ខេត្តសៀមរាប៖ផ្ទះប្រជាពលរដ្ឋចំនួនពីរខ្នងបានរងការខូតខាត ដោយខ្យល់កន្ត្រាក់។
ហេតុការណ៍បានកើតឡើងវេលាម៉ោង២០និង០០នាទី ថ្ងៃទី១៥ខែឧសភា ឆ្នាំ២០២០ នៅចំណុចភូមិត្រាចពក និងភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប។
សមត្ថកិច្ចបានរាយការណ៍ថាករណីខ្យល់កន្ត្រាក់ នេះ បណ្ដាលអោយរលំផ្ទះ ទាំងស្រុង០១ខ្នង និងរបើកសំយ៉ាបផ្ទះ០១ខ្នង។
១/រលំទាំងស្រុង ផ្ទះជញ្ជាំងក្ដា ប្រក់ក្បឿង ទំហំ០៦មx១២ម ម្ចាស់ផ្ទះឈ្មោះឡាំ លាង ភេទប្រុស អាយុ៣៥ឆ្នាំ ទីលំនៅ ភូមិត្រាចពក.ឃុំពពេល ស្រុកសូទ្រនិគម ខេត្តសៀមរាប ។
២/របើកសំយ៉ាបផ្ទះស័ង្កសី ទំហំ០៤មx០៨ម ម្ចាស់ផ្ទះឈ្មោះសោម អោម ភេទប្រុស អាយុ៥៦ឆ្នាំ ទីលំនៅភូមិត្រពាំងត្រុំ ឃុំពពេល ស្រុកសូទ្រនិគម ខេត្តសៀមរាប។ទោះយ៉ាងណាករណីខាងលើនេះ ពុំមានបណ្ដាលអោយរងរបួសមនុស្សនោះឡើយ៕SRP

ខេត្តសៀមរាប៖រដ្ឋបាលក្រុងសៀមរាបនៅថ្ងៃទី១៥ខែឧសភានេះ បានរៀបចំកិច្ចប្រជុំផ្សព្វផ្សាយផែនការសៀមរាបផ្ទះខ្ញុំ ឆ្នាំ២០២០-២០២៤ ក្រោមអធិបតីភាពលោក ទេព ប៊ុនឆាយ ប្រធានក្រុមប្រឹក្សាក្រុង និងលោក នួន ពុទ្ធារ៉ា អភិបាលក្រុងសៀមរាប  ព្រមទាំងមានការ អញ្ជើញចូលរួមពី សមាជិកក្រុមប្រឹក្សាក្រុង អភិបាលរងក្រុង នាយក-នាយករងរដ្ឋបាលសាលាក្រុង ប្រធានការិយាល័យ អង្គភាពចំណុះក្រុង ចៅសង្កាត់ មេប៉ុស្ត៍ និងមេភូមិគ្រប់ភូមិផងដែរ។  ផែនការសៀមរាបផ្ទះខ្ញុំឆ្នាំ២០២០-២០២៤ បានរៀបចំឡើងដើម្បីអនុវត្តការងារសំខាន់ៗ ចំនួន០៦ រួមមាន៖
០១-ការងារបរិស្ថាន
០២-ការងារបេីកផ្លូវ
០៣-ការងារដោះស្រាយសំណង់មិនរៀបរយនៅលេីផ្លូវ
០៤-ការងារសណ្តាប់ធ្នាប់នឹងសោភណ្ឌ ភាព
០៥-ការងារទេសចរណ៍
០៦-ការងារសន្តិសុខ។
ក្នុងកិច្ចប្រជុំនេះដែរគណៈអធិបតីបានក្រើនរំលឹក និងណែនាំដូចខាងក្រោម៖
០១-ចូលរួមទាំងអស់គ្នាដើម្បីប្រយុទ្ធប្រឆាំងនឹងជំងឺកូវីដ-១៩ និងក្រុមការងារត្រូវបន្តចូលរួមយ៉ាងសកម្មក្នុងការគ្រប់គ្រងបងប្អូនប្រជាពលរដ្ឋចំណូលស្រុកវិញ  ព្រមទាំងផ្តល់អំណោយសប្បុរសធម៌ជូនពួកគាត់ និងប្រជាពលរដ្ឋខ្វះខាត។
០២-អំពាវនាវដល់សមាជិកអង្គប្រជុំធ្វើការគាំទ្រដល់ផែនការ និងចូលរួមអនុវត្តការងារអោយបានព្រមគ្នា ដើម្បីជាស៊ីសង្វាក់ប្រទាក់ក្រឡាគ្នា សំរេចតាមផែនការដែល បានគ្រោងទុក។
០៣-គ្រប់ការិយាល័យ អង្គភាព រដ្ឋបាលសង្កាត់ ប៉ុស្ត៍នគរបាល ត្រូវផ្តល់សេវា សាធារណៈជូនបងប្អូនប្រជាពលរដ្ឋ អោយបានលឿន រហ័ស ទាន់ពេលវេលា ដោយតម្លាភាព និងប្រសិទ្ធភាព។
០៤-គ្រប់កងកម្លាំងប្រដាប់អាវុធ គណៈ បញ្ជាការ ឯកភាពរដ្ឋបាលសង្កាត់ ត្រូវយកចិត្តទុកដាក់អោយបានខ្ពស់នូវការងារ សន្តិសុខ និងសណ្តាប់ធ្នាប់សង្គម៕SRP

ភ្នំពេញ៖សម្ដេចស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ បានអះអាងថា ថ្ងៃនេះខ្ញុំសូមជម្រាបជូនបងប្អូនជនរួមជាតិអំពីលទ្ធផលជាវិជ្ជមានប្រកបដោយនិន្នាការដ៏ល្អចំពោះការរឹតបន្តឹងការអនុវត្តច្បាប់ចរាចរណ៍ផ្លូវគោកដែលធ្វើឲ្យអត្រាអ្នកស្លាប់ អ្នករងរបួស និងគ្រោះថ្នាក់ចរាចរណ៍ក្នុងរយៈពេល២សប្តាហ៍ក្នុងខែឧសភាឆ្នាំ២០២០ មានការថយចុះគួរកត់សម្គាល់បើប្រៀបធៀបនឹងពេលមុនមានការរឹតបន្តឹងការអនុវត្តច្បាប់ចរាចរណ៍ផ្លូវគោកនេះ។
សម្ដេចស ខេង បន្តថា ទិន្នន័យជាផ្លូវការបានបញ្ជាក់ថាចំនួនគ្រោះថ្នាក់ចរាចរណ៍ផ្លូវគោកក្នុងរយៈពេល១៤ថ្ងៃគឺតពីថ្ងៃទី១រហូតដល់ថ្ងៃទី១៤ខែឧសភាឆ្នាំ២០២០នេះបើប្រៀបធៀបពីថ្ងៃទី១ដល់ថ្ងៃទី១៤ខែមេសាឆ្នាំ២០២០ដូចគ្នាគឺចំនួនគ្រោះថ្នាក់ចរាចរណ៍មានការថយចុះ២៦លើក អ្នករងរបួសថយចុះ៨១នាក់និងអ្នកស្លាប់ថយចុះ៤នាក់ ។ ចំនួននេះបើប្រៀបធៀបពីថ្ងៃទី១រហូតដល់ថ្ងៃទី១៤ខែឧសភាឆ្នាំ២០១៩វិញគឺមានការថយចុះកាន់តែច្រើនដូចជាគ្រោះថ្នាក់ចរាចរណ៍ថយចុះ៦៨លើក អ្នករងរបួសថយចុះ៩១នាក់ និងអ្នកស្លាប់ថយចុះ២០នាក់ ដែលនេះគឺបានបង្ហាញយ៉ាងច្បាស់ថាប្រជាពលរដ្ឋយើងពិតជាមានការយល់ដឹង និងបានចូលរួមគោរពច្បាប់ចរាចរណ៍ កាន់តែច្រើន។

ជាថ្មីម្តងទៀតខ្ញុំសូមថ្លែងអំណរគុណដល់បងប្អូនជនរួមជាតិទាំងអស់ជាពិសេសអ្នកប្រើប្រាស់ផ្លូវថ្នល់ដែលបានចូលរួមគោរពអនុវត្តច្បាប់ចរាចរណ៍ផ្លូវគោកយ៉ាងខ្ជាប់ខ្ជួន និងអរគុណដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានអនុវត្តភារកិច្ចរបស់ខ្លួនបានល្អប្រសើរ ។ ជាមួយគ្នានេះក៏សូមថ្លែងអំណរគុណចំពោះគ្រប់បណ្តាញសារព័ត៌មាន អង្គការក្រៅរដ្ឋាភិបាល និង អាជ្ញាធរមូលដ្ឋានគ្រប់ជាន់ថ្នាក់ ដែលបានចូលរួមផ្សព្វផ្សាយ និង អប់រំអំពីច្បាប់ចរាចរណ៍ផ្លូវគោកនេះជូនប្រជាពលរដ្ឋផងដែរ។
រដ្ឋមន្ត្រីក្រសួងមហាផ្ទៃបញ្ជាក់ថាកន្លងមកនេះមានមតិខ្លះក៏បានលើកឡើងដោយសុំឲ្យមានការពន្យាឬក៏ផ្អាកការរឹតបន្តឹងការអនុវត្តច្បាប់ចរាចរណ៍ផ្លូវគោកនេះដោយមូលហេតុផ្សេងៗ ប៉ុន្តែក្នុងនាមជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកខ្ញុំសូមជម្រាបបញ្ជាក់ជូនបងប្អូនជនរួមជាតិមេត្តាជ្រាបថាតាមលទ្ធផលជាវិជ្ជមានខាងលើនេះបានបង្ហាញថា ការពន្យាឬក៏ផ្អាកការរឹតបន្តឹងការអនុវត្តច្បាប់ចរាចរណ៍ផ្លូវគោកនេះគឺប្រៀបបាននឹងការបណ្តែតបណ្តោយឲ្យប្រជាពលរដ្ឋខ្មែរយេីងនៅតែបន្ត រងរបួស និងស្លាប់បាត់បង់ជីវិតកាន់តែច្រើនឡើងថែមទៀតដោយសារគ្រោះថ្នាក់ចរាចរណ៍ ដែលជាការកេីតឡេីងនូវសោកនាដកម្ម ទាំងចំពោះគ្រួសារ និងសង្គមជាតិ យើង។
សម្ដេចបន្តទៀតថាទោះជាយ៉ាងណាក៏ដោយដើម្បីកាត់បន្ថយ ឬក៏លប់បំបាត់ឲ្យបាននូវ​បាតុភាពអវិជ្ជមានផ្សេងៗក្នុងយុទ្ធនាការ​ ការរឹតបន្តឹងការអនុវត្តច្បាប់ចរាចរណ៍ផ្លូវគោកនេះខ្ញុំក៏សូមក្រើនរំលឹកថែមទៀតដល់កងកម្លាំងមានសមត្ថកិច្ច ក៏ដូចជាមន្ត្រីពាក់ព័ន្ធទាំងអស់ ដែលបានចូលរួមអនុវត្តភារកិច្ចរបស់ខ្លួន ត្រូវតែបន្តការគោរពក្រមសីលធម៌វិជ្ជាជីវៈ និងវិន័យឲ្យបានខ្ជាប់ខ្ជួន ក្នុងការអនុវត្តតួនាទីភារកិច្ចរបស់ខ្លួនដើម្បីបម្រើផលប្រយោជន៍ជាតិ​ និងប្រជាពលរដ្ឋយេីង​៕SRP

ខេត្តកំពង់ចាម​៖លោកស្រី​ ប៉ាង ដានី អភិបាលរងខេត្ត តំណាងលោក​ អ៊ុន​ ចាន់ដា​ អភិបាលខេត្តកំពង់ចាម បានចាត់ទុកថា បងប្អូនដែលបានចូលរួមផ្ដល់ឈាម គឺសុទ្ធតែជាវីរៈជន ដែល​មាន​វីរៈភាពស្នេហាជីវិតមនុស្ស និងសង្គមជាតិ ដោយ​បងប្អូនកំពុងរួមគ្នាធ្វើបុណ្យ ដើម្បីសង្គ្រោះជីវិតមនុស្ស។
ថ្លែងយ៉ាងដូច្នេះ ក្នុងឱកាសចូលរួមបើកយុទ្ធនាការអប់រំ ផ្សព្វផ្សាយ និងទទួលអំណោយឈាម ក្រោមប្រធានបទ ៖«ផ្ដល់ឈាមផ្ដល់សេចក្ដីស្រឡាញ់» ដែលបានរៀបចំឡេីងនៅសាលាស្រុកព្រៃឈរ នាព្រឹកថ្ងៃទី១៥ ខែឧសភា ឆ្នាំ២០២០នេះ ក្រោម​វត្តមានលោកស្រី តោ ពិឡា ទីប្រឹក្សាក្រសួងពាណិជ្ជកម្ម អនុប្រធានក្រុមការងារ ចុះមូលដ្ឋានស្រុកព្រៃឈរ​។

នាឱកាសនោះដែរ​ លោកស្រី​ ប៉ាង ដានី និងលោកស្រី តោ ពិឡា បានថ្លែងអំណរគុណ និងកោតសរសើរ ចំពោះ លោកលោកស្រីបងប្អូនជនរួមជាតិ ទាំងអស់ ដែលបានជួយគាំទ្រ​ក្នុង​យុទ្ធនាការអប់រំ ផ្សព្វផ្សាយ និងទទួលអំណោយឈាម ដែល​ជា​ទឹកចិត្ត​មនុស្សធម៌​ ផ្ដល់សេចក្ដីស្រឡាញ់ តាម​រយៈ​ដំណក់ឈាម នៃក្ដីសង្ឃឹម ជាពិសេស បាននឹងកំពុងបរិច្ចាកឈាម ដោយស្ម័គ្រចិត្ត​ ដើម្បីយកទៅប្រើប្រាស់ ក្នុង​ករណី​សង្គ្រោះបន្ទាន់ និងជួយដល់អ្នកជម្ងឺ ដែលកំពុងខ្វះឈាម និងអ្នកជួបគ្រោះថ្នាក់ផ្សេងៗ ។ ដូច្នេះការបរិច្ចាកឈាម ដើម្បីសង្គ្រោះជីវិតមនុស្ស គឺមានសារៈសំខាន់ណាស់ ពីព្រោះថា ការបរិច្ចាកឈាម គឺដើម្បីបញ្ឈប់បញ្ហាកង្វះឈាម ឬនិន្នាការ នៃការជួញដូរឈាម ដោយខុសច្បាប់ ខណៈដែលតម្រូវការឈាម មានការកើនឡើងជារៀងរាល់ឆ្នាំ ក្នុងរង្វង់ប្រមាណពី ១៥%ទៅ២០%។
បើតាមឲ្យដឹង ពីលោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្ដល់ឈាម បញ្ជាក់ថា ការប្រារព្ធពិធីផ្ដល់ឈាម នាពេលនេះ ដើម្បី ៖ ១.បង្កើតទម្លាប់ និងវប្បធម៌ នៃការបរិច្ចាកឈាមដោយស្ម័គ្រចិត្ត និងជម្រុញលើកកម្ពស់ឲ្យយុវជន ប្រជាជនទូទៅ ចូលរួមធ្វើសកម្មភាព ជាមួយសេវាកម្មជាតិផ្ដល់ឈាម នៅទូទាំងប្រទេស ដើម្បីធានាឲ្យមានការផ្គត់ផ្គង់ឈាមគ្រប់គ្រាន់ សម្រាប់អ្នកជម្ងឺ ដែលកំពុងត្រូវការឈាម នៅគ្រប់មន្ទីរពេទ្យ ដោយគ្មានការរើសអើង និងមប្រកាន់ជាតិសាសន៍ឬសាសនា ។ និង២.ផ្សាភ្ជាប់សកម្មភាព នៃការបរិច្ចាកឈាម ដោយស្ម័គ្រចិត្ត ទៅនឹងសកម្មមនុស្សធម៌ ក្នុងសង្គម ។
គូសបញ្ជាក់ដែរថា ក្នុងយុទ្ធនាការអប់រំផ្សព្វផ្សាយ និងទទួលអំណោយឈាម នេះដែរ គេសង្កេតឃើញថា មានអ្នកស្ម័គ្រចិត្តចូលរួមបរិច្ចាកឈាម សរុបប្រមាណជា ៣២នាក់ និងទទួលបានឈាមចំនួន៣២ប្លោកផងដែរ៕SRP

ខេត្តកំពង់ចាម៖លោកស្រីប៉ាងដានី អភិបាលរងខេត្ត  និងជាអនុប្រធានអចិន្ត្រៃយ៍ គណៈកម្មាធិការសាខាកាកបាទក្រហមកម្ពុជាខេត្តកំពង់ចាម តំណាងលោកអ៊ុនចាន់ដាអភិបាលខេត្ត និងជាប្រធានគណៈកម្មាធិការសាខា កាកបាទក្រហមកម្ពុជាខេត្តកំពង់ចាមរួមដំណើរដោយ លោក លោកស្រីសមាជិកសមាជិកាគណៈកម្មាធិការសាខា និងអនុសាខាស្រុកនៅថ្ងៃម្សិលមិញបានអញ្ជើញចុះសួរសុខទុក្ខនិងនាំយកអំណោយមនុស្សធម៌សាខាកាកបាទក្រហមខេត្តទៅចែកជូនប្រជាពលរដ្ឋដែលរងគ្រោះដោយខ្យល់កន្ត្រាក់ក្នុងស្រុកព្រៃឈរចំនួន៩គ្រួសារ  ដោយសរុបរួមប្រជាពលរដ្ឋដែលរងគ្រោះទាំង៥២គ្រួសារ។

ក្នុងឱកាសនោះដែរលោកស្រីប៉ាងដានីបានពាំនាំការផ្តាំផ្ញើសាកសួរសុខទុក្ខពីសំណាក់លោកអ៊ុនចាន់ដាប្រធានគណៈកម្មាធិការសាខា ដែលតែងតែគិតគូរពីសុខទុក្ខរបស់បងប្អូនប្រជាពលរដ្ឋដែលរងគ្រោះ«ទីណាមានការលំបាក ទីនោះមានកាកបាទក្រហមកម្ពុជា»។ ជាមួយគ្នានោះលោកស្រីបានអំពាវនាវដល់ប្រជាពលរដ្ឋទាំងអស់ចូលរួមបង្ការនិងទប់ស្កាត់ការរាតត្បាតនៃជម្ងឺកូវីដ១៩ ដោយត្រូវអនុវត្តន៍តាមការណែនាំរបស់ក្រសួងសុខាភិបាល ដោយការលាងសំអាតដៃ ,ប្រើប្រាស់ម៉ាស់ ឬក្រម៉ាឱ្យបានត្រឹមត្រូវនិងត្រូវថែរក្សា សុខភាព អនាម័យ និងសុវត្ថិភាពផ្ទាល់ខ្លួនឲ្យបានជាប្រចាំផងដែរ ។

គួររំលឹកផងដែរថានៅក្នុងភូមិសាស្ត្រខេត្តកំពង់ចាមកាលពីយប់ថ្ងៃទី១៣ខែឧសភាឆ្នាំ២០២០វេលាម៉ោង៣.៣០នាទីមានភ្លៀងធ្លាក់ លាយឡំជាមួយខ្យល់និងរន្ទះបណ្តាលឲ្យរលំផ្ទះ៤ខ្នង និងរបើកដំបូលចំនួន៤៨ខ្នងក្នុងនោះ៖នៅស្រុកបាធាយរលំផ្ទះ១ខ្នងនិងរបើកដំបូលផ្ទះ២១ខ្នង,ស្រុកព្រៃឈររលំផ្ទះ១ខ្នងនិងរបើកដំបូលផ្ទះ៨ខ្នង,ស្រុកជើងព្រៃរលំផ្ទះ២ខ្នងនិងរបើកដំបូល៣ខ្នងនិងស្រុកចំការលើរបើកដំបូល១៦ខ្នង៕SRP

ខេត្តកំពង់ធំ៖ឈើអារប្រមាណជិត១០ម៉ែត្រគូប នៅក្នុងព្រៃឡង់ត្រូវបានមន្ត្រីបរិស្ថានខេត្តកំពង់ធំ រកឃើញបន្ទាប់ពីឈ្មួញបានលាក់ទុក។

ទីតាំងរកឃើញក្នុងព្រំប្រទល់ព្រៃឡង់និងក្នុងចំការស្វាយចន្ទីក្រោយផ្ទះប្រជាពលរដ្ន ស្ថិតនៅចំណុចអូរលំស្សី និងចំណុចត្បែង ក្បែរភូមិខ្ចាស់ ឃុំបឹងល្វា ស្រុកសន្ទុក ខេត្តកំពង់ធំ។

លោក លី ស្រេង ប្រធានការិយាល័យដែនជំរកសត្វព្រៃបានឲ្យអ្នកសារព័ត៌មានដឹងថា ឈើដែលយើងរុករកឃើញទាំងនេះបានចុះប្រតិបត្តិការតាំងពីម៉ោង៩ព្រឹកថ្ងៃទី១៤ ខែឧសភា ឆ្នាំ២០២០ រហូតដល់ម៉ោង១១និង៣០នាទីយប់ថ្ងៃដដែលដោយយកឈើទាំងអស់មករក្សាទុកនៅទីស្នាក់ការ៤៤ ច្រករបៀងអភិរក្សជីវះចំរុះព្រៃអង់តែន ឈើមានចំនួនជាង៩ ម៉ែត្រគូប។

ករណីនេះលោក តុប កក្កដា ប្រធានមន្ទីរបរិស្ថានខេត្តកំពង់ធំធ្លាប់បានប្រាប់ថា លោកមិនលើកលែងចំពោះការដឹកជញ្ចូនឈើពីព្រៃឡងនោះទេ​លោកនិងចាត់វិធានការបង្រ្កាបអោយអស់ដោយមិនទុកឱកាសអោយឈ្មួញ​ អ្នកកាប់បំផ្លាញនោះឡើយ៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានៅព្រឹកនេះបានអញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី ដែលប្រព្រឹត្តទៅនៅវិមានសន្តិភាព។សម្រាប់របៀបវារៈនៃកិច្ចប្រជុំមានដូចខាងក្រោម៖
១- សេចក្តីព្រាងច្បាប់ស្តីពីការប្រឆាំងហិរញ្ញប្បទានដល់ការរីកសាយភាយអាវុធមហាប្រល័យ។
២- សេចក្តីព្រាងច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម។
៣- សេចក្តីព្រាងច្បាប់ស្តីពីការជួយគ្នាទៅវិញទៅមកផ្នែកច្បាប់ក្នុងវិស័យព្រហ្មទណ្ឌ។
៤-បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តពីស្ថាប័ននីតិប្បញ្ញត្តិលើ៖
៤.១- សេចក្តីព្រាងច្បាប់ស្តីពីការអនុម័តយល់ព្រមលើ កិច្ចព្រៀងស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការគេចវេះពន្ធ និងការចៀសវាងពន្ធ រវាងព្រះរាជាណាចក្រកម្ពុជា និងម៉ាឡេស៊ី។
៤.២- សេចក្តីព្រាងច្បាប់ស្តីពីការអនុម័តយល់ព្រមលើ កិច្ចព្រមព្រៀងស្តីពីការលុបបំបាត់ការយកពន្ធត្រួតគ្នាពាក់ព័ន្ធនឹងពន្ធលើប្រាក់ចំណូល និងការបង្ការគេចវេះពន្ធ និងការចៀសវាងពន្ធ រវាងព្រះរាជាណាចក្រកម្ពុជា និងសាធារណរដ្ឋកូរ៉េ។
៤.៣- សេចក្តីព្រាងច្បាប់ស្តីពីការអនុម័តយល់ព្រមឱ្យ ព្រះរាជាណាចក្រកម្ពុជាចូលជាភាគីនៃអនុសញ្ញាទីក្រុងប៊ែនស្តីពីកិច្ចការពារស្នាដៃអក្សរសាស្រ្ត និងសិល្បៈឆ្នាំ១៨៨៦ និងវិសោធនកម្មឆ្នាំ១៩៧៩៕SRP

ខេត្តសៀមរាប៖មនុស្សចំនួន០៣នាក់ត្រូវបានសមត្ថកិច្ចចាប់ខ្លួនក្រោយរងការចោទថាបានចាប់រំលោភ ក្មេងស្រីដែលបាននាំម្តាយទៅមើលជំងឺ។
ការចាប់ខ្លួនធ្វើឡើងនៅថ្ងៃទី១៤ខែឧសភាឆ្នាំ២០២០ ស្ថិតនៅភូមិក្របីរៀល សង្កាត់ក្របីរៀល ក្រុងសៀមរាប។
លោកវរសនីយ៍ឯក ជា ហេង នាយការិយល័យនគរបាលប្រឆាំងការជួញដូរមនុស្សនិងការពារអនីតិជនខេត្ត បានឱ្យដឹងនៅព្រឹកនេះថា កាលពីថ្ងៃទី០៩ខែឧសភាឆ្នាំ២០២០ ជនរងគ្រោះឈ្មោះ ឡ .ធ.វ ភេទ ស្រី អាយុ២០ឆ្នាំ រស់នៅស្រុកពួក ខេត្តសៀមរាប បានដាក់ពាក្យបណ្តឹងថា ខ្លួនបានទៅនៅថែជំងឺម្តាយនៅផ្ទះ គ្រូ អ៉ឹម (គ្រូខ្មែរ) ភូមិក្របីរៀល សង្កាត់ក្របីរៀល ក្រុងសៀមរាប ខេត្តសៀមរាប ត្រូវបានឈ្មោះ គ្រូអ៉ឹម ហៅចូលបន្ទប់យកដៃច្រត់ពីលើក្បាល ហើយឱ្យលេបថ្នាំពណ៌ខៀវស្រាប់តែទន់ខ្លួន ហើយឈ្មោះ គ្រូ អ៉ឹម រួមភេទជាមួយ ជាមួយខ្លួន បានសម្រេច។ បន្ទាប់មកគ្រូអ៉ឹម ឱ្យកូនសិស្សឈ្មោះ សី ឈ្មោះ ប៊ុន ឈ្មោះ ជាល ឈ្មោះ វីត រួមភេទជាមួយខ្លួនបានម្នាក់ម្តងផងទៀតផង។
លោកជា ហេង បន្ថែមថា ក្រោយពីទទួលពាក្យបណ្តឹងរួច លោកបានសុំលោកព្រះរាជ អាជ្ញាអមសាលាដំបូងខេត្រសៀមរាបបើកការស៊ើបអង្កេតបឋម។ លោកជា ហេង បន្តថាលុះនៅរសៀលថ្ងៃទី១៤ខែឧសភាម្សិលមិញ លោកនិងកម្លាំងនគរបាលដឹកនាំដោយលោក ថេង សំណាង ព្រះរាជអាជ្ញារង បានទៅដល់ផ្ទះ គ្រូ អ៉ឹម ដែលមានទីតាំងខាងលើ ដោយធ្វើការឆែកឆេររកឃើញវត្ថុតាងសំបកថ្មាំ Viaga ជាច្រើនបន្ទះ។
ក្នុងនោះឃើញមានជនរងគ្រោះ ចំនួន ២នាក់ទៀត មាន ឈ្មោះដូចខាងក្រោម: ១ ឈ្មោះ ព. ផ អាយុ ១៧ឆ្នាំ និង ឈ្មោះ ឌ. វ.ន អាយុ ១០ឆ្នាំ ជាកូនអ្នកជំងឺ។
លោកជា ហេង បន្តទៀតថាក្រោយពីសាកសួរជនរងគ្រោះទាំង០២នាក់បានឆ្លើយថាះ ឈ្មោះ ព. ផ ត្រូវបានឈ្មោះ សយ សំប៊ុន ចាប់រំលោភនាងតាំងពីនាងអាយុទើប ១៤ឆ្នាំ។ចំណែក ឈ្មោះ ឌ. វ.ន ត្រូវបានគ្រូអ៉ឹម នាំចូលបន្ទប់…..។

លោកជា ហេងបានបញ្ជាក់ថាជនសង្ស័យទាំង០៣នាក់ មានឈ្មោះដូចខាងក្រោម៖
០១.ពិន អ៉ឹម ភេទប្រុសអាយុ ៤៦ឆ្នាំ។០២.សយ សំប៊ុន ភេទប្រុសអាយុ ៣៤ឆ្នាំ។០៣.ស៊ាន កុសល (ហៅ ជា) ភេទប្រុសអាយុ៣៦ឆ្នាំ។អ្នកទាំង៣នាក់នេះ រស់នៅភូមិសង្កាត់ កើតហេតុខាងលើ។ បច្ចុប្បន្នត្រូវបានកម្លាំងជំនាញបាននាំមកសាកសួរ ប៉ុន្តែពួកគេមិនបានសារភាពនោះទេ។ទោះយ៉ាងណាជនសង្ស័យទាំង០៣នាក់ ត្រូវបានឃាត់ខ្លួនតាមបញ្ជា របស់ លោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាប ដើម្បីកសាងសំណុំរឿងបញ្ជូនខ្លួនទៅកាន់តុលាការ៕SRP

ខេត្តសៀមរាប៖កម្លាំងនគរបាលក្រុងសៀមរាបនិងពលរដ្ខបានចាប់ខ្លួនជនសង្ស័យម្នាក់ ករណីប្លន់។
ការចាប់ខ្លួននេះធ្វើឡើងនៅថ្ងៃទី១៤ខែឧសភានេះចំណុចមុខវត្តចក ក្រុងសៀមរាប។
ជនសង្ស័យឈ្មោះ រ៉េត សារួម ភេទប្រុសអាយុ២៣ឆ្នាំ មានទីលំនៅបច្ចុប្បន្នភូមិ ភ្នំក្រោម សង្កាត់សៀមរាប ក្រុងសៀមរាប។
អធិការនគរបាលក្រុងសៀមរាបលោកវរសេនីយ៍ឯកណុប សារ៉ាក់ បានឲ្យដឹងថា
ជនសង្ស័យពាក់ព័ន្ធនឹងករណីអំពើលួចមានស្ថានទម្ងន់ទោស(យកពូថៅគំរាមយកខ្សែករ)។
លោកវរសេនីយ៍ឯកណុប សារ៉ាក់ បានបញ្ជាក់ថាទៅថ្ងៃទី១៤ខែឧសភា ឆ្នាំ២០២០ម៉ោង១៤និង២០នាទី ស្ថិតនៅរោងចាំចំការដាំឈូកក្នុងភូមិ ស្វាយព្រៃ សង្កាត់ ស្វាយដង្គំ ក្រុងសៀមរាប ខេត្ត សៀមរាប ពេលជនរងគ្រោះឈ្មោះស៉ឹង ឡាំងគឿ ភេទ ស្រី អាយុ២០ឆ្នាំ កំពុងនៅនឹងរោងជាមួយប្អូនស្រីឈ្មោះ វ័រ រដ្ឋា អាយុ ១៩ឆ្នាំ ត្រូវជនសង្ស័យឈ្មោះខាងលើ ជិះម៉ូតូ០១គ្រឿង ម៉ាកសង់ស៊េរីចាស់មកឈប់ពីមុខរោងហើយដើរចូលសំដៅមកជនរងគ្រោះនិងប្អូនស្រី រួចជនសង្ស័យបានឃើញពូថៅរបស់ជនរងគ្រោះទុកនៅនឹងជណ្ដើរក៏ស្រាប់តែជនសង្ស័យយកមកកាន់នឹងដៃរួចគំរាមជនរងគ្រោះឲ្យដោះខ្សែករផ្លាទីនតំលៃ១៥០ដុល្លារពីករ តែដោយជនរងគ្រោះដោះយឺតជនសង្ស័យក៏កន្ត្រាក់ដាច់រួច ត្រូវប្អូនជនរងគ្រោះស្រែកឆោឡោថាចោរៗ ជនសង្ស័យរត់ឡើងជិះម៉ូតូត្រូវអ្នកជិតខាងឮ ជិះម៉ូតូដេញតាម ទៅទិសខាងជើងបានប្រហែល៣ គីឡូម៉ែត្រ ជនសង្ស័យភ័យ ក៏គប់ខ្សែករលួចបាននោះចោលតាម ផ្លូវបណ្ដាលឱ្យបាត់ ពេលជនសង្ស័យជិះដល់ត្រង់ចំណុចមុខវត្តចក ត្រូវបងប្អូនប្រជាពលរដ្ឋជិះតាមផ្លូវឃើញនាំគ្នាជួយឃាត់បានប្រគល់ឱ្យសមត្ថកិច្ច។
ជនសង្ស័យក៏ឆ្លើយសារភាពដូចបានរៀបរាប់ខាងលើផងដែរ។ជនសង្ស័យឃាត់ខ្លួននៅប៉ុស្ដិ៍នគរបាល ដើម្បីកសាងសំណុំរឿងបញ្ជូនទៅតុលាការ ធ្វើការផ្ដន្ទាទោសតាមច្បាប់៕SRP

ខេត្តសៀមរាប៖មន្ត្រីជាន់ខ្ពស់ខេត្តសៀមរាបថាការដ្ឋានជួសជុលកែលម្អចំណតយានយន្តផ្សារលើធំថ្មី ដែលគ្រោងនឹងបើកការដ្ឋាននាពេលឆាប់ៗខាងមុខនេះ នឹងបានក្លាយជាចំណែកនៃដំណោះស្រាយការកកស្ទះចរាចរណ៍ សណ្តាប់ធ្នាប់ និងសោភ័ណភាព ឆ្លើយតបទៅនឹងការអភិវឌ្ឍក្រុង បន្ទាប់ពីបានសិក្សារួចរាល់កាលពីអំឡុងឆ្នាំមុននេះ។
លោក ពិន ប្រាកដ អភិបាលរងខេត្តសៀមរាប បានថ្លែងប្រាប់អ្នកសារព័ត៌មានថាការដ្ឋាននេះនឹងត្រូវបានប្រើប្រាស់ថវិកាអាជ្ញាធរខេត្តដែលជាម្ចាស់គម្រោង និងអនុវត្តដោយអាជ្ញាធរក្រុង ក្នុងនោះមន្ទីរសាធារណការនិងដឹកជញ្ជូន ជាសេនាធិការលើការងារបញ្ចេញគំរូប្លង់មេ។
ដោយឡែក លោក នួន ពុទ្ធារ៉ា អភិបាលក្រុងសៀមរាប បានឲ្យដឹងផងដែរថានេះគឺជាការឆ្លើយតបទៅនឹងការវិវត្តរីកចំរើននៃក្រុងទេសចរណ៍វប្បធម៌ប្រវត្តិសាស្រ្ត-អង្គរ ដែលកំពុងមានកំណើននៃការប្រើប្រាស់យានយន្ត យ៉ាងដូច្នេះហើយទើបបញ្ហាសណ្តាប់ធា្នប់សាធារណៈ របៀបរៀបរយសង្គម ចរាចរណ៍ បរិស្ថាន និងសោភ័ណភាព ត្រូវបានស្ថិតនៅក្នុងកម្មវត្ថុនៃការអភិវឌ្ឍស្របតាមនិន្នាការនៃការរីកចំរើន។
យ៉ាងណាក៏ដោយ ការពិនិត្យមើលស្ថានភាពជាក់ស្តែងនៃតំបន់ដែលគ្រោងនឹងបើកការដ្ឋានជួសជុលកែលម្អចំណតយានយន្តនោះ អាចនឹងតម្រូវឲ្យមានការកែសម្រួលខ្លះៗនៅលើគំរូប្លង់មេ ដែលមិនត្រឹមតែធ្វើឲ្យចំណតយានយន្តអាចដំណើរការប្រកបដោយបទដ្ឋានបច្ចេកទេសនោះទេ តែផ្លូវភ្លោះមុខផ្សាលើធំថ្មី អាចនឹងមានភាពធំទូលាយជាងមុន៕SRP

ខេត្តកំពង់ចាម៖ក្នុងពេលចែកកញ្ចប់អាហារ ស្រាយបួស រ៉ាម៉ាឌន  ជូនដល់បងប្អូន ប្រជាពលរដ្ឋ សាសនិកខ្មែរឥស្លាម ចំនួន៤៦០គ្រួសារ នៅក្នុងភូមិទី១៣ឃុំ កោះសូទិនស្រុកកោះសូទិន នៅព្រឹកមិញ លោកអ៊ុន ចាន់ដា បានថ្លែងបន្តថាចំពោះអ្នកជំងឺកូវីដ១៩នៅក្នុង ខេត្តកំពង់ចាម  ដែលមានចំនួន១៦នាក់  ត្រូវបានព្យាបាលជាសះស្បើយអស់ ហើយ។ដោយឡែកអ្នកជំងឺក្នុងប្រទេស កម្ពុជាទាំងមូលដែលមានចំនួន១២២នាក់ក៏បានព្យាបាលជាសះស្បើយ ចំនួន១២០នាក់ហើយដែរ។ទោះជាយ៉ាង នេះក្តីយើងនៅតែមានក្តីព្រួយបារម្ភ  ព្រោះជំងឺដ៏កាចសាហាវមួយនេះដែល មិនទាន់ទៅណាឆ្ងាយពីយើងនៅឡើយទេបើយើងមានការធ្វេសប្រហែស តែ បន្តិចនោះនឹងមានហានិភ័យខ្ពស់ណាស់  ក្នុងការចម្លងវីរុសនេះ  ពីបុគ្គលម្នាក់ទៅបុគ្គលម្នាក់ទៀត  ក្នុងរលកទី២ដូចនៅ បណ្តាប្រទេសលើពិភពលោកដែលនឹងអាចធ្លាក់ចូលទៅក្នុងសភាពធ្ងន់ធ្ងរជាមិនខាន។

លោកអ៊ុន ចាន់ដា ក៏បានស្នើដល់អាជ្ញាធរគ្រប់ មូលដ្ឋាននៅតែបន្តធ្វើការផ្សព្វផ្សាយសារ អប់រំអំពីវិធានការបង្ការទប់ស្កាត់ការឆ្លង រីករាលដាលនៃជំងឺកូវីដ១៩នេះជាបន្ត ទៀតដេីម្បីឲ្យបងប្អូនប្រជាពលរដ្ឋយើង  បន្តការអនុវត្តគម្លាតសុវត្ថិភាពបុគ្គល  និងគម្លាតសុវត្ថិភាពសង្គមនិងប្រេីប្រាស់ម៉ាស់ព្រមទាំងធ្វើអនាម័យជាប្រចាំឲ្យបានគ្រប់ៗគ្នាស្របតាមការណែនាំរបស់ ក្រសួងសុខាភិបាល។

សូមបញ្ជាក់ថាពិធីនេះក៏មានការចូលរួមពីលោកខ្លូត ផនប្រធានក្រុមប្រឹក្សាខេត្ត និងថ្នាក់ដឹកនាំមន្ទីរអង្គភាពពាក់ព័ន្ធ ជុំវិញខេត្តផងដែរ។ដោយក្នុងមួយគ្រូសារទទួលបានអង្ករ១០គីឡូនិងគ្រឿង ឧបភោគបរិភោគ មួយចំនួនមានដូចជា ស្ករសរទឹកដោះគោប្រេងឆានិងទឹកសេរ៉ូ ផងដែរ៕SRP

ខេត្តសៀមរាប៖មន្ត្រីនគរបាលបានថ្លែងថា កម្លាំងនគរបាលខេត្តសៀមរាប បានឃាត់ខ្លួនមនុស្សចំនួន២នាក់ ករណីលួចសម្ភារ។ហេតុការណ៍នៅវេលាម៉ោង១១និង០០នាទីថ្ងៃទី១៣ខែឧសភាឆ្នាំ២០២០ត្រង់ចំណុចផ្ទះសំណាក់យីហោឈារី(ផ្ទះសំណាក់បិទទ្វាទុកចោល) ស្ថិតនៅភូមិត្រពាំសេះ សង្កាត់គោកចក ក្រុង.ខេត្តសៀមរាប។

លោកឧត្តមសេនីយ៍ត្រី ភឹង ចិន្តារ៉េត ស្នងការរង ទទួលផែនការងារនគរបាលព្រហ្មទណ្ឌ ស្នងការខេត្តសៀមរាបបានឲ្យដឹងថា ជនសង្ស័យ០១ឈ្មោះលី ភ័ក្ក ភេទប្រុស អាយុ៣១ឆ្នាំមុខរបររើសអេតចាយ រស់នៅភូមិវាល សង្កាត់គោកចក ក្រុងសៀមរាប ។០២-ឈ្មោះសុង រ៉ាវុធ ភេទប្រុស អាយុ៣៨ឆ្នាំមុខរបរមិនពិតប្រាកដ រស់នៅជុំគ្នា ។ករណីអំពើលួចមានស្ថានទម្ងន់ទោស( គាស់ទម្លុះទម្លាយ )។

លោកឧត្តមសេនីយ៍ត្រី ភឹង ចិន្តារ៉េត បន្ថែមថា ជនសង្ស័យខាងលើ បានធ្វើសកម្មភាពចូលទៅគាស់ទ្វារផ្ទះសំណាក់របស់ជនរងគ្រោះឈ្មោះស្រ៊ុន សុភ័ក្រ្ក ភេទប្រុស អាយុ៤៣ឆ្នាំរស់នៅនៅភូមិត្រពាំសេះ សង្កាត់គោកចក ក្រុង.ខេត្តសៀមរាប។ដោយពួកគេនាំគ្នាលួចវ៉ៃដោះយកគ្រែប្រអប់ធ្វើអំពីឈើ រួចលើកយកមកដាក់រ៉ឺម៉ក ក្នុងពេលធ្វើសកម្មភាពក៏មានអ្នកជិតខាងនៅក្បែរនោះឃើញ ហើយរាយការណ៍ដល់សមត្ថកិច្ច។ លោកបន្តថាក្រោយទទួលបានព័ត៌មាននគរបាលបានចុះឃាត់ខ្លួនមកសាកសួរ។ ជនសង្ស័យទាំងពីរបានសារភាពថាខ្លួន ពិតជាធ្វើសកម្មភាពចូលគាស់ផ្ទះលួចយកសម្ភារខាងលើពិតមែន។លោកបញ្ជាក់ថា ជនសង្ស័យខាងលើគឺជាមុខសញ្ញាទើបនិងចេញពីពន្ធនាគារ។បច្ចុប្បន្ននគរបាលកសាងសំណុំរឿងបញ្ជូនទៅតុលាការដើម្បីចាត់ការតាមផ្លូវច្បាប់៕SRP