិនិត្យ សំណង់អាគារសាលាបារាំងចុងបូព៌ា ដែលមានអាយុជាង១០០ឆ្នាំ មកហើយ នៅខាងលិចប្រាសាទបាយ័ន្តដើម្បីពិនិត្យ ពីស្ថានភាពសំណង់ និងឱ្យរៀបចំជួសជុល អគារនេះឡើងវិញ សម្រាប់ទុកជាកន្លែងរក្សាទុក នូវបុរាណវត្ថុផ្សេងៗ ព្រោះកន្លែងនេះក៏ជាទីតាំងរក្សាទុក និងជួសជុលបុរាណវត្ថុពីសម័យ បារាំង ផងដែរ៕SRP

ខេត្តសៀមរាប៖អភិបាលស្រុកបន្ទាយស្រី លោកឃឹម ហ្វីណង់ បានលើកឡើងថា
ខ្ញុំពិតជាចង់ឃើញ បងប្អូន ប្រជាកសិករនៅក្នុងស្រុកបន្ទាយស្រី និងអ្នកវិនិយោគ នាំគ្នា ដាំដំណាំហូបផ្លែ ឱ្យបានច្រើន ជាពិសេស ប្រភេទដែលលក់បានថ្លៃ មានភាពទាក់ទាញ និងមានទីផ្សារទូលំទូលាយ សម្រាប់ វិស័យទេសចរណ៍ ហើយរៀបចំចម្ការ និងកសិដ្ឋាន របស់ខ្លួនឱ្យទៅជារមណីយដ្ឋាន សម្រាប់ មកលេងកម្សាន្តផង។ បើធ្វើបែបនេះបាន ខ្ញុំជឿថាយើងនឹងអាចជម្រុញ ឱ្យអ្នកទេសចរមកលេងស្រុករបស់យើង កាន់តែច្រើន ព្រមទាំងអាច”នាំចេញនៅនឹងកន្លែង”នូវកសិផលទាំងនេះទៅផ្គត់ផ្គង់ដល់ក្នុងក្រុងសៀមរាបទៀតផង។

លោកឃឹម ហ្វីណង់ បន្តថា រដ្ឋបាលស្រុក បានត្រៀមខ្លួន រួចជាស្រេច ក្នុងការជម្រុញទីផ្សារ និងផ្តល់ការគាំទ្រ គ្រប់រូបភាព ធ្វើយ៉ាងណា ដើម្បីឱ្យ បន្ទាយស្រី សម្រេចបាននូវ ចក្ខុវិស័យ ជា«ដែនដីកសិទេសចរណ៍» ដ៏គួរឱ្យទាក់ទាញមួយនៅក្នុងពេលអនាគត។

បើតាគណនេយ្យផេកហ្វេសប៊ុគរបស់ លោកឃឹម ហ្វីណង់ បានសរសេរថា៖«តាង៉ែនបន្ទាយស្រី»៖ ផ្អែមមុត ឈ្ងុយឆ្ងាញ់ ស្រស់ថ្មីពីធម្មជាតិ! សំខាន់អាចទៅលេងដល់ចម្ការ ហើយដើរកាច់ពីដើមដោយខ្លួនឯងបានទៀត។

តោះអ្នកសៀមរាប! មកសាកភ្លក់រសជាតិ និងគាំទ្រផ្លែតាង៉ែន ក្នុងខេត្តយើងម្តង! ប្រហែលជានៅមិនទាន់ មានអ្នកដឹងច្រើនទេ ថានៅជើងភ្នំគូលែន មានចម្ការតាង៉ែន ដ៏គួរឱ្យចង់មកលេងមួយនេះ។

ដើម្បីចូលរួមជម្រុញ ឱ្យមានការ រីកចម្រើន និងបង្កើនភាពទាក់ទាញ
ខាងផ្នែកកសិទេសចរណ៍ នៅក្នុងស្រុកបន្ទាយស្រី ម្ចាស់ចម្ការ បានយល់ព្រមសហការ ជាមួយរដ្ឋបាលស្រុក ដោយលក់ជូនក្នុងតម្លៃពិសេស (ត្រឹមតែ៥០០០រៀលក្នុងមួយគីឡូ) សម្រាប់អ្នកទេសចរ ដែលអញ្ជើញមកទិញដល់ចម្ការផ្ទាល់ ហើយអនុញ្ញាតឱ្យដើរកាច់យកខ្លួនឯង និងអាចបេះហូបពីដើម”ម៉ាសេរី”ដោយមិនគិតថ្លៃបន្ថែមទៀតផង!។

បញ្ជាក់៖ ដើមតាង៉ែនទាំងនេះ មិនមានបាញ់ថ្នាំគីមីឡើយ មានសុវត្ថិភាព១០០% សម្រាប់ការ បេះហូបភ្លាមៗ ពីដើមផ្ទាល់ តែមានលក្ខខណ្ឌ តម្រូវឱ្យទិញចាប់ពី១០គីឡូឡើងទៅ ទើបអាចធ្វើដូច្នេះបាន (ព្រោះខ្លាចដើរហូបឆ្អែតហើយ ទិញតែកន្លះគីឡូ 😅)។

ទីតាំង៖ ជើងភ្នំគូលែន ចូលតាមច្រកផ្លូវវត្តស្គន់ ក្នុងភូមិស្គន់ ឃុំត្បែង ស្រុកបន្ទាយស្រី ខេត្តសៀមរាប
(https://goo.gl/maps/McH6wBf84a3TSDte6)
ម្ចាស់ចម្ការ៖ មីងសំណាង (085 406 668 / 097 8282 897)

ខេត្តសៀមរាប៖អភិបាលស្រុកបន្ទាយស្រី លោកឃឹម ហ្វីណង់ បានអះអាងថា«ទីបំផុត ទំនាស់ដីធ្លីរវាងប្រជាពលរដ្ឋ១០គ្រួសារ ដែលបានអូសបន្លាយជាង១៥ឆ្នាំ បានជ្រើសយកការចាប់ដៃគ្នា សម្បទានទៅវិញទៅមក និងទទួលយកដំណោះស្រាយដោយស្នាមញញឹមរៀងៗខ្លួន ហើយយល់ព្រមផ្តិតមេដៃបញ្ចប់វិវាទនៅចំពោះមុខរដ្ឋបាលស្រុក»។

លោក ឃឹមហ្វីណង់ បានបន្តថា៖១៥ឆ្នាំនៃទំនាស់នេះបានក្លាយជាឧបសគ្គដល់ការរស់នៅប្រកបដោយសុវត្ថិភាព និងស្ងប់អារម្មណ៍សម្រាប់ភាគីជម្លោះទាំងសងខាង ខាតបង់ពេលវេលា និងបាត់បង់ឱកាសប្រើប្រាស់ដីធ្លីរបស់ខ្លួនអោយអស់សក្តានុពល សូម្បីតែអាជ្ញាធរក៏ជាប់រវល់ដោះស្រាយ និងខាតបង់ពេលវេលាដើម្បីអភិវឌ្ឍមូលដ្ឋានមិនតិចដែរ។ សង្ឃឹមថាករណីនេះ នឹងធ្វើឱ្យករណីវិវាទដទៃទៀតមានការបន្ទន់ឥរិយាបថ និងព្រមទទួលយកដំណោះស្រាយដែលអាជ្ញាធរបានប្រឹងប្រែងស្វែងរកជូន។

បើតាមលោក ឃឹម ហ្វីណង់ ក្នុងឆ្នាំ២០២១ខាងមុខនេះ រដ្ឋបាលស្រុកនឹងបើកយុទ្ធនាការដោះស្រាយបញ្ចប់ ឬបញ្ជូនបន្តទៅស្ថាប័នមានសមត្ថកិច្ច នូវពាក្យបណ្តឹងពាក់ព័ន្ធនឹងបញ្ហាដីធ្លី សរុបជាង១០០ករណី ដែលបាននៅកកស្ទះជាច្រើនឆ្នាំមកហើយ ដើម្បីត្រួសត្រាយផ្លូវដល់ការចុះបញ្ជីជាប្រព័ន្ធ ដែលនឹងធានាភាពរឹងមាំច្បាស់លាស់ និងសុវត្ថិភាពនៃការកាន់កាប់ដីធ្លីដែលមានការការពារដោយមូលដ្ឋានច្បាប់ត្រឹមត្រូវ ជូនដល់ប្រជាពលរដ្ឋក្នុងការប្រើប្រាស់ដីធ្លីរបស់ខ្លួនជាទ្រព្យដ៏មានតម្លៃឱ្យអស់សក្តានុពល៕SRP

ខេត្តសៀមរាប៖លោក នួន ពុទ្ធារ៉ា អភិបាលក្រុងសៀមរាប រសៀលថ្ងៃអាទិត្យ ថ្ងៃទី១៧ ខែមករា ឆ្នាំ២០២១ ម្សិលមិញ បានអញ្ជើញ ក្នុងកម្មវិធីចែកអំណោយ ជូនដល់បងប្អូន ប្រជាពលរដ្ឋក្រីក្រ រស់នៅតំបន់សំណង់បណ្តោះអាសន្ន នៅភូមិទក្សិណខាងត្បូង សង្កាត់គោកចក ចំនួន៨០គ្រួសារ។

សូមជម្រាបថា អំណោយ ដែលបានចែកជូនប្រជាពលរដ្ឋ នេះបានមកពីការចូលរួម ចំណែកពីមាតាបិតាសិស្ស លោកគ្រូអ្នកគ្រូ បុគ្គលិក និងគណ:គ្រប់គ្រង នៃសាលាវេសហ្គេតអន្តរជាតិ ក្នុងមួយគ្រួសារ ទទួលបានរួមមាន អង្ករ មី សាច់ក្រក សម្ភារសិក្សា និងថវិកា ២០.០០០រៀល រួមជាមួយការបរិភោគអាហាររួមគ្នាផងដែរ៕SRP

ខេត្តសៀមរាប៖បុរស២នាក់ ត្រូវបានឃាត់ខ្លួនពាក់ព័ន្ធករណីឆក់ទូរស័ព្ទ។

ការឃាត់ខ្លួនធ្វើឡើងនៅ ទី១៦ខែមករាឆ្នាំ២០២១ នៅស្រុកសូទ្រនិគម បន្ទាប់ពីធ្វើសកម្មភាព នៅក្រុងសៀមរាប។

ជនសង្ស័យទី១/ឈ្មោះ ជឿង យូឈាន ហៅ ប៉ាង ភេទប្រុស អាយុ២០ឆ្នាំ មុខរបរ សិស្ស ស្រុកកំណើត នឹងបច្ចប្បន្ននៅភូមិសាលាកន្សែង សង្កាត់ស្វាយដង្គំ ក្រុងសៀមរាប។

ទី២/ឈ្មោះ ហុង សុភ័ណ្ឌ ភេទប្រុស អាយុ២០ឆ្នាំ មុខរបរ នៅផ្ទះ មានស្រុកកំណើតនៅភូមិខ្នយ ឃុំតាកោ ស្រុកកំពង់លាវ ខេត្តព្រៃវែង បច្ចុប្បន្នជួលបន្ទប់ស្នាក់នៅក្នុងភូមិត្រពាំងសេះ សង្កាត់គោកចក ក្រុងសៀមរាប។

បុរសទាំងពីរ បានឆ្លើយសារភាពថា ពួកគេពិតជាបានធ្វើសកម្មភាព ឆក់យកទូរស័ព្ទ ពីជនរងគ្រោះ ហើយពេលដែល ជនរងគ្រោះបើកម៉ូតូដេញតាម ពួកគេបានយកមួកការពារ​ គប់ទៅលើជនរងគ្រោះ បណ្តាលអោយ ជនរងគ្រោះរ៉េចង្កូតម៉ូតូដួល ទៅប៉ះជាមួយនឹងអ្នកធ្វើដំណើរផ្សេងទៀតពិតប្រាកដមែន។

វត្ថុតាងដកហូតបាន
-ម៉ូតូដែលជនសង្ស័យជិះធ្វើសកម្មភាព០១គ្រឿង
-ទូរសព្ទ័របស់ជនរងគ្រោះ០១គ្រឿង។

សូមរំលឹកករណីឆក់ទូរស័ព្ទនេះ បានកើតឡើងកាលពីវេលាម៉ោង១៨និង០០ នាទីថ្ងៃទី៦ខែមករា ឆ្នាំ២០២១​កន្លងទៅ​ នៅចំណុចជិតភ្លើងស្តុបសណ្ឋាគារស្មាយលីង ក្នុងភូមិចុងកៅស៊ូ​ សង្កាត់ស្លក្រាម ក្រុងសៀមរាប។

ជនសង្ស័យនិងវត្ថុតាង ត្រូវបាននគរបាលក្រុងសៀមរាប កសាងសំណុំបញ្ជូន ទៅសាលាដំបូងខេត្តសៀមរាប ដើម្បីអនុវត្តតាមផ្លូវច្បាប់។

សូមជម្រាបថា ប្រតិបត្តិការបង្ក្រាបនេះ ដោយនគរបាលក្រុង ដឹកនាំដោយ​លោក​វរសេនីយ៍ទោ​ ដា​ ចំរើន​ អធិការ នគរបាលក្រុងសៀមរាប សហការ ជាមួយនគរបាល ស្រុកសូទ្រនិគម ក្រោមការចង្អុលបង្ហាញពីលោកស្នងការនិងលោកស្នងការរង ទទួលផែនព្រហ្មទណ្ឌ៕SRP

ខេត្តសៀមរាប៖បុរសម្នាក់ បានស្លាប់ភ្លាមៗ ដោយសារបាក់ដីសង្កត់ពីលើ។

ហេតុការណ៍បានកើតឡើង នៅវេលាម៉ោង១១និង២០នាទីថ្ងៃទី១៧ខែមករាឆ្នាំ២០២១ នៅចំណុចភ្នំស្រីស្នំ ភូមិដំណាក់ដំរី ឃុំស្លែងស្ពាន ស្រុកស្រីស្នំខេត្តសៀមរាប។

សមត្ថកិច្ចស្រុកស្រីស្នំ បានរាយការណ៍ថា ជនរងគ្រោះ មាន ឈ្មោះជូន ចាន់ធុនអាយុ២៣ឆ្នាំ រស់នៅភូមិស្តៅពក ឃុំជ្រោយនាងងួន ស្រុកស្រីស្នំខេត្តសៀមរាប មុខរបរកសិករ។

សមត្ថកិច្ចបានបញ្ជាក់ថាករណីនេះ មូលហេតុ ជនរងគ្រោះ ទៅជីកដី យកដីនិងថ្មមកធ្វើតូប៕SRP

ខេត្តសៀមរាប៖លោក ពិន ប្រាកដ អភិបាលរងមានប្រសាសន៍ថា ស្ថានភាពគ្រោះថ្នាក់ចរាចរណ៍ ក្នុងរយៈពេលកន្លងមកនេះ មាននិន្នាការកើនឡើង នៃការស្លាប់ជាក្រុម ដែលបង្កឡើង ដោយសារការបើកបរ ហួសល្បឿនកំណត់ ការបើកបរ ក្រោមឥទ្ធិពល ជាតិស្រវឹង ការមិនពាក់មួកសុវត្ថិភាព មិនពាក់ខ្សែក្រវាត់សុវត្ថិភាព ការវ៉ាជែងដោយប្រថុយប្រថាន បានបង្កឲ្យមានគ្រោះថ្នាក់ចរាចរណ៍ ដែលមានសភាពធ្ងន់ធ្ងរ បណ្តាលឲ្យបាត់បង់អាយុជីវិតមនុស្ស ឬរបួស ពិការយ៉ាងអាណោចអាធម រួមជាមួយនឹងការខូចខាតទ្រព្យសម្បត្តិរដ្ឋ និងឯកជនយ៉ាងច្រើនផងដែរ។

លោកថ្លៃយ៉ាងដូច្នេះ នាថ្ងៃទី១៥ ខែមករា ឆ្នាំ២០២១ នៅរដ្ឋបាលខេត្តសៀមរាប ក្នុងពិធីបើកយុទ្ធនាការ អប់រំផ្សព្វផ្សាយច្បាប់ ស្តីពីសុវត្ថិភាពចរាចរណ៍ ផ្លូវគោក ក្រោមវត្តមានលោក ជំទាវ មឹង មាណវី រដ្ឋលេខាធិការនៃក្រសួងសាធារណការ និងដឹកជញ្ជូន និងជាប្រធានលេខាធិការដ្ឋាននៃគណៈកម្មាធិការជាតិសុវត្ថិភាពចរាចរណ៍ផ្លូវគោក។

លោក ពិន ប្រាកដ បានបន្ថែមទៀតថាយុទ្ធនាការអប់រំផ្សព្វផ្សាយច្បាប់ ស្តីពីចរាចរណ៍ផ្លូវគោក នេះ ជាសារក្រើនរំលឹកបងប្អូនប្រជាពលរដ្ឋ បន្តចូលរួមចំណែកក្នុងការកាត់បន្ថយ អត្រាគ្រោះថ្នាក់ចរាចរណ៍ និងអ្នកស្លាប់ដោយសារគ្រោះថ្នាក់ចរាចរណ៍ អោយកាន់តែមានអត្រាទាបជាងមុន និងបានចូលរួមជាមួយរាជរដ្ឋាភិបាល ក្នុងការលើកកម្ពស់ជីវៈភាពបងប្អួនប្រជាពលរដ្ឋ និងសេដ្ឋកិច្ចសង្គមជាតិទាំងមូល។

លោជំទាវ មឹង មាណវី បានថ្លែងផងថាអ្នកប្រើប្រាស់ផ្លូវគ្រប់រូប ត្រូវបន្តពង្រឹងស្មារតីប្រុងប្រយ័ត្ន ក្នុងពេលបើកបរ និងត្រូវអនុវត្តឱ្យបានខ្ជាប់ខ្ជួន តាមច្បាប់ស្តីពីចរាចរណ៍ ផ្លូវគោកទាំងអស់គ្នាផងដែរ៕SRP

ខេត្តសៀមរាប៖សមត្ថកិច្ចស្រុកសូទ្រនិគមបានឲ្យដឹងថាបុរសម្នាក់បានស្លាប់ភ្លាមៗ ដោយសារធ្លាយទុយយោ បូម បែនរថយន្តដឹកដីខ្សាច់។

ហេតុការណ៍បានកើតឡើង វេលាម៉ោង០៩និង៣០នាទី ថ្ងៃទី១៧ ខែមករា ឆ្នាំ២០២១ នៅចំណុច ការដ្ឋានចិនធ្វើព្រលានយន្តហោះថ្មី ក្នុង ភូមិប្រវាលឃុំតាយ៉ែក ស្រុកសូទ្រនិគម ខេត្តសៀមរាប។

សមត្ថកិច្ចបានដឹងថា ជនរងគ្រោះ មានឈ្មោះផាត សោភា អាយុ២៥ឆ្នាំ ទីលំនៅភូមិទួលព្រិច ឃុំមាន ស្រុកព្រៃឈរ ខេត្តកំពង់ចាម។

សមត្ថកិច្ចបានបញ្ជាក់ថាមូលហេតុ ដឹកខ្សាច់ មកចាក់នៅការដ្ឋានព្រលានយន្តហោះថ្មី ហើយបែនចាក់ខ្សាច់ រួចពេលទម្លាក់បែន មកវិញមិនធ្លាក់ អ្នកបើកបររថយន្ត (ជនរងគ្រោះ ក៏ចុះទៅដោះទុយយោ ហើយធ្លាយចុងទុយយោ ចំ ពោះ ចេញពោះវៀន បណ្តាលអោយស្លាប់តែម្ដង។

តាមការពិនិត្យ ពីមន្ត្រីជំនាញពុំមានស្លាកស្នាមអ្វីពាក់ព័ន្ធ នឹងបទល្មើសនោះទេ៕SRP