ឧកញ៉ា គិត ម៉េង៖ “គ្រប់រឿងស្នេហាមានលក្ខណៈពិសេស ខុសប្លែកពីគ្នា និងពោរពេញដោយភាពស្រស់ស្អាត ប៉ុន្តែរឿងស្នេហារបស់យើងគឺជារឿងដែលបងចូលចិត្តជាងគេ”។
តើបងគួរចាប់ផ្ដើមសរសេរចេញពីចំណុចណាដើម្បីបង្ហាញពីភាពអស្ចារ្យរបស់អូន ចំណាន? នៅពេលដែលបងអង្គុយនៅទីនេះ ហើយគិតអំពីរយៈពេលនៃឆ្នាំដែលយើងរស់នៅជាមួយគ្នា បងមិនអាចហាមចិត្តខ្លួនឯងមិនឱ្យញញឹមម្នាក់ឯងបានទេ ហើយបងចងចាំថាថ្ងៃនេះជាថ្ងៃគម្រប់ខួបមួយទៀតនៅក្នុងដំណើររឿងរបស់យើង។
នៅថ្ងៃដ៏ពិសេសនេះ បងចង់ប្រាប់មនុស្សទាំងអស់នៅលើពិភពលោកម្តងទៀត ដោយក្តីរីករាយថា ការរៀបអាពាហ៍ពិពាហ៍ជាមួយអូនគឺជារឿងដ៏ប្រពៃបំផុតដែលបានកើតទ្បើងចំពោះបង។ បងជ្រើសរើសស្ត្រីដ៏ល្អត្រឹមត្រូវម្នាក់ដែលធ្វើឱ្យបងសប្បាយចិត្តជារៀងរាល់ថ្ងៃ។
បងចងចាំនូវផ្កាដ៏ស្រស់ស្អាត ស្នាមញញឹមដ៏រីករាយ និងបរិយាកាសពោរពេញដោយក្តីស្រទ្បាញ់នៃថ្ងៃមង្គលការរបស់យើង។ ថ្ងៃដែលអូននិងបងកាន់ដៃគ្នាលើផ្លូវជីវិតស្វាមីភរិយា គឺជាថ្ងៃដ៏រីករាយបំផុតក្នុងជីវិតរបស់បង ហើយចាប់តាំងពីពេលនោះមក សុភមង្គលនៅតែបន្តកើតមានជារៀងរាល់ថ្ងៃ។
មានពាក្យមួយឃ្លាដែលថា មនុស្សពីរនាក់ដែលស្រទ្បាញ់គ្នាច្រៀងចម្រៀងដូចគ្នានៅក្នុងបេះដូងពួកគេ ហើយចំពោះយើងវិញ អូនចំណាន និងខ្ញុំ មានបទចម្រៀងដែលយើងចូលចិត្ត គឺបទដែលត្រូវបានលេងក្នុងថ្ងៃមង្គលការយើង ជាបទដែលពួកយើងតែងតែច្រៀងជាមួយគ្នា។
អូន ចំណាន បានបង្ហាញឲ្យឃើញថាស្នេហាមិនមែនគ្រាន់តែជាពាក្យសម្ដីនោះទេ តែជាអារម្មណ៍ដែលគាត់បង្ហាញរៀងរាល់ថ្ងៃ។ ចំណាន ធ្វើឱ្យខ្ញុំស្រទ្បាញ់គាត់ជាខ្លាំង។ វាហាក់ដូចជាការស្វែងរកបំណែកនៃល្បែងផ្គុំរូបដែលបាត់អ៊ីចឹង។ ខ្ញុំបានរកឃើញក្តីស្នេហ៍ដែលខ្ញុំបានស្វែងរក នោះគឺអូន ចំណាន។
ការជួបអូនជាវាសនា ហើយការចាប់ចិត្តប្រតិព័ទ្ធលើអូនគឺជាបុពេសន្និវាស។ នៅលើលោកដែលអ្វីៗមិនប្រាកដប្រជា អូន ចំណាន ជាមនុស្សដែលបងជឿជាក់លើ ហើយនឹងមានភាពប្រាកដប្រជាជាមួយជានិច្ច។ ពេលដែលបងនៅជាមួយអូនកាន់តែច្រើន ក្តីស្រទ្បាញ់បងចំពោះអូនកាន់តែធំ។
ថ្ងៃនេះ ជាថ្ងៃនៃការប្រារព្ធអបអរសាទរក្តីស្នេហ៍ ការប្តេជ្ញាចិត្ត និងការលះបង់ដ៏អស្ចារ្យរបស់យើងទាំងពីរ។ នេះជាពិធីអបអរសាទរនៃការរួមរស់ជាមួយគ្នា និងពេលវេលាដ៏រីករាយរបស់យើងយ៉ាងពិតប្រាកដ។ យើងអបអរសាទរការសម្រេចចិត្តដ៏ល្អបំផុតដែលយើងបានធ្វើ នោះគឺ ការកសាងជីវិតរួមគ្នា និងធ្វើជាឪពុកម្តាយដល់កូនៗរបស់យើង។ បងអរគុណអូនសម្រាប់ការក្លាយជាចំណែកនៃបេះដូងរបស់បង។
ជូនចំពោះភរិយាដ៏ស្រស់ស្អាតរបស់បង ម្តាយរបស់កូនៗរបស់បង និងដៃគូពេញមួយជីវិតរបស់បង បងស្រឡាញ់អូនលើសពីអ្វីៗទាំងអស់ដែលមិនអាចកាត់ថ្លៃបាន។
រីករាយខួបអាពាហ៍ពិពាហ៍របស់យើង អូន ចំណាន!
លោកបណ្ឌិត ហ៊ុន ម៉ាណែត បានឲ្យកាសែត ខេមបូឌាដេលី ធ្វើការសម្រួលជាបន្ទាន់ បើគ្មានភស្តុតាងនោះទេ ដែលបានផ្សាយថារូបលោកជាមេបណ្តាញរកស៊ីឈើខុសច្បាប់។
