ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី នៅព្រឹកនេះបានប្រាប់ប្រជាពលរដ្ឋតាមផេកហ្វេសប៊ុកផ្លូវការរបស់សម្ដេចថា៖ខ្ញុំសូមផ្ញើសាររំលឹកអំពីការចូលរួមទប់ស្កាត់ជំងឺឆ្លងរលាកផ្លូវដង្ហើមកូវីដ១៩ ជាពិសេសនៅថ្ងៃចុងសប្តាហ៍ដែលអាចមានបងប្អូនប្រជាពលរដ្ឋមួយចំនួនធ្វើដំណើរកំសាន្តនៅតាមតំបន់រមណីយដ្ឋាននានាដែលអាចជួបជុំក្រុមមនុស្សច្រើន ឬក៏មានក្រុមគ្រួសារខ្លះនាំកូនចៅទៅទទួលទានអាហារនៅតាមភោជនីយដ្ឋាន​ និងដើរកំសាន្តនៅតាមផ្សារទំនើបតូចធំជាដើម។ នៅតាមផ្សារ ភោជនីយដ្ឋាន ជាពិសេសមន្ទីរពេទ្យត្រូវមានម៉ាស និងមានទឹកអាល់កុល ឬចឹលប្រើប្រាស់អោយបានត្រឹមត្រូវ​និងគ្រប់គ្រាន់ដេីម្បីទប់ស្កាត់ការការឆ្លងរោគ។
សម្ដេចតេជោហ៊ុន សែន បន្តថាចំពោះបងប្អូនប្រជាពលរដ្ឋត្រូវមានម៉ាស ទឹកអាល់កុល ឬចឹលដាក់ជាប់តាមខ្លួនជាប្រចាំ។ ព្រោះជំងឺនេះងាយឆ្លងណាស់។ កុំធ្វេសប្រហែសអោយសោះ ឬគិតលេងៗថាមិនអីទេ ប្រទេសយើងមិនឆ្លងទេ នោះគឺកំពុងប្រថុយនឹងគ្រោះថ្នាក់ធំហើយ។ ជំងឺកូវីដ១៩ដ៏កាចសាហាវនេះកំពុងឆ្លងរាតត្បាតនៅពាសពេញពិភពលោក ដែលមិនទាន់មានថ្នាំព្យាបាលនៅឡើយទេ។ ដូច្នេះគ្រប់គ្នាត្រូវប្រុងប្រយ័ត្នការពារសុខភាព។ បេីមានចម្ងល់ឬបញ្ហាអ្វីមិនច្បាស់អំពីជំងឺកូវីដ១៩ (Covid-19) សូមទូរស័ព្វទៅលេខ ១១៥។សូមជូនពរបងប្អូនជនរួមជាតិធ្វើដំណើរមានសុខសុវត្ថិភាព និងចៀសផុតពីជំងឺឆ្លងកូវីដ១៩​ ទាំងអស់គ្នា៕SRP

ភ្នំពេញ៖លោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារបានឲ្យដឹងនៅព្រឹកនេះថានៅថ្ងៃទី០៧ខែមិថុនាឆ្នាំ២០២០នេះ ស្ពានស្ទឹងស្ដៅ ស្ថិតក្នុងភូមិសុច ឃុំស្ដៅ ស្រុកសង្គមថ្មី ខេត្តព្រះវិហារ ឆ្ពោះទៅកាន់ដែនអភិរក្សសត្វព្រៃភ្នំត្នោត ភ្នំពក ត្រូវបានដាក់អោយប្រជាពលរដ្ឋឆ្លងជាបណ្ដោះអាសន្នហើយបន្ទាប់ពី មន្ទីរសាធារណការ និងដឹកជញ្ជូនខេត្តព្រះវិហារ ស្ថាបនារួចរាល់១០០% នៅថ្ងៃរសៀលម្សិលមិញនេះ។
សូមរំលឹកថាលោកមាស សុភា ទេសរដ្ឋមន្ត្រីទទួលបន្ទុកបេសកកម្មពិសេស ប្រធានក្រុមការងាររាជរដ្ឋាភិបាលចុះជួយមូលដ្នានខេត្តព្រះវិហារ និងលោក ប្រាក់ សុវណ្ណ អភិបាលខេត្តព្រះវិហារ នៅនៅថ្ងៃទី០៥ខែមិថុនាឆ្នាំ២០២០កន្លងទៅថ្មីៗនេះ បាន​ចុះ​ទៅ​ពិនិត្យ​មើល​ការ​ដ្ឋាន​សាង​សង់​ស្ពានស្ទឹងស្ដៅ។
លោកទេសរដ្ឋមន្ត្រី បាន​គូស​បញ្ជាក់​ថា ការ​សាង​សង់​ស្ពានស្ទឹងស្ដៅថ្មី​នេះ គឺ​ដើម្បី​បង្ហាញ​ពី​ការយកចិត្តទុកដាក់ និង​ការ​រួប​រួមសាមគ្គីរឹងមាំរបស់ថ្នាក់ដឹកនាំគ្រប់លំដាប់ថ្នាក់ មានថ្នាក់ជាតិ និងថ្នាក់ក្រោមជាតិ ដល់ប្រជាពលរដ្ឋនៅមូលដ្ឋាន។ ប៉ុន្តែ​ស្ពានស្ទឹងស្ដៅថ្មី​នេះ នៅមិន​ទាន់​កំណត់​កាល​បរិច្ឆេទ​សម្ពោធ​នៅ​ឡើយ​ទេ ដោយ​សារ​តែ​ជំងឺ​កូវីដ​១៩​។
សូមបញ្ជាក់ថាស្ពានដែកបេឡេត៍ថ្មីឆ្លងស្ទឹងស្តៅនេះមានប្រវែង៤៨ម៉ែត្រគុណ៤,២០ម៉ែត្រ គឺមានការជួយឧបត្ថម្ភដែកស្ពានបេឡេត៍ពី លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ឧបត្ថម្ភឈើក្រាលស្ពានដោយ លោក សាយ សំអាល់ រដ្ឋមន្ត្រីក្រសួងបរិស្ថាន និងឧបត្ថម្ភសរសរដែកស្ពានដោយ លោក ទេសរដ្ឋមន្ត្រី មាស សុភា និងលោក ប្រាក់ សុវណ្ណ ហើយអនុវត្តការងារសាងសង់ ដោយមន្ទីរសាធារណការ និងដឹកជញ្ជូនខេត្តព្រះវិហារ មិនមានថវិកា របស់សប្បុរសជនណាផ្សេងនោះទេ៕SRP

ខេត្តកំពង់ធំ៖មនុស្សចំនួន២២នាក់ត្រូវបានឃាត់ខ្លួន ករណីបង្ក្រាបទីតាំងលេងល្បែងស៊ីសង។ហេតុការណ៍ធ្វើឡើង

នៅថ្ងៃទី០៥ខែមិថុនាម្សិលមិញ នៅចំណុចផ្ទះរបស់ ឈ្មោះ ស៊ិន ណាវី ភេទស្រី អាយុ៥១ឆ្នាំ ជនជាតិខ្មែរនៅភូមិគ្រើល ឃុំអណ្តូងពោធិ៍ស្រុកតាំងគោកខេត្តកំពង់ធំ។

ការបង្ក្រាបដឹកនាំដោយលោក វរសេនីយ៍ទោ ស សុបិន្ត ជា នាយការិយាល័យនគរបាលព្រហ្មទណ្ឌកម្រិតស្រាល នៃស្នងការខេត្តកំពង់ធំ និងបានសហការ ជាមួយកម្លាំងអធិការដ្ឋាននគរបាលស្រុកតាំងគោក ដែលដឹកនាំដោយ វរសេនីយ៍ឯក សន តាល់ ក្រោមបញ្ជារបស់លោក សាយ វាសនា ព្រះរាជអាជ្ញារង អាយ្យការអមសាលាដំបូងខេត្តកំពង់ធំ។

សមត្ថកិច្ចបានឲ្យដឹងថាការចុះបង្ក្រាបល្បែងស៊ីសងខុសច្បាប់ ដែលមានភ្នាល់ចាក់លុយជល់មាន់ តាមទូរទស្សន៍អនឡាញ និងល្បែងអាប៉ោង បុកប៊ីយ៊ា នៅចំណុចផ្ទះខាងលើ សមត្ថកិច្ចបានឃាត់ខ្លួនមនុស្ស ២២នាក់ និងស្រី០១នាក់ ដែលជាម្ចាស់ផ្ទះ។

ប្រតិបត្តិការនេះដកហូតវត្ថុតាងរួមមាន៖
១- មធ្យោបាយម៉ូតូចំនួន២២គ្រឿង
២- មេអាប៉ោងចំនួន ០៤គ្រាប់
៣- គំរបចានអាប៉ោង ចំនួន ០១
៤- ហាន់តោ ចំនួន ០១
៥- គ្រាប់ ប៊ីយ៊ា ចំនួន ៣២ គ្រាប់
៦- ដងកឺ ឬឈើសម្រាប់បុក ចំនួន ០៦
៧- ប្រដាប់រៀបកូនប៊ីយ៉ាចំនួន ០១
៨- ទូរស្សន៍ ចំនួន ០២ គ្រឿង
៩- សន្លឹកបៀរចំនួន ១៤៩ សន្លឹក។ វត្ថុតាង និងមនុស្សអ្នកលេង សមត្ថកិច្ចបានបញ្ជូនទៅស្នងការដ្ឋាននគរបាលខេត្តកំពង់ធំ ៕SRP

ខេត្តព្រៃវែង៖ទីតាំងជល់មាន់និងល្បែងអាប៉ោងដ៏ធំមួយកន្លែងក្នុងផ្ទះវីឡា ស្ថិតនៅភូមិស្វាយសាក់ ឃុំពោធិ៍ទី ស្រុកស៊ីធរកណ្ដាល មិនទាន់ត្រូវបានអាជ្ញាធរសមត្ថកិច្ចចុះបង្ក្រាបនៅឡើយទេ។

ប្រការដែលអាជ្ញាធរសមត្ថកិច្ចខេត្តព្រៃវែង មិនទាន់ចុះបង្ក្រាបបែបនេះទំនងម្ចាស់ទីតាំងល្បែងខាងលើបានរត់ការជាមួយអាជ្ញាធរសមត្ថកិច្ចតាំងពីថ្នាក់ក្រោមរហូតដល់ថ្នាកលើអស់ហើយ ទើបរក្សាភាពស្ងប់ស្ងាត់យ៉ាងដូច្នេះ។

មានការលើកឡើងថាទីតាំងសង្វៀនជល់មាន់និងអាប៉ោងនេះអាចបើកលេងបានរយ៉ាងរលូនជាច្រើនថ្ងៃមកហើយដោយមិនខ្លាចញញើតទៅនឹងអាជ្ញាធរសមត្ថកិច្ចបន្តិចសោះឡើយ។

ពាក់ព័ន្ធករណីនេះប្រជាពលរដ្ឋបានសូមសំណូមពរដល់ លោកជា សុ មេធី អភិបាលខេត្តព្រៃវែង និងលោកឧត្តមសេនីយ៍ព្រុំ សន្ធរ ស្នងការខេត្តព្រៃវែង ជួយចាត់វិធានការណ៍បង្រ្កាបទៅលើទីតាំងសង្វៀនជល់មាន់និងអាប៉ោង ខាងលើនេះផង ដើម្បីភូមិឃុំមានសុវត្ថិភាពទាំង០៩ចំណុច ចៀសវាងមានអំពើចោរកម្មកើតឡើងក្នុងមូលដ្ឋានរបស់ពួកគាត់៕SRP

ខេត្តកំពង់ធំ៖បុរសម្នាក់ត្រូវបានរន្ទះបាញ់សម្លាប់នៅស្រុកសន្ទុក
ករណីនេះបានកើតឡើងនៅថ្ងៃទី០៥ខែមិថុនាឆ្នាំ២០២០ វេលាម៉ោង១៨និង១៥នាទីនៅភូមិទីពោ ឃុំទីពោ ស្រុកសន្ទុក ខេត្តកំពង់ធំ។
តាមរបាយការណ៍ពីសមត្ថកិច្ចបានឲ្យដឹងថាមុនពេលកើតហេតុនៅពេលមេឃ កំពុងមានភ្លៀង ផ្គរ រន្ទះ និងខ្យល់កន្ត្រាក់ ជនរងគ្រោះបានទៅបិទច្រកទ្វារក្រោលគោដែលបានបញ្ចូលរួច ហើយ ពេលកំពុងតែបិទនោះស្រាប់តែត្រូវរន្ទះបាញ់តែម្តង។
ជនរងគ្រោះឈ្មោះ ខៀវ អួន ភេទប្រុស អាយុ៦៣ឆ្នាំ រស់នៅភូមិទីពោ ឃុំទីពោ ស្រុកសន្ទុកខេត្តកំពង់ធំ៕SRP

ភ្នំពេញ៖លោកនាយឧត្តមសេនីយ៍ សៅ សុខា អគ្គមេបញ្ជាការរង និងជាមេបញ្ជាការកងរាជអាវុធហត្ថលើផ្ទៃប្រទេស បានបង្ហាញការគាំទ្រយ៉ាងខ្លាំងចំពោះចំណាត់ការរបស់សមត្ថកិច្ច ដែលចាប់ខ្លួនមន្ត្រីអាវុធហត្ថម្នាក់នៅខេត្តតាកែវ ពាក់ព័ន្ធនឹងករណីគ្រឿងញៀន និងជំរុញឱ្យស្វែងរកអ្នកពាក់ព័ន្ធ។
នៅរសៀលថ្ងៃទី៥ខែមិថុនា ម្សិលមិញ នាយឧត្តមសេនីយ៍ សៅ សុខា បានបញ្ជាក់យ៉ាងដូច្នេះថាជនល្មើសត្រូវតែបង្ក្រាបជាដាច់ខាត ទោះបីពាក់ឯកសណ្ឋានជាកម្លាំងសមត្ថកិច្ចអ្វីក៏ដោយ ក្នុងនោះអាវុធហត្ថត្រូវតែសំអាតមុនគេ ព្រោះជាមន្ត្រីប្រតិបត្តិច្បាប់ គ្មានយោគយល់អីទេ ហើយបើស្រាវជ្រាវរកឃើញពាក់ព័ន្ធ នរណាដែលមានភស្តុតាងច្បាស់លាស់ ត្រូវអនុវត្តច្បាប់ចំពោះជននោះទាំងអស់ ខ្ញុំស្អប់ពួកអាគ្រឿងញៀននេះណាស់ គ្មានការយោគយល់ គ្មានអាណិតអាសូរទេ គុណសម្បត្តិធ្លាប់មានកុំយក មកទូទាត់ជាមួយគុណវិបត្តិ ដាច់ខាតត្រូវតែបង្ក្រាប។

ការប្រកាសរបស់លោក សៅ សុខា បែបនេះបានធ្វើឡើងក្រោយមានករណីបង្ក្រាបករណីជួញដូរគ្រឿងញៀន ដោយដកហូតបានគ្រឿងញៀនជាង ០២គីឡូក្រាម កាំភ្លើង០២ដើម និងចាប់ខ្លួនប្រធានការិយាល័យគ្រឿងញៀន នៃអាវុធហត្ថខេត្តតាកែវ ជាមួយបក្ខពួកម្នាក់ទៀត ដែលជាអ្នកប្រព្រឹត្តបទល្មើសនេះ។

យោងតាមរបាយការណ៍របស់សមត្ថកិច្ចបានឲ្យដឹងថា ប្រតិបត្តិការនេះធ្វើនៅថ្ងៃទី០៤ខែមិថុនាឆ្នាំ២០២០ នៅចំណុចច្រមុះជ្រួកស្ទឹងមានជ័យ ខណ្ឌមានជ័យ រាជធានីភ្នំពេញ។
ជនសង្ស័យមាន៖ទី១-ឈ្មោះ ឈុន សុមេធា តួនាទីជា នាយការិយាល័យប្រឆាំងគ្រឿងញៀន នៃទីបញ្ជាការដ្ឋានកងរាជអាវុធហត្ថខេត្តតាកែវ ពាក់ស័ក្ដិ៤ រស់នៅភូមិកំពង់ហ្លួង ឃុំអង្គរបូរី ស្រុកអង្គរបូរី ។ទី២-ឈ្មោះ កេន ចាន់រី  ភេទស្រី ភូមិគោកដូង ឃុំពេជសា ស្រុកកោះអណ្តែត ខេត្តតាកែវ។

ក្រោយឃាត់ខ្លួនកម្លាំងមន្ទីរប្រឆាំងគ្រឿងញៀន បានពន្លាតដែនដី ដោយសហការជាមួយស្នងការដ្ឋាននគរបាលខេត្តតាកែវ ក្រោមការសម្របសម្រួលពីព្រះរាជអាជ្ញាអមសាលាដំបូងរាជធានីភ្នំពេញ និងខេត្តតាកែវ បន្ដទៅឆែរឆេរទីតាំងពីរកន្លែងទៀត ដោយមួយទីតាំងនៅផ្ទះជួលរបស់ជនសង្ស័យរកឃើញផ្លាកលេខម៉ូតូចំនួន០៣ និងទីតាំងទីពីរនៅផ្ទះរបស់សង្ស័យផ្ទាល់តែម្ដង ក្នុងស្រុកអង្គរបូរី រកឃើញអាវុធខ្លីអត់ច្បាប់ ០២ដើម កញ្ឆាមួយចំនួន និងប្រដាក់ថ្លឹងគ្រឿងញៀនមួយចំនួនផងដែរ។បច្ចុប្បន្នជនសង្ស័យ កម្លាំងសមត្ថកិច្ចជំនាញកំពុងធ្វើការសួរនាំ ដើម្បីបញ្ជូនទៅចាត់ការបន្ដតាមនីតិវិធី៕SRP

ខេត្តកំពង់ចាម៖ក្រុមការងារត្រួតពិនិត្យ ការដាក់តាំងផ្សព្វផ្សាយផ្សេងៗ ខេត្តកំពង់ចាម​ នាព្រឹក​ថ្ងៃ​ទី​០៥​ខែមិថុនា​ ឆ្នាំ​២០២០​ ម្សិលមិញ​នេះ​ បានចុះត្រួតពិនិត្យស្លាកយីហោអាជីវកម្ម​ ក្នុងក្រុងកំពង់ចាម។
លោក​ ឈាង​ បូរិន​ ប្រធាន​មន្ទីរ​ពាណិជ្ជកម្ម​ខេត្ត​កំពង់ចាម​ បាន​ឲ្យដឹង​ថា​ គោលបំណងដែលក្រុមការងារចុះត្រួតពិនិត្យនេះ​
១.ស្លាកអាជីវកម្មដែលបានលើកជាភាសាបរទេស ដែល មិនត្រឹមត្រូវតាមច្បាប់កំណត់។
២.ត្រួតពិនិត្យអាជ្ញាប័ណ្ណអាជីវកម្ម និងវិញ្ញាបនប័ត្រចុះបញ្ជី ពាណិជ្ជកម្ម។ ៣.ជំរុញលើកស្លាកអាជីកម្មឲ្យបានត្រឹមត្រូវតាមច្បាប់កំណត់ និងជំរុញឲ្យអាជីកម្មមិនទាន់មានអាជ្ញាប័ណ្ណ ឬវិញ្ញាបនប័ត្រចុះបញ្ជីពាណិជ្ជកម្ម ឲ្យមកសុំច្បាប់ឲ្យបានត្រឹមត្រូវ។
លោក​ ឈាង​ បូរិន​ បាន​បន្តថា​ ការ​ចុះ​អនុវត្ត​នេះ​ ក្រុមការងារបានត្រួតពិនិត្យអាជីវកម្ម​ ចំនួន០៨ទីតាំង​ ដែលសរសេរជាភាសាបរទេស ក្នុងនោះ១ទីតាំងមានច្បាប់អនុញ្ញាតត្រឹមត្រូវ ចំណែក៧ទីតាំងផ្សេងទៀត​ មិនទាន់បានសុំច្បាប់អនុញ្ញាតប្រកបអាជីវកម្ម និងសរសេរជាភាសាបរទេសដែលមិនត្រឹមត្រូវតាមច្បាប់កំណត់។​
លោក​ប្រធាន​មន្ទីរ​បាន​បញ្ជាក់​ថា​ ក្នុង​ការ​ចុះ​អនុវត្ត​នេះ​ដែរ​ ក្រុមការងារបានពន្យល់ណែនាំ​ អំពីច្បាប់ ការលើកស្លាកអាជីវកម្មអនុលោមតាមច្បាប់ ព្រមទាំងជំរុញឲ្យគាត់សុំអាជ្ញាប័ណ្ណប្រកបអាជីវកម្ម ឲ្យបានឆាប់ និងកែសម្រួលស្លាកយីហោអាជីវកម្ម ឲ្យបានត្រឹមត្រូវតាមច្បាប់កំណត់ និងធ្វើកិច្ចសន្យាដោយទុករយៈពេល ៣០ថ្ងៃ​ ក្នុងការសុំអាជ្ញាប័ណ្ណប្រកបអាជីវកម្ម និងកែសម្រួលស្លាកយីហោឲ្យបានត្រឹមត្រូវ។​
ជាមួយ​គ្នា​នោះ​ ម្ចាស់អាជីវកម្មទាំង៧ទីតាំង បានសន្យាអនុវត្តតាមកិច្ចសន្យា​ ដែលបានកំណត់ និងអរគុណដល់ក្រុមការងារបានណែនាំ ពីការប្រកបអាជីវកម្មដែលអនុលោមតាមច្បាប់​ផងដែរ​៕SRP

ភ្នំពេញ៖សម្ដេចតេជោ ហ៊ុន សែន នាយករដ្ឋមន្ត្រី បានបង្ហោះសារថាខ្ញុំសូមរំឮកដាស់តឿនដល់បងប្អូនជនរួមជាតិទូទាំងប្រទេស សូមមានការប្រុងប្រយ័ត្នខ្ពស់ជាប់ជានិច្ចចំពោះជំងឺឆ្លងផ្លូវដង្ហើមកូវីដ១៩ ដែលកំពុងរាតត្បាតនៅក្នុង២១៦ប្រទេសនៅទូទាំងពិភពលោក។ កូវីដ១៩ ជាជំងឺឆ្លងរាតត្បាតដ៏កាចសាហាវបំផុត ដែលពុំទាន់មានថ្នាំព្យាបាលនៅឡើយទេ។ កូវីដ១៩ បានបន្តឆ្លង និងសម្លាប់មនុស្សជារៀងរាល់ថ្ងៃ។ ទោះអត្រាឆ្លងរោគកូវីដ១៩ នៅកម្ពុជាយើងមានកម្រិតទាប ហើយចំនួនអ្នកព្យាបាលបានជាសះស្បើយច្រើនមែន ក៏ប៉ុន្តែយើងមិនត្រូវបណ្តោយខ្លួនធ្វេសប្រហែសមើលស្រាលលើជំងឺឆ្លងរាតត្បាតមួយនេះដាច់ខាត។ សូមដាក់តាមខ្លួនជាប់ជាប្រចាំនូវម៉ាស នឹងលាងសម្អាតដៃជាមួយសាប៊ូ ទឹកអាល់កុល និងចឹល។

សូមអាជ្ញាធរនិងសមត្ថកិច្ចទទួលខុសត្រូវបន្តពិនិត្យទៅតាមភោជនីយដ្ឋាន ផ្សារតូចធំ ទីកន្លែងប្រជុំជន និងកន្លែងបណ្តុំក្រុមមនុស្សច្រើន អំពីការអនុវត្តន៍អនាម័យប្រចាំថ្ងៃ ដែលត្រូវតែមានទឹកអាល់កុល នឹងចឹលលាងដៃសម្រាប់អតិថិជន ជាពិសេសគឺនៅតាមក្លីនិកព្យាបាលជំងឺ និងមន្ទីរពេទ្យគឺត្រូវតែមានចឹល ឬទឹកអាល់កុល និងម៉ាសសម្រាប់មនុស្សចេញចូលក្នុងមន្ទីរពេទ្យប្រើប្រាស់ ដើម្បីការពារការឆ្លងរាលដាលមេរោគពីម្នាក់ទៅម្នាក់បានដោយសារតែការធ្វេសប្រហែសគ្មានការប្រុងប្រយ័ត្ន។

សូមបងប្អូនជនរួមជាតិបន្តសហការជាមួយក្រសួងសុខាភិបាល មន្ទីរពេទ្យ នឹងរាយការណ៍ជាបន្ទាន់មកលេខ ១១៥ ប្រសិនបើមានការសង្ស័យណាមួយអំពីជំងឺឆ្លងកូវីដ១៩។ ហើយសូមតាមដាននិងស្តាប់តាមការណែនាំរបស់ក្រសួងសុខាភិបាលជាប្រចាំអំពីវិធីទប់ស្កាត់ការឆ្លងជំងឺកូវីដ១៩។

សូមអរគុណដល់អ្នកសាព័ត៌មាន វិទ្យុ ទូរទស្សន៍ និងភ្នាក់ងារផ្សព្វផ្សាយអនឡាញ ដែលបានចូលរួមផ្សព្វផ្សាយព័ត៌មានកូវីដ១៩ទាន់ហេតុការណ៍ និងអំពីវិធីទប់ស្កាត់ការឆ្លងជំងឺកូវីដ១៩ នៅទូទាំងប្រទេស៕SRP

ខេត្តសៀមរាប៖សេចក្ដីរាយការណ៍បានឲ្យដឹងថាស្ត្រីម្នាក់ត្រូវបានគោយន្តកន្រ្តៃបុកបណ្ដាលឲ្យស្លាប់។
ហេតុការណ៍បានកើតឡើងវេលាម៉ោង៧និង២០នាទីថ្ងៃទី០៥ខែឧសភាឆ្នាំ២០២០នៅលើផ្លូវលំក្រាលកៅស៊ូក្នុងភូមិស្រះ ឃុំរើល ស្រុកពួក ខេត្តសៀមរាប។
សមត្ថកិច្ចបានឲ្យដឹងថាករណីគ្រោះថ្នាក់ចរាចរណ៍នេះរវាងគោយន្តកន្រ្តៃនិងមនុស្សដើរ។ គោយន្តកន្រ្តៃម៉ាកគូបូតាពណ៌ក្រហមបើកបរដោយឈ្មោះចក់ ខេន ភេទប្រុស អាយុ៣០ឆ្នាំរស់នៅភូមិត្រពាំងប្ញស្សី ឃុំរើល ស្រុកពួក ខេត្តសៀមរាប។ បើកបរទិសដៅពីត្បូងទៅជើងបានបុកនិងជនរងគ្រោះឈ្មោះសុិន សែត ភេទស្រី អាយុ៨៣ឆ្នាំ រស់នៅភូមិស្រះ ឃុំរើល ស្រុក ពួក ខេត្តសៀមរាប។ បានដើរឆ្លងផ្លូវ បណ្តាលអោយ(ស្លាប់)។
សមត្ថកិច្ចថាមូលហេតុជនរងគ្រោះឆ្លងផ្លូវខ្វះការប្រុងប្រយ័ត្ន។ ក្រោយកើតហេតុសមត្ថកិច្ចបានចុះទៅវាស់វែងធ្វើកំណត់ហេតុផងដែរ៕SRP

ភ្នំពេញ៖ សម្តេចតេជោ ហ៊ុន សែន ប្រធាន គណបក្សប្រជាជនកម្ពុជា និងជានាយករដ្ឋមន្ត្រីកម្ពុជា នៅព្រឹកមិញបានអញ្ជើញពិនិត្យអគារទីស្នាក់ការកណ្តាល គណបក្សប្រជាជនកម្ពុជា ស្ថិតនៅតាមបណ្តោយវិថីព្រះនរោត្តម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

អគារថ្មីរបស់គណបក្សប្រជាជនកម្ពុជា គឺបានសង់ឡើងនៅលើផ្ទៃដីទីតាំងអគារគណបក្សចាស់ ដែលមានទំហំដីប្រមាណ ១.៦ហិកតា ដែលមានកម្ពស់៥ជាន់។ ទំហំសំណង់អាគារគឺប្រមាណ ៥០,០០០ម៉ែត្រក្រឡា ដែលពេលនេះសាងសង់បាន៩៥%ហើយ។ អគារដ៏ធំស្កឹមស្កៃនេះត្រូវបានសាងសង់ឡើងរំលេចដោយក្បូរក្បាច់រចនាបថខ្មែរដ៏ល្អវិចិត្រ និងមានសោភ័ណភាពល្អប្រណិតទាក់ទាញចំណាប់អារម្មណ៍យ៉ាងខ្លាំងពីសាធារណៈជន។

ការកសាងអគារនេះត្រូវបានធ្វើពិធីបញ្ចុះបឋមសិលាសាងសង់នៅថ្ងៃទី១១ ខែវិច្ឆិកា ឆ្នាំ២០១៨ ក្រោមអធិបតីភាពរបស់សម្ដេចវិបុលសេនាភក្តី សាយ ឈុំ ។ អគារនេះមានបណ្ដោយ១៥០ម៉ែត្រ, ទទឹង៧៤ ម៉ែត្រ, កម្ពស់អគារគិតអំពីទីលានមហាជនខាងមុខរហូតទៅដល់កំពូលពេជ្រ មានកម្ពស់៤៨ម៉ែត្រ។ ជាន់ផ្ទាល់ដីមានចំណតរថយន្តជាង៥០០ចំណត និងទីធ្លាមុខអាគារសម្រាប់មហាជនយើងអាចចតរថយន្តបាន៣០០គ្រឿង។ នៅជាន់លើគឺមានសាលសម្រាប់ប្រជុំជាលក្ខណៈមហាជន ឬក៏មិទ្ទិញបានចំនួនប្រមាណជា១ម៉ឺននាក់។

អគារនេះមានកម្ពស់០៥ ជាន់ ដោយមានសាលបដិសណ្ឋារកិច្ច ដែលមានក្រឡាផ្ទៃប្រមាណ ៣ពាន់ម៉ែត្រក្រឡា ដែលអាចដាក់មនុស្សអង្គុយបានប្រមាណជាង៤,០០០នាក់, មានអាហារដ្ឋាននៅផ្នែកខាងត្បូងអាគារ ដែលអាចដាក់មនុស្សបានចំនួន១២០នាក់ក្នុងមួយពេល។ អគារនេះមានបន្ទប់សោតទស្សន៍ បន្ទប់កាត់សក់ បន្ទប់រដ្ឋបាល មានបន្ទប់សម្រាប់ជនពិការ មានបន្ទប់ឃ្លាំង មានបន្ទប់សម្រាប់កងការពារ បន្ទប់ប្រជុំគណៈប្រចាំការ និងបន្ទប់ប្រជុំអន្តរជាតិ មានការិយាល័យសម្រាប់សម្រាក និងការិយាល័យសម្រាប់សម្ដេចប្រធានកិត្តិយស ការិយាល័យសម្រាប់ប្រឹក្សាគណៈអចិន្ត្រៃយ៍ ការិយាល័យដែលជាសាលសមាជិកអចិន្ត្រៃយ៍ និងបន្ទប់ទទួលទានអាហារ។ អគារនេះក៏មានសាលលៀងយភោជន៍ដាក់មនុស្សបាន១៥០នាក់ និងបន្ទប់រៀបចំអាហារ។ ចំណែកនៅជាន់ទី៥ មានសាលប្រជុំធំ ដែលមានចំនួនកៅអីអាចដាក់បានប្រមាណ ៣,៤៧៤ នាក់ មានទីសម្រាកនៅសងខាងដែលអាចដាក់មនុស្សបាន ៣៤៧០ នាក់ផងដែរ។

ចំពោះសោភ័ណភាពនៃការឌីហ្សាញអាគារនេះជារួមគឺមានរចនាបថថ្មីហៅថា រចនាបថរួមសម័យដោយសារមានរចនាបទបីរួមចូលគ្នាគឺ ទី១)រចនាបថប្រាសាទអង្គរវត្ត ទី២) រចនាបថបន្ទាយស្រី និងទី៣) រចនាបថកណ្ដាល ហើយបានរួមបញ្ចូលគ្នាយើងហៅថា “ រចនាបថរួមសម័យ” ។ វត្តមានអគារដ៏ធំស្កឹមស្កៃនេះគឺបង្ហាញឱ្យឃើញពីភាពរឹងមាំ និងជានិមិត្តរូបនៃការរួបរួម សាមគ្គីភាព និងភាពរុងរឿងដ៏អស្ចារ្យរបស់គណបក្សប្រជាជនកម្ពុជា ដែលជាបង្អែកមិនអាចខ្វះបានសម្រាប់ជាតិ និងប្រជាជនកម្ពុជាតាំងពីអតីតកាល បច្ចុប្បន្ន និងទៅអនាគតកាល៕SRP

ខេត្តកំពង់ចាម​​៖គម្រោង​មូលនិធិ​ឃុំ​-សង្កាត់​ឆ្នាំ២០២០ របស់​គណៈកម្មការ​ជាតិ​សម្រាប់​ការអភិវឌ្ឍន៍​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​ ក្នុង​ការ​ជួសជុល​ និង​សាងសង់​ផ្លូវ​នៅ​តាម​មូលដ្ឋាន​ ដែល​បាន​ដាក់​ឲ្យ​​ដេញ​ថ្លៃ​ ផ្លូវ​ចំនួន៥គម្រោង​ ស្មើ​នឹង​៤ឃុំ​ កាលពី​ព្រឹក​ថ្ងៃ​ទី​៥​ខែ​មិថុនា​ឆ្នាំ​២០២០​ នៅ​សាលា​ស្រុក​ចំការ​លើ​​ ខេត្ត​កំពង់ចាម​​​ ត្រូវបាន​ដំណើរការ​យ៉ាង​រលូន​ ដោយតម្លៃធ្លាក់ចុះប្រមាណជា៥០% ដោយ​​ចំណេញ​​ថវិកា​រដ្ឋ​នៅ​សល់​ច្រើន​ ខណៈដែល​ប្រពលរដ្ឋ​កំពុងតែ​ ទន្ទឹងរង់ចាំ​ការ​ស្ថាបនា​ ​ពីផ្លូវ​ដី​ទៅ​ជា​ផ្លូវ​បេតុង​នៅក្នុង​មូលដ្ឋាន​។

គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​៥ខ្សែ​ ដែល​ត្រូវ​ស្ថាបនា​​ ជូន​ប្រជាពលរដ្ឋ​សម្រាប់​ប្រើប្រាស់​ ក្នុង​នោះ​មាន​ នៅឃុំ​តាអុង​ មាន​ការ​សាងសង់​ផ្លូវ​បេតុង​អាមេ​១ខ្សែ​ នៅ​ឃុំ​ជយោ​ សាងសង់​ផ្លូវ​បេតុង​អាមេ​១ខ្សែ​ និង​ជួសជុល​ផ្លូវ​ដី​ក្រាល​គ្រួស​ក្រហម​១ខ្សែ​ ឃុំ​ចំការ​អណ្តូង​សាងសង់​ផ្លូវ​បេតុង​អាមេ​១ខ្សែ​ និង​ឃុំ​បុស​ខ្នុរ​សាងសង់​ផ្លូវ​បេតុង​អាមេ​១ខ្សែ​ ផង​ដែរ​។
ដោយការ​ដេញ​ថ្លៃ​​គម្រោង​សាងសង់​ផ្លូវ​ទាំង​៥ខ្សែ​ខាង​លើ​ ត្រូវ​បាន​ដំណើរ​ការ​ដោយ​រលូន​ និង​តម្លៃ​ធ្លាក់​ចុះ​ច្រើន​ផង​នោះ​ ដូច្នេះ​ប្រធាន​គណៈ​កម្មាការ​ម្ចាស់​លទ្ធកម្ម​ឃុំ​ទាំង​៤ឃុំ បាន​ធ្វើការ​ប្រកាស​ទទួល​យក​ដោយ​រីករាយ​ ព្រមទាំង​បាន​ធ្វើការ​ផ្តាំផ្ញើរ​ថា​ ​ក្រុមហ៊ុន​​អ្នក​ទទួល​ការ​ទាំង​អស់​ ត្រូវ​អនុវត្តន៍​ការងារ​សាងសង់​ផ្លូវ​ ឲ្យ​មាន​គុណភាពល្អ​ ​និង​ត្រូវ​តាម​ស្តង់ដារ​ ​លក្ខណៈ​បច្ចេកទេស​​​ ប្រយោជន៍​ដល់​ការ​ប្រើប្រាស់​ របស់​ប្រជាពលរដ្ឋ​ ដែល​កំពុងតែ​ទន្ទឹង​រង់ចាំ​ផងដែរ​៕SRP

ខេត្តសៀមរាប៖សមត្ថកិច្ចបានឲ្យដឹងថាបុរសម្នាក់ ចុកពោះរហូតស្លាប់។ហេតុការណ៍បានកើតឡើងនៅវេលា​ម៉ោង១១និង៣០នាទី​ថ្ងៃទី០៤ខែមិថុនាឆ្នាំ២០២០​ នៅភូមិព្រះអង្គធំ​ ឃុំខ្នងភ្នំ ស្រុក​ស្វាយលើ។

សមត្ថកិច្ចបានបន្តថាជនរងគ្រោះ ឈ្មោះ​ហ៊ីង​ ហេង អាយុ៤៦ឆ្នាំ​មុខរបរ​លក់ដូរ នៅភូមិព្រះអង្គធំ​ ឃុំខ្នងភ្នំ ស្រុក​ស្វាយលើ។បើតាមសមត្ថកិច្ចបញ្ជាក់ថាមូលហេតុជនរងគ្រោះចុកពោះ​​រហូតដល់ស្លាប់តែម្ដង។ ក្រោយកើតហេតុសមត្ថកិច្ចចុះពិនិត្យនិងបានប្រគល់សាកសពឲ្យក្រុមគ្រួសារធ្វើបុណ្យតាមប្រពៃណី៕SRP