ខេត្តសៀមរាប – Page 23

ខេត្តសៀមរាប៖សេចក្តីបំភ្លឺព័ត៌មាន ការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប មានកិត្តិយស សូមគោរពជម្រាបជូន អ្នកនិយមតាមដានព័ត៌មាន នៅលើបណ្តាញទំនាក់ទំនងសង្គម Facebook និងសាធារណជន មេត្តាជ្រាបថា៖ នាពេលថ្មីៗនេះមានព័ត៌មានតាមបណ្ដាញសង្គម និងសារព័ត៌មានមួយចំនួនបានធ្វើការចុះផ្សាយអំពីករណីគ្រោះថ្នាក់ចរាចរណ៍មួយដែលបង្កឡើងដោយមន្ត្រីនគរបាលចរាចរណ៍ផ្លូវគោកម្នាក់ បានបើករថយន្ដបុករបាំងថ្មពុះចែកទ្រូងផ្លូវគ្រោះថ្នាក់ដោយខ្លួនឯង មិនបង្ករអោយមានគ្រោះថ្នាក់ដល់អ្នកដៃឡេីយ។

យោងតាម របាយការណ៍វេនប្រចាំការពេលយប់ និង តាមហេតុការណ៍ជាក់ស្តែង នៅថ្ងៃទី០៣ ខែមករា ឆ្នាំ២០២៥ វេលាម៉ោង២១:៥០ នាទី ត្រង់ចំណុចស្តុបកោះកេរ្តិ៍ លើផ្លូវជាតិលេខ៦ ភូមិបន្ទាយចាស់ សង្កាត់ស្លក្រាម ក្រុងសៀមរាប ខេត្តសៀមរាប មានរថយន្តម៉ាក LEXUS 400h ពណ៌ទឹកមាស ពាក់ផ្លាកលេខ សៀមរាប 2C- 8744 បើកបរដោយឈ្មោះ វេង សៀកហ៊ុយ ភេទប្រុស អាយុ៣២ ឆ្នាំ មុខរបរនគរបាលជាតិ បានបើកបុករបាំងពុះចែកទ្រូងផ្លូវ បណ្តាលឲ្យដួលរលំ និងខូចរថយន្តខាងមុខផ្នែកខាងឆ្វេង មិនមានបង្ករគ្រោះថ្នាក់ដល់អ្នកដទៃទេ។នៅកន្លែងកើតហេតុកម្លាំងដែលប្រចាំការគោលដៅស្តុបកោះកេរ្តិ៍បានសួរទៅលោកវេង សៀកហុយថា ម៉េចបានបើកបុកខឿនអញ្ខឹង ?មានកើតអីដែរឬទេ? ហើយលោក វេង សៀកហ៊ុយ បានប្រាប់ថាខ្ញុំឈោងយកទឹកនៅគៀនទ្វារឲ្យទៅម្តាយដើម្បីញ៉ាំថ្នាំហើយបានរ៉េចង្កូតបុកតែម្តង ខ្ញុំមិនអីទេ តែម្តាយខ្ញុំគាត់ភ័យ ក្រោយមកគាត់បានហៅម៉ូតូរ៉ឺមកជិះជូនម្ដាយទៅផ្ទះបាត់ទៅ។ ក្រោយពេលកើតហេតុ កម្លាំងដែលប្រចាំការបាន ស្ទូចរថយន្តទៅរក្សាទុកនៅការិយាល័យនគរបាលចរាចរណ៍ និងបានលើករបាំងថ្មរៀបចំឡើងវិញ ។ តាមបទបញ្ជារបស់លោកឧត្តមសេនីយ៍ទោ ហួត សុធី ស្នងការនគរបាលខេត្ត បានដាក់បទបញ្ជាទៅលោកវរៈសេនីយ៍ឯក ឡុង ម៉េនសុយ៉ាលី ស្នងការរងទទួលផែនការងារនគរបាលសណ្តាប់ធ្នាប់(ស្តីទី) ដើម្បីធ្វើការស្រាវជ្រាវហៅលោកវរៈសេនីយ៍ត្រី វេង សៀកហ៊ុយ មកសាកសួរ និងណែនាំ ហើយបានធ្វើកិច្ចសន្យាទទួលស្គាល់អំពីការធ្វេសប្រហែសក្នុងពេលបើកបរ ។
ដូចនេះសូមអ្នកនិយមតាមដានព័ត៌មាននៅតាមបណ្តាញទំនាក់ទំនងសង្គម Facebook និងសាធារណជន មេត្តាជ្រាបចំពោះករណីខាងលើ៕

ខេត្តសៀមរាប៖គ្រឹះស្ថានអប់រំឯកជន បានលើកឡើងថា ការលើកកម្ពស់ការអប់រំឱ្យមានគុណភាព គឺជាមូលដ្ឋានគ្រឹះមួយ ដើម្បីជម្រុញឲ្យយុវជននាសម័យទំនើប ឬយុវជន Digital មានសមត្ថភាពគ្រប់គ្រាន់ សម្រាប់ចូលរួមជួយអភិវឌ្ឍប្រទេសជាតិ នាពេលអនាគត។

គ្រឹះស្ថានសិក្សាឯកជនលើកឡើងបែបនេះ នៅក្នុងពិធីប្រគល់ពាន បណ្ណសរសើរនិងរង្វាន់ដល់សិស្សជ័យលាភីនិទ្ទេសAជំនាន់ទី១៥ របស់សាលារៀនអារីហ្សូន ដែលធ្វើនៅសាកលវិទ្យាល័យអង្គរខេត្តសៀមរាប នារសៀលថ្ងៃទី៣១ខែធ្នូឆ្នាំ២០២៤នេះ។

ឧកញ៉ាវេជ្ជបណ្ឌិត ជា សុខឃាង ស្ថាបនិក និងជាប្រធាននាយកប្រតិបត្តិនៃស្ថាប័នអប់រំ អេជី មានប្រសាសន៍ថា គោលនយោបាយយុទ្ធសាស្ដ្របញ្ចកោណដំណាក់កាលទីមួយរបស់រាជរដ្ឋាភិបាលកម្ពុជានីតិកាលទី៧ នៃរដ្ឋសភាដែលមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី បានដាក់ចេញនូវគោលនយោបាយជាគន្លឹះ និងជាអាទិភាពចំនួន៤ ដើម្បីលើកម្ពស់គុណភាពអប់រំ ដែលចាប់ពីថ្នាក់មត្តេយ្យសិក្សា ដល់មធ្យមសិក្សា ពោលគឺ៖ ពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យាដែលមានក្រសួងអប់យុវជននិងកីឡា អនុលោមតាមគោលករកដឹកនាំតាមបែបយុទ្ធសាស្ត្រ នាសម័យទំនើបយុវជន Digital)។

ឧកញ៉ាបានបន្ដថា រាជរដ្ឋាភិបាលកម្ពុជាគ្រប់នីតិកាល តែងលើកកម្ពស់គុណភាពអប់រំជានិច្ច ព្រោះវិស័យអប់រំជាកត្តាមួយដ៏សំខាន់ ក្នុងការជម្រុញដល់យុវជនកម្ពុជា ឲ្យពួកគាត់មានសមត្ថភាពគ្រប់គ្រាន់ ក្នុងការជួយអភិវឌ្ឍជាតិ និងដឹកនាំប្រទេសជានាពេលអនាគត។ជាមួយគ្នានេះ វិស័យអប់រំឯកជនត្រូវបានលើកទឹកចិត្តឲ្យចូលរួមអភិវឌ្ឍធនធានមនុស្សចាប់ពីកម្រិតមតេយ្យសិក្សា ដល់កម្រិតឧត្តមសិក្សាផងដែរ។

ឧកញ្ញាបន្ថែមថា ដើម្បីចូលរួមអភិវឌ្ឍធនធានមនុស្ស ត្រូវឲ្យពួកគាត់ស្រឡាញ់ការសិក្សា យកចិត្តទុកដាក់ខ្ពស់ក្នុងការសិក្សា សំដៅអភិវឌ្ឍជីវិតខ្លួនឯង គ្រួសារ និងប្រទេសជាតិ ឱ្យសំបូររុងរឿង។ ឧកញ៉ាវេជ្ជបណ្ឌិតក៏បានវាយតម្លៃខ្ពស់ ចំពោះគណៈគ្រប់គ្រង ដែលបានខិតខំប្រឹងប្រែងបង្ហាត់បង្រៀន និងអប់រំដល់សិស្សានុសិស្សប្រកបដោយគុណភាព ពីមួយឆ្នាំសិក្សាមួយទៅឆ្នាំ។ ឧកញ៉ាវេជ្ជបណ្ឌិតក៏បានជម្រុញសល់សិស្សានុសិស្សត្រូវបន្តខិតខំរៀនសូត្រ បង្កើនសមត្ថភាពនិងបច្ចេកវិទ្យា ឈានឲ្យទាន់សភាពការសង្គមជាតិ និងសកលលោក ព្រមទាំងឱ្យក្លាយខ្លួនជាពលរដ្ឋល្អមានប្រយោជន៍សម្រាប់សង្គមជាតិទៅអនាគត។

តាមរបាយការណ៍របស់លោក ម៉ី ភារិទ្ធ នាយកប្រតិបត្តិប្រចាំតំបន់ បានឲ្យដឹងថា ឆ្នាំសិក្សាថ្មី២០២៤-២០២៥ សាលារៀន អារីហ្សូន សាខាខេត្តសៀមរាប មានសិស្សសរុបចំនួន១ពាន់៨៥៥នាក់ មានកម្មវិធីសិក្សា៣ភាសាខ្មែ ការសិក្សាសឹង្ហបុរី និងភាសាចិន។ សម្រាប់ឆ្នាំសិក្សា២០២៣-២០២៤នេះ មានសិស្សជ័យលាភីសញ្ញាបត្រមធ្យម សិក្សាបឋមភូមិ សិស្សឆ្នើមទទួលបានប្រាក់ខែប្រចាំខែធ្នូ ចំនួន០៩នាក់។

លោកថាសាលារៀន អារីហ្សូន សាខាខេត្តសៀមរាប បានយកចិត្តទុកដាក់ពង្រឹងនិងជម្រុញលើវិន័យ សណ្តាប់ធ្នាប់ ក្រមសីលធម៌ រស់នៅបានយ៉ាងល្អដោយផ្តោតទៅលើវិជ្ជាទំាង៣ គឺវិជ្ជាសម្បទា បំណិនសម្បទា និងចរិយាសម្បទា ដែលធ្វើឲ្យសិស្សានុសិស្សទទួលបាននូវលទ្ធផលដ៍ប្រសើរជាមួយកម្មវិធីសិក្សា STEM ដែលជាកម្មវិធីសិក្សាតាមបែប Digital នាសម័យបច្ចេកវិទ្យា៤ចុច ដោយបានអនុវត្តត្រឹមត្រូវតាមគោលការណ៌ណែនាំរបស់មន្ទីរអប់រំ យុវជន និងកីឡាខេត្តផងដែរ។

លោកបានបន្តទៀតថា ដើម្បីអភិវឌ្ឍប្រទេសឲ្យមានការរីកចម្រើន និងក្លាយទៅជាប្រទេសដ៏រុងរឿងមួយនាពេលខាងមុខ យុវជនត្រូវកសាងខ្លួនឲ្យក្លាយជាយុវជននសុជីវធម៌ល្អ ព្រមទាំងមានចំណេះដឹងខ្ពង់ខ្ពស់ ខណៈដែលប្រជាពលរដ្ឋខ្មែរ កំពុងរស់នៅ ក្រោមម្លប់សន្តិភាព៕SRP

Sponsored

ខេត្តសៀមរាប៖រថយន្តមួយគ្រឿងដែលដឹកមន្ត្រីធំបានជួបហេតុការណ៍គ្រោះថ្នាក់ចរាចរណ៍មួយកាលពីយប់មិញ។

យោងតាមរបាយការណ៍របស់សមត្ថកិច្ចបានបង្ហាញថា គ្រោះថ្នាក់ចរាចរណ៍ បានកើតឡើងនៅថ្ងៃអង្គារ ថ្ងៃទី១៧ ខែធ្នូ ឆ្នាំ២០២៤ វេលាម៉ោង ២២និង៣០នាទី លើផ្លូវជាតិលេខ៦ ចំណុចបង្គោលគីឡូម៉ែត្រលេខ 348 – 349 ស្ថិតក្នុងភូមិ ព្រៃជ្រូក ឃុំព្រៃជ្រូក ស្រុកពួក។

របាយការណ៍បានបន្តថា ករណីនេះ រថយន្តម៉ាកឡុចលុចស៊ិស ៥៧០ ពណ៌ខ្មៅ ផលិតឆ្នាំ២០២៤ ពាក់ផ្លាកលេខ ភ្នំពេញ 2BW-1236 បើកបរដោយឈ្មោះ កែវ ពេជ្រចិន្ដា ភេទប្រុសអាយុ57 ឆ្នាំរស់នៅភូមិថ្លែង ឃុំជម្រះព្រៀន ស្រុកសំរោង ខេត្តតាកែវ មុខរបរជាអ្នកបើកបររថយន្ត
មានដឹកអ្នករួមដំណើរ០២នាក់៖
១/ឈ្មោះ ពុំ តារាសិទ្ធី ភេទប្រុស អាយុ60 ឆ្នាំនៅភ្នំពេញ ព្រះបរមរាជវាំង មានតួនាទីអគ្គរាជទូតអមព្រះរាជលេខាធិការដ្ឋានព្រះមហាក្សត្រ
២/ឈ្មោះ richard.falquero ភេទប្រុសអាយុ50ឆ្នាំជាជនជាតិបារាំង មុខរបរ ឯកអគ្គរាជទូតអមព្រះរាជលេខាធិកាដ្ឋាន ព្រះមហាក្សត្រ បើកបរមានទិសដៅពីកើតទៅលិចបានបុក ត្រាក់ទ័រម៉ាកគូបូតា ពណ៌ក្រហម សណ្តោង រ៉ឺម៉កព៌ណក្រហម គ្មានផ្លាកលេខ មានដឹកដឹកម៉ាសុីនច្រូតស្រូវ។ អ្នកបើកបរមិនស្គាល់អត្តសញ្ញាណ ក្រោយពេលកើតហេតុបានរត់គេចខ្លួនបាត់ បើកបរមានទិសដៅពីកើតទៅលិច។

ក្នុងរបាយការណ៍បានបញ្ជាក់ថា ករណីនេះ ពុំបណ្តាលអោយរបួសមនុស្សទេ ប៉ុន្តែបណ្ដាលឱ្យខូចខាត រថយន្ត១គ្រឿងធ្ងន់ និងត្រាក់ទ័រ១គ្រឿងស្រាល។

បើតាមរបាយការណ៍ មូលហតុ ត្រាក់ទ័រដឹកម៉ាសុីនច្រូតគ្មានភ្លើងបំភ្លឺក្រោយ នឹងរថយន្ត បើកបរក្នុងល្បឿនលឿនខ្វះការប្រុងប្រយ័ត្ន។ ក្រោយពេលកើតហេតុកំលាំងផ្នែកជំនាញបានសហការណ៍ ជាមួយកំលាំងប៉ុស្តិ៍នគរបាលរដ្ឋបាលព្រៃជ្រូក ចុះវាស់វែងប្រមូលយកវត្ថុតាងមករក្សាទុក្ខនៅអង្គភាពដើម្បីបន្តនិតិវិធី៕SRP

ក្រុមហ៊ុនទឹកពិសា ហាយ ធិច បានបង្កើតយុទ្ធនាការសប្បុរសធម៌ ដើម្បីកុមារកម្ពុជា និងចូលរួមលើកកំពស់វិស័យសុខាភិបាល នៅកម្ពុជា ដោយធ្វើការសហការជាមួយផ្សារទំនើបម៉ាក្រូ។

កម្មវិធីនេះ និងប្រព្រឹត្តធ្វើឡើងរយៈពេល៣ខែ ចាប់ពីថ្ងៃទី២ ខែធ្នូ ឆ្នាំ២០២៤ រហូតដល់ថ្ងៃទី២៨ ខែកុម្ភៈ ឆ្នាំ២០២៥ ដោយលោកអ្នក គ្រាន់តែធ្វើការបញ្ជាទិញទឹកពិសា ហាយ ធិច ចំណុះណាក៏បាន ពីផ្សារទំនើបម៉ាក្រូ នៅគ្រប់សាខាណា ដែលនៅជិតលោកអ្នកបំផុត ដូចជា ផ្សារទំនើបម៉ាក្រូសៀមរាប ផ្សារទំនើប ម៉ាក្រូជ្រោយចង្វា និងផ្សារទំនើបម៉ាក្រូសែនសុខ។

នៅបំណាច់ខែកុម្ភៈ ឆ្នាំ២០២៥ រាល់ការជាវទឹក ពិសា ហាយ ធិច របស់លោកអ្នក ពីផ្សារទំនើបម៉ាក្រូ ក្រុមហ៊ុននឹងធ្វើការបរិច្ចាគទឹកប្រាក់ ចំនួន៥% ទៅកាន់មន្ទីរពេទ្យកុមារ គន្ធបុប្ផាសៀមរាប។ អ្វីដែលកាន់តែពិសេសសម្រាប់អតិថិជន របស់ផ្សារទំនើបម៉ាក្រូ ក្រុមហ៊ុនទឹកពិសា ហាយ ធិច ក៏មានកាដូ លើកទឹកចិត្ត ជូនផងដែរ ដល់ អតិថិជន ដែលមានតម្រូវការច្រើន ដោយគ្រាន់តែជាវទឹក បរិសុទ្ធ ហាយ ធិច ចំនួន ១០កេស នឹងទទួលបានតុក្កតា Labubu ជាវត្ថុអនុស្សាវរីយ៍ ដ៏ស្រស់ស្អាតមួយភ្លាមៗ។ ដូចនេះសូមបងប្អូនទាំងអស់គ្នាចូលរួម ដើម្បីគាំពារនិងគាំទ្រ យុទ្ធនាការដើម្បីកុមារកម្ពុជា។

នៅថ្ងៃទី ២៩ និង ៣០ ខែ វិច្ឆិកា ឆ្នាំ ២០២៤ ទឹកពិសា ហាយ ធិច បានឧបត្ថម្ភជូននូវទឹកបរិសុទ្ធ ចំនួន ៦៤០កេស ក្នុងនោះផ្តល់ជូនមន្ទីរពេទ្យកុមារគន្ធបុប្ផាសៀមរាប ចំនួន២០០កេស មន្ទីរពេទ្យកុមារអង្គរ ចំនួន២០០កេស និងបានផ្តល់ជូនចំនួន ២៤០ កេស បន្ថែមទៀតផងដែរ សម្រាប់ចែកជូនដល់ប្រជាពលរដ្ឋយើងដែលនាំបុត្រធីតា មកព្យាបាលជំងឺនៅមន្ទីរពេទ្យ។

ទឹកពិសា ហាយ ធិច ដើម្បីសុខភាពរបស់យើង ទឹកពិសា ហាយ ធិច ចូលរួមដើម្បីកុមារកម្ពុជា!

ទឹកពិសា ហាយ ធិច ជាទឹកពិសា ដែលមានគុណភាពខ្ពស់ ត្រូវបានផលិត ចេញតាមស្តង់ដា បច្ចេកវិទ្យាអន្តរជាតិ (ISO 9001:2015) (ISO22000:2018) ដោយច្រោះសម្អាត និងសម្លាប់មេរោគ ដោយប្រព័ន្ធ SMART MICRO FILTER ជាបច្ចេកវិទ្យាចុងក្រោយរបស់សហរដ្ឋអាមេរិក និងអាល្លឺម៉ង់។ ទឹកពិសាហាយ-ធិច ទទួលបានពានរង្វាន់ មេដាយមាសចំនួន ៣គ្រឿង រួមគ្នា ពីស្ថាប័នពិភពលោក Monde Selection ដែលជា World Selection of Water and Soft Drink 2024 នេះជាមោទកភាពដ៏អស្ចារ្យរបស់កូនខ្មែរយើង។

ទឹកពិសាហាយ-ធិច តែងតែយកចិត្តទុកដាក់ លើកត្តាគុណភាព និងសុវត្ថិភាព ផលិតផលជាចម្បង និងធ្វើ ការអភិវឌ្ឍដោយឥតឈប់ឈរតាំងពីឆ្នាំ២០០១ ដែលបានបង្កើតឡើងជាង 2ទសវត្សន៍មកហើយ៕SR

ខេត្តសៀមរាប៖លោកលី សំរិទ្ធ ប្រធានក្រុមប្រឹក្សាខេត្តបានស្នេីឱ្យមានការហោះហេីរត្រង់ពីក្រុងតាលៀនមកកាន់ខេត្តសៀមរាប។

លោកក៏ស្នេីដល់អនុប្រធានសភា នៃក្រុងតាលៀន ឱ្យជួយជំរុញនិងផ្សព្វផ្សាយ ដល់ប្រជាជនចិន អំពីតំបន់ទេសចរណ៍ វប្បធម៌ និងអរិយធម៌ របស់ខ្មែរដល់ប្រជាជនចិន ដេីម្បីមកទស្សនាកម្សាន្តនៅខេត្តសៀមរាប។

ក្នុងជំនួបសម្តែងការគួរសម និងពិភាក្សាការងាររវាងរដ្ឋបាលខេត្តដឹកនាំដោយលោក លី សំរិទ្ធ ប្រធានក្រុមប្រឹក្សាខេត្តជាមួយនឹងលោក XU SHAODA អនុប្រធានសភាប្រជាជនក្រុងតាលៀន នៃសាធារណរដ្ឋប្រជាមានិតចិន នៅថ្ងៃអាទិត្យនេះ

ប្រធានក្រុមប្រឹក្សាខេត្ត បានស្វាគមន៍យ៉ាងកក់ក្តៅចំពោះប្រតិភូនៃក្រុងតាលៀន នៃសាធារណរដ្ឋប្រជាមានិតចិន ដែលបានអញ្ជេីញមកទស្សនកិច្ចនៅខេត្តសៀមរាបនាពេលនេះ។

នៅសាលាខេត្តសៀមរាប ប្រធានក្រុមប្រឹក្សាខេត្តសៀមាប និងអនុប្រធានសភាប្រជាជនក្រុងតាលៀន នៃសាធារណរដ្ឋប្រជាមានិតចិន នឹងបន្តពង្រឹងចំណងមិត្តភាព និងពង្រឹងកិច្ចសហប្រតិបត្តិការទ្វេភាគី លើវិស័យអប់រំ ទេសចរណ៍ និងវប្បធម៌ជាពិសេសការមានបំណងចង់ឱ្យមាន chapter flight រវាងខេត្ត-ក្រុងទាំងពីរផងដែរ។

ប្រធានគណៈប្រតិភូក្រុងតាលៀន ក៏បានបង្ហាញពីគោលបំណងនៃដំណើរទស្សនកិច្ច នៅខេត្តសៀមរាប ដើម្បីពង្រឹងកិច្ចសហប្រតិបត្តិការ ទ្វេភាគី លើវិស័យអប់រំ ទេសចរណ៍ និងវប្បធម៌។ ជាមួយនឹងការហោះហេីរត្រង់រវាងក្រុង និងខេត្តសៀមរាប លោកក៏មានបំណងចង់ ឱ្យមាន chapter flight រវាងខេត្ត-ក្រុងទាំងពីរផងដែរ ចំពោះការងារនេះ លោកនឹងជំរុញបន្ថែមទៀតដេីម្បីឱ្យបានជោគជ័យ។

លោកលី សំរិទ្ធ បានថ្លែងនូវការអរគុណយ៉ាងជ្រាលជ្រៅចំពោះ លោកប្រធានគណៈប្រតិភូ ដែលបានយកចិត្តទុកដាក់ខ្ពស់ ចំពោះកិច្ចសហប្រតិបត្តិការរវាងខេត្ត-ក្រុងទាំងពីរ។ លោកសង្ឃឹមយ៉ាងមុតមាំថា ទំនាក់ទំនងកិច្ចសហប្រតិបត្តិការ និងការផ្លាស់ប្ដូរទៅវិញទៅមក នឹងធ្វើឱ្យមានការអភិវឌ្ឍរួមគ្នាកាន់តែប្រសើរឡេីងថែមទៀត៕SRP

Sponsored

ខេត្តសៀមរាប៖លោកលី សំរិទ្ធ ប្រធានក្រមប្រឹក្សាខេត្តបានណែនាំដល់អាជ្ញាធរក្រុង ស្រុកត្រូវពន្លឿនការផ្តល់សេវាសាធារណៈជូនប្រជាពលរដ្ឋឱ្យបានទាន់ពេលវេលាបន្ថែមទៀត។

ក្នុងកិច្ចប្រជុំសាមញ្ញរបស់ប្រឹក្សាខេត្តលេីកទី៦ នៅថ្ងៃទី១១ ខែវិច្ឆិកា ឆ្នាំ២០២៤ ប្រធានក្រុមប្រឹក្សាខេត្តក៏បានថ្លែងអំណរគុណ ដល់អាជ្ញាធរពាក់ព័ន្ធទាំងអស់ដែលបានខិតខំប្រឹងប្រែង ក្នុងការដោះស្រាយជូនប្រជាពលរដ្ឋ ប៉ុន្តែអាជ្ញាធរទាំងអស់ត្រូវបន្តជំរុញនិងពន្លឿនឱ្យលឿន ព្រោះបញ្ហាទាំងនេះជាតម្រូវចាំបាច់របស់បងប្អូនប្រជាពលរដ្ឋប្រេីប្រាស់ប្រចាំថ្ងៃ។ ម្យ៉ាងទៀត សូមលោក អភិបាលក្រុង ស្រុកត្រូវបន្តផ្សព្វផ្សាយដល់ប្រជាពលរដ្ឋឱ្យចុះបញ្ជីសេវាអត្រានុកូលដ្ឋានឱ្យបានគ្រប់គ្នា ជៀសវាងមានតម្រូវការបានទៅធ្វេី។

លោក ង៉ូវ សេងកាក់ អភិបាលរងខេត្តតំណាងលោកប្រាក់ សោភ័ណអភិបាលខេត្តសៀមរាប បានថ្លែងអំណរគុណដល់លោកប្រធាន ក្រុមប្រឹក្សាខេត្តដែលបានចង្អុលបញ្ហា បន្ថែមដល់អាជ្ញាធរក្រុង ស្រុក។ ជាមួយគ្នានេះ លោក ក៏បានណែនាំបន្ថែមដល់ក្រុង ស្រុកត្រូវរៀបចំ និងសម្អាតអនាម័យ បរិស្ថាន នៅតំបន់ទេសចរណ៍ ដែលមាននៅមូលដ្ឋាន ដេីម្បីផ្សព្វផ្សាយ ដល់ភ្ញៀវទេសចរជាតិ អន្តរជាតិបន្ថែមទៀត ព្រោះឆ្នាំ២០២៥ យេីងនឹងមានជេីងហោះហេីរមកត្រង់បន្ថែមទៀត។

លោក ប្រធានក្រុមប្រឹក្សាខេត្ត ក៏បានអរគុណចំពោះការផ្តល់ព័ត៌មានអំពីការងារទេសចរណ៍ របស់ខេត្តសៀមរាបយេីង។ លោកក៏បានជម្រាបដល់អង្គប្រជុំផងដែរថាចុងឆ្នាំនេះខេត្តយេីងមានកម្មវិធីច្រេីន មានទាំងកម្មវិធីជាតិ និងអន្តរជាតិផងដែរ ដូចនេះមន្ត្រីរបស់ខេត្តមានភាពមមាញឹកច្រេីន៕SRP

Sponsored

តាមរយៈក្រុមការងារបច្ចេកទេស រៀបចំពិធីបុណ្យអុំទូក បណ្តែតប្រទីប និងសំពះព្រះខែ អកអំបុក របស់រដ្ឋបាលខេត្តសៀមរាបបង្ហាញថា ទូក”ង” ប្រមាណជាង ៣០ទូក នឹងចូលរួមប្រកួត នៅថ្ងៃទី១៤ និង ១៥ ខែវិច្ឆិកាខាងមុខនេះ។

តាមការបញ្ជាក់ របស់ លោក អ៊ឹង គឹមលាង ប្រធានអនុគណៈកម្មការបច្ចេកទេស លើកឡើងថា នៅឆ្នាំ២០២៤នេះ រដ្ឋបាលក្រុងស្រុក គ្រឹះស្ថានសាធារណៈ អង្គការ សមាគម គ្រឹះស្ថានឯកជន ជាច្រើន នឹងនាំយកទូក”ង” មកចូលរួមប្រកួត បន្ថែមពីនេះថ្នាក់ដឹកនាំខេត្ត ក្រុង ស្រុក និងមន្ទីរ អង្គការជុំវិញខេត្ត ក៏នឹងចូលរួមអុំប្រកួត ដើម្បីញ៉ាំងឱ្យពិធីនេះ កាន់មានភាពសប្បាយរីករាយផងដែរ។

តាមការបញ្ជាក់របស់លោក អ៊ឹង គឹមលាង ពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងក្រុងសៀមរាប នឹងចាប់ផ្តើមរៀបចំកម្មវិធីកម្សាន្តសប្បាយចាប់ពីថ្ងៃទី១៣ ដល់ទី១៦ ខែវិច្ឆិកា ក្នុងនោះ រួមមាន ការប្រគុំមន្ត្រីសម័យ បុរាណ កម្មវិធីជិះទូកកម្សាន្តកម្មវិធីដាល់អំបុក កម្មវិធីលេងល្បែងកម្សាន្ត ពិព័រណ៍ម្ហូបអាហារ និងមានកម្មវិធីជាច្រើនទៀត ។

ទន្ទឹមនោះ លោក អ៊ឹង គឹមលាង ក៏បានណែនាំដល់អ្នកពាក់ព័ន្ធ ធ្វើការផ្សព្វផ្សាយនូវព្រឹត្តិការណ៍ដ៏សប្បាយរីករាយនេះ ឱ្យបានទូលំទូលាយទៅដល់ភ្ញៀវជាតិ និងអន្តរជាតិ ជាមួយនោះ ប្រតិបត្តិករទេសចរណ៍ ក្នុងខេត្តត្រូវពង្រឹងសេវាកម្ម និងរក្សាតម្លៃសមរម្យចៀសវាងការតម្លើងថ្លៃ ដែលធ្វើឱ្យប៉ះពាល់ដល់អារម្មណ៍របស់ភ្ញៀវទេសចរ ដែលមកកម្សាន្តក្នុងខេត្តសៀមរាប។SRP

ខេត្តសៀមរាប៖លោកសុខ ថុល អភិបាលរងខេត្តសៀមរាប បានសូមស្នើដល់ ប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ប្រធានការិយាល័យរៀបចំដែនដី នគរូបនីយកម្ម សំណង់និងភូមិបាលក្រុង-ស្រុក លោក អភិបាលនៃគណៈអភិបាលក្រុង-ស្រុក មេឃុំ-ចៅសង្កាត់ទាំងអស់ បន្តការយកចិត្តទុកដាក់ខ្ពស់ ពង្រឹងកិច្ចសហការជាមួយសាខាពន្ធដារខេត្ត ក្នុងការជំរុញការប្រមូលពន្ធលើវិស័យអចលនទ្រព្យ មានជាអាទិ៍៖

ពន្ធប្រថាប់ត្រា លើការផ្ទេរកម្មសិទ្ធិអចលនទ្រព្យ ពន្ធលើអចលនទ្រព្យ ពន្ធលើដីធ្លីមិនបានប្រើប្រាស់ និយាយដោយឡែក និងជំរុញការប្រមូលពន្ធដទៃទៀតទាក់ទងនឹងការប្រកបមុខរបរអាជីវកម្ម។

លោកសុខ ថុល ក៏មានជំនឿយ៉ាងមុតមាំថា សិក្ខាសាលានាថ្ងៃនេះ នឹងផ្តល់នូវការយល់ដឹងថ្មីៗ បន្ថែមទៀត ជាពិសេសនោះ គឺ “លិខិតបទដ្ឋានគតិយុត្តថ្មីៗ ពាក់ព័ន្ធនឹងវិស័យអចនទ្រព្យ រួមមាន៖

ប្រកាសស្តីពីពន្ធលើអចលនទ្រព្យ ពន្ធលើដីធ្លីមិនបានប្រើប្រាស់ និងពន្ធប្រថាប់ថ្លាផ្ទេរកម្មសិទ្ធិ ឬសិទ្ធិកាន់កាប់អចលនទ្រព្យ” ដើម្បីបន្តពង្រឹងកិច្ចសហការ នៃការប្រមូលពន្ធរបស់អគ្គនាយកដ្ឋានពន្ធដារឱ្យបានគ្រប់ចំនួន ឬលើសពីផែនការដែលបានកំណត់ និយាយជារួម និងនិយាយដោយឡែក នៅសាខាពន្ធដារខេត្តសៀមរាប ឱ្យអស់សក្តានុពល និង ចូលរួមផ្តល់សេវាសាធារណៈពាក់ព័ន្ធ ជូនដល់ប្រជាពលរដ្ឋ បានកាន់តែប្រសើរឡើងថែមទៀត។

លោកក៏សូមលោក-លោកស្រី ដែលជាសិក្ខាកាមទាំងអស់មេត្តាយកចិត្តទុកដាក់ ទទួលយក ចំណេះដឹងដើម្បីជួយផ្សព្វផ្សាយ បន្តដល់ប្រពលរដ្ឋ នៅមូលដ្ឋានរបស់ខ្លួន ឱ្យបានយល់ដឹងកាន់តែច្បាស់ ដើម្បីចូលរួមអនុវត្តកាតព្វកិច្ចបង់ពន្ធឱ្យបានត្រឹមត្រូវតាមច្បាប់ និងបទប្បញ្ញត្តិស្តីពីពន្ធដារជាធរមាន។

លោកសុខ ថុល មានប្រសាសន៍ជំរុញបែបនេះ ក្នុងពិធីបើកសិក្ខាសាលាផ្សព្វផ្សាយស្តីពី “លិខិតបទដ្ឋានគតិយុត្តថ្មីៗ ពាក់ព័ន្ធនឹងវិស័យអចនទ្រព្យ ក្នុងខេត្តសៀមរាប” នាថ្ងៃទី៣១ ខែតុលា ឆ្នាំ២០២៤ នៅសាខាពន្ធដារខេត្តសៀមរាប។

លោក សុខ ថុល តំណាងដ៏ខ្ពង់ខ្ពស់ឯកឧត្តម ប្រាក់ សោភ័ណ អភិបាលខេត្តសៀមរាប បានថ្លែងអំណរគុណយ៉ាងជ្រាលជ្រៅ ចំពោះ អគ្គនាយកដ្ឋានពន្ធដារ ដែលផ្តួចផ្តើម និង រៀបចំសិក្ខាសាលាផ្សព្វផ្សាយស្តីពី “លិខិតបទដ្ឋានគតិយុត្តថ្មី ពាក់ព័ន្ធនឹងវិស័យអចនទ្រព្យ រួមមាន៖ ប្រកាស ស្តីពីពន្ធលើអចលនទ្រព្យ ពន្ធលើដីធ្លីមិនបានប្រើប្រាស់ និងពន្ធប្រថាប់ត្រាផ្ទេរកម្មសិទ្ធិ ឬសិទ្ធិកាន់កាប់ អចលនទ្រព្យ” ដល់មន្ទីរ-អង្គភាពពាក់ព័ន្ធ រដ្ឋបាលក្រុង-ស្រុក និងរដ្ឋបាលឃុំ-សង្កាត់ នៃខេត្តសៀមរាប ក្នុងគោលដៅជំរុញដល់ការផ្សព្វផ្សាយ បន្តជូនដល់អ្នកជាប់ពន្ធ និងសាធារណជន ឱ្យបានយល់ច្បាស់ពីប្រភេទ ពន្ធទាំងអស់នេះ សម្រាប់ជាគុណប្រយោជន៍ដល់ថវិកាថ្នាក់ជាតិ។

លោកសូមសំដែងនូវការកោតសរសើរ ចំពោះថ្នាក់ដឹកនាំ ព្រមទាំងមន្ត្រីគ្រប់ជាន់ថ្នាក់ នៃអគ្គនាយក ដ្ឋានពន្ធដារទាំងអស់ ដែលកន្លងមក បានខិតខំប្រឹងប្រែងយកអស់កម្លាំង កាយចិត្ត ប្រាជ្ញា ស្មារតី និងការប្តេជ្ញាចិត្តខ្ពស់ក្នុង ការខិតខំបំពេញ ភារ កិច្ចបម្រើជាតិមាតុភូមិ រហូតសម្រេចបាននូវសមិទ្ធផលជោគ ជ័យ ដ៏ឧត្តុងឧត្តមគួរជាទីមោទនៈ។ ជាពិសេស តែងតែបំពេញការងារយ៉ាងលឿនឆាប់រហ័ស ប្រកបដោយឆន្ទៈមុះមុត និងមានភាពបុរេសកម្ម ក្នុងការអនុវត្តការងារប្រកបដោយប្រសិទ្ធភាព៕SRP

ខេត្តសៀមរាប៖សមត្ថកិច្ចជំនាញនគរបាលចរាចរណ៍ផ្លូវគោកបានឃាត់ខ្លួនអ្នកបើកបររថយន្ត lexus 1 គ្រឿង បន្ទាប់ពីរបង្កហេតុបើកបុកម៉ូតូចំនួន 3 គ្រឿងបណ្ដាលឲ្យស្លាប់និងរបួស។ ជនបង្កមានឈ្មោះ មឿន បញ្ញា ភេទប្រុស អាយុ២៣ឆ្នាំ នៅភូមិខ្នារសណ្តាយ ឃុំខ្នារសណ្តាយ ស្រុកបន្ទាយស្រី។

តាមសមត្ថកិច្ចខេត្តសៀមរាបបានប្រាប់ ទីភ្នាក់ងារ សារព័ត៌មាន សៀមរាប ប៉ុស្តិ៍ នៅរសៀលថ្ងៃសុក្រនេះថា គ្រោះថ្នាក់ចរាចរណ៍នេះ រវាងរថយន្ត និងម៉ូតូ៣គ្រឿង។

រថយន្តមួយគ្រឿងម៉ាក Lexus Rx300 ពណ៌ស ផ្លាកលេខ 2B-3400 សៀមរាប បើកបរដោយ ឈ្មោះ មឿន បញ្ញាបើកបរមានទិសដៅពីជើងទៅត្បូង បុកម៉ូតូ មួយគ្រឿងម៉ាក Honda Zoomer X ពណ៌ស ក្រហម ពាក់ផ្លាក់លេខសៀមរាប1AB-1484 អ្នកបើកបរឈ្មោះក្រា ស្រីណូ ភេទស្រី អាយុ២៥ឆ្នាំ រស់នៅភូមិប្រាសាទចា ឃុំដូនកែវ ស្រុកពួក បើកបរមានទិសដៅពីកើត ទៅលិច បន្ទាប់មករថយន្ត បានរ៉េចង្កូតទៅបុកម៉ូតូមួយគ្រឿងម៉ាក ហុងដាពណ៌ស្លែ ពាក់ផ្លាក់លេខសៀមរាប1AQ-2508 អ្នកបើកបរឈ្មោះ ហុង ហេង ភេទប្រុស អាយុ១៨ឆ្នាំ រស់នៅ ភូមិក្រសាំងរលើង សង្កាត់សៀមរាប ក្រុងសៀមរាប និងមានអ្នករួមដំណើរ ម្នាក់ឈ្មោះ មាន ផានិត ភេទប្រុស អាយុ១៦ឆ្នាំ រស់នៅ ភូមិក្រសាំងរលើង សង្កាត់សៀមរាប ក្រុងសៀមរាប បើកបរមានទិសដៅពីលិចទៅកើត និងបុកម៉ូតូម៉ាក ហុងដាពណ៌ខ្មៅ ពាក់ផ្លាក់លេខសៀមរាប 1Q-7366 ម្ចាស់ឈ្មោះច្រុច ស៊ីណុច ភេទប្រុស អាយុ១៨ឆ្នាំ រស់នៅ ភូមិតាគង់ សង្កាត់សំបួរ ក្រុងសៀមរាប។

សមត្ថកិច្ចបានបន្តថា នៅក្នុងហេតុការណ៍នេះ
បណ្តាលអោយ ស្លាប់មនុស្ស ម្នាក់ ឈ្មោះ ហុង ហេង អ្នកបើកបរម៉ូតូ ពាក់ផ្លាកលេខសៀមរាប 1AQ-2508 និងអ្នករួមដំណើរអ្នកទៀតុំឈ្មោះ មាន ផានិត (បាក់ភ្លៅខាងឆ្វេង បាក់កដៃខាងស្តាំ និងបែកចង្កា កំពុងសង្គ្រោះបន្ទាន់នៅមន្ទីរពេទ្យខេត្ត បានស្លាប់នៅមន្ទីរពេទ្យ។

ចំណែកអ្នករបួស មនុស្សមធ្យម ឈ្មោះច្រុច ស៊ីណុច កំពុងសម្រាកព្យាបាលនៅមន្ទីរពេទ្យខេត្ត អ្នកបើកបរម៉ូតូសៀមរាប 1Q-7366 (របួសចង្កា ផ្ពាល់ និងជង្គង់ខាងស្តាំ)។ របួសស្រាលឈ្មោះក្រា ស្រីណូ រលាតស្មងជើងខាងស្តាំ កំពុងសម្រាកព្យាបាលនៅមន្ទីរពេទ្យខេត្ត។

ករណីនេះ ខូចខាតម៉ូតូធ្ងន់០២ គ្រឿងស្រាល០១គ្រឿង និងរថយន្តស្រាល ០១គ្រឿង។ សាកសពត្រូវបានប្រគល់ទៅក្រុមគ្រួសារ ដើម្បីយកទៅធ្វើបុណ្យតាមប្រពៃណី។

បើតាមសមត្ថកិច្ច មូលហេតុ: រថយន្តបើកបរក្នុងល្បឿនលឿន និងមិនគោរពភ្លើងសញ្ញាចរាចរណ៍ (ភ្លើងក្រហម)។ វត្ថុតាងរក្សាទុកនៅការិយាល័យនគរបាលចរាចរណ៍ផ្លូវគោក។

កម្លាំងជំនាញកំពុងស្រាវជ្រាវ និង កសាងសំណុំរឿងតាមនីតិវិធីដើម្បីបញ្ជូនទៅអយ្យការអមសាលាដំបូងខេត្តសៀមរាប។

សូមជម្រាបថា ករណីគ្រោះថ្នាក់ចរាចរណ៍ នេះនៅថ្ងៃទី៣១ ខែតុលា ឆ្នាំ២០២៤ វេលាម៉ោង២៣និង៥០នាទី នៅត្រង់ចំណុចស្តុបព្រះរាជដំណាក់ ស្ថិតនៅ ភូមិមណ្ឌល១ សង្កាត់ស្វាយដង្គំ ក្រុងសៀមរាប ខេត្តសៀមរាប លើផ្លូវ រុក្ខវិថីព្រះសីហនុ៕SRP

Sponsored