ខេត្តសៀមរាប

ខេត្តសៀមរាប៖ក្រុមហ៊ុន បុរីប្រ៊ីលានសុីធី បានឧបត្ថម្ភ គ្រឿងឧបភោគ បរិភោគ និងសម្ភារមួយចំនួន សរុបថវិកាជាង២០០០ដុល្លារ ដើម្បីទប់ស្កាត់ការរីករាលដាលនៃជំងឺកូវីដ១៩។

ការឧបត្ថម្ភនេះធ្វើឡើង នៅថ្ងៃអង្គរ ទី០៦ ខែកក្កដា ឆ្នាំ២០២១នេះ នៅទីស្នាក់ការ ក្រុមហ៊ុន បុរីប្រ៊ីលានសុីធី ក្រោមកិច្ចការទទួលពីលោក ហ៊ុន ប៉ូគា ប្រធានសមាគមចលនាយុវជនកម្ពុជា (ក១៥៧) ខេត្តសៀមរាប និងសហការី។

សូមជម្រាបថាអំណោយសប្បុរសធម៌ពី ក្រុមហ៊ុន បុរីប្រ៊ីលានសុីធី ដែលបានផ្ដល់សមាគមចលនាយុវជនកម្ពុជា (ក១៥៧) ខេត្តសៀមរាប រួមមាន៖ – អាកុល 10កានស្មើ 300លីត្រ – ម៉ាស 10កេសធំស្មើ25000ម៉ាស- មី ម៉ាម៉ា10កេសធំ ស្នើ 60កេសតូច – ត្រីខ 10កេសធំ ស្នើ1000កំប៉ុង- អង្ករ 500គីឡូ – ទឹកត្រី 50យួរ – ទឹកស៊ីអ៉ីវ 50យួរ – ទឹកសុទ្ធ200យួរ។

ឆ្លៀតក្នុងឱកាសទទួលអំណោយនេះលោកប្រធាន ហ៊ុន ប៉ូគា បានថ្លែងអំណរគុណ និងកោតសរសើរ និង វាយតំលៃខ្ពស់ ចំពោះថ្នាក់ដឹកនាំ បុរី ប្រ៊ីលានសុធី ដែលបានយកចិត្តទុកដាក់ ប្រកបដោយទឹកចិត្តមនុស្សធម៌ ក្នុងឧបត្ថម្ភ សមាគមចលនា១៥៧ខេត្តសៀមរាប ដើម្បីចែកជូនប្រជាពលរដ្ឋ ដែលបានរងគ្រោះដោយសាេរាតត្បាលជំងឺកូវីដ១៩។ ជាមួយគ្នានេះដែរ ប្រធានសមាគមចលនាយុវជនកម្ពុជា (ក១៥៧) ខេត្តសៀមរាប បានរំលឹក ដល់ក្រុមការងារនិងសប្បុរសជនទាំងអស់ អោយមានការប្រុងប្រយ័ត្នខ្ពស់ នូវជំងឺកូវីដ១៩ ដោយត្រូវការអនុវត្តន៍វិធានការ 3កុំ 3ការពារ របស់សម្តេចតេជោ អោយបានទៀតទាត់ ដើម្បីចៀសវាងជំងឺកូវីដ-១៩៕SRP

ខេត្តសៀមរាប៖កម្លាំងនគរបាលព្រហ្មទណ្ឌកម្រិតធ្ងន់ខេត្តសៀមរាប បានចាប់បុរសម្នាក់ ដែលសង្ស័យជាឃាតករចាក់សម្លាប់បុរសម្នាក់និងរបួសម្នាក់ ទៀតនៅស្រុកជីក្រែង។

ការឃាត់ខ្លួនធ្វើឡើងនៅ១៦ថ្ងៃទី ០៦ ខែកក្កដា ឆ្នាំ ២០២១នេះ ខណៈ ជនសង្ស័យ កំពុងលាក់ខ្លួនក្នុងព្រៃក្នុងភូមិសាស្ត្រស្រុកជីក្រែង។

យោងតាមរបាយការណ៍បានបង្ហាញថា ជនសង្ស័យ ឈ្មោះ ជិន វណ្ណា ភេទប្រុស អាយុ ១៨ឆ្នាំ មុខរបរធ្វើស្រែ រស់នៅភូមិព្រីង ឃុំជីក្រែង ស្រុកជីក្រែង ខេត្តសៀមរាប។

តាមរបាយការណ៍បានបន្តថា ជនសង្ស័យ ឈ្មោះ ជិន វណ្ណា បានផឹកស៊ី ជាមួយជនរងគ្រោះ ០២នាក់ ០១.ឈ្មោះ រិន លាប ភេទ ប្រុស អាយុ ២៦ឆ្នាំ មុខរបរធ្វើស្រែ ០២. ឈ្មោះ រុន ដូង ភេទប្រុស អាយុ២១ឆ្នាំ មុខរបរធ្វើស្រែ អ្នកទាំង០២ រស់នៅភូមិកើតហេតុខាងលើ។ ដោយពេលកំពុងផឹកស៊ីនោះ ក៏មានទំនាស់ពាក្យសម្តីនិងគ្នា ជនសង្ស័យ ឈ្មោះ ជិន វណ្ណា បានយកកាំបិតចុងស្រួចពណ៌សដែលហាន់សាច់ខ្លែម ចាក់មកលើ ជនរងគ្រោះ ឈ្មោះ រិន លាប ១កាំបិត ត្រូវចង្កេះ និងចាក់ជនរងគ្រោះ ឈ្មោះ រុន ដូង ត្រូវចុងដង្ហើម ១កាំបិត។ ចំណែកជនរងគ្រោះទាំង២នាក់ ត្រូវបានបងប្អូនដឹកយកទៅពេទ្យទាំងយប់ បានពាក់កណ្តាលផ្លូវ ជនរងគ្រោះ ឈ្មោះ រុន ដូង បានស្លាប់។

ជនសង្ស័យ ឈ្មោះ ជិន វណ្ណា បានឆ្លើយ សារភាពថា ខ្លួនពិតជាបានធ្វើសកម្មភាព ករណី ខាងលើនេះ ពិតប្រាកដមែន។

បច្ចុប្បន្បនេះ ជនសង្ស័យ កំពុងត្រូវបានកម្លាំង ជំនាគបញ្ជូនទៅតុលាការ ដើម្បីចាត់ការទៅតាមផ្លូវច្បាប់។

ករណីឃាតកម្ម បានកើយឡើងនៅវេលាម៉ោង ២២និង០៥នាទី ថ្ងៃទី០៥ ខែកក្កដា ឆ្នាំ២០២១ ត្រង់ចំណុចភូមិព្រីង ឃុំជីក្រែង ស្រុកជីក្រែង ខេត្តសៀមរាប។

សូមជម្រាបថាប្រតិបត្តិការបង្ក្រាបនេះ ក្រោមបញ្ជាពីលោកព្រះរាជអាជ្ញាអមសាលាដំបូងខេត្តសៀមរាប លោកមាស ច័ន្ទពិសិដ្ឋ ដោយដឹកនាំផ្ទាល់លោកសុខ ម៉េងអ៊ាង នាយការិយាល័យ នគរបាលព្រហ្មទណ្ឌកម្រិតធ្ងន់ សហការជាមួយលោក តាំង លីហេង អធិការ នគរបាលស្រុកជីក្រែង តាមការណែនាំពីលោក ទិត្យ ណារ៉ុង ស្នងការនគរបាលខេត្ត លោក ភឹង ចិន្តារ៉េត ស្នងការរងទទួលផែនព្រហ្មទណ្ឌ និងណុប សារ៉ាក់ ស្នងការរង ទទួលជំនួយការដឹកនាំកម្លាំងព្រហ្មទណ្ឌកម្រិតធ្ងន់៕SRP

ខេត្តសៀមរាប៖បុរសម្នាក់បានស្លាប់និងម្នាក់ទៀតរងរបួសធ្ងន់ ដោយជនបង្កបានចាក់ក្នុងជម្លោះពាក្យសម្ដី។

ហេតុការណ៍បានកើតឡើង វេលាម៉ោង ២២និង៣០នាទី ថ្ងៃទី ០៥ ខែកក្កដា ឆ្នាំ២០២១ ស្ថិតនៅភូមិព្រីង ឃុំជីក្រែង ស្រុកជីក្រែង ខេត្តសៀមរាប។

យោងតាមរបាយការណ៍របស់សមត្ថកិច្ចដែលបណ្ដាញ សៀមរាបប៉ុស្តិ៍ ទទួលបានបង្ហាញករណីហិង្សា មានស្ថានទម្ងន់ទោសនេះ
បង្កដោយជនសង្ស័យ មានឈ្មោះ ជិន វណ្ណា ភេទប្រុសអាយុ១៨ឆ្នាំ រស់នៅចំណុចភូមិកើតហេតុ។ ជនបង្កបានយកកាំបិតចាក់ទៅលើជនរងគ្រោះបណ្តាលអោយស្លាប់ម្នាក់និងរបួសម្នាក់។

ជនរងគ្រោះទី១-ឈ្មោះ រិន លាប ភេទប្រុសអាយុ ២៦ឆ្នាំ របួសចំចង្កេះ១កាំបិត ត្រូវបានគេ បញ្ជូនទៅសង្គ្រោះនៅមន្ទីរពេទ្យខេត្តសៀមរាប។

២- ឈ្មោះ រុន ដូង ភេទប្រុសអាយុ ២១ឆ្នាំ របួសចំចុងដង្ហេីម១កាំបិត បានស្លាប់ ពេលបញ្ជូនទៅមន្ទីពេទ្យ។ ជនរងគ្រោះទាំងពីរ រស់នៅភូមិកើតហេតុខាងលើ។ ចំណែកជនសង្ស័យក្រោយពីធ្វើសកម្មភាព ចាក់ទៅលើជនរងគ្រោះ រួចបានរត់គេចខ្លួនបាត់។

យោងតាមរបាយការណ៍បានបញ្ជាក់ថាករណីនេះមូលហេតុ ដោយជនរងគ្រោះកំពុងអង្គុយផឹកស្រា ពេលឃើញជនបង្ក បានហៅអោយចូលផឹក តែជនបង្កមិនចូល ក៏មានទំនាស់ពាក្យសម្តីនឹងគ្នា រហូតដល់មានការប្រតាយប្រតប់គ្នា ដោយខាងជនរងគ្រោះមានគ្នាច្រើន ចូលមកវាយខ្លួន ក៏បានដកកាំបិតចាក់ទៅលើជនរងគ្រោះតែម្តង(ជនបង្កមកពីឆ្លុះសត្វ)។

ពាក់ព័ន្ធករណីនេះ កម្លាំងសមត្ថកិច្ចកំពុងយកចិត្តទុកដាក់ ស្រាវជ្រាវស្វែងរកចាប់ជនល្មេីសដេីម្បីអនុវត្តតាមច្បាប់៕SRP

ខេត្តសៀមរាប៖លោក ចែម ចន្ថា ប្រធានសមាគម ចលនាយុវជនកម្ពុជា (ក្រុម១៥៧) ស្រុកជីក្រែងនិង លោក ស្ងួន សុបាន ប្រធានផ្នែកទំនាក់ទំនងសាធារណៈ បានដឹងនាំ សមាជិក សមាជិកា នាំយកអំណោយប្រគល់ជូន ប្រជាការពារចំនួន ២០រូប នៅសាលាឃុំសង្វេីយ ស្រុកជីក្រែង។

ការឧបត្ថម្ភ នៅថ្ងៃ ចន្ទ ទី ០៥ខែ កក្កដា ឆ្នាំ២០២១ នេះ នៅសាលាឃុំសង្វេីយ។

លោក ចែម ចន្ថា បានឲ្យដឹងថាការផ្ដល់អំណោយនេះ តាមការណែនាំរបស់លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) ខេត្តសៀមរាប ដោយមានការ
ចូលរួមពី ព្រះ តេជគុណ ធរ សុឃុន ជា ស្ថាបនិក CCD លោក តាំង លីហេង អធិការស្រុកជីក្រែង លោក តែម គឹមសេង មេឃុំ សង្វេីយ ផងដែរ។

លោក ចែម ចន្ថា បន្តថា អំណោយដែលចែកជូនរួមមាន៖-មី ២០០កញ្ចប់ -ទឹកសុទ្ធ២០យួរ -អង្ករ ២០០គីទ្បូ -ពងទា ៣០០គ្រាប់ -បុកអង្ករលីង ២០ប្រអប់ -ម៉ាស ២០ប្រអប់ -អាកុល ១០០០០ml -ដបអាកុល ២០ដប -សាប៊ូ Lix ២០ដប -ទឹកត្រី ៤យួរ -កូកា ២០ កំប៉ុង និង ថវិកាចំនួន ២០មុឺនរៀល។

នៅព្រឹកមិញនេះដែរ លោក សំ វណ្ណធឿន ប្រធានផ្នែកបដិសណ្ឋារកិច្ច សមាគមចលនាយុវជនកម្ពុជា(ក្រុម១៥៧) សាខាសៀមរាប​ ក្នុងនាម តំណាងលោក ហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប បានដឹកនាំសមាជិក​ សមាជិកា នាំយកអំណោយ មួយចំនួនប្រគល់ជូនលោកខៀវ សត ចៅសង្កាត់ស្លក្រាម ក្រុងសៀមរាប ខេត្តសៀមរាប ដេីម្បីផ្គត់ផ្គង់ដល់ប្រជាពលរដ្ឋ ក្នុងការប្រយុទ្ធប្រឆាំងជំងឺកូវីដ-១៩ផងដែរ។

អំណោយប្រគល់ជូនរួមមាន៖ អាកុល​ពេទ្យ ចំនួន ៣០លីត្រ ⁃ ទឹកសុទ្ធ ចំនួន ៣០យួរ .មីម៉ាម៉ា ចំនួន ២កេស . ម៉ាស ចំនួន ៥០០ ម៉ាស -ដបអាកុលចំណុះ៥០០ មីលីលីត្រចំនួន10ដប -ដបអាកុលចំណុះ កន្លះលីត្រ ចំនួន៥ដប។

ក្នុងឱកាសចែកអំណោយដល់ អាជ្ញាធរស្លក្រាមនឹងប្រជាការពារ នៅឃុំសង្វេីយ លោកប្រធានទាំងពីរ បានមានមតិសំណេះសំណាល និងផ្តាំផ្ញេី ដោយសូមថែរក្សាសុខភាព និងចូលរួមអនុវត្តន៍តាមប្រសាសន៍ណែនាំ របស់ សម្តេចតេជោ (៣កុំ ៣ការពារ) ឲ្យបានខ្ជាប់ខ្ជួន​ ដេីម្បីចៀសផុតពីជំងឺកូវីដ-១៩ ដ៏កាចសាហាវនេះ៕SRP

ខេត្តសៀមរាប៖លោក សឹង្ហ សំរឹទ្ធិ អនុប្រធានសមាគមចលនា យុវជនកម្ពុជា (ក្រុម១៥៧) សាខាខេត្តសៀមរាប និងលោក អ៊ុន វណ្ណសក្ក័ ប្រធានសមាគមចលនាយុវជនកម្ពុជា (ក្រុម១៥៧) ស្រុកស្វាយលេី បានដឹកនាំសមាជិក សមាជិកា ចុះចែកអំណោយជូនប្រជាពលរដ្ឋ ចំនួន២០គ្រួសារ។

ការចុះចែកអំណោយ នៅអាទិត្យ ទី០៤ ខែ កក្កដា ឆ្នាំ ២០២១ នៅភូមិដំបូលខ្ពស់ ឃុំតាសៀម ស្រុកស្វាយលើ។

លោក សឹង្ហ សំរឹទ្ធិ អនុប្រធាន បានឲ្យដឹងថា ការផ្ដល់អំណោយនេះតាមការណែនាំរបស់លោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប ដោយមានចូលរួមពី លោក អៀង ពិសិដ្ឋ អភិបាលស្រុកនិង មេបញ្ជាការកងរាជអាវុធហត្ថស្រុកស្វាយលេី ព្រមទាំងអាជ្ញាធរភូមិឃុំ សសយក ស្រុកស្វាយលេី រួមនឹង អង្កការអភិវឌ្ឍន៍សហគមន៍ផងដែរ។

ឆ្លៀតក្នុងឱកាសនោះផងដែរ លោក សឹង្ហ សំរឹទ្ធិ បានមានមតិសំណេះសំណាល និង ក្រេីនរំលឹកដល់ប្រជាពលរដ្ឋ​ ទាំងអស់ ដោយត្រូវយកចិត្តទុកដាក់អោយបានខ្ពស់ នូវវិធានការពារទប់ស្កាត់ ជំងឺកូវីដ-១៩។ ជាពិសេស ត្រូវអនុវត្តន៍តាមការណែនាំ របស់សម្តេចតេជោ ៣កុំ ៣ការពារ អោយបានខ្ជាប់ខ្ជួនដេីម្បីចៀសអោយផុតនូវជំងឺកូវីដ-១៩ ដ៏កាចសាហាវនេះ។

សូមជម្រាបថា៖អំណោយដែលត្រូវប្រគល់ជូនរួមមាន៖ -អង្ករ ២០គីឡូ – មី​ ១កេស – ត្រីខ ១យួរ – ទឹកត្រី ១យួរ – ទឹកស៊ីអ៉ីវ​១យួរ- អំបិល​ ១គីឡូ – ស្ករស​ ១គីឡូ – ប៊ីចេង​ ១កញ្ចប់ (៥០០ក្រាម) – ប្រេងឆា​ ១លីត្រ-ជែលលាងដៃ​ ១ដប​ និងម៉ាស់​ ១ប្រអប់-ថវិកាចំនួន ២មុឺនរៀល។

ដោយឡែកអំណោយឧបត្ថម្ភបន្ថែមពីអង្គការសម្រាប់ចំនួន៥គ្រួសារ ដែលកំពុងខ្វះខាតជីវភាពលំបាកខ្លាំងសម្រាប់ជីវិតប្រចាំថ្ងៃ។ រួមមាន៖ -អង្ករ​ ២០០ គីឡូក្រាម -ទឹកស៊ីអុីវ ៥យួរ -ទឹកត្រី ៥យួរ-ម្រេងឆា​៥ដប -ពងទា​១៥០គ្រាប់និងសម្ភារសិក្សាមួយចំនួន៕SRP

ខេត្តសៀមរាប៖លោកជំទាវ ឧកញ៉ា បណ្ឌិត លី អ៊ុំអេង អគ្គនាយិកាក្រុមហ៊ុន លី អ៊ុំអេង បានឧបត្ថម្ភ អង្ករ ទឹកស៊ីអ៉ីវ ទឹកត្រី និងថវិកា សរុបជាង៤ពាន់ដុល្លារ ដល់គណបក្សប្រជាជនស្រុកប្រាសាទបាគង។

ការឧបត្ថម្ភ ធ្វើឡើងនៅថ្ងៃទី ០៤ ខែកក្កដាឆ្នាំ ២០២១ នេះ នៅមន្ទីរគណបក្សប្រជាជនកម្ពុជា ស្រុកប្រាសាទបាគង ក្រោមការទទួល ពីសំណាក់ លោកសូ ប្លាតុង ប្រធានគណបក្សប្រជាជនកម្ពុជាស្រុកប្រាសាទបាគង។

លោកជំទាវ ឧកញ៉ា បណ្ឌិត លី អ៊ុំអេង បានឲ្យដឹងថាអំណោយដែលលោកជំទាវ បានផ្ដល់ជូន គណបក្សប្រជាជនកម្ពុជា ស្រុកប្រាសាទបាគង នៅព្រឹកមិញនេះ រួមមាន៖
អង្ករចំនួន២០០ ការ៉ុងស្នើ៥តោន គិតជាទឹកប្រាក់៣១២០ដុល្លារ. ទឹកស៊ីអ៉ីវ ទឹកត្រីយួរ ចំនួន២០០កញ្ចប់ គិតជាទឹកប្រាក់៦០០ដុល្លារ និងថវិកាចំនួន៥០០ដុល្លារផងដែរ ដោយសរុបទាំងអស់ប្រមាណ៤ ២២០ដុល្លារ។

លោកជំទាវ ឧកញ៉ា បណ្ឌិត លី អ៊ុំអេង បានបញ្ជាក់ថា អំណោយដែលត្រូវផ្ដល់ជូន ខាងលើ សម្រាប់ចែកជូនដល់ ប្រជាពលរដ្ឋ រស់នៅ ភូមិអំពិលបង្កោង ឃុំត្រពាំងរុន ស្រុកប្រាសាទបាគងដើម្បីចែករំលែកដល់ប្រជាពលរដ្ឋ ដែលកំពុងជួបប្រទះការខ្វះខាត៕SRP

ខេត្តសៀមរាប៖មានការលើកឡើងថា បទល្មើសនេសាទ នៅក្នុងភូមិសាស្ត្រ ឃុំកណ្ដែក បានកើតមានជាបន្តបន្ទាប់ ហើយការបង្ក្រាប ហាក់បីមិនចេះអស់នោះឡើយ។

ជាក់ស្ដែងនៅថ្ងៃទី ៣ ខែកក្កដា ម្សិលមិញ នគរបាលស្រុកប្រាសាទបាគង សហការជាមួយប៉ុស្ដិ៍កំពង់ភ្លុក សហគមន៍ឃុំកណ្ដែក និងប្រជាការពារ បានបង្ក្រាបឧបករណ៍នេសាទខុសច្បាប់ នៅចំណុច ខាងលិចកោះវ័រព្រេង ស្ថិតក្នុងភូមិសាស្ត្រ ឃុំកណ្ដែក ស្រុកប្រាសាទបាគង ខេត្តសៀមរាប។

ករណីបង្ក្រាបនេះ ក្រុមសមត្ថកិច្ច បានដកហូត និងកម្ទេចចោល នៅនឹងកន្លែង នូវឧបករណ៍នេសាទខុសច្បាប់រួមមាន៖ -បរចំនួន៣ខ្សែសរុបប្រវែង២០០ម៉ែត្រ -អ៊ូទូចំនួន៧ខ្សែ សរុបប្រវែង៤០០ម៉ែត្រ -ចម្រឹងសរុបចំនួន៥០០ដើម។ ក្នុងនោះព្រលែងកូនត្រីចម្រុះប្រមាណ៥គីឡួក្រាមចូលបឹងធម្មជាតិវិញ ផងដែរ។

លោក លឹម សម្បត្តិ អធិការនគរបាលស្រុកប្រាសាទបាគង បានឲ្យដឹងថា ប្រតិបត្តិការនេះ គឺដើម្បីចូលរួមរក្សាការពារ ធនធានជលផល ដែលជា ស្បៀងបម្រុង សម្រាប់ប្រជានេសាទ ក្នុងសហគមន៍ និងដោយមានការណែនាំ ពីលោកសូរ ប្លាតុង ប្រធានគណៈបញ្ជាការឯកភាពរដ្ឋបាលស្រុកប្រាសាទបាគងផងដែរ។

លោក លឹម សម្បត្តិ បន្តថាការនេសាទនេះមានហានិភ័យ ដោយប្រើប្រាស់ ឧបករណ៍ខុសច្បាប់ ឬឧបករណ៍នេសាទប្រភេទក្រឡាល្អិត ចាប់យកសូម្បីតែកូនត្រីចម្រុះ តូចៗ ជាហេតុធ្វើអោយធនធានជលផល ដែលជាស្បៀងបម្រុងរួមនៃយើង កាន់តែបាត់បង់៕SRP

ខេត្តសៀមរាប៖សូមអបអរសាទរ ស្ត្រីម្នាក់ បានសម្រាលកូននៅលើគោយន្ត មានសុវត្ថិភាព ទាំងម្តាយទាំងកូន។ ហេតុការណ៍បានកើតឡើងនៅថ្ងៃទី ០៣ ខែកក្កដាឆ្នាំ ២០២១ នេះ។

លោកម៉ក់ សំអឿន ប្រធានការិយាល័យសុខាភិបាលស្រុកប្រតិបត្តិអង្គរជុំ បានប្រាប់បណ្ដាញសៀមរាបប៉ុស្តិ៍ថា ស្ត្រីដែលបានសម្រាលកូនលើគោយន្ត មានឈ្មោះ ផាត លំអាន អាយុ៣២ ឆ្នាំ និងប្ដីឈ្មោះ រ៉ូ រ៉េន អាយុ ២១ឆ្នាំ។ អ្នកទាំងពីរ រស់នៅភូមិ រាជជន្ទល់ ឃុំស្រែខ្វាវ ស្រុកអង្គរជុំ ខេត្តសៀមរាប។

លោកម៉ក់ សំអឿន បានបន្តថាភូមិដែលស្ត្រីខាងលើរស់នៅមានចម្ងាយប្រមាណ ១២ គីឡូពីមណ្ឌលសុខភាព។ លោកថា ស្រ្តីរូបនេះបានសម្រាលកូនលើគោយន្ត ប្រហែល២០នាទី មុនមកដល់មណ្ឌលសុខភាព។ ចំណែក ឆ្មបប្រចាំការ ឈ្មោះ ធន សុគន្ធា បានកាត់ទងផ្ចិតទារក និងទម្លាក់សុកនៅលើគោយន្តតែម្ដង។

លោកសំអឿន បានបញ្ជាក់បន្ថែមថា ឆ្មបមណ្ឌលសុខភាពស្រែខ្វាវ បានជួយសង្គ្រោះស្ត្រីសម្រាលកូននៅលើគោយន្តមានសុវត្ថិភាពទាំងម្តាយទាំងកូន។ លោកថា សារ៉ុងរបស់ម៉ែក៏កក់ក្ដៅដែរ!៕SRP

ខេត្តសៀមរាប៖លោក​ ភួង​ ឆាំងកា​ ប្រធាន​សមាគមចលនាយុវជនកម្ពុជា​ ​(ក្រុម​១៥៧​) សាខាស្រុកបន្ទាយស្រី​ បានដឹកនាំសមាជិកសមាជិកា នាំយកអំណោយ ទៅជូន​ លោក មាស រ៉េត នាយប៉ុស្តិ៍នគរបាលរដ្ឋបាល ឃុំខ្នារសណ្ដាយ​ ដែលកំពុងធ្វេីចត្តាឡីស័ក​ នៅប៉ុស្តិ៍នគរបាលរដ្ឋបាលឃុំខ្នារសណ្ដាយ​។

ការផ្ដល់អំណោយ នៅថ្ងៃសៅរ៍ ទី០៣​ ខែកក្កដា​ ​ ឆ្នាំ២០២១​ តាមការណែនាំលោក ហ៊ុន ប៉ូគា ប្រធានសមាគមចលនាយុវជនកម្ពុជា(ក្រុម១៥៧) សាខាខេត្តសៀមរាប ដោយមានការចូលរួមពី​ លោក​ ស្រី​ វង្ស​បញ្ញឬទ្ធិ​ ប្រធានសមាគមចលនា​យុវជនកម្ពុជា​ (ក្រុម១៥៧​) សាខាស្រុក​អង្គរធំ​ផងដែរ។

លោក​ ភួង​ ឆាំងកា​ បានឲ្យដឹងថា អំណោយដែលត្រូវប្រគល់ជូនរួមមាន​៖ ម៉ាស ៥០០ម៉ាស. ​អាកុលពេទ្យ​ ២០លីត្រ​ .ដបអាកុល​ ចំណុះ​ ០.៥លីត្រ​ ៥ដប​. ដបអាកុល​ ចំណុះ​ ១០០មីនីលីត្រ​ ១០ដប.ទឹកសុទ្ធ​ ៣០យួរ​ និងមីម៉ា​ ២កេស​ ផងដែរ។

ឆ្ឆ្លៀតក្នុងឱកាសនោះផងដែ លោក​ ភួង​ ឆាំងកា​ បានមានមតិសំណេះសំណាល ជាមួយលោកនាយប៉ុស្តិ៍​ ដោយបានសាកសួរសុខទុក្ខ ពពីបញ្ហាសុខភាពរបស់លោកនាយប៉ុស្ដិ៍ ជាពិសេសបាន ក្រើនរំលឹក សូមឲ្យគោរពនូវអនុសាសន៍សម្តេចតេជោ (៣កុំ និង ៣ការពារ) អោយបានល្អ ដេីម្បីចៀសផុតពីជំងឺដ៏កាចសាហាវនេះ៕SRP

ខេត្តសៀមរាប៖ផ្ទះមួយខ្នង នៅទល់មុខមណ្ឌលសុខភាពគោចក ត្រូវបានអគ្គិភ័យបំផ្លាញទាំងស្រុង រួមទាំងសម្ភារក្នុងផ្ទះផងដែរ។

ហេតុការណ៍បានកើតឡើង ម៉ោង១៩ នាថ្ងៃទី០២ ខែកក្កដា ឆ្នាំ២០២១ ភូមិត្រពាំងសេះ សង្កាត់គោកចក ក្រុង សៀមរាប ខេត្តសៀមរាប។

នគរបាលប៉ុស្តិ៍គោកចកបានឲ្យដឹងថា ករណីនេះម្ចាស់ផ្ទះឈ្មោះ យឹម រិទ្ធា ភេទ ស្រី អាយុ ៥៩ឆ្នាំ។ ផ្ទះដែលរងការឆាបឆេះប្រភេទឈើ លើថ្មក្រោម ទំហំ (០៥x០៧ x៦/៥០)។

នគរបាលបានបញ្ជាក់ថា អគ្គិភ័យនេះបានឆេះទាំងស្រុង សម្ភារបាត់បង់ ខោអាវ ម៉ូតូម៉ាកវ៉េវ០១គ្រឿង លុយ១២០$ អត្តសញ្ញាណប័ណ្ណ សៀវភៅស្នាក់នៅ សៀវភៅគ្រួសារ ប័ណ្ណការងារ កាត ATM (អេស៊ីលីដា ABA ប្រាសាក់។ មូលហេតុ៖ តាមការនិយាយរបស់ឈ្មោះ យឹម រិទ្ធា ប្រាប់ថាគាត់ដោតខ្សែភ្លើងចោល នៅជាន់ខាងលើ។

ក្នុងហេតុការណ៍នេះ សមត្ថកិច្ច បានប្រើប្រាស់មធ្យោបាយ ឡានទឹក ចំនួន៧ឡានទឹក ដើម្បីអន្តរាគមន៍ជួយពន្លត់ ហើយរលត់ទាំងស្រុងនៅវេលាម៉ោ១៩ និង៤០នាទី៕SRP

ខេត្តសៀមរាប៖ដំរីជាប្រភេទសត្វដែលជិតផុតពូជនៅលើពិភពលោក តែនៅបន្តមានវត្តមាននៅក្នុងប្រទេសកម្ពុជា។

យោងតាមទិន្នន័យពីម៉ាស៊ីនថតស្វ័យប្រវត្តិ ដែលបានដាក់នៅក្នុងតំបន់ការពារធម្មជាតិនានាបានរកឃើគថាដំរីអាស៊ីបានរស់នៅជាហ្វូងនៅក្នុងតំបន់ការពារធម្មជាតិរបស់កម្ពុជា ហើយ មានឃើញកូនតូចៗជាច្រើនថែមទៀត។

លោកនេត្រ ភក្ត្រា រដ្ឋលេខាធិការនៃក្រសួងបរិស្ថានបានថ្លែងថា វត្តមានកូនដំរីតូចៗដែលទើបនឹងកើតនៅក្នុងហ្វូងដំរីធំៗគឺជាក្តីសង្ឃឹមរបស់ក្រុមអ្នកអភិរក្សនិងក្រុម អ្នកបរិស្ថានដែលថានេះគឺជាប្រសិទ្ធភាពនៃការការពារនិងអភិរក្សព្រៃឈើទីជម្រកសត្វដំរី និងការថែរក្សាបាននូវប្រភេទពូជដំរីអាស៊ីដែលជិតផុតពូជនៅលើពិភពលោក។

យោងតាមការស្រាវជ្រាវរបស់អ្នកជំនាញ ដំរីនៅអាស៊ីត្រូវបានគេចាត់ថ្នាក់នៅក្នុងបញ្ជីឧបសម្ព័ន្ធ១នៃអនុសញ្ញាសាយតេស។ ដំរីជាប្រភេទសត្វចតុបាទដែលមានមាឌធំជាងគេបំផុត។ វាមានប្រមោយវែងស្បែក្រាស់ពណ៌ប្រផេះ និងមានរោមរឹងៗ ស្លឹកត្រចៀករាងដូចផ្លិតតែស្តើង។ ដំរីមានក្រចកម្រាមជើង ១៨ គឺនៅជើងមុខនីមួយៗមានក្រចកម្រាមជើង ៥ ឯក្រចកជើង ក្រោយមានម្រាមជើង ៤ តែក៏មានដំរីខ្លះមានក្រចកម្រាមជើងដល់ទៅ ២០ ដែរ។ ភ្លុកដំរីឈ្មោលមួយចំនួនមានប្រវែងរហូតដល់ទៅ១ម៉ែត្រ។ ដំរីនៅតំបន់អាស៊ីខុសពីដំរីនៅតំបន់អាហ្វ្រិក ដោយសារមាឌនិងស្លឹកត្រចៀកមានទំហំតូចជាង។ ដំរីអាស៊ីមានខ្នងស្ទើររាបស្មើ ឯដំរីអាហ្វ្រិកមានខ្នងកោងជាទួលខ្ពស់ឡើងលើ។

ដំរីច្រើនរស់នៅតាមព្រៃរបោះ វាលស្មៅ ព្រៃឫស្សី ព្រៃជាំទឹកតាមដងអូរ ព្រៃពាក់កណ្តាលស្រោង និងព្រៃស្រោង៊ វាស៊ីសំបកឈើ ស្លឹកឈើ មើមឈើ ឫសឈើខ្លីៗ ទំពាំងឫស្សី ផ្តៅ និងវល្លិ៍ជាដើម។ ដំរីផឹកទឹករហូតដល់ ២០០ លីត្រក្នុងមួយថ្ងៃ (នៅកន្លែងសម្បូណ៌ទឹក)។ ដំរីច្រើនផ្តល់កំណើតកូននៅ អំឡុងខែកក្កដា និងខែសីហា។ កូនម្តងបាន១ក្បាល ឬភ្លោះក៏មានដែន ប៉ុន្តែកម្រណាស់ បន្ទាប់ពីពពោះរយៈពេល ២១ ខែ (យូរបំផុត ២៥ខែ)។ ដំរីមេអាចបង្កើតកូនបាន ៤ ឬ៥ដង ហើយអាចមានកូនរហូតដល់អាយុ ៥០ -៧០ឆ្នាំ។ គេអាចសម្គាល់ដំរីឈ្មោលចុះប្រេងនៅពេលដែលគេឃើញមានសាធារុរាវម្យ៉ាងហូរចេញពីរន្ធមួយនៅចន្លោះត្រចៀក និងភ្នែកដែលជាទូទៅនៅចន្លោះខែវិច្ឆិកា និងខែធ្នូ។

លោក នេត្រ ភក្ត្រា បានថ្លែងឱ្យដឹងទៀតថា នៅក្នុងប្រទេសកម្ពុជាបច្ចុប្បន្ននេះ ដំរីអាស៊ីមានចំនួនប្រមាណចន្លោះពី ៤០០ ទៅ ៦០០ ក្បាល ដែលភាគច្រើនរស់នៅក្នុងតំបន់ជួរភ្នំក្រវាញ តំបន់ខ្ពង់រាបខាងជើងទន្លេសាប និងតំបន់ទេសភាពខ្ពង់រាបភាគខាងកើតដែលជាតំបន់ជីវៈចម្រុះដ៏សំបូរបែប ប្រព័ន្ធអេកូទ្បូស៊ី និងមានទីជម្រាលអំណោយផលដល់ការរស់នៅរបស់សត្វដំរី និងសត្វព្រៃផ្សេងៗទៀត។ ចំណែកដំរីស្រុកត្រូវបានប៉ាន់ស្មានថាមានចំនួនប្រមាណជាង ៧០ ក្បាល។

លោក នេត្រ ភក្ត្រា បានមានប្រសាសន៍ថា យោងតាមការសិក្សាស្រាវជ្រាវរបស់អ្នកជំនាញ ក្នុងរយៈពេល ៦០ ទៅ ៧០ ឆ្នាំចុងក្រោយនេះ ចំនួនដំរីអាស៊ីនៅលើពិភពលោកបានថយចុះប្រហែលជា ៥០ភាគរយ ចំណែកឯទីជម្រករបស់វាបានបាត់បង់អស់ជិត ៩០ភាគរយ។ ក្នុងចំណោមដំរីអាស៊ីសរុបប្រមាណពី ៣៩ ៤៦៣ ក្បាលទៅ ៤៧ ៤២៧ ក្បាលដែលកំពុងរស់នៅក្នុងព្រៃសត្វថ្ងៃ ក្នុងនោះប្រហែល ៧៥ភាគរយរស់នៅក្នុង ប្រទេសឥណ្ឌា និងស្រីលង្កា។
ដំរីអាស៊ីត្រូវបានចាត់ទុកថាជាប្រភេទសត្វបង្គោលដ៏សំខាន់ដោយសារសារៈ សំខាន់ផ្នែកវប្បធម៌ តួនាទីក្នុងប្រព័ន្ធអេកូឡូស៊ី និងសក្តានុពលដែលអាចការពារប្រភេទសត្វផ្សេងទៀតនៅ ក្នុងដែនជម្រករបស់វា។

លោក នេត្រ ភក្ត្រា បានគូសបញ្ជាក់ថា ដំរីអាស៊ីកំពុងតែទទួលរងការគំរាមកំហែងធ្ងន់ធ្ងរនៅទូទាំងដែនជម្រករបស់វានៅលើសកលលោក ហើយត្រូវបានចាត់បញ្ចូលជាប្រភេទជិតផុតពូជនៅក្នុងបញ្ជីក្រហមរបស់អង្គការសហភាពអន្ដរជាតិដើម្បីការអភិរក្សធម្មជាតិ (IUCN)។ ការរិចរិលទីជម្រកបានធ្វើឱ្យដំរីអាស៊ីរស់នៅបែកខ្ញែកពីគ្នានិងជះឥទ្ធិពលអវិជ្ជមានដល់ស្ថិរភាពយូរអង្វែងរបស់ប្រភេទដ៏សំខាន់នេះ។

ចំពោះមុខនៃការគំរាមកំហែងនេះ លោក នេត្រ ភក្ត្រា បានថ្លែងថា រាជរដ្ឋាភិបាលកម្ពុជាតាមរយៈក្រសួងបរិស្ថានបានខិតខំរៀបចំផែនការសកម្មភាពដើម្បីអភិរក្សសត្វដំរីអាស៊ី ដោយបានថ្លែងថា៖ «ក្រុមអភិរក្សដំរីព្រៃនៅកម្ពុជា(CECG) ត្រូវបានបង្កើតឡើងនៅឆ្នាំ២០០៥ ដោយមានការចូលរួមពីក្រសួងបរិស្ថាន រដ្ឋបាលព្រៃឈើ និងអង្គការសត្វព្រៃ និងរុក្ខជាតិអន្តរជាតិដើម្បីអភិរក្សដំរីអាស៊ីនៅកម្ពុជា តាមរយៈការរក្សាស្ថិរភាពនិងជំរុញឱ្យមានកំណើនចំនួនប្រភេទនេះនៅក្នុងព្រៃនៃប្រទេសកម្ពុជា ហើយផែនការសកម្មភាពដើម្បី អភិរក្សសត្វដំរីអាស៊ីឱ្យនៅគង់វង្សត្រូវបានរៀបចំឡើងសម្រាប់រយៈពេល ១០ ឆ្នាំ គឺពីឆ្នាំ២០២០ ដល់ឆ្នាំ២០២៩ដោយបានកំណត់នូវបញ្ហាអាទិភាពចំនួន ៦ ក្នុងនោះរួមមាន
១) ការកាត់បន្ថយការបាត់បង់ទីជម្រក
២)អភិរក្សនិងតភ្ជាប់ច្រករបៀង និងហ្វូងដំរីព្រៃឡើងវិញ
៣) ពង្រឹងការអនុវត្តច្បាប់
៤) បង្ការមិនឱ្យមានការចាប់ដំរីព្រៃមកចិញ្ចឹម
៥)បន្ធូរបន្ថយជម្លោះរវាងសត្វដំរីព្រៃនិងមនុស្ស
៦)អប់រំផ្សព្វផ្សាយ និងដាក់ចេញសកម្មភាពយុទ្ធសាស្ត្រសម្រាប់ដោះស្រាយបញ្ហាទាំងនោះ។

យោងតាមការប៉ាន់ស្មានផែនការសកម្មភាពរយៈពេល ១០ ឆ្នាំដើម្បីអភិរក្សសត្វដំរីព្រៃអាស៊ីនេះត្រូវការថវិកាចំនួន ៤០,៥លានដុល្លារសហរដ្ឋអាមេរិកដែលជាគម្រោងថវិការំពឹងថានឹងបានមកពីប្រភពរួមបញ្ចូលគ្នាទាំងកញ្ចប់ថវិការាជរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍នានា៕SRP

ខេត្តសៀមរាប៖លោកភឹង ចិន្តារ៉េត ស្នងការរងប៉ូលិសខេត្តសៀមរាប ទទួលផែននគរបាលព្រហ្មទណ្ឌ បានអះអាងថា៖ រាល់ការបើកហាងបញ្ចាំចងការប្រាក់ផ្សេងៗនៅក្នុងខេត្តសៀមរាប គឺរូបលោកនិងក្រុមគ្រួសារមិនបានរកស៊ីនិងមិនពាក់ព័ន្ធនោះឡើយ។

លោកអះអាងយ៉ាងដូច្នេះ នៅរសៀលថ្ងៃទី០១ ខែកក្កដាឆ្នាំ២០២១ នេះ បន្ទាប់ពីមានការផ្សព្វផ្សាយព័ត៌មាននៅក្នុងបណ្ដាញសង្គម facebook មួយចំនួនថារូបកាងកន្លែងរកស៊ីបញ្ចាំ។

លោកបញ្ជាក់ថាមុនបង្ហោះផ្សាយ សូមសាកសួរឱ្យបានច្បាស់សិន កុំចុះមិនមានការពិត នាំឲ្យខូចកិត្តិយសអ្នកដទៃ។

លោកបានបញ្ជាក់បន្ថែមថាករណីបុគ្គលដែលយកឈ្មោះរបស់លោក មកប្រើក៏នឹងត្រូវស៊ើបសួរបានច្បាស់ដើម្បីចាត់ការទៅតាមផ្លូវច្បាប់ផងដែរ។ ជាមួយគ្នានេះ លោកសំណូមពរដល់អ្នកសារព័ត៌មានទាំងអស់ មេត្តាមុននឹងផ្សព្វផ្សាយអ្វីមួយសូមសាកសួរព័ត៌មានឲ្យបានច្បាស់ ចៀសវាងប៉ះពាល់កិត្តិយសរបស់គេ៕SRP