ខេត្តសៀមរាប

ខេត្តសៀមរាប៖នគរបាលព្រហ្មទណ្ឌកំរិតធ្ងន់ នៃស្នងការប៉ូលិសខេត្តសៀមរាប បានចាប់ខ្លួនបុរសម្នាក់ ពាក់ព័ន្ធករណី អំពើលួចមានស្ថាន ទម្ងន់ទោស។

ជនសង្ស័យ មានឈ្មោះ យ៉ែម សំណាង ភេទប្រុស អាយុ ៤៨ឆ្នាំ មុខរបរ គក់ជេ រថយន្ត បច្ចុប្បន្នរស់នៅភូមិក្រសាំង សង្កាត់ជ្រាវ ក្រុងសៀមរាប។

ហេតុការណ៍លួចវេលាម៉ោង ១០ និង០០នាទី ថ្ងៃទី ១៩ ខែមិថុនា ឆ្នាំ២០២១ ត្រង់ចំណុចភូមិខ្នារ សង្កាត់ជ្រាវ ក្រុងសៀមរាប។

ជនរងគ្រោះ ឈ្មោះ បឿ ឈុននី ភេទស្រី អាយុ ៣៦ឆ្នាំ មុខរបរ នៅផ្ទះ រស់នៅភូមិខ្នារ សង្កាត់ជ្រាវ ក្រុងសៀមរាប។

យោងតាមរបាយការណ៍របស់នគរបាលព្រហ្មទណ្ឌកំរិតធ្ងន់ ដែលអង្គភាពសៀមរាបប៉ុស្តិ៍ ទទួលបាននៅព្រឹកនេះបានបង្ហាញថា
នៅថ្ងៃទី ១៣ ខែមិថុនា ឆ្នាំ២០២១ ជនរងគ្រោះ បានចាក់សោទ្វារផ្ទះទុកចោល ហើយទៅមើលម្តាយឈឺ នៅខេត្តត្បូងឃ្មុំ លុះរហូតដល់ថ្ងៃ ទី ២៣ ខែមិថុនា ឆ្នាំ២០២១ ជនរងគ្រោះ បានត្រឡប់មកផ្ទះវិញ ក៏ឃើញផ្ទះមានស្នាមគាស់ និងរ៉ើកកាយ ក្នុងបន្ទប់ដេករបស់គាត់ ដោយបាត់បង់ ប្រាក់ដុល្លារ ចំនួន(១២៤០០)ដុល្លារ ខ្សែកមាស ០១ខ្សែ ទម្ងន់ 0១តម្លឹង (ទ្រព្យសម្បត្តិទាំអស់ ជនរងគ្រោះ ទុកក្នុងស្រោមខ្នើយក្នុងបន្ទប់ដេក )។

របាយការណ៍បន្តថាក្រោយពីទទួលពាក្យបណ្ដឹង
កម្លាំងនគរបាលបានធ្វើការស្រាវជ្រាវ និងស៊ើបអង្កេត ដោយសង្ស័យទៅលើ ឈ្មោះ យ៉ែម សំណាង ត្រូវជាប្តីចុង របស់ជនរងគ្រោះ នៅវេលាម៉ោង ១៥ និង ០០នាទី ថ្ងៃទី ២៣ ខែមិថុនា ឆ្នាំ២០២១ ដោយបាននាំខ្លួន ឈ្មោះ យ៉ែម សំណាង មកធ្វើការសាកសួរ។

តាមចម្លើយសារភាព របស់ជនសង្ស័យ ឈ្មោះ យ៉ែម សំណាង បានឆ្លើយសារភាពថា៖ គាត់ពិតជា បានធ្វើសកម្មភាព ករណីខាងលើនេះ ពិតប្រាកដមែន។ ដោយដោយឃើញជនរងគ្រោះមិននៅផ្ទះ ( ប្រពន្ធចុងរបស់គាត់ ) គាត់ក៏បានចូលធ្វើសកម្មភាពដោយយកដង្កាប់ កាត់ស័ង្កសីបង្អួច ហើយលូក ដៃបើកគន្លឹះទ្វារចូបន្ទប់ជនរងគ្រោះ ហើយធ្វើសកម្មភាព លួចយកប្រាក់ដុល្លាចំនួន ១១២០០ដុល្លារនិង ខ្សែកមាស ១ខ្សែមិនដឹងទម្ងន់ ដើម្បីយកប្រាក់ទៅទិញរថយន្ត ក្រោយពេលធ្វើសកម្មភាពហើយ គាត់បានយកប្រាក់ និងខ្សែក ទៅផ្ញើប្រពន្ធដើម នៅខេត្តត្បូងឃ្មុំ។

សូមជម្រាបថាប្រតិបត្តិការស្រាវជ្រាវចាប់ជនសង្ស័យនេះ ធ្វើឡើងតាមការណែនាំរបស់លោកទិត្យ ណារ៉ុង ស្នងការខេត្តសៀមរាប និងបញ្ជាផ្ទាល់ពីលោកភឹង ចិន្តារ៉េត ស្នងការរងទទួលផែនកណ្ដាលយុត្តិធម៌ និងមានការចង្អុលបង្ហាញពីលោកណុប សារ៉ាក់ ស្នងការរងទទួលជំនួយការព្រហ្មទណ្ឌកម្រិតធ្ងន់ ដោយដឹកនាំកម្លាំងបង្រ្កាបដោយ លោក សុខ ម៉េងអ៊ាង នាយការិយាល័យ នគរបាលព្រហ្មទណ្ឌកំរិតធ្ងន់ សហការជាមួយនគរបាលក្រុងនិងប៉ុស្ដិ៍ជ្រាវផងដែរ៕SRP

ខេត្តសៀមរាប៖សមត្ថកិច្ចបានឲ្យដឹងថាបុរសបុគ្គលិក អចលនទ្រព្យ ម្នាក់បើកឡានព្រូស ជិះគ្នា៣នាក់ គេចពីម៉ូតូរ៉ឺម៉ក មិនជាន់ហ្វាំង បែរជាជាន់ហ្គារ ថែម បណ្តាលឱ្យចូលទៅផ្ទះវេរលុយទាំងកំរោល។

ហេតុការណ៍នេះបានកើតឡើងនៅវេលាម៉ោង១០និង១០នាទីព្រឹក ថ្ងៃទី២៣ ខែមិថុនាឆ្នាំ២០២១ ស្ថិតនៅលើដងផ្លូវចាក់បេតុង ក្រោយផ្សារលើធំថ្មី (ហៅផ្លូវតាអុច) ក្នុងភូមិតាវៀន សង្កាត់សាលាកំរើក ក្រុងសៀមរាប។

ប្រភពពីសាក្សីបានប្រាប់ថា មុនពេលកើតហេតុ ឃើញមានរថយន្តព្រូស ពណ៌សមួយគ្រឿង បើកបរមកពីទិសខាងត្បូងបតមកទិសខាងកើត ខណៈពេលនោះបានគេចពី ម៉ូតូ រ៉ឺម៉ក ប្រហែលមិនជាន់ហ្វ្រាំង បែរជាជាន់ហ្គារ ចូលក្នុងផ្ទះវេរលុយ យីហោ អ៊ី ម៉ាននី បុក ខ្ទេចទ្វា កញ្ចក់ និង ទូរទស្សន៍ អស់ចំនួន៣គ្រឿង។

មន្ត្រីនគរបាលចរាចរណ៍ខេត្តសៀមរាប បានប្រាប់នៅកន្លែងកើតហេតុថា តៃកុងមានឈ្មោះ ប៊ិន ដូរិទ្ធ ភេទប្រុស អាយុ៣៦ឆ្នាំមុខរបរ បុគ្គលិកអចលនទ្រព្យ ក្នុងក្រុងសៀមរាប មានស្រុកកំណើតនៅភូមិកំពង់ចន្លុះ ឃុំពាង ស្រុកត្បូងឃ្មុំ ខេត្តត្បូងឃ្មុំ បានរថរថយន្ត ម៉ាកព្រូស ពណ៌ស ពាក់ស្លាកលេខភ្នំពេញ ២.BC.១៩៨២ ស៊េរី ឆ្នាំ២០១០ មកពីទិសខាងត្បូង បត់ មកកើត បំរ៉ុងទៅផ្ទះ មកដល់ចំណុចខាងលើ បើកចូលផ្ទះវេរលុយ យីហោ អ៊ី ម៉ានី វីរៈ តែម្តង។ ចំណែកម្ចាស់តូបជួល មានឈ្មោះ ឈើត វីរៈ ភេទប្រុស អាយុ៣៥ឆ្នាំមុខរបរ វេរលុយ យីហោ អ៊ី ម៉ាន់នី វីរៈ រស់នៅភូមិចុងកៅស៊ូ សង្កាត់ស្លក្រាម ក្រុងសៀមរាប។

បច្ចុប្បន្នអ្នកបើករថយន្ត និងម្ចាស់ផ្ទះជនរងគ្រោះ បានសម្របសម្រួលគ្នា ចំនួន១០៥០ដុល្លារ ដោយមានចំនួន២តូប៖ តូបទី១/ម្ចាស់វេរលុយ ទាសំណង ចំនួន១០០០ដុល្លារ និង តូប ទី២/ម្ចាស់តូប ជាងជួសជុលទូរទស្សន៍ ត្រូវរថយន្តព្រូសបុកចូល ប៉ះពាល់ខូចខាតអស់ទូរទស្សន៍អស់ចំនួន៣គ្រឿង សំំណង ចំនួន៥០ដុល្លារ ដើម្បីបញ្ចប់រឿង។ ក្រោយបញ្ចប់រឿងនគរបាលបានប្រគល់ឱ្យរថយន្តព្រូសយករថយន្តទៅផ្ទះវិញ៕SRP

ខេត្តសៀមរាប៖លោកតាម្នាក់បានដួលស្លាប់នៅព្រឹកមិញនេះ នាថ្ងៃទី ២៣ខែ មិថុនា ឆ្នាំ ២០២១ នៅភូមិតាអាន ឃុំតាអាន ស្រុកក្រឡាញ់ ខេត្តសៀមរាប។

សមត្ថកិច្ចស្រុកក្រឡាញ់បានឲ្យដឹងថាជនរងគ្រោះឈ្មោះ ម៉ៅ ស្មិន អាយុ៧០ឆ្នាំ រស់នៅភូមិតាអាន ឃុំតាអាន ស្រុកក្រឡាញ់ ខេត្តសៀមរាប។

សមត្ថកិច្ចបានបន្តថា មុនពេលកើតហេតុជនរងគ្រោះ បានទៅបាចជី នៅវាលស្រែ ជាមួយកូនស្រី ឈ្មោះ រៀម រស្មី ដោយជនរគ្រោះ បានលីជីពីប្រឡាយទៅដាក់នៅស្រែចម្ងាយ៥០០ម៉ែត្រ លុះដល់ពាក់កណ្តាលផ្លូវគាត់បានដាក់ជី អង្គុយសម្រាក និងបានក្រោកនោម ហើយក៏បានដួលស្លាប់តែម្តង។

សមត្ថកិច្ចបានបន្តថាក្រោយពីបានទទួលព័ត៌មាន កម្លាំងជំនាញបច្ចេកទេស នៃអធិការដ្ឋាននគរបាលស្រុក សហការជាមួយគ្រូពេទ្យ បានចុះទៅដល់កន្លែងកើតហេតុ បានធ្វើកោសល្យវិច្ច័យ ពិនិត្យឃើញថាមិនមែនពាក់ព័ន្ធនិងរឿងឃាតកម្មទេ។

តាមការសន្និដ្ឋានរបស់សមត្ថកិច្ចនិងគ្រូពេទ្យបានបញ្ជាក់ថាជនរងគ្រោះ បានស្លាប់ដោយសារជំងឺលើសឈាម និងខ្យល់គរ។មូលហេតុ ជនរងគ្រោះមានជំងឺលើសឈាមនិងខ្យល់គរ៕SRP

ខេត្តសៀមរាប៖គម្រោងសាងសង់ពីស្ដុបសុខាដល់វង្វង់មូលជ័វរ្ម័នទី៧ មានប្រវែង ៥៨០០ម៉ែត្រ ទទឹងតួផ្លូវ ២១ម៉ែត្រ ជាគម្រោងអនុវត្ដន៍ដោយក្រសួង និងពីរង្វង់មូលជ័យវរ្ម័នទី៧ ដល់ព្រលានយន្ដហោះ មានប្រវែងប្រមាន ១៨០០ម៉ែត្រ ដែលអនុវត្តគម្រោងដោយអាកាសចរណ៍សុីវិល ហើយការដ្ឋានផ្លូវមួយខ្សែនេះនឹងបញ្ចប់នៅខែវិឆ្ឆិកា ២០២១ ឆាប់ៗខាងមុខ បើមិនមានការរាំងស្ទះក្នុងករណីណាមួយ។ គម្រោងរបស់ធនគារអភិវឌ្ឍន៍អាស៊ី (ADB) ដោយបែងចែកជាង ៦គន្លង (៣ទៅ ៣មក) និងមានផ្លូវថ្មេីរជេីង ផ្លូវកង់ផងដែរ។

ម្យ៉ាងទៀតផ្លូវមួយខ្សែ គឺជាផ្លូវមួយដ៏មានសារៈសំខាន់សម្រាប់ភ្ញៀវទេសចរជាតិ អន្តរជាតិដែលបានអញ្ជើញមកទស្សនាខេត្តសៀមរាប ហើយផ្លូវនេះក៏ជួយរំដោះការកកស្ទះក្នុងពេលពិធីបុណ្យផ្សេងៗទៀតផងដែរ។

លោកទៀ សីហា អភិបាលខេត្តនៅ ថ្ងៃទី២២ ខែមិថុនា ម្សិលមិញបានដឹកនាំក្រុមការងារចុះពិនិត្យការដ្ឋានសាងសង់ផ្លូវ (ទ្រូងកណ្តាល) ចាប់ពីស្តុបសុខារហូតដល់ព្រលានយន្តហោះ ដែលជាគម្រោងរបស់ធនគារអភិវឌ្ឍន៍អាស៊ី (ADB)។

ជាមួយគ្នានេះ រដ្ឋបាលខេត្តក៏សូមការយោគយល់ពីសំណាក់ ប្រជាពលរដ្ឋ ក៏ដូចជាសាធារណជនផងដែរ នូវបញ្ហារំខាន និងការកកស្ទះចរាចរណ៍ដែលជួបក្នុងអំឡុងពេលសាងសង់ផ្លូវនេះ៕SRP

ខេត្តសៀមរាប៖មានការលើកឡើងថាប្រធានមន្ទីរផែនការខេត្តសៀមរាប បានសាងសង់សំណង់មួយកន្លែងយ៉ាង ស្គឹមស្គៃ ក្នុងដែនគ្រប់គ្រង របស់អាជ្ញាធរជាតិអប្សរា គ្រាដែលពលរដ្ឋនៅក្បែរនោះ មិនអាចសង់ផ្ទះបាន។

ករណីនេះមន្ត្រីអាជ្ញាធរអប្សរា បញ្ជាក់ថា ក្រុមការងារធ្លាប់ចុះទៅហាមឃាត់ច្រើនដងហើយ តែបុគ្គលខាងលើនៅតែលួចសាងសង់ទាំងបំពាន។ ពេលនេះអង្គភាពបានដាក់ពាក្យបណ្តឹងទៅតុលាការហើយ។

ប្រភពបានឲ្យដឹងថាការសាងសង់សំណង់របស់ប្រធានមន្ទីរផែនការខេត្តសៀមរាប គឺធ្វើ ប៊ូទិក ដែលកំពុងដំណើរការសាងសង់ក្នុងដែនគ្រប់គ្រង់ដោយអាជ្ញាធរអប្សរានេះ ស្ថិតក្នុងភូមិវាល សង្កាត់គោកចក ក្រុងសៀមរាប ត្រង់ចំណុចខាងកើតវត្តប្រាសាទគោកចក ប្រហែលជាង២០០ម៉ែត្រ។ ជាកម្មសិទ្ធិរបស់លោកហាក់ សុធារ៉ា ប្រធានមន្ទីរផែនការខេត្តសៀមរាប និងប្រពន្ធ។

ការសាងសង់ប៊ូទិក ក្នុងដែនគ្រប់គ្រង របស់អាជ្ញា ធរអប្សរា ដោយគ្មានច្បាប់អនុញ្ញាតនេះ ក្រុមពលរដ្ឋក្នុងតំបន់នោះ បានលើកឡើងថា ពួកគាត់ត្រឹមតែសង់ផ្ទះតូចតាច សម្រាប់រស់នៅ ឬក៏ធ្វើទ្រុងមាន់ ទ្រុងទា ត្រូវបានហាមឃាត់យ៉ាងតឹងរឹងបំផុតពីអង្គភាពអាជ្ញាធរអប្សរា។ ចុះប៊ូទិក ដ៍ធំស្គឹមស្គៃរបស់លោកប្រធានមន្ទីរផែនការ ហេតុអ្វីមិនហាមឃាត់ ឬហាមឃាត់មិនបាន។ តើជាអំណាចបុគ្គល ឬ មានអ្វីនៅពីក្រោយសំណង់ប៊ូទិកនេះ..?។ ក្រុមពលរដ្ឋបានលើកជាសំណូមពរ សុំអោយអាជ្ញាធរពាក់ព័ន្ធ ពិសេសអង្គភាពអាជ្ញាធរអប្សរា មេត្តាពិនិត្យសំណង់ប៊ូទិកនេះ ហើយអនុវត្តវិធានការច្បាប់ ដោយមិនបែងចែករវាងពលរដ្ឋនិងអ្នករាជការ។ ប៉ុន្តែបើប៊ូទិក មួយនេះមិនត្រូវបានចាត់វិធានការច្បាប់ទេនោះ អាចនឹងមានការសាងសង់ប៊ូទិករាប់សិបកន្លែងទៀតបណ្តែតខ្លួនក្នុងដែនអប្សរាដូចគ្នា។

ជុំវិញករណីនេះ ប្រធានមន្ទីរផែនការខេត្តសៀមរាប លោក ហាក់ សុធារ៉ា បានប្រាប់តាមទូរស័ព្ទថា សំណង់នេះមិនមែនជារបស់លោកឡើយ ផ្ទះរបស់លោកនៅភូមិផ្សេងទេ។

ទោះជាបែបនេះ មន្ត្រីរបស់អង្គភាពអាជ្ញាធរអប្សរាបានបញ្ជាក់ថា ប៊ូទិកខាងលើនេះជារបស់លោកហាក់ សុធារ៉ា ប្រធានមន្ទីរផែនការខេត្ត សៀមរាប និងប្រពន្ធ យ៉ាងពិតប្រាកដ។ ប៉ុន្តែពេលអាជ្ញាធរអប្សរាចុះទៅទប់ស្កាត់ហាមឃាត់ការសាងសង់ ប្រធានមន្ទីរផែនការរូបនេះ តែងអោយប្រពន្ធ ឈ្មោះស ពិដោ ជាអ្នកចេញមុខតតាំង។

មន្ត្រីអាជ្ញាធរអប្សរា ដែលសុំមិនបង្ហាញឈ្មោះ បញ្ជាក់ទៀតថា សំណង់ប៊ូទិក របស់លោក ហាក់ សុ ធារ៉ា នេះខាងអាជ្ញាធរអប្សរា បានចុះទៅហាមឃាត់ច្រើនដងហើយ តែគេនៅតែលួចសាងសង់បំពាន។ ពេលនេះអង្គភាពអាជ្ញាធរអប្សរា បានកំពុងដាក់ពាក្យបណ្តឹងប្តឹងទៅតុលាការរួចហើយ។ អង្គភាពរងចាំតែដីកាសម្រេចពីតុលាការប៉ុណ្ណោះ ក្នុងការអនុវត្តរុះរើ៕SRP

ខេត្តសៀមរាប៖លោកទៀ សីហា អភិបាលខេត្តសៀមរាប បានឲ្យដឹងថាការដ្ឋានសាងសង់ផ្លូវ (ទ្រូងកណ្តាល) ចាប់ពីស្តុបសុខា ដល់រង្វង់មូលព្រះបាទជ័យវរ្ម័នទី៧ដែលជាគម្រោងរបស់ធនគារអភិវឌ្ឍន៍អាស៊ី (ADB)។

លោកទៀ សីហា បានបញ្ជាក់ថាការដ្ឋានផ្លូវមួយខ្សែនេះនឹងបញ្ចប់នៅខែវិឆ្ឆិកា ២០២១ ឆាប់ៗខាងមុខ បើមិនមានការរាំងស្ទះក្នុងករណីណាមួយ។

លោកបញ្ជាក់យ៉ាងនេះនៅថ្ងៃអង្គារ ទី២២ ខែមិថុនា ឆ្នាំ២០២១ ព្រឹកមិញនាឱកាស អញ្ជើញចុះពិនិត្យការការដ្ឋានសាងសង់ផ្លូវ (ទ្រូងកណ្តាល ខាងលើដែលស្ថិតនៅបណ្ដោយផ្លូវជាតិលេខ៦៕SRP

ខេត្តសៀមរាប៖ការឈូសផ្នូរខ្មោច នៅក្រុងសៀមរាប មួយកន្លែងសម្រាប់ធ្វើដីឡូតិ៍លក់ កំពុងចាប់អារម្មណ៍យ៉ាងខ្លាំងពីសំណាក់មិត្តអ្នកអាន។ ករណីនេះស្ថាបនិករបស់សមាគមសពគ្រីស្ទាន សុំអោយអាជ្ញាធរ ជួយទប់ស្កាត់ការធ្វើលិខិតទិញលក់ដីផ្នូរខ្មោចពីសំណាក់ក្រុមឈ្មួញឃុបឃិត ខណ:ខាងសមាគមន កំពុងដំណើរការពាក្យបណ្តឹង។

ការទទូចសុំអោយអាជ្ញាធរជួយទប់ស្កាត់នេះធ្វើឡើងក្នុងកិច្ចសម្ភាសន៍មួយ នាព្រឹកថ្ងៃទី២១ខែ មិថុនាឆ្នាំ២០២១ នៅក្រុងសៀមរាប បន្ទាប់ពីក្រុមឈ្មួញដីឡូត៍បានឃុបឃិតគ្នាទិញលក់ដីកប់ខ្មោច (ផ្នូរខ្មោច)គ្រីស្ទាន។

លោកប្រាក់ វុទ្ធី ស្ថាបនិក របស់សមាគមសពគ្រីស្ទាន និងជាប្រធានសមាគមគ្រូគង្វាលប្រចាំខេត្តសៀមរាប បានផ្តល់បទសម្ភាសន៍ថា ដីផ្នូរខ្មោចឬកប់ ខ្មោច ដែលត្រូវបានគេឃុបឃិតគ្នាទិញលក់ ឈូសឆាយបោះបង្គោលធ្វើជាដីឡូតិ៍នេះ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប មានទំហំ៥០ គុណ១០០ម៉ែត្រ ដោយពួកគេឃុបឃិតគ្នាលក់ទិញ ក្នុងតម្លៃជាង១០ម៉ឺនដុល្លារ។

លោកបន្តថា ដីនេះកាលពីអំឡុងឆ្នាំ២០០៤ អង្គការ វិហារមេថីឌីស កម្ពុជា បានប្រគល់អោយសមាគមសពគ្រីស្ទាន ទុកសម្រាប់កប់សព ហើយបន្តគ្រប់គ្រងមកទល់បច្ចុប្បន្ន។ តែថ្មីៗនេះមានបុគ្គលមួយក្រុមតូចឃុបឃិតគ្នាទិញលក់ដីនេះពុះជាដីឡូតិ៍ ទើបខាងលោកសម្រេចរៀបចំដាក់ពាក្យបណ្តឹង។

លោកប្រាក់ វុទ្ធី បញ្ជាក់ថា ពេលនេះលោកកំពុងដំណើរការបណ្តឹងទៅថ្នាក់ក្រុងនិងខេត្ត ដើម្បីរំលាយការទិញលក់ហើយរក្សាដីនេះអោយសមាគមគ្រប់គ្រងកប់សពគ្រីស្ទានវិញ។ តែក្នុងពេលកំពុងដំណើរការបណ្តឹង ក្រុមជនឃុបឃិតលួចបន្តឈូសឆាយនិងបោះបង្គោល ហេតុដូច្នេះហើយទើបរូប លោកទទូចសុំអោយអាជ្ញាធរជួយទប់ស្កាត់បែបនេះ។ ត្បិតបណ្តឹង របស់លោក អាចនឹងឈានដល់តុលាការ។

សូមបញ្ជាក់ថា កាលពីថ្ងៃទី១៥ខែមិថុនាឆ្នាំ ២០២១កន្លងទៅនេះ លោក ក្អោប រ៉ន ចៅសង្កាត់ជ្រាវ បានថ្លែងថា ករណីនេះលោកនៅមិនទាន់ដឹងច្បាស់ដែរទេ តែអាចសួរទៅលោក ខន ទើបដឹងច្បាស់។

លោកឃុន សុខន ថៅកែដីឡូតិ៍ ក្នុងតំបន់សៀមរាប បានអោយដឹងថា ដីខាងលើនេះរូបលោកបានត្រៀមទិញមែន តែរងចាំអោយអ្នកលក់រត់ច្បាប់បានសិន។ ប៉ុន្តែលោក នួន ពុទ្ធារ៉ា អភិបាលក្រុងសៀមរាប បានបញ្ជាក់ថា រាល់ការឈូសឆាយពុះជាដីឡូតិ៍ត្រូវមានលិខិតកាន់កាប់ដី និងច្បាប់អនុញ្ញាតត្រឹមត្រូវ។ មិនចឹងទេគឺខុសច្បាប់។ តែបើដីខាងលើនៅជាប់ពាក់ព័ន្ធនិងសមាគម ខាងសមាគម អាចមកដាក់ ពាក្យនៅសាលាក្រុងបាន។

លោកបន្តថា ថ្វីត្បិតអាជ្ញាធរក្រុងមិនទាន់បានចុះ ទៅពិនិត្យទីតាំងដីនោះពិតមែន តែបើពិនិត្យឃើញ ថាដីនោះស្ថិតក្រោមការគ្រប់គ្រង របស់អាជ្ញាធរបឹងទន្លេសាប សាលាក្រុងមិនអនុញ្ញាតច្បាប់នោះឡើយ។

លោកប្រាក់ វុទ្ធី បញ្ជាក់ចុងក្រោយថា ដីដែលខាងលោកកំពុងដំណើរការប្តឹងនេះ ក្រៅពីសម្រាប់កប់សពគ្រីស្ទាន វាក៏ស្ថិតក្នុងដែនគ្រប់គ្រងរបស់អាជ្ញាធរបឹងទន្លេសាបផងដែរ ហេតុដូច្នេះការឃុបឃិតគ្នាទិញលក់ពិតជាល្មើសច្បាប់៕SRP

ខេត្តសៀមរាប៖លោកសឿន តុលា ស្ថាបនិកក្រុមហ៊ុន ផា ផា យ៉ា បាននិពន្ធនូវអត្ថបទមួយក្រោមចំណងជើងថា «ភាពស្មោះត្រង់»។

លោកសឿន តុលា ស្ថាបនិកក្រុមហ៊ុន ផា ផា យ៉ា បានសរសេរថា៖ ពាក្យស្មោះត្រង់  គឺជាឬសគល់ ល្អបំផុតសម្រាប់ទំនាក់ទំនងរវាងគ្នានិងគ្នា  សូម្បីតែមនុស្សដែលចេះកុហកអ្នកដទៃ  ក៏មិនពេញចិត្ត ចំពោះនរណាម្នាក់ ដែលកុហកចំពោះខ្លួន បានឡើយ។

ប៉ុន្តែ ភាពស្មោះត្រង់  គឺមានតម្លៃ ជាងមនុស្ស  ប្រសិនបើ ” អ្នកណាម្នាក់ ប្រកាន់ យកភាពស្មោះត្រង់  ក្នុងមាគា៌ជវិតរបស់ខ្លួន   ពួកគេ មានប្រភព ទុនដ៏ល្អមួយ សម្រាប់ ទំនាក់ទំនង និងការធ្វើអាជីវកម្ម។

ភាពស្មោះត្រង់ កើតចេញមកពី  ការនិយាយពិត   ការដែលមិនលាក់លៀម ក្នុងបំណង យកផលប្រយោជន៍ ដើម្បីតែខ្លួនម្នាក់ឯង ដោយយកប្រៀប ទៅលើអ្នកណាម្នាក់ ឬភាគីម្ខាងទៀត។

គ្រប់មាគ៌ា នៃការធ្វើជំនួញ ទាមទារឱ្យមានភាពស្មោះត្រង់  ” គឺនិយាយការពិត”

នៅទីនេះសូមធ្វើការពិចារណាថា: ប្រសិនបើ អ្នកលក់ មិនមានភាពស្មោះត្រង់ ជូនអតិថិជនទេ  តើអ្នកគិតថា : តើអ្នកមានទំនាក់ទំនងល្អ និងយូរអង្វែង ជាមួយគ្នាដែរឬទេ?

ជាការពិតណាស់ អាជីវកម្មមួយដែលទទួលជោគជ័យទៅបាន  គឺអាស្រ័យទៅលើប្រភពចំណូល  ដែលអតិថិជនត្រូវចំណាយ ទៅលើ ផលិតផល ឬសេវាកម្ម ក៏ប៉ុន្តែ ទាំងនោះ គឺភាពស្មោះត្រង់ ដើរតួរសំខាន់ ក្នុងគោល ខ្លឹមនៃកាធ្វើជំនួញ។

ការលួចកិបកេង  គុណភាព ឬ ទំហំបរិមាណ ដែលជាការបំភាន់ ទៅដល់អ្នកប្រើប្រាស់ ឬអតិថិជន  មិនមែនជាមាគ៌ាធ្វើឱ្យអាជីវកម្មរីកចម្រើនបានទេ  ប្រាក់ចំណូលខ្ពស់អាចកើតឡើង  ប៉ុន្តែគ្រាន់តែជារឿងបណ្ដោះអាសន្នតែប៉ុណ្ណោះ។

ប្រាក់ចំណូល ដែលល្អបំផុត និង គាំទ្រឱ្យអាជីវកម្មឲ្យរីកចម្រើនទៅមុខ  គឺចេញពី ផលិតផល និង សេវាកម្មត្រឹមត្រូវ ជាមួយនិងភាពស្មោះត្រង់។

” ប្រសិនបើអ្នកដាំពូជស្មោះត្រង់   ការប្រមូលផលគ្មានដែនកំណត់”

ជាអកុសល  ភាពស្មោះត្រង់ មានតម្លៃថ្លៃណាស់  លំបាកកើតឡើង ចំពោះ មនុស្សដែលមិនយល់អំពីតម្លៃរបស់វាបានឡើយ ដូច្នេះហើយ  យើងត្រូវចំណាយពេល ដើម្បីឱ្យជឿជាក់ទៅលើអ្នកណាម្នាក់  ហើយយើងអាចសួរថា ” តើយើងត្រូវចំណាយពេលប៉ុណ្ណា  ដើម្បីឱ្យមានការជឿ…? គ្មាននរណាម្នាក់ អាចឆ្លើយបានទេ”

ប៉ុន្តែរឿងដែលល្អនោះគឺថា ” អ្នកណាក៏មានសិទ្ធិ ប្រកាន់យកភាពស្មោះត្រង់បានដែរ  ប្រសិនបើ ពួកគេ ជឿជាក់លើខ្លួនឯង គោរពខ្លួនឯង  និងគោរពដល់អ្នកដទៃ”

សូមចងចាំថា ” អ្នកនឹងទទួលបានជោគជ័យ ជាមូលដ្ឋានគ្រឹះ  ប្រសិនបើអ្នក មានភាពស្មោះត្រង់ចំពោះខ្លួនឯង”

ពីព្រោះភាពស្មោះត្រង់  នឹងនាំអ្នក ទៅរកមាគ៌ា នៃជំនឿ ដែលជឿទៅលើខ្លួនឯង  នៅក្នុងលោកយើងនេះ គ្មានជំនឿណាដែលត្រឹមត្រូវ ហើយល្អឥតខ្ចោះ នោះទេលើកលែងតែយើងជឿលើខ្លួនឯង ជាមុនសិន។

នៅទីនេះ មានរឿងល្អៗ 5 ចំណុច ដើម្បី ធ្វើឱ្យយើងពិចារណានិងអនុវត្ត ក្នុងការអភិវឌ្ឍខ្លួន :

1: អនុវត្តប្រកាន់យកភាពស្មោះត្រង់។

2: ឆ្លៀតពេល រៀនជាប្រចាំ ដោយទទួលស្គាល់ការពិត ថាយើង មិនមែនមនុស្សចេះឡើយ។

3: ធ្វើការផ្ដោតឱ្យបានហ្មត់ចត់ និងឱ្យអស់ពីសមត្ថភាព។

4: ដាក់គោលដៅ គិតតែចំណុចវិជ្ជមាន ដើម្បីបំពេញឱ្យទៅដល់គោលដៅ។

5: បង្កើតភាពរីករាយ និងការស្រឡាញ់ពីលើកិច្ចការ អ្នកកំពុងធ្វើបច្ចុប្បន្ន។

សូមចងចាំថា : ភាពលាក់បាំង មិនអាចធ្វើឱ្យយើង បំពេញកិច្ចការឱ្យអស់ពីសមត្ថភាពបានឡើយ  ហើយ ជោគជ័យកើតឡើងក្នុងរយៈពេលខ្លីតែប៉ុណ្ណោះ។

” លុយតិច ឬក៏ច្រើន គ្រាន់តែជាទំហំ នៃតួលេខប៉ុណ្ណោះ ប៉ុន្តែ នៅពេលដែលយើងមានភាពស្មោះត្រង់  គឺយើងមានអ្វីគ្រប់យ៉ាង។

និពន្ធដោយ លោក : សឿន តុលា ស្ថាបនិកក្រុមហ៊ុន ផា ផា យ៉ា PAPAYA NEXT STEP CO,.LTD * PAPAYA REAL ESTATE( គម្រោងអភិវឌ្ឍន៍អចលនទ្រព្យ) * PAPAYA HOMESTAY (គម្រោងលើវិស័យទេសចរណ៍)* PAPAYA GARDEN(គម្រោងលើវិស័យកសិកម្មនិងចែកចាយអាហារ)

ខេត្តសៀមរាប៖ជនដៃដល់៣នាក់ត្រូវអាវុធហត្ថស្រុកសូទ្រនិគនចាប់ខ្លួន បន្ទាប់ពីវាយមនុស្ស៥នាក់អោយរងរបួស ក្នុងជម្លោះដណ្តើមទីតាំងប្រព្រឹត្តបទល្មើសនេសាទ។

ការចាប់ខ្លួនធ្វើឡើងកាលពីល្ងាចថ្ងៃទី២០ ខែមិថុនា ឆ្នាំ២០២១ ម្សិលមិញ ស្ថិតក្នុងភូមិតាច្រនៀង ឃុំកំពង់ឃ្លំាង ស្រុកសូទ្រនិគម។

មន្ត្រីកងរាជអាវុធហត្ថស្រុកសូទ្រនិគម បានអោយដឹងថា ជនសង្ស័យដែលចាប់ខ្លួនទី១ ឈ្មោះ ផាត់ ង៉ុយ ភេទប្រុស អាយុ ៣០ឆ្នាំ។ ទី២ឈ្មោះ ផាត់ ងី ភេទប្រុស អាយុ ៣១ឆ្នាំ។ ទី៣ឈ្មោះ ផាត់ ផល ភេទប្រុស អាយុ ៣៤ឆ្នាំ។

ចំណែកជនរងគ្រោះទី១ឈ្មោះ តែ លី ភេទប្រុស អាយុ ៣៦ឆ្នាំ។
ទី២. ឈ្មោះ ខ្វៃ តែ ភេទប្រុស អាយុ ៦៨ឆ្នាំ។ ទី៣. ឈ្មោះ តែ ធី ភេទប្រុស អាយុ ២៥ឆ្នាំ។ ទី៤. ឈ្មោះ តែ លីដា ភេទ ប្រុស ៣០ឆ្នាំ។ ទី៥. ឈ្មោះ ឡឹង ហុក ភេទប្រុស អា យុ ៦៥ឆ្នាំ។
ជនសង្ស័យ និងជនរងគ្រោះរស់នៅភូមិ ឃុំ កើតហេតុខាងលើ។ មូលហេតុភាគីទាំង សង ខាងទាស់សម្ដីគ្នា រឿងដណ្តើមកន្លែងដាក់សម្រាស់យកត្រីនៅតាមព្រែកក្នុងភូមិសាស្រ្តខាងលើ។

ប្រភពបញ្ជាក់ថា ក្នុងខណ:នេះភាគីរងគ្រោះកំពុងបញ្ជូនទៅមន្ទីពេទ្យ ឯភាគីបង្ក កំពុងបន្តនិតិវិធី៕SRP

ខេត្តសៀមរាប៖បុរសម្នាក់បើកម៉ូតូបុកត្រាក់ទ័រពីក្រោយ បណ្ដាលឲ្យស្លាប់នៅពេលបញ្ជូនទៅដល់មន្ទីរពេទ្យ។

ហេតុការណ៍បានកើតឡើង វេលាម៉ោង០១និង៣០នាទីយប់ ថ្ងៃទី២១ ខែមិថុនា ឆ្នាំ២០២១ នៅលេីផ្លូវជាតិលេខ៦ ចំណុចភូមិព្រៃទទឹង ឃុំល្វែងឫស្សី ស្រុកជីក្រែង។

សមត្ថកិច្ចស្រុកជីក្រែងបានឲ្យដឹងថា គ្រោះថ្នាក់ចរាចរណ៍នេះ រវាងបេីកបរម៉ូតូម៉ាកវ៉េវអាល់ហ្វា អត់ស្លាកលេខ បានបុកពីក្រោយត្រាក់ទ័រម៉ាកKOBUTA ពណ៌ក្រហម (ទិសដៅស្របគ្នាពីលិចទៅកេីត)។

សមត្ថកិច្ចបានបន្តថា ជនរងគ្រោះ ឈ្មោះ ញ៉ាញ់ មោង អាយុ ២៧ឆ្នាំ ទីលំនៅភូមិគោកអំពិល ឃុំល្វែងឫស្សី ស្រុកជីក្រែង អ្នកបេីកបរម៉ូតូ បញ្ជូនដល់មន្ទីរពេទ្យស្លាប់។ ចំណែកអ្នកបេីកបរត្រាក់ទ័រ ឈ្មោះ ពុធ ឃា ភេទប្រុសអាយុ៤១ឆ្នាំ ទីលំនៅភូមិក្នុង ឃុំល្វែងឫស្សី ស្រុកជីក្រែង មិនមានរងរបួសនោះទេ។ ករណីនេះត្រាក់ទ័រ និងម៉ូតូ ត្រូវបានសមត្ថកិច្ចនាំយកទៅរក្សាទុកនៅប៉ុស្តិ៍នគរបាលរដ្ឋបាលល្វែងឫស្សី ដេីម្បីចាត់ការនីតិវិធីបន្ត៕SRP

ខេត្តសៀមរាប៖លោក​ ឆាត​ ឆី​ហ៊ុយ​ ប្រធាន​សមាគម​ចលនាយុវជនកម្ពុជា​ (ក្រុម​១៥៧)​សាខាស្រុកក្រឡាញ់​ បានដឹក​នាំ​សមាជិក​ សមាជិកា​ ជួបសំណេះសំណាល នាំ​យក​អំណោយ​ជា​ គ្រឿង​ឧបភោគ​ បរិភោគ​ និង​ សម្ភារមួយ​ចំនួន​ឧបត្ថម្ភ​ដល់​សាលាឃុំតាអាន និង​ពលរដ្ឋចំនួន៣ គ្រួសារ​ ដែលមានជីវភាពខ្វះខាត​។

ពិធីនេះនៅថ្ងៃ​អាទិត្យ ថ្ងៃទី២០ ខែ​មិថុនា​ ឆ្នាំ២០២១​ តាមការណែនាំរបស់លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម​១៥៧)​ សាខាខេត្តសៀមរាប​។

លោក​ ឆាត​ ឆី​ហ៊ុយ​ បានឲ្យដឹងថាការផ្ដល់អំណោយនេះ ទី១ បានជួបសំណេះសំណាល​ជាមួយ​ លោក​ ស្គន់ សាគិន មេឃុំ តាអាន ក្រោមវត្តមាលោក​ សុខ​ ណារ៉េត​ អភិបាល​រង​ ស្រុក​ក្រឡាញ់​ ក្រុមការងារ ស.ស.យ.​ក​ ស្រុក​ក្រឡាញ់​ លោក ថ្កើង សេងគា មេប៉ុស្តិ៍តាអាន និងលោកមេភូមិ ផងដែរ។
អំណោយដែលប្រគល់​ជូន​សាលា​ឃុំតាអាន មាន​ដូច​ជា​៖
-​ ទឹក​សុទ្ធ​ ២០យួរ​ -​ ទឹក​ក្រូច​ ១កេស​ -​ មី​ ១កេស​ -​ សាប៊ូ​លាង​ដៃ​ ២០លីត្រ​ -​ ម៉ាស ចំនួន ៤០០ម៉ាស -​ អាកុល​ ៣ដប។
ចំណែកអំណោយប្រគល់ជូន​គ្រួសារ​ដែលមានជីវភាពខ្វះខាត​ ចំនួន៣គ្រួសារ​ នៅភូមិតាអាន ភូមិទឹកជុំ និង ភូមិសំរោង ដោយក្នុង​មួយគ្រួសារ​ទទួលបាន៖ -​ ថវិកា​៥មុឺន​ររៀល -​ អង្ករ​ ២៥គីឡូ​
-​ ទឹក​សុទ្ធ​ ១០យួរ​ -​ មី​ ១កេស​ -​ ត្រី​ខ​១យួរ​ -​ ទឹក​ស៊ីអុីវ ១យួរ​ -​ ទឹក​ត្រី​១យួរ​ -​ ប្រេង​ឆា​ ១លីត្រ​ -​ ស្ករ​ស​ ១គីឡូ​ -​ ប៊ីចេង​ ១គីឡូ​ -​ អំបិល​ ១គីឡូ​ -​ សាប៊ូ​លាង​ចាន​១ធុង​ ៥លីត្រ​ -​ ពង​ទា​ ៣៣គ្រាប់​-​ អាកុល​ ១ដប​។

ឆ្លៀតក្នុងនោះផងដែរ លោក ឆាត ឆីហ៊ុយ បានមានមតិផ្តាំផ្ញេី ដោយសូមអំពាវនាវដល់ពលរដ្ឋ ត្រូវយកចិត្តទុកដាក់ អោយបានខ្ពស់នូវអនាម័យ​។ ជាពិសេសសូមចូលរួមអនុវត្តតាមប្រសាសន៍ណែនាំរបស់ សម្តេចតេជោ (៣កុំ ៣ការពារ) ឲ្យបានខ្ជាប់ខ្ជួនដើម្បីចៀសផុតពីមេរោគកូវីដ-១៩ ដ៏កាចសាហាវនេះ។

ជាមួយគ្នានេះដែរ លោក​ អ៊ុំ​ ភឿង​ អនុប្រធានផ្នែកបុគ្គលិក​ សមាគមចលនាយុវជនកម្ពុជា(ក្រុម១៥៧) ខេត្តសៀមរាប​ ក៏បាននាំយកអំណោយជូន​ លោក​ មេ​ រ៉ាឌី​ មេឃុំសែនសុខ​ ស្រុកក្រឡាញ់​ផងដែរ។ អំណោយរួមមាន៖ -​ ម៉ាសុីនវ៉ាស់កម្ដៅចំនួន២គ្រឿង -​ ម៉ាស ចំនួន​១០០០ម៉ាស -​ ទឹកសុទ្ធ​ ចំនួន​ ៥កេស៕SRP

ខេត្តសៀមរាប៖លោក សឿន តុលា ស្ថាបនិកក្រុមហ៊ុន ផា ផា យ៉ា បាននិពន្ធនូវអត្ថបទមួយដែលមានចំណងជើងថា «ការពឹងលើខ្លួនឯង»។

លោកសឿន តុលា បានសរសេរថា៖” ប្រសិនបើ អត្ថភាពដំបូង យើងអាចជួយខ្លួនឯងបាន មានរឿងជាច្រើន ដែលអ្នកដទៃ ចូលរួមជួយយើងបន្ថែម ទៀត ដើម្បីឲ្យ យើង ទទួលបានជោគជ័យជាបន្តបន្ទាប់” ជាការពិតណាស់ ” យើងមិនអាចសុំគេជួយយើង ក្នុងរយៈពេលយូរ បានទេ ពីព្រោះអ្វីទាំងអស់ គឺផ្ដើមពីខ្លួនយើង”
ហើយជាទូទៅ អ្នកដែលអាចជួយខ្លួនឯងបាន តែងតែបង្កើត មាគ៌ា ផ្លូវដើរ សម្រាប់ជីវិតរបស់ខ្លួន និង ពួកគេ មិនអាច ខ្ជះខ្ជាយ ពេលវេលា ដោយមិនបានស្វែងយល់ អំពីហេតុផលផ្សេងៗដែលកើតឡើងជុំវិញខ្លួននោះទេ និយាយរួម ពួកគេតែងតែចំណាយពេលអភិវឌ្ឍន៍ខ្លួនឯង ជាប្រចាំ។

ពួកគេតែងតែ ប្រឆាំង ចំពោះការនិយាយថា ” ខ្ញុំគ្មានសមត្ថភាព” ឬក៏” ខ្ញុំគ្មានជម្រើស” ឬ ពួកគេប្រឆាំងចំពោះហេតុផលដែល គាំទ្រចំពោះការគិតអវិជ្ជមានទាំងឡាយ។
សូមចងចាំថា មនុស្សដែលខ្លាំងពិតប្រាកដ គឺជាមនុស្ស លត់ដំ ការគិតនឹងខ្លួន ដើម្បីឲ្យជឿជាក់លើខ្លួនឯង។
មានលក្ខណៈ 5 ចំណុច ដែលធ្វើឲ្យយើង
ផ្លាស់ប្ដូរការគិត ដើម្បីពឹងខ្លួនឯង។
1: ខ្ញុំអាចធ្វើបាន ” ខ្ញុំអាចដោះស្រាយបាន”
2: ខ្ញុំធុញទ្រាន់ គ្រប់គ្រាន់ ក្នុងការពឹងផ្អែកលើអ្នកដទៃ ដូច្នេះហើយ ខ្ញុំចង់ទទួលខុសត្រូវ លើវាសនាជីវិត ទទួលខុសត្រូវ កិច្ចការដទៃទៀត ដោយខ្លួនឯង។
3: ភាពថិតថេរ មិនមែនការពិតទេ ពីព្រោះ នៅក្នុងលោកយើងនេះ គ្មានអ្វីឋិតថេរ និងទៀងទាត់ឡើយ ដូច្នេះហើយ
ខ្ញុំត្រូវតែ ដឹកនាំ ជីវិតរបស់ខ្ញុំ តាមរយៈ ការគិត និងការរៀន គ្មានព្រំដែន ដើម្បីឲ្យជីវិតរបស់ខ្ញុំ ទទួលផលល្អគ្មានដែនកំណត់។
4: ពាក្យថាលំបាក ពាក្យថាមិនអាចទៅរួច….ពាក្យថាគ្មានលទ្ធភាព គឺមិនសម្រាប់រូបខ្ញុំទេ ពីព្រោះ ខ្ញុំត្រូវការស្វាហាប់ វាងវៃ នឹងប្រឈមជាមួយកិច្ចការថ្មីៗ បន្ថែមទៀត។
5: ខ្ញុំជ្រើសរើស យក ” បោះចោលអតីតកាល ដែលកំណត់វាសនារបស់ខ្ញុំ ឲ្យនៅដដែលនោះ ពីព្រោះ ខ្ញុំមិនមែនជាជនរងគ្រោះ ដោយសារអតីតកាលនោះទេ។

និពន្ធដោយលោក  សឿន តុលា ស្ថាបនិកក្រុមហ៊ុនផា ផា យ៉ា PAPAYA  NEXT STEP CO,.LTD.*PAPAYA REAL ESTATE(គម្រោងអភិវឌ្ឍន៍អចលនទ្រព្យ)*PAPAYA HOMESTAY(គម្រោងលើវិស័យទេសចរណ៍)
*PAPAYA GARDEN  (គម្រោងលើវិស័យកសិកម្មនិងចែកចាយអាហារ)