សៀមរាប ប៉ុស្តិ៍

ខេត្តសៀមរាប៖ក្រុមមន្ត្រីខេត្តសៀមរាបនៅថ្ងៃថ្ងៃទី០៦និង០៧ខែមេសាឆ្នាំ២០២០បានចុះបង្ក្រាបការដ្ឋានជីកយកអាចម៍ដីមួយកន្លែងស្ថិតនៅភូមិសាស្ត្រភូមិចុងឃ្នៀសសង្កាត់ចុងឃ្នៀសក្រុងសៀមរាបខេត្តសៀមរាប។ករណីនេះសមត្ថកិច្ចចម្រុះបានធ្វើការឃាត់គ្រឿងចក្រចំនួន០៩គ្រឿងមានដូចជា៖អេស្កាវ៉ាទ័រចំនួន២គ្រឿង,ឡានដឹកដីចំនួន៧គ្រឿង។
ចំពោះវត្ថុតាងសមត្ថកិច្ច្ចបានប្រគល់ឲ្យទៅការិយាល័យជំនាញដើម្បីអនុវត្តបន្តទៅតាមនីតិវិធីច្បាប់។ទោះយ៉ាងណានៅថ្ងៃទី០៧ខែមេសាម្សិលមិញសមត្ថកិច្ចបានប្រគល់រថយន្តទាំង៧គ្រឿងឲ្យទៅម្ចាស់ដើមវិញបន្ទាប់ពីធ្វើការស្រាវជ្រាវជាក់ស្តែងទើបដឹងថារថយន្តទាំងនេះបានចូលទៅទិញអាចម៍ដីពីការដ្ឋានខាងលើដោយខុសច្បាប់ដោយអចេតនាពីព្រោះម្ចាស់ការដ្ឋានបានប្រាប់ពួកគាត់ថាការដ្ឋាននេះមានលិខិតអនុញ្ញាតត្រឹមត្រូវ។
ជាមួយគ្នានេះដែរមន្ត្រីបានធ្វើការអប់រំណែនាំពួកគាត់ត្រូវទិញអាចម៍ដីណាដែលមានលិខិតអនុញ្ញាតត្រឹមត្រូវ។ចំណែកចំពោះវត្ថុតាងអេស្កាវ៉ាទ័រចំនួន២គ្រឿងត្រូវបានឃាត់ទុកនិងបិទការដ្ឋានជាបណ្តោះអាសន្នដើម្បីឲ្យម្ចាស់ការដ្ឋានចូលខ្លួនធ្វើការផាកពិន័យអន្តរការណ៍ដោយអនុវត្តន៍ច្បាប់ស្តីពីការគ្រប់គ្រងការធ្វើអាជីវកម្មធនធានរ៉ែ។យ៉ាងនេះក្តីនៅមុនដំបូងករុមហ៊ុនខាងលើមិនឲ្យសមត្ថកិច្ចចូលត្រួតពិនិត្យនោះឡើយ។តែដោយកិច្ចសហការបានឆ្លងយោបល់ថ្នាក់ដឹកនាំខេត្តនិងលោកព្រះរាជអាជ្ញាទើបតំណាងក្រុមហ៊ុនខាងលើបើកទ្វារឲ្យសមត្ថកិច្ចចូលត្រួតពិនិត្យ។មហាជនលើកឡើងថាក្រុមហ៊ុខាងលើទំនងមកអភិវឌ្ឍរបៀប ធ្វើនំអត់ម្សៅអញ្ចឹង៕SRP

ខេត្តសៀមរាប៖សមត្ថកិច្ចនគរបាលជាតិបាន ចាប់ជនសង្ស័យម្នាក់ នៅក្រុងព្រះសីហនុ ខេត្តព្រះសីហនុ ឈ្មោះ អាត់ អេង ដែលបានបង្ហោះតាមបណ្ដាញសង្គមនូវសកម្មភាព និងរូបភាព គំរាមសម្លាប់ថ្នាក់ដឹកនាំ ញុះញង់ឲ្យមានការរើសអើង ជេរប្រមាថព្រះមហាក្សត្រ។

បើយោងតាមលោក ឧត្តមសេនីយ៍ត្រី ហួតសុធី ស្នងការរងទទួលផែនការងារសន្តិសុខនៃស្នងការដ្ឋាននគរបាលខេត្តសៀមរាប បានអោយថា ៖ នៅរសៀល ថ្ងៃទី០៦ខែមេសា ឆ្នាំ២០២០ ក្រោមការចង្អុលបង្ហាញពី ឯកឧត្តមនាយឧត្តមសេនីយ៍សន្តិបណ្ឌិតនេត សាវឿនអគ្គស្នងការនគរបាលជាតិ នាយកដ្ឋានជំនាញ បានសហការជាមួយផែនការងារសន្តិសុខ នៃស្នងការដ្ឋាននគរបាលខេត្តព្រះសីហនុ និង ផែនការងារសន្តិសុខ នៃស្នងការដ្ឋាននគរបាលខេត្តសៀមរាបដែលមានការិយាល័យប្រឆាំងភេរវកម្មនិងឧក្រិដ្ឋកម្មឆ្លងដែនជាអ្នកអនុវត្តនីតិវិធី ហើយមានការសម្របសម្រួលពីសំណាក់លោកព្រះរាជអាជ្ញាអមសាលាដំបូងខេត្តព្រះសីហនុ និងលោកព្រះរាជអាជ្ញាអមសាលាដំបូងខេត្តសៀមរាប លោកឧត្តមសេនីយ៍ទោ ស្នងការនគរបាលខេត្តទាំងពីរ បានធ្វើការស្រាវជ្រាវរកឃើញ អនុវត្តដីការបញ្ជាអោយចូលខ្លួនមុខសញ្ញាសង្ស័យ មានឈ្មោះ អាត់ អេង ហៅ អាត់ សំអេង ឬ សេន អាត ភេទប្រុស អាយុ៣៦ឆ្នាំ មុខរបរជាងភ្លើង និង ម៉ាស៊ីនត្រជាក់ មានទីលំនៅភូមិទួល ឃុំទឹកល្អក់ ស្រុកព្រៃលប់ ខេត្តព្រះសីហនុ ដែលបានធ្វើសកម្មភាព និងរូបភាព បង្ហោះតាមបណ្ដាញសង្គម គំរាមសម្លាប់ថ្នាក់ដឹកនាំ ញុះញង់ឲ្យមានការរើសអើង ជេរប្រមាថអង្គ ព្រះមហាក្សត្រ និងជេរប្រមាថស្ថាប័នផ្សេង និងប្រជាពលរដ្ឋជាច្រើននាក់ក្នុងប្រទេសកម្ពុជា។
ជនសង្ស័យរូបនេះបានបង្កើតបង្ហោះតាមបណ្ដាញសង្គម Facebook និង Tiktok ក្លែងដោយប្រើប្រាស់មធ្យោបាយទូរសព្ទដៃម៉ាកVivo (Y5)ពណ៌ខៀវ ដែលមានគណនី ឈ្មោះដូចខាងក្រោមនេះ ៖
១- ត្រាំងសិលា អង្គរធំភូមិប្រាសាទ
២- សិលា សៀមរាប រឺ សិលា ប្រាសាទ
៣-គណនី Tiktokឈ្មោះ សិលាសៀមរាប។
ក្រោយសាកសួរ សាមីខ្លួនបានឆ្លើយសារភាពថាខ្លួនពិតជាបានបង្ហោះដោយប្រើប្រាស់គណនីដូចខាងលើពិតប្រាកដមែន ដោយប្រើឈ្មោះ និង រូបថតអតីតសង្សារបស់ខ្លួនដើម្បីអោយសមត្ថកិច្ចចាប់អតីតសង្សារខ្លួន ដាក់គុកព្រោះដោយហេតុខឹងអតីតសង្សារមិនរស់នៅជាមួយខ្លួន។ សមត្ថកិច្ចបានកំពុងកសាងសំណុំរឿងបញ្ជូនទៅតុលាការដើម្បីបន្តនីតិវិធីច្បាប់៕SRP

ខេត្តសៀមរាប៖នៅទីបំផុត អ្នកពាក់ព័ន្ធជាង៥០នាក់ នៅក្នុង ស្រុកបន្ទាយស្រី បានឆ្លងផុតរយៈពេលតាមដាន មិនមាន រោគសញ្ញាអ្វីទាំងអស់។ នេះបើតាមការបញ្ជាក់ពីអភិបាលស្រុកបន្ទាយស្រី។

លោកឃឹម ហ្វីណង់ អភិបាលស្រុកបន្ទាយស្រី បានបញ្ជាក់យ៉ាងដូច្នេះថា
មានដំណឹងល្អមួយ ចង់ជម្រាបជូនពុកម៉ែបងប្អូននៅក្នុងស្រុកបន្ទាយស្រី ដើម្បីអោយបានធូរស្បើយក្នុងចិត្ត និងកាត់បន្ថយការព្រួយបារម្ភខ្លះៗពីកូវីដ១៩។
លោកឃឹម ហ្វីណង់ ថារហូតមកដល់ពេលនេះ អាជ្ញាធរស្រុកបានបញ្ចប់ការតាមដានទាំងស្រុងហើយ ទៅលើសុខភាពរបស់ក្រុមអ្នកពាក់ព័ន្ធជាង៥០នាក់នៅក្នុងស្រុកបន្ទាយស្រី ដែលបានប៉ះពាល់ជាមួយក្រុមជនជាតិបារាំង៣៦នាក់ដែលមានវិជ្ជមានកូវីដ១៩។ ពួកគាត់ទាំងអស់នេះ បានឆ្លងផុតរយៈពេលតាមដានចំនួន៣សប្តាហ៍ដោយមិនមានរោគសញ្ញាអ្វីទាំងអស់ លើកលែងតែប្រជាពលរដ្ឋ២នាក់ដែលមានរោគសញ្ញាសង្ស័យខ្លះៗ តែក៏ត្រូវបានធ្វើតេស្តឃើញអវិជ្ជមានផងដែរ។

រដ្ឋបាលស្រុកក៏បានដកចេញពីបញ្ជីតាមដានសុខភាពប្រចាំថ្ងៃនៅតាមភូមិ ចំពោះបងប្អូនពលករមួយចំនួន ដែលបានវិលត្រលប់ចូលមកភូមិវិញលើសពី១៤ថ្ងៃដោយគ្មានរោគសញ្ញាផងដែរ។

នេះបង្ហាញអោយឃើញថា ស្រុកបន្ទាយស្រីមិនទាន់មានអ្វីគួរអោយព្រួយបារម្ភពីបញ្ហាមេរោគកូវីដ១៩នៅឡើយទេ។ ក៏ប៉ុន្តែអាជ្ញាធរនឹងនៅតែបន្តធ្វើការងារគ្រប់គ្រង តាមដានជាប្រចាំថ្ងៃអោយបានម៉ត់ចត់បំផុតទៅលើមុខសញ្ញាថ្មី តាមរយៈក្រុមការងារដែលបានបង្កើតរួចនៅតាមភូមិទាំង៣៦ក្រុម ដើម្បីបង្កើនទំនុកចិត្តដល់ពុកម៉ែប្អូននៅក្នុងមូលដ្ឋានរបស់ខ្លួន។

នៅក្នុងចុងសប្តាហ៍នេះ រដ្ឋបាលបាលក៏នឹងដាក់អោយដំណើរការមណ្ឌលចត្តាឡីស័ករបស់ស្រុក(ប្រសិនបើមានអ្នកសង្ស័យ) និងបន្តបាញ់ថ្នាំសម្លាប់មេរោគនៅតាមផ្សារ ព្រមទាំងទីប្រជុំជនសំខាន់ៗនៅតាមឃុំផងដែរ៕SRP

ខេត្តព្រៃវែង៖សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រមការងារថ្នាក់ជាតិចុះជួយជួយខេត្តព្រៃវែង នៅរសៀលថ្ងៃទី៧ មេសានេះ បានអញ្ជើញជួបសំណេះសំណាលដោយផ្ទាល់ ជាមួយក្រុមគ្រូពេទ្យ និងប្រជាពលរដ្ឋ ដែលមានការសង្ស័យ ពិសេសប្រជាពលរដ្ឋដែលទើបវិលត្រឡប់មកពីក្រៅប្រទេស ហើយត្រូវបានដាក់ឱ្យនៅដោយឡែករយៈពេល១៤ថ្ងៃក្រោមការតាមដានសុខភាពពីក្រុមគ្រួពេទ្យ នៅតាមបណ្ដាស្រុកមួយចំនួនក្នុងខេត្តព្រៃវែង។

នៅក្នុងឱកាសជួបសំណេះសំណាលនោះ សម្ដេច ស ខេង បានមានប្រសាសន៍កោតសរសើរក្រុមគ្រូពេទ្យ ដែលបានខិតខំបំពេញភារកិច្ចប្រកបដោយការយកចិត្តទុកដាក់ខ្ពស់ ក្នុងការពិនិត្យតាមដានសុខភាបប្រជាពលរដ្ឋ ព្រមទាំងបានសម្ដែងការលើកទឹកចិត្តខ្ពស់ដល់អាជ្ញាធរមូលដ្ឋាន ដែលបានរួមសហការគ្នាចុះទាំងការអប់រំផ្សព្វផ្សាយ និងណែនាំបងប្អូនប្រជាពលរដ្ឋដែលមានការសង្ស័យ ឬទើបវិលមកពីក្រៅប្រទេស ឱ្យមកពិនិត្យសុខភាព និងចូលរួមអនុវត្តវិធានណែនាំដោយក្រសួងសុខាភិបាល។

សម្ដេចក្រឡាហោម ក៏បានបង្ហាញទឹកចិត្តរំភើបរីករាយបន្ទាប់ពីបានសង្កេតឃើញថាបងប្អូនប្រជាពលរដ្ឋ ពិសេសប្រជាពលរដ្ឋដែលទើបវិលមកពីក្រៅប្រទេស មានស្មារតីចូលរួមសហការជាមួយអាជ្ញាធរ និងក្រុមគ្រូពេទ្យ ដើម្បីពិនិត្យតាមដានសុខភាពខ្លួនឯងផង និងចូលរួមបញ្ចៀសការឆ្លងជំងឺកូវីដ១៩ជាយថាហេតុណាមួយដល់ក្រុមគ្រួសារ សាញ់ញាតិ និងបងប្អូនក្នុងភូមិ។ សម្ដេចបានចាត់ទុកការការចូលរួមសហការគ្នានេះថាផ្នែកមួយដ៏សំខាន់នៃការទប់ស្កាត់ការរាត្បាតជំងឺកូវីដ១៩នៅកម្ពុជាយើង និងនៅលើពិភពលោក។

សម្ដេច ស ខេង ក៏បានផ្ដល់ជូននូវម៉ាស់ ទឹកសម្លាប់មេរោគ និងសម្ភារៈមួយចំនួនទៀត ព្រមទាំងថវិកាដល់ក្រុមគ្រូពេទ្យ ដែលកំពុងបំពេញភារកិច្ចពិនិត្យតាមដានសុខភាពប្រជាពលរដ្ឋ និងជូនដល់បងប្អូនប្រជាពលរដ្ឋដែលកំពុងស្ថិតក្រោមការតាមដានសុខភាពនៅតាមអគារសាលារៀន ដែលរៀបចំយ៉ាងសមរម្យដោយអាជ្ញាធរមូលដ្ឋាន៕SRP

ខេត្តកំពង់ចាម៖ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការប្រយុទ្ធនឹង ជំងឺ កូវីដ១៩ ខេត្តកំពង់ចាម រួមនឹង លោក លោកស្រី អភិបាលរងខេត្ត នៅព្រឹកមិញបានអញ្ជើញចូលរួមទទួលថវិកា និង សម្ភារៈ បង្ការ ទប់ស្កាត់ ការ រីករាលដាល នៃ ជំងឺ កូវីដ ១៩ ពីព្រឹទ្ធសភាប្រចាំភូមិភាគ២ ខេត្តកំពង់ចាម-ត្បូងឃ្មុំ ។

ឆ្លៀត ក្នុង ឱកាស នោះ ដែរ លោក ជឹម លាវ សមាជិក ព្រឹទ្ធសភា ភូមិភាគ ២ បាន វាយតម្លៃ ខ្ពស់ ចំពោះ ការ ខិតខំ ប្រឹងប្រែង របស់ រដ្ឋបាល ខេត្តកំពង់ចាម ដែល បាន អនុវត្ត តាម បទ បញ្ជា របស់ សម្តេច តេជោ ហ៊ុន សែន ក៏ដូចជា សេចក្ដី ណែនាំ របស់ ក្រសួង សុខាភិបាល ក្នុង ការ បេីក យុទ្ធនាការ បង្ការ ទប់ស្កាត់ ការ រីករាលដាល នៃ វីរុស កូរ៉ូណា (កូវីដ ១៩) ដោយ បាន ធ្វើ សកម្មភាពចុះផ្សព្វផ្សាយសារអប់រំ នៅតាមដងផ្លូវ នានា និង នៅ តាម ខ្នងផ្ទះរបស់ បងប្អូន ប្រជាពលរដ្ឋ យ៉ាងសកម្ម ជាពិសេសចំពោះបងប្អូនពលរដ្ឋ ដែលទើបត្រឡប់មកពីក្រៅប្រទេស វិញ ដេីម្បី រួម គ្នា ទប់ស្កាត់ ការ រីករាលដាល នៃ ជំងឺ ដ៏ កាច សាហាវ នេះ ព្រមទាំង បាន រៀបចំអាគារ ដាក់ ឲ្យ នៅ ដាច់ ដោយ ឡែក ចំនួន ៤ កន្លែង ដែល មាន ជិត ២០០បន្ទប់ សម្រាប់ ត្រៀម ទទួល ព្យាបាលអ្នកកើតជំងឺ Covid-19 ផងដែរ ។

ជាមួយគ្នា នោះ លោក អ៊ុន ចាន់ដា អភិបាលខេត្តកំពង់ចាម បានថ្លែងអំណរគុណចំពោះសមាជិកព្រឹទ្ធសភា ភូមិភាគ ២ ដែលបានជួយ ឧបត្ថម្ភ ជាថវិកា ផ្ទាល់ ខ្លួន ចំនួន ៦លានរៀល ម៉ាស់ដេរដោយដៃ ចំនួន ៥០០០ម៉ាស់ និងអាល់កុល១២០លីត្រ ជូន ដល់ គណៈកម្មការ ប្រយុទ្ធ នឹង ជំងឺ កូវីដ ១៩ ខេត្តកំពង់ចាម សម្រាប់យកទៅប្រើប្រាស់ តាមតម្រូវការចាំបាច់ ក្នុង យុទ្ធនាការ នានា ជាពិសេស ក្នុង ការ ចុះផ្សព្វផ្សាយ ណែនាំ អំពី វិធានការ ចាំបាច់នានា ក្នុង ការ បង្ការ រទប់ស្កាត់ ការ រីករាលដាល នៃ វីរុស កូរ៉ូណា (កូវីដ ១៩) ជា ពិសេស ការចុះ ផ្សព្វផ្សាយ ដល់ បងប្អូនពលករ ដែលទើបតែត្រឡប់មកពីក្រៅប្រទេស វិញ ឲ្យ ពួក គាត់ ស្វែងយល់ អំពី ការ ដាក់ ឲ្យ នៅដាច់ដោយ ឡែក រយៈពេល ១៤ថ្ងៃ ដេីម្បី សុខសុវត្ថិភាពក្នុងគ្រួសារ សហគមន៍ និងសង្គមជាតិទាំងមូល ផងដែរ ៕SRP

ភ្នំពេញ៖​ ក្នុងសន្និសីទសារព័ត៌មាន ពាក់ព័ន្ធបច្ចុប្បន្នភាពនៃជំងឺកូវីឌ-១៩ ដែលប្រព្រឹត្តទៅ នៅវិមានសន្តិភាព នាព្រឹកមិញ សម្តេចតេជោ ហ៊ុន សែន នាយករដ្ឋមន្ត្រី បានថ្លែងថាការធ្វើសន្និសីទព័ត៌មាននេះ គឺជាការបញ្ជូនសារយ៉ាងសំខាន់មួយទៅកាន់ប្រជាពលរដ្ឋខ្មែរ ដែលចង់យល់ចង់ដឹងពីវិធានការ និងដំណោះស្រាយនានារបស់រាជរដ្ឋាភិបាល ជាពិសេសសាររបស់សម្តេចតេជោនាយករដ្ឋមន្រ្តីផ្ទាល់តែម្តង ចំពោះការរាតត្បាតជំងឺកូវីឌ-១៩ ក៏ដូចជាការឆ្លើយតបនឹងវិបត្តិដែលកើតមានឡើងពីជំងឺមួយនេះ។

សម្តេចតេជោ ហ៊ុន សែន បានមានប្រសាសន៍ថា ពេលនេះយើងកំពុងទប់ទល់ជាមួយនៃជំងឺកូវីឌ-១៩ ដែលជាសង្គ្រាមឥតស្រមោល ហើយសង្គ្រាមនេះគឺយើងមិនអាចយកឈ្នះបានទេ គឺបានត្រឹមតែទប់ទល់តែប៉ុណ្ណោះ ហើយសម្តេចតេជោចាត់ទុកថាការទប់ទល់ជាមួយសង្គ្រាមនេះ គឺត្រូវប្រើយុទ្ធសាស្ត្រទប់ទល់រយៈពេលវែង ពីព្រោះរហូតមកដល់ពេលនេះ អង្គការសុខភាពពិភពលោក នៅមិនទាន់មានថ្នាំបង្ការ និងទប់ស្កាត់នៅឡើយទេ ដូច្នេះយើងត្រូវដាក់ផែនការទប់ទល់រយៈពេលវែង។

ដើម្បីទប់ទល់នឹងស្ថានការនៃជំងឺនេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានដាក់ចេញនូវយុទ្ធសាស្ត្រទប់ទល់ជាច្រើនជាបន្តបន្ទាប់។ សម្តេចតេជោក៏បានកោតសរសើរគ្រប់តួអង្គពាក់ព័ន្ធទាំងអស់ដែលបានចូលរួមប្រយុទ្ធប្រឆាំងជំងឺនេះ។ សម្តេចតេជោក៏បានថ្លែងនូវការអរគុណដល់ក្រុមគ្រូពេទ្យនៅជួរមុខទាំងអស់ដែលបានខិតខំក្នុងការព្យាបាលអ្នកជំងឺអោយបានជាសះស្បើយជាបន្តបន្ទាប់។ ទន្ទឹមនឹងនោះ សម្តេចតេជោបានបញ្ជាក់ថាមិនបណ្តោយអោយគ្រូពេទ្យរបស់យើងបាត់បង់ជីវិតឡើយ។ សម្តេចតេជោក៏បានអរគុណកងកម្លាំងប្រដាប់អាវុធគ្រប់ប្រភេទ ដែលបានចូលរួមសហការ និងអរគុណប្រជាពលរដ្ឋទាំងអស់ដែលចូលរួមទប់ស្កាត់ និងអរគុណដល់បងប្អូនពលករជាង៦ម៉ឺននាក់ដែលមកពីប្រទេសថៃ ដែលបានការពារខ្លួន បានដាក់ខ្លួននៅដាច់ដោយឡែក១៤ថ្ងៃ ដែលរហូតមកដល់ពេលនេះ យើងមិនទាន់មានបងប្អូនពលករយើងណាម្នាក់ឆ្លងជំងឺកូវីឌ-១៩នៅឡើយទេ។

ក្នុងឱកាសនេះ សម្តេចតេជោនាយករដ្ឋមន្ត្រីបាន ថ្លែងអំណរព្រះគុណចំពោះ ព្រះមហាក្សត្រ និងសម្តេចម៉ែ ព្រមទាំងបណ្តាសប្បុរសជនទាំងឡាយដែលបានបរិច្ចាគថវិកាចូលរួមប្រយុទ្ធប្រឆាំងនឹងជំងឺកូវីឌ-១៩ ដែលពេលនេះយើងទទួលបានទឹកប្រាក់រហូតទៅដល់ជាង១១ម៉ឺនដុល្លារហើយ។ សម្តេចតេជោ ក៏បានអរគុណដល់បងប្អូនមន្ត្រីរាជការដែលបានបរិច្ចាគប្រាក់ខែមួយចំនួនចូលរួមក្នុងការទប់ទល់នឹងជំងឺកូវីឌ-១៩ ដែលពេលនេះមានអ្នកបរិច្ចាគកាត់ប្រាក់ខែនោះ ចំនួន១,៥៨៦នាក់ហើយ។ សម្តេចតេជោនាយករដ្ឋមន្ត្រីបានចាត់ទុកថាចលនានេះ មិនមែនជាការទាមទានោះទេ គឺជាការបង្ហាញនូវទឹកចិត្តនៃការចូលរួមរបស់បងប្អូនខ្មែរ ដែលចេះជួយគ្នាក្នុងគ្រាលំបាក។

សម្តេចតេជោ ហ៊ុន សែន ក៏បានអរគុណចំពោះប្រទេស និងដៃគូរអភិវឌ្ឍន៍ទាំងអស់ដែលក្នុងនោះដូចជាមាន ចិន, ជប៉ុន ,អាល្លឺម៉ង់ និងស្ថាប័នអន្តរជាតិមួយចំនួនទៀត ដែលបានចូលរួមជួយដល់កម្ពុជាក្នុងការទប់ស្កាត់ការរីករាលដាលនៃជំងឺនេះ។ នៅថ្ងៃនេះ សម្តេចតេជោសុំអំពាវនាវសូមអោយបងប្អូនពលរដ្ឋខ្មែរយើងដែលនៅក្រៅប្រទេសសូមបន្តរស់នៅប្រទេសនោះជាបន្តទៀត ដោយត្រូវអនុវត្តតាមបែបបទប្រទេសគេ សូមកុំធ្វើដំណើរមកកាន់ប្រទេសកម្ពុជាក្នុងអំឡុងពេលនេះ។ សម្តេចតេជោមិនអនុញ្ញាតិឲ្យបងប្អូនខ្មែរយើងដែលរស់នៅក្រៅប្រទេសចូលមកកម្ពុជាអំឡុងពេលនេះនោះទេ។ សម្តេចតេជោ ហ៊ុន សែន ក៏បានអំពាវនាវទៅដល់បងប្អូនកងទ័ពមួកខៀវកម្ពុជានៃអង្គការសហប្រជាជាតិ ដែលកំពុងឈរជើងការពារសន្តិភាព នៅតាមបណ្តាប្រទេសមួយចំនួនដូចជា ប្រទេសម៉ាលី ស៊ុតដង់ជាដើម ត្រូវមានតាមដានសុខភាព និងត្រូវមានរបាយការជាប្រចាំ។ សម្តេចតេជោបានសង្កត់ធ្ងន់ថា អ្វីដែលសំខាន់នៅពេលនេះគឺត្រូវរួមគ្នាប្រយុទ្ធទប់ទល់ការឆ្លងចូលជំងឺកូវីឌ-១៩ពីខាងក្រៅ។
ជាមួយគ្នានោះ យើងត្រូវទប់ស្កាត់ពីអ្នកដែលកើតហើយ មិនអោយឆ្លងទៅអ្នកដែលមិនទាន់កើត តាមរយៈវិធានការដែលយើងអនុវត្តកន្លងមក។ សម្តេចតេជោនាយករដ្ឋមន្ត្រីបានមានប្រសាសន៍ថា កម្ពុជាមិនមានការអោយបិទវត្តអារាម និងវិហារសាសនាផ្សេងៗឡើយ តែគ្រាន់តែហាមមិនអោយមានការជួបជុំប្រមូលផ្តុំគ្នាតែប៉ុណ្ណោះ ចៀសវាងកុំអោយមានការរីករាលដាលជំងឺនេះដល់សហគមន៍។

នៅថ្ងៃនេះផងដែរ សម្តេចតេជោ ហ៊ុន សែន បានសម្រេចអោយមានការផ្អាកពិធីបុណ្យចូលឆ្នាំប្រពៃណីជាតិខ្មែរ។ ទាំងវិស័យរដ្ឋ និងឯកជនត្រូវធ្វើការជាធម្មតាមិនមានការឈប់សម្រាកនោះទេ ហើយរដ្ឋនឹងសងថ្ងៃឈប់សម្រាកចំនួន៥ថ្ងៃមកវិញនៅពេលក្រោយ។ ជាមួយគ្នានោះ យើងត្រូវកាត់បន្ថយការធ្វើដំណើរ នៅតំបន់រមនីយដ្ឋាននានា, ទីប្រជុំជន តែទោះជាយ៉ាងណាក៏ដោយសម្តេចតេជោអនុញ្ញាតអាចធ្វើការគោរពសាសនានៃពិធីបុណ្យចូលឆ្នាំនៅតាមផ្ទះរៀងៗខ្លួន។

សម្តេចតេជោ ហ៊ុន សែន បានបន្តទៀតថា ចំពោះការត្រៀមបម្រុងសម្រាប់អ្នកជំងឺនេះ គឺយើងបានត្រៀមបន្ទប់ចំនួន ៣,០០០បន្ទប់ហើយ មានទាំងសណ្ឋាគារ និងសាលារៀនជាដើម ក្នុងនោះយើងក៏បានត្រៀមក្រុមគ្រូពេទ្យជំនាញ និងក្រុមគ្រូពេទ្យស្ម័គ្រចិត្តផងដែរ។ យើងបានត្រៀមអាវគ្រូពេទ្យចំនួន៥ពាន់សម្រាប់ និងម៉ាស៥ម៉ឺនម៉ាស រួមទាំងអាល់កុលផងដែរ។ បញ្ហាស្បៀងយើងបានត្រៀមអោយមានការផ្អាកការនាំចេញនូវស្បៀងអាហារសំខាន់ៗដូចជា អង្ករ អំបិល និង ត្រីជាដើម ។ សម្តេចតេជោបានជំរុញអោយប្រជាកសិករត្រូវបង្កើនការដាំដុះដំណាំផ្សេងៗអោយបានច្រើនបន្ថែមទៀតដើម្បីអាចជួយបំពេញតម្រូវការនៅក្នុងស្រុកដែលកំពុងខ្វះខាតនោះ។

ជាថ្មីម្តងទៀត សម្តេចតេជោ ហ៊ុន សែន នៅតែបន្តសុំអោយវិស័យឯកជន និងវិស័យឯកជន ត្រូវមានការយោគយល់គ្នាក្នុងអំឡុងពេលនៃវិបត្តិនៃជំងឺកូវីឌ-១៩ តាមរយៈការអនុគ្រោះ ឬការពន្យាប្រាក់ឈ្នួលជួលអគារ ,ឈ្នួលផ្ទះ ការបង់រំលស់ផ្ទះ និងអាជីវកម្មផ្សេងជាដើម ដើម្បីរួមចំណែកកាត់បន្ថយការលំបាករបស់ប្រជាពលរដ្ឋ ដែលកំពុងមានវិបត្តិនៃជម្ងឺកូវីឌ-១៩នេះ៕SRP

ខេត្តកំពង់ធំ៖ស្នងការដ្ឋាននគរបាលខេត្តកំពង់ធំ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ នៅព្រឹកមិញបានទទួលអំណោយមួយចំនួន ពីលោក រិន វីរះ ម្ចាស់អាជីវកម្មផលិតទឹកកកអនាម័យ រិន វីរះ នៅក្រុុង ស្ទឹងសែន ខេត្តកំពង់ធំ និងលោក រស់ ចិន្ដា ម្ចាស់អាជីវកម្មផលិតទឹកកកអនាម័យ រស់ ចន្តា
នៅស្រុកសន្ទុក ខេត្តកំពង់ធំ ។អំណោយដែលជាការឧបត្ថម្ភ របស់ម្ចាស់អាជីវកម្មទាំងពីររួមមានៈ អង្ករ ១០ បេ ក្នុង០១បេមានទម្ងន់ ៥០គីឡូក្រាម សរុប ៥០០គីឡូក្រាម .ម៉ាស់ចំនួន០៥ប្រអប់ ក្នុង០១ ប្រអប់មានចំនួន៥០សន្លឹក សរុប ២៥០សន្លឹក និងអាល់កុលចំនួន ០២កាន ក្នុង០១ កានមានចំនួន៣០ លីត្រ សរុប៦០លីត្រ។

លោកឧត្តមសេនីយ៍ទោ អ៊ុក កុសល បានថ្លែងអំណរគុណយ៉ាងជ្រាលជ្រៅចំពោះលោក រស់ ចន្តា និង លោក រិន វីរះ និងក្រុមគ្រួសារ ដែលបានឧបត្ថម្ភ សម្ភារៈមួយចំនួន ខាងលើ ដល់រូបលោកសម្រាប់ចាត់ចែងប្រើប្រាស់តាមសេចក្តី ត្រូវការក្នុងអង្គភាពជាប្រចាំថ្ងៃ។លោកឧត្តមសេនីយ៍ទោ អ៊ុក កុសល បានជូនពរដល់ម្ចាស់អាជីវកម្ម ទាំងពីរ និងក្រុមគ្រួសារ សូមសមប្រកបជួបប្រទះដោយពុទ្ធពរទាំង៤ ប្រការ គឺ​អាយុ​ វណ្ណៈ​ សុខៈ​ ពលៈ​ កុំបីឃ្លៀងឃ្លាតឡើយ៕SRP

ភ្នំពេញ៖ ក្នុងស្មារតីរួមចំណែកជាមួយរាជរដ្ឋាភិបាលកម្ពុជា នៅក្នុងការងារប្រយុទ្ធប្រឆាំងជំងឺរាតត្បាតកូវីដ១៩ នៅព្រះរាជាណាចក្រកម្ពុជា សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចចូលរួមចំណែកបរិច្ចាគនូវប្រាក់បៀវត្សប្រចាំខែ រយៈពេល០៣ខែ គិតចាប់ពីខែមេសា ដល់ខែមិថុនា ឆ្នាំ២០២០ ជូនគណៈកម្មការជាតិប្រយុទ្ធប្រឆាំងនឹងជំងឺកូវីដ១៩ ដើម្បីប្រើប្រាស់គាំទ្រដល់បេសកកម្មរបស់ខ្លួន ក្នុងភារកិច្ចដ៏មានសារៈសំខាន់នេះ តាមការគួរ៕SRP

ខេត្តកំពង់ចាម៖ លោក អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការប្រយុទ្ធនឹងជម្ងឺកូវីដ១៩ ខេត្តកំពង់ចាម រួមនឹង លោក លោកស្រី អភិបាលរងខេត្ត នៅរសៀលថ្ងៃទី៦ ខខែមេសា ម្ម្សិលមិញ បាន អញ្ជើញ ចូលរួម ទទួលថវិកាចំនួន១៦.០៥០.០០០រៀល ពីមន្ត្រីរាជការនៃសាលាខេត្តកំពង់ចាម ដែលបានចូលរួមបរិច្ចាគថវិកាផ្ទាល់ខ្លួនដល់គណៈកម្មការខេត្តប្រយុទ្ធប្រឆាំងនឹងជំងឺកូវីដ១៩ ដេីម្បី រួម គ្នា បង្ការ ទប់ស្កាត់ ការ រីករាលដាល នៃ វីរុស កូរ៉ូណា (កូវីដ១៩) នៅ ក្នុង ភូមិសាស្ត្រ ខេត្តកំពង់ចាម ក៏ដូចជា នៅ ក្នុង ប្រទេស កម្ពុជា ទាំង មូល ផង ដែរ ។

គួរ រំលឹក ផង ដែរថា ដោយ អនុវត្ត តាម បទបញ្ជា របស់ សម្តេច ជោ ហ៊ុន សែន និង ក្រសួង សុខាភិបាល ផង នោះ រដ្ឋបាលខេត្តកំពង់ចាម បាន សម្រេច រៀបចំកន្លែងព្យាបាលអ្នកជំងឺ កូវីដ១៩ ចំនួន៤កន្លែងក្នុងក្រុងកំពង់ចាម ក្នុង នោះ រួម មាន ១-មន្ទីរពេទ្យខេត្ត ចំនួន២អគារ មាន១៤បន្ទប់ ស្មើចំនួន៦២គ្រែ (អ្នកជំងឺកំពុងសម្រាកព្យាបាល)។ ២-សណ្ឋាគារមេគង្គ មានចំនួន៧១បន្ទប់ ស្មើចំនួន១៤២គ្រែ។ ៣-សាលាគរុកោសល្យភូមិភាគ មានអគារអន្តេវេសិកដ្ឋានមាន ៤០បន្ទប់ ស្មើចំនួន១២០គ្រែ ក្រុមការងារបានរៀបចំបំពាក់សំភារ:បន្ទប់ទឹក ប្រព័ន្ធអគ្គីសនី ទឹកស្អាត និងគ្រែអ្នកជំងឺ។ ៤-អាគាររៀនចំនួន២អគារ មាន ចំនួន៥៤បន្ទប់ ស្មើចំនួន៤៣២គ្រែ ក្រុមការងារបានរៀបចំសំអាត និងបំពាក់សំភារ:បន្ថែម។ សរុបចំនួន៤អគារ មានបន្ទប់ចំនួន១៧៩បន្ទប់ ស្មើចំនួន៧៥៦គ្រែ ដោយទីតាំងធំទូលាយមានខ្យល់ កាសចេញចូល គ្រប់គ្រាន់ និងបន្ទប់ប្រកបដោយផាសុកភាពផងដែរ ៕SRP

ភ្នំពេញ៖នៅបន្តិចទៀតនេះសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញធ្វើសន្និសីទសារព័ត៌មាន ពាក់ព័ន្ធបច្ចុប្បន្នភាពនៃជំងឺកូវីដ១៩ នៅវិមានសន្តិភាព៕SRP

ខេត្តសៀមរាប៖ ជនជាតិវៀតណាម០៥ នាក់ ត្រូវបាន កម្លាំងនគរបាល ស្រុកប្រាសាទបាគង ចាប់ខ្លួន ក្នុងប្រតិបត្តិការ បង្រ្កាបបទល្មើសនេសាទខុសច្បាប់។

សង្ស័យទាំង០៥នាក់
១/ឈ្មោះ វៀង យ៉ាំងគឿង ភេទប្រុស អាយុ៤០ឆ្នាំ ជនជាតិវៀតណាម រស់នៅភូមិមាត់ខ្លា ឃុំកំពង់ឃ្លាំង ស្រុកសូទ្រនិគម ខេត្តសៀមរាប
២/ឈ្មោះ ត្រឹង យ៉ាំងវិន ភេទប្រុស អាយុ២៩ឆ្នាំ ជនជាតិវៀតណាម រស់នៅភូមិមាត់ខ្លា ឃុំកំពង់ឃ្លាំង ស្រុកសូទ្រនិគម ខេត្តសៀមរាប
៣/ឈ្មោះ វៀង យ៉ាំងសំ ភេទប្រុស អាយុ២២ឆ្នាំ ជនជាតុវៀតណាម រស់នៅភូមិមាត់ខ្លា ឃុំកំពង់ឃ្លាំង ស្រុកសូទ្រនិគម ខេត្តសៀមរាប
៤/ឈ្មោះ វៀង យ៉ាំងយុង ភេទប្រុស អាយុ១៦ឆ្នាំ ជនជាតិវៀតណាម រស់នៅភូមិមាត់ខ្លា ឃុំកំពង់ឃ្លាំង ស្រុកសូទ្រនិគម ខេត្តសៀមរាប
៥/ឈ្មោះ ដូរ យុងយ៉ាង ភេទប្រុស អាយុ១៥ឆ្នាំ ជនជាតិវៀតណាម រស់នៅភូមិមាត់ខ្លា ឃុំ កំពង់ឃ្លាំង ស្រុកសូទ្រនិគម ខេត្តសៀមរាប។
សមត្ថកិច្ចបានឲ្យដឹងថា ហេតុការណ៍នេះ ដកហូតបានវត្ថុតាងរួមមាន៖
-ទូកស្មាច់ចំនួន០៤គ្រឿង
(ទូកធំចំនួន០២គ្រឿង និងទូកតូចចំនួន០២គ្រឿង)
-សាច់មងប្រភេទម៉ាញ់(យ៉ាំងកាវ) ដែលមានមុខ៣៧ម៉ែត្រ ប្រវែង២០ម៉ែត្រ ។
-អាំងមុតទ័រសម្រាប់ឆក់ត្រី មួយបន្ទះ។
បើតាមសមត្ថកិច្ចជនសង្ស័យ និង ឧបករណ៍ នេសាទខុស ច្បាប់ ខាងលើ ត្រូវបាន ប្រគល់ អោយ ទៅជំនាញ សង្កាត់រដ្ឋបាលជលផល ប្រាសាទបាគង ដើម្បីបន្តនិតិវិធីច្បាប់។
សូមជម្រាបថាករណីនេះ ធ្វើឡើងនៅរសៀលថ្ងៃទី០៤ខែមេសាឆ្នាំ២០២០ ដោយ លោកវរសេនីយ៍ទោ លឹមសម្បត្តិ
អធិការនគរបាលស្រុកប្រាសាទបាគង នៅចំណុចព្រុំប្រទល់ កំពង់ភ្លុក និងកំពង់ឃ្លាំង សស្រុកប្រាសាទបាគង៕SRP

ខេត្តកំពង់ធំ៖ ភ្នាក់ងារបណ្ដាញ សារពត័មានសៀមរាបប៉ុស្តិ៍ បានរាយការណ៍ថា រថយន្តសាំយ៉ុងមួយគ្រឿង ពាក់ស្លាកលេខ ភ្នំពេញ ២AA៦៣៤១ ដឹកឈើ ជួបគ្រោះថ្នាក់ចរាចរណ៍ដោយបុកបង្គោលឡាក់លើផ្លូវជាតិ៦ត្រង់ចំណុចគីឡូម៉ែត១៣៩ភូមិសំពង់ ឃុំប្រាសាទ ស្រុកសន្ទុក ខេត្តកំពង់ធំ នៅវេលាម៉ោង៥និង៣០នាទីថ្ងៃទី០៦ខែមីនាឆ្នាំ២០២០នេះ។

បើតាមសេចក្ដីរាយការណ៍ថា ក្នុងរថយន្តនេះ មានឈើមានចំនួន១៦៥ដុំប្រភេទសុក្រម៊ំនិងពពេល ប្រវែង២ម៉ែត្រ។
ក្រោយកើតហេតុរថយន្តនិងឈើត្រូវប៉ូលិសចរាចរណ៍ស្រុកសន្ទុក ប្រគល់ឲ្យសង្កាត់រដ្ឋបាលព្រៃឈើ តាំងក្រសាំងយកទៅរក្សាទុកនៅផ្នែករដ្ឋបាលព្រៃឈើកំពង់ថ្មរងចាំដោះស្រាយតាមផ្លូវច្បាប់នៅពេលក្រោយ៕SRP