សៀមរាប ប៉ុស្តិ៍

ខេត្តសៀមរាប៖នៅក្នុងវេទិកាសាធារណៈ របស់ក្រុមការងារថ្នាក់ជាតិ ស្តីពីការត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្តចតុកោណ ដំណាក់កាលទី៤ របស់រាជរដ្ឋាភិបាល នាព្រឹកមិញនេះ ពលរដ្ឋរស់នៅស្រុកវ៉ារិន
បានគាំទ្រយ៉ាងខ្លាំង នឹងបានលើកឡើងថានៅមូលដ្ឋាន របស់ពួកគាត់មានការខ្វះខាតនៅឡើយ មានដូចជា៖ ផ្លូវ ប្រព័ន្ធលូទឹក អគ្គីសនី និង សេវាសុខាភិបាលជាដើម។

វេទិកាសាធារណៈនេះធ្វើនៅ នៅវត្តស្វាយស ស្ថិតក្នុងឃុំស្វាយស ស្រុកវ៉ារិន ខេត្តសៀមរាប ក្រោមវត្តមានលោករបស់ នូ សុវត្តិ រដ្ឋលេខាធិកាក្រសួងសាធារណការ និងដឹកជញ្ជូន និង លោក មាស សាវ៉ន ប្រធានក្រុមការងារថ្នាក់កណ្ដាលចុះជួយ ស្រុកវ៉ារិន ដោយមានការចូលរួម ពីមន្ត្រីពាក់ព័ន្ធអាជ្ញាធរមូលដ្ឋាននិង ប្រជាពលរដ្ឋ២០១នាក់ផងដែរ។

ក្នុងវេទិកានេះ លោកនូ សុវត្តិ បានផ្តល់អោយមន្ត្រីជំនាញពាក់ព័ន្ធ បកស្រាយបំភ្លឺ ជូនប្រជាពលរដ្ឋមនិង ទទួលយកនូវរាល់អ្វីដែលជាកង្វល់របស់ប្រជាពលរដ្ឋ។ ក្នុងឱកាសនោះដែរ លោកក៏បានសុំការយោគយល់ពីប្រជាពលរដ្ឋ ចំពោះភូមិដ្ឋានមួយចំនួន មិនទាន់បានបំពេញគ្រប់តម្រូវការនៅឡើយ។

ជាមួយគ្នានេះលោកនូ សុវត្តិ បានរំលឹកដល់ពលរដ្ឋទាំងអស់ សូមចូលរួម ថែទាំសុខភាព ប្រុងប្រយ័ត្ន ទប់ស្កាត់ការចម្លងមេរោគកូវីដ១៩ និងជំងឺគ្រុនឈិក និងផ្តាំផ្ញើរអោយ ផ្សព្វផ្សាយអោយបានទូលំទូលាយដល់បងប្អូនប្រជាពលរដ្ឋ ទៅពិនិត្យផ្ទៀងផ្ទាត់ឈ្មោះ និង ចុះឈ្មោះបោះឆ្នោតអោយបានគ្រប់ៗគ្នា នៅសាលាឃុំ សង្កាត់ អោយបានមុនថ្ងៃផុតកំណត់ការចុះបញ្ជីចុះឈ្មោះបោះឆ្នោត៕SRP

ខេត្តកំពង់ចាម៖រដ្ឋបាលខេត្តកំពង់ចាម នៅថ្ងៃនេះ បានរៀបចំប្រារព្ធពិធីគោរពព្រះវិញ្ញាណ ក្ខ ន្ធ ថ្វាយ ព្រះករុណា ព្រះ បរម រតន កោដ្ឋ ព្រះមហាវីរក្សត្រ ព្រះបាទ សម្ដេច ព្រះ នរោត្តម សីហនុ គម្រប់ ខួប៨ឆ្នាំ ដោយមានការអញ្ជើញចូលរួមពីលោក ខ្លូត ផន ប្រធានក្រុមប្រឹក្សាខេត្ត និង លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម ព្រមទាំង សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរអង្គភាព មន្ត្រីរាជការ និង កងកម្លាំងប្រដាប់អាវុធ ដែល បានប្រារព្ធ ឡើង នៅ មុខសាលាខេត្ត នាព្រឹក ថ្ងៃព្រហស្បតិ៍ត ១៣រោច ខែអស្សុជ ឆ្នាំ ជូត ទោស័ក ព.ស២៥៦៤ ត្រូវនឹងថ្ងៃទី ១៥ ខែតុលា ឆ្នាំ២០២០ ។

លោក អ៊ុន ចាន់ដា និងថ្នាក់ដឹកនាំខេត្ត មន្ត្រីរាជការ កងកម្លាំងប្រដាប់អាវុធ តំណាង បងប្អូន ប្រជាពលរដ្ឋ ក្នុងខេត្តកំពង់ចាម បានធ្វើការបូជាទៀន ធូប ថ្វាយនៅ ចំពោះមុខព្រះឆាយាល័ក្ខ របស់ព្រះបរមរតនកោដ្ឋ និងការគោរពព្រះវិញ្ញាណក្ខន្ត របស់ព្រះ បរមរតនកោដ្ឋ ដោយបានធ្វើការស្មឹងស្មាត ដើមី្បឧទ្ទិសព្រះវិញ្ញាណក្ខន្ធរបស់ព្រះអង្គទ្រង់ បានយាងទៅកាន់ព្រះបរមសុគតិភព ឲ្យ បានគ្រប់ៗជាតិ កុំបីឃ្លៀងឃ្លាតឡើយ។

ជាមួយគ្នានេះ កូនចៅ ចៅទួត ចៅលួតរបស់ព្រះអង្គ ចងចាំ ជានិច្ចនូវព្រះមហា ករុណា ទិគុណ និងព្រហ្មវិហារធម៌ដ៏ថ្លៃថ្លា ឧត្តុង្គឧត្តម វិសេសវិសាល របស់ព្រះអង្គ ដែលបានលះ បង់ព្រះកាយពល ព្រះបញ្ញាញាណ ក្នុងព្រះរាជសកម្មភាព ដើម្បីបុព្វហេតុឯករាជ្យជាតិ បូរណភាពទឹកដី ផ្សះផ្សាជាតិ និងបង្រួបបង្រួមជាតិ ។

ការរៀបចំពិធីនេះជាកិច្ចតបស្នងចំពោះមហាករុណាទិគុណដ៏ឧត្តុង្គឧត្តម ចំពោះព្រះ បរមរតនកោដ្ឋ ដែលបានបូជាព្រះកាយគ្រប់បែបយ៉ាង ជូនជាតិមាតុភូមិ និង ប្រជាជាតិជាទី ស្រឡាញ់របស់ព្រះអង្គ។

លើសពីនេះទៀត ក្នុងនាមកូនចៅជាប្រជានុរាស្រ្ត ទាំងព្រះសង្ឃ ថ្នាក់ដឹកនាំ មន្ត្រីរាការ កងកម្លាំងប្រដាប់អាវុធ សិស្សានុសិស្ស និសិ្សត ប្រជាពលរដ្ឋ និង បងប្អូនជនជាតិខ្មែរ ទូទាំងខេត្តកំពង់ចាម មិនអាចបំភ្លេចបាននូវព្រះរាជសកម្មភាពដ៏ឧត្តុង្គឧត្តម របស់សម្តេច ព្រះវររាជបិតាជាតិខ្មែរ ព្រះបរមរតនកោដ្ឋ ដែលមួយជីវិតរបស់ ព្រះអង្គទ្រង់បានបំពេញ ព្រះរាជបូជនីយកិច្ច ដើមី្បឯករាជ្យ បូរណភាពទឹកដី និងឯកភាពជាតិខ្មែរ ប្រកបដោយ ព្រះបញ្ញាញាណភ្លឺថ្លា គ្រប់កាលៈទេសៈ៕SRP

ភ្នំពេញ៖នាយករដ្ឋមន្ត្រីហ៊ុន សែន នៅព្រឹកថ្ងៃទី១៥ ខែតុលាឆ្នាំ ២០២០ នេះបានបញ្ជាក់ថាថ្ងៃទី១៥ ខែតុលា ឆ្នាំ២០២០
នេះ គឺជាខួប ទី៨ឆ្នាំ (១៥តុលា ២០១២-១៥តុលា ២០២០)នៃការយាងចូលព្រះទិវង្គត នៃព្រះករុណា ព្រះបាទ សម្តេច នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត។
នាយករដ្ឋមន្ត្រីបន្តថា ប្រជារាស្រ្តទូទាំងប្រទេស ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះ ព្រះបរមរតនកោដ្ឋ ដែលព្រះអង្គបានលះបង់និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា។សូមថ្វាយព្រះរាជកុសលថ្វាយព្រះវិញ្ញាណក្ខន្ឋព្រះបរមសព ព្រះករុណា ព្រះបាទ សម្តេចព្រះ នរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លៀងឃ្លាតឡើយ៕SRP

ខេត្តសៀមរាប÷លោកទៀ សីហា អភិបាលខេត្តសៀមរាប នៅថ្ងៃទី ១៤ ខែ តុលា ឆ្នាំ២០២០នេះ បានដឹកនាំកិច្ចប្រជុំត្រួតពិនិត្យរាល់ផលប៉ះពាល់លើផ្លូវ៣៨ខ្សែក្នុងក្រុងសៀមរាប ដោយមានការចូលរួមរបស់លោក លី រស្មី អគ្គលេខាធិការរង នៃគណៈស្ថាបត្យករកម្ពុជា ផងដែរ។

តាមសេចក្តីរាយការណ៍លទ្ធផលតាមក្រុមការងារវាស់វែងទាំង០៦ក្រុម ដែលអនុវត្តបានមកត្រឹមថ្ងៃទី១៣ តុលាម្សិលមិញ បានបញ្ជាក់ថា រាល់បញ្ហាដែលប្រជាពលរដ្ឋមានក្បាលដី និង លំនៅដ្ឋានបានប៉ះពាល់លើផ្លូវទាំង៣៨ខ្សែក្នុង ក្រុងសៀមរាប ដោយម្ចាស់លំនៅដ្ឋានមួយចំនួនបានអនុវត្តន៍ ធ្វើការរុះរើ និង មួយចំនួនមិនទាន់បានរុះរើ ដោយស្ថានភាពប៉ះពាល់ធ្ងន់ធ្ងរ និង ម្ចាស់ដី ឬសំណង់នៅក្រៅខេត្ត។ ក្នុងនោះដែរក្រុមការងារក៏បានលើកផងដែរ អំពីបញ្ហាប្រឈម មួយចំនួន ដែលក្រុមការងារបានជួប ក្នុងពេលចុះអនុវត្តធ្វើការវាស់វែង កំណត់ជើងម៉ែត្រ ដោយមានម្ចាស់សំណង់មួយ ចំនួនបានធ្វើការបំពាន លើគំនូសជើងម៉ែត្រ ដែលធ្វើឲ្យមានបញ្ហាមួយចំនួនជាមួយក្រុមការងារ ។

លោកលី រស្មី ក៏បានលើកនូវបទពិសោធន៍មួយចំនួន ដែលបានអនុវត្តនៅខេត្តព្រះសីហនុ ចំពោះ ការកំណត់ទំហំផ្លូវនីមួយៗ ព្រមទាំងបានផ្តល់នូវអនុសាសន៍មួយចំនួនដល់អាជ្ញាធរខេត្ត និង ក្រុមការងារវាស់វែងផ្លូវទាំង ៣៨ខ្សែក្នុងក្រុងសៀមរាប គឺត្រូវចេះធ្វើការអនុម័តទៅលើរាល់បញ្ហាមួយចំនួន។
ក្នុងកិច្ចប្រជុំលោក ទៀ សីហា បានឯកភាពទៅលើរបាយការណ៍ក្រុមការងារវាស់វែង ដោយបានលើកឡើង សំខាន់ដោយបានផ្តោតទៅលើបញ្ហាប្រឈម និង សំណូលពររបស់ប្រជាពលរដ្ឋមួយចំនួនបានលើកឡើង ដើមី្បដាក់ជូនទៅគណៈកម្មការអន្តរក្រសួង ដើមី្បធ្វើការត្រួតពិនិត្យ និងសម្រេច។

អភិបាលខេត្ត ក៏បានធ្វើការណែនាំ ដល់ក្រុមការងារវាស់វែង បន្តធ្វើការពិនិត្យ ជំរុញនូវគម្រោងផែនការជាប្រវត្តិសាស្ត្រ ក្នុងខេត្តសៀមរាប ក្នុងគោលដៅបម្រើដល់ប្រជាពលរដ្ឋ សំខាន់លើវិស័យសេដ្ឋកិច្ចទេសចរណ៍ ដោយខេត្តសៀមរាបជាខេត្តគោលដៅសំខាន់ក្នុងវិស័យទេសចរណ៍វប្បធម៌ធម្មជាតិប្រវត្តិសាស្ត្រ ដែលជាខេត្តដ៏សម្បូរបែបលើវិស័យវប្បធម៌ ដែលមានប្រាង្គប្រាសាទលី្បល្បាញ។ ម៉្យាងទៀតក្នុងគម្រោងស្ថាបនាផ្លូវទាំង៣៨ខ្សែក្នុងក្រុងសៀមរាបនេះ ក្រុមការងារទាំងអស់ត្រូវបន្តធ្វើ យ៉ាងណាឲ្យទទួលបានជោគជ័យនូវសមរភូមិសតិអារម្មណ៍របស់ប្រជាពលរដ្ឋ និង កិច្ចដំណើរការស្ថាបនាផ្លូវបានជោគជ័យផងដែរ ។

អភិបាលខេត្ត បានថ្លែងអំណរគុណដល់ប្រជាពលរដ្ឋ ដែលមានស្មារតីចូលរួមសហការជាមួយគណៈកម្មការអន្តរក្រសួង និង រដ្ឋបាលខេត្ត ក្នុងការរុះរើបានទាន់ពេលវេលា ទោះបីក្នុងដំណាក់កាលនេះយើងខ្វះខាតជាងសំណង់ក៏ដោយ ក៏បងប្អូនបានខិតខំ
ដើមី្បឲ្យកិច្ចដំណើរការស្ថាបនាផ្លូវក្នុងក្រុងសៀមរាប ឲ្យក្លាយជាទីក្រុងស្រស់ស្អាតប្រកបដោយបរិស្ថានល្អបរិសុទ្ធ ក្នុងការទទួលស្វាគមន៍ភ្ញៀវទេសចរណ៍ជាតិ អន្តរជាតិ ក្រោយពេលបញ្ចប់ជម្ងឺកូវីដនេះទៅ៕SRP

ខេត្តស្វាយរៀង៖លោក ម៉ែន វិបុល អភិបាលខេត្ត នៅរសៀលថ្ងៃទី១៤ខែតុលានេះ បានដឹកនាំកម្លាំងមន្ត្រីរាជការ ប្រមាណជាង៣០០នាក់ចូលរួមដើម្បីទប់ទំនប់វៀងក្រុងត្រង់ចំណុចសង្កាត់គយត្របែកនិងសង្កាត់ពោធិ៍ធិហោ ដែលបច្ចុប្បន្នទឹកជំនន់ទឹកភ្លៀងកំពុងវាយលុកនិងគំរាមកំហែង។

ក្នុងឱកាសនោះដែរ លោកម៉ែន វិបុល បានថ្លែងថាទឹកជំនន់ដោយសារទឹកភ្លៀងពីមួយថ្ងៃ ទៅមួយថ្ងៃកើនឡើងជាលំដាប់ ហើយត្រង់ចំណុចដែលសមត្ថកិច្ចនិងក្រុមការងារ ចូលរួមទប់ថ្ងៃនេះឃើញថាទឹកឡើងខ្លាំងអាចនឹងឈានដល់ដាច់ទំនប់ប្រសិនបើយើងមិនបានទុបបង្ការទុកជាមុន។ ដោយក្នុងរយៈ ពេលប៉ុន្មានថ្ងៃនេះ ឃើញថា មានភ្លៀងធ្លាក់ជារៀងរាល់ថ្ងៃ ធ្វើអោយទឹកនៅក្នុងទន្លេវ៉ៃគោ ហក់ឡើងរហូតបណ្ដាលឱ្យលិចភូមិដ្ឋាន បងប្អូនប្រជាពលរដ្ឋនៅក្នុងក្រុងស្វាយរៀងចំនួន២៨គ្រួសារផងដែរ។

លោកបានបញ្ជាក់ថាបច្ចុប្បន្នកងកម្លាំងទាំងបីប្រភេទនិងមន្ត្រីរាជការ ព្រមទាំងសាខាកាកបាទក្រហមកម្ពុជាកំពុងត្រៀមលក្ខណៈ ជួយសង្គ្រោះ ដល់ប្រជាពលរដ្ឋដែលងាយនឹងរងគ្រោះដោយសារទឹកជំនន់នេះ។
ជាមួយគ្នានេះដែរលោកក៏បានអំពាវនាវ ដល់បងប្អូនប្រជាពលរដ្ឋ នៅតាមដងទន្លេវ៉ៃគោ នឹងតាមក្រុងស្រុកទាំងអស់ត្រៀមបង្ការនិងប្រុងប្រយ័ត្ននូវគ្រោះមហន្តរាយ ដោយសារទឹកជំនន់ ព្រោះប្រទេសយើងទទួលសម្ពាធខ្យល់មូសុងវស្សាក៏ដូចជាព្យុះភ្លៀងធ្លាក់លាយឡំនៅប៉ុន្មានថ្ងៃខាងមុខនេះបន្តទៀត៕SRP

ខេត្តបាត់ដំបង៖លោកឧកញ៉ា ភួ ពុយ តំណាងរាស្រ្តមណ្ឌលខេត្តបាត់ដំបង និងជាប្រធានគណ:កម្មាធិការកណ្ដាលចុះជួយស្រុកថ្មគោល លោក ភួ វាសនា ប្រធានសភាពាណិជ្ជកម្មខេត្ត និងជាប្រធានយុវជន ស.ស.យ.ក ស្រុកថ្មគោល នៅថ្ងៃទី១៤ ខែតុលា ឆ្នាំ២០២០ បាននាំយកនូវអំណោយគ្រឿងឧបភោបបរិភោគ ថ្នាំពេទ្យ ដោយក្នុងមួយគ្រួសារទទួលបាន អង្ក(រ១០គីឡូក្រាម) មី(១កេស) ចែកជូនបងប្អូនប្រជាពលរដ្ឋដែលរងនូវការលិចលង់លំនៅដ្ឋានខ្លាំង នៅឃុំអន្លង់រុន និងឃុំអូរតាគី ស្រុកថ្មគោល ខេត្តបាត់ដំបង។

ថ្លែងក្នុងឱកាសនោះដែរ លោកឧកញ៉ា ភួ ពុយ បានថ្លែងអំណរអរគុណដល់ អាជីវករ នៅក្នុងក្រុងបាត់ដំបង ដែលបានចំណាយពេលវេលា ក៏ដូចជាថវិកាផ្ទាល់ខ្លួនយកមកឧបត្ថម្ភ ដល់ប្រជាពលរដ្ឋ ដែលកំពុងជួបទុក្ខលំបាកនេះ ព្រមទាំងបានផ្ដាំផ្ញេី ក៏ដូចជាក្រេីនរំលឹកដល់ប្រជាពលរដ្ឋ ឱ្យប្រុងប្រយ័ត្នខ្ពស់ ចំពោះឪពុកម្ដាយដែលមានកូនតូចៗ ហាមកុំឱ្យលេងទឹកដែលកំពុងឡេីងខ្លាំង ថែរក្សាសុខភាព និងប្រយ័ត្នចំពោះសត្វអសិរពិសទិច ឫ ខាំ នៅពេលជំនន់ទឹកភ្លៀងនេះផងដែរ៕SRPដោយវណ្ណៈ

ខេត្តបាត់ដំបង៖លោក ណុប ដារ៉ា អភិបាលរង ខេត្តបាត់ដំបង និងលោក ផេង សិទ្ធី អភិបាលក្រុងបាត់ដំបង ព្រមទាំង ស.ស.យ.ក. នៅថ្ងៃទី១៤ខែតុលាឆ្នាំព្រឹកមិញ បានចុះជួបសំណេះសំណាល សួរសុខទុក្ខភ្នាក់ងារប្រមូលសំរាមរបស់ក្រុមហ៊ុន ស៊ីន ទ្រី ប្រចាំខេត្តបាត់ដំបង ចំនួន ៨៤គ្រួសារស្ថិតនៅក្នុងបរិវេណក្រុមហ៊ុនសុីនទ្រី ក្រុង/ខេត្តបាត់ដំបង។

ក្នុងឱកាសនោះដែរលោកណុប ដារ៉ា និងក្រុមការងារ ក៏បាននាំយកអំណោយ ជាគ្រឿងឧបភោគ-បរិភោគ រួមមាន៖ អង្ករ ទឹកត្រី ទឹកស៊ីអ៊ីវ មី ត្រីខកំប៉ុង និងថវិកា ប្រគល់ជូនបងប្អូនភ្នាក់ងាររើសសំរាម របស់ក្រុមហ៊ុន ស៊ីន ទ្រី ផងដែរ។

លោកណុប ដារ៉ា បានមានមតិផ្តាំផ្ញើរដល់បុគ្គលិករបស់ក្រុមហ៊ុនសុិនទ្រីទាំងអស់គ្នា ត្រូវបន្តខិតខំប្រឹងប្រែងធ្វើការងារឲ្យបានល្អជាប្រចាំថ្ងៃ ដែលក្រុមហ៊ុនដាក់ផែនការតាមផ្នែកនីមួយៗ ពិសេសនៅពេលយកសំរាមនៅតាមផ្ទះ នឹងតាមដងផ្លូវនានាជុំវិញក្រុងបាត់ដំបង កុំឲ្យមានការយឺតយ៉ាវ ចៀសវាងការទុកច្រើន ថ្ងៃបង្កការជះក្លិនមិនល្អជាដើម៕SRPដោយវណ្ណៈ

ភ្នំពេញ៖លោកជំទាវ ពេជ ចន្ទមុន្នី ហ៊ុន ម៉ាណែត អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅរសៀលថ្ងៃទី ១៤ ខែតុលា ឆ្នាំ២០២០នេះ បានអញ្ជើញមកសួរសុខទុក្ខ លោកយាយ ប៊ុន សេន អាយុ ១០២ ឆ្នាំ នៅក្នុងកម្មវិធីមនុស្សចាស់នៃអង្គការមូលនិធិកុមារកម្ពុជា(CCF) ដែលសម្រាកព្យាបាលជំងឺរលាកសួតនៅមន្ទីរពេទ្យមិត្តភាពខ្មែរ-សូវៀត៕SRP

ខេត្តសៀមរាប៖អាជ្ញាធរខេត្តបានប្រកាសឲ្យដឹងនៅរសៀលថ្ងៃនេះថាក្រសួងសាធារណការ និងដឹកជញ្ជូន នឹងចាប់ផ្តើមដំណើរការអនុវត្តគម្រោងស្ថាបនា និងស្តារផ្លូវជាតិលេខ ៦ ចាប់ពីរង្វង់មូល ព្រះរាជដំណាក់ ដល់ រង្វង់មូលព្រះបាទជ័យវរ្ម័នទី៧ ស្ថិតនៅខេត្តសៀមរាប ក្រោមជំនួយឥណទានរបស់ ធនាគារអភិវឌ្ឍអាស៊ី (ADB) នាពេលខាងមុខនេះ។

ដូចនេះ ដើម្បីឱ្យគម្រោងស្ថាបនា និង ស្តារផ្លូវជាតិលេខ ៦ ខាងលើនេះ ប្រព្រឹត្តទៅដោយរលូន និង សម្រេចបានស្របតាមផែនការដែលបានគ្រោងទុក សូម សាធារណជន បងប្អូនប្រជាពលរដ្ឋ ជាម្ចាស់ទីតាំង អាជីវកម្ម លំនៅដ្ឋាននៅអមសងខាងផ្លូវជាតិលេខ៦ ចាប់ពីរង្វង់មូលព្រះរាជដំណាក់ ដល់ រង្វង់មូលព្រះបាទ ជ័យវរ្ម័នទី៧ ចូលរួមសហការរុះរើសំណង់ និងសំណង់ការផ្សេងៗទៀតដែលនៅលើដីចំណីផ្លូវជាតិលេខ៦ ឱ្យបានរួសរាន់មុនការបើកការដ្ឋាន។

រដ្ឋបាលខេត្តសៀមរាប សង្ឃឹមយ៉ាងមុតមាំថាសាធារណជន បងប្អូនប្រជាពលរដ្ឋ ជាម្ចាស់ទីតាំងអាជីវកម្ម លំនៅដ្ឋាននៅអមសងខាងផ្លូវជាតិលេខ៦ នឹងចូលរួមអនុវត្តដោយធ្វើការរុះរើសំណង់របស់ខ្លួនដោយស្មារតី ទទួលខុសត្រូវខ្ពស់៕SRP

ខេត្តកំពង់ចាម៖លោក​​ អ៊ុន​ ចាន់ដា​ អភិបាល​​ខេត្ត​ បាន​ប្រគល់​ម៉ូតូ​ និង​ថវិកា​ មួយចំនួន ជូន​ដល់​ជនរងគ្រោះ​ ក្នុងហេតុការណ៍ បាក់ស្រុតលូបង្ហូរទឹក និង​សួនច្បារ​មាត់​ទន្លេ​នេះ​ បន្ទាប់​ពី​ក្រុមការងារ​ជួសជុល​កកាយ​រក​ឃើញ​ ក្នុងពីជម្រៅដីប្រមាណជាង៤ម៉ែត្រ។

អញ្ជើញចុះពិនិត្យវឌ្ឍនភាពនៃការសាងសង់ប្រព័ន្ធ​លូ​បង្ហូរ​ទឹក​ចេញ​ពី​ក្រុងកំពង់ចាម​​ នៅថ្ងៃទី១៤ ខខែតុលាព្រឹកមិញនេះ លោក​​ អ៊ុន​ ចាន់ដា​ បាន​ជំរុញ​ដល់​មន្ត្រី​ពាក់ព័ន្ធ​ ក៏ដូចជា​ក្រុម​ការងារ​បច្ចេកទេស​ ឲ្យ​​ពន្លឿន​ការ​ងារសាងសង់​នេះ ធ្វេីយ៉ាងណា​ត្រូវ​ឲ្យ​មាន​គុណភាព​រឹងមាំ​ និង​សម្រុក​ឲ្យ​បាន​មុន​ទឹក​ជំនន់​ចូល​មក​ដល់​ ដែល​នាំ​ឲ្យ​បង្ក​ការ​ខូចខាត​ដល់​សួនច្បារ​ និង​ហេដ្ឋារចនាសម្ព័ន្ធ​ផ្សេងៗ​ទៀត។

មន្ត្រី​បច្ចេកទេស​​បាន​ឲ្យដឹងថា​ បច្ចុប្បន្ន​ក្រុម​ការងារ​កំពុងដំណើរការ​សាងសង់​សម្រេច​បាន​ប្រមាណ​ជាង​២០%ហើយ​ ដោយ​ត្រូវ​ធ្វើការ​ចាក់បេតុង ឱបចង្កេះប្រព័ន្ធថ្មី និងចាក់បេតុង គ្របពីលើមួយជាន់ទៀត មានប្រវែង៨០ម៉ែត្រ ចាប់ពីមាត់អណ្តូងលូចាស់ ទៅដល់ក្នុងទន្លេ ហេីយ​ត្រូវ​ប្រេីប្រាស់​ប្រព័ន្ធលូមុខ៣​ មានមុខកាត់លូនីមួយៗមានទំហំ០,៨ ម៉ែត្រ និងសង់អណ្តូងលូបណ្តែត ចំនួន២បន្ថែមទៀតដើម្បីការពារការកកស្ទះផងដែរ។

គួរ​រំលឹក​ថា កាលពី​វេលាម៉ោង១២​និង៣០នាទី រំលងអាធ្រាត្រ​ ​ឈាន​ចូល​ថ្ងៃ​ទី​១៣​ ​ខែកញ្ញា​ ឆ្នាំ​២០២០​កន្លងទៅ​ថ្មីៗ​នេះ​មាន​ករណី​បាក់លូបង្ហូរទឹកចូលទន្លេ ទំហំ​ ៧ម៉ែត្រ គុណ១០ម៉ែត្រ នៅចំណុចមាត់ទន្លេស្ថិតនៅ​ក្នុង​ភូមិទី៣​ សង្កាត់វាលវង់​ ក្រុង​កំពង់ចាម​ បណ្តាលឲ្យធ្លាប់ម៉ូតូ០១គ្រឿង ម៉ាកវេវ​ តែមិនបង្កឲ្យមានគ្រោះថ្នាក់ដល់​អាយុជីវិត​មនុស្សឡើយ។ បេីតាមការសន្និដ្ឋានរបស់មន្ត្រីជំនាញថា ការបាក់ស្រុតដីនេះអាចបណ្តាលមកពីប្រព័ន្ធលូបង្ហូរទឹកចេញពីក្រុងកំពង់ចាម ចូលក្នុងទន្លេ​ដែលមានសភាពចាស់ទ្រុឌទ្រោម គឺជាប្រព័ន្ធលូសាងសង់ឡេីងតាំងពី​ជំនាន់​អាណានិគម​បារាំង​ ហើយមុនពេលកើតហេតុក៏មានភ្លៀងធ្លាក់​យ៉ាង​ខ្លាំង។សូមជម្រាបថាពេលនេះទឹកទន្លេមេគង្គចាប់ផ្ដើមហក់ឡើង​ជា​បន្តបន្ទាប់​ រហូត​មានកម្ពស់​១០​.៦២ម៉ែត្រ​ ដោយខេត្តកំពង់ចាម កម្រិតទឹកដែលត្រូវប្រកាសឲ្យមានការប្រុងប្រយ័ត្ន​គឺ ១៥.២០ម៉ែត្រ​៕SRP

ខេត្តសៀមរាប៖លោក ខៀវ កាញារីទ្ធ រដ្ឋមន្រ្តីក្រសួងព័ត៌មាននៅព្រឹកថ្ងៃទី១៤ ខែតុលា ឆ្នាំ២០២០ នេះ បានអញ្ជើញចុះពិនិត្យពីការងាររៀបចំអភិវឌ្ឍ នានានៅបរិវេណខាងមុខប្រាសាទអង្គរវត្ត។

បន្ត្រីអាជ្ញាធរថាការរៀបចំកែលម្អសោភ័ណភាពបរិវេណមុខប្រាសាទអង្គរវត្តដូចជា ការរៀបចំដាំដើមឈើ ការរៀបចំផ្លូវនិងប្រព័ន្ធបង្ហូរទឹក ការរៀបចំបរិស្ថានជុំវិញត្រពាំងសេស ការរៀបចំចំណតរថយន្តនិងតូបលក់ដូរ និងកិច្ចការងារផ្សេងៗទៀតក្នុងន័យធ្វើឱ្យតំបន់នេះមានភាពទាក់ទាញ មានរបៀបរៀបរយ និងស័ក្ដិសមជាសម្បត្តិបេតិកភណ្ឌរបស់មនុស្សជាតិ។

លោកខៀវ កាញារីទ្ធ បានសម្ដែងអារម្មណ៍រីករាយ និងគាំទ្រទៅនឹងសមិទ្ធផលដែលកើតឡើងពីការខិតខំប្រឹងប្រែងរបស់អាជ្ញាធរ ដោយរំពឹងថា ការរៀបចំនេះនឹងក្លាយជាប្រយោជន៍ដ៏ធំរបស់ជាតិនាពេលខាងមុខ។ រដ្ឋមន្រ្តីក៏បានលើកទឹកចិត្តដល់អាជ្ញាធរ ឱ្យបន្តធ្វើកិច្ចការទាំងនេះបន្ថែមទៀត ដើម្បីជាប្រយោជន៍ និងមុខមាត់របស់ប្រទេសជាតិ ពិសេសទាក់ទាញភ្ញៀវទេសចរមកកាន់រមណីយដ្ឋានអង្គរ៕SRP

ភ្នំពេញ៖សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានៅថ្ងៃទី ១៤ ខែតុលា ឆ្នាំ២០២០នេះ បានសម្រេចផ្តល់ថវិកាចំនួន ៣០០លានរៀល ជូនដល់សាខាកាកបាទក្រហមកម្ពុជា ខេត្តចំនួន៣ ដែលបានទទួលរងគ្រោះដោយទឹកជំនន់ធ្ងន់ធ្ងរជាងគេ គឺ ខេត្តពោធិ៍សាត់ បាត់ដំបង និងខេត្តបន្ទាយមានជ័យ។ សាខាកាកបាទក្រហមកម្ពុជា ខេត្តនីមួយៗ ទទួលបានថវិកា ១០០លានរៀល ដើម្បីចាត់ចែងទិញគ្រឿងឧបភោគបរិភោគរួមមាន អង្ករ មី ត្រីខ និងទឹកស៊ីអ៊ីវ សម្រាប់ផ្តល់ជូនប្រជាពលរដ្ឋរងគ្រោះដោយទឹកជំនន់។

ទន្ទឹមនឹងនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ឱ្យមន្ត្រីទីស្នាក់ការកណ្តាល ចុះទៅប្រចាំការបំពេញការងារផ្ទាល់ជាមួយសាខាកាកបាទក្រហមកម្ពុជា ខេត្តពោធិ៍សាត់ និងខេត្តបន្ទាយមានជ័យ។ ដោយឡែក សាខាកាកបាទក្រហមកម្ពុជា ខេត្តបាត់ដំបង គឺប្រគល់ភារកិច្ចជូនឯកឧត្តម ប៊ុត គឹមស៊ាន ប្រធានគណៈកម្មាធិការសាខា ដឹកនាំប្រតិបត្តិការដោយផ្ទាល់តែម្តង។

ក្នុងស្ថានភាពគ្រោះធម្មជាតិទឹកជំនន់នេះ កាកបាទក្រហមកម្ពុជា ក្នុងនាមជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ រួមជាមួយ គណៈកម្មាធិការជាតិគ្រប់គ្រងគ្រោះមហន្តរាយ អាជ្ញាធរគ្រប់លំដាប់ថ្នាក់ បាននិងកំពុងប្រើប្រាស់នូវកម្លាំងសរុប មធ្យោបាយសរុប ដើម្បីជួយសង្គ្រោះប្រជាពលរដ្ឋឱ្យរួចផុតពីគ្រោះថ្នាក់ និងទៅដល់ទីទួលសុវត្ថិភាព។ ក្រៅពីការជួយសង្គ្រោះប្រជាពលរដ្ឋដល់ទីទួលសុវត្ថិភាព កាកបាទក្រហមកម្ពុជា ដែលមានកម្លាំងយុវជន និងអ្នកស្ម័គ្រចិត្ត បានធ្វើការអប់រំផ្សព្វផ្សាយដល់ប្រជាពលរដ្ឋឱ្យបង្កើនការប្រុងប្រយ័ត្ន និងរស់នៅមានអនាម័យស្អាត បរិភោគទឹកឆ្អិនឬអាហារដែលចម្អិនបានល្អ ជៀសវាងជំងឺរាតត្បាតនានាដែលបង្កឡើងដោយទឹក និងប្រុងប្រយ័ត្នពីសត្វអាសិរពិសគ្រប់ប្រភេទ៕SRP